再同場加映 － 探花兄試CAM之作：　《作為一個教師》
段片連當事人我都覺得越睇越七。唔好問段片入面我講乜。我都唔知自己講乜。

是日Dayoff。除了打機，還是打機。真係就咁睇係完全冇人相信原來我下兩個星期有十幾份功課要交。不過咁難得搞掂部新機點都要搵番隻John Woo Game 黎玩下。一玩就停唔到，跟住幾日似乎都係做唔到功課只會去探吳宇森。
"I made like Chow Yun Fat."

都可謂「有咁耐風流，有咁耐折墮」，上年去小西灣配屬，我就朝朝六點幾起身趕成個鐘車入黎，你班柴灣人就行幾個字搞掂；今年去油塘，你 班柴灣人仲唔死？五點半起唔到身就打個電話俾我，等我幫你地話俾校長知你地返唔切啦哈哈哈．．．

黎配屬，完全係退休Feel。番成日剩係要睇兩堂咁大把，其他時間就坐係度冇野做，嘆。不過過埋呢兩日就有排都冇得嘆。

油塘真係好好好偏僻，偏僻要走去隔離間中學買飯盒先有飯開。

退埋今日休就要復出喇。廢事今日又係學校冇野做，帶埋個算盤返學校。今日戰果係教識Janet姐珠算加做晒成本珠算練習。

點解妳班姐仔坐埋唔係講仔就係講仔呢？

一個學會入面通常都有兩個副會長，一個對內一個對外。我地組都採用左呢個雙會長制，本來之組長朱姐就係對內，教院入面佢就係我地組長， 但係係教院範圍以外，一切大小事務都係由我呢個對外組長負責。簡單ｄ黎講，即係小學入面ｄ野就我做晒，但係教院入邊一切除左做野之外都與我無關。

既然今日仲係退緊休，功課就．．．繼續John Woo上身！繼續made like Chow Yun Fat！

係配屬週最後一日，不過又係Dayoff喎。就係咁嘆。不過唔好再玩野喇，快手快腳爆埋隻野佢做野啦。

"I will leave tmr"
「咁快？」
前一排聽到大佬就返都冇乜點理，估唔到忙下忙下咁就到呢日。真係繁忙不知時日過。「點解．．．」呢句說話已經講到唔想再講。

又係星期六，又要開工。真係一日就可以體驗晒三種學生，一班就乖到痺教到我都悶，一班就冇助教的話就搞唔掂教到我都煩，一班就集合晒 成級所有搞事精英教到我都放棄。真係教晒成個Course之後下年實習見到咩學生都唔使驚。

點解．．．點解教院可以有咁多功課．．．「點解．．．」

點解？點解Steve Vai你之前都話未知幾時黎香港，點知突然間就話黎仲要係我最忙呢期先黎？點解？結他神呀．．．真係「點解」呢兩個字我都講到唔想再講．．．

七記魚旦終於回復原價，大副加價一百巴仙由五毫粒變成一蚊粒。以後逢青瓜堂Break都去七記篤魚旦之情景將不復再。

咦今個星期係交功課週，反而冇咁忙仲要好悠閒。睇黎唔係迴光返照就係暴雨雨前夕。

「嘩你好勁呀，搞咁多野連Mouse都唔使郁。」
有幾勁丫小朋友，呢ｄ叫做懶，只有好似我咁懶之人先可以記晒ｄHot Key連Mouse都唔使用。
又係廣告時間：想好似我咁懶，去《鼠鍵應用》睇睇啦。
我雖然唔會係全級電腦最勁之人，但係我敢話我會係全級「用」電腦最勁之人。 我不嬲都係Progressive User。

梁健平，講真教就唔係教得掂個人又唔係點好，成年最大貢獻就係全靠佢之前有日去左開會，令到我地成個Course進度延遲一個星期，連功課都十二月中先交。我無悔跟錯人。

你個英文增潤玩Drama & Poem？好呀開正我個飯。不過你班姐仔點解硬係要覺得玩呢ｄ野一定要用傳統港式讀法先係而我咁玩法就好唔正常呢？

又會咁神奇？居然一日開成兩個會大概搞掂晒兩個Present，仲要一晚內做晒個英文Problem 3？有冇咁完美？到左交功課週反而冇至前咁忙，起碼唔使又晚晚訓教院先。

剛剛話唔使訓教院，點知今日就要係教院過夜。聽日節目豐富，朝早ＧＳ要Present晏晝英文又要Quiz。都話教院ｄ「意義」係會突然間、無緣無故咁係你最唔覺意之時大量大量咁出黎搵你。

對唔住！Sam少！我居然．．．我居然著爛左你對同你「一起成長你與佢」既纖薄型拖鞋！真係好難想像到有人可以幾年黎都著同一對拖鞋 仲可以蝕到對鞋得個五蚊銀咁薄！而我！居然破壞左呢對歷史文物！我仲未同對野影相架．．．為左賠償！我決定買番對同款拖鞋再拎落工房將佢地磨左一毫子咁薄，整番對復刻版黎紀念！

