過完場騷，仍然意猶未盡，公司生活超頹。好似今日朝早，老細唔係公司，當堂勁hea（雖然係度都係咁hea），聽住謝安琪食雪條，今日朝早原來有客上黎我地公司，兩位客人見到應門果個係條band tee涼鞋長毛仲要聽住歌加擔住支雪條，未入門口已經定晒型。
「我地係咪搵錯地址？」
我若無其事亦冇佢地咁好氣，走番入pantry繼續食野同坐。
「唔係唔係我係呢度！你扮見唔到呢個人得架喇！」
經理拿拿臨拉左兩個客入會議室。兩位客人仍然係唔敢入黎。基本上呢個就係全日的寫照。都係頹頹地過。現在的生活，已經頹非昔比了。

今晚，只得一人：梁生。上個月放左半個月大假，上左北京玩左個禮拜，上星期先返到香港，琴晚返夜班時上一上黎，通宵之後返屋企訓醒覺又上黎，同大家分享今次北京之行。
「果度有條街，成條街都係賣樂器，搵到兩間賣metal野，一間係《重型音樂》間舖，但係成間舖先得四隻碟賣，其他都係賣雜誌賣band tee；另外搵到間666 Rock Shop，係同你地聯絡開寫雜誌果個人開架！果度細，但係多好多野買！起碼我有幾隻black metal野想搵，係果度都搵得到，仲執到ｄ大陸band！」
當連全港聽black metal聽到最癲的梁生都滿足得到，就代表真係好勁好underground。
「唔止呢ｄ架！當然唔少得同佢講下你是非，雖然我普通話係有限公司，都夠同佢一齊小九你！」
原來我臭名遠播到北京都咁多仇家。大劑。叫得全港聽最多black metal果個，上得大陸，當然有ｄ斬獲。帶左兩隊落黎，包括係「好似MARDUK」的復活同「同CRADLE OF FILTH一樣」的異端。聽完兩隊大陸black metal band，歌得、技術好、錄音靚，大陸band軟件同硬件之水平，已經大幅拋離香港。黎緊十月頭仲有個為期兩日的極端金屬音樂節。香港，爭氣吧。
「廿九號果場騷，我都想黎呀，但果日執屋執到塊布噉！」（第一次聽到呢個形容法）
難得放大假，梁生特登為佢屋企果千幾隻black metal CD同幾百隻unblack metal CD裝番個入牆櫃好好安置。
「之前冇乜時間執，ｄCD裝左幾箱咁多，再戙左幾棟，仲有幾箱未拆過黎聽忝！所以上個禮拜就叫師傅黎我度裝番個櫃，我要成間房ｄ野清晒，連張床都拆埋出黎，先裝得到個櫃。個櫃我訂果時已經度好晒架喇，一個CD盒一隻六寸七分深，我同趟門，再預埋入牆螺絲釘可能會頂出少少，預佢七寸就實冇死。呢幾日比較忙，裝完個櫃之後要搬番ｄ野入房，又要抹，扭毛巾扭到隻手成隻紅雞蛋咁腫！裝完個櫃都仲要補補，幅牆起屋時做得唔靚個櫃貼唔到，要用ｄ紅毛泥補補ｄ窿杜蟲，個櫃本身又有ｄ位唔係好靚又起角，咪用手指抹玻璃膠封下ｄ窿位隙位等佢睇落平滑晒。跟住仲要入膠袋，我隻隻碟都要入膠袋架，入完再磨平膠袋等ｄ碟貼服排齊，淨係膠袋都買左成千幾個！我好完美架！」
一絲不苟，梁生當正呢個櫃同呢千幾二千隻CD係藝術品噉看待。事實上亦都係。
「等我執好晒野裝好個櫃之後，一定影張相俾你睇下！」
「絕對要啦！咁狀觀！」（唔知我屋企果三四千隻碟又使唔使噉樣藝術一番？）
雖然係老坑，但非常好傾，跟住梁生又講番佢由韻彙到God's Child到TRHK、由rock到metal到extreme metal到black metal到而家已經聽到化境之音樂歷程，亦講講見到連佢聽到噉都會甘拜下風之人，果真人外有人。另外，原來梁生呢個不平凡阿叔身邊，仲有另一個不平凡阿叔。呢個阿叔係佢同事，老佢幾年噉遮，梁生係專聽black metal，呢個同事就專聽progressive rock，專到自己買書睇歷史再搵碟訂果隻，而佢係香港progressive rock之地位，應可以話等同於梁生於香港black metal之地位。人外有人。
傾左成晚之後，我發覺梁生同我一樣。同我一樣咁無聊。

唔知係咪真係因為我？呢間公司真係越黎越hea。今日我差唔多冇做過野。朝早仍然係《曹博士七問七答》，近排曹博士同高登友冇貨，冇咩笑料喎。可能悶過頭，睇睇下悶到部電腦都死左，其實只係非常非常非常小的問題，但我立即大做，成個office剷完再入個，之後再成個Windows re-install，慢慢一樣一樣野入番去，而我成日就係坐係部電腦前面，睇住部腦裝野。過程中我當然係扮住睇實部機查實係噉訓啦。當堂警告部機：
「拿！你唔好咁多好番呀下！」
lunch食完粟米煙肉咖哩香腸牛腩煎蛋飯同埋咖啡煉奶麥皮華田（請自己想像一個飯盒／一隻杯點樣可以裝到咁多野食／野飲），訓醒覺，繼續整機，亦即係繼續訓。場騷之後真係日日都睏。三點零鐘，點眼訓都醒晒，因為老細同老闆娘走人，兩個踏出門口唔夠十秒，成間公司已經反轉左，經理帶頭唔做野，我地呢ｄ做細點敢唔跟從（我愛經理！）。三條友匿入pantry，沖杯野飲食住西多吹下水，連經理都入埋黎一齊癲，笑到成公司都狂小，噉就癲左一個鐘。夠晒頹而家。之後？老細都未返過黎，梗係位都冇埋過啦。
而家就係咁頹。

今個禮拜星期五中秋節唔開，今日開舖架所以，但好多人都唔知，所以好靜。撞番107。上星期四出發，琴日落機，今日返上舖頭，
「成個禮拜去左邊？」
「去左食蒙古包！六十人裝果隻！」
冇錯，成個禮拜就係走左上去呢個內蒙古窩闊台汗國，
「我表妹嫁人呀！」
「嫁到去內蒙古咁遠？」
「去和親卦！」
而107的一氏家族（係呀佢真係姓一名零七架你唔知咩），就總動員去觀體，由香港去窩闊台汗國好簡單，先去深圳轉內陸機去北京，再轉機就去得到，
「呢架機一個禮拜得兩班，即係落左機留最少大半個禮拜先有得走人！仲要夜晚冇機一定要日頭上機，回程果時要卜架的士，坐成十個鐘返北京上機！」
大家都覺得呢ｄ汗國地區好落後，原來又唔係，基本上ｄ設施同香港差唔多，係殘Ｎ倍噉解，同埋超級污糟成街烏蠅，
「ｄ黑點多到成舊雲噉飛埋黎，就噉行過件衫都黐住幾十條烏蠅屍！」
而最正係果度日頭廿七度夜晚三度，夜晚想沖個熱水涼，只需要開住個水喉一個鐘 － 冇錯係一個鐘 － 就會有ｄ似我地而家開水喉咁「熱」的「熱水」你沖。呢ｄ生活環境，都唔係令佢極速仆返香港之原因。最主要原因係
「蒙古ｄ女，真係好核突！」
不過都有好野，就係食，除左食蒙古包之外（「喂，你唔係以為蒙古包真係食得架嘛！」），仲有超抵食自助餐，乜叉都有得食先至係HK$13！！！小婷姐之前推介之雲南過橋米線，食過一次已經成為TRHK最新指定食府，今晚107一返到黎兩條友又發癲，一人一個麵再加ｄ小食，加下加下就每人六條。
「去完蒙古之後，返到黎香港，食乜都覺得好叉貴！」

又係發癲吹水玩玩玩就一晚的一天。收舖之後，聽電話。十點幾收到意想不到的來電：
"METHOD!!!"
METHOD返到韓國，歌佬Alex特別打電話過黎報平安。而家係韓國果邊thanks giving day，放埋今個禮拜假，下星期又要開始搏殺。相處僅短短四日唔夠，大家已經一見如故，因為大家態度一樣：做事，都係冇機心，為音樂，而唔係為型、為賺錢、為唔係為音樂而做。你有見過歌佬台下好小朋友果個樣，就會明我講緊乜，同我同佢相似之地方係邊。
第二個呢，犀利喇！你已經知道咩事喇！

今朝早餐係食薯片。冇計，真係太多喇，會計靚女唔知係邊度買左個超勁珍寶裝枕頭咁大袋珍珍薯片，袋入面Ｎ包細包裝，多到自己張檯個櫃都裝唔晒，唯有食定幾包清清先。到左今日終於過左國慶假期，大陸ｄ公司同工廠開番工，開始要做番ｄ野喇。實在係非常眼訓，場騷之後到而家都冇日有覺好訓，尤其是突然間又咁大壇野出左黎（你知邊壇架啦）。lunch之前直頭係坐係度狂訓，隻右手捉住隻mouse震下震下扮做緊野，真係好難頂。lunch一搭正立即衝入去pantry超極速個半字清晒三盒飯中之其中一盒（即係今日下午茶＆晚餐已經有著落啦），咁鬼死早，因為兩點即係lunch一完立即有客見，唔把握時間訓番半個零鐘，真係見見下客暈低都似。
「ＺＺＺＺＺＺＺＺＺ．．．．．．」（見客時我對住個客就係噉款）
晏晝想訓都冇得訓，今日淨係收message同電話，個電話三格電都玩到得番一格。實在係太忙，我都冇計：
「今次中秋trhK出師不利喎！打邊爐再搵野玩下算啦我地！」

夜晚，仲係咁忙，唔係生意（TRHK永遠都係咁靜架啦），係黎緊ｄ搞作。聽晚壇野，唔係舖頭有電話，今晚已經玩晒呢個月電話費，但都係死架喇，淨係今日之短訊錢，都夠大劑架喇。
「所以各位唔好辜負劉Sir一番好意，務必出席呀下！」
再收多幾個電話。好有趣，其有一個係行家打黎。當今呢個世代，搞label呢家野，真係等同於燒銀紙，特別係幫一隊外國地下band出碟，基本上唔好話幫隊band維持，連維持自己間label都難，除非係做本地band、做（本地）明星band，噉先有機會維到皮加賺到錢，因為有一個事實大家都知：一隊香港band出碟，自不然會有大把人叫你買，甚至你會自動自覺去買，因為係
「支持underground music！」
但當係幫一隊外國band出碟，就算係相同style甚至水準更高，你都唔會特別去買、唔會特別叫人去買，因為「唔係香港人」，同冇人叫你去買，
「身邊ｄ朋友冇俾過我聽，我又唔識！」（面對現實吧，underground入面一樣有「pop野」）
同埋
「香港band同我朋友隊band出碟，梗係買碟支持啦！但係外國bandｄ碟邊有錢買丫！我download架咋！」（呢樣野我真係聽過）
加上全世界都苦惱緊、導致幾年間勁多獨立label執笠之mp3問題，真係有心賣唱片，根本係冇可能經營到落去：賣pop野都做唔住啦，更何況係連「我好underground」的仁兄都唔會買的underground野？但呢ｄ問題，都唔夠一個問題嚴重。又係好多音樂人包括我身受其害、完全同音樂無關的無稽問題。香港band界多勢力同圈子問題，呢樣野人人都知，都唔使講咁多，諷刺在，而家攬住呢ｄ勢力同圈子，對某ｄ人／某ｄ樂隊黎講似乎比玩好同推廣自己果種音樂更重要。呢樣先最有趣。所以當可以有人唔係有錢仔、完全冇影響力同勢力，都可以一面做茶餐廳呢ｄ低下職位一面堅持理想，用已經唔係多之人工同積蓄維持住一間只可能蝕本之label，我會尊敬同尊重。
跟住再黎一個，都係講果壇野啦。好有興趣知，次次搞親騷好多人都會因為唔係出名band而唔會睇，今次搞到隊全球最頂尖級數之prog-power band（當然，對某ｄ人黎講，唔係DT就唔等於出名＆唔等於勁），唔知又會有幾多人黎？未知，只知有兩種人一定唔會見到，除左頭先講果種，仲有一種，就係
「都唔係我聽果種metal／果隊band！我唔去睇啦！」
所以我好懷念當年只要一見有metal band出騷，唔理係邊隊band（香港本土都唔多人識，更何況佢地）、唔班係邊種metal自己識唔識有冇聽過聽開，總之係metal show或者場騷有metal band就去睇果班尼泊爾仔。可惜全部已回老家矣。

