段記

2/11/2012 FRI

First World Metal Problems...True Story

http://knowyourmeme.com/memes/first-world-metal-problems

唔知乜野係First World Problems，請聽First World Problems香港區主題曲、謝安琪《你們的幸福》。

http://youtu.be/oYgMRIIVX3w

3/11/2012 SAT

功夫、囡囡、metal、ACG
炒埋一碟居然炒唔晒：
Project: Tai Chi 《太極》二部曲
從零開始、英雄崛起

4/11/2012 SUN

每週一相片大行動 2012 Week 45
真．黑椒漢堡大戰2012

5/11/2012 MON

Darkthrone《A Blaze in the Northern Sky》
20th Anniversary Double CD Edition

https://www.burningshed.com/store/peaceville/product/261/4167/

十幾年黎出過唔知幾多個版Darkthrone又reissue，今日出個新版係食《A Blaze in the Northern Sky》廿週年條水，重點除左冇remaster（其實之前無數個digipak reissue版有remaster，出黎好聲左定更加tr00就唔知，但我成日覺得拎崇尚原音的black metal碟黎remaster是好很矛盾的一回事），最過癮莫過於disc 2係旁述版。即係戲出碟加旁述版平常過平常，音樂CD真係冇幾可見過，記憶中只少少Candlelight/Peaceville樂隊試過，又有趣地Darkthrone最多差唔多頭幾隻碟reissue都玩過晒，訪問完再同你9up一下當年寫歌點點點。老實我真係唔明點解Darkthrone班友咁熱衷呢樣野。可能就係特登出黎笑鳩你地班白痴仔，

「一聽玩得咁求祈，就知道當年我地根本連練歌都懶啦，我廿年後聽返自己果時玩到成劈屎噉都忍唔住笑呀。你估我唔想錄得靚聲咩，後生仔冇錢租大錄音室請出名監製嘛，錄好隻demo就用晒錢，咪當大碟出黎頂住先。點知我地扮晒野話『噉先係真正black metal』，你班傻仔又信喎。噉有水魚俾錢我賺我冇理由唔賺啦，係咪先。」

6/11/2012 TUE

http://youtu.be/Ub5pd_mbp40

琴日Darkthrone出完「新碟」，今日到Aerosmith。佢地98年首《絕世天劫》主題曲《I Don't Want to Miss a Thing》係其中一個我開始聽band sound的原因，但事實是佢地除左呢首single，對上一隻真係好的碟已經係廿年前的《Get a Grip》，今日出果隻新碟《Music from Another Dimension!》玩成點唔知，但見到封面伏味甚濃，皮應該可以收定先。不如重溫呢段超經典MTV頒獎禮表演好過啦。

雖然MTV而家完全唔掂開黎睇都廢事，曾幾何時係我地band友歌迷由朝捕到晚的究極電視台，當年一大節目就係等《I Don't Want to Miss a Thing》個MV（一出世就睇Youtube大的朋友，唔會體會到當年等電視機播MV、錄音帶錄收音機節目份情懷），1999年頒獎禮中間表演環節到今時今日仍然百睇不厭，有仲未變戇鳩的Kid Rock（雖然已經有一點了），有過多幾年DJ俾人槍殺而解散的Run D.M.C.，仲有當時狀態大勇的Aerosmith，單睇最尾成班人夾《Walk This Way》已經high到震，有幸當年可以電視上面睇到。睇返事後訪問，飛咪果野係Steven Tyler後台興起，Run D.M.C.聽到立即「黐撚線！」Kid Rock就話「嘩嘩屌你正呀喂」造就最後兩條友你掟咪我接咁柒，冇左呢野真係失色不少呀。

八九十年代實在是流行音樂的黃金時代。而家無論音樂還是表演，都搵唔返同一種震撼。

7/11/2012 WED

早幾日報紙講到有個十幾歲英國仔發明左個新世代搜尋系統，即獲李嘉誠基金俾錢研究，我記得第一次聽時係上年年底，近日又傳可能已經第二度注資。其實唔係第一次李嘉誠越洋掘金，有留心時事的話，每隔幾個月就會見到一則「李嘉誠基金注資外國創業公司ＸＸＸ」新聞，我印象中今年李嘉誠已經注資左落起碼三間外國科研公司。

這就是有趣的地方了。李嘉誠係香港人，住在香港賺緊香港錢，但係成日聽到佢（仲有其他香港有錢佬）投資外國科研注資外國創業公司，你又聽過幾多次佢地會注資返落非佢地旗下的本地企業／研究人員／發明家？原因睇睇呢篇《如果Instagram在中國》就可以明白。在香港區在亞太區，中國人老細們需要的只是奴隸同廉價勞工。

