段記

祝妳愉快

16/2/2005 WED

劉Sir新春精讀班正式開張。叫得新春精讀班，當然要有ｄ賀年食品，番到黎第一件事唔係教書、唔係印notes，係食年糕。阿姐屋企食剩左舊年糕，知今日我全日蒲頭就煎晒成舊番黎，
「就過期喇！你同我食晒佢！」
真係成舊磚咁大呀。十點幾個字仲係得四五個人，又要成磚年糕掟埋黎，都廢鬼事理開埋餐先算。班友見劉Sir得個食字就齊齊響應唔上堂運動，第一件事就係屈劉Sir請飲野。可能食年糕食慒左，劉Sir又真係醒左八十銀佢地落七記掃貨，
「同我清盡呢八十蚊！ｄ貼紙留俾我！」（有呢班學生，真係賺幾多都唔夠食）
除番每人十幾蚊直頭請食早餐，班友買左成袋野飲野食上黎，一黎到已經搶，搶到個袋剩番一包375維他奶先識得良心發現
「算啦，呢包俾劉Sir啦，可憐下佢啦！」
噉都算，點解叫你班友買足八十，結果只係買左$74.3咁大把？一包貼紙成廿蚊架大佬差果五個七就可以換多包架喇陰公！你班友仲要手痕搣左一包忝！又冇野食又少左包貼紙，灰！

繼續食年糕，食下食下越黎越多人差唔多全班番晒，死，迫住要教忝。而家朝早得我一個真係慘，冇得屈人幫我影印忝。影完ｄnotes（其實只係拎本書影幾版當天書，你估我真係會咁得閒自己整咩），都已經成十一點。一早番左黎果班冇乜所謂反正佢地有劉Sir包飲包食，遲左番黎果ｄ喊晒口
「咁遲先開班，又冇得分野食，早知就唔咁早番啦！」
可能做補習做得耐，雖然今堂係幫班友補下星期三英文考試，但全堂都冇乜教過英文，真係精讀班教法試題重點一一擊破。份卷咁難，隻鬼又唔係教得好，班友英文又唔係特別掂，三個鐘根本冇可能教到點樣寫正式商用英語同書信英文。與其係噉，直接講一封信格式係點，之後掟堆notes「背晒入面ｄ例句再砌番封信出黎就得架喇！」教果個好似好多料俾學生教得好pro（雖然唔係），聽果班覺得上完堂之後好似真係一定考到合格（雖然好難），課室外面果班人覺得教果個真係好勤力又教到聽果班好開心，最重要係，唔需要教英文剩係集中教格式重點（教埋英文的話我估開足成個禮拜班都得），派晒野解個零鐘就教晒，大家都有得早放，人人都開心，一石Ｎ鳥。

落左堂夜校部唔知咩賀年節目成村幾十人上黎切晒燒豬，個個都有得分豬肉，但唔關我事，上完堂ｄ燒肉差唔多比人搶晒，我只有繼續安份守己地食年糕。食完年糕（唔係食晒，哽極都仲有半磚），就過一過佐敦搵阿Jens拎野。呢個鐘數撞正番工時間，都幾驚行過佐敦果頭會撞到番緊officeｄ同事。食完番到學校又係繼續食年糕（．．．），幾經辛苦食剩三件，成舊磚終於比我哽晒喇！食到喊呀真係，抵食到喊嘛！食左成舊年糕當堂滯晒，係時候運動一下，學校之前訂左匹布今日有得拎，阿姐過左灣仔拎野，ｄ高層又唔會做野剩係點人做野，噉當然又係我啦！難得有得鼠出去蛇王，我十分樂意做呢ｄ苦差架！間野係深水步黃竹街，個名好熟我記得我黎過喎，冇錯，同上次一樣，中晒招。條街話係深水步，但查實去到深水步地鐵站睇地圖係發現冇呢條街存在，因為正確黎講，條街係位於太子－再正確ｄ黎講，係太子＆深水步交界，即係無論邊個站落車，之後都係要行餐死先去到。九月尾時呢度有間小學請TA，親身交表的我（係，唔知點解我搵工係好鍾意親自遞表，浪費無數金錢同時間），又係好似今次噉，深水步站落車之後逐個街口問人，指點迷津一輪兜足幾個字終於去到。但去到仲未有得拎，行餐死到左之後，俾左單交左錢之後要再坐餐死，因為塊布原來係第二間布舖要過成條街去拎，塊布到左之後再要等餐死因為仲要剪。早知要等咁耐，就把握時間訓個晏覺ＺＺＺ．．．

搭巴士番到學校（仲走番去搭地鐵咁戇居咩），年糕食晒，好在仲有朱古力。ｄ朱古力係一個學生幫我買，前個禮拜朝早夜校部果邊一個人都冇，我撻左勁多朱古力黎食，十分好味但唔知邊度有得買，咁蹺有個學生係佢屋企附近見過就話幫我執番幾盒，事隔兩個禮拜終於送到，好好味，但好鬼貴，一盒六蚊得果五條即係成個幾買一條仔朱古力，仲要比ｄ高層剝削，喊。食完之後又要出差，今次係落書局怒掃百幾蚊文具。個個月計雜務使費即係petty cash睇落都係我使得最多錢，但唔知點解鑊鑊都飲恨未能稱霸，所以拎住Ｎ袋野番上學校第一件事大叫
「今個月petty cash之王仲唔係我？」

無驚無險冇乜野做又七點放工，但因為屋企仲要拜年食飯（利是都逗晒，搵鬼去食咩），加想睇一睇間舖，就走左上皆旺避年。本身剩係坐陣睇下野執一執等到屋企冇晒人就走，搞掂晒ｄ野剛剛諗住收舖果陣時，一個有緣人撞左上黎。揚晒星期三dayoff仲要咁夜先上黎都撞到我係度，完全係有緣啦。所以大家就吹左成粒鐘水吹到九點先走人。其實而家吹水，吹極都係果一個字，有呢一個字，又因為三個字。有ｄ野，我係認真諗緊。

九點幾番到屋企，清晒場諗住冇人好開心，擰轉頭，仲有隻狗吊住尾，即係屋企人臨去拜年前冇放狗又要行多轉啦。九點半帶隻狗落街，順便過七街開餐，肉醬意粉Ｘ１＋七記薄餅Ｘ１＝是日晚餐，二十蚊鬆ｄ又多包貼紙。而家七記照顧晒我一日三／四／五／Ｎ餐。係呀我係狂要七記ｄ貼紙呀，有的話記得俾我。

今日，好似係愉快而平靜的一天，但事實上係心緒煩亂。一路以黎，時間同空間，實在有太多重疊，好多時都會有意無意間，重回一些特別地方，或者以往之事經過若干時光後再次發生，有太多機會，去被迫回想過往時光。呢兩年，一直－係一直，兩人可以相見或遇上之機會，係多到令人羨慕，因為大家生活有好多重疊之地方，好多時，行多幾步、等多一陣，已經會相遇，好似今日，睇落冇乜野，但其實有最少五個機會，我係可以見到佢、撞到佢。如果可以一齊，會非常溫馨愉快，因為大家可以朝夕相見，差唔多每一日都可以有不少時間見面共處，呢樣野已經唔係人人恨到；唔可以的話，只會係一種折磨。關係，好似越黎越疏離，大家之距離，卻越黎越近，機會亦越來越多，只不過差唔多出門口就會見到、行多步就會撞到，都只可以任由機會流走，叫自己唔好行咁前、唔好講、唔好做。果一種就在身邊將在眼前，卻看不見、捉不到之感覺，呢兩年，一直纏住我。可知有多苦嘛？

17/2/2005 THU

大量碟放，有意者請聯絡我，ICQ 22209700 or email lau_sir@hotmail.com。

Power Metal/Progressive Metal
SHADOW GALLERY - Shadow Gallery（日本版） $60
SHADOW GALLERY - Carved in Stone（美國名prog-metal樂隊最著名作品） $50
RHAPSODY - Symphony of Enchanted Lands（Symphonic Epic Power Metal及RHAPSODY最佳代表作） $50
STRATOVARIUS - Infinite & Vision (DVD) $80
FRANK GAMBALE - Coming to Your Senses（名爵士結他手個人專輯） $40
YNGWIE MALMSTEEN - The Collection（新古典教父精選）$50
CHRIS IMPELLITERI - Stand in Line（相傳世上最快結他手成名作） $50

Black Metal
EINHERJER - Dragon of the north $40
BURZUM - Aske（挪威傳奇black metal/black ambient單位名作） $50
ULVER - first album $50
ASHEN LIGHT - Nechb Beneca $30
SWORD OF DARKNESS - Heathendom $30
AGATHODAIMON - Blacken the angel（似早期DIMMU BORGIR之Melodic Black Metal） $40
SUMMONING - Stronghold（中世紀豪情） $50
MANES - Under Ein Blodraud Maane $45
MACTATUS - Provenance of Cruelty（交響black metal） $30
V.A - Firestarter（入門black metal雜錦） $25
BATTLORE - Where the Shadow Lie $20

Doom Metal
ENCHANTMENT - Dance the Marble Naked（著名Doom Metal樂隊作品） $50
ZAFIRA - Embalmed (EP) $35
MY SHAMEFUL - To All I hate (EP) $35
NOVEMBERS DOOM - To Welcome the Fade $40
EVOKEN - Quietus $50
MY DYING BRIDE - Like Gods of the Sun $40
UNTIL DEATH OVERTAKES ME - Prelude to Monolith $45

Death Metal
BLOODTHORN - Onwards into Battle $30
ARCH ENEMY - Burning Bridges $50

Gothic Metal
FLOODLAND - Ocean the Lost（復古派Gothic Rock） $40
THEATER OF TRAGEDY - Velvet Darkness They Fear（男女聲Gothic Metal先峰團名作之一） $50
THEATER OF TRAGEDY - Aegis（男女聲Gothic Metal先峰團名作之一） $50
HAGGARD - And Thou Shalt Trust…the Seer（十六人新古典Gothic Metal樂團第一作） $65

Darkwave/Ambient
AUTUMN TEARS - Love Poems for Dying Children…Act 1 to Act 3 (3CD)（美聲新古典） $180
THE RED KING - Vitreolvm $40
ELEND - Winds Devouring Men $50

Others
STEVE VAI - Passion & Warfare（結他英雄中最經典作） $50
KISS - Alive (2CD) $70
PEARL JAM - Ten（Grunge中經典） $25
WHITESNAKES - Greatest Hits (Hard Rock) $30
RAINBOW - On the Stage (DEEP PURPLE結他手Richie Blackmore創立，主音為Ronnie James Dio） $30
POISON - Open Up And Say...Ahh (Hard Rock) $30

有意者請聯絡我，ICQ 22209700 or email lau_sir@hotmail.com。

18/2/2005 FRI

只可以在這裏，作一個無言的祝福。

祝妳生活愉快、平安順利、開心無憂。

願安好。

劉義

20/2/2005 SUN

是的，真的很巧合。

到今天，已兩年。

仍有餐宴。只是，眼前，換了人；身處，境地不復。

很希望，可以再次，回到兩年前。

很希望．．．也很苦．．．

21/2/2005 MON TRHK License Releases

BLOODBATH – Resurrection Through Carnage
All-star Swedish old-school death metal project feat. members of OPETH, KATATONIA & Dan Swano

CRYTOPSY – None So Vile
DEATH METAL ABSOLUTE CLASSIC!

