段記

祝妳愉快

22/5/2004 SAT

不用擔心，也不會擔心，雖然是這麼繁重和要緊的工作，但聰明的妳當然能應付得到，只是辛苦一點而已。早點完成它，好好休息一下吧！

劉義

23/5/2004 SUN

今日係廿三號星期日，聽日就係交final year project之大日子，專登請埋假唔去學鼓留番係屋企專心做好佢。不過，都係咩都做唔到。今次唔使我自己出手就可以乜都唔做，全靠呢位新房客。
睇下我仲可以琴日專登飛出去接隻野番屋企，琴晚隻野唔肯訓覺通屋躝就陪佢癲成晚，今日佢訓幾耐我訓幾耐結果四五點先有動機去郁下個身，相信你都會擔心呢條友畢唔到業（亦可能完全唔擔心，因為覺得呢條友畢唔到業係抵Ｘ死）。

24/5/2004 MON

好難得今晚隻狗今晚肯乖乖地訓覺唔周圍走，份ed proj終於可以開始（「我就唔信隻野唔訓你就唔做呀！」你話）。禮拜三做晒緒論同文獻加少少數問卷數據，禮拜五番圖書館寫多左百零個的的了了，前日同琴日唔使提，即係今日（晚？）要起好晒研究設計同結果討論＆總結建議＋附件巨量。禮拜三果晚做緒論同文獻回顧二千零字聽晒全線THE GATHERING（六隻）七點幾搞掂，今次做就聽晒全線KATATONIA（又係六隻）再加多三隻DARKANE（實在太愛佢地）先起好正文四千幾加附件四千幾九點先收得工，噢退步左忝唔開心！

九點搞掂食多幾塊餅撚多一陣狗就躝番教院，好在今日先撞到塞車噉就可以訓多幾個字哈哈。番到去發現，大家都好勤力喎！全電腦房真係冇幾多個唔係趕緊工之BEd人架！（想打）最後份report齊頭六十頁，不過正文其實得果十零頁係疊附件四十幾張懶係厚噉，又衰貪靚ｄ圖係要印彩色，結果印到print quota都冇晒要磅六條買多二百幾個再印。真係從未試過做功課做得咁豪呀。最後多謝叻姐贊助「千幾張都夠你攝！」之官方指定釘裝spiral bound乙個！今次唔好"Further Down the Spiral"就好（呢條友聽"Hurt"聽到傻左）。
好似，冇乜提過份野內容做成點？算啦，功課做成點對我冇咩意思，我地呢ｄ人，不嬲都係追隨教育署(R.I.P.)之極端學習新文化：

不是求學，不是求分數，而是求祈

做完，當然係飛番屋企訓番覺好。今次退步左做多左幾個鐘（．．．），所以點都要訓多幾個鐘補償番。不過點支力都好，想訓都唔代表有得訓，訓左一個鐘都冇已經俾老細摷醒落order做RAｄ野，唔係夾硬賴死唔做話遲幾日先算真係覺都唔使訓。再訓多陣又有緊急電話要彈起身接fax搞文件，搞完訓多少少又輪到另一個老細摷醒做野，跟住成晚又係搞文件搞文件搞文件．．．喂我唔係交左功課咩點解好似仲忙過前幾日？

忙到喊之餘，都有ｄ野笑下。首先，各「教育界」朋友請睇睇留言板178號果位行家之說話，相信會係某ｄ人之心聲。自從"further down the spiral"之後，好耐未試過好似噉有番ｄ「真」留言。跟住果ｄ呢，就音樂人先有關係（冇計，你真係好難搵到邊一刻劉義係同音樂無關）：

Eternal Combustion
Eternal Combustion is Seattle's most unique metal band
featuring the youngest front man in metal & rock music, 13 year-old vocalist Tipton.
Tipton and drummer Ron (dad), lead guitar Randy (uncle),
and bassist Carrie (mom) make up the rest of the band.
睇左段介紹，係咪好過癮？聽埋佢地ｄ歌，仲過癮。我真係未見過有人會噉樣寫一篇詳盡評論只為數衰佢點樣以5/100之低分勇奪"Crap of the Month"之名銜（記得睇埋下面ｄcomment，仲爆笑）。有興趣可以黎呢度download佢地ｄ歌試試，連video都有忝，不過自問唔夠勇氣去睇。一面聽佢地ｄ歌一面睇篇碟評，實在係是日一大快事。

