今次真係通。六點幾先至訓。

廿年黎有三次臨開學之前一晚去人地屋企訓。第一次八號風球唔使返學，第二次搏佢係八號風球結果俾個九號過我又唔使返學。今次第三次，諗 住佢會黃雨轉紅雨。結果搏唔中都係要返。
有樣野好唔明，既然教院而家未係大學個校曆表同中小學一樣，點解人地「全日制學校」話唔使返，但係我教院仲要？

死喇，開學都未交學費．．．第一日已經俾咁Ｑ多功課過我，我唔交學費點對得住教院丫。

真係太耐未返過學喇．．．

三個內學成Visual Basic加寫好一個教學程式？咪仲勁過靈格風？
「因為凡事有夢想，先至會有嘗試。」
呢個夢好似發得太大喎。

到底Hal A傳說中之Band房幾時會搞掂？而家先至遞計劃書，等捶印都要等幾個月，即係又要下年啦。不過等到又點？會有人同我玩咩？

都唔知點解呢期ｄ翻版剩翻Game唔翻Software。Microsoft真係咁兇？行晒成個旺角都唔見Visual Basic，即係叫我又放棄IT啦？

A.I.，係唔錯。抵佢成場爆。

再行去兆萬睇睇，已經唔見左阿Andy哥。再去搵佢間所謂魔術協會，兜極都唔多覺有。唔通呢趟真係撞仙？

晨咁早出教院，為乜？原來係為請食雞同睇《魁男》。足足餓左成兩個月，用成三粒鐘黎刨晒 六本，睇完之後點都要嗌番句：
「灰呀！」
知唔知「如履薄冰」、「龍爭虎鬥」同「梁山泊」出處？想知就睇《魁男》啦！

「呼之則來，揮之則去。自願上釣，無怨無悔。」
由教院出旺角再過美孚幫校花搞掂部機之後只有呢四句說話。
佛爺，我都明「朋友」呢樣野有時真係好煩又俾人濫用。都係一句：「冇計啦。」順便贈多句：「祝你蜜運成功啦。」

大佬，咁好興致打黎。好耐冇「見」。係呀，呢排香港真係好多人跳樓。又係呢句：「冇計啦。」

GS都幾好野喎，上堂五分鐘之後開始每分鐘罰一蚊？如果係咁計今日你班友都剩袋十五啦。呢個世界唔係人人都住Hal架小朋友。明知我一定會 不斷遲到都搵我做財政，好諷刺喎。

幾大呀妳班姐姐仔？都唔知做乜諗野諗到成個小學生咁。同個女仔一組就係對人有意思？好在唔係同你地一組。

「呢度有冇人唔知咩係HTML？」「唔係呀？HTML都唔識？」
唔係呀？HTML幾時變左做Secondary Language呀？
「PowerPoint就係咁樣加音效，（碎玻璃）首先揀一幅圖，（碎玻璃）再揀 『自訂動畫』，（碎玻璃）選完動畫效果之後再揀聲音，（碎玻璃）咁就得喇。（碎玻璃） 」
知你識用PowerPoint識得整動畫加聲喇，來來去去淨係玩得同一板野又要不斷Replay，每三秒就碎一次玻璃嘈生晒仲以為自己好很型。好在你坐最前見唔到後面ｄ人點怒啤你。
重話自己修IT，修得IT就應該知道大把人都識PowerPoint啦，大大聲話冇理由會有人唔識HTML，但係又要以為全場三十幾人得自己一個識 PowerPoint，唔係呀？難為我呢個PowerPointer要坐你隔離，想笑又唔笑得想串又唔串得。

教學IT應用，又係同CA教ｄ野一樣。睇黎呢一年最歎會係呢科。
葉傑權，繼方駿之後另一個必跟之人。估唔到呢個博士會咁後生喎。估唔到呢個博士會咁多水吹喎。

已經算早出門口啦，咁都俾我撞到抄車咁就塞一大輪遲成差唔多半個鐘。不過，好事黎丫。訓多半個鐘唔好咩。
「下次唔好再咁遲喇。你應該預番多ｄ時間，唔好再俾呢ｄ交通意外搞到遲到。」
都講到明「意外」，你會唔會早ｄ出門口就係因為怕人地抄車咁到大塞車？阿教授你都幾風趣。如果人地係抄車搞到封晒路擺到明唔放你走 拖到你遲到，就算你預早一個鐘出門口都冇用啦。

估唔到係教院都有街坊喎。住正屋企對面都唔知，證明我真係非常非常之識得人少。

「身兼十三職傑出教師不堪壓力跳樓亡。」
完全係悲劇啦。我身兼一職就一萬七千五，兼多十二職我都唔覺會多得幾多人工。所以話做教師無謂咁搏丫，我肯搏的話分分鐘做多人十幾倍， 但係做又萬七五唔做又萬七五，都唔知搏黎做乜。為理想？為理想咪會好似呢位仁兄咁囉。呢個世界唔係「知才善用」而係「知才濫用」呀。所以 你班人唔好成日話教師唔做野喇。呢個係社會既錯。

快。前所未有咁快。十二點半落堂，十二點十已經食飽飯冇野做。

點解成個會之中個樣最唔似做得野個人居然會係主席？呢劑係教父定係垂簾聽政？

估唔到個所謂英文增潤原來只不過係吹吹水寫下野玩下遊戲。咁又一堂。

三架飛機撞世貿同五角，乜咁大件事呀。十足十睇戲咁，不過呢套戲個結果係奸角成功主角失敗。咁搞法真係遲早打仗。幾時開打我就唔知， 我淨係知搞到今晚成晚報新聞冇得睇David Letterman。結果係淨係睇新聞都睇通頂。

