漫話漫畫節 (Bonus Tracks Included)


2/8/2004 MON

今日終於起得切身喇十一點幾就到左。IQ題:前日生意係大前日之一倍;琴日生意係前日之一倍;今日生意會係琴日之幾多?算啦唔好提喇都唔合邏輯,坐到食埋晏咁滯先發到市,咁早到除左可以睇睇十一點半開始果個搖搖表演之外,冇咩意思。
...都有架,勝在有得同也哥個表妹玩下,一個非常過癮之中五靚妹,有佢係度冇咁悶。除左同佢一齊玩之外,我除左行黎行去都係行黎行去,反正棟係個檔口又係得句急口令:
「埋黎睇埋黎揀全部自己設計100%本地原創全綿製造夏天著舒舒服服絲網印刷保證你洗極唔甩買完再買buy or die∼」
(註:請於三秒內讀完)
除左急口令之外,都仲有騷睇架,因為我地大老細也哥(係呀我只係一個專責吞pop小職員咋你唔係以為檔野我有份丫嘛)耐唔耐就會變身出黎招徠下客人,順便周圍走嚇下細路。不過,每次變完身之後,客人就真係招徠到喇,不過招晒去佢度,冇人埋黎個檔口睇野,所以每次佢變身之後,我地成檔人可以坐定定睇戲,又或者好似我噉,行黎行去,呵呵。

到左一點鐘,真係有騷睇喇。基本上我黎做工作人員似為可以日日免費入黎睇騷多過幫也哥手。
MEG
本來有相睇,點知部機神左就係佢地d相冇晒冇計。玩folk pop,幾清新,個女主音把聲同唱都唔錯。

WING LO

十分之黃子華,不論音樂、歌詞、唱、台風甚至個人都係。不過睇過佢bio你就唔會奇怪:
「榮佬,前幕後玩家成員羅燊榮,現用回真名羅金榮,後認識黃子華,創作電視劇男親女愛主題曲《藍天》,並自資十萬元推出個人EP《英雄》。」
真係?有呢隻碟出過都唔知忝...

A'z
Pop rock/J-Rock乜都好,一直聽到好多人對佢地之負面評價,不過今次第一次聽,印象唔差。不過見唔到傳聞中「萬千妹妹仔一擁而上」之壯觀景象,或者真係要去d大騷先有得見識見識。

EVER
傳說中之J-Rock,超多fans,好難先行到近少少。一開始先黎轉unplugged,唔錯啦,係最後唱"Hey Jude"歌佬失準遮。

不插電完當然要插番電,估唔到頭先unplugged做歌佬果個原來係鼓手,一面打一面唱都冇失準唔錯。不過個bass唱就一般。有得plugged又有得unplugged,玩左好Q長。

DSC
三、二、一,請大家一齊尖叫:
「大∼哥∼丞∼∼∼」
今次又換左新bass,但係唔記得叫咩名:

In case you don't know,DSC係香港十分出名之progressive rock樂隊,聞名於將中樂融合搖滾。好耐冇見過佢地,今次真係曠工到比人小都要睇。玩左五首:《頑童》、"In the Mood"、"Flight of the Bumble Bee"、《闖將令》、《武術組曲》。之前EVER表演搞到成大班fans圍實晒個台,一到DSC玩左半首歌唔夠已經不斷有人(特別係女)走,「冇人唱架好悶呀!」到第二首「跟住我地玩首老餅swing歌叫"In the Mood"!你梗係唔識啦你老豆老母聽架嘛!」走得仲勁,而我亦得以十分輕鬆地霸到頭位企正係大哥丞面前影到頭先果副靚相,不過可能真係直線睇唔到雖然係正面前由頭到尾佢都發現唔到我。講番音樂先,英文名果兩首cover都改編得一般,特別"Flight of the Bumble Bee"好似慢左忝,都係d舊歌較好(等緊原創新歌呀,大哥丞)。新個bass好新手而且唔少失誤,大哥丞都係差少少(基本上我睇過佢幾次,除左Blackwine追夢演唱會果次每次都係差少少),今次唔多滿意,係《頑童》同《武術組曲》較好。可能其實大哥丞一早睇到我,不過廢事比我嘈所以扮睇唔到呵呵。

志光
DSC玩完,就到一個唔知咩來頭之日本仔,佢一上台立即超多人(當中又有超多女性)圍埋黎,特別係lolita裝物體仲要睇到尖叫晒噉款。首先自彈自唱左幾首歌,唱得好好而且手琴唔差之餘,淨係呢野相信香港而家都冇乜邊個歌手做到(淨係講唱果part都差好遠喇)。

自彈自唱完加例牌日式廣東話娛賓加無數妹妹仔尖叫之後,EVER(又係佢地)出番黎同佢玩多幾首。唱得好鬼輕鬆仲可以跳住噉唱,強。雖然我唔多鍾意聽日本野,但係的確係玩/唱得唔錯。
睇完佢玩之後,終於明點解日本仔咁受女仔歡迎:d台風真係好做作好肉麻...

