一個不再特別的特別日子。

偶爾都聽到有人話，劉Sir講一套做一套，乜音樂都聽又要成日針對某ｄ音樂／音樂單位，例如metalcore。我冇唔妥metalcore，亦冇唔妥任何一支本地／海外metalcore樂隊，亦冇唔妥過任何聽metalcore人士。我只係唔妥好似以上提及果ｄ「潮」人。見到太多人，起初係「聽metal」，跟住係「聽metal band」，然後係「聽最新果ｄmetal」，metalcore盛行之後
「Metal仲有咩好聽呀？我聽metalcore啦而家咁hit又人人都聽！」
就算聽metal都係
「呢隊？都唔識！身邊又冇人聽呢隊，梗係聽呢隊啦呢隊出名呀多人聽又有新碟出！」
我只係唔妥呢ｄ潮人。對感到無故遭單打者，本人深感歉意。

是日戇居一
「我想搵ｄband似ＸＸＸ，有冇呀？」
「有，試試呢隊、呢隊、呢隊同埋呢隊啦。」
「．．．點解好似隊隊都係麻麻地噉？或者比我試ｄ似ＹＹＹ既band啦。」
「都有，聽聽果隊、果隊、果隊同埋果隊啦。」
「．．．都係聽極都係麻麻地喎！點解好似隊隊都冇ＸＸＸ同ＹＹＹ咁好聽？」
「其實音樂冇乜野，最麻麻地在隊band個名唔係ＸＸＸ同ＹＹＹ。」

是日戇居二
「因為E神fans關係，佢星期六一出左隻EP，我就即刻去買喇，不過買左番黎，我都唔知要隻碟黎做咩，因為我已經無聽CD好耐，成日都係聽MP3ｄ歌，我又唔識將隻CDｄ歌拉入電腦度，而家我都係BT左佢隻EPｄ歌入到電話黎聽咋。最後都要BTｄ歌，真係有ｄ無奈．．．」

是日戇居三
Kit Kats are delicious, and this is what I am reviewing. I am reviewing the normal Kit Kat. This is the one with 4 sticks. You can also buy a Kit Kat Chunky and Kit Kat Cubes. Made by Nestle, You cannot resist a Kit Kat. Well, there I go I ripped open the packet by me and took a stick and ate it. I couldn't resist, and that is why I am going to write this review now so I can finish my Kit Kat. I hope you enjoy my review.

今日早餐食左個餐蛋治晏晝食左一個半飯盒加半碗米粉仲有蘿蔔糕然後清全盒食成袋糖又有蘋果食仲有幾包薯片做下午茶之後成件西多唔少得返到屋企仲有碗牛腩河等緊死今日條腰肥左足足三寸忝多謝大家！

真大劑。今日又有客上黎公司，留得係度食lunch當然要叫番ｄpizza宴客，最開心果個當然係我，因為實有食淨送比我執。結果今日晏晝除左食個茶餐，仲有多個pizza hut豬扒飯加兩件薄餅仲有其他多不勝數的雜食。基本上而家每日返工係最少食兩餐，如果果日會食早餐三餐，有下午茶的話四餐，連全盒食淨ｄ糖呀雪櫃食淨ｄ野呀同事度搶番黎ｄ零食呀，五六七八餐都有。
「冇人叫你食喎！你可以唔食架！」
「有張一千蚊紙跌係你前面，你執唔執？有著數有乜理由唔拎呀！」

今日係廁所都冇得去。到左唔夠三個字已經有人上到黎，之後到收舖都總有兩三隻野係度聽野。有SC雙A（星期日佢地會出蒲窩同R.A.M.B.O.出騷呀免費架，R.A.M.B.O.超正！上次睇唔到只有得睇VCD係超大遺憾！），見得佢兩個都知道，一般野係滿足唔到佢地，好在都仲有ｄ無聊野，最後執左EPHEL DUATH同DESPERADOS（全靠BloodKrishna，大家先有呢ｄ無聊野聽！）。跟住繼續聽聽聽同吹吹吹，成十一點先走得人。多人到，ｄ新貨我都懶上架。
「噉生意咪好好囉？」
又唔係。同「理想」相比，呢個平日係差左。
同埋我等緊成日要搵old-school thrash的大班朋友出現。
亦想知道，DARK ANGEL會唔會只有"Darkness Descends"賣得出（也是SLAYER只有"Reign in Blood"賣得出的道理），同埋有冇人會買FORBIDDEN。希望唔會估中。

朝早，好開心，因為唔使做。梗係啦，朝早出左去冇留係公司，做乜春？五月公司過美國搞展覽，今朝要上貿易發展局抽籤揀攤位，如此重任，當然／自然／居然係我呢ｄ雜卒仔做。
「拿！咪話老細成日唔俾著數你！今次抽籤你去，比你見識下大場面啦！」
「嘩！老細！美國展覽咁大件事，如果我抽籤抽禍左，點算呀？」
「搞到咁大劑，梗係即刻炒你啦！」
「好呀好呀！我好耐冇放過假喇！」
所以今朝特登早ｄ返公司搵老細傾傾。話早ｄ，真係「ｄ」，只係比平時九點三早一個字九點二返到，但係足足早左四個字出門口。平日八點半甚至八點七起身係搭九點鐘班車，八點七出門口都係要企係度等到九點鐘班車先有位上，所以我永遠唔會早出門口，點早都係戇居。反正早晚都係要等，訓多幾個字好過。返到公司又係無聊，其實同老細吹兩句咁大把之後拎埋ｄ文件野已經走人，見要上貿發局咁大件事今日隆重其事著晒成套西，但黎到發現，真係戇居。其實得四間公司抽籤，另外三個代表兩個師奶一個姐姐仔都著到去旺角行街噉款，早知我都求祈笠件OPETH算鬼數，MKｄ襯番佢地嘛。黎到，又係超頹，抽籤跟公司字母抽先後次序再揀攤位，四間我排最後，所以從頭到尾我都唔使郁。當其他兩個師奶加個姐姐仔摩拳擦掌非常緊張諗住一定要抽到第一果時，
「唔好意思！你地個個搏命抽ｄ二呀三呀四呀，抽淨張第一比我忝！多謝晒各位靚女！」
就係噉，係乜都唔使做得個坐字的情況下，劉Sir一唔覺意就抽左全場最靚果個位。比一位著老西的頹廢青年搶左頭位，其他幾位公司代表十分地唔滿意，為左可以安全返到公司，唯有叫實Ｑ押我落樓，即係唔小心比人打傷左返唔到工又要放日假就無謂啦！
「拿！老細！我幾經辛苦搏埋條命幫你抽左個靚頭位喎！（．．．）點計先呢舖！」
「好！將功報過！就唔炒你住啦！」
「下？獎我即炒得唔得呀？我要放假！！！！！」
出差我就最開心，過灣仔差唔多一個鐘，返黎又差唔多一個鐘，來回各一次SENTENCED "The Funeral Album"。你唔鍾意又好鬧佢地pop又好，我非常鍾意。多ｄ快歌會更好，但呢隻真係點聽都咁開心。（應該聽到唔開心先正確呢隻碟）

夜晚有一班ABC（或者叫做竹昇）入黎，吹水都係LAMB OF GOD之類。之後有一個想買隻HYPOCRISY新碟。循例，劉Sir都會講講TRHK折扣優惠。聽完之後，果位朋友即時唔買，
「冇得平，下次先啦！」
下次會係幾時？從佢地之談話內容同以往經驗，相信超過99%機會唔會再見，即係冇下次。或者好似某ｄ商戶，講錯野唔更正，有著數都唔講比客人知，果位客人就會開心地買，TRHK亦即時袋袋平安。或者你話，
「唔係卦！使唔使講到賣一隻碟都要又呃又暪先賣到呀！」
如果你知道賣到一隻碟，已經可以係全日生意額10%，而呢ｄ可以提供一日入面10%生意額的客人只會出現一次以後唔會再見到，就知道有良心坦白對客人的代價。即係昆左佢佢都唔會知，但係噉都唔昆，這就是忠忠直直終需乞食的道理。呢個情況亦唔係罕見，自從有呢個兩隻九五三隻八五之後，有ｄ客人特別係本身已經唔肯試新野果ｄ的確係接近永遠唔會買到碟。幾經辛苦搵到一隻，但
「得一隻，都冇折！等我下次上黎搵夠三隻再買啦！」
到經過幾次「下次」，好彩的話，終於有一次搵齊三隻，但果一次通常都係
「而家先有三隻，我都冇晒錢買啦！我淨係夠錢買一隻，但係買一隻又冇得平，唔買啦！」
到有錢果時，通常ｄ碟已經賣晒變到又淨番一隻。亦即係返番起點不斷循環，永遠都買唔到碟，亦即係TRHK擺左一批固定死貨係度去唔到入唔番新野。服務好只會寵壞客人，係香港做sales，都係乜叉著數都唔留比客人加用最囂張串咀地對ｄ客先係正確，因為噉樣賣得仲多，例如多到可以搞騷。

今晚上黎皆旺的各位，除可以見到劉Sir飲樣一個，仲可以見到，好多CD。噢。實在是太多了。但仲未夠。

「今個月入左咁多批貨，但係，搞錯呀！又冇
得得得得得。我知你要乜。所以，

成個月七批貨，入到而家，乜野都有晒，你要pop又有大路又有indie又有underground又有power女聲gothic brutal death black doom乜都齊晒，連CHILDREN OF BODOM新碟＆OPETH新碟加舊碟＆DRGONFORCE新碟同GORGOROTH都有，夠理由邀請各位上黎TRHK未？

今日你又係見到劉Sir飲樣一個。上普通話堂上左半年今日考試，即係普通話呢家野由細到學到大而家足足廿年都未識得講（好自豪我係一個典型香港人），　睇琴日晏晝《重型音樂》個編輯上黎買碟講到成劈屎噉連北京人都要
「你都係收皮算啦我識講廣東話架其實！」
已經知道死得架喇，琴日執左成日碟仲要整單DRAGONFORCE新碟，都未溫書已經支力到訓著，今朝仲要七點起身過香港考試，所以，死左架喇。
"Putonghua? Gong gong don wah suen la diu!"
都冇乜要求合格就算，我都只係志在拎番個持續進修基金，但仲要考多個公開試先得，超灰。（難得見到劉Sir都會咁有決心去學野呢？各位同學應該好好學習劉Sir這個榜樣）

今日算係非常好彩，考試抽到籤考第一組仲要係第一個，趕得切開舖之餘仲可以食個飯先。難得Henry兄同冷爺兩件閒人出黎旺角食飯（好明顯係難得女方肯放人的罕有自由日子），再夾硬屈埋拎貨落黎的Soni，搞掂。噉樣開餐法，真係幾年未試過喇。而家個個都有拖拍。但，唔關我事啦。我有拖拍的話，事實會係，你地最少會少一半metal野聽。
黎緊三月，會相當精彩，唔止係到貨方面（雖然，如果大家繼續噉樣支持落去，保持每星期一批新貨唔會係難事），仲有黎緊TRHK三隊band，當中一隊VEDONIST，波蘭technical brutal thrash death，完全精彩。當然，呢個只係開頭。呢ｄ都唔係咩秘密，有興趣上上TRHK官網個睇睇Label News，就知道發生咩事。一路以黎狂多band有demo聽，一路都有試，但今日有機會大家見面先可以完整地試聽埋個聲，外國實在係太多band戇ＸＸ地一Ｘ流。更戇ＸＸ地，呢ｄband正成噉，居然都冇人簽佢地搵label幫出碟要搵足成年。噉就益晒TRHK。黎緊三月，TRHK又彈多三隊，大家又可以聽多ｄ野。或者你覺得TRHK搞darkwave入darkwave係戇居（呢樣野有ｄ朋友最鍾意講架啦），或者你覺得TRHK簽REQUIEM AETERNAM或者其他所有TRHK band任何一隊係笨七，但，冇所謂啦。好多香港人覺得戇居的，外國係相反地非常之渴求。香港地睇TRHK同其他國家睇TRHK，係兩個完全唔同睇法黎，正如外國人聽／搵／睇metal同香港人聽／搵／睇metal完全係兩回事，REQUIEM AETERNAM香港人當係戇居，外國人一聽一睇，已經知道唔需要講咁多，可以即刻執。所以好多時有ｄband點睇都唔會冇人要但居然真係可以成棟放係度問都冇人問，就是這個道理。