為左各位中秋夜的福祉，今日收舖之後特登走過去創興洗樓，睇定邊間打邊爐又平又正。回程時經過新之城，手痕，又落一落去先。一唔覺意，今晚終於一舖一格血爆Time Crisis 3，係唔覺意到爆左我都唔知咩事，自己都有ｄ面對唔到。係咪真係咁易呀？
「多謝！多謝METHOD！」（「又關事？」）
黎左半個月都冇，部過山車版House of the Dead 4，冇左新鮮感，已經放左係度冇人玩喇。真係好擔心老細點回本。
「喂！107！我地幾時再落黎癲過？？？」

「今日中秋節，全公司四點放工！」
「灰！！！！！」
灰到爆忝啦！係四點放工，不過唔關我事！為左ｄ單，萬九幾樣野搞，就係今日早放工先黎有事，四點之後仲要坐係度stand by等到「另行通知」先走得。灰到爆，搞到打亂晒計劃，lunch要特登飯都唔食覺都冇得訓，飛出尖咀拎番部cam俾B哥執埋METHODｄ片。最灰，都唔係呢樣，係冇得走之餘，呢ｄ加班係被當奉旨地冇得補水補假。
「乜都冇得補，即係唔當返工啦！」
所以一搭正四點，其他同事一個一個地鬆人時，我乜都唔理撻低訓覺，訓醒，咪寫下野聽下歌囉，總之人在心不在，冇得走我一樣當自己四點鐘放左工，反正咁早唔係Time Crisis就係上皆旺，俾我涼住冷氣聽歌寫野攝下時間我仲開心ｄ忝。如果唔係今晚打邊爐，我係會非常唔客氣地打電話叫埋下午茶上黎食。我就係一個當老細咁冇到的惡劣員工。
夕陽公司就有呢個好處，反正唔做三十六，做左亦唔見得會多過三十六幾多，與其係噉，頹頹廢廢過日辰好過啦，係賺得多的話，我自願OT同你搏盡佢又點話！問題係賺得（完全）唔多嘛！

「另行通知」，已經係五點半 － 算早架喇，本來話六點半先有得走。立即走人乜都唔理。今日本來唔開舖，但噉又冇野做，留係公司又留夠唔想繼續坐係度聽歌寫野，結果打番舖冇乜癮的Time Crisis後（一格血爆機的奇蹟，似乎有緣先會再現），都係走番上黎。唔知點解，之前已經講左唔開，點知今個禮拜最多生意反而係今日！莫非我呢條真係犯賤命？開舖另一個原因係今晚開飯前等大家集合攝時間。窩闊台汗國歸港的107終於有番ｄ手信俾我地，包括「全蒙古唯一入到口」的窩闊牛牛肉乾，同埋點樣食都係咁難食佢自己都食唔落就轉交俾我地之艾麗亞奶香酪乾。
「即係我都想買ｄ蒙古metal俾你呀！但果度ｄ人仲係聽緊錄音帶咋！」
真係冇叉用！睇我地契爺，西藏返黎，冇lama metal，都帶左隻lama rock同西藏pagan folk野益我地！西藏民眾已經超越左CD的層次，係果度你只會搵得到VCD呢樣野而一隻聽audio CD都冇。先黎「成立於2000年的西藏四人男子樂團」羚羊角GOAT HORN（好明顯個英文名係我作），呢隻同名VCD收錄左十六首歌，可能因為六年ｄ歌都有，有時真係唔多知佢地想玩乜，一時BEYOND、一時VENTURES、一時THE DOORS、一時LINKIN PARK、一時NIRVANA、一時KATATONIA、一時RED HOT CHILI PEPPER，連台灣pop都有，有首歌仲有個阿叔客串吹中國笛子！到底佢地係玩ｄ乜？我好有興趣知佢地一路係聽ｄ咩，冇機會問，但我知道其中一樣肯定係但其中一樣一定係"tr00 Norwegian black metal"，好多位ｄ結他聲同個鼓似到足DARKTHRONE。有ｄ歌仲要兩個歌佬一清一嗌加拆聲焚兩焚又轉清聲抒情，嘩仲唔係西藏progressive？十六個video，個個video都有唔同衫，有求祈衫亦有民族衫，呢隻VCD佢地都幾落本，而大半MV亦帶相當飛圖色彩，唔知點解硬係要有個西藏妹係度行黎行去再含情默默噉擔天望地，其中一首歌個女主角激似Zoie Tung。
「契爺！點解人西藏你西藏，你撞親ｄ西藏妹都冇咁高質素？」
睇見成員極娘的造型同笑到爆肚的CG製作（必睇講獵殺羚羊的《羚羊角》同埋齋呢樣已經抵晒之片尾字幕動畫！），我真係好想好想好想幫佢地搞番個MySpace，成為「羚羊角國際歌迷會 The International Goat Horn Fan Club」會長！然後有唐古拉西藏音樂風系列「Tibet Angel格桑梅朵」首張個人專輯《天嫁》，呢個西藏衛蘭（一睇就知呢個名係我地老屈俾佢啦），玩pagan darkwave同ARTROSIS式gothic metal（呢班友真係聽到黐左線），有ｄ歌中間仲有喇嘛結他速彈，有ｄ歌就超ENIGMA feel，係正不過羚羊角咁大個驚喜在前，格桑梅朵太過正常唔夠癮。仲有時間，又聽聽SKID ROW，hair metal當中，佢地、BON JOVI同MOTLEY CRUE都係最無敵果班，
"Eighteen and life to go~~~"
永恆的經典。所以邊播邊狂嗌。眾人曰：
「好在今晚冇K唱！把聲咁鬼嘈，同你唱肯定俾你煩死！」

trhK，取消，百九蚊一個人仲要可能唱三個鐘就比人踢出黎，唔合符經濟＆hea原則。非常非常遺憾（但你睇左上一段，會發覺遺憾只得劉Sir一個）。玩咩好？
「煲臘！」
我都好想，呢個永遠係最應節的中秋節節目，可恨我中二果年剛剛開始玩煲蠟，玩左兩年已經冇得再玩，因為中三果年政府立例禁左，自此以後的中秋節已經唔可以算係中秋節。冇K唱冇蠟煲，咪打邊爐囉。噉晚專登踩勻全棟創興格價，實際上都唔多使格，幾間酒樓係度鬥，大家平鬥平都係宵夜場$86全包。有得打邊爐我就最開心。點打？先黎一個鑽石能量湯底，
「用鑽石能量湯底涮肥牛，ｄ肥牛入口咬落鏘鏘聲！」
然後，噉打。一班黐線友，叫親都係「無限肥牛」、「超多包心丸」、「勁多魚蛋」、「無盡生根」，你見過有人張送紙會畫個infinity符號落去未？你同劉Sir一齊食就有得見架喇。記得食劉Sir最鍾意整果個肥牛粉絲烏冬喎！
「上年年中去完NOTHING NONE場騷拉隊去旺角食果晚，六包肥牛烏冬都係噉照食法啦！果時我已經研究到，肥牛烏冬呢家野，記得落左烏冬先落肥牛！」
呢晚成班友玩＆食＆嗌到黐Ｑ線，最正係呢度ｄ阿姐又夠癲玩埋一份，我地坐主家席位，食食下坐我地隔籬果ｄ一檯檯噉走，最後成個主家席位得番我地一檯，連經理部長都唔（敢）行過黎。可想而知呢班友係幾咁變態。有得食有得玩，今晚非常滿足，但係相信冇下次架喇，因為我係世紀黑仔王，去親邊間執邊間，花園金閣位於創興八樓，當年同一位置係福星，就係紅燈山丘中同八三三指定邊爐檔，一個爐有得食有得燒，果時最鍾意涮午餐肉燒肥牛。當年福星開女人街同創興八樓兩間，點知黎左創興之後，執左，跟住去女人街果間，連呢間總舵都執埋，福星從此絕跡於世。係我害死佢地。龍珠時代果陣，星期日收舖之後成日拉隊去屋企附件近間翠湖，因為呢度邊爐無敵，送多料正兼有得叫點心仲要係即整果隻唔係晏晝食剩送頭送尾，兼每人送半隻BB鴿，最強係有咖哩角，都唔使九十蚊，果時真係食到ＸＸＸ。幫襯左幾次之後，執笠，易手做左花園酒家，再食，再執。仲有九龍城間七喜，當年六翼04係度連開六七圍包晒全部工作人員同樂隊之慶功宴，我幫襯完之後，又執左。中五六七去唱Ｋ，係唱三十蚊lunch K其他時段都只係七八十蚊一個人又多英文歌同舊歌＆rock/metal歌之創藝，唱唱下，呢間正Ｋ又執左。我幫襯親邊間野，邊間野就笠硬粒。所以呢間花園金閣應該都命不久矣。知唔知點解我去親ｄ舖頭都執？因為次次去完之後，老細都會的晒全公司ｄ人出黎審：
「邊個俾呢班人入黎？邊個俾佢地係我地盤噉樣發癲法？」
人人有份，所以一次過炒晒，結果全公司冇晒人，唯有執笠。我係世紀黑仔王。
「噉點解你食左咁耐，大家食都仲未執？」
「因為我冇堂食過丫嘛！」

打完邊爐，就到我地super agent 107帶大家去見識的時間（咩agent自己諗啦）。
「去酒吧搵Kawaii啦！」
「我地太純情喇，呢ｄ活動唔係太好！」
「去邪骨！」
「邪骨冇女賓部，我地一行有男有女，唔係好方便。」
結果，去左砵蘭街．．．隔籬街棟高氏大廈ｄcafe。一撻上長梳化即刻除鞋，我係好free的，自從我兩三個月前開始鞋都唔著日日著涼鞋返工，而家非常之唔慣＆唔鍾意著鞋著襪（「黐Ｘ線！咩人黎！」）。都算幾多野玩，裝左幾部大電視播有線，今晚有線電影台係愛情動作片之夜，第一套《表錯七日情》，講乜我唔知，只見鍾鎮濤由片頭做到片尾，超過半套戲冇著衫，
「搞錯！好似鹹片都有劇情過你喎！」
跟住係章小蕙套《桃色》，更加無聊，最無聊係
「搞錯！唔係冇格仔咩？」
當可以拎部手提電話用cafe個network上網去全港最膠果個高登係噉爆笑，就知道呢群人真係無聊到發癲，可惜上唔到《曹博士七問七答》！又飲住咖啡玩遊戲，玩番點睇都係普通竹籤的所謂遊戲棒，玩法係戙起成束野之後放手等ｄ竹籤散落檯面，之後用任何方法係唔郁動到其他竹籤之情況下將ｄ竹籤拎出黎鬥多，對上一次已經係小學時，可想而知呢樣野幾文物，同呢晚無聊得幾折墮。大贏家當然係得三柱香的二寶樂。玩埋唔多掂的層層疊（同METHOD玩果次，好多好多，呵呵），終於要玩走唔甩的啤牌。七個人鋤大弟勁好玩笑到爆，加一減一陷棉胎之後，係勁pro的show hand，我地有專業荷官負責派台同導賭，並有cult到爆的對白，最後當然係死淨107&108兩個世紀之戰，然後108比107怒炒晒幾百億身家之後跳樓死（請鼓掌），契爺將全程拍低晒，希望遲ｄ有機會睇番，到而家諗番呢晚牌局都笑到仆。呢一場，絕對係tribute to《勝者為王》，呢套《世紀之戰》（呵呵）之外最經典亞視劇集。
賭呢家野，都咪話唔邪。今日起初，係由頭帶到落尾，最後成為同107共分天下之大勢力，但跟住立即輸到貼地。時運呢家野我係好信。中學時有次去同學屋企通頂，四條友冇野做，成晚係度賭魚蝦蟹大細，四點鐘之前我係賭聖，買十舖最少有九舖係贏，連買圍骰都可以開圍骰咁邪，果時贏到差唔多連莊都冇晒錢賠；四點之後，立即由大贏家變成大輸家，永遠係買大開細買細開大，十舖最少輸九舖，之前係有錢到每一舖都買番個圍骰通殺，一中就賠五十幾喎中一次已經抵番晒啦，四點之後仍然係噉買法，但有一舖冇買到，果一舖就係圍骰，最後輸番晒所有錢一蚊都冇剩。就係咁邪。吹脹。我係好信運數同命數。我係七字命格，人人都知架啦。

