段記

祝妳愉快

29/11/2003 SAT

一個月了，回到教院再次見面，很高興能再看到妳嬌俏的面容、再聽到妳悅耳的聲音，雖然只有很短很短的時間能和妳面對面相處，也沒有談過多少（很多時看著優雅的妳，不知不覺間便會忘掉一切想說的），但看到妳安然無恙，我總算能夠安心。只是妳真的顯得很憔悴啊，是的實習真的很累人，雖然我明白那是很難做到，但謹記在百忙中都要抽空好好休息，多睡一點、睡好一點，別讓自己捱壞了身子，而且這些日子裏天氣開始轉寒，縱使不致累壞，休息不足弄得身子弱也會很易著涼的。還要經過一個多月實習期才結束，在這寒冷的數星期裏記著要保重身體，多放鬆、多加衣、少動氣、少過勞。

能看到妳，對我來說是很開心的一回事，但今天我卻笑不出來了。不是因為妳的某些行為使我感到不快，妳的很多行徑縱是不悅但我都明白為何；而是妳現在很少把笑容掛在臉上，整天都是愁眉深鎖的。許是教務真的累壞了妳，許只是因為妳的性格，許又是我自己庸人自擾，但在我眼中和心中，妳的不愉快比我身上身邊那太多的不愉快不順景還要重要，看見妳高興我也會開懷，但望著憂鬱的妳，我真的會感到很心痛。嘗試釋懷一下吧！整天都憂心忡忡地抑壓著自己對身心都不好的。請不要吝嗇妳的笑容啊，那可是世界裏最美的事物呢！記得那條還未解答的問題嗎？希望需要我去解答的那一天，永遠都不會出現。

縱使已講過很多遍，還是很想說聲，「祝妳愉快。」每一天我都會作這衷心的祝福，希望在說過千次萬次後，有一天這祝願終可從空言變成真實，這心愛的、可愛的女孩子無時無刻都會綻放那很久沒有再出現的純真笑容。

臨函涕零，不知所言。

劉義

1/12/2003 MON

英文、GS，今日一次過睇兩科。所以琴日冇野睇，因為淨係追返英文之前ｄ教案都做到五點幾。當然，琴日唔寫仲有其他原因．．．
結果點，唔使問，因為冇咩好講。都係得個pass。英文今堂廢事開新書唱歌仔算貪唔使準備（根本想準備都冇時間），加埋原任入埋黎睇總算令到班人肯上堂。隻鬼都話教得好諗得正，不過佢讚到曉飛都係得pass，因為而家語文基本上就差唔多只會俾pass。你教得到又教得好咪叫做合格囉，教到拍案叫絕嘆為觀止就credit，想拎distinction唔係唔得，即係你可以教到連隻鬼都睇到感動流淚自愧不如咪有得拎囉。
搞英文都做晒成晚，仲要睇GS點算？好在最後一堂先黎睇即係仲有幾堂空堂準備，況且佢今次有好野撞正黎睇我班「實驗班」二年班即係基本上又係乜都唔做都冇問題。咩野係「實驗班」？咪就係上堂乜都唔教淨係做分組活動當教書囉。意念係好亦好創新阿Sir都好鍾意呢套，但係理論上可觀一回事實際上搞出黎隻鑊有幾大先係果回事。一班我黎之前未做過小組活動之學生，一班圍埋就只係識玩之學生，加多幾個本身心理同情緒有問題之學生，結果就係落堂之後換黎導師一句
「從常識科同埋嘗試角度睇係好好，不過從成班整體黎睇最多都係得pass既遮。」
事實證明，你點樣肯嘗試肯創新都好，除非你果班係天才，否則想觀課可以拎到好成績除左做樣板戲之外冇第二條路揀，而且該成績之高低同該樣板戲之「樣板」程度絕對掛鉤。不過之後無論英文定GS我都唔會再做樣板戲，一來根本唔鍾意噉，二來噉樣做真係好／太假，三來上年個總成績都credit左今年pass晒都唔使驚／唔便理，唔係的話我今日仲唔肴晒底？好似而家噉樣想點教就點教、鍾意試就試，先真正係教書。

睇晒兩堂，唔代表有得嘆，因為我地TRHK教父阿冷就黎飛返夏威夷所以提早退休，即係又要我出山鎮舖。生意，算啦，而家只存在住「有定冇」而唔係「多定少」。
辛苦，真係好辛苦。唔係辛苦在朝早教書，唔係辛苦在晏晝要睇舖，而係辛苦在夜晚想抖又抖唔到想訓又訓唔著。希望妳唔會好似我噉啦。

2/12/2003 TUE

是日頭三堂空堂，訓足。晏晝又三堂空堂，訓埋。今日返到學校除左上堂同食飯之外真係全程訓晒，我都覺得自己訓到有點兒離譜，不過冇辦法，呢幾日真係身心衰竭。今日唔知點解寧舍多先生入黎我地休息室拎野，除左校長之外差唔多全校上至副校下至校工遠至書記近至學生都見過我趴晒係檯面仲要插埋耳筒焚到大大聲擺明寧嘈死自己唔比人嘈醒個衰樣。難得間野仲忍到我。我都好有興趣知我幾時比人踢出校，either呢間小學or教院。

是日同我地大佬阿偵哥吹水，講開罰學生呢樣野。話說有個導師話罰唔應該同學術有關，例如罰抄書、罰背書，因為噉樣會令學生對學科反感進而唔鍾意返學。正確之罰法，係令到果位同學對自己所做之反叛行為感到反感，例子有
「咩話？頭先你叫阿Sir食屎？陣間你lunch果時唔准食飯，落黎教院室對住個垃圾桶不斷講『食屎』，講到一係佢食一係你食先准停！」（呢野一睇就知罰果個係我呵呵）
嘩呢招完全係我style食完飯之後一定要搵班玩下！不過估唔到膳食部ｄ阿姐一早收到風快我地一步，當我今日落去乞飯食果時平時次次見親我都眼超超之阿姐居然一見我就拉我埋去走果時仲扯晒衫尾唔比我走噉
「今日好多飯剩呀！拎一盒咁少唔好啦拎多ｄ啦！拿拿拿拎多個A餐！好食呀今日ｄ飯！唔好走住啦拎多幾個先．．．」
又話說偵哥今日堂PE教唔知咩野，有個女學生唔肯試，因為佢之前做同一個項目時扭傷左隻腳有陰影，跟住仲驚到喊唔肯做。跟住阿偵哥就改下個活動，方式唔同但係其實做ｄ野都係一樣。今次果個女學生就做到仲要做得好開心。課堂總結時阿偵哥的左個靚妹出黎：
「所以話呢你邊度係做唔到？上次扭親係意外遮！你上次扭親唔係你蠢！唔係王sir我教得好！係個原任教錯野遮！即係但係果邊睇緊我堂果個你地本來個體育先生呀！記住叫家長投訴佢呀知唔知呀？」

