段記



6/7/2007 FRI

今個禮拜,全公司(我遮)無心工作,熱切等待今日朝早十一點鐘,因為過埋今日朝早,老細就會上工廠渡週末,一連兩日公司進入無政府狀態!為左慶祝今日咁大單喜事,今朝早晨咁早就起左身,走左出旺角買番個雞記早餐上公司食,當然係無敵的十八號餐雞扒炒蛋薯蓉腸仔通粉加奶茶,係貴,但好食!有幾可咁早起身丫我難得有次豪一豪佢啦!大模斯樣地擦完個早餐再(扮)做多陣野,到十一點老細走人,正全公司立即反轉晒!
「知唔知我等左今日幾耐???」
經理話。
「知!我梗係知!感同身受!!」
劉Sir話。經理發起,我地做細的自不然更加唔會做野了,所以今日十一點前老細部機係噉俾人炸email個個都係噉send俾佢睇,但十一點之後,老細部機一封email都冇收過。距離開餐時間仲有兩個鐘,唔需要擔心,原來我公司好多癲人。會計靚女拎埋本掌相書返黎逐個同事睇,睇到劉Sir,
「都唔使睇啦!一睇你個樣都知乜事啦!」
都未止,另一個同事識八字添(柒字我就識)。原來班同事咁癲。突然間覺得自己好正常。講相呢家野,我真係信架。想當年仲係做書院時,阿姐贈過幾句,中左好多野,仲叫我去榕樹頭走一轉,不過到而家都冇去到。可能就係因為噉,而遲左。
或者今日茶餐廳都知道我地景況,十二點幾d外賣已經送到了,是日午餐時間提早半個鐘,今朝個早餐實在好鬼多野食完之後滯到lunch,好勉為其難地啃左碗半米線(第一次覺得食lunch會辛苦,KFC早餐好野!),一點未到已經撻低訓覺,唔知係咪老細唔係度個人寧舍亢奮,好精神喎今日唔多使訓,一早訓又一早起身,名乎其實的早睡早起。一起身,差唔多兩點鐘,半間公司唔見左人,加多個經理坐係度印印腳食雪條。
「呢個情況算好架喇!幾年前公司生意好到飛起果陣,老細冇幾可返公司,果陣d人帶碟返黎睇、帶小說返黎睇、落街飛髮洗頭shopping添呀!你地算好識do架喇!」
原來劉Sir相比起前人已經係循規蹈矩,搞到我好自豪添。噉點解而家唔會咁癲狂?「以前」嘛以前公司生意好嘛!聽經理講,以前老細每日返黎真係睇一睇今日又賺左幾多個十萬美金,跟住就走人出去玩,成間公司99%時間都係冇人理任你點玩點發癲老細都廢鬼事理你!但幾年後生意狂跌,連老細都要御駕親征出番黎拉生意了。一切源於有條人稱「地獄黑仔王」的茂利,兩年前進入這家公司。
公司完全冇皇管的機會,真係半年都未必有一個,為紀念,今日同大家一齊食哈哈笑薯蓉


真係頹到爆炸,食完飯訓醒已經完全唔想做野,四個鐘入面公司入面躝黎躝去、食、玩、吹水、上網、攤係度等夠鐘,人間天堂呀!可惜只得一日半風光!一夠鐘自然係即時閃人啦,除左一貫劉Sir傳統之外(今日當然更甚),仲因為一個人,次次佢出現都要噉樣大嗌:
「張.大.導.!」
上次見已經係THERION出新碟果時,即係年頭,可以見到佢真人,已經由季度變成半年度,冇計,搵食艱難。
「之後你仲難見過我呀!聽日起亞視搬入大埔返工,到時想搵番日出黎探你掃碟都難呀!」
好少機會見,但好想見,超級老坑喎已經係,三四張野仲咁瘋狂metal有幾多個丫而家香港,不論年齡還是對metal之狂熱程度?大家都鍾意metal同大家都出到黎社會加大家都係老野,傾都傾得特別投契。同佢吹水真係好多笑野過癮野架。跟住又到耐唔耐走上黎玩果隻阿根廷鬼,由阿根廷走到意大利入Scarlet Records再黎到香港做網頁設計,次次上黎都係拎住大罐啤酒,肥到X不過鬼係噉架啦噉先似鬼噉先夠型。metal已經半退休了,做過唱片公司日頭又要返工又要顧家顧老婆仲邊有咁多時間玩咁多野丫,叫做執左枝新bass操緊MEGADETH囉,上黎探劉Sir只係順便,幾世都唔會出黎旺角,會過黎係因為上黎皆旺掃LotR公仔。
"Wan Lord of the Rings, jau gun hai yiu tan chu RHAPSODY ton SUMMONING lie wan la!!!"
上黎「坐」左冇耐就要返歸了,要返屋企住飯。
"Ng hai lo po chu fan mei?"
"Or lo po fan dai luk joy yeah, sor yi or chu! Or chung yi chu pasta, yet chu jau leung gor chung, or lo po dai luk fan gong, or fan dou ok kay dou sub dim gay, or chu leung gor chung fan arm arm ho!"

非常有閒情逸緻又顧家的家庭主夫。鬼佬們的生活態度係唔同d,外國人比香港人/中國人更加懂得享受人生、更加明白到 "work for life" 非 "life for work" 之道理。再跟住就到契爺上黎,帶埋周遊神州東歐亞洲各地刮番黎之「metal」野上黎一齊分享。有隊泰國野叫LOSO,係隻live黎齋睇個封面成隊band台上怒焚都知道rock到爆,一開波就黎首MOTORHEAD,
「正呀!呢隊band有前途!」
點知第二首開始,係五月天。當堂灰晒。係好聽係過癮連reggae都玩埋,
「但係我想聽MOTORHEAD多d喎!」
此乃千萬掛結他賣情歌的例子之一,好多都係睇落確實rock到爆,點知一開,哦。好在「哦」都有分好同唔好。張相左下角果位靚仔叫Ali Zafar,封面拎住枝結他個樣又咁'80結他手feel諗住有料到啦真係型加靚仔嘛,點知一開唔好話結他rock都冇舊,聽落去,原來係world beat野仲要係玩得好正果隻!個網話係巴基斯坦最成功流行音樂人紅到過歐洲表演,確係有料到喎!左上果隻新彊野流浪者,唔使講都知點解契爺會買啦,都係個英文名正,
「唔係SECRET GARDEN,唔係SOUNDGARDEN,係SARGARDEN!」
呢隻係VCD黎,有我最愛的飛圖年代MV。飛圖永恆印記:(懶)藝術/沙龍式取色取鏡、舊世代甩色菲林效果、一個/班人係度行黎行去擔天望地、(懶)深情的演唱同演出、一定要有條女不論老幼好醜、MV各角色娘到爆的造型同「時裝」,冇一個MV係好睇或者有劇情架其實係貪佢好笑咋嘛?
「好過睇容祖兒織冷衫果dMV先啦!反正睇黎都唔知係度做乜春,睇飛圖咪仲好睇,起碼娛樂性豐富d?」
噉呢隊流浪者玩乜呢?封面係五條友著晒皮褸拎晒結他。第一首歌,係電子新彊民謠跳舞野。第二首正宗八十年代流行曲冇錯就係飛圖MV必備果d,中間solo仲要係先電結他solo再駁木結他&鋼琴double lead,音樂同技術都係正宗八十年代!第三首係日本演歌,中間勁大段電子琴solo,第四首係超任大富翁之類捉棋gamed片頭歌,第五首係ORPHANED LAND有阿拉伯結他加有故仔講,講阿仔離家出走浪跡天涯最後有長頭髮有皮褸有結他(雖然係木結他)集齊三大神器終於「rock得起」的故事。第六首典型舊式亞洲流行曲,中間結他solo玩effect玩到把聲似枝結他好似壞左噉款,我真係呢世人都未聽過呢種solo玩法。第七首木結他民歌,直頭係新彊版unplugged "Hotel California",似RAINBOW、KANSASd靜歌,頭分幾鐘就係一個木結他solo,個結他手仲要掃chord上下但solo接近全downpick死未!第八首,又係日本演歌...都未睇晒只係睇左半隻,已經首首睇到如痴如醉!到底佢地係玩乜?唔知!好玩囉我知道!睇左咁多個MV,隊band話有五個人,但MV入面兩個結他一個唱一個吹笛/keyboard,睇極都得四個咋喎。
「仲有一個呢?」
「負責拍MV囉!唔係有佢做攝影師,你會有得睇呢隻VCD?」