三點cafe都收檔，走到落樓，前路茫茫。酒吧cafe乜都係三點零收，通宵網吧冇乜野玩又唔發得癲冇乜癮，唱Ｋ唱兩個鐘咁大把都可以收成百五蚊一個人仲要「已經八五折左架喇」咁搵笨，唔知點算。有諗過返皆旺，但冇冷氣上到去唔熱死都焗死，三點半時發現，冇得揀，爛尾收場。107走左之後，大隊走去地鐵站，點知撞到傳奇之街頭歌手。唔知在座幾多人去旺角、尖沙咀或者銅鑼灣行街時，有撞過一個自己帶晒成套架生，擺兩個喇叭加部track機set埋結他同咪自彈自唱、個樣幾後生之街頭歌手，我撞過一次，係兩年前天星碼頭，第二次撞，已經係事隔兩年之今日呢刻。大家排排坐睇表演。同兩年前比，台風、技術同器材都升級了。基本上只玩兩種歌：哥哥歌，同BEYOND歌，最開心係玩左BEYOND差唔多完全冇玩過live之《農民》，呢首係我最愛BEYOND作品之一，第一係《為了你，為了我》，第二係《海闊天空》，第三就係《農民》，呢首同《長城》果種溢於曲詞之中國色彩，先係BEYOND最突出之個人風格。仲有張國榮《這些年來》，冇錯就係「激似"The Inner Circle"時期EVERGREY但絕對恆過EVERGREY」果首哥哥歌，又係愛歌之一，所以呢晚好開心。我仲做埋camera man拍低呢段街頭表演documentary。大家熟落左，吹吹水，噉樣街頭表演法，已經堅持左幾年喇，因為自己之喜好，只唱BEYOND同張國榮，想搵Ｋ歌，唔好意思一首都冇。睇睇下，原來噉就玩左個零鐘，見佢支力，契爺立即衝上去搶台，須知表演地點係旺角地鐵站D出口兩個出口中間即係新之城行過ｄ撻空地，基本上街口已經係住宅區，本身唱果陣已係收細左機聲同就住唱，但契爺去馬第一年事係推爆咪怒焚《阿拉伯跳舞女郎》，焚到亞皆老街口都聽到，而我地呢班坐正佢面前之觀眾自然即場遭殃。我地上場，立即多左好多MK觀眾，有MK妹撩契爺玩《但願人持久》，笑到爆。不經不覺，就玩到五點半，收皮。
「天都未光，點解咁早收？」
咪就係因為天都未光。玩到好high，走左上去唱《海闊天空》，有個鬼婆經過即場俾錢（冇錯劉Sir幾有叫座力！），唱唱下，有警車經過，立即召左激唱果條傻仔去照肺（冇錯劉Sir幾on9！），有皇氣，迫住要收檔啦，好在班差佬逗完就算，我呢個世紀黑仔王冇邪到呢位仁兄成套搵食架生比差佬收晒！但已經十分冇癮，個天仲有排先光冇晒野玩，連個鬼婆都走過黎問點解冇得玩，但要同佢解釋香港冇街頭文化連街頭唱歌都會比差人趕呢回事，都幾花唇舌。玩左兩個鐘，五點半呢個雞肋時間走又唔係唔走又唔係，大家坐係街度吹水等食早餐。今日先知道原來日出個天光得好快，同從未感受過如此清新的旺角空氣。大家傾左好多野，呢位仁兄斷斷續續噉唱左幾年，待業又失業，而家都係唱住搵工做，但呢ｄ表演當然唔會幫到佢搵食，你覺得一班唱K大連BEYOND同張國榮都唔識、根本唔會知道佢唱緊乜之靚仔靚妹，係街邊撞到佢係度唱埋晒ｄ老土歌，笑佢傻仔居多，定會欣賞佢居多？就算會欣賞，當中有幾多個會肯俾錢佢，那怕只係幾蚊？所以琴晚有個阿叔一俾俾成捲廿蚊紙算係好符碌，扣番佢果四六十，淨番果ｄ搭完車食餐飯就冇晒，每次出騷都噉樣大大支結他加大大車音響，運輸同set都大大單工程，唔係為興趣，真係冇可能同唔值支持落去。傾傾下天都光晒，大家去麥記食多個早餐（冇錯又食，劉Sir點食都唔會夠），返到屋企沖埋涼已經八點幾。即訓。唔訓都得其實仲幾精神下要玩都仲玩得到，但係，仲要開舖嘛。真係唔使做咩？
呢晚夠晒無聊。人就係要得閒無事無聊下on9下先至開心嘛。呢ｄ野，有幾可會有機會試？唔無下聊戇下九，仲唔悶死？

訓到兩點幾，眼訓都要彈起身出皆旺。107返到黎，
「琴晚三點半走，返到屋企再執執野都成六點幾先訓，九點已經要起身去補習，真係頂唔順，望住條細路ｄnotes真係完全用唔到腦，我唯有同佢講：『阿sir今日唔Ｘ掂，你自己做功課算啦，記得唔好問阿sir，問左阿sir都應唔到你，就算應到你講果ｄ都唔好信！』」
跟住再睇睇佢批新貨，估唔到今次107返左隻超正野！唔係等左Ｎ年的六變獸（仍然等待中，幾時復刻？），亦唔係斯比頓星（太Ｑ大喇，大隻到我仍然考慮緊買完點放），而係一隻CD，仲要唔係視覺系而真係我會鍾意果ｄ野。
「估唔到你舖頭我都會有野買喎！今舖大劑喇你！世紀黑仔王係你度買過野，你執硬喇你！」

發現到個新食法。皆旺樓下間仙果園台灣野，一向唔太好，除左台灣野食一向唔多對口味，像冇問題食就免問，仲因為ｄ野其實都幾貴，但仲有一樣野可取：下午茶。廿蚊半隻燒春雞，雖然細細隻都勉強夠當一餐（對我黎講，係非常勉強），不過最正係隨餐附送野飲一杯，平時一杯珍珠奶茶都收你十幾廿蚊啦，而家加多幾蚊俾埋隻雞你仲想點？下午茶時間係兩點到六點，我地五點五十九分就打落去落單，噉就可以將呢餐超值下午茶變成超值晚餐！除左阿姐小幾句之外，冇咩問題。唔係，仲有一個問題：雖然仙果園係正皆旺樓下轉彎行上黎都唔使半個字，但呢間最近之外賣檔，送外賣反而係咁多間之中最慢果間。
「梗係啦！次次送外賣果條友，上黎之前都要去決戰夏佳理！」
「咁out架你！而家係決戰陳祖澤！」
所以點解我地5:59先叫。上到黎剛剛好夠鐘做晚餐。

平靜的一天，冇乜特別。除左用隻RAINBOWTRON同阿冷交換左隻NOKTURNAL MORTUM新碟（你都知你送俾我份生日禮物幾Ｘ呢！），仲有一位小朋友，未夠秤的小朋友。佢帶埋阿媽上黎，or佢阿媽跟住上黎，然後狂摷black metal同doom metal。會買MY DYING BRIDE，唔算好奇異，雖然呢個年代已經連呢隊經典都冇人會聽；但當佢會揀diSEMBOWELMENT，就知道呢條靚仔，有料到，勁！
「有前途喎小朋友！點解你會買呢隻咁堅？」
「其實係我阿媽買，佢怕醜，我幫佢買架！」

夜晚，更靜，因為全部人走晒，連107都走埋，今朝習都補唔到，上到黎個樣又殘到爆，最後頂唔順早個零鐘收皮返屋企訓覺，
「喂！唔好走啦！今晚收舖之後OutRun啦！」
「勾你老味咩！」
噉又係，難得連續三日假，琴晚又癲完黎，今日唔繼續癲都留係屋企抖抖啦！好得閒，睇晒成隻ANGRA DVD。呢隊野係一隊好好睇之live band，鼓佬真係好勁，唔係花巧果種勁，而係節奏感好強果種勁，所以我好鍾意巴西ｄ鼓佬，除左激快（巴西thrash同death一向出名在快絕全球架啦），仲因為好有部落feel，呢樣野係南美band獨有，亦係歐洲prog/power metal band唔夠ANGRA鬥之原因。非常鍾意睇呢場live，除左因為本身我受progressive & power野，仲因為呢班友玩live一流。好期待呢場live。

返到屋企，網上又見台灣朋友。大家唔係做野就要讀書，見面之機會越黎越少。
「最近我只看了一場rain台北演出。」
睇到呢度，你會大嗌：
「搞錯！！！metal友睇阿Rain？？？」
冇搞錯。
「是X-JAPAN結他手Pata組的Ra:IN。Rain是南韓的跳舞歌手。」
「Ra:IN是玩instrumental rock的，活像Joe Satriani，強的不像話！惜台下只有200人不到，但日本人就是敬業，演出不打折，設備還是由日本運來的，那場演出真精彩，讓我見識到能平步歐美的亞洲樂團！但觀眾只得200人沒有這麼少，台灣嘛，獨立音樂界就是這般，但也因創作者有堅持才更令人感佩。雖然X-JAPAN很出名，但已是前輩了，現代人聽音樂不看歷史的，而老搖滾迷們多結婚了，生活壓力造成頭甩不動了。」
相當唏噓。無論你之前係點、無論你玩音樂玩得幾好，係食唔到而家水潮流，都唔會有人睇你、睇得起你。同埋，而家ｄ人聽歌唔睇歷史係真。X-JAPAN，而家係香港仲係神級地位，但係Pata隊新band Ra:IN黎，又有幾多X-JAPAN fans會去睇，甚至會知道係咩黎？好有興趣知。不過睇佢地香港都唔會黎就知咩事。
所以好鍾意同台灣果邊ｄ朋友傾偈，有思想同成熟好多，好似一個「基督徒可以聽黑金嗎」之題目，香港同台灣兩邊都有出現過，但睇睇香港果邊大家湊一湊熱鬧就沉左去唔知邊度（典型香港forum傳統），而台灣果邊傾左個幾月都仲傾緊，傾傾下甚至大家用埋人文哲理宗教思想學說一大堆討論。呢ｄ先係真真正正之討論、真正有意義之討論。

今日真係超符碌。近來好多事幹，今朝早本身要九點返公司坐係度stand by，好在後來冇事發生唔使返，所以琴晚可以有幾夜訓得幾夜訓，跟住過埋朝頭早先起身，即係過番正常生活。因為阿冷呢份遲來的／補鑊的生日禮物，今晚特別煲晒NOKTURNAL MORTUM全線。black metal入面我較為鍾意一ｄ冷門pop野，例如SATYRICON同呢隊野，因為pop得黎有特色。NOKTURNAL MORTUM係難得地全線所有碟隻隻都正之一隊，到而家為止同EMPEROR一樣正式大碟有四隻碟，四隻都唔同style，但四隻碟都正爆，第一隻"Goat Horn"玩靚聲keyboard野，一講到呢度好多人會即嗌「Cradle！」但當然差好遠，兩隊野之距離差左唔知幾多皮。第二隻"To The Gates of Blasphemous Fire"變成怒爆EMPEROR，音樂都錄音都勁似，但我覺得佢地玩同一種野，某程度上比EMPEROR玩得更加好，特別係第三隻"NeChrist"，成隻再paganｄ再folkｄ，根本就係folk版EMPEROR，而呢隻係聽過最無敵black metal碟之一，如果超越唔到EMPEROR隻"Anthems"，都絕對可以齊名。隻新碟"Weltanschauung"同以前完全係兩個樣唔同晒，由symphonic black變到好似維京野噉，唔恆同埋勁多folk野，似GRAVELAND一類果種，唔知發生咩事，但聽得好過癮。但呢隻碟真係唔知點樣先搵得到，或者因為呢班納粹友實在太激，而呢個亦係佢地咁有實力都未成到名之原因，無論係咩音樂、音樂水準有幾高，逢掂親政治特別係反同極端果邊，已經有大半機會仆得街。所以EMPEROR可以出名成噉，而NOKTURNAL MORTUM呢班極端強化版EMPEROR一直都係得個"cult"字。

星期日不嬲都靜，所以繼續同107發癲，佢冇人時我更加冇人，兩間舖今日真係玩到黐晒線。今日大家繼續係度研究呢個埃及能量。之前都講過有個女人成日上佢度掃佢ｄ埃及公仔，因為呢個女人係研究呢種埃及能量，呢ｄ公仔就係用黎修煉果時當圖騰or乜叉or物叉噉用。埃及能量呢家野真係得架！107問過佢拎ｄnotes黎睇，入面話正常人人體震幅係四十幾，而透過修煉埃及能量，可以將震幅提昇至五十幾甚至以上，身體機能就可以達到更有效的運作。即係點？我都唔知。只見到份notes最後寫住：
「如欲修煉埃及能量至成正果，請到皆旺一樓一零七號舖『一氏宗親玩具會所』購買$500以上埃及信物，買得夠多，正果易成。」
「超！原來你兩檔野打龍通！」
唔得！我都要搞番個教派，教人修煉金屬能量先！

玩完，當然要食。lunch食左個燒春雞（因為冇馬跑，今日叫好快就送到上黎），夜晚想試ｄ新野，剛剛有間野又黎派外賣紙，
「呢間好似幾正喎！就試下呢間啦！」
107話。有追開的朋友，都會知道每次108聽107講食佢介紹ｄ外賣都係得個仆字，但今次居然奉陪到底，因為呢間野確係過癮，ｄ野食平之餘，仲有魚蛋腸粉煙肉腸同最重要的咖哩角賣，
「街邊ｄ炸野食檔幾時搞埋送外賣？」
本來諗住食飯，但一見到呢ｄ野食，兩條友立即飯都唔食係噉叫呢ｄ立雜野，送上黎又唔係耐（起碼快過係正樓下但永遠慢人Ｎ倍的仙果園先），最重要係
「真係好鬼死正！！！」
除左個香蕉西多完全理解唔到係咩味道之外，全部野都超正，$18一打咖哩角算好抵食架喇！！！今餐垃圾食物晚餐非常滿足！知唔知最正係乜？最正都唔係ｄ野好食！係咁勁Ｑ多野之後計一計發現原來收少左錢，兩條友食到笑每人先廿零蚊搞掂！冇可能唔再幫襯呀呢間野！
「107！兩年以黎，你終於有一次冇昆到我喇！」

