段記



12/10/2005 WED

近來,越來越冇咩好寫。音樂,都無謂寫啦。反正我聽d野,都唔夠"metal",
「JUDAS PRIEST都聽?唔Q係卦!梗係聽CHILDREN OF BODOM/TRIVIUM/BLEEDING THROUGH啦!」
係架。同身邊好鬼"metal"果班人相比,我發覺我真係一d都唔metal架。但冇乜相干啦都。大家都係聽下歌仔遮。又唔係聽音樂。
音樂,送多少少比大家:

A Night with DEATHGUY

Show review,唔好叫我寫。太多。


13/10/2005 THU

老細返大陸、幾個同事出去見客,今日全公司好靜。冇皇管,好開心,除左老闆娘間唔中經過我個位都會嗌句
「食蕉啦!」
冇錯,上星期老闆娘果一大箱百幾隻蕉仲未食完。有位同事睇《開心大發現》,發現到有一個大發現可以保存香蕉兩個星期唔爛(身為《開心大發現》究極fans的我居然miss左呢一集,實在慚愧),就係用報紙包住梳蕉放落雪櫃,
「噉就可以放兩個星期唔壞架喇!」
結果搞到成雪櫃蕉,今日拎番出黎,發現呢個大發現係...成功既!所以今日係噉食蕉!
真係好得閒冇野做,本身差少少係可以連阿姐送貨果份都撈埋幾鬼開心,但阿姐善意地
「唔使幫啦!我晏晝自己拎d貨過去咪得囉!我都知你多野做架喇呢d粗重野我做番啦!」
我唯有走番去自己個位喊。


謝謝。謝謝



14/10/2005 FRI

超忙。黎緊仲忙。

越黎越求祈。冇辦法。錄自一遺憾之好友。所見略同。
「與執筆寫日記一樣,我只是寫而不翻看舊日記的。因為,我還沒有信心可以面對那個一塌胡塗的過去。」


15/10/2005 SAT

今日TRHK見唔到我架喇。因為今日要見客。本來個客係琴晚到香港,今日一朝早出灣仔酒店見佢,但突然有事趕唔切過香港,迫住要今晚出機場見,所以,冇計。即係舖會照開,只不過見唔到我噉遮。朝早冇得見客,好處係可以訓多個零鐘,八點半仲刷緊牙果時收到個call,
「???????????????????」
完全唔知講乜,因為係普通話。我只知道係工廠打黎,同埋好Q急。唯有飛的返公司睇睇,原來有張fax要check,九點半前要覆番工廠。跟住仲過癮,係「偽造文件」,我發覺雖然我係marketing,但現時職責接近打雜多d。
一點鐘,個個都雞飛狗走,冇錯,夜晚出機場,即係老細都叫我返屋企訓下覺先好過,但我又懶(...),留係公司黐免費飯盒(留得係度,老細叫果時仲好意思唔請埋咩),之後上個網send下email無聊寫下野,就撻低。撻到老細都眼冤同老闆娘兩個走落樓行街算。唔係五點幾果陣聽日上廠參觀個鬼佬打黎約實時間(冇錯,順便提提你,聽日星期日TRHK照會開,不過唔會見到我),我估老細一日唔返黎,我一日唔會醒。支力。同好訓。

七點鐘飛車出機場,本來約八點,點知上埋茶樓搵埋位等極都唔見人,兩條友你眼望我眼,又唔叫得野食喎。都幾無奈。就當大家諗住可以早d走人返屋企訓覺之際,電話就黎喇。噢。話係見客,真係「見」,傾生意呢d大野梗係老細做架啦,我地呢d黎到,都係得個食字。老細係噉講,我就係噉食,老細講完,望望張檯,
「喂!衰仔!隻燒鵝呢?」
仲叫左個黑椒牛仔粒,十分有趣,用左個西餅型曲奇兜裝,前所未見。就噉睇,成味野最好食都係個曲奇兜。老細都知我諗緊咩。
「拿!唔好亂黎呀下衰仔!個客望住架!」
食下食下,唔知咩事,就走得人。真係黎「見」客。所以老細都好無奈。


16/10/2005 SUN

琴晚玩(...)到十點幾先走,機場飛到返屋企都差唔多十一點,理論上應該早訓既 - 理論上,實際上當然又係冇兩三點唔願撻上床。要咁早訓因為今日十點半就要返到大陸工廠,即係六點半就要起身趕番公司再搭老細車上。咁早起身,當然要訓番幾個鐘補補,所以一上左車已經非常唔客氣地大訓特訓。老細當然狂鬧,但佢都嘈我唔醒吹我唔脹,因為我訓著前已經戴定耳筒係噉焚
"Highway to Hell~~~"
其實,都係幾無聊,即係兩隻鬼上黎,除左比佢地見下我係乜樣同講幾句英文,基本上又係「見」客。星期日工廠又得幾個部門開工,行幾行已經玩完,係之後抄番佢要咩貨先煩。抄抄抄係噉抄抄左好耐,抄到老細都
「喂!抄完未呀?等緊你開車返香港呀頂!」
同樣地鬧極我都當冇到,因為一面訓一面焚
"Welcome to the Jungle~~~"

十二點幾開車,兩點幾返到公司,執埋辦同老細食埋飯都仲有時間,仲夠時間趕番去開舖。晏晝返大陸變左朝早返,都係好事,但結果都係去唔到開舖。太Q多野做喇,早左上完大陸,都要趕返屋企做定野,唔係聽日有排趕。搵到而家份工,輕鬆過以前,但又冇以前咁得閒,唔止今日,遲d可能仲多日子開唔成,起碼跟住個禮拜開始,未必晚晚都趕得切七點開,甚至未必開得到夜晚先。
你會覺得而家的劉義,好唔「劉Sir」。點睇,劉Sir照計係唔會、唔想同唔應該做番呢dtypical office job。而家劉Sir由超出規範,變番做一個普通平凡世俗officeguy。冇計。有陣時,的確係要向現實低頭。睇我正式回雀果兩個禮拜,計過數,其實全職做TRHK Metalhead,都未必係冇可能,如果真係可好似似果兩個禮拜咁興旺,訂到一至兩批貨加交埋租,淨番都會夠使((只)係「夠使」)。但回到現實,長遠黎睇,「夠使」,係唔會夠。單憑而家之香港市場同香港聽眾之接受力/購買力,我亦唔相信中期內可以脫離到「夠使」之水平。
「有冇CHILDREN OF BODOM新碟?冇?又冇!有佢地舊碟?我淨係要新碟!唔要舊碟!試其他melodic death?我唔係要melodic death!我係要CHILDREN OF BODOM!」
唔係個個,都有大半係噉。冇果一隻,有乜都好,都唔會買;果一隻到左之後,執得果一隻,之後又係繼續等同小一隻。身為客人的各位當然唔會諗冇咁多新貨係咩原因,因為永遠唔會去諗問題出於邊個身上。有d人肯試多d,但又成日嘈點解冇乜冇物,查實入碟係咪真係咁簡單呢?HMV咁大間都冇,又唔見會去鬧佢地冇?同埋有d冇,係因為賣晒年幾甚至幾年,一早唔會有存貨,而家先黎搵,冇又有乜計?就算真係有人搵有人肯試,就好似有個朋友,想搵廿幾三十隊,都有一半係有。上到黎,執執執執執執...
「你要果十幾隊係晒度,你想要邊幾隻?」
「一隻!」

...所以,其實冇果時嘈,有果時,係咪真係會買呢?就算真係齊晒,係咪真係會買晒呢?唔會。但又要嘈點解冇乜冇物。噉又有乜計?你又會問:
「喂!九月頭有第一波,之後又話仲有幾波?點解而家都冇新貨?冇新貨點買呀?」
本身九月,好彩的話,係唔止一波,月頭第一波,月中第二波,月尾第三波 - 呢個係最少,呢個先係九月。但結果得一波,月尾先到OPETH新碟第二波。我走左,係其中一個原因。之前所講幾個原因,係原因二三四五六N。試問第一波,到左咁耐都仲可以有咁多冇人買(唔係d貨唔賣得,係冇人買,可能因為唔係CoB新碟啦)。冇周轉,邊有資金入新貨?舊貨唔去,新貨點黎?
其實,講極都係果幾樣。年頭講到年尾,都係呢幾樣。但當然啦,相信好多小朋友,係唔會理解同諒解呢d野架喇,事非經過不知難,錯的永遠不是我。所以,算啦。我會繼續捱落去。但要我訓晒身噉捱(而家都捱左大半差未貼地遮),就無謂啦,始終災禍在前。就正如某仁兄之名句:
「唔使為香港metal界付出咁多啦。」
唔好話我唔再為自己之理想付出咁多呀。有人付出果時,唔去欣賞唔去尊重,只會雞蛋堿D骨頭;冇人付出果陣,又要鬧點解唔付出嘈做乜冇人付出,但自己卻永遠唔會、唔肯付出。算啦。這就是香港。


TRHK本週營業時間:
17/10(一) 7:00pm - 10:00pm
18/10(二) ***CLOSED***
19/10(三) 7:00pm - 10:00pm
20/10(四) 7:00pm - 10:00pm
21/10(五) 7:00pm - 10:00pm
22/10(六) 3:00pm - 10:00pm
23/10(日) 3:00pm - 10:00pm

TRHK將於本星期五晚上照常營業,請各位多多留意、多多支持!
請於各大forum代為散播消息,謝謝!
任何查詢可致電98675737 / ICQ 22209700 劉Sir洽


Weekly Reviews:

  1. TRAIL OF TEARS - Free Fall into Fear
All reviews here


17/10/2005 MON

真係超支力。係成晚都訓唔著。實在太多野煩喇,訓得兩個鐘都冇,又要起身返工。連返幾日,琴日見完客仲要起番會議紀錄同報價單(是但一樣都夠做最少一兩日喇),又要彈多幾壇野過黎,做。所以,都冇咩特別野好寫。

夜晚,算啦。本來有機會見見一位老朋友。但結果,都係唔上黎喇。因為,「心灰。」邊個?上黎TRHK咪知,其實次次上黎都見到佢。但,算啦。就同Mini版主一樣。
算啦。香港有心搞音樂果班,下場永遠唔會好。「型」才是皇道。


18/10/2005 TUE

今日非常開心。因為,好靜。又好嘈。靜,因為,今日大規模上廠,公司唔見左一半人,包括老細。所以,好鬼靜,因為冇皇管,得除左耐唔耐行過贈句
「食蕉啦!」
之老闆娘(上星期一箱,今個禮拜清晒,又買多幾梳...),全日公司先得果幾丁友,自己d野又跟得七七八八(即係冇皇管,萬幾樣野做都唔做啦),成日都冇乜野好做,但又為免比人小就求祈搵d野忙下,成朝早係度打雜地釘書、bind書,同埋一個人霸晒全公司電腦,飛黎飛去幫走左d同事check email。當然係焚住機噉做。成日係噉聽歌,聽番隻OPETH "Ghost Reveries",買左返黎咁耐,差唔多冇聽過(...),今日既然咁「得閒」就拎出黎焚,由朝聽到晚返工聽到放工,買左返黎咁耐都唔夠今日聽咁多次。(...well,唔講喇。)評語,都係得一句遮,聽過邊句啦,唔講喇。

到左lunch時間,變左大帝。相處左咁耐睇清左我真面目,而家逢到lunch timed女同事包括老闆娘都會自動自覺的朝貢,所以我永遠係最遲入果個,等其他人進貢晒之後先入去審查一下各位諸侯有冇私空貢品。結果今餐個飯盒三隻色,一餐食左兩個飯盒。
「食唔食到呀你?」
「挑!當年打邊爐一晚六包烏冬都係噉啦!仲講!整多半盒黎啦!」
食完(兩)盒飯,仲拎多隻蕉(冇錯又係蕉),霸晒成張檯兼成間pantry大字型攤係張凳度食,令人側目。但噉先似返工。


18/10/2005 TUE

今日怒頹。全日咩都唔理,搶鬼晒唔使用腦果d黎做,將成箱咁大棟A4紙一頁頁分番開做幾本catalogue,之後再幾張幾張噉打窿再疊番齊bind埋...噉樣玩玩下,都由十點幾做到四點幾,兼仲未做完喎。過程中當然係邊做邊焚,而家已經肆無忌憚到老闆見到都隻眼開隻眼閉。好頹。老細最後都睇唔過眼,
「喂!乜我請你唔係做marketing既咩?」
但真係唔想做野。實在冇乜心情。(冇錯,冇心情索性野都唔做,而家d人真係惡)

放工先黎病,都幾唔抵,一早病發咪好囉可以呃番日病假。但病都要開舖架啦。雖然上同唔上都唔係話差好多。
好Q多人今晚。雖然多人同冇人都唔係話差好多。


20/10/2005 THU

「病左呀你?」
今日好多同事問。係啦一睇就知病左啦,平日早餐係一個雞批一個菠蘿油加兩個蛋撻架嘛,今日少左個菠蘿油,一睇就知有事啦!其實都冇咩事遮,應該係喉嚨發炎啦我估(醫生都唔睇,懶到呢),咳到九彩都廢事出咁多聲同做咁多野(...),連lunch都只叫得個茶餐仲要唔留係飯廳走番出自己個位食。但各位同事實在非常關心劉Sir喇,一到lunch time立即衝晒,老細一馬當先
「今日我食特餐好多送,分d比你丫!咁Q大豬扒要唔要?」
「咳成噉,點食呀老細?」
「噉個奄列啦唔熱氣呀!」
「我個餐都有隻蛋啦老細!」
「...漢堡扒啦噉!」
「咪又係油炸野!點食呀!」
「......算!放你一馬!」
「......刁!」
(呢句當然係在心中)
之後到各位女同事大獻殷勤:
老闆娘:「今日我盒玉子豆腐飯好正架!我都食唔晒,分一半比你丫!」
「唔係卦!?」
秘書姐姐:「呢碗蘿蔔糕豉油牛肉盅頭飯,益你架!我邊食到咁多!成碗比你啦!」
「又黎?!?!」
助理B:「我個餐送漏左個火腿奄列同餐飽,陣間送上黎果時你拎埋去啦!我俾左你架喇!」
「噉都得?!?!?!個個都襯我命先黎!!!」

唔病死,都飽死。我仲要日日lunch都被全公司噉樣蹂躪。可想而知係度工作幾辛苦。因為日日食完飯都頂到上頸。所以呢,老細,冇計啦,唔係我唔做野呀,我都想做架,咁飽,點做呀?

琴日鍘得多工多藝熟,仲要最浪費時間之分紙工序琴日已經做晒,今日淨係打窿同bind書,再唔可以好似琴日噉借呢d無聊工作浪費成日,三兩下手勢就做完,今日真係要做野。琴日加今日鍘左幾千張紙,完全高估左部打窿機放紙碎容量今日,所以今日鍘鍘下發現,
「做乜次次打親窿部機都會彈起?」反轉一睇,放紙碎果格拱到仆街。
「嘩!果個位本來平架喎!部野飽到滯!」
成幾萬粒紙碎入面實到實一實,立即成班人衝過黎,拎晒鉸剪呀間尺呀螺絲批呀攝入去d窿窿罅罅整d紙碎出黎,過程中大家包括阿姐都好踴躍,仲要有幾大力得幾大力,因為,部機係我個位。所以我個位經常出現六月飛霜慘情之景。玩到通檯通街都係之後,花左唔知幾多心機去執拾,一座不小的小紙碎山矗立於我張檯上面,十足堆填區噉款。有同事手痕一個耍手
「我仙女散花!」
「我刁!!!!!!」

好準時做晒d野,就比平時早d走人,我地呢d而家唔會懶勤力,做晒野早d走人好過。早d上到皆旺,都係冇乜分別,即係/只係可以聽多幾首歌、睇多半隻DVD噉。除左Slayer妹妹加Glam妹妹,都冇。我發現香港女性越黎越metal。Metal過「我好metal」果班男士。
當世人眼中只有CoB只時,多少音樂都是無言。


21/10/2005 FRI

「咦!正常番喎今日!」
「...」
「餐餐都食盒幾兩盒飯,今日先得一盒飯一碗例湯,終於冇平時咁癲喇喎!」
「...」
「今日例湯係咩呀?開黎睇下!」
「...」
「嘩!!!」

一開,原來唔係例湯,係叉瀨。又係食咁多,嚇到成班同事即時四散。其實,今日見仍然有d咳叫碗叉瀨就算數,但d女同事擔心「唔夠營養病唔好」,兩個人夾手夾腳集兩盒燒味之飯頭送尾砌左一盒飯出黎比我。就噉睇,的確係好似一盒飯一碗湯。實際上...真係超飽。需知今日除左呢餐,早餐老闆娘御賜左半兜椰賓(得閒行下美心睇下咩叫椰賓就知有幾大),本來係早餐果兩個蛋撻變左下午茶(已經買少左個雞批架喇,今日俾錢時茶餐廳阿姐都問「唔要雞批?冇事丫嘛你?」),仲未計其他同事度搶番黎之零食例如會計姐姐果包點死都係提子乾味道之蘋果乾同樂天熊仔餅XN,當然唔少得香蕉(又買左幾梳,黐線),全日多數時間你都係見到我食。食左好Q多。好飽。咳又點?病又點?食完先算!
最正就係,今日出奇地冇乜野做。好鬼得閒。好鬼開心。但此乃迴光反照。下個禮拜,唔好話好得閒,直頭係好X大劑。

一次比一次早,今日比琴日更早。但其實講開唔開星期二五,今日得閒都放下自己假抖下病休息下好過啦,反正,開同唔開都冇乜分別。又係當可以專心聽野寫野。當然,寫,我都唔知有咩意義。因為係pop野,唔寫,都會有人買;唔係pop野,點寫,都唔會有人買。大家都係聽下歌仔遮。又唔係聽音樂。見冇人就早d收皮,就係乜Q都熄晒時先有一pair入黎,仲要係買黑膠,「買黎刮!」都幾神奇。落到巴士站,又撞到兩件,即係你地早半個字上黎就有架喇。算啦。
「有性趣」人士,永遠唔會有音樂,只有有性趣。


22/10/2005 SAT

「喂!係邊度呀?」
「舖頭囉!」
「咁早?又話遲開?」

冇錯,本身今日你冇五六點都見唔到我。下星期大鑊野,今日有幾噸野運黎公司入倉,前幾日已經唱行晒今日冇OT一定走唔到人,好在琴晚幾噸野到晒,今日就唔使搞咁多野可以準時走人,臨走前仲擸埋其他人飯盒d剩餘物資(都唔係剩餘架喇,基本上係佢地食之前同食緊時已經搶左),噉又慳多餐,仲可以兩點未夠走到上皆旺。
但,下星期,將就下,真係唔好預期咁多。

逢星期六,千祈唔好上黎,因為會比皆旺108果兩條無聊友嚇親。冇錯,就係「thrash才是皇道」果兩條。所以,冇人都係好事,起碼多番d位比兩條戇居仔互mosh先。越來越無聊,已經返到去大魔界村、惡魔城(聽"Apkas Itulia",一定會諗起呢兩樣野),同Mortal Kombat。Mortal Kombat,實在係太cult,暴力game經典。但套戲,就算啦。
FINISH HIM!

今日唔係好多人,但好多神奇事。第一單生意係NIGHTWISH,冇野做播隻NIGHTWISH,有條友走入黎,聽左陣兜個圈之後走左去隔籬睇模型,播左兩三首歌佢又睇完模型之後入番黎
「播緊呢隻咩黎?」
NIGHTWISH "Wishmaster"。」

即買一隻。對於一個模型友會有如此舉動,我都估唔到(仲有上次相同情況聽完之後隔日返黎買番隻DARKANE "Layers of Lies"的模型友乙,同行過唔知咩事都執隻avantgarde black的路人甲)。夜d又係冇野做播RHAPSODY,跟住有對快樂情侶走左入黎,
「播緊呢隻咩黎?」
「RHAPSODY "Symphony of Enchanted Lands Pt. II"。」

越聽越開心,即買一隻,仲要係女果個雀躍地買。神奇在於,兩宗個案之當事人,都唔係聽metal。講開又講,夜晚glam妹妹好開心,因為上左黎咁多次,終於搵到有女仔聽metal。點解咁難搵到?除左因為大多數已經download晒唔蒲頭(灰的一回事),仲因為
「男朋友唔鍾意我睇band騷架!我男朋友唔鍾意我聽metal架!」
所以點解成日話,香港女性越黎越metal,仲metal過「我好metal」果班男士。(仲未明呀glam小妹妹?)

再夜d,耐唔耐都會蒲一蒲頭隻鬼又出現。照舊都係冇買野,因為佢都只係一隻只搵pop野的鬼,好遺憾而家TRHK實在太缺乏pop野 - 雖然有好多在我眼中已經pop到唔pop架喇,係唔知點解都冇人會搵會試會買囉。雖然都係只搵pop野,但實在分別太大喇,佢口中dpop野,雖然已經好大路,但香港人都唔會搵,咁多年黎,呢d野未有香港人問過我。但呢d已經係好大路好大路架喇。點解接受力同知識可以咁低咁窄呢?所以見到棟"Reign in Blood",好想笑。就好似過左咁多年,香港人都仍然只係得CoB同CoF一樣咁想笑。當然,可能你又係同果萬幾人同一句:「有喇!」。就好似晏晝位仁兄咁威武:
「呢隊band呢隻碟都冇!?噉即係要download mp3啦!?」
噉可以咁大言不慚的話,咪去download囉。我地呢度冇band。只有music。

夜晚收檔,雖然好多碟等緊,都走去睇睇戲走走鬆鬆,廢事太多音樂喇。主要想睇近來較多人談論之《高凶三萬里》,上到新世紀剛剛開場,唯有朗豪坊,點知要等到十一點九,又廢事返皆旺,咪食下雞行下街聽下歌,都好耐未試過噉樣無聊地浪費時間法。雖然朗豪坊超豪,但戲院反而比想像中簡陋同細,係勝在夠高,坐後排睇十分一流。套戲,其實冇咩好講,一來唔想講太多(自有分曉),二來有點失望,好明顯又係玩意料之外劇情,可惜個劇本唔夠嚴謹,導演亦帶唔出揭曉真相時果份意外同高潮,完全唔識運用,好失望,睇《鬼眼》、《凶兆》反應係「嘩!原來係噉!」《高凶三萬里》反應係「...」舖排得實在太平淡。好失望。所以都冇乜特別野想寫。可能之前有意冇意睇到幾篇影評知,或多或少知道大概,影響左心態。但如果你真係想睇,誠心奉勸,睇之前,千祈千祈唔好睇任何影評。如果唔係,唔失望,都唔會有驚喜。(但黎到呢度,你最少已經睇左一篇,哈哈)


23/10/2005 SUN

今日如果你夜晚上左黎TRHK,真係好對唔住,我真係有事做分唔到身。(最後一位客人,你真係好彩,剛剛我臨走果時趕得切「電話訂購」)對唔住。或者下星期六日再上過黎啦。
黎緊呢個禮拜營業時間我都唔敢出喇。因為我都唔知道我睇到邊日或者睇唔睇到。請盡量星期六日上黎啦。對唔住。
我都唔會預期有好多其他人肯幫手撐幫手頂幫手捱。我只希望,各位可以體諒將就一下。我會主力攻星期六日。請幫幫忙,盡量週末抽身啦。唔好意思。


Weekly Reviews:

  1. 蔡汶家Homemade
All reviews here


24/10/2005 MON

又要返工。尤其是琴日睇完醫生,食埋藥先訓覺訓得好舒服,但又要早起身。慘。好在冇乜野做。今日神蹟地outlook express個收件匣同寄件備份入面得「這個檢視中沒有項目」一句。居然係咩email都冇黎過,更加接近冇send過email出去。朝早又幾檯客上黎公司,老細同經理都唔得閒,我地呢d頹廢員工自然係咩都唔做&求祈搵d野做。當連將dfax打番入個word度咁無聊都做埋,仲可以搞d乜?咦,我冇話你知呢段野係我等食飯果陣打咩?