ＧＳ個太空Present，Rehearsal玩過一次就夠其他野聽朝爆肚就掂。英文Quiz，十一課書佔成年三成冇得走點都要溫，一溫就溫到四點半但係點都有兩課讀唔到。 事實證明我根本就唔係讀書材料。入教育學院做乜？入演藝學院日日做秀好過啦。

ＧＳPresent算係咁啦，雖然有兩個Point講漏但係相信阿Sir都唔會知。係我太偏門定係層次高？我發現好多時我講ｄ野教院ｄ人聽完都唔知我講乜。

七記你都知道一蚊一粒魚蛋係冇人會買呢？加左價幾日就要死死地氣減番做五毫一粒。唔好又話係五折大減價呀。對我黎講五毫子一粒先至係真原價。

英文Quiz搞掂就算，成績我都只係預期係見得下人。都考完啦仲理黎做乜？與其懷緬過去不如展望未來諗下Visual Basic同Dreamweaver點做好過啦．．．

拳王二零零一終於出左。今集真係非常非常之「有趣」。如果你有睇開日本動畫同特撮片的話睇下隻野你就會知發生咩事。班韓國人真係玩野．．．

星期六中文又黎試教，不過又係玩即場即係唔使理。聽朝八點半普通話RPG，都係唔使理。「呢ｄ係聽朝既事．．．」

「．．．劉義這次的普通話有很大的進步，差不多有Ｂ了。」
「咁即係冇Ｂ啦MISS？」
淨係朝早飛車時溫左半個鐘， 算係咁啦。珠姐唔係度真係唔多掂。

今次捱通宵加跌五條都叫做有番ｄ意義，QUIZ掂之餘個英文版《狐假虎威》隻鬼又勁鍾意，英文整到個Ｂ今年就冇死。

落到機舖居然唔想打機，入左錢一面打一面充滿厭惡感，今次唔只係病咁簡單直頭係絕症。

前日就行行下爆拖鞋搞到赤腳遊教院，今次就手痕出門口幫人搞到鎖左門又赤腳遊Hal A，下次應該會到赤腳遊大埔。

係教院結果又係頹鬥頹大家都唔做野。聽朝試教呀呵？成晚就係去左呢度係咁睇。不過呢個網又真係勁正，極力推薦。

試教，唔使理丫，之前點計劃都好結果咪又係玩即場。剩係前晚同正場前綵排過下，尋晚都唔知留係度做乜。就當跌左五條。

功課又唔做，堂又唔上，返黎目的就係為左搞到人人都上唔到堂，你班友俾錢黎學珠算定係黎玩？

原來真善美村真係開麥記。而家真係「梗有一間係左近」，街頭一間街尾一間，以後落街買麥記之前都要諗清楚去邊間廢事行多一兩步蝕左。

咁就過左一個星期。好靜喎過得。點都唔似正週。
下星期節目：　星期二試教、星期四英文講故事、星期五Dreamweaver、再加再下星期一配屬兩份反思兩個Present

星期日，當然係休息日。打機啦。

"good~~~
I like your style~~
u make me feeling comfortable~~~"
多謝你既評語喎七哥。有好多人都好鍾意同我做朋友因為識左我之後點頹都好都會覺得自己係好勤力。

「估唔到你平時個人冇咩，個網頁就咁樣，鬼死咁騎呢！」
Jenny姐，我較喜歡 無聊 呢兩個字，話晒呢度叫 無聊齋 。

「做咩呀？」
「VB。」
「幾時交呀？」
「聽日。」
「咁慘呀？」
大半間電腦房ｄ人都係趕VB，真係強。不過唔好笑人喇，下星期到人地指番住我黎笑。

「星期五Dreamweaver要Present，星期四先開始做？好Impossible喎！」
我不嬲都係唔Impossibleｄ野唔做架啦璇子．．．
「我同阿漢傾過，劉義呢個人英文又得中文又得ＩＴ又得，老豆做教書老母係護士長，屋企仲有三個單位，但係都可以搞到咁懶。我同阿漢最後斷定，劉義係一個缺乏家庭溫暖而墜落教院既人。你係屋企冇家庭溫暖唔緊要，你入黎我同阿漢俾番ｄ家庭溫暖你．．．」
好丫。無端端多左兩個契弟照顧下我溫暖下我，我又唔拘呀。