INTO ETERNITY – Buried into Oblivion
Candian progressive death metal masterpiece

THE ETERNAL – The Sombre Light of Isolation
Australian best melodic/gothic doom metal newcomer

ORPHANED LAND – Mabool - The Story of the Three Sons of Seven
Mystic oriental death metal act from Israel, 2004 album of the year

VITAL REMAINS – Dechristianize
2003 best death metal album feat. Glen Burton (DEICIDE)

Trinity Records Hong Kong
地址：香港旺角皆旺商場108號舖（先達向火車橋方向麥當勞餐廳樓上一樓）
電話：23832801
營業時間：3:00p.m. - 11:00p.m.（星期三休息）
網頁：http://www.trinityrecords.com.hk

22/2/2005 TUE

冇皇管真係開心。上個禮拜五開始灣仔會展有呢個教育展，我呢ｄ身兼Ｎ職之打雜仔邊有時間見識呢ｄ大場面，所以全校消失剩我一個－仲有阿姐，佢好重要架，冇左佢一早九點幾番黎開門的話，等我番你地真係食埋早餐先上黎都得。好似今日成九點先起身，仲可以施施然起身再去麥記執多個十二蚊柳蛋餐，學校冇堂上番到去又係嘆住早餐焚下機打下野，點零鐘過去佐敦搵一搵阿Jens哥又逛下街，兩點零鐘番到去三點食多個吉野家牛肉飯先慢慢執野上潮流特區下半場，好嘆呀好嘆呀～

．．．可能嘆過頭，所以今日冇咩好寫。提多一樣野，廢事個個都有折冇新貨、有新貨冇折，而家整番個折頭比各位大老細：

買兩件九折　三件八五折
咪話唔益你地，計番新到果批license貨都係$94一隻，噉都話貴，又或者仲係講完「有乜有物正喎」之後又唔蒲面買，都係收得皮。

23/2/2005 WED

仍然係冇皇管的日子，ｄ高層走晒真係開心，鍾意幾點番就幾點番，番到又乜都唔使做＆做乜都得，晏晝要考試都照抬埋部機入去打，你見到呢堆字就係監考時冇野做又寫好一隻碟撩出黎。唔係放左之後要同隻鬼拗一大餐，真係準時六點鐘走人算。冇乜好氣理咁多，近排病病地，早日番屋企訓下好過。
冇喇係咁多喇。鬼叫終於有一日可以"dayoff"一下咩。

24/2/2005 THU

「劉主任！」
係呀我今日差少少就做主任架喇。朝早有個學生想入學黎in，因為人手極度短缺關係，我臨時拉伕做左呢個「課程主任」去面試，冇計啦，老細朝早不嬲唔多蒲頭，高層又得一個做左reception又做埋in會好樣衰（唔通叫阿姐兼埋reception咩），唔搵我搵邊個呢？正當諗定晒點樣去演露主任之威嚴點樣去玩果件學生，點知等極都冇影，打埋電話去發現被放飛機，我呢個「主任」當堂吟都冇得吟打回原形做呢個被呼呼喝喝之微型打雜。所以打多幾篇野，都係鼠左去算。

午間，仔仔一堂。會有此場面，都幾意外，一切都來得那麼自然、那麼快。往後日子不長不短，如此機緣不多不少，期望下回再會。

．．．唔講喇，學同事A話齋，今日好沮喪。

25/2/2005 FRI

好在開始識死，今日開始早番ｄ番學（記住，係「ｄ」），番左唔夠一個鐘已經幾日冇出現之老細就蒲頭。好在今日冇訓多幾個鐘食埋早餐逛埋街先番！但係其實早番同晏番都冇咩關係，係啦ｄ高層衰啦霸晒ｄ野黎做啦！搞到我又要開自己部機打碟評！

．．．之後，冇咩特別啦。叫做冇咁沮喪囉。呢幾日係好悶，其實有好多野可以做，好多小說未睇、好多碟未寫完、好多無聊野積左係度，好似嚇親人笑爆咀之LAUVERGREY放左係度都冇乜搞過。但冇乜心機搞野住，寫完野之後，抖下先．．．

26/2/2005 SAT

．．．呢幾日段記，一開始都係三點，而每次你見到係用三點做開頭，都知道呢一日又係冇野睇。荃灣八堂九半踩到八半諗住咁多時間會做到好多野，但結果係乜都冇全日就只有係噉睇原振俠。基本上我係每一日都會睇一本，星期六日當然睇多ｄ，今日就睇左三本。唔知係咪原振俠長ｄ，衛斯理最勁一堂睇晒一本，原振俠每本都要睇足兩堂先睇得晒，但不出一個禮拜應該會睇晒全套。其他時間都唔係做到好多野，本身諗住寫多隻碟執下LAUVERGREY，都係聽日再算。呢排真係冇乜心機同動機做野。

27/2/2005 SUN

．．．大埔五堂，繼續原振俠之旅。全三十二期，睇多三本，只餘五期。跟住每一日睇一本，應該可以清晒全套，之後一係再搵其他野睇消遣，一係清番晒積左好耐ｄ文同碟評。
衛斯理？反而睇左原振俠之後，就冇睇衛斯理，甚至冇乜動機再去睇。睇晒全套原振俠之後，或者會寫出因由。

大埔走都係搭火車出旺角轉巴士，例牌上皆旺坐一坐。又有貨番左。只有話，各位，唔該唔好再靠上網等消息，我都唔係時時都咁得閒通知有貨到，自己上多ｄTRHK啦唔該。唔好話冇野買，其實有好多野，應該一早就會有大把人會買／話要買－當然，你話唔係冇野買而係唔想俾錢我冇野講啦。好似到左今日，居然仲有成棟－真係成棟－ NOKTURNAL MORTEM。照計呢ｄ野同埋其他唔少野，係我（地）心目中，應該係到左唔夠一個月／一個禮拜已經消失晒，唔會好似而家噉，到左幾個月，都仲可以掂都冇人掂過。聽black的話呢隊野都算係必買，唔會到而家個個買完／買過EMPEROR就唔再聽其他，即係如果覺得聽完cradle聽埋emperor就等於聽晒全世界我冇野講啦。反正我遲早都會買黎寫，就一執執晒全套幫TRHK發市－冇錯，我差唔多七點蒲頭，都仲可以做是日第一客。冇咩好講囉我都。所以，如果係我負責入貨，剩係入CM+IO+RR就夠，The End都唔使入，因為已經太「另類」，雖然對我（地）呢ｄ人黎講，其實仍然好"pop"。
執左NM，就遇到有人問「點解寫晒OPETH都唔寫EMPEROR？」所以咪執晒套NM番黎囉，遲ｄ就會寫架喇（係呀，幫手寫碟評仲要自己倒貼俾錢買碟寫，都幾（＿＿））。而且全香港唔係得我一個人寫丫，如果話冇人寫唔知搵乜聽的話，可以去TRHK Webzine，可以去阿冷個爛屍金屬網，可以去阿Jens個網，可以去XMETAL，可以去Reek of Rot，都仲未計大陸果無數網站，而且唔係冇人寫就代表唔好聽／買唔過。EMPEROR唔係唔寫，係寫緊，有好多碟都係開左個頭收唔到尾／未收到尾，但應該都遲ｄ先起埋佢，因為發現，都唔使寫咁多野，寫番ｄ「pop野」就夠，因為連ｄ「pop野」都冇人搵，更加唔使話唔pop果ｄ，噉你地要有人寫先至搵，咪寫晒ｄ「pop野」先囉，所以呢排會沉溺一輪power同melodic death先再轉其他。又有人話鍾意睇我寫ｄ碟評，因為「幽默」（我自己都唔知忝），係呀真係好幽默架，當你睇左我最新寫果批，就會發現，劉Sir真係好幽默，因為十分metal之佢，已經唔再metal真係pop喇！

28/2/2005 MON

呢間office，真係越黎越無聊。唔知點解大家突然研究起金庸十四書，「飛書連天射白鹿　笑書神俠倚碧鴛」，就係差本「白」諗唔起係咩。為左解開呢個疑團，大家都扭盡六壬尋找答案。我呢，就第一時間打比佛爺（佢經常成為我無聊行為之受害者），經過佢問勻全棟旺電之後，我終於知道：
「各位同事！答案就係！
白馬！　嘯．西．風！
之後全公司「挑！咁Ｑ串！好醒咩！」見仲有時間，就打鑊呢條傻仔先出門。呢間office，真係越黎越無聊。

繼續原振俠，繼續寫野。冇咩特別。又講多兩句囉：

如果手頭上仲有7-11ｄ足球貼紙，唔要的話請收集俾我，
盡要，有用！

1/3/2005 TUE

三月。好快。

又係仔仔一堂。今日，可能係最後一次。係，好多野都好突然，好快。

冇。又係同事A果句：
「好沮喪。」

2/3/2005 WED

「好鬼得閒！」
大大聲話。唔係我講（雖然同「好鬼眼訓！」一樣，呢句我日日都講），而係日日番到黎第一件事「成朝乜叉都唔理留晒ｄ野俾我做就走左去！」果ｄ高層。連ｄ高層都噉講，可想而知幾多野做都照頹之我是日會有幾開心。係朝早最忙要影印，影完之後差唔多成個晏晝冇野做，全日ｄ高層十分得閒地係噉上網bid野，仲立即用部電話影相再徵用我部電腦紅外線過相再send上網放野，包括呢個「有面值地鐵紀念車票」（已經賣左）、「冇面值地鐵紀念車票」同埋呢個「Ｎ年前買Sony野送而家唔知掟去邊度好唯有上網放之扮晒絕版Aibo狗公仔」乙隻（仲搵番快勞甲同塗改液乙做茄哩啡）。我被屈做相片編輯同撰文果個。摷摷下，有隻野我十分之有興趣bid，成功bid到的話話你知。

既然今日咁得閒，不嬲都準時放工之我今日更係格外準時，因為BAD RELIGION．．．唔係，係BAD ATTITUDE。休止最少半年，終於再聚頭。今次換左新bass阿興，歌都係果堆，熱身必玩STEPPENWOLF "Born To Be Wild"，跟住就係BAD RELIGION一堆加埋GREEN DAY "Basket Case"（呢首玩多幾多次都咁正，等我記埋歌詞下次試埋和音），整多首DEAD KENNEDY "Let's Lynch the Landlord"（非常鍾意玩的"surf-punk"）＆PENNYWISE "F**k Authority"（必定係壓軸，因為玩完全隊即收得檔），當然唔少得校歌"School Politics"。在座如果有劉Sir的學生，記得睇埋呢個"School Politics" Live MV，剩係睇最後五秒就夠，讓你們對這位心愛的老師有更深的認識，
「原來我阿Sir痴線架！好驚呀呢間學校好恐怖呀阿媽我唔讀喇我要退學嗚嗚嗚嗚～」
雖然半年冇夾，但出黎好似好左，起碼以前玩完壓軸"F**k Authority"就走得人，但今次打極都仲有氣走人果陣都覺得未玩夠。每次有新朋友同我夾，夾完唔係即時都會第二日發生耳痛或者耳鳴之症狀，跟住一定係問
「咁Ｑ嘈，你噉玩法冇事架？」
又真係玩咁耐都未試過喎。真係天生都要我嘈。

夾完搭阿冤車程車出番皆旺，經過徘徊於大角嘴＆太子幾乎踏足深水步＆直入九龍城唔使上舖頭之情況下，兜足差唔多半個鐘，終於去到皆旺。因為阿興哥想執番幾隻碟，即係遊完車河都成十點幾今日又唔開舖都專誠開比呢個是日榮譽顧客啦，艱苦經營嘛而家賣得一隻得一隻啦。好多貨。係囉，真係好多貨．．．

3/3/2005 THU 28 Days Later

真係笑到我九彩。令我諗番起探花兄個《紅色警戎》。

4/3/2005 FRI

唔講我喇。講極唔係灰就係沮喪。幫其他人宣傳一下。

誠讓GrassRoots七線結他
誠讓GrassRoots七線結他，已換Di Mazio Steve Vai "Blaze" guitar pickup一對，買價$6XXX、pickup $1100，現$2900出讓結他連Di Mazio pickup，八至九成新，可再議價，有意者可ICQ 22209700劉Sir洽或致電97687531聯絡Davy。搵阿Davy時響劉Sir朵可得極惠價兼送十堂免費結他班，由MESSIAH/NOTHINGNONE Dave(y)一對一教授－認真架，唔係玩你。