12/9/2001 WED

兩點鐘返到學校，四點鐘就閃，今日返教院主要目的又係送外賣。真係唔知返黎做乜，留係屋企Dayoff好過。

「Ｘ，淨係講美國，乜Ｘ香港新聞都冇得睇。」
今日ｄ人好躁。不過美國咁大件事，有邊間傳媒會唔做丫？

今晚七點半無線個《恐怖大襲擊》雖然個名係咩ｄ，毫無疑問做得非常非常之好，個主持又好掂，好耐都冇睇過ｄ咁高水準之新聞節目。好過 隔黎何守信加張立講時評幾十倍。不過咁又係唔係值得高興？
既然都做左呢個新聞特輯，點解跟住《全線大搜查》又講多次咁多餘？原因好簡單，因為ｄ師奶一定唔會鍾意睇，但係如果係《全線大搜查》 做的話，班師奶就一定會睇。其實ｄ料一樣只不過主持唔同，我地就睇《恐怖大襲擊》，師奶就睇《大搜查》，所有觀眾一網打盡，無線好野。

美國ｄ人咁很慘，中東ｄ人就觀晒呼慶晒祝，吹脹。中國人都話美國抵死，不過我覺得ｄPoint又的確係講中晒。

「ITS有人俾蜈蚣咬傷入院」
聽完之後，真係唔知驚好定係笑好．．．

今日主要功課：一晚內睇晒兩篇Journal加睇兩本書準備聽日個Present。淨係印Journal都用左成四十幾銀二百幾張紙，好明顯教院係鼓勵各位 準教師千祈唔好環保。

「布殊勢擒拉登」
點睇都唔明，我中文真係差．．．

蘋果日報世貿中心事件十八版特集，係做得唔錯，但係最唔明點解擺埋Nostradamus篇預言入去仲要講到似層層。危言聳聽定贈慶呀？

尋晚搞一大輪，結果英文堂乜都唔使做。早知尋晚唔咁搏啦。有時都幾慚愧，見到May姐咁勤力又做晒所有野，但係我淨係做監工又乜都唔理。

開打喇。真係俾Nostradamus卜中？

「Microsoft Flight Simulator俾恐怖分子拎黎練習飛行。」
好出奇咩？美國特種部隊都拎大把戰略同模擬Game訓練啦，仲同遊戲開發公司簽晒約合晒作忝。咁樣你又唔鬧，但係恐怖分子咁做就嘈？如果 Delta Force成功平定呢次危機，然後同傳媒講：「全靠Rainbow 6！」咁你班衛道之士又會邊講？
因為呢次慘劇，好多Game － 尤其是戰爭遊戲 － 都延期推出、暫停電視廣告或者抽走世貿中心一帶景物。但係最重要一隻： Red Alert 居然照原定計劃九月尾發行。呢隻Game個故事係蘇聯入侵美國，美國受到蘇聯大舉襲擊，多個美國城市同著名建築物都成為廢墟， 傷亡慘重．．．

劉以達隻《水底樂園？》個碟評真係非常非常之極端。除左見到《壹周刊》俾四粒星之外，其他全部都唔會超過兩粒星仲要彈到超廢，Sina俾得 一粒星之餘仲要講到「不值一提」。所有負面碟評之作者都犯左一個好嚴重之毛病：用聽流行曲之心態去聽呢隻另類碟。你諗住呢隻碟會好似陳冠希 同張柏芝ｄ歌咁Pop的話就死得啦。

星期六堂完全係雞肋，八點半返十點半走得，見到咁仲要加埋星期六就唔多想上啦，但係偏偏就係唔上唔得。死喇，第二個禮拜已經走堂，跟住 十幾個星期淨番一個Quota點挨？對我呢ｄ逢星期六就訓到天昏地暗之「星期六沉睡症侯群」黎講，星期六返八點半簡直係地獄。又要再讚一讚編時間 表條友。

都成大半個星期冇拎起過個結他。求其拎上手即刻覺得自己「識彈」，而唔係好似以前死練難練咁只係覺得「彈到」。所以話做事「要隨意，莫刻意」。

都好耐冇黎上海。啤啤仔，咁難得請日假出黎搵我同探花食飯呀。
都冇幾可試過食到咁滯，冇幾可有咁多水吹，冇幾可由尖沙咀行番紅磡。太多冇幾可喇。不過都冇幾可可以再有咁多冇幾可囉。

教院好很多野做、好很多堂、好很少假。好很慘。
「這就是教院。」
冇錯，探花兄。一語道破。

Sam少， 漢 ，估唔到你地同我共患難一齊唔上中文。好兄弟！
「８３４三賤人，三位一體！」

　U2: "ALL THAT YOU CAN'T LEAVE BEHIND"
U2，不愧為提倡人權與和平之樂隊。真係好耐未聽過ｄ碟好似呢隻咁有意思，唔係再一味情歌咁悶咁普通。有首歌仲係為昂山素姬而作。全 隻碟最差一隻可能係"Tomb Raider"隻主題曲"Elevation"，因為根本同其他歌唔同Feel．．．
　"This album is all that you can't leave behind."