呢幾日突然間聽多好多野，睇多好多野。今日段記特別號：《天涯孤客話今時》

今日顏色：灰
已經晨早出門口啦，點解又俾我遇到撞車？一個月起碼都見兩單．．．你撞唔緊要呀，搞到我又搭多三個字車真係麻叉煩．．．
屋企唔見配屬個File，上到８３３摷成朝都唔見，唔見晒ｄ觀課紀錄，點做功課？下星期一就係囉喎．．．
「喂我抽到三十一喎！後個星期先至Present！」「哼！好威咩！我知我會抽到三十二！」死喇真係笑得人多今次天譴，ＩＴPresent咁都俾我抽到三十二．．．減廿三。Sam少，尋晚係電腦房趕通宵之各位人士，盡情指住我笑啦。
「你死喇成身都黑色，我地個Miss話上堂唔好著到咁黑，小朋友會覺得唔舒服．．．」咁都有事？係咪要我即刻上８３３問 漢 借套灰西黎著．．．
點解我借左部機抬生抬死之後，你個蘇詠梅至話俾我知原來你地有機提供？搞咁多野為乜？
乜事？點解今日會講唔到野？練過都可以唔記得，你個Sam少又一個字唔夠玩完，要我爆肚爆兩個字咁大整蠱．．．
「劉義個試教係好好，非常之詳盡同清晰，但係似乎提問少左ｄ同太似Presentation，一直都係咁講．．．我對呀麥旭森今次個試教個印象就好好，簡單易明，又帶得唔錯．．．」 哼！唔係我講得太多太長！係Sam少段野太快太短！我段野只係相對地長左同少左問題．．．Sam少！你好野！唔好唔記得係我夾硬黎先湊夠三個字！
中文講唔到，英文又講唔到。Suzanne，今日我係講得少野過平時幾倍，你都唔使咁口黑面黑丫，我有我苦衷．．．
我ＩＴ係掂，但係我冇話過我美術同設計掂丫。點解蘇詠梅你居然要我做設計證書仲要下星期三交到稿呢？呢個係比一日做好VB更Impossible之Mission Impossible．．．
返到屋企，「交左學費未呀？」「老豆你唔係話入左數呢咩？」「我係話入左數落我個支票戶口度呀！」咁又俾人小。係囉係我錯囉老豆。似乎過期個罰款都係要我哽。
做功課啦。點解？點解．．．全部碟都留晒係８３３？想做功課時都唔俾我做，係咪咁趕盡殺絕？嗚∼∼∼
不過好彩Net姐你一言驚醒夢中人幫我整番個File出黎，咁先令我今日有番一線曙光．．．

油塘 ＞ 北角 ＞ 旺角 ＞ 尖咀　今日又係行程豐富　不過聽日英文要講故仔放學要開會後日又Dreamweaver喎點解仲可以走黎走去

雖然唔想俾人昆，但係有陣時又真係唔得。晨咁早旺角ｄ舖又未開，碟又要自己搵，最緊要就係冇乜舊碟雜碟。想買好ｄ，你話唔去HMV點得？ 一次過買成五百蚊碟，咁大過人都係第一次咁豪。雖然係旺角起碼可以平一百，但係一早幫你執好晒ｄ碟又新舊都有，就當俾加一啦。

 　　　Pink Floyd　最新精選雙碟　一百二十
 　　　Smashin' Pumpkins　最新精選雙碟　一百四十
 　　　Yngwie Malmsteen　九八年新派古典大碟　一百七十五

一隻三年前之古典大碟居然可以貴過一隻最新雙碟？點解次次我有興趣ｄ野都一定貴過其他主流野？

「除左Present兩組人之外得五個人黎！你地五個真係好學生！」
「我用晒ｄQuota咋Miss．．．」

英文Problem 3，事前完全冇度過稿乜都玩即場，事實再一次證明隨意勝刻意。個個睇完個《狐假虎威》英文版之後都話Present得勁正PowerPoint勁靚， 人人都話唔係A頭就係A尾，連隻鬼都勁鍾意。但係結果係．．．B。得此下場皆因遊戲規則係由其他人Assess你，而剛剛好幫我Assess之兩位姐仔都只俾個B咁大把。 咁就中招。但係既然遊戲規則係咁就我都冇計，只有嘆一句「遇人不淑」。Peter仔，睇下你有冇人性喇今次．．．今年英文拎咩就係睇你今次點判．．．

今次配屬主修報告組合真係好大驚喜．．．又係得我一個咁特殊觀課睇到ｄ野同你地三個唔同，得啦又係我俾人針住好似打麻雀俾人地三個圍攻一個。

Dreamweaver Dreamweaver 都係 Dreamweaver 總之成晚就係 Dreamweaving 仲要一次個 weave 兩個夢。
漢 ，下星期我都幫你唔到喇，你個Dreamweaver自己醒定ｄ啦．．．

朝早六點先訓，訓到一點。咦兩個西都仲未搞掂喎三點半就要Present點解仲可以咁嘆？正所謂「一日不吃飯，一日不做事」，Sam少你開完工之後買埋飯上黎先好叫醒我．．．

三點九上堂之後Present一個字就走得前後真正上堂時間唔過三個字。咁樣上堂先有效率嘛，「能者走之」。
死喇做Present完全唔準備玩即場已經成為習慣，咁樣落去我驚會玩上癮次次都唔做野靠即興咁就死得．．．

估唔到而家連巴士都有教院廣告。昆到幾多人呢？唔知遲ｄ會唔會為左搶客搵楊思琦黎做宣傳大使．．．

旋轉餐廳終於都執喇．．．嗚．．．Sam少．．．你同璇子．．．嗚．．．

估唔到今次會輪到我俾高層觀課。呢趟真係陰到正。
我係教得唔好。不過並唔係因為我教得唔好，只不過係我唔鍾意呢種「教小朋友教法」黎教書。真係睇你個高層示範點教時我都頂唔住。你仲叫我好似你咁教，點掂呀？仲有，班小朋友驚你唔係因為你有威嚴，只係因為你生保。
「跟住兩堂我都冇時間睇喇，你自己試下好似我頭先咁做會唔會好ｄ啦。」我都知你睇我睇到唔想再睇，慢行．．．
好野你班小朋友終於都嘈到主任同校長都出黎嘈跟住大家都冇好日子過。
可能今日就係我人生之一個轉捩點。

