離開了。完了。之後可以怎樣，應該怎樣？不知道．．．
劉義
呢兩晚，幫左阿Samson哥睇睇佢PE份功課。PE我當然唔識睇，我係負責幫佢執篇文ｄ英文。完全唔明點解PE功課都要寫英文咁得意。
「我英文得小學程度架咋！」
就噉睇第一段，據Samson官方消息稱，「已經錯左超過一百個。」雖然係誇大，不過都差唔多架喇。我估真係改篇小學生英文作文都冇錯咁多呵呵。一番努力，經過無數糾正之後，終於去到最後一段。呢段，唔係好長，不過一共睇左三次。因為，點解會咁完美？一個字都冇錯，仲要寫到靚一靚順到冇得彈？唔通經劉Sir一夜點化，真係小學生都可以升大學？
「果段成段都係抄架咋傻仔！」
．．．哦。
今日專登請晒假唔上堂唔開舖，因為要飲野，仲要飲三野。第一野同張大導＆老細三個人飲，真係好欣賞佢，因為佢真係好有態度，不論係音樂還是工作。而且佢好能夠將音樂融入於佢而家之工作中，「睇下星期三十點半亞視播個越野電單車，我係入邊cut左幾多首啦！」同佢吹水好正，真係有料到之外，仲可以知好多無聊野。例如你知唔知ｄ所謂收視率點計？佢都唔知，因為其實係冇得計，呵呵。
張大導「搵料做research」兩個鐘迫住要番去開工之後，就到我同老細再飲。實在太多事要煩要顧，舖內、外，場騷之前、之後，同埋最重要之七月。飲得好辛苦。
最後，就係戲肉，"Hole"《打口音樂雜誌》總編輯Alge Cheung。可能你唔知佢係邊個，就好似我噉，不過如果我話你知，佢筆名叫清研，可能你會有番ｄ印象。當可以幫本音樂雜誌取《打口》呢個咁有意思之名稱（你問下身邊幾多「聽歌」之人知打口點解丫），自然有番咁上下來頭，簡單黎講，即係同老細一樣，老坑乙個，呵呵。唔怪得當初一問佢地贊助立即應承咁爽快，「音樂人」是也。真係好好傾（雖然我呢ｄ後生仔負責聽多），大家視野、心態都好似。實在有太多主意，希望以後有更多機會合作同發展。
所以點解，咁唔鍾意睇香港ｄ所謂音樂論壇。一係笑，一係爆粗，一係兩樣一齊做。最憎果ｄ「好有態度」之MK人，明知冇料又要誤人子弟（ｄ所謂論壇有九成人以上係比呢ｄ人更膚淺，所以佢地絕對有發揮空間）。單野，唔使知前因，唔使理後果，睇中間就夠。即係知衰唔緊要，跌落地都要拎番渣沙，撻到貼晒地之後仲要扮晒冇野噉繼續廢話落去，噉先乞人憎。刷我鞋有咩用丫，早日收皮先係做福人群。
本來，都唔諗住記低番段野係度，forum既野不嬲都要講完笑完就算。但係後來得一位大師指點啟發，就順便收錄番係無聊齋，因為諗番轉頭，其實無端白事噉樣寫成千字回應果位仁兄都幾冇意思，因為佢只會覺得我係想串人 － 雖然一千字入邊一句串人字眼都冇，而唔會諗自己搞左個咩爛攤子出黎要人收拾；放係呢度起碼有ｄ貢獻，因為黎呢度之音樂人會更加明白同知道我想講／做ｄ咩。呢位大師，就係Ataraxia，又名Mornepak，你唔識佢仲好，噉我點誇大法你都唔知係真定假：佢係一個細我三年，但係比我老誠三年以上之後生仔，三言兩語已經可以令所有人（包括我）佩服得五體投地、貼貼服服；另外寫得一手好英文，為人極有教養，八級鋼琴有成，而且對音樂之認識與研究非常廣泛同深入，其音樂造詣同思維，我敢講會勝於教院最少一半音樂系學生。咦，我仲未作大佢架喎．．．
其實，真係應該幫webzine寫多ｄ呢ｄ文章。不過，好坦白講，我實在未夠料。
祝妳開開心心、快快樂樂、平平安安．．．太多了，但就算多辛苦，我也會繼續為妳祈求祝願的。
祝妳開開心心、快快樂樂、平平安安．．．
劉義
今日，我做左一樣好多人都估唔到既野。我居然，寄左五封信。成日話「寄咩信丫都搵唔到架啦慳番ｄ油錢郵費好過！」成日話「我會係第一個一封信都唔寄都搵到工之教院畢業生！」但係今日居然破戒寄左五封（其實係睇晒二百幾個全港教職空缺資料之後發現得五間寄得），我都有ｄ愧對自己，所以收皮。雖然我知道，之後都唔會搵到工，放完個暑假又係坐係皆旺等TRHK執笠，呵呵。
多野做啦總之。唔好問我做咩，總之好多野做。靠不斷煩做野令自己冇時間同精力去煩其他野，都幾斬腳趾避沙蟲。
又係頻撲的一天。今日九點幾起左身（本來七點幾忝架諗住），搞左少少野就飛出高山。今次係同音響公司ｄ人上黎睇睇個台點搞，基本上唔關我事我只係陪睇之後再填表寫低要邊ｄ器材。雖然高山係響譽江湖之band show發揚地，但係我都係第一次入黎呢個場。之後仲有冇機會我都唔知，呢場可能會係高山最後一場band show，因為遲ｄ會改建做粵劇專用劇場，話唔埋到時唔肯再租場比我地搞band show，除非我地搞番場metal opera呵呵呵。