...同樣地,夜晚好靜。除左兩條友吹水之聲之外。所以今晚淨播darkwave。同樣地是蟻哥,發現,冇錯,metalcore&hardcore(仲有「型」)才是皇道。算啦。近排好多人感到好訝異,原來劉Sir唔係只係metal。好多樂隊/單位/歌手不論metal與否還是pop唔pop,除左bootleg同single同精選,都有甚至齊晒全線。
「咩話?搞錯!呢隊你都有仲要齊晒?佢地有d咩你係冇架?」
「呀...佢地dmp3噉囉...」

冇錯。好靜。靜到可以三條友傾足三個幾鐘傾到晏左收舖,都全無被打斷過。


25/10/2005 TUE

又係中港一日遊的日子。逢係呢d日子,都要朝早六點半起身,之後返公司check check email食個早餐八點又上老細車到皇崗過關。但今次大野喇,唔係上工廠,係去工展會。
「上次阿邊個上去扮buyer講日文扮日本仔喎!你今次上去扮得咩呀?」
「呀...扮傻仔囉。」

今次老細唔車埋上去,穿過皇崗果堆人牆之後要轉工廠車,過左關之後問問經理,
「今日行程係點?」
「有咩行程呀?咪自由活動囉!去沖個涼dub個骨先啦!」

自由活動之前,都要搵番個司機帶路先。平日見經理講電話,聽經理口普通話都叫做呃得下人,今次上到黎發現,真係只叫做呃得下人,打個電話去搵司機:
「Lay joy lar lui?」
「Wo zai zher!」
「Jei hai lar lui ar?」
「Zher!」

今日一行最大收穫,就係睇清經理之真面目,難怪當時話上大陸咁踴躍仲拉埋我落水,原來大家普通話一樣咁屎,同埋一樣咁懶一樣咁頹。

此行目的地係廣州工展會,但上車之後先黎深圳一朝遊,跟架車送晒貨,然後先再上傳說中之琶州,暫時離開香港最遠就係呢度,但居然都只係搭私家車上,我都覺得幾神奇。八點上車,減番中間轉車過關搵車果半個鐘,都搭左三個鐘,除左頭半個鐘搭老細車廢事訓,其餘接近訓足全場,司機聚精匯神地穿州過省時(真正穿州過省,我都幾佩服佢大陸咁多車仲要架架都亂咁飛,佢居然可以超級集中精神成三個鐘都唔精神緊張加冇意外發生),但沿途都好難訓得安樂,因為大陸d路實在難頂,往往一訓著果時就過段爛路拋番醒。噉樣醒左無數次都「仲未到?」十一點半終於黎到會展,超大超靚,個設計,套經理果句,
「成條坦克車履帶噉!」
一入到去,超多"interpreter",一路行側邊成排舉晒牌做翻譯導遊,印卡片印文件之類當然唔少得,大陸人實在超識做生意。雖然個場超大超多人,但一貫大陸傳統:亂。超果隻。黎左,都唔知應該去邊,唯有跟住大隊行;行一大輪加比人點左最少一次,終於去到登記處搞pass。搞完之後發現,原來我係buyer!搞完證去番個廁所,個男廁中門大開,一出對住行幾步已經係成檯女staff,成班麻甩佬係入面做乜各位女同事都可以清楚睇到,經理都不禁讚嘆
「大陸真係open!」

出左登記處,依然係冇路牌路標,唯有繼續白撞(即係向最大棟果棟野撞),撞到入去,個場超---大,好鬼靚真係,拍得住香港會展,我甚至鍾意呢度多d忝!我地目標係"multi-national sourcing",都唔知去邊度搵,就去搵counter問姐姐:
「小姐,識唔識講廣東話?」
「講咩話都得!」
「...噉就最好啦!我想問呢個multi咩咩咩係邊?」
「咪你頭頂囉!」

果然。原來就係正同一個位上一層。搞一大輪先發現,真係問黎都多餘。
「噉呢間公司?係邊呢?」
「呢間今日冇開呀!」
「噉呢間呢?」
「都冇呀!呢d公司上個禮拜已經做完晒啦!今日呢d公司全部唔擺攤位架喇!仲有咩問?」
「有呀!想問邊度有飯食?」

千山萬水上到黎,先發現d採購公司得幾間仔仲要得一間未做過生意,今日又冇燈具攤位,又唔知係我地太早定人地太忙,搵親d採購agent都唔係度招呼都冇得打,咁無聊,唔食飯仲可以做d乜?十二點都未夠都冇計啦!有得蛇皇仲唔蛇咩!搵食途中,沿途有好Q多「快餐點」,但一間都唔幫襯,因為「快餐」原來只得三文治仲要超貴,行到番落地下,多左d「麵食點」多番少少野食,除左三文治,仲有麵食點獨家提供:杯麵。(...)仲要只提供筷子。(......)好在再行入去,最後搵到真正之飯堂。超大,但唔知點解有三份一係空地。有野食喇!點知...都係食麵。(.........)叫做唔係杯麵噉囉。一個拉麵一個炸餃一個蔥油餅都係各十蚊咋!(雖然三樣都唔好食)點解咁隱蔽咁偏僻?仲要差唔多全部中文字,睇賣果班友個樣廿六個字母都未識到一半,好明顯呢度就係主做中國人生意啦!睇樓上十蚊一桶袖珍裝利士著片呢度一碗麵都只係十蚊就知!當然都有鬼佬落黎,飯後娛樂就係睇鬼佬用筷子食麵(冇錯,咁大間國際會展飯堂居然只得筷子同匙提供,果真中國)。即係我地呢d咁"multinational",叫麵食都國際化過人!
「朕要niu rou mian,please!」
「WAN YE AR?DIAO HAI YAR!」(what a forgotten cult)
食完走番出黎,一路行,經理一路提點:
「有冇發覺呢度d接待同侍應全部都係女仔,仲要個個都鬼死咁矮?搵個高d都冇!」
呢樣真。呢度超多學生(基本上,登記處搞證全部「工作人員」都係學生,大學生黎實習卦),好多翻譯伴遊唔使講都係學生啦(有d英文確係唔錯,香港人發憤啦),最重要係,質素好高,要多靚有多靚身段要多好有多好仲要多嗲有多嗲,如果我有相機,我怕我都會搵幾個影相留念,d「知客」真係好古典feel。
「遲d有機會過日本搞展覽仲開心呀!d日本妹真係靚到你唔信!嘿嘿嘿嘿嘿∼」
經理說罷不住奸笑,嚇親途經之知客妹妹。所以立時急步逃離現場。

食完飯先十二點幾(十一點幾食「午飯」...),一點半先至要上番去攤位搵agent,仲有時間,咪去行下睇下人地d地攤囉。三個廳,幾萬尺,千幾二千檔,點行?好彩我只係掛牌buyer,唔明dbuyer點行咁多?著波鞋行都死啦噉行法!睇人地行生行死,我地兩條友就慢動作式行消磨時間,
「好似黎襯墟噉!」
經理話。真係好Q大/太Q大,成千幾幾千個檔口,理論上真係冇乜野冇得買,悶到爆果d有(齋賣打火機都可以開一檔,吹脹),冇咩特別果d有,超神奇用品都有!高科技袖珍偷拍偷聽用具?碎料啦!廁所板?未算!專賣pad都有得開檔!吹脹!(咩pad?男人唔岩用架喇!)襯左一大輪墟,終於夠鐘返去multinational探人。點知,仲未到。點算?
「噉呀...噉啦!比個機會你練普通話!拿!反正今日上黎都搵唔到公司dcatalogue冇派過,你就去隔籬d攤位同人傾幾句夾硬塞埋比佢地,順便呃dleaflet返黎交功課比老細啦!」
「嗚嗚嗚∼多謝你呀經理!真係多X謝呀!*#XYZ!」
(經理又點呢一樣照爆粗架啦,兩條麻甩佬噉先夠暢快架嘛)
迫於無奈,走到去隔籬個booth講「普通話」。
「Ah...lay hao...or le...or si...or si...ah...」
「我識廣東話架!見你講普通話講得咁辛苦,不如講番廣東話啦!」
「...Or!Dor lan jei!Wuwuwuwuwuwu∼」

以普通過普通的普通話夾硬派左幾份出去就返轉頭算,返轉頭陪經理見buyer(經理見遮,我係「秘書」),即係頭先我噉款去見人都樣衰,估唔到經理d普通話仲...難怪指定要我地兩個打孖上黎啦。

兩點幾,係時候趕路走人。
「拿!我唔認得路架!你帶返我出去出邊搭車呀!趕唔到車上唔切船入你數架!」
經理真係超頹。好在已經夠頹的我都勤力過佢少少,大家至可以安全順利出到去趕得切上車返香港。行番出去,仲有好多人入黎睇,
「咦,個證值成三舊水,放番出去賺番張船飛都好喎!」
難怪咁頹都做到經理,咁有生意頭腦。行行下聽到隻鬼講電話,原來一個翻譯導遊一日都收三百,但佢地未必有證要幫佢地俾錢搞埋。
「咦!仲咁早,我地一人做番單撈多筆都好喎!我地有證,可以收平d!」
就係噉,我地兩個buyer踏上返歸之路。可能你會問,點解只上黎做「buyer」,唔直頭上黎擺檔?唔係未試過,上年上過黎擺,但結果成個禮拜展覽擺左半日就走夾唔抖。冇計,係大陸擺展覽,真係搏抄。你睇堂堂工展會吉祥物都唔係原創,點睇都係叮噹黎(重申:「永遠唔會叫多啦A夢咁七!」),但又要不倫不類地轉黃色身加個頭由貓頭變左做獅子頭(well,都係貓科動物遮),望住呢隻「叮噹獅子」,我都唔知應該俾咩反應。更加唔知日本客黎到會有咩反應。

趕到上車,又訓。(...)半個鐘之後去到碼頭,差少少就趕唔切。唔係因為架車遲左到。
「去左邊呀你條衰仔?過左關唔見左人,去完廁所出黎仲唔見你,以為你上左船呀!」
「過唔到關呀!」

冇錯。個公安哥哥話搵唔到我個名,仲「打唔到我個名。」,唔知係佢唔識打繁體字定部機冇繁體字。仲比人懷疑我係非法入境忝。(冇錯,在大陸,錯的永遠不是官方)
朝早上黎搭車,返香港就搭船。好Q貴,成百二蚊張飛,仲要加多十蚊「燃油費」,好Q貴,但反正開公數就乜X所謂都冇所謂,仲打死都要搭船忝,咁正!上到船,經理必做兩件事。第一:即整杯熱奶茶。第二:即整份報紙。一手一樣返到埋位,一陣即小:
「刁!份報紙冇波經版!搞X錯!」
即去理論。
「冇計啦!我地呢d淨賣二手報紙,睇過先至賣,係噉架喇!」
果真大陸。嘈一輪之後冇波經蘋果換番份有波經東方返黎。我呢d,當然係乜都唔理。實在太太太舒服。d位夠闊、d凳勁好坐、架船唔搖,一坐低安安心心焚住機嘆世界,聽聽歌睇睇報紙,又訓,兩個鐘船全程怒訓。今日真係訓左幾鬼多個鐘,所以今日好鬼精神。絕對嚴重究極過於舒服超級嘆。太正。正到我都唔想落船。一百三十蚊噉樣嘆法,抵到爛啦!(「超,唔使自己出錢梗係噉講啦你!」)

搭正六點落船,正!仲唔可以即走?尖咀落船仲可以行街忝!但老細下旨,
「都要返黎公司先!」
都冇野做又夠鐘,仲返去做乜?返去打卡卦...仲指定要飛的返公司。載我地架的士都真係唔好彩,就係因為比我地截左停左係巴士站果幾秒鐘,噉就比人抄牌。但其實,都抄得幾冤枉。兩架的士,一架停正巴士站等客,一架途經巴士站停一陣載客,兩架邊一架有問題?個差佬話停一停果架有問題,停成個字果架冇。好明顯追唔到停巴士站果架又要抄人牌就夾硬屈人啦!就係噉我地兩條友被呢位有牌爛仔搞到無端端坐多三個幾字。差少少又訓過。(...)
返到公司,已經成棚人係度,各位工廠同事都到左。
「等你呀!」
冇錯就係等我放工去食自助餐,多謝頭先位有牌爛仔,令各位同事等放工等多三個字。雖然係有免費自助餐食,但唔係太想食架返到屋企訓下覺仲好啦(又訓...),但老細下到旨,有乜計呢唉。唔係咩貴價野,幾十蚊貨色噉啦,但都有唔少海鮮生冷野,一向男人格之女同事阿助理甲瘋狂食生蠔,黎到唔使幾耐已經兩大碟廿幾隻清晒,唔係出邊冇晒佢一定會繼續食多幾十隻,但無法得逞,因為已經食到廁房都唔敢再拎出黎。連d大陸同事都食生蠔食魚生,我呢dcheap仔呢,就真係夠晒cheap,因為我,係食格仔餅。(...)係噉食,乜叉都唔食,就係食格仔餅,連食幾底。(......) 在場人士無不側目。
「我鍾意呀!吹咩!都不知幾正!」
食完,夠鐘第二餐。成班麻甩佬即衝出去露天茶座煲煙。工廠入面,十件麻甩九件煙,等我地工廠首席工程師同大家分享分享:
「梗係要食煙啦!唔食好Q悶架嘛!好似夜晚玩"CS"果陣("Counter Strike"呀),比人一槍爆X左個頭(廢Q事出街啦呢d),睇埋其他人玩等佢地完果陣,好Q悶架嘛!唔整番飛點捱呀!」

頭先因為要趕黎食飯,買野買到如火如桃都被迫收手之大陸同事仍然意猶未盡,食完自助餐落廟街走多一轉,但由街頭行到街尾都冇收穫,或者呢d野大陸同胞都嫌cheap卦(嘩,大陸人好鬼有錢架而家,人地炒樓賺幾Q多),自己就買左兩條呔裝身,聽日開始日日都要執到四正,但成廿五蚊條,真係幾鬼貴架,出面十蚊條呔咋嘛!難怪大陸同事都廢事買。之後,都係去買六合彩實際。講起呢家野成班大陸同事好開心,成班人衝晒去放飛個counter,我直頭比成班人迫左入去個counter入邊,其他人行埋黎以為我係staff。
「俾張電話投注飛我丫唔該!你唔知咩黎?玩野呀?」
之後仲比阿姐趕忝哈哈。

玩到好鬼死夜先返到屋企,沖緊涼成身濕晒果時Tommy哥打個電話,自從走左黎而家新公司,太多人好耐未搵過喇。沖緊涼時傾左陣(都不外乎「收線未呀?好收線喇喎!」之類),沖完涼再傾左好耐好耐,好多事發生,有d好笑,有d好灰。走左之後,發生左好多事。所以聽日要買本《便利》睇睇笑笑哈哈。


26/10/2005 WED

香港燈展今日正式開始,亦即係今日開始,一連四日都要駐守會展,呢個禮拜差唔多日日都要六七點起身飛車過灣仔,慘。呢兩日都幾係野,琴日先上廣州會展做buyer,今日去香港會展做exhibitor,好似好威,我就寧願簡簡單單做個打雜er算,我唔想日日飲樣著晒老西打晒呔呀!

法定上班時間係九點鐘,仲要準備個攤位,自然要早番幾個字黎,點知八點九到,等足半個鐘先有人出現,老細仲要最遲蒲頭,早知就訓多幾個字啦,我黎到都做唔到d乜!琴日全公司黎會展身水身汗set場時,我上左大陸嘆緊世界遊緊船河食緊麵訓緊覺(所以點解琴日同經理兩個咁鬼開心,但都唔夠大陸同事咁開心今日有得去敵視里(what a forgotten cult)),呢度萬幾串燈駁黎駁去咁叉亂咁叉煩,我都唔識搞!廢事搞錯左開唔到就大X鑊啦!(懶就懶啦挑)
細公司仔人手有限,所以每一晝都係得幾個人睇檔,咁早有乜人黎丫比我都去食早餐好過啦,好鬼梳乎。呢d大型展覽自然好鬼死多鬼,仲有一檯台灣客豔壓全場。搞得呢d大型function,所有公司實會推晒d公司之花呀model呀之類黎做reception、PR、promo同counter,但同幾個台灣妹拍埋,香港果班立即變晒做綠葉。呢幾日走咁多地方,結論係,台灣妹>大陸妹>香港妹。當然點都會有d靚(起碼會展自己出得黎幕前d女職員好明顯係揀過蟀先),但人地起碼唔會係唔係都厚粉濃妝先。
「好!呢間台灣公司我第時多d接觸先!」
「你就想喇!你當你經理我冇到架?」

成日,真係做野時間實在唔多,最多時間就係行行企企,更多時間係食朱古力。要招呼客人當然要有番d甜品,最簡單就係朱古力,而我地呢d唔使做/冇乜野做/唔願做,工餘時間(即係99%時間)自然係食朱古力,當個客人同經理拗價拗到天花龍鳳、當老闆娘同d交怨對頭人對拆拆到天翻地覆,我姿姿悠悠地坐係度食朱古力睇戲。(...)食左成日,隻Kisses朱古力即係圓錐形有條紙果隻四隻味比我食勻,銀色果隻原味最唔好食,金色果隻牛奶朱古力正d,但都唔夠金色底加啡斜紋果隻咁正,因為係牛奶朱古力再加nuts!超好味!所以呢隻好快就(比我)食晒!仲有一隻藍色底加銀色斜紋,又係超正,牛奶忌廉朱古力加朱古力餅碎,一X流!(食得真激動)Nuts果隻之外,呢隻又係去得超快!可以得閒到寫食朱古力食到寫得出朱古力評,證明我係幾咁得閒!其實仲有一包朱古力,但唔鬼開加勒令全世界唔准開,三角朱古力喎!呢d筍野梗係留番比自己嘛!個個都問幾時開,開左比人搶晒我仲有得食?

無驚無險噉又三點。咦?下更同事呢?
「仲未到?不如叫佢地唔好黎啦算啦!黎到都係得果兩三個鐘,我睇晒好過啦唉!」
本人極力勸籲。反正係唔係都係頹!而且,真係唔想走!由會展最入果個hall行番出去大門成兩個幾字,由會展大門行去灣仔地鐵站三個幾字,地鐵站入口入閘去到月台都要行兩個幾字(所以我超唔鍾意搭港島線),搭到去太子仲要行多兩個字 - 本身仲諗住借d倚扮遲左個站深水步落車,因為同行之經理同assistant搵到個好位訓覺,即下令「你幫我地睇住幾時到站呀!等我訓夠先好叫我起身!」好在冇!唔係仲死!而家噉樣行法,雖然做展覽冇乜用過神,返到公司已經散鬼晒,今日過會展仲要冇得訓晏覺忝(好緊要架呢樣野對我黎講),襯冇皇管,瞌番陣先算。反正收件匣同寄件備份,仍然係空空如也。好多謝各位客人覆都唔覆我demail。多謝晒大家!

其實都幾無謂,因為跟開dclient又冇野跟(個個都唔覆email,益晒我唔使做,好野∼),今日先開始展覽又唔會咁快有野搞住(係唔係都頹埋今個禮拜下星期先至再算),睇左半日檔返黎公司,實在冇乜作為。勝在可以準時放工上皆旺。當然,都係冇咩分別。好似差唔多晚晚都上黎吹番幾個鐘的蟻哥,
「廢事傾咁耐啦!今晚早d走喇,廢事阻住你早收工啦!」
冇錯,一語道破。因為,冇乜特別。依然是「有冇OPETH新碟?」和「有冇CHILDREN OF BODOM新碟?」&「有冇新貨?」的日子。


27/10/2005 THU

八點八趕頭趕命趕到,原來今日九點鐘先開場,難怪人人都咁晏先到。好鬼冷清,但我做多左野,例如講左好多英文同普通話,當然,仲有食左超多朱古力。(...)今日我責任重大,因為肩負左各位的膳食,需知為左可以等自己餐廳可以做獨市,會展嚴厲打擊帶外來食物到場內,送外賣入黎都有d難度,朝早見到有人拎箱水入黎都比實Q截查。為左各位同事,我十足十當年d起義烈士噉,拎住個大紙箱落樓下大門,秘密地從場外同事手中接收飯盒,再將盒面寫住「樣辦」之紙箱運番入場。
實Q:「咪行住!咩黎?」
劉Sir:「公司機密樣辦黎!行開!咪阻路!」

晏晝唔使返公司,留係會展做全日,十分開心,就係坐坐行行企企,都有唔少人架,雖然人流接近冇乜。得閒無事除左食朱古力就係行黎行去。行番去hall門口sourcing部門,實在係好多女,雖然質素唔係好高(除左外來buyer,全場最靚就係會展自己d女職員),勝在夠多,有d仲高我成個頭。所以點解做sourcing果d會咁多人。呢樣係真架。所以點解我地個攤位咁鬼少人入黎,因為唔夠(靚)女同事。呢樣係真架。

算係較平靜的一日,今個禮拜個時間表都算就到時間可以夜晚開到舖。但今晚就唔多好彩,六點幾執野走人,之後仲要返公司繼續做,搞到冇開到。但唔緊要啦。冇乜唔同遮。


28/10/2005 FRI

今日醒喇,反正都九點先入得場,遲d起身遲d去到會展,點知都仲係我最遲,永遠等我set到咁上下野d人先出現,都唔知係咪匿埋晒一二邊等set好野先出黎。去到尾二一日,更少人,更靜,更多時間食朱古力。(...)真係好Q多食極都食唔晒,但忍唔住,點都要開包三角朱古力。拎左少少出黎已經唔敢再搏,因為d死鬼佬行過見到就順手拎(每次人流最旺之時就係我放朱古力出黎之時,個個行過都入黎偷d走),我食得幾舊已經冇晒,即時收埋唔再補。搞到好多人圍住。
"You come do what? Give money? Good! Give order? Excellent! Eat chocolate? NO! FXXK OFF!!!"
所以今日趕左唔少客,更加清閒。

經驗所知,食飯時間會係最忙,往往d人等你坐定定開晒飯盒先至會黎,仲要係一群群噉撞入黎。冇錯,同事帶埋d「辦」上黎,一開,幾班鬼衝入黎。不過冇我份,因為今日只做半日,理論上lunch時間就走得人,但實際上,
「好!見你唔使食飯,你同我地護航!頂住班鬼呀!我地食飯先!」
結果護航左半個鐘先走。我自己一個走就打死都唔行去搭地鐵喇,好鬼灰架搭地鐵,行到對腳唔似自己對腳,落到去又迫,又冇位坐,幾大去灣仔碼頭搭巴士近得多太有得坐舒服,有得訓,仲可以扮塞車遲d返office(呢樣最重要)。三點幾返到大角咀終於有得食得飯,當然焚多陣機先上去,咁搏做乜有得蛇梗係蛇啦!

上到公司,send番demail做少少報價,實在超殘,聽日就係展覽last day,捱埋佢啦。反正一向話星期五唔開,開左亦唔見有咩分別,早d返屋企抖抖好過。下星期就真係唔知點算喇。雖然都係果句:
「...冇咩分別丫都?」


29/10/2005 SAT

Last day朝早唔使返會展,返到公司都冇乜野好做,又寫下野囉,例如呢段段記。食埋個飯(幾耐未試過食公司飯盒?)又出發!非常唔開心地搭地鐵,兩點幾行到黎,本來一個人都冇,我地一黎,即成村人湧入黎。我幾旺場!
黎到,又係得我一個撐場,因為個個見last一日就走晒去行街同執野。Account靚女今日裝束成個buyer噉(女buyer都好鬼fashion,難為男buyer一律要打呔老西),行到邊所有人真係當正佢係buyer,我地跟住佢,沿路不知收到幾多攤位的熱情招待同幾多單張catalogue。返到黎繼續招呼客人食下朱古力,之後就到是日重點:拆場。調晒全公司人連account同shipping冇乜關係都黎埋,都係為左呢樣野遮。起壇容易拆壇難,執野身水身汗執到但大家好鬼快就搞掂晒,因為走人先係重點。逢係呢d大型展覽最後一日,散場之後先係黃金時間,因為好鬼多野執,我地d辦算細細個少少地執得晒,有d公司件貨仲高過個人,特別係大陸佬果d,成噸野運黎香港點會咁得閒運番上大陸?所以散場之後,成班人立即變左收買佬(or收買婆),放工之後同account個靚女鼠入人地d攤位度摷(所以途人無不側目:「乜buyer都搞到咁cheap呀?」),摷摷下撞多兩個同事,
「咁慢架!我地摷完上層啦!都冇野執!」
之後四件一齊再由頂樓掃到地下,基本上只要個攤位冇人睇都會大模斯樣噉入去摷,有人果d呢就係噉死纏難打:
「喂!你仲未走?d野幾時唔要呀?我要呀!」(well,呢d野當然唔會係我做...)
最後會計部buyer執左兩大盞燈,大到要到處撲袋裝番去,再加埋大家無聊執埋d零碎野好似紙巾呀可樂呀,個個都大袋細袋噉走十足十shopping完噉款,但當然,shopping都冇咁開心。
「咁多野執,早知就call埋男朋友入黎幫我手拎野啦!」
個個都好開心。除左我。因為我執得一大堆燈膽。(...)行到腳都跛之後,大家(唔包括我)都好開心,但仍有少少不滿:
「今次係玩具展咪好囉!」


30/10/2005 SUN

終於開舖。好耐冇上過黎。除左CoB同OPETH,今日多一隊,有少少新意。
「有冇ALL THAT REMAINS?」
上黎睇番睇條數,嗯,琴日第一單,一睇就知係鬼,係某隊本地鬼仔band member,傾左好耐,琴日咁蹺行過旺角就上黎探探,但可惜我不在場,miss左個機會見面吹水,亦少左d收獲。隻鬼兜左個圈就執左兩隻(正確黎講係一餅一隻),同埋睇佢執野手法就知,真係「聽野」,唔係想歧視香港,但香港人,聽野同接受方面實在同外國相差太遠,佢買果隻碟,唔止隊band或者隻碟,就算果隻style,咁多年黎接近冇人問過我,所以點解成日話TRHK好多時要靠鬼,因為好多野,真係只有鬼先會搵先會聽,香港人,從不過問。講聽,亦只有鬼會最接受到新野唔係齋睇名,就好似呢位仁兄,但除左鬼同老一輩,真係好難有人係憑feel黎買,唔識就唔會搵,唔出名就唔會試,試呢,都唔會好似佢地咁豪爽,唔係話一聽就買先至係正確係應該,最起碼唔係死聽爛聽聽完又聽聽到隻碟都花之後,唔買走左去,好少少咪求祈雞蛋堿D骨頭地搵d野話唔岩唔買囉(呢d定算係唔好呢?),就好似有條友上黎,話想買OPETH新碟,之後試聽,每首聽左大半首之後飛下一首,噉樣聽左大半隻,之後粒聲唔出走左去。或者錯果個係我啦,居然肯比佢地噉試聽法。
之後有個美少女上左黎,實在難得,但唔係聽metal,係想買隻metal碟送比人。其實要昆佢買野好容易,但我又冇噉做,只係
「始終唔係你聽,不如你帶你朋友落黎聽真d再揀啦!」
可能就係因為噉,所以先搞到噉啦。忠忠直直,終需乞食。

有少少奇遇,例如上次「十九世紀工業革命發展至現代軍用科技民用化直接將廿一世紀唱片公司業務推至現時無法覆轉之窘局」之飛圖老闆,今次入到黎第一句係
「香港從來冇出現過搖滾音樂同搖滾文化!」
第二句都係,第三句都係,直到最後一句都係,由頭到尾都係死嗌呢一句,因為純粹上黎借廁所,點知廁所有人霸左,攝時間,就嗌下口號。又有頭先提過之(搵)metal美少女(可惜相信唔會再有機會見到),另外狂聽SLAYER,聽左兩隊SLAYER,現正搵緊傳說中之第三隊SLAYER。仲有真人親身演譯傳說中之"Hellraiser",雖然講到好七,但更加想睇。可以咁多野玩,就知道可以有幾靜。夜晚臨收舖,又有女士出現。今次就真係metal少女。
「咁貴架!」
基本上入到黎,就係話呢隻碟點貴、果隻碟點貴。同自己買呢隻同果度點平法。噉點解可以咁平?
「有折丫嘛!」
哦。所以成日話,「食米唔知米貴」,例如留言板274號(無意針對)。或者大家唔知做進口貨成本有幾高啦,特別係歐羅面世之後美國歐元連續幾年鬥高鬥貴冇跌過,你拎一隻來貨價可以好Q低的香港版,或者「有折」有得平唔知幾多之平貨,甚至廿蚊隻之大陸版,或者$0任拎之mp3黎比,根本冇得比;其實真係要經營一間metal CD舖(我係指正當果d,唔好拎「某d」同我講),要生存,真係要標HMV價,但TRHK標到甚至回唔到本之低價,旨在推廣。結果,推廣就冇喇,平呢就人人都當奉旨,但又要平甚至唔使錢,又要有折頭(唔係今日,我試過最勁有人問半價得唔得,你落信和搵二手或者「正版」算啦),但就算兩樣做齊,都唔會買。最經典:當初TRHK仲係熟客就有得平五蚊,果時標價仲係105-110一隻碟,其後歐盟出現匯率狂昇,就改折頭,變成買三隻有折。改新折頭第一日,有個客黎左,買兩隻碟,其中一隻係SODOM "M16"。但佢只執兩隻,見冇得拎折,又冇得每隻平五蚊,結果寧願唔買,都唔肯俾原價$105買,因為「蝕十蚊」 - 雖則實際上根本冇蝕,因為本來就唔係一定要俾折;而且,用原價買,都已經係全港最平,果時未有港版行版之HMV最平果隻metal碟仍然係160以上。所以,都無謂做好人,做左一次好人,其他人就會要求你做多十次好人;但做夠一萬次好人都好,做少一次好人,即比人屌。這就是香港。

係好灰,唔返舖頭之日子段記好開心,開親舖之日子,實會小。冇計啦。有d野真係好撚灰。TRHK隔籬果個問,
「係度屌有乜用?係屌,點解唔索性上forum開個forum屌?」
未試過嘛?從上miniforum第一日開始,我已經做緊呢樣野,相信大家都會記得我上miniforum第一個開之thread係乜。但,做足咁多年,係咪真係有用?我只知道,有好多「有性趣人士」比我串/講/勸完之後,就再冇係TRHK出現過囉。即係各位大老細咁身驕肉貴,唔衰得又唔串得架嘛,TRHK生意又唔係易做有得發市已經好開心,噉咪喜喜哈哈噉服侍各位大爺囉,事實果d,留番自己地盤呻呻咪算囉。就好似近來出現之幾位仁哥仁姐,係得呢個井底度嘈生嘈死,係冇用架喇,正如forum上講左咁多年依然戇鳩一樣,但有用冇用都冇關係啦,都影響唔到你點樣繼續(扮)metal,依然阻止唔到您繼續話TRHK點廢話自己先識metal同darkwave話除左自己所有人都係poseur,係咪?