玩到悶，又係ANGRA DVD，演唱會前基本上上親TRHK都會見到呢隻野架喇，以前已經成日睇，呢兩日夾埋睇左都唔知幾多次，但仲未悶依然覺得點睇都咁好睇。progressive/power metal live黎講，呢隻DVD絕對係冇五星都四星半級數，亦因為佢地power得黎偏好多progressive所以相當襟睇，再加埋根本係一隊live band玩live係精彩同活躍過CD好多，而一隊band玩live得唔得，有陣時比佢CD同歌得唔得更重要。有ｄband聽碟時勁到飛起，但一出live食晒屎，因為studioｄ器材救極，都救唔到現場技術，但玩live玩得好，就算ｄ歌唔夠好都可以化腐朽為神奇。好似IN FLAMES，好坦白講"Soundtrack"隻碟唔多得係人所共知，同時唔係非常鍾意佢地，而家ｄ野話pop過頭亦絕對冇錯，但live時過度活躍之表演，睇一次已經令我突然愛上番呢隊band。live band之影響力就係咁大，即使你唔係鍾意果隊band、唔係鍾意果種音樂，都可以感染到你令到你投入同享受。
雖然噉講，都預左今場騷好多身邊朋友唔會蒲頭，同去呢場騷之面孔會同上幾場騷好唔同。
「因為ANGRA係power metal。」

近來，好多討論。
「點解聽音樂果班人唔可以開明開放，去嘗試多ｄ唔同音樂同真係去聽音樂，而要追名同追其他野但唔追音樂本身？」
「如果所有音樂人，無論玩果班定聽果班都做得到呢樣野，一早已經唔存在underground。」

ANGRA場騷出左post之後，有位朋友回應：
"I wouldn't want it organised by some big money hungry corporate record label."
"That's why it is organized by small potato money losing amateur closing-down bankrupting record store."
"Well kinda true, but I support that more."

Weekly Review:

今年最好玩，就係呢場騷，一齊玩得最開心，亦係METHOD。或者因為大家都係亞洲人，同大家生活同音樂態度好相似。

玩到完全唔想返工。所以今日返到公司，係非常之灰暗無奈。再加埋少年風濕，一天陰雨濕就眼訓，加上極度得閒冇野做，今日超過一半時間唔係個位度，因為要周圍走搵野食搵位訓浪費時間。死，過完騷又過埋國慶中秋，玩到咁癲放左咁多假，完全唔習慣要返工。跟住仲要冇假放忝，而家先星期一．．．．．．．

「ＺＺＺＺＺＺＺＺＺＺＺＺＺＺＺＺＺＺＺＺＺＺＺ」
真係好鬼難捱。好難得至頂到放工，走上皆旺，仍然係ANGRA。因為場live黎緊，請預左呢排會經常提住佢地。今晚聽"Fireworks"，好多人唔鍾意呢隻，但反而"Temple of Shadows"之外我最鍾意果隻。呢隻從來係比人狂小之一隻ANGRA，碟評講晒歷史點解，就係因為唔power而變到好progressive，又變到好暗冇晒之前果種正氣，聽過頭兩隻再聽呢隻，好大機會唔鍾意。但我第一隻就係買呢隻，第一首"Wings of Reality"個intro已經知道呢隻碟唔會冇料到，又可能暗野較適合我，所以呢隻ANGRA頭五隻中最暗一隻，反而最鍾意，淨係錄音已經無敵，得呢隻碟係用最有真實感之錄音，之前之後果ｄ都顯得太電。呢隻碟我確係百聽不厭，技術、編曲、交響同氣氛完全係我鍾意果類。好靜，玩具舖唔開107又唔係度，今晚又係大家食的時間。發現好耐冇幫襯過佢地，因為同107癲左一排，太多其他野食喇，不過都不枉我係佢地超級fans，差唔多成個月冇幫襯過，打去一開聲，已經認得到
「又係皆旺108嘈喧巴閉果間丫嘛！認得你！」
太多仇家了。

．．．呢排非常睏。坦白講，過完上個星期，黎緊月底日頭夜晚兩頭都忙，實在支力。

返到公司第二日，仲未適應平靜的生活，今日lunch仲要落銀行做野入數冇得訓晏覺，個晏晝真係好難頂。好在呢排公司執倉執辦房，「急需人手」，自然唔客氣入去扮「人手」順便扮訓。入到去撻落張凳度，大家都知咩事架喇唔需要再出聲，佢有佢地做野我有我訓覺。先講講辦房個格局：呢度有兩個入口，在場有我、會計靚女加阿姐三個人，我坐大班椅（即係老細張龍椅，十分肆無忌憚），碌去對住牆角坐＆訓，而呢個位剛剛好係死角，兩個入口都唔會望見要入到黎先會見得到，而兩個門口分別有靚女＆阿姐兩個睇實，老細入黎前要經佢地兩關，就算入到黎，都睇唔到我訓緊覺，只會見到好似做緊野的背面。我有一班守望相助的好同事。

捱下捱下捱過左六點，即走唔理。日頭好悶，但今晚好玩得多。六點幾去到已經有個國際學校同學等緊開門。事實確係鬼仔聽野比香港人開放得多，揀ｄ野、試ｄ野同最後買ｄ野，都係平時冇機會掂果ｄ，所以同佢玩得好開心，大家都係聽on9野。
「我跟『香港Stanley Jordan』學過師架！」
唔怪得口味咁獨特。之後再有好多朋友拜訪，一個接一個，連食飯同去廁所都冇時間。呢晚確係多樂趣。不過仍然係好支力。

返到屋企，又過過台灣。每次搞親（大）騷都有野玩架啦！不過今晚唔玩喇，「無必要」，同聽朝要一早起身，早抖好過。

今日史無前例地咁早起身。有個客九點鐘到工廠，香港出工廠要預三個鐘，又通常老細會預再早ｄ集合開車，有幾早，自己想像一下。但後來老細都有點回頭是岸，因為點早出發到好，皇崗口岸一樣係七點先開關俾人過關。實在係太早，今日完全唔夠訓，所以一上到老細架車，佢都未開得切口講野我已經暈低左。可惜今日實在係太早，咁早根本成條路唔會有人同車爭路，塞車同交通意外之可能性係零，所以七點開關，八點半已經飛到返工廠（「嘩，返教院都冇咁快！」），未神智清醒已經比老細趕左落車。呢種半睡半醒喪屍狀態先係最難頂，一落車已經比成班高層拉去會議室傾住等客，個人根本冇可能清醒，但對住成班大粒又唔訓得，非常難捱。個客當然遲到（每次開會客人遲到已經成為係自然定律之一），九點鐘變成九點半先到工廠，即係對住班大粒一個鐘，又要再對住班客人一個鐘。呢班其實都唔算客人，係美國電器安全標準測檢所ｄ人員，黎呢度傾下產品安全申請之類，簡單黎講，係佢地黎呢度拉生意搵錢。而呢ｄ甚麼電器安全標準甚麼，同我呢位小小薯仔有乜關係？我都唔知，正如我都唔明老細今日拉我上黎有乜用，因為全個會都係高層對高層，成班老細係度傾，我根本坐成場，一粒聲都唔使出／冇得出。班友仲要傾成個幾鐘先肯停，聽聽下真係頂唔順，兩幫大老細面前照釣魚係度瞌下瞌下，個人係開半分鐘閂半分鐘噉去，冇乜幾多句說話係完整地聽到晒，有時紮醒就拎起支筆係度扮寫野，真係「野」，因為只係拎住支筆係同一點或者橫向不斷顫抖，只會形成一堆比草書更加草當事人都唔明白之「野」，當十點半全場走晒之後，唔理喇立即訓番陣先，嘩真係死噉款。由頭到尾都係得個聽字，其實今日冇左我係度，係絕對唔會有影響。我都唔知我今日黎工廠之存在價值係乜。我只知道我真係好鬼眼訓。

十點半全部人走晒，唔理立即瞌番陣先，跟住十一點半食飯十二點食完再訓，一點開車繼續訓。咁早走，除左因為早搞掂趕番公司做下野，仲因為避塞車。今次難得地，同世紀黑仔王劉Sir上黎，居然全程乜意外都冇車都冇塞過。所以，太快喇。
「喂！起身喇！到左皇崗，要過關喇喂！」
「唔係卦？而家幾點呀？」
「兩點囉！」
「快成噉？？？？？」
真係快到黐晒線，未訓夠已經紮醒，三點半返到公司時都仲係慒下慒下，根本冇精神做野，匿入pantry搽下麵包沖下麥皮飲（劉Sir係公司除左訓覺以外唯二識做兩件事），好在今日公司入面幾多事發生亂到爆，老闆加老闆娘兩個都走晒，先可以係如此肆無忌憚，頹到六點立即搭正準時走人。所以千祈唔好叫劉Sir早起身，佢真係會死架。

今日星期三，既然ANGRA場live未開始賣飛，都冇諗住開舖，但實在冇野做，加埋107今晚開檔，就上去無聊下。
「乜你咁早呀？我都係早你半個字到咋！」
「放工打完舖Time Crisis咪上黎囉！你呢？」
「中山砲兵團鳴金收兵，我今朝先搭火車返到香港！」
成三日冇搞過間舖，加埋其他Ｎ份工夾埋萬幾封email，開左舖之後未見過佢停過手。
「我到而家都唔明，既然你咁多瓣數，呢間舖算係你搵最少果瓣，仲係度撐住屈就你遮！你執鬼左呢間舖出去全力搵銀，搵多過而家幾倍都得啦！」（唔好以我講笑，呢個係事實黎，107就係咁把炮）
「係辛苦又唔算賺得多，不過我又唔會執笠！淨係係度睇你點死，都值番晒啦！」
冇錯。亦因為相同原因，108都會死撐住唔執笠，因為大家一個禮拜入面，最開心果幾日／晚就係見到對方果幾日／晚。
「話時話，今晚埃及能量妹會上黎喎！」
「係？好呀好呀！我想拜佢師好耐喇！」
「唔好意思！佢剛剛打電話黎，話感覺到有股強大的金屬能量潛伏係皆旺商場，危害到佢體內果股埃及能量，所以放飛機唔上黎喇！」
今晚終於磅水過107，執左佢唔知邊度刮番黎之《強戰世界》超勁6CD1DVD七碟連全粉紙彩頁硬皮書，
「真係估唔到，你都會入呢ｄ野，都會有碟我會執！」
今晚就係同107係度研究呢隻《強戰世界》，一九七幾年出品，上年襯電影版上畫時重出呢個超豪華復刻七碟版時已經搵緊，點知會神奇地出現係點睇都唔關事的視覺系專門店皆旺107，而107亦以超值知音價超極低廉出讓，
「橫掂我又唔知咩黎，呢ｄ野除左你又冇乜人識，你又識聽，當益下你啦！」
有幾知音？相信呢隻野，二手價甚至全新普通版個價都冇咁平。呢個版本非常限量發行，
「全香港十隻都冇，大半係我度，我107要一隻再加108一隻，冇幾多隻剩！」
有心人士、prog rock/art rock迷，不妨過去107斟斟。佢真係好少咁有意思之碟賣。或者就係因為噉，近排大家都係係度研究呢隻碟，今晚打埋電話落樓下佳人，叫一隻多到連個盒都裝唔晒爆晒出黎之燒春雞同一個pizza上黎食住研究，本身完全唔聽呢類野之107比我仲要認真，真係走去黑膠舖摷番呢隻碟個黑膠版，再對比晒CD、SACD、DVD、LP邊隻（最）好聲。兩條友就係投入到噉。所以你明點解107＆108死捱難捱都頂住唔執笠，同唔想對方執笠未？大家都係生活好簡單之人，錢唔係首要，名利亦唔係必要，簡簡單單開開心心追求自己想追求就夠。所以我已經唔多上香港forum了，與其上去招風招雨晒命拋書包，不如留番ｄ精神聽多隻碟、聽真ｄ隻碟好過，正如香港區每週一唱片大行動除左呢度已經全線休止，既然已經試過，真係講音樂結果係唔會有人理，倒不如留係呢度同台灣兩個地方講就算有緣自會相見，特別係台灣果邊ｄ人睇完後真係會諗一諗、試一試，而唔會睇完就算。我地呢ｄ人，只需要音樂，唔需要做／扮專家，亦唔需要fans。
「聽下歌遮，又唔係做明星，要搞到噉又何必？」

