十點半老細打黎：
「快ｄ黎！再唔黎炒你！」
「你試下炒丫！炒左我睇下邊個同你搬舖！」
係呀一早就俾老細召左去搬野。本來佢係叫我十點鐘到架不過想我禮拜日十二點前起身都幾高難度。起身搞兩搞十一點幾去到老細同Kara已經包好晒ｄ野我又係坐享其成哈哈，不過噉唔代表好得閒因為跟住要將所有野搬晒落樓！全間舖淨係CD都放左成十幾個大箱加廿幾個細箱仲有化身成廿幾條鐵條之CD架加木檯木櫃電腦電視機，抬唔係問題不過要行兩層樓抬落去就真係好大問題！真係上年全年加埋運動量都冇今日咁高，早知就寧願冒俾老細炒之危險都唔黎啦我呢ｄ懶人你叫我用腦算啦！
經過左大半年之折騰，到左今日龍珠終於都有日安寧喇，所以一眾隔離鄰舍對我地搬遷都表現得好熱心：
「你地（終於肯）搬拿？」
「乜一日就搬晒咁快呀？（噉就好囉聽日唔使再見到你地！）」
「等我幫你地睇住ｄ野啦！（廢鬼事搬搬下唔見左幾箱野到時見到你地返黎眼冤！）」
「．．．．．．（你班ＸＸ都嘈得耐喇！＊＃ｘｙｚ．．．）」
以上對話紅色部份係經我解碼後出現之潛台詞。唔好睇到佢地咁好禮貌呀其實自我地開舖係呢大半年入邊好多人都好唔妥我地架。
「拿！呢ｄ咪叫『虛偽』囉！」
太多野喇實在，夾埋搭左兩程車走左兩將所有野搬晒過去旺角新舖。搬完之後就明皆旺點都贏龍珠幾條街：淨係呢度行一層都有電梯搭已經贏晒啦！呢度地點都唔錯可以諗下租樓上寫字樓舖做band房，似乎又係時間同業主聯絡聯絡∼七條友搬左成朝做到九彩好在老細包lunch，不過唔好以為好開心呀呢餐晏仔就係今日人工黎架喇！
開張第一日已經俾管理員小我地嘈生晒，噉又係既成個商場都係賣模型賣舊書俾人小就預左不過冇諗過咁快囉。舖頭係正廁所側邊就真係唔多方便，不過唔方便果個唔係我地係係皆旺做保險ｄ女經紀，因為全層得一個廁所所以佢地去親廁所就實會經過我地舖頭，而一有人經過無論係有心定冇心舖入邊所有人都一定會望下。你去開旺角都知ｄ保險公司實係搵ｄ後生女著晒靚衫打扮得靚一靚黎兜生意（都唔明點解佢地淨係搵麻甩佬？女人生意唔做得乎？），所以每隔一陣都會有（靚）女經過甚至停留係舖頭門口。最開心果個就梗係阿明啦！
「我愛保險！」
六點正搞掂，TRHK旺角新店終於正式營業喇！之前未開已經有幾個客撞過上黎，當中仲有隻係鬼黎忝老細都話「呢舖掂！」夜晚就好多Band人上黎，睇黎呢度將會成為好多樂隊成員新聚腳地點，好快皆旺就會變成臥虎藏龍之地！搬左出黎旺角人人都好開心因為好方便夠就腳，但係我就非常之唔開心因為本來住得最近舖頭果個係我，而家搬左出黎次次返工放工都要搭車之餘得閒無事果陣又少左個地方打下碟釘吹下水！第時禮拜四五六四點至九點行過旺角又得閒的話就不妨上一上皆旺商場108號舖探下我班啦！先達行過ｄ間麥記側邊個111商場就係喇！個舖位好易搵架，上一層電梯循住最嘈果個方向行就實冇錯，唔識就問下管理員「唔該我想去日日都俾人投訴果間舖。」真係第一日已經俾人投訴我地嘈喇繼龍珠之後皆旺將會成為另一個冇日安寧之清靜地哈哈。
阿威第一次上到黎舖頭帶左份禮物俾我地：
「我地麥記冇得Thrash呀！」
個演奏會個搞手一聽到我地玩Metallica就耍手拎頭，「咁嘈ｄ家長唔鍾意架！」頂乜而家出騷都咁多事幹要俾錢先有得上台仲要呢樣唔得果樣唔得？噉我地玩Beyond囉夠「靜」喇卦其他band都係噉玩法啦！不過果日台上面出現《我是憤怒》同《金屬狂人》我地恕不負責！
話晒今日係TRHK旺角新店第一個正式營業日，放左學之後當然要立即飛去幫手啦！不過上舖頭之前都要幫襯一下火車站個走鬼CD檔先，經過好多次見到都行過就算但係查實呢度確係有唔少正野，今次就真係坐定定揀返幾隻先！呢度ｄ碟都係五六七八十蚊隻，好多人都驚係翻版黎唔買，但係我可以話俾你知佢地賣ｄ碟都係正版，賣到咁平係因為ｄ貨都係外國ｄCD舖清倉或者執笠果陣唔要ｄ倉底貨黎！
以為舖頭搬左出旺角會有好多客，點知上到舖發現冇乜人，可能因為冇人知道新舖而家開埋禮拜一。開埋以前唔開之星期一係開左旺角新舖之後TRHK生意踏上新一步之象徵，睇黎跟住仲有有好多野新一步，例如下一步係搞Webzine，好似好犀利不過簡單黎講即係又係我，係就灰囉老細真係以為我萬能乜都一條友做得晒！傳聞第時生意上左軌道之後老細可能唔會好似而家噉再計鐘數俾人工，而係每個月俾七八千蚊請全職，係就真係發囉反正我都冇諗過下年畢業之後教書＆有書教！到時可以搵一份半職教師朝早教書晏晝就走去開舖，計埋人工同個全日制教師比都係爭二千零但係分分鐘嘆過佢！不過唔好發夢住因為一切都只係傳聞，而且「生意上軌道」亦唔知係幾時之事，老細對新舖暫時都只係持觀望態度，
「好彩咪挨到一年半載，唔好彩咪三個月囉！」
落完堂之後去左搵GS阿Sir傾一傾份個人功課，發現基本上個功課大綱寫ｄ野就係阿Sir要ｄ野，而且又係果ｄ只要搵多幾本書睇睇通一晚頂就可以起到貨仲最少都有B之功課黎！我肯做的話絕對可以實習之前起到貨架－ 「肯做」的話！不過呢份功課點好做易做都冇用，因為其他無數樣功課份份都要做field work同research，一係就要睇勁多書同理論點都唔會明，今年GPA過唔過到2.4我都唔知呀唉！
放左學立即飛出尖咀，冇錯又係行CD舖時間遲ｄ再冇呢ｄ機會架喇。尖咀美麗華入邊有間專賣日本野之CD舖就黎執笠所以而家大清貨，呢ｄ情況我當然係第一時間飛身去現場搶埋一份！可能因為間舖執笠已經傳左一排所以今日黎到好多正野都俾人掃晒，不過就算九成野俾人掃晒我都冇有怕因為我要果ｄ野差唔多永遠都唔會有人買。黎親呢ｄ賣日本野舖頭ｄ人實係時髦到爆，有邊個會好似我咁無聊專掃埋六七十年代老餅野同偏門野？
出尖咀又點少得HMV。睇黎今次清貨都差唔多到盡頭喇冇乜新貨蒲頭。係中文部見到林敏怡隻CD做緊特價。未聽過林敏怡？林敏聰個家姐喎，佢修爵士樂同古典樂出身，遲ｄ林敏聰開演唱會佢都有份玩，慶祝香港回歸果陣都係搵佢幫手搞掂音樂果部份架。知唔知係香港呢ｄ真正音樂人之下場係點？就係永遠可以以超過二百隻之存貨量囤積HMV清貨架。成個架都係放同一隻CD個場面都幾壯觀架得閒就上HMV睇下啦。又令我諗起一個關於我老細之故事：話說當年老細離開阿龍大搞Azylum出左碟之後，開始紅之阿龍大推出佢地第一隻碟。當佢地呢隻碟係HMV以$1XX高價賣緊果陣，Azylum唯一一隻碟"Are We Born To Suffer"大大棟放左係HMV清貨架以三十蚊一隻賤賣。
冇堂上反而要六點半起身因為要返小學拎配屬ｄ野。今年個時間表點睇都嘆過上年好多，除左禮拜一雙週果陣要連上五堂之外基本上每日都係得兩三堂。不過IT就灰喇收到本書睇到教整網頁立即好開心，點知阿Sir話
「整網頁我教完架喇！所以我會教佢地倉頡輸入法攝時間！」
當堂超灰呀之前睇到三年級有講過倉頡以為點都唔會關我事忝！死喇今次真係要的起心肝學好倉頡喇！
是日最大節目當然係行CD舖啦。咁耐冇幫襯Rock Gallery到而家已經累積左好多心水喇所以今日黎到立即連掃三隻。死喇今日順路已經噉喇到三月日日都會黎點算？
冇喇跟住就係訓同RA喇。本來諗住飛髮都懶去更何況旺角呢？Sor呀Kara放左你飛機冇上舖頭忝！
雖然搬左出黎旺角成個禮拜我都係今日先至正式開新舖。可能因為噉今日差唔多全部鬼都一齊上黎賀一賀我，加埋差唔多有成十幾人同時塞晒係舖頭。換著以前（其實只係上個星期）龍珠間舖得而家呢間一半大真係企到出門口霸埋走廊都裝唔晒咁多人啦！最開心果個就梗係老細啦出到旺角係唔同ｄ，不過我就灰喇第一日開已經開到九點幾，官方仲話「希望可以開到十一點」，嘩實習果陣同學期尾點算？
呢排我地麥記好不思議，個個都話聽到其他隊員講左一ｄ當事人都唔知有講過既野，唔得禮拜日一定要開會搞清楚到底發生左咩事！不過就算冇事發生今個禮拜日都要開會架喇，就係因為「麥記」．．．
專登返去上一個鐘GS都幾無聊，不過好在個導師正，
「我話俾你知，除左我之外冇人會噉樣上呢一堂！我當呢堂吹水堂黎架咋，唔係好似其他人噉樣講幾句就討論算數！」
呢ｄ導師邊度搵？提到一次觀課觀到代埋個實習生教之後仲要都唔肥佢，又講到佢係科學系如果係教社會科學課題ｄ野佢唔識所以唔會有咩要求，嘩真係講到唔會肥噉喎。睇黎今年GS真係完全唔使驚學生同導師都好如果拎到Distinction就掂喇！
落堂之後搞EA節目又係PPT畫圖用黎玩"Describe & Draw"。畫白痴圖就實係搵我架喇，不過話白痴俾我搞一搞有ｄ圖都複雜到相信鬼佬都唔會玩得掂。有人問
「嘩！咁難！得唔得架！」
「車！玩果個又唔係我地！」
到左三點真係要走喇。呢個時勢走左去好似好對唔住不過又唔走唔得因為．．．
「反來囉！」
唔怪得老細係噉call啦原來今日有咁多新貨要上架！而且禮拜六話係三點開但係三點先走得，好在三點九趕到如果唔係就得罪晒係門口等緊果班人。是日勁多人除左有指定路人阿明同Kara之外，仲有維京人阿Jens同靚女Rain（十五六歲女仔已經聽好多野仲聽得耐過我，不過噉都唔奇我地ｄ客中二都有．．．），最重要當然係阿叉啦！今次又係上黎砌好一箱之後俾我sellｄ新野俾佢，跟住聽聽下就抽返半箱出黎留返下次再換返我推介果ｄ入去，即係每一次都最少有半箱野會／要買！阿叉走左之後輪到ｄ鬼上黎又sell多幾野倉底貨，仲有好多熟客同稀客今日都上晒黎，搬出旺角真係唔同ｄ！夜晚仲過癮有兩公婆上黎買野，開頭以為係個老公聽老婆陪佢點知原來係兩公婆一齊聽仲要聽埋晒好嘈好激果ｄ真係估唔到！到最後仲有「TRHK夜場」差唔多有兩隊band上左黎齊齊排排坐睇MTV，除左睇電視之外就係講「爆鼓事件」－ 冇錯受害人就係我，之前踩爆bass單野已經揚威舖外喇以後班友仲有排串。
好多事發生呀呵舖頭好似？好事黎丫，咁多事發生咪即係我到放工都唔使上架囉需知上架係TRHK員工最唔願做之工作∼
「係我錯！」
EA仝人！我對你地唔住！琴日話今朝返黎幫拖搞EA Weekｄ野點知起身已經十二點幾！係我唔好係我錯嗚嗚嗚∼
《和平示愛三十六小時》
呢個節目唔錯。唔錯在好多歌手都肯唱似返ｄ「歌」既歌，同埋電台肯播返真正係「歌」既歌。Radiohead, U2, Bob Dylan...呢ｄ電台平時點會（肯）播？如果每日電台都係噉樣的話我一定會好似以前噉樣成日都開住收音機聽，而唔係好似而家噉開收音機係為左轉台。
麥記又黎，今次夾得好過上一次。不過太耐冇掂過套鼓喇，當結他同Bass都彈到飛起果陣我仍然係唔知打乜，死喇而家最唔掂果個反而係我。一定要勤力ｄ執＆練歌如果唔係我好快就會俾人打。
夾完當然係開會啦，主題就係「麥記」。因為阿Rax唔係好接受到呢個名之關係「麥記」將成歷史！唉麥記呢個名有咩唔好呢？本來諗呢個名之目的就係為玩野架啦但係點解到頭來反而驚俾人笑？不過你地唔要呢個名唔緊要呀有機會我一定會搞返隊為玩野而玩既band振「麥記」之餘烈！
今日本來叫左位濫send Mp3小朋友上黎俾老細小下，所以開完會／餐之後就立即飛上舖但係都發覺「遲左忝！」臨散會果陣發現場戲已經做完冇得睇喇！大家都好失望尤其是阿Rax，因為原來佢都好唔妥呢條友今日專登上黎想睇下佢點樣俾人小大快人心！其實除左我地之外仲有唔少人都收到風專登上黎睇戲因為呢條友都幾臭串得罪好多人，不過算啦大家原諒佢啦話晒只係一個聽少少Metal就以為自己好威好勁之中三小朋友．．．
十點，終於返到教院。遲左十二個鐘忝。做啦．．．
通，但係冇想像中咁忙當中有一大段時間係坐係度睇書冇野做。六點幾收工見Canteen有排先開門就去左出巡痴返跌左果ｄ野，點知等一大輪先知間野係七點半開真係灰。本來都諗住唔食早餐抗議架喇點知走左去班房訓左陣就俾實Ｑ趕。？？？班房開左門做乜唔俾人入呢？？？可能又係商業陰謀一部份迫ｄ早返人士冇定坐又冇野做唯有去食早餐。到八點幾先至訓都帶定鬧鐘驚起唔到身上堂架喇，不過起到都冇用因為跟住中史堂都係訓足四個鐘好在阿Sir都睇化知道我聽多四十個鐘都唔會明就由我訓由頭到尾都冇小過。
