大佬自澳洲來，爐邊吹水，不亦樂乎。
「我有個Friend住宿舍，佢話夜晚聽到隔離房ｄ叫床聲，仲以為自己入左黃色架步。」
「嘩，咁佢點做呀？」
「有得點做呀？咪同佢鬥叫得大聲囉！」

TA生涯，開始。
九時簽到，九時半上課，十時半就在開行冷氣的圖書室等放工，完美的人生。 朝九晚五變晚四，長短週變成自由出席的「彈性上班時間」，一個字－歎。不過小朋友真是好很難教。
「眾數加s呀！Is am are都唔識！係咪要阿Sir爆粗先安樂呀你老！」

原來東莞同鄉會小學有間 念慈堂！

八時半起床，八時四十五已出現在圖書室等開工，發現遲到是一件很困難的事。

「奇數偶數係乜都唔知！識得Rap九因歌又唔識點搵因數倍數！識個十百千萬位又唔識寫五位數！」
事實證明，Maths真係好難教．．．

教師投訴TA工作量少？大佬，人工同你地爭一大截，如果你俾我同你拎一樣咁多人工，我幫你落場教又點話．．．

真係估唔到連小學都有古惑仔！

「阿Sir，唔好教咁多啦，記唔得晒．．．」
一堂教三版書都嫌多。真是給這些學生吹脹。
「A an the都未識用，標點符號點寫點用都唔識，咁就想放學？」

林哥：「希望聽日唔使見到你！」我：「大家咁話！」希望以上對話成真。

林哥，承你貴言，今日終於也不用看到你。八號風球高高掛，今天又是打機天。

放榜正值八號球，天陰雨溼聲啾啾。今年考試局首次提供網上放榜服務。

摘自明報
網上放榜失敗 熱線亦無人聽
八號風球下，高級程度會考只能網上放榜。不過，以萬計考生未能上網，考試局秘書蔡熾昌承認「有少少擠塞。」
蔡熾昌接受訪問時表示，他們原來預計三萬多名考生中，只有二萬多人會同時上網，但今早上網人次高達五萬多人，他呼籲市民如無必要， 不要上網查詢成績。．．．

都幾抵死，學校冇Cert派，又叫人「非必要」唔好上網睇成績，即係點？
另一個大錯誤：新聞中連查詢放榜的網址都打錯了。
　http://www.results.hkea.edu.hk/hkale
錯係邊？自己諗諗。

晨咁早俾人嘈醒，幫人上網查成績。個密碼最長只可以有十個字，但係唔知點解有人可以搞到個十一字長密碼出黎。

年年放榜皆如此，有人歡笑有人愁。
阿聲，掂呀！士別一年，脫胎換骨！中史轉讀AL仲要有B，Econ有C，好！不過我諗你都估唔到你中文會肥．．．唔好步大佬後塵呀，不過你 Combine Cert應該掂．．．
「盧樹聲！係咪要我兜口兜面鬧你？考得咁好仲入教院？」
Gerund，唔好灰心，仲有機會．．．
劉超，有我上年水準，入教院實得啦，仲之記住面試要點：「幻想第一，事實第二。」睇黎教院又會多個GTO。
阿Super兄，冇野講啦，座底有條Ｃ，係咪真係中大哲學？？？
今屆理科真係好掂，睇黎上年個紀錄真係好難打破．．．文科點？不過都好難差得過上年．．．
睇下今年又有幾多「受害人」入教院？

放榜了，大伙都開始關心算科的問題。近來收到很多人詢問教院的相關，有常客，有稀客。
「．．．我以過來人加受害人之身份勸你唔好讀教院．．．」

「喂，而家係你樓下，俾我上黎"DUM"一粒鐘波鐘．．．」
絕對沒有可能想像得到啤啤仔會突然間登門"DUM"波鐘。好，無無聊聊有水吹。

可能是最後一晚見大佬了，雖然是很晚，雖然是很貴，雖然還有其他事，但是都是要出來的了。
大伙出來唱Ｋ，一如所料，又是做三陪，沒有怎麼唱過。
「阿聲，估唔到你原來係食全餐，A B C D E F U 一餐過食晒．．．」
「肥中文，冇咩野丫，AS Level 咋嘛，唔重要丫．．．」
閱讀理解：
「．．．阿聲有次去買褲，揀左條『迫』鈕款，點知佢拆左扣鈕個位出黎，咁就整爛左條褲。之後佢叫人換過條俾佢，咁人地都肯，即刻 拎條新褲俾佢。點知佢試完之後就同條友講佢唔要．．．整爛人地一條褲之後又唔買，你話好唔好笑？」
問題：正如文章最後一句所說，這個故事好不好笑？
大佬真係一年比一年賤，冇野好講．．．簡直係天生地下音樂人．．．
'It's hard~~~~~~~ It's hard-hard-hard-HARDCORE~~~~~~~~!!!"
永遠都係同大佬唱Ｋ至最有 Feel 。

今日好倦．．．係咁訓．．．

「此人已死......」Gerund，肥左科Pure Maths，仲有兩科AL丫，唔使咁灰住．．．

八時九起床，還是趕得及．．．真是很難很難遲到．．．

今天英文教大班。
「．．．今日我地教This is同There are．．．」
「亞洲電視本港台　百萬富翁陳啟泰∼」
「．．．This is呢，就係咁樣用．．．」
「一千蚊題目：香港市花係乜？」
「．．．There are，眾數時用．．．」
「香港有幾多個水塘？ A.11 B.13 C.15 D.17．．．」
「．．．a school bag，前面點寫？成句讀我聽．．．」
"This is a school bag."
「恭喜呢位參賽者答中三千蚊題目，可以得到獎金三千蚊。」
．．．上腦．．．

班學生真係好差。俾一個詞語佢，叫佢寫番一句單數式一句眾數式，咁都唔識．．．教成粒鐘都先僅僅教 完This is There are．．．教一粒鐘好似去嗌一晚Ｋ咁嚴重，講到沙聲咁滯。班先生仲投訴TA工作量少？唔係我地哽晒ｄ地底學生， 你地會教得咁歎？

「．．．嘩個故事真係好離譜，個女生得靚，個阿媽同家姐妒忌佢，就夾埋一齊黎虐待佢．．．個家姐妒忌佢好正常丫，個阿媽 有乜理由唔化呀，居然會妒忌個女．．．『當女孩最可憐的時侯，王子出現了．．．』又王子？邊度有咁多王子呀？．．． 『到最後大女兒沒有人理會，孤獨一人，終於寂寞死了．．．』寂寞死？即係點死呀？未聽過！．．． 『大女兒都最後都不明白自己的死是因為她不夠愛人，對人不夠親切，所以沒有朋友，也沒有人愛她。』咁都得？吹脹！．．．」
算啦林哥，唔好再搏故喇．．．如果唔係連童話故事都唔俾得小朋友睇喇．．．