死喇又發癲，國際學校分享唔計分就亂玩野，繼完全反傳統用英文Present之後再將校長寫到成日串其他國際學校咁，再落去唔知會點．．．不過咁先似做功課。

人又係百二蚊，我又係百二蚊，點解人地可以咁嘆，對住成三十個小朋友但係個個都咁乘咁聽話？真係係呢班入面做助教都做得特別開心。都係一句囉：咁唔好彩抽到班問題學生就冇計惟有照哽，遊戲規則係咁除非唔玩如果唔係唔該繼續挨落去啦。

半粒鐘內搞掂六百字報告仲要送多二百字俾佢，狀態返黎喇。咁先叫做「做功課」。好耐未試過，好耐未感受過。

又係「一日不吃飯一日不做事」，等人送飯之際又係好得閒冇野做，結果係幫阿嫂個Present整左個PowerPoint加教院一圈遊。真係咁得閒就做下自己ｄ野啦。

純英文Present、「完美梅花間竹」一個做單數版一個做雙數版、完全唔認真去報告．．．好耐未試過咁癲，突然間咁玩反而有少少憟忝．．．

好輕鬆就做晒配屬ｄ野，又有立哥陪，好今晚一次過搞掂個VB佢！今日係升左Year 2咁耐以黎最有衝勁之一日。

零時零分正。估下我係邊？原來係電腦房。有房上都唔上，證明我今次係幾有決心。目標係今晚做好最少半個VB。結果係一直係度唔知做咩剩係 聽歌。因為雖然我配屬搞掂晒但係立哥未掂，得啦阿立哥我等埋你先開工．．．
「喂今晚唔上房訓？呢度點訓呀！」
「電腦房唔係房呀？要訓實訓到架！」

由尋晚九點開始，不斷見到有BEd二年生進出電腦室。有時我都因為自己居然可以咁早做晒配屬ｄ野感到幾自豪。千二字係咪真係咁難做呀？

「HTML同Dreamweaver有咩分別呀？」
「HTML就係打指令話俾IE知版野係點，Dreamweaver就係直接用個程式做個網頁出黎，好似加相時HTML就要打句式話俾個Browser知拎邊張圖同放係邊， Dreamweaver就可以直接整張相出黎再自己擺位。」
「咁用HTML之前咪一定要知道幅圖係邊樣囉？」
「咁梗係。」
「咁HTML唔係咁好喎，都唔可以直接睇個效果係點，要開左版野先知做成點。」
我呢個長期HTML支持者真係用左咁耐都冇諗過喎呢ｄ野。係教院真係好少撞到好似你咁會諗野之人囉。立哥你真係識得過。個人係好，除左做功課 太過抽絲剝繭太拘小節喇，一份六百字報告剩係睇幾版仔英文資料都用成兩個鐘，四粒鐘都未搞掂．．．好似除左呢份之外仲有另外六百字喎．．． 按呢個進度剛剛好聽朝八點半上堂前就完工。最後事實證明正是如此。

Present過程係點唔重要，最重要係我冇識錯人。

「下次你地想走堂呢就唔好走剩幾個喇，大家夾下ｄQuota，跟住再Send封Email話俾導師知你地唔返，咁我地咪可以上少堂囉。」
見過鼓勵學生集體走堂之阿Sir未？繼之前一次凌兆興再為大家帶黎一堂「大專堂」。真係呢ｄ先似番ｄ我地Level上之堂。開多班安哥班同大家吹吹水咁正當然要支持，之但係有幾多人肯俾兩個鐘出黎上一堂唔計出席率之課外堂？

今日金曲：光輝歲月
「．．．今天只有殘留的軀殼．．．」
今日只可以唱呢句。無論係個人定係個VB都適用。仲可唔可以唱埋落去就要睇聽日喇。

又係零時零分正，又係時候估下我係邊？今次終於上房喇，聽日VB Present電腦房一定爆，費事到時霸唔到位冇得做VB又唔可以上房訓咁就笑爆咀。五條野，豪俾你啦。
尋晚．．．應該係尋日朝早六點幾先有得訓，今日又幾點？．．．做啦而家都五點囉．．．

六點半，訓。九點半，起身。十點九，落樓。十一點半，Present。然後，唱歌。
「．．．迎接光輝歲月．．．」
堂又唔上野又唔做，阿Sir見到我個「發難富翁」之後都睇化，評語都冇唔知講乜好。不過好事黎丫，對我黎講冇評語就係好評語，過到骨就算。黑暗日子終於過去，光輝歲月卒之來臨。

「你企出黎個款真係好似先生架，係非常之似。但係就係差ｄ．．．」
「．．．氣質？」
「唔係，氣質你都有．．．係你太自我喇。」
教院一大教授蘇詠梅都咁講。 事實再一次證明我都係適合入演藝學院多過教育學院，一有野講就狂，一狂就係咁搶，係咁搶就唔使問問題，唔問問題學生就好很悶，咁就會俾人小教得唔好喇。不過而家．．．有得揀咩？