今個月，黎到呢度，成七批貨，當然啦，可以的話，都會keep住逢星期六有貨到之進度。
「嘩！做乜咁多貨？」
呢句開始成日聽到。噉係好現象，因為以前果句係
「嘩！做乜咁少貨／唔入貨？」
亦係「舊貨唔去、新貨唔黎」的道理。你係肯俾錢買碟肯試新野，一個人買多ｄ，就可以入多幾隻碟；大家一齊買多ｄ，就可以入多幾水碟，就好似呢個二月噉。生意呢家野，就係咁簡單。
呢七批貨，最大得著係，再一次印證香港朋友搵碟係難以理喻。到而家都唔明白，為何冇貨果時係大大聲堅定不移係噉嗌「我要呢隻呢隻我一定要！」而到左貨上到黎之後係一臉狐疑地問「我係想要但可唔可以比我試聽下先呀？」抵死在，試聽完之後有九成機會係唔會要。呢個情況，連old-school thrash呢樣時下最潮人人話要的玩意都發生。為何？乜唔係自己一早上網睇定晒資料搵定晒試聽做定晒決定先會講「呢隻碟我實要」架咩？
另一難於理喻，係玩音樂同聽音樂的心態。好多人「想搵metal」，但入到黎摷一大輪搵唔到野買走人，一年之前係噉，算係正常。但到今時今日呢個二月尾七批貨到左，而係話「上黎買metal碟」都可以一隻都買唔到，就好似話上黎TRHK買最少一隻black metal而對住成個black metal架過百隻地下又有大路野又有仲係一隻都揀唔到 － 當然，「冇我聽開果隊bandｄ野或者果隻碟唔要」或者「冇呢隊band我即走」就另計啦。呢個現象，越係玩band，越常出現。也是本地90%結他手心目中只有某幾個結他手同某幾隊tech/prog band的道理。Extreme Metal呢家野，反而唔玩樂器更易開放接受，因為呢種音樂唔係聽樂器，係聽整體。（唔知會唔會有一日，香港聽果班之音樂要求去到比玩果班之音樂要求更高之水平，迫番香港band開明進步？）又或者，真係有碟放正係面前要俾錢買果時，的確係好痛苦好心酸。每次見到有客人拎住「等左好耐好想好想要」果隻碟但掙扎一輪都係放番低再頭也不回地閃出舖頭，我完全感同身受得到。
同埋，越黎越鍾意唔需要劉Sir服待自己搵碟的客人。又唔使劉Sir介紹，又唔使劉Sir試，噉就最好，你開心ｄ我又可以做少ｄ。只不過，唔好跟住又出去話「劉Sir點點點」就好。即係成日聽番黎ｄ傳言好有趣，個客上到黎問佢「想要ｄ乜／想試ｄ乜」，會比人話煩住晒；個客上到黎唔問佢野唔開口，又話唔出聲串。出聲又唔得唔出聲又唔得，原來劉Sir真係咁乞人憎。

再提一提，TRHK清貨大減價進入最後階段了，而家$100兩隻，所餘日子無多。都唔多宣傳，因為而家已經冇左好似我地呢種人，
「咦呢隻好似幾正喎果隻又幾吸引，$100兩隻咁平的話執番去試試都好丫！」
而家ｄ人心態係
「$100兩隻？噉有冇（呢度填你想搵果隊band e.g. Cob/DRAGONFORCE）先！冇的話減乜價都冇Ｘ用啦！都冇野好買！超！」
順便提埋，二樓收皮，即時生效。日頭份工越黎越忙，TRHK越做越多，免費幫手做買賣仲要受氣（買二手的，有ｄ真係惡到好似我先係問人買二手碟果個），買幾多賣幾多我又冇著數，都係收皮算。時間同精神，我留番metal同TRHK好過。所以，黎緊個星期開始，TRHK加開星期一晚。

收舖點一點執一執，實在太多貨到。BERZERKER全線＋DECAPITATED全線都未執（DECAPITATED新碟，簡直係一撚流！），但慢慢黎都得，近排仲係聽緊NEURAXIS（一路唔同，但一路都咁正）。太多碟要聽，太多碟想寫。所以，雖然DRAGONFORCE已經到左，歷史性地一隻咁重要既貨到左，全日TRHK係一次都冇播過。都唔急，係夜晚好唔情願地聽一聽噉。慢慢黎都得，已經太多候選同選擇。也是當時OPETH新碟買左個幾禮拜都未有動機聽的道理。要聽同想聽ｄ野特別係等緊聽ｄ野，實在太充裕，根本已經冇乜必要去追咁多，無論新（潮）野還是舊野。

是日小病，休息一天。

好耐未試過由朝訓到尾，好耐未試過係屋企食飯。一鑊過聽晒DRAGONFORCE+DARK ANGEL+NEURAXIS全線確係好爽。留係屋企食公仔麵加多半罐午餐肉永遠係人間極品。正。太耐未試過。

雖然病左一日，但係不可思議地，今日十一點前，我已經做晒琴日加今日應做之所有野。點解會噉？唔知呢，身為全世界最得閒marketing，就係應該咁得閒卦？

夜晚，好大雨。好在臨到落雨前上到皆旺，亦好彩大部份人都係最大雨之前上到黎。基本上八點之後，已經好靜，可以坐係度吹吹水聽聽野。唔知係咪過左四批貨一半野到晒，所以輕鬆咁多。
冇錯，只係一半野到左。未落黎ｄ野，基本上兩個星期先落得晒。所以，各位，未拆利是的話，係時候拆喇。拆晒的話，係時候死慳死抵喇。要聽野但冇心拎錢出黎買野的話，就繼續唔使理TRHK發生咩事喇。

終於忙ｄ，有客見的日子都較忙 － 只限正常的客人好似今日果個，所以之前見親客都非常疏乎，因為劉Sir跟親ｄ客都同佢一樣，係黐Ｘ線的，唔知點解佢ｄ客明知呢間公司係賣燈，但上到黎唔係搵燈而係搵燈以外其他野，噉對住黐線ｄ客人，自然唔使咁認真求Ｘ祈算啦。就係今日個客人居然上黎呢間賣燈公司搵燈，噉就大劑喇。立即連揀廿幾三十樣野好似入左遊樂場噉款，走左之後未開始做價錢，淨係執番好ｄ辦都有排執。跟住做番個會議紀錄再做報價，噉就一日。所以點解咁唔鍾意對住正常的客人。又要無端端早左大半個鐘上黎，未到lunch就走人，連呃pizza都呃唔到！超灰！
「頂好地地上黎大家食個pizza吹個水走人咪算囉！無端白事搵乜鬼燈丫！你話搵個燈罩都好丫我唔使做咁多丫嘛搵成支燈噉做乜遮而家！」

聽日要返大陸，今日執定野夜ｄ走，就係搭巴士經過皆旺時收到個電話，想放番晚假都唔得，又要上去服侍各位老細 － 冇錯而家TRHK有埋電召開舖服務。如果我遲一個字走，或者位朋友遲一個字打黎，我都已經直去返屋企算數。結果今日又係七點鐘棟係度，隔籬舖又係係度眼超超面阻阻。
「又話星期三唔開又要見到你，Ｘ！」
唔止隔籬幾檔，好多朋友都好唔滿意：
「．．．喂！唔係話星期三唔開咩？做乜今日開舖？」
「挑！知星期三唔開，又上黎買碟？挑！」
本來只係開比一位朋友，點知一不離二，二不離三四五，最後九點幾先走得人。喂，唔係話星期三唔開咩？知星期三唔開，又上黎買碟？挑！
又出現了。今期流行係SINERGY、LACUNA COIL同white metal。做乜以前不嬲冇搵開呢ｄ野，突然間人人都搵，尤其是white metal？
「網上面有人講丫嘛！」
難怪，當年（其實只係半個月至一個月前）最潮的GORGOROTH和EPICA已經冇人再問了！

七點起身，實在係人間一大慘事 － 當然係好過四五六點起身，果ｄ係好Ｘ慘。又要返大陸，十分地開心，即係又係唔使做嘆世界就得。早開車都係要遲到，因為撞正落馬州炒貨櫃車壓扁左架私家車封晒條路，結果皇崗已經塞車塞足成個鐘，大家上網或者睇報紙都會睇到，因為都幾大單野。老細曰：
「又係你！前次炒車，上次爆胎，今次又炒車！十幾年黎都未試過撞到呢ｄ衰野，你一入黎做次次都有大鑊野！你好好反省下啦！！」
我冇理佢，因為一上到車已經狂訓，聽住DRAGONFORCE黎訓。

塞足成個鐘車，即係有得訓多成個鐘，又即係可以聽多一隻碟，非常開心地聽晒全線DRAGONFORCE訓夠，仲趕得切十一點一到只遲個客一個字咁大把。呢ｄ先至係客！黎到工廠，兜左個圈，之後坐低睇睇貨辦，再大家一齊食碗炒飯炒麵，
"Dim ar? Yau di mei tai chung jaw ar?"
"Mo ar! Or day gum arm lai chung guok lui hang, shung pin lai ark fan sic ja mar!"
Fit晒！最鍾意呢ｄ客，上黎兜個圈望望睇睇就走人，唔使寫會議紀錄因為根本冇會議，唔使做價錢因為根本冇乜睇過貨，又係上黎渡個假食完飯訓個覺就閃，正！所以點解咁鍾意上工廠！
回程，老細非常之擔心，雖然朝早叫做已經「過左關」，但心理陰影關係，老細都唔敢開咁快，由以往百七米減到一百米。開咁慢，即係又多一個鐘訓覺。最後一路順風。（估唔到而家連上工廠咁少事都要「祝你一路順風！」）
「唉！你次次出門都有大鑊野！為左香港市民的安危，為左國內同胞的福祉，你以後唔好出門口留係屋企算啦！」
我冇理佢，因為一上到車已經狂訓，聽住DARK ANGEL黎訓。

十分高興的一天，除左睡眠充足（上大陸訓兩個幾鐘，食完飯又訓個幾鐘，返香港又訓兩個幾鐘，夜晚都冇訓咁多呀真係），仲一味夠恆，DRAGONFORCE加DARK ANGEL呢ｄ乜都唔使諗一味死去就完全適合我呢ｄ膚淺人士。DRAGONFORCE新碟，坦白講，同一款野玩到第三隻點都會悶架喇，好在呢隻更prog、更多keyboard、更NWOBHM，真係唔錯，起碼唔係一味死恆先。DARK ANGEL隻"Darkness Descends"自然係無Ｘ敵，但最鍾意，都係"Time Does Not Heal"，夠prog夠technical，ｄ歌係長左ｄ，但係riff完全一Ｘ流，有陣時聽呢隻碟真係只係為左聽riff其他玩成點都唔Ｑ理。近排怒煲DARK ANGEL，已經聽到可以埋埋一路寫緊幾篇碟評個尾（一隻"Darkness Descends"，已經寫左三千字論文）。"Time Does Not Heal"，冇人買唔緊要，我好鍾意。因為，要用番腦諗諗。（講左咁耐，前後好似有ｄ矛盾忝）