是日好嘆。完全唔似教書。除左訓足六堂空堂之外仲有好多奇遇。一朝早返到去派簿之後好神奇地有隻狗走左上黎學校一樓條走廊度，嚇到兩個Miss係走廊度攬埋一齊唔敢郁哈哈哈。之後當然係全校最得閒果一個我行過去同隻狗玩（．．．）之後佢就跟住我行。本來同佢玩得好地地點知行行下老遠有個Miss叫走左佢搞到冇得玩唔開心。隻野係一邊樓梯走左之後成班拎晒掃帚地拖垃圾剷之校工先至係另一邊衝上黎
「邊度有狗！同我出黎！」
派完簿訓完覺之後上常識堂，班友話
「阿Sir我地要做board呀！」
噉咪比班友做成堂囉。反正我呢班GS教快左成個月而家得返一課書要捱五個禮拜（係我敢講我教GS係史上最快！唔係點會咁得閒／有時間搞個「實驗班」？）。結果成堂班友負責做board我就負責企係度訓覺等佢地做到悶果時可以有個目標掟紙／筆／粉筆／粉刷／whatever娛樂。所以點解我係呢間學校咁受歡迎。
食完飯冇野做就跟左阿堂上去玩佢班數學靚仔。話說阿堂上堂之前要去第二班派簿，噉我就扮晒野入去
「而家周老師好唔妥你地！所以叫左重案組劉Sir即係我上黎點相！你你你你你同我出黎！」
跟住成堂就係周sir有周sir教書，劉sir有劉sir鬧人。所以你話炒果ｄ超額教師做乜，好似噉樣一個人教一個人管都不知幾開心。玩完落番休息室之後仲有得玩，有個四年級女學生中文作文作左句絕句：
「那條粉腸．．．」
絕對真人真事冇誇張老作！所以點解而家教書會教到喊，你真係唔知可以點教！之後三個人研究「Ｘ」呢樣野，跟住越Ｘ越開心三個人係度互Ｘ，差少少Ｘ到ｄ學生落黎問功課果時
「Ｘ！而家落黎做乜？唔好阻住阿Sir合皮！Ｘ！」
玩完？Ｘ！仲有！經典名著「廉潔社會、豐盛人生」面世Ｎ年之後，終於都後繼有人！

BATTERY!

睇返呢日，係咪似返ｄ劉義寫既段記？不過，其實呢排唔係真係太開心。一來唔開心，二來好憂心。

3/12/2003 WED

琴晚訓得果個零鐘，今日又係冇得訓。因為丁菲飛。呀唔係，係因為舍妹。又唔係，其實又真係因為丁菲飛。話說舍妹要做份中樂評論功課，結果就當然係到臨交前果一晚都仍然係乜都冇做過歌都未搵（真係我好果ｄ佢一樣都學唔到最衰果樣學識完仲要叻過我）。十個鐘頭唔夠之後就要交點算？算啦實係我架喇。結果就要我漏夜拎左篇丁菲飛改下改下搞到噉款噉就掟左去交。佢先生收到之後會有咩反應、睇果時睇唔睇到明、睇完會發生咩事，我都唔知，不過就好想知呵呵。成篇野除左樂理果部份之外都係我寫既（冇錯聽我就識聽叫我由音樂角度去解我係呢世都做唔到），只要你比較下其他部份同埋"Music Theory"果部份，同埋知道"Instrumentation"果部份佢連將我寫低ｄpoint轉番做一段都懶就噉point form交就算數（呢度我已經係執過架喇），你就會明白舍妹係頹呢方面點樣青出於藍。

繼琴日以客席講師身份小人之後，開始好鍾意觀課。而家好鍾意扮晒野入去人地課室度幫人鬧人，反正班友又唔係我教，小完罰完就走左去班友冇仇報，就算報仇都唔會報係我身上啦有事果個都係本來教佢地果位同事遮！好似上次去阿堂班超差數學度狂小之後班人當堂靜晒，點知今日去上堂時見到我唔係度當堂
「上次叫人地黎鬧我地咁威？郁佢！」
搞到阿堂落堂之後走落黎哭訴。噢唔好搵我呢ｄ野我過完癮就算數．．．

今日我地大天乞食兵團再創奇績。話說逢禮拜三全校學生半晝放學關係所以餐單得A餐同B餐兩個飯揀，但係無論佢有一款定一百款都影響唔到我地每日十二點九一點就鼠落去搵阿姐乞飯之例行公事。見到我（冇錯做醜人果個永遠都係我）班阿姐自然又係反射性地黑口黑面，
「咁多嗲，俾個C餐你好唔好？」
玩野乎？好既然阿姐敢玩我呢ｄ契弟當然願意到底
「C咪C驚你呀！」
點知！佢地真係拎到個C餐出黎！我！當堂！冇野好講！輸得心服口服！服到五體投地！唯有攬住個C餐喊晒口噉走返去休息室！
今日膳食部阿姐問左一條佢地想問好耐之問題：
「喂！查實你班友仔幾時走人？」
又會咁好死咁關心我地？除左計下仲要蝕多幾多日／盒飯之外，背後原來仲有一個重大陰謀！話說上年有人實習完之後以為好地地等畢業，點知到臨畢業果時學校先通知佢，原來佢其中一個原任睇佢堂果時係冇通知返佢之情況下肥左佢，所以佢實習唔合格要重讀！噉又同我地呢班乞兒仔有咩關係？就係班阿姐諗住係我地臨走果時寫返封信比校長：
「此批實習教師每逢午飯時間必定扮晒野強索最少六個飯盒，令本公司蒙受巨額金錢損失，而且又食又拎仲要唱，本公司仝人對此四名實習教師之道德操守持極負面之評價！」
結果我地就成為史上第一班亦會係唯一一班因為膳食部投訴而集體實習唔合格之實習教師。