25/5/2004 TUE

琴晚一做就做到今朝四點幾，加埋隻癲狗搞住五點幾先有得訓，但係訓得個零鐘又要彈起身開工－冇錯，係開工。晨咁早飛出紅磡同ｄ官僚打下招呼，八點幾就去到佢地寫字樓等到搭正九點開門，之後再用九個幾字同佢地執文件（冇錯又係文件，臨走果陣仲拎多成疊文件），係戇居架不過有ｄ野冇得唔做＆越早越好，冇計。

開完工都冇得訓，仲要番教院開會。十點半開會本來我十一點三先到已經衰，點知呀臘味哥仲可以「遲左起身跟住煮早餐食埋先番」真真正正遲上加遲。本來大家諗住約十點半開會就係諗住早ｄ開會減番午飯下午茶同其他無聊時間應該可以做多少少，結果又係齊人果陣已經係食飯時間唯有食埋晏先算，即係同以前一樣。
呢份野逢禮拜四比阿sir睇一次，亦係逢禮拜四比阿sir ban一次，即係基本上一個禮拜做一份功課。點做都比人ban，真係做得一次比一次頹。不過都好架喇今次四個幾鐘就砌到份野出黎（因為每星期一份工多藝熟？），可能因為大家趕住去食下午茶。係幾無謂，係幾支力，不過，係幾開心。哈哈～

番到屋企本身都諗住的起心肝做埋份功課佢，後日又要見阿Sir喎，點都要做下野啦。（潛台詞：「後日又要比佢ban多次喎，唔做野佢邊度有得ban丫。」）但係番到屋企冇耐又比老細急call飛出旺角傾野（其實係我想搵佢傾自己搵黎衰），咁難得今日又遇到久未露面之張大導，當然冇得唔蒲頭。張大導不愧為亞視首席名導（當然係我老吹，不過相信相差不太遠），不論是影是音都專業到暈，同佢吹完水，發覺自己真係太渺小。
出到旺角搵老細，又係搞文件。我終於明點解官僚咁Ｑ乞人憎。

26/5/2004 WED

紅假今日。結果真係放假訓十幾個鐘，本來有大量野要做例如（又係）搞文件、聽日見阿sir之功課、後日見老細之RA，結果到四點幾真正起身先趕好聽日份野少少。不過趕左陣又要停，因為五點幾又要飛出大角咀。出得黎呢頭當然要探一探我「母校」大天，真係探一探紅假仲要五點幾如果我話「嘩入到去萬幾條靚仔衝上黎成村先生等緊我校長仲以為我黎遞求職信忝」你就驚喇。

為左同阿冷哥夾番野，今日咁忙都飛出黎。幾耐冇真真正正入band房夾過？上次夾應該係同阿Rax慶祝要考AL果次，即係兩三個月前。夾成點，就算啦。技術上玩到囉，但係可能因為太耐冇玩又太忙太煩，硬係冇乜feel。

玩完，又係時候做功課。冇計啦聽朝要見阿Sir，合皮完冇得唔做啦。不過話就話做功課，結果又係成晚公務（搞文件．．．）兩三點先有得做四五點先有得訓。係好多時候我覺得而家比趕功課更加似趕功課。