兩日黎夾埋都訓唔夠五個鐘，返到屋企就大昏迷。聽日要交張Cert稿俾蘇詠梅喎。不過呢ｄ係聽朝之事。

十一點起身，好耐未試過囉。訓成十幾個鐘，又係好耐未試過囉。

是日全休，真係好頹。功課、Cert，「今天的事明天做」。

想知何謂「雞肋」，唔使讀《楊修之死》喇，去「師範」睇下我個Sem 4時間表啦。

今日終於正式落Office開工。睇番ｄ信，原來我仲未同佢地簽約。再睇多眼，原來每星期最少要做兩個工作日。死喇今日係做／挨左好耐但係成個星期加埋好似都唔夠一個工作日八個鐘喎。
證書設計又係Copy & Paste，將海報ｄ公仔整番晒出黎擺過位咁就變成張證書。我就覺得非常之老土但係班人睇完又話好。點解成日都係我ｄB-Side反而係最掂？

似乎尋日都未頹夠。上到房，浪客行之後又係訓。咦好似仲有兩個夢加埋聽朝普通話考試喎．．．今晚似乎又要通。

又係六點半訓，不過今次訓多八個字十點二起身。好似好開心其實係死得，因為十點半就要去普通話考試。本來計劃係九點起身練好普通話，而家係兩個字播ＣＤ潛移默化幾多得幾多。結果．．．算啦。

挨左成晚，最大成就就係．．．整左呢個全級最差最７最樣衰之網頁。 漢 ，記住唔好話俾人知係我幫你整架，我唔想俾人笑兩年呀．．．

再次隨意勝刻意。整膠片求其每版塞幾個Clipart落去我自己睇見都覺樣衰，結果班人又係話好。成日就係坐係度等野做仲要求其做ｄ野就交到貨，呢份工係咪真係咁易賺錢呀？
原來唔只嘆，份工福利仲好好，除左送多一個廿MB Email加多廿MB Harddisk，仲要有多個UNIX Account加無限Print Quota，正！入左教院第一次感受到教師福利係幾咁豐富。

我開始懷疑自己係咪真係好頹。我一條友要搞兩個夢仲有學習報告都係一晚搞掂晒，五點鐘功課死線四點臨走都仲見到成電腦房都係趕Dreamweaver。會唔會勤力既其實係我呢？冇理由丫．．．

教院交響樂團．．．水準好一般咋喎。個指揮動作唔夠豪，玩變速又唔齊，個小鼓ｄRolling又散又唔平均。唔好話我知佢地出去表演都係咁水平呀。

Cherry姐，你冇睇錯係我錯；棋姐，你係病不過未病到咁都睇錯。晏晝交功課時唔覺意Upload錯份功課Overwrite左呢度，雖然我已經盡快返到屋企立即搶救， 咁都俾你兩個睇到。第一件事，SOR，搞到你地想睇都冇得睇。第二件事，多謝，估唔到我個網都有忠實支持者。

今朝七點半起左身。好早。不過尋晚八點半就訓左喎。不過咁早起身又冇野做，都係滾番去訓啦．．．

清左今個星期ｄ功課，今日珠算又唔使返，是日Dayoff，亦為好耐冇見的「完美的一天」。
「喂，乜唔係下星期一交青瓜星期三GS教案星期五配屬再下星期GS Portfolio加VB再搭配屬咩？」
．．．難得我咁合皮．．．唔好敗我雅興好唔好．．．

係好多功課黎緊，係聽日就有野要交，但係反而好似好悠閒咁喎。呢個星期睇黎淨係訓今晚就夠。做野？食埋桶雞先算啦。

星期一三都係交教案，理論上只要搞掂一份就可以一稿兩投。咁難得我尋晚起勢猛寫，點解到我返到黎你先至話我知原來有呢個一千字上限？ 淨係成堂頭十分鐘都已經成千幾字囉喎，點減．．．咁我惟有．．．訓啦。

「．．．劉義呢條友簡直係一個奇人，以佢既飲食習慣同生活習慣，佢冇理由到而家都仲未死，惟一解釋就係呢個係一個奇蹟．．．」
我由出世開始已經係一個奇人黎架啦。不過再係咁樣玩落去未到三字頭你已經見唔到我。

算啦，個教案係超一千字就超一千字唔鬼理，由頭到尾都話唔計分都唔知咁執著做乜。結果晨咁早做完又係撻落床訓。查實今晚呢五條可以慳番。 不過做完野訓係張床度，靜靜地諗下野，聽下Beyond感受一下，同班友發下癲吹下水，呢ｄ野又真係係屋企做唔到。
「好耐都未試過做功課做得咁輕鬆喇。我地Year 1既狀況返黎喇。」
五條野，就當買番Year 1之感覺番黎啦。