高山劇場個格局，係一樓寫字樓地下劇場。今日我地四條麻甩佬睇完場之後企晒係一樓樓梯口傾要ｄ咩器材設備，吹水之際舞台經理係寫字樓步出經過我地行樓梯落劇場。剛剛我地傾到燈光方面要搵佢，就嗌左句
「舞．台．經．理．！」（當然冇咁大聲，細一半啦）
「．．．咩咩咩咩事？？？」（噉佢又當然冇應得咁細聲，大番一半啦）
跟住四條麻甩佬就係樓梯中間截停包圍佢問燈光ｄ野，問咩就唔好問我因為呢ｄpro野對我呢個淨係識聽metal之小朋友黎講實在太深奧。傾完之後：
「．．．講講講完喇呵？？？」（差唔多喇呢個大細）
跟住就走番上office。發唔發現到有個問題？
「咦？佢本來唔係落去咩？」（不明所以之四條麻甩佬狐疑）
上完高山再落紅蘋果還番GS借黎做功課ｄ書＆兩隻CD跟住節目係飛出尖咀。今次出黎唔係行HMV（雖然例牌「順路經過」），而係搵Davy嫂即係Tiffany姐拎我地多災多難果張演唱會海報個Ver. 0.9。冇錯，成品仲未出到架，鑑於大家之中文同英文水平都偏低（係我係講緊我，次次傳話度稿都係我負責唔係我錯係邊個），今日高山都仲話有野錯，灰。即係其實都有個Ver. 0.8係舖，因乜事咁緊急要專登出黎拎個Ver. 0.9？
拎完之後我仲以九秒九速度飛出皆旺，再以慢少少之速度執舖（！）、抹萬年塵（！！）、梳頭（！！！），發生咩事？掛住人掛到傻Ｘ左？
一面食蝴蝶餅（呢樣係TRHK Metalau指定食品）一面飲朱奶一面等，一點九等到兩點三，終於等到遲左三個字先出現之：
「張．大．導．！」（今次就真係咁大聲喇，仲要有火忝）
點解有火？喂又話《慧珊時尚坊》黎訪問TRHK，朱慧珊呢？開頭仲以為亞視咁「大」間電視台黎TRHK咁「大」間唱片公司做訪問會的晒成支採訪隊黎，點知朱慧珊又冇，化妝師又冇，茶水阿姐又冇，整張凳仔都冇（真係要去問門口檔擅面借），成「隊」人就只有負責爆粗、煲煙同拎機拍野之張導演，同負責爆粗、煲煙同拎機拍野以外所有工作之跟班阿Wen姐，同場加送大光燈乙支。阿Wen姐雖然唔知咩野係"metal"（除左「好Ｘ嘈」之外），今次上黎訪問佢都做晒功課溫定書架！雖然佢搵到ｄ所謂"notes"其實就係TRHK其他同事之作品，簡單黎講，即係問我就得，呵呵。首先，張大導問番大家：
「琴晚十點半個越野電單車有冇睇？我係入邊cut左幾多首metal野？」
答案係我都唔知因為我老豆睇波，聽佢講番淨係知有用到SLIPKNOT。到呢個地步你都知道，其實佢又係一個聽metal聽上腦之傻佬，今次話就話「介紹香港獨立重金屬唱片公司，推廣重金屬音樂文化」，上黎借我過蹺呃番幾集時間做少ｄ再假公濟私借ｄ倚用公時聽歌買碟為實。睇佢拍晒之後陰陰咀笑「呢段野斬開幾截，中間再攝幾個video，噉就可以分四個禮拜出，呵呵呵！」就知。擺明求祈交差架啦條友睇阿Wen姐ｄ訪問問題就知：
「METALLICA，你話係咪正先！」（擺明係為阿冷而設，不過因為佢一開口就最少會小一個鐘，要專登開多個專輯比佢，而我又一定講唔出佢果種神髓，所以最後唯有作罷）
「CRADLE OF FILTH又係一Ｘ流，係唔係？」（又作罷，原因同上）
「DIMMU BORGIR又係正丫！荷里活套"Hellboy"都搵左佢地ｄ歌做主題曲喎！仲唔勁？」（都冇問，又係噉）
「請問，重金屬之化學成份為何？」
「一舊rock同一舊metal相撞，邊舊會傷ｄ？請從物理學角度解釋。」
「噉rock同metal其實有咩分別先？用bio去講呀唔該邊個話呢個訪問係講音樂架？」
「其實呢，我想問，你同我老頂都淨係顧住爆粗同聽歌，其實個訪問做唔做架？搵我黎係咪淨係為左擔擔抬抬架？呀我老頂好似想用部cam扑人，唔問喇呢條我地去下一題．．．」
「"Metal is life"喎有句金句好似係！我想問點解話金屬即是生命？乜生命唔係上帝所賜咩？唔怪得人人都話metal反基督啦我明喇而家！」
「心理學有冇話點解聽metalｄ人short short地架？好似係我側邊拎camera果條傻佬呢．．．」
「你答問題果陣可唔可以唔講粗口？講少ｄ都好丫ＸＹＺ！」
真係好難架！話就話講metal隨口都可以講到你唔想聽，不過要好似今次噉對住鏡頭正正經經噉講
「Heavy metal，中文係重金屬，起源可以追溯至六十年代末期。當時英國有三隊樂隊將當其時之主流、藍調同搖滾結合，再調重樂器音色，形成重金屬音樂之雛型．．．」
ＸＹＺ真係好Ｑ難架！所以阿張大導拍到五點鐘先搞掂之後第一件事就係打呢個投訴熱線（即係搵老細）：
「喂你條靚NG到九彩喎！下次你落黎拍呀我唔知你！」