《亞洲青年音樂大賞》，點解最後四強冇個似青年？不過毫無疑問彈手風琴個越南女人係非常之強。唔得，我都要練好手古典結他去參賽。不過 當我得道之時相信都已經超齡囉。

土瓜灣 ＞ 旺角 ＞ 美孚 ＞ 紅磡　今日都幾充實

專誠出到美孚幫你整機執埋ｄ手尾，仲要一面做一面俾你嘈，一完工又即刻趕人走，阿花姐你到底知唔知我係上你門黎幫你整機？唔收人工倒貼 車錢飯錢加牛力仲要俾你鬧住黎做，我呢ｄ廉價勞工真係夠晒Cheap。

．．．嘩，開學以黎，都好似未試過係真真正正去機舖打機囉．．．

足足俾校花煩左成半個鐘問點樣將人加入Invisible List，仲要學極都搞唔掂。本來都想再講多次佢係完完全全電腦白癡，但係校花又用半個鐘千 叮萬囑叫我唔好再係我個空披廚度叫佢呢個名，咁好啦，算。
「花姐，對唔住，我唔應該再叫你電腦白癡，雖然呢個係事實，但係做人唔應該咁坦白，就好似畫公仔唔需要畫出腸咁，係咪？」

乜咁大整古呀 漢 哥，買桶雞返黎三條友分又甩底唔黎食，兩條友分十四件雞加其他雜碎，即係叫我九月唔使再食雞啦。

「有冇人聽過布魯姆Bloom？」
「冇呀Miss我淨係聽過刁老母Dloom。」

再一次證明上年吳本韓真係好歧視我地組水火箭，人地一支火箭加VCD就A，我地四支火箭加VCD就得條B，好明顯係性別歧視 － 歧視我地組係 六組入面惟一一組全部麻甩佬一條女都冇。

娘親：「世界真細小矣。」
完全係啦娘親，又點會估到阿Fanny姐又會同我地家有關連。真係你一講有親戚去飲撞到有個姓希讀教院Year 2我就知乜事。

唉，Late Show都唔知幾時先知再有得做．．．

IT越黎越不知所謂，阿Sir係咁講但係又冇得做，都唔知聽黎做乜。呢個「三個月學成Programming」之春秋大夢都唔知點收科。

用電飯煲煮意粉你試過未？結果係難食到仆仲要搞到一男一女食完之後要屙到仆。

「呢幾日唔係咁多野要做，想搵野做又搵唔到，都冇乜意義。」
係呀，係教院ｄ「意義」係會突然間一大堆咁衝出黎搵你架，而且永遠都係你最唔想佢地出現之時先會出黎，你想有意義的話只可遇不可求。

教英文個鬼妹都話其實David Letterman係好難聽得明，你信唔信？

亞視《世紀第一戰》，點解又係何守信．．．係做得唔錯，但係唔知點解個女旁述可以有咁多懶音讀錯咁多字仲要對住份稿都可以講錯野。

有史以黎最少笑聲之一場Late Show。可能係David Letterman做咁耐Show以黎第一次咁嚴肅。

「今次英文增潤入學測試唔係拎黎計分，而係用黎評估你地係增潤前同增潤後之．．．」
「運氣。」
五分鐘之內一面做Listening一面做一百條MC你試過未？跟住又十五分鐘內做一百條Grammar MC。根本就唔計分，即係考人運氣啦。

原來全教院最先進之地方居然連印膠片咁簡單都做唔到，反而去到中文中心就三十秒唔使搞掂仲人專人從旁指導幫你做。
「教學資訊科技部呀呵？」

C-CANｄ飯真係．．．唔好提。芝士龍利焗飯，成碗飯惟一入到口係芝士呀陰功．．．好在晏晝去Pizza Hut一餐下午茶補番晒，兩條友食一個細 批一個小食加兩杯特飲每人三十，算係咁啦。不過講真除左下午茶之外Pizza Hut又真係貴到冇野講．．．

　今日《蘋果日報》有關 "Late Show with David Letterman" 之剪報
今晚吳君如同杜文澤集《嘩嘩嘩打到黎》又有講呢集劫後第一集Late Show。吳君如話David Letterman係一個非常之成功同幽默之主持人，因 為佢可以苦中作樂係呢件大災難之中諗到Gag位出黎。冇錯，苦中作樂．．．

居然會用成個鐘搵Sam少黎練好普通話，都算係開學以黎最有意義一次。Sam少，煩左你成粒鐘難得你又肯同我地癲，請食飯又點話．．．不過 除左做左呢樣野之外成個晏晝就淨係對住部Game Boy Advance係咁煲Final Fight One。咦聽日英文好似要做小組Present喎，稿都未度又未同人夾過， 仆得啦．．．

從今以後， 灰色軌跡 就成為８３３房歌。

Late Show終於都開始笑番下，Jay Leno都開番Show喇，不過幾時先至會變番以前咁？

今日英文Present果然仆得好慘，兩分半鐘就搞掂晒成個五分鐘報告，又俾佢突然問問題陰死我地冇準備，完全係死得。不過我都承認我地組係 八組之中最差之其中一組。博迪學我都冇計啦，之前綵排的確係完美只不過你睇唔到。呢個係宿命，我做野永遠都係要好隨意咁做先做到，你叫我專 登做係永遠都唔會達到最高水準。

死啦只不過係兩三日，已經俾我練到Final Fight隨隨便便都可以一舖爆機，睇黎以後係教院除左上堂之外就會係對住部Game Boy。睇黎又係宿命， 呢世人除左打機之外都冇乜邊飯掂囉。

基本上個「教學IT應用」上堂只不過係為簽到，根本乜都識晒，連阿Sir都叫我走堂好過，死未？

上網見到，係幾好笑．．．
　
　19歲o個年新年人日帶個friend(佢17歲)入過機鋪
　本來雙打緊1945
　點知畀條差佬竇
　差佬:你17歲咋喎
　friend:今日係人日喎
　差佬:人你老母
　我個friend畀趕走
　佢o係機鋪出面睇我打1945