EA week第一日好成功，本來個個覺得最難玩同最少人玩之1 Minute Drama反而係最好玩＆最多人玩果個攤位。開幕禮之後有呢個Refreshment本來諗住做一大輪有免費飯食，點知有班友行過見野食任拎就每人幾碟where碟＝裝到滿瀉噉走左去自己開餐結果全檯野唔使兩個字就消失晒。嘩我地EA人都未食／冇得食喎，不過既然ｄ人可以咁厚面皮都冇咩好講喇。
搞活動最難唔係搞，係set野同埋收野。今日搞掂之後收野收左差唔多三個鐘連堂都走埋，嘩如果日日都噉做會死過喎雖然我聽日開始晏晝冇堂．．．
收完野點支力都好，沈太堂都係一定要上。越黎越鍾意上佢堂，因為越上越唔想教書。今日睇左集劉家傑年代之《鏗鏘集》（話時話有冇人知佢去左邊？），講有間學校有個鬼佬神父點樣違反常規地教學生。佢有大半時間都係帶學生出學校外邊上堂，上堂方法都係實身體驗而唔係讀書做功課。Year 1開始我已經諗過Final Year Project就係做呢個「非常教室」仲同ｄ導師吹過水，不過睇黎點樣有研究價值都好都係冇得做架喇，你可以好似果個神父噉好似間學校係佢開既無論點做間學校都唔會小咩？
上緊堂果陣阿威猛噉打電話黎，落堂之後call一call先知
「冇得出騷呀！」
個琴行老細話滿額唔肯受我地玩，我就唔信喇既然係上台表演都要收錢咁商業呢ｄ活動點會有「滿額」呢回事？好明顯就係唔想俾我地麥記上台Thrash！如果想玩可能要參加Yamahaｄ比賽喇不過呢個又係另一個問題因為呢個係另一個世界ｄ人太勁，同埋個評分準則好有問題唔係睇你「玩得好唔好」而係睇你「玩得in唔in」．．．
返緊屋企果陣撞到個客，原來佢係我街坊就係住我隔離真善美村！我發覺好多客都係住係呢一頭架！不過搬左出新舖之後都冇乜見過佢地喇，因為以前仲係龍珠果陣就腳好多冇野做都可以上去吹吹水，而家出左旺角反而遠左唔順路所以都係出開旺角先會上舖頭。我都好唔開心架其實而家返放工都要搭車喎不過有乜計呢！
今晚《夜媽媽與夜爸爸》第一個鐘講有大量人士係香港目擊UFO而天文台又否認，唔算太正唔聽都唔算太可惜；第二部份就正囉講史提芬史匹堡前一排係美國公映引起好多人關注之電視劇"Taken"。呢部戲劇情由羅茲威爾講起講到不久將來，引起好大迴響之原因係當中牽涉到好多內幕差唔多每一句對白都有潛台詞係入邊，同埋呢部史匹堡作品居然係推翻晒史匹堡自己以前所有作品！想知史提芬史匹堡點樣「以今日的我打倒昨日的我」就快ｄ去聽喇！
真仆街今日訓到三點先起身EA仝人我冇野好講．．．
THE END OF
今次一氣過個半鐘搞掂一首好爽，錄音果陣真係超正。最後四個字Dave話夠錄多首跟住又係彈Riff＞加鼓＞Jam兩個字真係黎多首！有陣時我都唔知我地呢隊咩樂隊黎架，又唔玩人地歌又每次都有新歌，所以如果每一次都一定要錄音因為已經有太多歌，唔錄低的話真係到底寫過ｄ咩歌都唔記得！
大家仍然係一次玩得比一次好尤其是笛，而套鼓亦係一次比一次唔掂哈哈．．．
「熱播MV：劉德華《包青天》」
係香港雅虎度見到呢句。《包青天》差唔多十年前已經出左但係當其時大家都唔聽甚至話呢首歌七，但係點解十年之後大家反而係噉捧呢首歌？其實你地係聽歌定係睇人？
今日終於起到身喇仲好左忝，終於唔使俾人打喇∼
禮拜三好多course都係dayoff成日都冇人流，仲撞正我地副校阿KC彭個劈炮典禮噉就搞掂可以一早收工去開飯，不過點早搞掂都好晏晝個基準briefing同listening mock都一定係唔會去架喇∼
今日終於見到傳說中之live band － 一睇就知係臨時拉伕，個鼓一聽就知「唔應該係噉打」。不過最傷心都係冇Hotel California冇得睇傳說中之完整版solo（呢首歌段solo好出名架逢有最佳solo選舉一定係三甲之內），不過都識到另一個傳說之中成日提及之Samiel！真係讀左三年都唔知原來我有呢個同學！又識多個音樂人睇黎距離係教院組隊pop band又行近一步！不過大家點有興致都要等到實習之後大家得閒先再算．．．另外我發現音樂人都有一個問題，就係彈野一定要搵譜唔會自己執。唔通音樂人由細到大彈野都係對住份譜搞到有職業病？出到去同人夾band話「我唔識執歌架！俾譜我啦！」會俾人笑架！
前日我地EA開幕禮之後ｄ野食俾人搶，今日又有野食當然要搶返轉頭！我套衫（只限套衫）比某ｄ職員仲似職員當然成功搶到，不過跟住隔離檯見我搶到都出去搶埋一份先發現其實乜人都食得。話晒副校長劈砲喎學校梗係掟大把錢出黎搞得好好睇睇啦豪幾盒蛋糕幾箱汽水俾你算ｄ乜！你估好似ｄ系會仔噉俾人明搶都聲都冇得出咩！
一早收晒野唔代表有得早抖，仲要填定實習ｄform交俾ｄ導師。填form永遠都係好痛苦之一回事因為ｄform永遠都要你填學校之中英文地址，而所有官方訊息包括官方網頁永遠都唔會有自己學校之中英文地址。交完落音樂室執埋ｄ野，難得冇人上堂套鼓又棟正係度當然要打一打啦。阿明其實我唔係唔想教你打多ｄ呀，教院都冇一間固定band房可以俾我玩下我邊度搵到地方教你丫？即係你又唔好彩囉揀正住HalB，另外兩間Hal都有Band房係Hal B得一間得Amp冇鼓之「Amp房」．．．
Rosy唔好意思放左你飛機忝，本來仲諗住搵你夜晚傾埋GSｄ教案點知無端端有得打鼓開心得滯就走左去。呢期真係萊特兄弟上身．．．
又走增潤真開心，不過都要返教院因為EA Week同有免費飯食。唔知點解越接近EA Week尾聲人手越不足今次要一個人睇兩個檔，搞到個個玩完1 Minute Drama之後行過隔離「乜又係你？」最好玩仍然係呢個一分鐘爆肚遊戲，有班癲佬五六個人霸住個台係噉玩唔肯走真係睇到笑爆咀，事實證明大家唔係唔肯／想講英文只不過係英文堂真係太悶同太著重成績搞到大家都唔願講英文，如果你上堂俾人噉玩法加上英文堂真係為學英文而唔係為做功課同年尾考試我相信全香港冇人學唔好英文。
唔知點解雖然我地卜左個場都成日俾其他人踩場。今日有中樂團同手鈴團表演，本來都有ｄ期待但係唔使兩個字就知道一定會失望，因為雖然係有兩隊好唔同之樂團但係大家居然係各有各玩一人一首輪住表演而冇一齊表演，大佬你搵到人手就唔該加多ｄ新意啦！所以成日話香港音樂冇前途，玩「正宗」音樂ｄ人都唔肯創新仲邊度會有新意出現？
搞完EA下半場又係開舖。呢排都冇乜生意又係唔知點解我開先有，淨係今日生意已經抵返前兩日老細都吹脹，應該係因為糧尾啦下個禮拜會好ｄ。除左呢個Sales之外第時我係舖頭又多樣功能就係電腦問題射手（即係Trouble-Shooter）。老細唔使咁驚訝我居然識整電腦喎話晒我都係教電腦，真係要驚訝就驚訝俾十五蚊一個鐘請我真係好很抵啦。
EA Week真係一日比一日少人，唔知係咪因為冇左由我負責之一分鐘爆肚呢哈哈。係冇咁開心架喇不過都總算好頭好尾。
見仲有時間就上沙田HMV行下，發現冇減價喇而家！因為取而代之既係二百蚊三隻！好多之前減價都唔肯放而被迫俾超多錢買之貴碟而家都平最少一百！又俾HMV昆左真係灰呀一面掃碟一面喊！雖然最後都掃左唔少正野不過都冇用喇因為ｄ碟都俾我ｄ眼淚水浸爛晒！
晏晝開舖有好多水吹，因為呢排有幾隻大家都等緊之新野到左個辦所以好多人都專誠走上黎聽下有幾正。老細成日打黎問「點解仲冇人買野？」梗係啦，人人都仲試緊新貨嘛一日未聽晒班友一日都唔會俾錢買野。
收工之後當然要上一上火車站反正順路。基本上而家逢四五六晚都會上一上黎探下條友架喇。雖然之前幾次已經掃左好多估唔到仲會有正野執喎，死喇再係噉每日一兩舊水第時真係唔知點死。不過對我呢ｄ唔識死人士黎講呢ｄ問題當然永遠都唔會理，我仲叫條友聽日帶多ｄ黎落俾我執執。聽佢講其實佢果度仲有好多Metal野同老餅野，真係遲早踩上佢個倉度睇睇先。
噉就三月完全唔知發生咩事。一起身就燒當然要走堂啦，好在今日兩堂都超廢。反正 IT個導師不嬲都熟我唔返佢都唔會小，英文果個又唔會黎睇我堂唔使驚有人會公報私仇，今日慳返三條加兩個半鐘留返係屋企訓多陣絕對係明智之舉！
燒都要開舖架啦（返學又唔見咁落力喎）。好在三點就到因為阿叉一開舖就上黎噉又一千。知唔知點解佢逢禮拜六都會上黎買千幾蚊野？買野都係其次，最主耍係因為佢鍾意我既服務態度，所以話我讀書唔成係咪冇用先讀過書ｄ人都做唔到噉樣好服務到個客為服務而上黎呀。
聽日就基準所以今日又係練英文時間最後衝刺同ｄ鬼吹多ｄ水（但係聽日唔係考Oral喎？）。如果我肥左基準係咪代表我英文唔掂呢？我相信合格ｄ人都未必可以好似我serve得咁好囉，我見過好多所謂「英文好掂」之人見到鬼已經肴晒底更何況叫佢講？
又有屎忽鬼（班友自稱）上黎。今次呢班屎忽鬼係隸屬於一隊叫Messiah之樂隊。同班友吹過水知道佢地就黎出碟喇，雖然只係一隻幾首歌demo仔但係成本都差唔多要一萬。大家努力啦雖然出碟對我地The End Of黎講仍然係好遙遠之一回事．．．
火車站將會成為繼HMV之後另一新蒲點，耐唔耐上到黎都執到正野即係要成日都要上黎啦？今日行一行噉又舊五喇第時佢再拎多ｄ正貨落黎點算？
聽日就基準不過仍然係乜都冇完全冇準備冇溫過書連本範本係邊我都唔知。當連耳機使唔使帶我都唔知果陣你話我仲會做過ｄ乜？
明明屋企樓下有試場就係唔知點解編我過到黎柴灣考基準咁遠。不過遠還遠原來出柴灣九個字都唔使咁快，早知就唔六點幾起身飛地鐵出黎啦。可能咁早出黎就係為左打電話俾阿明：
「唔好你千祈唔好起身！我冇帶部printer出黎還俾你你千祈唔好出黎搵我立即撻返低繼續訓！」
黎到間學校先知原來有幾part要鉛筆做。當你見到我仍然係全身得幾支藍原子筆就知道我係幾咁冇準備同幾咁頹，好在最後都俾我乞到支鉛筆如果唔係真係就算全部答案中晒都因為用錯筆俾人扣晒分。
Reading:好神奇地居然易過Mock好多。除左MC冇乜唔掂有信心合格 － 不過都係唔好發夢我不嬲都冇乜MC運仲有人記得"catastrophic"嘛？
Listening:唔係難不過好多陰濕位應該錯唔少野，呢份有ｄ信心會肥哈哈。份野最抵死就係每講一兩段野就會有大大段Pause俾你慢慢寫，嘩A-Level都好似冇咁嘆喎？
Writing:點睇都肥架喇呢份。改作文講Grammar冇讀過書完全唔掂架喇；作文果部份係鬧香港教育，基本上作得呢ｄ題目就一定唔會／唔願停架喇所以最後超字一倍佢話寫三百但係我寫成差唔多五版實肥。本來一直都諗唔到點樣收尾所以係噉寫不過一見到鬼佬上台就點難寫都一定諗到點埋尾，因為佢上台就即係話唔俾再早走仲唔即閃？反正都冇預過合格不如早ｄ走去開房好過！
事實證明考完試之後千祈唔好打鼓，就算體力上精神上都完全地支持唔住。今次大家都好唔掂不過都係因為個鼓亂晒搞到其他全部仆晒街，睇見阿Rax手結他今次乜solo都彈唔到真係灰。Kara如果禮拜二晚我手鼓仲係咁差唔好小我呀我都唔想架．．．
超頹今日九點返到搵阿Sir傾IT功課＞十點未夠搞掂冇野做等六點半傾GS＞上阿明房聽歌跟住就訓。仲話今個禮拜做好RA忝都係唔好發夢喇哈哈∼
今次終於冇放Rosy飛機喇六點準時開工一齊傾GS！發現佢學校用果本《現代常識》ｄ課文編排得差唔在講仲要講錯野，「植物以陽光製造養料」噉都寫得出好野！都係我間學校用果本《今日常識》正教埋你點教之餘仲要有大量IT野俾你用！我上年個原任上堂都係播本書送果隻CD扮晒有活動架咋！即係GS雖然唔係有好多堂不過堂堂都要有創意每堂都要唔同真係諗活動都諗死。更灰就係你發覺你每科都要咁諗到喊而教院只係俾得一個禮拜你準備，而呢一個「禮拜」當中又要補課又要做功課仲要考基準就會明點解教院咁多講師成日勸你唔好教書－ 而家教幾班都咁慘，第時教十幾班果陣點算？寫埋個教學大綱之後你就會更加唔想教書，因為你會發現原來做教師之成本係好好好高：唔使計足咁多級咁多科咁多課喇，淨係三年級常識教一課植物已經要買無數盆栽同花黎做實驗。嘩我實習已經冇錢收囉喎點解仲要我咁搏？
係呀今個禮拜係「實習準備週」呀不過唔知點解又要返黎補課囉，都好在沈太今堂淨係上個半鐘早左成半所以成日都好鍾意佢因為佢上親堂都一定會早放。好彩今堂冇走如果唔係真係蝕灼（不過沈太堂點都唔會走）。
因為學校唔夠書分之關係所以今日一返到黎教院就要落一落拉記搵返本常識書影印。但係搵一大輪之後發現教院居然係冇而家好多間學校都用緊之新版書而只得嚴重過時之九七年版。呢樣野講出去真係俾人笑死架阿「香港教育學院」＆「全港最大教育類書籍藏書庫」！