係呀我都覺得今次拍得唔好架，我估下星期會搵佢再黎玩多次。放心啦，應該月尾會播第一集，有野笑我實會通知你。到時你會見到個電視寫住
玩完，又見福星。今次會一會阿Victor兄，好唔妥。往年每星期出少次黎見佢都小到飛起，今次居然順順攤攤番左黎成個月先搵佢但係粗都唔爆，原來係佢搵到工。即然佢冇時間玩，又點需要我地出黎陪佢？
越黎越差。今次食左三轉已經收皮兼半年內唔想再打，我都想像唔到點解當年可以每個禮拜打一次邊爐。今次又見福星，仲比我見番分舵未執時係果面「舉一次夠架喇！見到架喇！」果位經理。
好灰。真係好灰。$230，可以睇來自台灣之世界級power metal樂隊六翼天使表演，仲要有香港progressive metal樂隊BLACKWINE & MESSIAH做開場，會場採用一級專業樂器、燈光同音響器材，全長三個鐘，之後仲要有簽名會同樂隊聚會。你覺得點？佢地（自己諗邊個）覺得：
1. 「台灣band點會玩得好？」
可以亞洲、歐洲、北美都捧佢地，芬蘭、瑞典都邀請過去同個個都話好勁之NIGHTWISH、SONATA ARCTICA表演，都唔係好勁遮。玩得最唔好，咪就係全隊都係華人，同來自台灣囉。玩得最廢就係呢兩樣。
2. 「香港band有咩好睇呀？」
冇架。你都係留番係屋企繼續嗌「支持香港地下音樂」算啦。
3. 「冇人陪我去，咪唔去囉！」
係架。你都係自己一個留番係屋企聽CD算啦。
4. 「二百三十蚊，好貴喎！」
今日一個客話。但係跟住佢可以買三百五十蚊碟。嗯，呢場買少兩隻碟就可以睇到之演唱會，真係好貴。
所以點解話，香港metal / band scene已經冇得救。成日話冇人搞metal show，到搞過黎又要嫌三嫌四話「都唔係邊隊邊隊」唔去睇，你覺得metal band係咪真係咁易請，又「邊隊邊隊」會唔會咁易肯黎香港開演唱會先？因為上一場metal show係$180，個個人都覺得今場$230「好貴。」ｄ人永遠只會睇「貴左$50」，而唔會睇「貴左$50可以買到乜野」，仍然咁短視膚淺冇進步過。成日話「支持樂隊」、「支持metal」，但係一到有機會去做果時，要俾錢的話，影都冇隻。典型香港人，更典型MK人。茂利兄，深切明白到你對上一場Live House band show居然男女比例係一比一之悲慟。
有ｄ人（「支持metal」人士）笑LINKIN PARKｄfans掟成九百幾蚊買張飛去睇偶像，同成日叫人支持香港地下樂團，但係而家有機會觀摩真正之metal樂隊表演同支持香港地下樂壇，呢ｄ人（「支持metal」人士）卻反而做唔到LINKIN PARK fans都做到之一樣野：願意付出去親身支持佢地覺得應該同值得支持之樂隊／人。
「唉。」
好耐未試過好似今日咁似開舖，起碼間唱片舖似番ｄ唱片舖先。因為，今日有新貨到。個個都話等「新貨」，但係其實好多人搵極都只係搵舊貨，真正果ｄ「新貨」永遠冇人理。幾時有人理？過多兩三個月當批新貨變成舊貨之時候，亦即係ｄ貨係香港冇人買然後批晒去外國之時候，亦係ｄ人終於黎搵「新貨」但係一早批走晒買唔到然後話「TRHK好Ｘ廢」之時候。當然點都會有人搵新貨，不過搵極都係幾隊大band，跟住冇架喇，因為佢地世界入邊就只有呢幾隊，呢幾隊就＝metal，聽晒呢幾隊就＝我好metal。好多人成日話，「其實你地入咁多野做乜？都冇人聽！入ｄ大band咪得囉！」係架。我地都好戇居架其實。學下人地，入晒ｄ大路野pop野咪算囉，反正個個想話比人知自己走得點前點快點另類點metal之人，都只係永遠唔會明白自己係行得最慢最後最大路最唔metal果個，入ｄ普通行貨已經足夠滿足佢地有突。又或者學下人地，唔係賣音樂，係賣「威」、「型」、「潮」。
唔使再叫我講野，要講我已經講野。唔聽，同仍然覺得自己好（ˍ），噉你就繼續落去、繼續（ˍ）啦。對唔住，呢幾日我真係好憤世，因為呢個世界，仆街實在太多。戇Ｘ仔都係。
父親節，你送左咩禮物比你阿爸？我份禮物，就係見工。冇錯，今日我去左見一份出版社工。好驚訝？係，我自己都係。廿三年黎，我真係從未試過咁孝順。
今日朝早十一點in，琴晚專登摷番ｄcert出黎（都唔係專登冇得唔摷啦，仲要琴晚先摷忝唉），中五中七ｄ野都唔知幾耐冇掂過，基準張cert唔Ｑ見左忝好在之前有留番張副本。執晒ｄcert，整埋履歷加埋推薦信果ｄ，發現我真係超級離群＆頹廢，乜野課外活動證書、獎狀乜叉都冇，成份野計埋都唔知有冇十頁。好在個file夠薄。