27/5/2004 THU

晨咁早番到教院就係為左見一見阿Sir －真係見一見，半個鐘唔使已經走得人，又唔睇做過ｄ乜野喎早知琴晚就唔咁搏啦。可能噉樣番一番黎教院就係為左等齊人再飛番出銅鑼灣中央圖書館。都幾無聊架早知我走堂之後再跟番隊算。
知唔知今日中央發生咩事？冇錯，就係果個唔知咩招聘會！睇下我連發生咩事都唔清楚就知今日完全係跟隊襯熱鬧，個個都拎晒成疊cert加Ｎ份履歷而我相都冇張，黎到咪就係晒大半個鐘太陽排個幾鐘隊感受一下「搵工真係好辛苦」囉！其他人個個都幾份幾份噉交，係我一個行黎行去唔知做乜。可能聽日睇報紙就會見到我，一個全場搏晒命填表得佢一個係度「工？晨早搵到啦！搵工有幾難呀？」然後比人打之傻仔。
其實，我都唔係頹到噉，係呢個招聘會入邊，我有做好多野架。包括搞文件（．．．），同埋講電話（．．．．．．），總之係同招聘會無關但係又會係會場內進行（．．．．．．．．．）。又係四格電講到冇晒，又係官僚．．．
晒左一大輪又迫左一大輪，加上搞左一大輪文件＆講左Ｎ咁多個電話（．．．），當然要上KFC刷番餐好發洩一下（剛剛其他人先報左KFC，呵呵）。想當年「一人一桶」之光景不再，今次四個人一桶都食唔晒自己果份。不過唔緊要，食得開心就得。真係好開心！

「好耐未見過你噉樣寫段記！」
呢排好多人同我講，包括我自己。係，我自己睇番呢幾日段記都有點愕然，我都估唔到會寫得出呢ｄ野。係，呢幾日，真係好開心、好開心，好開心！哈哈！
不過，唉。有時都驚，唔知道仲可以開心幾耐。

28/5/2004 FRI

本來今朝一早要番工，點知老細一早打黎話晏晝先出現，噉我就當然唔會客氣直訓到底。但當訓得好開心之際又要番工，因為老細又打黎叫我飛出去做野。請自己諗諗此老細同彼老細邊個老細係邊個老細。
幾耐未試過食早餐？仲要係同老細食忝（佢住我附近咋嘛，唔係點會可以成日搵佢食乜食物）。冇辦法，太多野要兼顧，呢兩個禮拜唔開舖都要做外勤，好似今日，又上左上星期開始每日都上一次之高山劇場，搞文件（．．．）。點解？睇落去啦．．．

放左工，又番工，跟住要飛出大埔見另一個老細。其實都唔算係番工，只係之前幫佢就黎出本新書做校對－其實有咩好對丫，廿幾版入邊十幾版係我之前譯果堆野，我冇理由「以今日的我打倒昨日的我」卦？雖然都好樂意噉做，因為可以昆番ｄ人工呵呵～基本上番黎之目的就係覺得唔使兩個字就放工好戇居，唯有迫自己出HMV執下減價貨。點知一走立即超大雨仲掛埋雷暴警告，遮都冇把唯有番屋企。點知一上車，立即停雨喎！真係個天都叫我唔好買咁多碟！更吹脹就係，搭車果時一滴雨都冇，一落車就立即落番！明玩野！

華語金屬力量：六翼天使香港演唱會
Chinese Metal Power: Seraphim Live in Hong Kong
Headliner: 六翼天使 SERAPHIM http://www.magnum.com.tw/Seraphim
Opening Acts: MESSIAH, BLACKWINE http://www.blackwine.org

日期：9/7/2004 (Fri)
時間：7:30p.m.
地點：高山劇場（九龍紅磡高山道77號）
票價：$230（設劃位）
（門票不日於TRHK及城市電腦售票網公開發售。台前首十行座位門票由TRHK發行。）
主辦機構：Trinity Records Hong Kong http://www.trinityrecords.com.hk
查詢電話：98675737 劉Sir

好娘呀呵個名？我作架！哈哈！本來都唔想咁快公佈諗住出埋海報先，但係既然有單位踢爆，就順便講埋。基本上呢個月係Ed Proj＆功課、RA同呢場演唱會同時進行，我發覺每次到交功課果個月都係咁癲。所以，基本上我都唔想／使搵工，搞唔完呢場演唱會，我都唔會得閒做呢ｄ野。好大壓力架，唔係因為太多野做，唔係因為驚做唔切功課，唔係因為驚做唔到RA，而係一個人揹住成千條人命（樂觀的話），一唔覺意交少份文件遞遲左張form，就做得千古罪人。
各位朋友，今勻有冇得睇，除左睇我，仲睇你地造化。請多多捐獻。