好笑，不過有一個問題：乜成人機舖唔係十六歲就入得咩？

過左英文Present之後即刻好頹，不過好似要玩成個鐘個大Present就黎到囉喎．．．

近來ICQ最HIT話題：
開Word ＞ 打Q33NY ＞ 放大字體 ＞ 轉Wingdings字型 ＞ 好很驚
係真係假？自己去 呢度 睇睇．．．

睇番以前ｄ相，諗番好多野。原來三年前之九一一我地．．．仲有．．．成個人都好沉．．．
踏著灰色的軌跡．．．
Janet姐，多謝你，係教院都冇咩人會為我呢ｄ人粗心同付出囉．．．

「課堂教學語言」呢個Module的確係正，完全係可以活學活用學以致用。
例句：Ｘ你老母　將重音同延長放係唔同字之上
Ｘ∼你老母　重音係「Ｘ」呢個字，即係話俾人知你係度小緊人　處境：打街霸就黎打爆機之時俾人挑機
Ｘ你∼老母　重音係「你」，即係話俾你想小條友知你係非常之想小佢　處境：贏左挑機條友一Round Perfect之後對住佢高舉中指大大聲咁講
Ｘ你老∼母　重音係「老」，我地想抒發一下時就會咁講　處境：俾條友贏番你一Round
Ｘ你老∼母∼∼　重音係「母」，同時會係讀「母」之前拖長小小個「老」字，都係抒發用但就去得更盡。通常會係最後加番個 「丫」，即係「Ｘ你老∼母∼∼丫」　處境：最後一Round俾人地Perfect贏左

又會上上下堂燒電機房，全教院Server同冷氣都一齊壞又搞到成校警鐘猛響，好丫，咁就走火警可以早走半個鐘。
冇野做，跟左村友去學生會影印，點知架消防車就正停係門口，班消防員立即佈陣駁喉，ｄ地盤佬又拆走晒學生會門口裝修ｄ棚架。死喇，唔通 係我地被困？跟住有個消防員拎住把斧頭劈Ｑ爆晒學生會度門ｄ玻璃同我地講：「唔使驚！等我黎救你地！好快就可以拆左度門，你地好快就可以 脫困！」企係門口隔離既我就上前推開度門同佢講：「度門冇鎖架阿Sir。」

又話救完火就返班房繼續上堂，點解我地三條友去到坐到正常落堂時間都係一條友都冇連歐婉儀都唔黎？身為教授放我地飛機都算，但係點解我 一完堂即刻落大埔會俾我見到你會出現係市中心行街？又可以學以致用：
「歐婉儀，你－好－－野∼∼！」　呢句說話表達出講者俾人放飛機之後之憤怒同輕蔑
歐婉儀，你一個鐘前教我ｄ野我即刻可以之應用番，你有我呢個學生係咪應該感到自豪呢？

今日食左個麥記雞餐：　雞腿飽餐 ＋ 雞柳餐 ＋ 麥樂雞 ＋ 雞翼　係爭麥香雞未有
咁就七條。食完之後只有一個問題：
「橫掂都係食雞，點解唔加多兩條去雞記買一桶？」
「型ｄ嘛！」

「．．．你唔好教我ｄ普通話拼音喇，如果唔係用粗口同埋淫野黎記的話我係唔會有興趣學．．．」
點解呢個世界ｄ人咁犯賤？

今日最大成就：又爆多兩次Final Fight，做孖寶兄弟過關顧問兼技術支援，瘟女顧問同埋好神奇咁睇晒一遍Journal加查晒字典寫晒Foot Note。我有時都唔多信。

當事人都不解之迷：點解一個讀書有成成績優異身兼數職月入半萬之女仔會鍾意一個乜都唔做加唔識做淨係曉一日訓十二個鐘煲煙爆粗睇咸碟之人。
另一個除左當事人之外所有人都不解之迷：拍左拖一個月都冇，使唔使買對二千八情侶錶加卜定下年酒店房睇煙花呀？

大埔豆漿大王，雖然成間野由豆漿到其他野都完全冇可能同個名有任何關係，雖然完全唔明點解會又有車仔麵又有中西小食又有西飯賣，雖然唔 知點解車仔麵可以係中西合壁中法煮麵西法整送，但係又真係完全抵食夾好食仲要ｄ老闆同ｄ客勁多水吹。真係黎食多幾次同佢地熟左之後就可以成 日黎發癲。

可以好準時返到八點半堂，又打過幾舖機，食到好多新野，好多水吹，逛左好多街，做多好多本來都唔會做之野，又係完美的一天。不過到底仲 有幾多「完美的一天」之Quota可以用？淨係今個星期已經用左兩個囉喎，聽日又．．．

呢個星期真係用得太多精神加太灰喇，居然一訓就訓到十二點，咁就走左堂結他。

講左成年，終於都北上喇。除左我地仲有最少三幫教院人上左黎逛書城，點解ｄ人可以咁好學？
書城，失望得個大字，係書多但係有用書唔多，簡體字都算啦又鬼死咁亂鬼死咁迫加冇人幫你搵，結果係無無聊聊兜左三個幾鐘，唱成四舊人民 幣結果只係用左剛剛好一舊黎打機食野搭車加買左隻播唔到之ＣＤ。不過深圳又真係幾好行，搭的士每次跳錶平香港的士六成，真係三條友每人一架 的士鬥快兜晒成個深圳都得。食野又係超平，書城入面兩蚊一個飽加兩蚊一杯豆漿五蚊都唔使咁就一餐，街邊仲平三蚊兩杯珍珠奶茶。當然，一分錢 一分貨，你敢唔敢食丫．．．