所以香港本地人才唔係冇，但比外國難出頭好多，就算出到黎如果去唔到外國發展困死本地已經幾近等同於收皮－諗起我地indie人睇其實柒到出汁的《音樂人生》，評論時提到有個阿爸將個仔會考俾人批肥佬的畫作寄去外國藝術學院自薦，立即俾幾間學府爭請佢過去讀書的舊事。

點解9gag明明係一班香港人搞，但要整到自己淪為山寨版Reddit/4Chan/Cheezburger噉款完全搵唔到香港文化色彩（此乃其中一個我唔妥9gag原因），再去到外國搵人投資先發到達？假如當年高錕冇出國深造一直留守香港，你覺得香港會唔會出到個「光纖之父」？答案唔使講都估到。難怪世界強國永遠只可以成為世界代工廠。

亦順便幫篇舊文賣賣廣告，我好少褒自己，但拎出黎再編修一下從頭到尾重溫過，都不禁為自己寫過呢篇由尋常獨立音樂人角度出發之《音樂人生》評論感到自豪。老實講，我到而家仲未識得點樣去欣賞所謂香港藝術界傳奇的黃家正、所謂經典級的港產紀錄片《音樂人生》，因為當中所驚訝所表揚者，我地indie人唔係日日都見到個個都做緊咩。

「你覺得一個冇文化市井metal友，
識唔識得睇香港少年鋼琴家黃家正
傳奇紀錄片《音樂人生》？」

8/11/2012 THU

哎喲喲～以為「港女500」單野報紙都講埋正式玩完，點知黎到第四日高登仲有大量推post黎到(17)即係平均每日最少有四千幾個回覆歌頌佢，起底起得更詳細，更多新相新料爆唔停，例如個港女言行舉止不負港女之名，足夠令「唔好噉樣玩人啦玩死人你會安心咩」變成「嘩乜佢份人噉架而家俾人搞真係抵佢死囉」。

通常高登仔玩一樣野推到上報已經功德圓滿開始收皮，但今單仍然打得火熱，全因到頭來兩公婆原來一擔擔。做埋頭條主角的老婆一直冇回應，以為冇面見人匿埋喊？唔係，話咁快俾人踢爆單野黃左之後立即洗Facebook毀滅證據（一早圖已cap，掩耳盜鈴嗟），然後向各大報館「伸冤」死話自己冇錯俾人屈；本身老公冇乜野仲上高登出左篇文幫老婆出頭，冇道歉但平和，唔知係咪真係佢本人寫但最少贏返唔少讚佢肯承擔之掌聲，點知隔日報紙訪問佢態度完全唔同寸咀到爆，睇完就明點解佢會揀呢條港女做老婆。變卦之大係見報前「自己未婚妻得罪咁多人仲咁撐佢真係唔話得的好男人」＞上報後「除左呢條港女都冇邊個配得上你囉」咁堅。

其實佢學佢老婆粒聲都唔出下個星期已經冇人再提，但而家噉樣上報紙同記者講到自己兩公婆巧威威，都可謂老婆落井老公下石，單野高登仔分分鐘玩到佢地大婚當日30/12，再一週年一post賀佢地柒頭到老賀到2046，結婚果晚仲分分鐘有人組團成全佢地搞返個全港都知的世紀婚禮，陰公豬囉～

10/11/2012 SAT

[Gig // Metal // Hong Kong] 週二13/11就是瑞典首席black metal樂隊Dark Funeral香港演唱會，當晚齊齊到Hidden Agenda拋豬頭灑羊血。

The revered Swede black metal veterans Dark Funeral is giving their first ever concert in Hong Kong this Tuesday night 13th at Hidden Agenda. Don’t forget to bring along pig heads and goat blood.