29/5/2004 SAT

「跟住果三個月我唔再買碟！」
上次一野執左十幾隻之後我話。記唔記得你幾時？我唔記得喇，不過肯定唔夠一個月，因為我記得我今日上TRHK執左兩隻碟之後諗番起：
「丫乜呢三個月過得好似半個月咁快！」

既然呢三個月咁快就過左，回程（即係番工）就再上荷里活行番轉。摷摷下又比我摷到隻正野！當串串貢以為自己好Ｑ醒果時．．．Ｘ！

又，呢兩個禮拜第一日上黎舖頭，好有久別重逢之感。所以，又執多隻慶祝。
雖然失蹤左咁耐，但係似乎冇乜人掛住我。所以成日都冇乜人上黎。

原來我們這班metal7head都是恐怖份子。

30/5/2004 SUN

冇。今日冇咩事發生。係阿Davy哥一知個廣告出左立即打電話：
「個廣告我睇左喇！我係專登打黎Ｘ你架！」
唔係小「華語金屬力量」（仲未有人投訴），係小
「我地唔係咩咩『地下前衛金屬新力量』！好Ｑ多年架喇我地！」
「好似BLACKWINE叫我地『香港前衛金屬樂團』咪好囉！我地係少佢地『著名』兩個字遮！」

咦，唔係喎。呢單野琴日發生架喎。．．．冇。今日真係冇咩事發生。

31/5/2004 MON

今日就多事好多喇，紅磡高山＞土瓜灣恆生＞灣仔稅務大樓＞銅鑼灣皇室堡＞中環置地廣場。
紅磡高山
高山已經變左做我別墅，差唔多每日都會上黎坐一坐，好在我屋企行過黎四個字都唔使。上到黎，當然又係搞文件，真係長搞長有。不過我寧願繼續有得搞，七月以後仲長搞長有就最好呵呵。
土瓜灣恆生
走左過紅磡又要番屋企果頭拎野。上星期銀行戶口果度話要出一封信講我點樣點樣紀錄良好，出一出噉就幾日今日先有得拎。成封信一百粒字（當然係講有意義果ｄ）都唔夠，噉就收我舊幾水。唔怪得銀行市道點差都唔會執。
灣仔稅務大樓
行完成朝再飛身過海，不過上黎唔係交稅，（又）係搞文件。上黎係想拎番張唔知咩證俾銀行，點知出張紙仔都要「下一個工作天11:00a.m.後取」仲要收五條。唔多使做又可以笠咁多錢，唔怪得咁多人想打政府工。
銅鑼灣皇室堡
做完公務，自然要抖抖。既然HMV又減價，點都要出黎支持下。但係行左兩個圈之後，發覺上次係尖咀執果兩隻（MACHINE HEAD "Through the Ashes of Empires" & LAMB "Lamb"）已經係今次減價最正之兩隻，其他只得一隻有ｄ興趣。真係好唔掂，唯有等多幾個禮拜睇下仲有咩正野放出黎。
過到黎剛剛撞正差唔多時間開場，就順便睇埋《明日之後》。好睇，擺明諷美＆唔少黑色荒謬玩野位，劇情幾有意思，不過到左後段就唔多夠力。點解個老豆係要搵番個仔？理論上去親點會唔死？（劇情上當然唔會）又個仔點會噉都唔死？（又劇情上當然唔會）搵到又點，咪又係攬住一齊死？（結果呢當然冇，睇落去啦）搞到好似夾硬搵戲做整長套戲，又兩條友遇番果日立即變番好天氣，夾硬整到大團圓搞到立即想小。開頭先狂風暴雨到仆，點知訓一訓醒立即雨過天晴晒，喂又話世紀災難咁容易就冇事有冇搞錯？又之後個總統終於知錯，「以後我地會環保ｄ」，環保又點先？全美國比幾十層樓雪埋左（所以點解ｄ美國人走去墨西哥避難果時可以風和日麗水都冇滴？），地都冇塊遲ｄｄ雪溶埋死得仲快，你而家先去環保有咩用？之後又點先你唔係話我知全地球（除左墨西哥．．．）比水淹沒晒班友仲可以平安冇事地生存落去嘛？除左個結局太唔合理之外，套野都算唔錯。最重要係，銅鑼灣JP畫靚聲掂地方舒服，睇都睇得開心ｄ，所以，小少句。
中環置地廣場
又係唔關事，基本上每次過海去完銅鑼灣都會逛埋呢間HMV。行完之後，發覺HMV今次減價真係好廢．．．