五點九先返到公司，不過返到黎只係等打卡，其實六點三就走得架喇，但話晒上完工廠返黎理論上唔會咁少野跟，咪做多少少先走人好睇ｄ囉。真係冇乜野做架，冇辦法啦，做野快手，係噉架喇！（「挑！冇客跟就冇客跟啦！扮晒野！」）今日咁合皮，放工特登慶祝落雞記整個餐趙下先！（所以而家180磅39寸）因為今晚有大騷，成晚冇乜人，梗係，可以的話，我都仆去睇啦！（AUDIO TRAFFIC！！！）少人，但係基本上上親黎果ｄ都知道唔多會去今晚場騷，因為一係好extreme（終於有人買GORGOROTH！雖然呢位朋友係一直聽開佢地而買，而唔係「有人提起」而買，「有人提起」果ｄ已經唔見晒了），一係metalcore（「有冇TRIVIUM同BLACK DAHLIA MURDER？冇？拜拜！」）。好靜。好在都有ｄ無聊人上黎，講到無聊呢家野當然唔少得SPERMATIC CHORD，也就是傳說中的Brutal Anchor。原來今朝炒車果時，佢係正我旁邊做緊直播！所以大家今日睇國際台新聞可以見到Metalau比Brutal Anchor訪問：
"We are fortunate enough to interview this witness of the day. Could you tell us how the ground zero scene looks like?"
"Dismember cannibal corpse & decapitated carcass everywhere the mortician gave obituary to fleshgrind vital remains it's a crimson massacre a bloodbath gorefest!"
主播呢份工真係非常好玩，尤其是好似佢件老西左邊一個NILE襟章右邊又縫多個VENOM，做主播做到噉都算神奇。成晚冇人，又吹個幾鐘水，每次上黎，都覺得SPERMATIC CHORD呢班友真係戇ＸＸ，有ｄ乜野你地係唔鍾意聽？（"Normal music!"）次次上黎都係摷ｄ無聊野，今次正常番ｄ，係執隻DRAGONFORCE，呢ｄ"easy-listening"野定期都會入番ｄ，就好似聽得多EMPEROR都要聽番隻Bon Jovi一樣，當係NWOBHM噉聽一面聽一面唱架（有次有個阿叔入黎，聽到DRAGONFORCE，話「嘩！好似聽緊URIAH HEEP噉！」（唔知咩係URIAH HEEP，就要上上網搵搵料喇））。又講講R.A.M.B.O.場騷（同樣地，可以的話，我都仆去睇啦！），睇完條片，真係灰到爆炸，一場騷有三隊香港band加一隊美國thrashcore band玩，仲要免費入場，點解可以少人到噉，半間蒲窩都唔滿？？？因為「呢場騷冇我朋友隊band／我識果隊band份」？？？第一隻碟賣到而家全球一共賣左過萬隻，呢隊野都可以話係一個傳奇，但world tour香港站相信係最少人之一場騷，難為人地係走咁多個國家黎到香港呢一站已經係山窮水盡到差唔多燒味飯都食唔起。
講開R.A.M.B.O.又傾到去metal、hardcore同其他好多野。香港而家個scene (hardcore/metal/band)發展到而家噉，又或者話要「發達」到一個地步，真係因為好多實質的實際事實，不論正面還是反面。有好多野，同我地心中所想同典型想法，原來好唔同。有理想的各位，不妨實際ｄ好。

今日終於正常喇！食完飯訓埋個晏覺，兩點鐘已經唔知做乜好！正呀！（但已經唔正常喇，「正常」係十二點鐘未到已經做晒所有野等食飯）
非常得閒冇野做，唯有繼續搵野食啦。仍然係清緊全盒（全公司有恐怖地多的白兔糖，極速食左成個禮拜都仲有勁多），晏晝又係一個飯盒加搶人地半個餐，lunch甜品蘿蔔糕兩件仲可以留番晏晝施施然霸晒成個pantry慢慢食（吞住pop食蘿蔔糕特別好味），仲有傳說中的金莎酥（「咩係金莎酥？」「你塞十幾粒金莎入個麵飽入面，咪就係金莎酥囉！」「噉即係乜野黎？」「．．．總之你知道好Ｑ肥就得啦！」「嘩！正！即黎半打！」），噢，實在飽到仆街。＆肥到仆街。

不過，仲未夠，夜晚仲食。
「有乜做？」
「冇野做！」
「點算好？」
「食pizza囉挑！」
已經係第二次，星期日無端端有人拎個pizza上黎請，今次到番我請客，上次有coupon買大批送細批，難得今日大家都咁得閒（．．．），到左三月TRHK生意又終於回復正常（即係冇人上黎），四條友塞係TRHK食pizza，本來想黎買碟ｄ人離遠見到已經唔敢入黎走鬼晒。所以今晚好靜。

搞左ebay，但搞耐以黎都冇乜用過，其實唔使啦，根本淨係TRHKｄ碟都有排買，而且時間實在有限。有日 － 其實前幾日 － 見Devin Townsend出新solo，身痕上HevyDevy一睇，
「係喎！Devin Townsend呢隻仲未買喎！」
就係佢最玩野玩punk果隻PUNKY BRUSTER，得佢official site有，手痕即訂一隻，估唔到隔幾日一個禮拜都唔使已經由加拿大飛到屋企，郵費都差唔多成十蚊（所以加拿大太難做mail order生意，郵政簡直搶錢），佢地根本冇錢賺咁滯。好少CD好似OPETH同DRAGONFORCE新碟會咁有衝動一到即聽，因為，Devin Townsend喎大佬！仲要佢最cult果隻無聊野喎！ｄ歌擺明無聊，但呢隻絕對係見過聽過最笑爆咀之concept album！絕對係Hall of Fame之選哈哈哈哈！
HevyDevy寄黎除左隻碟，仲有一大疊紙，有HevyDevy Records負責人即係Devin Townsend老婆親筆簽名之label news一張（睇完就知，而家做label實在太難，特別係郵費貴到仆的加拿大），catalogue自然唔少得，仲有一疊Devin Townsend Band/SYL訪問，最正係Devin Townsend從頭到尾講解最新隻solo "Synchestra"。淨係為呢疊紙，已經值晒果十蚊郵費。幫襯一次已經對呢間label抱超極正面好感。所以點解咁鍾意Devin Townsend。

十分悠閒的一天，無論朝早定晏晝定夜晚。好鬼得閒真係。亦即係，冇人。好靜。平時見開的各位，都少蒲頭了。
前日見完Brutal Anchor，今日又有奇人出現，就係狂聽black metal的樹木學家。呢條鬼佬都算係見過最神奇一人，樹木學家呢家野真係聽都未聽過，
"Wai! Kay sak lay fun gong joe d mud?"
"Ah...or dou ng gi ar! Fan dai luk lok tin mon mon d shu gum law!"
做咁多年整飽整餅做實Ｑ都見過，新聞主播以為已經夠神奇，點知走左呢隻樹木學家出黎，當堂唔知應該點面對。條鬼佬仲要長駐大陸睇樹（．．．），一兩個禮拜會落一次黎香港，通常個零月都會見到佢。
"Gum lay gay si fan dai luk ar?"
"Jen gan zou fan gar lar! Lai li dou my yuen dip yat gor gi gi hau sheng four cher gar la!"
"Gum lan kua cheung?"

就係冇乜人，多番ｄ時間執下野聽下歌睇下碟。唔知點解，呢排XANDRIA多人買左，呢隊一直都好鍾意，WITHIN TEMPTATION "Mother Earth"已經去到盡，同類後繼最鍾意就係XANDRIA，一向唔算非常沉迷gothic metal（學上黎執野越黎越偏越黎越恆的Metal Father話齋：「Gothic Metal呢家野，越聽越覺冇力水！」），但罕有地呢隊真係鍾意到追全線。問題係，點解入左咁耐都冇人問冇人搵，又會係突然間咁紅？唔知呢，亦都懶理，我聽下歌仔就算。
DETONATION "An Epic Defiance"一直冇人搵，今日終於賣到一隻（知道適合自己唔使試已經即執，我鍾意呢種買碟態度），得意地點解咁耐以黎都冇人問呢隊band。根本就係未加keyboard仲玩得好恆之DARK TRANQUILLITY，基本上鍾意"The Gallery"同"Character"唔使諗即買都得，就係有趣地搵melodic death的全無過問囉。不過身處香港地呢ｄ都唔係咩新奇事（「咩band黎架？網上都冇人講呢隊band，梗係唔買啦！」），得意在外國。當時呢隻碟做好之後隊band未搵到label出碟，send左promo差唔多全部review唔係9.5/10就係10/10，個個都話"best unsigned act"、"best unsigned release of the week/month/year"，新band黎講佢地確係屬於極高水準。跟住簽左Osmose隻碟正式推出，音樂定錄音完全冇變過因為根本就係一早整好晒，但係同一隻碟同一批歌，經Osmose出之後外界評價一致下滑，跌到去8-9/10，"just an ordinary Gothenburg melodeath release"、"good but nothing special"。完全解釋唔到的不解之謎。點解同樣既野，可以有兩種完全唔同之評價？或者因為underground先夠cult，而cult野無論好定唔好，都一定好過major release，即使係好似今次噉major前後樣野係一模一樣冇改變過，依然係cult好過major。
同埋BEYOND THE NINTH WAVE隻"Beyond the Ninth Wave"。隻碟一出即被評為「比"Aske"時期BURZUM（亦即係玩得最好果陣之BURZUM）更BURZUM」，簡單黎講，你係搵BURZUM或者搵suicidal black，客觀黎睇呢隻碟具有非常大吸引力。但，有趣地，上年返左返到過年過埋農曆新年，仲係冇人買過咁滯，照計BURZUM一路咁多人搵，又要唔係未試聽過，點解可以放到過年兼過兩年都冇人要？搵suicidal black果ｄ唔要，因為「都唔係BURZUM！」搵BURZUM果ｄ唔要，因為「都唔係BURZUM！」就係咁簡單。就算比原版更好，個名唔係，都係唔使理。
當然仲有無敵的FARMAKON同EPHEL DUATH。由兩隊剛剛出碟果陣聽到而家都覺咁正。通常我越鍾意果ｄ，越冇人會買。就好似呢兩隻。（雖然FARMAKON確係多人提，但事實係，只要係我鍾意果ｄ，幾多人提都唔會有人上黎買；我冇乜興趣果ｄ就次次有人提都大把人問）

最後，今日發生左件事，非常有趣，一次過印證左幾個甚至所有理論。有興趣睇番剛剛過左個禮拜日段記第四段。全段適用。
"Event of the Month."

今日七點鐘起身。非常地唔正常呢。冇錯，星期一一朝早有客上黎公司，今日禮拜日都要返黎公司準備定，即係個客九點半黎，我都唔會咁得閒聽日八點鐘返到公司執定野囉！（雖然我知道，事實上真係會八點鐘返到公司執定野）。其實返到黎都冇乜野做，因為淨係差ｄ報價單，個殼一早做晒只係差個價，噉做價呢家野當然唔關我事而係等老闆親自落手做，所以其實一早坐左係度，就係等打卡同開公數食lunch，打個數字入個Word度有幾難！所以十分無謂，但我十分開心，因為我第二嗜好就係做無謂野（第一嗜好自然係做無聊野），坐係度唔使做呢ｄ工就最適合我。但又冇得走，因為要等辦到。聽日個客要睇件新產品，個辦趕到琴晚先起好由大陸寄黎香港，所以今日返公司其實就係為左收辦，但要成兩點幾先有得拎仲要自己落速遞公司拎，噉呃完老細請食飯之後唯有訓番個靚覺訓醒走過太子收件。
「成廿幾個箱三十一斤野喎！你一條友點拎呀傻仔？」
咪一條友推住架車仔太子推到返大角咀再推番架車去太子。又要收辦又要趕開舖，趕頭趕命十分支力。過程中耽誤唔少，因為一面趕一路聽住前日到隻Devin Townsend PUNKY BRUSTER，講隊cult death metal變左隊pop punk band再變番做cult death metal，無論歌詞定台詞都笑到仆街，所以每行幾步就要仆一仆街笑到碌地碌多幾野地笑多幾聲先捨得起身繼續行。Devin Townsend這條友真的是太無聊了。