「喂！前兩日ｄ段記呢！」
星期日做完功課之後頹到仆街，點知突然間又話今日要交個八堂教學大綱，咁頹，呢兩日功課都有排搞啦。仲要打機呢？邊有時間寫段記．．．

冇堂上，都要返教院。目的係交功課，重點係開工。「做乜？」幫個比賽打參賽學校紀錄囉。「打字咋嘛！咁嘆！」打字係好嘆，不過今次並唔係打字咁簡單．．．
「乜而家ｄ老竇老母咁鍾意玩自己ｄ仔女同先生！個名都唔識讀，個字見都未見過！禾字邊加個春字？世界上有呢個字咩？」
平日一分鐘五十字小意思，而家有三十字都已經好野．．．
繼 森林木 之後，又一個好名（定又一個俾老竇老母整古之不幸兒童？）： 屈能伸
今日朝十晚六做足八粒鐘一個標準工作天仲要返屋企加班，終於似番Office做野囉。咁我咪真真正正變左做個OS囉？哈哈．．．

去到惠康，因為一粒魚蛋而推跌成個遮架。

好很耐冇見過電視。
楚留香，ｄ特技「媲美無線」．．．楚留香學小李飛刀？小李飛刀原來係彈指神通？不愧為 「新」楚留香
「其實呢條題目，我地之前都問過．．．」陳啟泰，乜百萬富翁唔係話每次玩都係十五條全新題目咩？
「以下邊隻野唔係數碼暴龍主角？」乜ｄ主角唔係人黎咩．．．而且點解問現場觀眾居然班師奶會識答？

尋日美國搞左個九一一三個月悼念，今日我又搞番個一一一二一個月紀念。
用左部廠機成個月，毫無疑問，冇RESET掣存在好多時都搞到我想爆粗，因為雖然係新機但都冇用因為ME係要Hang就Hang，Boot唔到的話又冇得Reset，個Power掣又唔知點解係唔可以用黎熄機，拉電線似乎係惟一辦法。 ME又真係煩到爆粗，個介面同九八時唔同，用起上黎完全係兩回事。最明顯就係多項選擇變晒做Drop List，加「我的電腦」同「我的文件」調左位。用左成個月，到而家都仲未用得慣，仍然成日想開我的文件變開我的電腦搞到爆晒粗。 而且話係１．７激但係就咁睇速度同我以前部三百五冇咩分別，有ｄProgram行起上黎仲要慢過部舊機好多，張Sound Card又唔可以好似舊張咁每次只可以俾一個Software佔用，Modem冇得熄聲之餘連線時又會整窒部機， 我完全係好好好想打電話去IBM對住條經理狂講粗口。不過，亦都係毫無疑問，廠機散熱同穩定上都好過砌機，起碼開機同LOAD機時部機唔會好似地震，ｄCD同Floppy入左部機之後又唔會六十幾度咁出番黎。但係，粗，仍然係有排爆。

又係冇堂上都要返教院。目的係上錄影堂，重點係開工。遲ｄ微格教學要錄影，專登返黎上堂學點樣用微格教學室拍野。點知點七開工，搭八收工。阿立哥點解你話堂野要上成個鐘？好在跟住有工開，如果唔係就真係爆粗都無謂．．．

半個鐘唔使打好一千字，唔算好快丫。又唔知點解班友又當正神咁拜。正喇咁你地請到個神打番黎，每個鐘四條八咁抵直情係賺番有突。
「喂我仲未打好探究篇野，又要打上網篇野．．．」
「唔使打喇，頭先我幫你打左。」
「咁快？咁你不如幫我打埋探究啦。」
「拎黎啦。」
雖然唔係好多人識我，不過又有好多人鍾意同我一齊做野，因為我做野實在太有效率喇，我做兩份人地先做一份野。快手之結果，全部人咩都俾晒我做。所以話呢個世界知才濫用。係咪係都要迫我頹俾你睇先安樂呢？

返到屋企，打機啦。完全唔似下星期一二都有大Project要交。不過發完夢又點會有心機做功課？

今日配屬．．．
「．．．咩？點解又會成日都係屋企？」
冇計啦，連個天都幫我，一起身就痾到仆。SOR呀各位，我都唔想架，個天衰囉，今日先黎玩我，搞到我呢個組長唔可以番黎同你地共患難．．． 對唔住！我居然一個人留係屋企打機，留低你地係學校由八點坐到三點半戇居居冇野做！我唔配做你地組長！

不經不覺，已經到左星期五。下星期一GS Portfolio，星期二VB。有陣時真係唔想咁頹，之但係上幾個星期忙到九彩，突然間做好晒ｄ野你就好自然開始頹廢，跟住就算再有野做都唔會有心情去做．．． 先用大量功課做到你氣咳，搞掂晒放鬆晒之後再整多幾件乘虛而入，教院果然夠陰濕。不過暫且放下一切恩怨情仇，打機罷啦．．．

珠算日。全日都係開工。晏晝教完三個鐘之後又要再出樂富幫人代堂。
探花兄，所言甚是，既然係代堂，班學生係差係唔上堂，所與我無關，理咁多做乜？呢番說話我會記住．．．之但係問心，有陣時我又真係唔想咁求其交貨就算．．．又一個矛盾。