搞完個"portfolio"（我都唔好意思噉樣稱呼果疊紙），第二朝一起身溫書睇熟常識科課程同咩係專題研習，四個關鍵項目、八個學習領域、九項共通能力，四年黎我第一次可以一次過講晒出黎呀真係。好似好掂檔，但係又係得個樣。填form果時連自己報邊個部門邊個職位都唔知，相又唔記得帶，差少少諗住剪左履歷張相出黎貼．．．in果陣諗住一輪咀講晒朝早背果堆野出黎，點知有關常識課程冇問過，面試過程就係查家宅，評語係
「你都好多job喎！」
In完，結果點？嗯．．．繼續寄信啦．．．
好多野都想做（不論在公在私），但係想做都做唔到，個腦實在太空洞。想做好多野，但係唔知有咩可以做，亦唔知可以點樣去做，果種無力感真係好恐怖。
Davy兄放結他effect乙套，Line 6 POD，連長footboard，$2500-$3500，有意者可與我聯絡。
今日一早起身番學。係呀番學呀番教院呀，唔係為左聽下我地英文副修之後點收科，真係唔會八點幾起身番黎。根據政府保障教育質素新政策，只有主修英文先至夠資格教英文，我地呢ｄminor人就到頭唔到岸要再讀多Ｎ樣野先可以升到major水平，今朝英文系就專登開左個招待會講下跟住會點補鑊法。不過當你見到咁重要會議居然揀左係課室開，三條4BEd(P)4人遲兩個字先到居然一條友都冇，埋單得四個4BEd(P)4人加多個唔知咩course主修人黎襯熱鬧（即係得我地呢個course有人出現，其他course係完全冇人理），遲過我地到之tutor黎到第一句就係「咦？仲諗住今朝會冇人黎忝！」你就知道點隻鑊補得幾求祈，同其他courseｄ人唔蒲頭完全係明智之舉。
首先講明，跟住段野會好Ｘ長，無關人士唔使睇落去。點補法呢結果？首先，英文副修學生可以黎教院報一個Post-Graduate Diploma in Subject Knowledge，part-time兩年，上堂時間可以揀一至五晚、星期六晏晝同暑假，$6000一個module，七個core另外要六選一讀多個elective，minor可以豁免三個core另外教院可能會送多一個免費，即係可能會係讀5個module收$24000。現職長工教師可以申請$30000 grant讀，minor人就可以申請grant一半學費，最多去到$30000。報讀的話教院副修英文人士截止報名日期係八月最後一個星期前，另外副修人報讀一定會收唔使in唔使等。見我bold咁多野，都知道好有問題啦。首先，知唔知點解張野註明"subject knowledge"？即係教書呢，除左本科知識，教學技巧都好重要．．．即係吹到好行話呢張dip因為只覆蓋到一半所以認受性冇乜架啦，之後會唔會開多張"PGD Teaching Skills"呢，英文系只有話「會保留呢個可能性」，所以，你諗你喇。提醒你，主修英文程度要2009年達標，如果今年開始讀兩年，之後又話要再讀多張，錢一回事，時間又一回事，即係你唔今年開始的話，分分鐘你唔夠時間達標．．．當然你夠搏三個上堂時段都揀晒，每日放工／學都飛車入大埔教院上堂，可以一年full-time搞掂佢，果時未死得而真係讀完之後仲有得再讀都仲有心情，我咪黎賀下你囉。而且最重要就係，而家已經咁難搵教職，讀完呢（兩）張dip之後都唔知係幾多年後之事，到時係咪一定可以憑dip換職先？我就唔敢講喇。至於學費呢，$6000一個module擺明搶，無論點豁免點送都好（仲要全部都未定案忝），冇三萬唔使落樓，話就話有grant，到時係點又唔知（擺明我地死我地事都做得出架政府ｄ野），好似我地呢ｄ冇工開傻仔真係除了灰還是灰。另外呢，搵到教職都唔好咁開心住，如果你係合約而唔係長工，果三萬銀呢都係得個望字。同埋，都係呢個問題啦，係咪俾左呢三萬就一定埋到單呢．．．睇落就好灰，不過其實又唔係一定要幫襯教院，佢地賣點只係有得豁免乜乜物物、（話）送一個free module同一定即收（有ｄ大學講到明教院生唔入，in都冇行），但係其實另外有幾間大學都有呢ｄcourse可以讀，而且絕對正過教院好多。好似理工同城大，讀完十幾個CP拎左張dip之後，可以再補讀N個CP拎多個Master degree，Poly係MA in English Teaching，City係MA in English Language，總之你俾到$50400讀30CP就一定走得兼達到主修英文個標準，而就噉睇當然係City吸引ｄ啦話晒個master唔係淨係for教書喎。係架好正架快ｄ去報啦！今年就晨早五月尾截左止冇行架喇小朋友，不過搵定銀排定隊下年年頭報差唔多架喇！
唉。所以點解我阿爸成日話我主修常識副修英文硬朗膠。