TRHK 5th Signing
REQUIEM AETERNAM

1995年9月在烏拉圭，主音兼結他Pablo Magallanes和結他手Jose Romero (INNER SANCTUM)找來了鼓手Martin Lopez (AMON AMARTH, OPETH)和低音結他手Martin Mendez (OPETH)組成了REQUIEM AETERNAM，在一張合輯中推出了第一首demo，之後換了些成員，Death Row Productions在1997年推出"Eternally Dying EP"，同年末樂隊開始製作首張大碟"Eternally Dying"，並在98年7月透過ICorp作全球性發行。他們為"Infamy"和"Come Back"拍攝MV於拉丁美洲的電視頻道播出，並開始了"Eternally Tour"，在烏拉圭、阿根廷、巴西、巴拉圭等國家演出。到2002年4月，主腦人物Jose Romero著好"Escritos Prohibidos"（《禁文》）一書，探討不同的哲學、經濟與政治問題，其中有一詩辭部份收錄了樂隊首張大碟點題曲"Eternally Dying"的原版歌詞。
Jose Romero後來遷到紐約居住，並在當地找來一些樂手協助完成REQUIEM AETERNAM第二張專輯"Philosopher"，這時樂隊的陣容包括低音結他手Maciej Kupiszewski和著名Death Metal樂隊IMMOLATION鼓手Alex Hernandez。專輯於2004年5月和6月於澤西城Big Blue Meenie Studio經Joe Pedulla和Arun Venkatesh (OVERKILL, ALL OUT WAR)進行錄音工序，並在7月由Tom Hutten (IGGY POP, FOO FIGHTERS, CRO-MAGS)在紐約的Bionic Mastering完成後期製作。專輯中每一曲的歌詞都取材於不同哲學家之思想主張，還有一首是源於Romero的著作《禁文》。音樂與錄音製作皆有著非常高的質素，特別是Alex Hernandez的精彩鼓技，音樂充滿各種各種對比、衝突與不平衡，是一張出眾的Progressive Black/Death Metal唱片，而Trinity Records Hong Kong將會為REQUIEM AETERNAM作"Philosopher"的亞洲區及歐洲區發行！

REQUIEM AETERNAM 2nd album "Philosopher"
Available through Trinity Records Hong Kong on 15/4

Trinity Records Hong Kong: http://www.trinityrecords.com.hk
REQUIEM AETERNAM: http://www.requiem-aeternam.com

5/3/2005 SAT

今日終於唔係沮喪的一日，一朝早，已經有著一個愉快的開始。可能唔算係咩、冇乜特別，但係而家，有著幾毫克的愉快，我已經好開心。

奮戰半個月，終於睇晒全套原振俠。好少遮，只係三十二期，一期要差唔多兩堂先睇得完，閒日一日睇一期，星期六日每日睇兩三本，半個月就搞掂全套。少少感想．．．都係唔講，我發現，實在太多野寫，我又懶，都係算。簡結係，原振俠，衛斯理係大團圓劇之傳奇英雄，原振俠係悲劇之傳奇英雄，所以，原振俠好睇過衛斯理，因為虛幻，點都不及真實切身。

6/3/2005 SUN

7/3/2005 MON

新學期開始喇！好犀利呀！班友居然記得要番學呀（雖然都有一個唔記得左．．．）！我都居然記得，今日開始我要番九點鐘！好犀利呀！

今朝早ｄ學生好多問題，有位同學之問題係聽到我「老喇！後生可畏！」但我並冇替各位同學解決問題，因為一早就走鬼左去尖咀。今日開始轉出尖咀番工，地點係Hard Rock Cafe附近－呢間野個名聽左好耐，上就只有World Battle of the Bands上過一次（詳見漫話漫畫節），一上到去已經係MEGADETH "Holy Wars"，之後PANTERA "Cowboys from Hell"、MOTORHEAD "Ace of Spades"再PANTERA "Cementary Gate"，high到爆架上到去，但當然唔係上黎呢度番工啦雖然係極想，係度食餐飯都食唔起啦。出到黎呢頭十分唔方便，以前佐敦旺角放工之後行都行到去，而家尖沙咀要搭多程車成本都幾高，更高就係成三間CD舖呀！好似今日兜一兜HMV已經跌左唔少錢，第時仲一個禮拜有三四日可以噉樣兜法忝。另一個問題係呢度真係搵食艱難，好似今日幾個同事新港中心聚餐，食左個咖哩雞飯加塊薯餅整多包375維他奶差唔多成五十蚊，最貴係包奶，成$5.8痴線。係好Ｑ貴。但係唔緊要，今餐係食得好開心好開心，如果可以再食多次，貴幾多都肯。

搬左過黎呢邊，雖然有少少不愉快事件，但從未試過咁好玩。只不過我心愛的同事B，你離我好遠啊～過左黎呢頭，過香港島方便ｄ因為搭少個站，但我就冇份因為多數唔係九龍就係新界，出九龍反而冇以前咁方便，好似今日出九龍灣趕地鐵趕死先僅僅趕得到。之後要番多ｄ時間適應番，同埋要搵番多ｄ錢，噉樣先唔怕隔幾日跌一鑊錢跌到窮。

9/3/2005 WED

「劉生？？？乜咁早？？？」
今朝早問呢條問題之人數超過一千。係囉，平時冇九點幾十點唔出現之劉生，點解居然八點八已經出現學校？所以今日引起全球性恐慌，
「世界變喇！今日一定有事發生！凶兆！呢個一定係凶兆！」
因為有個學生之前請病假要番黎補考，晏晝仲有份功課要交，就要求劉Sir早ｄ（九點．．．）開考跟住可以做功課。結果佢仲龍精虎猛過我我先似係病果個，聽住mp3開住部機打野已經衰，跟住訓埋忝直頭，
「阿sir訓喇！出貓出靜ｄ唔好嘈住我！」
嚇到個學生唔敢郁：
「阿sir，你點知我想出貓架？係咪擺個空城計陰我？」
我已經答唔到佢，因為已經訓到一檯口水。個學生好驚，
「乜阿Sirｄ演技咁迫真！」
就乖乖地考試唔敢玩野。呢一野虛則實之相當奏效。

訓醒覺．．．唔係，應該係監完考，就回復打雜生涯。今日多番ｄ野做，但同日日都做到唔知點果ｄ高層比，算係十分地得閒，當然啦，佢有咁多野做都係因為我卸膊卸晒俾佢遮嘛。通常星期三其中一個環節都係出差，呢個環節我就最鍾意，借「幫學校買野」為名躝街聽歌為實。今次一掃又文具又燈膽又郵票（原來七十一買郵票買夠幾多錢都唔送貼紙，賤），拖地綠水都比我掃埋又終於唔食吉野家地去左買米線做lunch，乜叉都有晒，今個月petty cash之皇仲唔係我？你ｄ高層想贏我，除非又用埋晒ｄ拿渣手段係噉買書幾百蚊幾百蚊噉使啦哼！

晚上，有幽會，開完房，連仔都生埋。但地址係旺角唔係九龍塘，對象係男唔係女，係咪有ｄ掃興呢？我指我。又唔好咁衰，今晚玩得相當高興，雖然今晚最後都係有點不完美，但已經十分十分滿足。等待下一場幽會。
而家每個禮拜，開心，只有星期三。

10/3/2005 THU

朝早，冇咩特別野發生，都係趕晒班靚仔入課室上堂之後大模斯樣攤係張凳上面訓覺耐唔耐上下網打下野噉啦，所以我成日俾ｄ高層鬧架，但佢又要一面鬧一面搶晒ｄ野黎做喎，真犯賤。廢事冇野做又比人鬧唔做野，都係鼠左去算。尖沙咀，真係好鬼死遠，搭車又唔係行又唔係，更慘係冇啖好食，好在都仲有幾間仔外賣。一直以黎食開新旺（自從發現左吉野家，都好耐冇幫襯），都幾擔心呢度ｄ飯盒質素，尤其有先例個豆豉鯪魚飯只得白飯形成之白色同一劈經過猛火怒炒之豆豉鯪魚形成之黑色，叫番個最傳統之西多似乎較為保險。送到上黎發現，嘩，你食過湯西多未？通常外賣西多甚至堂食都係冇乜奶油冇乜醬乾哽幾難頂，但呢間野可能驚送到上黎乜都乾晒，乜都唔理係噉倒落去先，上到黎舊西多索晒都仲多醬到成兜湯噉係差ｄ西多未浮起，食完奶醬多仲有得飲奶醬，鍾意食甜野之我就最開心。更開心係「搬左去離島」之同事B都走過黎一齊食，有佢係度係寧捨好玩。估唔到原來你都來頭不少喎，仲有唔少奇遇忝！行行下街比人截住問「有冇興趣拍廣告」都試過，笑爆！但都唔及一次等巴士，隔籬果位男仔甲比另一位男仔乙搭訕，
「有冇興趣拍戲呀？好多導演都鍾意發掘新面孔架！好似杜琪峰啦．．．」
一面食呢個湯西多，一面同同事B吹吹水，仲有．．．呢餐，十分快樂。但唔知幾時再有咁甜之一餐。

11/3/2005 FRI 是日一大遺憾
12/3/2005 SAT

今日有點反常，首先係七點幾已經起身落街食早餐，八點已經上路去荃灣，平時係冇搭半都唔肯出門口。又不嬲都唔會食晏，寧願慳番幾個字睇多幾頁衛斯理或者寫多幾隻字，而且今晚有飯局都諗住唔食野留番個肚，但今日都落去呢頭唯一入到口果間所謂印尼茶餐廳食呢個「招牌印尼撈麵」，其實只係ｄ醬特別少少之撈公仔麵，但我就係鍾意食埋晒呢ｄ大排檔貨色。今日又特別多事發生臨尾差唔多遲成半個鐘先走得人，但係全日都十分開心，因為今日係最後一次黎荃灣。即係多堂又舒服呢ｄ唔計啦，最珍惜反而係番荃灣，做咁多間，除左北角，最好做、最好玩、最好人，就係荃灣。所以今日好開心，又好唔開心。

福星又見福星．．．唔係，應該係福星樓上唔記得叫咩名果間（創興而家間間打邊爐個名都差唔多，最少一定會有個興字），福星而家連女人街總舵都執埋，正式成為歷史喇，就好似八三三一樣。又收到call「今晚食飯！」－其實已經係一月講到而家，但被放幾次飛機，而次次班友放完飛機好似上星期六之後都係入我數，典型八三三風格。今日又多事幹成八點九先放工，條條友都話一早出左旺角，諗住今次實係我最遲，點知差唔多搭半出到旺角再落埋朗豪坊搵廁所，先發現又比班友玩，漢係港大（「架巴士遮！唔係我！上去先啦你地！」），七爺係油麻地打緊機（「打完過黎！你地上去先！」），Sam少係百老匯電影中心睇《擊情》（「呢套戲係度度都有得睇，但係度睇懶係有文化ｄ嘛！唔講喇未睇完，睇完上黎搵你地！」），最早果個又係我，典型八三三風格。就係因為呢班友，俾左個機會我撞到一個分校同事，雖然極少機會遇到佢，但同佢之間真係冇乜隔膜，即係social呢家野我不嬲唔在行做左咁耐都冇乜幾多個staff同我有兩嘴，唯獨是佢第一次見面已經有點一見如故，所以遇著佢，係高興之事。
八三三＆八三四仝人難得聚首一堂（八三三前身就係八三四，八三四亦係八三三之始，唔知唔緊要，知道逢係八三Ｘ就係麻甩竇就夠），畢業之後四個都係阿Sir，但你話得三個阿Sir又得，因為姓劉果條友點睇都只係掛名阿Sir一個。而家教書，似乎都係「教是為了不教」：真係個個教左一年頂多兩年已經決定轉行，除非好似七爺噉搵著間疏乎上午校啦，差唔多冇一日會遲過兩點走人，有次兩點幾番緊工幫緊學校買野之我撞到放左工出黎旺角行街之佢，番到學校仲要收到佢ICQ「你就好啦學校都可以online！我要番到屋企先得呀！」輕輕鬆鬆就萬五，有咁正我都想教呀，如果好似Sam少呢ｄ得半職人工一萬但做全職野，我真係寧願好似而家噉。最型個個都係漢，發覺同佢有關係ｄ學校都不得好死，先前in左一間，殺左；又有一間先七爺再到我然後到佢in，雖然佢果時已經搵到教職冇in到，但一癡埋佢度，又殺埋；而家做緊果間，就更加死得轟烈死都死得型過人，人地殺就係殺，佢地死都要拎番個彩拎左三個第一，包括今年唯一一間被殺港島學校、第一間辦學未夠五年被殺、同第一間被殺之千禧學校，下星期六仲要去靜坐抗議，睇報紙有機會見到佢忝，全場最型係佢啦。反正係唔係都死硬，呢幾個月鍾意點都得老細都吹唔脹，學生好玩同事又撐佢，臨走前仲可以得償所願開番班拳擊班，真係夫復何求呢真係。如果有呢ｄ正學校，我都想入去教呀。所以成晚劉Sir搭唔到咀得個食字，因為真正果三個阿Sir所面對之種種問題，都唔關呢個「書院打雜甲＋播碟員乙」事，
「乜做阿Sir要教書架咩而家？」
在場最得人羨慕，當然係我。雖然每日做成十三個鐘，工作量同自由度卻相差超遠，人工夾埋先得一萬鬆ｄ唔算高但已拍得住全職半職之Sam少一樣。我係有時間時又算有錢，但你地冇時間之時，有前途。下年轉專科專教，搵到的話兩萬三喎！我連今年試下搵教職定係搏讀Master還是報PGDE先都未知呀唉。
食呀食，隔籬幾圍走得就走，怪醫秦博士都睇左半集（同永遠唔會叫叮噹做多ＸＸＸ一樣，我點都唔會叫怪醫黑ＸＸ），差唔多成點，班友仲未有意識要走，
「聽日星期日dayoff丫嘛！」
我唔係丫嘛大佬。所以，你睇我好我睇你好啦。

