渾渾噩噩噉就兩年，無無聊聊咩都唔知。灰。
今年個時間表課堂分佈非常之唔平均，懶講喇自己去「師範」睇下我Sem V時間表（係呀《讀後感 2.0》都出左請幫我將信息傳俾身邊企圖入讀教院人士）。
第一堂：英文
冇一年教英文條友會唔認得我，因為全班先得兩條仔仲要得我一條仔係自己一個人。唔走得堂啦佢實知。
第二堂：GS
「我地呢科要考試，你番少堂就一定唔知講乜學期尾實仆街！」講到咁嚴重，又唔走得堂啦即係。
第三堂：課室管理
開頭見呢組係教Year 1 Life Skill條友覺得佢教得唔錯先入，但係而家有ｄ後悔，因為佢一入班房見到我第一句就係「又係劉義你條衰仔！」隔左成年佢都仲咁記得我呢個頑劣學生，得啦即係又唔走得堂。
第四堂：IT
上年VB死得轟烈，今年Authorware唔敢玩野喇一定要上足堂學點整，雖然見到隻野之後第一句就係「挑！咪即係PPT版VB！」
朝八晚七呀真係，又唔走得堂喎。你話跟住三個月點挨。

今日零時零分正有冇開收音機聽96.8《夜媽媽與夜爸爸》？冇啦？我唔怪你，我明，可能對離奇神怪野大家興趣不大。但係今次講美國人其實冇登陸過月球，你冇理由唔聽架？聽下你就知道咩叫「陰謀論」。咩話？你唔係未聽過呢樣野呀？我都知左好耐囉喎 － 可能對離奇神怪野有興趣之人真係得我一個．．．另外《驚兆》呢套片係真有其事、真人真事改編，外星人出現捉人成個過程仲俾人拍低晒。內幕喇卦呢野抵聽喇卦呢個節目？俾埋條拎你喇小朋友預計自己夜晚會有兩個鐘冇野做又訓唔著就去聽下啦。仲係冇興趣？噉我都冇計，記得阿Sir話過你知「美國佬呃左你幾十年」就算啦。

一點幾先起身好有放假Feel呀真係。不過跟住又要番教院上一堂三點半，灰。可能番教院之真正用途就係為左放學可以「順路」上一上龍珠。
因為上個禮拜掃左太多貨，由琴日開始我已經決定今個禮拜唔買碟。但係上到去阿Rock哥（對唔住應該係Randy，噉我叫阿Rhoads啦哈哈你冇背景唔明架喇俾我笑下算啦）一句「喂今日裝左EPS喎碌番次啦！」噉就中招。當然淨係EPS三個字係唔會搞到我破戎：

今日劉家聚餐，結論係「有錢有Ｘ用！最緊要健康！」同「有錢有Ｘ用！肯使錢先有用！」我個六十幾歲大伯父以前做律師而家退左休又冇結婚，工做夠錢搵夠又自己一個人，而家唯一一樣野佢仍然會放係心上就係佢細路即係我老豆果三兄妹。睇佢冇乜大病痛又冇牽掛，而家之生活就係「鍾意做乜就做乜」同「等果一日到」。我幾羨慕佢架，需知唔係人人都可以享受到呢種生活。我老豆有個舊同學五十一歲，平日生生猛猛又行得走得，點知有一日突然間有事，九個字之後走左，死因係心臟衰竭，冇人見到佢遺容之前相信呢個事實。再摷番Ｎ年前一段新聞：有一晚一個廿零歲尼泊爾地盤工人寫信番屋企，寫寫下伏低左，佢ｄ同事以為佢思鄉冇理，後來見佢好耐都冇起身先發現原來佢急性心臟衰竭死左。係幾恐怖架，唔使講個世界局勢，淨係你自己個人你都唔知下一秒鐘會係點，所以係而家仲健康健在之時，好盡情享受玩多ｄ喇。
教我GS個阿Sir六十幾就退休，咳左八個月，醫生話未必有得醫；我老豆六十幾歲就退休，咳左幾個月，咳到醫生都話醫佢唔到。我都咳左幾個月喇。健康第一，今晚早ｄ訓。

六點就起左身去放狗，劉義呢條友好很健康喎突然間。
八點就落左車到班房，劉義呢條友好很得閒喎突然間。

今日呢堂學左ｄ乜我唔知，我剩係知呢堂要八點半番到上成三個鐘即係遲ｄ加埋FE就要八點半直踩到兩點半死得，知道個阿Sir係唔錯跟得過，同埋知道今個Sem除左GS之外堂堂都冇咩熟人今年又係呆滯地過。

暑假已經過左幾日，係時候做番個Summer Review：

記住早睡早起係為左健康健康健康．．．但係結果就係晨咁早起身又挨到仆街一番到屋企食完飯就訓訓訓訓訓訓．．．到十一點幾，起左身一陣之後又訓訓訓訓訓訓．．．死喇聽日仲要見老細喎乜都未做過點算？但係六點起身又確係太早唯有訓番Ｎ個鐘補番。呢個故事教訓我地如果ｄ骨頭賤慣，一係遲睡早起一係遲睡遲起，但係就千祈唔好早睡早起因為噉樣係違反自然定律後果自負。

永遠都覺得我地EAｄMeeting係鬧劇，成個過程邊個人講ｄ乜點樣講都係開會之前編好晒到開會時再做一次。其實個會議記錄係咪應該開會之前寫定呢？可能呢樣野係同「係校外開會永遠都要揀貴價茶餐廳」一樣係EA傳統之一。
開放日諗住搞唱Ｋ，一個永遠都唔會明白之不思議。唔知會唔會有我ｄ心水出現？

冇呀今日除左開會同見下老細等佢記番起我之外，剩係上一堂三點半英文拼音咋（可能呢科係我四年入邊最有意義最實用之一科）。為左廢事又出黎無聊夜晚又「順路」出尖咀食飯 － 我發現逢二四呢ｄ成日先得一堂我都會好順路去做其他野。
麥記咪麥記囉我都係一句「入到口就得啦」，反正出黎重點係吹水食乜都唔緊要。呢幾日差唔多堂堂都冇熟人悶到仆街，今晚有水係吹幾合皮。
上到HMV，「好多隻碟你都話正喎！」真係推介左好多好多碟，但係我都係得一句：「真係正呀呢隻碟！」除左想話你知其實除左POP呢個世界仲有好多唔同類型音樂之外，係主流入邊真係冇咩新野好聽。除左因為音樂發展開始技窮之外，仲因為我地個將來已經變成噉。我地其實好幸福，因為前人留左好多甚至太多寶藏俾我地，問題係你自己肯唔肯去發掘。我而家都係搵番ｄ七八十年代甚至係六十年代黎聽。話「ｄ歌太舊」之前，先話我知而家搵唔搵有人／樂隊玩流行曲正過Bee Gees、Air Supply、Carpenters呢ｄ老牌樂隊。

好野！不過都係要開工。是日工作係訪問，問番畢左業ｄ人之前做Portfolio做得幾慘。知唔知做訪問最難之地方係邊？冇錯，問唔難，訪先係最難。其實得十零條問題半個字唔使就搞掂，但係搵班友約時間做訪問就半日都搞唔掂。麻煩到爆所以最後我都懶理，鼠去龍珠蒲下好過。
冇喇今日係訪左八條友加問左一條友再行多轉龍珠係咁多喇。你唔係諗住我dayoff會做超過四個鐘野呀？

教院永遠都係咁無聊。科科都冇事係GS編到有一堂係星期六八點半，要人晨早起身山長水遠入到黎然後十點半走得係咪玩野？所以今日好多人都要求調堂，心水之一係星期四晏晝三點半，
「因為呢個時間冇人上堂！」
冇錯 － 假如我唔係人的話。我覺得我遲早會俾人打，因為星期四三點半其實係有英文堂要上，而我係全級唯一一個主GS副英文．．．

得一堂八點半係幾開心，但係其實唔係太合皮因為都要開工。晏晝要電話訪問三個畢業生，慘嘛？未最慘架因為夜晚仲有三件，ｄ時間仲要八點八點半十點煩到爆 － 我都想一次過做晒三條友呀但係顧客永遠是對的佢地話要呢ｄ時間做我都冇計。
訪問完之後我只有話真係有錢落袋囉，而最大果舊就係做Portfolio真係好Ｘ慘，問左七個冇一個唔係話「根本就唔夠時間做！」「完全唔知做ｄ咩架果陣時都冇人講！」開始諗下點樣去執定ｄ野以防跟住自己都要做。不過我知最後我都會同ｄ前人一樣「我年半前已經開始『準備』啦！不過交之前三個禮拜先開始做咋嘛！」
不過講真Portfolio呢樣野又真係有用。之前有成功人士甲示範一遞個Portfolio未畢業就有學校請，今日有成功人士乙示範一遞個Portfolio就升職，因為班阿頭未見過Portfolio所以就覺得條友超PRO立即升佢職。