臨尾仲有一個不知名folk rock友,「個樣似足Paul Gilbert」,挾住刀郎之聲線加結他英雄級技術唱加彈,木結他scale、riff同solo都唔弱夠嚇死人,編曲係極現代的folk rock(超似BORKNAGAR新碟!),最過癮係首歌用木結他、敲擊同小提琴玩,但如果完全唔改只係將木結他變成電結他,彈出黎首歌會變成中東/埃及味好重果期IRON MAIDEN,係一模一樣果隻就係似成噉就係folk rock得咁metal!可想而知條友技術有幾高!
「呢d級數,大陸其實周圍都有!淨係過左關入到去深圳火車站,街邊彈結他果d已經可以同香港兩個級數!」
鍾意坐係度,就係因為冇音樂又好、冇生意都好,都可以見識好多野、遇到好多奇人奇事。唔係有緣入到黎TRHK,呢世人絕對會見少識少好多人、少左好多人生樂趣。


講開老坑,之前提過果位被遺忘之香港極端金屬界大老前輩
「原來有blog,收集番舊作。」
仍然係老坑之文筆。幾時會有新一代人寫碟評?相信都好難。文化同態度已經大不如前。
「新一代,音樂甚至不是消費。近年已經唔再會聽到有後生仔話夾錢開唱片舖。」




07/07/07 SAT
7 七 柒

上年6六陸,大家玩得高興,今年更好意頭喎?朝早就真係好玩喇!平時老細係度果陣日日都遲到,點知呢兩日老細返大陸唔係度反而晨咁早就返到公司,真犯賤!搭電梯時撞到經理,眼神交流,得到共識:
「最後半日,好好珍惜喇!」
禮拜一起,就會回復到以前之生活,即係大家在老細的督促下勤力工作,除左劉Sir衣毛衣樣地食野唔做野。但又抵死喎,last半日自由,反而各位同事比平日都勤力工作。我都係。居然。呢輪美國國慶d客冇乜email,過左七月四突然成堆email炸過黎,
「頂你地個肺丫!」
琴日食雞記,今朝食完會計靚女個靚腸粉就要開工了。仲未止,今日要寄一大疊目錄俾客人,琴日print幾百張紙,今日釘裝幾百張紙,起初諗住好簡單,點知齋疊紙疊番開幾本野都疊足成個鐘,跟住趕頭趕命係噉釘,剛剛好趕得切釘晒個速遞員就上到黎收。之後又係自由任飲任食的時間。真係最後一日喇有咩想玩想癲就去盡佢喇,下星期一返到公司就灰喇到時真係要做野!


放工好多街行,因為107有新野玩,放工之後專登走上去搵佢,同行仲有私家囡囡添!
「係我公司個靚女會計遮,唔係董事夫人,唔好意思107。」
睇落似佢好得閒地陪劉Sir行街,實情係我幫佢攝時間,即係唔係人人都好似劉Sir咁得閒無事咁無聊嘛。就走到上去信和探探107,可惜老細不在。
「拿107,帶埋個靚女上黎俾你睇你都唔蒲頭,我都冇計啦!」
阿煲姐每次對住劉Sir都好慘,就係俾佢玩死,今日再加多樣,就係做死。成個朝早都好靜,但劉Sir一到,立即客如輪轉,就連靚女會計想買野都買唔到,太旺了。
「107,我咁好帶契,應該分番dcommission俾我啦!」
煲姐咁忙107又未到,就走左上樓上九樓同十樓,唔係為特區而家真係好少行唱片舖,而係樓上d玩具舖。兜個圈都知大劑,出面冇幾多間多變形金剛包括玩具反斗城,呢度勁多仲要見過最齊,不過價錢都...係多(入水貨的)鬼佬囉,冇計啦香港貴極都平過外國嘛。睇中就總有幾款,不過唔急都多野玩到玩唔晒之前買落果d都未拆,而且價錢噉款,真係想執返皆旺搵人幫手搞掂都得啦。睇完變形金剛落番樓下,終於撞到107,同佢新電話:
部野真係好過癮喎!」
我都有d興趣,大佬內置模擬器仲可以加game加可以當埋PDA絕對引死人。不過電話呢家野我打到出去聽到電話又send到短訊就夠都冇咩追求,所以換電話呢樣野又唔係點急法,再者咁耐以黎其實我從來未自己買過電話,部部都係屋企人用完或者唔識用我就執黎自己用。冇要求嘛。
「等我有番d斬獲的話!到時或者執部玩玩!」


跟住就上舖頭,又有新野嘛。近來算好多。

Handsover

成日就係執貨同埋執貨,而家實在太多貨責左係度。玩?冇呀。7七柒就係噉過。起初大家雄心壯志想玩大佢,一百年一次喎!但大家都諗唔到搞咩活動好,搞搞下就散晒大家自己顧自己,呢個去食飯,果個有街去,有d又話去聽鬼古(但發起人居然今日自己冇去到而現身TRHK,契弟到佢丫!)(為保發起人之安全,其真正身份繼續保密!),7七柒就變成同平時一樣,冇柒野了。但好似噉先襯番我地咁柒喎!幾條老野夜晚就係度吹水,當然包括鬼古發起人啦(呵呵),講番game書真係好懷念以前,細細個屋企冇機打,都會買《超任一族》黎睇,當望梅止渴冇機打都睇下嘛,而且《超任一族》期期都超多野睇,最厚果期我見過有成半寸厚!雖然只係拎日本書翻譯得攻略係自己寫,但細個點會諗咁多野丫有得睇開心就算架啦!跟住進化到32位元,《超任一族》班底搞《Gameplayers》,自然繼續追啦況且果時屋企終於有部PS1有機打喇!果時全港最強最pro打機班底就係佢地,唔睇佢地睇邊本?但《Gameplayers》最好睇唔係講game,而係睇班編輯d專欄,越同game冇關果d越好睇,班友全部玩野玩到黐晒線玩到本野似笑話書同健康期《便利》多過game書,亦係因為咁癲加上班友本身有料到爆,當時直到而家仍冇任何一本本地game書超越到《Gameplayers》。本野真係由初初出一開始已經追,但後來越來越多game書出,多到玩減價錢其他果d$10有一本仲要個個禮拜出,《Gameplayers》雙周刊仲要$35一期,乜都以平為先之香港入面確係輸蝕左好多,但我仲有買繼續支持;直到屋企部PS已經死死地自己都開始唔多打機搵其他野玩,都仲有追落去始終係fans,到本書內部「內鬨」同開始脫期,末代果陣先至冇再買,而買落果百幾幾百本《Gameplayers》同其他game書好似又幾十本《軟體世界》,因為屋企冇位同放棄打機關係,好多都變成垃圾,就連《互動遊戲誌》VCD都不知所蹤晒,而家諗番都好遺憾,因為入面好多笑料同寶藏。而家game書,已經與我無關了,我仍然係超任同PS1年代,old-school game迷一個。
「所以,107,你部新電話我確係有d興趣架!」