好，彌勒佛心經真是一首「正」歌，但似乎不會為人接受，即使唱的是王菲．．．

亞洲神童！
仍然沒有看過《我愛香港》的謎之廣告．．．好想看．．．

唔好食麥記。係咁咋傻扮懵狂加價，但係人工又年年都一樣咁低。個手指魚餐成廿三蚊，超貴但係又要超難食，搵笨。

「下？聽晚要去聚會咩？」
「係呀，年年畢業禮之後全校教職員都要去食餐飯，我聽晚就去睇番我檔生果檔，梁小姐就去探人，你自己諗掂用乜藉口唔出席喇。」
．．．乜咁煩？快ｄ諗．．．

林冠新，教育署總課程發展主任。估唔到同我劉家又有關係。

挑戰極限，今晨起床到簽到十分鐘之內完成。

「劉Sir，今晚我地有個晚宴喎．．．」
「係咩？對唔住呀校長，我今晚唔得。」
「下？點解呀？」
「冇呀，尋晚諗左成晚，都諗唔到用咩藉口唔黎，諗諗下就通宵，到而家都未訓過。所以我今晚要返屋企訓覺，黎唔到食飯。真係唔好意思 呀校長，如果我一早知道的話，我就唔使諗通宵咁辛苦，搞到冇得訓黎唔到啦。」
「．．．好，咁你今晚就唔好黎啦，不過晏晝都有飯局，位都訂埋喇，你想走都走唔甩。」
「．．．」

無端端又要去應酬．．．由學校行去茶樓一個字都唔使，但係居然包車去？搭車都要成兩個字，真係行路好過。到左茶樓，原來係集體食點心，吹脹。

這間學校的校工真係有趣，「酗可樂」，連吃飯時都無可樂不歡，瘋狂叫可樂互隊。正。

「．．．嘩仲以為無端端黎左幾個舞小姐忝，又要緊身又要露膊，平時都冇乜點，今日畢業禮就著成咁番黎，ｄ女學生真係．．．」
英雄所見略同啦林哥。

突然有飯開。大熱天時，這麼幸運上了一架壞了冷氣的冷氣巴。冇野講。

大佬餞行宴，重見大伙，所有人仍是那麼賤格。結果是吃打冷，整晚金句不絕。
「如果你問我入唔入中大讀好，我會答你唔好。因為唔好，同埋唔好俾我見到你。」
「係呀，間間Ｕ都唔好入呀。咁入邊間好？樹仁啦！」
「我同你講，唔入Ｕ仲好，每年投資四萬幾，出到黎又係八千幾一個月，洗咁多錢為乜？不如而家出黎六千蚊個月啦！」
「佢唔係似隻『也母』型，佢根本就係一隻『也母』型！就算佢係現場我都係咁講！我拍心口話你知係我講既，佢問起就叫佢黎搵我啦！」

聚完餐去看電影，看了本來沒有甚麼興趣的少林足球。看過之後對周星馳改觀，終於不用再只靠無厘頭屎尿屁了。

12/7/2001 THU

畢業典禮翌日假期，令我終於可以在正常起床時間下午二時正才起床。

亞洲電視有個記者叫 林振強。

今晚 Late Show 有Dido。冇野講。正。

伊能靜新歌好有丁薇Feel。當初丁薇出碟猛比人話抄外國抄Bjork，唔知佢又會唔會？

凌晨時份，雷動九天，眾人夢中驚醒，無不仰天爆粗，都可謂「天怒人怨」。

終於遲到。偏偏就係今日遲左兩分鐘先至俾校長睇到。冇野講啦。

無端端帶隊出科學館。ｄ學生真係好正，講野超俗又當住我面爆晒粗，又冇野講啦。

土瓜灣出科學館唔係經紅磡過紅磡車站最快咩？點解要入黃埔再出尖東然後兜大圈到理工先去科學館？另一車仲勁，做乜轉出佐敦道？

今日咩日子？成四間學校黎科學館？聯校大旅行乎？

唔知有冇人記得科學館入面有舊野係有個波係一部噴氣機上面浮下浮下？個學生係二十米以外見到立即衝前，當住企係部機前面個實Ｑ面前由右 至左凌空一手將個波搶到手。好型，不過跟住就即刻俾個實Ｑ狂鬧。又要阿Sir出面。
「鬼叫你地跟我咩！」

估唔到尋日睇報紙講科學館最新個「誰是兇手」，今日就有得睇。記住係「睇」，班學生永遠都唔會跟住我行，追得呢件另一件又走， 追得晒全部已經夠鐘冇得玩。

真係估唔到帶隊出科學館都會撞到人，仲要係Gerund細路。冇野講。

請學生食薯條，個學生一拳捶落樽茄汁到，搞到成褲都係，班友又剩係顧住食薯條唔幫拖。最後成日個人都散發茄汁味。冇野講。

學校又再出現「舞小姐」。超低斜膊仲要染金毛。「下次番黎唔好再著成咁，著校服呀．．．」唔係聽到ｄ先生咁講都唔信原來佢地就係六年級 ｄ學生．．．

今晚集百萬富翁真係冇野講！條友頭三條用晒錦囊，居然撞撞下都撞到十五萬！極欣賞呢條友！

是日長週。今次擺到明遲到，吹咩？

．．．全校除左校長校工得我一個，要由九點一直坐到十二點，真係無鬼聊．．．

返到屋企，開機．．．發現原來好好耐冇打過機．．．決定今日大休打機乜都唔做。

繼續打機。乜都唔做。

今集百萬富翁超正。睇陳啟泰俾霑叔同馮寶寶玩左成粒鐘真係好過癮。

娘親話今日打麻雀贏左三百幾，聽日早餐請食自助餐。

散學禮，全體學生先生提早收工，除左我之外。又要坐朝九晚四。

母校音樂比賽，返學校睇順便走「堂」。正，終於有Instrumental Performance，不過冇得睇。呀！薩克管呀！

Hall 終於都裝冷氣，個台又終於整番Set似樣ｄ既收音設備。而家ｄ學生真係幸福，做Drama終於可以自己發聲，唔使再靠幕後配音同邊做邊拎住 支咪黎講。

在丘中渡過了十一年光陰的郭Sir終於也要離開母校了，在此祝他 前程似錦。
「郭SIR！好行！！唔送！！！」

「．．．我臨走前叫ｄ學生寫ｄ野俾我，講下我教書教成點，有個學生寫我身為教師只有四十九分，即係永遠都唔會合格；但係 身為朋友就有九十九分，即係接近完美。我好開心可以作為你地朋友．．．」
呢句唔錯．．．等我TA約滿上台講呢句先。

「．．．今年既音樂學會到此結束．．．」真真正正的曲終人散。「．．．嘉賓可以離席．．．」MC叫到，走得。

無聊。放左學之後俾成班Miss拉左去食下午茶。明知大家唔想見到大家又冇野講，又要你俾錢，為乜？「．．．今晚校長餐飯八點先開始， 之前乜都冇得食又冇野做，慢慢食消磨下時間先．．．」大佬，我又唔使去食飯，困我係度大家眼怨做乜？