$280預售票仍作公開發售，可經門市、電話或電郵購買

$280 advanced ticket still on sale via outlet or phone/digital reservation as below

Dark Funeral Satanic War Tour: The Return

https://www.facebook.com/events/231791193613945/

日期 Date: 13/11/2012 Tue 星期二

時間 Time: 8:30pm

地點：牛頭角大業街15-17號永富工業大廈2樓A室 Hidden Agenda
Venue: Hidden Agenda (2A, Wing Fu Industrial Bldg, 15-17 Tai Yip Street, Kwun Tong, Hong Kong)

票價 Ticket: 預售Advanced $280 (STILL ON SALE!) / 即場Walk-in $300

購買或查詢預售票 Advanced Ticket Reservation: 9170.6073 Kimi

14/11/2012 WED

每週一相片大行動 2012 Week 46
007 + 寒戰 + Dark Funeral
= 完美的一天

18/11/2012 SUN

Kowloon Metal City
Track 22
怒人．下傳：
怒人，給大家上了一課
唔係亂屌而係有橋的marketing

19/11/2012 MON

是日娛樂：民建聯官方Android app

http://play.google.com/store/apps/details?id=com.logictoken.dab

download完login上去屌，
屌完上Android Market評論區再屌

20/11/2012 TUE

上星期二Dark Funeral，睇左一場show，睇左兩套戲，但睇漏左兩套劇，《Perception》仲要係大結局添。所以睇完Dark Funeral第一件事係上網搵返，然後唔小爆無線唔得，佢地近年最大（唯一？）貢獻就係搞左個可以隨時上網重溫節目的MyTV，偏偏乜都有得睇返，就係唔擺我追開果幾套上去。執柒左佢啦。大陸網又block晒香港IP，結果咪要BT囉。或者要多謝無線，上年《天與地》知道佢一定唔會出碟甚至重播所以一播完大結局立即上網download定珍藏，到今日MyTV只重播中文台膠劇加超多廣告係唔重播美劇你吹咩，迫到我學識左用BT。

賣點係J. J. Abrams監製的《Alcatraz》差幾集大結局睇晒先再講，《Perception》其實開頭好麻麻見後來有起色就追埋，雖然劇本同演技水準偏低－當女主角身份係FBI但外型同演出點睇都係做緊仲讀緊書的校園青春劇萌味十足《寒戰》咁超現實選角已經失敗（雖然正，香港女永遠恨唔到就係人地萌極都有胸）－低極都睇得出點解無線連人地最低level劇集都贏唔到。其實九成美國劇情片都係玩「Good Cop/Bad Cop」／「Black Cop/White Cop」，幾個主角實係正規官僚派配破格神經刀，細個睇電影到大個睇劇集都係呢一條橋但睇極唔悶，因為人地搵親班演員除左有外型仲好識做戲而且有性格，好似《House》同《Mentalist》睇一條佬點樣神神化化破奇案，做足百幾集仍然可以每集都演到你真心笑，然後睇返無記林瘋福祿壽，唉。當然仲有劇本，唔使比較真實性嚴謹度同規模三樣，單人地係一晚講一個完整故事的單元劇，而唔係一個單元拉長五晚做死拖難拖到你追都冇心情的吊命連續劇，年年只識copy & paste同cut budget的無線已經輸足九條街。所以我地甘心比鬼佬用一條食左廿幾三十年水舊橋昆，都唔會睇一樣翻炒舊野但越炒越不知所謂的無記膠劇。

以前港劇同外國劇一樣，好睇在故事好、演得好。當無線將同一班演員加同一個故事翻炒左唔知幾多年，睇果班已經唔會再理套劇邊個做同做乜野，無記劇只有淪落到要用幾多條女會除幾多衫、邊一條女會俾人姦之類做宣傳重點。但講到賣女同鬼佬劇比咪又係戇居，人地根本唔使特登拎出黎賣已經係必然一部份，尤其商戰片多正野睇到你滯。而且單元劇優勢就係每集都有新囡上場，個個星期有新血有樣有身材有演技絕對唔會貨不對辦，例如絕對唔會出現事前講到點樣輪姦點勁，等左幾個禮拜原來得一秒仲要衫都冇除，最後我不受接受.jpg的悲劇。

我仍然等緊《天與地》之後下一套有理由去追的無記劇，但睇黎直接等Wiki Wong打救好過，一日佢未開到台，每次開電視只需要轉有線或者英文台。《Perception》完今晚開始做新一季《Good Wife》，撞睇平戲日子好驚又會間唔中錯過一兩集，無線如果你又係唔擺上MyTV重播就繼續食屎算啦。