夜晚睇《警訊》，有兩條友揩野，有關人士支持佢地夾Band等佢地從良。睇完之後有ｄ灰喎我。我為打鼓要出去打工賺錢挨貴學費貴房租，人地揩下野就有得玩，喂係咪即係要我去隊下草你班友先安樂先？

「再見喇，TRHK！」
冇錯，再見喇。想當年（其實只不過係暑假）一點起身就係焚機焚到夜晚兩三點每日可以聽成十幾隻碟，而家開左學就算加埋搭車番放學加空堂時間都焚埋一日都係七八隻少成半，今日見減價支持下掃左七隻即係跟住兩個禮拜都可以唔使再係龍珠出現。

今年真係好Ｑ灰，因為ｄ功課居然折散晒隔幾個星期交一份，好似英文聽日就有野交喇。我都知噉樣野迫我做野係好ｄ，但係對我呢ｄ頹友黎講當然係一次過整份大野算啦反正我慣左乜功課都係一晚通搞掂，而家拆散晒真係麻Ｑ煩，即係擺到明想我唔做功課。

真係咁大個仔（小學唔計）第一次用快勞執notes。係真架連當事人我都有少少驚架。

「再見喇，TRHK！」
冇錯，又再見喇。冇計始終番屋企程車一定經龍珠，真係送到上門冇理由唔上去兜番轉架？就算唔買碟都要焚下機睇下碟啦。今日有Rock哥（定係Randy？其實識左咁耐我都唔知你係叫咩名？？？）為我地帶黎Dream Theater "Live Scenes from New York"。呢隻真係正野之前HMV減價都想介紹下不過唉．．．呢隊野四條友技術係屬於世界最頂尖一批，想知咩叫高手睇下佢地Live就知：就噉聽係好快但係其實佢地係彈得幾慢下 － 因為太容易同輕鬆喇對佢地黎講。

覺唔覺開左學ｄ段記短左好多又冇咩講？梗係啦番學冇得頹嘛番到屋企梗係乜都唔想做啦。其實有好多野想寫／搞架，不過懶郁嘛。

好Ｑ灰呀禮拜二剩係得一堂三點半都唔知番黎做乜。（下星期二英文增潤開班時又會話「好Ｑ灰呀禮拜二八點半ELE跟住三點半GS唔番又唔得。」）

好Ｑ灰喎我發現開左學之後真係，即係唔係唔想寫多ｄ但係我又真係頹到我都唔想講野喎。

我發覺我逢星期三都會八點鐘番到。上個星期就係得閒得滯，今個星期就係開工 － 係呀係開工呀八點半上堂但係八點鐘就俾老細召番黎開工。可能其實係佢太耐冇見過我呢個曠工多時之頑劣員工心掛掛所以晨早call我番黎俾佢見下。

今次個八號波唯一用途就係令到全世界番／放學／工時煩到仆街然後以為聽日唔使番學／工但係結果要喊住噉訓。

知唔知今日係九一一一週年？我唔係問你知唔知今日係九一一一週年，我係問你知唔知原來噉就一年！

星期四同星期二一樣灰，又係一點起身點半食飯兩點出門口三點半上堂五點半閃六點半龍珠八點食飯然後頹到唔知幾點就訓噉就一日。基本上而家一個禮拜係得五日。

英文拼音呢科真係一舊究極雞肋：係有用呀我知我都想學喎，但係每個禮拜整一野quiz咪即係迫我唔學？好懷念Year 1時Self-access得閒就上去英文系搵阿Jack吹幾咀，佢開心我高興又真係學到野。（其實當年Self-access我都係學拼音，不過最後次次上到去都淨係同阿Jack吹水冇乜傾過學拼音ｄ野結果咩都學唔到）
叻姐，似乎今年又係靠你打救我喇哈哈∼

而家用緊個免費上網account由中六用到而家，而由中六到而家都係一樣每次打風就唔知點解上唔到網。所以我成日都問
「丫係咪露天既呢個server？」

冇呀今日dayoff所以咩都冇做，晏晝見得閒得滯出街打鼓加打機。真係落到街先知原來十蚊紙出左囉喎。以下係我行一條街（係呀係一條街咋）聽到對新十蚊紙之評語：
「嘩乜咁似用黎玩遊戲果ｄ紙既？」
「似張公仔紙多ｄ喎！」
「ｄ紙質幾靚喎。淨係ｄ質地咋！」
「呢張野真係有人跌左落地我都唔識執喎！」

前日開始到今日都上唔到網。可能個露天server真係俾颱風打爆左。又可能爆果個原來係我個modem。無論爆乜都好，爆到探花兄唔知今晚有飯開就係真。死喇我發覺我開始過份依賴電腦，一上唔到網就笑爆咀電話都唔識打。
咦原來佛爺同權叔都最後一年囉喎。早知我都讀IVE啦，橫掂挨多兩年拎個Degree出黎都係同拎Dip一樣搵唔到工。

打完風雨過天晴，我部機都係終於上到網！但係．．．想緬懷下九十年代初要打幾十次電話先連到線加世紀極速38K上網就上黎我屋企啦！而家我都唔奢求可以睇下網頁喇，可以打十次電話以內連到線check email ICQ又connect到我已經好開心。
想當年見到IE「不顯示圖片」呢個選項時反應係「唔使咁復古呀？」估唔到我而家做埋古人先勉強上到網。灰。

九月冇習補係幾灰架少左成千幾喎（遙想當年高峰期我月入差唔多有五千架哈哈），係咪個天知道我唔會讀書又有ｄ手頭緊呢，十二點半至十二點九呢三個字之內有兩份工飛過黎搵我 － 冇錯係三個字兩份工呀。
12:30 - Part Time A: TYPER
放心我知係typist不過我對"ER"情有獨鍾哈哈．．．老細係李華度冇錯就係紅燈山丘中李華度，「七舊水打三千字下星期交貨！」頂筍到噉我都廢事逗咁多人工收順ｄ五舊水算（其實都好好好高喇哈哈）。特此嗚謝也哥呢位Agent。文曲星人聽住：
「下餐我請！」
12:45 - Part Time B: RA
呢個冇得"ER"忝．．．係呀又係RA不過今次唔係科學系係心理學系，老細乙因為「名義上係忙實則上係懶」之關係搵我做佢私人助理（唔記得邊個係老細乙唔緊要睇番《中國山區教育之將來》啦）。又係打字不過加多樣翻譯，人工有幾多我都唔知但係重點係呢份可能又會係長工即係哈哈哈∼∼∼

最新紀錄26.4K邊個夠我慢！

大天地真係好難挨。八點半上英文增潤至後三點半先GS，中間五個鐘你話應該做ｄ乜？呢樣野我研究過，就算落電腦房、行黎行去、食飯、訓覺呢四樣野每樣做一個鐘都仲有時間剩喎。點算？點算？？點算？？？（叫我開工？算！）

係喎今朝八點有拉闊開金塔喎。我冇睇呀番學嘛，夜晚番到屋企我老豆第一句就係「Ｘ都唔知有乜好睇！成套野兩個幾鐘但係真係有野睇得分零鐘！」好在我重播都冇睇，聽日睇新聞ｄ精華片段就夠晒。上星期一收音機就係講埃及點知隔一個禮拜就開金塔咁蹺，係度送上上個禮拜節目重溫條拎俾你應下節，得閒就去啦兩個鐘架都成，呢排去唔到唔緊要佢地ｄ節目會Keep成年架。另外琴晚就主要係講火星，唔好話冇興趣呀有好多野你都應該聽下知下：火星上面塊人面到底咩料？火星上面有城市你聽過未？其實地球有兩個月亮你又知唔知？呢ｄ野我就應該要知喇第時昆細路丫嘛哈哈．．．冇興趣都應該聽下，因為最後果兩個字又講俾你聽今次開金塔又有陰謀：班友話係「全球首次開金塔」，但其實係好多年前已經有人做過同樣野，呢樣野好多考古學中人都知。噉點解班友又要搞咁多野呢？懶講喇條拎係度自己聽啦記住係最後兩個字咋（其實都冇講點解架剩係班友自己亂估不過都聽下啦）。

今日有冇上龍珠302？冇啦？（死喇玩完番到屋企都仲噉寫開始有ｄ傻）成日先得探花兄一個上黎。我睇舖喎噉都唔黎支持下？今次真係我一條友玩晒，因為到左九月個個開工開學人手短缺，大老板正職間公司又俾佢大老板視察冇得走，唯有搵我呢個"Keeper of Last Resort"出馬。我冇諗住收人工架，有大大間CD舖任你聽碟睇碟可以寓工作於娛樂，仲要因為人地信得過先會俾間舖我打骰，呢份工之價值已經唔係錢可以衡量。
我諗住爭取逢星期三都由我睇舖，反正我得閒又合皮。第時禮拜三冇野做又行過九龍城就上黎探下我啦！你肯買碟我計熟客價再打多個折頭又點話！