又見大伙，重見賢少，冇野講，識左咁耐都係咁頹。去到蕉葉咖哩屋，居然有人信撕薄餅要對摺撕。阿姨，好野！

又多三件受害人。點解咁多人想入教院？

是日放假。兩點鐘先起身，簡直係享受。

聽日就教院面試。電話響過不停。

一個字之差，一個天之別。
八點鐘－「得啦，一個字同你搞掂條Cable。一個字一定掂！」佛爺話。其時天氣晴朗。
八點一－「就得喇，等多我一陣先。」佛爺話。其時天色轉暗。
八點三－「得喇，搞掂．．．頂！個頭整錯！再黎過！」佛爺話。其時烏雲密佈。
八點半－「好喇！今次真係搞掂！走得！」佛爺話。其時天降狗屎。
一個字。就係一個字。如果可以一個字之內搞掂的話，全體人員都可以無風無雨咁走，唔使搞到而家咁橫風橫雨中行。
佛爺，識左咁耐都係一樣，信者失救。

致各位愛民村住戶：
　奉有線電視喻，愛民村即將禁止使用56K連線上網，全體住戶必須轉用有線寬頻上網，否則即屬違法。現時愛民村所有使用上網 服務之居民（包括使用非有線寬頻之寬頻用戶），請從速轉用有線寬頻，違者送官究治。
 　　　　　　　　　　　　　　　　　　　　　　　　　　　　　　　　　　　　　　　　有線寬頻啟

去左新世紀間 www.[cafe de coral].com ，有個阿叔要左個 鐵板餐行街。

Final Fantasy，睇完之後只有一句：「明就明，唔明就唔明。」你永遠唔會明第一靈魂同第八靈魂有乜分別，又唔明明明原本有第一至七隻， 後來得二至八隻，佢又話搵晒成套，更加唔會明呢套Final Fantasy同Final Fantasy有咩關係。不過ｄ英文真係好鬼死易，可能因為要逆賣埠去日本啦。
可能因為打得太多機，對呢套「驚世之作」有ｄ不以為然。
如果你當套野係「動畫」而唔係「電影」咁黎睇的話，無論劇情定係畫工方面，驚喜著實不大。

今個星期開始，逢星期二都去睇戲。下個星期睇Spy Kids。再下個星期睇Harry Potter。

又到艾美。又係Late Show玩晒。

X Files又到大結局。呢輯真係唔多掂。

今天全校無人，獨守圖書館。都是睡，只不過是由在床上睡轉移到在椅上睡。

路經蘋果，樓下士多門口寫住
「熱浪薯片　千元一包」
附稿：《逆市致富　千元傳奇》

連巴士車身都有亞洲神童個廣告。佢隻碟真係唔買唔得。

「魚油入面邊種維他命最豐富？」
「維他命Ｅ。」
「錯。答案係維他命Ａ。」
係咩？即刻搵樽魚油對對．．．唔掂，呢排百萬富翁真係有好多問題出錯。

早。前所未有咁早。十二點幾就訓。

舍妹晨咁早Call起身。今日咁難得放假，當然唔起。點知咁就睇少左一場好戲。唉．．．此乃後話。

冇野做出九龍城打機，又係打鼓，打打下有個鼓飛脫甩左。本來都想投訴，係我後面Set緊機個「踢力死人」立即就衝上黎整整佢， 整完之後仲要Set到部機減價一蚊，當堂冇野好講仲要讚番轉頭。
「堅駿，抵我捧你咁耐。」

今次一定要賣廣告：
如果你今日晏晝有聽「森美小儀」的話，可能會聽到呢一段：
「．．．今朝面試有個妹妹仔，佢彈結他自彈自唱，可能緊張得滯啦，一面唱隻腳一面係咁震，後來張歌詞仲震到跌埋落地．．． 不過佢各方面都表現唔錯．．．（略）」
冇錯，呢個「妹妹仔」就係舍妹。雖然今日有成二百幾個人去面試，舍妹又表現失準，但係成個節目剩係提及佢面試時個情形，另外二百幾人 就講都冇講過，同埋身為全場惟一自彈自唱之人，就算落選都仍然值得自豪。
「阿妹，對唔住，如果我陪你去的話，戰果就會改寫．．．」

「．．．如果你今次中唔到獎的話，即係你拎二百萬既機會已經幻滅左，不過咁只不過係令下次中獎機會出現．．．」
．．．真係佳句．．．

睇黎舍妹都係冇行，又要登道歉啟示：
「阿妹，對唔住，如果我陪你去的話，歷史就會改寫．．．」

無聊，九點起身，九點半返到學校，跟住就一直訓到三點幾，仲衰過留係屋企。

聽日電腦班開班，搞左兩日先之做好個小小力量點，煩。

「．．．哥仔食飯埋邊．．．廿五蚊套餐，任－你－組－合－．．．今日有烤鱔喎先生．．．廿五蚊廿五蚊！冷熱飲品供應！．．．食飯就入黎啦！好多位呀．．．」
第一次見食店街頭嗌客好似嗌四仔咁。

「教院IN成點呀？」「成個面試都淨係講過一句野囉。」「咁咪冇得入囉？」「車，橫掂本來我都唔想入教院。」「咁你又揀教院？ 要一個Band A位喎！」「人地想試下IN丫嘛！」「．．．」
．．．冇野講啦Kelly姐．．．

冇野講啦，已經鬼死咁夜，無端端電台又會打電話黎話舍妹俾「森美小儀」抽中，舍妹真係掂．．．

英文輔導班成三十幾人，數學反而成日先得十個鬆ｄ，班學生又掂，真係嘆好多。

林哥，乜而家先至整傷？呢個星期要我教晒，想我死？我只不過係個小小一年級院校生．．．

學校突然拆晒ｄ冷氣。「幾時有新機到？」「八月初卦．．．」得啦，一上完堂就走，擺明放非官方「夏令時間」。

最憎霸機人士，更憎霸機兼無品人士。
「得喇，知你勁喇，知你打贏大佬調轉頭望我時你好型我好渣喇，知你爆左機仲有8UP加高我一倍分搶左我個第一好很叻喇， 知你好多錢霸機喇，知我同你雙係我錯，所以我打晒ｄ野，你淨係負責肴底同食晒我ｄ野係應該喇，唉．．．」

舉人院線又有新口號：
「循環不停為你播映　帶你眼睛環遊世界」

堅駿套鼓俾人劈左兩年，終於都功成身退。俾我預期中挨得耐。
「堅駿，如果你咁都搞掂埋的話，要我每次幫襯捐多十蚊又點話．．．」

Tomb Raider，比預期中失色。到底係香港電影特技製作進步左，定係荷理活特技水準下降？有多好特技同動作場面可以話只有香港電影水準。 最正之一都可以話係搵U2唱主題曲。"Ele-Elevat~ion~~~"
睇緊戲時又有正野。睇左大半套之後有班人走左入黎睇睇下就走，其中一個居然留低係到冇野做，係咁走來走去好似搵人咁，繞場兩周之後仲 搵個位坐低睇到片尾。好野。

