今日，全公司彌漫著一份淒涼的愁情。老細禮拜頭去左旅行，今晚搭飛機返到香港，即係聽日朝頭早會見番佢，回歸正常返工日子。一諗到呢度，成間公司都好唔開心。所以今朝我都好唔情願噉八點九先起到身。（「．．．咪扮野啦．．．」）

我地公司指定早餐食品係午餐肉，總之你食早餐的話唔整舊餐肉落去就會比人歧視，所以你見呢幾日老細唔係度班友自已整早餐都係整餐肉治。而我地公司之最常食之早餐就係餐蛋治，除左劉Sir果舊係「三塊麵包四塊芝士夾半罐午餐肉終極致命雙層芝士餐肉孖堡」之外。但係餐蛋治又分成兩派：經理派同會計派。經理同會計兩個叫兩間唔同茶餐廳，
經理：「我叫果間先係皇道！我係呢間公司做左咁多年，淨係食呢間茶餐廳ｄ餐蛋治！」
會計：「我果間先正！收皮啦你經理！」（冇錯，咪睇我地個會計咁靚，一開口就鬼死咁粗俗成個男人／劉Sir噉，仲要經理面前都係咁目無尊長冇大冇細（但查實我地ｄ經理不嬲都係比人玩冇乜地位架啦））（但係又唔怪得晒佢既，即係劉Sir仲未入黎呢間公司做即係佢仲未比劉Sir教壞之前，會計姐姐的確係好鬼斯文好鬼純品架，點似得而家成個劉Sir噉收皮前收嗲後鬼咁俗係差粗口未爆到出口）
呢個爭拗，經歷左千秋萬世依然未結。為左天下太平，今日就等最公正之劉Sir為大家平息呢個餐蛋之爭！今朝即每間叫一個餐蛋治，即場試食證明到底邊間好食ｄ！（幾無聊！）

冇錯。其實結果係點，邊舊餐蛋治好食ｄ，經理定靚女精明ｄ／戇居ｄ，唔重要，重要係
「你班友真係好鬼得閒！」
同埋
「癲架呢間公司！！！」

食完（兩）個餐蛋治，排解左呢個歷時幾年之餐蛋之爭為天下百姓重謀太平盛世之後，係時候訓覺。食飽飽就訓架嘛一個正常人係！非常唔合時地呢個禮拜老細旅行先黎病，我打死都唔會係佢返黎之前請病假！
「喂！會計姐姐！ｄ傷風仲未清得晒，拎ｄ藥出黎俾我啦！食左藥訓覺好訓ｄ架！你咪扮野呀你你平時放埋咁多例假，儲埋儲埋肯定收埋左唔少藥！仲唔拎ｄ出黎大家分享一下？」
「超！你食panadol算鬼數啦！panadol我大Ｘ把！」（而家ｄ香港女仔真係，粗鄙程度同樣靚程度成絕對正比）（以上比喻只適用於我公司個會計）
「好！panadol照殺！拎黎！」
「拿！成盒唔使找！」
「喂！唔對路喎！呢ｄ藥，唔食得架喎！」
「點解唔得？我幾廿年都係噉食啦！」
「呢度寫住『不會令人昏昏欲睡』喎！食左唔會眼訓，點得呀？我點樣光明正大噉同兩位經理交代我食左藥所以要訓覺？」
「超！你扮晒食完藥好眼訓咪得囉！你扮開架啦！」
「今日冇乜mood扮眼訓喎我！近排我鍾意玩誠實喎！有冇ｄ食完立即昏昏欲睡先？」
「有！我仲有一粒！」
「掂！即整黎！」
「唔制！」
「點解？？？」
「呢ｄ正野梗係留俾自己啦！必要時食可以同老細講食左藥昏昏欲睡立即訓覺嘛！傻仔！呢ｄ筍野仲益你？」
就係因為今日ｄ藥不會令人昏昏欲睡，今日奇跡地全日訓都冇訓過覺（lunch當然唔計），之前「訓到成隻海狗噉」之風光不再。呢個亦係今日甚至今年最大遺憾，因為相信今日係今年最後一日可以如此放肆矣！