仲出尖咀真係唔識死不過為左二百蚊三隻冇計啦。今次減價ｄ貨整齊左好多有好有唔好，好在唔使摷唔好在俾上次清貨少好多貨。今次好多都係大路Bandｄ名碟正貨睇黎HMV真係就黎爆倉喇，遲ｄ應該會越黎越多正野。有興趣執ｄ大Bandｄ碟就快ｄ上HMV行返轉喇好多大Bandｄ碟而家都係全線減緊價！
THE END OF
仍然係唔使玩人地歌又係無聊地Jam下就有新歌。今次又作多幾首就黎多歌到自己都記唔到喇，所以一定要錄音等第時可以聽返同做編曲。係呢度夾真係一次比一次成功，夾完之後睇返麥記，唉．．．
「教育統籌局在二月一日起凍結所有教席，學校需要優先聘用超額教師，即是說我們畢業後，無論你是一等榮譽學士，或是有多優厚的條件，都會被淪為次等申請者，作為超額教師的後備選擇，失去了與超額教師公平競爭的機會！」
哈哈哈哈哈哈哈哈哈∼∼∼
終於唔使返教院喇今日，立即兩點幾先起身。仲諗住返小學問原任拎ｄ教材忝．．．
冇得玩野喇要開始準備實習。雖然做足全日不過好慢，因為越黎越唔知做緊乜：１．實習ｄ野根本就係太多永遠都做唔晒 ２．見到咁多野做越做越唔想教書搞到冇晒動機 ３．無論而家做得點好下年都係搵唔到野做而家咁辛苦忙黎做乜？
睡房張床
乜今朝有英文增潤堂架原來？乜今個禮拜唔係俾我地準備實習既咩？
蘋果頭條
小小五百字仲要一早諗野點寫份都要做到六點，唔係唔知要做乜而係唔知做緊乜。
「做得點好都冇書教做黎做乜？」
Present搞掂就算，本來今日可以搞掂晒ｄ野，點知阿Sir反而ban左之前佢話冇問題個方案搞到今晚又要再執一執。堂上做？傻咩咁多時間梗係拎黎頹啦！
今日Present嚴重超時知唔知點解？話說阿Sir話「每人有四分鐘報告」，點知原來係解「每人報告果陣俾阿Sir小四分鐘」噉解。噉搞法唔超時都唔得啦！即係好多人唔係做得唔好只不過係阿Sir心情唔好囉。
Lunch見冇野做就上叻姐度訓。死喇大家ｄ粗口越黎越流利下個禮拜就實習喇點算？
晏晝節目當然係開舖。今日係今個禮拜我唯一一日係度。係咪間舖嫌棄我琴日唔睇佢呢今日全日先得幾單生意仔，老細今日唔得閒落黎接更直開到十點都冇人，睇黎今個禮拜做到灰之我真係唔適合返黎呢度邪住！
雖然冇乜生意好在都Messiah個歌佬上黎吹下水。原來呢條友又係無聊人黎，全隊雖然仲有兩個未見過但係都夠死喇因為隊野五份三都係傻既：個鼓佬係唔係都爆粗，歌佬上台指定動作係掟咪Stand，結他佬睇落好正常點知原來又係癲佬係台上邊專踢譜架，雖然好多時出騷都係唔用譜架不過都照叫人Set俾佢踢！呢排佢仲諗住帶黑Con上台仲好似已經寄左信去外國公司訂造真係痴線。
返到屋企本來都諗住做下IT架，不過開完機之後一訓低就死左結果成晚野就冇做過部機就係噉係度焚．．．
本來琴晚係諗住訓左的話就六點起身繼續做，結果真係六點起身不過係搬竇去睡房繼續訓仲死。十點起身之後當然係立即飛身返教院繼續啦份野唔做真係會死。
特此嗚謝Xam少一個人做晒成個Present，不過都係因為佢知靠我就死硬所以寧願靠自己哈哈。全班組組都係人人有野講係我地組得一個人講，不過你要笑我小我我都唔介意呀總之唔使我講野就得。之後抽籤睇實習返黎果次Present個次序阿Sir無端端屈左我地最後先俾抽，點知仲正最後抽淨第一真係得來全不廢工夫！經過呢兩日知道Present越早越好早搞掂早著唔使等咁煩，最重要就係可以迫到自己做野！（理論上）
Present完之後襯阿Sir見唔到就即閃喇，部電腦壞左坐係度唔知做乜不如早ｄ走好過。咁早走唔係搞實習係開舖，其實一早搵左Kara替更不過都專登返黎開因為阿叉好鍾意見我，除左服務好之餘我又可以sell到佢覺得自己真係執到唔少正野，每次買ｄ野有一半都係我sell俾佢架所以佢每次都有一半野係留返下次買。係舖頭同係試場講ｄ英文真係好唔同，係咪即係我肥左＝我英文好唔掂？真係調返轉俾合格ｄ人黎做我呢個位佢地都未必得啦，考試果日好多人見到鬼已經驚到咩噉呢度仲要成日見喎。學英文係為實用而唔係為考試呢樣人人都知，但係就係唔知點解ｄ人永遠都係講係一套諗又係一套囉。
夜晚係噉催老細返黎接更，「就實習喇唔使準備咩！」不過其實咁早走都係為左HMV。又有唔少新貨出不過暫時都冇太多新貨想買執左好耐先夠三隻，阿明就慘喇好多都唔係本來目標點知俾我地講講下就越買越多仲轉晒型忝（冇錯我係Evilau！）一上DVD部就死本來同阿明傾好一人一隻剛剛好二百五，點知又俾我見到有套戲想買好耐，而家雙碟特價冇理由唔買架？阿明對唔住喇放你飛機搞到你都要買多隻忝。不過噉又何嘗唔係好事呢因為噉即係遲ｄ我又多隻碟睇囉！
又四舊半死喇淨係今個禮拜已經跌千幾，夠喇我決定今個月內唔會係舖頭（狂）買碟！不過似乎最後都會架喇因為老細都唔多想出糧果陣出現錢，寧願我地拎碟易計唔使煩，簡單黎講即係其實今個月已經係舖頭買左Ｎ隻碟架喇！
點零起身發現「最後一日喇！」點睇都唔似聽日就實習囉。英文同GS仍然係課文都未睇過，IT仲衰倉頡仍然係未研究過，field research都係乜都未諗過真係唔識死，不過點都打埋鼓先算哈哈。
基本上真係「今日」先開始搞實習ｄ野，琴日玩完返到屋企之後立即頭痛到爆食完飯搞下野就撻低不醒人事喇。好明顯潛意識上我係非常之唔想去實習，結果搞到三四點先至起到IT個教案。好在聽日兩堂GS都唔使上如果唔係真係返左聽日之後後日開始唔使再返學。
由今日開始日日都要六點幾起身真係命苦。返到學校先發現真係超級大整蠱，本來話今個禮拜唔使我教GS點知突然要我教返，即係如果係教三年級講植物冇所謂對住書照吹都應該死唔去，但係要我教四年級睇地圖就真係．．．指南針都未搵地圖都未畫你叫我點教？當堂立即唔肯教啦大佬一早講掂數過喎呢ｄ野！
IT未備過課就去教喇真好野。入到班房見個秩序已經知呢班唔會搞得掂，上到電腦房嘈足兩堂難得原任阿sir坐足兩堂都唔嘈佢地可能佢都睇化呢班。最抵死係教一大輪落堂之後個原任話「其實你講ｄ野佢地上年都學過識架喇。」噉又叫我由頭開始教？繼GS之後又一飛機。好在佢叫我上堂唔使講咁多俾多ｄ野班靚仔做就得，噉就最好啦反正我都唔識打倉頡少講少錯。
最後兩堂四年級GS雖然講掂唔使上不過都要入去觀下課。挑原來聽日測驗本來佢就諗住同班友溫書，雖然而家「我放佢飛機」（呢句唔多正確事實係相反）俾佢小但係如果係我教書搞到佢冇得溫書佢會小得仲勁囉。成班學生都痴線聽日測驗講到明今日複習都仲唔肯溫，基本上答到：答唔到＝1:3我都唔知點教喇呢班。
本來對呢間名校有返ｄ期望點知睇完呢兩堂先知名校原來都係齋講，個原任睇落好好人但係入到班房原來係惡到死果隻係唔係都小，睇左呢堂好似返左以前小學年代噉。即係又係按教院標準佢實肥到仆街。呢ｄ先生係呢間學校唔止一個喎好多老女人都係噉，真係唔明點解呢間野會做到名校照計理論上之名校唔會用呢種八十年代教書方式。上個學期觀課果ｄ原來係假象，果陣個原任剛剛病左冇睇到自己ｄ班但係見到人地教ｄ班全部都超強以為今次掂梗，點知自己教呢幾班GS原來都超廢！本來仲諗住GS教好ｄ拎Distinction噉今年實習成績就坐B望A睇黎冇望架喇，即係今年GPA又過唔到2.5唉！
一朝早返黎就俾英文原任捉左叫去開備課會，都幾肴架差唔多乜都冇諗過，更肴係本來諗住最後兩堂同阿華一齊傾點教點知要去GS「觀課」冇埋！又爆肚囉唔係點呀唔通真係話「冇我乜叉都冇！」
備課會流程：成班五年級英文先生遲三個字入黎之後有個大叫「我三個字之後走架喇！」＞班友自己傾聽日份測驗個marking scheme＞差唔多夠鐘先開始傾點教黎緊課英文。唔怪得呢間學校兩個禮拜教一課原來全部野都係先生自己諗，傾一大輪結果差唔多唔跟書教咁滯因為重點係做project同堂上活動，都幾free喎呢度。我就當然冇出過聲啦一來未夠班二來（呢樣最重要）冇貨哈哈。結果傾出黎係教一版書就做一個活動即係同本來諗ｄ野又唔同，睇黎今晚有排諗 － 仲要諗定後日三堂GS呀突然間要我教返真係灰！
個個都好擔心下年畢業之後，但係有人話我完全唔需要顧慮呢ｄ無謂野！點解？
「你媽媽是護士，爸爸是副校，故此家庭月入有十多萬，Year 1開始已經好多人都知架喇！」
升上神檯喇真係！所以成日都話我係全BEd最傳奇人物，因為人人都識我但係我差唔多乜人都唔識，所以全世界都好樂意自由發揮塑造「劉義」呢個角色。睇下Year 1已經俾人神化到噉我都唔知而家我變成點！可能佢地已經講到我已經畢左業而家返黎係做助教！不過呢ｄ都唔緊要，最重要係
「邊個講既同我出黎！」
英文果班掂呀真係班友英文超勁，我已經講得好快同好深個原任仲話「其實你可以再快ｄ。」問題係班友真係超勁但係英文越勁果ｄ越唔上堂，原任都話「呢班真係好typical架！」開始對跟住幾個禮拜感到擔憂．．．
今日上兩堂，第一堂冇活動齋講原任話好掂，第二堂有活動就嘈到原任冇野講，因為佢慣左一搞活動就真係自由活動，所以佢都話「咁嘈其實係正常架！」最弊到時導師黎睇果陣佢唔會認同呢個係正常現象呢．．．
有時都懷疑呢間係咪上午校，到兩三點ｄ先生都仲未走？（係差唔多一個都未走呀！）不過懷疑黎做咩呢我又何嘗唔係放左學之後搞一大輪野兩三點先走人？
THE END OF
開始有ｄ驚，因為大家越黎越夾玩得越黎越好，再落去會點？
今次轉左方式夾唔再即興Jam野，而真係專注係兩首上慢慢度點玩，結果真係唔同ｄ。或者噉樣真係會易ｄ同快ｄ起到歌，不過相信第時我會好唔開心，因為我絕對係The End Of即興精神之最忠實追隨者所以每一次打ｄ鼓都會唔同，而家要我諗好晒ｄ野點打就真係有ｄ難度．．．
夾完節目當然係上舖。今日到批貨真係多到仆好在係老細自己睇，我開舖的話淨係入電腦都做死。今次批貨乜都有基本上係Metal人入親黎都會中招架喇，我當然唔例外就拎三隻先啦。計返條數最後只需要俾十蚊現金就夠，所以點解咁鍾意係舖頭買野呢掟十蚊俾老細執果一刻真係好有老細feel。
開完房上完舖玩完野就要寫教案喇。三堂都未諗過我有時都覺得自己幾勇。第一個禮拜已經咁頹跟住點算？
是日GS戰況：
三年級：秩序暫時冇問題不過真係夠晒蠢講成堂都唔識用指南針，無論你點教都好班友仍然認為只要將指南針支針指向你想搵果個方向就會搵到你要果個方向。
四年級：第一堂個超超超兇原任係度所以冇乜事，教方面佢都冇乜小我架喇仲覺得我教得好好忝，因為雖然我又係一筆走天涯但係一定好過佢果ｄ七八十年代教書法；第二堂原任一走就仆街淨係搞秩序都搞左大半堂。好在導師係黎睇三年級．．．（暫時「好在」咋三年級其實係點可能下星期先知）
今日得三堂最後兩堂空堂當然即訓啦唔通諗定聽日ｄ堂點教咩？
今日終於可以準時放學喇！本來要幫出trip之Kara開舖點知突然唔使得喇返到屋企立即訓足成日。唉晚晚都噉做法有得唔訓咩？
今個禮拜係單週所以今日上少兩堂IT淨係得兩堂英文要上，不過都夠晒灰喇。小息完之後三個字都仲可以有成十幾個人返唔到黎搞到超遲開始已經算，完全唔明點解班主任會調最嘈果幾個坐埋一齊，真係想知其他先生上堂果陣係咩情況？可能原任俾太高自由度喇（上學期黎觀課果陣可以佢一面教書學生一面整board你話死未）所以而家成班學生都開始好敵視我呢個第一堂已經立好多規矩同小左好多人之實習老師。導師黎睇果陣點算？
實習．．．又點？舖我都係照開架喇！好耐之前提過條女好唔鍾意佢買碟果隻鬼今日上黎仲要係同佢條女一齊上忝，可能係想帶埋條女上黎自動投案加自首啦哈哈。平時有正野佢多多都會買但係今次居然只買六隻，可能係想做騷俾佢女朋友睇，我絕對相信佢今日做騷＋自首完之後聽日一定會再上黎掃過。
雖然出左糧但係禮拜四都冇諗過會有好多人好在都有生意。咩叫有生意？噉就要睇睇我成日講之呢句：
「冇二字頭我都唔叫做生意！」
老細都開始認同呢一句喇∼