死啦，上到書城都一本書都買唔到，黎緊ｄ論文點寫？點解硬係唔可以俾我吹晒水算數呢？橫掂你地都知我讀唔到書死剩把口．．．

Sam少，既然你真係咁肯投資落璇子度，咁你兄弟我就幫你一把做下資料搜集啦。

香港旋轉餐廳一共有四間：
第一間　上環喜來登
就係呢間年尾執呀，你應該係搵緊呢間
第二間　佐敦胡社生行
同你諗一樣佐敦的確係有一間，不過已經執左喇
第三間　山頂
係有，不過而家好似話唔再轉囉
第四間　海洋公園
相信由下年開始會係香港碩果僅存之一間旋轉餐廳

係深圳食野真係咁危險？乜解究一起身就係咁係咁去屙呀，咁就走一日堂．．．好事黎丫，俾多日我做功課。

「 思 覺 失 調 」 是 一 種 可 能 發 生 於 一 些 人 身 上 的 不 正 常 精 神 狀 態 ， 處 於 「 思 覺 失 調 」 失 調 狀 態 人 士 的 思 維 、 情 感 及 感 覺 會 與 現 實 脫 離 ， 並 會 出 現 思 想 及 言 語 紊 亂 、 妄 想 被 人 監 視 或 迫 害 ， 及 出 現 看 到 不 存 在 的 事 物 或 聽 到 有 聲 音 對 他 們 說 話 等 幻 覺 ， 可 說 是 精 神 病 患 者 的 早 期 狀 態 。

九點鐘起身，準備返學。點知有個教授打電話黎。
「喂，今日Lunch Time我要去搞個座談會呀，本來約左你地但係而家唔得喇，你地唔好黎搵我喇下次再約啦．．．」
「掂啦。」
跟住即刻訓番低訓到十一點幾。咦個電話好似淨係話Lunch Time唔使去Con咋喎唔係話連堂都唔使上．．．

Problem 2你真係一個大Problem，都唔知投資左幾多精神時間落你度囉。今日Dayoff都專登番黎搞你，點解？點解人地大學可以咁嘆？

「我決定，今晚留係電腦房做功課睇論文做通宵！」
係呀，結果都係通宵，不過係偷渡上左８３３通。睇定九點鐘看更換更空檔即刻潛入，仲要行樓梯上樓以防閉路電視睇到，有時我都因為自己 做親非法野都做得咁專業而感到自豪。

仲話一晚搞掂個普通話錄音，結果你班友又係出去瘟女瘟到三更半夜返黎就訓，稿都度唔到，點算？

諗定晒步法陣式對白黎迷惑個看更令佢覺得我係剛剛入黎而唔係屈左一晚蛇，點知落到樓原來個看更剛剛去左第二度。又會咁完美？好少可喎。 不過今晚廢事煩喇，今次俾五條你地賺啦。

Problem 2又見Problem 2。本來半個鐘之Con可以變成一個鐘，因為Peter仔聽完我地個計劃之後發晒癲咁係咁幫我地諗野，結果成個Present 無端端俾佢講多左幾個Activity出黎。喂阿Sir好似係我地Present喎點解你搞到好似係做個Game Show俾你自己玩咁？

今晚工作係幫Sam少砌好部機。淨係九月都洗左成萬，Sam少真係值得尊敬。不過真係老囉，原來而家ｄ電腦野同我個年代相差幾多下，不過 既然人地執晒ｄ手尾我就廢事馬後砲啦。

點幾砌完機，再搞到三四點，終於都搞掂四個鐘頭之後就係死線之普通話錄音。講讀音同聲調就兩條友頹鬥頹一定仆得，但係講劇本的話我地一定 會係全級最嚴謹最有創意之一組。不過我地ｄ創作通常ｄ教授都唔識欣賞只會肥我地算數，節哀順變。

訓到呆滯，今日見親人都只有一句對白：
「今日訓到天昏地暗．．．」
一次過走晒成日所有堂黎訓覺，一訓就訓成十幾個鐘，係夠爽。尋晚係得Hal訓都唔去上八點半堂，真係好野。
「走堂黎訓覺係特別有滿足感。」
係呀，不過跟住就會好有危機感喇。得番一個Quota，點挨到年尾？

真係由尋日五點幾開始就留係８３３留到今日七點幾，仲要落到樓下又係冇管理員睇場。完全冇人上黎話過晒鐘要趕我走。真係我唔落樓的話就 訓番一年半載都冇人會知有人會理完全唔會有問題。

乜ME同98可以相差咁多咁遠？都叫你裝98算啦Sam少．．．呢次唔係我陰你呀係個ME陰我．．．

由晏晝五點開始，失去知覺．．．

四點，終於起身。乜原來而家係星期日。我尋日做過ｄ乜？今次訓左廿幾個鐘仲天昏地暗過之前幾日。

星期日，咁又點？Problem 2又見Problem 2，今日同聽日兩日之內要睇四五篇論文幫Partner修改PowerPoint同埋打好Present Handout。咦好 似星期四又要交GS個R1星期六又要交中文錄音。又係一句：
「點解？點解人地大學可以咁嘆？」