福星又見福星，睇黎福星已經變左做我第三個家（第二個家呢？咪龍珠囉噉都要問！）哈哈今次真係好很合皮吹得，佛爺你今晚件衫我好鍾意你快ｄ同我買多幾件，如果唔係我考試時你借俾我著！
今餐證實到一個事實，就係原來打邊爐唔拎肥牛係唔會死人。

今日EA上英文系踩場做Promo，我職位係Water-Watcher，係班友上樓時幫佢地看書包同埋睇住英文學會幾時黎踢我地館。一睇就睇左成個鐘，「嘩踩場唔使踩咁耐呀唔通俾ｄ講師嫌煩打死晒？」搞到成十幾個書包放係ELC門口個個行過都「．．．」如果唔係我快手快腳搬開擺好ｄ的話，ELC入邊ｄ人就會控告我「阻礙走火通道」。
「點解唔上去踩場？」我屋企而家仲係疫埠嘛，一唔覺意搞到成個英文系都紅眼症就仆街啦係咪？
「Ｘ！平時係教院又唔見你咁淆底！」
Ｘ！人地係大粒野，中招中到份工都冇埋的話咪仆街？尤其是我老細，佢唔做的話我飯碗都冇埋即係大家一齊死，所以我呢排都唔番工廢事惹到成Officeｄ人都有事（呵呵呢個曠工藉口非常無敵）。其他人你死你事丫我叫左你地唔好行埋黎我度你地係要自作孽我都冇計！（咦照計我琴日都唔應該睇舖喎，如果唔係一唔覺意Trinity所有人、物都呵呵呵．．．）

是日重點：JAM!
係教院都總算搵到人識彈結他有得一齊玩下，不過大家都係水鬥水累鬥累真係哈哈哈．．．希望下次可以最少有一首歌可以完整地彈出黎啦。係廢但係最少都開左個頭。阿立哥又有興趣加入，如果可以每個禮拜都噉樣成堆友出黎玩下都唔錯。

係得38.6K上網仲要嘗試無數次先去到個網，係每聽幾秒就要Load十幾秒好似前行一步後走兩步噉款，但係都係要聽，因為又黎踢爆星期一個開金塔。呢野係堅料喇得閒就去聽啦係第二部份三十五定六分鐘到最尾。

冇呀今日dayoff唯一成就就係TYPER，五千字一晚就搞掂大半 － 唔係收Fax時收唔到最後半版野而家應該係收緊錢喇。不過重點唔係個成果，係內容。篇野叫《災難中的國度》，係由基督教角度睇九一一事件。打完之後我得一句．．．呢一句我都廢事出喇總之係負面啦。寫果條友係基督徒，但係佢講到飛機撞世貿其實係一件好事，因為「先死後生」九一一令到美國無論精神定係道德發展都可以進化到一個新層次。喂噉死果班人尤其是非基督徒又點計點算？我地又係咪應該多謝拉登叫佢撞多幾次呢？
「神既然愛世人又有大能，點解佢唔制止災難發生要世人受苦？」
「神任由災難發生世人受苦，係為左彰顯神之大能。」
好Ｑ吹脹＋矛盾呀真係！仲有一段話其實神無處不在，成功、財富、健康．．．當中都有神存在，但係同時人又因為成功、財富、健康．．．之蒙蔽而睇唔到神。？？？即係點？？？仲叫人唔好追隨健康，又想人點？？？（講開又講，推薦大家聽金屬樂隊Metallica作品"The God That Failed"，主音寫呢首歌係因為佢阿媽患癌但係相信神會救佢，結果唔肯接受治療就噉死左．．．當然你可以駁我神救佢之方式就係帶佢上天堂）
「拉登殺左咁多人，應唔應該追究佢？」
答案＝一大堆經文 ＞ 「要愛你的仇敵」 ＞ 「請追隨神」
最後一句簡直係無敵百搭，因為文中提出左好多問題，但係全部個解答方式都係同呢個例子一模一樣，搞一大輪之後「信神實冇錯！」但係完全冇答過題。其實都唔明條友寫篇野黎做乜，想踢人入會一句就夠啦點解要搞咁多野？？？夠喇夠喇呢度只係五千字中之冰山一角，唔再講如果唔係呢度會再多五千字。
「我盡量做足一個『好人』應做之本份，甚至做得比信神向善之人更好，但係死左之後我唔可以好似佢地噉上天堂，點解？」
係囉點解呢？不過講真如果係噉的話我又唔怕落地獄，因為我自問我待人處事做人方面比好多所謂「基督徒」更加似一個「好人」，但係我死左之後要落地獄就因為差一個信念，而唔係因為我唔夠善良。既然係噉我都無謂上天堂啦，因為我發現原來天堂ｄ人俾地獄中人更似地獄中人。
我唔知你係咪教徒，係得話唔使搵番我講道你知我唔會聽；黎小我我又唔拘不過提番你「在神眼中仇恨和幸災樂禍是最大的罪」同「要愛你的敵人」。（呵呵剩係第一樣野到今日我都冇乜見過有基督徒做到，反而好多非基督徒就得）

我可以肯定我用緊個server係露天。颱風Ｎ日後之日終於可以有番49K上網（係呀最高都係得49冇56架所以我成日都覺得俾人昆左），唔係之前幾日搶修番個俾風打爆之露天server而家點會上得番網？

今晚做《愛上女主播》大結局，我睇左最後半個鐘。邪惡女主角恰左善良女主角同若干個路人十幾集，跟住恰得人多走左去跳海自殺，點知死唔去仲失憶，最後全世界都原諒佢。舍妹不嬲都睇開ｄ韓劇日劇，唯獨是呢套唔睇，我而家終於明：
「好野，壞人有好報。」

唔使問我中秋做過乜，你應該一早知道。

冇賞到月，又何來追月？星期日我都係開工架喇。
「挑劉義呢條友成世人都剩係識做野！」
係呀我係做野呀，不過又可以話唔係做野喎，因為是日工作係看舖。可以寓工作於娛樂呢ｄ工你搵到咩？

今日真係灰到爆，日日都冇咩人係今日拎住兩箱野時程程車都爆滿，搞到點擺都阻頂成日俾人怒啤。我都唔想架．．．正當番到教院放低兩箱好合皮之際．．．
「又兩箱！」
冇錯又係兩箱。之前就搵人做訪問點睇Portfolio，而家就拎人ｄ貨番屋企睇點做Portfolio。冇錯又係Portfolio真係長做長有所以根本唔使擔心冇工開只係驚「又有工開？」
十二個人十二份Portfolio，我睇左四箱 － 但係都只係三份，琴日兩箱野係同一條友做，多到老細都話「下乜原來一份野可以做到咁多野出黎架？」睇左幾份之後都唔多想睇，拎親ｄ都係Ａ級作品個個做到幾寸厚，完全係叫我呢ｄ頹友唔好做，但係唔做又唔得喎噉先灰。所以我好鍾意其中一次訪問條友話
「叫你上頭唔好淨係俾ｄA Grade sample我地睇啦，俾ｄcheap野我地睇等我知道點樣做可以合格仲實際。」
可能你會問「點解唔係教院做呢橫掂星期二大天地中間成五個鐘？」係囉，點解呢？

係呀又多份（義）工呀，由今個禮拜開始逢星期三四至九我都會係龍珠三樓302號舖 Trinity Records Hong Kong 出現，得閒記住黎支持。黎探下我都好丫，需知今日除左我之外冇人入過舖，睇阿Rock哥一個人坐成日悶到仆街，我唔想聽日歷史重現係我身上呀．．．

(By Theatre of Tragedy, "Theatre of Tragedy", 1995)

是日Assembly重點：

1. 剛剛畢業屆BEd就業率有九成四（信不信由你我當然係唔信）
2. 轉左個Grading System喎原來，C-有1.67C有2，即係我呢ｄ永遠符碌合格人士以後都會一六七
3. 原來3rd安2.2咋喎我呢ｄ20/9人士可能會同個安字有緣
4. 咦點解我會黎assembly？？？

是日睇舖重點：

1. 做Sales睇落幾容易查實係有ｄ難度
2. 做CD舖有打Band始終好ｄ，因為好多客都係Band友，玩過先識點用Band界方式同佢地溝通
3. 係好多客係Band友，但係唔知點解佢地好多都唔係聽過好多野反而要我教番路話佢地知聽乜好
4. 開左學真係唔同ｄ：Rock哥殘到變左另一個人，Kara開左學一個禮拜已經瘦左成個碼，An哥可能俾先生恰到好慘由暑假時一個成日叫人唔好聽同買邊隻邊隻碟變到而家好有禮貌地勸人聽同買邊隻邊隻碟；唯一冇變果個係我，可能真係因為頹慣係唔係暑假已經再冇分別

今日又搵多份工，係政府工。份野係幫我地偉大的政府官員做Final Year Project。酬勞係麥旋風乙杯。我自己今日兩份part-timeｄ野都未做好就搵多份工，我都覺得有ｄ神奇。請大家跟我一齊嗌俾官員聽：