食飽飯冇野做，阿偵哥就開始計劃佢下星期俾阿Dr. Lee觀課堂IT。
「今堂阿Sir教你地用Excel做photo processing！而家你地自己嘗試一下，可以運用任何Excel之指令去做，點樣做阿Sir落堂開估！．．．有冇人知點做？做唔到？冇錯！咪就係做唔到囉！用Excel做photo processing？傻架？話做到果ｄ全部拎本手冊出黎比我！但係有一個方法可以做到，你地知唔知？咪就係去『檔案』揀『結束』閂左Excel之後再Ctrl+Esc去『開始』再開小畫家囉！咁簡單都唔識！做唔到果ｄ全部拎埋本手冊出黎比我！呢個故事教訓你班友仔，做人呢就要變通！唔係的話就算你有幾醒，做野唔識轉彎一樣冇用，好似『果ｄ人』噉樣讀電腦讀到做博士又點？冇電腦俾佢咪又係乜叉都做唔到！挑！」
教得咁好，阿李博士當然會俾丁。Extinction。

4/12/2003 THU

琴日因為家教會霸左我地平時用開間休息室關係，我地就比人流放左去醫療室。嘩仲衰！大大張梳化棟係度度門又要冇窗口，即係係之前間房ｄ先生成日經過又要入黎拎野訓都訓得唔夠盡情，而家真係鎖左度門之後撻上張梳化度訓足一日都冇人阻止到我！結果又招人妒忌，搞到搬左黎醫療室唔夠一日又比人掟返過去本來間房。
即係繼上次比晒副校主任先生見到我擺明入到休息室就係訓覺乜都唔做個衰樣已經衰架喇，但係入到黎發覺即係唔係我想訓囉，係地靈人傑囉！入到呢笪風水地真係寧舍好訓架我發覺！所以晏晝前又係除左堂英文之外全部五堂空堂都係處於昏迷狀態，亦即係回復返之前之正常實習生活。
正常之實習生活，當然包括乞飯食此重要一環。今日行緊去果時阿姐老遠見到我已經叉晒腰大叫
「咩餐呀今次又？」
經過琴日一役，今次當然不甘示弱：
「一個set lunch唔該！即係ABCD餐要晒！」
然後劉老師名正言順地回歸醫療室，因為佢講完果句說話之後頭部受到一個"set lunch"撞擊當場昏厥。（我常識上個禮拜先教完《昏厥的處理》呵呵）

好嘆。而家每日返到屋企就係狂訓，訓爆起身就食食飽之後又訓十足十我屋企隻狗。其實我同佢邊個係雞邊個係蛋，到而家我同佢都仲未搞清楚。

5/12/2003 FRI

因為淨返唔係幾多個禮拜六之關係，今日專登搵左我常識個原任黎睇堂。雖然黎左成個幾月，但係我發覺我同佢真係好冇緣。今日佢黎觀課先至係我開始實習之後第三次同佢見面。第一次係十一月頭，佢某次撞到我之後問：
「我係唔係要睇你堂架？係呀？哦！」
之後就走左去，然後成大半個月唔見人。第二次就係琴日我去約佢今日睇堂，佢見到我第一個反應係
「嘩！好耐冇見！」
係！真係好耐！跟住今日就係第三次，相信亦都係最後一次。睇佢今日一個連堂淨係入黎睇半堂，果堂仲要拎左一半時間帶做作業然後再借時間俾人派簿，跟住打鐘果時佢仲急過我走因為要去叮飯食，之後講返果堂教案又唔拎黎睇（都預左所以我都冇寫過）又乜都唔理淨係識話「教得唔錯教得唔錯．．．」跟住掟低張分紙就走左去食飯。仲頹過我咁滯，真係搞掂左呢單野之後佢仲邊會再俾機會我撞到佢？

每逢禮拜五晏晝我地都會好開心，因為最後兩堂係課外活動而ｄ主任仲未得閒編我地幫手做之關係，食完飯又上晒堂之後班友實會立即撻低晒（相信ｄ高層見跟住只係剩返果幾個禮拜都廢鬼理事隻眼開隻眼閉算）。我就當然永遠都係帶頭撻低果個，反正我食完飯之後果堂係空堂面皮又夠厚ｄ先生入黎拎野都照係噉訓，阿堂同珠姐上完堂返到黎見到我訓就實跟住一齊訓，永遠堅守點都唔訓之大佬阿偵哥到最後見人人都訓好冇癮之關係實會被迫陪我地訓。但係今日好無聊大家都訓到無可再訓，訓醒又見冇野做就幫阿副校做下教材。話說三年級要做呢個誇學科統整，我地被編左去負責呢個公民教育科教ｄ小朋友要珍惜食物，其中一個環節就係講一個叫做《千人糕》之故事。即係呢ｄ野俾著我地呢班已經訓到唔想訓悶到發癲之無聊人手上，想篇野可以保番返原汁原味真係仲難過叫我地唔好做。

真．千人糕

一係就成個月唔黎，一黎就幾噸幾噸噉黎，突然間咁多新貨到真係放左學之後點都要上一上舖頭睇睇咩環境！同我一樣，好多久未蒲頭之契弟都終於捨得上黎喇。眾契弟之首，MESSIAH輝爺話：
「咁Ｘ多，搞到成間CitySuper噉！」
擺明架啦？但係你班友仔夠薑唔添香油咩？遲ｄTRHK會學足CitySuper提供埋手推車，等你班契弟一邊喊住口爆粗一邊不能自控地係噉一棟碟一棟碟噉掃落架車度，十足十比CitySuper昆噉款。