芭啦芭啦櫻之花．．．我睇油脂好過。

旺電１１０號舖DIGITAL急聘廉價勞工，低薪＄２２／小時，朝十二晚十，有意者請向店員查詢。

凌晨零時五十分，八號東北強風信號現正懸掛。到底這個八號風球能不能夠維持多五個小時？答案是．．．

．．．能夠。又可以到正常起床時間才起床。不過似乎這會是今年最後一個八號風球了。

大部份人都說面試時表演不太好，可能入不到教院．．．你們說是悲我卻說是喜。

封神榜．．．到底無線幾時先知佢ｄ所謂電腦特技好很白痴得啖笑？

Poly開電子遊戲製作課程？真唔真？香港都接受到呢味野？

估唔到學生會有「八號風球後假期」。成日先得一半人唔夠返黎上堂。

發現自己教數學居然掂過教英文．．．

尋晚百萬富翁破最多人玩紀錄，總共有八位參賽者有得玩，另外有兩條友拎０蚊走。今晚就再破多個紀錄，成晚有三個人冇錢分。又試有一條友 第二條就錯戇居居走人。真係笑ｄ人冇錢拎都笑到悶。

百萬富翁教書法，一教班學生就識。活動教學萬歲！亞視萬歲！！百萬富翁萬歲！！！

乜今晚百萬富翁有人拎十五萬？剩係走開左一節，咁都走寶？次次冇睇時先至有人拎多錢，證明我真係邪住ｄ參賽者。

校花路經九龍城，得閒冇野做就搵左我同探花兄「義務」陪佢食宵夜。
「嘩，原來由九龍城咁樣穿就到土瓜灣，真係神奇！！！」
「喂，我想叫佛爺快ｄ砌好部機，應該點樣做呀？」「你咪封番封利是俾佢囉！」「咁，應該封幾錢呀？」
「小姐，請問想點ｄ咩呢？」「三個Ａ餐丫唔該。」「三位都係要Ａ餐？」「唔係，係我一個人要三份Ａ餐。」
食左成晚，校花教曉左我一樣野：
性教育，由家庭做起。

本來長週，但係全校都拆晒冷氣，返去坐成朝咪戇居居？索性唔返，留係屋企過「正常生活」，兩點先起身。

今年中一派位真係癡Ｘ線。
更正，應該係　香港個教育制度真係癡Ｘ線。

終於 － 終於都派成績表。幾乎全C，Maths仲要得個D。IT錯成大半份卷都有條C，奇。GPA跌成0.5，真係笑爆咀。
阿鬼佬申德澤都算俾面，OUC俾條A，睇黎都唔會係因為我份「體驗版」功課。只有一句：
「多謝各位姊妹。」
最仆都係GS。如果你一早講有得遲交，我地就唔使趕成咁交得咁馬虎啦。不過算，吳本韓不嬲都睇死我地組，份功課搞成咁樣再經佢手都有 條B，證明我地好有升值潛力。

出街打機，激戰途中有兩個一蚊銀由側面飛入，「叮」然兩聲，唔使擰轉頭睇都知係上次條無品霸機友。
「小朋友，等阿Sir教精你，下次想扮型呢就唔好掟兩個銀仔出黎咁寒酸喇。真係想型的話就掟兩疊銀紙出黎啦。」

「阿妹，掂！一早就話你會入選！為我地劉家爭光！」
掂！舍妹終於打贏一百八十幾人，入選「森美小儀」歌劇團！之前覺得唔會掂只不過係我地「見怪不怪」，出面ｄ人見識少未見過 我地劉家之神、瘋、癲、狂，一出手自然放鬆入選。掂！

終於見識到何謂靚結他。一拎上手個感覺已經唔同，再掃一掃，得喇，唔使再講。萬幾蚊貨就係萬幾蚊貨，唔係我地ｄ市井貨可以相比。
「真正好結他，五十年不變。」

都唔想係度講Game，但係又真係太正冇計。
Max Payne，擺明係玩香港動作電影Feel，當連隻Game入面個主角自我介紹都話自己似周潤發既 時侯，你就會感受到香港電影係幾咁偉大。最重要係槍戰途中只要Click下個掣就可以標童標John Woo上身，全世界因你停頓，當你見到手持雙槍 之主角慢動作飛身連開六槍，子彈由槍口拖住一縷縷白煙飛出，係空中緩慢飛行劃出六度灰白軌跡再準確射入六名槍手頭部，眾槍手之慘叫倒地聲 同自空中翻滾落地之主角手中雙槍之退膛聲同時響起，你都會不自覺咁為香港動作電影喝采。
UbiSoft出臥虎藏龍，Interplay出Matrix，睇黎西洋就黎會多一個Game Genre叫HongKong-Action-Movie-Like Game。

好耐冇出過黃埔，好耐冇食過雞記，好耐冇見過也哥，好耐未試過三條友一齊吹水，好耐都未試過好似今晚咁爽。吹乜水咁爽？
"We are talking about Murphy's."

賢少又見賢少。大伙唱Ｋ，冇野講，正，雖然又係做陪唱。

「我有時都想同ｄ人夾下Band，但係唔想玩，同佢地相差太遠。成隊Band四個人彈結他，有條友彈到超勁，勁到SONY搵佢做 樂手。其他三個就冇咁勁，不過都有阿Paul水準。」
西洋就係西洋，鬼就係鬼。西洋鬼的確唔係我地東洋人可以相比。

"What a wonderful world..." Louis Armstrong，冇野講，永遠都係舊歌最正。而家ｄ歌 － 尤其廣東歌 － 永遠都唔會咁有意思咁值得欣賞。

今日成日都好吽。成朝都坐係度唔知做乜，連出街打機都冇乜精神。

「幾有趣喎，有得同梁漢文同何韻詩同台做戲。」舍妹話我知入左個劇團之後第一單柯打我同舍妹講。
「頂，乜咁７呀。」舍妹話俾我聽個咩咩崇拜個製作特輯之後我同舍妹講。

馬騮星球。「一齣好戲。」佛爺由散場到散水唔知重複左幾多次。最後三十分鐘完全係充滿住「符碌」、「預左」、「玩晒」加「吹脹」。 ｄ路「人」真係好鬼路人完全冇野講。主角完全係為左自己走路完全唔使理其他人咁款。由此至終都完全唔驚險，個主角完全唔似係走緊難。仲有， 你永遠都唔會明劇情個邏輯，一架載滿馬騮之太空站跌落地球居然會令地球變成馬騮星球。

「十一點半囉喎，夠鐘放工。」「唔好，今日坐多一陣，過多幾個字先至落去啦，咁樣好睇ｄ。」「又好。」
三個字之後，一起身，立即黃雨。
「點解咁玩我？想做個良好市民都唔得？」