真係好放假feel，完全唔似仲有三份功課要交＆搞緊個演唱會。不過唔知仲有幾多光景／心情可以噉樣放假法。

1/6/2004 TUE

六月了。還有兩星期不夠，便會離開教院了。我知道這兩星期，一定不會過得輕鬆的了，每經過一天，便少一個機會遇見妳；兩週之後會怎樣，我也不敢去想。這兩週裏，只可以珍惜每一刻可以開懷歡笑的光陰；兩週之後，只有希望，這不會是最後的兩週．．．

劉義

2/6/2004 WED

琴日一點幾就訓左。係咪好健康呢？不過冇乜分別，因為一起身都係噉捱，又係無盡的搞文件＆講電話，叫做唔使上高山囉呵呵。今日仲病勁左忝，我都唔知點樣捱埋下個禮拜。

3/6/2004 THU

份GS下星期就交，今日點都要出去考察一下。由做水污染到做空氣污染，由做不同地區空氣質素比較到做巴士站空氣研究，由琴日一點幾拗到今朝一點幾，結果係點？我都唔知我淨係負責做野諗野唔好叫我（所以我成日比人小呵呵）。
仍然病緊。不過病有一樣好，就係有得食藥，食完藥先訓係訓得熟ｄ（真犯賤）。好似今朝就訓到差唔多起唔到身－都九點半起，距離開工時間十點半仲有成個鐘，但係，出門口前仲要開另一份工嘛。做功課＆搞演唱會真係嘔心瀝血，我而家只希望可以有命／順利捱埋下星期呵呵。

結果，我地GS就係做巴士站空氣質素研究，簡單黎講，即係搵幾個巴士站食下塵，睇下邊度食得最多最應就知邊個巴士站最唔掂。是日行程係藍田＞平田＞鑽石山＞荃灣＞大埔。病緊仲要食晒塵晒到死行到身水身汗十一點半做到四點半，好辛苦，不過好開心。果種感覺，就好似搭巴士果陣，你鍾意個女仔坐係你側邊好平靜噉訓著，你一面傻笑一面睇住佢訓．．．

4/6/2004 FRI

搵左好耐，終於都搵到本音樂雜誌《打口》做贊助，難得佢地一口應承肯贊助登廣告，不過設計師因為時間咁倉促＆要靠公司機整關係（唉話就話「唱片公司搞演唱會」不過全世界冇個唔係業餘），所以今日有一個重要任務，就係三點鐘飛出葵興拎個廣告圖樣再飛出灣仔交貨，朝早仲要去尖咀文化中心睇飛辦，功課？病？顧唔到咁多啦。