三點半極速趕到，因為：

「星期一一朝早有客上黎公司，今日禮拜日都要返黎公司準備定，即係個客九點半黎，我都唔會咁得閒聽日八點鐘返到公司執定野囉！」
雖然我知道，事實上真係會八點鐘返到公司執定野。今日要見大客，朝早見完客晏晝一直做到八點先走得人，忙成噉都冇乜好講喇，要講都係得一句遮：
「搞錯你班友仔！九點幾上到黎坐到剛剛好臨食飯就走，搞到我冇得借ｄ倚黐pizza食又要我做餐死！」

呢幾個月最潮查詢，莫過於thrash。最典型查詢，開始係「有冇thrash野？」然後係「有冇呢隊band？」之後係「有冇呢隻碟？」最後，多數都係
「唔買！都唔係ＸＸＸ！」
例如今日的例子，係
「唔買！都唔係德國thrash！」
香港地就是這麼有趣，係咪唔係德國thrash，就唔係thrash，就唔聽得呢？而且真係到左德國thrash，相信都唔會真係成棚人地衝上黎搵，因為話要（德國）thrash野，有果陣時都一定會經過上面果三個步驟，到三關都過晒，又係咪100%會買？都唔係。因為真係放隻碟係面前真係要俾錢唔係淨係靠把口時，就真係要先再思再三思後四五六思先敢行，而思完再思之後．．．近來DRAGONFORCE見過太多這些例子了。
另一有趣的是，從thrash可以知道甚麼叫物以罕為貴，好地地搵得到果ｄ唔會要，完全搵唔到果ｄ先要。冇乜人開始搵thrash野果時已經一大棟thrash野放係度，坦白講，純粹係要玩得好之thrash而唔係買band名，根本放係度咁耐之ANDRALL、SUICIDE WATCH同MUNICIPAL WASTE已經係可以即刻買得到執番屋企聽之好thrash，但到呢ｄ野除左剛剛到香港果時有人搵，已經冇人再理 － 另一個講法：「唔夠潮了。」而家到左ｄ舊thrash band，係咪會買？又唔係。因為呢ｄ係搵得到的thrash，而好多香港人係要搵搵唔到的thrash，亦即係正常途徑唔會入得到，入得到個價都唔會係你肯俾之價錢，就算個價真係OK喇，仲有一個問題，最大問題。而家入得到搵得到，即係唔係搵唔到啦，既然唔係搵唔到，仲搵黎做乜點解要買？
也是SLAYER永遠只需要入"Reign in Blood"的道理。"Reign in Blood"都要成個月先賣得晒（此乃當年之事，而家冇兩三個月都唔使旨意清得晒，隻"Reign in Blood" DVD更加係未賣過忝），"Reign in Blood"以外果幾隻，半年啦。亦是當年之事了，而家會唔會有半年咁快，我都唔敢諗。你係要thrash metal定thrash metal band我控制唔到你。我只有話，TRHK係有thrash metal，thrash metal band就唔好意思一定欠奉。

琴日見大客搞場會議搶到太盡，又要搞新貨，玩到虛脫咁滯，好早訓，但好遲起身，迫住要飛的。黎緊四五六七月仲大劑忝。要開始諗諗計點樣顧晒日頭夜晚兩頭．．．

十分落力地做，所以今日四點幾已經做晒野，都退步架喇食飯完居然仲要做野。（．．．）早左做晒野就早ｄ放工，反正真係冇野做，放番下假何樂而不為？但最主要都係部電腦咁唔好彩跌左一跌噉就死左，華碩間維修中心返工食飯放工時間同我返工食飯放工一樣，迫住一定要早ｄ走拎部機去整。華碩呢間野係我遇過服務最差之一間機構，拍得住當年高山六翼果次城市電腦售票網咁差。即係第一次見有維修中心營業時間咁短，唔開星期六日都算啦，禮拜一至五開夜ｄ等埋人都得卦？Receptionｄ靚女唔知點解可以串得咁離奇。打電話去問野，態度同語氣好似好唔想講野答你噉，潛台詞係
「Ｘ！收線啦！阻Ｑ住晒！」
阻住ｄ乜？上到去發現，咁大間維修部根本接近冇人，但有得睇電視又有得上網，明白了。成間野唯一好態度就只有個整機師傅。但態度好，價錢都係大劑。
「噉樣跌死左，成塊底板換喎要！三千啦！」
唔使卦？高科技產物呢家野真係唔係我地呢ｄ膚淺人士所能涉足。我地呢ｄ傻仔，都係買下碟仔聽下歌仔算。但係電腦呢家野，唔整又唔得，冇左真係會死架！灰！呢個月，都唔使買碟。

難得地見到咁多人。今日都算傳奇了。

Chinchilla
實物原大。

勤力人士比懶惰人士更具工作效率更快做完野，一向係大家特別係我地的老豆老母所相信之觀念，但研究指出，其實一個人越懶越勤力，因為懶人為左可以偷懶，就會用最簡單最有效之方法完成工作，亦會比勤力人士更有動機做野，因為兩者加埋就可以用最短時間做晒所有野繼續偷懶。就好似我噉，禮拜一開大會見客，星期日搏命做，星期一狂做，星期二做，星期三已經唔使做，今日更加係要搵野做。實在係太得閒了。所以我呢個經科學研究證實懶惰有效之過來（頹）人奉勸各位，
「咁搏做乜春丫！訓埋個晏覺食埋個tea先做野啦頂！都唔明你班友日做夜做做乜！咁多野做咩真係！」

十點未夠已經做晒野（．．．．．．），咁得閒，點算？當然係走入pantry怒頹。同樣地，仲有又係冇野做＆唔知做乜好的會計姐姐（冇錯，呢間公司最得閒永遠係呢兩個，第三個係日日都係第一句「眼訓到嘔！」第二句「悶到抽筋！」的經理）。兩隻野，一如平時，匿埋係pantry吞pop。
「嘩∼∼∼（＜喊路）好悶呀！有咩做？？？」
「嘩∼∼∼∼∼∼（＜更大的喊路）唔知呀！搽麵包食啦！」
冇錯，兩隻野無聊到十點幾工作時間搽麵包食，已經比上次無聊到要叮個公仔麵兩個人分進步左架喇。我呢ｄ當然係撻係張凳度等食包果個，有ｄ後悔，因為會計姐姐真係無聊到傻左，將搽三塊麵包用之花生醬＆煉奶劈晒落一塊度，食一啖就好似隊成匙花生醬入口再整多成匙煉奶，根本完全唔覺有麵包存在。
「嘩！呢塊野真係肥到漏！完全係監生食花生醬溝煉奶！」
「噉仲食唔食丫？」
「食！正！咁肥我就最鍾意！整多件奶醬包多奶多醬走包唔該！」
好很肥。

都唔知幾耐未試過好似今日噉，返到公司開機見到差唔多一封新email都冇（所以我outlook個收件匣永遠「沒有項目」），成日夾埋都冇幾多封email，實在太令人感動了。食完個奶醬包就係等食飯＞訓晏覺＞訓醒冇野做＞又食奶醬包＞等放工＞拜拜。非常開心。晏晝重點節目又係奶醬包，同樣地我係等食會計姐姐整果份超唔健康奶醬包。齋搽野都悶喇，所以搽完再掟入微波爐叮，拎番出黎ｄ花生醬溶晒流到成街都係，超級核突，但就係咁核突先夠正。噉樣一餐早餐加一餐下午茶，成樽花生醬加大半支煉奶已經消失左。好很肥。一出到去，比全公司啤住。
「你地又知我地食野？」
「成樽花生醬放入微波爐叮，成廠都聞到啦！」
食完特級奶醬包都仲有個幾鐘先放工，點算？匿入廁所訓覺都匿唔到咁耐啦！冇野做，又寫下野。可以得閒到寫左成篇碟評出黎。晏晝唔知掘路定電燈公司有事，突然間跳左野fuse全部電腦熄晒，全公司同事非常驚慌：
「我封email呀！／我個Word/Excel呀！」
而我係
「我個段記呀！／我篇碟評呀！」

一名老坑上黎（To Bloodkrishna: Decreate；To Henry & concerned: AZ-Chung），每次上黎都係一張，無論果日幾多生意都好，只要睇一睇張貨單，三秒已經可以知道邊單生意係佢，因為佢執ｄ野，真係典型香港人唔會執，全部都係無聊／硬膠／神奇野。所以次次上黎都好開心，因為臭味相投，通常ｄ無聊／硬膠／神奇野都係入兩至三隻，一隻佢，一隻我，最後果隻（有的話）就放番一年半載靜待有緣人啦。所以每次見到佢都有遇知音感覺，不過太難相見，出到黎做野大家都忙，佢仲個個禮拜要過大海一星期先得一日返香港，做左野，太少機會矣。
再一名老坑上黎．．．都唔知大家算唔算老坑了，阿Rock爺。同樣，大家搵到工做，太少機會見面，太少時間聽野。灰。
「Rock爺！我要打機！我要落新之城打三代！」
出左黎做野，面對之事同以前完全係兩回事了，太多野要諗，亦太多現實問題要兼顧。呢ｄ問題，已經唔係上網鬥寫名鬥晒「我聽ｄ乜」、「近排有咩聽」，或者同人拗「呢隊邊度係玩（＿＿＿）？」咁簡單。

GAMMA RAY新碟又變樣，仲可以正過上隻已經好勁之"No World Order!"，當堂冇晒野講；DRAGONFORCE新碟少有地要用下腦，第一隻8.5/10，第二隻9.5/10（呢隻我心目中已經係10/10，夠老餅），新碟就一定係10/10；HELLOWEEN新碟，如果disc 2第一首歌放入disc 1最尾然後成隻disc飛走，隻碟肯定讚到九彩，而唔係而家噉唔湯唔水。返到屋企，都係聽聽power metal算，臨訓前，黎番野DRAGONFORCE全線，唔係要訓覺聽日早起返工，起碼聽埋隻DARK ANGEL "Time Does Not Heal"。辛苦左成日，唔想用腦，簡簡單單舒舒服服輕輕鬆鬆就最好，power metal最鍾意，越膚淺越好。深奧果ｄ，留番舖頭同搭車果時先聽吧。做成日返到屋企，都係求祈播ｄ唔使用腦又一個鐘搞掂，例如Bon Jovi。"Crush"同"Have a Nice Day"依然熱播。

早餐：會計姐姐親手下廚之芝士鹹牛肉三文治一大份 ＝ 真係肥
Lunch：一個茶餐再搶多人地半碗米粉 ＝ 好肥
下午茶：琴日一塊麵包夾半樽花生醬＆四份一支煉奶之特濃奶醬包再現江湖 ＝ 很肥
今日：真係好很肥。

仲好得閒忝。全日夾埋正式email五封唔夠。全日就係坐係度扮做野，但唔做野老細又吹我唔脹，因為又確實係一早已經做晒所有野。要九點坐到六點，原來都相當辛苦。（．．．）好得閒，又寫下野，目標係DARK ANGEL全線（"Darkness Descends"玩完，"Leave Scars"同"Live Scars"相信好快搞掂因為冇乜特別野好寫，係"Time Does Not Heal"有排玩），得閒寫埋DRAGONFORCE新碟，power metal野始終易寫ｄ，唔使用腦嘛！
近來，真係超級異常地得閒。但唔知如此光景仲有幾耐矣。