點解咁早紅雨？如果可以遲十個鐘先掛得話．．．

中央台全面革新天氣報告，改用吟詩頌經的方式報導天氣，觀眾除了可以知道最新的天氣消息外，也可以學到不少的詩經與人生哲理。革新 後的天氣報告大受觀迎，收視率一直高企，同時亦為中央電視台帶來龐大的廣告收益。
「颱風玉兔肆虐廣東省沿岸，帶來大量的人命與經濟損失。香港天文台因為玉兔而錯誤懸掛八號風球十三小時。可是，糊塗的 並不是颱風。」

之前一個月為左間珠算學會猛練算盤，點知打左成個月都冇搵我做野，到而家冇掂成個月乜都唔記得晒，又叫我幾日之後去試教一次加考試。 開頭簽約時話有「彈性上班時間」，原來係我彈性俾佢，隨傳隨到唔要你就唔好到。

支結他終於都彈斷線。功成身退。

只不過係兩日，也哥個網頁已經擴充左幾倍。有工開同冇工開分別真係大。

咩話？學左半年就話去到三級？結他有冇咁易學呀？

訓，起身就打算盤，打完又訓，訓完起身又係打算盤，今日就係咁充實。

打算盤打到傻左，連計六十幾條都冇錯。
「得道？」「迴光返照。」

珠算考試考第二，不過全場得四條友考其中兩條友合格，仲要合格兩條友一個滿分一個Bare Pass。又可以用番一句會考之後好耐都冇用過既金句：
「真係一世死符碌。」

龍吻，睇完之後要嗌李連杰萬歲、中國武術萬歲同埋針灸萬歲。除左武打，又真係幾好笑。ｄ英文好好好易，可能因為要就番李連杰，但係最冇 癮就係應講中文時ｄ中國人又唔講中文。
「睇到最後先知道個戲名點解，真係好有深度。」「都未見過ｄ人做英雄做得咁毒。」探花話。
仲有，唔好呃我，海報入面條友明明係趙文卓。

漢 終於都係澳洲寄張明信片黎，個半月喇哥仔。又屈請食飯，送左餅街霸仲唔夠呀？
「『Ｘ你』 送住呢兩個字俾你先，Postcard冇信封，唔方便爆粗。」

今日有個女學生著到成個少數民族咁返學，型爆。

放榜，又到放榜。今年放得好靜。理科得兩條友唔掂，都預左。文科唔知點？
最重要就係冇人入到教院。

「FF VIII 主題曲　王菲Eyes on me！」
「醉翁亭記　歐陽修！」
「香港交流電電壓220！地線黃綠相隔！」
「Command & Conquer: Red Alert 第二張資料片？The Aftermath！」
「彭仕國係鬼佬呀！有中國血統！！」
「取火氏發明鑽木取火？你唔係呀？」
今日個半鐘電腦堂工作就係幫班學生做百萬褲窿智囊團．．．

想教小畫家，班學生打死唔制，一上也哥個Ring of the Kings，睇到班學生 拍爛手掌。「你地都想用小畫家畫畫畫到咁靚呢？所以我地今堂教小畫家。」班學生立即調轉頭繼續百萬褲窿。

早知唔教也哥搞FTP，識用之後為左之前俾Geocities個「無痛上傳」搞到鬼死咁痛苦而癲狂。

估唔到出街打機都撞到基耀。冇野講，玩篤篤機玩到成佛。每關時間由一百開始倒數，「九十五先玩晒已經算慢。」只要行能源仲有三格就 可以玩落去。但係到最後都係要輸，因為隻手動作太快，快到部機都Sense唔到當佢冇掂個Screen屈佢輸。
不過，打機打到成佛一回事，冇書讀又係一回事．．．

同個行家係ICQ傾，三個字之後就知道入教院讀Degree真係好好好很戇居。

如今二十又一年矣。狂想：
　每日都有Autonomous Living，打一個鐘算盤，彈一個鐘結他。
　一個月內學成珠心算，再係今年內考番個撚手九級番黎！
　半年結他學到三級，按照正比例黎計下年年頭可以去到六級啦？
　張書檯已經四年冇執過，希望今年會係最後一年。
　以後寫論文都唔使再Quote野。最憎睇書，同埋發覺Reference越多越齊分數越低。

估唔到今年其中一份生日禮物，就係今屆中五破左我地個紀錄，六個理科生轉讀文科．．．不敗之身終於被破。

「阿Sir，屋企冇飯開，阿媽又唔係屋企，我今日早ｄ返黎喇．．．」
做阿Sir做到要幫人湊女，我都算係第一個。

成班學生一齊Download個ICQ可以連個寬頻都搞到Hang埋，冇野講。

見到有個阿伯坐住架電動輪椅，大模斯樣係正條馬路中間行，後面仲有架巴士跟住，勁過癮，搞到想買番架玩下。

機場入面最開心之人，就係一邊打機一邊周不時回頭懶藐視咁睇其他人，打完之後立即頭都唔回懶瀟灑但係又要快步走出機舖之人。對佢地 黎講自己永遠都係最勁，因為永遠都唔使面對現實同事實。

三點先起身，都算係對得住自己。

Gerund，真係要去上海？．．．

原來紀錄係年半內考到六級，睇黎我手結他都要努力ｄ。

「標準」式打鼓法：鼓棍自備。
今日乜事？全場都帶私家Ｑ黎打鼓？好有江湖Feel。
有條中手，自己圍內有對棍唔用，問其他人借棍打，借勻全場咁多對棍黎打之後大聲宣佈：
「唔得！都係打得唔順手！下次都係帶番自己對棍落黎打！」
地硬，地硬，我地ｄ棍唔似你對咁鑲金鍍銀，你梗係用得「唔順手」啦。

估唔到恐龍哥都會黎打機。可能真係做裝修做得太辛苦黎散散心。

贈呢句俾今年放榜人士：
「古來懷才皆失意，科場豈為我輩設？」

死喇WWF終於都俾WWF搶左WWF呢個名以後WWF都唔可以叫WWF也哥點算？ 你個JWF會唔會又惹官非俾JWF搶番JWF呢個名？

做到校工都叫好想我下年加畢業之後都番黎做，阿Sir又薦入童軍，得一句說話：
「我黎打份工0者老闆。」

基因電腦終於發明成功，令現實又再次向小說走近一步。這些小說中的人類的結局都是因為自己的「超級發明」而導致滅亡。

凌晨點幾兩點，人都訓埋，老母先打電話黎話旅完行返到香港幫手拎行李。掙扎落樓下，先發現得一箱行李。
「娘親，兩點啦，我都訓左，得一箱仔野自己拎都得啦，搞到我遲到點算呀．．．」
「訓左又點呀遲到又點呀？唔使幫我拎行李呀？」
冇野講，兩個眼訓之人辛苦少少搬一箱仔行李都唔得，硬係要搵多個沉睡者陪葬，都唔知做乜諗野。劉家果然冇個正常。