好Free呀我發覺今日可以十二點幾先起身，晏晝仲要除左食飯之外差唔多咩都冇做。今朝八點半有堂仲有兩份RAｄ野未做完喎唔好唔記得。可能今日咁Free就係為左今晚：

時間：是日晏晝四點半　地點：龍珠302號舖TRHK　人物：男甲＆女甲
劇情：男甲帶住女甲上龍珠，當黎到Trinity門口時女甲表露出佢極唔鍾意Metal野之情緒，同男甲嘈左一大輪之後先肯跟男甲行入舖頭。但係隔左唔係好耐女甲就走左出黎，再隔一陣男甲高速地離開舖頭搵番女甲，係女甲對男甲不滿地講左一大輪野之後，兩人離開龍珠商場。
所以點解我呢ｄ人一定唔會溝到女呢？你搵到有女接受到我而家接觸ｄ野咩？唔好話肯聽Metal野喇，而家有女第一次聽到我聽ｄ野時唔係話「嘩乜你聽咩晒呢ｄ野！」已經好好。如果俾我揀，我都想揀一個唔會淨係鍾意唱Ｋ睇八卦雜誌通街蒲之女仔。問題係：
「乜而家有女仔會唔鍾意唱Ｋ睇八卦雜誌同出街蒲既咩？」

即係係唔想番學架今日，聽日紅假喎咁大引誘，一起身仲要傷風噉款你話係咪應該唔番學呢？如果唔係因為星期三Present今日要開會，我真係會一舖過走晒今日四堂，唔會淨係走堂八點半英文咁小野。如果今日真係唔番學的話，我諗我會好開心地整番野釜底抽薪一走走到星期六，「橫掂日日都係番得一堂番黎都無謂啦挑！走埋佢慳番車錢好過！」

唉我發覺開左學之後生活真係枯燥左好好好好好好多。

我慶祝國慶之方法就係食飽就訓訓飽就食。十二點幾起身然後食飯，食完兩點幾又訓過，七點幾起身就食夜晚。噉慶法邊個夠我頹？

琴晚訓太多搞到今朝五點半先訓到，六點半就要起身番學，係呀成日就係訓得果一個鐘咋。但係八點鐘要開工跟住上三個鐘堂晏晝又要睇舖，你認為我仲有冇可能做（到）其他野呢？
又係如果唔係今日要present，我真係會走左堂訓多幾個鐘算．．．

係死，不過臨死前講多單野俾你聽：
「七記呢排Short左，Dreyers甜筒十蚊兩支！係Dreyers呀大佬仲要係十蚊有兩支呀！要買就快手呀，我買左兩支食完之後落樓想再買，屋企樓下三間七記ｄ貨已經差唔多俾人掃晒．．．」

係咪得罪人多呢今個禮拜真係好唔掂，今次就頭痛到番唔到學。好野今個禮拜完美地走晒所有英文堂，噉又多日off。不過為免跟住禮拜六又番唔到，是日收皮一天咩都唔做。工？聽日先開啦。
問：「係咪你唔想番學而諗到自己病，結果病左唔使番學呀？」答：「係唔想番學就噉走左堂佢咪得囉，使咩搞咁多野？最多咪詐病．．．」

日頭灰夜晚又灰。亞視某導演放風話佢同近排好多人談論之樂隊Blackwine做個訪問今個禮拜會播。正當我以為係會係ｄ《時事追擊》之類播之時．．．原來係今晚十一點個《ＸＸ時尚坊》做！！！冇睇已經夠灰，更灰就係「地下樂隊幾時變左時尚野？」可能要問番阿導演借餅帶黎睇下到底係咩一回事．．．

「已經咁多野做，乜仲咁得閒搞咁多野呀？」
其實我今日都有開工架，一個字內同四個人講電話你試過未？今日有個訪問條友係反Portfolio，講到唔夠帶錄音都仲唔肯收。如果次次做訪問都好似呢條友噉過癮有水吹就真係合皮囉。

「冇錯又係我。」
今日成日都同ｄ客呢句。冇錯今日又係我睇舖，而家除左三之外唔想見到我的話星期六就就千祈唔好上龍珠302喇。好似好得閒查實我睇緊舖時好神奇地同時開緊另外兩份工架。
想知咩叫「旺」，就應該今日上黎舖頭睇下。由四點幾開始連續幾個鐘大過間士多房少少既舖頭仔長期塞滿五六個人，真係講都講到口水乾。最開心就係成日都勁多鬼，我諗開左學以黎我講最多英文就係今日。所以成日話讀書做乜丫，直接落場實戰一定學得仲快仲好。例子有佛爺做旺電一年學ｄ電腦野已經多過我兩年CA加三年IT。英文增潤問我點樣練英文，我答案就係「做Sales囉！」
講開又講，本來今晚約左個人 － 佢係教徒 － 做電話訪問，我叫左佢晏晝上黎Trinity搵我拎番佢份Portfolio。佢拎完之後就神色怪異好高速地走左，到左夜晚我打極佢個電話都唔通。可能佢見到舖頭門口ｄ反基督野嚇到以為我係某邪教教徒哈哈∼

今日好似聖誕老人，拎住成裝碟上舖頭派俾人。
俾．．．Rock
Rainbow同Genesis你可能未聽過，不過知道呢兩隊野都係六七十年代老牌樂隊就夠。老牌野（包括pop & unpop）其實係好好好好聽架小朋友，唔好剩係聽新歌啦。
俾．．．Dave
Joe Satriani，可能你又唔識不過遲ｄ就會知係邊個，因為佢黎緊星期六日會係香港開音樂會，你應該會係報紙見到佢。呢兩隻碟借俾阿Dave睇騷前做定功課。
俾．．．明
Nirvana呢隊野呢，你唔聽都應該要識，因為九一年佢地帶黎（流行）音樂史上其中一個最大衝擊。想知乜事就問我啦廢事又打千幾字，不過其實上網查都好簡單因為呢野實在太大。我借Nirvana第一隻碟"Nevermind"俾佢唔關歷史事，係因為：
「組BAND時間！」
係呀假如成事的話，頭先出現果三條友再加埋我就會合體成為絕對路人樂隊，第一首歌可能就係玩Nirvana "Smells Like Teen Spirit"，隻碟係借俾我地主音阿明學下點嗌。如果阿明哥同佢個friend講掂數可以用佢間Band房就皆大歡喜，不過間野係西灣河就真係．．．

我已經成為左TRHK資源回收中心總管。呢ｄ「資源」唔係碟，係一ｄ麻煩到其他人都唔想／肯做既客。冇計啦佢地始終係客要買野的話唔可以唔做，結果佢地冇人肯接就唯有由我呢ｄ好人做。係呀做好人其實好慘架，最衰我唔識做衰人啦。
黑人物甲：由開舖坐到收舖拎成棟碟係噉聽，跟住叫你拎ｄ新碟俾佢，拎出黎之後又好彩的話會買其中一兩隻，俾錢之時仲要嫌熟客價都仲唔夠平係噉講價。到俾錢果陣「一百蚊咁貴！我係出邊買CDR三四十蚊隻咋！」
黑人物乙：係聽幾多野，點解我知呢因為一見到人佢就猛噉講自己識乜識物。你每講一樣野佢就會重覆一次講到好似ｄ野係佢都識佢講先噉。買碟時除左基本資料之外仲要知道係邊間廠出、咩國家出、樂隊成員係咩人、ｄ成員年齡幾大．．．知道之後又要知隻碟係咪正版、有冇CD Code、係咩國家版．．．有花就算係少少花都一定唔會買，然後摷晒倉入邊ｄ存貨逐隻睇邊隻冇花冇痕先買。呢位仲要係豪客每次都會買十幾隻碟喎即係佢每次黎親以上劇情都會重覆十幾次。
不過就算點仆街點西煩到要爆粗鬧都好，對住佢地最多口黑面黑好喇。我有個同事就係噉中左招。黑人物乙係煩到仆街但係又唔鍾意人地講佢，我同事有次係佢背後窒佢幾句俾佢聽到，跟住佢懷恨在心左成個禮拜搵左我猛呻之後又同老板報串，結果我呢位同事就俾老細小加暫時停職。今日佢黎買野仲以「我俾你ｄ靚窒好唔開心呀！」為藉口要大老細減價俾佢．．．

叻姐你送俾我張凳仔我唔敢坐呀，細到成張玩具凳噉又化學我驚坐多次都爆。張野我玩左幾野之後就轉送左俾我菲傭喇，俾佢禮拜日拎去皇后像廣場坐好過放係屋企俾我玩爛啦。

「又一箱！」
今日拎住個大黑紙皮箱，好多人都問「搞乜？」其實呢個箱關乎教院之將來。而家又話科大同中大合併，睇黎我地教院都危危乎遲早俾中大吞埋，所以我專誠係科學系借左支狙擊槍黎暗殺莫禮氏。與其益中大，不如一早做底教院，噉樣中大想吞併我地既野心就頓成泡影！你話呢個計劃幾完美哈哈哈∼∼∼