13/3/2005 SUN

TRHK 6th Signing
SIGNS OF DARKNESS

自1994年開始，經過多次改組與人事變動，
SIGNS OF DARKNESS至今成立已達十年，為比利時歷史最悠久之黑金屬樂團之一。
SIGNS OF DARKNESS最新Fast Melodic Black Metal專輯
"The 17th Floor"將於四月下旬由Trinity Records Hong Kong推出！

SIGNS OF DARKNESS 2nd album "The 17th Floor"
Available through Trinity Records Hong Kong Late April

Trinity Records Hong Kong: http://www.trinityrecords.com.hk
SIGNS OF DARKNESS: http://www.signsofdarkness.be

14/3/2005 MON

番左半年學，個個深得劉Sir真傳全部頹晒，而家朝朝早成班人鬥遲，仲要今日測驗都照係有幾多遲幾多忝，阿sir直頭成張檯棟係門口，遲到者寫低理由先准入，有條友寫「屙屎」，你真係吹佢唔脹。ｄ高層番到黎，
「做晒ｄ野未呀！又唔做野！」
非不為也實不能也，成班友一測完立即衝出黎搶左部機睇戲（．．．），即係冇腦點做，全日只餘一個又冇野食又冇機打想做野都冇得做之傻仔。

好在逢星期一都要一早上路，唔使成日對住你班友咁眼冤。今日係噉食。先「撞到」一個同事食左餐，跟住今日重出江湖再戰屯門，一早出左門口，到左屯門仲有成個鐘又唔多想行，又食多餐，當然係大家樂咖哩角啦。上次黎屯門已經係個幾月前之事，過到黎立即成班人問
「好耐冇黎呢度喇喎你！梗係因為果班太嘈所以調你過黎喇！」
「果班」，果然惡頂，但基本上出得新界邊位屯門呀元朗呀呢ｄ都難搞，睇我今日上堂前去廁所一入到去就撞到成班人係度煲煙就知。即係開左部機係度都冇乜用過，剩係殊下人又行黎行去扮兇啤啤共都玩左大半時間。但好在呢度ｄstaff都幾好玩，抵番。

差唔多十點先放，但未有得番歸住，因為劉Sir而家好紅好多人搵佢開飯（係真架），難得出到屯門立即比人召左去食「晚飯」（呢個時間，應該宵夜至係喎）。邊個？睇番2月3日段記就知（2月6日亦得），呢，大脾好肥果ｄ呢。仍然係冇變，一樣係咁矛盾，又叫我唔好響朵仲要係日記出言恐嚇，但又死纏爛打「Link我個網落你個網度啦！」真係冇你咁好氣。自己上http://www.肥脾李.net一睹尊容。而家冇咁肥，可能因為飲得膳後瘦多。
另一樣永遠唔會變就係永不準時，約「十點大會堂門口等」，真係等，棟左係大會堂門口成個字先發現佢仲飛緊西鐵過黎等足我三個字，過到黎仲要被昆左，俾成三十二蚊兼加一即係三十五食果只得半兜份量之肉醬意，仲要係唔好食果隻忝，全餐唯一叫做入到口得杯餐飲凍華田，同以前一樣，永遠冇好帶契。又同以前一樣，我只係負責做被呻果個又係聽下「教書點辛苦」，點樣一星期番足七日，星期六得果七度仲要比校長老點帶學生去海邊食風浸水，點樣再被校長老屈教自己冇修ｄ科特別係電腦＆普通話（呢位同學於呢兩方面係究極白痴），同講下身為主修中文教師但學生識字仲識得多過佢之苦況，
「所以上中文堂永遠得我講冇佢地講！我永遠唔會比佢地問問題！次次比ｄ學生問我ｄ字點寫都唔識答，所以佢地一問我點寫邊個字立即叫佢地問隔籬同學囉！佢唔識就問再隔籬果個囉！全班都唔識問隔籬班，隔籬班都唔識咪問隔籬班個中文miss囉！總之唔好問我！」
又摷番ｄ舊帳黎講，
「喂到底果句標語錯ｄ乜？我諗左幾個月都諗唔到！」（已經係1月27日之事）
即係一條咁簡單之問題兩個月都諗唔到，仲要問番個英文阿Sir呢條中文題點答，好心你就努力ｄ啦！咁簡單，你ｄ學生兩秒就答到啦！謹記做個負責任的中文老師！
十一點幾先食完（or被玩完），仲要搭多成個鐘車，聽日仲要番九點忝，咁辛苦仲肯出黎同／比你玩，俾足面啦。最後終於講出真相，
「搵你食飯，都只係想問你同『佢』點遮！」
好多人搵我食飯，其實都只係想知呢樣野，但問多幾多次，我答案都係一樣：
「算啦，有ｄ野，你（地）永遠唔會明。」

15/3/2005 TUE

又換新面孔。或者早ｄ轉會好ｄ。不過而家都冇咩心機再理，寧願集中寫作同「內政」。
今批貨非常地唔差，SUMMONING全套、ToT女主音自組新band LEAVE'S EYES、DARKWELL & LACRIMAS PROFUNDERE新碟都好正，最鍾意係好似FINNTROLL之芬蘭folk metal band KORPIKLANNI新碟"Voice of Wilderness"。各位人士，請多多支持。首先我應承你（地），你四點上黎一定有人開先。

16/3/2005 WED

好慘呀今日，同上星期一樣要監補考，完全唔似劉Sir的好學生非常勤力又早睡早起要求劉Sir提早開考，今朝八點幾九點就要番到喇陰公！想訓多幾個字都冇呀！（高層曰：「喂！你好似本身就係要番九點架喎！」）今日難得地冇訓住黎監考（．．．），都寫左唔少野，朝早係靈感較多筆風順暢，咦阿劉Sir係咪應該學習佢ｄ學生早睡早起呢？（從來只有先生做榜樣俾學生睇，估唔到而家調番轉，真係一sir不如一sir）
本身今日十一點又可以變身劉主任in人，個學生九點考份卷三個鐘都係噉催佢快手ｄ，
「陣間阿sir有得升職，你乖乖地兩個鐘做晒份野佢等我可以慢慢過下主任癮！」
點知次次臨有得做主任都係比人放飛機，阿掛名主任我又無用武之地。個學生猛咁嗌
「阿sir十一點喇我做晒喇！」
「唔好出聲！繼續做做到十二點先好做完！等我可以頹多陣先！」

我成日都覺得呢排會有事，因為實在有太多神奇野發生，好似今日監完考走左去印定聽朝ｄnotes（呢ｄ野通常係二十個鐘後即係第二朝9:29亦即上堂前一分鐘先做，仲要對住已經喊晒口「夠鐘上堂喇！ｄnotes呢？」之阿sir「部影印機仲未warm up完忝！我十點先俾你啦！」），差少少連星期一ｄnotes都印埋，之後居然會執一執入職以黎從未清過之書檯同櫃桶。今日執野執到連ｄ高層都話
「終於見到你忙過我喇！」
執左都唔知幾排，成個萬紙塚起出黎只得兩種野，一種係環保紙（係環保就應該直情唔用紙，唔係用左一邊之後拎出黎再用就叫環保），一種係廢紙（當然係拎去回收，又當然係環保的話，本身係唔需要諗到回收呢樣野），除此之外乜都冇。起完塚之後發現，萬紙塚就係萬紙塚，當環保紙＆廢紙都拎晒出黎之後，全個櫃桶係乜叉都冇！原來我一直以黎積埋咁多垃圾！高層有見，曰：
「我番全日都冇乜立雜野鬼咁整齊，都唔明點解你番半日都可以多垃圾過我！」
呢個事例，印證左「高層永遠做少野過低層」之定律。低層番半日，時間短，就用大半時間去做野，通常做完晒野之後都冇乜時間剩去清番ｄ垃圾；高層番全日，又要懶唔做野，通常做幾分鐘野就會消磨番幾個字，而其中一個最佳浪費時間方法，就係執檯，結果每次一出現垃圾，就會用長過製造垃圾幾倍之時間去思考點樣清左佢，再用比思考時間長多幾次方之時間實行，幾個循環之後就會發覺，
「咦夠鐘放工拿？丫我今日做左咁多野喎！勤力過番得果半日果ｄ多多聲！」
所以ｄfull-time高層永遠唔會明點解唔夠ｄpart-time低層多垃圾。

朝早冇得做劉主任見人，好在晏晝仲有得見下鬼。隻野係好耐之前去蘇聯讀大學，都可謂老鬼一隻。由兩三點開始，平時一聽到我落街買野就嘴蔑蔑ｄ高層已經猛咁叫我落街（所以成日話呢排實有事發生，太多神蹟出現），見完隻鬼四點幾，ｄ高層就更加熱心，
「快ｄ落去買啦！快ｄ去躝街啦！快ｄ啦！」
「下？買幾粒釘書釘同電芯咋喎！落街買咁少野，連我吞pop當食飯呢ｄ都覺得有ｄ歉意喎！」
「邊個話你係落去買學校野呀？今日我想食肯德基，你買完雞之後順路買埋ｄ野咋！」
通常星期三ｄ高層＆低層食得寧舍豪，因為呢一日多左個外賣仔可以唔使叫飯盒落街買乜都得，本身我係非常想買夠一桶架反正我一個人清六七八件完全唔係問題，係ｄ高層孤寒囉唔肯蝕底死都唔入股囉搞到我好唔開心囉。咁有興致食雞，仲因為
「我好耐未試過好似今日咁嘆喇！」
跟住一輪嘴幾耐未試過ICQ，幾耐未試過上網睇報紙，幾耐未試過捕住Yahoo bid野，幾耐未試過乜乜物物．．．咦，呢ｄ野我好似日日都做架喎！

先前到批新貨都未有時間試試，襯今日身在旺角下半場又未夠鐘，就上一上皆旺巡視一下業務兼驗下貨。又比我撞到生意，到走人鎖門果時又有個剛剛上到黎，唯有同佢講句
「今日唔做生意！扯！」
話左今日唔開都有人上撞上黎，仲要咁好彩我係度時上，近排好似好左。希望換番新面目可以帶旺番。