31/10/2005 MON

好耐未正式返過公司,冇得偷懶,好唔慣忝。本來已經覺大劑,因為派左好鬼多卡片出去,到臨尾幾日我唔係度果時,班同事直頭係唔係都塞我張卡片俾d客,
「咁Q多!你跟埋佢喇!」
數下數下,夾埋成六七十幾個客,將全部客d資料打晒入電腦,已經一日。黎跟真係有排玩慢慢跟。聽落好似好多個,睇黎收入確係有番d保證,但當然,全部都做得到就係,即係咁容易開到單就人人都做到marketing加唔使請咁多人啦,而且我做果d客...哈哈。就正如TRHK,有貨,就算係幾好幾高質素,都唔代表人地會同你買,因為老細唔係你,人地先係老細,同埋要親人俾錢,就收得皮,明白未?
好多野做,但心有不甘,點都要搵個機會蛇下皇先對得住自己。機會黎喇:而家又流感又禽流感乜感都咁猖狂,老細又肯俾錢去打流感針,全公司都打晒得番我同另一個同事未打,噉而家就黎到高峰期,再唔打就弊架喇!惹到其他同事就唔好啦!所以今日幾多野做都要鼠落街,為了公司的生意和為了各位同事的健康!(挑)四點半就拉左同事一齊落去打針,其實打就好快又唔使等又唔痛,落到去兩個零字就搞掂。
「喂!打完好耐喇喎!你兩個仲唔走?」
「點知打完會唔會有副作用呀?抖陣先啦!半個鐘都冇發作我先安心架!」

結果都被姑娘掃左出去。冇咩緊要啦,一場落到黎,咪再搵下野食,穿街過巷之後終於搵到檔篤魚蛋,又平又多但得個凍字又唔好食,純粹過下口癮,仲可以行下街忝!幾開心!兩條友完全唔似係返緊工!開心完一大輪,大家先發現:
「嘩!公司樓下打完針,行到呢條都唔知咩街!邊度黎呢度?點樣返公司?」
就係噉蕩住失路撞下撞下,差少少就要截的士時,終於返到去公司樓下,上到去,原來已經(玩左)大半個鐘。各位同事好緊張,連老細都問:
「咁遲先返到黎?打完針之後思覺失調唔識路返黎呀?」

七十幾個客,入晒機就走人。十分早地六點半鐘上,差唔多啦都係,大家都係要新野遮同pop野遮。係噉啦。


1/11/2005 TUE

原來又一個月喇噉又唔知咩事已經。全日就係怒做,唔係做展覽後follow up,係幫其他同事做好多好多野,唔止經理,連dassistant都推野比我做,唔止老細,我都覺得自己似assistant多過似marketing。野怒做,好在飯都有得怒食,今日有超正之芝士肉醬焗闊條麵,幾乎諗住叫兩個黎食,好在冇,因為又係叫呢個粉的會計靚女先質左半盒過我,之後我個位無端端多左一盒飯出黎,仲有半個茶餐=奄列加包,
「拿我地食唔晒架盒飯,明益你架!俾面食晒佢呀你同我地!」
眾女同事話。就係噉,今餐超正。亦超X飽。

怒食完就繼續怒做做做做做做...好多野做,做到成七點幾先走得。見星期二,反正一向唔開呢日,都廢事上舖頭喇,返屋企抖下好過。咁搏為乜?


2/11/2005 WED

依然係做同埋做的日子。又回歸到段記只有「忙」或者「灰」的日子。

夜晚,多番d人氣。呢半年黎,藉著幾位兄弟的幫忙,呢幾個月,買碟頻率及數量持續高企,即係淨係執二手,都執到我唔敢再執,但黎緊又有人開倉,真係大檸樂。所以,繼續慢慢聽。未拆碟存量,正穩步上揚。


3/11/2005 THU

今日,唔使返工,因為唔返工,去左好多神奇地方。是日走穩港九,去左好多神奇地方,但咩地方就無謂提。一句講晒,非常唔鍾意入官門,官僚野永遠仆街,越高級越大權態度越差,越高位置越冷漠無情。做到政府工當然勁嘆到好賺,但要對住做緊政府工果班...算啦。


4/11/2005 FRI
TRHK0411新貨(加強版)

今日超忙,做到冇乜胃口,睇平時日食兩盒之我今日食得一盒飯仲要冇下午茶就玩完就知咩事。六點十走人,即跑,緊要,因為,唔使講啦,樓上睇到。見字時,加強版都出埋喇。
有新貨到,立即OT都夾硬衝上黎執執貨,唔係好多遮,唔難執丫。執著執著,就再執埋自己果棟 - 冇錯又一棟,樓上你睇唔到我執咩架喇,但識我人士都知道,我非硬膠不執。今晚見到好多朋友,有位唔見好耐突然出現,我估上次見佢係,係年幾前。咁耐先出現(係我幾個月前未回巢撞唔到遮),唔係因為佢又係「OPETH新碟」、「CoB新碟」果d一年買碟一度的年度客人,而係,睇落去就知。今晚一個到完再到一個,都係老餅,最老果個,當然係metal老豆。冇錯,又係佢,in case you don't know,佢係由八十年代開始追metal野追到而家,某日買個仔買書上黎皆旺,聽到有metal,入黎,與時並進地踏入廿一世紀。老就係老,成班old-school傾好多野,呢d野、噉傾法,冇可能係同其他「後生仔」之間發生,因為老一代同呢一代心態實在太唔同,會俾錢買碟果班都係老野,唔好話因為有錢,大家起步同路向都唔同;佢地唔係由黑膠開始,都係由錄音帶開始,我就最老,CD開始,但都唔同於而家各位小朋友,由電腦開始;我地呢代,面對問題係「冇錢、唔夠錢」,因為果陣時黑膠同CD貴到飛起,為左一隻要四份一月薪先買到之黑膠,唯有努力工作死慳死抵,而家一代,問題由「冇錢」變成「冇seed」,解決方法,係上網問「有冇人send俾我?」。好似今日位朋友,為左音樂、為左買碟,打兩份工(之前,我又何嘗唔係呢),但而家d靚仔,算啦,我從來只聽到有人呻「都唔知邊度買碟,又冇錢買碟,唯有download啦!」未聽過「想買多幾隻碟睇多幾場騷,唯有搵多兩份part-time食少幾餐飯啦!」
個老豆,久唔久個零禮拜半個月就會上黎掃一次貨(可惜老豆係musical,但個仔係artistical,遺傳唔到),買d野,亦好神奇,唔係自己未聽過都唔會買 - 冇錯我冇打錯,唔同而家各位朋友「唔係自己聽過加聽過晒先會買」,而係「唔係自己未聽過都唔會買」。
「好多朋友都話我『聽番ROLLING STONES、DEEP PURPLE、IRON MAIDEN咪好囉,聽咁多做乜丫!』但我自己唔可以只停留係同一個地方、困係自己個年代。」
所以呢個老豆,唔係自己未聽過,都唔會買。肯咁試新野,又係異數。越老一輩、越有心,反而越肯接受新野同不知名事物,呢樣野真。因為唔會理出名唔出名、型唔型。

呢批貨,個個成日話要MARDUK、要IMMORTAL,而家有喇,理論上會有好多老細落黎光顧。當然,大老細又會話:
「又冇CHILDREN OF BODOM新碟!又冇CRYPTOPSY新碟!」
或者從電腦開始音樂的各位,會覺得搞間舖頭賣metal同捱落去會好似搵mp3咁容易啦。(最經典金句:「呢隻一早就應該入啦!」)細label就係成日比人恰,訂貨時拍晒心口話有、收晒錢,點知運到黎先發現,乜都冇。噉可以點?可以點?咪又比各位以為做indie label好容易的大老細屌囉。做細label就係咁難架喇各位大老細,比大公司恰不在話下,入到番黎諗住已經夠大路/夠號召力會有人買,結果永遠估計錯誤(經典笑話:Reign in Blood)。而且,訂貨係咪真係咁易話有就有?download得多的小朋友似乎唔記得左,買賣CD要錢,市場已經細生意唔係多,一個月廿幾三十隻新碟出,又要補舊貨,錢已經唔係多,訂得一款貨已經冇晒,可以點辦?我都想乜都入晒,假如你可以帶比TRHK HMV程度之生意額就可以,但當價錢標高左或者冇折頭已經嘈到拆天,每個月買多過一隻碟已經好似好慘噉,相信都幾難。同樣地唔係生意多少之問題,係有冇生意之問題。冇貨時冇人買又比人屌,有貨時都係冇人買又比人屌,要滿足各位大老倌,真難。


5/11/2005 SAT

「仲唔走???」
雖然好多野做,十二點半已經比老細趕,因為發現公司有幾隻小強,襯聽日星期日,今日公司大放毒霧毒Q死晒佢地。(都幾誇張...)所以十二點半已經被喝止熄機,跟住用幾千個膠包陷部電腦同張檯。各位同事都好落力地保護自己個位(同d煙),而我,好開心地去左捉魚。
「走?仲想走?睇你匿得去邊!仲走?嘿嘿嘿嘿嘿嘿嘿...」
全公司放毒霧,缸風水魚都要搬竇過廁所避避,捉魚呢個咁神聖(應該係好玩)之任務,自然係由我負責(應該係比我搶左去)。一面捉,一面奸笑,嚇到其他女同事都唔見晒人。捉完(應該係玩完)之後,就到走人時間。都仲未執晒野,
「咁快出煙?」
係囉,咁快放毒霧,都仲未搞掂走得人!點算?公司最入果罐杜蟲劑仲比人踢跌左忝!正值毒霧瀰漫,又要拯救果罐野,呢d時侯,自然要屈條傻仔去執手尾,而呢個死士,當然係我。所以我已經同老細請定下星期一假去醫院驗身。

因為呢壇野比人趕放工,得以準時放工(一點半,已經係不成文星期六標準放工時間架喇),亦可以兩點走到上皆旺印印腳。但今日靜左好多,因為兩條傻仔玩少左好多野,幾灰架,起碼冇左「美少女召喚」先(oh, what a fxxking legend!)。的確冇咁cult。今日有位仁兄,拎住CHILDREN OF BODOM第一隻碟走過黎,問:
「有冇佢地新碟?」
「仲未運到,或者可以試試其他death metal先?」

都唔使喇,因為聽到冇,已經放番低,走。我都未講得切比果位仁兄聽,成日恨買CoB新碟,但你買完之後,會寧願買頭先拎住果隻舊碟好過。不過唔緊要啦,各人自有各人口味。正如我無戇鳩不執一樣。
今日好多人好好玩,亦開始去多貨,雖然,按照一貫傳統,一水到左,d人會先買上一水,之後至買新果批(「之後」=「下一水到果時」)。呢個同「我要新貨!」成絕對矛盾之社會現象,係香港其中一個不解之謎。近排去得最好之其中兩隻,係INTO ETERNITY "Buried in Oblivion"ORPHANED LAND "Mabool",前者根本無論係搵power metal、progressive metal、death metal、melodic death metal定technical metal都會鍾意,後者更係太過癮,你唔係唔肯試新野果種都會去聽,好似今日有個聽開black metal同brutal death之阿叉上黎,一聽,已經買左。但,又,同VITAL REMAINS "Dechristianize"一樣,就係唔知點解,個個都話正、個個都話想試,但永遠冇人買。或者因為唔係CHILDREN OF BODOM新碟啦。同埋,我地唔metal啦。就好似有個客人,四年前上黎,淨係聽結他佬;三年前年上黎,仲係聽結他佬;兩年前上黎,都係聽結他佬;上年上黎,當然係結他佬;上個月見到佢,冇變過。即係,成世都係結他佬。自從九龍城時代至旺角時代初期,唔再入結他佬野之後,已經少見左呢位朋友,亦次次比人小:
「呢個結他佬又冇,果隻結他野又冇!你地點話自己賣metal架?」
係架。我地成人批評「唔metal」,就係因為唔夠pop野,同埋唔夠唔係metal果d野。因為係好多人眼中,TRHK而家d野實在係不知所謂,就好似某d「我好metal」人士形容:
「半紅不黑既垃圾!」
(哈哈哈哈哈哈哈哈哈!呢句真係一撚流,將來我會大量引用。希望講者冇夾band啦,因為以佢標準評論,佢自己有band的話,都一定同其他全部所有香港band一樣,係屬於半紅不黑既垃圾;如果冇band,可能係早有先見廢事投身半紅不黑垃圾之列直頭唔夾啦哈哈哈哈!)
TRHK越來越indie,但大眾卻仍然咁大眾甚至越黎越大眾,難怪入親乜都比人話半紅不黑。亦難怪越來越多人轉投信和懷抱,因為佢地覺得信和比TRHK更加metal。因為五折,近來都去多左darkwave。或者有d小朋友想講野,噉就同幾位講一講。Darkwave五折呢樣野其實上個月管理層已經傾定諗住清清d貨,等有新貨到就會同步推行,但新貨遲到而家先有,原因上個月月中講過,唔再提喇,想知自己摷番樓上。不過如果你覺得唔信呢個事實,繼續「自己覺得」地摒棄所有客觀事實會開心d,噉隨便你啦,就當係TRHK買你地怕而減價,我地冇乜所謂,滿足傻仔,一向係TRHK仝人最愛之行善之德。

過左十點,好靜,繼續坐係度聽下歌寫下野,因為近來好多人執,又拎隻"Mabool"出黎由頭聽到尾,其實頭兩首歌唔多鍾意,但第三首開始一直到尾,真係冇得彈。撞到metal阿sir,但唔係我,係隻鬼,從九龍城時代開始一路上黎,唔只上黎幫襯,仲帶左好多學生上黎,幫左TRHK好多 - 冇計,講極都係果樣,最聽野最肯付出俾錢買碟果班,都係鬼。同埋,真係帶多左唔少客黎,雖然因為女朋友唔鍾意佢買咁多碟(哈哈我估兩三年前段記都寫過喇呢樣野)同埋教書太忙太多野做又要飛黎飛去,所以以前差唔多個個星期見,到而家個幾月先見一次。佢就係傳說中之Metal阿Sir。Metal阿Sir,我就做唔到,呢d野真係國際學校先做得到。而且,如果我真係做左阿sir,都一定唔會metal得到,果陣時,唔止見唔到我,你連TRHK都唔會見得到。


6/11/2005 SUN

收左舖,繼續聽繼續寫,寫到十一點幾先走人,留咁耐,因為:

"DOOOOOOOOOOOM!!!!!!!!"

同叮噹永遠唔叫新名一樣,Doom永遠只叫Doom。坦白講,本身興趣唔係好大,因為衰過太多次,卡通漫畫或者game改編電影實仆直(本年最佳例子:AVP,但亦有拍得好:蜘蛛俠、X-Men),同睇完trailer覺得都幾七(拍戲玩FPS?WTF?我自己打機唔好?),但冇得走架啦,就同(填band名)一樣,DOOM喎!!!有得走咩!好多人玩完Doom 3之後去睇,但我呢d老餅睇,係因為Doom 1同Doom 2,Doom 3我見都未見過,灰。又要講下打機,太耐未打過,但實在忘懷唔到當年情,果一期實在係八十年代一樣咁令人振奮!因為old-school!同我同一個年代的話,應該都玩過Doom,同體驗到當年id Software點樣一隻game創造一個朝代,由暗殺希特拉開始一路追id,果時已經覺得呢隻game係好勁甚至最勁(呢隻game第二個episode打喪屍果關仍然係FPS史上最X心寒得人驚之一關),但Doom第一隻雙碟demo一出,立即冇晒野講,暗殺希特拉都成三四五隻碟啦,Doom話試玩版兩隻碟都有成六關玩,仲要靚過晒當年所有FPS!亦係當年第一隻有高低差之FPS(雖然某程度上,佢都只係一個「平面」)!更係當年部「高科技486」第一隻玩唔到之game!(就係由呢隻game開始,知道部腦係時候換喇,但當年咁細個都唔到我話事啦)idd野真係差唔多隻隻都正,換新engine寫之Doom 2仍然係最經典最classic,就同三秒內講晒「漢堡煎蛋飯粟米汁炒底凍華田」一樣(what a forgotten cult),一開始立即五秒內輸入
IDDQDIDKFAIDSPISPOPDSPAWNCYBERDEMON
跟住拎把電鋸出黎衝埋去,搞掂。(呢樣野而家我都做唔番,當年點樣五秒打晒我到而家都唔明)呢隻永遠、永遠永遠,都係最佳FPS,亦係由呢隻game開始,先真真正正開始有FPS,但仍然好掛住Corridor 7,呢隻係我最後一隻接觸用暗殺希特拉個引掣寫之第二代FPS(第三代當然係Doom開始,第一代真係要搵番Appled野出黎喇),但過左咁耐玩過咁多隻FPS,最鍾意其中一隻仍然係Corridor 7。雖然而家睇番d畫面超樣衰、d外星人超七、d武器超普通、個劇情超娘,但個feel實在係冇乜邊隻game及得上,玩過你就會知,呢隻game有一樣驚嚇,而家都冇game做到。前面條拎就有得download黎玩,但太灰,部機太"new-school"喇,download完之後唔好話玩,install都install唔到,老左,已經唔記得晒點樣set config同autoexec喇,或者為左呢隻game,要整番隻開機碟(真cult!)。未完,仲有Rise of the Triad。如果Doom係classic、Corridor 7係cult,Rise of the Triad直頭係"muthafxxking cult!!!"!唔係視覺上(雖然影像上已經超越左同期99% doom-like game,操作、介面、真實性、解謎性同難度更超越Doom),而係意識上,當年年少無知,玩咁多暴力game,都仍然覺得呢隻game好恐怖,意識上真係連Doom都及唔上!(或者因為Doom已經殺到麻木晒喇)。之後仲有好多正game,有唯一拍得住Doom之Hexen(呢隻又係其中一隻最完美&最愛FPS,FPS都有得揀職業,吹脹!),超淫的Duke Nuken(呢隻gamed武器仍然係very cult),主角係一個叫老王的忍者巨屠殺又係超多血仲要超勁多美式gag的Shadow Warrior(有得用核彈!仲要超多無聊野同笑位!主題曲仲要係首hip hop!有sample老王d無聊對白!果時係愛歌之一!最鍾意聽佢一劍劈開人兩截之後d爆肚,次次唔同,搏兩支烏茲出黎仲會爆句"Hoo Hoo! Mr. Woo!"次次笑爆!),仲有十分pagan拎槍同巫毒怒殺彊屍魔鬼超級極度嚴重暴力的Blood(睇名都知幾多血,你一開始係棺材度起身,笑爆!),始終old-school FPS係最正 - 冇錯係old-school,new-school果d已經唔再係手畫3D,全部轉晒多邊形,同PS時代之FF一樣,一踏入new-school已經冇晒興趣,除左因為唔「真」,仲因為過於著重介面、操作、解謎同現實性而忽視遊戲性,就好似metal,一樣,越新d野越恆越複雜,但最好聽,永遠都係'80。真係有心煲晒之new-school,真係玩完都冇乜印象喇,只記得Max Payne,一隻John Woo Tribute,Matrix式慢動作,型到爆+吹X脹。但,實在冇乜邊隻new-school野有興趣玩,除左Doom 3(雖然到而家見都未見過)。冇計,太假始終接受唔到,正如日本動畫開始用Photoshop之後,真係冇左果種感覺,加埋CG,仲仆街(最差CG電影:太空戰士)。所以,同好多人一樣,玩極都係Doom & Doom 2。可能你會話,有乜咁好玩?就係因為,唔使煩。而家dgame就係太真實喇,我都係鍾意超現實,冇得望高望低、冇得跳冇得蹲,又幾個掣玩晒成隻game,有乜咁好玩?就係幾個掣玩晒成隻game,唔使顧高睇低擔天望地飛黎飛去,拎住支shotgun衝過百幾隻怪物一野爆頭,乜叉都唔使煩!噉先夠old-school噉先夠正噉先夠cult!正如周潤發雙槍連開二百幾發都唔使上彈一樣!所以點解Grindcore咁好聽!
「爆就爆咪X煩!」(又關事?噉都得?)
走左去好遠講左好耐game又無端端拉到去metal,都仲未講到Doom套戲。結果,係失望。差少少跌到去好失望果隻。你知唔知我上畫第一日上畫立即去睇?已經失望,加埋間戲院唔得(超細銀幕超差音響),算啦俾多次機會啦,上新世紀睇多次。我好少會會咁留意咁關注一套戲,之前另一套又係噉樣睇兩次係AVP,只可惜,兩套都係失望收場,如果唔係後半救番,絕對可以同AVP爭crap of the year。首先,編劇太差。需知Doom本身就係其中一隻編劇最好之FPS,由第一到第三集一直圍繞住同一個中心「地獄攻陷火星同地球」發展而且發展得好有力好嚴謹,呢樣野已經唔係其他FPS做得到,即係整FPS果班都知道玩FPS果班得鬼閒理你個故事(坦白講,初初打果陣時都顧住殺遮,英文又唔係好!),特別係old-school果班!既然Doom有一個咁好之故事,都唔明編劇果班點解會唔用本來個故事已到天花龍鳳,初初連火星都唔係忝,即比成班fans小爆,話係Doom但居然唔係火星而係「某星球」?噉仲係Doom?唔係比人小到九彩,都唔會改番做火星!導演又唔掂,套戲前半太快太亂,基本上唔夠半個鐘,已經當交代晒所有野兼黎料,跟住仲要超多不合理、交代不清同犯駁位,唔X掂啦唉!個埋尾仲廢!雖然一早知道會有伏筆(睇落去就會知),但估唔到咁眼高手低!完全唔知導演同編劇搞乜!我真係睇第二次先明番個劇情講乜,但依然覺得好鬼唔合理!隊入面有個亞洲人,全場唔夠三句對白一槍冇開過已經死Q左,基本上睇完你都唔記得有呢條友出現過,超灰,都唔知出黎做乜!一直睇落去,你唔會覺得係Doom,同Doom有咩關係?就係因為支BFG(呢支炮,學術名稱叫Bio-Force Gun,正確名稱係Big Fxxking Gun,你玩FPS,一定會/要知道呢樣野),仲有電鋸(呢樣都冇,唔好叫做Doom),就叫Doom?或者呢套係前傳啦,因為點睇,d怪物都係「變」出黎,所以好失望,因為人地Doom係地獄走出黎,而唔係人變出黎,或者你話改編唔代表一定要跟足原著而且跟足亦未必好,但我仍然係好old school,Doom=hell!地獄一直係Doom最重要最重要之一部份,你冇地獄,唔好話係Doom!魔鬼同怪物係來自地獄,唔係人類變種而成!而且玩過Doom,都會知道呢隻game係極度pagan同antichrist,但電影,為左市場同入座率,當然係冇晒呢d野。好灰。完全違背晒Doom之原旨!我地old-school友唔係想聽「貪婪最終會反噬人類」,我只想睇地獄湧出千萬魔鬼怪物殺晒全地球所有人,之後主角一條友或者一班友拎住幾十支槍怒殺無限隻怪物,最後殺到入地獄搵個大佬出黎碎屍爆頭!(冇錯,呢兩樣係old-school FPS之生命)冇錯我就係咁old-school就係咁膚淺!因為噉先係Doom,噉就係Doom!而唔係到最後,一個人形忠角同一個人形奸角打摔角!近年套套美國動作片都太美國喇!AVP又係,Doom又係!係唔係都要一對一打摔角!我知搵到The Rock拍係賣點之一,佢最後一場同主角對打(冇錯,順氣在,The Rock早死,雖然都唔係死,但做左奸角,總算似番d樣,但佢做左奸角,最後又變做打摔角...),中間打大佬又係(雖然打怪物都係拳腳,好Q灰),但動作同構思都度得好正,起碼動作同智慧高過AVP幾倍先,只不過都係果句啦,噉唔係Doom,同埋一套成功之科幻恐怖動作片,係要有超重火力(最佳例子:Aliens),而唔係赤手空拳(超劣例子:又係AVP)。Doom,應該係槍砲亂啡,唔係打摔角,即係你唔用槍都用電鋸丫唔該。睇完之後你就會知道,其實全套戲除左個名,一d都唔doom...呀唔係,好似講漏左最緊要果樣野?冇錯!就係預告片引左我入場果段FPS!見到拍戲都要FPS咁過癮(或者戇居),仲要有電鋸對Pinky(個受害人好刻意地改左名做Pinky,你有玩Doom就會知點解),興趣大番d。點知!原來超短一個字都冇!仲要本來好很兇惡d喪屍(喪屍?Bio Hazard定Doom呀呢套?),黎到呢度變晒傻仔,企定定傻笑比人爆頭!怪物得果幾隻仲要幾槍死,唉,打機第一關都不如啦!起碼隻game第一關d傻仔都識用槍,d怪物識得噴火球!結果套戲&隻game之重點同賣點,變到得啖笑!你係夠薑就成套戲同FPS玩法拍,噉先夠cult,而我亦會立即連睇幾次!而家噉款,唉!我寧願唔整!連片尾段FPS都做得仲好,其中一個原因NIN首"You Know What You Are?"(好顯為左超多粗口之歌詞,因為全套戲真係爛口到仆街,2B喎!我睇過最多粗口之2B級戲!)都廢事再講!即入呢度download番Doom 1個試玩版,但同樣地,太新喇部機!玩唔番d舊game!超灰!淨係有得去電影官網玩,但超笑爆地,我寧願玩官網隻game,都唔想睇套戲,通常d電影d官網整dgame都好無聊,但呢一隻完全估唔到仲正過好多online flash game,先過三個完全唔同之training,之後正式,係可以同時夾晒三個唔同介面兼夾得通,必玩!我玩果時唔使入密碼,但而家要入,想知咩password,記得問Pinky!
講左咁多,好似又係冇講過野。一句講晒,不鼓勵任何人睇,包括逢有The Rock必捧場的超級硬蕊The Rock fans也哥。成套戲,除左個名,一d都唔Doom。但又要叫Doom。因為唔叫Doom,就算有The Rock都唔會有人睇,因為呢套只係一套極度普通過普通B級荷里活片(記得星河戰隊嘛?)。唔antichrist、冇地獄、冇碎屍、冇爆血、冇怪物、冇飛行蕃茄(呢樣都唔識,唔好話自己係Doom迷喇),唔好叫做Doom。我就係咁old-school。只希望下一集,會好d。仲會期待第二集,因為個名。睇左套戲(超爛)個尾都知實有下集,而期待之原因,就係Doom 2隻game係叫

Doom 2: Hell on Earth

隻game本身已經係呢個名,再加埋套戲噉ending,下一集會係點,大概估到。不過,又驚會估唔到,
「咩話?噉又叫做Doom?寫game果班點解會比套戲出街架?」
(又一個唱片工業的悲劇,做決策果班永遠係門外漢的高層人士,而唔係內行的創作人)


...講左好好好好好長超超超超超耐,都仲未講,到底今日發生過咩事。星期日,都冇咩講架啦,又係TRHK。
「嘩!肥仔喎今日!」
隔籬鄰舍話。冇錯,真係好肥,因為真係好多生意,甚至(已經)係全年最旺之其中一日。好似好好景。但,呢d野,真係N年一閏(上閏係OPETH出DVD果時,再上一閏係OPETH出"Deliverance"果時,可想而知係幾耐之前,亦可想而知OPETH救左TRHK幾多)。而且,計埋今日咁旺咁多生意,全星期總生意額都唔夠一間正常唱片舖一日生意額。所以,你成日問,
「點解冇乜冇物?」
連一間CD舖之基本運作支出都搵唔到,點樣有乜有物?
前日一批貨,隔一日今日又黎一批,都可算經典。但同樣地,入左新貨,大家都係問
「點解冇乜冇物?」
坦白講,兩日兩批貨,我睇都知道,前日果批會賣到(賣到,唔代表賣得晒,因為根本唔代表有人會黎買,就好似先前有人「好有性趣」果隻EPICA DVD事隔個幾月居然仲放係我眼前),今日果批,都唔使旨意會賣得出。點解?唔好聽?唔係。今批black野,其實好得;doom野,就預左死,因為無論幾正,classic doom一向唔會有人買。呢批貨,一隻都賣唔出,絕對唔出奇,因為對於「我要試新野」果班黎講,呢批「新野」,絕對係半紅不黑既垃圾。(噢,我發覺我真係愛上左呢句!)冇辦法啦,或者你冇留意啦,TRHK今年頭半年係做到好indie好underground,入親d野,套本地某extreme metal band成員一句,
「入到黎,一隊black metal都唔識!」
因為,好多人都話想試新野,想underground,而且,pop野真係賣得太多太耐喇。噉就去underground。結果?真係好underground。Underground到"underground"果班,冇黎過,因為人人都話:
「根本就係半紅不黑既垃圾!永遠番貨都唔係DARKTHRONE、MAYHEM、CHILDREN OF BODOM、OPETH,悶唔撚悶架?」
連續幾日一隻碟都賣唔到,都唔知試過幾多次。後來入番多d大路野,唔係真係死得,先有番人上黎。但,又有人不滿。
「根本就係半紅不黑既垃圾!永遠番貨都係DARKTHRONE、MAYHEM、CHILDREN OF BODOM、OPETH,悶唔撚悶架?」
最悶果個咪我囉。入大路d又比人屌又冇人買,入地下d又比人屌又冇人買,我都比人屌到悶。有陣時我都唔明,聽下歌仔遮大家都係,屌咁撚多做乜?講到咁不滿咁有大志咁有計劃,點解你又唔出黎搞?屌完又點?咁得閒屌,不如諗下點樣搞好佢仲好?又要屌又要唔做野唔支持,噉同話自己好punk班MK有咩分別?其實,好簡單遮,如果覺得TRHK只會賣pop野、賣垃圾野唔會賣好野,不如,你黎搞番間只賣「好野」之metal store?或者,噉樣就可以建設到你心目中之美好香港?而且我絕對相信,你可以屌TRHK屌得咁起勁,心中應該已經有一套理想加成功之metal store營運策略,你(地)出手的話香港一定有得救,我非常樂意為你地出任營業顧問同市場預測。
不過算啦。大家,包括我,都好膚淺遮。就好似幾位朋友自己唔識/唔聽/唔識聽就代表係半紅不黑既垃圾一樣。所以有陣時我都唔知應該點入貨。反正係唔係都比人屌。而且好多時入貨,都估計錯誤,好多時入我地覺得好出名好大路好pop大家會接受到dband,到頭來都係估錯,最佳例子:STRAPPING YOUNG LAD "Alien",係佢地其中最好一隻,好鍾意,諗住會有市場有潛質,點知,到頭來發現原來得我一個鍾意,「想試新野」果班全部收晒皮。所以,好難入,因為入極,點入都好、入乜都好,到頭來,都只係半紅不黑既垃圾。