AIR TUB
阿志光玩完之後,散場∼...咪住先,明明寫住話AIR TUB會黎玩架喎!心愛之Air Tub去左邊?點解變左個日本仔?呢個係今次漫畫展中之一個污點嗚嗚嗚∼


睇完返檔發現賣左野,我坐咁耐先開得一張單一走立即多幾張,我唔係度果然好d。既然係噉,繼續蛇王:

F.I.R.飛兒樂團
頭先場騷完左之後有個台灣歌手上台唱,唱左好好好Q耐之後終於輪到佢地出場。超超超多fans連專業fans團都黎埋想行近d都難,幾經辛苦加zoom到盡先影到呢兩張咁大把:

超級似D.A.I.(台稱 大無限樂團,咪即係DO AS INFINITY囉),不過好聽就得,音樂同唱都好好,呢d先係唱歌嘛。係結他佬同keyboard佬有時做作過頭,明明唱緊和音都要fing到死噉款。唔錯,點知唱左一陣,就玩完。喂頭先個台灣男歌手唱成半粒鐘咁滯,佢地先唱得四首?

又走番檔口,又多少少生意,事實證明我唔應該出現。除左撞到有個英國番黎香港之女客人著住件FUNERAL FOR A FRIEND tee有得贈下幾句之外,毫無建樹,騷又睇晒。結果又係狂食,今日破紀錄食左四杯雪糕食到筆雪糕條友都認得我筆多d忝抵我醒一舊水你地啦真係。

十分的無所事事,返去檔口睇也哥變身嚇下人、舍妹十分得閒地黎探下我班(順便同也哥無聊下)、睇睇謝杜點樣踢晒西幫我地手(「我都想幫架!不過噉款點幫!」)、太陽報又黎訪問也哥,捱捱下噉就九點鐘係時候同也哥表妹一齊鬆人。本來等左幾個鐘都係零生意,點知我走果一刻立即有人買野哈哈哈我真係唔應該係度架!


3/8/2004 TUE

今日本來起得切身架,不過可能琴日食太多雪糕一起身就痾仲要臨出門口再黎痾完再痾結果十二點幾先到。係痾架不過雪糕照食架喇唔食對唔住自己嘛。

最後一日又要係閒日,冇乜生意就預左架喇,不過就算有生意我都照係噉吞pop架啦。又有騷睇喎今日,一夠鐘我當然名正言順地消失:

官恩娜

極大量fans(當中唔少係麻甩佬/仔),搏晒命先至影到呢幾張。唔係live band或者播帶而係搭一個DJ一個MC,唱唔差,係d歌悶左d,有d似劉以達《水底樂園》果d不過較hip-hop(即係唔多岩我)。即係有云「醉翁之意不在酒」,台下好多都唔多似係聽歌唱幾耐就影相影幾耐,因為好多人都係為左睇佢扭腰,噉佢又真係勁喎一唔使唱立即扭到爆。不過最後好唔開心,因為佢冇講到佢句口頭禪:
「你今日download左未!!!!!」



葉世榮
玩五首歌,頭四首都係自己歌得最後《光輝歲月》係BEYOND(結他solo前吹口哨果段變左bass solo呢個編排好正)。唱得比以前好,佢自己d歌都唔錯,最重要就係,隊band好勁,特別鍾意個鼓佬打得好靚,我估佢勁過而家之葉世榮好多呵呵。

睇完騷就返檔口最後衝刺。生意難做呀真係,成個著衫公仔隊到九尺高先引到人過黎睇,仲要得隨便睇冇隨便揀,到最後自己都執多兩件支持下。雖然冇預期中賣咁多,不過都賺番場租,算唔錯啦。
之前《太陽報》訪問中空寶,今日《中國經濟日報》訪問就終於有登到喇,得閒睇睇
最後張導演好帶契:
「喂有個人email黎亞視話想知多dmetal野問點樣可以聯絡到你喎!300磅超肥女fans黎架正呀正呀∼」