返到屋企，又過台灣玩玩。
「點解次次玩，都係過台灣玩？香港唔好玩咩？」
「老實講，的確係！」
台灣果邊，係玩，大家會玩到出晒面玩到好大好大，真係鬥有冇料到鬥渾身解數；但香港人係唔會同你玩。香港人講果時係好威好勁好有料，但真係要比試真材實料果時就唔會出聲，只會扮見唔到當冇到，跟住係側面背後陰ｄ陰ｄ噉唱衰同踩低對方。所以鍾意正面交鋒的我，已經唔多上香港forum了。

今日，全公司（well，我遮）非常合皮，因為老細同一個經理上左廠，老闆娘又出街，公司入面最大果個已經係五十幾歲等退休所以仲頹過劉Sir的經理（冇錯就係日日食餐蛋治做早餐果個），可想而知呢日班友會係幾無法無天。就好似我噉，時值而家淡季本身已經得閒，全日係冇做過野淨係係度寫寫寫同訓訓訓，當lunch外賣十二點半送到時，開完袋分完飯已經好自然地坐低食埋，十二點九未到已經係度
「ＺＺＺＺＺ∼」
訓醒之後食條雪條再食多包明輝蝦片，又再重覆番朝早的職責，即係寫寫寫同訓訓訓。
「呢日真係太過舒服，你俾我抖抖先。」

今晚，又係好多神奇人士出現的一夜。重點除左有GUNS N' ROSES兩大從未曝光片段、drum solo版"Paradise City"同crossover版"Welcome to the Jungle"（唉，早知係噉，唔睇好過睇），仲有王妃呢隊本地cult野，越黎越多本地經典reissue，搵次要落去CD舖兜番轉。發現搞騷以黎，真係好耐未認真聽歌買碟，呢個月正式買，除左呢隻王妃，就係107隻《強戰世界》（祖國盜版譯《宇宙戰爭》）。搞埋場騷，要發下癲先。

返到屋企，今晚起可以靜番ｄ安心聽歌。
「做乜唔過台灣喇？」
因為已經夠喇。做到呢一步同呢個結果就夠。跟住係我最鍾意果part：
食住花生等睇戲

或者前日太早起身，今日一起已經超病，返到公司把聲已經係講唔到野咁拆，點都要去睇睇醫生。所以今朝節目就係坐，坐係度等睇醫生，可以坐住連聽三隻KATATONIA。呢三隻KATATONIA足夠令我遺憾少壯不努力。做私家醫生實在係好好賺，尤其是呢ｄ舊區實多病人，成間診所真係從未試過唔爆，當三個字睇一個病人連執藥，一個病人$170，一個鐘六百八十生意，八個鐘都已經成$5440，基本上做一個禮拜已經夠晒全個月成本，剩番果三個禮拜全部純利，呢個仲要只係保守估計，月入過十萬都絕對唔奇，又要呢個環頭冇乜幾多私家醫生，所以ｄ護士態度奇差串咀到爆，甚至講到明太多客唔做你生意，你都真係吹佢唔脹。
「早知我就唔聽metal，專心學醫！」
睇完醫生，返到公司剛剛好食飯時間，夾都冇咁準。食完飯食藥，我特登叫醫生開ｄ藥要「服後有倦意」，噉就可以名正言順食飽就訓，點知ｄ藥反而越食越精神，連晏覺都訓唔到，晏晝仲好有精神做野忝！立即打去問：
「醫生你係咪俾錯藥我呀？」
食完藥之後，真係越黎越精神。噉係好大件事。好在一到四點鐘下午茶時間立即唔掂。
「老細，真係頂唔順！」
可能因為搽完麵包食血氣運行快左，藥力終於發作，起身都冇力，唯有係pantry撻低訓番個零鐘覺先啦。一訓醒，已經可以走人了。ｄ藥確係使得喎！唯有打電話落去醫生度道個歉啦！得罪左佢，下次睇佢佢真係俾ｄ藥點食都唔眼訓咪大劑？

今晚107係度，加埋路人甲乙丙，又係過癮的一晚。今晚重點節目係YJM八五年日本live
「嘩我呢個前超級Malmsteen fans都未睇過！多謝Rock爺帶契！」
睇過呢場live，回想番點解當初咁鍾意聽Malmsteen，二十年前初出道果時，即係剛剛出第一隻碟"Rising Force"果期，亦係呢場live果期，呢條友手結他確係無懈可擊，的確係而家睇番都會覺得快到離奇粒粒音清再加好多而家唔會（再）玩之神奇野，冇錯佢係串，仲要係串到仆晒街果隻，但果個年代之Malmsteen就係串得起。單係睇"Far Beyond the Sun"一首已經殺晒啦。如果下個月黎香港個Malmsteen，係呢個廿年前仲係勁瘦勁fit動作多多技術勁爆之Yngwie Malmsteen，俾多兩舊水我都會去。但現在的Malmsteen，算吧。

今日病左，收舖之後，去邊好？返屋企抖下啦梗係唔係！
「小肥羊啦梗係！」
107同Rock爺話。病左都仲噉癲法，呢條友真係黐鬼線。
「小肥羊？係邊架？」
「小肥羊都唔識？咪朗豪坊果度囉！」
「皇馬廿三隔籬呀！知唔知呀？」
「哦！噉就知喇！早ｄ講丫嘛！」
「係要講到咁白先明！」
已經病到聲都失埋，仲噉樣食法，真係唔識死。個名就成日聽，食呢次先係第一次食，難得今晚突然間即興發癲話食呢間，病都出黎癲一癲。雖然好出名，但聽過唔少人話唔鍾意食呢間野，食過就明白點解，因為呢度絕對唔係全香港人口味，ｄ料同調味唔似一般香港邊爐，所以ｄ味道未必人人鍾意，同埋主要係羊肉，牛肉冇乜仲要係勁瘦唔多肥，打開以肥牛作主力之香港邊爐，又確係幾鬼古怪。但淨係叫羊都大排野食，有有勁多級數同品種選擇，膚淺的我食極唔覺有咩大分別，但係cheap極都食得出價錢貴唔貴同舊羊肉好唔好食絕對成正比。你話ｄ羊肉落湯即溶入口再溶即係靚，確係靚同好食，但我都係鍾意肥牛趙趙下果種口感。膚淺嘛。食完，覺得冇乜問題，唯一問題係要斷碟計，同埋每一碟真係好鬼貴。三個人，食左都唔係好多野得三round左右，埋單一共
「660!!!」
即係二百二十打一次邊爐。冇錯小肥羊ｄ料的確係好高級，好食過其他好多，但係二百幾蚊打一次邊爐，對我黎講確係豪過頭。膚淺的我都係鍾意俾一舊水之後無限肥牛，唔使諗唔使煩。
「一生人起碼豪一次」
呢家野，真係豪一次就夠晒。
「唔夠架！我地應該每個禮拜都噉樣on9一次，噉先夠過癮嘛！」
絕對係，對住呢班友確係過癮到極。下次點玩先？真係小肥羊隔籬皇馬廿三？

返到屋企，噉就完左一日。知唔知今日有咩特別呢？
「黑色星期五囉！」
冇錯。不過冇咁簡單。今日，仲係SLAYER新加坡演唱會。
「新加坡遮，又關你事！」
SLAYER咁大，就當然唔關我（地）事啦，但兩三個月前聽到呢單野時，真係有諗過問公司請定假買機票飛過去睇，錢已經唔會顧慮使晒咪再賺過慳過唔夠錢咪借貸籌旗，不過都係一個最大問題：時間。果時梗係諗好晒幾時出發玩幾耐幾時返黎香港啦，但諗還諗，兩個月後發生咩事點會知得道，正如果時都諗唔到，一個月內會搞兩場騷咁激啦，而就算唔理呢樣野，淨係要諗間舖點算已經夠煩。所以出國睇騷咁大壇野，可能「退休」之後先算啦，呵呵。

今日返工前都唔敢食藥，好驚食完之後一睡不醒。今朝早公司仲要開例會，即係唔明開黎做乜純粹俾老細同大家「分享」一下的會議，一開就九點半開到十一點，呢個半鐘絕對渡秒如年，冇食藥已經非常眼訓（某程度上係因為老細講野好悶啦），如果食左藥相信呢個會會釣住魚開。開完會都已經差唔多放工。
「喂！唔係一點先放工咩？」
喂！唔使匿入倉訓覺同去pantry搽麵包架！呢ｄ唔使時間架！

冇乜野做，玩左成日。今日「31人計劃．達成」之二寶樂帶埋計劃完成品上黎。呢個31人計劃，係條友特登整黎賀佢年年今日，搵左三十一個茂利（冇錯我係其中之一），每日磅一舊水，集齊$3100上沙田Tom Lee執睇中左好耐之Tony Iommi signature，今日晏晝上黎就係騷俾我地睇也文也武。今日真係好多人上黎．．．玩（即係又係灰，呵呵）。呢日又撞Rockit又撞蒲窩比賽，所以冇人上黎（「我當係架喇！吹咩！」）。好多人混吉。所以當劉Sir係一個咁多人上黎聽metal的場合播一隻free jazz野，點樣俾全場怒小個淒涼款，大家可以慢慢想像。呢晚最大娛樂係睇CASH流行曲創作比賽，純粹係107話有亞姐昆左開電視點知做完見播呢個又順便睇睇。真係有ｄ動機睇晒先走。可想而知今日係幾無聊，同混吉人士人數幾多。

今日收左舖之後，又係去打打機的時候。新之城實在係太多人，而家開始轉移陣地去好景（今日晏晝先去完，打左舖Time Crisis 4，仲俾我開到部機個bug，明明過到關都game over，灰爆）。呢度都開始多人喇，打黎打去，始終都係OutRun最好玩。三條友玩得好合皮，但係我好懷念加埋二寶樂四條友一齊玩的日子，因為只有靠二寶樂不斷同107鬥撞兩敗俱傷，我先可以漁人得利過107頭衝線。玩左咁耐，今日終於搵到架車合自己心水同style，要苦練一番炒九107！
「咁得閒打機？點解唔過台灣玩？」
已經玩夠、玩到要玩到之結果。留番ｄ精神打機好過啦！
或者因為臨到騷，冇乜心機理metal同音樂。

又係吹水的一天。有位行家上黎，就係之前做茶餐廳捱住間label果位行家，大家傾開，而家做label，真係幫band出碟、做underground野，而唔係只賣大路野同搞大騷賺錢的label，只有一日比一日難做。首先假設係唔存在MP3問題。一隊band要維持到，除左要賣唱片，更需要表演，呢個MP3年代當然係後者比前者重要，而無論幾大既band，一定係靠持續演出賺錢繼續落去，而一隊band可以成功、可以賣多ｄ碟，亦直接令間label可以有更高盈利，跟住擴充同再加強支持樂隊。但而家之underground，已經冇以前咁underground，metal慢慢上主流大路化，因為有利可圖個個都玩埋一份，直到而家歐洲果邊已經有太多band，以前就話係捱住捱住噉樣落去，但靠音樂搵飯食之樂隊係越黎越多，就算係地下band都已經做到好pro，pro到唔似underground。你會唔會諗得到，連細band都會有經理人、有booking agents？因為太多對手、太大競爭，就算你寫歌得live玩得好，出到碟都唔代表出到live，而出唔到live直接代表你唔會出到名。所以出現好多呢ｄ地下經理人、underground booking agents，冇呢ｄ人幫你手，可以話唔使旨意有機會出到騷同tour，亦即係已經冇左大半生存機會。亦因為而家地下之商業味都越黎越重，樂隊難維持、靠樂隊維生之公司自然更難支持，因為出騷咁難，有ｄband就算係當地甚至歐洲算幾出名，都可以出左碟成年之後先有騷出，但果時出到騷已經冇用，都谷唔到隻碟，始終聽歌買碟係靠「潮流」呢樣野由始至終都係事實，就算你係好好好出名（地下黎講），過左果個「潮」已經有大半人唔會留意你隻「新碟」。問問自己就知：你聽野，會揀新野聽先定舊野聽先，同埋有幾何會追番舊碟？隔左一年，對而家ｄ人黎講已經係舊到爆啦，唔新唔「潮」，又有幾多人會買番？（突然間諗起METHOD隻碟忝）
有心搞音樂永遠係艱難，因為有心聽音樂之人，從來係超少數。