既然番到教院，都係時候清埋個locker佢喇。點知今日先黎玩野，個密碼鎖壞Ｑ左！係SAO「我好忙架！」唔肯幫拖爆鎖之後，好，我自己去lab問偉哥借架生搞掂佢！來回A座SAO B座locker加D座lab唔記得幾多次、沿途比無數實Ｑ問候（拎住兩把鉗一把鋸通街走已經死啦，莫講話爆鎖果陣）、Ｎ次上SAO交代（又要忙又要串串貢唔肯幫手自己爆又話點點點，算點先？），簡簡單單爆個鎖都搞左成個鐘，仲未計身水身汗又鉗又鋸灰到爆之爆鎖工序。唉。點解教院最後一日都唔可以留個好印象比我。
為左慶祝以後唔使再番教院（畢業禮唔計，希望真係啦），今日放左專登上舖頭出下糧慰勞下。上星期兩批貨實在太多喇，點執，都仲有得執。唯有執左五隻先：
IN FLAMES "The Jester Race"
瑞典melodic death中之經典，見唱到咁行今次又番貨就順便執（其實只係為左湊夠兩隻拎$188減價哈哈）。都有ｄ擔心唔鍾意始終唔係太好melodic death，結果，唔鍾意。聽完之後，死，反而想聽番佢地而家nu-metalｄ野多ｄ。
WINTER "Into Darkness/Eternal Frost"
Doom metal名作，一隻包晒佢地唯二兩隻碟，當年年少無知放左後來好後悔，等左Ｎ年老細終於肯入番兩隻咁大把，即掃。好Ｑ悶架佢地ｄ野其實，不過我鍾意囉，就好似GODFLESH，呵呵。
NIGHTWISH "Once"
我發覺，而家隊隊band係唔係都拉隊交響樂團一齊玩(CHIMAIRA....)，呢隻夾埋用左成百幾人做。今次結他聲恆左但係唔power，有點兒失望，聽真ｄ呢，除左果首disco野之外，又唔係咁差，ｄ編曲同交響真係一Ｘ流。女聲唔再用女高音用埋正常聲唱歌反而仲好（我鍾意不過比狂多人小），係唔鍾意多左咁多男聲。我認同呢隻就係佢地最好最終極一隻，除非下隻同樣玩法不過轉番power，但係如果噉樣可能唔可以再上德國排行榜第一位，因為，變番metal，呵呵。
THERION "Lemuria/Sirius B"
唔知點講喇，opera metal啦。一出就出兩隻新碟，成隊交響樂團加多個合唱團同廿幾個guest樂手，真係佢地最癲一隻，如果以呢個班底跟番前三隻風格噉走，可以接近超越metal之範疇，可惜今次好玩唔玩轉玩power。隻碟仲未聽，因為睇歌詞集已經嚇親，每首歌都係一段神話／歷史。唔敢聽，太癲。
ORPHANED LAND "Mabool"
又唔知點講，"world metal"？雖然呢隻碟班底「只」得五十幾個人，不過已經足夠同THERION鬥癲：以色列樂隊、中東＆阿拉伯＆古典音樂、唱六種語言（THERION上隻都差唔多），「大洪水」故事概念專輯，今年ｄband實在係越玩越狂。不過全晚我聽得最多果隻，反而係特別版送果隻unplugged。
買完碟，仲有下文，就係上band房夾野。冇認真玩好耐，睇下今次終於又打斷鼓棍就知我有幾認真，仲要唔係一支，係斷夠一對！番黎喇！阿冷，世伯絕對唔會介意我打斷佢對棍！上次四百幾蚊個鈸都照係噉爆啦！慣架喇佢！
今次係打得最（較？）好之一次，或者可能因為之後唔知仲有冇得玩。唉。
相信，今日會係正式畢業之前最後一次番黎教院。好唏噓，因為真係帶不走一片雲彩。
唔使問前兩日發生咩事。耐唔耐冇一兩日段記，將會成為平常事中之平常事，因為而家每日生活實在冇乜意義，唔寫好過。
開舖。好生意。係咁多。
多謝Henry兄隻FUNERAL FOR A FRIEND。好過DYSRHYTHMIA，唔係為左寫呢隻都唔係太想執。
冇咩好講，最後講埋好多人都好關心之一樣野：
「禮拜四七一遊行之後夜晚冇節目的話，番到屋企臨訓前十點半鐘打開電視擰去亞視睇《慧珊時尚坊》啦。」
今日係港九一日遊派海報之旅。我當係派傳單架咋，係張傳單變到好Ｘ大噉囉。三十幾度拎住百幾張粉紙成斤幾重通街走玩到中暑咁滯，老細我要申請呢個勞工賠償！（可能老細都知衰，所以投訴熱線即係佢手電琴日開始已經冇人聽）
紅磡高山
印完海報今朝立即拎上高山派去城市電腦售票網。為左佢地搞到要專登印多個高山版！個阿姐睇張海報睇左成個字都未睇完，幾驚印埋出黎佢先話「唔掂喎！」到時會點？
「乜叉都唔得！咩意思先ＸＹＺ！」（同場加送拍檯動作乙個）
當然唔會！佢真係話唔掂的話高山會立即有條傻仔跪低攬住個阿姐大脾係度喊
「唔好玩我啦姐姐嗚嗚嗚嗚嗚嗚嗚嗚∼」
尖咀柏斯
搞掂高山就要飛出尖咀搵搵我地演唱會贊助商柏斯派海報。佢地寫字樓係鐵路大廈，而我今日終於知道原來鐵路大廈係唔近地鐵站，等我條傻仔兜勻成條彌敦道戇ＸＸ。
文化中心