21/11/2012 WED

請原諒我同時局脫節＆後知後覺，雖然近來寫左兩篇怒人，呢兩日先知道原來佢地出左兩首新歌。

http://youtu.be/LKP9tn_0V8w

http://youtu.be/wJi1TMivvtw

風格同好折衷的之前唔多同，變左直接punk底但仍唔錯，只係音樂斯文左冇咁喪。《香港鳩政》少少差在詞，粗口落得唔夠以前咁絕，其實粗口歌最忌係太濫粗口，不過旋律同chrous依然係無敵的怒人。《商業狗西》就笑到我碌地，前幾日出街的《怒人下傳》入面講到咪就係呢樣野，其實亦係我咁多年黎（唔多敢講出口的）心聲（咦點解我會無端端諗起《難忘時刻》），中間寸爆班恨上位indie band段breakdown，次次都聽到我同佢一齊笑，笑柒你一世呀！

有少少偏差但仍非常期待下一首新歌／下一隻EP，所以希望《商業狗西》出左街之後，怒人仲有命出埋下隻碟先至俾人打死，哈。

23/11/2012 FRI

尋找他鄉的故事之
愛斯基摩冰屋入面個屎塔

24/11/2012 SAT

劉Sir除左黑仔到震之外，仲好撚厚面皮架，所以一知道呢晚觀塘有場免費band show，仲唔落晒狗屎都拿拿聲仆到黎睇咩。點知黎之前多多野搞，黎到已經錯過左第一隊Stone Mind，好唔開心囉。好在其他三隊都好睇。

Synergy：

除左唔使錢之外，其實都係為睇Davey哥隊新band處男show先特登黎嗟。首先要懺懺悔：Davey哥其實之前好耐之前你send俾我首demo我有聽過，不過好撚長聽左頭半就ＺＺＺ所以唔好意思出聲啦，因為我聽左果半首demo近doom底冇預過其他歌會咁爆，十足Carcass《Heartwork》聽上腦噉款riff爽歌寫得好（原來demo果首後半玩到Opeth咁正），成隊band又夾得齊，除左歌妹清聲位我麻麻，簡直冇得彈。其實有四首歌同寫＆玩到噉水準，可以錄EP了。

Mass Roten：

好似本來冇佢地，好在有嗟，有囡目及喎，口桀口桀。都幾J但唔差，兩枝結他技術仲相當勁估唔到咁後生玩到噉水準，歌頭幾首編曲有點怪，最後幫《九龍城寨》寫果首曲編彈最好，但較多野批評，結他技術夠晒只差台風，女歌手把聲入唔到咪同唔太鍾意種用聲法，bass同鼓都玩得有點急躁。不過有乜所謂，咁後生，大把時間練，同埋（最重要）有靚女的band是大晒的，口桀口桀。

No Excuse：

唔知點解見到個名就成日覺得佢地玩punk，今日第一次睇先知道原來玩cover，仲係我睇過香港地難得數一數二地無敵的cover band，睇成班友拎晒八幾年metal佬結他，一身牛仔褸褲加黑衫，三枝結他戙晒腳再夾定一齊搖旗式勁chok，唔少得首歌一開始同最尾歌佬手伸向上再望天唱個超長高音，你話好娘好老土我話屌真係好撚old-school簡直落左深圳酒廊噉款。搞到28號蒲吧想執笠show好想去。

場show咁正唔使錢真係抵到爛啦，Stone Mind唔知但今晚三隊band都好睇，有得encore會再捧場果隻，所以十二月應該幾多show要睇。唔知幾時又有免費show睇呢，搞手再有咁著數記得通知聲，尤其有Mass Roten出的免費show，騎騎

26/11/2012 MON

係我個位太差，定搖滾X古典先天本已不足？
Kolor X 柏斯管樂團演唱會

27/11/2012 TUE

除左謝安琪，李卓庭係我最迷超級地迷的香港女歌手，不過當 1) 冇偶像派外型只得「型格派」路線 2) 唱rock仲要唔係pop當rock果隻，好遺憾收山是必然結果，問題只在於時間。2007年出道開始差唔多冇觀眾識冇搞手理都可以維持一年出一隻碟屬非常難得，但今年黎到年底仍然只得一首新歌冇碟出，呢場Run for Your Dream，可能真係李卓庭告別演唱會。

呢幾晚我放工就會仆到去奧海城買飛。希望唔會好似上次同樣九展開show的農夫，唔夠人買飛搞到要取消臨開先話取消。

28/11/2012 WED

Zippo向來支持音樂活動，因此Zippo於今年十二月將參與香港本土最大型的現場樂隊表演及藝術節Clockenflap，藉著本地及國際歌手或樂隊之演出，繼續與香港樂迷慶祝其長久的搖滾音樂歷史。