漫畫節,噉就玩完,好明顯我呢幾日係乜都冇做過。廢事你班友成日鬧呢度字就大把圖就冇乜,最後整多個相片特集你班友慢慢睇。



ofFREAKso漫畫展限定版貨品。有興趣記得去ofFREAKso網頁http://www.ofFREAKso.com睇睇。


果條山賊咪也哥囉。至於點解會扮成噉就唔好問我,有排解。黑衫果個係也哥死黨阿龍,成個檔口都係靠佢撐住架。你知啦,我每企三分鐘就會消失三個字,佢唔係度的話,邊有人睇?
影相果個呢,就唔係我,果時我好似去左睇官恩娜扭腰呵呵。


呢幾日ofFREAKso檔口大家做最多之事就係好似阿龍哥噉:等運到。
「X!劉Sir條XX又唔知鼠左去邊!」


等極都冇,劉Sir又晨早閃左去唔知邊度,最後人去樓空,大家都走晒去蛇王算。


也哥有好多(女)fans之餘連玩cosplay果班都捉佢去影相,因為佢地點諗都唔會諗到到底也哥係扮邊個漫畫角色(肯定點諗都唔會諗到)。另一重點當然係右邊果位蜘蛛俠,點數法全場最型都一定係佢。而且佢唔止咁簡單...


扮完蜘蛛俠之後佢又變左身做柯柏文。仲有咩好講?佢上兩屆cosplay比賽都拎左冠軍,今年就唔玩喇因為已經贏夠唔需要再玩。除左蜘蛛俠同柯柏文之外連超時空要塞都扮埋仲要可以變型(佢第一日表演果時我剛剛睇到,吹脹真係)。仲有咩好講?

頭一兩日也哥扮山賊,跟住幾日就扮...

呢個係Kane,一個摔角手,全場亦只得佢一個夠料扮。呢個扮相更加受人歡迎(不論男女),更易嚇到小朋友,更多人搵佢影相,更多人顧住理佢唔理我地檔口。


呢個死靚妹就係也哥表妹(我到而家都唔知佢叫咩名呵呵),過癮小妹妹乙個(中五架喇),唔係有佢係度係我唔蛇王果時有番d娛樂呢幾日真係唔知點捱。佢見到我淨係識講一句:
「你點睇都唔似教書!點睇都唔似!!」


舍妹黎到漫畫節順便黎探一探我班,又「順便」比也哥捉左去玩&影相。不過玩一大輪佢都唔知「果隻野」係邊個黎,係後來講番佢知先知
「原來佢係People's Champion?開頭以為你黎呢度做都會著到好似佢噉出場忝!」


以下為老細愛死了屈臣氏、瘦仔搏左條命都要入屈臣氏之原因:



呢兩個靚女唔係我影架,係阿龍學我走左去蛇王果時影。不過佢揀唔岩時候唔早d星期六日去影,因為過左旺日少左人d女立即著番褸,當堂少左好多狂蜂浪碟(不過都好鬼多),一除褸呢就立即幾村人/麻甩佬圍住。如果阿龍影係襯佢地唔著褸果陣先去影,果絲春光可能會令呢度更多人立志要加入屈臣氏呵呵。

黎到漫畫展,個個都走去影屈臣氏姐姐、cosplay少女、暴露game girl。我就影左呢個:


個個都要點性感點靚點野豔,但係女仔都係簡單d好。雖然會展d焗薯好難食,但係又真係冇其他野食好揀冇計,結果就撞到呢個焗薯妹妹。除左拎下飯盒執下野之外佢主要職責就係整焗薯,所以經常藉食野逃避工作之我就成日都撞到佢。最後一日臨別秋波食最後一餐焗著就問下焗薯妹妹可唔可以影番張相,佢又肯應承,不過
「...唔拎住舊薯仔得唔得呀?」
最後都肯聽我講捧住舊薯仔比我影左呢張相。最大興趣反而係佢到底幾多歲?分分鐘細過我但係已經去到大廚級呵呵。
買左個焗薯影完張相之後,我就拎左舊薯仔走左去,順便傾多幾句都冇。問埋人地個名都好丫唔使淨係識叫焗薯妹妹,但係我就係唔(會/識/敢)做呢d野。所以點解我到而家都咁失敗。