經過今日，我以後上IT堂都會好專心唔會再玩ICQ。如果我上堂唔開ICQ的話，原來係今日生日之政府官員就唔會搵到我出黎打邊爐，噉就慳番舊半加聽朝唔使走堂。不過唔係你錯今日係你生日，錯果個係我：
「係我錯！錯在我唔專心上堂！錯在我出黎同你食飯！係我錯！」
我發現冇英文名真係幾難同人溝通，因為都唔知點介紹自己。可能真係好似我對住ｄ鬼果陣時噉：
"My name is............just call me Lau..."
講開打邊爐，見到漢寶門口寫住：

後日英文就交功課，我好想知今朝八點半ELE有幾多人番。我就當然係冇番啦（不過唔關功課事，係琴晚餐飯。功課係咁早做既咩？）。好鬼灰我發覺今年真係，好似番中學噉隔一排就有功課交。對我呢ｄ臨尾一鑊過人士黎講完全係悲劇。就算今日晏晝走埋堂GS靠叻姐打救我，我都唔多明其實要做咩架。冇做／趕功課果個Mood嘛。所以工呢，都係留番聽日先開啦。

是晚最精彩：久違了的珠算協會居然失驚無神打俾我，劈頭第一句就係
「有份導師你做唔做呀？」
「下乜我仲係員工咩你地都冇同我續約！乜我都做得導師咩我考左九級咋喎！做導師要六級水平架你身為阿頭唔係唔記得呀？」
「．．．．．．」
嘩協會而家真係好好好需要人手呀，聽番其他人講而家係有求必應你話想做就一定會請。不過我都係會勸你唔好做，百二蚊一個鐘但係堂堂都要寫教案做教具搞活動登足分仲要每個學生最少做一次電話訪問，嘩我寧願搵份補習收八十蚊一個鐘疏疏乎乎噉教好過。

一千字，只不過係一千字，但係俾一千分鐘我我都唔會做得完。冇計我發覺最大問題係我根本完全唔明／識Phonetics。我連ｄ符號都未識讀，你仲叫我分析ｄ靚仔讀書讀得點差法，係咪好搞笑呢？因為我對Phonetics之認識仲差過佢地對讀緊果篇野之認識哈哈哈∼∼∼
我始終相信一個正宗香港人係永遠都唔會學得識普通話同英文拼音。

今朝窿哥堂當然係走左啦，唔使做功課咩？聽日就交喇，都係時候開工。
．．．係開工，不過唔係功課係開舖你話死未？八點半收舖跟住番屋企食飯同頹（係呀已經係臨死邊緣但係仲可以頹你玩死唔死），結果即係九點幾先開始做。其實intro一陣就寫晒，不過見既然可以寫得咁快，無謂咁搏命丫不如再頹多陣等下回分解。結果下回 ＝ 聽日。

去下回之前，呢樣野唔講唔得：
「下乜原來今日係水運會根本就唔使番咩？點解從來都冇人話過俾我知？好在本來就諗住走堂，如果唔係番到黎喊又唔係唔喊又唔係夠晒on9！」

Phonetics
「份英文功課點呀？」
「挑！一早做晒啦！」
六點鐘夠早未！係呀我發覺ｄ功課不論長短大細，我每一次通都會做到第二朝。今次仲早左忝按照傳統應該七點先搞掂。
今朝早大家都未訓醒時有一個神跡發生左：一個差唔多完全唔識Phonetics之人居然可以完成一份有關Phonetics之功課。請大家從速決志。如果份野Cre到的話就真係神跡到我都要決志喇。

RA
上到心理學系．．．
「我份野下星期要交呀！你今個禮拜快ｄ同我譯好佢！唔好接其他Job呀！」
跟住上到科學系．．．
「Portfolio個project十月尾就會cut funding架啦！你快ｄ同我搞掂佢！唔好接其他Job呀！」
跟住落番去D2同D3中間個花園，發覺真係左右做人難：到底跟住幾日我全心幫係我左手邊之心理學系好？定係做好係右手邊之科學系個project先好？做邊一份都會得罪另一邊喎．．．所以最後我決定兩邊都唔理，向前衝衝番去九龍城龍珠Trinity！

TRHK
上次條哈爾濱豪客又黎幫襯。點解ｄ人可以咁得閒好似日頭份工就係專業跨境收購員噉？不過唔係靠呢ｄ豪客的話其實生意又真係幾灰，好似噉日我睇舖成日先得三舊水生意，冇番呢ｄ豪客落黎養下我地我又點會有糧收呢？
好野今日又搵多件Andy哥黎，第時想夾Band又有著落。我發覺突然間身邊ｄ人都好雄心壯志想組Band。有心係好，不過就係唔知點解個個ｄ蒲點都鬼死咁遠，好似Andy哥（個朋友）間Band房係火炭．．．

Bootleg
唔知點解算啦，我之前拎過一版解釋過但係果版野已經down左。簡單ｄ黎講Bootleg即係一ｄ較高檔之翻版，唔係剩係翻現成作品而會係推出一ｄ未公開過之歌曲、演出同Demo，所以收藏價值好高。買左咩就唔使講喇反正我相信冇咩人會識同有興趣，唯一一句係俾探花兄：
「喂我搵到Aerosmith好多年前場MTV Unplugged VCD喎有冇興趣！CD版就冇喇我都搵緊！」

福星
福星又見福星．．．唔好意思今次係福星樓下間幸福樓。雖然星期一已經見過福星但係其實要我黎多野我又冇相干架，不過探花兄話「一個禮拜兩次福星會死」噉就幸福樓啦。不過食埋呢次之後以後打邊爐我都會極力遊說大家上福星，因為幸福樓係平但係真係得個平字少野食到爆，而且係福星閒閒地趙番個零鐘之戰鬥力一落到幸福樓就只會剩番半個鐘。已經唔係第一次架喇所以我成日都覺得幸福樓ｄ野係落左藥等你快ｄ食飽走人。
阿駒哥幾多年冇見？不過呢個已經唔再重要因為仲有好多好多野係更多年都冇回想過。今晚越吹得多水，越覺得而家係教院之生活係幾咁枯燥乏味。不過冇架喇似乎跟住兩年都會係噉過。

LIttle Wing
番屋企時成條街冇人冇車得我一條友，係咁空曠同寧靜之環境下叫部Mp3man播已故傳奇藍調結他手Stevie Ray Vaughan翻玩史上最偉大結他手Jimi Hendrix名作"Little Wing"，全日最好Feel就係呢一段路。其實我就噉講你唔會明，得閒就上網搵下"Little Wing"呢一首歌啦。我會推介由Jimi Hendrix所唱之原版，首歌兩分幾咋唔會用你好多時間卦試下啦。嫌首歌七零年代太老餅的話搵The Corrs重唱版啦，夠晒現代不過我未聽過，因為我驚pop過頭哈哈。

今日差少少就會成為九場名人，好在去左開房我而家先可以繼續做路人甲（我都唔知噉算好定唔好囉真係）。想知咩事或者下星期啦，有興趣可以係下個禮拜五晏晝係九場一樓間CD舖捕下。

而家RA個Project月尾就cut funding，即係唔係我唔想快ｄ做好佢，不過剩係打電話去搵人做訪問已經難＆煩到喊，訪問完之後仲要拎佢地ｄPortfolio做研究，你覺得有幾多人會制呢？嗚即係唔係我唔想做快ｄ囉老細，非不為也實不能也。

早：

午：

晚：

呢一日突然間變得充滿意義呀，我發覺除左文曲星人之外Trinity已經成為左我生活之色彩來源。今日係玩完，不過呢個只係上半場．．．

早：乜星期日仲會有朝頭早咩？

午：

晚：

今晚98.6講ｄ人俾外星人捉左之後發生咩事。佢地都係話「冇呀有一段時間渾渾噩噩咩都唔清楚，好似身邊有ｄ人行黎行去講下野噉囉。」聽完之後，我諗緊使唔使去搵FBI求救，因為我覺得我今日好似俾外星人捉左噉．．．

「．．．你今日番黎做乜？」
「番黎問今日使唔使番學囉！」
八點四番到黎即刻仆去搵老細，八點九「遲到喇！」立即仆番去班房，點知一個人都冇！跟住好驚地四圍搵係咪轉左班房時撞到同我一樣四圍走之Tutor阿祝姐。討論左成個字之後得出一個結論：
「係喎原來今個禮拜係reading week唔使番學！我地兩個都唔記得左！」

八點半就番左黎但係又冇堂上真係究極戇居，但係又唔走得喎因為約左人地五點半拎Portfolio。中間九個鐘點挨？理論上係可以好完美地做好篇翻譯加少少Portfolio，但係實際上就係一隻字都冇做過，全靠教院全線寬頻令到我可以上網周圍搵野睇／聽／玩。今日重點係睇人打鼓（係呀睇班友打鼓都睇左大半個晏晝）大家應該冇興趣，不過有兩段野推介俾大家睇下，因為條友似玩雜技多過打鼓。第一段就悶ｄ睇開頭三十秒就夠，睇得明條友做緊咩我話你好野；第二段就精彩好多成段都睇得過，重點係睇佢顧住玩野搞到有幾次失誤。每段野都成十幾Ｍ架所以你話冇寬頻點會有得睇呢？
可能我屋企就係好在冇寬頻。好好地一個晏晝已經搞成噉，如果我屋企有寬頻上網的話本來已經夠頹既我可以立即畢業哈哈哈∼