無無聊聊噉就散band今晚,節目結果都係睇"Die Hard",本來諗住今晚會有野玩所以下星期六先睇,但結果可以提早一個禮拜開場。開九點十一場搭九收舖立即仆上去新世紀,趕到趕命入到去剛剛做完片頭,勁唔開心睇戲我最鍾意睇片頭架,照計今晚可以睇多次《變形金剛》架!不過趕得切開場就算啦有生意冇得睇片頭都冇計。套戲起初叫"Live Free or Die Hard",香港上叫"Die Hard 4.0",個名改得好因為套戲就係與時並進地講電腦犯罪,故事係前美國國防電腦保安顧問利用美國本土電腦系統漏洞,將全美國所有重要設施關閉製造全國混亂再乘機網上搶錢,最後梗係我地主角單人匹馬做低晒班電腦匪徒拯救美國啦。同第三集隔左好多年,而家Bruce Willis五十幾歲個樣已經老老地,加上出極又出又由硬橋硬馬變成網上鬥智,都幾擔心會唔會又係呃錢之作睇完得個灰字,但預告片已經爆到七彩拍得震撼,加上"Die Hard"小學睇到而家,就算係垃圾片都要捧場架喇。通常預告片都係全套戲之精華,入到場先發現原來預告片睇晒其他d文戲打戲都係睇完就冇,好在今集唔係,成套戲兩個鐘大半時間都係打,唔多廢話亦唔多文戲交代,而且其他都拍得住預告片水準,我呢個"Die Hard"迷同動作迷都會滿意,就即係打戲方面合格,加上Bruce Willis五十幾歲仲打得咁勇親身上陣交足功課,當係動作片夠睇到你好開心。劇情方面反而未必人人鍾意,因為「與時並進」左,以前睇"Die Hard"就係鍾意睇困獸鬥,主角一個點樣死纏難打成幫人,過程中充滿槍擊火花拳來腳往飛車跳崖,第一集場景係一座大廈,第二集機場,第三集紐約,第四集已經變成全美國(或者話幾個郡),一集比一集大,而動作場面亦正比地越來越大規模,加上今集主題係電腦,想睇好似前幾集一個炸彈炸晒成條街?唔係冇,不過確係少好多,感覺同以前好唔同,頭三集係恐怖份子用重武裝要美國政府屈服靠主角打救世界,今集變左用電腦,好多時間都係講出電腦犯罪點樣癱瘓美國,數碼攻擊點都俾火藥攻擊斯文同隱性,係好"Die Hard"亦有Bruce Willis搏晒命,但感覺係唔同就係唔同,又係「情意結症候群」累事,但大體確實唔似"Die Hard"因為太「高科技」喇,而似將另一套荷里活警世動作片(唔知點解會諗走丹素華盛頓)再放番"Die Hard"個名同搵Bruce Willis做主角,同埋又係要用對講機同奸角講數,就當做係"Die Hard"第四集,噉包裝確係高招,因為唔係有"Die Hard"個名,同一套片,你話票房少十倍我都會信。係好睇,只係越睇越唔對路,例如而家做荷里活片奸角,除左識功夫識飛車識開槍,仲加埋要識電腦,求祈搵個都係呢d貨色。「與時並進」。
整體格局點同以前"Die Hard"不符都好,有樣野仍然係貫徹系列傳統,大量美式幽默笑料同一個勇者同成個組織抗職之英雄色彩,就係Bruce Willis個角色果種「悲劇英雄」慘情,黎到第四集瓦解左第四班黑幫,但同人打好多時都係打得好樣衰,打完之後爛身爛勢爆晒缸流晒血,又會中刀中槍會重傷,成日都下場狼狽點睇都唔多次主角,現實生活又係人際關係差家庭破裂,日日做下做死似捱日辰完全冇人生目標,點睇都唔似你睇開無限金錢打得瀟灑來去不帶一片雲彩挽個手就救晒全世界之英雄。但佢會做,唔係因為佢想做英雄,而係時勢造英雄,好多時英雄係迫出黎,英雄自己本身都未必想做落去。饒有意思。



8/7/2007 SUN

琴日都未執完貨,太多喇而家實在搵位擺都頭痛,今日繼續,一面執野一面聽歌。今水貨加上上一水好多都係重覆貨同補舊貨,但今個禮拜多番d新碟,好似TURISAS。新碟同第一隻好唔同,上隻係epic black power的話,今次folk progressive左好多,不論技術定編曲,好多人覺得唔及上隻因為冇上隻黎得咁大陣仗,我反而覺得新碟比上隻更epic,唔係靠樂器/keyboard同唱做到,而係靠編曲做到起伏,尤其最後兩首歌直頭玩到好似SYMPHONY X,上隻碟吸引在好多玩野位但今集成熟左純左好多,聽落梗係冇咁好玩啦,但冇咁好玩唔等同於冇咁好聽,係兩種聽法黎,認真地玩都有認真之好聽。另一重點係SONATA ARCTICA新碟,過左頭兩隻碟已經慢慢求變,上隻碟已經同以前之SONATA ARCTICA唔同得好犀利,今隻再加「嚴重」更接近完全progressive metal再少dpower metal位,玩埋choir同chamber orchestra、更多北歐folk野、已經成立「Tony Kakko招牌旋律」(有d音樂人勁在聽一個音就知首歌係佢寫,除左佢,另一個例子係AYREON),好多progressive rock玩法但保留番power metal/heavy metal味道,特別在結他佬同keyboard今集唔多晒命,聽power metal/progressive metal 會冇咩keyboard/結他solo位你試過未?唔玩技術,而玩寫歌同編曲,今集仲QUEEN過上集唱果part玩到黐晒線,有d歌加埋結他仲有orchestra幾重聲玩harmony,再玩chord同scale玩到好詭異好邪,最正果首仲有卡拉OK版送添,笑爆metal碟都有卡拉OK,聽完就知點解會揀呢首做卡拉OK,玩(neo-)classical玩到根本唔唱齋播都好聽到爆orchestra member啡到黐線,已經搵唔到任何一隊band係似而家之SONATA ARCTICA,因為上隻我已經好鍾意,今隻自然更鍾意,拍得住佢地加power metal界之永恆經典"Ecliptica",相信佢地呢種「SONATA ARCTICA派progressive metal」仲有得玩落去,而家先係「第一隻」遮!Tony Kakko係當今歐洲power/prog界最強創作師之一!只可惜勁還勁,power metal?已經唔係啦。所以咪冇人聽囉。所以今日有個客,第一首歌十分一都未夠,又冇double bass又冇guitar/keyboard melody又冇solo,已經可以幾秒鐘遮只係已經可以好權威地話俾你聽
「一d都唔好聽。我一定唔會買。」
就係咁「唔好聽」。只有劉Sir一個人話好聽。而通常劉Sir話好聽果d,都係「垃圾」黎。佢唔識聽嘛。就好似新貨入面仲有隻MIDNATTSOL,係THEATRE OF TRAGEDY前女主音/LEAVE'S EYES女歌手個妹自己隊band,就係唔pop而飄飄地好好聽之女聲gothic metal,劉Sir話好聽。好唔好聽?係信劉Sir講、信身邊d人講、信隊band個名、定信自己對耳呢?



9/7/2007 MON

享左咁耐福,就到報應的時候了。前排咩都掟晒上工廠自己乜都唔使理,但積下積下手頭上幾個project都係今日峻工,一返到公司,要面對的係幾十箱貨加N咁多文件要跟。由返到公司開完早會食完早餐開始(我們的早餐由健康的降膽固醇麥皮,去到餐蛋治,再去麥記/KFC/腸粉豪食,而家變番好似好健康(卦)的「螺旋藻麥片」),之後直做到五點幾除左中間食飯之外未停過手,朝早匿入倉執足成朝,晏晝就埋位狂做文件。在旁的老細,睇得老懷安慰:
「一睇就知你條衰仔上個禮拜冇做野啦!抵死!」


忙足成日,放工心血來潮想食d野,好在去皆旺途中有唔少食府。公司附近有檔泰國野,就係年頭二月九公司團年飯時廿一點一舖贏左老細兩舊水,之後走左去酒樓對面呢檔泰國食串燒,食得非常開心因為d串燒正到hihi,但果檔野過左年之後,就執左了。
「對唔住。又係我。」
旺中KFC對面有檔篤魚蛋,又係超正有得堂食叫麵食,又可以出面勁量煎炸野,先達呢頭食過最平加款最多就係呢間,其他檔煙肉腸一串四舊呢檔俾夠五舊你,而且,而且有d款又平人一蚊仲有我勁愛的麥樂雞,五蚊七舊食到你飽仲要炸得勁好食,好鍾意幫襯佢地架!但到行過,
「咦?點解光猛左咁多?」
原來變左檔賣鞋。超灰。先達樓下變左做獨市,本身佢地已經唔係平又唔係特別好食,而家想食垃圾真係要行到去百老匯果邊先有喇。我發覺得所愛之一切,往往慢慢無聲無息地消失。

「我想問你地有冇《魔盜王》隻soundtrack呀?」
「有!」

曾幾何時發生過的笑話。但真係發生左喎。不過今次唔係"Cauldron Black Ram"(呵呵呵呵)。新貨「最魔盜王」果隻,就梗係TURISAS啦。一播就有位仁兄走入黎,
「正喎!咩黎架?」
「呢隻。」
「好海盜喎!」
「...係架...」