6/12/2003 SAT

終於有個禮拜六有野講。是日契弟特多，同是日生意一樣咁多；是日生意就同是日契弟一樣咁多，多如天上繁星。（眾契弟唔好打我）
嘩呢間唱片舖有幾耐未試過好似今日噉似番間唱片舖呢？呢個究極買二送一加八五折當然有關係，但係最大原因都係因為OPETH。等左成世，大家終於等到呢班神人出DVD喇。就噉睇台風，班友可以話完全係冇／唔掂，仲要搞到好似有點兒怯場。但係就算佢地噉樣成場都係企定定冇乜郁過都冇乜所謂，因為神就係神，無論係靜定係嘈，只要聽到佢地結他其中一個chord、鼓其中一個過門、主音其中一句，已經再冇野好講。神就係神。

7/12/2003 SUN Bad Attitude

據消息人士透露，上一次夾已經係兩個幾月前之事。好在聽日學校放假，終於可以係收左皮咁耐之後襯阿冷臨走前出黎夾多鑊。為左呢野今日晏晝專登出去卜鼓房練返下（嘩我都唔知幾耐冇做過呢樣野），點知入到去發現敲多幾下已經要嗌晒停對今晚都冇咩期望，即係其他人小少幾句已經好開心。點知上到band房發現，其實擔心咁多做乜？因為當你發現面對既唔係一套鼓，而係一班仆街果時，你打果時真係好似粗口一樣乜都爆到出黎。
玩完之後賽後檢討，「今次好左定差左？」我都唔知，淨係知下一次檢討最少係大半年後之事。唉。

8/12/2003 MON

是日放假真係開心。唔使問我放咩假，你知我呢ｄ頹友永遠都係只知有假放唔知點解有假放。既然咁得閒又走出黎飲茶。是日因為爆滿關係冇得上稻香（當堂解咒！上到舖頭射二百一十八次垃圾桶終於有一次射入！）走左去另一間唔知邊間度飲，仲要加多個阿Rock三條麻甩佬，今餐終於可以六條埋單。最無聊果個當然又係我，當人人都係食蝦餃燒賣果時，全場係得我一個專揀埋晒香蕉理戟、芒果布丁呢ｄ仲要係噉叫。所以點解其他麻甩佬咁唔鍾意同我飲茶。雖然話就話六條，但係今餐食ｄ野絕對多過上次稻香八條果餐。而且今餐一百八十入邊絕對有最少一百係我一手／口包辦絕對係嚇親街坊加引來同檯其他人士不滿。所以點解其他麻甩佬咁唔鍾意同我飲茶。
真係好撞唔撞今日飲飲下茶撞到個學生（唔使問我邊個我都唔知佢邊級／班／個）。即係雖然而家係實習我仍然維持住逢禮拜日先剃鬚之好／壞習慣，既然今日唔使返學就專登留到今晚先剃。點知噉就俾個家長睇到呢個衰樣。
「嗚～～～媽咪呀～～～頭先我俾粒糖阿Sir食，佢唔肯要仲小我忝呀！嗚～～～」
「一睇佢成面鬚ｄ鬚根仲密過你ｄ頭髮，就知唔係先生黎啦！俾人昆左喇你傻仔！以後上佢堂記住搞多ｄ事忝呀有事老母撐你！」

冇錯禮拜一又係我開舖。冇乜生意（雖然同上個月比今日已經係好好生意），不過前兩日已經呃夠喇，就算今日乜都冇都唔出奇。冇人就最開心，等我可以安安心心係舖頭寫碟評呵呵呵。（而家寧願寫碟評都唔寫段記真係衰！）

9/12/2003 TUE

冇今日乜都冇做過。當我今日常識堂連堂都唔上果時（真係唔上，仲要係擺明唔上），唔上到搞到學生喊（真係搞到學生喊），你認為我仲會做ｄ乜？

係乜都唔做，不過有一樣野就點都會做，就係寫碟評，仲要係一日寫夠兩隻忝。寫到聽日英文睇堂都唔理，呢條友真係死得。

10/12/2003 WED

睇堂，算啦。出到班房之後只有呢段對話：
"The worst planning I've ever done, the worst class I've ever met, the worst lesson I've ever taught."
"Yes I strongly agree with you!"
真係精彩到我都唔信。入左去成個字仍然全世界當我透明自己玩／傾偈／出位／打架／做功課，跟住三個字連一個生字仔都教唔到，因為淨係全班三十幾個人名差唔多全部俾我嗌勻晒淨係嗌名都嗌到冇晒時間！跟住讀課文不論係我自己讀定係播CD班友都係擺到明唔讀，就算讀都唔係一齊讀得幾個人肯開下口出下聲。結果到打鐘果時半個教案都教唔晒。本來係課室果度見個鬼佬唔夠兩個字已經剔晒張分紙仲要有好多係fail，之後又拎本野出黎睇日子，都諗住今舖死硬冇得唔肥，因為班友真係擺明玩野。到最後估唔到，隻鬼居然會俾個pass我！雖然只係borderline pass，不過我理得你總之合格我就乜都得！（可能因為佢睇完日子發現跟住都係冇時間再黎廢事揹鑊所以求鬼祈pass左佢算呵呵）係教得「未如理想」（甚至話教得幾好我都唔知隻鬼點諗野），不過佢都肯俾pass，因為：
A. 呢班係一年級；
B. 呢班係好難搞之一年級；
C. 呢班係好難搞到佢都教唔掂之一年級。
聽佢講到C，反應當然係
「哼！死鬼佬！你都知自己教唔掂呢班呢！而家我教到你教唔到！即係我教書教得好過你！Dr又點呀大Ｘ晒呀！係呢度我勁過你我話你知！」
不過個死鬼佬完全唔知我講乜淨係以為我教成噉都拎到合格所以搞到亢奮失常，淨係識一邊睇住我發癲一邊係度點頭
"Oh yes yes yes...yes you are correct...that's right!"