有假放．．．咩？你地點慶國慶中秋？出街蒲？狂打機？訓成日？我就係睇論文諗Handout猛度稿忙到嘔．．．同一句說話講兩次已經好足夠。

兩點鐘起到身，都算早囉。尋晚就做到五點幾，今晚又會點？

放假，又如何？咪又係返教院？教院是我家．．．上年每星期平均用一舊放學之後去打機，但係今年就係每星期平均用一舊留係教院做功課， 租房下年會點？．．．
「灰呀！」

「放心！雖然我俾人抄左，都唔會掉低我班學生！班長！即刻同我度期補課！」
「拿！而家我教精你地呀！第時做左先生呢就記住入教協，每年六條野咋嘛，有乜事都有人同你撐。六條野就有人同你頂，幾抵呀！」
．．．呢ｄ先係教授！

做。只有做。除了做。還是做。

八點半Assembly，例牌唔去啦，有覺訓仲唔訓咩。Sam少九點鐘彈起身，即刻兩個字內換衫著鞋執行李飛落樓，全場人見佢遲到半個鐘都仆到去 都非常之尊敬佢。點知到晏晝返黎問番朝早Assembly講ｄ乜，「咩呀！我去開工咋！」．．．冇野講囉。Sam少，我地信錯左你。

又一早就飛出去做Problem 2。唉．．．好在係搭May姐。有May姐唔使驚！

咦？點解我去教育學院個學生餐廳買野食，佢會俾個「科技大學教職員餐廳」盒過我？科技大學幾時做左我地附屬校？定係其實我地係附屬佢地？

上年六組水火箭之中已經知道有三組係拎Ａ，剩番兩組都廢事問．．．點解我地每人捶成兩舊幾飲十幾樽汽水整成四支火箭仲要幫其他組探晒路格晒價計埋洗最多錢 做最多野最勞心勞力，結果都係得條Ｂ？
「係！我地死！因為得我地組冇女！吳本韓！我地一定會去平機會投訴你性別歧視！」
我地做生做死得Ｂ，點知七哥做半鐘搞掂有Ａ，冇野講。冇女真係咁折墮？

「喂！知唔知我同劉茂法係咩關係？得閒就問下佢啦！」
「放心！我今晚就見到佢！」
點都唔會估到係教院入邊會有人無端端走過黎咁同我講，更加無可能會估到原來我個大學同學係我個中學同學個小學同學．．．

黎啦．．．是禍躲不過．．．做到六點幾，扯到個腦行晒想訓都訓唔到，七點幾訓八點幾起身又仆落去做Rehearsal，十點半上堂十二點半放又 要即刻去搞班房最後綵排。真係好似從來都未試過做功課做到咁勞心勞力．．．不過點支力都唔緊要，Rehearsal點差都唔緊要，黎料之時掂就最緊要。 同Major個評價簡直係差天共地！當然仲有一句：
「有May姐唔使驚！」

 　　　Problem 2  Major vs Minor　0:1

"Everyone has his own beliefs, but to do it is another question. You and me believe that the optimum daily sleeping hour is eight hours. But none of us really sleep for that long last night! Why?"
你話呢Peter仔？你呢個罪魁禍首搞到我呢三日夾埋都訓唔夠八個鐘仲好意思問？
做完個Present之後再一次證明我係教院永遠都只會係一個路人。榮耀永遠都唔會歸於我。

佛爺，真係提少句都唔得。提得你出黎食飯，又唔記得帶隻Visual Basic出黎。好在唔係剩係提你帶隻VB俾我，如果唔係你就會係屋企拎住隻VB 行黎行去諗到底應該做ｄ乜．．．
「我尋晚做到今朝七點幾訓八點幾起身跟住Rehearsal再上堂再Rehearsal然後Present．．．」
「我今朝十點半起身之後打機點半返學校上一堂之後鋤弟鋤到出黎食飯．．．」
唉．．．教院．．．點解可以咁忙？

忙左咁多日訓得咁少，咁難得返到屋企，唔知喇，訓啦．．．

呢堂普通話堂相信都會係我係教院入面最充實之一堂。真係Miss永遠都會記得我。由今堂開始每一堂班長都會俾Miss委派黎同我做私人補習。
「Hua1 Ya ！Siao2 La3 Ba1！」
新種語言：　廣東英文 = Chinglish　普通廣東話 = Putonese　普通廣東英文 = Chinglishua

唉．．．點解同一個Present可以分開兩個人獨立咁做連PowerPoint都可以一人一個？不予置評．．．

 　　　Problem 2  Major vs Minor　1:1

得啦 漢 ，同你做相同題目但係相比之下咁水準低咁多，明幫你拉Curve啦．．．

人地一分鐘打五十個中文字佢一分鐘打四十個中文字
佢：「嗯，呢個速度都唔算係好快丫，再快ｄ都有。」
人地一分鐘打三十八個字佢一分鐘打四十個字
佢：「三十八個字？慢ｄ喎！我都一分鐘都打四十個啦哈哈哈．．．」
佢打十個字錯兩個字
佢：「唉，唔奇丫，打錯字呢ｄ野就實會架啦，尤其是打得快既時候，呢個情況好正常純粹係因為意外．．．」
人地打二十個字錯兩個字
佢：「嘿！唔係卦？咁都打錯？咁渣架你？」
結論：呢個世界真係好多神鬼雜種。

佛爺，對你我真係冇野好講，由出九龍城食飯變到我樓下飲杯野，我已經遲但係你可以仲遲遲到要我幫你買埋野等你，你想我講乜？真係粗口都講到悶．．．

今堂中文教朗讀講故事？強項丫。粵劇又得話劇又得歌劇都得，歐婉儀你仲想挑戰我ｄ乜？乜你唔知我原本係諗住入演藝學院？雖然最後都係入 學院，不過係教育學院，咁就．．．唉．．．