十一點幾飛出尖咀簽收完飛辦，兩點幾先要走下一轉就當然要走上HMV行個圈（就算唔使走下轉都行架啦超～）。冇乜新野仍然係冇好野執，目標LAMB全線仍未出現，好後悔上一次減價放晒全線出黎果時唔掃。見冇野執就再飛出灣仔Rock Gallery執左隻jazz野（真得閒）。仲有成兩個幾鐘，點算？好在，仲有個lau-sir.com。為左唔使走Ｎ轉同交唔切稿，就剷平成個lau-sir.com等設計師搞掂之後可以直接upload上網再叫《打口》網上收稿，所以唔使點解呢幾日無聊齋死左喇我已經答左你。個domain話就話有50MB，但係查實只係得38MB鬆ｄ，真搵笨！想投訴好耐，最衰我懶！（．．．）諗住實掂之際，設計師三點幾交稿果陣之話
「死喇，幅圖成38.5MB忝！」
當堂吹脹！好在後來縮到有38.7MB（仲話50MB大個domain挑！雖然後來發現，個domain係可以谷爆十幾MB．．．），經過無數次上傳下載，終於可以今日交到稿！TRHK（而家應該叫Trinity Music），你地應該特別嗚謝無聊齋！
成個晏晝瘋狂打電話＆send email＆FTP，搞掂之後聽住隻GODFLESH訓覺。係好悶架佢地ｄ野，不過我就好鬼鍾意。知道咩野係"godflesh"的話，就會明點解聽住佢地訓覺可以咁開心，真係冇改錯名，呵呵．．．

5/6/2004 SAT

而家每次上舖，感覺都好陌生。人人都話「TRHK冇左劉Sir唔掂」，唔係丫，仲未執丫。

今日煩左Davy兄（就係MESSIAH結他佬，自己睇相估下邊條契弟係佢）同阿嫂即係今次演唱會海報大設計師成晚，我都真係唔好意思。點都好，多謝阿嫂呢幾晚抽空幫我地手，我呢ｄ小雜卒就淨係識拎住人地ｄ彩去耀武揚威：

華語金屬力量：六翼天使香港演唱會
Chinese Metal Power: Seraphim Live in Hong Kong

真係好靚，就好似阿嫂一樣（想打真係）。知唔知點解張海報要加黑邊呢？阿Davy兄有以下解釋：
「加左黑邊睇落有個框好睇ｄ，唔加黑邊就得背境ｄ樹皮，到時一出咪．．．咪得樹皮囉。」

6/6/2004 SUN

今日好平靜。冇乜野做、冇乜野忙、冇乜野煩。好靜。

7/6/2004 MON

同ｄ學生係email傾一傾，出左高山傾一傾，去左銀行傾一傾，搵老細、Hole＆Davy係電話傾一傾，跟住好靜。咁靜，反而唔安樂。

唔想咁靜，咪嘈番ｄ。想知咩叫「無Ｑ聊」、「笑爆咀」，請睇睇TRHK旗下第三支樂隊、來自瑞典之melodic death band CARNAL GRIEF製作之"Entrapment Concealed" MV。雖然首歌係幾嘈下，不過佢地自己都講到明"not in a very serious manner"，唔好預期會點樣驚心動魄驚險刺激。同場有將會成為TRHK第五隊樂隊、又係瑞典melodic death之SKINFECTED友情客串。又係硬膠友一堆。所以點解我成日叫人唔好玩／聽metal。

8/6/2004 TUE

雖然而家係凌晨三點半，不過都專登打多段先訓，因為，我已經做晒後日10/6先交果份current issue！一千字咁大把我都會咁早做完，係咪神蹟呢？我都記唔到有幾多份功課好似噉樣係死線之前兩日以上做完，實在係太少，呵呵。基本上咁快做，就係因為冇時間做，我都只係求祈拎番上年課程研究相同題目果份功課出黎減淨一千字，再將實習觀察果部份改成今年讀cross curriculum做功課做到一鑊泡，然後撻一句「教院學生咁得閒又點做都得都做唔掂何況現職教師！」噉就收皮。好Ｑ創新噉款，不過噉樣做比唔比我都唔知，因為按照傳統我係冇搵過張guildline睇點做（搵都冇用，我記得張野都冇乜講過），分分鐘懶係型噉結果做錯晒都唔知。又要早交又要懶創新，犯晒做功課大忌，今次仲唔肥？不過結果係點我都唔Ｑ理，詳情請睇樓上五月廿四之段記。