見番好多人,傾開,今日提到九龍城果陣時好好多。冇錯,真係好好多。起碼黎幫襯果班好好多先。但太多人事物已經不復見矣。
真係好好多。真係好懷念。


7/11/2005 MON

呢批貨,都算神奇。(呢批貨係指第一批,第二批都好神奇,就係TRHK居然仲唔面對現實地入咁多indie野),坦白講,我唔睇好。結果,反而賣得幾好(所以,我都開始唔信自己直覺去搵貨,我發覺我聽果d、我覺得好果d,永遠唔會有人買;簡簡單單入番最出名最大路果d咪算囉,例如CoB & CoF;但又唔想噉做,齋做潮野,同信和有乜分別?(雖然,唔潮而真係有心推廣,結局都係食得屎)),就係因為(居然)咁好,已經開始搞緊第二張單。連到兩批貨,已經即搞第三批,都可算神奇,好耐未試過,上次好似已經係九龍城時代,即係大家仲係買碟聽野同試野果時,果時真係超癲一個星期一批貨,相信大家都記得當年收email收得幾密,但大家可以咁多野買,就係因為 - 道理好簡單 - 果時大家肯試野、肯買碟。而家,停晒唔見晒人喇,因為果時買左CoB同CoF,夠喇,可以停喇,同埋,要的話download算囉。所以好耐冇咁癲過。顯而易見,成日話冇乜冇物,但係肯俾錢肯試野的話,到時要乜有乜。唔肯的話,我都冇計,原因睇番琴日段記。所以,其實噉做都好搏,本都未回番租都未搵到,又拋舊錢出去,太搏。尤其是為香港呢個市場搏。

咁大批black野到,又係梁生蒲頭時間。其實,每次TRHK返親black野都唔止咁少,基本上真係上架只有五份一左右 - 另外四份一去左邊?就係直表撥入梁生之TRHK VIP Account。所以,成日話TRHK冇呢隊underground冇果隊cult得番d半紅不黑垃圾的小朋友,唔係冇,而係你仲未有意識去搵果時,已經比人拎左遮,噉之後想搵果時見冇,又唔睇清楚架上面果堆係乜,咪嘈囉。今個月,同佢「檯底交易」果堆碟數目已經多到嚇死人(你以為我買碟多?錯喇。一人還有一人癲),聽black metal人士想搵果d、好想搵果d、好Q想搵果d、搵緊果d、未搵到果d、未搵過果d、「有的話幾多錢都肯俾」果d、小「TRHK冇」果d、小「TRHK點解唔入」果d,其實全部都有/有過,TRHK可能係全亞洲black metal吞吐量最高label之一。係你見唔到同唔知遮,噉見唔到又唔知咪小囉。雖然係執咁多,佢都要上黎TRHK聽埋檯面果堆。冇辦法,聽metal就係噉,識唔識都好,一路搵一路等,一有唔理係乜起碼上黎理解一下先。聽metal就係噉,就係咁癲。(噢,我冇包括到download三四十激mp3之後話「冇時間聽聽唔晒」果d)
一個頹廢阿sir (R.I.P.),一個敦厚阿叔,入到黎TRHK見到呢兩條友,你會以為入錯舖頭。每次上黎都好多無聊水吹。
「而家做緊乜?」
「醫院做打雜囉!」
「辛唔辛苦架?」
「唔辛苦架!係要輸通宵更,有人瀨屎瀨屎要抹噉囉!」
「人工好低咋喎呢d工!做乜唔轉工?」
「呢份係衰要返通宵更咋嘛!又唔辛苦!賺多d錢好煩架!報稅時要報乜報物,又成日比人查!好鬼煩架!」

寧願搵少d錢黎嘆d舒服d頹d,同道中人,難怪我地咁投契。做人同生活應該係開開心心而唔係辛辛苦苦。(呢樣野,近日同Soni吹水後,十分感概)
試左好耐,都仲未試晒。
「唔買住!都未試晒!幫我留起先!夠鐘接人放工!唔買d碟住,廢事見到比人鬧!」
原來梁生而家都有下半場。而家,真係人人都有下半場,所以見少左好多人,呢個黎少左果個唔見人,走下唔見下,成間TRHK只淨番唯獨是冇下半場的我。難怪而家TRHK得番我一個撐住。因為呢度係麻甩佬的世界。


8/11/2005 TUE

好多野做,但只係忙,唔辛苦,所以我鍾意呢份工,同梁生一樣,唔係搵好多,但唔辛苦,仲幾舒服,福利唔差,人事唔錯,又算早放工,返五日半,又近皆旺 - 為左TRHK,當年我搵工就係主力搵旺角區加返五日半。冇錯,我就係咁戇居。所以,雖然唔少問題,雖然好多隱憂,都會做住先。起碼,第二份冇乜可能可以咁疏乎,六七點走人行幾過字就可以開舖。

今日奇蹟地有生意,繼有琴日未玩夠今日上黎encore之梁生,仲有好多神奇人士。多多支持。下批貨,已經搞緊。希望會好快到。


9/11/2005 WED

無驚無險噉又一日,雖然好鬼平淡,起碼唔辛苦先。夠鐘又係時候走人上皆旺。好難得Vincent哥大駕光臨,當然要問番上次Noah's Ark最後兩首歌(同樣地,唔使問我show review,太多野,唔會寫得晒),兩首新歌實在太正,亦開始「唔KATATONIA」,因為唔KATATONIA,而係MOGWAI喇。對我黎講成場騷最最highlight,就係呢兩首歌,唔止唔KATATONIA,直頭唔BEREAVEMENT忝喇,特別係最後一首,點會估到而家會變左post-rock?(雖然最後都加番段doom,但唔加仲好,加左反而有d唔知點噉)尾二果首,結構又係好順好煽情,但唔傾過都唔知道,原來中間melodic bass撞結他&鼓怒爆果段,真係「撞」出黎!所以,千祈唔好比我聽到呢首歌完版同正確版,噉反而會壞左我心目中之極正面印象!我就係鍾意d戇居野白撞野,太靚太整齊,我反而會唔開心!最後一首,全場最唔metal一首,亦係全場焦點之一刻,更加係台下好多人呻悶怒小的時間。我就好受,非常受,亦講左,唔加段doom的話,更開心。實在好少香港band會噉樣嘗試同轉型,太多人都係幾隻碟幾隊band過世,所以聽到BEREAVEMENT由KATATONIA過渡到MOGWAI,確係好意外,之後會唔會更遠離doom進入post-rock,真係坐定定等睇戲。呢首歌拎過比唔同人聽,人人睇法都唔同,有人話似MOGWAI(相信呢個係最正路),有話似SIGUR ROS,甚至有話似MUSE,唔同人聽野,感受始終唔同,就好似前幾日有位仁兄上黎,試左好多隻碟,覺得THE ETERNALd野似Manson、INTO ETERNITYd野似KORN一樣,唔同背景感受都唔同,唔係夾硬黎例如Twins係black metal就得。同埋,好多人都對metal友有誤解,事實都係,越唔metal,越metal。例子甲:又係前幾日蒲頭之梁生,冇背景人士見到佢入黎TRHK以為佢又係「上黎搵周潤發」(what a forgotten cult)d阿叔,但原來佢就係全香港聽最多black metal、最聽black metal果位;例子乙:咪就係我。仍然好多人覺得我只係「聽metal傻仔乙個」,包括我自己,睇睇留言板都知。(有時睇完我都覺得自己好戇鳩架哈哈哈)
最後,問左一條問題:
「而家生意難唔難做呀?」
「你坐左係度兩個幾鐘,有幾多人入過黎?」

聽果班,唔會買;玩果班,都唔會買。噉你話,生意難唔難做?成日收到電話,有人打黎話「我見到(本地某extreme metal band樂隊名)個(本地某extreme metal band成員名)係TRHK樓下呀!」但冇一次,我係見到當事人所講之(本地某extreme metal band樂隊名)個(本地某extreme metal band成員名),所以今日撞到Vincent兄收穫相當豐富。點解會噉?我都唔知。皆旺太多人難上黎卦。或者,呢度唔夠metal卦。正如我一直以黎都冇覺得自己點樣metal法,我唔係metal,我只係聽metal。噉點先算metal?我都唔知。大家,包括我同埋TRHK,需要搵(本地某extreme metal band樂隊名)個(本地某extreme metal band成員名)問問。
就同香港hardcore一樣,玩果班同聽果班,永遠唔會支持香港本地label。一個不解之謎。或者有label幫手都唔要乜都要靠自己,先夠indie先夠underground先夠型卦。

一個doom人走左,又一個doom人上黎。呢批貨,都預左係死貨,因為太多classic doom,呢家野,都係得我地呢d老野先會聽架喇,冷爺。各位後生仔上到黎,
「咩話?呢d係doom?你玩野呀?X!」
所以要有Circle of True Doom。


10/11/2005 THU

今日責任重大!老細見到朗豪坊有間舖掛左盞燈,用N塊膠片摺摺摺再拼埋做燈罩,見幾靚,就叫/屈左我同另一個同事去偷拍人家的商業秘密比工廠參考。其實琴日已經去過一次架喇,為免唔知幾點放工仲要萬九幾人時去影,lunch食完飯一點半就起程去朗豪坊,不過兩條友都淆晒底噉,行到好鬼遠zoom埋去影然後好Q驚比人打走左去,結果乜叉都影唔到,仲要去七記食多杯雪糕吞多兩個字pop先返到公司。
「頂你兩隻野咁唔掂早知我自己去買左佢好過啦刁!」
今日,老細又再派多次去,為免又再笨七收場,老細特別委派埋好鬼fashion十足buyer款的秘書部靚女同行 - 上次燈展,呢位buyer已經贏盡風頭受到無數攤位之簇擁,今次一樣扮晒野
「外國朋友間屋裝修,你知佢間屋幾大架啦!咪買d野比佢裝飾下囉!呢盞燈我睇中好耐架喇!如果佢係鍾意會買多幾盞架,咁大間屋,一盞邊夠光丫!拿拎出黎比我睇睇驗下貨啦,係好的話我真係會買好多架!呢度又咁多款,我邊買得晒咁多喎,比我影埋其他幾款等我可以send比我朋友睇睇下佢鍾唔鍾意啦!好唔好呀」
一面死纏難打引開睇檔個哥哥仔,我地兩隻野就私縮地係側邊偷拍影低晒所有野,當然係行到去舖入面影d燈唔似得琴日出到外面九里遠再zoom埋去又朦又睇唔到,傾到最後講到一定會買好鬼恨買果陣,臨俾錢果時個哥哥仔提一提間有生產商有網頁,當堂連三舊水都慳番。
「有網頁噉唔買住喇!我叫我朋友睇睇個網頁,睇佢鍾意邊款再黎買啦!」
今日buyer出馬果然掂呀!我呢d,點睇都係跟班黎遮!係呢d高級地方,拍埋其他人身邊,當堂覺得自己呢個band tee傻仔好MK!不過冇所謂!唔使做我PK都得!不過呢d地方,真係太Q高級!好似琴日走左之後去七記食杯軟雪糕兩個半,今日係朗豪坊食,當堂升價十倍!(仲比會計姐姐屈左一杯,廿幾蚊呀,嗚嗚)
就係因為哥哥仔善意的一句,果間舖頭,就做少左三舊幾水生意。就好似TRHK,成日善意地提醒各位
「我覺得呢隻未必適合你喎!你不如諗諗先決定買唔買啦,廢事買到番去唔岩聽啦!」
「咁快做決定?試真d先啦!試真d唔會買錯嘛!」
「今次買咁多?其實呢幾隻會仲有貨,一次買咁多碟都聽唔晒,呢幾隻不如留番下次先啦!」

就係噉、就係咁善意,TRHK一直以黎唔知做少左幾多生意。係昆人的話,其實會同可以多好多生意,反正d傻仔慣晒比人昆完鬧兩句之後返轉頭,隨便睇TRHK以外任何一間就知。結果,唔當其他人係傻仔,自己就做左傻仔。(「講講下買燈做乜又關TRHK事???」)

夜晚,都好靜,我可以完整聽晒兩隻碟。都有人上黎,但,唔會預期多啦,聽下歌吹下水噉囉。又夜開門,又冇「新野」,又冇pop野,算啦。


11/11/2005 FRI

知唔知咩叫天時 地利 人和?今日就係。老闆加老闆娘有事出左去成日,有個經理又上廠(雖然做耐左發現,經理者,比我更頹之人也,係唔係度都冇乜所謂),已經好得閒(冇皇管唔做野遮),做做下野仲要上唔到網,已經成日斷架喇條線,差唔多隔幾日就上唔到網一次,即打去怒小,原來今次真係斷線,樓下掘路掘斷左隻電線,成棟大廈上唔到網!
「搞錯!而家噉,搞到我全公司同事做唔到喎!噉你係咪想我地訓下覺先丫!」
「(喊住噉講)你唔好噉講啦!呢d野我都唔想架嗚嗚!」

所以,全日超頹!可以做d乜?冇呀寫下段記噉囉!見今日咁得閒,lunch特地叫多一大輪無聊小食(冇錯呢個當然係我主義,反正都係屈經理請),仲提早兩個字開餐,除左上次返大陸工展會嘆足成日之外今日係全年最開心!食完飯訓多個靚覺,兩點幾起身做一陣到三點幾又無聊,點算?結果無聊到要玩蘋果,自從公司添購左一班批蘋果機(香港製造架,果時上埋鏗鏘集忝),每一日成班人逢到四點鐘起碼清番半打蘋果,今日數量當然冇少左,不過時間提早左噉遮,就算經理在場又點,通常呢d無聊節目都係經理發起!(附和果個當然係我)實在係太嘆太好玩太舒服太開心喇!我已經當左聽日係禮拜日唔使返工!

六點半「準時」放工,又係時候仆出旺角,上皆旺之前,仲要走多一轉先,有個舊同事有筍野,幫佢手翻譯d功課噉又賺番幾舊水。買碟唔使錢咩!...well,可能得我地呢dold-school友以為要遮。到而家為左音樂,我仍然用盡一切機會同時間去賺錢,買碟又好、支持TRHK又好,搵錢睇騷又好,為左音樂,由讀書到而家,一直努力搵錢。你呢?


12/11/2005 SAT

真係超超超眼訓,好在朝早有公司派人上黎呢度試辦,噉「試辦assistant」呢d無聊position當然就係我呢d傻仔(搶黎)做。其實冇乜野做,拎晒d辦入房set好晒插好電掣就收得工,個檢定員係度努力地驗辦寫報告,我就搬張凳去角落頭匿去個檢定員後面訓下覺,當出面全世界甚至房入面位檢定員都以為我好勤力地工作時,我大字形攤係張凳上面訓緊覺。仲要冇比人發現。都不知幾開心。

之後,都冇乜野好寫喇。試完辦都差唔多放工,一點三老細已經開始趕人(此乃奇蹟),兩點未夠已經走到上皆旺坐定定食飯聽歌。上個星期六日超多人,因為呢兩日都有貨到,事隔七日,已經冇人。因為「冇新貨」。我都冇辦法啦。我都想每一日都有新貨。因為各位大老細有新貨果時先會上黎,而新貨之有效日期只有一日,過左果一日,舊左喇,就唔好聽,唔使買唔買得架喇。不過冇乜關係啦,照係兩條傻佬係度thrash & mosh,仲有每星期都會出現之飛圖老細,今周主題係
「你知唔知澳洲沙漠有蟹?蟹連沙漠都生存得到!所以你話,你地點會生架唔到?」
可惜今日「美少女召喚」失效。同埋,諗計點樣吸引多d人買EXODUS新碟 "Shovel Headed Kill Machine"。就同"Reign in Blood"一樣,好多人話想聽thrash野,大大棟碟放係度喇,想試thrash果班卻一個都冇出現過上黎買。你話唔好聽?唔係喎。好聽?係好聽呀,齋聽solo都抵晒啦。噉點解唔買or冇人買?天知。
一位又一位,今日接濟左好多朋友之物資,一日,突然間多左近廿隻碟。呢幾個月,二手市場實在過份活躍,今個月每日平均買碟數我怕達到兩隻。仲有最少兩位朋友未開倉忝。黎緊,真係大檸樂。所以,排下隊先啦,好多碟甚至係好多band全線,開都未開掂都未掂。

日頭事忙夜晚開工深夜都仲要做,實在miss左好多野,例如演唱會。好耐之前聽到,點知眨下眼,原來今日就係NoFX!真係殺到黎都唔知咩事!太極miss左,林子祥又有?完全唔知! 十二月BEREAVEMENT,睇黎又唔使睇!冇計,有時間,都要睇舖,冇得睇騷。黎緊,仲有兩場大騷,香港人話「冇得唔睇」之大騷。日日都比人問,我回應係:
「冇乜興趣。」
你當係酸葡萄又好點都好,我冇乜所謂,真係興趣不大,可能已經過左果個時期。如果Noah's Ark係同DREAM THEATER、STRATOVARIUS同一日搞,我都會揀DEATHGUY。點解?因為冇乜興趣。點解冇乜興趣?我都唔知。解釋唔到。就好似人人都只睇到DREAM THEATER同STRATOVARIUS呢兩個名,睇唔到呢兩個名背後係點一樣解唔到。如果你覺得呢兩場騷真係值得支持,噉咪支持。
越黎越多metal騷。所以,成日比人問幾時搞騷,唔係唔想搞騷,好想,亦有band搞,不過,點搞?大家都知TRHK資金來源,就係賣碟,正版碟,metal碟。你會肯買幾多碟,肯接受幾多野,唔使我講。賣唔到碟,唔好話搞騷,維皮都難。好多band都想搞過黎,搞IN FLAMES好唔好?ORPHANED LAND好唔好?好。佢地都想黎。但以色列來回機票加酒店住宿,係咪你包?都仲未講到卜場同搞聲。又係咪你俾錢?叫到黎香港,又係唔係真係會睇?
「以色列Metal野?唔metal喎!都唔係DREAM THEATER同STRATOVARIUS,點叫metal呀?又搵唔到人一齊睇,冇人陪我唔去喇!仲要我俾百幾二百蚊?當我傻架?」
所以,都無謂搞咁多啦。正如,黎緊會有好多thrash metal band經過香港,其實,要一兩隊途經香港係度玩番一兩場,唔係冇可能,真係搞的話,你見d外國metal band會密過蒲窩d騷。但係,搞黎做乜?因為大家都只係要明星,唔係要音樂,大家中目中仍然係唔出名=玩得唔好=半紅不黑既垃圾,最佳例子:六翼天使KING'S-EVILTHE ETERNAL。你覺得六翼天使果場唔好?你覺得KING ETERNAL LIVE唔夠feel?(自己睇KING'S-EVIL果part吧,睇明星的各位)坦白講,唔係賣花賺花香,你都幾難搵到有一場本地騷台上台下可以咁high,特別係THE ETERNAL果場。但,都唔關你事啦,三隊都唔係明星,你唔睇係明智的。你想睇騷,最快,兩個禮拜後果一個禮拜六,就可以有一隊美國underground cult thrash band黎香港表演。但叫唔叫佢黎好?唔好。我驚到時,Livehouse搞都嫌太大,因為全場得六個人唔夠(有關人士自然知道係邊六個),分分鐘台下都唔夠台上多人。噉,搞黎做乜?大家等睇DT好過啦,都係聽下歌仔遮大家,又唔係聽音樂。冇計。這就是香港,有錢就係老細,有錢就做乜野其他人都話好,點冇心都冇所謂,因為有錢;有心果批,做乜都好,都只會比人小冇人理,因為你窮。所以真係搞metal果班咁折墮,當metal係潮野黎搞果班賺到笑,而各位亦會覺得後者更加值得支持。這就是香港。

臨走,再送多少少比各位朋友。話說有位仁兄係信和角落頭好精警逗雞四眼肥佬果間二手提起電梯口果間門口隻DREAM THEATER bootleg,精警逗雞四眼肥佬即曰:
「你講緊電梯口果間?佢地搞DREAM THEATER黎香港出騷丫嘛!或者噉樣就入多幾隻佢地d碟谷下啦!不過果間野不嬲都七七地架喇!之前都聽過好多人賴過野架喇!你最好就唔好幫襯佢地喇!」
冇錯,有DREAM THEATER bootleg,仲要係貴價果隻。不過買唔買就你自己諗喇。因為你自己先知值唔值,同埋搏唔搏得過(呢樣最重要,你知果間野不嬲都七七地架喇!之前都聽過好多人賴過野架喇!你最好就唔好幫襯佢地喇!)即係你鍾意買史上最貴CDR,噉咪去買囉。


13/11/2005 SUN

好靜。靜到離奇。月中遮,就已經咁靜,只不過係差一個禮拜遮,同有新貨到的上星期日相比,係兩個究極極端。不過早就預左。因為就好似前幾日所講,批新貨已經「過期」喇。唯有等下批新貨到啦。可能等下批貨到,成日話要MARDUK話要IMMORTAL果班人先會蒲頭(或者,會見埋要EPICA DVD果位有性趣人士?)。同埋,真係滿足唔到各位。九成人士上黎都係問band,冇果隊band,即走,都唔使試其他野;上黎唔係問band係問style,基本上都係唔多使理,因為唔出名,又係唔會買。(所以今批貨我見到都好X驚:「又classic doom?唔係卦?聽doom果班都唔見晒啦,何況classic doom?」)又或者,問極,都係symphonic power。冇錯,成日話要extreme metal果班,有大半由第一日到今日都只係要symphonic power,而TRHK,已經由symphonic power去到true black death(但聽true black death果班又要由第一日到今日都小「TRHK得symphonic power」喎,真難服侍)。難怪人地可以咁旺,旺到有錢搞咁多騷,因為潮爆的symphonic power才是皇道。所以,TRHK呢間extreme metal store,都係收得皮。見到成日話「支持音樂」、「支持正版音樂」果班可以咁支持翻版野,我都幾想笑。
所以,成日都覺得好有趣,聽metal其中一種追求,就係去學識點樣去接納去包容,學識勞動付出去支持。但香港,真係唔多見到,特別係某d成日網上講野果班。不過冇所謂啦,聽下歌仔遮,使乜咁認真丫,慳番啖氣download多幾隻碟等睇DT好過啦!


TRHK本週營業時間:
星期一:***CLOSED***
星期二:7:00pm - 10:00pm
星期三:***CLOSED***
星期四:7:00pm - 10:00pm
星期五:7:00pm - 10:00pm
星期六:3:00pm - 10:00pm
星期日:3:00pm - 10:00pm

由即日開始,TRHK營業時間修正如上,逢星期一三休息,敬請留意!
任何查詢可致電98675737 / ICQ 22209700 劉Sir洽
請於各大forum代為散播消息,謝謝!