咦珠算協會，乜你地仲記得我咩？突然有工開，你地唔夠人咋卦？做助教仲以為好嘆，點知原來要一個人走兩班，水平走兩個班房垂直走三層樓 又要同班家長講晒數，仲要做三個鐘但係得兩個鐘人工，睇番正教企定定嗌幾個鐘就袋多我一倍人工，唔得呀會長我想快ｄ轉做正教做多兩堂助教算數．．．

深圳又見深圳。七、八年未上過深圳，但係而家唔夠一個月就上兩次。今次終於有書買。「上書城買書，好有文化氣息喎。」人地就買周作人、 魯迅、「普通話國家級考核水平」，我就買「科學小實驗」、「腦筋急轉彎」，咁算唔算有「文化氣息」？不過目標之蓆同鋁公事包仲未入手，下回 仍需努力．．．

死呀！一定係係大陸得罪人俾人落降！點解兩次都係北上完之後第二日就返唔到學？上次就屙到仆，今次就兩點幾起身都夠膽死！真係連續兩個 星期一都冇上堂，咁就用晒ｄQuota！十月咋喎點挨到年尾！呢鍋真係仆街！睇黎呢個陰影會令我今年都唔敢再上深圳！為左表示哀悼，今日收皮一天．．．

「喂！好Ｑ悶！有咩做！ **叮** This "Q" is used for emphasis in this sentence e.g. I am very Q bored.」
「咁得閒，落Ｄ囉！ **叮** This "D" equals to disco in English, and so 落Ｄ means going to disco.」
「但係我想唱Ｋ喎！ **叮** In this case, the "K" means karaoke or karaoke box.」
唔係玩野，呢個的而且確係Major英文人介紹港式Chinglish之Presentation個劇本。最正係個鬼佬居然非常之受。我已經決定左搞大佢再收入我份英文Portfolio之中。

青瓜又會俾我撞到你．．．我知我係連走你兩堂你都唔使咁口黑面黑丫．．．
「Sor囉Miss。 **叮** "Sor", that's sorry. And the meaning of "Miss" is so obvious. So this sentence means "Sorry Miss".」

好明顯係受到聽日Dayoff影響，一上完朝早IT堂就竄上８３３睇漫畫訓教走晒晏晝兩堂跟住再落去睇醫生。睇左六本《浪客行》加睇埋醫生出到 九龍城先至五點幾，好閒情逸緻咁遊蕩九龍城，行過邊檔好食又食番三兩味，去九場行兩行上雞記整客雞翼再走番去久違了成季之堅駿打幾舖機。好有閒日Feel。
「咁先係生活嘛。」

打喇。打啦。仲有幾多好日子可以過。
Amani。唔好再當佢係牌子喇，有幾多人仲記得或者知道呢首歌？Amani，送俾今日個世界。

你班友仔又話唱Ｋ？點解最後放我飛機？出到旺角十二點幾，你班友仔先話唔黎？唔出就早講啦，本來我唔出黎就可以去浸大參觀下人地間Band房．．． 探花兄，睇黎我都係同你無緣。夾band，等聖誕啦。

被放飛機轉左尖旺半日遊，係唔錯。估唔到我呢ｄ人去到HMV都可以挨到成兩個鐘。
Joe Satriani。世上最強結他手之一，人稱結他神之Steve Vai之師父。真係為睇佢個音樂會企係部電視側邊成個 鐘企到俾ｄ員工係隔離嘴藐藐都抵。真係從來未見過有人手結他可以咁快咁強咁正，玩震臂拍線Scratching加Pedal玩到咁出神入化，仲可以一心二用 一邊起勢彈一邊吹口琴。最強就是最強。

　DSC 龍變
「．．．在香港這個只有偶像式崇拜的所謂樂壇，DSC是一個必須的另類聲音。」
冇錯，而家有邊間大唱片公司會簽呢ｄRock Band或者出呢種Instrumental CD？
DSC，強就係強，係唔錯！中樂Rock，完全係"Chinese Classic Party"，一個字：「正」！不過HMV又真係昆水，成隻碟得五隻歌廿零分鐘長 但係賣九十，即係每首歌每四分幾鐘十八蚊唔該。但係唔去HMV呢ｄ大舖又唔會搵到呢ｄ碟。行另類路真係咁辛苦要洗咁多錢？

今次主修英文個Present咁鬼掂連個鬼佬都可以讚到天上有地下無，我地副修班做到點都冇可能贏到啦。

 　　　Problem 2  Major vs Minor　2:1

"Oh baby, I can't find a site that can be so Hardcore, so XXX, so..."
哈Sam少，突然間璇子上黎玩你部機仲要摷番你之前睇ｄ鹹網出黎，連聲都出埋，仲唔斷正？
「阿Sam，估唔到你個人原來係咁鹹濕．．．」
璇子，Sam少點只係鹹濕咁簡單．．．
「咦，點解阿漢個櫃上面咁多煙盒？乜原來佢食煙架？」
「．．．哦．．．唔係．．．呢ｄ係朱古力黎，唔係煙．．．」
．．．嘩Sam少，你呢個藉口都假得離譜喎．．．就連當事人聽完之後都話牽強到爆．．．

死喇連隻孖寶兄弟我都拎上手就爆我而家係８３３仲有咩可以玩？

兩條麻甩佬可以用成半個鐘都開唔到一罐午餐肉。

草爺自澳洲來．．．
「肯返呢咩？點睇你都唔似係因為阿媽整親所以返黎。」

花姐，ICQ連唔到線咪連唔到囉，都唔使打電話搵我求救丫，你都知我幫唔到你，不過你又唔鍾意我係度講你呢個「絕對電腦白痴」，所以我都唔再講喇。

普通話堂，玩晒啦而家，堂堂都有新諗頭。Miss你叫我唱歌俾你聽嘛，我咪將成篇課文Rap俾你聽囉。三十秒鐘讀六十個字，你聽唔到與我無關喎。
"This is RAP."