BAD RELIGION，超灰，灰到爆，前個星期新班底夾左一鑊，仲要係更勝以前，諗住可以再戰江湖點知第一次即成絕響又散band。好在仲有其他窿路仲有得玩。延續上次幽會，但今次差左少少，冇乜探過我地個仔，又差噉ｄ目標，下次應該傾一傾黎緊點玩同執定歌先上。
劉Sir夾野之傳統不嬲都係不爆無歸，爆鈸爆bass斷棍都冇咩未試過，但都沉寂左一輪冇乜新戰績。好在今日終於都有野爆：爆左半邊眼鏡！非常滿足，
「冇野爆又點叫做夾band呀？」

．．．我已經不知應該說甚麼了。

17/3/2005 THU

鬥遲比賽之結果，已經唔敢講，我開始擔心各位同學記憶力開始衰退，你地知道九點半上堂架呵？阿sir我都甘拜下風呀真係！
呢排成日做埋社工，好似今朝主要工作就係同個學生傾偈。呢位同學教識左阿sir好多野，而家阿sir我識得好多種唔同自殺方法，正確之割脈方法你識唔識？我就識呢而家！另外位同學指出電視劇經常出現之謬誤：
「電視ｄ人成日飲酒送安眠藥，之後實係入院洗胃，都痴線！噉樣死唔到人架！我都試過啦，訓完之後都不知幾精神呀！」
但有豐富死亡經驗的同學有個疑問：
「點樣死先死得最靚？」
今次阿sir終於威番次喇！我係未死過架，但我都知道邊種自殺法會死得最靚，就係燒炭，燒炭死果陣塊面會變成粉紅色，貪靚的話會死得開心ｄ（開心又使乜自殺呢？）。大家不妨試試，死得唔夠靚唔關我事，因為呢ｄ野係舍妹教我既！

同個學生交流完點樣死法最死（阿sir我得益不少），個學生臨走前問阿sir：
「劉Sir，點解你個眼鏡右邊冇左塊鏡片既？」
琴晚打band打爆左副眼鏡．．．粒螺絲之後，摷唔番ｄ舊眼鏡迫住要戴番呢對爆鏡，琴晚到今朝，終於有人發現喇。而家身兼Ｎ職，都冇時間搞其他野，連爛眼鏡呢少少野都冇機會專登拎去整，所以今日中場時間特別走左去搵眼鏡舖。理論上好易搵呀呢ｄ舖頭，都比我由旺角行到去佐敦先搵到一間仔。搞掂副眼鏡，無端端被放飛機搞到有飯食（係咪好矛盾呢），上到office又有野玩。今日office裝部大釘書機，個師傅－理論上唔係師傅，叫親佢師傅佢實會話
「我唔係師傅！我送貨架！本身黎裝野個師傅冇黎，唯有頂埋佢果份囉！」
睇佢裝左一輪，越黎越深信呢個係事實，因為每隔一陣佢就會打電話去求救，
「喂呢舊野點裝架？果part又應該點搞架？我點知呀我送貨咋喎！」
佢裝機時我係側邊裝裝下，跟住落埋場玩埋一份，佢負責研究點裝嵌，我就負責睇果本英文說明書，一文一武開心一輪終於搞掂。師傅因為仲有下半場簽單即走，時值老細出黎，見到全場有一個傻仔棟係部新裝好釘書機側邊串串貢，當堂下旨：
「部機你裝咁威水丫嘛！以後就由你負責呢部機！你呢個釘裝部主管下星期一交五千份leaflet！」
為左慶祝「升職」（．．．），又為慶祝搞掂部機，噉又食多餐。對上次果餐湯西多非常滿意，點知上次奶油漂西多之景不再，今次舊多送到黎唔好話湯，醬都唔多滴，差唔多要乾哽成件西多。但都好過同事B果盒蠔油草菇牛肉飯，蠔油完全同蠔or蠔油無關得個油字，牛肉好硬，都唔夠ｄ飯硬，一支匙羹插落去係可以成盒飯拖住行。但最灰都係：
「喂！我話要金菇唔係草菇喎！你打電話時聽唔到我同你講？」
「你有同我講咩？」
「你落緊單果時，我好大聲講我要蠔油金菇牛肉飯架！」
「噉即係你嗌得唔夠大聲，搞到個外賣佬聽唔到，所以整錯左啦！好在今次係你盒飯中招遮！如果搞到我盒飯，點計呀？」

18/3/2005 FRI

素來只聞轉冷發病，未見回暖生病，今日終於得見，主角係我。之前一日比一日凍都冇事，到呢幾日明明熱到離奇行幾步都出汗，點解反而會病？班學生見今朝counter冇人趴晒係度打晒喊路好唔自在，就打晒電話黎刮佢（冇錯，我電話、ICQ＆各種聯絡方法一早已經揚晒全校（十零件．．．）都知），所以大朝早已經收到好多學生之電話。但係我一絲感動都冇。
「邊個話打黎問侯你架？我要prtint野呀！喂部電腦點開呀點login呀喂我仲要上網搵野做功課呀！病又點呀唔使做呀！喂部printer點開架開完個掣之後點呀喂佢話error喎點搞架點解我print唔到野？喂答我呀喂！喂唔好死住呀劉二！」

耍走左班靚仔，又係時候番工－朝早我呢ｄ打雜除左比學生玩同印notes請假一日都唔會太嚴重，而家補習旺季，晏晝果份走左去的話就真係累死街坊。所以出門口前都啪劑藥先，隻藥叫Piriton，黃色細細粒特效醫傷風感冒化痰止鼻水，因為老母成日係醫院撻屋企永遠有大量存貨，所以每到天氣凍有乜頭暈身興就會拎黎當糖食，通常食番一頭半個月就會好番（基本上唔食藥捱番咁上下都會自己好番），最正係食完勁好訓。極力推薦，各位有咩傷風感冒記得試試，但食死左唔好搵我，雖然而家仲未病死，都唔想比人打死。

呢排冇乜新野，因為繼原振俠後埋頭苦幹衛斯理。小學睇到而家，睇足十幾年終於睇晒全131期。結論係，原振俠仍然好睇過衛斯理，雖然衛斯理ｄ橋段同轉折普遍諗得好過＆絕過原振俠，但越後ｄ故事越唔掂，唔係指ｄ橋唔掂其實冇乜幾多期個衛斯理故事真係咁廢（反而頭幾十期有ｄ真係廢得離奇），而係個劇情結構，頭果百幾頁成功建立一個迷離境界，點知解主線解到最後幾頁，突然間扯左去第二件事度然後完，主線就當冇解過仍然係不解之謎，睇到小晒老母。睇到最後一期，衛斯理傳奇個結局就更加爆粗爆到出口，
「求Ｘ祈！刁！」
兩位大俠之傳奇都睇晒，又未有興趣摷番其他倪匡故事，其實仲有成套金庸等緊我但都冇太大動機去睇（冇錯，廿幾歲仔一本金庸都未睇過，灰），突然間好空虛忝。所以黎緊之日子會寫番多ｄ野。我會繼續沉醉power & melodic death，其他同仁請努力寫好black、death同doom。我會寫番晒ｄpop野先。好多人成日都問：
「點解唔寫〔隊名／碟名〕？」
1. 邊有咁多時間？ 2. 有ｄ野點寫都唔夠其他人寫得好，不如等其他人寫。 3. 邊度有咁多碟？好多band包括「pop」果ｄ我都冇碟，冇又點寫？話時話近排揀碟寫，發現原來我隻RHAPSODY第二隻碟"Symphony of Enchanted Lands"唔鬼見左。如果你唔要呢隻的話請放比我，當然，你肯借我就好啦！如果燒做mp3再send俾我會更加完美！（寫碟評都要又賒又借，真係灰，終有一日我要做辦王呃辦聽）

自從身在夏威夷好食好住懶讀書結果被踢出校流亡香港後，放左兩個幾月假阿冷爺終於搵到工。晏晝去Hong Kong Records面試，夜晚即收到電話叫開工。雖然人工唔算太高但福利唔錯又算係長工兼發揮空間大，最重要係鍾意做，係囉之前係噉搵學校工做乜丫比我我都揀做呢份呀！但反而個個人都話呢份工唔好，好明顯果ｄ唔係音樂人黎。
面試成功，幾時上工？
「四月一日！」
知唔知點解會揀呢日上工？唔知唔緊要，到左果日大家自然有得笑：
「下乜你當真架？叫得你愚人節番工，就知道係玩你啦傻仔！」

19/3/2005 SAT

今日朝早番一番學校－冇錯係番學校，因為調左更表，朝早多左幾個鐘就上黎走一轉。難得咁得閒，食番餐早餐先。估唔到而家食餐飯仔都可以淪落到噉。
上到學校，估唔到我係最早ｄ高層都未出現。琴日朝早冇番到今日要補番隻鑊，都幾多手尾執，執完即刻攤低，冇計，食糖食得多，睏。但瞌著左仲好，唔使對住果班冷血學生：
「咦？你唔係病左咩？死番黎做乜？走啦！」（冇錯，劉Sir係呢間學校冇乜地位）

訓到十一點準時出發。而家星期六唔使上堂轉行做外賣仔，職責係走幾間分校等ｄ同事食飯時頂佢地食飯時間，唔使上堂坐九個字就走得人去另一間，番工時間又短剩係十二點番到四點幾，好似好疏乎，但有好有唔好啦。第一站先出荃灣，十分懷念，專登去山崎麵包執左袋包上路。之前有個火腿薯仔冬甩超超吉好食，成五個半一個但當年逢星期六都食成三四個，而家冇左好唔開心，轉食十蚊四個芝士牛角酥，基本上廿蚊八個係夠捱到放學，今日唔使上堂就番到屋企仲有兩舊益舍妹。荃灣果頭有間二手舖都冇乜行過，今日見反正有時間就入去睇睇，兜個圈又跌左幾十，一隻係黃秋生《支離疏》，另一隻係SLAYE "Diabolus Music"．．．oh sorry應該係SUEDE "Head Music"。仲有隻A.S.O.S.極大興趣，下星期似乎會執呢隻。死，之後仲個個禮拜都有機會行呢間二手舖忝．．．

第二場走元朗，好在追到車九個字就出到，如果走左班車的話真係成個鐘先去到。坐完九個字就到戲肉：銅鑼灣。呢程真係搭足個幾鐘，搭極都冇得落車，但對我黎講其實噉樣遊車河法都唔係點無謂，因為噉樣仲多時間去聽碟，夜晚番到屋企就可以寫，但當然有得揀，都寧願好似之前荃灣朝九半晚八半坐定定唔使煩。噉樣走黎走去我冇乜所謂又有得聽野又四點幾就放得工，但車錢就真係幾襟計，旺角＞荃灣$7.8、荃灣＞元朗$8.4、元朗＞銅鑼灣$20.8，剩係呢三程已經$37，加埋屋企來回兩程冇五字頭落唔到樓，一日已經抵晒平時一個禮拜之交通費。好在今個月剩番一個禮拜六，慳番唔少，但轉左食飯更有個好處，第時星期六晚可以去睇騷，亦即大把機會使錢，慳埋慳埋，都係使突。

四點幾銅鑼灣放工，走完已經冇乜「減價貨」值得執之HMV一轉，就出番旺角搵Queenie一聚（噉又十蚊）。本身係晚飯，但佢因為「金錢問題」同屋企炒左廢事出夜街就飯局變（奶）茶局。
「你教職萬六都唔夠使？」
「係囉，點解我教職萬六都唔夠使？你話唔話到比我知點解？」
之前日日都食七記換貼紙，咪就係為左佢。呢幾個禮拜差唔多晚晚都係肉醬意加pizza，家中充滿各式薯片、朱古力＆七記微波爐食物，真係食七記食到驚，之後再發起各位同事＆各方友好收集，終於儲左成疊（真係成疊，好Ｑ多）比佢。點知．．．
「係好多，但而家先俾我，呢ｄ我都搵晒啦！成套差一張咋而家果張你又冇！超！廢！」
除左食之外（我當然係大模斯樣＆大條道理唔俾錢得個食字），基本上又係鬥呻。教書辛苦人人都知，但最驚做到死之後約都冇得續一聲唔該踢走你。我就基本上冇乜辛苦架喇。所以佢都只係得一句，身邊好多人成日問之一句：
「劉義唔係不嬲都好安於現狀好知足，乜都唔志在既咩？點解而家會噉架？」