高山批左ｄ海報之後（專登印多個版本比佢地架！唔批就真係喊喇！）以為佢地會幫我地派埋，點知原來仲要拎出文化中心比佢地過目再簽多張紙再搭多幾層樓電梯拎去另一個部門再等多幾日至一個禮拜先會真正搞掂。真係麻Ｑ煩，好在剛剛要出黎尖咀呢轉都叫做順路。不過其實貼去城市電腦售票網都冇咩用，因為睇果班人（唔計鬼啦）除左阿叔阿嬸，就係ｄ斯文西裝友。佢地睇到張海報反應會係
「六翼天使？甚麼來的？噢，來自台灣的六翼天使，把古典與重金屬揉合．．．挑！都唔知乜Ｘ野黎！聽番貝洛郭白齊立可夫依之頓斯基治好過！」
灣仔Rock Gallery
所以點解咁憎出黎呢頭但係唔係由我屋企出發。我屋企樓下有巴士直到，但係搭地鐵的話呢個位置剛剛好係灣仔同銅鑼灣中間果點即係邊度落都要行餐死，最弊唔知點解次次出黎Rock Gallery都係唔係尖咀出就係旺角出！灰！今次仲要拎住成斤野過黎忝！更灰！
搞掂之後又躝上188逛下（仲未搵到工唔敢亂買碟喇），又比我撞到阿Rock哥。不過我成日覺得，如果有一日上到黎撞唔到佢，噉至奇。
旺角好景
搭三個字地鐵＆行三個字到灣仔英皇中心用三十秒時間俾張海報搖擺廊之後，就行三個字＆搭三個字地鐵出旺角洗樓。首先洗好景，十六樓洗番落地下（其實得四層有得洗），咦，洗極都唔見有四仔？唔開心忝。
旺角先達
之後到先達十樓洗到落地下，今次就真係洗晒咁多層喇。冇上黎一排，發現有幾間突然間變得豪裝左，跟唔上行情忝。冇辦法，我地呢ｄ太耐未試過俾錢租band房呵呵。
太子89268
搞掂旺角又要走多轉出太子上黎89268，其實係假借派海報之名執左WHENCE HE CAME隻好評新碟"The Shorter Story"（先前先話冇工開唔買碟，超！）。
旺角信和
走完太子番到黎先醒番起，最重要果座信和都未派，噉又要走多轉。地庫除左賣日本野果幾間之外其餘所有CD舖不論二手還是pop野甚至"R"（除左一間，相信大部份人都知邊間）都派晒，真係好白撞架希望ｄ舖頭肯做下好心幫手貼啦！
是日總結，得一個字（定兩個字？）：
今日我睇。不過，冇咩好睇。月尾預左咁灰架喇，睇下下星期會唔會有奇蹟出現。
睇完舖番屋企食個飯（灰到飯都要番屋企食慳錢）又飛出佐敦，阿Davy兩公婆叫到飲杯野冇得唔出啦。飲咩？飲酒囉！咁大個仔第一次上酒吧！所以阿媽成日叫我唔好群埋晒MESSIAH班壞人．．．
今日七一，不過冇遊行，因為一早就走出舖頭搵張大導食飯＆做佢生意。查實，佢係我地TRHK大恩公黎架，得閒無事就上黎買碟（雖然佢幾個月先得閒一兩次，係今次擺明假公濟私先突然間咁「得閒無事」），又幫手拍咁多野（最開心果個當然係佢），吹水果陣粗口落ｄ位又真係落得好精彩次次都笑爆，對著佢真係有不少歡樂。
食完飯爆完粗之後老細過左海踢波，另外再派左ｄ海報過港島，雖然我唔明貼係茶餐廳之成效有幾大，不過老細的專業決定永遠是對的，我地呢ｄ做細既都係收皮繼續同張大導爆下粗算。不過佢今次失策在唔記得帶多張海報過去，如果唔係你跟住幾日睇電視會見到七一遊行隊伍入邊有個麻甩佬拎住大大張黑色紙係度嗌
「七月九號六翼天使演唱會！二百三蚊一張飛唔買就笨七！喂喂喂唔好打．．．」
晏晝唔講喇，講番大家最關心之夜晚，相信大家等呢一晚等左好耐。首先講下ｄ幕後花絮：出鏡之前，大大話話係亞視首席主持之朱慧珊問張大導
「呀．．．阿阿阿阿阿張導演．．．metal喎。會唔會好Ｘ嘈架？」
「你話呢？？？」
當然唔係噉答啦阿張導演。佢個回應係：
「梗係唔嘈啦嘈仲敢出街咩ＸＹＺ！」（呢兩日群得壞人多，好Ｑ爛口忝）
終於到左大家好期待之十點半，《慧珊時尚坊》正式開始！（係個時尚節目度講metal都幾諷刺架其實）第一節講玩講飲講食，嘩乜咁多女？頂早知有咁多女揀我就一早申請調件過黎訪問我啦！到第二節，廣告做完飲完食完wargame都打完非常好煮意埋，仲未蒲頭？俾ｄ耐性，好物沉歸底！拿拿拿做喇做喇！不過做成點呢我自己都唔知，因為上鏡五秒鐘之後個電話狂響未停過，ICQ更加係比人炸到九彩，結果搞到我自己反而冇得睇，劉Sir講緊metal起源果時劉義顧住講電話，成段淨係瞥到DARKANE班友fing頭同HAMMERFALL唱緊"Hearts on Fire"，最後好似係TO/DIE/FOR "In the End of the Night"（即係《將冰山劈開》）收場。自己講過咩都冇乜聽到，淨係知道，張大導真係大整蠱，佢揀果幾段片全部都係NG得最勁果ｄ，你見講講下中間閃左一閃就知。雖然好多人都話內容上講得唔錯，不過我覺得講得好Ｘ差（不過算，鑊鑊都係噉，好似次次做功課越做得唔掂果份越高份呵呵），同埋真係好好好好好好ＸＸＸＸＸＸＸＸＸ快快快快快快快快。我已經就住慢慢慢慢慢慢慢慢講架喇，點知出到黎都係快到發癲！（我都知阿Wen姐就住我配字幕配得好辛苦架喇呵呵）唔得張大導下次再拎部機上黎補飛，今次我要開住個拍子機較到40跟住黎講，到時包保夠慢慢慢慢慢慢慢慢慢慢！