唔知咩係heavy metal黎,就執左了。TURISAS新碟就係咁玩野。我鍾意呢隻多過第一隻碟 - 老實講,第一隻碟係正,不過有幾首歌差d整體冇我所想中咁好,新碟同樣因為同上隻碟好唔同而唔係個個人鍾意,理得其他人丫我(勁)鍾意就得啦。跟住又係SONATA ARCTICA,嘩唔掂隻新碟真係越聽越神奇,「冇solo的progressive metal」、「唱多過彈的progressive metal」,越聽越明白到隻新碟係唔會有幾多人買,power metal友會因為而家佢地唔係power metal而唔會買(但會download,因為「咁唔好聽唔值得買碟」),progressive metal又因為「佢地係power metal」或者「『SA派progressive metal』唔係progressive metal」同「都唔知佢地玩緊乜」而唔會去聽(算吧,一定要多solo高技術歌複雜同似DREAM THEATER先係progressive之篤信者悲哀地仍然大有人在),甚至試都唔會試除非「有人send俾我」(又係一個諷刺,一面話唔會聽但一面又會搵免費野試)。除左QUEEN,因為choir同orchestra夾埋又有dTRANS-SIBERIAN ORCHESTRA,冇錯就係潮過一排的TRANS-SIBERIAN ORCHESTRA,尤其最後果首「卡拉OK」,掂!所以,慢慢聽,我自己。
今晚仲有Rock爺同大家分享「Virtual溫布頓速食賺錢法」,點樣「一餐晏仔時間就賺左八十幾蚊」。話說家陣電視做緊溫布頓,開始好多有錢二世祖現身機舖玩Virtual Tennis(睇完溫布頓之後「關注網球界」之行為也),新世代儲卡Virtual Tennis有challenge mode,合符某d特定條件過關就可以拎到隱藏球拍同球衣。因為Virtual Tennis出左咁耐,好多而家先「關注網球」的二世祖遲左入場,實力未夠拎寶物挑機又唔夠其他拎晒特殊球拍d老鬼(Rock爺呢d明顯係啦),Rock爺深明此道理,所以逢到lunch(or晏晝唔使做的時間)就走落街去機舖霸住部機坐定定打challenge mode,一個字已經有大量二世祖圍觀,再過多個字就會有人出聲:
「你好勁呀!係咪打左Virtual Tennis好耐架?」
「係呀。」
「可唔可以幫我拎隱藏球拍呀?」
「可以。」
「...」
「...」
「...」
「...」
「...幾多錢呀?」
「...四十蚊啦!」
「唔該晒...噉可唔可以幫我拎埋件隱藏球衣呀?」
「都可以。加多四十蚊啦!」
「好...」

跟住耍個手就拎晒球拍同球衣兩樣野,幾個字就賺左八十蚊,喂仲抵賺過返正職啦!計落長駐機舖,當一個鐘做一個二世祖,時薪都有八十喎扣番開機費廿蚊當宣傳引二世祖埋黎,一個鐘都淨袋六十啦賺錢又賺得疏乎喎!嫌賺得唔夠多?六十蚊只係個開始黎遮!通常d二世祖遲左入場,要的是隱藏實物而有的是錢,都唔會唔捨得花番一個幾毫(「喂!好似冇咁少喎!」)搵人幫手拎寶物。噉拎到寶物就自然係立即挑人機啦,人之常情地覺得「有勁拍=勁左」,但始終打波都係靠技術球拍球衣只係副,噉好快地挑左幾舖又輸了。此方乃真正商機。Rock爺立即第一時間衝過去二世祖度:
「拿!你梗係輸啦!用果枝球拍果件球衣,冇用架邊度夠人打丫!拿!我教你!你要拎,就應該拎呢把拍!著埋呢件球衣肯定無敵!噉啦!計平你!一次過拎晒兩樣,球拍球衣套餐只收你九十八!噉你要唔要丫?」
仲抵過返工啦!快d辭左日頭份工佢啦阿Rock!



10/7/2007 TUE

今日全公司玩水。公司部飲水機唔知點解壞鬼左,漏水漏到成地下都係,飲水機報銷今日全公司冇水飲。但係唔飲水會死架,特別係劉Sir 呢d先借飲水入pantry吞pop像完再借尿遁入廁所瞌番陣,冇得飲水簡直係冇左返工的兩大快事。搞到成朝早班人係噉吹水。點吹法?即係部飲水機壞左遮,但係仲有個熱水煲可以煲水飲嘛?煲完之後d水鬼死咁熱,大家想快d飲就唯有吹水,笨實果班用口,醒少少果d拎個USB風扇出黎對住隻杯,噉先係正宗過正宗之吹水!
「唔好問我點解,我公司明明有雪櫃!」
是日lunch有無敵雙拼:卡邦尼芝士雞扒(食左成世仍然未知甚麼是卡邦尼)加芝士粟米火腿雞絲焗意粉再整多個炸薯條做頭盤,一如平日我自己叫果盒意粉從來唔會lunch食,一點打鐘之後各位女同事分d夾d噉就砌左個雙拼兩盒出黎俾我喇,等/睇佢地分飯之時間當然就係清埋兜薯條頭盤啦,清完就剛剛好可以開餐!食完個飯當然係訓個晏覺,但今日訓得唔多安寧,因為老闆娘落街行行下踩到狗屎,上到黎入廁所洗鞋,點知一洗洗到爆埋水渠個廁所水浸埋(好架喇係爆水渠唔係爆屎渠),呢d情況,你會點做?梗係立即落樓下買番包爆谷上黎食住睇戲啦!睇下老闆娘點樣廁所入面澗水真係好有娛樂性架!因為要救忙,唯有打電話落樓下管理處閂水掣,為救老闆娘搞到全層冇水,即係我地唔想要水遮人地廁所同公司要丫嘛。搞掂左之後,唯有逐家逐戶拍門道歉:
「對唔住啦!都係我老闆娘啦!人踩狗屎佢踩狗屎踩得咁柒累左各位街坊真係!我會管教下佢下次踩好d架喇!」
晏晝老細仲要出埋去返大陸見客添,野一早做晒(「劉Sir返黎喇!」)自然又係怒玩怒食啦!好得閒真係開心到爆,上網又上到悶近來冇咩做開始寫番野,今日的起心肝埋左兩篇碟評尾,儲備出下出下冇晒而家開始補充番。要寫永遠都寫唔晒,想寫/寫緊之舊碟未寫完,新碟又出極都有得出,要揀寫邊隻碟寫乜野先都有排揀。仲要打機同寫game呢!仲要玩變形金剛呢!
「很多!!!」


除左殺到埋身就聽之外,已經不理metal界間之世事。BBM?算啦我而家一d都唔潮了。好多野都係其他人睇到知道之後「潮」番俾劉Sir知。好似Rock爺今日介紹左呢個妹妹仔俾大家識。
「MK妹!!!」(都唔妹妹喇其實)
可能好多人睇到,都會有如此反應,的確著住件band tee戴metal飾物攬條鐵鏈上身就假設成metal之「MK系」男女確實唔少,就同以前之visual、punk甚至gothic、hip-hop,著係噉著,但點解要噉著、背後之音樂文化,可能一竅不通。好在呢個唔係。首先,佢係日本妹先。二來,係一個超級沈迷metal之日本女仔。日本metal甚至音樂市場都係亞洲最大,又未至於好似北歐咁全民metal地瘋狂(「全民」有點兒誇張左),但論狂熱程度世界上真係冇太多地方及得上,好似個日本妹,唔聽extreme metal果隻最extreme都係melodic death之列,可以話係聽大路野多果一種metal友,但大路一回事,唔係聽完圍威喂拋拋書包就算,而係真係支持metal鍾意meta到你唔信之地步,佢自己本身係做網頁設計師,除左經自己個MySpace推廣自己鍾意之樂隊同metal,仲用一技之長用日式漫畫手法幫metal band畫肖像畫。都未止。NOCTURNAL RITES(早期似HIBRIA現時似RAGE,又係一隊被遺忘之勁band)係佢最鍾意metal band,鍾意一隊band,你會點做?因為佢識做網頁又識畫畫,就幫佢地整左個日本網頁,仲得到樂隊認同成為NOCTURNAL RITES日本官方網頁,而佢幫隊band畫之肖像,更加俾隊band拎埋黎做NOCTURNAL RITES個MySpace之頭像。冇錯佢係一個日本女仔,一個望落都「幾潮童下」之日本妹妹仔,但事實上呢個日本妹真係為metal同樂隊做左咁多、為世界metal作出如此貢獻。日本仔鍾意metal,就係可以鍾意到噉程度,就係做到真正之樂迷,就如《不日成名》(24/6/07) 所講:
「做得樂迷,就係對一隊band好執著,熱情投入佢地音樂、態度同文化當中,唔止口頭,而係心理、生理同經濟上都為佢地付出,只有噉先至叫同配做一隊樂隊之真正樂迷。」
所以難聽d講句,點解香港音樂水平仍然未有大進步過,甚至前景完全唔樂觀。層次根本同其他地方完全唔同。當你上本地大部份音樂forum睇睇,再睇睇呢個日本妹,大家聽metal、對metal、為metal之心態已經完全係冇得比啦 - 香港甚至係「為metal」果部份都搵唔到,好似我冇乜見過香港會有人好似個日本妹噉,為自己鍾意之音樂同樂隊付出咁多心血時間,唔係為自己可以威可以型可以多d人識得自己出人頭地,而係為等隊band同呢種音樂可以更多人識。前面「metal」改為「音樂」結果亦幾近一樣。
冇辦法,音樂同人文層次實在相差太遠。有時都想睇同講到咁灰,但係望左咁耐,再睇睇其他地方幾年黎發展(唔使講日本,齋講大陸同台灣都夠),香港音樂文化前景真係只得一個字。



11/7/2007 WED

「放假喎!有咩做呀?」
今日好早返到屋企online,大量人問。難得星期三唔使開舖嘛。只係唔使開舖,並唔等於唔使做...返到屋企,其實仲係做緊野架。做緊乜?之前都講過,而家已經排期排到做緊九月d野啦。真係一星期做足七日而家。
當然,禮拜三返到屋企,就自然要輕鬆番下先。flash game仍然係怒煲一隻,近來搵d新flash game冇乜邊隻覺得特別好玩或者有潛質,反而終於的起心肝上網搵,俾我摷番隻超想玩番之超任game。而家上到舖頭就玩變形金剛,返到屋企打機,已經冇時間metal了。(死,好似返工反而係最多時間添而家)
「喂!C&C呢?」
係喎!sound card都未買添!下星期三去買啦!使如下個禮拜三唔使做野有時出去買的話!