朝早臨出門口時硬係型住要帶電腦，但今日走食飯更每個地點留九個字覺得帶黎都冇乜用電腦就慳番ｄ力，點知最後發現，原來第六感是對的：夜晚要頂睇舖。本身諗住今日早放工終於可以帶隻狗躝下街，點知都要上黎坐到十點幾先走得人，如果真係今朝順手帶埋部機，就唔使咁沉悶。今日撞到唔少人，好多都係唔知幾耐冇見過一見面大家都嗌番句「終於見面喇！」最有趣係撞到阿Glory兄，我發覺耐唔耐都會係旺角撞到佢，對話內容都係「教書是十分辛苦的」之類。但吹水人多買野人少，好耐冇上過黎，估唔到而家呢度咁free自助煲煙吹水聚會等人，直頭比人當正自己別墅乜都自己黎，同佢地相比我反而似唔屬於呢間舖。真係變晒。
因為冇電腦，今日唯有用筆寫，都叫做寫左一隻。而家積左ｄ存貨，但冇乜打算拎出黎住，連用乜野形式掟出黎都未知。只有繼續寫落去再算。

今日見左好多人，睇到好多野。而家，除左「灰」字，仲有個「悔」字。如果只係犧牲我自己一個，我係唔會後悔，但而家，唔止我自己，仲連累埋友好同身邊所有人，我的確係好後悔。好後悔。

21/3/2005 MON

繼續鬥遲，差少少連阿Sir都鬥埋一份－我番到佢都未番喎，都估到有幾遲啦？拿其實我一ｄ都唔遲架唔好話我呀！遲呢家野係相對的，我幾點鐘番到唔係問題，當我番到果時全校計埋我同阿姐先得果四個人，就知道，劉Sir其實係幾咁早番工。所以我今日感到相當自豪。
既然我係呢度之存在價值就只有負責比班靚仔搶部機去上網之後喊晒口噉叫阿姐落去買早餐（兩樣野好似冇關係架喎），此地不宜久留，就按照「正常時間」十一點半閃人。冇計星期一係要早閃ｄ，尤其是而家搬左出尖咀番工，基本上逢星期一都被倉務部ｄ同事召左去苦力將ｄ書由佐敦搬過尖沙咀。而家天氣凍，的住幾斤書成條海防道由頭行到尾都走到身水身汗，第時天時熱點算？（其實擔心黎都多餘，未回暖已經比人炒鬼左啦！）

今日又戰屯門，但大戰前夕，當然要食餐飽先。今日唔好彩地走左班車，遲左三個字成三點半先去到屯門唯有食趕ｄ。實係大家樂架啦我地呢ｄ無咖哩角不歡嘛，一個叉瀨$15加多兩件咖哩角$7.5噉就廿二個半－冇錯，得兩隻角仔就收成七個半，其實超級呃錢，但超級鍾意食，冇計。因為遲左到所以食趕ｄ，唔知係咪因為噉，係唔使兩個字就清晒，十分地唔夠喉，唯有走左去搵士多篤魚蛋牛丸又$10，之後見Crunch出左條裝買盒試試再$10（點知非常地唔好食，灰）。所以成日話出屯門成本高，剩係一個lunch & tea合璧已經使左成四十幾，仲未計去廁所ｄ消費喎。有間士多開正係去廁所條必經之路，通常來或者回總有一程會入去兜個圈，而每兜一個圈會有七成機會執番ｄ野飲／野食，計計下，我都唔敢計。同一層其實仲有一間士多，但冇黎咁耐發現已經比廁所側邊果間做低左，果間我行過幾次，其實賣ｄ野款多ｄ而且價錢平ｄ，我每一次見到呢間士多ｄ野平ｄ之後實會「好陣間幫襯呢間！」但跟住去完廁所回程果時就會入左去途經果間士多，出番黎之後再見到果間士多「係喎！唔記得幫襯呢間忝！」地利真係好重要。

又係屯門，非常地難頂。第一堂對住班中四友上堂勁嘈，
「同學，請將聲浪降低！」
之後不單止冇降低，仲要高到全班都聽到的贈阿sir一個字：
「挑！」
第二堂案件重演，第三堂唔敢出聲喇阿Sir已經，唔好阻住ｄ學生乖乖地自己打野仲好啦。而家ｄ學生真係好惡。
今日ｄ堂好短係史上最早放，但被放飛機冇飯開好唔開心。邊個？又係大脾好肥果ｄ囉。幾難得出黎屯門呀阿劉Sir，噉都唔俾面，唔掂啦！
「要學單簧管又點呀！同劉Sir食飯大晒架啦！係唔係都賴左你拎番個頭彩先！」

22/3/2005 TUE

今日番到學校，咦，點解一條友都冇？．．．原來又過左半個學期，今日唔使上堂，成朝得我一個戇居居。（「仲有我！」阿姐曰。）但係今朝都幾唔得閒，而家要搵鬼教商業英語，一朝早開個email已經十幾封信，執一執ｄ信又打幾個電話，之後又要造下翻版影下書，仲有好多我記得做左但唔記得係ｄ乜之無聊野，忙到連吉野家都冇時間食。突然間好懷念班學生，起碼佢地係度果時我可以名正言順地同老細講
「拿老細唔係我唔想做野呀！你都睇到啦係班學生搶左我部機去用咋唔係我懶呀！我乜都唔理呀訓埋個早覺食多個早餐先算！」
臨走節目係撞鬼。以前搵鬼佬教師，招一招魂閒閒地廿幾三十封信飛過黎，點解今次十幾封信得兩隻鬼見得下人，點知一隻鬼
"Or gow English, dan hai ng chung yi gow Business English, tsui mei!"
另一隻仲簡單：
"Duck ghou gay shui gum cheap, or ng q joe!"
有錢都唔賺，好猛呀而家ｄ鬼！

晏晝，好靜。全office得我一個（當然係指細粒果ｄ），一早番到黎仲有成個半鐘先出門口又做晒野，見咁得閒，咪開部機玩下。好似呢幾隻字咪就係冇野好做撩幾撩撩出黎囉。除左呢幾隻字仲寫左半隻碟，阿頭見到我居然可以咁得閒，
「冇野做丫嘛？同我拆晒果箱新碟佢！」
照頹架喇我地呢ｄ拆碟都要聽住mp3，聽住歌黎拆膠袋拆得寧舍有beat，旁觀者見到都贈番句
「唔好fing啦ＸＹＺ！」

為免fing出血案，今日非常準時起行，臨等打卡時走左去同事B度笠左罐薯片消磨時間，
「都唔好食！挑！」
「唔好食你又猛食？」
「試真ｄ丫嘛！食左半罐，結論仍係唔好食！挑！」
今日番屋企．．．唔係，係番旺角，好似好耐冇做過九龍噉。成日差唔多冇嗌過人靜ｄ上堂，相當輕鬆。所以今日可以疏疏乎乎地抖一抖，寫一寫。近日手風相當順。

都唔多想講，但見到，真係．．．唉。（又）得罪晒。睇呢個Forum，睇果個Forum，睇邊個Forum，都只睇到香港音樂冇前途。仍然係咁見識少但又自以為是，只諗自己同自己果套先係正道，硬將自己一套加落全世界，香港前途，就此被摧殘。
以上說話，唔係同潮人講。所以點解話（又）得罪晒。

23/3/2005 WED

「早ｄ啦阿sir！」
上兩個禮拜三都比個學生催早ｄ番學校開考，今日得番一個測驗仔，終於可以遲一個鐘十點先開始，當堂訓多幾個字先。但其實個學生十分唔願意測，因為根本測唔到，
「阿sir話ｄ題目係出past paper，但係佢又冇派過ｄ問題，notes又冇，圖書館又借唔到，番左黎都唔使答架啦！噉我番黎做咩喎！」
「冇架！番黎買早餐俾劉Sir食囉！」
所以佢測成點我都唔知道，食早餐要緊呀。所以今日係屋企笠左麵包都lunch時間先食，ｄ高層好奇怪點解早餐會變左做午餐，
「乜你真係咁多野做咩？」
算啦，冇學生請食吉野家果ｄ人永遠唔會明架喇。

睇完個學生測驗，完全唔知咩事地突然做左劉主任in人，人都未見完又多左隻鬼，今日朝早節目相當豐富。隻鬼係南非黑鬼，之前係利比亞掘金掘鑽石，操流行阿拉伯文，係非洲仲係演員兼歌手忝．．．嘩，世界唔係真係咁難撈丫嘛？話請外籍英文教師但真係教師冇乜，奇人異士就出極都有，有band友音樂人甚至藝術人唔奇，做核電廠、修核子化學都有，去遊水滑水乜水都算，有個仲要係深水潛水、深水攝影、深水乜叉都有。喂，好似係請先生喎而家！仲有個Doctor －冇錯係Doctor，上年年尾開始send信send到而家成半年都係噉send，都唔記得收左幾多次喇。呢位Doctor相當睇得起我地書院，亦相當地有恆心。但連Doctor都要為份part-time仔send信send足半年．．．嘩，世界唔係真係咁難撈丫嘛？

朝早算忙架喇今日，但係ｄ高層成日都話
「超！咁都叫忙！扮晒野！」
其實我都想做多ｄ野架，ｄ高層衰囉搶晒ｄ野黎做又要超超聲囉，我係好有心好想好想好想做野架，但佢夾硬迫我打機，
「唔准做！今日打爆佢先准走！」
打咩？正確ｄ黎講，係養。呢隻養魚遊戲瘋狂極度超級嚴重地好玩where好玩＝浪費時間，真係好耐未玩過咁正既game，玩到野都冇寫過夠鐘都唔走人，隻野比我打到爆完再爆非常開心。最衰未研究到點樣download，但download到上堂都唔敢玩，因為上堂果陣隻mouse瘋狂左click，真係搏比學生投訴都似。

星期三晚就最開心，因為又係幽會時間。（噉「幽會」法都幽得幾張揚．．．）同事B非常之落本，繼整左對棉槌（「兩舊幾水架！」），再整多對鼓掃（「百二蚊，呢對就抵玩呢！」），呢次仲拎埋隻wah黎忝。正所謂「有娃有掃，Ｘ你老母」（．．．），所以今晚玩得額外開心（．．．．．．）。玩完一個鐘間房比人卜左，點知拆晒ｄ野出去之後人地話換房，既然空左間房出黎，就勉為其難幫襯多個鐘黎野encore啦，搞到ｄ野搬晒出黎之後又要搬番入去。兩條友，你話係玩rock又得，話係blues又得，話post-rock又得，話迷幻都得，因為我（地）都唔知自己玩緊乜，呢家野咪叫「後」囉呵呵。養左幾個禮拜，我地個仔越黎越大，夠秤換證果日或者比大家睇睇（聽聽？）。等緊其他仔仔女女出世。
所以話夾band不爆非劉Sir。上個禮拜玩結他玩到手指公起水泡（「用pick丫嘛！傻仔！」同事B曰），今個禮拜隻手指公直頭爆埋，玩完之後成棍紅晒，還棍時嚇親睇檔個姐姐仔，
「嘩你地租房打band定打人架？」