夜晚同老細吹水傾下生意上ｄ野，吹吹下就吹到黎海皇粥店。雖然而家已經搬左出黎旺角，但係另一個計劃整Webzine仍然非常迫切。點解？睇睇網上面ｄforum就知，大部份人話就話係聽野不過心態仍然處於捧謝霆鋒ｄ靚妹之階段，睇下香港附近ｄ地方真係冇得比。唔使講日本咁遠淨係台灣聽音樂ｄ人都深入過香港好多，見到人地真係可以用學術性角度去「研討」音樂就覺得香港灰。即係唔係冇不過又係圍內幾個囉，但係得幾條友又點夠？所以就好想搞個網鮮「教育」下開始日漸增加之自認「音樂人」。不過問題又係迫切又點？有人得閒做咩？所以大家唯有繼續灰落去．．．
返到屋企就係聽歌聽到三點都冇乜準備，聽日IT拎返上次個教案算喇懶諗．．．
今日呢班IT幾易教真開心，不過發現本來ｄ教學目標又其實係已有知識即時吹脹，好明顯真係因為個阿Sir快左教晒整網頁唯有拎倉頡黎攝位。噉就最好既然班友全部都識晒倉頡噉我就可以唔使教佢地倉頡ｄ基本野，即係佢地一定唔會發覺到佢地個阿Sir其實係唔識倉頡輸入法。
上堂除左教書之外仲要做研究：做第一張倉頡工作紙＞睇網頁學倉頡＞做第二張倉頡工作紙。理論上第二次做工作紙成績當然會好ｄ點知，實際上就完全相反因為班靚仔上完網之後已經冇晒心機做野，第二次擺明唔做搞到好多肥佬！噉結果真係笑爆咀我都唔知點同阿Sir交代呢個超自然現象。
放學之後走左去行HMV，成日以為銅鑼灣好遠今日經小寶姐一帶先知原來咁「近」。之後再上埋中環果間不過都係冇野執（其實係廢事再執咁多）。今次減價基本上行尖咀就夠因為其他分店有果ｄ貨尖咀總店都一定會有。有好有唔好啦又係，好在唔使再成日行勻全港噉摷一兩隻野，唔好在即係今次減價ｄ貨一定唔會多元化得去邊，同埋一定冇果ｄ「全港淨返一兩隻加冇人會要」倉底貨執。
好靜今日好在超多無聊人上黎有水吹：
１．Messiah歌佬又上黎唱校歌結果全場成日都係度"HEARTS ON FIRE!~~~"唔識係正常架因為呢首歌真係太唔正常喇 － 唔係應該係話玩呢首歌果班人太唔正常！有興趣上黎舖頭問我啦睇過你先會知道
「嘩乜原來麻甩佬都可以搞成噉！」
２．有條友聽左幾年野，乜都聽過晒而家已經去到聽Darkwave，一種只有環境同氣氛之音樂。呢類野舖頭入邊暫時冇人識聽所以佢一直都係我地舖頭VIP之一 － 佢唔黎邊個幫我地清噉果ｄ貨？加上佢造型獨特（好襯佢聽開果種音樂），但係佢上左黎咁多次大家都唔知佢叫咩名所以大家一直都覺得佢個名同佢外型一樣咁型。點知
「其實我叫 Bunny呀！」
當堂覺得無Ｑ聊男人老狗改呢個名係咪兔年出世架條友？之前見到佢個樣仲諗到佢會叫Darkwavian之類咁型忝點知而家呢個樣加呢個名當堂冇晒幻想！又一個被神化例子．．．
３．老細以前隊band另一個結他佬上左黎買野，不過重點唔係佢係佢女朋友。外左美唔使講除左靚之外仲好有氣質係一睇就知好賢淑果種（人人都覺得真係超靚但係老細反而覺得唔靚可能人同鬼睇野係唔同），內在美就更加唔使講即係我冇乜見過而家有女仔可以咁馴品心地咁好囉，最重要就係佢接受到佢男朋友玩＆聽ｄ音樂仲肯陪佢一齊聽忝！係幾令人羨慕架需知係我地個圈子入邊女已經唔係多，圈子外邊又冇乜女會明我地做緊乜，接受到我地做緊乜ｄ女仔都冇乜邊個咁馴品呀真係我到而家都冇乜見過有女仔係唔MK架！所以到而家為止TRHK仍然係麻甩佬集中營。點解麻甩佬咁難溝到女呢？睇睇《麻甩佬分類指南》就知．．．
本來諗住一朝早返教院還埋之前借ｄ書因為仲有幾日就過期，不過結果係冇返因為一起身就立即發燒，訓到三點一定要起身喇因為要開舖 － 真係病死都要開呀今個月實習冇得做RA唔開舖的話唔病死都餓死！今日阿肥仔瘦仔上黎吹水，一聽到我有兩隊band就話要打死我，不過又真係唔打得唔得既因為佢地剛剛又係爭鼓佬，所以我諗我會同佢地搞多隊band玩番ｄ舊野。
點解今日會咁靜？冇人之餘鬼都唔上黎已經再冇我既事喇係時候收皮。
我發覺年年都係噉架喎係實習果排先至病，下個禮拜唔知點算真係。
琴晚八點幾返到屋企食少少野再食藥之後就訓訓成十幾個鐘先起身，起身之後冇咩事ｄ藥係幾掂喎。（定還是係訓得多掂？）
．．．要開始準備聽日實習ｄ野喇。之前兩日點睇都唔似而家係TP緊喎？聽日仲要教三堂交四個教案忝我都唔知點算喇哈哈∼
今日GS好神奇呀居然教得好順利，一班教學上同秩序上都完全冇問題一班仲要教完之後有時間淨，到觀課果日都係噉就正∼
返到屋企就狂訓喇是日真係早起早睡。
六點九起身基本上琴日到呢一刻訓左成十幾個鐘，嘩日日噉訓法真係唔使做噉款。
先前指南針都唔識用琴日講一講就識以為好開心，點知原來都係咁蠢講埋答案俾佢地抄都可以答錯。英文又仆街班友擺到明唔上堂，當撩人傾計最多果個係班長果陣你仲可以講ｄ乜？班友好唔妥我知唔知點解？因為原任由佢地嘈同癲上堂果陣乜都唔理，我第一堂就係噉小人班友自然唔妥啦。不過小就要繼續架喇唔係視導點算？唔好同我講果ｄ咩「諮詢立約」呀乜乜乜呀我個半禮拜已經試左兩三套方法都失敗所以永遠都話理論係冇用。
聽日ｄ書就夠期喇所以今日死都死返教院還書。當有條傻仔話你知佢俾左三十蚊千山萬水搭兩個幾鐘車出入教院用分幾鐘還書你會有咩反應？
THE END OF
打第一個音就感覺到今晚唔會夾得好，結果整體真係玩得幾差下。唔通真係灰開有條路？
今日好榮幸收到阿Tommy Lee寄黎之讀者來函。有背景人士睇到呢個名應該同我一樣會心微笑哈哈∼呢位仁兄同我一樣「於教院此咀咒地受難」，跟住意外黎到我個網頁發現有我呢個同道中人（又或是同是天涯淪落人？）當堂send封email過黎問候下我。Tommy Lee相信我同你會好好傾＆好多野傾，我都想拜侯下你架不過相信短時間內都冇時間架喇，復活節啦到時一定搵你．．．
ZZZZZZ...是日狂訓。而家每日最少都訓十個鐘真係好「健康」。
班友已經擺到明好唔妥，當然啦當原任上堂係好似放小息噉款你換邊個入黎都死啦，我話上堂唔俾食野都俾學生小你話點管？當班友完全唔合作你認為我仲可以教到ｄ乜？進度已經慢架啦仲要唔肯上堂遲人地成四份一課架喇已經！幾經辛苦終於趕起作句一樣功課不過都冇用因為仲有兩本作業要做。噉秩序我都唔知觀課果陣點算喇唉．．．
又係灰開有條路。點解今日舖頭乜人都冇？？？
終於知道阿Bunny哥哥身世！（唔記得邊個？睇返之前幾日啦！）（始終都係好頂唔順呢個名，你叫Benny我都算啦男人老狗叫Bunny！）原來佢已經三十幾歲仲要結埋婚仲要生埋仔仲要生左兩個仲要大仔已經五歲忝！既然已經三十幾歲人就當然聽野聽左好多年。最開頭係聽ｄBritpop野，到九七年某一日突然間覺得「唔掂喎而家ｄPop野！」跟住就轉左去聽Metal，聽多幾年之後Metal都聽到悶喇就轉聽Darkwave（都唔知咩黎？算啦我勸你千祈唔好聽．．．）。都幾神奇喎屋企有兩個仔仲要有個已經五歲佢點可以係屋企播埋晒呢ｄ咁ＸＸ既音樂呢？（佢老婆就一早已經睇化仲一齊聽架喇唔係點會肯同佢結婚丫）唔知佢班細路由細聽呢ｄ野聽到大第時大左會變成點？
最後Bunny哥哥奉送是日名句俾大家（其實已經累積左好耐）：
「我老婆識我果陣已經知我聽ｄ另類音樂架喇，不過而家再另類ｄ噉遮！」
「拿你地就係舖頭間一格，你地唔聽果ｄ野呢就放晒係果度留俾我揀就得架喇！」
「我而家仲有麥記隻黑碟，我係咪好娘呀？」
「廁所係你地舖頭隔離，噉ｄ女仔去廁所果陣聽到呢ｄ音樂咪．．．咪．．．咪會好驚囉？」
「我地噉既年紀，最緊要就係食多ｄ龜苓膏同煲多ｄ老藕 － 第一句真架第二句就呃你既！」
冇喇返到屋企就係訓喇。呢排都幾灰。
IT今日觀課但係好淡定。有幾淡定？琴日開完舖返到屋企就訓訓到今朝七點幾先起身返學教案都未寫就知。不過最後一堂先睇IT又唔使教具淨係齋講有乜好驚呢？最重要個Tutor超好人又同我熟點差都一定會俾合格我，我有信心有講過野我已經可以有Cre！更掂就係今日抽中教果班係全級最靜一班當堂冇野講有得唔Cre咩。如果抽中另外三班是但一班就分分鐘仆得我話你知，因為上到電腦房除左俾佢地自己上網佢地先識靜ｄ之外你講乜佢地都只會啋你都傻然後周圍走黎走去踩場打架．．．
灰開有條路好在掂開都一樣！去到舖頭已經有人等緊我開舖有得唔掂咩？今日終於持續地有人喇一洗前幾日乜叉都冇之頹風！如果係讀書方面都可以好似噉樣一洗頹風就正∼
是日長週。都幾無聊架返黎又唔使上堂喎淨係留係office等三個鐘之後搞課外活動。小息前果粒半鐘個個都改簿改到喊我就訓到九彩，梗係個個都幾疊簿要改我就得一疊，小息之後一堂代堂一堂空堂都未驚過改唔切，所以話教書教得慢都有好處架。
幫拖搞果個課外活動係「齊來學英文」。咩黎？原來即係唱歌學英文嘩噉都算課外活動第時我都要搞∼
琴日先至好開心點解今日開舖又係冇人？連阿叉都唔多買野今日大家都好頹，似乎呢個「一洗頹風」只係過眼雲煙。不過冇人幫襯唔好以為好得閒因為要將ｄ碟ｄ資料入電腦，入晒之後ｄ客買野果陣就唔使手寫可以「嘟嘟嘟」搞掂，真係方便好多架快好多之餘又自動計埋條數俾我睇唔使下下篤機咁煩。為左將來可以更頹！我而家一定要努力！
今日阿Rax病左房都唔使開除左學鼓同放狗都冇出街，留係屋企就係訓教案當然係未寫過啦禮拜日嘛仲唔回下氣先咩？
無驚無險又一日。放學之後同ｄ原任開備課會傾新一課點教，本來諗住有八堂可以一堂完上課七堂教新課，點知個原任仲嫌慢要我七堂教課半，嘩其他先生兩個禮拜十幾堂都仲未教完上一課，而家居然叫個實習教師教快過現職教師一倍真係威。要我教快冇緊要呀幫我管好ｄ秩序先啦又要有得蛇皇又要乜都唔理！
開完會返到屋企三點幾立即換衫飛身出去開舖因為Kara病左所以要替佢更，返工果陣遇到洗街見到其中一個熟口熟面，睇真ｄ原來係舖頭ｄ客黎！係呀雖然佢係洗街佬但其實佢係音樂人黎，成屋結他又成日同人夾band，不過點熱心音樂都要食飯所以乜工都要開洗街都照做，洗完街仲要另外打多份工，冇計份糧淨係夠食飯仲要玩音樂唔搏ｄ點得？
「香港音樂人係咁悲哀架喇！」
另外佢咁醉心音樂之原因都幾有趣，以前老細係同另外兩個人合夥係信和開舖（所以間野就叫Trinity喇），當期時佢仲好細個，成日跟住鍾意聽Rock野之老豆落信和搵老細，後來仲受佢老豆同環境影響鍾意左Metal同夾band。所以佢第一次上舖頭見到老細果陣講左一大輪野老細都唔認得佢到佢話自細跟住老豆搵佢聽野先知，梗係十幾年喇真係隔咁耐見返點會咁易認到呢？
本來禮拜一開六點就係唔知點解我今日四點一開就有人入黎買野，全日三份一生意係五點前做，咦好似不嬲都話禮拜一開六點過喎點解大家都好似一早知道今日早開噉？所以老細成日都想禮拜一開早ｄ兜多ｄ意外生意但係Kara又要返學冇咁早開到，所以諗住搵維京人阿Jens入黎幫拖因為佢理論上五點前一定開到舖。今日專登叫佢上黎實習，實習左一日老細叫佢下星期就黎料可想而知老細幾想快ｄ開早ｄ。
身為維京人都要搵食架所以阿Jens都要繼續實習做護士，吹一吹水好多內幕：伊院話收到五個非典型病人但查實實際數目最少多廿個；本來ｄ實習生極無良地俾ｄ高層推晒出去威院做砲灰，嘩又要唔俾錢收又要ｄ人去高危地搏命真係夠晒賤格，好在而家單野揚左搞到ｄ高層俾人小取消左呢個方案噉先冇事。如果唔係阿Jens就成為唔到我地TRHK新員工 － 嘩日日都去威院喎一唔覺意帶幾粒菌返黎點算？如果佢真係去左威院實習到時真係皆旺都唔俾佢入呀！
八點幾Phoebe個老公阿楊興摷到上門就上去學結他啦阿Jens間舖交俾你喇。係呀學番結他喇終於，係幾開心架原來學果度就係皆旺樓上咁蹺，不過最大原因都係一個月三舊幾真係幾平。本來聽楊興講到點樣初階點樣基本好吸引，大佬咁耐冇掂過支結他我都想由頭學過，點知上到去先知俾人昆左：以為係學古典結他點知係木結他，唔緊要我都想學返ｄChord點知一去就去到瘋狂計數計chord果ｄ。又話係初級？基本上講左成個鐘都唔明亦都唔會明做左全班最佳綠葉。好在跟住兩個禮拜唔使上堂可以練下，希望今次唔會跌三舊幾啦而家開始乾塘噉跌法好傷架．．．
今日好開心，因為咳左幾聲俾人趕出校。其實都咳左好耐架喇之前咳到痰都咳埋出黎但係當其時冇人理，今日差唔多好返淨係乾咳幾聲ｄ人立即猛小：
同事：「嘩你今日突然間咳得好嚴重呀！你快ｄ走唔好傳染俾我地！」
主任：「嘩你咳呀！快ｄ走忝啦唔使問架喇！」
校長：「而家係非常時期，你快ｄ去睇醫生然後話返俾我地知醫生吩咐有咩特別安排！」