今日又係頹，兩點半先起身跟住睇下報紙三點幾就走去開舖。
「睇舖都頹？」
梗係頹啦，成日先得一個客，全日就係得佢一單生意百五蚊，想唔頹都唔得啦。過左今日我都有ｄ驚老細出唔到糧俾我架，所以收舖果陣時拎左幾本書幾隻碟夾帶私逃以防萬一。

今晚同阿Rock打邊爐，不過冇見福星，因為臨收舖時探花兄打黎話禮拜五再見福星，而我亦都開始相信「一個禮拜兩次福星會死！」所以今次轉移陣去去九龍城漢寶！（不過最大原因係懶行咁遠）間野唔好食夾少野食以後都唔使再去。重點係呢樣野： MCB 。有冇聽過《音樂殖民地》？MCB就係佢既第二代。呢本野我推薦俾你地睇架，因為佢係講流行音樂而且寫得都唔算差，又講唔少外國野，買黎增廣見聞都好丫。另一個原因就係呢本野係現時全港唯一一本音樂雜誌，你唔買佢的話除左去外國同大陸網站之外，你仲有途徑可以搵到有關音樂ｄ資料咩？

意外甲：「病！」
點幾兩點先起身，迎接我既係「喂老細今日病左開唔到舖呀！」簡單ｄ黎講即係「要我睇舖啦？」理論上我只可以睇四至五，因為今晚要出大圍拎Portfolio。點知．．．

意外乙：「放你飛機呀小朋友！」
行到龍珠樓下時個Miss打俾我。又會咁蹺喎係今日舖頭有事先俾人放飛機，即係今日我註定係情歸TRHK啦？

意外丙："No one comes...how come?"
灰到震呀真係！三點九開舖連坐三個鐘居然一個人都冇入過黎！唔係卦你俾個白撞人士撞入黎行個圈都好丫！我係可以冇野做到落街買包薯片上番黎睇書架！好在差唔多七點時「是日永遠榮譽顧客」上黎幫我開齋，如果唔係就真係平到阿冷「全日一個人都冇入過舖生意額零」個紀錄！
其實仲有另一個客跟住呢位「榮譽顧客」入黎，不過嚴格黎講佢唔算係「客」，睇下以下對話就知：
「咦？Heavy Metal？Metal就即係Van Valen、Guns N' Roses．．．（下刪樂隊名Ｎ個）」
「唔好意思，果ｄ我地呢度全部都冇得買，我地舖頭剩係賣ｄ較偏流Metal音樂。」
「偏流？即係邊ｄ？」
「即係Black Metal、Death Metal．．．（下刪音樂名詞Ｎ個）」
「．．．（走左）」
即係想拋書包之前呢，都要諗下對住咩人拋，同埋自己拋唔拋得起．．．

意外丁：「仆街！」
可能全日就係得一個客／人好合皮，搞到收錢時都顧住同佢吹水結果就收少左錢。唔係收少左幾（十）蚊咁簡單，而係．．．點解可以搞到咁大劑？有冇用過EPS機呢？用過你就（可能）明架喇哈哈哈．．．
今日真係唔開好過開！一日內又會咁多「咁蹺」，我硬係覺得今日全日都係一個局！

龍珠
唔係開舖，係填番條數。無端端入錯數跌左三舊真係好Ｑ灰，好在個客係熟客，有緣的話應該追得番。老細到而家都未蒲頭，不過又唔敢搵佢驚佢未病完聽到我收錯數嚇死哈哈．．．係時候諗下面對佢時點樣懺悔。其實衰仔的話可以掟左EPS單毀屍滅跡．．．

旺角
自從知道左旺角ｄ鼓房可以咁平之後，我發誓唔會再做傻仔！雖然事實證明一分錢一分貨平野冇好．．．

大圍
「又兩袋！」
唔係因為出差拎Portfolio，我又點會咁得閒山長水遠出到黎大圍呢！噉又兩袋，而家我屋企已經累積左三袋一箱等緊我！不過仲未止．．．

沙田
搭得火車，冇理唔出下沙田行HMV架？不過結果就係唔行好過行，間野大舖變細舖斬左一半當堂少碟好多（尤其是我想搵果ｄ），連減價貨都少過其他舖就真係．．．所以我決定轉移陣地！

紅磡
其實呢度只係一個中途站，因為跟住會出尖咀所以係紅磡落車行過去做下運動（劉義呢個人居然會做運動呀！又一個不思議！當大家集齊七十個「七不思議」時，就係時候去決志喇！）。

尖咀
總陀就係總陀，所以YiuLeung成日小沙田間HMV唔係無因，果間野實在係太太太少碟喇。因為已經入秋關係，HMV "Summer Sale"已經圓滿結束（我地Trinity都係哈哈)，取而代之係"Best of the Best"，都係減價不過取巧地減少左囉。你留意下的話會發現有好多問題，例如有ｄ（廢）碟一出佢就話係"Best of 2000"，仲要呢ｄ碟多到成幾個櫃都係，HMV都幾有遠見＆眼光獨到．．．
今次目標一隻係老餅Rainbow，一句：「Deep Purple、Ritchie Blackmore、Ronnie James Dio，以上三個名識兩個就買啦冇介紹錯。」另一隻就你地應該聽下架，就係Cranberries精選碟"STARS"。王菲首《夢中人》都係改編自佢地首"Dreams"咋，連個迷幻唱腔都學埋，而個主音係唱得比盧巧音更盧巧音。都係一句：「王菲、盧巧音，鍾意佢地ｄ歌的話就買啦冇介紹錯。」隻碟係特別版，成廿首歌加五首Live都係九十八咋，買啦阿Sir幾時昆過你？
呢排仲有一個櫃係"The Best Guitarist"，似乎又係淨係關我事；當中有兩個好好好傳奇結他手個位空左，本來已經有ｄ捶心，但係番到屋企發現唔止係捶心咁簡單．．．
除左HMV其實出尖咀仲有一個活動，就係係文化中心門口睇書，但係俾我發現到一樣野。我係坐係有舊人型鐵同埋噴水池果個門口，位處門口斜對面三十米左右，中間有ｄ柱隔住。我發現當文化中心果一度門持續開住大約五秒左右，入邊ｄ冷氣係可以吹到出黎我坐果個位架！（好Ｑ無聊呀呵寫咁多野但係原來只係一ｄ好很無聊之事）

旺角
福星又見福星。十一月前唔好再搵我打邊爐唔該剩係呢兩個禮拜已經食左四次夠Quota喇！
原來人人都畢業喇！到左下年就剩番我呢個岸交仔讀書！（雖然我而家已經係半工讀．．．）

網
原來尖咀HMV結他佬專櫃空左果兩格真係大有文章！而家講乜都冇用，一來真係講乜都冇用，二來我講你都唔會明！呀∼∼∼
「阿Ant！點解！點解你見到唔幫我買！呀∼∼∼」

葵Ｘ
我都唔知係葵芳定葵興定葵涌，你亦都唔需要知道點解晨咁早我會係度出沒下回自有分曉。重點係搭車經過呢個葵Ｘ時 漢 打電話黎問「喂珠算加減加十位先定個位先？」原來終於輪到佢做正教。想當年我做正教時都已經夠衰，堂堂都係接近零準備＆零備課差唔多乜都係入到去玩即場，不過點都叫做吹到兩咀。估唔到 漢 仲衰過我，只不過係第二堂教ｄ好好好普通野但係上堂前都仲未知其實講乜，要打黎問我呢個退休多年人士。由此可見，而家協會真係好急要人用。梗係，上次協會掟過黎封《最後通碟》叫人「一係番黎培訓再做，一係唔好再番黎做！」個名單成半版長三四十人架，我諗到最後同我一樣遞信走人之人數最少都二字頭。不過既然而家退左休就廢事講咁多喇，都係一句：
「想搵工去做珠算啦，嚴重缺乏人手有求必應，不過應徵之前諗清楚先。」

荃灣
朝早十點幾出到荃灣咁遠做乜？當然係出差啦唔係呢個時間我仍然係床上面昏迷緊！其實真係幾無聊架搭車來回個幾鐘就係為左出黎用幾十秒拎一個portfolio。所以唔好睇到RA呢個名咁勁，其實好多時做埋ｄ野都係極度戇居架。
回程果野諗住型ｄ搭Van仔，行左大半個鐘搵到個站之後，發現一張銀紙都冇既我身上所有散銀已經俾我之前買旗果陣懶型噉掟晒俾個賣旗姐姐，而家搵個一蚊銀都冇冇得搭，唯有死死地氣行成里路番去搭地鐵，真係是日一大on9！