12/7/2007 THU

今個禮拜清番七一同美國國慶之後d手尾,忙左幾日,到今日晏晝終於叫做得閒番d,玩下食下又放工了,即係,
「又開工了。」
多番d新人,多番d人氣,最正係見多左老野,始終老野諗野聽野係唔同d,同埋言行舉止、對音樂係「有文化」d。
「就係因為鍾意、有果個mood,先會走上黎買碟試新歌嘛!如果唔係有心聽,求祈download MP3入落部MP3機同電腦聽算啦使乜買咁多碟使咁多錢?」
阿叔過癮地係條hi-fi友,拎部靚聲hi-fi黎聽爛聲hi-fi的hi-fi老野。metal從來唔係靚聲,用太靚音響聽反而唔好聽,本身metal係玩厚聲拆聲音牆格,錄音同分析唔同其他音樂,用一般音響整出黎可能全部定位亂晒加空洞好多甚至音質都唔同,聽metal反而用平野先「好聲」,例子甲係肥仔條鴨寮街廿蚊headphone,「metal過二百幾蚊果d」;例子乙係咁多年黎我用過最好之聽metal耳筒,仍然係Sony MDR-EX71SL
「我都唔算玩hi-fi架喇!我朋友套野成兩百幾萬,齋玩混音都十幾萬,一條純銀線六萬蚊幾,噉先叫玩hi-fi!好在我聽metal野,唔使咁勁,雞雞地都得!」
只不過「雞」極都係幾十萬計貨色,一條線唔使六萬不過幾千蚊噉囉。好在我仍然十分滿意於兩百幾蚊之Sony。你俾咁多錢我,其實我都用唔晒(呵呵呵)。



13/7/2007 FRI

黑色星期五今日。好黑今日真係。夜晚就加番d白色,即係灰啦。都係old-school友聚腳日子,唔係撞d阿叔就係一班友係度吹水。近排熱播係變形金剛電影版soundtrack,唔係月底上果套真人電影版,而係廿年前果套卡通電影版,到而家真人電影都上,卡通電影版都拿拿臨復刻(咪就係107隻常平正版),隻soundtrack都順便reissue埋刮多筆,之前聽入面最出夠最首歌聽到上癮上網摷,起初都有平貨點知全部賣家見電影版就上立即收埋晒唔賣諗住遲d上畫之後拎出黎炒,好在等到而家出新版(所以我聽歌買碟已經唔追唔急),嘩開心幾多呀大佬reissue!首先有超詳盡解說,搵番當年個producer寫當年點解會搵佢做配樂、點樣幫呢套卡通片做配樂、同做一般電影配樂有乜唔同,跟住送多四首歌,都係電影中之插曲但soundtrack第一版冇入到,廿年前但係d歌全部超正,隻soundtrack主要係rock band插曲("Transformers"主題曲加所謂「cult-hit」之"The Touch"廿年後仍然無敵!),但其他電子/古典配樂特別係新版加送果堆先係正野,非常progressive rock,電子加交響加rock正得黎多變化再加夾埋變形金剛機械主題!而家好多戲一係狂metal一係狂交響,反而冇左呢種情操!個新版更正係雙封面,舊版個封面唔係差,只係新版重畫色同畫都靚加俾足兩個款,唔需要問變形金剛 + 正宗'80 heavy meta&hard rock&glam + 超正之progressive/symphonic rock + 詳盡解構電影soundtrack之前因後果,仲要有"Transformers"+"The Touch",最正soundtrack之一在我心中佔有神聖地位。另外今日在場人士一致認同,超任永遠係最正遊戲機,不論味道還是遊戲,你上黎睇見我唔係變形金剛就係忍者戰士就知啦。打機就係為左離開現實過癮下,以前超任年代機能唔夠,畫風反而更加具動漫感,而家乜都要CG乜都要真實乜都要超靚,系統又要有幾像真得幾像真有幾複雜得幾複雜變化有幾多得幾多,喂,咁鬼死真,日頭做野返學已經用死個腦啦,打機仲要我咁煩?所以Capcom兩個掣打爆機之行街game永垂不朽,就係用最簡單之系統同設定帶黎最大空間同遊戲性,打足廿年都完全唔覺悶,反而新果dgame可能玩一輪就冇心機玩落去或者再玩多次。行過報紙檔,一唔好彩又俾我見到本玩具書即買,,玩具書咁簡單就當然唔會引到我買啦我未至於玩玩具玩到咁癲,係因為個封面有超大個博派標誌加「變形金剛特集」大大隻字。本野叫《Giga Hobby》,買左本發現真係死得人,本野齋睇廣告都睇死人(唔係多到死果隻,係正到死果隻),入面d專題又係恐怖,講高達講足十幾版,講超合金又講十幾版,連齋講女都講足十幾版,睇玩具的話本野真係完全夠睇心滿意足,一唔覺意執左呢本野,變形金剛事少,見到其他野先死:
「超獸機神又有?機動警察又有?異形都有得出kubrick?如果連變形金剛都有kubrick出,死我驚連kubrick我都會追埋!」
仲有好耐冇食過之大家食,近來狂食新旺(無敵之「粟雞蛋!」(都唔夠當年最cult之三秒鐘讀出「漢堡煎蛋飯粟米汁炒底凍華田」!)),好耐冇見過大家食阿姐了。超飽。大家食一碗麵實在超多野食。
點睇都唔似做生意而家TRHK。似上黎玩多。(雖然不嬲都係)



14/7/2007 SAT

「我要食大家樂早餐!」
琴日會計靚女出到聲,今朝搞到我晨咁早起左身。有幾早?八點半已經出到去大角咀,連自己都有d唔信。係真係太早,早到我要入機舖。公司果頭好多又殘又細舊區特色機舖仔,大家樂果邊有間,反正大把時間入去睇睇。通常返大陸時上老細車係同一位置等,出車早到六七點都有,有時七點幾行過黎間機舖已經開左今個鐘數八點半,唔好話有人啦直頭係旺添啦,全間機舖冇幾多部機係冇人打緊。全場除左一部跑馬機(當今機舖唯一賺錢機)加超殘頭文字D兩部,陷家都係篤篤機(唯二賺錢遊戲機),只得兩部拳皇同一部500合一,部五百合一又勁喎有之前果隻中文三國吞食即係關羽曉出飛龍在天果隻,四打加玩法同系統絕對係產版《AD&D》(「政治正確!」),當年有bug玩無限爆珠加出超必睇人打怒炸都睇得高興,但後來唔知點解突然消聲匿跡機餔之中,以前真係為睇人爆珠唔打機都落機舖兜架,事隔好多年終於再遇!
「死!好似好好玩添!係咪又要入番機舖摷部五百合一煲煲佢?」