今日只係為左一樣野：METALLICA live。METALLICA踏入九十年代確係接近一無是處，基本上除左頭四隻亦即係八十年代之四隻，其餘咁多隻除左"Live Shit"同"S&M"兩隻live，其他接近完全唔需要理（唔好同我講黑碟，到而家我仍然係十分唔鍾意呢隻「經典」），我係METALLICA fans都係噉話。但佢地衰極，都仲有一樣野係好多band都及唔上：佢地絕對係最佳live band之一，演唱會時玩ｄ歌係快好多激好多放好多，特別係鼓佬，CD入面佢打ｄ野其實係好求祈甚至唔夾首歌特別係"Load"同"Reload"，但live手鼓完全兩樣野黎，好多歌特別係新歌全靠佢救番先由唔掂變成好聽，所以ｄ新歌點衰都好，METALLICA live仍然係最鍾意睇、最襟睇。今晚睇睇場live，諗番下，都好耐未睇同聽過佢地，因為實在有太多野揀／做，原來噉就過左"St. Anger"三年，下年又話出新碟。經過"St. Anger"，已經完全冇乜期望，更加諗唔到佢地仲會玩ｄ乜，可能會玩metalcore，或者TRIVIUM噉款？不過暫時流出之兩首新歌，聽過都唔係。第一首放出黎之新歌，完全合乎情理同預期，似搵首"St. Anger"用淨ｄ歌再安番段solo入去就當係新歌，所以聽完冇失望，因為"St. Anger"已經夠晒失望；第二首，就好大問題。居然係一首七幾英國野。點解會噉？聽多次聽真ｄ：真係喎！做乜METALLICA會玩番呢ｄheavy metal／半thrash metal野？會唔會呢首只係cover黎，唔係佢地新作？點聽都唔似真係METALLICA自己作。點聽都唔似。而家之佢地，唔會有咁好。第一首新歌先似佢地。（而家對METALLICA之印象就係負面到噉，可想而知"(Re)Load"同"St. Anger"係幾咁灰）
METALLICA絕對係最pop（出名／流行） thrash metal band之一，因為夠melodic又夠易聽，係少數能夠係激同靚兩樣野中間取得最平衡點之樂隊。的確METALLICA '80 thrash黎講係好／最pop係事實，你唔會話SLAYER或者DARK ANGELｄ野會pop得過METALLICA卦？

夜晚，大家都趕收舖。唔使講都知啦，
「OutRun！！！」
呢樣已經成為皆旺107&108每週重點節目，所以夜晚107&108+Rock爺三個好快就落去新之城跟機。跟機途中，二寶樂來電：
「我係好景喎！」
既然新之城咁多人又只得三打，而家多埋二寶樂，即時搬竇過好景啦，有得四打仲要平新之城一蚊！就係噉，四條友係好景展開令人側目的炒車決戰。三蚊一舖實在超級抵玩（不過成班癲佬一舖駁一舖，一舖一個字，一個鐘已經每人四條，呢部機果然好搵，起碼易回本兼好賺過過山車版House of the Dead 4先！），而一班人／四條友，皆旺以外除左Neway，最happy絕對係大家一齊OutRun。而家玩OutRun，大家都玩到化境，唔係勁到飛起果隻化境，係炒到飛起果隻，玩呢隻game之目標唔係贏，係撞死人同炒九人，呢樣永遠係賽車game真正樂趣所在。四條友迫埋一齊鬥推人埋牆、特登唔過車係噉撞人車尾、無端白事甩尾等自己架車攔腰撞落人地架車度、自己炒車時飛去後面架車度等佢一齊失控一齊撞壆收場，已經係小兒科，當OutRun呢個冇後波加只可以向前行之賽車game當中，我間車係可以俾人炒到倒車行甚至九十度角打橫行車都試過，就知道全班友都係癲佬。無怪乎每一次我地四條友玩OutRun，方圓十尺四野無人。嚇走晒。
星期一至五都咁悶咁靜，星期六日唔發下癲，對唔住自己。

Weekly Review:

ANGRA香港演唱會前夕，當然係重溫一下佢地咁多隻碟啦。最愛仍然係"Temple of Shadows"同"Fireworks"，但只可以揀一隻的話，我會揀"Fireworks"。

我已經當左公司係我別墅。因為手頭上ｄ單已經搞掂晒（or冇晒），過左旺季，而家的而且確係冇野做，係冇野做到真係自己都有ｄ苦惱果隻。食住蝦片寫下野就必然架啦（都未病好就噉食法，已經可以再卜定醫生了），上個禮拜會計靚女一掃掃左勁勁勁多，我食到而家，仍然未可以將所有蝦片收晒入我個位度，所以你會見我電腦上面幾包檯面又幾包腳下面都可以放一包，而家我個位ｄ蝦片，就同我屋企ｄCD一樣，多到唔知點放亂到飛起。近排煲OutRun煲到上癮，反正得閒又上Wikipedia搵下賽道圖，睇定下次我地點樣玩法可以兜晒所有最好玩賽道。可以咁明目張膽，
「簡直係當老細冇到呀你！」
唔使當啦，我老細的確係冇到喎！下個禮拜公司又去擺展覽，今日差唔多成間公司上晒去工廠睇定個展覽攤位，我呢，就當然要去架啦！點知上個禮拜一唔覺意病左，為免同車上廠時傳染晒俾全公司各位同事大家一鑊熟，噉我唯有好唔好意思噉擔任鎮守香港支部之工作啦。即係我都唔係太想架其實，得閒到噉，真係好悶架嘛！（「超！！！」），鬼叫成間公司走剩果幾個人咩！我已經係無聊到代埋上左工廠的阿姐果份，得閒無事時清下垃圾收下信執下檯噉架啦！不過，都有要扮死狗的時候。老闆唔係公司，仲有個老闆娘係度嘛！如果連老闆娘都唔係公司，我今日直頭扮晒野唔返黎忝啦！晏晝Rock爺打電話黎：
「做緊野呀！」
「乜你要做野既咩？？？」
「醒水啦！即係老闆娘係我後面呀！！！！！」

今晚發生咩事？點解會出奇地咁多人上黎？107聽日過城大跳蚤市場擺檔，今晚專登上黎執定幾大箱貨，
「我帶晒ｄ法老呀木乃伊呀貓頭呀過去，聽日城大會充滿埃及能量！」
有例牌的Rock爺，跟住「經過上黎探一探你」的契爺伉儷，同在場大家一齊分享「西洋視覺系搖滾」（阿嫂，嫁著個老公有呢味特殊喜好，對你深表同情），跟住連小婷妹妹同二寶樂都上埋黎，今晚發生咩事？
「上黎食飯囉！」
原來TRHK又變左做飯堂。我、107＆Rock一早決定左食雞，所以放工過黎的Rock爺上黎果時已經拎住兩大袋雞，我地三個（特別係我），已經唔需要諗食乜呢個問題。其他幾位，契爺食劉Sir最愛的大家食，兩位女士食雲南酸辣米線，二寶樂當然係食煙。而每次TRHK變身飯堂，最大鑊果個，當然係劉Sir。又要食野，又要落order，又要清理現場，又要應酬各位大老細，實在繁忙，例：兩隻腳夾住桶雞右手食雞，左耳應酬酸辣米線肉搏（都怪契爺打去落單時係噉話「酸辣米線走酸辣！」搞到阿姐專登打番上黎狂鬧「你地而家係咪玩野先？」），右手拎住部手提聽Henry電話，前面仲有個大家食阿姐等收錢。在場各位當然係絕對唔會幫手你死你事啦。
除左契爺的「西洋視覺系搖滾」（果真淫賤），又係METALLICA live。越睇越有癮，好想搞番隊band瘋狂cover METALLICA，但因技術所限，每次一到solo會即時飛去下一首歌，全隊band只會玩一首歌，就係完全冇solo的METALLICA medley。
「唔得！今年聖誕節，一定要搞番隊I LUV U METALLICA去LiveHouse俾人掟雞蛋！」

因為估唔到咁人齊，冇架喇都係好景見架喇，107本身聽朝一早要去城大擺檔都話要去，冇得走點都要奉陪啦。好大棚人去好景打機今晚，都係煲一隻：OutRun。而家開始研究手波，雖然手波同自動波兩樣野對我黎講，除左手波難用幾倍之外，係冇分別。今日成班友係噉玩玩左十幾舖，除左贏到一舖之外，其他好多時係輸到九彩完全不在狀態，除左因為未用慣手波，仲因為其中一個對手係Rock爺，係逢彎必甩的Rock爺。無論個彎有幾大幾細，總之係彎，佢都會竭盡所能噉去甩尾，甩到就連直路都要蛇形前進，非常危害各位駕車人士，就算唔撞上去，跟住佢尾見到都笑到爆咀，就好似我今日噉，會笑到同一個彎位可以撞兩次牆炒兩次車，因為佢呢種花式賽車，實在係太空前絕後了。所以每次有佢出賽之賽事，我有大半機會抄三次車以上兼入唔到頭兩甲。仲要加埋其他果班都係為撞人而賽車的癲佬喎，同佢地玩唔使旨意可以健全噉完成賽事，好似有一場本身係由頭帶到尾，去到最後一個一百八十度彎，只要甩尾過埋就可以贏，係甩緊尾果陣後面三部車跟住衝上黎，噉都唔係咩問題丫公平競賽嘛，但你班友甩尾還甩尾丫，係唔正正經經噉甩，而係我甩緊尾果時，三架車逐架逐架撞落我車尾，撞到尾都甩唔到仲差唔多停埋車最後仲撞壆死埋第一變包尾，已經係冇體育精神到油都廢事踩等time up算。所以同呢班友玩，可以話好有樂趣，亦可以話灰到震。玩到後來玩到悶，
「輸果個表演玩跳舞機！」
果舖參賽者有107、108、二寶樂，而本來Rock爺負責包硬艇的「徘徊」職位由契爺頂上，賽果如何唔使多提啦，但結果輸果個契爺冇（得）玩，因為贏果班傻佬自己霸機玩晒。想當年，跳舞機（只限一代）我都煲過下架，果時Paranoia 180仲有練過下舞步花式架！不過而家當然係收晒皮啦，睇睇二寶樂同大家表演好過啦！想當年跳舞機剛剛出果時成十蚊舖，但過左唔係好長時間已經冇乜人玩唔興喇，估唔到而家都仲會有新版出，但都要成七蚊舖。呢個年代仲會唔會有人玩？
「關你Ｑ事咩！快手ｄ入錢啦！差隻腳等緊你呀！」
無端白事，今晚都會走到上機舖，噉又冇左四條，計埋食雞又四條，突然間係噉跌錢。死次次對住呢班友都冇好下場，而家盡量令自己星期一至五返工日子除左搭車咩錢都唔使晚飯都黐同事食，等自己可以儲番下錢，但呢排實在太多呢ｄ「意外」。仲係噉打機真會跌錢跌死。
「聽晚唔好俾我見到你地！」

可能琴晚又食雞又炒車太high，今朝起身真係身都起唔到成個人散晒，病都未好仲玩到咁激，唔掂，起身打個電話返公司請假之後，立即撻低直訓到晏晝，三點半睇完醫生，再返屋企食個公仔麵 － 好耐未食過喇，因為ｄ假拎晒黎搞騷，已經好耐未放過例假，今日最後一日所餘無幾之annual leave放番日病假，好開心，終於有得食番餐公仔麵（我思想同生活都係好簡單的）。留得係屋企，除左聽下歌仔，之前部機壞左，救番之後都冇乜搞過，既然有時間，順便清清部機執番好ｄfile。搵番咁耐以黎幾場騷ｄ相，諗番同諗到好多野。今次場騷唔知又會點呢？（睇埋今晚，就知其實冇乜會點）

聽完歌執好部機，今日早ｄ出門口，
「開舖前打番舖Time Crisis先嘛！」
三蚊玩半個鐘，抵玩到爆啦！六點鐘落車時收到個call，即上皆旺，好在今日早出門口，噉又賣多張飛！呢個係一個鬼電話，有隻西班牙鬼黎香港做野，見到ANGRA黎開演唱會，立即買飛支持。一場黎到，當然要傾傾偈啦。先傾傾佢果邊，西班牙果邊聽metal個風氣算發展得好好，好開明噉會接受全部／大部份唔同種類之metal唔係冇，常理地唔會多但亦冇想像中咁少，其他果ｄ似番大部份地區，都係「一幫幫」人噉樣聽法，即係呢幫專power、果幫專death噉樣，但整體聽metal人數都幾多下，始終歐洲嘛。西班牙都有自己種celtic同folk，亦有唔少metal band將呢ｄ民族音樂加入metal入面，而果邊metal band生存可以話較為輕鬆，假如你係屬於薄有名氣同具實力，宣傳一下，可能都可以賣到20,000張，賣到金唱片，簽埋大label的話，賣多一倍都唔奇，當然大家都係打入主流流行榜，待遇同銷量同真正之流行歌手／樂隊當然仲差好遠，但起碼果邊主流係接受metal呢樣野，不過西班牙有樣野較有趣，果度打入主流果ｄmetal band唔會話自己係玩metal，想入主流果時／入到主流之後，會叫自己rock band，而唔係metal band，因為metal呢種音樂同文化，當地仍然屬於負面（乜唔係"Sex & Drugs & Rock N' Roll"咩，，幾時RNR變左metal？），唔似得其他國家例如芬蘭，話係metal就係metal，NIGHTWISH呢ｄ話自己metal一樣賣到仆。但為左各個市場之商業潛質，好多metal band都會選擇放棄或者掩飾自己metal之身份，因為話自己係rock友，對主流群眾黎講絕對係大吸引力同親民過話自己係metal友，有幾多人記得IN FLAMES入左主流之後，係叫自己hard rock，而絕口不提自己（以前）係玩(death) metal？傾完西班牙，就傾下香港。內容係點已經唔需要多提，有黎開呢度，都會知我對香港metal scene之印象同總結係點。聽完之後，佢相當疑惑，日本都係亞洲城市，點解對metal之接受、支持、發展同開明程度可以差咁遠？噉日本成個國家加崇洋幾十年，同香港一個城市仔比，就冇得比啦。仲有其他好多問題，例如「專家」，呢ｄ我都無謂同佢講啦。
佢之前係西班牙睇過一個metal音樂節，果日有大量勁band好似ANGRA、GAMMA RAY、STRATOVARIUS同其他好多好多，本來佢呢個超級GAMMA RAY fans係專誠去捧佢地場，但睇完ANGRA已經知道唔使再睇落去，因為全晚玩得最放最好，就係ANGRA。