即係想話你地知，其實我只係之前感冒ｄ手尾未搞掂遮阿醫生都係噉講，不過既然你地咁想我走噉我就勉為其難返到黎改左兩堂簿小息都未到就走啦！最衰昆唔到幾日病假反正下星期先睇堂！平時ｄ醫生成日都dum症點解反而今次應該噉做時先俾我遇著個好醫生！
今日返學唯一目的可能就係知道 漢 英文拎Distinction。嘩主科拎Distinction基本上其他兩科玩野都唔使驚架喇因為主科丁到全年實習總成績差唔多一定會拉到丁！不過我話你知， 漢 呢一個Distinction完全唔係佢應得既！話說個Tutor睇左佢兩次，第一次唔計分睇果陣成班都超亂唔上堂，到第二次正式睇原任都入埋班房一齊睇，因為個原任本身超兇之關係班學生全部上堂果陣都唔敢嘈當堂乖晒仲猛答問題，個鬼婆見到噉情況就立即俾Distinction佢，因為睇左兩堂之後覺得佢教學真係「有進步」。即係我可以好肯定話你知 漢 口英文其實幾水下，我成日都話佢主修英文之目的就係避基準，而家居然可以丁到都係因為個原任壓住班學生，所以佢拎到丁唔係因為佢教得好而係因為佢原任！除左個主任之外Tutor個評分標準好有問題都係因素之一，如果「有進步」就可以Distinction的話對睇得一次果ｄ咪好唔公平？而且完全唔諗個原任之影響淨係睇學生表現就話教學上有進步又真係片面左ｄ喎！不過都無謂＆唔使講咁多因為實習完返到教院之後 漢 自然會俾其他主修英文人打死，尤其是英文好過佢Ｎ倍但係Credit都冇果ｄ人．．．
咦我又係俾同一個鬼婆睇，又係班學生完全唔上堂，又係叫左佢黎睇兩次喎，點睇我都有望今舖？都係唔好發夢喇我個原任肯幫我小下班學生管下秩序已經好喇，我之前教書佢次次入黎都係同ｄ學生一齊玩．．．
THE END OF
成日俾人投訴：
「喂點解你次次打個鼓都唔同架？」
就係因為次次個鼓都唔同所以ｄ歌質素都波動得幾大，一時似Gothic一次就似Doom，不過即係打鼓呢家野係好隨意架大家唔好咁刻意啦．．．
大家真係玩得越黎越好，最緊要就係我手鼓都係終於有番ｄ「進步」喇！雖然係遲來的進步都好過冇丫∼
見仲有一兩聲咳就搏大霧放多兩日假先，反正病徵點輕微都好係呢個非常時間只要咳一兩聲都會俾人趕出校不如自己扮晒野放假好過。噉又返少兩日教少五堂好野∼最重要係唔使對住英文果班人把鬼火！
冇呀是日生活就係放假＞食藥＞訓覺＞起身食飯＞食藥＞訓覺。死GS上個禮拜開始未寫過教案仲話今日追返晒忝，下個禮拜就睇堂喇點算點算．．．
仍然係嘆世界中。今日走堂係走得開心ｄ阿原任兩堂英文留返俾你教喇唔幫我搞秩序丫拿！睇你點七堂教課半！
十二點幾先起身好爽。本來諗住晏晝去睇醫生之後開舖點知個醫生唔係度夜晚先返！嘩朝早睇兩個鐘夜晚睇兩個鐘跟住乜都唔做真開心唔怪得咁多人話想做醫生！見咁早就去HMV行下先真係唔識死。
睇黎呢個非典型肺炎真係影響深遠差唔多成日都冇人上黎，上黎商場果ｄ大半都有戴口罩，噉仲開心可以慢慢睇DVD又可以計下今個月份糧點玩法∼
七點就鼠去睇醫生喇冇醫生紙的話聽日真係炒得。真係有咁耐風流有咁耐折墮俾四舊水放三日假成舊幾買一日都幾灰大佬四隻碟架喇！
夜晚電視宣佈下星期正式停課。噉GS同英文點算？？？放埋假先算啦哈哈∼之前仲諗住日日食雪糕食剪炸野食糖飲汽水整到每日都會咳番一兩聲跟住就可以扮晒野上晒堂就走人，不過而家唔使喇。但係食雪糕食油炸野食糖飲汽水呢ｄ都係照做架喇放假唔做呢ｄ野邊度有樂趣架！
教統局ｄ人出黎講野老豆好關心：
「你話停課呢ｄ日子唔係放假就得喇！我地一年有九十日假架到時唔好話時要拎暑假黎補課！」
Last一日返學突然間話冇堂上最後四堂全部變晒做班主任堂，當堂問班主任借堂上埋IT先啦一來做要做field research二來叫埋個原任睇埋堂先。個原任都唔知幾開心呀知我會借堂教IT即刻多謝前多謝後，梗係啦條友同我一樣咁頹多一事不如少一事，佢成日都驚唔睇堂的話會揹鑊所以而家有得睇仲唔開心死咩！結果係點就唔使講喇（其實想講都冇得講因為我間學校係睇左堂唔會公報成績），睇佢條頹友基本上我唔爆粗小班靚仔就一定合到格！呢樣真架呢班秩序係四班之中第二差個原任都搞唔掂（其實佢係班班秩序都搞唔掂因為實係太頹），有條友係擺到明唔上堂淨係會搞事果隻，不過好在上一堂落堂之後小左佢成個小息佢先識收歛番ｄ，最重要就係個班主任知道我小條靚仔之後第二日就叫佢親手寫封道歉信交俾我，雖然一睇就知佢係求祈寫ｄ野講幾句算不過重點係佢今堂真係立即靜晒粒聲唔出又唔出位，睇黎佢班主任之前一定小左佢唔少。唉人地班主任唔多識我都肯幫我小下人搞下秩序呀，睇番我個英文原任知自己果班亂到爆幾個禮拜都係乜都唔理真係灰！
入到班房就知點解今日全部堂變晒班主任堂：班班都成十幾人冇返唔怪得最後四堂唔教書啦。不過幾多人冇返都好華少尾二一堂英文都要照上架喇因為今日要俾Tutor睇堂。個Tutor就係上次丁左 漢 果個本來大家都對今次成績好大期望，點知結果出黎係Credit都冇淨係得合格！因為個鬼婆話華少教果班其實係天才不過佢就完全唔識運用呢班天才學生。話說華少果堂教"Food"，佢教班學生將food分成"healthy"同"unhealthy"兩種，整體黎講都算順利。但係個鬼婆嫌未夠，因為依呢班學生之「天才」英文水平就噉分健唔健康係唔夠，應該叫佢地講埋「點解healthy/unhealthy」。係呢間學校ｄ學生英文係好勁不過個鬼婆真係太高估佢地喇，你覺得班一個五年班學生可唔可以用英文講到「午餐肉是不健康的食物，因為脂肪含量太高而且含有很多化學成份如調味料和防腐劑對身體有害。」你都未必講到啦！個鬼婆評分完全唔依常規都唔係睇你教得好唔好而係睇個環境！之前 漢 拎Distinction華少反而得Pass，同一個Tutor俾分可以咁大分別睇一次定兩次同原任都好大影響。咦我地三個一個Pass一個丁淨番我一個，唔知我會唔會係Credit？
放左學之後唔走得因為要參加教務會議。真係超悶架基本上係聽老校同副校講個半鐘野，當中其實得個零字關我地事，但係全校先生同校長都係晒度唔訓得喎都幾灰架。不過最重要都係講左下星期唔使返好野！不過老豆似乎會唔開心因為官方話就話ｄ病假「唔係假期」但係結果咪又係照扣暑假！
本來仲諗住放學之後又去行勻港島HMV點知開完會都三點幾飛去開舖算。又係好靜不過大家都預左架啦我呢ｄ咁唔識死之人七點幾出門口之後都係罩不離口，即係我出到旺角都唔敢過去信和果邊呀好在舖頭開係火車橋果邊夠偏僻！即係唔係冇人上黎其實有幾多下忝，不過全部都係band友都係上黎吹水居多幫襯冇乜。班友個個都唔戴口罩可能Rock友係勇ｄ。即係我都唔想戴架邊個鍾意笠住個口成日丫不過而家咳果個係我廢事返到學校又俾人趕出校冇計！
月尾又係出糧時間，發現雖然有好多碟想拎不過都冇乜動機去拎，一來仲有好多舊野想聽返二來屋企冇位三來部機都冇位需知部野四激幾已經有四份三拎左黎擺歌喇（冇錯其實我係香港Metal界最大翻版商之一）。最後拎完碟見仲淨返三舊幾水就拎多兩件衫啦反正今批貨有幾件個款我幾鍾意，不過買完衫之後睇黎要再去買褲襯返你都唔想見到一個上身band tee下身西褲之傻仔架？係呀劉義都開始買衫呀世界真係變喇！
是日最大成就係爭取到員工福利，而家響一響朵話「我係劉Sir！」就全線乜都九折，睇黎第時出糧會係出衫而唔係出碟喇因為有左九折買衫係抵ｄ！
夜晚電視宣佈大學都停課喇！一早就應該啦睇下人地新家坡一有第一宗個案已經全國停課喇！睇報紙有人話已經對香港死心，過左肺炎朝之後會舉家移民去新加坡。雖然我唔多鍾意新加坡不過我都會支持佢，因為基本上除左中東之外你移民去邊度都一定好過留係香港。話時話電視宣佈八間大專院校停課果陣讀晒咁多間大學出黎，間間都有講連公開都有就係唔知點解數極都數唔到教院。我明喇梗係因為我地唔係大學係學院！
肺炎都要開舖架唔使呃人工咩！好靜真係好靜不過又好多人上黎喎（不過只限吹水）。好在生意都有二字頭 － 不過今日阿豪客阿叉冇上黎喎（係我叫佢唔好黎既）。證明肺炎係影響唔到我地既係Metal就會自動自覺上黎唔會／識怕死！（聽唔聽到呀阿明！）
夜晚肥仔瘦仔走左上黎吹水所以放工之後都唔走住留係舖頭先。是晚九點至十一點半流程就係開碟＞全場靜晒聽歌＞吹下水＞下一隻＞全場靜晒聽歌＞再下一隻＞全場靜晒聽歌．．．唔使咁驚訝TRHKｄ麻甩佬相處方式就係噉架喇。是晚重點係終於同肥仔瘦仔傾掂數，
「又多隊Band！」
係高危不過都要出旺角架唔使練鼓咩。所以有時都覺得學結他ｄ人係幾開心，起碼唔使好似我噉要係間唔知之前有咩人用過之半密封鼓房戴住口罩練先。
出完黃埔學鼓之後理論上係應該返屋企不過實際上就當然唔係啦之後係返出旺角探下老細，肺炎都咁多人幫襯喎真係估唔到。今日上黎收穫係可能我又多隊band玩Industrial Gothic Doom哈哈。本來隊野只係搵Keyboard手點知上個禮拜個鼓佬突然走左人唔玩，個結他佬上黎貼尋人啟事果陣已經同佢傾過入去玩下，事隔一個星期見佢地仲未搵到人就去馬啦試下夾唔夾到先。不過應該要等到肺炎單野搞掂左先因為班友而家都唔敢上band房．．．
上完舖頭仲未返屋企走左去行女人街忝完全係搵命搏。此行除左睇褲仲為左街尾檔翻版band tee不過冇乜斬獲（黎到呢度有人懷疑緊係咪睇緊劉義寫ｄ段記）。之後落信和刺探敵情，嘩仲冇生意過我地一個人都冇個老細得閒到企出黎吹風，另一間仲直頭唔開忝，好野肺炎反而仲好似幫左我地忝！行過見到有間舖有件Pink Floyd tee買，個款幾靜有ｄ興趣不過成兩舊半買的話就真係跌得幾傷下！（死喇劉義真係變左喇！）
一點起身平日冇乜大問題不過今日就好大件事因為兩點要出到旺角！即係其實出旺角三個字搞掂平日冇乜大問題不過今日又好大問題因為今日五點前要交選科表，一點半果陣我連有乜科好reg同點reg都未知！搞到點九十連口罩都唔得閒拎就飛出旺角幾勇／趕／戇居！
趕到死仆出旺角就係為左開房！前日先同肥仔瘦仔傾過今個禮拜搵日出黎夾，點知班友真係等唔切今日就想黎料！有band夾我實奉陪架何況今次間band房係三樓電梯都唔使搭唔使怕中招（雖然我最後都係搭電梯上去，但係一去到棟大廈立即電梯門大開冇理由唔入架？），而且間野大贈送五點前卜房半價即係買一送一，三條友玩兩個鐘都係每人三條嘩抵到爛我開房練鼓都四條一粒鐘啦！雖則ｄ器材超廢ｄAmp由頭feed到尾不過我冇所謂反正我套鼓超好打你班結他佬你死你事啦！
真係人不可貌相呀阿肥仔瘦仔，點解可以咁癲？阿瘦仔你手結他點都冇可能及阿Rax咁強架喇人地真係搵成個暑假閉關係屋企苦練你又要讀書會考，六月啦考完會考我又交晒功課之後我同你慢慢夾包你可以好似阿Rax噉玩晒正反手．．．阿肥仔我覺得你首bass勁過我個Bass，死啦有ｄ想撬你走忝不過我又唔可以對唔住阿威架？即係我一定要夾多隊band啦哈哈不過睇黎會係六月之事。仲有咁多時間實練得好我地首重點「校歌」（唔好再問我校歌係乜喇阿明！）。聽佢地講之前佢地之前搵ｄ鼓佬冇邊個玩到呢首野，上一個連intro果幾個音都玩唔到，聽完之後真係
「唔係卦？」
夾完就上一上舖頭探下今日第一日開工之阿Jens班。第一日開舖就撞到有鬼上黎（特大P.S.：佢地係鬼佬版肥仔瘦仔所以又稱肥鬼瘦鬼，兩者之對比比我地人間版肥仔瘦仔仲極端。想像一下瘦鬼係矮我一個頭，而肥鬼係高我一個頭．．．）。好在今日佢地上黎果陣老細剛剛係舖頭執貨如果唔係我都唔知呢位Ｎ年冇講過英文之維京人點算！搵我幫手？唔好意思冇人工收我唔開工哈哈。咦阿肥仔瘦仔你地而家先知老細仲未炒我就係因為我識講英文咩？
同場加映《醫生與Jens》：
「今日去左睇醫生，個醫生叫擘大口俾佢睇喉嚨。佢知我讀緊護士又實習，所以係我擘大口之前大嗌『等陣！』之後坐後幾步，然後先話『得喇你可以擘大口喇！』」
另外奉送是ˍ（阿Jens自己填）最ˍˍ（阿Jens都係你自己填）問題：
「阿Jens，其實你係唔係維京人？」
不過，阿Jens，其實，呢條問題個答案我都想知好耐！尤其是見到你Info寫住
"I know you are watching me from Valhalla! Odin!"