禮拜三晏晝又係同ｄ主任一齊備課。話說呢幾個禮拜目標係寫好一份教案（嘩呢ｄ野理論上我地日日都寫架啦估唔到呢度會俾幾個禮拜寫一個），即係你搵著我呢就真係無敵架喇，當其他組幾個先生圍埋個幾鐘都淨係畫左個表寫得幾隻字之後下回待續之時，我已經幫我果組ｄ原任搞掂晒份教案！本來見負責打個先生打字慢諗住同佢講「不如俾我打埋佢啦！」但係見佢話晒係panel就廢事落佢面咁衰啦（．．．），如果唔係今日份野一定已經打好晒print埋交埋貨嚇親其他組！不過噉都好，咁快做晒的話，下堂人人都做而我地冇野好做，又真係幾無聊架喎？咪當就下其他組ｄ進度囉呵呵。（．．．）

開完會之後其他先生走晒去做師資培訓，我地呢ｄ頹友自然就係扮晒野鼠番去休息室吹下水無下聊挨到放學算。我地大佬阿偵哥就係我地四個入邊最正常／正直果個，不過佢今日小息鬧人果時一唔小心漏左口，爆左句金句出黎：
「叫你琴日小息落黎你唔落，到今日小息先落黎，你係咪唔想小．．．丫！定係想阿Sir小．．．你丫！」
又是日出現左《金斧頭的傳說》version 3.0（2.0就睇返上個月尾ｄ段記喇）。話說今日珠姐派左一張帶分數加減工作紙俾ｄ學生做家課，點知有個學生放學果時跌左就專登晏晝果時返黎學校問佢拎返：
「呢張真分數加減工作紙係咪你架？」「唔係。」
「噉係咪呢張假分數加減工作紙呢？」「都唔係。」
「係唔係呢張帶分數加減工作紙呀？」「係喇係喇！呢張先係我架！」
「好！見你咁誠實，Miss就獎晒呢三張工作紙比你，你今晚同我做晒佢聽朝九點前交比我！」
跟住個小朋友喊晒口「我以後都唔要做一個誠實的好學生！」飛奔出校門。
偵哥同珠姐都講完，之後當然輪到阿堂。話說佢有一次同朋友去打邊爐，見到間酒家門噉寫：

任食小童六十八
任食成人九十八

11/12/2003 THU

禮拜四就最開心，因為中間成三堂空堂，晏晝又淨係上電腦堂乜都唔使準備，所以呢個半鐘實係寫寫寫寫寫寫．．．雖然禮拜二朝早頭三堂一樣係空堂，但係八點幾早會完返到休息室就自然係立即撻低訓晒呢三堂架啦。呢間學校ｄ空堂真係嘆到爆。改簿？傻既咩！呢ｄ野梗係訓都訓到悶果時先做架啦！
平時用筆寫個幾鐘都未必搞得掂一篇碟評，今日全靠阿堂捐出佢部手提電腦過我，當堂連起兩篇之後仲有時間焚下機等開飯真係狂起！我老母成日小我，
「冇電腦就乜都唔做，唔用電腦你係咪會死架？」
事實證明，係！

聽日又放假，唔經唔覺又到左呢個禮拜最後一日。今日食完飯之後先發現，好遺憾，今個禮拜居然冇去到探探班阿姐乞飯食！大拿拿五蚊架我俾左而家一日先食得一盒飯蝕灼忝！唔抵呀好唔抵呀我喊嗚嗚嗚～～～
是日學校停車場出現以下情景：
「阿頭，大家都到齊，ｄ野又收晒，幾時開車呀？遲左好耐喇喎！」
「等多陣先啦，高高地瘦瘦地戴眼鏡果個實習先生日日都借ｄ倚黎拎飯食，呢個禮拜見唔到佢反而有ｄ唔聚財忝．．．」

「全部先生今日放學開聖誕聯歡會！」
阿偵哥話。嘩仲有個幾禮拜先聖誕聯歡會正日先生咁快就有得玩同食咁開心？放學之後好期待，點知開開心心去到果時先發現原來係：
「今日放學先生開聯歡會．．．開會！」
原來係開會講廿二號果日聯歡會做ｄ乜！灰！呢排阿偵哥漏口之毛病都幾嚴重下！
開完「聯歡會」之後又係無聊吹水時間。話說我地三條友都有教之1C居然係短短一個月之內換左三個女班長。點解？？？原因係個男班友同班主任講
「Miss，條女好唔掂喎！換過件啦！」
定係之前兩個女班長同班主任講
「Miss，個男班長個頭咁薯又咁矮，拎簿出去時要我同佢一齊行咪比人笑？好瘀過喎我！唔制呀我劈砲呀！」
邊個先至係？我都唔知我淨係知而家ｄ小朋友真係好Ｑ俗。（係而家擺明老屈吹咩呵呵）
吹完水之後，臨走經過電腦房果時入邊ｄ先生／TA見到我地都眼超超。死而家除左膳食部之外連資訊科技部都結埋怨我地真係樹敵無數。點解？咪就係因為我地係教院人囉。話說雖然已經差唔多睇晒堂，但係我之另外三位同事仍然每日都寫Ｎ份教案，噉打完之後就自然要print，print就順理成章地係拎返學校print員工福利仲唔用到盡咩？偵哥一日已經要印成十幾版教案，仲有另外兩個未計喎。對於見到就問「教案？咩黎？要寫既咩？」之先生同日日都係「印印印印咁多昆水呀邊有先生要印咁多野架？」之TA，呢班每日都浪費五十幾張紙加Ｎ公升碳粉之實習教師自然成為眾矢之的。不過我就不在此列，因為為免惹來公憤同為左保護環境，我不嬲都唔寫教案！

12/12/2003 FRI

又放假。一個禮拜放成兩日假，呢間學校真係好好好正，今次實習真係好好好嘆。見咁得閒，晏晝就走左去睇《無間道三》。睇完之後，發現同唔睇冇乜分別。其實，你想講乜？如果第二集係第一集前傳的話，噉第三集就一定係第二集之前傳。根本真正之第三集內容，其實只係得好少好少，而且都幾無聊下。首先黎明呢個角色其實出現得都幾無謂，成個「第三集」之內容又係冇咩驚喜，結局就更加係無鬼聊，最後居然係講到劉德華原來係梁朝偉上身傻Ｑ左明老屈，跟住自殺又死唔去吹脹！成套野都好亂好隱晦，相信會係最多人彈之一集，亦係最少人會睇得明之一集，即係你睇完之後答得出其實黎明係忠定奸已經好野。不過反正睇一次都係三十蚊咁平，有時間我又唔介意入去睇多次！