今晚，見好多人，但又可以話接近冇人。
知唔知點解外國ｄmetal音樂節、metal演唱會可以做到咁多咁大？除左因為多band、多明星band，仲因為大家都知道，真正俾metal之市場係好細，既然有機會，都會去參加演唱會睇表演聽音樂作態度同商業上之支持，因為機會難得，「有gig有我、gig在我在」。但香港地，係唔會發生呢個情況，因為好耐以前提過的「住半山心態聽地下音樂」問題，同「專家」學識。我份人較為膚淺求祈，從我ｄ碟評同點滴你都睇得出，我真係狗屎垃圾都鍾意接受，同乜叉都覺得好聽，所以成日遺憾我永遠做唔到專家，因為專家係識得將所聽到之所有野當中，99%聽得出係垃圾，剩番果1%，就係值得聽／值得睇／值得買果ｄ，亦即係出名、多人提果ｄ，或者自己聽、自己話好聽果ｄ。香港band友、metal友，對於「音樂」，越係玩音樂果ｄ，越會介意同計較，同越會追名，因為「識聽」。想唔想聽下一隊band，點樣一夜之間二十四小時之內，由「好撚悶都唔知玩乜撚野」，變成「呢隊band玩得好一定要買碟支持」之故事？
所以TRHK入面，其中一句聽最多係
「呢間舖冇DT／TRIVIUM賣喎！走啦！」
而TRHKｄ騷，除左「冇人陪我去睇」之外，聽最多果句係
「都唔係我聽開果種metal／都唔係果隊band／都唔識呢隊band！梗係唔睇啦！」
有gig有我、gig在我在。

唔知係ｄ藥真係得，定係琴日放左日假訓足，今日返到公司，精神飽滿。冇返一日工，多番ｄemail，叫做有番ｄ野做 － 「ｄ」遮，即係都好叉得閒。冇左我一日，公司運作都完全冇影響喎！唔係，係有分別的。多左劉Sir係度，大家的工作效率直線下降，太頹了，大家都受佢影響，一齊唔做野。好似今日晏晝，做到悶，入pantry搽麵包，立即成班同事連經理都走埋入黎，「抖」番半個幾鐘。此乃幾百宗罪之其一。呢ｄ事，琴日我冇返工時，係完全冇發生過。所以老細好希望我可以繼續病落去。

準時放工，今日星期三照開舖，除左因為要賣飛，仲因為107今晚都係度，但開舖之前，當然要打番舖Time Crisis 3先啦。自METHOD再ANGRA，同埋蒲點由新之城搬去好景OutRun，都成半個幾月未玩過，今晚唔知係病好左定係搞完／搞緊騷求祈左，居然拎起手就一舖爆機，仲要係差少少一招都冇中過就爆果隻 － 唔係最後一關打緊大佬時阿Ant哥打黎中左一刀，已經可以perfect爆機。而家第三代都去到玩親都爆之地步，似乎要開始研究第四代，亦即係要繼續交學費。

七點鐘上到舖頭，都係噉架啦，有107有Ant哥有Rock爺，就係冇客，冇乜特別丫！話說呢兩日107去左城大跳蚤市場擺檔，賣佢ｄ死亡筆記同埃及能量野，同場仲有佢以不人道黑工價聘請之阿捷同學做苦力。一場去到，當然幫ANGRA場騷派下CD同傳單啦！今日完左，條友就搬番晒ｄ貨上黎舖頭入倉。呢晚，108收到個電話。
「Trinity Records！」
「Ｘ！」
「？？？」
「今日係城大果度幫你地買左隻Sony貓風扇，又話有得插USB，條USB線呢？而家係咪呃我錢先？」
「拿拿拿呢位朋友你唔使咁激動住先！我搵我經理同你傾傾呀下！」
邊位經理？
「107！你ｄ蘇州屎呀！」
我講到「經理」果part，107已經笑死左。呢晚，不斷地收到呢ｄ投訴電話。
「頂107你賣ｄ野唔Ｘ得喎！十個有九個都話買完有事！」
但點解咁得意，明明係107去城大擺檔，但ｄ人買完野有事果時，會打上黎108賣CD果間發洩？原來條ＸＸ拎左疊ANGRA演唱會傳單之後，係就係見人就派，但係噉樣派法：
「我地公司就分兩個office，呢張係我卡片，有生意就打呢個電話去皆旺107行政及銷售部啦，但係如果買完野有問題或者有野鬧，就唔好打呢個電話，打去呢張個電話，呢個電話係皆旺108即係客戶服務部，有投訴就打果邊啦！」
所以今晚萬幾個電話，都係打晒過黎108，107個電話響都未響過。到後來我已經廢鬼事理，邊個打黎都係怒爆果句：
「呢度賣CD架！唔好再打黎玩電話呀你！」
有107，再加多兩件，即係今晚又會發癲，成班友又係瘋狂上海。一面食，107繼續同大家分享呢兩日係城大擺檔之見聞，同而家ｄ大學生可以有幾on9。
「等我食埋啖飯先，一面食一面講，我驚會笑到噴飯！」
話說佢其中一樣最好賣，就係死亡筆記。有條七仔行過（係真係好七果隻），107 sell sell佢本死亡筆記，回應係：
「車！都唔係真果本死亡筆記！」
跟住睇睇摸摸，講多句：
「真果本質感都唔係噉！」
107怒曰：
「你唔好走呀下你！我而家就開本寫你名！唔好走呀你！」
條傻仔立即肴晒底走人。現在的大學生就係噉。而正正係107檔埃及能量對面，擺左檔水晶能量同佢地抗衡，睇左半日，107就知道一定唔夠佢鬥，因為實在太七喇。有人行埋去，首先會遞張卡片俾你，
「呢張係我卡片，唔好睇少呢張卡片呀，有暗花架！」
「咩暗花？點解睇唔到？」
「講到明暗花，梗係唔會咁易俾你睇到啦！拿！你噉樣噉樣照照佢，先至會睇到架！」
「點樣照呀？都係睇唔到喎！」
「算啦！睇到就唔靈架喇！你知道有暗花就得架喇！」
派完卡片，當然要介紹一下佢ｄ水晶能量鍊啦。
「呢條好靚架！果條好靚架！係呀好靚架！」
「唔該，有冇邊ｄ唔靚架？」
冇架！條條都好靚架！」
假如有水魚買野，佢會幫你舊水晶「開光」。點開法？你拎住舊水晶，跟住佢會放隻手係舊水晶上面凌空郁下郁下，跟住好肉緊噉
「喝！」
噉就開左光架喇！
「而家幫你條水晶鍊開左光，你帶住佢就一世有運行架喇！」
買完野仲有紀念品送，就係一世行運紙。先拎張A4紙，之後佢係上面徒手「畫」兩「畫」，
「呢張紙我畫左個符咒係入面，你帶住佢就好運一世！睇唔到？真係有個符號架！睇唔到唔奇，暗花丫嘛！」
開正佢對面，107要睇住唔笑真係好辛苦，阿捷直頭走左去，
「唔得喇真係忍唔到喇太好笑喇！」
仲連片都拍埋忝。第一段係水晶能量點樣昆ｄ水魚，但只見到有條水魚係度同佢搭訕，成算片淨係得107把聲，但齋睇都知條友真係七到仆，
「即係佢個樣同講ｄ野做ｄ野已經夠七，佢講野仲要係黐利根果隻忝！真係俾錢黎睇佢都抵呀！」
第二段係大抽獎時間，有ｄ人會定時搞抽獎，無論主辦果班、參加果班定得獎果班，全部都不堪入目。而家ｄ大學生．．．算數吧。
「阿捷，我明點解你唔想讀大學喇！」
原來，相比起而家呢代，我已經算係好好架喇！

呢晚真係大劑，咁齊人，即係又要打機啦！107擺左兩日檔而家仲要執倉，已經執到冇左意識，打機呢家野都係唔使預佢。冇左佢呢個最大對手，得番Rock爺同阿Ant兩個，
「冇乜挑戰性喎今晚！」
用自動波贏到冇癮今晚當練手波車，亦只有玩手波先至多番ｄ機會輸。呢隻game，其實得我同107兩個係正正經經噉玩，其餘所有人例如在場兩位都係on9的，係唔係都甩尾連直路都甩到盡果隻甩到黐線，我試過不知多少次行緊直路無端端可以有架車九十度側邊剷埋黎，仲要係撞完右邊之後衝過架車再左邊兜番過黎撞埋左邊，同班友玩真係笑到上沙地（想唔想像得到點樣笑到上沙地？）。實在係太搞笑。呢晚研究到點樣去我地夢寐以求的太空站，同越黎越熟手波車，雖然用極都唔覺得手波點有用法。不過你班友唔好再出現，前日先話唔想再跌錢，點知今日又黎四條！真係大劑！
另外，好想研究番好耐冇見過之野球格鬥。想當年玩呢隻game，係中二三去兒童場果時（果真文物），見果陣ｄ靚仔已經玩到出神入化識晒出招玩連招玩到黐晒線，但過左十幾年後的今日，我仍然係唔識玩呢隻game。的而且確係有必出架！綠色果隻可以飛上天之後係噉落雷之後放個旋風落番地屈爆機果時人人必用，藍色果隻可以飛去人地頭頂係噉篤再掟個炸彈炸晒成堆人，係玩到好勁架！但係我十幾年都仲未識出招，仍然未識玩！最灰係舊到上網都搵到呢隻gameｄ料，想練都冇得練。又係一個未能圓之童年夢。

「妖！飲樣！」
一起身大叫。係呀今日飲樣，亦即係有客見，要恤衫西褲，灰，都唔夠要著鞋著襪（「黐Ｘ線！」）咁灰。執到咁四正非常唔聚財，所以今日好眼訓（．．．）。個客兩點幾先黎，未食飯已經要走左廁所訓覺，訓醒食左半盒飯（「一盒飯」＝「自己果盒再加會計靚女果盒接近100%」，so「半盒飯」＝「一盒飯啦即係」），再訓，兩點鐘起身仲未訓夠，但過左lunch訓到咁揚又唔係咁好意思，唯有坐係度對住個芒扮做野，個客又遲晒到喎。噉我唯有係噉訓訓訓訓ＺＺＺ．．．個客終於到。都未訓夠的我，實在冇乜精神心機去見。所以拉埋個同事入去，
「你見埋我果份啦！」
佢又肯喎！結果係佢同個客傾，而我拎住支筆對住本簿，一路低頭訓覺一路扮寫野記低會議內容，一面隨機地爆幾句
"Yes...ok...I agree with you!"（好似以前會考英文oral做group discussion忝）

放工／訓醒，係時候上舖頭。
「你要返工，噉點開四點？」
想知，咪晏晝上黎囉，有神秘嘉賓同大家玩遊戲架，呵呵∼今日撞好多鬼，最正果隻係隻荷蘭鬼。佢係夾black metal玩bass，不過當然唔係black metal搵食啦，正職係做苦悶的sales，捱左好耐搵到假期，就飛黎香港渡假，點知黎到香港先知道大件事：
"Or chu gor zhung, d yan lin boon tiu Nathan Road dou mo! Holland dor yan!"
由人口密度低的荷蘭黎到香港，度度都到高樓大廈同舖頭通街都係人，嚇到街都唔敢出，因為出左門口，連點行都唔識！可能就係因為噉蕩左失路，撞下撞下就撞左上黎皆旺，但晏晝上黎仲未開舖，睇睇門口張野先知夜晚先開舖，今晚就再撞上黎。
"Lie dou heung gong dou wan dou metal po tau, I am destined to be here!"
聽朝就返荷蘭，黎左香港幾日都唔知做乜，回程之前，終於有個地方令佢覺得呢程有番意義。荷蘭果邊佢同唔少band係朋友例如THE GATHERING，所以黎到呢度見到幾萬里以外之東方都見到有佢地ｄ碟賣，感到幾意外。既然係荷蘭黎，當然要同佢吹吹DISAVOWED場騷啦，同佢講到全場爆晒250人，
"Good! 250 is enough! We do not like too many people!"
的確，講音樂講態度而唔係講錢講排場的underground，確係唔需要太多。貴精不貴多。