播左之後，除左舍妹話「上鏡靚仔過真人喎！不過把聲好難聽！」同播果時剛剛出房去廁所點知見到電視機出現佢個仔結果廁所都唔去之娘親（本來淨係諗住俾阿妹睇，冇諗過搞到咁大）同若干無端白事又會睇到之親戚係屋企／打電話黎尖叫
「嘩！！！！！！！！我個仔／（ˍ）上電視呀！！！！！！！！」（點解會上同上黎做乜佢地當然唔知同唔會想知，重點係「上左電視」）
外界反應普遍向好，呢樣不得不讚張大導一黎就擺NIGHTWISH "Sleeping Sun"係頭，淨係呢首歌已經吸引到好多人問「咩黎？」（雖然亦有人問，「Metal黎咩呢首？」）呢樣真架，乜我冇話你知張大導係廠一播呢個MV立即勁多人話鍾意等張大導今日專登幫人執多隻"Oceanborn"？所以咪話，又唔係話真係咁難聽／唔好聽，係肯唔肯行第一步遮（又或者話真係好犯賤，電視唔播的話點都唔肯試）。另外，有ｄ人好感動，因為第一次可以係香港電視節目睇到metal MV。希望之後仲可以有好多次。所以張大導唔走得架，佢一走，大家唔使旨意會再有呢ｄ「神蹟」發生（最起碼，係TRHK執之前唔走得，呵呵）。
就噉睇一集，大家當然未笑夠喉，噉就記住呢個下回預告：
「《Metal時尚坊》將於下星期三7/7十點半於亞視上映，果集會講六翼天使，請大家多多捧場！睇完個節目肯睇埋場演唱會我地TRHK仝人會萬份感謝你！」
基本上去到七月尾你每個星期都會有一次機會係電視機見到劉Sir。劉義呢，應該會收番幾日皮先，落街比人點相就廢事啦。
今日除左同音響公司ｄ人上高山開會firm實下星期五ｄ野，再同番緊工都專登番一番黎土瓜灣搵我食飯之老細會一會，之後都冇／唔敢出街。或者你會有ｄ意外，今日我係街度仲未比人的去後巷打。
今日係我開舖，亦可能係我最後一次開舖。臨別秋波，算唔錯啦。我已經收左皮喇，第時有野唔好問我，問阿威啦。我會專心做呢個「吹水唔抹嘴無責任樂評人」呵呵（擺明卸膊）。
蒲番頭，立即比人串爆。黎緊仲要每個星期都要比人串。所以點解我唔再開舖。
開完舖我都想番屋企訓餐飽，點知無端端比老細落order「收舖之後今晚去開會！」十一點半收舖就飛出佐敦 － 當然又係上bar啦。成五個鐘話就話開會其實係班友自己想飲酒吹水，真正「開會」講星期五演唱會ｄ野其實三個字唔使講晒。當中一半以上都係大我最少十五年之麻甩佬，我呢ｄ做細既純粹負責一面做秘書一面食薯條＆沙嗲串燒雞（好食）再順便食多Ｎ支二手煙。咦阿Davy小朋友原來你同我差唔多後生咋喎！
三點幾四條友飛的番屋企發現，原來我地大設計師阿Tiffany姐姐就係住我附近，比梗有一間係左近之七記仲要近多幾步！頂早知你住咁近搞海報果時就唔使又email又出尖咀拎辦又點點點啦唉唉唉唉唉唉唉！一早知你住咁近慳番ｄ功夫真係分分鐘早番個零兩個禮拜印好張海報真係無Ｑ聊而家！
成五點幾先訓著點幾又起身同老細搞野食餐飯，之後都係收下皮唔出舖算。因為聽日開始有排玩想頹都未必有得頹。
今日第一個節目係上高山。淨番幾日仲有好多問題未傾掂，又呢樣唔得果樣唔得，得果ｄ，俾錢啦。唉。下次去live house搞算，夠簡單直接夠爽快又唔使乜乜物物唔比點點點點。
第二個節目係落尖咀。都唔怕話比你知點解出黎尖咀，就係因為銷情慘淡大把飛賣唔出，所以要拎飛出黎文化中心做退飛（係度我唔會話點解會搞成噉，因為「其他人」睇到只會笑我地戇居唔會諗點解會咁「戇居」）。因為佢地話每日只可以退五十張之關係，今日我就拎左正正五十張上黎。點知上到黎先至話
「其實呢，你可以一次過拎定晒ｄ飛上黎比我地架．．．」
．．．哦。
我都唔記得第幾次上黎，只記得次次上黎印象都仍然係，文化中心票務處係我遇過服務態度最差之一個政府部門。不過今日好左架喇，或者下次上黎班友會肯笑口噬噬噉對住我（係笑口噬噬噉話「成個場一千個位十份一都坐唔到，城市電腦網仲要一張飛都冇賣過，抵Ｘ死戇Ｘ居！哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈！」）
