近排會計靚女唔知咩事，突然好踴躍地炫耀佢「好自豪」的廚藝，
「好自豪」＝「兩塊麵包中間塞餐肉同芝士再掟入微波爐」噉囉。
「你竟敢蔑視你公司個美少女廚神？」
可能激親，搞到靚女近來頻頻大展廚藝以證明佢手野真係「好自豪」。
白老鼠，自然係劉Sir啦仲會有邊個咁抵死啦。今朝入到pantry已經覺得十分面善：

「呢位阿生，我地係咪之前見過面？」
一睇就知佢係等緊我（把口）啦！

微波爐叮叮再拎出黎，正呀！肥美的午餐肉，仲有勁漏的芝士！令劉Sir無法抗拒的賣相！
咦？今舖好似有ｄ唔同喎！「美少女」廚神出現搭嗲：

「我手廚藝又再進一步！研究左一晚，我諗到個新整法！就係烚多兩隻蛋再壓碎搽上餐肉先加芝士，
噉會再入味ｄ！快ｄ同我食左佢，之後話我知我而家煮野食有幾得！」
「收皮啦！咪又係一堆垃圾塞爆兩塊麵包然後叮叮搞掂？」
「噉你食唔食丫？？」
立即唔敢出聲，乖乖地拎碟三文治返自己個位坐低慢慢食．．．

齋中間搣開睇都漏到嚇死人，對一般人黎講口都唔敢入，可惜今次舊三文治撞到劉Sir。
一入到口，芝士餐肉鹹撞鹹味覺享受一流，麵包淡淡地中和一下，芝士餐肉三文治同雪夾糕一樣，
是永恆的人間美食，亦係劉Sir成日叫會計靚女整／會計靚女成日整俾劉Sir食的原因。
不過今次加左蛋，蛋味甜少少，溝埋雙鹹反而溝淡晒陣味唔夠激。都係old-school好。

「唔得喎！今次唔多好食喎整得！」
「噉你食唔食丫？唔食下次唔整！」
「食囉我食囉．．．」