最後，係出新聞稿時間：

ANGRA演唱會進展速遞
鼓手Aquiles Priester之全套signature model MAPEX鼓已經運抵香港，全套鼓安裝好後佔地3m x 3m，用到20個咪收音，是香港同類演唱會中少見創舉之一，星期日各位便可在The EDGE一睹其風采！錯過的朋友亦不必失望，演唱會後Aquiles會為親筆為此套鼓簽名，並於贊助商偉樂琴行之黃埔號分店展示！
有鑑於香港的金屬演唱會音響部份往往成為最大的遺憾，此次Angra演唱會按照樂隊方面的嚴謹要求，找來最高質素的音響設備將其最佳音樂效果發揮。樂隊和他們的音響人員每日皆與主辦單位就場地音響進行長久討論，對此次演出極其認真，即使場地非大，仍追求最完美的音響效果，不會馬虎了事。一如TRHK以往的演唱會，場地音響的投資屬演唱會的最大開資之一，無論是以前、此場和以後，皆會保證聽眾能得到最佳聽覺享受！
ANGRA的一系列CD及DVD，於TRHK及演唱會當中發售，當日亦會有其他商品供購買，最新專輯"Aurora Consurgens"則將於十一月發行。演唱會前Angra透露一點風聲：這次他們會演出18首歌約100分鐘，其後按觀眾反應，或會再有encore也不定！演唱會後ANGRA會抽出20位幸運兒到後台共聚，與樂隊簽名、拍照、暢談。祝演唱會當中各位好運！

經過了無無聊聊又一天，又進入好好玩玩的一晚。
「大家有冇上黎同神秘嘉賓玩遊戲呀？」
已經有好多朋友晏晝上左黎玩左了。錯過左的朋友，唔好意思，時機一閃即逝，有緣再玩。上到黎，有個師奶買緊飛同ARCH ENEMY DVD。
「買俾個仔？」
「買俾自己！」
已經好耐冇見過女性黎睇呢度ｄ騷喇，估唔到一黎就係個金屬師奶，仲要唔係大陸人係香港人，甘拜下風。之後好耐冇見的意大利鬼又出現。嚴格黎講係阿根廷鬼，佢由老家搬左過意大利住左一排，跟住再過黎香港。
"Last week or hui jor Japan, joy last week hui Thailand, next week hui India hui two months, fan dou Hong Kong ha lin lin tau yau hiu Europe! Ng hai joe yeah! Hai vacation!"
條友好似黎香港做野，但係去其他國家時間仲多過留係香港，仲要似黎香港做野目的就係放假渡假，呢份咩工黎呢ｄ咩老闆黎？（「同你果份一樣，唔係工黎！」）上幾次黎，次次都係劈住啤劈到醉晒，今次「冇飲醉酒」所以買野，買左隻OPETH DVD，傾傾下偈，原來OPETH鼓佬去過佢屋企！唔係香港間屋，係佢意大利間屋，佢係意大利LACUNA COIL女歌手隔籬果間屋。佢住意大利果時仲做緊Scarlet Records，OPETH去意大利時大家見到面，個鼓佬講西班牙文，佢本身係阿根廷人又識，傾下傾下，就傾到去佢間屋。呢晚真係好多無聊人。唔使返學的阿捷同學晏晝已經走上黎同107食燒春雞，再同大家分享一下城大水晶能量條片幕後花絮：
「其實我拍果時，仲有條女係隔籬架！我拎部機出黎果時，佢已經知道我想做乜野，仲特登行埋去個檔度問『係咪有得開光架？』擺到俾ｄ正野我拍！」
「頂！咁正，聽日上去佢新之城個總舵踩場啦！」
樂嫂又上左黎，順道撻左本BC Magazine上黎睇睇，呢本野係本專派酒吧之免費雜誌。我呢ｄ唔落吧當然冇咩特別興趣，就噉掀掀，
「過癮喎！阿Big阿Small你地好上鏡喎！」
本magazine有一版係放靚仔靚女相，有一幅居然係著住CRADLE OF FILTH的阿Big同著住BURZUM的阿Small！睇到即時笑爆！而今晚，亦都係得個笑字，夜晚冇野做，食完個雞之後，又係同玩到癲的日子，尤其是吹開高登果時。相信高登係香港、中國甚至世界中首屈一指地無Ｘ聊的論壇，一個正常的香港人，每日生活中，一定唔會同唔可以缺少上高登硬膠一番呢一環。
「喂！快ｄ收舖啦！等緊你呀！」
好多人催。但冇人都好，今晚都堅持晏收，因為一個人：
「大．哥．丞！」
好耐冇見過喇，無論live還是真人，貴人事忙、無事不登三寶殿，唔係ANGRA駕到咁大單野，都請唔郁我地大哥丞上黎。難得見到，當然又要傾一傾DSC到底咩情況。我到而家仍然好想買番隻《龍變》，借左俾人之後一去冇回頭，單為最後一首《但願人長久》已經值得買，更何況仲有夠晒玩野的《闖將令》同《武術組曲》兩首？但個人對老坑野的情意結，個人之選係《Apache》。但呢隻碟最過癮，唔係DSC，唔係DSCｄ歌，而係製作。果隻碟完全係hi-fi級錄音水準。所以當年出果時好有趣，隻碟出左之後，差唔多會寫呢隻碟果ｄ都係hi-fi書，因為個錄音真係半天碟級數靚唔到似搖滾唱片（大哥丞曰：「其實當初錄果時，真係諗住錄天碟噉錄架！」），反而真係寫rock寫音樂果ｄ，冇乜幾多會寫呢隻碟（又賣廣告：所以各位記得支持呢篇已經冇乜幾可之《龍變》碟評喇，呵呵）。
「果時錄呢隻碟，用左幾多錢錄呀？」
「我都唔知呀！係間唱片公司落本造呢隻碟架！」
「噉果間公司呢？」
「執左好耐啦！出完我地隻碟之後就執左喇！」
「會整隻噉既碟，又好難怪會執！」
再傾傾當年上環文娛場live，原來為左呢場live，用左好多時間準備，同落重本。香港地要搞一場呢ｄ演出，真係好難，因為冇乜人支持。除非真係噉樣自己花錢花時間啦。但有幾多人肯噉樣付出法，付出左又有幾多人會理你欣賞你？
「話時話，幾時有新歌呀？」
「Rock On玩左首，搵左兩個人玩中樂野，其中一個係玩二胡。」
「呢種中樂搖滾先至係DSC個style嘛！幾時再有新歌先？」
「唔好迫啦！邊諗到咁多丫！」
捱左咁多年，捱到而家都近中年啦，香港地少人聽之餘又要搵食艱難，要邊捱邊諗到新意念，確係太難。
「幾時搞番場港樂DSC，DSC featuring香港中樂團先？」
「Ｘ！」

「喂！快ｄ收舖啦！等緊你呀！」
今晚突然間咁多人，弊，又要OutRun，本來係107&108+Rock仲有陪跑的阿捷，跟住二寶樂無端白事都走出黎旺角湊熱鬧，又係玩到on9的一晚。而家已經玩到唔係賽車，係撞車，直路Ｓ型前進同甩尾側邊撞人甚至成架車打橫噉行唔係咩新奇事，三四架車互夾抄埋一碟亦都好平常，自己炒車都要炒落後面架車累街坊係基本劇情之一，一開始唔踩油等後面架車撞上黎再絲絲然走左去變成慣招之一，有一round係無聊到一開波四條友都唔踩油開車敵不動我不動，笑到仆。扒頭拎第一唔再係追求之目標，墮後睇前面三條友點樣撞生撞死仲好睇。
「喂！我已經落到三波二百米都冇，點解仲係第一？快ｄ搵人過我啦！」
今日有段時間，有位仁兄同我地一齊玩，對住我地呢班癲佬，正正經經的佢完全係冇晒乎，佢女朋友直頭笑到想死。相信佢呢世人都唔會再玩OutRun可以玩得咁開心。甚至可能之後唔會再玩Outrun，因為同呢班癲友玩左一輪，發覺呢班嚴重暴力傾向之車手實在太恐怖，最後嚇到帶埋女朋友急急腳走左，心中留下陰影，從此以後唔敢再上黎好景同唔敢玩OutRun。
除左OutRun，今晚亦係拳皇之夜，睇二寶樂、107同Rock爺三個互挑，屢挑屢敗唔係最好睇，係睇佢地點樣一面挑一面指罵坐對面隔住兩部機的對方，呢樣先係最過癮。我都無聊到走去玩舖果隻野球格鬥，今日終於研究到其中一個角色點出招，即係黎緊又要跌多ｄ錢了。而今晚重點，當然係跳舞機啦，雖然次次都講OutRun輸果個跳，但結果永遠係贏果幾個霸住部機黎玩。呢晚最勁唔係我地，係兩條女，佢地唔係玩得好勁，而係玩得好有創意，兩個人唔係雙打，係單打，一個人踩兩個掣，屈爆機。
「佢地一個人兩個掣，我地八個人一人一個掣啦！爆硬機！」
呢晚真係玩得夠晒癲，玩到成十二點半先走人，史無前例。
「仲好早遮！跟住去邊？毓民牛肉麵啦！」
「得你聽朝唔使返工遮107！超！」

每次有騷，總係臨近日頭份工最繁忙的日子，下星期又要去做展覽，今日成日不斷噉做，做到差唔多兩點先走得人，之後再飛出尖咀搵B哥拎機，即衝上皆旺。除左因為要趕開舖，仲趕住同107一齊叫飯食。梗係食呢個台灣仙果園啦，本來都想留番夜晚整個燒春雞一餐過，但實在肚餓頂唔順，整番個米線食下先。
「喂！今期六合彩一定要買呀！中左立即唔使憂呀！」
「係喎！頭先唔記得左買忝！」
一注獨贏頭獎六千幾萬，真係立即唔使憂呀！如果真係有咁多錢，點使？對於我呢種極度簡樸深居淺出避世人士黎講，唔使六千萬，六百萬已經夠我食過世，但如果真係咁唔好彩中左六千萬（．．．），第一時間搞番間studio先啦，呢樣野一直都好想，為人為己。第二件事，當然係顧番舖頭，必定會落本擴充或者索性即時搞掂呢度再直接開另一間，而如果真係由我搞的話，唔會放棄地下，但地下同地上之比例一定會同而家調番轉，賣都只賣DT、TRIVIUM、metalcore呢ｄ為主，其次係教材同bootleg，地下同唔出名果ｄ再好似而家噉慢慢用心介紹去谷，因為事實證明，聽果班係唔會理一隊band玩得好唔好而只會理出唔出名，玩果班亦寧願買教材買DVD都唔會買碟聽唔會試新band，而呢兩樣正正係而家背道而馳緊之兩樣，所以我做的話肯定唔會落咁重本去地下同唔出名ｄ碟度，而會落本去演唱會度，當然係地下band酒吧騷為主力，始終追隨反潮流，同較享受細場細band果種大家好接近之相處關係，同時你做場騷去谷一隊band，絕對係比你賣佢地ｄ碟更有效，大前提當然係呢ｄ騷會有人黎睇啦，又係頭先提過果兩點。好似好冇態度，但唔係完全放棄晒地下只賣大路野「從商」，敢講仲係有態度，但實在冇乜必要再咁執著同在乎好多野，經過呢幾年，就知道態度呢樣野係香港絕對唔重要，香港呢個小小地方之中，有態度係唔會有人理唔會有人欣賞同尊重，搵唔到食之餘仲要俾人串俾人笑，而冇態度地搞，賺到錢之餘仲分分鐘有人讚番你轉頭。你覺得入晒全線DREAM THEATER加全線TRIVIUM俾人揀，同入一百隻underground death metal再加一百隻underground black metal俾人揀，邊樣會令人受落ｄ？
你問我，我仍然係鍾意而家呢種地下，但為左捱住間舖，「pop」番ｄ等可以易ｄ維皮係無可厚非。地下點都唔會放棄，只不過一定唔會堅持得太固執。有陣時做多幾倍野，但自己辛苦多多又幫唔到ｄband，無謂咁搏嘆番下好過啦。

呢一日，重點唔係賣飛，係玩。突然間咁多人，實在係玩到太癲。不能盡錄，我已經笑到寫唔晒咁多野。算啦，今晚講番場騷算啦：

今晚8:00，就係Angra香港演唱會開始時間！謹記會場會有商品包括CD、tee、poster等發售，而票尾可於會場或TRHK作$20購物券使用，每次購物可用一張。另演唱會後，會抽出20位幸運兒到後台與樂隊會面、簽名等，祝大家好運！
如有朋友仍未買飛，敬請留意*TRHK將於今日休息，購票者請直接於六點後到會場The EDGE購票*，如有查詢及通知留飛可於今日七點前致電劉Sir。另因有不少學生反映近月尾負擔較重，今日即場票將會提供學生優惠。凡購買即場票者出示有效學生證者，可購買學生票一張，學生票售價$280，但將不可作$20購物券及失去抽籤與樂隊會面之權利。而購買正價票之朋友，除可於今晚有機會獲邀與Angra共聚及購物可有$20優惠，亦可以折扣價於TRHK購買十一月推出之Angra新專輯"Aurora Consurgens"！
今晚The EDGE見！