咩話？奧丁係乜水你都唔識？唔怪得你會問果條問題喇！
是晚節目係聽demo。幾日黎收到好多隊bandｄdemo係時候清清喇如果唔係真係爆機。首先係一隊真正Gothic樂隊，睇人地玩ｄ野真係勁似七幾八幾ｄ元祖Gothic再睇睇我地The End Ofｄ所謂"Gothic Jam"真係笑爆咀，不過又冇得比人地聽都聽左兩年幾野我地真係夾先夾得果兩個幾月！另一隊就係我諗住入去試下之工業歌德毀滅金屬樂隊（係聽得音樂多就會有呢個職業病一講到音樂就會撻好多行內術語出黎完全唔顧其他人感受），嘩係幾Industrialｄ歌個鼓係編得唔錯點解個鼓佬要走呢？我入去都覺得編唔到咁靚架ｄ野真係完全係志在有得呃人地間band房黎玩幾野之後俾人踢走哈哈。最重要都係人地ｄ所謂"Demo"錄音都好靚聲起碼聽得到佢地玩乜先，我地麥記同The End Of仍然因為成本同技術問題只係得部雙聲道MD機錄音（已經改善左架喇以前得單聲道忝呀），錄出黎果ｄ就真係Demo喇ｄ質素究極唔穩定果一次聽唔聽（得）到完全要搏符碌，就算聽（得）到都係乜叉都抄埋一碟有少少旋律聽到已經好開心架喇！
是晚重點甲：
原來噉就四月乜都唔知忝，不過噉又係話晒放緊假嘛！晏晝一大節目：
「喂！宣佈左香港做疫埠未？」（極想放大假之老豆係學校打返屋企Ｎ次問）
「你覺得點解非典型肺炎會擴散得咁快？」
夜晚有線訪問淘大居民麻甩佬甲。知唔知條友點答？
「點解我就唔知喇，不過睇報紙同電視話．．．」
挑噉使鬼你講咩報紙同電視人人都識睇啦！真係訪問佢果兩個主持聽到佢噉講之後都偷笑呀！
講講下肺炎突然間話張國榮死左。嘩超突然完全係好似發緊夢噉。雖然我唔多聽佢ｄ歌不過我都覺得佢死得好唔抵＆唔應該死，佢真係唱到歌架。佢死左香港樂壇真係損失左一個音樂人。雖然呢單野除左肺炎之外真係非常之大件事，但係好在電視都唔係第一時間乜都唔講就淨係超大篇幅報導呢件事。如果你話電視真係寧願講張國榮自殺都唔講肺炎我就真係冇野好講。（聽朝報紙會唔會噉做就無謂提喇我不嬲都對香港ｄ報章冇晒信心）
電視「話」張國榮係「被情緒困擾導致自殺」，但係「寫」就係「被情所困自殺身亡」，喂兩樣野唔同架大佬唔好以為真係減噉幾個字就真係縮寫先得架睇埋點解先啦唔該！
嘩琴日盜用明報版面作香港就變疫埠搞到超市擠堤果條友十四歲咋！睇完之後真係有ｄ自卑！唔好話我道德水平低呀我老豆不知幾支持我做呢ｄ野呀！當年播親「我都唔知我個仔匿係書房都可以搞咁叉多野架！」個廣告我老豆實會話
「你條衰仔識唔識搞呢ｄ野呀？搞到的話你就威喇到時大把公司排住隊黎請你呀！」
冇喇今日乜都冇喇唔使放假咩？教育署都話「下週復課機會微」，教統局連幾時復到課都未知呀！放假啦仲睇！
點幾起身見冇野做又咁早就出尖咀掃貨。係危險架不過可能中招患肺炎大劑ｄ定冇去HMV減價搞到買少幾隻正野昆少左HMV錢大劑ｄ？我就死都會死出尖咀架喇唔使同我拗！
是日收穫：Yes "90125" '60藝術搖滾，其實係果個年代佢地ｄ野雖然係好前衛同複雜但係ｄ人都（肯）當係流行音樂，玩pop野都可以玩到做「藝術」呀，睇到四十年之後今時今日ｄ「流行音樂」搞到噉想聽pop野唯有搵返呢ｄ陳年舊野；Extreme "III Sides To Every Story" '80其中一隊較高質素Hair/Pop Metal其中一隻大碟，之前買左隻精選不過都想買返隻呢隻碟因為有佢地其中一首大作：一首長二十分鐘之三部曲。係呀係pop野黎架不過到左十幾年後之今日已經冇人再（敢）噉玩喇，想聽呢ｄ長篇流行曲又係返番去六七十年代啦唔該；Ministry "Filth Pig" 老牌工業樂隊'90年代中大碟，佢地八幾年頭出道以玩工業跳舞音樂出名，後來轉型偏向工業金屬，Nine Inch Nails九十年代頭將工業音樂打入主流之後佢地就越黎越紅（都幾灰一直玩工業野ｄ人就唔受，到NIN上到地面喇ｄ人先肯支持佢地！F**K THE TREND!）。其實呢隻碟係佢地其中一隻較差作品，不過一時間又諗唔到買多隻咩好又剛剛見到就求祈執埋佢湊夠三隻兩舊水，咪當買返黎聽下有幾廢囉！
此行收穫真係乜都有而且仲未買完／晒架。雖然今次「兩舊三隻」差唔多去到盡但係都仲有少少（真係好少）新貨出仲行得過，即係理論上我仲會係未來Ｎ日去多Ｎ次（甚至係Ｎ間）HMV。
呢個禮拜好多人都唔知乜事？上個禮拜又唔見你班友仔肯落黎買野！（黎到呢度阿Jens飛出黎：「咪就係因為旺財童子即係我黎左Trinity做囉！」）發現一個奇怪現象：有新貨到果陣ｄ人係都唔落黎，到過左成個禮拜ｄ新貨變晒做舊貨喇ｄ人就仆到黎搶。即係大家呢一種購物態度我又唔介意呀反正你係要買就一定會落黎唔會去第二度，我寧願你地全世界迫埋同一日落黎等我可以一日做晒你地生意跟住嘆Ｎ日世界，而且你地愈遲黎仲好等我睇清楚ｄ新貨有咩想要執晒先唔使驚俾人截我糊！
好野今日開始正式放假！其實心理上同生理上就不嬲都係放緊復活節假架喇不過今日官方認同埋我呢條頹友之生活方式遮！不過間間都話廿幾號先返學係教院話十四號復課灰！我個復活節假去左邊！
發覺真係好得閒點幾起完身之後冇野好做跟住就返舖頭喇。兩點幾開舖理論上係冇人架不過係屋企都係唔知做乜HMV琴日先行完不如鼠上舖頭焚下機好過！如果今日晏晝你打過電話俾我的話你都知道你係唔會搵到我，因為我飛左線返舖頭。今日全日舖頭淨係收到呢個電話：
「想打電話呀？交電話費先啦傻仔！」
今日同阿工業佬阿豪傾過睇黎應該會入佢地隊Band試下，不過今次有對手喇因為又有個鼓佬見到則尋人啟示之後都想玩下。後事如何就隨緣啦反正我而家咁多band多一隊唔多少一隊唔少哈哈。如果上去試（應該叫咩試？手試？鼓試？band試？jam試？）完之後班友收貨又搞得掂另一個鼓佬的話，呢隊將會係我第四隊band。至於想搞好耐之第五隊pop band就仍需係教院努力喇。
有件衫睇中左好耐因為個款同隊band都好鍾意，本來一早諗定今日買埋佢噉就剛剛好著緊果件今日拎去洗跟住就有新衫著，點知臨門一腳俾阿唔知邊個（呢條友由九龍城時代開始已經上黎但係我到而家都唔知佢叫咩名）截我糊超灰！
「你真係想買呢件？噉我讓呢件俾你我要第二件啦！」
「唔使喇！我寧願多一個仇人都唔要多一件tee！」
好耐未上過火車站喇。條友真係好多水吹真係上黎唔買野純吹水都開心啦更何況今日又有新貨到當中仲有我想要ｄ野呢？噉又兩隻仲要唔止咁少忝因為已經落左單叫佢下星期帶多ｄ我地想要既貨落黎。遲ｄ真係要叫佢俾張list我地跟住我地就係度剔剔剔剔剔剔．．．
睇佢呢個個檔口真係幾難賺錢：一來ｄ人成日唔信賣果ｄ係正版，有條友問Pink Floyd孖碟精選幾錢，知道只係六十咁平但係最後都唔買就係因為呢個原因，其實歐洲版都係正版唔係隻隻碟都有中／英文字，有德／意／法文亦唔代表果ｄ係翻版黎架；二來ｄ人只會買自己識果ｄ野，好似ｄ人會買Pink Floyd但係就絕對唔會買Pink Floyd主將Syd Barret同Roger Waters自己ｄ個人大碟，知唔知點解？因為佢地就算聽好耐Pink Floyd都唔知道呢兩條友其實就係Pink Floyd成員，就算知都唔會買因為碟上面個名唔係Pink Floyd。噉就延伸到三來喇：有邊個好似我地咁無聊唔知隻碟玩乜／唔識個人or隊名都會買返黎試聽？
都係噉架喇起身＞食飯＞晨咁早開舖噉先夠頹嘛。是日都係一個字：「靜」。有幾靜？我成日夾埋睇左四隻DVD夠靜未？老細見到靜到噉都話「早知係噉你拎定支結他黎練好過！」今日唔止得我地舖靜成個場都好靜，我地舖成晚都冇人黎可能係因為今晚有騷（成日都係我開舖果陣先有騷！灰！），但係點解可以成座皆旺成晚都差唔多冇人上黎就真係不解之謎。個場真係靜到我地舖附近剛剛開左幾日間玩具舖個老細飛過黎問：
「嘩呢個商場係咪逢禮拜六日都咁靜架？我仲諗住呢度人流會好多忝而家點算呀實蝕到喊喇今次．．．」
話時話唔知點解身邊好多人都同酒店有關係，老細就一定係第一個喇以前做酒店Reception（佢成日都強調：「呢ｄ係十五年前既事！」），佢以前隊band個結他佬而家又係做酒店，跟住Kara同某個阿明讀緊酒店，呢間新玩具舖個老細原來之前又係做酒店。仲有邊個酒店人同我出黎！
夜晚節目當然又係火車站啦。又有新貨真係痴線架噉又兩隻喇！ｄ主菜仲要下星期先到忝而家前菜已經搞到噉點算！
最後係還「債」時間請某人自己對號入座：
「你個芒果味雪糕我真係寄左出去，仲同你留言入邊果個一樣綠色架！知唔知綠色芒果幾難搵呀！你到今日都仲未收到之唯一解釋就係杯雪糕俾郵差偷食左！我會將你果篇血淋淋『追債』留言Forward去郵政局架喇！」
超晏起身＞旺角練鼓＞黃埔學鼓＞上舖頭＞女人街＞信和＞返屋企放狗＝頹廢的一天
今晚電視係幾多野睇：
《Michael Jackson唔知咩特輯》
Michael Jacksonｄ歌不嬲都唔鍾意（我甚至係覺得好難聽），不過由細到大都超鍾意睇佢跳舞。淨係四十五度前傾呢野到今日都冇乜人夠佢鬥啦。呢野唔係特技黎喎Live果陣都有做仲要係成班dancer同佢一齊做忝！淨係睇佢玩四十五度前傾同Moon Walk已經抵晒啦！但係佢ｄ歌真係完全聽唔到入耳，所以睇果陣我都熄左聲睇佢跳舞算！
《金像獎》
其中一屆最失敗金像獎啦，揀ｄ司儀根本連戲都唔識做仲叫佢地負責呢ｄ大場面唔係卦？ｄ頒獎嘉賓又係完全唔明點搵冇乜邊個係似同ｄ獎有關係，度ｄ台詞又超廢最好笑果part就係全場咁多段台詞居然冇一段好笑。最廢都係搵Twins做頒獎嘉賓！見到佢兩個上到台淨係識傻笑叫ｄ小朋友留係屋企讀好ｄ書真係想爆粗，得喇佢地未講完我已經熄左機喇寧願跟住所有獎都唔睇都唔想見到果兩條痴利根妹！
冇冇冇今日都係乜都冇。Sor喇阿Jens本來都諗住上舖頭探下你班架不過懶＋落雨冇計！不過可能好事黎架因為出一出黎跟住實會上火車站之後又喊晒口噉「又兩舊喇嗚嗚！」
張國榮今日舉殯，諗返起黃家駒，唉．．．
兩點幾去剃完鬚（冇錯係剃鬚飛髮只係順便）再上一上舖頭探探老細之後就去左雞記搵也哥開餐。也哥大作《神皇錄》最後一部終於大成喇！雖然可能唔會俾好多人睇到，但係可以為自己興趣用兩年時間畫四部一輯漫畫真係好值得敬佩，「噉先係生活！」兩年黎搞咁多野就係為左畫呢部大作，而家畫埋最後一筆也哥感到有ｄ空虛，而今日一聚除左聚下舊之外仲為左令到佢可以更空虛，因為畫畫畫到識飛唔代表識得＆打得好中文，就算打到以也哥千年錯字修為佢寫ｄ對白都一定會有無限咁多錯別字同文法錯誤，所以又要我呢個TYPER出手幫佢搞掂ｄ對白喇！三舊半將六版本也體真跡（也體＝一種媲美狂草之書法）數碼化再執執果無限個別字&文法錯處呢份「優差」有得唔做咩？何況呢幾個月使大左超多而家有咩兼職雜差散工狗屎垃圾只要收入算係咁上下都要做架喇唔係我都唔知點樣挨到下個月！
同也哥係雞記食雞（呢句係咪好廢？）果陣雞記播緊黎瑞恩演唱會。即係佢當年出道到摺埋我都唔覺得佢唱歌好聽架喇，不過Ｎ年之後之今日佢再出返黎唱聽完之後發覺都係差，不過已經夠贏而家ｄ所謂「歌手」幾條街喇！好灰呀真係而家個香港，當年見到Shine呢ｄ所謂Boy Group（我打死都唔會用Boy Band呢個字形容佢地！）已經覺得仆街，而家連Boyz呢ｄ仲可以差過Shine幾皮之傻仔出黎我都諗唔到用咩形容詞黎描述香港娛樂圈（同樣打死我都唔會用「樂壇」呢個字！）真係粗口都講到盡喇。終有一日香港會有一個人／一隊野淨係跟住音樂講野（rap都冇呀係講咋），再延續落去就會有唔會／使唱歌之「歌手」出現反正而家ｄ「歌手」都係求祈搵ｄ靚Model黎做架啦！
THE END OF
因為Bass阿勤見肺炎肴底上星期唔肯出黎旺角夾之關係，所以隔左成個禮拜我地The End Of先可以再聚首一堂！但係以「驚肺炎肴底」上星期罷彈之阿勤今日上到黎傳聞十九樓有人中招之好景居然口罩都唔戴，有關人士已經捶左佢幾鑊架喇大家放心！為令各位更放心我可以話俾你地知：
「我地度度都打就係唔會打佢對手！」
係肺炎累事？定還是因為被迫休息左一個禮拜？（剛剛爬返起身之阿勤又俾人打返落地下喇）點解？點解今日可以夾得咁順利？真係我地The End Of夾左幾個月都未試過好似今晚咁順利！睇黎經我地咁多個之中樂理最掂之Bonze執一執過首歌再編一編曲噉係幾掂！大家繼續努力啦相信The End Of第一首氣氛派作品《書卷味》"The Smell of Book Roll"就快可以面世。夾到無聊Jam Jam下跟住又無端端多一首，呢首即興新作我好好好鍾意知唔知點解？因為呢首野係玩Noise噉就最適合我呢ｄ頹友喇見野就扑就實夠Noise！死喇點解成晚玩ｄ野都好似同我地本來個音樂取向唔同？遲ｄ我地要轉型唔再玩Gothic Doom定還是自創一派Atmospheric Gothic Doom Noise Metal？（死令我諗返起"Modern Symphonic Black"忝哈哈）