出得尖咀，一定要上黎HMV，上個星期開始左crazy sale今日先出到黎，傳說中之FEAR FACTORY三十蚊隻冇晒！好在都仲有個亂葬崗有得摷下ｄ平碟，雖然同上幾次比今次係一隻正野都冇不過企硬咁耐HMV總算肯再開倉！亂碟之中有大量TOM PETTY & THE HEARTBREAKERS $20@，巨量INCUBUS $68@（係有興趣不過幾貴下），DEEP PURPLE隻經典"Made in Japan"孖碟版 $68（灰），THE JASON BOHAM BAND "When You See The Sun" $68（好有興趣不過好Ｑ貴）同幾隻COLLECTIVE SOULS $5-$15@（有ｄ興趣，下次先），已經係較大興趣架喇呢ｄ可想而知今次批貨係差過之前幾多（又或者係我太遲黎一早比人執晒）。結果搵到：
FAITH NO MORE "We Care a Lot" $20（呢隊係想搵後來發晒癲ｄ野，不過見呢隻第一隻咁平順手）
KISS "MTV Unplugged" $20（唔多鍾意佢地架不嬲，又係見平順手）
URIAH HEEP "Conquest" $20（似WHITESNAKE，唔正架，再次純粹順手）
URIAH HEEP "Abominog" $20（呢隻名作算係最大收穫，果然好正，不過今次就係得咁多）
唉，今次crazy sale都唔crazy好唔開心。或者真係要過海尋寶先有正野執。本來都想摷多陣不過．．．
今日第一個節目又係上高山。基本上大部份問題都搞掂晒，係差最麻煩果樣：傳媒。乜又唔得物又唔准，俾左錢都唔可以點點點，唉，張大導，睇黎你果日黎到真係睇騷架喇．．．
第二個節目係落尖咀。（真係好似琴日）黎做乜？又係退飛囉。之前好好手尾噉張ｄ飛撕開晒跟行排，令本來諗住冇撕到一大張睇睇就掂果位收飛姐姐一見到就
「下？搣開晒架？」
之後咀藐藐噉點飛。對唔住囉，早知冇人會買飛我就一張都唔搣原封不動噉退貨算啦。
行緊仍然係冇乜正野睇之HMV之時比老細搵左去土瓜灣食下午茶（已經係五點半）。傾咩就唔使理架喇，都係得一個字遮。
食完老細又出旺角搵DC謙食野，跟住出番黎土瓜灣又見到我，因為Henry叫食宵夜老細連踩三場。全靠Henry哥架靚車出到地茂館飲糖水。同邊個食去邊度食食乜野都係然係一個字架喇，一個而家連老細都耐唔耐大嗌之中文字：
今日第一個節目再係上高山。真係想搵一日唔使出黎都唔得。好風平浪靜今次冇咩大問題或者拗撬，星期五都咁順利就好．．．
．．．不過我硬係覺得唔係架。本身話今個禮拜開始逢星期三唔開，但係為左就番ｄ人賣飛（都唔係就，係搏有人會黎買）剛剛收左皮幾日又要重出江湖睇多日。係好多人，但係ｄ人唔係黎買飛，係買碟。吹脹。（話今日會上黎買飛果幾條友出黎！）越近場騷生意越好，硬係覺得係迴光反照。
夜晚好靜，都有三位客人。一位係大哥丞，專登上黎拎演唱會個song list。後日就開騷仲要負責做聲，係時間拎ｄ碟番屋企做下功課喇大哥丞。睇睇個song list，都幾意外，諗住主要玩新碟ｄ歌點知唔係，以為會用黎做開場果首反而．．．總之呢，真係想呢場聽得夠盡情夠開心，就一定要買晒《平等精靈》同《不死魂》。
第二條友Henry哥，借買碟為名上黎睇《Metal時尚坊》為實。好在今日開舖，唔使係屋企面對老豆老母＆無盡親戚之電話＆ICQ轟炸，最好就屋企冇人開電視冇人知道（雖然問番舍妹，播果時係全家排排坐齊齊笑）。好神奇，今次講power metal同六翼天使語速居然只有上次一半咁快，係用左NG四十幾次講到支力無氣講快ｄ果段？定係播帶果個較慢左個播帶速度？剛剛播果陣有個客入到黎，見到電視入面條友同開緊舖條友個樣一樣（「電視入邊果個靚仔ｄ囉」好多人話），都幾驚嚇架，佢仲不時望望電視又望望我睇下自己係咪撞鬼。
同樣今集講左咩我自己都唔知道，因為播果時我係搵緊窿捐，不過張大導演真係好強，話就話唔出得名同場騷ｄ資料，佢都慢慢掃張海報無聲地幫場騷做宣傳。本來諗住佢地淨係用STRATOVARIUS，點知仲用埋MANOWAR同PRIMAL FEAR兼自己做埋資料搜集唔使搵我講忝（知唔知我試過幾多次行行下街無端白事亞視打電話黎問「喂！聽住！呢隊玩咩？」之後再質個電話落個喇叭度要我聽歌答問題？）。我都覺得今次講得唔錯（係同上次比，之後果ｄ唔知點呢），老細睇完都話
「嗯，見你講得幾好，就唔炒你住啦！」
再講ｄ花絮比你地聽，講六翼天使果part好似好鎮定係咪？其實淨係拍呢段都NG左三四次，因為次次都唔記得佢地幾隻碟ｄ名同次序，結果要拍果時阿Wen姐係鏡頭側邊棟晒三隻碟係我前面先冇錯漏。
Henry哥笑完加幫襯完臨收舖又多位朋友阿Rax哥。就放榜喇喎，希望你可以代我入到Creative Media跟住做香港Steve Vai啦。雖然後日放榜不過都希望你會去睇場騷，因為TRHK需要你．．．ｄ錢。