是晚同阿冷餞行走左去韓燒，係呀佢就走喇所以舖頭呢排咁多生意囉，睇佢返到黎之後生意一直都咁灰到左今個月佢一走立即谷底反彈就知！你條友仲敢話唔係你係度邪住晒？走！
冇錯。上次去到茶樓淨係食西菜，今次去到韓國都係唔食韓國野。人人係度猛咁燒豬牛羊魚乜乜乜，我就係度雞翼薯餅雪糕者喱呵呵呵。如斯飲食習性自然引來眾人之側目。所以點解其他麻甩佬咁唔鍾意同我食飯。

13/12/2003 SAT

又禮拜六。又係冇野寫。唔係又係冇野好寫，不過係我懶寫。呢排鍾意寫碟評多，吹咩？

14/12/2003 SUN

．．．．．．

係。此時此刻，真係冇咩好講。
又或者，係唔知可以講乜。
見到你「解咒」，應該講乜？恭喜？祝福？
定還是，睇番自己如斯，只好繼續嘆？繼續喊？
「不愛江山愛美人，可惜美人不愛我。」
唉．．．

15/12/2003 MON

是日調左去間唔係比人上電腦堂之電腦房上，間房細已經大件事，一上到去仲要死左一半電腦，投影機又壞埋，用用下電腦又再死多半，結果差唔多要五個人一部電腦。一個對住部電腦就只會開彈珠台同上網之小朋友已經難教，而家仲要每組都有幾個呢ｄ人，你話班友點會聽書？而結果就當然係得個pass。
「唔係你教得唔好，你ｄPowerPoint仲要靚到識飛，不過間房咁細學生又咁曳，我都冇計！」
唉！最後一個搏distinction之機會都冇埋！不過係呢間房教電腦唔代表一定會好似我咁灰，例子有上個禮拜於同一地點上電腦之偵哥。課題多野教＋冇死到機＋抽正本來由全校管得最嚴果個主任教果班，咁天天時地利人和，有得唔丁咩？
又今日珠姐第五堂睇堂，阿堂剛剛係佢上家，佢就諗住果堂早一個字走，到個導師去到班房門口
「嘩乜呢班咁嘈？」
到Ｎ個字之後先發現，原來上一堂個先生（即係阿堂）一早已經閃左！呢條友係某ｄ方面真係比我仲衰仔！

是日晏晝有個飯超難食（唔關我事！好在我剔左最正果個！），「迫於無奈」之下眾受害人唯有出去「換」－以上重點字眼只係同校方交代之門面字眼，正確黎講其實都係搵阿姐白拎。
「阿姐，俾六盒飯我！」
「拎六盒咁多？你地唔係得四個實習先生既咩？」
「新黎架你？」
每逢食完飯午息，各位觀眾都可以係1A或者1C班搵到我，因為呢段時間唔係去派簿同補番上堂教唔晒書隻鑊就係食飽飯冇野做唯有去的ｄ人出黎鬧下。是日去1A班派簿，
「邊個邊個！出黎！」
「咩料？」

上堂睇堂果時搞到一鑊泡（我嘔出黎既ｄ白泡），今次去番班二年級諗住玩殘班友仔先教書。點知入去到發現，即係我教書已經教得快，點知個原任教得仲快教得仲快連我教緊果份都教埋！當堂想做萬幾樣活動都冇得做！不過冇活動做咪冇囉，今堂就係噉俾功課報仇！點知個原任已經連功課都做埋，我個聖誕報復行動又冇埋！跟住原任入黎，
「係呀書我教晒架喇！係咪要睇堂丫？唔係咪玩下遊戲睇下教育電視算囉！」
結果就成堂都係度睇電視，睇左三集連唔關事果ｄ都睇埋。死，突然間好驚聖誕節之後果兩個禮拜忝！書冇得教，教育電視又俾我睇晒，我仲可以做ｄ乜？

今日返到屋企食完飯之後即訓訓到四點幾先彈起真開心。

16/12/2003 TUE

更開心呢就係今日係家長日，唔使上堂之餘又有得早放好野！因為四點幾起左身之關係所以焚埋機睇埋報紙（當然係琴日果份）先出門，但係噉都仲係六點半就到左學校，不過同麥記一樣果個時間都仲未開門唯有鼠去ｄ茶餐廳食早餐。即係今日七點半先至夠鐘，但係點解要六點十一咁早到學校呢？咪就係印定ｄ功課俾學生聖誕假做囉成日上堂嘈生晒唔折磨下班友點得！

家長日當值其他人都係看地下，係得我一個睇樓上仲要係最高果層。仲好，咁鬼高除左家長同上黎電腦房打機ｄ靚仔點會有人咁得閒上黎？睇下我負責看果間美勞室根本由頭到尾都冇人入過就知，真係我入去閂燈閂門再焚住機訓覺訓到十二點半放學先斯斯然彈出黎都唔會有人知／理！
有我係度，全班風紀當然係立即做足晒所有風紀唔應該做既野，包括擅離職守、叫人唔好跑（甚至唔叫）之餘自己又跑黎跑去跑上跑落、行街噉走黎走去玩＆吹水、走左音樂室同我展覽ｄ樂器玩、同音樂室入邊其他細路一齊整爛ｄ展品（戰利品包括整爛兩塊敲板、整甩鋼片琴個腳掣、整彎揚琴支琴竹同整爛無數其他學生做之樂器模型）、搶左音樂室部電腦一面怒播古典CD一面接龍（難得負責果個主任忍到佢）、走去電腦房打機打到放學先肯走，連睇呢一層果個主任都話
「好在副校長睇唔到！唔係大定攬住一齊死！」（呢間學校ｄ主任仲淋過好多先生）
是日有個風紀成日跟住我，又可以話係我成日跟住呢個五年級小妹妹。話說有另一個風紀黎搶佢條頸巾，搶搶下就打架，打打下就搞喊人，搞喊人之後果個風紀就走左去。叫我搞掂呢ｄ場面唔係卦？結果又要求又呃又笑又tum先搞番掂個靚妹。跟住佢阿媽拎完成績表之後上黎搵佢，好唔開心
「考得好差呀！」「幾多？」「十八！」「仲話差？」「我上年考第三架！」
之後又喊，又係要我搞掂。今日似褓姆多過似先生。對住呢個小妹妹，令我諗番起佢，亦令我越明白點解會咁鍾意佢。