黎啦。聽日GS，後日IT，死就死啦。呢兩晚肯定做死。
GS Portfolio，係好易做不過太多野懶執，係好想做不過冇時間冇計。

係多野做到仆，但係又專登由七點到九點用兩個鐘睇小說。「咁勇？好得閒乎？」當然唔係，睇黎就係為左我呢個GS Portfolio．．．倪老匡，估唔到到頭來我做功課都係要靠你．．．

做啦。搞掂GS Portfolio，今日節目係無盡VB。
VB，點解而家先黎玩我？點睇我段野都冇寫錯，點解你硬係唔肯整個結果出黎？由頭到尾都錯晒唔緊要，點解你係有時中有時唔中咁大整古．．．
開始好有信心IT呢科下年要Retake。

幾乎連通兩晚。不過，VB，仍然係無窮無盡。計算錯誤。
真係讀教院咁耐，第一次真係完全做唔晒而交唔切、交唔到功課。
其實應該可以早幾個鐘做得完，不過越係接近完工就越係做得慢。燈枯油盡。
過左五點，搞掂，知道遲交梗，滋滋油油咁做都唔緊要。係輕鬆好多諗野都諗快左，打字又快一半。又係一句，無壓萬歲。
一邊做，一邊問自己：「其實我係做Game，定係教學軟件？」
「果斷ｄ啦，做唔到咪唔好做囉，如果唔係到頭來盞唔夠時間做其他野。」成日同人講呢句，但係就唔識同自己講。結果俾自己累死自己。

十一點半，終於返到屋企。三日黎第一次。返到屋企即刻兩個世界，仲有時間打幾個鐘機，死未？
挨左咁多日，又要唱歌。
「．．．今天只有殘留的軀殼．．．」

「由今朝開始，遲交都要扣１０％呀！」
梁健平，呢趟真定假？起碼半班人有事喎咁．．．不過係真係假都冇所謂，遊戲規則係咁，這是我應得的懲罰。唔扣分我咪當Bonus囉。
一起身未出門口已經黑到痺，估唔到返到教院仲有排灰。交功課日先至壞剩一部彩Print都算，點解你班尋日交左功課之人仲要印多幾份彩色野俾阿Sir搏加分？我唔知你印多咁多彩野阿Sir會加多幾多分，剩係知你搞到我返到黎成個鐘先Print到野，遲多一個鐘交功課阿Sir一定扣多幾分。

十二點半，交完今年最後一份功課，繼續唱歌：
「．．．迎接光輝歲月．．．」
冇錯又到光輝歲月。下份功課下年先算，今年，終於歎番ｄ。不過，仲要開工．．．

用左咁多日腦，係時候俾個腦休息下喇，今日去做下體力勞動，去打鼓啦。
鼓初階班，果然係初階，連阿Sir都話「你都識打，不如去機舖練好過啦．．．」真係打得機太多。

一搞掂校務就咁多節目，一次過見兩個回歸人。
Victor，好耐冇見，都係一樣，咁頹咁豪。
大佬，好耐冇見，都係一樣，咁淫咁賤。
睇黎，大家對畢業之後都唔係咁睇好。個個都覺得畢左業之後唔知做咩好、唔知有乜做，反而最有目標個就係我。不過咁只係因為你地太多選擇揀，而我就冇得再揀。
Victor 兄，橫掂你四年之後出左黎都唔知做咩好，不如呢幾年搏埋個哲學佢啦。哲學畢業讀多年就有得做高級公務員，仲好賺過我喎。而家Drop左哲學，可能好似我咁，「冇得再揀．．．」

兩點半先起身，呢幾日真係「只有殘留的軀殼」。Sam少，唔係我唔想返黎救你呀。不過我返到黎都夠鐘收工，咁我就費事返啦。
「九月不努力，聖誕徒傷悲啊！」
．．．阿Sam少我唔係想串你．．．不過見你個ICQ Info寫得幾好．．．咁咪擺上黎分享一下囉．．．

做完功課，跟住輪到開工。似乎都係冇假放。
「嘩有工開，咁咪有錢搵囉。」
搵到錢，不過冇假放，咁咪即係有福冇命享。

六點半起身。好很早。點解？配屬囉。又要返小學睇人地「冬至聯歡會」。成日作為就係幫人地清野食同埋做歡樂先生。真係食薯條都食滯。班友都幾有趣加幾夾硬黎喎，人地放聖誕假佢地就放「冬至假」。
「冬至大過年嘛。」

我劉邪！真係邪！先係創藝，今次前衛！只不過係想唱下K，點解平時唱開幾間全部都冇晒？我幫襯開邊間就摺邊間，咁我呢個大聯盟支持者以後就要瘋狂幫襯加州紅，邪到佢地執粒為止！