因為聽日會超忙關係，今日計劃係一早番大埔＞去銀行＞番教院睇醫生（病到今日先去真係犯賤）＞搵叻姐食飯＞做埋GS份（呢樣最緊要）。結果呢，唔使點樣晏法已經一早比人call醒，最先係一個唔知邊間公司打黎話
「八達通．．．抽獎．．．保險！」
仍然昏迷之我只隱約聽到呢幾個字。難得果位保險小姐又可以講足四個字，當堂點眼訓都比佢講到醒。之後高山、贊助商、海報設計師同老細幾十個電話，我變左做接線生呵呵呵。癡完線之後，同屋企兩隻狗一樣，訓覺訓足成個晏晝。功課，都係收皮。

訓到五點幾，唔得喇一定要做下野，就走左去蘋果借下書。公共圖書館居然搵到有書係專講空氣污染，不過我次次上黎都只係為左借CD。雖然呢間冇咩正野不過有唔少神奇野，好似TOOL "Aenima"（會有呢隻真係好神奇）、LAMB "Lamb"（前排執左先話有，不過呢隻係買得過）、TESTAMENT精選同Eric Martin。最後執左Brian May "Another World"同ALICE IN CHAINS隻unplugged，兩隻都一般。勾起左舖癮，搵日要去中央怒掃（雖然點怒法最多都只可以掃六隻）。

番到屋企食完飯都係訓，十點又出左去搵老細飲野。真係好多野煩。包括，一個街坊裝小朋友點樣可以夜晚十一點拎住萬幾蚊現金通街行而唔比人老笠。

．．．仲話今日起埋份GS忝。

9/6/2004 WED

做喇點都要份野，不過成晚都冇乜做過，除左搞文件之外，仲有執番之前去巴士站影果大堆相，你試過用56K速度收六十幾MB file未？今日我「有幸」試到，結果係十二點幾收到六點幾想訓都冇得訓，因為要睇住幾時斷線又要黎過。Queenie小朋友，你應該係你份功課特別嗚謝lau-sir.com，唔係我真係唔知你點樣用呢個龜速send果ｄ相野比其他人。當然，嗚謝唔止淨係呢少少野，呢幾個鐘入邊點樣用Paint Shop Pro執番靚ｄ相，幫ｄ相分類編號，再將8XMB縮細到5.XMB，冇人會知，包括特別想佢會知道之人。
係，我唔係咁鍾意做完野之後講番比人知，可能就係因為唔夠高調，搞到咁蝕底。

今日係一個大日子，因為六翼天使演唱會（我都唔多敢講個全名）正式開始賣飛。ｄ飛邊度黎？咪就係要我出尖咀文化中心行政樓磅水。差唔多四百張飛要度成萬二銀，所以點解琴晚土瓜灣會有個傻仔拎住成萬銀現金通街行呵呵。本來約兩點收飛，點知兩點幾先起身，都好在「趕得切」三點半飛到。係咪做政府工一定係噉呢？ｄ員工之服務態度真係差到高過貼地少少，問多句都好似阻住佢地放工噉，未貼晒地係起碼肯答下問題囉。所以點解咁唔鍾意官僚。

是日四點半至五點半，TRHK成為左一間庇護工場。當中有三條傻仔拎住一大疊印住「六翼天使演唱會門票」之紙張撕撕撕撕撕．．．成三百幾張飛仔再跟號碼排好，然後對住路過／入黎TRHK之人機械式地不斷重覆
「六翼天使演唱會有飛賣喇有台灣女聲power metal樂隊六翼天使加香港band Blackwine同Messiah開場七點半開始十點半完之後仲有簽名表一張飛二百三有得睇三隊仲要有名簽抵到爛啦真係買啦買啦六翼天使演唱會有飛賣喇有台灣女聲．．．」
所以點解今日冇生意。見生意咁差，唯有自己幫補下啦。不過係同阿Rock哥走左去韻彙執碟，又係GODFLESH，呵呵。