權威小道消息（好似好矛盾喎）指出，五月尾jazz鼓神Dave Weckl會黎香港舉行工作坊，地點待定，欲拜神者敬請留意！

24/3/2005 THU

今日只需要三個鐘。十二點到兩點之間，發生左好多事，點解有ｄ野可以咁麻煩咁複雜，而我又可以咁義無反顧呢。或者，真係早走早著？

25/3/2005 FRI

過左咁耐朝九晚十之生活，終於捱到放假，好開心可以冇朝早。但係一起身都立即飛出旺角，星期三晚夾完未夠喉，見呢幾日有假放就黎多野復活節encore演唱會，但係觀眾人數係零，唯有兩條友你睇我我睇你都叫做有兩個咁大把，差少少要叫埋出邊看檔個姐姐仔入黎當觀眾。今日都幾大陣仗咩都搬晒過黎，剩係鼓棍都有三款，DV連廣角鏡＆智能咪都有，係差結他同amp冇拎過黎，遲ｄ我地可以開番間「劉義移動band房」。
今次豪少少換左間中房，唔知係俾多左錢確係掂ｄ，係拎多左架生過黎，定係間房風水好，還是入房前阿姐怒噴左劑「生人勿近！」之空氣清新劑（清新到生人勿近，呢隻牌子都幾勁），今次玩得好夾好順，仲發掘埋keyboard試多好多野，我地出碟之日子越黎越近喇！
夾完兩個鐘非常之意猶未盡，本來都想加多個鐘但比人卜左唯有走人。得兩條友，噉樣夾法其實成本都幾高，但真係冇計，真係好難搵到人夾。似乎同事B同埋我同事E真係要迫同事A出身，我地「劉昌Ｂ大聯盟」先可以成到團！

音樂人只會出現於兩個地方：band房同唱片舖，噉比人趕左出band房，唯有走去行CD舖囉，但去之前都要去茶餐廳充個飢先。點睇，呢餐都應該係去酒吧傾而唔係茶餐廳，眼前亦唔應該係凍華田而係嘉士伯。食完先過好景，而家ｄ大陸版越黎越多神奇野而且越黎越昌盛，睇黎翻版唱片公司越黎越多，好似EAGLES同一隻碟都可以有四個版本，鷹合唱團、老鷹合唱團、飛鷹合唱團，仲有我最鍾意的爾高斯合唱團，搵日我一定要集齊一套，反正買齊晒都只係八條野，一隻正版之價錢都唔使！之後再落信和，無論舖頭仔、Zoo定港交所都多左有興趣執之新野or正野，今日執左一隻，黎緊可能會跌多唔少錢。睇番今日買ｄ碟，同黎緊會買ｄ碟．．．死，越黎越唔metal忝！

落完信和兩條友行過佐敦，送完同事B過佐敦之後再走番過黎信和，名乎其實係行街。噉樣行街法因為仲有下半場，夜晚出旺角搵叻姐食番講左好耐都未食果餐雞。暫時最有前途係你架喇叻姐。呢個月見番／見到好多人，越黎越覺得，我真係好Ｑ頹。

26/3/2005 SAT

終於有一日可以乜都唔做剩係留係屋企訓覺，好耐未學過我隻狗噉訓飽就食食完就訓訓醒又到食夜晚。訓完食完，睇下書，寫下野，養下魚，噉就一日。唔寫喇，聽日仲要番工，頹埋佢先。

27/3/2005 SUN

一朝早比人鬧：
「放緊假，仲咁早起身做乜？番工？放緊假番咩工呀？扮勤力呀！」
點樣講，老豆老母都唔信我今日－三日紅假夾住之星期日－要番工。我都唔信架。所以今日九點幾起身出大埔，全程我當自己發緊夢算。但如果發夢都係番工，都幾灰。
唔知咩事，今日寫左唔少野，都好耐未試過起貨起得咁順，寫到放工覺得咁早落堂仲到喉唔到肺忝。好似寫左好多，點知數一數．．．咦，呵呵！都係繼續收埋算．．．

八點幾上到舖頭，但上到ｄ人又係走晒。好多人真係好Ｑ耐冇見過。遲ｄ啦，我估四月我會得閒番ｄ。
又有貨到。都好灰，敢講每次入貨會有最少四份三係ｄ人唔會聽過，但未聽過ｄ名ｄ人就乜都唔理等人餵，永遠唔曉自己搵，冇人餵，就大安旨意地唔會幫襯，仲小番人入埋晒ｄ唔知咩野－但又要經常提住自己要搵要聽「唔知咩野」。所以話，入咁多貨咁有心做把鬼，個個都只係要三個字，三個英文字。每次到新野，個個都會問：
「點解冇ＸＸＸ？幾時有ＸＸＸ？」
個個都只會問，結果個個都唔幫襯，最後個個都冇野買，再後個個都唔使買，因為TRHK執埋，好野。

28/3/2005 MON

最後一日假喇，所以我都係咩都唔理頹埋佢算。走啦，今日冇野睇。

29/3/2005 TUE

一朝早番到，死啦，野又冇得做，學生又唔番，有咩搞？好難得我有心情做架嘛！訓又訓完、網又上晒、文又寫過、連早餐都食埋，有咩好搞呢？丫！諗到喇！都係時候backup一下公司ｄ野！我地呢ｄ不嬲都好有手尾架定期backup定公司ｄ野以防不時之需架！跟住ｄ高層番到，
「你係度就好喇！我overwrite左個file唔鬼見左半盤數！你快ｄ摷番之前backupｄfile救我啦！你唔好話我聽你冇左上星期個backup file呀！」
．．．哦。呢個故事教訓我地，做人千祈唔好咁有手尾，記得頹得就頹乜都唔好理，所以以後朝早番到黎我咩野都唔會做淨訓覺算。

晏晝又係我獨霸office之時間。都幾開心，開住部機播住歌，行黎行去執執office（可想而知我係幾得閒），執晒各位同事ｄ立雜野就搵同事B吹吹水，吹完再坐低寫寫段記（咪就係你睇緊呢段囉），十分疏乎架真係，差少少就唔記得左，其實我係要出去上堂忝，呵呵。黎到呢度，你會有個問題：
「係office播歌？唔係卦？你老細唔小你？」
播metal野就聽小啦我當然冇咁夠薑，都係播番ｄpop野遮。播ｄ咩就無謂講啦，係一隻好多人以為好新，但查實係舊野黎之非本地唱片，遲ｄ或者會寫寫。最後聽晒成隻碟先走人。而家我熱切期待緊F.I.R.新碟。係呀，劉Sir已經唔再metal喇。

夜晚冇咩好講，又係寫呀寫呀寫噉囉。番到屋企，立即拎同事B剪好條片睇睇。我地個仔越黎越大喇！支智能咪果然夠靚仲要有立體聲忝，上次拍左咁多，黎緊有大把野睇大把野笑。我地隻大碟未出甚至歌都未寫，已經籌備好隻bonus DVD喇，非常之有效率同有計劃。

30/3/2005 WED

08:00
每日呢個時間都係生死存亡之間，訓又死，唔訓又死，橫又死掂又死，訓住死好似型ｄ喎。

09:00
．．．唉，真係想死，我要訓覺訓死，唔要番工番死，嗚嗚嗚嗚～

10:00
「人呢？」
十分勤力果ｄ同學話今日準時十點會出現，等阿sir搏晒老命死番黎早餐都冇買，點知最勤力果個係阿sir我！（「喂！應該係我！」阿姐曰）人又冇早餐又冇，早知就訓多幾個字啦！（呢條友已經冇皇管到不可理喻之地步）

10:30
終於有人出現，但唔係一早約好我果個，反而係另一組。全組三個人，琴日黎左兩個，琴日冇蒲頭個就今日出現，我發覺佢地都幾有默契－但都唔夠其他組咁有默契，你不做我不做，結果大家一齊唔郁。呢位同學一番到黎，
「我ｄ組員呢？又話十點番黎，唔係放我飛機丫嘛！」
琴日果兩位組員番到時，都係講同一番說話（雖然佢地番到果時自己都遲左成個鐘）。放人飛機者終被放飛機，呢ｄ咪報應囉。見一個組員都冇做唔到功課（雖然到齊一樣唔會做／做唔到），呢位同學唯有又搶劉Sir部機上勞工處搵part-time。真係我上年搵工時都冇咁勤力呀。但今次劉Sir冇有怕，因為逢星期三佢都會帶定部私家機番黎做野，你班友仔隨便搶啦點搶都搞唔到我缸魚！各位同學上個學期剛剛上完Business Writing，想必對求職信盞之撰寫有相當進步，但呢位同學並不認同：
「以前呀我寄親信呀間間公司都叫我去做，點知上完個Business Writing隻鬼話我個履歷格式寫錯晒喎，而家跟佢果個format咁詳細喇，立即冇晒公司搵我in都冇得in喇！」

11:00
「夠鐘完早餐時間喇喎！做乜今日唔食吉野家？」
朝朝早都好熱心地問我食唔食吉野家之阿姐問。
「使自己買架咩早餐呢家野！送到黎忝啦！」
等左好耐，個學生終於番黎喇！劉Sir最關心當然係個學生－唔係，應該係唔係個學生，而係佢拎住果個吉野家牛肉飯，好在佢趕得切買，餓左好耐喇我！（劉Sir不嬲都係咁黑心架啦，難得ｄ學生又係噉請佢食野，吹咩）跟住搵工果位都搵無可搵，佢ｄ組員又終於出現（咦，本身好似係約十點架喎．．．），野又食晒，都係時候做功課喇。雖然根據自然定律，約番黎學校做小組功課，無論係幾早到（雖然永遠只會一係遲到一係唔到），無論你搵左幾多書同資料（雖然永遠只會一係番到學校先搵一係「咦乜唔係你搵書咩？」），黎到學校做功課點做都唔會做到野，永遠只會一係吹水收場一係上網搵資料搵極都搵唔完直到永遠，做到lunch時間（計埋做野都做唔夠兩個鐘）就走人or食埋飯先走人，勁少少咪留到食埋下午茶先散囉。即係大家都知道會有噉下場架喇，但既然一場番到，咪象徵式地做一做，之後再例牌地爆番句「都唔知做乜！」食飯盒算。因為人太多的關係，做做下都唔夠機做功課（呢樣野ｄ學生成日投訴），劉Sir唯有慷慨地讓埋部私家機出黎。冇機用，點知仲衰．．．

12:00
．．．好唔開心囉。ｄ高層囉。衰囉。唔肯做野囉。要我做囉。塞晒ｄ野比我做囉。要我做晒囉。衰囉。做咪做囉。唔開心囉。喊囉。

13:00
終於可以（暫時）逃離高層之魔掌，因為有得做劉主任，全日仲有得走幾場忝呀幾開心呀，衰在ｄ人只係黎見part-time clerk仔，問得ｄ咩丫真係一個字唔使就玩完啦。所以夾硬都整ｄ問題出黎消磨時間，好似呢個係讀電腦，見查完家宅ｄ行野又問晒就猛問
「識咩software？打字？Hardware？砌機？Networking？講！」
係噉問電腦野先叫做玩到兩個字，但如果呢位幸運兒咁好彩做到呢份工就會發現，查實面試時果隻咩劉主任講果一大堆乜叉電腦野根本唔會用得著。面試到最後，例牌問一句
「有冇咩問題想問？」
「有．．．點解你隻腳上面有張紙仔？」
係囉個劉主任真係好鬼求祈囉，以前in乜in物乜都唔使，係inｄpart-time仔懶到問乜都唔諗定仲要大大張貓紙，劉主任擺明歧視唔夠佢浪費番幾個字半個鐘果ｄ。

14:00
第二場，今次唔係見人係見鬼。點知坐極都唔見有鬼，已經係第Ｎ隻失約。係咪近排燒多左飛機呢ｄ人？撞鬼真係咁難？撞唔到鬼冇得玩都唔緊要，冇得in，搞到又要繼續做野，灰．．．

15:00
幾經辛苦終於做完大部份野，可以餵下魚，又可以撩番幾隻字。即係噉先似番工架嘛！番工為做生做死既咩不嬲都係番工等放工放工等出糧架啦！我係噉架啦而家大大聲擺到明唔做野點丫炒我丫笨！