好多謝Alge兄本身幫我留左張Steve Vai演唱會免費飛,不過結果收左檔清左場之後都趕唔切喇,只好推卻Alge兄之一番美意,然後出尖咀Hard Rock Cafe趕下半場World Battle of the Bands香港區總決賽。呢個總決賽係灣仔區同中環區各揀兩隊band到今日總決賽再比試,冠軍一隊可以係十二月代表香港到紐西蘭參加世界總決賽。之前一直追開NOTHING NONE,今日總決賽咁重要要磅舊幾水入場都唔會托手爭架喇,睇連老細都出埋黎就知大家幾睇重呢場比賽。不過中環區決賽揀左三隊,即係今晚一共有五隊玩,十點鐘開始一隊玩九個字,即係兩點先完真係大整蠱,今日星期二聽朝大家仲要番工架大佬,Henry哥果d仲要睇完Steve Vai又要趕過黎下半場忝。又其實如果可以揀三隊的話,灣仔區都應該可以比AIR TUB出線啦...
MONOGEL
大頭佛SITE ACCESS同PULLOVER成員所搞之舊式rock band。雖然話呢隊只係夾左幾個月,但係班友本身資歷都唔淺,十分之唔錯。聽聽下覺得好老土架其實佢地d野,不過玩得好有feel我鍾意呵呵,係玩果時台下好似冇咩大反應噉囉。
HARDIHOOD
Metalcore,上次灣仔一役十分之精彩(bar都插到水喎),今次雖然要俾入場費睇但係都仲有唔少fans到場走到台前支持。但係同上次灣仔相比,今次玩得冇咁好喎,上一次放d同埋冇咁亂。
AUDIOTRAFFIC
Britpop,似MUSE(可能因為佢地以前玩grunge),真係冇野好講。睇過佢地bio都知道,根本冇得唔比佢地贏,大家本身就係處於唔同層次。真係好精彩,歡眾之反應簡直係瘋狂,對住佢地的話我只有講句「雖敗猶榮」。
NOTHING NONE
Nu-metal,整體表現唔錯係歌佬好似未入狀態同支咪唔夠聲差左d,阿Davy哥fing多左頭但係好多時fing得唔夾beat呵呵。雖然冇乜fans到場支持(都係果幾個自己友架喇),好在不嬲肯投入睇騷之鬼佬多叫做多番d人幫手嗌下叫下。Hard Rock Cafe個台又設計得好最前係拱起,岩晒阿Davy一high起上黎就衝上去爆番幾句,最後果野歌佬走落台唱然後兩支結他加bass走晒上台頂fing就一流。正!
DRAGON FLY
似係progressive metal,有唔少fans,玩得三首歌都不第一首歌好長其實等於左兩首。佢地d歌就好似IRON MAIDEN音樂底加CHILDREN OF BODOM歌佬,不過d聲set得差左d,大部份時間只係聽到歌佬同鼓,bass只感覺到「有」,結他rhythm隻聲好朦到solo果時轉用另一隻聲先聽得清,keyboard除左最後首歌較番大聲d之外差唔多係聽唔到而且效果唔多突出。如果用番多dkeyboard、加多支結他同較番恆d聲效果會好好多,不過始終覺得歌佬唱法同音樂好似唔太夾,同埋作風太過「明星」,成日同台下dfans「交流」。
大致上係十分精彩之一場比賽,為等結果大家捱到差唔多兩點。最後點?...冇咩好講...
季軍:HARDIHOOD
亞軍:DRAGON FLY
冠軍:AUDIOTRAFFIC

「?」
除左呢個符號,我諗唔到俾咩回應。AUDIOTRAFFIC贏冠軍就唔使講架喇,如果佢地拎唔到我實會同其他人一齊暴動反轉Hard Rock Cafe。NOTHING NONE一直都係灣仔區最被睇好一隊,坦白講亦玩得唔係差甚至唔錯,但係結果居然係三甲不入,衰係邊?你再睇多次上面幾段野,可能可以找出端倪。宣佈賽果前聽過十幾個評判最識band sound果兩位之一些評語,或者佢地都會唔多認同呢個賽果(佢地頒獎前已經走左),但係或者冇緊要啦,呢個比賽可能音樂只係次要,最重要係,你玩果時台下夠唔夠多人嗌同鼓掌。