龍珠
又開舖。一個禮拜開三次，TRHK已經變左我別墅。是日節目又係搵鬼玩，真係講左唔知幾多次都係要講：「噉先至係英文增潤！」呢度越黎越多鬼，我就越黎越開心哈哈。雖然今日仲係冇咩生意只可以叫左吊下命，但係到左聽日就哈哈哈．．．
老細仍然唔蒲頭，噉我唯有打電話遙距懺悔啦哈哈。雖然我呢野先至係第二次出事，同我另外兩個同事相比算係好少野（殊．．．細聲ｄ如果唔係聽日上舖頭時俾人打），但係計落就係我呢鑊最杰，但係結果竟然係冇事，老細小都冇小到一句！（呢野唔使殊喇因為事發時在場之另外兩位同事已經打左我一劑）即係我呢世人其實都幾符碌架，雖然係頹又間唔中撞板，但係遇親ｄ老細都同我一樣係好人哈哈哈．．．

尖咀
琴日「尖咀HMV空櫃事件」仲有下文！話說前幾日有兩隻絕版多年之經典係HMV出現，目擊者甲阿Ant見到之後唔買番黎益街坊反而淨係上黎舖頭唱「喂HMV有旬貨執呀！」琴晚我去過證實已經俾人掃左之後，佢已經俾人打左一身。今日阿Rock同阿明再上去，終於搵到其中一隻 － 冇咁經典果隻，仲問到倉入邊仲有另一隻 － 經典到無可再經典果隻。當佢地叫人入倉幫佢地搵時，「個倉係有，不過入去搵都未必搵到過喎，噉我就廢事入去搵啦！」即時吹脹！係時候叫劉德華出黎
「今時今日噉既服務態度唔Ｘ要得架小朋友！」

是日重點甲：開房
我地路人樂隊（咦又唔同左名喎）再次成團，團員包括鼓手／主音甲、鼓手／主音乙同Bass。係冇結他呀因為支結他到而家都冇蒲過頭我都冇計。不過噉樣並唔會打散我地上Band房夾兩個鐘之雄心壯志！不過真係出師未捷身先死，卜左三點但係到兩點十先齊人，到齊之時居然發現原來三條友冇一個知道間野係邊！差少少就會變佐敦一日遊！
間房真係好Ｑ大，ｄ設備都唔算太差（冇錯係有少少問題），不過到最後都係夾唔成，因為到齊人時先發現除左個鼓之外原來乜都未掂！「得個鼓噉點夾？」個主音跟住個鼓唱囉有乜計呢哈哈。好在臨走前仲有個「即興Medley」，主音求祈諗首歌出黎唱（由Metal到羅文），然後鼓＆Bass即刻求祈作番ｄ野出黎Back佢，噉樣jam左三個字咩都抵晒。埋單果陣以為百一一個鐘都跌得幾傷之時，條友將我地喊住推俾佢疊銀紙掟番過黎，「兩個鐘一舊水咋傻仔！」死喇而家我驚唔係因為ｄ房貴，而係因為次次開房都係一次比一次平。咦聽講有一間直情鼓房免費忝喎．．．

是日重點乙：開火
「打邊爐呀今晚！」
番到屋企時我老豆話。傻架佢都！我梗係唔理佢啦！
「打邊爐呀今晚！」
上到舖頭時我老細話。傻架佢都！不過我仲傻居然會去食。兩個禮拜打五次邊爐今個月真係食飯都食到窮呀哈哈哈．．．

是日重點乙：開學
不經不覺，Reading Week到左今日已經圓滿結束，聽日又要重返教院受苦。不過我而家仲諗緊其實我聽日番唔番學好。上次連佛爺都知道之教院水運會由頭到尾都冇人講過俾我知，今次Reading Week我仲要係番到學校中左招俾人指住笑果陣先知道。其實我仲係唔係教院學生？

又要番學好慘嗚∼∼∼
冇喇今日就係咁多，我係教院ｄ生活不嬲都係咁苦悶架啦。

今日終於遞信正式退休，從此同協會一刀兩斷，唔使再得閒又俾佢地炸Email叫我去培訓得閒又俾佢電召教班。睇番個名單，原來同我一樣之前收到《最後通碟》之人數唔止三四十人咁少，乘二就差唔多。唔知又會有幾多人同我一樣遞信走人呢？ 漢 ，做得開心ｄ啦，你應該有得教＆有排教＆教到你唔想教哈哈哈．．．

提左Ｎ次果兩隻絕版經典，雖然其中一隻經阿明同阿Rock協助之下已經入手，但係我又點會對另一隻死心？果隻仲要係正過我手上果隻忝架！所以琴日專登上HMV踩多次場，難得俾我撞到個Sales同阿Rock阿明果個剛剛相反幫我跑左幾個圈搵，雖然最後都係搵唔到淨係知道呢隻「全港唯一一隻存貨」放左係舖內唔知邊度，但係有噉既服務態度總算可以令我笑住噉走。琴日臨走前無聊留個電話都冇咩預期，估唔到今日就收到電話「搵到喇你隻碟！」雖然HMVｄ碟百六蚊隻係幾貴，但係有噉既服務態度我ｄ錢跌都跌得心甘命抵！不過隻碟搵到還搵到，得唔得閒出去拎又係另一個問題．．．

係喎，今個禮拜五係報考基準試死線。點解我會記番起？因為今朝堂英文增潤終於出現「基準試」呢個詞喇！兩年黎第一次呀真係！臨截止先之講咩係基準試仲要淨係講咩Paper係考乜，乜叉都唔知去唔去報好呢？不過想唔報的話，就要有下年Year 4時可以一次過全部Paper合格之信心．．．不過要做到真係有ｄ難度，因為基準試入邊其實係有一個商業陰謀存在，每份Paper合格率已經內定左係四成，即係有六成人考完之後要係第二年再跌千幾銀考多次．．．

今日五個鐘空堂，我就真係訓足五個鐘，專登帶番黎果兩個portfolio係完全冇掂過架。月尾囉喎我都覺我死得哈哈。

今日上舖最大用途就係拎「丘中跳樓事件」第一手資料。呢ｄ第一手資料唔係係丘中人處拎到而係我同事係佢ｄ人度知番黎再話番俾我知都幾諷刺。黎到呢度應該好多人都已經知道呢單野，噉我就講ｄ「內幕」（？）俾你地聽：
「朝早跳左樓之後，晏晝ｄ人打波個波打左去死左人果邊，佢地都唔敢去執呀。」
「本來今日測驗架，點知而家有人跳樓，跟住測驗就變左輔導。突然間唔使測驗我個Friend都唔知幾開心．．．」

冇。今日除左因為晏晝要補課搞到要挨多三粒鐘之外咩都冇。而家番教院就係為上堂，真係幾灰。（開工唔包括在內因為我都係留番晒係屋企做）

EA，七哥，叻姐，對唔住！即係唔係唔想黎開會，但係唔知點解今朝全屋得我一個人，搞到我可以肆無忌憚噉訓到成點先起到身。我都話禮拜四開會有危機架啦！（係時候收皮廢事俾人打）
冇今日番學又係冇事發生，重點反而係下午茶時間哈哈。

日頭實係悶架喇我而家，夜晚就會好ｄ因為放左學就自然會上舖頭。今晚係舖頭聽到兩個故事：
故事甲
有個鬼佬客每次上黎都會買幾多碟，但係佢有一個特殊購物習慣，就係假如隻碟有存貨的話就會唔買住。知唔知點解呢？因為佢條女唔鍾意囉！「死佬有錢都唔使係我身上反而拎晒去買碟！」呢個故事教訓我地，冇女原來係好幸福架想買乜都得！好似今日我就砌左一大棟碟出黎喇，仲同老細爭取到九五折忝！
故事乙
呢個故事由琴晚去左打邊爐之阿樂提供（佢隊Band二保好過癮架網上有佢地ｄMp3得閒就搵下啦）。話說打完邊爐十二點幾，佢係彌敦道等車果陣，有一名中年男子當街當巷大聲高唱羅文名曲《幾計風雨》。記住十二點幾之彌敦道仲係人山人海架。

因為好多人催，老細又好想＆想左好耐，一個「足以影響香港Metal界發展」（老細噉講）之計劃即將落實，而我亦已經俾老細點名加入成為計劃之一份子。簡單ｄ黎講即係
「Ｘ！又多份工喇我！」

今日Dayoff，完全係Dayoff feel。（簡單ｄ黎講即係乜都冇做過哈哈）

之前砌出黎果棟碟係時候埋單喇。十一隻碟合共千二，爭取到員工福利「購物過千九五折」之後折實一一五零，好似好貴但係其實全部都係人地幫我俾我係一蚊都冇出過。月頭到今日睇舖人工有六百六，減埋淨番果四百九終於出左五舊水糧俾我之李華度幫我俾埋，埋完單仲有十蚊淨買排益力多。得喇十一月你唔會係龍珠見到我。
買碟買到好合皮，我就黎會唔記得下星期一要交IT功課哈哈∼∼∼