(最後果句,永遠都冇人理,就同永遠冇人理TRHK一樣)


Weekly Reviews:

  1. CRISIS - Like Sheep Led to Slaughter
All reviews here

冇錯,除左symphonic power,metalcore才是皇道。雖然呢隊聽metal唔會當佢地係metal,聽metalcore唔會當佢地係metalcore。


15/11/2005 TUE

「悶到抽筋!」
經理成日都話。冇錯,基本上每一日,經理最少都會講一次呢句。真係悶到抽筋。係咪好奇怪講果個唔係我?唔奇啦,睇番樓上10月25,就知道,成堆都頹。的確好悶。夜晚,就到我講。
「悶到抽筋!」
的確好悶。所以,呢幾日,可能越寫越少野寫。


16/11/2005 WED

今日連金句都唔得閒講喇,因為係忙到抽筋,好鬼多野做。例如,晏晝全公司走晒入辦房玩。(...)話就話「幫d新產品影相」,成班人都係無聊玩辦吹水爆笑加做下木工金工,例如我就被會計部靚女請/屈左幫佢係燈展偷番黎盞燈(又要摷番樓上喇)鑽窿等佢可以釘上屋企天花板(...),三點幾玩玩玩下就變左五點。所以老闆娘見成office得番佢一個,非常唔滿意:
「搞錯!成班友係度吞pop?出去出去!d野留比我玩!」
好忙好忙。所以,冇乜好寫。包括碟評。就好似今晚係NIRVANA之夜由第一隻一路聽聽到最後一隻live,好聽。但唔metal。


17/11/2005 THU

亦係超忙。十分多野做。最大任務,係做導演。自《瘋云》以後(what a forgotten cult),隔咁多年,終於重出江湖。今次其實都幾無聊,因為要整說明書教d人點樣用燈(噉都要整夠晒無聊喇卦),如此重任編監導演乜叉當然係由我負責,唔使做喎!好認真架我地,度晒佈景寫晒story board晝埋場景圖架!噉可以浪費多d時間嘛!攝影組的同事同埋場務組的同事(基本上已經包括左半間公司)見到導演構思咁耐久久未能開拍,檔期都就快過,一巴車埋黎
「刁!影就影啦搞咁多野!趕放工架!」
唯有好無奈地求鬼祈拍。其實都幾無聊架,講點樣裝支燈,拎住盞燈一張、拎起燈膽一張、插個燈膽一張、級番燈罩一張、放好盞燈一張、插埋火牛一張、駁好電線一張、"press the 'On' button"一張、見著左就唔爭在影多張,跟住連點樣換燈膽都要從頭到尾影一次。其實唔講唔睇都識整啦,但既然有得比我偷懶唔使做,何樂而不為?所以今日十分開心!仲做埋明星忝!因為過多幾個月,將會有百九幾萬人見到我...對手。
影完之後,就可以唱唱是日金曲,一首我幾鍾意之無聊歌:

I Was a Teenage Hand Model

邊隊?答中冇獎。


夜晚,同樣地,好靜,可以慢慢地覆番295號朋友的留言。先由本地某名金屬網網主寫寫序言:
「好多人睇完XMetal之後,個個都話要CRYTOPSY,但XMetal捧到CRYTOPSY太高喇,搞到個個聽完CRYTOPSY就唔再搵其他野!其實聽多左,都知道勁過同好過CRYTOPSY大有人在,但XMetal吹得太勁喇,搞到好多人都係聽完CRYTOPSY之後唔會再聽其他野!」
凡事總有開始。好多人聽metal,都係由CoB、CoF、RHAPSODY呢d開始。所以,當年TRHK仍位處九龍城時生意好好。因為大家都係剛剛開始。起初之概念,的確係用某d音樂踢人入會,一開始就raw black、brutal death,唔係人人接受得到,點都要有d流行音樂帶入去先得,就好似我都係由Malmsteen開始聽metal,而唔係CANNIBAL CORPSE(CANNIBAL CORPSE都有,請睇留言297)。果時,真係有好多、乜都有。套某兄台一句:
「九龍城果時好好多!果時CHILDREN OF BODOM呀IN FLAMES呀好多都有,可以隨時拎黎試聽!搬左黎旺角之後,少左好多大路野!」
因為TRHK一開始目標已經唔係商業,而係音樂。見有好多人買左 - 同一款產品總有市場飽和之一日 - 同開始推廣其他更多band同style,開始慢慢降低大路野之比例,入多d新band,雖然呢dband香港唔算好出名,但本質上都係pop野黎。雖然,我地覺得呢d野都係好易接受、好pop好大路,聽落其實同CoB、CoF呢d分別唔大。就係噉,CoB、CoF開始減少甚至消失,轉而入多dCoC、CoD、CoG、CoH。你話唔似?唔係。似CoB、CoF,又可以有自己style。玩得唔好?唔係。甚至可以好過CoB、CoF。噉,買唔買?唔買。靠人講同其他人介紹,一直都係香港人搵band之途徑。問題係,本來之方向,就係由CoB呢d開始,再慢慢CoC、CoD噉上,由symphonic去到extreme、melodic death去到brutal death、pop black去到true black。但結果,TRHK依住呢個方向黎行,其他人卻唔係。要推廣到更多新band,TRHK人員始終有限,都係要靠前人指點後人,但前人都唔行前,聽CoB、CoF果班,聽左咁耐都只係CoB同CoF,買碟都仲係「非果隊band果隻碟不買!」舊人都唔接受新野,新人問起,又可以介紹到d乜?舊人上到黎,都只係識得CoB、CoF。因為「我dfriend叫我聽呢隊!」其他?本身聽開果班都唔聽,唔好話更極端之CoY、CoZ,連CoC、CoG都唔聽,又點會講到新野比其他人聽?果dband,你話唔夠名聲?唔係。佢地而家拍得住甚至比CoB/F更響負盛名。玩得唔好?又唔使再提咁多。到真係有人肯試,亦唔係一定會買。好多人親耳試過甚至試左半隻,亦都表示有興趣,但都係唔會買,原因不外乎「係好,但都唔係CoB!」同「我都未聽過呢隊,我dfriend又唔係聽呢隊!」冇錯,如果你話個包一百蚊,結果冇得買,我都未必會揀差唔多之一百蚊包;但當食左半個,仲要覺得好味果時,都要唔買,因為點鍾意都好,總有一樣野會唔鍾意:個名唔係CoB。噉我都冇乜好講。聽metal,係咪一定要由呢幾隊開始?當然唔係。查實一開始係咪一定要由呢幾隊開始?相信人人都會話唔係,正如唔係早餐一定要食白粥油炸鬼先係中國人。噉係咪TRHK冇入過或者唔入新野?又唔係喎?唔由CoB開始,由CoD開始得唔得?點解唔得?音樂質素已經拍得住,以流行程度或知名度去比,可能大家亦差唔多,呢dband外國本土可能去到KORN咁紅咁hit。但好多人都覺得唔得,唔可以由佢地開始。點解?問問你自己就知。又或者,睇睇序言,呢個情況以前聽果班人都已經根深柢固,新果班更加唔使講。呢個情況,亦唔係「一下子由以前的symphonic power轉到去True black death」。係TRHK做左咁多年,好多野,我一路睇住。正如上面5/11講過之結他佬。呢種人,唔係「一下子」要變,而係咁多年都唔變。
「請問有冇DESTRUCTION?」
「DESTRUCTION賣晒,試唔試其他thrash野?」
「(擰頭)...噉有冇SODOM?」
「SODOM都賣晒喎!其實仲有其他thrash野會似佢地,或者可以試一試?」
「(擰頭)...噉都係冇野喇!」(即時高速離開)

以上對白,我講過兩次。一次係上個禮拜。另一次,係一年以上之前。兩次都係撞到我,兩次都係問相同問題,兩次都係唔試野。要一下子轉?並唔係一秒之間就要做到。但好多時,d人係連花多一秒黎比自己試多少少都唔制。同埋,好多人反而唔係越聽越廣、越聽越深,係相反。好多人以前係聽好多野、試好多野,而家反而行返轉頭:doom metal,已經接近冇人問冇人搵。Brutal death同特別係grindcore,我都唔記得上次問我介紹係幾耐之前,只知道,真係好耐之前。因為,以前咩都聽,而家反而只聽番symphonic power、power progressive、metalcore。當然,呢個係其中一種「搵到路向」。好多人都噉講。我只睇到,香港,實在太難做極端金屬,雖然個個都話要。我做左咁耐咁多年,見過咁多人,好多人點樣咁多年都係搵同一樣野、越聽越遠離極端、堅持唔落去直頭放棄metal從此消失,我敢講睇到好多好多。好多人都耳濡目染地朋友推介或者上網搵到,問TRHK有冇邊隊,冇果時,鬧;跟住見有人問有人搵,就入d黎比佢地。試完之後,
「下?乜原來呢隊band係噉架?唔買喇!」
初初見搵得咁落力,仲以為真係有心搵呢隊bandd野或者聽左佢地一段時間,點知,原來呢次先係第一次聽。跟住,隻碟就只有變成死貨留待有緣人。呢個情況black metal發生最多。好多人話
「呢隊都冇快d入啦black metal都唔入呢隊!」
點知入貨等於入死貨,因為大大聲話要果班原來最唔肯要,而起初佢地之言論,係權威到我都有少少驚。你亦會話,
「噉就應該入d大路band啦!」
乜野事都係,旁觀好容易。你自己諗深一層,都知好難。正如你開一間pop唱片舖,你都唔敢淨係賣張學友同周杰倫其餘咩都唔賣,點一定要多元化入好多唔同碟,包括未必賣得出果d。而且,都講過,淨係入大路野或者淨係入某幾隊band,噉同某d弄潮唱片舖有乜分別?到時,又比人話「做到好pop」(雖然呢樣野一路有人講,而呢d人我唔覺上過幾多次TRHK)。但事實,或者真係應該噉入貨法,因為神奇地,呢間唱片舖d客真係十個入面有九個都只係要張學友同周杰倫咁pop既野,雖然把口提住想試新野。或者真係天真左d啦TRHK,會諗住多元化可以吸引到多d人試,但結果唔係。而唔入番多dpop野,冰封三尺,非一日之寒。有睇過同唱片零售業有關之訪問或者報告,都會知道一樣野:每積一隻碟存貨,要賣多兩隻碟先補得番 - 呢個係講緊本地唱片,TRHK做入口唱片,成本會更高,有d碟可能要賣多三甚至四隻先可以補番。當CoB、CoC、CoD每樣同時入十隻,結果往往係CoB賣十隻(而家,六七隻已經好喇,因為越黎越多人變做「有性趣人士」),CoC同CoD夾埋先可能賣得兩三隻。亦即係話,要再額外賣多最少十六至二十隻CoB,先回到呢次入碟之成本,亦即係,基本上一定要蝕。噉呢d額外碟邊度搵錢入?就要搵儲備資金。但儲備資金有幾多?你唔係諗住一間專賣metal之唱片舖回到本之餘仲可以賺好多嘛?你計番自己一個月會買幾多隻metal碟、一年幫襯TRHK幾多次,已經知道。可以話,蝕,仲要係好多果隻。仲未計download或者rip完share出去同燒CDR果班人之帶契。所以點解話,
「舊貨唔去,新貨唔黎。」
呢個係一個現實的事實,無論對TRHK或者搵metal的各位而言。好多時有新貨到,即日已經好多人問
「仲有冇新貨?」
最爆笑一回,係有位仁兄新貨到果日上黎,比張新貨貨單佢睇,睇完之後
「有冇新貨?」
「你咪睇緊囉!」

但我唔怪佢,因為佢係年度客人,容後再談。好多真係話買果d,一樣難服待,因為新人又好,舊人又好,聽好多年都好,都係一樣,非邊隊邊隊band不買,有果隊band都「我淨係會買果隻碟!」(又或者「我淨係要新碟!舊碟我唔買!」)你話,點搞?好似話,想要CHILDREN OF BODOM,但係咪真係會買佢地d碟、會買晒佢地四隻?要OPETH,又係咪真係會買、真係會追?就好似好多人話要買"Morningrise",但返左成個幾兩個月,唔知點解,我仲可以見到好大棟放係度,OPETH另外幾隻都係。你係只聽symphonic power咪只聽symphonic power,我一樣會盡量滿足你,但只聽一個style,唔垂直發展,都水平發展聽闊少少試多dband丫。更有趣,就係SLAYER "Reign in Blood",好多人話要聽thrash,好多人話「呢隻經典野我必買!」結果,到左咁耐,差唔多未賣過。或者,download就算。呢個就係「有性趣」現象。所以年度客人算俾面架喇。雖然佢地都係唔買碟,但每年起碼最少會買一隻,今年年度客人代表有全年只買一隻OPETH "Ghost Reveries"或者CHILDREN OF BODOM "Are You Dead Yet?",亦即非最pop者必不買也。其他?Download咪得囉。至於sales,或者我呢條王八實在唔應該做得咁好啦,去介紹咁多野,試咁多野比人聽(最經典,有位仁兄試聽左大半隻OPETH新碟之後唔買走左去),好似人地噉串串貢
「係噉架喇我地!買唔買丫?唔買撚就!」
d人反而仲會受仲肯去買。做得太好,人人就當咩都奉旨。入多大路野時又嘈冇選擇,有選擇時又嘈唔夠大路野,同埋最主要而家大部份人都download,入乜都冇用。有心,都唔夠有錢好,起碼鍾意搞乜就搞乜搞風搞雨都得又人人當神噉拜,TRHK搏到盡去做音樂就人人當係戇居仔。因為冇DT同CoB。
你講完公道話,我唔會話你講d野點唔公道,另一方面,我唔會話為TRHK講咩公道說話。由一開始,都冇預過為呢個市場付出可以有咩回報(呢樣野,好多本地人甚至外國人都有講過,外國人都講先夠灰),就好似冇心但有錢果班永遠更得人心一樣。所以,其實講左「HK人一向都唔會XXXXXX」果段,我已經唔使回,因為咩都講晒解釋晒。雖然成日話反商業、抵抗商業社會,但坦白講句,仁兄之發言,同典型商業社會中人冇分別。而家metal野實在太易搵,太多主流大唱片公司收購metal label,間間大唱片舖都開始入metal野加狂做低價(有錢真好),仲出埋大跌價本地版,兼大量sample、mp3...如果你覺得比d錢同嘗試新音樂新樂隊去支持一間有心做呢種音樂之唱片公司,唔會比求祈搵間買左算數甚至download晒就算更有意思,噉都冇乜再好講。難怪香港音樂 - 主流又好地下又好,pop又好metal又好 - 從來搞唔起。就係因為錯在係香港搞呢檔野(同樣地,好多人都有此同感)。有一間唱片公司成立,唔係去支持,而係去anti-label,先係好多人覺得應做之事。唔止TRHK,從其他好多都睇到,越有心搞音樂果d,越少人支持、越難經營(同樣,例子又係呢個);越有心玩音樂,越比人排斥(有d我覺得好有質素會好有發揮之本地band,都係呢個原因不知所蹤)。知道香港人/自己通病就係太「有性趣」、唔試野,點解唔嘗試改變去試去付出?知道香港人一向唔會欣賞,噉點解自己唔開始嘗試去欣賞?但如果你安居於香港人之身份同習性,不妨繼續。從你提話之字眼同語氣,相信,你係屬於安於現狀之類別。我都唔想成日小乜小物、我都唔想成日提住「有性趣」果班,花咁多心機寫咁多野,聽多隻碟寫多篇碟評唔好?而家日日捱兩份工,每日返到屋企成十二點後先可能 - 係可能 - 有私人時間做自己野,報紙好多時星期六日先有時間睇,其實自己聽就得使乜做多咁多野?但有乜計?有得揀咩?係冇以前咁五體投地式投身,淨係日頭份工做完都冇時間冇精神啦,但我心態冇變。我會繼續為呢種音樂去付出同努力,你問我問題我仍然會答,你想試新野我依然會推介。但如果你安於香港人之身份同習性,「就係噉架喇」,不妨繼續。反正metal之哲學就係,追求至到自己喜愛就得。所以,我會繼續為呢種自己心愛之音樂付出同奮鬥,我會繼續做可以所做去推廣呢種音樂,你上黎問CoB、CoF,我都會盡力比你,亦會更盡力介紹其他,你真係唔係要聽明星而係要聽音樂,淨係而家TRHK有dblack metal,都夠你聽最少一年。至於你會點、變成點,相信已經冇乜重要性。我只追求音樂。


18/11/2005 FRI
八歲的Van Halen

睇完,記得睇埋下面d老生常談。做人都係膚淺d好。


19/11/2005 SAT

朝早超忙,晏晝同夜晚超靜。兩樣調番轉就好。夜晚,就忙好多,因為,


20/11/2005 SUN

同樣地,又要回一回仁兄。語氣或者會重d,因為實在冇時間點樣去諗同用d媚俗文雅字眼黎包裝,我打呢段野之時先十點幾返到屋企沖完個涼之後,都未坐定飯送都未放好已經要食住飯打住回,聽日有貨到都仲未準備,聽朝仲要一早起身做野。所以,今次會打得好求鬼祈,雖然又會唔覺意地變到好長。
你所講之好多甚至所有野,其實,前日已經答晒。你覺得冇答到,係因為我冇好似你噉講到明「1.呢個問題出現,原因係XXX」,因為我實在冇時間執咁多野,你知道我唔係用software而係用html寫,你就會明,點解我咁唔想分point。但廢事又舊題重答,今次我唯有用番point form寫。
1. 「...但現在的TRHK真的只剩下一些『地下』band了...」
「地下」你自己都用左引號,相信你都唔敢講實「地下」呢樣野。真正地下野TRHK係有好多有緣人同有心人自會發掘,但『地下』果d,即係其實都係pop野果d,我唔覺得點「地下」法囉。近半年每次入碟,都一定做足準備功夫,搵定d「新band」或「某名band新碟」(滿足番各位成日話要「新」的要求),同補番「某名band邊隻舊碟」(滿足番各位「非邊隊band邊隻碟唔買」之要求),你係有睇實今年入貨情況,都知道TRHK係pop左幾多,妥協得我都有d灰。但,唔知點解,唔會係新潮過頭卦,就係已經pop到噉,都冇人買。唔係隻隻都好似"Alien"咁偏鋒,好多都好大路。都冇人試、都賣唔出,除左「唔係CoB」、「唔係symphonic power」,都冇乜解釋,或者仲有因為「一早download晒啦!」又或者,入左一隊band,但唔係邊隻邊隻,就係地下。好似IMMORTAL,好多人話要,點知到左之後,一樣冇人買。
「有冇IMMORTAL隻"Pure Holocaust"?冇?噉我唔買喇!我淨係要呢隻!」
就係噉,同一隊band,都可以有地上有地下,並唔係話好似"St Anger"呢d咁失水準,但唔係邊隻就唔要,甚至果一隻係聽都未聽過但「人地話唔好」就試都唔試繼續只等某一隻 - 雖然,好多時恨好耐隻碟到左之後,先發現原來成日話要果位仁兄都係第一次聽呢隻碟,同聽完又係唔鍾意(呢樣係最神奇,講到咁想要,點解有果時又唔要仲講到原來好唔好聽?),即係基本上隻隻都話想要但隻隻都唔要,詳情又可以睇番前日,下面亦會講多d。所以就算真係入齊晒,係咪真係會買?唔使問會唔會買晒,會買幾多甚至賣唔賣得出已經成問題。亦因為噉,TRHK有好多點睇都唔「地下」之「地下」貨比人遺棄。有時某d朋友上黎,睇睇個架,話
「唔係卦?呢隊都冇人買?嘩!呢隻咁耐都賣淨咁多?」
例子有SLAYER "Reign in Blood"同DISSECTION "Storm of the Light's Bane",亦係好多人話「要」之其中兩隻,其他更多不能盡錄。你話佢地好「地下」?唔覺喎。噉點解賣唔到?我都想知。不如你話我知?如果你所講之『地下』,係解「唔係symphonic power/CoB/CoF」,噉,請睇落去。
2. 「佢想試XXX,冇,就試左XXX...結果一隻都冇買...」
冇乜冇物呢樣野,都係請睇落去。反而「試左XXX」呢樣想講。
3. 「...就試左隻X字頭的gothic metal,但係都係播dvd的歌,結果一隻都冇買...」
全世界冇一間CD舖可以包羅萬有要乜有乜。大至HMV都係。更何況小至TRHK。係唔夠pop野,但我唔係冇介紹過,介紹新野、做推廣,我已經咩都做到足晒突晒。冇可能全部野都盡善盡美,而我咩都做足晒,都嫌未夠,噉我唯有謹此致歉。我只有話,試碟,係應該試,但好多人,就係因為有得試,所以唔買。唔講借d倚聽晒大半隻碟果d,我只有話,越要試野、越試得多歌試得耐,越唔會買野。你話我一竹竿打一船人好,話我偏激又好,唔鍾意聽又好,呢個係我做TRHK咁多年黎見到之事實。我唔會話試碟試得耐試得多就唔滿意,呢樣野上親TRHK見親我都知道,前日都講過,我係戇居到可以試晒差唔多成隻OPETH新碟;亦都有人真係越試得多越買得多。呢個事實,我只係客觀地講番出黎。每一次有人搵CoB、搵melodic death,我都會試LILITU "The Delores Lesion",我敢講呢隻係上年melodic death最佳之一,而且每次播,聽者實會有反應同好有興趣。但,結果一樣,唔係冇試過,亦唔係唔鍾意,但,就係唔買。係有心聽,自己又鍾意,點解唔買黎試?即係唔係難食,已經餵到入口咬碎晒咀嚼完仲要覺得真係好好味,噉點解就係唔可以吞埋落肚?好簡單,就係因為,又係,個名唔係CoB。講極都係呢句、提極都係呢個例子,但其實呢句同呢個例子,已經直接或間接地答左你接近全部野。
如果你係話,就係因為只「試得DVD一首」唔夠所以唔買,基本上真係自己搵野聽果班,往往都係靠官網同網上流傳之一兩首sample,有dband甚至可能只得成隻碟其中一首歌當中三十秒sample你試。但係搵野聽果班自會用呢三十秒黎做決定;有dband甚至係試聽都冇,只有靠自己判斷網上同其他人之評價。反而好多人上黎TRHK,唔從頭到尾聽過晒都聽番最少半隻,都覺得「聽唔真、搏唔過。」
「噉而家有得試聽多d,梗係聽多d啦!」
同樣地,係對人太好的報應,冇得試聽局你買,你都會照買,就算買完唔岩聽,一樣心甘命抵地返轉頭再買過;有得試聽,就唔試到盡都唔會買,試盡晒亦未必會買。所以成日話,食米唔知米貴,download碟唔知賣碟難。
4. 「...就試左隻X字頭的gothic metal,但係都係播dvd的歌,結果一隻都冇買...」
前幾個禮拜有次播FALL OF THE LEAFE "Volvere",之後有個人走入黎買左。佢係冇聽過metal。
「噉點解你會買?」
「因為好聽囉!」

上個月,又有個模型友播緊DARKANE "Layers of Lies"時走左黎,問係播緊邊隻,之後話冇錢走左去;隔一日,佢真係走番黎買左隻,理由同上。再之前 - 起碼個幾月前 - 又有次播EMANCER "The Menace Within",有條好明顯係上皆旺睇模型的靚仔衝入黎,
「嘩呢隻好聽喎!」
之後聽多半首,已經俾錢買左隻走人。當然佢地會唔會再返黎,係另一個問題。但重點係,呢樣野,反而係好多話要「搵metal聽」之人身上唔會發生。越話要聽metal果d,反而越追名。當然你可以話,佢地買係因為
「果三條友唔識聽遮!」
識唔識聽一回事,我只知道,佢地反而識得搵音樂:聽個feel、聽感覺,而唔係聽band名,或者係聽style,只係聽好聽。所以點解成日話香港人聽野聽極都唔夠外國多、唔夠人地接受力咁強,真係做唔到人地噉係睇音樂同感覺而唔係睇名同風格噉聽野。請參考番上面LILITU之例子。
5. 「...對於佢地d新仔,咁真係好難幫佢carry on聽落去的...」
要carry on,不論係TRHK、新人、舊人、香港甚至音樂整體,都係要一路向前先做得到,正如你彈結他,都唔會永遠只彈一個chord、一款scale、一隻style。又好似讀書,自然係一年一年噉升上去先會有進步,會唔會叫先生第二年唔好較新野,教番同一年d野你就番你?就算真係肯就你,你覺得自己會學多到幾多野,carry on到幾多?當然,聽下歌仔遮,我都覺得唔使諗到咁Q煩咁認真鑽咁多牛角尖。而如果就係想講,聽歌唔同讀書,應該就番大部份人,與其真係搞音樂推廣音樂,不如將metal當係流行音樂噉搞淨係入d大路野就夠(亦即某d商戶做法),噉,請睇落去。
6. 「...你要知道700萬人,我唔信當中無有心聽音樂的人囉,可能二十個只得一個,要推廣一個文化就係要捉到這二十個中的一個...」
曾幾何時,我都噉樣天真過。結論係,不要發夢吧...現實就係,有心聽音樂,人數係少到你唔信;有心聽音樂,唔代表有心支持音樂;有心聽音樂,亦未必會持久地支持音樂。有好多野係好理想,好似TRHK,但當睇耐左,特別係睇香港呢個市場同文化,就知道,不要發夢吧...你係要拗的話,我可以話你聽,唔使再拗,因為呢個係我咁多年黎睇到同嘗試後發現之事實。好似有個朋友,係超極級CHILDREN OF BODOM fans,但問佢,
「你買左佢邊隻碟呀?」
「一隻都冇呀!我download晒佢地dmp3咋!」
「新碟出左喇喎!」
「唔買啦!而家都唔聽佢地喇!佢地dmp3都洗晒啦!」
「唔再聽CoB,噉,試唔試其他野呀?」
「唔試啦!」

同埋有幾多真係話自己有心係肯俾錢去買CD?最流行一句:「download完mp3我會買番隻碟!」實際上有幾多人做,心知肚明。我都知乜都買碟係冇可能,但連自己慳下錢打下工付出去買碟支持都唔肯又話自己係支持,同埋聽兩聽就唔聽、聽極都係幾款幾隊甚至越聽越窄,如果呢d人都計埋,唔好話二十個,你個十字改成個萬字都仲得。我見過超過九成自己講或者人地話係「有心聽metal」之人士,都符合以上形容。所以,
7. 「...我清楚明白香港有太多X...」
清楚,但都係抱「香港人/我地就係噉架喇!」之態度,依然地要做典型香港人而唔求轉變,其實解多幾萬次都冇意思啦。同埋,已經係誤解左我係埋怨啦,我一直都只係講事實遮,包括TRHK居然戇居地在香港呢個market犯賤地堅持下去的事實。
8. 「...入CoA/B/C的目的是...」
從幾個月前到幾日前睇到呢度,相信我都唔需要再多講,其實,成個文化唔變,入乜春都冇用,除非入番黎$10一隻。至於你d提議,老生常談地講句,既然你都識講「TRHK用邊隊邊隊踢人入會」,你覺得我/TRHK會唔知唔清楚嘛?我明白你的用意,但今時今日入唔到咁多CoA/B/C,唔係因為唔入,而係好多因素,包括市場同歷史因素。明白你的用心,但其實,呢樣野由TRHK第一日開始,已經知道同做緊。(寫到呢度,覺得好有趣,如果你唔係同我講而係同第二間野或者第二個人講,得到之回應九成會係「屌!使鳩你教?收撚皮啦戇鳩仔!」我都覺得自己好友善,甚至係善良過頭)至於唔入,原因,你都講左:
9. 「...現在說這些有點太late...」
你都知late,因為你都知道,太多人同事,令到咁late。講到重點:
「點解唔入大路野?」
好簡單,你知唔知一間唱片舖點樣經營?落信和睇睇舖頭仔已經得。點解賣pop野果d唱片舖可以成日都入咁多碟,仲入親都咁新?要新貨如輪轉,舊貨都要如輪轉。相信係追開我段記之人,噉你應該聽過我一句說話:
「舊貨唔去,新貨唔黎。」
呢個係一個簡單之營商事實。你亦應該記得我講過,TRHK呢間唱片舖,最好生意果個禮拜之總生意額,都未必夠一間本地流行唱片舖一日之生意額。所以現階段TRHK係一間唔可以積貨之唱片舖,除非所有貨可以賣得好密好密,但唔使講都知冇可能。當而家連買賣本地貨咁頻密之流行唱片舖都咁難經營,TRHK仲要係做入口貨成本要高得多,仲要係做metal,你覺得TRHK經營會唔會易得過其他人?好似仲未直接答條問題,但其實已經講晒。冇人買野,冇生意,冇錢,入唔到新貨,積晒舊貨,比人屌。以前九龍城時期仲可以儲定好多存貨,上親黎搵pop野一定有,仲差唔多個個禮拜都有新貨到,因為果時d人肯買碟同肯試唔同野,唔係一味symphonic power其他好似doom同death都肯試(雖然而家見到呢d人好多都只聽番其中一兩樣),次次有新貨到,連續幾日爆到陷晒。而家冇,除左因為慢慢入多更多band(或某d人口中之「半紅不黑既垃圾」),亦因為越黎越少人買碟。以前好多人每次上黎都買幾隻碟、個個禮拜都上黎幫襯,但而家呢種人接近見唔到;有新貨到,d人只係「哦」一聲,真正即刻上黎甚至會上黎其實好少。你自己都知,你幾耐會上黎TRHK買碟、每次買幾多?而且亦唔會好似以前買得咁快一有就買,往往拖番個幾兩個禮拜甚至個幾月先黎買,即係仲要等多好大段時間先可以套現番資金再入貨,而呢段時間,仲未落黎買果班又要嘈
「點解仲未有新貨?」
可以話,仲好似以前噉果種形式買碟之人,得番我自己一個 - 或者你唔知,TRHK我只係做坐檯,買碟我一樣要自己俾錢,我寫碟評d碟大半都係自己俾錢買番黎聽完再寫。或者因為我真係狗屎垃圾都聽加通常一隊band最差drelease都接受到,同自己聽野會求聽到最真,就算最差一隻都會想聽到可以有幾差同點解有咁差(例:St Anger),所以一路以黎,我可以持續地係TRHK買到碟。但,聽metal人本身已經唔夠多,唔試新野之人仲多,聽野而又真係肯買碟可以話好少,你覺得TRHK有冇可能好似求祈一間唱片舖噉一日賣咁多?有d野人人都知,而TRHK一路以黎都有做keep pop band呢樣野,只不過講過,冰封三尺非一日之寒。每次入貨,可能一半都賣唔到(果一半往往就係black / death),即係要搵一筆錢填左條數先可以再入下一批,亦即係,一路入,一路蝕;蝕到一個地步,已經唔可以入番咁多喇因為已經冇晒儲備,keep住果dpop野賣晒,淨番d其實都係好pop又唔係唔好聽只係本地人唔多識(正如"Buried in Oblivion"對我黎講已經算好地面仲要聽好多style都會鍾意,但事實係冇乜人聽過加冇人肯試),但新人唔肯受其他人提開果幾隊以外dband,舊人又唔肯聽新野同新音樂,結果,有貨冇人買,唔買野果班又係度嘈。「power to true black/death的轉型,到而家差不多全是black/death/doom」,就係呢個歷史遺留下來的後遺症。唔係完全轉型,坦白講TRHK亦唔敢完全轉型,做得呢個市場會唔會唔知道噉樣做係白痴?而如果你係由最起初online時代開始跟住TRHK,你就會知道呢樣野TRHK最最最開始已經明白。但問題係,當整體因素令到轉型成偏black/death之後,令到入少左或者入唔返dpop野/symphonic power/CoABC之後,就個個都小。同埋,入左之後,你覺得係咪真係一入即刻救晒呢?如果你問「點解而家搵唔到XXX」,我可以用番你講dband做例子。知唔知上一批THEATER OF TRAGEDY同SINS OF THY BELOVED,用左幾耐時間先賣晒?Human Equation果時入左兩批,夾埋個數量係好好好少,但,知唔知用左幾耐時間,先至完全賣晒?隻Universal Migrator,甚至連特別版都出埋喇,但依然冇人會搵。就算係CoB呢d,都唔係賣得你想像中咁好咁多咁快。好似第一隻碟,唔知點解,人人都話搵,但我可以而家仲見到係度。你話唔好聽?唔係喎。點解去唔到?唔知喎。「都唔係佢地果隻!」噉卦。或者「都download晒仲買黎做乜?」噉囉。最重要就係,相信好多人都睇到,metal呢家野,真係越黎越地面同主流化,已經唔再屬於HMV純粹入黎攝下個櫃185一隻之裝飾品,甚至可以有一百蚊唔使一隻之香港版,但TRHK係做入口版。即係如果你係歐洲或者美國唱片公司,知道而家賣呢隊band呢隻碟開始可以賺好多,你會唔會唔乘機坐地起價?就好似OPETH新碟,坦白講,真係要做得住,係要同HMV一樣標185。所以TRHK做到$140,我覺得,實在太好人,至於出邊見到百一二果d,就係港版,你要用港版同入口版比,基本上冇得比較,除非可以好似HMV咁大鍾意點壓價就點壓價(或者你唔知,佢地d碟就算標到神奇地低低到神奇,一樣有錢賺,此乃大公司之絕對優勢),而而家TRHK有d碟都唔敢入,因為入到返黎真係要標HMV價。到時,又嘈。所以點解咁難入大路野。唔係冇門路入,但仲貴過入流行野,冇得買果時講到點點點,但入到返黎賣得貴又要嘈價錢點點點一樣唔買,當而家d人一隻碟賣過一百蚊已經嘈生晒,你認為要賣到未計折時標百四五,d人會唔會唔出聲?所以都係一句:
「食米唔知米貴。」
另外之前都講過,要快有新貨,舊貨都要去得快;keep一隻死貨,就要錢填錢賣多幾隻去回番本。唔止TRHK,冇一間唱片舖係可以keep大量stock,就算keep,都冇可能keep住咁耐,除非其他碟之盈利覆蓋到。就好似你自己開舖頭,你敢唔敢入一d要放三四年先賣得出,但又唔會放耐d可賺更多d貨番黎keep住?你話d碟會升值,噉又唔同講法。但問題係,對香港人黎講,呢d碟唔會升值,只會out。所以,冇計。太late。但成日講乜講物有乜用?當然你亦會話,我一樣係自己地盤講三講四,但起碼我會行住講。坐言起行,先係改變現實之方法。TRHK已經起行左好耐行到去好遠。你,同其他人,我就唔知。同樣地,TRHK同我會繼續行落去,亦會行慢d就番好多人,你都可以見到,TRHK而家變到行得越黎越慢,黎近會再慢d,甚至會停落黎。但冇所謂啦,當你見到越行越前果d蝕到仆街,但行都唔行甚至調轉行果d可以多錢到搞騷搞乜搞物,就會知道,係囉,搞咁多做乜?聽下歌仔遮大家都係!
可能難聽d,係真心聽有心聽,唔會只會聽邊隊band邊隻碟。要carry on,唔係淨係話「屌乜都冇架!」淨係聽某個style某隊band某隻碟,就carry得到,就好似好多metal人士成日鬧聽nu-metal果班「屌淨係識聽nu-metal!」成日鬧j-rock果班「屌淨係識聽j-rock!」但,自己情況好似差唔多。亦可以話,好多人之心態同行為同只聽英皇仝人果班冇乜分別(但往往「有心聽metal」果班都會針對聽英皇仝人果班)。原因係點解?有d野,都無謂講啦,香港人一向唔衰得唔串得,講錯少少,得失多幾個客人,生意再難做d,又係仆街。所以,我只有話我會繼續捱落去,噉大家要pop野,咪盡量滿足番大家,你係要唔行冇所謂,我選擇繼續行。你覺得我唔客觀只係度埋怨的話,前面都講左喇,你覺得我係度怨,但我可以話你知我只係講緊事實,當然事實永遠係最唔好聽。你覺得我唔客觀,我可以話你知,因為我同時係一個metal聽眾、一個TRHK客人加TRHK成員,我三方面都睇到,同時觀察到三個客觀層面之事實情況,包括我同TRHK自己戇鳩。好多人會覺得因為冇人上TRHK買碟所以係度嘈,我只係講番TRHK同其他多方面見到之事實出黎。但已經冇乜好講,再講咁多,不如寫寫碟評,好似呢幾日寫段記之時間同精神,如果將呢d心血同文字化番做碟評,應該都寫到三四篇出黎,如果有二百個人睇到(我唔會樂觀到話二十,雖然二百已經係神蹟),而當中有幾個人係有興趣去搵,已經好好。至於睇完碟評之後係上網download完隻碟聽完再上網同人講「今日我聽左乜乜乜」好,真係睇完之後搵碟又好(有d野,你真係唔使旨意搵得到mp3),我已經懶理,我只旨在支持呢種音樂,同維持TRHK。你上黎問我碟d野,我照會介紹,至於試唔試,唔到我管。黎到呢度,講埋某朋友的故仔,我就訓覺,聽朝早d起身做完野上TRHK執定新貨。
「...我第一次去買death metal CD(基本上係買CANNIBAL CORPSE CD)係去Dyson度搵,因為覺得好Metal(註:Dyson係好耐以前信和一個賣metal之名人,而家已經絕跡)。想當年剛剛識death metal,最開始我只係識CANNIBAL CORPSE,所以只要係佢地,哈哈!果次佢都係答我『CANNIBAL CORPSE賣晒,不如試試其他丫!』我真係冇走到試左三隻碟,最後亦冇買到CC而買左另一隻。哈!我都唔明點解而家d人唔會好似我噉,一聽到冇CoB即走?唔係卦?難得個sales答『賣晒,不如試試其他類似band』,都即刻聽啦,又唔使錢!點解唔試?我就係試左DIABOLIC、SINISTER、BRUTALITY,最後揀左SINISTER,雖然開始都有少少懷疑,不過一聽到有death voice,已經覺得係咪CANNIBAL CORPSE都冇問題,最緊要夠恆同death voice...我諗同而家聽野d人最大分別係,我乜都唔識,自己聽KORN聽上去,所以俾隊SINISTER我都肯買,唔會死要CANNIBAL CORPSE。但而家聽CoB果班聽到冇CoB就即走,冇CoB都唔敢買其他野?驚唔買CoB買左另一隻比人笑?」
或者已經討論夠。如果真係有心再傾,就無謂係度喇,或者要問朋友借借地方。