．．．咦？份GS呢？

10/6/2004 THU

．．．份野我點幾先開始做，唔使問我忙咩。睇電視！訓！焚機！玩狗！搞文件！夠忙未？
絕對冇人做功課似我地做，到交功課之前果晚開工先發現原來ｄ研究數據係有問題，結果要等聽朝搵lab tech問清楚先可以做埋佢。不過對我就冇咩影響，ｄ數據有問題，咪唔用數據囉，做人求祈ｄ好。你想有得訓定冇得訓？（當然，首先你要好似我噉唔去理「你想拎A定拎C？」）
八點幾做完，呢份功課都算做得（好）慢。不過Queenie姐要訓覺其他人又未做完，一撻低肯定冇兩三點唔會起到身，噉就睇睇報紙撚撚狗先出門口。都好耐未試過感受番呢種「做功課」感覺。其實有時都幾鍾意做功課架，特別係份功課係好有興趣好鍾意去做果ｄ吹水功課（例如上年份玩到盡之教哲），反正我呢ｄ人都唔係睇分數只係睇寫ｄ野可以有幾玩野，反而主做其他野副做功課可以思考到更多野（呢ｄ「野」當然係功課以外），做功課亦都較有效率（唔計時間），睇我上次一面做ed proj draft一面寫碟評結果更神速起貨就知。

番到黎，又係我一個最得閒，人人都係度做果時，已經印好份功課之我係度印印腳搞住阿臘味兄，我冇咩叻，就係叻在夠求祈同唔識死呵呵。本來人人（Queenie小朋友，對唔住，唔包括你忝）都三點前搞掂，但係阿臘味哥執參考書目＆頁碼＆附件（佢疊附件差唔多多字／厚過正文笑爆咀），最後仲要集三人之print quota先印到出黎，前後搞多個幾鐘先起到貨，令在場所有終於可以係下午茶時間完結之前免致於餓死。

今年基準試，合格率創下新紀錄，五份卷之中有三份係歷來最低，口語試卷更只得45%。到左就黎畢業呢個非常時期，今次合格與否，對跟住搵唔搵到教職有住決定性之影響。經過兩次失敗之後，今次，唉，我都唔想講。有乜理由十條友入邊死五條半都死唔中我呀？即係咩意思先？唔通個天都要我教書？我唔制！！！

今日，我真係好開心。做功課做得好開心，過得好開心。今日係呢個禮拜入邊，甚至呢大半年入邊最開心之一日。我真係好開心、好開心。誠心祝願，今日係明日之始，唔係末日之緣。

11/6/2004 FRI

最後一日。最後兩份功課。唔想做。三點幾先開始，做得好慢。好唔想做，因為今日應該係最後一日番學，交埋最後一份功課，就完。從未試過咁冇心機做、甚至係做唔到功課。好唔想做，因為好唔想完。
十一點半開會，十一點三先起身，一開始已經一塌糊塗。一個非常之唔好之開始，對今日，已經冇乜寄望。
分工合作，就好似今日，五個人每人做ｄ，一日就起好成份小組功課，疊野夾埋ｄ雜碎成八十五版仲厚過ed proj。做果陣，我都幾開心，仲可以笑。
之後點？只有一句唔係俾我之道別。

呢段，你知我係寫比你。你願意的話，就睇下啦。其他人，唔好睇啦，唔該。
「首先，好對唔住。我係令到你好嬲好唔鍾意，不過做果件事果時，你係從你角度去諗，我係從其他兩個人角度去諗，所以最後起左衝突。你都明呢排我係好煩，煩業務、煩功課、煩一個人，寫果時，我係因為當時之煩躁壓抑而有感而發，令你反感、不滿的話，好對唔住。另外，好多謝你，因為估唔到係教院最後一晚，會係你陪我過，而你又願意仲有份功課要做都付出大半個鐘黎陪我，多謝。我知我煩左你好多好耐，之後可能會煩你更加多，對唔住。我唔識講野，所以我淨係識講對唔住，同多謝，就好似對住佢噉。可能你覺得你冇做過咩野、冇乜幫過我，最少你肯聽我講，同講我聽。點都好，我真係好感謝你呢一晚．．．」