好多奇遇今晚。有個客上黎搵death metal點知執左GATHERING隻新碟走人；有個上黎搵post-rock野（！），之後推介GATHERING（雖然個個都話佢地係gothic metal，但其實由"Mandylion"開始，根本就係metal版之post-rock），差少少買但結果都係冇買，唔買，因為結果係揀左三隻doom野走人（！），但隻GATHERING都未執，睇黎呢位朋友仲有得玩；有個客上黎本來係買WINTERSUN，點知最後聽下聽下，WINTERSUN冇執執左另外兩隻，其中一隻係Symphonic Brutal Black Death的SEMARGL； 有位朋友上黎執足一箱，呢樣當然係奇（如此買物者現有幾可得見？），更奇係好多碟都唔使試，
「上Trinity MP3試過晒啦！」
三個月黎第一次聽到有人會上去試聽（相信在座的你，到而家都未理會過呢個咩T咩3係咩黎），簡直係奇遇of the evening；玩到好夜，臨玩完果陣近來一位成日見之朋友又出現（TRHK越來越多老野了），果真符碌。老野當然係聽老餅death，
「我聽death，一係聽好doom果ｄ，一係聽好brutal果ｄ！」
一黎先係RUNEMAGICK "Darkness Death Doom"（最愛doom death碟之一亦係最愛doom metal碟名之一，拍得住CANDLEMASS隻epic doom metal masterpiece "Epicus Doomicus Metallicus"），聽到第四個音（冇錯，係第四個音）已經知道
「呢隻我要！就係要呢隻feel！」（最鍾意呢ｄ睇個封面再聽十秒已經feel得到隻碟屬咩料之人）
搵完好doom果ｄ，就到好恆果ｄ，差少少執埋隻DARK FUNERAL，結果反而揀SEMARGL，
「佢地ｄ野夠特別！」（所以新呢批貨其中一我隻最鍾意就係呢隻）
SEMARGL近排真係熱賣！而家聽brutal death但對DARK FUNERAL有興趣，呢位brutal叔叔遲ｄ搵埋black野聽的話又有排玩。呢一晚，實在係太開心，唔係生意多少的關係，而係全晚完全冇出現過
「有冇呢隊band冇呀我走喇拜拜」
呢個情況。一次都冇。全晚只有
「有乜正野聽？播黎聽下！呢隻咩黎？嘩乜有呢ｄ野？正呀！要試試！仲有冇其他？」
同呢ｄ朋友一齊拎ｄ唔識野＆無聊野焚下笑下吹下，一齊發掘更多唔識野＆無聊野，係最開心之事。當連搵post-rock的都執三隻doom返屋企聽，今天已再無所求了。

十分得閒的一day，得閒到要走過隔籬玩具舖扮客混吉（雖則呢樣野差唔多日日都做）。原因好簡單：
「有冇新貨？冇？拜拜！」
好難得終於有個禮拜冇新貨到．．．呵？其實係有新貨，不過唔係好多，又唔係大路野，留番下個禮拜一鑊過出啦。反正都唔係大路野，到左都唔會有人理架啦，係咪？
而且，連續咁多個禮拜個個禮拜六日，黎少個禮拜，唔係即係乜野都唔買得卦？NAPALM DEATH MORBID ANGEL DECAPITATED CARCASS EMPEROR IMMORTAL DARK FUNERAL TAAKE MARDUK DEATH THERION THEATRE OF TRAGEDY EPICA LACRIMOSA MOONSPELL WINTERSUN DARK LUNACY ETERNAL TEARS OF SORROR CHILDREN OF BODOM BLOODBATH仲有果無數power metal band近全線（有一位朋友問過一條好有趣的問題：「以前好多power metal排成三四行，點解而家得半行都冇咁少？」答：「果三四行一早掟晒過去清貨減價果欄度啦！其實Power Metal入你見到呢幾隊已經夠晒有突，入其他band根本唔會有人問有人買！」），呢ｄ「冇理由會冇人買」之大堆碟，一大堆經典，居然成為死貨。點解呢？按照推理，香港地唔出名唔願買架喎。原因，係忽略左一半：出名，唔夠，唔止要出名，仲要夠新。呢ｄ經典野，邊度夠新丫。所以HYPOCRISY新碟賣得咁好，以上所講之任何一隊，反而一直以黎都係接近無人問津。不解之謎。呢ｄ都冇人要？？？或者第時真係好似做pop唱片舖噉，淨係入最新出果ｄ算啦，正如而家成堆melodic death放係度只要係肯聽一定大把選擇，但好多人上親黎望都唔望就走左去，因為，唔係要melodic death，只係要KALMAH新碟，冇KALMAH新碟，有咩melodic death點好聽之melodic death都冇用唔會買唔會望。也是上年CHILDREN OF BODOM出新碟時的道理。

或者因為我只係單純聽歌啦。有ｄ野，我見左咁多年，都未明白。好多時幾個人一齊入黎買碟，真係買的話，一個或幾個都會講句
「買左記得燒晒ｄ歌俾我喎！」
又或者
「我今晚燒隻碟俾你！」
同場加送一個好似好威的表情，仲要大大聲地講慌死其他人例如睇舖果個劉Sir唔知。係咪噉樣講，會威ｄ型ｄ呢？如果真係威真係型的話，係咪應該直頭唔使上黎買碟直接上網download，連百幾蚊都慳番，噉會更威更型？唔明。我只明白，就係因為好多呢ｄ朋友，一路以黎好多碟都入唔到。如果本身話好想買DRAGONFORCE果ｄ真係全部都買碟，而唔係好似而家噉平均五個人買一隻碟（呢個估計已經樂觀了），大家買完呢隻碟之後係會見到有多好多荀野出現，「舊碟唔去，新碟唔黎。」但當然，如果你係好似上年全年只會買一隻OPETH新碟的朋友一樣覺得今年買隻DRAGONFORCE乜都夠，就不在此列啦。
同埋，TRHK原來除左賣碟同聽歌，仲有一個用途，就係令某ｄ朋友更威更型。有一條formula：一入到黎就會問
「有冇（＿＿＿）ｄ碟／呢隻碟？」
（＿＿＿）不外乎metalcore樂隊、nu-metal band、一ｄ出名band好似METALLICA & SLAYER，同埋（最重要的）DREAM THEATER（出現機會80%）。所以，回覆通常都係「冇。」因為TRHK真係冇呢ｄ野。唔係即走的話，或者會試ｄ野甚至試幾多野，而試聽通常唔會只試少少而會試幾多下，有ｄ較pro的朋友甚至指定要「呢隻碟第幾首歌」噉試。但對於一隻未聽過既碟，呢ｄ朋友係點樣噉揀歌法試呢？歌名？唔知呢？而最後試乜試幾多都好，評語不外乎「呢隊唔好聽」同「呢隻算係OK噉啦」之類，然後走，而從頭到尾之行徑語氣同表情，都好似只為表達一個信息：
「賣metal？都冇我想聽ｄ野同（＿＿＿）！超！」
面對呢班專家，我完全自愧不如。我只係一個冇乜聽／唔識聽（＿＿＿）的傻仔，同各位見識廣搏的專家相比，完全係冇得比。多謝晒。多ｄ上黎玩。

所以，好靜。好多野玩。過隔籬玩具舖發癲（同皆旺108一樣，皆旺107係一間深藏不露深不見底之神秘商店），怒聽HELLOWEEN（完全唔明，HELLOWEEN出新碟點睇都比DRAGONFORCE出新碟更屬盛事，何解到而家HELLOWEEN都冇人過問？），同埋同Rock爺吹水。兜兜轉轉都係做唱片舖，辛苦，不過有野玩就算啦。原來而家出面唱片舖銷量最高係鹹片。有個阿叔入到去，第一件事拉住佢：
「喂！兄弟！有冇六級呀？」
「阿叔！細路我見識少！三級四級我都知咩黎，但六級係乜野小弟就真係未睇過！阿叔你介紹下小弟啦！」
原來有好多阿叔鍾意買三仔。又有次有個阿叔買完碟之後，
「阿叔，要唔要膠袋呀？」
「梗係唔使！等我拎住呢隻《弊傢伙！地鐵有色魔！》去行街先！」
傻既都知，個阿叔梗係唔會噉答啦。正常的阿叔都會答
「梗係要啦！黐Ｘ線！」
黎到呢度，你又會點回應個阿叔？當時之回應係：
「哦，噉我俾個透明膠袋你裝住隻碟啦！」

琴日係史上最早訓，平時冇兩三點見唔到我offline，今次一點未夠已經唔見人。冇計，有個客揀今日朝早上黎公司傾野，仲因為要趕船要八點鐘上黎，即係要六點幾起身七點返到公司開門準備。星期日早過一點鐘起身，絕對係人間慘劇黎架！為左今朝，琴晚仲搞到有邊爐都冇得打。（拿Sam少同阿 漢 哥，即係唔係我唔想囉你地都明架啦要返工嘛我地呢ｄ，拿，而家我約實你地下星期六晚打邊爐！拿下星期六晚你兩個唔好放我飛機呀下！）本來諗住係八點開始傾傾到九點半上車走人，點知個鬼佬七點九已經上到黎（原來樓下個看更識英文曉同鬼佬溝通，呢躉大廈咁臥虎藏龍！），之後都係行行企企，
"K shek or hai joe hei sun mo yeah joe, lai lay day le dou yum ha coffee gum jei! Ng sai lay or gar! Lay day ho chee pang si gum joe zhi gay yeah duck gar lar!"
最鍾意呢ｄ客，吹下水就得唔使做大量文件野，正！睇左九個字八點半已經走人，見咁早又得閒地跟埋老細車車佢過尖沙咀再遊個車河返公司，九點鐘已經玩完。咁早，點算？真係得閒到由大角咀行返土瓜灣，差少少行足一個鐘剛剛好聽完一隻DARK ANGEL，返到屋企冇野做又整多野DRAGONFORCE全線，三隻之中新碟最正、第二隻最鍾意，第一隻係真正最有feel最有意思。再執執寫寫，食埋個大餐（呢個大餐容後分曉）見得閒又徒步土瓜灣行番出去旺角（．．．），再聽多隻DARK ANGEL（呢隊band雖然好多缺憾，但實在好多野可以欣賞同研究），原來，星期日起身都幾多野玩喎！不過相信只此一次，唔係今朝要見客都唔會咁早起身，星期日早過一點鐘起身，絕對係人間慘劇黎架！

冇新貨到，係咪真係咁大劑呢？真係好鬼靜。睇我可以完整地睇晒成隻PoS "BE"再完整地聽左三隻black metal碟，就知道我係幾得閒。亦即係，生意幾少。咁得閒，又係過隔籬玩具舖發癲，最癲，莫過於又整番個pizza。冇錯，係「又」，今日晏晝屋企叫pizza食，特登叫Pizza Box買一個12"大批送一個12"大批，要噉叫法，當然係因為我一個已經要食一個12"大批，唔買一送一，其他人邊有得食丫。夜晚，隔籬舖撩左好多日
「樓下茶餐廳三十蚊有一個pizza，買兩個先送貨，一齊叫pizza食啦！」
今日終於得閒到要叫黎食，係有少少唔夠喉噉啦，三十蚊個pizza先得九寸大！兩餐都食pizza一日食兩個，噢真係超級飽加好很肥。所以點解今日要大角咀＞土瓜灣＞旺角行咁多路。要做做運動了。（雖然行咁多都係冇叉用，因為行極都未消化夠半個pizza）

或者今日個場真係淡到死，隔籬舖都冇咁好氣一早收舖走左去算，但我堅守到最後睇埋"Sin City"先走，明珠九三０呢ｄ尷尬時間，早ｄ收舖走又唔係，準時收舖走又遲，咪睇埋先走。呢套戲都可算近年較cult的一套，拍攝手法同意念都好獨特，不過當年上畫冇得睇（果時仲係一日走兩份工走足七日之日子，點睇），難得今晚有得睇一定要睇番。套野節奏太快劇情太散太亂亦變態得超現實，但拍出黎似足漫畫，呢套野劇情唔夠好唔夠實，淨係睇影像睇顏色都要睇。就係鍾意節奏咁快劇情咁散咁亂亦變態得超現實，cult片就應該係噉嘛，唔係咁誇又何cult之有？有ｄ後悔當初冇去戲院睇。亦值得買番隻DVD再睇。
最cult係，睇戲睇到有生意。講左十點鐘收架啦，點解你班友仔可以十一點鐘皆旺都拉閘果時先上黎？？？你今鑊就真係好彩喇噉都撞到我係度！賣左咁耐，之前千百人打晒鑼鼓噉搵但只係入左非常少之GORGOROTH終於賣得晒！（係囉！如果各位真係有心搵GORGOROTHｄ野聽的話，點解入得果五隻都冇，都可以賣咁耐？？？）特別嗚謝"Sin City"！

VIRGIN BLACK: "Three albums to be released simultaneously"

A release date for the albums has not yet been set.