夾完之後走左去大快活賽後檢討，死啦點解個個好似突然間開晒竅變晒做另一個人噉？執執下歌之後真係好有衝動上去夾多個鐘，反正阿Dave仲有一首新作未公開！（今日最掂就阿Dave啦冇貨左咁耐終於好似以前噉一上到band房就「唔好玩呢首住啦！我又有新野喎！」跟住不嬲都唔會／識彈Solo既佢今日居然搖晒頭Fing晒頭髮問：「喂！幾時彈Solo遮！」）不過最後衝動還衝動大家唔好咁激動都係留返下次一野過夾三個鐘啦！而且我都諗住呢幾日幫首歌寫埋Midi先！是日發現大家雖然都識打／彈／吹但係樂理知識方面都好缺乏。淨係執返淨係識講「呢個音長ｄ．．．呢個就短ｄ．．．」之拍子白痴阿Dave寫份六線譜已經執左幾個字喇真係！Kara你又勁啦首歌明明四拍四點解你可以彈到六拍八出黎？都係Bonze好寫份五線譜乜錯都冇讀過書係唔同ｄ！最緊要就係佢由頭都尾都係吹幾個音完全係方便我編Midi呀！
好明顯假期就快結束喇所以今日三點幾先至起身！跟住三日要開舖然後禮拜日要學鼓冇得再咁開心架喇！唔係無端端訓訓下覺俾人打個電話黎嘈醒（邊個？唔好要我再提呢個人喇我好後悔俾左我個手提佢嗚嗚∼）真係分分鐘冇五點你都見我唔到呀！
起身第一件事係飛去舖頭買衫。今次呢件唔係上次俾唔知邊個截糊果件係另一件，呢件個款正在夠舒服簡單所以一早睇中，第一次有貨果陣俾Messiah個鼓佬（佢又自稱「屎忽鬼」）截左糊 － 呢件個款真係正俾佢截我冇野講因為鍾意果隊野睇到呢件野都一定會買！今次返呢件係最後一件倉底貨，琴晚本來夾完上舖買點知開心得滯上唔切今日當然立即飛身上去啦呢排咁黑仔我都驚又俾人截糊！特此嗚謝Kara幫我留起佢，如果唔係可能係我起身四個幾鐘前俾我地The End Of其中一支笛買左！
買左呢件，之前俾人截糊果件就可以暫時唔理喇！黎到呢度唔知邊個飛出黎：
「喂！反正你買到第二件衫個款你鍾意，不如之前果單就一筆勾消啦！」
「問題唔係買唔買到個款！係你之前截左我糊！所以你仍然係我仇人！」
呢個禮拜走兩場，琴晚玩完The End Of之後今晚又再上之前係噉搵鼓佬果隊工業野玩下！。記住記住我係去玩Industrial Gothic Doom，點解上到去係jam Korn、RHCP、Manson、Ozzy．．．？Manson都話同Industrial有ｄ關係丫（重申一次佢絕對唔係Gothic！），其他Funk野Metal野同Gothic Doom呢兩樣野有咩關係？好灰囉自問Metal野係聽幾多不過呢ｄ地上Metal要我玩就真係哈哈哈∼當全場所有人都認為呢ｄ歌全世界都聽過果陣我仲好似個傻仔噉係度問「咩黎架呢首？」結果點？跟住條Bass Line作返條Drum Line囉唔通唔打咩！
雖然是晚有九成歌都係唔知做乜得個亂打，好在仲有麥記！（係Metallica唔好諗錯）玩到冇野玩果陣班友問
「喂！玩咩呀？」
「Master啦！」
「你識玩？黎啦！」
跟住就黎喇！校歌不愧為「校歌」果然夠晒universal！睇班友知道我識打校歌之後個反應好似之前遇過咁多個鼓佬冇一個曉噉（令我諗返起肥仔瘦仔．．．乜呢首野真係咁難打咩？）。睇見班友未到Solo已經「唔掂！冇力喇！」就覺得一野過連玩幾次之後仲要「黎多次啦！」之阿Rax手結他真係超勁。瘦仔你都努力啦因為我覺得阿Rax暑假走左之後我就會搵你．．．
夜晚終於的起心肝幫我地琴日起果隻"Smell Like Book Spirit"（都係呢個名好！「書卷味」嘛！）個Midi。見琴日大家夾得咁順利諗住今晚可以好快＆輕鬆地起到貨，點知最後發現夾到一回事執唔執到又係一回事！Kara你俾我果條Guitar Line點解可以同阿Dave果條撞到九彩？Bonze你又神奇喎夾果陣吹出黎冇事喎但係跟你份五線譜編ｄ笛又可以同阿Dave條Guitar Line唔多夾？結果搞左成晚連Intro都冇淨係得一鑊泡 － 係我嘔既。下星期二唔該你地俾返個交代我！
起完身，都係開舖，都係咁靜，都係靠睇DVD度日晨。都係肺炎衰。
開完舖，都係上火車站，都係又有新野，不過都係聽日先算。
今日，都係同Ｎ日前一樣咁平淡。都係因為我頹啦。
兩點幾起身即刻換衫刷牙去身去開舖，趕到九彩之後發現老細仲早過我到，原來因為有隻鬼想一早上黎買野。仲記唔記得好耐之前提過帶埋條女上黎自首果隻鬼？呢隻鬼就係果隻鬼個friend，話說個零鐘前佢地係尖咀撞到，果隻鬼知道呢隻鬼鍾意Metal野就介紹佢黎TRHK，呢隻鬼知道左呢度之後就飛身上黎尋寶。上到黎梗係開心啦以前搵呢ｄ碟淨係識靠HMV，又等得耐又未必訂到價錢又要貴呢度最少一半，好野又少一個俾HMV搵笨之受害人！話時話好似咁耐以黎都未講過俾大家聽「果隻鬼」個故事。其實，佢同我一樣都係教書佬黎架！不過佢就係教國際學校，仲威我好多忝。有幾威？威到可以叫埋佢ｄ學生上黎一齊買碟你話死未？我都想呀呢樣野最衰我係教小學！
又係唔知點解全球都係五點前衝晒上黎買野，結果大半生意都係五點前搞掂跟住就開心＆放心喇可以自己慢慢焚機試野。是日目標係試晒所有Doom野，但係結果半個目標都未達成就收皮，因為試試下阿Jens又中左招。本來佢諗住黎到呢度做之後可以好多碟都可以係舖頭聽進而可以買少ｄ碟慳返ｄ錢，點知事與願違越試得多越發現「死喇乜原來呢隻咁Ｘ正架！」試下試下又一隻試下試下又一隻結果反而係買得仲多，每個禮拜唔執返兩三隻都冇得走。阿Jens而家好後悔入左黎TRHK呢間黑店做。
我地心愛既Bunny哥哥又出現喇！次次佢黎親都有金句今次都唔例外：
「如果你過左一排都見我唔到，就即係我去左渡假村喇！」
夜晚Messiah鼓佬上到黎好開心，
「我終於做到你徒弟喇！」
話說當年見親面就係噉串「Lautallica踩爆鼓」之輝哥琴晚終於練成呢野Mute鼓神功喇！本來佢都只係我徒弟，日子有成終於踩得爆當堂晉升成我師弟！當然Level呢樣野就爆得多升得快，踩爆多幾個就師叔、師父、師公都有得你做，大家多多益善少少無拘請繼續努力踩爆鼓！（幾時到你呀阿明！）
逢禮拜五上火車站收貨已經成為生活一部份。上次落左單之後條友特登拎左批貨落黎，不過ｄ貨多就係多但係冇乜邊幾隻真係正，不過最後都執左三隻 － 其實總數係四隻因為仲有一隻係幫阿明買。（黎到呢度好多個阿明飛出黎：「你係咪搵我？」）噉又三舊幾不過今次叫佢拎貨出黎都唔係太多好野，睇黎佢個倉暫時都冇乜正野，真係要賣噉ｄ清下貨真正果ｄ倉底貨先出現，中期內相信可以跌少一陣錢喇。
之前無聊寫左篇野之後就有大量男性飛出黎問：「喂你係咪講緊我？中晒喎！」時至今日，《麻甩佬分類指南》已經成為TRHK仝人之ICQ Info（除左我之外，我都係唔捨得而家個info），已經人數更上斷上升。為左答左各位麻甩佬，無聊齋特別推出「《麻甩佬分類指南》一個月紀念安歌大酬賓」：
是開開舖得一句：
「阿明你終於肯躝上黎舖頭呢咩？」
又係好靜阿叉都唔黎乜事？可能大家仲係度等緊ｄ新貨變舊貨下星期先一次過黎。如果係噉下星期就開心喇．．．
俾留言版八三八四請自己對號入座：
「我知你地係邊個架喇，不過想打聖戰呢就唔該第度．．．」
話說呢排阿Jens好耐冇裝修過佢間「金屬精神病院」（話時話我都未加你條拎忝），其實佢一早寫好好多碟評，好似今晚噉剛剛聽左幾隻就又寫多篇喇。不過寫好佢都冇諗過整上去，知唔知點解？請睇睇以下對話：
維京護士：「喂，係咪真係有好多人睇我個網買碟架？」
香港阿Sir：「梗係啦！幾時昆過你！」
維京護士：「多人睇的話我都係唔post呢頁住，廢事人地同我爭碟！」
超晏起身＞旺角練鼓＞黃埔學鼓＞佐敦裕華＞尖咀HMV＞返屋企放狗＝最後的晚餐
聽日開始冇得頹架喇嗚嗚∼
睇睇電視同報紙先知原來真善美村同欣榮都有人中招，真真正正係街頭有人中街尾又有人中，我呢ｄ住正係條街中間之人士最適合就係隱居避災（簡單黎講即係留係屋企頹）。可惜個天係都唔俾我噉做嗚嗚∼
「．．．幾耐未試過噉樣搭巴士返教院？．．．我個復活節長假呢？」
咁耐冇返過教院上堂，返到黎第一個感覺就係
「咦！我又變返做個傻仔喇！」
GS居然奇蹟地冇訓過囉係咁多喇。英文都有少少特別既好耐未試過上ｄ堂可以悶到想死悶到想小。都係噉架喇冇乜特別（查實我之教院生涯不嬲都乜特別，所以我都唔明點解ｄ人可以成日將我神化）。
是日最開心當然係最後堂沈太唔使上（有好有唔好喇始終好鍾意聽沈太講書，而且佢份功課唔夠一個月就到期我仍然係做乜都唔知）。見咁得閒就上去搵一搵老細，嘩冇蒲頭幾耐呢老細見到都問
「嘩呢幾個月你死左去邊呀？」
係好耐冇蒲頭，但係我呢ｄ頹廢員工老細又一定唔會炒知唔知點解呢？因為每次佢最江湖告急果陣我呢個救星就會出現。本來聽日佢要交份research proposal但係到三點幾都仲未有時間做，剛剛我落堂上黎噉就fit晒喇因為又係除左我之外呢樣野冇人做得到：英文！冇錯我就係一個應用英文冇問題但係永遠都過唔到基準試之傻仔哈哈！又係C&P砌砌砌呢ｄ我就最拿手啦噉就昆左兩個幾鐘人工！（唔好意思呀我已經好頹架喇！）都唔係第一次出現呢ｄ情況架喇就係唔知點解我成日唔蒲頭，一蒲頭就成日就唔覺意幫佢搞掂呢野燃眉之急，所以點頹都好老細都唔（敢）炒我架喇廢事冇左粒救星照住佢！不過其實都幾灰架需知呢ｄ「江湖告急」事件唔係日日都有即係想昆多少少人工真係有返ｄ難度！
聽朝要返配屬小學交返晒ｄ書同教案，識死喇今次十二點幾就開工喇！好彩查返ｄ日子之前走下堂又放假原來GS只係差六個教案未寫比預期少一半，英文就一早搞掂IT又淨係要寫半個如果唔係聽日真係佢地放學果陣我都唔知寫晒未。其實最難就唔係寫教案而係print教案，用屋企部老爺機印十幾份野真係搞搞下就成個鐘。是晚真係去到盡，搞掂最後一份教案之後剛剛好冇晒墨冇晒紙連釘書釘都冇晒。
搞掂果陣已經日出六點幾，真係訓都懶喇反正六點九就要起行聽下歌好過。出門口果陣真係書包都懶執求祈拎個HMV大膠袋（HMV各碼膠袋我屋企長時間供應）再質晒ｄ書同教案入去就算。噉款就出門口可想而知我係幾咁頹。
今日八點半有堂上。但係今日七點半要返配屬小學執手尾。係迫人走堂架喇但係你敢唔走咩？死喇我都唔記得呢堂仲有冇quota忝．．．
今朝返學果陣ｄ先生臨入校門果陣都啤實晒，因為佢地見到有兩位蘋果速銷先生拎住兩大棟餅企係度。
「好野有餅食！」
因為買三件送一件之關係最後夾埋砌左成九打出黎真開心，真係呢朝全校都唔知有冇六十人呢ｄ餅夠佢地食成日架喇。返去探一探原任交返晒ｄ野俾佢噉就搞掂真開心，簿又改晒form又填晒教案又印晒理論上一個鐘搞掂晒，最後係噉挨夾埋都唔使兩個鐘都幾無聊，可能返黎就係為左拎盒免費檸檬茶飲。飲完之後當然係立即飛返屋企撻低啦真係成晚唔使訓咩！
差唔多五點先起身立即飛出佐敦，除左為左行裕華（呢排好鍾意行）仲為左一間專賣香港獨立音樂之CD舖。本來都幾大期望點知上到去發現原來仲細過我地舖頭（係龍珠果間呀）。上黎係想搵一隊香港地下bandｄ碟（之前出騷果陣小Twins同Juno果隊自己上網摷下料啦）點知（噉都）冇，噉就唯有買返隻有耳非文啦 － 不過係俾舍妹唔係我，因為佢Ｎ年前做舞台劇果陣同過佢合作跟住就變得好鍾意佢。不過佢ｄ歌我都有ｄ興趣架始終呢ｄ音樂係香港真係好難搵到。走果陣望多佢地舖頭一眼，覺得
「香港音樂真係灰。」
見到叮噹新戲個廣告。即係呢叮噹我就係好鍾意，不過佢一日仲係用果個白痴名我一日都唔會支持佢．．．
THE END OF
因為上次大家雄心壯志關係，今次決定夾三個鐘！一開頭真係好掂大家都以為「今舖掂梗！」之際居然好頭爛尾大家越黎越唔知做乜。是晚三個鐘＝兩個鐘執首舊歌"Smell Like Book Spirit"＋半個鐘唔知做乜亂彈＋半個鐘ｄ人去廁所。原來今日大家都唔夠訓仲噉踩三個頭鐘真係傻Ｘ左，希望下星期二大家再努力（＆訓多ｄ），不過相信中期內點唔會再有呢種「三個鐘咪三個鐘黎咪黎！」事件出現，除左因為心理＆生理上之外，仲因為＄！
打打下鼓果陣老細突然call（跟住就演變成鼓佬冇鼓打但係其他人有人打）夾完就上一上舖頭吹吹水。吹一吹發覺呢排真係好灰，只止係舖頭，大家、全香港都係：
搞減價ｄ野搞到十一點幾先走，到十二點幾返到屋企發現琴日唔記得左做一樣好重要既野：