冇K唱，結果係同YiuLeung尖旺一日「行」加HMV瘋狂買碟。又冇左三舊兩條。
Queen:　A Night at the Opera
Queen，七幾年紅到爆之樂隊，你應該未聽過。但係你應該聽過"We Will Rock You"同"We Are the Champion"。 呢兩隻經典就係出自Queen。「咁咪好Rock？」唔好意思，冇你想像中咁Rock，呢隻碟係玩彈住結他唱歌劇之Rock Opera。聽ｄ野真係越來越唔正常，繼上次「電結他協奏曲」之後又黎多野Rock Opera，跟住唔知會係乜。個銀包亦唔知會剩到ｄ乜。
呢隻碟一九七四年出，但係ｄ歌到而家聽番都唔覺過時。其中一隻 "Bohemian Rhapsody"更係搖滾樂史上一大經典，你點聽都會覺得呢隻歌係非常神奇，因為聽完之後你先會知道原來搖滾係可以咁樣玩，Opera原來可以Rock住黎唱。
「"Bohemian Rhapsody"？好熟喎個名。」係呀，十幾年黎呢隻歌俾人重唱過幾次，最近一次重唱就係王菲三年前個演唱會。不過，想聽的話，唔好聽王菲版喇，因為同原版相比王菲版個水準真係．．．

是日Dayoff，好耐未試過。一點起身，跟住食飯，打機，再食飯，咁就一日。完美的一天。

好很涷今日。涷到手指都僵晒。不過，點都阻止唔到我打機。
又係打機打成日。又係Dayoff。又係完美的一天。不過聽日開始應該有一段時間唔可以咁嘆。

九點鐘開工，點都拖到八點先起身。唔得再係咁落去下星期開始日日八點半上堂實死。呢幾個星期點都要練番每日七點起。不過直到星期五前日日都Dayoff，睇黎呢件又係下年之事。

開工。又係咁。「能者居之」同「知才濫用」，自己揀個。人四條八一個鐘我四條八一個鐘，點解Miss你係要將所有野都派俾我做呢？我都唔知自豪好定爆粗好。深切體會「做又三十六，唔做又三十六」之真理。

「聖誕快樂！平安夜，有咩節目呀？」
冇。我個人不嬲都冇咩節日氣氛架啦。平安夜咪留番係屋企平平安安咁打機囉。

《康熙帝國》，有冇睇？居然睇左一集。成半個鐘就係講一個阿太點死。不過，又拍得幾好睇。
話「會有少量暴力鏡頭」，個「少量」原來係打仗斬人斬到ｄ血係咁飛，飛到個奸角成頭紅色咁解。好想知，如果拍完之後個奸角個頭沾得唔夠多血的話，使唔使拍過？

三點起身。好野，仲話要練番早起身。

聖誕節，對我黎講，都係咁丫。打機啦。

David Letterman，好耐冇見，專登搵你黎陪我過聖誕夜。

屋企成村人上黎打牌咁大整古。探花兄，打救我啦。好無聊咁出左去獅子山「睇」人燒野食。
探花兄，先話你冇帶Band房鎖匙，自己後冇帶941鎖匙，好似識話人唔識話自己，不過，我咁講有我理由同諗法，不過有時我諗野又真係可能同時牽涉太多範疇，所以，算啦，你明我咁講係有原因就得啦。

九四一開房，又係睇人打牌。
估唔到而家連教書都可以外判。先將唔同技術學校合併成IVE，而家又將ｄ課程外判番出去私營，政府真係好野。教得唔好唔緊要，最緊要係要俾多勁多學費。咁難得有Fund-Dip呢樣野救番唔少人，點解而家又再整番死班人？ 不過都睇化，當教院ｄ教授都可以狂小而家個教育制度同政府時，我呢個小小準教師聽到呢ｄ野都冇咩好講。
星期五上鳳凰山咁益智？睇下開工開成點同個天點先啦。

三點一，上鼓班。三點二，阿Sir話：
「得喇你今日走得喇。」
．．．成個鐘剩係掂過套鼓一次咁大把。點解個初階班可以真係咁初階？呢三舊五跌得真係慘，真係自己搵本鼓書卜間鼓房自修都唔使咁貴．．．今堂開始轉移目標，都係練鼓，不過係非洲鼓。

返到屋企，唔好玩野喇，開工。

之前搵生搵死係咁搵人今日返黎幫拖，點知最後三丁友得閒到爆慢慢做都兩點半收得工。枉我係咁幫你打鑼打鼓。
我發現咁多RA當中，好似得我一個識電腦咁。Word、Excel、Powerpoint、畫圖．．．除左打下字之外幾乎同電腦有關之工作都係由我負責。 我成朝就係咁做，另外兩丁友就一面打機一面猛講「好悶呀，冇野做。」吹脹。
度左兩日，都係設計唔到比賽紀念品。都唔知點解搵我呢個美術咁差之人做設計。呢ｄ野好心就俾班姐仔做啦。

鳳凰山計劃，失敗。得番三條麻甩佬，結果都係上唔到。行山，似乎，新年啦。

今年最後一個星期六．．．又點？都係打機架啦。我都唔想架，不過暫時冇工開剩係on call，你諗到仲有其他野好做咩？
係好想睇《暗戰》，點知成場剩番頭兩行。睇戲，似乎，下年啦。

頹左成年，今年最後一日終於都益智番ｄ出去燒野食。一餐食成日係幾抵，似乎最貴係交通費。
似乎大家都係為女所困。希望大家下年今日唔使再為同一個問題煩惱。

咁多年黎最戇居最無聊之一個年尾。九四一淪落，一呼百應風光之景將不復再。希望下年同一地點唔會發生同一事件。