唔知點解我公司果頭冇乜食肆,莫講茶樓就連茶餐廳都冇幾多間,因為半獨市關係間大家樂朝朝早都爆到出街,真係出街咁爆我試過六點幾黎都可以排隊排到出門口,係大家樂的無敵咖哩角係我仲非常支持佢地之原因,但大家樂早餐真係唔多掂,會計靚女鍾意食所謂招牌鮮奶炒蛋早餐,我食過一次超唔鍾意食,好在今次自己叫個餐腸蛋沙嗲牛肉米加多士仲有杯野飲廿蚊仲有找,同新明威唔係太好食勝係夠多又唔算太貴,尤其塊多士上到公司之後俾靚女加工變成牛油芝士多,食完之後飽到滯。餐早餐直頭食飯噉食。
食完之後,老細見到我個死樣,都知我衰架喇。
「...不如噉啦。橫掂你回鄉證就夠期,反正今日禮拜六,你快快手手去搞掂埋佢啦。」
「多謝老細!」
立即飛出旺角中旅社。都唔係就快,仲有十幾日噉囉,過多十幾日先至過期,唔係老細今日出到聲要我扯,我都唔會咁快&自願搞番個續證呀!冇錯我仲係用緊大大半回鄉證之old-school友,其中一個唔想換證原因就係而家換會變成細細張回鄉卡,灰喎過關時大大半拎出黎先夠霸氣喎!原來續證有好鬼多野要搞,填晒表影晒印影晒相之後,
「唔好意思,今日換證派籌已經派晒喇!想換證的話,請聽朝早八點半再黎拎籌啦!」
唔叉係卦??????先十二點未夠,點算?反正出到黎旺角,順便上上新世紀先啦!
"Project: Grindcorehouse!!!"
我計劃係搵個朝早一次過睇晒兩集,噉先似番grindhouse!但上到去先知道原來仲未上第二集,要到下星期先上...即係今個禮拜日冇歡樂早場了。好唔開心,返公司抹個汗再打卡就走人了。(「挑!你妨你敢當自己放左工公司都唔返去!」)


返到公司又行番出黎,係我都覺得自己好戇居。今日太曬唔多想行街,只行左皆旺附近幾間VCD舖。好多新野出喎!俾我發現到一隻
Transmorphers
同埋"War of the Worlds"有特攝版!嘩越睇越神奇!真係要搵次黎掃掃貨先!得閒無事落VCD舖,見到好多過癮野又廿蚊有找,睇完得到之快樂(因為好睇or好柒)遠唔止廿蚊呢個數啦!抵玩!一點幾已經見到我上到舖頭打忍者戰士了,隔籬仲有個Rock爺,唔係得閒無事又點會咁早上黎丫好明顯係借TRHK/劉Sir攝時間啦!劉Sir一面打忍者戰士,Rock爺一面播一隻pop野,一個芬蘭流行女歌手,本身極鍾意'80 glam&hair野,隻碟有超強班底(坦白講,歐洲真係行行下街捉條靚仔塞枝結他俾佢,都可以勁過大半個香港),最強係有SONATA ARCTICA同EUROPE大佬幫手寫歌,一聽你就知道唔係普通野唔係濕野唔係pop野。當今想搵番呢dband pop野黎聽真係冇幾多地方搵到,日本卦,但歐洲先最精最多,人地d所謂pop野係band野rock野甚至metal野,既然呢d野而家咁多人鍾意,點解都冇乜人會識?冇計,美國仍然壟斷市場媒體,而美國而家係南美野同hardcore野,所以個個都係聽/玩hip-hop、R&B、metalcore。呢d真正好聽pop野,就只有屈居歐洲了。
三點鐘,TRHK開舖時,Rock爺就走了,幾仆街。晏d仲有又神州遊完回流香港的肥仔。之前契爺香港走到去巴基斯坦行足差唔多三個月,肥仔三個禮拜行完四川清海就玩完,目的地西藏都冇去到,
「使左五千幾蚊!」
所以返黎香港。據之前契爺再加今次肥仔形容,而家中國大陸北方,簡直係人間天堂。環境唔使我講大家睇《大江南北》都知啦(知道《大江南北》乜黎加睇過的朋友,對唔住,你已經有劉Sir咁老了),直到係渡假聖地啦而家香港日日三十幾度,上面夜晚只係十度咁大把!講食野餐餐都係食麵同肉,菜冇乜肉反而係最多最平,七蚊一大碗羊肉食到你唔想食咁多,
「嘩正完全係劉Sir式生活!我要上去餐餐無限肥牛!」
北部都係歸原田居,講玩同買都冇乜架喇,但好睇。
「真係好好睇!齋坐係街都大把野你睇,睇到你唔想走!」
睇咩?唔使講啦。北方地區,血統同民風確係唔同d。難怪越來越多香港男性北望神州。
「上過大陸睇過,終於明點解有人話香港係塊洗衫板!」
據肥仔所講,真係架,你齋坐係度睇,根本通街都係靚女,單講外在美係完美,睇女的話睇到你走都唔願走。話說有一晚肥仔走到去一座二千米高之唔記得乜野山山頂間旅館住左一晚。旅館老細不住重申:
「我從前是當兵,為人很梗直的!」
轉過頭,好關切地詢問肥仔:
「需不需要女人?」(已經成為TRHK金句了)
肥仔話...居然話唔需要喎!返到香港睇番(香)港女,先識後悔!
「講真,真係想玩,你帶二千蚊上去就夠,二百蚊食住,八百蚊車錢,剩番果一千蚊...玩到你謝都得呀!」
噢。107。我們的澳門團,相信要再議了。

講女,今日都好多見聞。又撞到一對孖女,見過好多次,上黎真係黎搵rock同metal野,冇錯係兩個/一對鍾意聽rock同metal 的靚妹仔。好過癮。夜晚仲有個gothic妹妹上黎,認得出《將冰山劈開》、講得出「chrous梅豔芳同許志安調轉左」,勁!而家d妹妹仔,實在太恐怖了!港仔都比唔上!
「女呀!!!」



15/7/2007 SUN

「想換證的話,請聽朝早八點半再黎拎籌啦!」
上回講到。因為八月開始會多番客蒲頭,個回鄉證要整整了,迫住今日星期日都一早。鑑於琴日已經填好表影晒相準備好晒文件影件影印本,心諗黎到拎個籌坐低等嗌名之後交表就走得人可以去玩,去到旺角中旅社已經係好早架啦,點知都係遲到,辦證果層已經成層爆Q晒,排足半個幾鐘九點幾先拎到陋籌,個阿姐得一/三句:
「九十號!填好表,三點再黎!」
立即爆出連串粗口(在心中)。你叫我八點半黎,就係為話俾我聽三點鐘先有得搞證?好在冇影響到我計劃,歡樂早場如常進行,只係由整晒證先去玩變成玩完先返黎整證。梗係出尖咀啦立即,HMV而家CD唔多睇而集中睇戲,上次黎唔係好耐之前遮,擺d貨又唔同晒,吹脹喎咪即係得閒無事都要走過黎睇睇有咩平野,尤其是而家summer sale開始左?
「Roger Waters "In the Flesh Live"隻2CD+DVD超豪特別版,而家賣$98咋,仲抵過齋買DVD!」
睇睇報紙見到廣告話「全港最大玩具店重開」,即係尖咀玩具反斗城啦,專登去睇睇咩料(所以上網睇報紙永遠冇咁好睇,除左冇果份質感,網頁數碼廣告亦唔夠平面廣告有味道)。裝完修開番晒,即係由得番半間變番實物原大,有乜唔同?唔多覺同以前有咩大分別喎...係全部野擺位調亂晒囉,上次一入已經成堆變形金剛,今次係BB車BB衫果d,仲有遙控玩具。門口已經砌左兩大座野,一座係Radio Controlled Robotic Car,土炮出品遙控戰車機械人,有車、「GERWALK」同機械人三個型態,可以遙控走黎走去同變形傳說中「五秒鐘由車變成機械人」,香港人整但勁到外國拎埋獎架呢部RCRC!香港製作加遙控加曉變形(重要!),確實有足夠理由支持,只有兩個問題。一個係價錢:
$599
三個月前報紙賣時已經講左個價出黎,我反應係
「嘩∼∼∼」
買過最貴玩具都係
斯比頓星(會買到絕對要多謝107同招商啦),六舊水一隻玩具現階段對我黎講真係豪左d,現階段兩舊水已經係我極限。第二個問題係大。斯比頓星成尺高已經難搞,呢隻仲要兩尺幾,香港地咁細,有幾可有咁大地方擺咁大舊野玩咁大隻玩具丫?題外話,個包裝都幾惡頂,香港出產中國人地方,都唔使夾硬塞d中文字落去卦,睇見盒面寫住「變身機械人」呀、「強勁」呀,好國產feel喎大佬。仲有!正正RCRC隔籬另一座山係隻機械狗,同RCRC一樣新出,但興趣絕對係隻狗仔大d,冇計真係好過癮架隻狗。價錢三舊水噉囉。或者下個月十號生日(呵呵)諗諗佢囉。同埋
「睇睇個市點先啦!」
話咁快就行晒了。尖咀反斗城「裝修」完,大番,但好似仲少款玩具過以前喎...
「...我隻手榴彈呢?」