絕對係major event of 2006。除左"Elegant...and Dying"差少少（只係少少），呢隊band每一次做親任何一樣野都係major event level，一年內同時出三隻大碟仲要完全唔同玩法，已經史無前例。隔左三年，呢（三）隻係今年最期待之一。但，或者，只係關我事得我一個咁關心遮，因為對某ｄ朋友黎講，今年唯一major event，都係DRAGONFORCE出新碟遮，係咪？

終於唔使六點鐘起身。都要七點。叫做好過冇啦。不過早起都冇所謂，今日返工廠，亦即係大把時間訓覺。所以一返到公司先訓番半個零鐘（睇住條友趴晒係張檯訓都可以到開車出發前先出聲叫醒佢，睇黎老細都睇化了），上到車又係訓番兩個鐘，落車之後其實都係等訓覺，今次上工廠係睇定五月過美國做展覽會ｄ準備，真係得個睇字，其實乜都已經比班工程師做晒，我去到只係睇住成個展覽攤位超大堆野
「嘩－－－－－」
讚嘆一番工程部同事的成就之後當然要食飯，三個字ｄ野唔使掂都唔使掂又唔使我砌，其實要我返黎做乜？或者老細見我係公司都咁得閒（全日夾埋收發email唔過十封，你試過未？我近排差唔多日日都試），咪帶我上黎放下假囉。食完飯一點又係訓，同樣地老細都廢事理喇未到三點開車走老細都廢事叫醒我（冇錯，原來呢間公司入面我咁惡），上到車又訓兩個鐘一野補晒呢幾日日日早起身訓少左果Ｎ個鐘，返到公司坐番幾個字之後準時打卡，拜拜。正。你會發現，成日就係訓同不斷咁訓。真係好訓。所以，訓喇，唔寫喇，拜拜。

嘆左咁耐訓左咁多，天譴來了，一返到已經三四封email飛過黎。係好少，但係呢幾封一封都夠做大半日，原來做marketing跟客係咁辛苦的，係度做左半年先知。（．．．．．．）都叫做好彩，五點半趕得起晒所有野，仲有時間去個廁所加寫埋呢段碟評。就係咁多野做，所以冇咩好寫。

夜晚，都係冇野好寫。寫一個字就夠：

就係咁冇野寫。當八點之後可以成間舖由頭到尾執一鑊再聽多兩隻碟都冇比人打斷過（因為根本就冇人），就知道有幾冇野寫。
對唔住，番左咁多thrash野，都係美國野，德國野得一隻DESTRUCTION咁大把，搵thrash的各位，再等等吧。

居然會有風水大師上黎睇風水。神Ｘ奇。其實係老細請師傅上黎公司同佢屋企睇風水，噉一眾愛貪小便宜的同事當然唔會執輸，個個畫晒自己屋企點點點拎定晒ｄ時辰八字出黎問師傅。師傅見有咁多fans，十分高興，一開口就唔停得口，本來諗住兩點走人，點知到三點都未講完。
「師傅！就到吉時喇！夠鐘去我屋企睇風水喇！行啦我車都開定喇！」
「收聲！我講到興起，咪阻住！陣間仲要同班fans開個簽名會！」
正所謂人以類群，有班咁無聊的同事，自然有個更無聊的劉Sir。
「拿師傅！見你咁口痕，贈番我兩句啦！」
「．．．」
「黎啦師傅！兩句噉啦！」
「天生能養　闔家富貴」
「．．．真架師傅？？？」
「我睇風水遮！但係我冇話過我識睇相架喎！隨口爆句遮傻仔！噉都信！」
「我信架師傅！我信架！」
「．．．」
「．．．」
「．．．噉啦！贈你幾句啦！認真架今次！」
「．．．」
「睇你個款都知你係無為之相（註：整段對話中，劉Sir從未改變過佢四十五度角拉長攤直係張殘廢凳上之招牌座姿／睡姿），陣間我會去你老闆同老闆娘屋企睇風水，有排搞架喇，等我拖下佢地睇耐ｄ等佢地係你放工前趕唔到返黎，你今個晏晝慢慢嘆啦！」
「多謝晒師傅！」

琴日加今朝係噉趕，終於趕好晒所有野，晏晝睇完風水老闆又走左嘆＆頹得好開心，又幾乎準時走人，合皮。更合皮，又見到你喇，B哥。對上一次拎鼓棍，已經係我地對上一次夾喇。即係，大半年前？估唔到咁快我地已經到瓶頸喇。（「快」？？？）玩左兩年，都係果兩首歌 － 冇錯，就係《我們的第一首歌》同《我們的第二首歌》。而家只求得閒無事有得玩下焚下就得，合皮就算。
一場出到黎，當然仲有緊要野：
「我個Metalpolis！！！」
而家星期三晚係我一星期唯一一晚free，想夾band的請早約實，不過下個星期三就唔好意思，已經有VIP卜左。冇錯劉Sir個schedule好full，有約請早。

琴日風水大師上到黎，人人都係問「我屋企風水點」、「呢個位旺唔旺財運／事業運／桃花運」、「噉樣擺剋唔剋得住對面條死仆街」之類，我就最簡單直接搭實際：
「師傅，幾時有人工加？我幾時會中六合彩？」
「你都係慳ｄ收皮算啦！」
師傅話。天機一語道破，我亦只好安照上天的指示，慳ｄ收皮，乜都唔做算。師傅都噉講啦！仲咁搏做乜！所以十一點之後，又進入等食飯再等放工的正式工作階段。（「正式」．．．）實在係太得閒了，所以，不斷地寫。DARK ANGEL，又寫好一隻了，頭兩隻碟都係公司度冇野做時寫好，已經開始寫隻live，然後"Time Does Not Heal"，相信呢隻有排玩。我怕最後得閒到全線都係公司寫晒。我驚架！

見到好多人，好正路地，都係去DRAGONFORCE同埋thrash野，唔算太特別。特別在係一位朋友除左幾隻black野，仲一執就係CORONER全線。六隻碟入面有頭四隻但冇"No More Color"（最後兩隻唔使問係咩黎，有你都唔會（想）要），因為按照「SLAYER只會執"Reign in Blood"」、「DARK ANGEL只會執"Darkness Descends"」之經驗，今水乜都有就係冇"No More Color"，都冇預過會有人執呢ｄCORONER，因為一來「冇人提過／冇人寫過」，二來就算話係搵thrash多數都只肯執「最好果隻」或者「最新果隻」。所以對呢位朋友之舉動相當意外。為左呢位一心執全線的朋友，已經要番番隻"No More Color"喇。難得有心人。

有貨前堅毅地大大聲「呢隻正呀入左一定買」，有貨後望住隻碟猶豫拎起又放番低重覆幾次，此情此景，一向常見，每次返左好多人話要果ｄ大band／pop野，都有得見。自從thrash回到TRHK之後，呢個苦況發生得比前多好多。

「今日會有新貨！」
我都以為係。點知結果係．．．有。真係有。但係好少。所以我都廢事出list喇，下次一鑊過啦。呢少少野當中有一隻thrash，不過唔使期望咁高，唔係德國thrash野。所以我都廢事提喇 － 係德國thrash仲唔立即爆通街咩。所以，遲ｄ先話你知咩黎啦，因為各位搵thrash的朋友已經由搵thrash「進化」到非德國thrash不要了。好快就會再「進化」到連德國thrash都不要了，因為果時最潮已經唔係thrash，係另一樣TRHK冇既野，然之後堆thrash又好似而家Ｎ咁多野一樣放晒係度冇人理。

一個故事：
「呢隻碟咩黎？」
「呢隻係SEMARGL "Attack on God"。」
「似ｄ咩架？」
「會似早期DIMMU BORGIR果種symphonic black。」
「似DIMMU BORGIR？噉即係唔好聽啦！」
聽左一陣之後．．．
「．．．咦！而家播緊呢隻咩黎架？幾好聽喎！」
「呢隻係SEMARGL "Attack on God"。」
「又幾好聽喎！」
就是這麼有趣。所以有陣時我都唔知應該點樣介紹、介紹時應唔應該坦白，因為好多時話似乜野或者似乜band，只要「乜野」或者「乜band」同我己心水有少少出入，立即
「噉即係唔好聽啦唔使試架喇我唔會要架喇！」
但播左或者聽左，又會神奇地鍾意，例如呢個唔鍾意DIMMU BORGIR但會鍾意DIMMU BORGIR style（又係呢條經典問題：成日話CRADLE OF FILTH、DIMMU BORGIR「商業」、「pop」、「唔掂」的朋友，有幾多真係有（詳細／認真）聽過CRADLE OF FILTH、DIMMU BORGIR？）。如果一開頭唔講係「似DIMMU BORGIR」，反應會係一聽已經「嘩呢隊band真係正！」而唔會係好似而家噉講左「似DIMMU BORGIR」之後聽完就算真係知道正覺得正都仲要狐疑。又係因為名的問題，同埋唔夠hype的問題（見過太多人聽聽下唔聽CoF、DB甚至聽都唔聽會聽CoF、DB，唔係「因為佢地ｄ歌點點點」，而係「其他人話佢地ｄ野pop唔好聽，咪唔聽囉」）。講真話又唔係，講假話又唔係，講多ｄ無謂，講少ｄ又唔應該，有時對住客人特別係知道少少唔鍾意立即反檯走人果ｄ客人都好為難，尤其是用一直以黎果份old-school求真求是態度去做而家已經變得潮到爆要靠hype黎決定聽唔聽的metal。所以，第時都係講少ｄ同講小心ｄ好，講多錯多，特別係事實。

而家ｄ靚妹，居然可以望住CANNIBAL CORPSE個封面聽住MORBID ANGEL笑騎騎，而家ｄ靚妹，實在係太brutal了。

是日最大project。又係睇埋明珠930先走。今晚做《妖夜尋狼》第一集，佈定晒陣連野食都準備埋坐定定睇戲。一貫荷里活動作片風格，動作算係噉（雖然以荷里活標準黎講，呢套野動作算唔多掂），劇情有非常地唔通暢＆交代唔清楚地「呢ｄ野唔使解釋架你應該一早知架喎！」一路落去非常平坦平淡完全冇驚喜，一路睇，一好多野好似預左會發生噉，之後睇睇下已經
「噉就到最後打大佬架喇？」
矛盾漏洞更加唔使講。話係彊屍打人狼，不過實際上係人狼啡槍對彊屍啡槍，真係狼對屍鬥打唔多覺有有都唔打得長，更抵死係ｄ彊屍明知道ｄ人狼由人變形做人狼之後一定唔夠抽，都要等佢地變晒身先開始打，噉．．．梗係死啦咁戇居抵佢地死啦。更唔合理地，係好多時ｄ人做ｄ野係完全無緣無故加唔似佢地，十分地唔夠說服力。同埋最後擺到明，套戲根本未完，甚至可以話其實睇完呢一集，故事先正式開始。完全唔知做乜呢套戲。最可取／唯一可取係soundtrack好多metal。但如果係噉我寧願睇《幽靈刺客》，都係現代彊屍故事，起碼型ｄ同誇ｄ，又一樣有metal，同埋扮型扮到嘔假都假到盡擺到明做作，我鍾意。而唔似而家想唔扮型又型唔起咁灰。