琴晚Trinity有故事乙，今日有線有故事丙。唔知邊個節目訪問左一個古董收藏家，話就佢某日對古董野發生興趣，就散盡家財去搜購心頭好。結果佢係好合皮但係有一個人就同佢相反，果個人就係佢老婆。「死佬有錢就買間屋俾我住好過啦！」所以你話冇女幾好呢！真係我而家立即散盡家財去收購TRHK都冇人會阻止呀！（死喇好似好推崇「無女主義」忝哈哈）

「張光亮，我應承你！由今日開始我唔會再走你堂！」
冇錯我發誓！因為我已經連走兩堂釜底抽薪！我一定唔會再走堂，最多遲到．．．

「反來囉！」
好耐冇見過老細所以係時候上去探下佢等記得佢仲有我呢條靚同「糧尾喇老細！」本來差唔多咩都冇做過噉上去都預左會俾佢小，點知佢第一句就係
「我剛剛想搵你呀！而家你自己上黎真係好！我唔會催你做架我知你一直係度自動做緊架啦！慢慢黎唔使急！」
？？？係咩都唔知淨係好似錯果個原來係老細之情況下，交貨日期又順延多兩個禮拜。即係天都要我讀書啦（or 即係天都要我頹啦？）

晏晝節目當然係開舖。好很合皮真係好似完全唔使做星期一死線份IT功課噉哈哈。話就話星期六，但係就係唔知點解冇乜人上黎幫襯，結果大半日節目就係食栗子。我地Trinity栗子採購員阿樂（二保∼）終於明點解ｄ龍珠人經常都係度食野，因為個場成日都咁少人，冇野做冇水吹果陣你唔搵ｄ野趙下真係唔知點過日辰。好在去到第三十蚊栗子時終於有客到，如果唔係可能到收舖時樓下個栗子伯伯ｄ貨會俾我地以$X00收購晒。需知廿蚊栗子都唔夠我地兩條友消磨半個鐘．．．
係冇乜客但係今日ｄ客都係貴精不貴多全部都係吹水客，不論新舊最少都可以吹番個零鐘，全日試過ｄ碟加埋可以棟到上天花板。有咁多水吹咪幾好，你又有得聽多ｄ我又有得知多ｄ，最緊要就係大家都合皮。
今日證實舖頭細都有好處，就係客多時熄晒燈播DVD可以好有睇Live Feel。

「開工！」
梗係啦，星期日喎！不過唔係開IT，係開舖。老細前幾日飛左去澳洲公幹（間舖頭係佢興趣／嗜好／理想／兼職／另一個身份黎架咋），今日又咁蹺全世界都唔得，即係開舖呢個責任又係落係我身上啦？理論上星期日係會好多生意，本來都諗住走左堂鼓佢全職睇舖，但係見成個晨晝淨係得兩條友入過黎，灰到噉我都懶睇啦去上堂好過唔通真係睇DVD成日咩。

好在冇走到堂鼓，如果唔係就見唔到我阿Sir最後一面。原來佢上埋呢堂就唔再教，番去幫屋企手搞生意。
「佢地話好希望我番去幫手，如果我唔番的話佢地會好失望。噉樣講即係擺到明叫我唔好再教啦！」
都幾灰架，假如有一日我老豆老母叫我唔好玩音樂唔知我又會點呢？
聽阿Sir講下堂個新阿Sir同Beyond有ｄ關係。聽落好有興趣．．．

即係雖然走左去學鼓，夜晚點都要番舖頭睇睇，如果唔係點對得住老細？結果全晚又係得我一條友，全日生意就係晏晝果兩隻碟營業額二百都唔夠。今日係禮拜日黎喎大佬發生咩事？唔通人人都收晒風知大老細今日唔係舖頭所以索性唔黎？（我地大老細好有江湖地位架）
今晚節目有二：
一．食飯，係麥記果個飯。點解我俾兩條二買左兜粥番黎？
二．睇女，當中有一段幾曲折之經過哈哈∼

番到屋企當然係開工。梗係，聽日交囉喎！不過又唔係開IT，係開Macbeth。唔知咩黎？唔緊要我都唔知，我淨係知我幫舍妹打篇Eng Lit Essay係講呢部莎士比亞名著。不過我都想知道，又係因為Trinity哈哈．．．

三點鐘而家。終於俾我死左四百字出黎。都幾灰架需知份功課係八百字架咋，搞左成晚先嘔到一半你都咪話唔死。雖然份野已經諗晒稿度晒點做，但係我知道唔通頂的話跟住果四百字都唔使旨意出現。所以我決定乜都唔理聽朝日先算，反正四點半先至係IT又有三個鐘空堂。（係囉噉我點解今晚仲咁戇居做功課呢？）

十點七而家。理論上應該上緊GS堂之我實際上位處ITS。唔係做功課份野十分鐘之前已經搞掂，而家我趕過去都仲黎得切上堂，但係我又冇噉做喎。冇計啦GS成四個quota淨係用左一個，我又唔覺得到學期尾可以用得晒喎，而家唔物盡其用走多堂，到左sem尾用唔晒咪捶心？死喇開始頹到有ｄ犯賤忝，不過我乜都唔知等我食埋早餐先好小我。

一點半而家。呢個一點半同之前果ｄ唔同，多左成倍人黎上堂。原來禮拜五阿Sir開唔到班結果成堆人今日走晒黎sit堂。亦都因為噉，我地八三三三賤人係呢個sem終於第一次聚首一堂！有我，有 漢 ，當然仲有最重要之八三三大才子　Xam少！（拿冇出你個名打左交叉架唔好小我哈哈）
漢 ，不如下個禮拜開始調過黎我地呢邊永久sit堂啦！

六點鐘而家。交功課喇要。由今朝到而家都唔知聽過幾多次「未做晒份野就番黎仲可以咁淡定？」我真係諗唔到點樣可以唔淡定囉，即係就算琴晚完全唔做，今日死線前俾三個鐘空堂你撩八百字野都撩唔到出黎的話就真係唔好讀教院喇。

咦原來八三三三賤人冇一個預過或者諗住畢業之後會去教書。我唔係RA就係TRHK， 漢 就會繼承歐陽家家族生意賣粉果，Xam少就講到除左教書之外咩都肯做噉。其實我地三條友仲係度做乜？佢地係開工＆瘟女，我就係開工＆搵女？
人地話「做果行厭果行」，我地係未入行已經厭。睇下大家每次搵part time個情況就知。除非真係窮途末路或者條件優厚，如果唔係「要教書果ｄ一定唔會做！」

俾HMV耍左鑊。以為我手上隻"Speed Metal Symphony"真係「全港(HMV)最後一隻」，點知今日突然間放左成棟貨出黎。乜唔係全港都冇晒貨咩？之前查電腦係噉講，而家噉情況我真係冇野好講。

羅文今日走最後一程。睇見群眾同佢送行個情形令我諗番起兩個人，一個係李小龍，一個係黃家駒。點解唔應該死果ｄ反而最早走呢？

又搵多份工 － 唔使驚只係俾窿哥釗點負責幫佢記低邊個上佢堂遲到。我地窿哥出晒名憎人遲到架啦！我估唔使幾個禮拜我就會俾人打死。
今堂最大驚喜就係「下星期三交六版Proposal！」我地組今日僅存之三位組員係完全唔知發生咩事架，但係幾時開會做晒呢ｄ咁重要之事當然要五個人都到齊先可以做啦。即係冇下星期都唔使旨意會開工。

是日節目：基準試
唔使驚係去報唔係去考，如果唔係我都唔會咁戇居一放學就由大埔趕出去灣仔啦。可能我早到，我埋完單之後後誘已經成十幾廿人排隊報名。當然啦聽日就死線囉喎你敢唔報咩？我琴晚先至睇張form摷番要果ｄCert出黎已經覺得衰，點知今日有條友仲勁上到黎先問「我想問報基準試要帶ｄ咩呀？」
即係我諗全世界都唔想報呢個無聊基準試囉，我英文係唔得的話又點可以過到會考高考同教院ｄ英文試呢？但係又冇得唔報喎個制度係要你考過先教得英文，噉就一千。完全係貼錢買難受啦。所以我老豆知道我報左之後立即小
「頂你條衰仔原來副修英文我而家先知！你一早主修英文拎夠學分咪唔使搞咁Ｑ多野囉！」

本來都入左閘不過突然醒起「一場黎到灣仔冇理由噉就走架？」噉就豪四蚊上番去英皇商業中心行行。果然係多CD舖到爆，而且唔係淨係得我要果ｄ其他大路野都好多，所以你地得閒都不妨黎行下！分分鐘好似我噉有驚喜！今次執到一隻搵左好好好耐之絕版經典碟（講過幾次不過懶再講＆搵番出黎講），咁難得當然要立即磅水啦！下回目標：《Beyond Unplugged 演唱會》！呢隻真係超難搵，噉都有的話我分分鐘會跳槽過黎灣仔哈哈∼