走晒尖咀目的地先十點半,再過銅鑼灣,次次歡樂早場都係呢兩度架喇。而家鍾意行銅鑼灣HMV多過行尖咀,因為銅鑼灣超勁多戲DVD有勁多做減價,冇黎一排今次d減價野又唔同晒,定好似行左咁多間間間都係同上次唔同喎咪即係個個禮拜都要搞番場歡樂早場先收得科?唔止戲款換,就連價錢都換,之前有幾套目標標三四十蚊,今次黎到已經變成每隻賣成舊水,灰呀當時冇執真係而家蝕晒!有一套等緊跌價,就係Stanley Kubrick's "Full Meta Jacket",唔使問點解啦一睇個名都知咩事啦!(噉我未至於唔知套戲講乜咁白痴)大把時間順便睇睇CD,行過「最新出品」個架,唔明點解而家99%華語歌手出碟都要用到DVD digipak包裝,咁Q大舊,點擺呀?又見到變形金剛電影版soundtrack,唔係幾日前怒煲煲到而家仲係日日聽兩三次果隻動畫電影版soundtrack,係黎緊廿六上畫真人電影版隻soundtrack,套戲冇得唔睇但soundtrack興趣著實唔大,因為唔使問肯定係大堆(最新)rock同metal野,即係想聽同鍾意果dband實會有買碟唔會/唔使為自己鍾意dband而買,如果好似動畫電影果隻噉係插曲加配樂更加吸引,電影配樂比插曲更重要呀。隻soundtrack隔籬隻SMASHIN' PUMPKINS新碟先緊要呀,會放隔籬好明顯因為佢地新歌套戲有用到啦,散左咁耐終於出番黎出新碟,等左真係好鬼耐呀知唔知佢地十幾年前隻"Siamese Dream"仍然係我最愛grunge碟?(假使你當佢地係grunge的話)執下執下自己都唔為意就執齊佢地全線,散左之後隊ZWAN又係超正,當然未去到SMASHIN' PUMPKINS之神檯級地位,佢地係grunge又好、係alternative又好,做到好多樂隊、而家好多emo(core) band想做但未達到之層次:重、技術同灰而灰得黎夠靚加唔會令人反感,齊晒深度甚至實驗性、前衛性,或者因為噉,越來越「玩野」之佢地音樂太前內部不和加埋就散左,復出上年講到今年,變形金剛出現之時,估唔到佢地一齊再蒲頭。事隔多年而家玩d乜d歌咩樣未聽過,自從收左皮冇再上網同forum睇野加埋sound card壞左,已經同潮流完全脫節了,睇我而家仲係聽廿年前隻變形金剛soundtrack就知。
「很多。」
慢慢黎啦。手頭上果d都未聽得晒。反而有隻好想搵見唔到,就係KOLOR,亦即係臨記結他手搞NOTHING NONE前結他手有份上到台大大聲「我地係玩pop」之(曾經)朗豪坊駐場樂隊。搵極都搵唔到。唯有過去對面玩具反斗城洩憤。尖咀唔同晒樣銅鑼灣呢邊冇乜唔同,同樣變形金剛守門口,搵唔到隻機械狗但遙控玩具多過尖咀,有隻勁大隻遙控速龍,睇落咁型咁高科技以為要成千銀點知原來一半都唔使,隔籬兩舊水有部超巨型遙控飛機,真飛得上天果隻,而家d科技玩具好似仲賤過玩公仔玩機械人,興趣係有架只係香港地點玩呢d玩具丫,遙控飛機要出郊外又冇車又冇時間,遙控恐龍本身隻野已經差唔多成米長,你屋企冇番咁上下size真係玩條毛,俾地方隻野周圍走都唔夠啦,但呢個機械人系列Robosapien,即係我唔玩玩具時都已經留意佢,係現今最完善之低成本電子機械人玩具,AI同動作真係正到你唔信架,只係如果得百幾尺地方困隻野入你房仔度玩有咩癮丫,係要放隻野自己通屋企佢周圍搵野摷野,然後你出下聲拍下佢搞搞等佢應你咬你噉先好玩架,智能同反應好接近真正寵物。純粹睇睇噉遮(只係隻機械狗我真係興趣益大),但估唔到有意外收穫:
「原來尖咀d手榴彈搬左過黎呢邊!」
兩間舖兜左好耐,因為要攝時間,想過埋White Noise掃掃碟同買黎緊場post-rock show飛嘛,點知等到十二點幾又未開,
「喂拍得住TRHK咁遲開門喎你地而家!」
又待有緣啦。相信黎緊仲有歡樂早場玩。

搭地鐵出番旺角先一點鬆d,先上皆旺「補給」,又去行過。第一站,冇人會估得到。
「我去左買筆。」
梗係劉Sir做代言人果隻三菱牌SN-80,唔見晒好耐既然今日經過中南執番兩枝先,點解會咁鍾意6六陸有講架自己慢慢搵啦哈哈哈哈。睇《Giga Hobby》見到兆萬咁多玩具舖賣廣告,中南對面就係啦冇理由唔上去睇睇,玩具舖確係幾多呀但點幾鐘都未開?據聞樓上寫字樓仲多,但實Q擋住話兩點先放人上去,嘩咩商場黎呢個仲衰過有劉Sir駐場的皆旺?唯有算啦走過對面宇宙船算。話搬左,但好有趣地只係由街尾棟大廈搬過隔籬大廈,日版野多當然唔少得變形金剛啦,但其他貴價野反而仲吸引,好彩我未迷玩具至此!搬左舖之後新裝修超靚,睇檔的妹妹仔仲靚。跟住無聊地上信和問煲姐借廁所,
「契弟呢?」
「上左去啦!」

先知原來107又北上玩幾日!
「搞錯呀自己唔聲唔聲就走左上去唔等埋我地!需要女人都唔需要急成噉卦!」
梗係唔可以唔行VCD舖啦,宇宙船樓下果間夠廢,係多廢碟果種廢,喂睇廢片爛片一大樂趣黎架!而家個得意動物人系列(鯊人蛇人蟲人蚊人仲有骷髏人)已經跌到廿九蚊隻了,我等佢去到十九蚊立即一次過豪一舊掃晒全線!星際樓下間大野就正囉又多又齊,好似我想搵之"Predator"第一集孖碟特別版,只此一間見過,亦有好多其他正野,好似"War of the Worlds"除左年前果套電影版,同新出現之特攝版(一睇就知又係廢片得架喇跌完價必掃),原來仲有出過個"Live on Stage",就係之前107有入過果個七碟symphonic/progressive rock版之舞台劇版,將成個rock opera搬上舞台,加上演員、視像、樂隊同交響樂團變成音樂劇現場演出,嘩頂點解會咁叉多正野?點算?
「睇睇個市點先啦!」

中旅社兩點先開始辦工,行晒咁多地方先點半,條街成三十四度梗係上定去中旅社坐低涼冷氣好過啦。「兩點開始辦工」之意思,原來真係解兩點開始辦工,朝早派籌真係派籌咁簡單,派晒之後晏晝先開始收表,我張飛仲要九十號,即係兩點起要坐係度等足八十九個人先排到我,飛仔寫住「三點回來輪侯」,果然係三點就輪到我搞證,全中旅社最有效率就係呢樣估飛仔囉。流流長成個鐘睇晒本《Giga Hobby》,成疊metal雜誌冇幾多本有揭過,揭都冇揭就更加唔好話有邊本睇晒,但本玩具書我會坐定成個鐘圖加字撈晒,劉Sir已經唔再metal了。好在玩具呢家野仲只係玩玩下,未至於真係黐線到metal咁激,有時間又有閒錢見到有平貨同幾過癮先執囉。只係基於以上條件,都已經多野想執到爆了。同樣,
「睇睇個市點先啦!」
係呀真係要睇住個市架。股呢家野可以話係極端數理化之買大細。好彩的,符碌或者睇得中低入高沽,一日賺到幾千唔出奇甚至算少野,你睇報紙成日講邊個富豪邊間公司點樣一單買賣一個價位幾十萬進帳就知,但回報高時風險亦高,假如睇唔到又或者咁唔好彩抽中d灰股低開怒跌,真係連經紀佣金同手續費都填唔番。炒股同睇長線唔太合我性格,我唔多鍾意太多俗務纏身同太向錢看,加上自己唔識(你估我係股神107咩),所以有新股上市時咪試試短炒,賺多賺少都好總之一有賺立即離場,之後永遠唔再睇番隻野而家點升到幾耐費事心掛掛或者眼冤冤,好彩賺到咪買多隻變形金剛開心下囉(人地炒股係搵大錢,我玩股卻係為左買玩具,為細路玩意玩大人玩意,係咪好諷刺?),唔好彩蝕左的話...好好彩,或者因為我股票態度係唔貪又唔係玩身家果種,現階段有賺有蝕,夾番埋叫做打個和收少少噉囉。
「玩股一日賺幾千,噉你咪搵好多?」
「假如你好似劉Sir咁重負擔,你就會明白要每個交易日都賺到幾千蚊,先夠應付晒咁多開支。再者,承受之風險遠比你想像中大,即使你只好似劉Sir玩咁細。」