電視一做完，立即收舖衝上去新世紀睇第二集，相信呢個係全香港只此一個之壯舉。唔係見今日電視做第一集，一早買飛睇《弦途有你》啦！第一集十二點做完，第二集十二點開始，所以完第一集即時熄機鎖門飛奔，去到已經過晒廣告片頭開始左半個字（冇得睇片頭，睇一段片頭預告已經等於睇左一套戲）。第一集咁失望，本來對第二集都冇乜期望，但結果反而好過第一集，文戲就預左唔會有咩野睇所以今集多番ｄ打戲，亦唔係一味兩面拎槍鬥啡多番ｄ埋身，又明顯地今次真係度過下ｄ動作，同埋ｄ奸角終於叫做勁番ｄ，即時好睇過第一集，個長老識飛對翼又勁到爆，但最後對住主角居然完全唔用呢ｄ優勢企係度你一拳我一拳噉打，抵死；講到人狼個大佬點勁點打不死，點知出到黎兩三下手勢已經比人做低；同主角明知人狼咬完人之後ｄ人都會變人狼，但最後明知ｄ人幫唔到手又要帶成隊人入去比人狼咬，搞到自己比成班人狼圍．．．總之十分地無聊。不過都叫做唔會後悔入戲院睇呢套。或者因為睇左第一集，因為第一集失望，所以第二集相比下好得多；同埋順住落噉睇完整得多，因為第二集一開始就係由第一集最結尾開始，你冇睇第一集，係完全唔會知同唔會明第二集講乜。最重要就係，睇呢ｄ戲唔使用腦嘛。所以點解咁鍾意睇李連杰ｄ戲，一面睇一面「嘩∼∼∼」拍拍手掌睇完走人就得。（都未講完，夜晚返到屋企老豆就係睇緊《霍元甲》DVD，正）

好Ｑ靜。平時個場走廊係塞人塞到望出去淨係見到人頭同人身，今日係一望無阻睇到晒對面幾間玩具舖班友做緊乜；或者就係咁靜，隔籬玩具舖直頭廢事開門。今日係皆旺商場歷史上最靜最少人之一日。所以TRHK今日都好靜，除左一個「我聽punk架我聽最嘈係SUM 41」講完就走左去、一個鬼佬走入黎飲汽水（．．．）、兩個架妹入黎借廁所（．．．）仲要俾兩蚊貼士（．．．）、有個阿叔入黎叫人收二手、加多幾件路人甲乙丙丁，就係得我同冷爺兩件坐係度。所以今日可以連聽幾隻碟吹咁耐水完全冇比人打斷，聽晒隻NEVERMORE新碟，再聽晒隻AETERNUS新碟，整多隻AMORPHIS新碟，唔爭在重溫多次ARCH ENEMY新碟，冇野做聽多鑊AMORPHIS新碟，之後先叫做有人上黎。真係成日都冇乜人，係想搵個人入黎混吉都冇，根本成個場都靜到喊。我係得閒到可以打電話比個鬼婆客卜appointment。灰到爆。成日完整地聽左好多隻碟。呢ｄ日子，最適合寫碟評。

「．．．糧尾卦？」
我只有噉樣同自己講。

夜晚Ant哥上黎。第一句贈佢係
「唔好意思呀下！我地呢度冇TRIVIUM賣！唔好意思！」
呢句說話，我都唔記得講過幾多次了。呢無數次之中，只有兩次唔係聽到冇TRIVIUM賣即刻走人。一次係試多幾隻然後執隻DARKANE因為「佢地似TRIVIUM」，一次係今次，冇TRIVIUM，都執隻EXODUS。（不過其實都唔關佢同TRIVIUM事，哈哈哈）

日頭份工開始忙，夜晚份工今個禮拜如無意外整左好耐之一單大搞作會如期實行，所以呢個禮拜段記應該會好短甚至冇，online時亦同之前一個月一樣唔多會見到我出聲（先撩者賤另計啦）。因為太多野搞，無論日頭定夜晚。等星期六日吧。

再提一提大家，而家TRHK加開星期一晚7-10，所以星期一有時間又順路都可以上黎兜兜坐坐，好似Rock爺今日噉。記得上黎啦，我都唔想個個禮拜一好似今晚噉連聽四隻碟加寫多篇碟評然後走人返屋企繼續做野。

有興趣，上上TRHK@MySpace睇睇。TRHK有好多friend。包括OPETH同DISSECTION。

朝早食個餐蛋治，晏晝食個餐蛋飯，下午茶食個餐蛋通，仲有咩未食？
「呀．．．俾多個餐蛋粥我丫唔該。」
餐餐餐蛋餐餐蛋。我愛餐蛋。

一個禮拜只得星期三叫做可以放下假，而今個禮拜星期六之前亦只會有今日有野睇。今日準時放工，之後大角咀行返屋企，返到屋企再帶隻狗落街行半個鐘街（正確黎講係佢帶我行半個鐘街），然後又行出旺角，行咁Ｑ多因為連續咁多餐餐蛋，夜晚仲要打冷，唔行番兩三個鐘，聽日著褲爆得紐。你班衰仔咁難得話出黎食飯仲要就晒我星期三晚，冇得唔出啦！（大大聲先：「拿阿邊個！唔係我（地）放你飛機呀！係你放我（地）飛機呀！」幾大大大聲先呵呵呵）但出到黎除左知道「一定唔打邊爐！」乜都唔知。然後又行，旺角行去油麻地再過佐敦又過番去油麻地。雖然各位同學打冷打得好開心，劉Sir都係要打邊爐先至慣，結果要拎個羊肉煲黎烚肥牛先叫做飽到下肚。各位同學，下次約劉Sir出黎食飯，記得要打邊爐先唔會餓親佢架！
各位同學好明顯睇到劉Sir係拎定成疊銀紙出黎比各位浪費，但你地硬係收劉Sir五舊水咁大把，噉我都冇計啦！拿唔關我事架你地自己犯賤咋！即係你地出得黎，劉Sir都唔會孤寒得去邊。噉你地唔識得珍惜，下次開始，劉Sir淨係會坐係度食，你地負責養劉Sir！多謝晒！

TRHK@MySpace搞左幾日，多左好多friend，例如好多thrash友，好似TESTAMENT、KREATOR、FORBIDDEN、HEATHEN。成日話想知道邊度有得試聽thrash野的話，入TRHK@MySpace個friend list搵link就有得試聽。當然，亦可以試聽埋其他好多band好似OPETH、VITAL REMAINS、NAGLFAR、DEICIDE同DISSECTION新歌，MySpace實在係一個非常有效加偉大之發明。亦都唔怕倒trhk米，HEATHEN個官網係有齊晒佢兩隻碟download，包括絕版之"Victims of Deception"。我敢係度講，就預左好多人會download完之後唔買碟，或者因為我仍然一廂情願地相信有心聽音樂ｄ人download完MP3聽過之後鍾意，真係會俾錢買碟、真係會買番隻碟支持隊band（你黎TRHK買碟，TRHK唔會賺到你幾多，但隊band係真係搵到錢）。如果你係有得聽就算數，或者永遠都係只想有得聽唔使俾錢買碟，就唔關我事喇。我只係幫隊band推廣。噉你覺得支持左，就支持左啦。或者好多野都只係我一廂情願遮。
有興趣的朋友或樂隊，不妨加入TRHK@MySpace個friend list，入左之後起碼其他國家ｄ大band同label有機會睇到你個MySpace聽到你ｄ歌。識有ｄ外國，就係因為放自己歌上MySpace同搵好多band/label/producer交流，比其他外國band/label/producer聽到佢地ｄ歌，大家再吹吹水，就發生一ｄ不可思議之事。或者你當係吹水啦，
「TRHK係咪咁Ｘ把砲咁Ｘ威呀？」
嗯．．．又當係我一廂情願算啦。

新加坡：「咦？乜今日咁早online呀？」
香港：「請病假丫嘛今日！唔係病假你點會十一點前見到我丫！咦？你又咁早？」
新加坡：「咁蹺？今日我又係請病假喎！」
香港：「唔怪得你又咁鬼早啦小你！」
小病是福。

麥樂雞：「請問而家買麥樂雞仲有冇卡送呀？」
麥當奴：「一早派晒啦！」
麥樂雞：「噉幾時會再派呀？」
麥當奴：「唔再派架喇！」
麥樂雞：「但係張卡四月尾自完架喎個活動？？？」
麥當奴：「總之派晒啦！冇得再派！」
麥樂雞：「我果時食第一盒拎到左下角，第二盒拎到左上張，第三盒拎到右上角，之後食左四五六七八九Ｎ盒都冇隻右下角，我ｄ學生個個都係噉食，有個直頭一餐食成十幾盒，一張右下角都冇喎！到底你地有冇出過右下角架？定其實印得三張，第四張唔印呃人錢架？」
麥當奴：「有！右下角有出過架！」
麥樂雞：「噉邊度有？」
麥當奴：「上eBay五百蚊張！」
麥樂雞：「．．．多謝提點喎！」
就係見有得免費換麥樂雞，冇食大半年麥當奴都專登幫襯番半個月，點知又係比麥記昆。灰。

客人：「唔該，有冇呢隊bandｄ碟呀？」
劉Sir：「呢隊bandｄ野絕左版，入唔到架喇。」
客人：「呢隊冇？搞錯呀！！！」
劉Sir：「十幾廿年前隻碟已經冇出，我都冇辦法架！我可以有乜計？我幫你上網買，要買五百蚊一隻，你肯唔肯買？」
客人：「．．．．．．噉有冇呢隊band隻新碟呀？」
劉Sir：「佢地隻新碟外國都未出，所以未有得買住。」
客人：「隻新碟冇？搞錯呀！！！」
劉Sir：「隻碟下個月先出，我都冇辦法架！我可以有乜計？叫隊band早ｄ出碟？」
客人：「．．．．．．總之搞錯啦！乜都冇！搞錯呀！！！」
劉Sir：「．．．對唔住呀下！真係對唔住！！！」
以為講笑？如果我話你聽呢單野唔係真人真事，就真係講笑喇。

過左呢壇野，今日開始叫做得閒番ｄ（「ｄ」遮，黎緊仲有好多野搞），之前有事但冇理你的話可以搵一搵我喇，我亦會陸續搵番各位有關人士（算帳）。終於可以有覺好訓可以早少少訓覺，唔使晚晚做到兩三點先走得。但咁早訓主要原因，係星期日朝早都要返工。禮拜日仲要做野，好Ｑ慘架。（「超！等你仲星期五唔返工丫拿！」）前兩個禮拜係夜晚忙過日頭好多，今個禮拜開始調番轉，一直到五月尾都會忙到九彩，黎緊復活節四日紅假都要返工，五月頭仲要過美國個幾禮拜忝，到時我都唔知點算。（當然可能原來冇乜事，四五月不嬲都係淡季黎啦）
禮拜日返工，自然要有禮拜日feel。十點幾返到，當然係食個早餐先，上多陣網十一點幾先施施然開工，當然係焚住機做啦，成間公司一個人霸晒真係好鬼free。夾埋聽左好多野，先黎野NEURAXIS全線，我天生真係同一ｄband有緣，好似呢隊NEURAXIS，之前係未聽過佢地ｄ歌、未聽過佢地個名、完全冇睇過佢地ｄ資料，唔知點解第一次見到佢地隻碟同個名就知道呢隊野我會好鍾意，跟住唔使煩即執晒全線，果然係正我杯茶，而呢個「齋睇名就鍾意即執全線最後發現的確係正野」個案亦發生超過一次，或者我呢ｄ真係天生要聽metal啦。（咦，或者我仲適合做經理人或者測字？）雖然呢隊野網上評價一向唔算好高都係二線頭一線尾，佢地隻modern technical death style我自己十分鐘意，第一隻碟似CRYPTOPSY，第二隻碟加ｄprogressive，第三隻加ｄmelodic thrash death，第四隻即係05年隻新碟夠爆，冇錯比佢地好大有人在，有ｄ歌的確係聽得出有瑕疵，但個feel鍾意就係鍾意，唔好唔代表唔好聽，同VIPERINE一樣道理，有ｄlo-fi同raw同「真」之感覺只有二三線樂隊同indie單位至俾到你，最大最出名果ｄband點聽都唔會聽得到。順帶一提，今批貨到果兩隻NEURAXIS已經包晒佢地四隻碟，即係兩隻碟價錢包晒佢地全線，有興趣不妨諗諗。不過都預左冇人會理，呢一類玩得好但唔出名band係香港永遠唔會賣得出，到現時為止，佢地ｄ碟得兩個人買過，包括埋我。NEURAXIS全線之後整多隻RUNEMAGICK "Darkness Death Doom"，冇野講，我心目中之doom death經典之一，唔止音樂，隻碟個封面都好鍾意，聽到有ｄ興趣訂呢隻碟件tee返黎。最後整埋IMMORTAL "Sons of Northern Darkness"成隻，絕對地唔black，又唔夠heavy metal/thrash，但我鍾意果隻epic feel，今年其中一個目標會係追番晒IMMORTAL全線。可以聽咁Ｑ多野，就知道今日做左幾咁耐野幾咁「多」野。
就係咁頹。做做下眼訓訓鬼左佢算數，訓訓下老細返黎都已經懶理喇，由我訓算。
「訓啦！訓飽佢啦ＸＸ！」
所以點解老細咁鍾意我。
話時話，真係好耐冇茗報，亦更耐冇睇廣告。當報紙從最初全書面語變到白話同書面語兩溝，睇見都唔開胃，所以其實我係好唔鍾意睇《蘋果》，佢地ｄ中文完全係教壞細路，看見佢地可以的的了了當中加左ｄ遮呀了呀這樣，真的好鬼死難頂。廣告，由以前真係有心玩野玩無聊，到而家唔係夾硬黎完全唔好玩唔好笑就係賣明星賣女，冇癮，已經冇興趣再睇喇。