「原來琴日唔記得食飯！」
真係十二點幾又差唔多間間都閂晒都飛身落街搵飯食啦大佬真係窮一回事唔使食咩！
食食下飯睇報紙見到吳國敬演唱會廣告。佢ｄ歌我就唔多識不過睇到個班底已經好想睇：鄧建明彈結他！恭碩良打鼓！仲有亞洲鼓王Donald Ashley！知呢三個夠喇因為其他樂手都係超超超強不過講個名你知你都唔會識！好想睇呀好想睇呀淨係有得睇恭碩良同亞洲鼓王已經抵喇∼不過又係一個問題：＄！真係Beyond都未有時間＆錢買飛呀唉呢個都係發下夢算！
起身果陣見到個鐘指住一點十，我只有對有關之四個單位講：
「．．．．．．」
「TRHK復活（節）大減價今日開始」之消息揚左之後「外間反應良好」，連阿維京Jens點唔得閒都話要立即飛上舖頭搶！（條友真係「坐言起行」！）上舖頭之前都落一落信先刺探下敵情先。仍然係咁灰ｄ除左四仔檔同流行CD舖之外差唔多一個人都冇我都唔知笑好定喊好，連同我地「關係親密」之音樂會館都三點幾就開門，換著係以前呢個時間佢仲係舖頭入邊訓緊覺而且最少要訓多兩個鐘。可想而知而家市道係幾咁灰。不過成日咁灰唔係辦法，角落頭門口成日有正野寫果間CD舖俾左條問題大家笑下：
問：「知唔知而家既香港男人同伊拉克女人有咩相同地方？」
答：「出街淨係可以睇到對眼。」
肺炎係阻止唔到大家既尤其是今日開始有減價！真係復活喇呢野七點前已經有平時一日之生意額，跟住淨係賣減價貨都抵返一日生意，可想而知「小便宜」呢樣野對大家黎講係幾咁吸引！所以話就話係復活節大減價但係復完活之後我都會叫老細繼續減落去，一來益街坊（講得真好聽咪又係因為想清貨！）二來（呢樣最緊要）我都要貪小便宜架大佬！
肺炎，前日死五個，琴日死七個，今日死九個，聽日會唔會十一個？
最後送一篇文章《老黃》俾大家 － 其實篇野係老黃同某雜誌做之一個訪問，我將當中一段有關老黃對當代香港青少年同流行音樂之睇法同評價編修出《老黃》。相信睇完之後大家都估到邊個係老黃，真係諗唔到就問我啦。仲有睇完之後話我知：
「老黃係咪講緊你？」
夜晚十二點幾 漢 話有急事，跟住就俾左個電話號碼「即打！」，打左隔左幾秒再整另一個電話號碼黎（不過太遲喇我已經打左！），以為呢個實冇錯啦再打，點知打左去之後又係打錯！不過神奇在佢俾錯左果個電話居然係Leanne姐間房個電話號碼！到第三個電話號碼先至係堅野，都唔知係咪你兩條友仔玩野陰我！
點幾就俾老細電醒跟住搞下野立即飛上舖頭，唔怪得老細咁急call啦有成二百幾隻碟到，好在之前上網揚開有新貨搞到咁遲先到，等我到果陣老細已經差唔多上晒架我就淨係負責入袋入機拎尾彩。真係早少少返到都做到仆呀好在我夠頹！
今日到果二百幾隻全部都係一間芬蘭唱片公司ｄ貨黎，不過唔好睇少呢ｄ來佬野呀芬蘭Metal一直都好受歡迎架，而且呢批貨已經全人類已經等左成個月（呢ｄ「人類」只包括香港人，呢ｄ貨外國一早出左只不過因為間唱片公司效率奇低之關係我地香港人今日先有得買）。本來見琴日生意可以旺成噉，今日挾住呢個「復活大減價」之勢加埋呢批萬眾期待之芬蘭貨生意一定會多到唔想做，但係點解結果係同琴日完全兩回事？同一隻DVD睇左Ｎ次都係得小貓三四隻，似乎大家又係度等ｄ新貨折舊。好在最後無聊開到十一點做埋十點幾冇野做行過ｄ無聊客條數先至好睇少少！好在跟住幾日係紅假咋如果開返學果陣仲要好似噉樣留株待兔到十一點幾就真係死。
經過今晚一役，對香港ｄ音樂forum已經完全失望。班友開口埋口話好唔妥ｄ淨係識追Pop野之靚妹，但係其實到頭來自己之心態同態度其實同佢地一樣 － 「高層次靚妹」都只係靚妹黎架咋小朋友。就算你講ｄ野幾有論點都係冇用，因為佢地講＆做就一定係冇錯，即係做果ｄ野係犯法。唉好白痴呀而家ｄ靚仔／妹唉唉唉唉唉．．．老細我都越黎越覺得搞Webzine呢樣野真係好迫切，我希望我地可以開到一個真正係為討論之音樂論壇．．．
今日好早點幾就起左身，因為要開兩點。點知最後唉．．．阿Henry哥你又話兩點黎，早知你係兩點搭十一先到就俾我訓多陣先啦。
似乎ｄ人等唔切ｄ新貨變舊喇先黎話晒呢批芬蘭貨大家已經等左成個月，但係最後生意都冇琴日咁高點解？肯定係因為紅假ｄ老豆老母唔使返工留晒係屋企管住ｄ細路，搞到ｄ靚仔出唔到黎買碟！
收舖之後同Kara同老細返左土瓜灣食粥。今日開始我同Kara又多左個新鄰居喇因為老細搬左出黎土瓜灣住！無端端多左個鄰居背後當然係有好多故事啦，不過就係太多事喇實在都唔想講＆無謂講．．．呢個禮拜真係「多事之週」。
兩點起身剛剛好Kara打黎「仲唔開？我係門口囉喎？」仲好唔使我開等我訓多陣先。兩點半返到果陣舖頭有唔少客係度。我發覺呢排成日都係噉，無論我幾早開都好都一定要無聊一大輪先會有人出現，其他人就一開就有生意。生意又要一日比一日少喎睇黎今個月我真係邪住舖頭。不過呢樣野呢我又唔會內疚既因為有人俾錢我睇DVD何樂而不為∼
晏晝有位新朋友黎左買碟，本來佢諗住買一買碟就走但係最後留左係度吹左個幾兩個鐘水。呢樣野就經常發生架喇因為基本上香港地冇乜邊度有得噉樣搵人同你講音樂，因為就算你好似呢位哥哥仔噉係band友，你隊band其他人都未必有水同你吹因為香港仍然有大半「band友」夾band係為左型同威。大家吹左咩就無謂提喇一來好多二來好深三來好灰，知道吹左咁耐大家有一個共識就夠：
「香港音樂真係好灰！」（呢句係呢度已經出現過無數次，不過似乎仍然會繼續出現）
夜晚有個老細既老朋友上黎搵老細，不過老細今晚唔係度佢又冇野做就坐底齊齊吹水。對住老野當然係吹老水。是晚共識有三：
「Rock，始終都係六七八十年代好。」
「香港音樂真係好灰！」（係又係呢句，基本上呢度每次吹水呢句都一定會出現）
「雖然香港只係得一隊樂隊Beyond，不過都已經好好架喇！唔係有Beyond出黎的話ｄ靚仔靚妹真係連咩叫『樂隊』都唔知呀！」
因為老細唔得閒開舖之關係今日學完鼓立即飛出去開舖。五點準時開舖，果個人都準時到（唔好問我「果個人」係邊個！我好想知佢係聽Metal聽到智障定智障完之後先聽Metal！）。我未見過有人可以咁白痴／煩，如果唔係佢（有陣時）係豪客的話真係舖頭都唔俾入呀（呢樣野老細都認同架）。
仲記得上年最後一個廿八號果個Metal阿叔嘛？（我記得我真係會死，嚇死）話說今日俾果條友煩到喊果陣時有個阿叔隊住罐啤行入黎，四目交流之後發現就係果個阿叔！難得個阿叔仲認得我先好野。不過佢唔係知道我地搬左專登上黎睇下而係得閒冇野做行旺角咁蹺撞上黎。
「我一聽到呢ｄ聲就會行埋去睇下咩黎架喇！」（唔使問我「呢ｄ聲」係咩聲卦）
難得阿叔撞上黎果條友有另一個目標俾佢煩我當堂輕鬆唔少，見突然咁得閒我唯有棟係側邊睇戲：
問：「你聽過ｄ咩呀？你識邊幾隊呀？」
答：「我咩都唔識！淨係識呢條友！（即係我）」
問：「嘩你唔戴口罩就出黎旺角呀？頭先我戴住口罩行先達都一面行一面驚呀！」
答：「聽親呢ｄ音樂ｄ人都係豁達ｄ，乜野會發生既事都預左架啦！要死唔會病！」
問：「我廿幾歲人先黎學結他，會唔會太遲呀？」
答：「遲？咩叫遲？四十歲先做老豆就叫遲！假如你個決定會搞到其他人，噉就叫遲！如果你做件事唔會影響到其他人只係為自己，噉幾時做都唔叫遲！」
同阿叔吹水真開心，唔止因為音樂仲因為阿叔肯教你「做人既道理」。（不過最緊要當然係佢可以令到果條友唔再纏住我）不過上左黎個零鐘阿叔就話「冇晒啤忝！」就鼠左去買酒飲。禮拜六有緣再會啦阿叔∼
唔知點解成日都係ｄ人九點前係唔上黎，到十點幾十一點果陣就係噉衝上黎搞到收唔到舖，今日又係噉俾人玩搞到十一點半先走得。十二點幾返到屋企果陣發現屋企隻禽獸走左喇！因為工人返鄉下舍妹會考老母唔理老豆頹我更頹之關係，愛犬已經俾原主人押解左去喇！睇黎六月前都唔會再見到佢，不過到時拎唔拎得返都唔知喇因為可能原主人見隻野真係咁得人鍾意就索性唔「還」俾我地自己繼續養算數！
好在有返個少少復活節假俾我復活下如果唔係我真係會走晒堂架話晒之前幾個星期日日都係午二晚四。
晨咁早俾老豆屈左去荃灣飲茶之後本來想出尖咀HMV跟住
「唔可以噉既！」
冇錯HMV實在出得太多喇！所以我決定 今日轉上九龍灣HK Records！都係執減價野不過呢度ｄ減價貨擺得仲亂過HMV搞到冇心機摷，不過當中有唔少正野搞到真係好想執（阿Rock如果你知道當中有ｄ乜你會同我搶埋一份，好多Prog野呀）。不過點想執都要下個月有緣再會，而家真係好窮．．．
係好想做野不過返到屋企就訓訓訓．．．
是日行程（理論上）：七點起身 ＞ RA ＞ GS ＞ TRHK ＞ The End Of
是日行程（實際上）：兩點起身 ＞ "#*XYZ%$!"
THE END OF
最新消息（不過黎到呢一刻已經out晒）：Bonze發燒！不過最後發現只係腸胃炎冇事冇事。點解唔係中招呀中左我咪有得隔離十日嘆世界囉！我仲未有feel返學！（Bonze男朋友就黎上門斬人架喇）
經過上次之教訓，今次都係夾兩個鐘算。又有新歌（呢樣野已經變成奉旨）不過似乎大家唔多順利，睇平時最溫文儒雅之阿Dave今次都夾到火就知。我都唔係好多敲敲下噉又斷對棍即係又要俾＄唉．．．或者下次再減夾一個鐘算？或者索性停埋佢唔好夾住？
夾完上舖頭行下，同老細先知晏晝走左之後有人上舖頭偷野！條友都幾勇拎成棟碟之後仲要他他條條等電梯走！如果係你捉到個賊仔係你地方偷野你會點？如果發生地點係信和的話一早有成村人衝出黎打幾鑊再報警拉人。但係而家地點係TRHK，而之後發生之事你點都估唔到，連老細自己都覺超級戇居而家諗返起都笑：佢最後冇打七條友反而係小完俾左兩條佢落去食麥記。
本來諗住一早返去搵老細斟RAｄ野又係老細睇黎我同你都係無緣。本來都晏晝諗住做下RA（係另一份）不過最後知道今日點都只會動機不足都係走出街算。HMV減價差唔多冇晒新野喇。冇咁快去到盡卦我對你地好大期望架喎？都有ｄ貨想執架不過算喇都係有緣再會．．．（幾時再有緣我都唔知）
舖頭死寂睇黎復活節減價真係只限於復活節，結果三條友全日棟係度唔知做乜叉。好在都有阿Bunny哥哥上黎同我地講下故仔：
「有次拎左隻打鐵野返舖頭（註一：佢係開時裝舖既），封面上面條女對奶超大成四十二寸（註二：我承認係好不雅不過為左原汁原味．．．）），跟住放左係檯面又唔記得收好佢，剛剛有個客（註三：係生客，仲要係女！睇落去就知點解要註明）入黎見到就『咩黎架？借黎睇下？』拎左黎睇，睇睇下就話『咩黎架？咁得意既？』我就拎本歌詞集打落佢心口度『你都唔細丫！』」
又係點幾兩點起身，仲話返學搞GS都係飛去開舖算。今日生意一條equation就搞掂：
（好靜）X Infinity
聽朝要返教院開會，夜晚冇得唔做野喇要睇報紙搵料。今次目標係人大人大人大，都唔明點解search人大呢個字會出現勁多冇關野結果成晚就係係度睇埋ｄ無聊新聞。係呀終於有得《茗報》喇！
十點鍾開會十點三先起身，事實證明真係完全未準備好「返學」呢樣野下星期點算？
十二點幾返到一個鐘唔夠就搞掂，見仲有咁多時間就出尖咀買返對棍先（阿明我都開始想買返對Ahead鐵棍喇唔使驚又斷）。出得尖咀HMV當然唔少得。減價大致已經可以唔使理喇，見行咁多次都係空手而回今次就買返左隻Noise野試試（唔好以為好似阿Bunny聽果ｄ打晒鐵果ｄ呀我未去到咁高層次）。有幾隊ｄ碟一直都想搵老細又話太地上唔會入但係黎到呢度發現都係冇，而家Hmv都開始冇我想要ｄ地上野我仲可以去邊度搵呢？唔通真係要搞返張卡上Ebay？
生意．．．又係（靜）X N。阿Rock肥仔瘦仔三四點上到黎可以吹水吹到七點都冇人。佢地是日結結論係
「死喇我地同佢地有代溝呀！」
只係差幾年，不過我同阿Rock講果ｄ野佢地已經唔知係咩一回事，同佢地吹當年ｄ卡通電視漫畫完全地唔知我地講緊乜。連當年最經典之六變獸廣告「一變噴射機、二變火箭車．．．」都唔識？有冇做過靚仔架你地？不過當阿Rock呢個變型金剛都唔記得呢段經典之時，我都相信冇乜人仲講得出架喇因為事實上又真係冇咩人好似我咁無聊專記埋晒呢ｄ無謂野。阿肥仔瘦仔乜你地而家先知我乜都識咩？想當年又唔出街蒲又冇咩朋友加埋我另類之關係，當時自己一個人果陣都鑽研過好多野，不過當中好多都係純粹娛樂自己，「用」都冇「用」過就再冇發展落去，好多野到而家都生疏／唔記得喇。不過呢，又要搵返呢句出黎：
「我就好似一個刀架，睇落戇戇居居又粒聲唔出，但係如果你肯行近ｄ睇的話，你就會發覺我周身刀，雖然未必係張張利甚至有好多已經鈍左，但係總足夠幫你打江山、闖江湖，就好似你需要緬懷過去果陣，我一定可以幫你地做到一個集體回憶．．．」