Zippo將於Clockengflap音樂藝術節的會場內設置攤位，展示一系列極具代表性之產品、並與各位入場人士大玩遊戲，更會送出多項Zippo的限量禮品，包括Zippo特地為 Clockenflap 設計的 Zippo x Clockenflap 限量版防風打火機。

節目詳情：

Clockenflap香港音樂藝術節

日期：2012年12月1日及2日〈星期六及日〉

時間：正午12時至晚上10時

地點：西九龍文娛藝術區

參演樂隊：超過90個音樂單位將會於一連兩晚的音樂會演出，當中最為矚目的表演樂隊包括Alt-J 、De La Soul、恭碩良、Killersoap及觸執毛等

關於Clockenflap：

Clockenflap由Mike Hill、Jay Forster和Justin Sweeting於2008年創立，為香港帶來一個值得驕傲的大型節目。一直以來，Clockenflap都不受利益驅使，主辦單位一直為香港大眾提供他們所期待渴望，真正屬於他們的音樂文化節目。受Glastonbury、Fuji Rock、South by Southwest等國際音樂節所啟發，Clockenflap不但帶來國際知名樂隊，同時亦把焦點放在區內新進音樂人身上。

踏入第五年的Clockenflap持續增長，不斷壯大。2011年的Clockenflap吸引了一萬八千人入場參與，今年預期入場人數將達至二萬五千。

Clockenflap官方網頁：http://www.clockenflap.com

30/11/2012 FRI

今日返工經過個公園，見到外面綁左隻狗，一睇就知靚野啦柴犬喎，照計冇理由有人會唔養就噉掟出街，不過好鬼惡一行埋去就撲埋黎隻手俾佢噬左幾啖好在冇留血，公園管理員當然多一事不如少一事啦問佢都廢鬼事答你，又趕緊返工＆廢事俾隻野繼續噬，就走左了。

返到大角咀，見到有隻好細好細隻貓仔匿左落架車底，想走出黎又驚人唔敢出，個司機又唔知去左邊，我又趕緊路，就只有希望開車之前隻貓走得甩。市民唔多理，而家仲要咁多變態佬黐線MK，政府更加希望早日死晒最好，流落香港街頭的貓狗真係好慘情。

而邊個話政治只關人事？唔好唔記得之前未發生咁多虐待流浪動物案、香港人對街頭同家養動物態度冇而家咁正面時，係民建聯先成功爭取捉左兩隻流浪狗送去人道毀滅，再記憶中有份同其他土共左仔一齊推翻左個幫助流浪動物草案，到之後開始多人關心、發生左幾單案件，成班捉貓捉狗聯盟突然間好愛護動物，愛到成為自己本身包括「捕捉流浪動物」的政綱其中一部份。無恥到連流浪貓狗都受誅連之餘再可以抽水做自己政治本錢，禮義廉都算宇宙無雙了。

1/12/2012 SAT

唔覺唔覺，我地黎到可能係人世最後一個月喇。大家齊齊唱返首Megadeth倒數先。

http://youtu.be/R8g-lugXGBQ

2/12/2012 SUN

麥樂雞 x 6 + 香辣雞翼 x 4
= $28.5 = 勉強可以一戰

戰得好勉強，因為上年同樣玩boxset，但差唔多同樣價錢有18件麥樂雞先，多過而家一半有多囉。

3/12/2012 MON

Predators@Android

https://play.google.com/store/apps/details?id=com.fde.predators

好少玩電話game因為一係收錢價錢仲要唔平，如果免費通常玩到後半先發現要俾錢買道具升級先可以玩落去中晒伏，好多又實在同我自己開browser玩flash game冇乜唔同，最大問題對我黎講篤芒真係好難控制（所以Shadowgun同Dead Trigger買左好耐而家都仲未玩），會好神心地煲除非隻game真係好正啦好似對上一隻煲爆的Gears & Guts，不過唔係有修改器都唔會玩。而作為一個超級Predator fans，雖然好少打電話game，但一知Predators減價USD0.99，點可以唔立即磅七個半港紙買左佢呢。（「挑！真係咁神心，一出果陣廿幾蚊已經買啦！」）