是日見咁早放學，其他人又改簿改到唔想改（冇錯我又係乜簿都冇得改只引來其他同事連串唾罵果個），大伙就走左飲茶。呢兩年實習我第一次試過同其他全部人一齊食飯，證明我呢條友係幾咁離群呵呵。不過食完之後班友就非常支持我離群呢種習性，又係因為大家都頂唔順我專叫埋ｄ無聊野食之另類飲食習慣，同埋永遠都係張單之最大股東但係錢都係夾咁多變相要其他人請食飯。

是日發現，居然有人以為無聊齋／段記入邊ｄ內容可信性係100%。阿珠姐，你都好有趣喎！

17/12/2003 WED

是日改變策略－唔係睇堂，係返學。琴晚一早（都點幾兩點）就訓，六點幾起身七點鐘就返到學校，跟住先執返好ｄ教案。不過咁早返學，睇堂都係次要因為根本就冇咩好睇（下回自有分曉），其實係為左琴日個學生。邊個？呵呵呵～

點解今堂冇咩好睇？因為真係冇咩好睇。第一堂係對作業＆派聖誕功課，第二堂係睇ETV之後做工作紙，有咩好睇？所以阿Sir黎到都睇得好無奈。所以佢睇完之後好冇癮地掟低條Credit就走左。我又冇乜所謂今次擺到明係頹，因為之後同佢講話一月「可能」會冇晒常識堂冇得睇，佢一睇到封email立即打電話黎
「等我仲大安旨意諗住一月先黎睇忝！而家死都要死出黎睇你啦！」
既然係噉，即係好似噉擺到明頹佢都吹我唔脹，好得閒咩肥左邊有時間睇多次呀？當人人都唔敢睇堂果堂播電視果時，唯獨是我可以扮晒野話「作為課程總結」播教育電視，呢個就係常識科之優勢！

晏晝又係集體備課，即係有我呢個「課程專家」（個GS panel噉稱呼我）係度我講佢打，一個教案仔兩個禮拜乜都搞得掂啦使乜煩咁多？睇成組其他三個人由坐係度吹水唔夠幾個字就消失晒就知，我地呢組做野係快過其他組幾多。問題黎喇：今個禮拜已經做晒，仲有兩個禮拜要做呢份野，點挨？

Ed Proj交左proposal未知點，堂呢又暫時睇晒，仲有咩好做？冇。冇咩好做。因為今日，有點兒失望，有點兒唔開心。所以，一早就撻上床算。直到第二朝。

18/12/2003 THU

又係六點幾就返學。永遠都唔願早起身之劉義呢排突然間咁神心，點解？（其實都唔係早起身，而係琴日七點幾八點訓到今朝兩三點跟住見冇得訓寫野寫到返學算）因為一個女孩子。同埋另一個女孩子。

越近十二月尾，越唔想講野。唔好阻住我上床愁。

19/12/2003 FRI

又係好早就返黎探一探果個學生。每次見到呢個學生，都好開心。不過，越黎越少機會可以遇到佢。就同佢一樣。

臨近聖誕，今日全世界都要清晒ｄ簿，是日大家淨係改簿都改到仆街。你睇我呢個永遠都唔改簿／冇簿改之所謂教師今日都可以一上完堂就飛返房剔剔剔（實際上係叉叉叉呢度ｄ靚仔你點教ｄ功課都只會做錯）三個小息都係飛幾層樓派簿／收簿再改，就知道另外三位正常教師點樣做到隻積噉。好在晏晝全組人又食足七盒飯補番（其中二又三份一盒當然係俾只識食唔識做果個契弟即係我吞左）。但係都食得好唔開心，話說今日B餐係「聖誕餐」，隨餐會附送多個蛋糕（仲要係好正之朱古力合桃蛋糕），點知今日走第二轉搵阿姐拎多個B餐果時
「話時話，呢個係我地第三個B餐喇喎！舊蛋糕影都冇見過喎！」
「晨早比ｄ靚仔搶晒啦ｄ蛋糕！你唔係諗住阿姐我會留比你地咁大想頭丫嘛？」
晏晝三堂空堂，又係開開心心寫碟評同搵另外三個吹水無聊之時間。臨近聖誕，除左返舖頭借音樂同工作麻醉，同每日七點幾見一見果個學生，而家只有呢兩樣野可以令我開心下。我都唔知聖誕果時，我會點。

基準，又放榜。又肥，預左。考得仲衰過上次，都預左。返到屋企比老豆老母狂小。亦預左。好多野預左，點都預左。如果有ｄ野可以好似噉，一早已經可以「預左」，可能呢個月尾，我唔會灰到自己都預唔到。

今日收到好多電話。可能對你黎講冇咩特別，但係我呢ｄ隱士廿四個鐘入邊電話冇響過係屬於好正常。係收到好多電話，但係最想收到果個電話，收唔到。我寧願今晚電話冇響過。

20/12/2003 SAT

算啦。越近年尾，越少野講。越係想講，越唔想寫。涷。個天、個心、對手都係。打唔到、寫唔到、諗唔到，唔想寫、唔想打、唔想諗。算啦。
晚晚都好無聊果個，對唔住，我真係滿足唔到你，因為我而家ｄ段記只可以令你知道，無論你有多無聊，都不及我無聊。

21/12/2003 SUN

冇心情到極點。打鼓已經打到唔打好過打，睇見阿Sir口黑面黑，我真係連鼓棍都唔想拎起。

本來預左又係無聊一日，好在上到舖頭發現夜晚有飯開。話說TRHK Webzine主編兼負責人阿MF兄自北京來又聽日就走，反正聽日聖誕聯歡乜都唔使理就挨到十點幾同呢位高人聚聚。不過雖然高人難遇，全晚我都冇講野，因為對住佢我淨係識不斷重覆一句：
"wo3 bu4 dong3 de5 shou1 pu3 tong1 hua4"
聽佢講唐朝個結他手老五又名劉義軍（劉義君呀劉義君唉）練分腦練到昏腦。「分腦」即係用一支結他同時負責節奏同埋旋律，亦即係用一支結他去做應該兩支結他先做到既野，結果練成之後手結他係超掂，但係就搞到思維受創口齒不清。可能彈琴果ｄ人會笑「有冇咁容易傻呀？」你可以練下同時左手寫中文右手寫英文而兩隻手寫ｄ野係唔同意思，練完之後（你咁勁練得成的話）就會明分腦同昏腦係點。又北京ｄband友都好長頭髮。
「留咁長頭髮，佢地點搵工做呀？」
「所以佢地咪冇野做囉！」