原來我地英文Present係快過主修一堂。不過又係，人地成班咁多人，三四個人一組都分到成十組，我地兩三個人咁分分到盡都只係得八組，點會 唔快丫？

 　　　Problem 2  Major vs Minor　2:2

Dreamweaver果然係強，夠多野玩夠夢幻。套用探花兄一句：
「Dreamweaver　係夢冇錯」

聽日要交中文錄音，今晚專登留係教院做。「使唔使呀？」絕對要，我仲好慶幸自己咁做．．．
五點半落堂之後就上８３３訓，十一點起身打孖寶，十二點半話去度稿之Sam少帶住篇空稿上番黎接 漢 更ICQ， 漢 轉行電話瘟女，我就繼續打機， 三條友都等其他人開工之後再抄佢。一點，終於開工，但係三條友頹鬥頹，三點幾四點先度完。四點啦，倦喇，訓啦，錄音？聽朝先算啦。聽朝八點半仲要上堂。
冇錯，就係咁頹。留係教院係頹不過起碼會做，留係屋企都一定唔會做。有得揀咩？

又係走堂。似乎每一次係教院訓一晚之後之節目一定係走堂。十月就用晒星期六八點半堂之Quota，跟住有排挨。
十一點半，終於錄好音。十分鐘之錄音搞成十個鐘先至搞掂。頹成咁，年尾趕功課時都唔知點算。

「天上一日，凡間十年。」如果係咁計，即係樓上過左一分鐘，我地人間就過左六十一分鐘。
Sam少剛剛燒左一隻「天碟」。叫「天碟」唔係因為隻碟好勁，而係因為隻碟居然用左成足足三日七十二個鐘黎燒。以佢部神機之速度 應該半個字唔夠就燒好，但係而家居然用左成七十二個鐘先燒好，除左部機燒碟果陣用左「天時」黎計都諗唔到有咩原因。所以話，唔叫「天碟」點得？

你個珠算協會高層黎到俾家長小又點？我俾個普通話叔叔係咁嘈要用普通話同佢互講三個字咪又係咁？我一個人走兩班仲免費做多個鐘俾你地都 未出聲啦，你地度到死請多個助教都唔肯黎到又淨係坐係度冇野做俾人小兩句算得乜？
每星期賺百二，減番車錢二十，淨賺一百。不過都只係剛剛夠俾每星期之房租。灰。

終於睇到傳說中之浸大Band房，亦都明點解入親間房都會咁頹。不過迫狹左ｄ套鼓又殘左ｄ喎。都係時候買個Pick番黎練下喇。

點解每一次都係搵生搵死都搵唔到平貨迫住要出高價買心頭好之後，先至俾我發現原來仲有舖頭開價更低仲要低好多？又係宿命。

Gerund，權叔，臘腸，好耐冇見。相約在福星。
草爺，點睇你都係同以前一樣咁白痴。不過大佬又一而再再而三咁同我講你係成熟左，咁我惟有改口叫你做「成熟的白痴」囉。
九四一又見九四一。唔好玩我喇，今晚真係倦。

除了訓，還是訓。

部機可以每開四個字就自動停機半個鐘，次次都臨Save先至黎Hang，搞到成日開十幾次機都乜都做唔到，係時候搞搞部機喇。

十點幾起身，死，十點半要開會，死都要死番去。撞正屋企制水折墮到要摷勻全屋搵滾水刷牙我算，出到門口發現冇帶銀包都費事等人番黎開門 就咁用銀仔渡日都算，點解到我上左車行左大半之後你先至話俾我知原來個會改左期？

成個星期都冇咩功課交，星期三唱Ｋ，星期四打邊爐順便漏夜度埋稿星期五朝早普通話Present，係咪真係「完美的一週」呀？

　凌兆興語錄

「錯晒。所有人都錯晒。全世界都錯晒。其實而家成個地球有大半人都解錯左呢個燒蠟燭實驗。」

「路人甲問路人乙：『喂，邊解跑咁快呀？』『因為要追巴士囉。你又做咩跑咁快呀？』『因為肌肉收縮囉。』佢又冇講錯喎。你係吹佢唔脹喎。」

「我地以為自己好自由，但係其實乜都係俾因果律或者命定律所控制。人生就係咁無奈、荒謬。」

估唔到呢堂GS可以咁過癮咁哲學。兩年黎第一次覺得自己真係上緊堂。咁先係上堂嘛。呢ｄ先係教授嘛。

終於搵到Hang機原因。原來每次開親Media Player或者Internet Explorer三個字之內部機就會自動停工半個鐘。呢兩個Windows default programme 居然可以同部機Crash仲要Crash到停機咁嚴重？乜Windows可以有ｄ咁神奇既BUG？成為第一個「令到Windows俾自己ｄ程式Crash到開唔到機」 之人，睇黎我都可以繼Sam少「天碟」事件之後申請入建力士世界紀錄。