果然，今朝果然俾娘親搞到遲到仲要係遲超大到。娘親又係得一句：
「遲到又點呀？唔使幫我拎行李呀？」

哥登堡終於裝修完工重新開張。九龍城紅磡警署反黑組、九龍城警區防止罪案科、九龍城警區警民關係科都送花圈恭賀，不愧為 龍門客棧。

睇完人地教一堂珠算，感想係就算打算盤唔掂都一樣可以教。

都好耐冇食過火鍋。一到八點三，全場電視全部轉亞視睇百萬富翁，一到九點半，全場又轉番睇無線剩番兩部亞視。終於明點解除左百萬富翁之 外亞視其他節目收視都超低。有條友一邊睇一邊狂叫答案直情係佢玩一樣。係好樣衰好傻仔，但係可以玩得咁投入又真係好難得。

侏羅紀，睇完之後唔想再提，一個字講晒：「廢。」
「點解呢ｄ戲都可以成場爆晒咁多人睇？」
上兩個星期睇完戲之後佛爺都問我呢個問題，今次輪到我問番佢。

好野，電腦房終於裝修，唔使再教電腦，日日都可以十二點收工。不過會唔會呢幾日搞掂？
「點會呀，有排搞囉，佢地連油都油錯，應該油灰色就油左白色，八月都唔知裝唔裝修得完。」
「好事黎丫。」

Sam少同 漢 終於浸淫完回歸，打俾我第一個電話唔係報平安、唔係報不安、係叫請食飯。

Lawrance哥終於都腥衣貓過黎，叻姐又催，又係時間被屈請食飯。好啦叻姐，就當係慶祝你五條Ａ啦。

終於 － 終於都出Sem 3時間表。英文又係博迪學教。份功課包艇又唔去浸淫，我已經想像到開學第一堂見到佢 時會俾佢小得幾慘。

劉以達《水底樂園？》（記住有問號），係幾正。成隻都係玩迷幻。「乜你又聽ｄ頹廢碟呀。」舍妹聽到之後話。冇計，物以類聚。
事實又好偏見又好，最正都係夏韶聲。《故居夜遊》，劉以達話作曲時作到喊，聽過可能你都會有同感。

點半就到機舖，打到兩點幾三點條友先黎，但係聽番留言信箱條友居然話一早到左機舖等緊我黎。七不思議。

「你今年會考考到十Ａ，請問你有咩讀書心得呢？」「到臨考試之前先讀書囉。」
以上係今年放榜之後瑪莉諾某十優狀元接受訪問時所講。但係睇極咁多份報紙，份份都話班狀元接受訪問提供讀書心得不外乎「勤力讀書」、 「努力工作」等等的所謂「心得」，就係唔見呢ｄ野出現。點解？Constructive Reality...

窗、窗花、冷氣可以分三間公司黎做，呢間學校行政真係好有特色。搞成咁，抵你開學都裝修唔晒啦。不過我唔會怪你。

死喇，出到機舖居然會冇心情唔想打機，我梗係病左重要病得好重。

真善美廣南終於俾惠康收購，日前正式開張。成班阿伯師奶叔叔婆婆哥哥姐姐弟弟妹妹都不顧一切咁衝入去，就算唔買野都入去睇下，令到間 超市成個旺角咁旺。冇計，始終餓左個幾月。

真係臨走先至聽到咁多內幕。呢個世界真係好多人有濕疹，靚女叫寫推薦信就寫到接近完美，男搵佢就叫人「自已寫。」自己手下都唔幫，好在 你唔係校長。
前車可鑑，我已經可以想像到走左之後個星期會俾人係背後插成點。

有錢就係有錢，話八點入席，點知到八點連「席」都冇淨係有得睇人地Show Off；終於九點入到席，每食幾度菜之後又唔上菜，要全場等對新人 講夠野玩夠野先至有得繼續食。如果抽走所有無聊環節，最少可以早個半鐘食完。不過人地有錢，連你ｄ時間都買埋，吹脹。

「廣州神童」個師傅又走黎香港教珠算。邊個係「廣州神童」？如果你有追開《香港早晨》的話我就講到俾你知．．．

佛爺真係好野，冇一次幫人砌機可以一次過成功冇問題。今次部機可以開唔夠廿四小時就燒底板咁抵死。星期三先至搞得掂部機，今次校花一定 等到發花癲。
大家都冇野做，又見大家都發福左，決定進行食肉減肥法，兩條友落雞記食一桶。估唔到佛爺原來食得咁少野，不過吸收得好，逢脂肪同碳水 化合物都一定吸收得晒，咁先可以咁肥。

「你之前學電子琴時都捉唔到拍，成日彈到甩晒，估唔到你而家彈結他反而捉得好準喎，連切分音咁複雜都一下彈到。點解你 好似開左竅咁樣？」
事實就無謂提，當全人類都仍然認為E-game只會係ｄ白痴益智ABC遊戲時，我講事實只會俾人當傻仔。而且如果話俾佢知我寧願幫襯機舖 都唔幫襯佢，唔俾人小先奇。

原來珠算乘除同筆算一樣，不過一個用筆一個用算盤，同埋珠算要做多好多野煩好多仲要一計錯要番轉頭就笑爆咀。都有ｄ多此一舉。

都好耐未見過呢ｄ機舖。打打下Hang機，居然個阿伯肯賠夠兩局過我。真係請跟緊機條友打番舖又點話。呢ｄ遭遇真係買少見少。

「丫，你都幾勤力喎，仲早過我到．．．」阿會長，我早左出門口而已，唔好捧到我咁高．．．不過我都真係唔明點解ｄ人可以咁唔準時，遲 成個鐘先出現都夠膽死。

《三個光頭佬》，都好耐冇做過呢ｄ節目囉。不過都係鍾意《今夜不設防》倪匡、蔡瀾加黃霑鐵三角無敵組合。

都唔明點解有ｄ人成日都以為自己睇穿晒知道晒人地ｄ野仲要當自己好很勁。
－ 以為自己乜乜乜就當自己真係乜乜乜，就好似拎住對真鼓棍去機舖打得兩手打鼓機就以為自己真係識打鼓一樣咁 戇居。
－ 真係知道又點？使唔使我當住你面讚你好威好勁好很醒再頒個獎座俾你？

教院又見教院。久違了的教院，久違了的 漢 與Sam少，久違了的個半鐘車程．．．

真係Reg完之後，我又可以好自豪咁同其他大學生講：「我生活點都充實過你地。」 漢 仲折墮，真係剩係睇張臨時時間表都知道點都 擺脫唔到返足一至六仲要日日都要返八點半之悲哀命運。希望到時唔好又一個唔覺意唔夠位分就官方派位搞到我連星期三都冇Dayoff要返黎無聊一堂 就走咁戇居。
第時你問我入教院有乜好，我只可以話俾你知院校同大學大家都係收四萬幾，但係我地就可以返多好多日上多好多堂，你俾四萬蚊學費完全係 物超所值好很抵。