今個月終於似番樣 － 我係講緊我，TRHK就甭提，睇我今日可以睇左THE GATHERING隻新DVD "A Sound Relief"兩次（睇post-rock＆dream pop密切留意，呢隻DVD就係玩靚女聲dream pop + post rock），再聽晒EWIGKEIT兩隻碟（第二水都到埋依然係問都冇人問過，其實係一隊techno+ambient之德式dark electronic prog-metal），就知道今日TRHK幾咁靜，尤其是播GATHERING隻DVD，門口經常有人駐留圍觀。我個樣就係前幾次都係一大棟野拆開幾鑊每個禮拜陰ｄ陰ｄ噉執，好耐未試過咁壯觀一野執咁多，回來了，近排亦都怒拆以前儲左果成疊碟黎聽，聽到好多野。每有新貨到都係執野時間，但同你所諗唔同，到左新貨我唔係執新到ｄ野，而係執上一兩批貨ｄ野。既然TRHK隊新band VEDONIST出左，就係時候執講左好耐之DECAPITATED全線，四隻一次過搞掂。
「VEDONIST同DECAPITATED又關事？」
其實除左大家都係波蘭同大家都係廿零歲後生仔，不無關係。最主要原因都係，呢隊野新碟都出埋（非常有趣：今年咁多death metal勁band出新碟，但網上唯二有人提係CANNIBAL CORPSE同KATAKLYSM，其他好似KRISIUN同DECAPITATED講都冇人講）（又提多樣：「咦，前排咁多人提KATAKLYSM新碟，點解而家到左成半個幾月，一隻都冇賣過？」），到左個幾兩個月依然接近冇賣過，連DECAPITATED都可以變成死貨，可以點做？點做？我買囉．．．也是NEURAXIS的道理：任你玩得點好，冇hype就唔會有香港人理，香港地始終都係要有人講起ｄ人先會開始搵。仲有CARCASS（好在等得到呢個original gore artwork版出，所以我永遠唔急買碟），你話唔出名唔買唔奇，但連CARCASS咁出名都冇人會問會買．．．老餅過頭卦，又唔似新碟噉有網頁同雜誌谷，所以又係得我呢ｄ老餅執啦。其餘果ｄ，提唔提都罷，都係一ｄ無聊的死貨，一係其實就係訂比自己之玩野，一係係僻到「有性趣」人士都唔會有性趣之超死貨（仲記得呢ｄ朋友嘛？原來「有性趣」的朋友都好耐冇蒲頭了）。好多呢ｄ野其實理論上唔會冇人要賣唔出，玩得好，外國又叫做有知名度，但理論上係噉，實際上黎到香港確實係另一回事，正如你係要technical death、要suicidal black，根本大把放左係度，但唔係邊隊所以唔試唔要，噉算啦。入左兩個月，成間Earache成90%野入左，呢個算係好驚人之創舉，Earache自己都講根本未遇過有一間label會入咁多同入咁多唔同band，但結果發現其實都唔使入咁多，因為各位入到黎都只係搵某幾隊，最出名果幾隊，亦即係Earache所有樂隊當中之10%唔夠。當連真係玩band果ｄ都係望望個架冇一隊識就走人算數試都唔會試新野之時，明白到有陣時真係唔使咁搏咁有大志，根本大家要求都好低。都係膚淺ｄ好。
努力捱番半年，開始墜入衰退期之跡象再次出現TRHK，好似ｄ架越黎越滿、death/brutal death/grindcoreｄ碟可以排滿成行，按照以往經驗，當death/brutal death/grindcore滿足一行，就代表唔可以同唔能夠再入新貨了。又係估計錯誤，好多野TRHK以為夠pop夠大路夠多人提會賣得果ｄ，結果係成棟放係度完全冇人過問，始終外國唔同香港，外國受果ｄ，香港往往調番轉。睇我今晚係可以執DECAPITATED全線加CARCASS，呢ｄ野居然會多貨淨到我終於可以買 － 換著以前，我係被勒令唔准買，因為呢ｄband好大機會有人買，再睇睇連DEATH呢隊係聽death metal根本七隻碟都可以即執加冇可能唔執而而家係成箱放左係度個幾月賣都冇賣過，就知道，冇喇。盡喇。
或者要像某forum某朋友所言，TRHK要入TRIVIUM呀MASTODON呀呢ｄ同埋band tee，先會有人上（番）黎，就算人人都知美國band根本就係跟住歐洲個趨勢抄歐洲melodic death黎造hardcore，講同一種音樂歐洲band亦絕對玩得好過美國band（抄襲有幾何會好得過原創丫），但就係唔會搵歐洲metal野聽，因為傳媒＆大眾成日提住果樣係metalcore而唔係melodic death，而歐洲玩果ｄ唔係叫metalcore；同埋對band友黎講，買band tee絕對緊要過買band CD，但TRHK新入band tee亦唔代表會有人買，因為一日唔係入TRIVIUM、LAMB OF GOD或者RHAPSODY、OPETH，一日唔會有人買，因為ｄ人唔會買為件tee靚個設計好而買，而係睇隊band識唔識唔識的話點靚都唔會買。自從metalcore當道，已經唔見左好多當年「熱心聽metal」人士了。

今日好多野做．．．應該話今日開始黎緊日日都多野做。以往十點已經坐係度寫住碟評等食飯再等放工之光景不再（差隻"Time Does Not Heal"寫唔完，遺憾也）。係超極多野做，不過搏晒老命做六點半即閃人，要開舖嘛。因為TRHK，日頭份工的確係落力做好多。老細應該特別嗚謝TRHK同Metal，因為呢兩樣野，佢先會有呢個全公司最搏殺員工。
同場加映經理lunch先講搞到各位食緊lunch同事笑到噴飯的故事。
「邊個經理？」
邊個經理？回到上年十月廿五，就知道邊個經理。劉Sir老左，都會係噉Ｘ樣。所以如果劉Sir一直做落去（而間公司執唔去），經理退休之後，一定係我承繼。

所以要咁搏，因為七點趕到已經三個人等緊。仲諗住大家依然當星期一唔開，點知一見就見番咁多人，比兩個靚妹玩完之後（冇錯，劉Sir今晚比靚妹玩，玩到好鬼開心（I meanｄ靚妹）），聽埋EYES OF FIRE新碟disc 2首五個字長歌，輕輕鬆鬆地走人（佢地新碟，實在係進化得太犀利）。而家變到夜晚開心過日頭。黎緊兩個月都會係。
最開心，係終於開到齋，包括NEURAXIS同NIGHTWISH "Century Child"。前者果位客人會買，好簡單，因為佢唔係「有冇（band名）」，而係「有冇death metal野聽」，果時我又聽緊隻NEURAXIS新碟"Trilateral Progression"，試左幾首，再試多幾隻碟，揀左NEURAXIS，再加多野又係加拿大之INTO ETERNITY "Buried in Oblivion"。後者，其實係佢地"Oceanborn"之後"Once"之前最正果隻，就係永遠唔會有人買。到左咁耐（幾耐？上年年尾已經見了），今日先第一日有人買。或者因為NIGHTWISH都已經out了。

．．．過左禮拜日兩壇野仲以為可以舒服ｄ，點知琴日朝早做到夜晚支力到好早訓之後今日一朝早又做到夜晚．．．原來噉就兩日。做到唔知點噉忝呢幾日。好耐未試過七點先放工仲要未做得晒今日ｄ野。

咁遲先走，立即超極速飛過皆旺。
「星期三喎！」
噉有人出到聲要今晚上黎買碟，我實會奉陪架啦。呢位朋友都好識做，
「知你趕架喇，特登買定罐寶礦力比你補充體力！」
「你係就買多隻碟好過啦小！」
雖然冇上次咁好彩一不離二二不離三，但有番幾隻都算好。諗緊第時係咪真係要做呢個週三電召開舖服務。

難得忙左咁多日，呢個禮拜三都係唔玩留番係屋企小休。先黎DECAPITATED全線，一來夠短四隻碟兩個半鐘搞掂（黎到呢度，有ｄ朋友會大大聲：「原來得咁短！梗係唔買碟啦！」），二來由MORBID ANGEL變成MESHUGGAH一路變一路正，噉要揀我呢ｄ鍾意實驗野當然係鍾意後期ｄ野，不過四隻都好鍾意，又係同NEURAXIS一樣，因為知名度唔高所以網上評價一向唔係高亦唔會有人搵有人理，但果種modern technical death令所有碟都係我心頭好。之後冇乜聽野，因為走左去睇電視。原來好耐好耐冇睇過電視。開電視最主要原因係今晚首播"Invasion"（手痕上Wikipedia睇睇，原來香港播呢套野會大件事到上呢個網）。會睇，唔係因為特別好睇，而係因為呢一套係唯一一套我有時間追之電視劇。

做野＞入pantry搽麵包＞做野＞入pantry食蘋果＞做野＞入pantry食蕉＞做野＞入pantry食飯＞做野＞入pantry食下午茶＞做野＞繼續做野＞噉就做足成日。好在今日最後半個鐘可以重拾冇野做等放工的樂趣。

靜。所以，早ｄ返歸算。

是晚，都係DECAPITATED全線。就係貪佢兩個鐘玩晒，同埋夠爽，唔係要訓覺一定焚埋NEURAXIS全線先訓。即係我地呢ｄ咁夜先返到屋企訓前得幾個鐘，一隊band聽得佢地一兩隻碟嫌唔夠喉，呢ｄ一陣仔就焚晒佢地所有碟之band最鍾意，呢個亦係鍾意DECAPITATED & NEURAXIS原因之一。唔知幾時先再有時間DEATH同KATATONIA全線一鑊過，真係要噉玩，基本上係一朝早要勁早起身聽聽完之後已經深夜訓得覺。

全日最特別，係SOLER add左TRHK MySpace。佢地個friend list都有好多本地同外地metal band（有六翼天使），但會add TRHK，係神奇得不可思議 － 衰ｄ講句，中港台地區metal band都唔會add啦，睇個friend list就知超過九成都係外國band仲要係我地呢ｄ見到會「嘩－－－∼∼∼！？！！」果隻，或者「係香港搞label之價值就係比人anti-label」的確係事實啦，但居然SOLER呢隊點睇都完全唔關事會add。點解add同add黎做乜我都想知（始終個MySpace我都只係得個睇字），我只關心，
「SOLER幾時落黎TRHK？我要影相握手加簽名！」

一日內發生太多事，冇癮，亦好麻煩。黎緊可能會有好大件事發生。唔使問發生咩事，如果真係有事發生，自會公開公佈；冇聲氣的話，即係冇事，亦即好事，亦係我所希望。