TRHK1120大批新貨(仲有大清貨!)

基本上見字又係已經去到version 2.0。落到黎先發現,
「嘩!乜搞到噉?」
冇錯,又係時候年度大清貨,我都係入到舖頭見到先知有呢回事。巨量$150兩隻包括band tee,抵玩到爆。基本上,差唔多全部power metal、全部gothic metal、全部darkwave、全部thrash、全部death、全部melodic death、全部brutal death加全部band tee都做減價。立即好多人衝上黎,但又超多人爆粗:
「挑!都冇CoB!」
正如HMV減價,會唔會減人人都想買d野?減價目標係清貨,所以用低價錢放冇咁出名dband同碟,唔係冇好野,只不過實在唔出名,又要套現,就減價清貨。其實有唔少野確係幾好我都有興趣,只不過,都預左迴響不大,
「平又點?都唔係CoB!挑!」
冇錯,平,唔代表肯試。因為,除了CoB,所有都是
「半紅不黑既垃圾!!!」(呢一句,我真係越來越鍾意)
當然,即使點好,唔係CoB同CoF,點平都唔會有人要。想平?得,執笠果時啦,果時會十蚊隻宴客親朋。或者大家都想呢一日早d到。

又轉頭睇番今次批貨。有CoB新碟喇!有ARCTURUS、CRYPTOPSY、DARKTHRONE同SUBTERRANEAN MASQUERADE新碟喇!DEATH全線返齊!仲有超鍾意的BIOMECHANICAL同TEXTURES!(呢兩隻,都預左唔會賣得,因為逢係我鍾意果d,我發覺一定冇人要,冇錯我就係無膠不要)好多,仲好多都好正。但,預左唔會賣得。好似ARCTURUS。DEATH全線都好擔心。因為唔pop。


23/11/2005 TUE

琴日唔使寫,因為冇野寫,好忙。今日,就得閒超多。老細出埠公幹,今個禮拜都半冇皇管狀態(老闆唔係公司,都仲有老闆娘睇住),但我已經乜叉都唔理,朝早做下野之後,食完飯訓醒晏覺晏晝已經超頹,頹到可怕。基本上晏晝係冇用過電腦,因為又係做庇護工場,臨近年尾要寄CD目錄過外國,除左燒碟仲要整CD封套,如此重任當然係我呢d傻仔負責,唔使用腦嘛!結果成個晏晝就係拎把界刀界界界界界界...界完之後摺摺摺摺摺摺...摺完之後攝攝攝攝攝攝...攝入CD套。所以我做得好開心。因為完全唔使用腦。求祈搵張紙皮墊住張檯就界(真頹),但下面又要再墊一張報紙,唔係怕界花張檯,係怕悶要搵d野睇。(...)老闆娘都睇唔過眼。
「喂!唔使做呀!係度睇報紙?」
「唔係睇架!要黎墊檯架!」
「噉張紙皮要黎做咩呀?」
「墊住張報紙廢事界爛佢囉!界爛左邊度有得睇呀?」

睇睇睇,原來係一個月前之報紙,講「六成教師唔敢請病假」,因為太多野做,病都寧願病住做,甚至星期六日都要返全日做野。噉幾時放病假?病到終於要入廠做手術果時,迫於無奈要放假果時。假都唔敢放,超灰。所以我唔教書。教左,唔好話TRHK,你連我都見唔到。
已經越黎越肆無忌憚,基本上而家做緊野無論在場有咩人都照戴住一邊耳筒聽歌(雖然忙起黎果時,真係可以忙到有得聽都唔想聽),特別係今日呢d咁悠閒之日子,做d野又唔使用腦,唔聽歌真係對唔住自己。都係OPETH "Ghost Reveries",呢隻碟真係買番黎之後接近未掂過,屋企唔會聽,TRHK除左試比人聽果時又唔會聽,差唔多聽咁多次都係返緊工做緊野果時聽。嚴重地有趣。所以可能永遠都只聽得真一半,因為公司聽淨係可以戴一邊耳筒,另一半永遠都唔會聽哈哈哈。結論,由「唔係玩nu-metal」,進化到「好!」好過"Deliverance"。在我而言甚至好過"Blackwater Park"。基本上,真係只衰一樣野:"The Grand Conjuration"。其他的確接近完美。

噉樣界下摺下攝下,無無聊聊原來都玩到六點半,即走啦真係我都估唔到玩下玩下就咁晏。跑過皆旺途中,又要落一落雞記先。有同事email左dcoupon黎,買任何一樣野都可以用coupon送多一樣,超極嚴重抵食,仲可以自己print,所以近來大幅翻版雞記coupon,今日既然順路,就落黎掃一掃啦!先買兩隻雞 - 當然係分開兩件買反正價錢一樣 - 用兩張coupon換四隻雞翼,再買一件葡撻換一碗薯蓉,再加一杯汽水換一條粟米,夾埋超大餐三十都仲有得找,而家KFC又加左價(呢樣野可能好少人知),噉砌法仲平過買個餐,但仲要豐富N咁Q多喎!好耐未試過食得咁開心,尤其是你知道之前有一段短時間係冇左雞+薯格餐,只食呢個餐之我即灰爆,亦因為噉我冇再幫襯,或者就係唔敢得失我呢個大客(...),之後好快又出現番。同樣地,相信又係冇人發現呢樣野。不過懶理,總之抵食(但冇coupon的話相信我都未必會幫襯),有興趣自己上KFC網頁睇睇,但而家好似又轉左優惠得買餐先有得平,究極唔抵食!所以,拜拜!(都起碼過埋呢個月先拜得拜,因為手頭上果幾十疊coupon用埋今個月先過期,所以今個月大把雞叫)

趕頭趕命七點準時到,一開唔夠兩個字連續幾條茂利衝上黎,好耐未試過咁齊人,仲要咁早同時出現,究極神奇。
「要影張相啦!約都冇咁齊!」
好多人,更多神奇人士,今日乃神蹟。最神奇,都係九點幾收到個call,
「喂!今晚收幾點?我十點半先上黎呀等埋我呀我要試新到果dblack野呀!」
可以噉玩法,都冇乜邊個架喇,除左梁生之外。為左佢,今日留到好夜成十一點幾先走,但乜都值啦,因為梁生。次次上親黎都好好玩。
「今次死喇又買幾隻!上次執左百幾二百隻(唔使問喇各位搵black metal人士,基本上你想要or搵緊果d全部都包括在內),比人鬧餐死,鬧做乜使咁多錢買碟,跟住黑口黑面左幾日。我同佢講人總會有嗜好架喇!噉都好過去賭去滾,而家d錢使左都仲叫做有d野係度丫!如果人冇嗜好,同條鹹魚有乜分別?跟住幾日咪買左幾千蚊手袋俾佢囉!果批貨一箱九十幾隻再加一大袋,我都仲未開箱check下d碟!買左咁多碟放係屋企已經眼冤啦,都唔敢係佢面前搞d碟啦!有晚收到Soni email,send左一間label條link,睇一睇都有廿幾隻想要,但未睇清楚又比人催上床訓覺。聽歌反而唔怕喎!佢晏晝返工,我返夜晚,噉咪晏晝聽歌囉!隔籬屋成日係度打麻雀,噉咪佢有佢打麻雀我有我聽歌囉!以前一條冷住,好似今晚噉實搞通宵起碼三點先訓覺,而家搞夜少少都比人嘈『成日對住部電腦!早d訓覺啦你!』我地仲未結婚架!未結婚已經噉,結完婚點算?挑!結鬼婚咩!邊有錢丫!有錢都拎黎買碟啦!」(well,最後果句係我加的,嘻嘻!)


23/11/2005 WED

琴日超得閒,諗住今日可以超開心,點知今日庇護工埸開唔到工,因為超超超忙(就係忙到有得聽歌都冇心情聽果種忙),根本係多野做到你都唔記得有d咩要做,因為都唔知可以同應該點樣開始。仲要超眼訓。噉先死。好在,仲有得唱歌。
"I was a teenage hand model~~~"
因為劇本(即係說明書)比投資者(即係訂貨間公司)改左,導演(即係我)唯有就番大老細叫hand model(又係我)補番幾個shot。
「道具部!(即係阿姐)同我執呢幾件架生出黎!主角!(乜事叫自己?)快d幫你對手補下粉剪下指甲!攝影師!(即係助理甲)同我set定機拍野!」
「唔得!導演我唔做!」
「唔做?我立即升你做助導!制唔制?」
「睬你都傻!而家我係監製!唔好阻住我直接同投資者磋商!」

一番談判之後,監製宣佈:
「導演!我幫你重奪創作自由!」
正!而我呢個導演亦都做左最明智之決定:
「全份劇本報廢!呢套戲取消!導演我決定唔拍!!!」


...沒有意思。



24/11/2005 THU

琴日,夠忙,夠多野做,夠冇心情聽歌,夠辛苦,夠眼訓。今日,請將全部「夠」換成「更」。係忙到晏晝寧願食碗就算留番多d時間訓覺。都夾硬聽左一次OPETH。今日結論係,
「寧願唔加"The Grand Conjuration"呢首歌。其他七首,10/10。」

都係趕,但都趕得切買埋雞(...)先上皆旺。今晚好靜,只有三條老老野在發洩青年的憤怒。哈哈哈。
等左咁多年,終於睇到,Yngwie Malmsteen "Concerto for Electric Guitar and Orchestra" Live DVD。”Concerto Suite for Electric Guitar and Orchestra in E Flat Minor Op. 1”係我第一隻metal碟("metal"...),之後出DVD,已經十分想睇,但當其時得日版貴價到恐怖(五舊水買隻DVD?我係癲,但冇咁豪),年幾兩年之後出歐版,都仲係高價到唔捨得買,唔好話隻Live DVD,隻Live CD都死得人。經過不知多少年之後,話黎香港又放左幾次飛機、追越多碟覺得越追越差、已經聽到冇乜大興趣追落去(而家d靚仔都唔聽啦,問而家幾多個人識Yngwie Malmsteen我驚唔夠一半人話知邊個),但隻DVD,依然有興趣買,因為想圓番當年之兒時夢想(...)。當年幾近五蚊跌極都三百(當然你去「某間」就可以百零二百搞掂),當年唔知幾多人話要搵之呢隻,估唔到而家美版reissue一百蚊搞掂,仲要每日都係度跌價(...),所以得以用好低價買到呢隻當年夢寐以求之"Concerto Suite for Electric Guitar and Orchestra in E Flat Minor with the New Japan Philharmonic Live"(...),只係個封面,實在可怕。從期待度到價錢,都可睇到此一代結他英雄之沒落。但冇所謂。我依然鍾意。我仍然好想買番"Seventh Sign"同"Alchemy"。搵日要拎番隻"Rising Force"同"Facing the Animal"出黎聽聽。
當其時,的確可以當佢神噉拜。只係而家睇番,實在冇咩(所以,我對DT Live冇乜興趣)。其實唔係玩得好,純粹一圓心願心態捧場,場live果時功力同台風過左高峰期,好多位亦即興過龍跟唔到&夾唔到隊交響樂團,求祈位當然有你睇佢玩果時已經肥到噉就知果排已經係好景到亂咁彈都冇乜所謂(G3果時玩果首"Fugue",都好過呢場多多聲),最抵死木結他都要企係度彈仲要用pick,始終唔鍾意佢彈木結他都要當電野噉彈,更戇居仲要用pick彈,聲又唔得玩又唔得真係做乜春,古典結他就坐低用手彈啦唔該。但,我冇所謂,因為雖然冇以前咁熱衷,我仍然係佢fans,同埋,其實,真係幾好睇。各位朋友,雖然對好多人黎講已經好娘好老土,亦有人連呢條友係邊個都唔知,但,買得過。


25/11/2005 FRI

無驚無險噉又星期五。仲係好忙,又好似冇咁忙,起碼得閒到可以執執張書檯同櫃桶(就黎又變萬紙塚),同摷摷之前有d咩未做好先。好似有份報價,到今日遲左整整一個月,終於摷得番記番起,拿拿臨拎番出黎做,都遲左成個月先交到比個客。(...)都幾得閒。起碼居然冇訓到眼覺都唔會做到訓著先。
又到月尾,好快已經知道下個月收入點。
「咦?做得成生意,有佣分喎!有幾多?」
「廿幾蚊噉囉!」
「廿幾蚊美金?都好丫叫做去HMV買到隻碟!」
「你就想喇!係港紙呀傻仔!」

再睇睇張糧單,原來今個月遲到左三分鐘,要扣人工。
「咁大劑?三分鐘,扣幾多人工呀?」
「大劑喇你!扣左一個六毫半!」
「嘩咁Q多?」

頂!原來遲到扣咁多錢!早知果日我就唔搭三十幾蚊的士趕番公司由佢遲啦挑!呢個故事教訓我,從今以後返工有幾遲得幾遲!
「咩呀!遲咪遲囉!今個月我每日十點先返!自己係我份人工扣定錢啦老細!我豪夠你一舊唔使煩!收左錢朝早咪打比我嘈住我訓覺忝呀你!」

夜晚,都係噉啦。今晚反而見到好多隔一段時間先蒲一蒲頭之朋友。同隔籬玩具舖吹水,結論係:
「玩同聽,實在係兩回事;玩果班,通常都唔會聽。」
冇錯,呢個係同玩具舖吹水的結果。好似好無稽,但如果知道隔籬舖副業係乜,就知點解大家可以有此結論。而家d人,要聽歌又要自己唔郁等人餵,真係餵到入口都唔肯食。因為,唔使講,前幾日講晒。
今晚,又係夜收,有大老細要好夜先下黎,服侍下佢再加執執野,都成差唔多十二點先走人。
「邊個要劉Sir等咁大牌?」
冇乜邊個咁大牌。其實人人都咁大牌。基本上你係肯聽肯試,我點都會等埋你。


26/11/2005 SAT

原來又星期六。唔知咩事地又到得閒的一天。但其實今日唔多得閒,走一個客,想焚兩焚之際碟都未執好又一個入黎,每個客一棟碟,客連客之後,最後檯面有超大棟碟係度。都係果句:
「冇所謂。你係有心聽就得。」
一百五十蚊兩隻大清貨開始吸引到人黎,除左「平又點都唔係CoB!」果堆,亦即係其實得好好好好少人黎。冇緊要,自己人&有心人玩。成堆友搵左好多,其實有好多好多正野,包括grindcore,就連一個專聽black同明星野之鬼佬都執左兩隻darkwave。真係好多野執。最抵死係有位朋友試隻progressive rock,睇個款都有d興趣買,點知出邊有條路人甲一馬當先衝入黎
「嘩!咩黎?正!我要!俾呢隻我!」
噉就放低錢走左去。嚴重地神奇。只留下本來試聽果位朋友一瞼無奈。跟住成班友繼續試d無聊野,
「再無聊d!播呢d無聊野先有人入黎問價!」
所以SHAMRAIN "Someplace Else"好有被問價潛質。

好多人上黎,好多碟要執。又係玩到十一點幾先走,做埋最後一大老細瘦仔之後(真係要講聲「多謝老細」啦!),仲諗緊自己執d咩果陣,又有位朋友撞上黎。其實都只係搵CoB新碟,但起碼,買完之後仲會問
「有咩好介紹先?」
之後走左去,一陣之後又返黎,
「冇呀見急咪上黎借廁所囉!」
撞正廁所有人用緊(多謝晒霸住廁所位朋友!),就播多幾個MV,睇完XANDRIA之後(就係傳說中「X字頭的gothic metal」),再去一去洗手間,出到黎已經
「都好正!你介紹就得啦!就要呢隻!」
噉又執多隻。之後傾家蕩產地要摷埋d神沙出黎俾錢,數到最盡發現唔夠錢仲一兩蚊,
「計平幾蚊啦!仲要留番d錢搭車返屋企呀!」
又好。之後再數數,淨番四個半...
「仲差三個幾先夠錢搭地鐵返荃灣呀!你可唔可以借幾蚊比我呀?」
即係減完再減仲有車船津貼。賣碟賣到噉,都可謂天下無雙。

走晒,到我自己執。的確需要好多時間去諗,因為真係太多野執。先執番隻ARCTURUS "Sideshow Symphonies"先,雖然初聽真係可以講句「都唔知玩乜!」但照執架喇冇得走。仲執左RITUAL "Think Like A Mountain",第一次聽已經超想執,就係排緊隊,但入得兩隻咁大把,一隻比個專試冷門野之朋友執左,淨番一隻,知驚喇,要執喇,雖然由「知驚」到「要執」之間隔左都幾長時間。隻碟其實唔係太特別,就係夠pop同我鍾意,呢隻碟對上一隻"Superb Birth"就似前面提過一聽到即問價隻prog rock野,呢隻"Superb Birth" TRHK仲有貨架!(當然,冇人搵冇人試就預左)。當然,仲有DEATH四隻,噉就買齊全線。
「搞錯!而家先執晒DEATH全套?」
比人鬧。因為同我一貫「一有即執全線」風格唔同。冇計。因為年代唔同。以前唔執,因為當其時多人搵,成日嘈
「搞錯!點解唔入DEATH?」
所以每次到貨,自己都唔敢執,寧願留番比人搶。但到左而家,大家見有DEATH到之反應係
「搞錯!點解入DEATH?」
送多幾句
「CoB新碟呢?」
「DIMMU BORGIR新碟點先?」
「呢隊band新碟都未入,入DEATH黎做乜?」

所以,雖然我地呢d老野恨DEATH恨到死,而且DEATH真係一買就實會買全線(今日未計我已經有兩位朋友「買啦唉遲早都要買架啦!」一take搞掂,仲有兩位朋友遲下都係噉玩法),呢d野亦屬於「冇可能唔入」&「冇可能唔賣得」,但就係入完只會比人鬧。所以,今次,終於都到我執,我唔執,即係又多幾隻死貨。好多band好似IMMORTAL,都因為相同原因之前未買/未買齊。但睇黎會有好多band開始買番或者買番齊。睇睇IMMORTAL除左"Pure Holocaust"同送DVD之最後一隻有人買之外其餘滯銷就知。都係同一條問題:
「唔好聽咩?」(答案,人人都知道係「唔係」,噉點解唔買?我都想知。)
亦有人話,
「邊有錢執咁多?」
都係果句啦。凡事總要付出。上黎TRHK冇一個係有錢仔,人人都係打工或者慳錢儲埋儲埋買碟,包括我。當年瘋狂打工,仲有瘋狂慳錢,可以成個禮拜唔食晏晝,「豪」少少係白粥煎堆一餐,最慳果時,我試過暑假買一排生命麵包,仲要係七仔臨過期五蚊唔使之減價貨,一排麵包五蚊夠食兩日,其餘除左搭車返放學,咩錢都唔使。噉先可以有錢追全線。亦有位朋友,好耐以前每個禮拜上黎執一隻HYPOCRISY,執下執下噉就執左全線(睇佢當時可以一隻一隻執,就知道唔係近年metal呢家野越來越地面同出左新碟有人提,基本上呢隊又係屬於好出名又有質素但只有鬼佬上黎搵果類)。執碟係咪真係咁難?以前果班就真係噉樣執法囉。而家真係冇乜呢d人。


27/11/2005 SUN

今日居然一早已經見到我。唔係我地心愛的Paul Lam今日Master畢業,點會晨咁早(十點幾...)飲樣上身千山萬水走到城大同佢影相?
「全世界黎晒呀!冇你點成事!」
講到全班學生黎晒,唔出席都唔好意思啦。點知去到先發現原來得果半班友仔黎到。仲好!少一個人少一個同我爭野食!城大茶樓果然唔錯(好過教院果間無法數清咁多聲),無論環境服務定食物質素都可以同一X流黎形容!雖然價錢真係好Q貴,芒果布丁成十二蚊一個,咁大棚人一黎就黎八個仲黎兩轉,第二轉嗌到經理都過黎問清楚
「八個?你地真係要八個?真係要八個咁多?」
「唔係!應該唔止咁少架!」

最後嗌到想食都冇得食,因為
「你地一檯一次叫咁多,廚房d芒果布丁都比你地叫晒冇晒喇!」
所以全酒樓都好唔妥我地檯。仲有超級無敵的椒鹽炸豆腐,正!超正!一X流!呢d先係茶樓!(真係想爆句「教院茶樓收皮啦!」)所以一坐低已經乜叉都唔理,拎住張點菜紙好似任食打邊爐噉叫!
「四碟腸粉先啦X!(個X當然冇爆出口,幾乎架喇,近得d契弟多近排爛口左好多)小籠飽得果幾粒仔,叫夠六籠啦唔係食都冇得食!整多兩碟炸豆腐!芒果布丁呀我要!」
「阿阿阿劉Sir,咁多,食唔食得晒架?」
「咁多嗲,食多兩籠叉燒飽先啦!」

難怪,劉Sir可以咁肥。當返而家份工兩個月已經可以食到肥左十五磅(!!!)(...),條腰已經去到三十七寸(!!!)(...)幾乎褲都著唔到,而家仲有得任食,有得食自然唔會蝕底。當然,可以食得咁爽咁豪,梗係唔使自己俾錢先會做得到同感受得到。淨係計芒果布丁,一個十二蚊,一轉已經成舊水,我地仲可以搶到連張吸印字都打滿晒之後d阿姐印都廢事吸,就知道我地擦左幾咁多,同劉Sir點樣老實不客氣。淨係食布丁都食到窮,仲有其他無數正野食,唔係最後趕埋單,起碼整多兩碟炸豆腐!所以阿Paul哥接到張單之後當堂冇晒聲出,飲餐茶仔都成一千六百幾(我食左三四百左右啦,所以劉Sir而家咁肥),本來仲諗住讀埋Doctor,但食完呢餐之後唔敢再讀,唔係學費太貴,而係個個係叫狂叫
「Paul Lam!幾時再畢業?Master畢業都食咁豪,做埋博士一定唔止食咁cheap呀!快d畢業呀你!」
食完飯當然係影相時間。一睇就知Paul Lam幾受歡迎,其他學校不知幾鬼多女學生黎同佢影相,睇番我地呢邊成竇麻甩佬,冇契妹係度抗衡住忝。影相之前,自然要講到明
「影正面好喇!唔好影側面!唔好影到我個超級肥腩!」
讀左咁耐使左咁多學費,影完相Paul Lam不禁仰天長嘯:
「我係MBA!Master of Business Administration!」
「我都係Master!」
「劉Sir你又Master?乜叉Master?」
「Master of Puppets!!!」