見個名有s都知係套戲的官方版電話game，話時話套戲兩年前上乜Android版而家先出咁wow，不過冇所謂因為好玩。好在唔係第一身射擊，因為到而家都未識用analog掣玩FPS（恥笑mode：Shadowgun玩左幾個月仍然第一關都過唔到），如果隻game唔整成咁old-school的俯視角動作game我都未必會玩。單睇畫面精細音響又唔錯，加上load得快完全冇lag就知隻game一定會成功，玩落其實好簡單就係殺殺殺同殺，武器招式夠多同型可以加多幾款fatality會更開心，最好係就算完全唔儲錢升級買野都可以打爆機，你鍾意長煲慢慢殺人儲人頭換錢買野又得，爽手快快打爆佢亦得。我一直覺得電話game正是應該如此簡單為主，而家電話定位係代替以前賣點簡單易上手、純粹俾你得閒無事拎黎消磨時間用的手提機同flash game，要複雜要長篇我開大機玩返keyboard + mouse的PC game好過啦。

只係簡單有陣時都有代價。隻game改編Predators，即係敵人只得人類同另外幾隻Predator冇得打異形，而且跟足套戲個森林星球，無論乜關都只得兩三個好鬼求祈的野外景，仲要關關一樣形狀一樣大細一樣冇乜地形變化，搞到好似成班古惑仔去球場打爛仔交噉款。的確有陣時你真係覺得自己似古惑仔多過Predator，喂我應該係高科技獵人隱形突襲點解成日要變葉問一個打十個？全隻game只得一關潛入人獸亂戰漁人得利，但都設計得麻麻帶唔出Predator果份獵人感覺，整game果班其實知唔知Predator本身係點？都仲未同你計我隱左形大庭廣眾殺人，附近其他人居然可以完全冇反應咁戇居。寫好少少個AI唔難卦。

頭三分二打人類絕對令你非常滿足，因為班友根本俾你撳住屈，你可以話前半隻game係俾你儲錢買升級同學識點操作，例如打遠開熱視線就可以立即lock人唔使等、打近連續技要睇準時機篤先至連到如果唔係會斷開（我到打爆機先發現呢兩樣野真失敗）。去到後三分一由打人類變成打Predator就風水輪流轉，大佬本身勁而你一定要埋身先打到佢冇得打遠，仲要無限勁卒圍你明恰，有關要同時打兩隻Predator未俾佢兩個屈死都俾班卒圍死，打幾打就要閃匿埋補血再重覆無限次，每次閃時見到自己俾成班人追住個款，然後睇實行血一滴一滴慢慢加再擔心俾人追到又成行血冇晒，更加覺得自己似個街頭打交唔夠打迫住著草間唔中出黎抽抽水抽完又要閃的古惑仔，做Predator做到噉都幾折墮。而真正折墮係本身已經屈機同時又有無限勁卒磅住的最後大佬，打足一晚都打佢唔爆自己就灰到爆炸，結果要上網睇人教路用bug先打得爆機而且靠bug都贏得唔輕鬆，回歸以前紅白機年代行街game最後大佬幾乎永遠冇可能用非屈form的正常方法打贏咁懷舊。

打爆機仲有兩個survival mode你玩，不過因為卒仔就算完全唔升級都可以用fatality一招必殺、全部大佬變左單挑冇晒無限雜卒支援即時削晒，要survive到永遠其實唔難欠缺挑戰性，所以當你打爆左一次機，基本上隻game已經冇乜繼續玩或重玩價值，最多只俾fans如我等緊車或臨訓無聊拎出黎打幾關過過手癮。但以電話動作game黎講，除左持續性唔夠同控制上有少少問題，值得俾$8娛樂返兩三晚，之不過要廿幾蚊買就免了，fans都係噉話。

老老實實其實最想出官方Android版，除左Capcom果隻史上最無敵行街game《Alien vs. Predator》（呢隻真係堅好玩中學打到而家都仲係咁正），就係復刻返2005年PS2果隻《Predator: Concrete Jungle》。我份人好有耐性，既然《Predators》都遲左兩年，再遲多幾年的《Concrete Jungle》唔爭在出埋Android版啦，要我廿幾蚊買我都制的。

4/12/2012 TUE

每週一相片大行動 2012 Week 49
Motorola R.I.P. feat. 曾經愛機A1600明

5/12/2012 WED

琴晚收到封恆生信，寄左張晶片銀聯卡迫人四個月內轉，今朝特登打電話去問清楚，回覆係而家提款卡部份強迫性轉做銀聯晶片卡，信用卡就暫時維持不變仍然係Master/Visa，當然第時就好難講。換左卡之後港外都可以用，搵銀聯同匯豐標誌櫃員機就提到款，不過銀聯網絡每次收手續費$15，匯豐網絡就$20 －話以前收$30，所以而家換左銀聯卡仲平左喎。至於Plus就唔再有，我冇詳細問有冇機會或點樣可以加返。