做極都未夠十二點，等飯食等到癲左，讀design出身攬住兩個degree而家仲讀緊MBA可能讀書讀到傻左的同事一如以往地，又有奇想：
「我諗到一個劇本！呢個劇本簡直係精彩絕侖！係一個兵同賊既故事！個故事係噉：有兩個小朋友細細個已經係好朋友，一個志願係做警察，另一個志願係做賊，每一次玩兵捉賊，想做賊果個小朋友都會話『唔使猜！等我做賊！』兩個小朋友，細細個已經各自做到自己鍾意既角色。兩個朋友長大左之後，一個成為最出色既警察，一個成為最出色既賊，有一日，一個世界環球珠寶參展商黎到香港擺展覽，呢對久未見面既老朋友終於再次碰頭！為左令到劇情更加緊湊，我決定加插愛情故事係入面！不過我都唔明點解要緊要反而加愛情戲，而唔加動作戲！我個諗法係噉，係警匪搏鬥之中，加入一個女主角，呢個女主角，係主角個同事，佢好專一，但係因為失憶，失憶之前係做警察，但失左憶之後就做左賊跟左另一個主角，到底佢最後會選擇邊一個呢？嘩，呢度夾埋，到底有幾多條線呢？雖然愛情部份好似好重，但係我地呢套戲賣點，其實係警匪搏鬥同埋槍戰！不過我諗到而家都諗唔到，最重要果部份係邊呢？結局又會係點呢？我只知道，呢一個係一個前傳，只係一個序黎遮！呀，或者個結局可以係噉：係會展槍戰之中，警察男主角同賊男主角鬥到難分難解果陣時，女主角出現，抒緩左兩個主角情緒，之後警察唔做警察，賊唔做賊，三個人一齊過住幸福快樂既生活！呢個結局完全做到首尾咐應呀下！我絕對相信，呢個係一個賣座劇本！我而家搵緊公司投資開拍！你地覺得邊間夠財力支持我呢部大製作？」
「夠喇！收皮啦你！！！」（唔使講都估到，未等劉Sir開口，會計部個靚女已經搶左呢句對白）
冇錯呢個係劉Sir個同事黎。對住呢條友，你絕對會諗起劉Sir，都係on99。如果唔係咁膠，老細又點會特別指派佢同劉Sir去美國出差／渡假？

每一日最重要的時間，當然係一點到兩點呢個lunch時間，特別係呢個禮拜，老細去左旅行，每一朝早大家都起碼拎大半個鐘時間討論
「今日lunch食乜？」
但按照經驗，呢ｄ討論最後通常都係無疾，結果大家都係求祈食番飯盒算，因為人人都唔想夾錢，食飯盒有得claim公司數嘛！但到左今日，話晒最後一日享受，唔理，去盡佢！

其他同事諗極都諗唔到食乜好，結果都係食番飯盒，癲果班當然唔會制（癲果班樓上已經出現晒：最頹果個劉Sir、讀書讀到傻左果個編劇、同會計部靚女），三條友自己補錢食呢個Pizza Hut餐，$145＝一個錦繡大會細批＋半打秘方炸雞槌＋一個香蒜肉酸意粉（落單時靚女特登講「我呢個餐要香蒜肉酸意！」電話另一邊特登糾正番「拿我地淨係整香蒜肉絲意架下！你嫌唔肉酸唔要唔睬你架！」），加番公司午餐津貼條數，除番開每人夾三十蚊都唔使，而我，錢當然係俾咁多，但實際上50%股份屬於我。
「挑！你兩隻野噉都話食唔晒？有幾多呀！想當年我去美國果時一個人食三個細批咪又係噉！」
真係超超超正！雖然我老豆唔知點解成日發癲經常禮拜日叫pizza返屋企食，但近來冇食得咁開心，因為以前係叫Domino，而Dominoｄpizza平得黎好食過Pizza Hut果ｄ好多，但後來Domino見多人幫襯立即加價，係加到飛起直頭貴到Pizza Hut level，如果係咁貴點解唔直頭叫Pizza Hut？之後我老豆就再冇幫襯Domino，所以而家每次佢叫襯pizza我都好唔開心（但係每次好唔開心都最少食成個大批，就好似剛剛個禮拜日）。今日第一次食呢個Pizza Hut錦繡大會，
「嘩！點解可以咁正？？？」
ｄ料其實好普通，但係我就係鍾意食幾樣送搞掂簡簡單單果ｄ批，一塊餅幾萬樣送果ｄ都唔知點食！呢個錦繡大會已經成為我最愛Pizza Hut薄餅！今次食得半個細錦繡大會當然唔夠喉！
「唔緊要！黎緊個禮拜日即叫我老豆發多次癲叫番個大批返屋企先！」