師範醫館個男醫生真係好正，服務態度好過其他阿嬸多多聲，仲要同你一邊睇病一邊吹水，真係俾十五蚊同佢見下面吹吹都抵。
「我第一次睇你個頭，第二次睇你個身同對手，今次就 睇你對腳！」
講野都充滿江湖味，真係睇完之後想同佢講句「多謝大夫。」

漢 去完澳洲浸淫完之後有以下得著：
－ 原來 Son of a bitch 唔係「沙灘小子」
－ 原來Funny Land十幾連勝之大埔軍佬神去到外國只不過係路人甲，接到人地一招四十幾HIT唔死已經係好勁
－ 原來對住鬼佬千祈唔好舉中指同反Ｖ，會即刻俾人拉入後巷圍毆
－ 原來鬼佬好驚中國人講「Ｘ你老Ｘ」，就算俾人打劫都好只要講句「Ｘ你老Ｘ」條鬼佬都會即刻好驚咁掉頭走仲勁過念經趕鬼

漢 ：「你見過佢之後，就會同身邊所有仇人化敵為友，因為見過佢之後，你先知何謂真正賤人，其他人點賤都係微不足道。」
Sam少：「每次見到佢，真係想衝上去一把摑埋去"FXXK YOU!"一講親野就又一把摑埋去"FXXK YOU!"正手摑完再反手摑多下．．．」
居然有人可以得到如斯精彩評價，搞到有ｄ後悔冇去浸淫睇唔到咁多好戲。

而家先睇《全職殺手》係咪太遲？好多人睇完都話悶，我就覺得冇咩丫。叫做港產片，但係全片最少講就係廣東話，真係諷刺。為賣埠都唔使 搞成咁呀。最正係坐「超等」位仲要包場，村友真係一邊睇戲一邊吹水咁堅。
得啦Sam少，下個星期搵日出黎陪你睇《少林足球》，火鍋直落入我數又點話。

唔講你唔知，原來《陰陽路》、《問米》等等呢ｄ低級香港片電影海報，我地當係草但係外國當係寶一張要成幾百蚊。

終於都裝到冷氣。圖書館終於回復生氣，全體上堂都上圖書館避暑，教教下校工都上埋黎大掃除襯熱鬧。如果校長室部冷氣都拆埋的話，相信 校長都會竄上黎呢個全校惟一有冷氣之空間。

佛爺．．．又係「一個字」，呢一個字可以成半個鐘咁長，睇黎旺電個時空真係有ｄ問題。

校花真係．．．我完全諗唔到有人電腦可以廢成咁。佢係我見過咁耐第二個絕對電腦白痴。

The Weakest Link（死都唔叫個中文名），真係好廢，唔係最有料贏而係俾個垃圾贏，唔想睇。更加唔想睇鄭裕玲。

所以話要睇多ｄ報紙．．．原來《百萬富翁》同"The Weakest Link"最精彩之處在於．．．
【明報專訊】《百萬富翁》與《一筆Out消》，看來勢不兩立，但原來兩個節目的創作班底，是同一班人。在英國，這班創作人製作兩個節目 自己打自己荷包則因此相當豐滿。
《百萬富翁》九八年啟播，一向被視為較弱的英國ITV播映後收視所向披靡，BBC急忙要找另一個節目對撼，結果找來創作《百萬富翁》的 原班人馬，想出了《The Weakest Link》這個節目。這創作人更要求BBC以高《百》數倍的版權費出售版權。BBC見劣勢，多多錢都肯花。
這條左右逢源的橋果然放諸四海皆準。英國版權人專將《百萬富翁》推銷給國家或地區的弱台，強台見弱台扭轉形勢，亦同樣願意以較高價錢 購入《The Weakest Link》的版權。無線見亞視《百》節節領先，亦急急商討購入版權，播映《一筆Out消》對陣。據了解，亞視購入《百》的版權 費只數百萬元，但《一》則接近二千萬元。

終於都做到最後一日．．．（乜唔係聽日先係咩？）聽日係成個暑期班最後一日，就算班學生肯上堂，我都冇心情做啦。

協教無敵

最後一日返工。臨出門口連個天都為我而喊。不過係開心到喊。

班學生為左我同林哥今日正式收工搞左個小小大食會，成日戰績係半打煙肉腸一碗蝦條兩碗薯片半樽可樂再可半樽雪碧，食到之後又有人請飲茶 都去唔到。好似食好多，其實只不過係全場人一係唔食一係小食結果要我哽晒。
煮飯又得煮送又得連煲湯都得，煙肉腸原來只不過係碎料。五年級已經去到大廚級，連個年代真係想係身邊搵番個女仔差唔多級數都好難。
對住幾個學生只不過係一個鐘，已經覺得我一年以黎生活可能都冇呢一個鐘感覺咁好。唔通人真係會越大越俗？希望佢地唔會入俗套啦．．．

二零零一年八月二十四日中午十二時正，劉Sir同林哥正式退休。劉Sir繼續學業，林哥開始失業。希望林哥可以快ｄ搵到份心水好工。到底中學 教師文憑加半年工作經驗對教師學位誰勝誰負？

完全明白人性、可以係系統程式範疇內做到未卜先知、完美部隊戰略配合、充分利用人力不可能克服之盲點BUG黎為自己製造優勢，呢隻Game 個A.I.都可謂前無古人。都好耐冇撞過一隻Game可以令我爆咁多粗，但係又要一面爆粗一面入錢玩先吹脹。

呢幾日真係．．．連打機到底係對兒童好定係壞都可以嘈一餐．．．歐日大戰，誰勝誰負？我當然係支持歐盟．．．
「我理你打機係好係差，仲至我都係咁機照打。」

倪匡，佢「而家」ｄ書都係二十年前作品，我地十幾二十年一直咁睇ｄ書其實都係二十年前ｄ野，但係題材同內容到而家都適用甚至呢幾年 先知有人提出或者發現，冇野講，你永遠都唔會明倪匡做乜諗野諗到咁神奇咁有遠見咁有深度。《第二種人》，而家先睇都仲有驚喜，「這種設想 『只此一家，別無他出』」，倪老匡八七年講呢句說話到而家十四年後都仍然正確。
「第二種人沒有獸性，他們比由動物進化來的人可愛多了，代表了善，可惜，善不敵惡，這算是一個寓言。」

終於可以過番ｄ退休生活，十二點先起身都嫌早。不過為番教院冇法子。

基本上淨番一科未得，但係呢科得兩組，我入唔到第一組都好自然會係第二組啦，都唔明點解硬係要人番多日去打多幾個字話俾個Database知 而家入唔到第一組所以要入第二組。橫掂唔係一就係二，點解要咁樣搵我黎搞？又點解唔可以留番俾校務處ｄ人幫我搞？佢地星期六放假就要我 戇居居番黎無聊？不愧為院校。全日意義就係番教院食雞同埋同人吹水。