16:00
．．．冇咩好講，繼續工作。認命啦，真係想冇得做咩．．．

17:00
五點鐘，翻生！又有得in，成日見親都係仔，今日終於有個女睇睇。印象非常之好，唔係因為係女仔（雖然某程度上女仔點都得體ｄ架喇，見親ｄ仔都超極呢啡），而係會早到三個字。早到呢個基本面試禮儀，不論人鬼都唔係成日見到。都冇咩唔掂，只有一樣，就係非常之少野講，係答得唔差但條條都係一句起兩句止半個字唔使就玩完，好多時仲睇緊貓紙睇下條問乜又或者寫下野，都未睇完寫完已經冇晒聲，呢個情況佢出聲又唔係，我唔睇貓紙／唔寫野又唔係，都不知幾尷尬。我係指睇緊貓紙果個我。

17:30
In完阿靚女就乜都唔理躝落街先，晏晝飯都未食呀真係專登留到而家一餐過搞掂架一早計劃好！剛剛有兩本書要釘，就更加大條道理要閃落街。即係唔知點解ｄ影印舖可以咁鬼旺次次落黎釘份野都要等番幾個字，咁多時間先走到創興寄信再落到信和兜個圈都仲有時間。係二手舖有隻想執好耐，今日都仲係度就豪五條過佢執左先，雖然睇番二手價五十蚊係貴左ｄ，但都睇中幾耐又唔係太易搵到就執左先算，俾完錢先發現原來隻野係孖碟黎當堂抵番晒，係衰在有大大隻字寫住sample囉。隻野係咩又無謂講喇，講左你都唔會信，經過舖頭仔有隻又想買（你都唔會想知係咩黎），Zoo門口隻壞碑唇好有興趣．．．噢，好Ｑ多，差少少唔記得左仲未放工忝。

18:00
放工時間但仲未走得，所以上番黎前專登篤左袋魚蛋＋番薯，唔係女人街口勁大檔隊晒成隻蟹出黎果間呢間ｄ野反而唔好食唔係有地利唔會做到咁大，係再向彌敦道行過ｄ果檔，舖位細好多但好食得多，最重要係超級抵食，我研究過買五蚊魚蛋番薯兩溝係超級抵，因為噉砌法只係少一粒魚蛋＆少一舊番薯即係同買十蚊差唔多，噉佢咁益我我就唔會客氣啦。呢餐就係我lunch黎喇。呢個時間先有得食lunch，仲要留番係學校食，咪又係因為仲要走一場。即係點in法都冇所謂，你唔好要我放工之後先黎丫大佬，所以第一個印象已經差爆，篤魚蛋都篤得寧舍唔開心。

18:15
跟住印象再差。六點三六點四，都仲未見人，即係又係「準時到」啦？所以點解咁鍾意頭先in個女仔，佢早三個字到，我就可以早三個字頹。到篤晒魚蛋．．．

18:30
「對唔住，我搭八先到！」
人唔見，電話就有個，灰！所以佢黎到我都冇乜好氣同佢傾，
「冇！冇行喇你！冇得做！Next！呀唔係夠鐘喇唔next喇，應該係，走！我係話我走！」

19:00
走完最後一場，已經差唔多七點，理應即刻閃人，係ｄ高層衰囉係要留難人囉唔開心囉，搞到人地打電話黎催，
「黎未呀！我就到喇！快手啦！」
正經事要緊，所以手頭上做緊野都當堂咩都唔理，立即衝過去先達．．．

19:30
衝到去剛剛好，一件加一件兩件咁大把，齊人！所以小人有小人的好處，次次夾野都唔怕等人。佢係阿B，我係阿2，冇錯我地就係B2．．．咦好似有隊跳舞野又係叫呢個名喎。本身八點先開始其實去食埋野都夠時間，但為左慳錢慳時間搭半就剷左上去，看檔個姐姐都嚇親目瞪口呆地睇本帳簿，
「又係你兩隻野！鑊鑊都扮晒野早上黎諗住呃多幾個字！超！」

20:00
繼上次轉左房立即煥然一新，本身都想豪番ｄ卜中房，點知一早爆鬼左，我地得兩丁友當然唔會豪到卜VIP房啦，唯有死死地氣走番去細房，好在今次劉義移動band房冇出動唔係就白移一趟。冇左keyboard，部amp又爛到爆（外型同聲都係），
「即係要我rock遮！」
本身係想jazz & blues之同事B話。十分無奈的佢又要rock得起喎仲要一搞就搞多左個仔出黎忝！呢首好似短左ｄ，但係我十分之滿意，最後仲有wah solo忝，我地B2創作越黎越在行喇（雖然由頭到尾都係得結他同鼓），出碟的日子不遠矣！（呢一句，每次入band房都會嗌唔知幾多十次）

21:00
有左二仔可能開心得滯，連續玩左幾次二仔，反而唔記得左大仔係咩樣忝，結果結他係大仔果時個鼓打細仔，噢，有點兒貪新忘舊忝。差唔多婷婷玉立喇喎我地個女都！唔得我都要研究番下結他先，噉樣先可以寫下歌同個結他佬溝通。
「寫咩歌丫，成日記唔住ｄ仔，你寫譜先啦阿鼓佬！」
阿結他佬云。噉就難ｄ喇，個結他佬都唔做個榜樣寫譜先，個鼓佬又點會跟住寫呢，個鼓佬咁懶！

22:00
夾完就當然係去食番餐啦，例牌又係果間睇唔到海景之海景粥店。似乎要搵多ｄ隊員喇，即係多個人，夾錢都夾得冇咁傷啦，而且有多門樂器變化都大ｄ。傾傾下，我地有位舊同事話晒八級琴，立即call佢搵佢彈keyboard，不過冇回音，或者睇緊《大長今》。係呀我地就係咁癲咁即興。
．．．都係問同一條問題架喇。亦係每一個人都同我講之一句：
「算啦劉義．．．」
呢句從來係我講最多，而家變成身邊個個都同我講番。唉。如果咁容易就「算」到，就唔使咁灰。所以，我都只係識講一句：
「算啦．．．」

23:00
臨走上一上舖頭唱散紙，發現奇蹟地有開到仲有生意，仲好神奇地聯絡到老細，都唔知幾耐冇見面，雖然今次都只係得個電話，已經好過平時得SMS & email。而家個勢，開始有番ｄ起色，但有時都覺得，幾不合常理。兩個市場，一個越黎越大，一個越黎越細，但越黎越大果個唔係本地市場，本地果個只會越做越細。

23:59:58
今日last，醒醒大家：

2R 《新世界》

傳聞已久，全城矚目，萬眾期待，終於有得睇喇！唔係睇2R（雖然我都承認，如果當初知道有得探班我實跟埋去架），而係睇MV阿首席結他手－ Dave(y)@MESSIAH/NOTHINGNONE！（即係全MV得一個結他手，唔算係「首席」算咩）佢出鏡都唔少架又彈Fender又彈banjo仲有solo忝，solo係簡單左ｄ都算啦，重點係睇佢唔係睇佢手結他嘛！係有一個遺憾：阿輝爺，點解唔係你打鼓？各位去唱Ｋ記得點　2R《新世界》，唔係唱，係睇清楚Davy哥果個佢話好nu-metal實情似個江洋大盜多ｄ之型爆haircut！

23:59:59
好耐冇試過寫咁長段記。

31/3/2005 THU

今日要走兩場，朝早十點半踩到十點半都係旺角，兩場都係呢頭唔使搭車搭黎搭去都幾方便架，係搞到番唔到學校囉。朝早ｄ堂都冇咩特別架喇，大家都未訓醒，上堂都冇精神啦邊度有心機搞事，噉我就可以安份守己地守住部機。輕輕鬆鬆三點鐘又放工，都冇咩事發生，最大件事就係走人果陣被困走唔到。點解有成三部電梯，都要等成兩個幾字先有一部上到黎？雖然座落八樓，早知行樓梯走人算啦，食飯時間黎架呢個鐘！

三點鐘放四點鐘第二場，ｄ堂超時又執下野吹下水仲要等下電梯（呢一「下」都幾係野）落到去已經差唔多搭四五，呢個lunch hour都叫做仲有半個零鐘break，下一場橫掂係潮流特區，就順路先上旺電探探佛爺執番隻mouse換番學校果隻不斷自動向左郁之波波mouse（包你用到爆粗，個箭咀係噉向左郁，連double-click都做唔到），之後再去超抵食果檔野篤多勁大袋魚蛋＋番薯就上上學校探個班。所以話冇心冇好報，上到去魚蛋都未篤已經
「自投羅網！快ｄ幫手做野！」
唔開心囉。今日明明唔使番工都要做囉。ｄ高層賤囉。魚蛋都冇得食囉。喊囉。

被欺凌到差唔多四點先走到人，好在夠近都仲趕得切，頭先剩係做野剩係清晒ｄ番薯，食剩ｄ魚蛋就拎上黎set野等上堂時繼續。之後都係繼續寫，近排起貨起得左慢ｄ又專左ｄ，或者遲ｄ慢慢放ｄ野出黎。

1/4/2005 FRI

朝早番到黎又係繼續不停做野。經過幾日黎之教訓，今日一個學生都冇番到，所以劉Sir做得十分之唔開心，因為冇人番黎請佢食早餐，做野都做得寧舍冇心機。唔開心。

今日出到沙田，有一堂有兩條友外型相當過癮，一個超高超肥另一個超矮超瘦（令我諗番起好耐冇蒲頭之肥鬼瘦鬼），入到班房就坐最後排係噉傾偈，之後過去叫一叫佢地靜ｄ，個肥仔自動自覺地走左過隔籬果排坐，我係完全冇出過聲叫佢噉做架。兩個人都坐走廊位之後仲可以繼續傾偈，但今次我阻止唔到佢地，因為佢地係用電話傾，唔係講，係SMS，唔係互send，係一個打完之後遞俾第二個睇，第二個打完之後又隊番俾第一個，噉佢地又的確係冇出聲，雖然係走廊遞黎遞去但佢兩條友坐最後一排又冇騷擾到其他人，我唯有眼定定地睇住佢兩條友噉樣用電話ICQ再送多個服字俾佢地。

兩個禮拜前日頭去in夜晚已經收到電話話請，被夏威夷流放返港之冷爺今日終於開始佢Hong Kong Records售貨員甲之生涯。做成點就廢事問佢啦預左唔係大大鑊都有一鑊泡架喇。為左慶祝終於搵到工放完暑假，阿冷哥特別獻上佢籌備兩秒耗資五毫大作賀一賀：

LAUVERGREY

2/4/2005 SAT

是日行程：旺角食早餐＞上學校坐坐＞荃灣＞銅鑼灣＞三點半放工可以逛逛街＞仲可以搵同事B食個飯忝。
結果：七點幾起身＞八點出門口＞出佐敦轉車＞元朗＞元朗＞元朗．．．
因為有同事請假，所以調更調左入元朗替佢個位，當場灰爆，冇早餐食冇街行冇所謂，要早起身先死呀，而且入一入元朗，車錢同本來行程走幾處地方代同事食飯一樣咁貴。叫做有得寫下野噉囉。
而家剛剛好四點，頭先三點零落堂之後有堂空堂食飯，阿姐推介係正學校後門出條後巷一出門對正四路步就到果間泰國野，阿姐仲起勢話
「好熟架喇！你去果度食就響我朵啦！好熟架喇響我朵會整快ｄ同多料ｄ架！」
果然超級好食又夠多，最後「餐飲」係槨汁西米露又係好好味，埋單廿六都唔算貴，食得十分開心。附近有間狗舖食完飯仲有大把時間剩可以過去睇下玩下，之後周圍蕩搵下士多買定ｄ糖果朱古力頂埋最後兩堂（所以呢份工賺極都唔夠食，日日上堂前實會執一大堆立雜野），四點番到黎又繼續打下野等搭半打鐘，都幾疏乎架。冇得早收工，但可以坐定定寫野唔使周圍走，有好有唔好啦，但有得揀當然想可以早ｄ番屋企同唔使出咁遠。

七點三放工，又係遊車河時間。同樣地先出尖咀轉車，噉又個幾鐘，雖然冇乜塞車等車，都差唔多八點半先番到屋企，其實都幾浪費時間，叫做聽住歌有番ｄ意義。今日個人好靜，所以番到屋企，都係繼續聽歌算。