所以其實幾想讀碩士,就係為左Master呢個稱號。到時就算有得讀Doctor都唔會讀,因為我要做Master!(發夢啦,Master都讀唔掂,仲咁頹,仲發夢讀Doctor,挑)

影完相冇得玩就走人,又係時候上舖,有新貨到點都要早d上黎執執,雖然好少。冇錯又有新貨。

TRHK十一月新貨終極篇
月底都仲可以黎多批我都估唔到,不過其實有同冇都冇分別冇所謂啦,都只係一堆半紅不黑既垃圾,係咪?有緣人自會尋寶,冇緣人自會爆粗。要明星的各位,請當冇事發生等下個月吧。就好似今日收到個電話黎問有冇新貨,回應係
「今日到左dblack野同doom野。」
「哦。」

噉就拜拜。基本上連有咩到都唔使問已經收得線。


Weekly Reviews:

  1. EMANCER - Invisible
  2. EMANCER - The Menace Within
  3. HELHEIM - Nidr Ok Nordr Liggr Helvegr
  4. TEXTURES - Polars
  5. WORLD BELOW - Maelstrom
More reviews here


28/11/2005 MON

這,已經很好、很高興了。



29/11/2005 TUE

今晚,唔使叫雞喇,因為晏晝叫左雞。難得老細兩個都唔見人,機會難得自然心血來潮食豪d,最冇所謂加最開心果個梗係我,有得食喎!仲要係食雞喎!一個大餐三十幾件雞兩兜飯加一大兜薯蓉幾年葡撻,
「咁多,點食呀?」
「點食?我食囉!」
「你點食到咁多呀?」
「你地全部唔食留晒比我咪食得晒咁多囉!」

唔知點解我d同事可以咁細食。食四份一兜飯加一舊雞唔夠已經飽。都係得一個人點食都唔飽遮。
「喂!你食左差唔多十舊雞喇喎!兜薯蓉都一個人食晒仲搶埋兩個葡撻!你仲未食夠架?」
「一早叫你地叫夠一桶雞比我架啦!唔好阻住我食多隻蕉做飯後果!」

劉Sir之真面目表露無遺,大家都睇清楚晒佢。所以,
「第時唔係食自助餐,打死都唔會同劉Sir夾!」
晏晝,都冇咩好寫喇。食完雞已經飽到郁都郁唔到,點做野?
「真係好鬼飽!六點叫我起身放工啦各位同事!」

夜晚...其實,一至五晚即係二四五晚,一般黎講都好靜。好似今晚,客得幾個,契弟多少少(久違了的輝爺!),全晚就係服務兩位女士。好難得一位專登出黎旺角搵NIGHTWISH & XANDRIA,得一隻仲肯試其他野,試左差唔多成晚。查實,點解一個小妹妹會無端白事撞上黎搵metal?
「聽而家d野聽到悶,想搵d嘈d,自已上網摷下摷到dmetal野,咪上黎試下囉!」
自己摷仲要乜都試忝,玩玩下就一晚(小妹妹曰:「呢度同我想像中好唔同!仲以為會有好多志同道合朋友上黎呢度,點知坐左咁耐一個人都冇!」)。呢樣野,好難得。即係而家見d男客人都唔會噉做。
所以點解成日話,而家香港女性仲metal過男性。


30/11/2005 WED

噉就十一月尾,十二月將至,係時候寫聖誕卡俾d客。通常呢d時間,都係全年大家最無聊的日子,因為
「寄黎做乜?徙郵費!又要徙時間寫!」
所以,逢係聖誕時節,大家都好鬼求祈,睇兩個經理,一個淨係上款"Dear XXX"之後簽個名就算Merry Christmas都冇句,另一個仲勁上款都冇求祈撩個名就算(「噉寄法唔好寄丫笨!」),就知道,各位同事幾咁厭惡聖誕佳節。
「而家寄都寄e-card啦!仲邊有人寄聖誕卡架老細?」
「咪我地囉!」
老細話。唯有寫囉。最愛公司果個不嬲係我(...),最得閒果個亦係我,所以用大半日黎寫聖誕卡,最慳水慳力睇落又似做緊野嘛!反正摷到盡先要寫果三十零封,咪手寫番幾句囉當浪費時間都好丫!我地呢d係其他同事眼中絕對係「做壞晒規矩」,人人都係有幾少得幾少,我呢d反而有幾多寫幾多,冇計啦,睇我段記同碟評都知,我寫野之陋習係,一係好鬼短,一係好很長。每張卡都作篇文比佢,同一間公司幾個人每條友寫d野都一定要唔同,寫下寫下,差唔多每封都唔同,但總有d例句會用N次,係d次序唔同改多少少字咪睇落篇篇唔同囉,雖然「大客」果d真係專登作得靚一靚(即係假一假)。最後,有一個大問題。我發覺,要幫自己設計番個簽名,要做到成個band logo噉款先得。
作完文(我做壞規矩之後,全公司除左經理之外都參加左作文比賽,我四五十字一封,原來已經算小野矣),仲有一樣緊要野:幫公司作口號。搞掂張卡,自然要整番句slogan上去,先可以順手宣傳一下公司嘛!成兜無聊友就借d倚扮作野蛇皇。
You build me up; I light you up.(咁柒,一睇就知係我作。所以全公司得我d卡有印呢句slogan。哈哈哈哈!)
We are the future, and future is by your side.(呢d懶文藝又hardsell當然係我作的硬膠野)
You are looking for the future. You are looking for us.(...)
You give me money I give you light.(同事甲的作品。簡單直接。)
Give me money give you light. I have money you are happy.(改良版。作者我非常鍾意,似我學生d作品)
Business come to me!(呢句好!我鍾意!)
MONEY OR DIE!!!(呢句更好!)
Money is my business...and business is good!(一X流)
「...你班友仔諗dslogan唔好咁hardsell咁commercial好唔好?係咪想同大老闆我倒米?」


1/12/2005 THU

琴日寫聖誕卡,寫完,當然要貼郵票。難得部電腦壞左(對我影響唔大,好多謝我跟親d客都唔覆email,多謝晒!),朝早做完野,食飽飯之後坐左成個晏晝慢慢貼郵票,貼完自己果d仲要搶埋同事d卡黎貼,唔噉樣貼番百零二百張,點樣消磨時間(正確點說是浪費時間)到放工?呢d完全唔需要用腦之工作就最適合我。貼之前仲可以拆同事d信睇佢地d卡點樣作論文法哈哈哈哈。

無驚無險仲好嘆,又夠鐘走第二轉。通常月尾最後一日同月頭頭幾日都接近冇人,今日居然調轉,係多人到想寫野都冇時間寫。又好多神奇人士,好似老豆帶埋老婆仔女上黎買brutal death,
「我個仔都聽架!」
又有兩位女士上黎玩左成晚(真係越黎越多女性),我都覺得有點神奇。玩到最後剛好十點諗住睇埋MACHINE HEAD個MV走人,就係因為MACHINE HEAD,噉又撞多單玩到十一點幾!實在有趣。今日反而更似星期六日同糧頭。但點解唔多使理。有人就得。有人上黎搵野聽我就會做。

為左慶祝臨走又做多單,返到屋企即時拎番MACHINE HEAD第一隻同最後一隻出黎怒焚番野先。雖然聽咁多次都仲未非常鍾意,但成日拎出黎聽,因為夠火。噉就一晚。
所以點解未聽碟量加未拆碟量越黎越多。暫時目標係,2006年前聽晒DEATH。

...咦?原來已經十二月。原來好耐好耐冇轉過段記。第一次段記係橫跨兩個幾月。相信今次段記會陪伴各位同學渡過2005。


2/12/2005 FRI

新旺,全旺角最成功外賣檔,TRHK御用食堂,正式跳出旺角進佔大角咀。今日返到公司第一眼,就係新旺張外賣紙。
「今日開始,全世界淨係准食呢間!」
我,當然係久違了的粟雞蛋!(又諗番起「漢堡煎蛋飯粟米汁炒底凍華田」呢個cult,次次講新旺必定提一鑊)實在超正,呢間真係次次叫都咁一流!就係因為叫太多,新旺阿姐都認到我,打電話去果時聽到我把聲都不禁爆左句:
「咦?你咪皆旺108?做乜扮第二間公司呀?玩野呀!」

是日十分地忙,搞到四點幾先可以開始心愛的貼郵票遊戲。(...)貼足兩三個鐘,終於貼晒全公司d聖誕卡,放工捧住百幾封成棟卡過隔三條街郵局度寄,差少少跌到成街都係。但跌都唔理架喇,又要趕路上皆旺,大老細梁生駕到喎!即係我地呢d做細既當然要早d開定門等佢啦!同場仲有冷爺,第時佢會經常出現TRHK,因為每次上完黎,都會覺得自己原來好瘦甚至「又瘦左!」所以上親黎都好開心。(死,搞到我都想減肥忝)
今晚正常番d,冇乜人,噉先似番TRHK(居然噉講法,真係灰到爆)。是晚節目就係「當年今日」。唔止音樂,好多野好似game同動畫,都係八十年代同old-school好。雖然而家好多野睇番其實幾戇居,好似變形金剛,見音波咁Q大部機械人變到咁X細部錄音機,細個睇冇乜野仲加多句「勁喎!噉都變到?」大個之後睇番真係要爆番句「搞錯!噉都變到?」果時d野真係好多唔估理。但我就係鍾意咁唔合理。此乃old-school。打機又係,以前dgame真係好玩好多,遊戲性高得多。果時打機狂熱程度拍得住而家metal狂熱程度,打機癲到係可以寫番份攻略出黎(最cult:電話從頭到尾講晒成隻"Alone in the Dark 2"),甚至指住game書d攻略小番「呢個secret point都搵唔到?」「噉屈大佬法都唔識?」「唔係卦,使咁難?」「噉樣走呢條路咪得囉,識唔識打架?」但老矣。
Old-School才是皇道。我都只係一個目光狹窄的傻仔。


3/12/2005 SAT

無驚無險地又一日,再走一走過旺角搵搵個舊同事幫佢做下功課賺下外快(音樂同好多野都係,始終都要自己努力工作先可以得到,靠免費午餐除外),又係時候衝上皆旺,因為又有新貨到。冇錯,又有新貨,但都懶講,唔係好多,又全部都係半紅不黑晚垃圾,我都慳番d功夫聽多隻碟好過。下次有pop野到時先講埋啦。有興趣自會尋寶。
睇番呢批貨,好有趣,原來而家Metal-Rules.com都有碟出,但唔奇啦,Metal Storm都已經出左幾隻雜錦。Metal Observer一早做埋mailorder忝啦。外國同大陸dwebzine真係越搞越大。香港,都唔會諗住搞得大,搞到唔使執笠已經好開心。

一開食完個飯,立即成村人衝入黎,一齊入黎,玩一大輪再一齊走。忙一輪之後,突然之間好靜。可能因為冇左d傻仔上黎mosh啦。(「飛圖老細又上黎呀!其實佢個個禮拜都上黎,但次次見唔到你得我一個佢都唔會發表偉論,冇癮!」)中間一大段空檔,做左神奇地多野,包括聽晒ARCTURUS新碟(變晒樣,但原來都唔錯),同睇晒OPETH隻DVD(自己果隻買左都未拆,哈哈!真係好好好睇,包括製作特輯)。之後,又一村人衝上黎,今日d客好似交更噉上法。成竇無聊人,好多人玩、好多水吹、好多粗爆。(冇錯,各位同學,其實劉Sir好Q爛口,佢絕對係你識得最爛口之一個)實在太多人&太過癮。玩玩下消防查牌隔籬玩具舖走鬼,
「喂唔夠位放野呀!擺d過你果邊先啦!」
「得!拎晒d變形金剛入黎啦!我要我要六變獸!」
(又一個童年夢想,總有一日要買番)
仲有臨走聽晒成隻"Seventh Sign"(呢隻,一定要買番),好難未試過咁開心。乜都唔使諗唔使煩就最好。


4/12/2005 SUN

「開唔開舖架?」
兩點十打黎。係喎!逢星期六日一定訓到好開心,今日差少少訓到舖都唔使開。唔係有人叫醒,真係可以直訓到八點幾,起身之後
「夠鐘食晚飯?好!今日唔開舖!」
食飽之後焚多陣機又訓過。

基本上,同以往一樣,都係噉:有人上黎、有人買野、有人唔買野、有問「有冇CoB新碟」見賣晒即走、有人上黎無聊、有人上黎吹水、有人上黎爆粗、有人上黎聽cult野、有人上黎on99...都係噉。我只知道,我好眼訓。ZZZZZZ...
夜晚又係好靜,隔籬玩具舖都一早收檔番歸食飯好過,但又要等人(放飛機的朋友請記得你果句:「下次買多幾隻補數!」),就睇多次YJM隻Concerto。呢幾日挑起左舖癮,搞到有d興趣執番 佢隻新碟聽聽忝。雖然有時間真係唔Q知佢想彈乜(如果呢場Concerto係後生十年之YJM玩,肯定係超經典),更超唔鍾意佢彈木結他(以前真係聽到喊果d真正古典結他曲目去左邊?),有時仲好鬼求祈(成個concerto最後個收尾簡直敗筆),不過,照殺架喇,睇"Far Beyond the Sun"都夠啦。始終第一個係聽佢。所以,
「我要"The Seventh Sign"!!!」(放碟者請搵我,呵呵)

冇乜好寫,實在眼訓。所以今個禮拜冇碟評睇。我已經好好好好耐未寫過碟評。又冇貨,又唔知寫乜好,寫左好係得自己一個睇,無謂。所以,收皮。

二樓
搵二手,上二樓

"Twins-Evil"
BloodKrishna特此祝賀二樓正式開張


5/12/2005 MON

「唔使返工咩?」
好多人問。要,但冇返到,因為病。其實係發燒同咳到死噉遮唔係咩大病(...),星期三又要返大陸,反正睇醫生唔使錢,係時間搵搵大夫清一清d久疾,順便放日假(「...刁!唔想返工仲多多事實!」)。見得閒(......),今日終於拎全線CELTIC FROST出黎,買左咁耐,終於拆喇。當然,一黎就係聽全線,呢個係我買碟加聽歌之習慣,由HELLHAMMER開始,可惜冇左中間隻glam black,差少少,雖然個個都小呢隻,但又係按我個性,執埋番黎研究係遲早之事。d野好簡單,就係夠暗夠邪(雖然有時簡約得有點悶),同埋真係到而家都冇乜邊隊非常似,學就有,似足或者做到果種feel,真係好少。所以點解咁鍾意VOIVOD同CORONER(CORONER更加唔使講,大家都係瑞士band)同好多怪雞band,就係因為咁邪咁暗。所以,下個月/下年應該執埋新到隻SIGH,當順便清清TRHKd死貨都好。
好似成日見我對好多野評價都好正面。或者真係因為狗屎垃圾都鍾意聽之關係。當連KREATOR隻"Renewal"我都可以聽到好開心,真係冇乜野覺得完全地唔好聽(有,"St Anger",雖然都有d位我幾鍾意),亦因為噉,聽野可以多好多闊好多。起碼唔會好似好多人為一棵樹放棄成個森林,
「隻碟係好,不過就係唔鍾意個歌佬/個錄音/d結他聲/個鼓/dsolo/band名,所以唔買唔聽喇!」
噉就損失左好多野。
實在爽。或者,搵日應該再放日假,黎野DEATH全線!(............)

實在疏乎,聽晒CELTIC FROST全線,見仲有大把時間(...),就順便睇埋隻"FFVIIAC"(to某仁兄:「睇喇終於!」)。睇完之後,真係,唉...點解當年上畫果套《太空戰士》可以咁差?如果用呢套上畫可能賺得仲多,雖然呢套都唔係非常好,因為只有OVA水準,打戲度同畫得非常非常之好,不過d茄哩啡出得幾下手就冇,又係最後一刻先出大招贏晒,冇癮(雖然設計幾好),劇情亦都太慢&太薄弱。如果係用呢一套之劇情同埋世界觀,加番上畫果套之劇力同投資,先係「應該係噉」之《太空戰士》電影。而家噉樣,真係兩套唔到岸。
實在太爽。唔使返工又唔使開舖之日子實在舒服。我已經太耐未試過。搵日一定要病多次,一日聽晒全線DEATH加睇埋Roadrunner United!(......)


6/12/2005 TUE

今日好似咩都冇做過。唔係好似,直頭係,病完一日返黎,突然間好似全部跟開d野都斷晒尾噉,雖然我知道,係有好多野要做。但,已經食藥食到冇乜知覺。唔知咩事噉,原來噉又一日。可以噉樣唔知做乜等糧出其實都唔錯架!

點唔掂,夜晚,都係要開舖。我都想返屋企抖抖算。雖然,結果一樣,休唔休息,冇乜分別。返屋企休息舒服d噉囉。所以,拜拜。

東主有病 休息一天

7/12/2005 WED

忙時可以好忙,得閒時可以好得閒,食飽飯又係大覺訓,噉又一日。都幾無聊。所以我鍾意。唯一貢獻,又係晏晝要做model。成日話做model,到底做咩model?今日就同大家分享一下。

I Was A Teenage Hand Model:
The Way To Metal


8/12/2005 THU

東主有事 休息一天

我都係突然先知。僅此致歉。

9/12/2005 FRI

都係忙,雖然呢份工「忙」之時候,相比以前任何一日都輕鬆舒服(其實就算「真係忙」d日子,點多野做我都覺得做得好舒服,因為我能幹卦哈哈哈),晏晝又要整電腦(冇錯,咁繁忙的時間都可以壞足幾個禮拜,搞到想做野都冇得做,可想而知我有幾「忙」),老闆見到大家做到死呢隻野都可以行黎行去扮忙咁得閒,就老點
「我有個親戚有幾箱橙比我,佢間野係隔籬街,你同我去拎!」
乜原來老闆有親戚開生果檔咁得意?真係睇唔出喎!仲要隔籬街咁近當然仆到去,可惜途中都冇舖頭,想篤串魚蛋吞下pop都冇。一個開公司 - 雖然唔係大,一個開生果檔,分別咁大,真係點睇都睇唔出。點知去到...原來個「生果檔」,唔係一個檔口,而係一層,仲要唔係檔,亦唔係公司,而係集團。一睇門口,列晒成個集團所有公司,香港有大陸有外國都有,似乎仲要唔止係集團而係大集團。當堂比呢個「生果檔」嚇到O晒嘴。
「哦!上黎拎橙丫嘛!我地買左好多橙食唔晒,你拎幾箱返去啦!反正仲有十幾廿箱,你想要幾多自己拎啦!」
噉就捧左幾箱返歸。返到自己公司,睇睇老闆親戚個大集團,再睇睇老闆,
「老細,真係睇唔出喎!」

夜晚,幾經波折,今晚終於出現TRHK。或者前幾日真係缺失唔少,因為今晚真係有人上黎。當然,有唔代表多啦,因為近日已經有人問
「幾時有新貨?」
咦?上批新貨好似上星期先到咋喎...(似乎呢位小朋友唔記得左「無論有幾新有幾多野冇pop野就唔叫做有新野」之事實)
二手市場交投活躍 - 我講緊我。近來,太多人開倉,噉又一棟。所以,成日話,
「很多。」(「很」字請讀正音)
所以,無論你係想買碟,定還是/特別是有碟放,記得搵我,同埋二樓


10/12/2005 SAT

「作為一個良好員工,我地應要有留時之美德,時時刻刻謹記工作要準時!」
今日我宣佈。因為,老闆二人居然都不在公司,冇皇管的情況,各位同事,自然要謹守崗位、盡忠職守、準時放工。
「所以,我宣佈,各位同事,今日請於十二點九開始執野,一點準時閂燈鎖門落閘,逾時不候後果自負!」
入左黎做咁耐,全公司一路以黎極唔妥呢條戇居仔的同事第一次咁同意佢。

難得今日咁早放,走人再搞多輪野即上皆旺,因為,冇錯,又有新貨:

TRHK Retro

基本上今批貨,就係睇張list,我係全部都要執。不過我未出手,已經有人先過我一鑊過執晒,連我隻DILLINGER ESCAPE PLAN都搶埋(唔使睇樓上,一直以黎都係只訂比我一個d碟一早已經篩晒)。可惜,仲會咁執碟之人,由九龍城時期都仲叫做數到幾個到而家,就只餘二人矣。我係其中一個。
又,基本上今批貨,都唔使預會去得多去得快。睇個list都知。好多,不過全部都太老坑。所以,前幾日/前幾個星期成日問「有冇新貨?」果d朋友,一樣唔會上黎。
「超!都冇symphonic power/CoB/CoF/果隊/果隻碟/(自己填)!仲有冇新貨?」
連metal都有潮流。突然之間,XASTHUR成為05之星,好多人唔知咩黎都走上黎問。過左一排,05之星期變成BETHLEHEM。又係唔知點解,某forum有人提起卦。結果又係勁多人上黎問「有冇BETHELEM」、「有冇dark metal野聽」、「入多dsuicidal black野啦」。Well,我都冇咩好講。我只知道,好耐之前,即係XASTHUR同BETHLEHEM呢兩樣野有人留意之前,我見到呢兩隊band全線碟大大棟棟係度,而冇人要,最後又係鬼佬執晒(好多野,真係只有鬼佬先識執)。到而家,突然間,兩隊變到好潮。而「有性趣症候群」亦由CoB同CoF變成呢兩隊。
「有冇XASTHUR/BETHLEHEM呀?」
「有!」
「有冇佢地呢隻碟?」
「呢隻賣晒,仲有呢幾隻,試唔試下?或者試唔試其他band?」
「...」
(高速閃走)


11/12/2005 SUN

今日上黎,你會見到,有條傻仔瘋狂食餅。果條傻仔係邊個唔使講啦。近日出左龍珠餅乾送卡,隔籬d玩具舖大量入貨,就係為左張卡,拆完拎左張卡,剩番咁多餅乾,自己食都食唔晒,點算?當然係塞晒比我呢個食物焚化爐。結果琴日同今日,全日都係食餅。個個入到黎,都係果句:
「又食!」
又有新貨到,所以,又係節衣縮食時間。除左乞隔籬玩具舖d餅當飯食,屋企都慳番唔少。剛剛過左個禮拜,屋企夜晚唔煮飯,成個禮拜夜晚冇食過飯。食咩?簡單。七記小籠飽而家減緊價十四蚊兩包,琴日執左,一包琴晚晚飯,一包今日晏晝,七蚊一餐。今日晚飯,更簡單,七記之前Oreo餅超減價大條裝九蚊兩排,大量收購,餅乾夠滯半排夠一餐,餓d咪一排一餐,即係最勁果時九蚊可以挨兩日。當然,都未夠當年四個幾生命麵飽挨四餐。錢呢家野,唔係有冇之問題,最主要都要自己慳出黎。要買碟時,我一樣要節衣縮食。但,都係啦,食開免費午餐的各位
「呢個戇鳩仔又係度吠!」
冇計啦。仲同人講「買碟」?不過戇居吧。免費午餐呢家野,食開左就有癮。
「CRYTOPSY出左新碟?唔知呀!我download佢地五隻碟都未聽!應該有隻新碟卦?」
冇計。而家噉先叫型。我地「屋企多碟到唔見碟搵唔到」呢d反而係傻仔。但最型,都唔係呢d。
「IN FLAMES新碟?聽左啦!下年先出,邊等得切?拿!隻野,真係好聽!你地記得入多d啦。信我就實冇死架喇!我聽晒喇!」
呢樣先正嘛!免費午餐唔止免費,仲有野送忝!所以好多朋友食個不亦樂乎(唔知點解,近日網上唔見晒佢地?)。我,就冇所謂。聽下歌仔遮。就好似果位朋友噉,係好型架!但如果係想我同或者TRHK講,你好型,算啦。你型,噉咪型囉。我仲係聽緊JUDAS PRIEST算,亦都係聽JUDAS PRIEST算。未出,咪未出囉。反正出左我都唔急買架啦。又唔係追潮流。我只係聽音樂。
所以,「型」果d,永遠唔會上TRHK。因為知道上親黎,想型都冇得型。因為TRHK只有音樂。

今日咁靜,就預左架喇,今批新貨都唔係新貨,甚至唔係貨。(出貨單後兩日內已經有N個人問過:「幾時(再)有新貨?」)所以成日都覺得好神奇架,你問聽metal果d - 我係指真係聽metal果d - 呢批貨點,相信冇一個會話呢批貨唔正,就算唔係聽呢d野,睇個名,都知道真係執一半都唔會後悔,就係咁經典。但,或者,我地老啦。就好似今日好晏先做成之第一單生意,係「想試新野」d人永遠唔會試之STRAPPING YOUNG LAD隻DVD,而買果個,係點睇都唔似聽呢d野之阿叔黎。我地真係老喇。就好似以前,每當有新貨,唔理係乜,都上黎無聊一番先算,好似果時DEATHGUY一出,
「DEATHGUY,泰國melodic black death?亞洲band要試試喎!」
好多人就係上黎買隻番屋企試試。但到而家,
「LERMAN "Killumiance",泰國melodic black death?亞洲band又點?都唔係邊隊邊隊!」
噉就拜拜。
日頭,好靜。成個晏晝,幾條契弟可以坐足玩足咁耐。往往就係我臨收舖果陣,各位朋友先至出現。但唔緊要。你係肯聽野肯買碟就得。

「真人不露相。」
近排,見到聽到好多野。而呢樣野,就係結論。而呢樣野,可以套在香港metal之任何一方面,包括TRHK、包括band、包括show、包括音樂。TRHK已經唔需要再講。睇番身邊做琴行d朋友,真係越黎越少人學band野玩metal,因為「過左果個熱潮」,本身學緊果d亦一齊潮退或者堅持唔到落去。騷,更加唔使講。好有趣,香港地現象就係,有人話冇騷睇,有騷就冇人睇,本地騷更加係唔會睇。同樣地,好多海外香港人睇本地之forum,同我講,
「香港metal都搞得唔錯喎!」
但駕臨香港後,就知,係兩回事。網上永遠好多人講野好多人好大聲,但當可以支持metal/香港metal果時,卻永遠唔會見人,最簡單例子:band show。其實,去睇騷,已經係最直接支持音樂之方法。Band show同有metal band之band show,亦絕對唔少。但點解,每一場都冇人去?
「都冇我隊band/我個friend隊band/我識dband/外國band/朋友陪,梗係唔去啦!如果我個friend出騷/邊隊band個邊個邊個我識/有朋友陪/有出名外國band而又夠平,我就去睇喇!」
而且,越玩,反而越唔會睇騷,冇自己友出騷,唔睇罷就。或者,場騷越多band我唔識興趣越大之我理解唔到啦。睇band show呢種最直接支持本地音樂之行為,好似真係好艱難好費力先做得到;其他所有野更加唔使多講啦。所以,都係上網好,全不費工夫,同埋做隱士"indie"先型嘛。你唔蒲頭,人地唔知你咩料,你點囂點串點大大聲都得,亦都可以顯得自己
「一早跳出左架沉船啦!睇你/你地班友,呢樣又唔得,果樣又唔掂,唉!我都睇死你地頂唔住捱唔得耐架喇!之不過噉!我又唔想見到你地死!見你地都叫做有d心,我都幾睇好你地想你地捱落去既!噉你地就繼續捱落去唔好放棄啦!」
呢番說話,我聽過N次以上。好型架講果d人真係。而呢番說話,唔止係講TRHK,亦係講成個香港metal scene/band scene,包括band show、包括metal band、包括extreme metal、包括夾band果班。如果你真係咁「型」,係咪出黎扭轉局面會比睇住大家一齊死更有意思、更有型呢?同埋,我希望同樣身在香港的佢地冇比人以同一番說話噉樣講過啦。

TRHK Retro

12/12/2005 MON

今日,又想請假。自從而家睇醫生可以claim番睇醫生錢之後,開始好懶,亦都好健康,因為小小病都要立即探探醫生哥哥休息番日先。做左呢份工之後,真係請多左好Q多病假,我估呢兩三個月病假之數目已經超過上年之總和。所以,冇乜野跟時(好似一路都係),一有病,唔好理咁多,放番日病假先。但當然,會如此想法/如此賤格,唔係得我一個。
「琴晚打完邊爐,又屙又嘔,好病呀!今日我要睇醫生返唔到,你返到公司時記得幫我跟番d野呀!」
噢。一早同事打黎,噉就比人截糊。本來我都想唔返,因為超級 頭痛(真係頭痛架,雖然我都知道狼來了),但,比人捷足先登,喊。好在,晏晝有會計姐姐幫我碗鵝瀨叫加底仲要「加到爆炸」,再斬多十蚊叉燒比我慰藉。但,都彌補唔到我冇得蛇皇一日之心靈創傷。而且,咁少,邊夠食丫。

踏入十二月,捱左頭幾日,開始好得閒。相信我係全港最得閒之marketing。所以我老細甚至我自己一路唔相信我係做緊marketing,因為要得閒到搶埋assistantd野黎做,真正職位係assistant's assistant。今日無聊地摷到份勁野出黎!完全嚇親!