個乜鬼Twins其中一個原來係鴨浰州街坊。佢阿婆知道左個孫女成左名之後就成日剪報，連卡拉ＯＫ廣告都剪，梗係，「光宗耀祖」喎。
「阿媽，乜佢係住我地條大街咩？大街有女『目及』我冇理由會唔知喎．．．」
「唔使諗喇，打牌時佢阿婆講左俾我知佢有好多男朋友，你收皮啦。」
「．．．」

「歐陽Sir，我今晚要上健教堂！」
漢 真係受觀迎，連去Campｄ女Camp友都要佢教番堂書。你真係無可能諗到幾男幾女入Camp原來就係為左一齊上「健教」。
另一樣野估唔到，有個女仔同我地一樣又係廿零歲，但係居然已經係實習飛機師。真係人地中一就出去外國讀書，讀番五六七年就拎住個飛機師 名銜番黎香港。係香港讀書真係咁冇出色？

每日一書：林振強《壹個人在四張床上查字典》
林振強出品，必屬佳品。總之睇下啦。

一見勁過自己ｄ人打就即刻閃開扮睇唔到，人地打完到自己打就係咁耀武揚威，「冇眼屎乾淨盲」真係開心。

見到有兩個高人爭論到底電腦上面入ＣＤ舊野係 DVD ROM 定係 VCD ROM 。

唔得，退完休之後真係好頹。

Sam少叫到，終於都去左睇少林足球長版。
「上完短版先至上長版，之前睇左短版ｄ人一定捶春。」
係呀，所以我一面睇一面捶春囉。人地笑多十分鐘，我就捶多十分鐘。

退左休，都要搞掂埋東莞ｄ蘇州屎。完全係同之前返工一樣，分別係打多好多字同埋冇錢收。

9999960　真係咁大個仔打十幾年機都冇幾可遇到過呢個最高分。點知得來全不費功夫，部機Hang一Hang 就有。所以話呢個世界真係好鬼死哲理同戲劇性。

九四一又見九四一。今晚職責就係開房。
事隔一年，佛爺終於重回IVE。好，終於有書讀。希望兩年之後可以成為旺電一一零真正老闆。

通完頂，訓。繼續訓，因為今晚又要通。

Victor又見Victor。都係咁頹。

門口舖做Reception，隔離間舖出機，後面間翻版出Game，半層商場聯手只係為左賣一部PS2。

我都知PS2係好很強，但係阿Victor兄點解你硬係要話PS2唔使Load碟？結果千辛萬苦係美孚抬部機出番旺角只係為左聽個姐姐仔講句 「你等部機Load完碟先至好轉碟。未Load完唔玩得架。」難為我要做代言人上完又落落完又上同班阿姐理論講到成班阿姐見親我都咀藐藐。以後 都唔使再上好景，上親都會俾人打。

ｄ鬼佬玩《百萬富翁》同"The Weakest Link"真係玩到癡鬼線。你去外國睇下你就會知道香港ｄ玩家係幾咁笑爆咀。

難得出到美孚就順便打個電話俾校花，真係一句「剛剛飛完」就要遙控我兜勻成個美孚新村買碗麵加狗糧上門。除左「自作孽」之外我搵唔到 更合適形容詞。
阿花姐，你不嬲都知我無聊，點解硬係要認為我玩你係因為幾年以黎懷恨在心加處心積慮呢？

三條麻甩佬大半晚消遣，唔係鋤啤唔係吹水，係煲《億萬富翁》。

李志雄又見李志雄。Lawrance哥，Sandy姐，叻姐，好耐冇見。雖然通完頂又要晨早由美孚飛出小西灣，雖然要冒住黃雨澗住水咁去搵飯開， 呢餐開得絕對有意思。

「仲叫自己做『校長』喎，一條問題都答唔到，第一回合就出局，都唔知點做校長．．．」
連正副校同先生開會都講呢單野，呢個「校長」都可謂名留千古。番到學校肯定俾全校上至先生下至校工都串爆。

《房屋署職員咒死阿伯》、《印度街童自學八分鐘識上網》，呢幾日ｄ新聞真係好鬼有趣。

「喂，你幾時轉番行做學生？」
「仲有四日。」
「唔．．．我覺得個角色好矛盾．．．係小學惡晒，但係返到教院又要比人小．．．」
完全係啦。我不嬲都係一個充滿矛盾之人。

大陸有條友去醫院搞左十五個月減左差唔多三百磅。
「經過左十五個月，黃馳終於都可以好似正常人咁生活喇．．．」

真係估唔到睇睇下電視咁又通到一晚。

五點半先起身。跟住今晚又要去通，即係差唔多連續四晚都通頂。

二零零一年八月三十一日十一時三十分開始，等．．．

．．．等，等到二零零一年九月一日一時十分。Victor哥，放飛機就早出聲啦。

被放飛機，點算？兩條友坐係球場吹水吹足成晚。又係等，不過今次係等五粒幾鐘等麥記開門。好自豪可以成為全港第一個睇晒成份麥記 《新新專訊》之人。

食完早餐七點幾有乜做？打機囉。好耐冇試過為爆一隻Game洗成四十銀。

六點半先起身。每日都遲一個鐘起身，都唔知下星期一點算。

兩日黎盡破之紀錄：
－ 有史以黎最晏起身（六點半）
－ 有史以黎連續最多晚通頂（四晚）
－ 有史以黎一日內係七記洗最多錢食野（四十幾）
－ 有史以黎第一次係室外滯留成晚
－ 有史以黎最早食早餐（晨早六點半）
－ 有史以黎最早出機舖打機

極力推介：
模型雜誌《PG》
內容極PRO極詳盡，唔係模型迷都值得一睇。只係創刊號已經咁正，將來大把發展。

最後一日。有幾多歎幾多。

七月及八月總收入：17000
　　　　　　家用：-6000
　　　　　請食飯：-1000
　　　　數碼相機：-2000
　　打機食野雜碎：-2000
　　　　　　純利：6000

最後一晚想靜下都唔得。Victor兄，大學真係咁好讀？假都唔放晨咁早就走？唱完K仲要直落通頂，臨開學先咁搞鑊我呀。

得閒行下去旺角兆萬中心啦，斜對面有檔野會有條友表演魔術仲要玩得超PRO。結果兩條友真係企係度睇佢玩成半粒鐘。再睇真ｄ，你會發覺 表演條友好面善。唔知你知唔知邊個Andy？一個出名到去國際級魔術秀表演之香港魔術師。但係始終現實迫人，做魔術可能真係幾難搵下，而家要淪落 到街頭賣藝搵人買自己發明ｄ魔術道具。見佢咁慘，捐兩舊水過佢買副玩下啦，點知ｄ教學VCD原來都係八幾年出品，連佢上《點解香港咁過癮》示 範千術ｄ片段都有。過左咁多年，可能真係窮途末路喇想搵錢拍新野都冇。真係經濟衰退百業蕭條，連國際級魔術師都要去擺街邊檔，世界難撈。