22/12/2003 MON

今日一朝早返到學校。係聯歡會唔使上堂又唔食早餐（原因後有分曉）咁早返黎係為左寫聖誕卡。中學以來（應該話係小學以來）第一次寫聖誕卡。見呢間學校都算唔錯，雖然教到氣咳但係ｄ學生都好好玩好開心，噉就開齋寫聖誕卡比佢地啦。不過一班先送得一張咁大把，仲要教九班先送得三張，認真寒酸到爆。
不過其實再寫聖誕卡，係為左果個學生，另外果三班只係「順便」寫埋。可能你會話，
「戀童癖咩！大果個唔要你就搵個細既！」
咁關心呢個細路女，仲因為某ｄ原因，一ｄ同我關心果個女仔好相似之原因。對於佢（地），可以做幾多、幫幾多，我都會去做。

是日聖誕聯歡－應該話係聖誕狂歡至係，睇下我地組最正果個偵哥今日都變到失常就知。今日聯歡會我地係負責做競技比賽啦啦隊評判仲要做足全日，即係又冇得上班房痴野食，不過完全地冇唔開心喎因為．．．呵呵。話說今日我地口中之偵哥即係學生口中之王老師非常之唔開心，
「喂！玩左四級喇喎！跑第一級果幾班係咪你教架？」
「．．．唔係．．．」
「唔怪得啦！」
「．．．」
為左擺脫教親ｄ班都包之厄運，黎到五年級比賽果時，阿偵哥專誠恐嚇佢班學生：
「拿！陣間比賽醒醒定定拎個第一番黎呀！輸左就罰你地之後唔准上體育堂！贏左就獎你地之後唔使上體育堂！」
結果？總之班友唔使再上體育堂啦唉。
今日由朝到放學都冇得食唔緊要，因為是日全校放學之後有得食自助餐！嘩黎呢間學校實習真係好正呀嘆世界到爆之餘仲有一流過一流之膳食福利！最後仲要抽到獎忝我真係成世都未試過抽獎抽中我架！有得食有得玩有得拎好開心！不過．．．

玩完食完拎完自然要飛出舖頭做野。難得有阿珠姐黎探班。其實，傾左咁耐，你明嘛？算啦。唉。
雖然今日做冬，但係生意都算唔錯，又見臨近聖誕佳節就出一出糧慶祝。真係好耐未試過出糧，因為碟真係唔係太想買，反而想好似今晚噉係舖頭一邊焚一邊寫，因為舖頭對喇叭靚過我屋企果對好多焚得開心ｄ。同埋有得睇OPETH。

OPETH隻"Lamentation"，到而家都仍然只係睇玩靜歌之第一個鐘，行＆嘈到極之第二個鐘都係冇乜睇過亦唔多想睇，因為次次冇人果時睇／聽第一個鐘，自然會諗返好多野，一邊諗一邊聽就會好灰，會想喊，會喊。尤其是好似咁唏噓之今日。估唔到經過正正十個月加兩日，我會舊地重遊，只可惜經過呢大半年，已經換了人間。你可能覺得我係走火入魔或者好戇居，但係因為某ｄ原因，我會繼續噉樣落去，不論最後會係點，至於而家，只有無奈落去。所以"Lamentation"，仍然只會播第一個鐘。正如其名。

23/12/2003 TUE

今天，我都沒甚麼好說的了，正如妳那般。希望妳這一行玩得開心，能好好的放鬆自己休息一下。在每一天，我做的第一件事和最後一件事，都會是在這遙遠的彼方祈求，祝妳安好，願妳愉快。

劉義

25/12/2003 THU

「聖誕快樂。」

在那邊好嗎？希望妳能好好的休養放鬆一下吧。今年的聖誕，只得空白一片，但希望妳不會像我一樣，平淡地過這佳節。祝願妳在這一天裏的生活，繽紛、多采、多姿、平和、安康、幸福、快樂。

「聖誕快樂。」

劉義

26/12/2003 FRI

Metal Christmas & A Heady New Year

27/12/2003 SAT

矛．盾　盡

28/12/2003 SUN

BEATALLICA - A Garage Dayz Nite

30/12/2003 TUE

今年尾二一日，相信在場大部份人都係出街玩，或者留係屋企嘆。我就唔係。你今日係教院圖書館會見到有個傻仔一朝早就返到黎睇書搞電腦做到圖書館閂門。點解？
「Ed Proj個proposal又比阿Sir ban，得番兩個禮拜實習，可以唔理咩？」
知唔知最傻仔係乜？就係做左成日搵晒網同書打左ｄ野之後漏左個file係教院。即係做左成日結果都係冇做過野。所以，今日都係冇野好寫。

31/12/2003 WED

最後一日，頭三份一係band房過。琴晚收舖之後成班麻甩佬走左上香港某名band（DV）間band房玩通頂。套名鼓double bass＋tom X 5＋cymbal X N果然非同凡響，不過太勁喇實在我呢ｄ傻仔都係唔會識點打呵呵。雖然ｄ器材係正但係全晚都冇咩正式夾過，因為發現大家都冇咩歌識夾／夾到（下次我要"Fade To Black"唔該）。結果成晚唯一節目就係睇阿Rax哥手《串爆春夏》（咩黎？正呀呢野不過一切還待下回分解）。
對呢間band房之感覺，除左器材超強之外，就係「真係好頹廢。」呢一種頹廢，自問真係唔太接受到。如果第時我整band房，我一定要間野冇煙冇酒光光猛猛乾乾淨淨，唔係我寧願唔搞。

跟住三份一係睡房過。玩到五點幾先散仲要山長水遠由葵芬出番黎，當對腳抬高過四十五度都做唔到果陣，除左撻上床訓覺仲可以做到ｄ乜？
最後三份一，我都唔知點過。本來想做埋個ed proj，不過，算啦，到左今日，都冇咩心情做野。