《反恐怖防破壞管理守則》
防恐反恐培訓會議
地點:工廠行政大樓地下五樓秘密會議室
議題:《防疆獨份子滲入工人組織措施研討》

「...對於蓄意破壞工廠生產、擾亂工廠生活秩序的行為,工廠將毫不姑息,給予嚴厲打擊。事態較輕者,說明教育直至開除出廠;事態嚴重者,將扭送公安機關處理。...」

「...對員工的懶散與紀律問題,部門管理人員要進行耐心說服教育,動之以情,曉之以理,批評嚴厲,處罰從輕,緩解矛盾,防止風氣擴大。...」

「大劑啦!你以後唔返得工廠啦!」
冇錯。實在太頹的我一返到去,立即全工廠一齊唔做野,擺到明蓄意破壞工廠生產,跟住就會被人毫不姑息嚴厲打擊,先動之以情曉之以理地進行耐心說服教育(即批評嚴厲處罰從輕地「小你啦!」),再開除出廠然後扭送公安機關處理。所以,以後我都係擾亂香港公司生活秩序算。

放工之後,實在頂唔順。最後,都係早d返屋企。呢兩個禮拜病左,最大得著就係,好耐未享受咁舒服之假期日子。原來,唔開舖、唔理TRHK,真係可以做多好多好多野。理少一個鐘頭,已經可以做多好多、抖多好多。
可惜,而家要噉樣放假,就只有病。


13/12/2005 TUE

今日公司有串珠仔班,因為要「為新產品設計搵新靈感」,就搵左個師奶興趣班導師(即係senior師奶)教全公司所有女同事串珠仔,一串就係成日成班女由十一點幾坐到六點幾,幾乎飯都唔食工都唔放。見佢地成班友真係玩到癲晒。係咪真係咁好玩?我點知呀!我淨係知今日我咁得得閒又唔比我入去一齊學,無聊到要寫呢段段記浪費時間,超!

「係我!」
上到皆旺,梁生第一時間出現。當然,每有新black野,必見呢條茂利蒲頭。再有幾條粉腸同契弟,仲有傳說中之紅毛蒲頭。
「又係你?你唔係去左外國讀書咩?」
「上次返黎你又係噉樣問我喎!」

上次,先係兩個零月左右之前。話去外國讀書,但次次都係唔見一兩個月之後差唔多個個禮拜都見人,上黎仲密過好多好多人,係咪真係走左去外國架你?上到黎,好開心,因為真係可以試足成晚。仲多多件白痴仔(傳說中之阿Don!幾位朋友記唔記得)。今晚玩得好開心。吹吹水,大家知唔知點解外國咁少mp3機款?
「外國dCD,超貴!成廿蚊隻!」
當然係美金。香港人都係買/只會買廿蚊CD,大陸翻版果隻。但,
「去到外國發現好唔同,外國人真係會買CD,所以周街都係discman!行街只會見到兩種人,一係discman,一係ipod,但discman多好多!用ipod都係俾錢download!」
所以,當你成日見到電視英皇仝人每日叫你買一款新mp3機果陣,外國,睬你都傻。因為一係discman,一係ipod。仲要discman多忝。笑爆。亦因為噉,紅毛小朋友唔會買SYL,
「呢d用discman聽,會仆街架喎!」
睇完上面,大家會發現,全TRHK一個「人」都冇。


14/12/2005 WED
大冒險家

好睇。要睇。唔止因為吳鎮宇同黃子華。而係,今晚睇左一集,已經知道《世紀之戰》之後亞視最好睇就係呢套。又有番一套電視劇想從頭追到尾。
可惜,我只可以睇到今晚呢集。


15/12/2005 THU

今日,好唔妥。大家突然間唔鍾意講廣東話。或者因為幾位工廠同事上左黎香港公司。所以今日變左普通話日,大家都唔敢講野,因為大家普通話都屎到爆,聽比人笑。工廠的同事來到香港,亦見識到傳說中的劉Sir是多麼的頹。食完飯之後立即死蛇爛屎地撻係自己個位度,我個位仲要對住門口,即係一入黎,各位工廠同事都可以見到我美妙的睡姿。所以開門的瞬間,大家的口都是O形的,包括嚇醒左的我。大家一場黎到又食晒飯,就切番幾個蘋果宴客親朋,同場加映內宮秘史,有會計部靚女飾演宮女甲,我當然係飾演皇帝,30度角攤係張龍椅(即係殘廢凳)上面,開口
「呀∼∼∼」
官女就會將蘋果送入口中。見狀的各位工廠同事個口形狀同大細同我等食蘋果時一模一樣。之後,更加唔使提。國內同胞絕對唔相信,有人可以噉樣「返工」。
「Lao3 ban3!Qing3 nin2 yi3 hou4 bu3 yao4 pi1 zhun3 zhe4 feng1 zi shang3 lai2 wo3 men gong1 chang3!Qian1 wan4 bu4 yao4!Za2 men qiu2 qiu2 nin2!」(詳情請參考12月12日《反恐怖防破壞管理守則》)


"This place is a fantasy!"

今晚,冇咩特別。除左呢句。有兩個鬼佬入左黎之後大叫上面呢句,玩左好耐,好fantastic地走人。(呢度,)真係fantasy。


16/12/2005 FRI

好開心可以躝街。今日要做苦力運辦,一大車野推去奧運站之後再推一大車野返公司。途經母校大天,再經教院towncenter,見到好多人。大家睇見風流一時的劉Sir而家要推車仔維生,不禁感到十分欣慰:
「嘿!你都有今日喇!聽metal丫喇!」(後面果句好明顯係作)(「後面果句作,即係前面果句真啦!你都有今日喇!」)

朝早好開心,lunch仲開心:
「嘩!今日呢間快餐店ABCDEFG餐都咁正,點算?」
「我地每人叫一個,再每人分半盒比你,噉咪得囉!」

真係肥到仆街。

食埋飯,繼續食(有野食,劉Sir就唔會停),繼續做皇帝(請參考琴日),亦,繼續做野。好唔開心,因為好耐未試過咁充實。我都係慣左做頹霸marketing。

夜晚,好靜。連續三位朋友入黎吹水,走左一個到另一個。噉就一晚。好靜。聽埋FARMAKON(相隔上一次認真聽差唔多兩年喇)同EPHEL DUATH最新兩隻先走,結論係,都係硬膠好。你問我,我寧要戇居,唔要型。聽下歌仔遮,開心咪得,搞咁多做乜?

就係咁短。而家d生活同時間,就係噉樣越黎越短,同越黎越唔知做乜。

「今晚十點半至十一點左右,我沖緊涼果陣,有位仁兄打電話比我,係我老豆接左。呢位朋友係邊個?見字速用所有方法搵我,急,快!」


17/12/2005 SAT

非常準時地放工今日,因為部電腦死死地都係要拎去整,臨到一點部機比人抬走左,冇機用,點算?唯有早d放工啦唉有乜辦法。(......)所以皆旺好早見到我蒲頭。十二月,預左,會好靜。正如我,都唔想開舖;唔出街應節,都死返屋企訓覺抖抖好過。有一pair上黎,女果個第一件事係睇DARKTHRONE(呢樣野已經唔係點樣神奇,而家好多女性都會留意/聽DARKTHRONE,數目甚至比男性更多),男果個係
「唔該,請問有冇BIOMECHANICAL HUMEN?」
「...呢隻!」
「唔係!我係搵THE CHEMICAL ROMANCE!」

初初聽佢講個band名真係完全聽唔明。等我仲咁開心以為真係/終於有人上黎搵BIOMECHANICAL。今日,有傻仔,又有doom小妹妹,仲有上黎搵SLAYER小妹妹的glam小妹妹,但少左d無聊路人甲mosh,靜加悶。所以,今日可以安心地聽左幾隻碟、寫番兩三篇碟評。似好事,但係壞事。

好好好靜。夜晚睇完戲的Rock爺上黎,先有d野笑。
「睇咩戲?」
「韓農勇戰特區猛警!」

冇錯!非常好睇!話說今日灣仔遊行,有班韓農兜路行軒尼詩道,警方本身都冇預到佢地會行果度所以得幾隻鐵馬加幾個輕裝警察係度駐守,自然唔夠抽。當時一班韓農係噉撞鐵馬,班警察係後面頂住,突然成班農民一齊縮,再彈條友出黎拎住個滅火筒噴足成條街,成班差佬盾牌又冇面罩都冇搞到比人噴到係噉走,逃走沿途不住爆粗:
「屌你老母丫!條撚樣噴鳩我!」(為表傳神只好不作刪減)
旁邊當然有大群鍾意襯熱鬧的香港人圍觀睇戲,我地Rock爺當然係表表者。香港人見到特區猛警被韓農之奇策攻到節節敗退,反應係點?
「噴得好!」
「抵X死!」
「早就應該噴啦!」
「哈哈哈哈哈哈哈哈哈哈哈哈哈哈哈哈哈!」

冇錯,笑得最大聲果個就係我地Rock爺。為免比特區猛警點相逮捕秘密審判再以「蔑視中央」罪名即時處決,立即過海走過黎旺角皆旺避避。
「好在早走,走左之後連灣仔都封埋,地鐵唔落得海底隧道又封埋,果時想走都冇得走!」
Rock爺個老細都算唔話得,為左各位同事朝早唔使舟車勞頓夜晚屋企都冇得返,索性連放幾日假,普天同慶。
「咁正!幾時開始放假?」
「十四號已經早放半日啦!之後就放假喇!」
「咁正!放到幾時?」
「起碼下星期一啦!」
「咁正!我係你就一早睇定旅行團買定機票,十四號晏晝上機,之後玩番四日三夜星期日晚返黎,返到黎星期一都仲有得抖多日呀!爽呀!」

夜晚十分靜,又係吹水時間。原來而家打鼓機已經出到V8(即係咩?我都唔知),我呢d實在已經out晒喇,因為我呢d仲係玩緊二代,好懷念當年九龍城三蚊五首仲要超低難度唔cut歌。對我地呢d老野黎講,四代已經係最後一個高峰,最好玩就係二代,因為果時大半都係band野,有jazz有rock有punk有pop rock有hard rock有metal有民族野電子野都有,我仍然非常鍾意玩十分白痴但好過癮的"Ska Ska No. 1"。最起初得三首果時,玩"Welcome to the Jungle"、"Mr. Machine"同"Double Orbit"三首就可以變成"heavy metal medley",勁開心(果時我仲要未開始聽metal忝,哈哈哈)。但最正當然係"Jet World",同後來四代鼓先有得玩之"Fire"。第三代實在冇癮,太多j-pop同j-rock,唔好聽之餘d鼓又唔好玩,到第四代正d,多番d西式band歌仲有長版歌,呢隻果時怒煲到仆街,仲為左有出街機同冇出街機d長版歌,第一到四代soundtrack都買齊晒。但之後已經收皮矣。因為到第五代,又係J之世界。好冇癮。而家,原來仲要玩到SONATA ARCTICA、DEP、MASTODON忝,睇黎Konami班友作完"Daydream"同"The Least 100 Seconds"之後(呢首個長版"The Least 333 Seconds"好正),知道自己點作都唔夠屈同唔夠癲架喇,直接搵Relapsed癲佬d野仲好啦("Panasonic Youth"哈哈哈)。不過,算啦。我都只係一個膚淺的old-school傻仔。
「唔得!我要打機!我聽朝要出去搵部四代狂煲!」
好耐未試過咁雄心壯志。返到屋企都第一時間摷番一至四代soundtrack出黎聽(果時連跌舞機soundtrack都有,雖然而家聽番唔算太鍾意,但Konami自己作ddisco歌其實好好好正)。可惜,摷唔到,因為實在多碟得恐怖,亂咁搬我驚成棟幾百隻一鑊過水銀瀉地。灰。(我仍然自卑於只可以話自己「有千幾二千隻CD太X多」而唔可以話自己「有唔知幾多激MP3太X多」,灰)


最後,送多一段閒談:
「Hello!隻碟出左半年,我想問賣成點呀?」
「香港賣左好少,不過外國幾好!而家好多label開始搵!」
「嗯...」
「冇辦法啦!你d音樂,起碼過多五六年,先會多番d人識聽!」
「噉又係!哈哈!」
「好似Earache當初都考慮簽你地,但後來唔知點解放棄左,佢地而家都有少少後悔!歐洲同美國而家開始多人接受到你地d音樂,加埋而家dlabel肯入你地隻碟,下年應該會多番d人留意你地!」
「好!我盡力試試,睇下年可唔可以出到第二隻碟啦!」

講完。兩個角色,一個,係佢地。另一個,係佢地



18/12/2005 SUN

「我要打機!!!!!!」
琴日大大聲。結果?唔使講啦大家都估到。其實九點幾起左身,但玩左陣狗,
「唉,星期日,冇理由咁早起身丫,比雷劈架!」
又訓。十點幾又彈起,又訓過;十一點幾收到電話:
「冇左喇部鼓機四代!唔使黎喇!」
噢。慳番。繼續訓。但想訓都冇得訓。今朝唔知點解咁Q多閒人係噉打電話黎,訓一陣就比人嘈番起身。難得星期日又冇機打,比我訓下啦頂!不過噉樣半睡半醒都幾舒服,萬幾張被兜頭笠再用幾萬個枕頭活埋,然後無限replay王菀之新碟(《雷電》:canto pop single of the year),一大樂事也。

起身之後撻番低,想訓覺果時又不斷比人嘈醒,想訓都冇得訓。都係上舖頭算。開左咁多年,十二月一向係好極端之一個月,一係超多生意,一係冇生意,今年好遺憾係屬於後者。所以今日有位靚女可以上黎玩足兩個鐘,不斷不斷不斷地試。可惜,都係冇心水。
「我成日都去芒記架!不過果度又冇得試聽,行耐少少又比人啤,但我都會去果度買架!邊似得你地呢度噉樣有得試聽咁多丫!」
冇錯。呢樣野,係好多人都話TRHK比其他CD舖好之地方。但,又因為噉,TRHK永遠做唔大同比人鬧。
「噉樣比人試,邊有人買野丫!你地唔比人試聽封實晒咪得囉!到時冇得聽,d人睇封面就會買!」
冇錯。起碼封實的話,呢位姐姐今日之購物時間會短十甚至二十倍,亦一定會買野。呢樣野,阿靚女都承認。事實證明,用良心做生意,聽食屎,尤其是在99%人唔會去諗只識得嘈之香港。

見得閒,有時間睇睇《獨立音樂》。難得有番本音樂雜誌,睇路向同文筆,我相信呢本可以捱到一段唔短之時間。睇睇下,咦,原來第一期假音人有用到我段記喎,呵呵∼

夜晚,反正冇人,不如早少少收舖出九龍城打機,圓番朝早個夢。黎到重點唔係打鼓機(我已經out晒喇),而係六百合一。我最後打果時仲係三百合一,而家已經跳左一倍,老喇真係。最開心係部無聊機兩蚊三個credit,超抵玩,所以已經唔玩AVP,呢隻一個credit都爆機啦,用呢部機玩呢隻反而蝕呀!立即煲番d舊game,"Punisher"雙打十蚊唔使就爆左,而家玩番,原來呢隻game好易玩,差唔多全部大佬都有得屈,成隻game半個鐘就玩完,原來都唔係幾夠癮。想當年兒童場(傳奇的ET)雙打廿蚊(係每人,灰)先爆到,但果時個ending唔同,今次打番另一個ending出黎,都叫做滿足番自己。下次要爆埋Capcom隻恐龍機同Captain Commando(當年,Capcom實在太輝煌了),仲有小學時期之忍者龜。仲有Rock爺極力推薦的Konami cult action game "Vendetta",果然超cult,其實介面幾差加難度幾低,就係正在夠戇夠cult!下次一定要煲爆呢隻!仲有紅白機隻成龍,我唔係玩,我係負責企係側邊睇住Rock爺戇狗狗係噉中飛刀然後笑到仆街再叫埋隔籬鄰舍一齊黎笑果個。噢,令人緬懷的八十年代與九十年代初∼
玩完,當然要玩鼓機。唔算新架喇呢度,但係對住部六代,已經唔識玩喇,都係玩番二三代d舊歌算。但實在太多pop歌少左好多band野,雖然三蚊三首仲可以全部長歌,但冇乜心機玩喇,長歌都冇"Depend on Me"、"Jet World"、"Fire"同"Primal Soul"!唉!老矣。仍然搵緊有冇機舖有四代,就係為左呢幾首。
好好好耐未試過噉樣放低metal做其他野。因為,實在太/太多音樂。


Weekly Reviews:

  1. BIOMECHANICAL - The Empires of the Worlds
  2. SCENT OF DEATH - Woven in the Book of Hate
  3. VIPERINE - The Predator Awakens
More reviews here


因公務關係,
TRHK將於本週五23/12休息一天,
不便之處,敬請原諒!
TRHK wish you a metal christmas!


19/12/2005 MON

又一個禮拜,噉又要返工,但是日朝早好XN咁得閒,因為壞下壞下部機上星期六部腦搬走左,按照整機佬之傳統冇今日lunch都唔會返到黎,所以,朝早好多野做,例如扮去廁所查實係走左去行樓梯、對住疊字好似睇緊野其實係聽緊歌、走入pantry食生果同摷雪櫃,同埋匿入倉訓覺。實在好忙。
「老闆娘!有冇唔使用電腦既野做呀?」
「噉呀...阿姐!你洗左廁所未?」

到食飯加食埋飯,部機終於黎到喇!但機到左仲要搞左一大輪set野,呢段時間就扮同整機佬溝通實質係兩條友無聊吹水黎偷懶。大家研究兒時最愛遊戲玩波波紙,佢仍然係old-school地用手一粒粒整爆,我就new-schoold,progressive得黎又brutal左少少,就係放張波波紙落地下,然後坐住張殘廢凳一野grind過去,噉就會爆爆爆爆爆爆爆爆爆爆爆爆爆得好開心。
「...咁得暴力架!我都係鍾意用手。用凳得聲,冇左果種手感同感覺!」
「係我呢d傻仔一味要夠brutal遮!」

晏晝,仍然係咁得閒,其實只有一樣野做,就係等鬼佬電話。而家全公司都當得我一個識英文噉款,逢有鬼佬電話都係搵我搞掂。點知又撞正一隻長氣鬼,連傾成大半個鐘長途電話,等到七點先至搞掂走得人。之後上陣堂,都係算啦,食飯要緊。
「梗係啦劉Sir!書呢d野,可以遲d讀既遮!呢d野劉Sir教架嘛!」
果然明師出高徒,一睇就知係我d學生。有得打邊爐當然仆到黎,好耐未打過喇。
「咦?Paul Lam,瘦左喎!」
「上次你噉樣食法,乜都瘦啦!」
(詳情請參閱樓上27/11段記)
上次之後,大家都明白到,同劉Sir食飯,千祈千祈一定只可以食任點任食自助餐,唔係就好似Paul Lam噉,有陰影到Doctor都唔敢讀。不過我懶理最緊要有得食,當然要有無限之肥牛同烏冬溝粉絲!此二乃人間極品也!確係好食,但個麻辣火鍋確係好辣,我都係食其他打邊爐d假辣沙嗲湯底算,而且實在超貴,一百五十蚊一個!一半價錢已經夠我到福星喇唉果度仲要有得食有得燒忝!好在,
「等我黎!我包!」
呢個我理所當然唔係我,大家都知厚顏無恥的劉Sir每每食飽飯就即走,最多臨走前食多個甜品,點會咁好死?對住呢位同學,劉Sir不禁爆句:
「一個人包千幾蚊!嘿!威喇!勁喇!有毛有翼喇!識飛喇而家!哼!下次再飛果陣,記得搵埋我喎!」


20/12/2005 TUE

或者老細已經送左聖誕禮物比我,真係從未試過可以咁咁咁得閒,成個月尾,忙果陣係好忙,但更多時間,係等放工。所以今日又係無聊地狂send email。見到有間公司叫Emo(相信都同傳說中之Emo Records一樣,全間野只有個名emo);有個俄羅斯人姓Slutskiy,email ID個短寫,就係sluts;有間公司叫Pearlfrost,肯定係black metal band黎。成日就係噉樣,一面聽王菀之新碟(今日公司已經怒煲左最少五次),一面浪費時間。呢d返工等放工之工作就最適合我。

夜晚,不用多提。我今晚可以完整地聽左好多隻碟。因為基本上只有一位客人上黎買野,一執就幾隻old-school classic(永遠的不解之謎:classic野,反而永遠冇人要,照計係聽野都會識貨喎),同埋家樂兄(僅餘無幾仍然會耐唔耐上黎「見悶咪買d碟返屋企聽聽囉!」之聽歌非聽名人士)。臨近聖誕,冇生意已經預左,因為逢到節日,大家都都要去玩。多數人有錢都係用晒去其他地方之後,有剩,先會搵音樂;我地呢d,一有錢乜叉都唔理買碟先,到時有剩咪儲埋下個月再黎過,冇剩咪慳d使食少餐囉,冇錢出街玩,咪唔出囉,總之乜叉都係碟為先。
同樣地,呢d說話,講黎都side9氣,在這download年代。


21/12/2005 WED

今日前半,好開心。因為噉就聖誕party。十點幾開完會,做左陣野就走人,因為
「今日開party,好多野食要拎,點算?」
「唔緊要!有我!」

得閒夾懶的我超踴躍地主動要求去拎野。
「都知你條衰仔想偷懶架喇!嘿!廢事對住你眼冤,今次就放你一馬!」
會計靚女加阿姐仲有襯墟的我三條友由大角咀行到去尚書坊對面間大快活,點知幾個字行到去之後
「一早送左去你地公司啦傻仔!」
打個電話返去,係喎,我地前腳入電梯,外賣仔後腳就到。極度唔合皮,立即屈得就屈:
「喂!我同事話盒咖哩雞d咖哩汁倒到通地都係喎!又話送餐具點知冇送!仲有呀!咩咩咩咩咩咩咩咩咩咩呀!大鑊喇你嘿嘿嘿嘿嘿嘿嘿嘿嘿嘿!」
招呼我地個妹妹仔立即
「唔好嚇我啦嗚嗚嗚嗚嗚嗚嗚嗚嗚嗚嗚嗚嗚嗚嗚!最多請番你地飲杯汽水啦!唔好嬲啦!唔好嚇我啦嗚嗚嗚嗚嗚嗚嗚嗚嗚嗚嗚嗚嗚嗚嗚∼」
千山萬水行到黎,就係為拎杯汽水仔飲,都好!吞pop仲要有野飲,正!
「喂!賠咁少?起碼賠多半打咖哩角黎啦!」
成九盆野十分十分地多野食,正!!!有同事投訴:
「都係你衰啦!你入左黎做之後,我一個月肥左四磅呀!」
「餐餐我都扮你食半盒飯,肥都係我啦,有乜理由肥呀你?」
「你成日係度摷野食,見到你食我地又要一齊摷野食,唔食飯都食肥啦!」

就好似今次噉,唔係因為我入左黎做,係唔會叫咁多野食。噉唯有好心地幫各位同事清左好多雞翼加半兜薯蓉加半兜肉醬意(超正!),可惜唔夠咖哩角!此乃本聖誕一大遺憾也!所以好唔開心!
「老闆!為左各位的身形著想,我決定引疚辭職!」
辭職之前,當然仲要抽埋獎先。首先係各位同事捐獻出黎之禮物,我果份係乜?有冇落七記?Edo新出果隻百力支做緊推廣十蚊三盒,平得黎仲要超好食,即掃番十幾盒,棟埋一棟再用尼龍繩紮住。同事睇到,見者無不
「*@#&%XYZ!」
不過,佢地就想。咁正之禮物,係送比我自己。送出黎抽獎果份係咩?精彩喇!真正果份,係行過dN蚊店見到平即執一大堆之暖蛋加發熱包,見唔算貴個盒又大,就買左好鬼多將到個盒塞爆炸(自從食燒味飯叫間野幫我個瀨粉「加到爆炸」之後,而家好多野都鍾意爆炸),收到果位朋友真係夠暖足成年。完全唔札使,見者無不
「*@#&%XYZ!」
之後就到壓軸節目:公司大獎。咩黎?
「頭獎:一個月四萬五,免供強積金,十五個月糧,即時分紅六十萬,一星期返五日,每日朝十一晚三,包早餐午膳下午茶,加送年假六十日!」
正!不過得主內定左係老闆自己,頒獎嘉賓係老闆娘。挑。好在剩番果d都唔差。我呢世仔都未行過抽獎運,除左小學三年級聖誕聯歡會成功地抽到一個全班連班主任都極唔想要抽到都掟落垃圾桶之超恐醜陋洋娃娃(刁,諗起都想爆粗,衰在當年細個唔使爆小狗抽籤個先生),除左人人有份果d之外真係廿幾年都未試過抽獎抽中我,最仆街果次試過有次抽獎一到三十號每人抽三個號數,理論上點都有三份一機會拎一份禮物卦,結果全場得我一個冇禮物,刁!到今日,終於到我喇!第一份大獎就係我!Panasonic最新512M MP3 Player!等左廿幾年喇我!好很感動!嗚嗚嗚嗚嗚嗚嗚嗚!!!但!天都註定我冇運行!因為第二份禮物係老細特別搜購番黎之鬚刨乙個,本來係冇呢份,不過老細話
「睇你條衰仔成日唔剃鬚,呢份特別買比你架!」
所以各位同好不滿,因為搞到少左份禮物,呢d豬頭骨又冇人肯要(包括我),所以會計姐姐抽到之後,第一件事就係搶左我部MP3機塞番部鬚刨比我。剛剛以為iPod Nano都唔使買可以立即換機慳番筆的我唯有
「X*#@*Y%!」
昨天的孽,造成今天的果,灰。但你覺得特登買個鬚刨比「窮到連鬚刨都冇錢買」的我(其實唔係冇,係我懶用鬚刨遮),等佢唔會影響市容。真係有用咩?會用!當然會用。但剃鬚依然係逢星期日晚臨訓前先剃,即係依然係一星期一次,不過以前係逢星期日晚用剃鬚刀剃鬚,今個禮拜起逢星期日晚用鬚刨刨鬚。所以老細都好鬼後悔特登為呢條友買呢部野。而我亦都居然有少少後悔唔朝朝早剃鬚,搞到而家唔見左部MP3機。所以,我同老細兩個人係度互小。
「*@#&%XYZ!」
食完飯抽完獎,兩點就走人,仲有大兜咖哩雞飯拎返屋企。有得食有得拎,完美的半天。


之後半天,沒有意思。

這個小時是白坐的。




跟著,也沒有必要和意義寫下去。



25/12/2005 SUN

TRHK wish you a METAL CHRISTMAS