食完個pizza再訓個靚覺，起身之後，迫於無奈要做下野喇。雖然今日各位客人更加合作地係全日都冇email收過，但老細聽日出現，即係點都要象徵式噉做番少少野send下email噉啦！呢ｄ時間，當然要順便聽下歌仔。呢幾日冇皇管，多左好多時間聽歌，手痕摷番好多平時好少聽ｄ野出黎，真係有太多野想再聽多好多次聽真ｄ，同今日發現做緊野果時聽doom最正，聽最鍾意果隻doom death RUNEMAGICK，聽呀聽呀聽，唔經唔覺已經做好晒所有野加做多左好多野。唔知真係聽得太開心，定係日頭ｄ藥不會令人昏昏欲睡得太勁平時無時無刻都勁眼訓果個劉Sir食左藥之後除左lunch例訓之外真係瞌都冇瞌過，還是劉Sir突然間勤力左好多？（最後一樣一定唔係呢樣）工作時間聽metal絕對有助提昇工作效率。我要向老細提出呢個研究方案，並將呢個方法推廣至全公司俾各位同事，提昇公司效率、改善公司業績、助長香港經濟。

做下做下，
「咦？夠鐘喇喎！做左咁耐，係時候食下午茶！」（其實，只係做得果個零鐘）
立即衝入pantry，摷摷同事ｄ貢品先！

而搽完麵包食完野，當然係怒玩怒走黎走去怒吹水怒聽歌！仲做野？傻架？
「過埋今日，冇得玩架喇！」
經理激動地說。既然經理都帶頭唔做野，我地呢ｄ做細的自當從命。所以，繼續玩繼續走黎走去繼續吹水繼續聽歌繼續唔做野，同埋最重要的繼續食野。上星期六臨走時特別成立左呢個零食基金，等會計姐姐為呢幾日搜購定大量零食，而呢大量零食，最後係邊個食（晒），大家心照啦。淨係呢幾日，食左ｄ野夾埋已經等於平時半個月咁多，四日內已經肥左差唔多十磅！

2006年7月20日香港時間17:58，全公司仝人非常肅穆地望住個打卡鐘。經理第一個禁不住飲泣：
「我好唔捨得呀嗚嗚嗚∼」
各位同事不住落淚。因為老細去完旅行今晚機返，聽日又會見到老細！
「聽日就要開始做番野冇得玩喇！嗚嗚嗚嗚∼」
「我唔制呀∼點解老細去得幾日旅行咁少？」
「死喇經理！聽日起冇人幫我朝早打卡喇！我又要繼續日日遲到喇！」
「冇得做做下野鼠落街買雪條喇！」
「之後冇得著涼鞋同踢拖鞋返工喇嗚嗚∼」
但各位同事只係感慨悲慟左兩分鐘，一搭正18:00放工鐘聲響起，所有人立即變成另一個樣，搶住係五秒鐘之內打卡執野熄電腦走人，
「最遲走果個熄冷氣熄燈拉閘！」
一秒前仲係喊苦喊忽，一打鐘立即唔記得晒聽日要見番老細冇得玩要做番野好鬼慘呢ｄ野拿拿臨走人。放工大過天嘛。但熄冷氣熄燈拉閘呢位幸運兒，當然唔係我。我從來係全公司最早走三甲之一。

「．．．．．．」

．．．冇錯，呢間公司係癲的。經理可以仲頹過劉Sir，ｄ同事又冇個正常，所以劉Sir咁鍾意呢間公司！係呢度，佢覺得自己好正常！（但今日「返工」都可以玩到咁多野寫到咁大篇文出黎兼起多一篇碟評，呢條友，正常極又可以有幾「正常」？）