所以股呢樣野細細地玩咪算囉,又唔係幾萬幾十萬噉去,搏幾千收得番幾千打個和冇蝕底,到時有一千幾百賺番,唔使賺得多,有筆意外之財買多少少野食番餐好都開心啦。你係諗住靠股票賺大錢就梗係易跳樓啦。又唔係賭身家。
「此乃劉Sir式心態。」


一早躝左出街,加上TRHK典型地永世冇人,全日多時間聽野到呢。今個朝早咁Q多個鐘再加舖頭大半日,一路聽聽到聽晒HELLOWEEN近全線。佢地第一隻碟其實係"Helloween"呢隻同名EP,呢隻碟係玩...
「Death Metal。」
專家請插。其實HELLOWEEN最恆最激就係第一隻碟,你話係power metal?首先,某程度上果年未有"power metal"呢回事;二來,好恆好激喎大佬?再跟住真正第一隻大碟"Walls of Jericho"(唔係hardcore band名黎係碟名黎),超級麥記點聽都係thrash metal多過power metal,有永世經典"Heavy Metal is the Law",睇個名都知道夠晒metal(&夠晒娘)!跟住"Keeper of the Seven Keys Part 1 & 2"唔使多講啦,好多人都視power metal之真正開始係呢(兩)隻,至於音樂,重覆番冇幾耐之前講過就夠:
「同GUNS N' ROSES對"Use Your Illusion"衰同一樣野。」
但其歷史地位係毋用置疑,入面d金曲真係永世流傳之power metal金曲。再跟住結他佬走左加舊歌佬最後唱果兩隻我冇,因為以前真係想搵都搵唔到,點解咁難搵?聽過你就會明白...
「算啦。」
換左歌佬之後,"Master of the Rings"係HELLOWEEN回歸作,上兩隻碟dhard rock/pop rock玩得好的話就會係呢隻碟,新歌佬把聲唔係唱power metal而係thrash metal,好多人唔鍾意但我超like,而且新歌隻style拆聲唱一定好過基佬式高音先,加上d歌metal得黎又夠pop,呢隻係我最愛HELLOWEEN之一,亦因為全碟質素偏高甚至好感比七匙更甚。然後"Time of the Oath"似番power metal野,又有另一經典"Power"有打打鼓機都會聽過玩過,只係已經開始暗左,令覺得HELLOWEEN就係正氣就係開心班(hardcore) fans繼換左歌佬唱把聲完全兩回事之後再下一城。"Better Than Raw"唔知點解聽極印象都唔太深,係記得首慢歌好聽,而HELLOWEEN兩個死穴之一就係慢歌,真係冇幾多首慢歌我覺得好聽,或者再聽耐d聽留心d會明白多d,就唔會只覺得得首慢歌好。如果唔鍾意HELLOWEEN變邪的話,"The Dark Ride"直頭會掟爛隻碟,開波係舊HELLOWEEN式power,但之後...邪到爆,勁暗,音樂歌詞都係。佢地真係HELLOWEEN黎?玩左十幾年點都要求下變啦,相信越黎越玩feel之新路線係隊band想玩之路向,只係實在同HELLOWEEN之名之歷史偏離太遠,可能因為噉、因為fans,下隻碟"Rabbit Don't Come Easy"睇個名都知道有幾開心啦,有上幾隻碟果種happy,但後半開始玩番暗歌邪歌,對好多fans黎講都算係(另一)回歸作黎架喇,我自己覺得最正梗係臨尾首ACCEPT cover,其實講X-JAPAN、講HELLOWEEN、講power metal,ACCEPT先至係教父,只可惜冇人理就係冇人理,雖則佢地係俾X-JAPAN同HELLOWEEN更重要、更值得聽!最後到新碟"Keeper of the Seven Keys: The Legacy",又係個名講晒啦,刻意地一出就孖碟扮番Part 1 & 2,兩首長歌當中一首《機會大道》直頭係無敵,除左慢歌HELLOWEEN長歌都係從來冇邊首寫得好,《機會大道》曲詞係最完美最成功,到而家仍然成日為呢首歌而播隻碟黎聽?只係兩隻碟夾埋其實(應該)單一隻CD都裝得晒,點解要拆開兩隻?用途可能係話俾你知邊d歌應該聽、邊d歌唔使聽,因為第一隻碟好正,但第二隻碟過左長歌之後,急跌...唔係好耐之後又有新碟出,真係諗唔到又會點玩法。
寫的話,相信又係幾萬字噉寫,一隻碟都要幾千字啦,加上HELLOWEEN非常複雜之人事同歷史,冇十萬都起碼有一半。有機會先啦,太多野聽緊寫緊,況且HELLOWEEN仲會有人特登搵黎聽咩?而家講power metal,好多人都係:
「DRAGONFORCE!」(同埋近期最潮HEAVENLY!)

真係可以好得閒架。係到契爺夜晚走上黎 - 當然仲有大量不知名國土之風土音樂啦 - 先至多d野玩。
「嘩!呢條友點睇都係新彊Marty Friedman,個樣同音樂都係!」
香港地,行街見到街邊有個人彈結他,會好詫異地望住佢唔知佢做緊乜、以為佢行緊乞,繼而遭到差人驅趕;大陸,都唔使走到去北面咁遠,齋過左境火車站已經大把人彈結他。去到北面,d人講緊係精神文明、精神文化,音樂係人文藝術之重要一部份,彈結他?指定動作黎啦差唔多成街都識彈、成街都係結他佬啦!「精神」同「文明」兩樣野,唔好意思,一境之隔,大陸同香港已經相差好遠了。
除左多野聽,仲多d人。經歷左四個幾鐘接近零人之歲月,契爺上黎招招財,終於多番兩隻野出現。
「今日生意好嘛?」
「你見到有幾多,咪就有幾多囉!」

再聽聽契爺分享婚姻生活,真係好過癮。我相信冇一個人會唔佩服契爺之勇氣(or戇居,觀點與角度),你夠唔夠薑好地地有份工加其他大公司俾埋offer你,但乜工都唔做乜野都唔要燒晒全副身家走去旅行兩三個月,返到黎再由零開始過?不過要服,都唔係服佢,而係要服佢老婆。香港地而家仲邊度會搵到有女仔會頂得順佢呢種生活,仲要嫁metal隨metal地同佢一齊辭工燒錢北上去癲?
「劉太真係一個奇女子!姓劉同同姓劉有關果真冇個好人!」
只可惜要達如此無欲無求之境之女仔,香港地實在冇可能再搵到多個。所以你見大家都係姓劉,但劉Sir仲享受緊單身的樂趣。


全日勁多節目,梗係仲未完啦最大壇野而家先開始呀!十點收舖之後仲要過創興花園金閣,
「頂!又係107號檯!每黎兩次就有一次坐呢張檯,點解咁邪?」
旺呀今日真係連cosplay妹都黎打邊爐,有檯條靚妹著到Dead or Live個女忍者噉黎食笑到爆,噉靚唔靚呢家野就見人見志啦,即係玩cosplay果d從來冇幾多個真係用得到個「好」字黎形容,悲哀地。美國之行回歸又再八三三聚會,八三三即係乜硬膠野就梗係要睇睇呢篇野啦,正常我地三個月至半年先開一次餐,今鑊咁密(其實都唔密,上餐都四月隔左三個月喇),因為今次輪到Sam少起行了。同契爺一樣,Sam少又係有舖流浪癮,當年未畢業已經勁架喇問政府借grant loan但筆錢唔用黎交學費而拎左去歐洲旅行兩個月,今次仲犀利,因為鐵定左唔教書關係決定一個人去尼泊爾兩個月,
「嘩勁喎Sam少我連尼泊爾係邊度都唔知!」
漢 曰。但今日佢令人大失所望,因為所謂之尼泊爾之旅,最後係變成去德國兩個月,仲要係有人一齊而唔係自己一個。
「阿Sam,我對你好失望。你都唔夠癲!」
噉又唔係。佢癲係癲另一樣野。而家佢讀緊master(無論你幾冇錢幾冇時間都好,教親書制度同老細問題迫於無奈地需要持續進修,教育界的悲哀),讀左一年原來已經唔聲唔聲,但係多年來積蓄先用黎還晒政府錢(終於還晒)再過去德國玩盡佢,
「乜錢都冇晒,銀行戶口得番四位數字!聽日就上機,我連下年master學費都未交,都唔知點算!」
我唔會叫呢d做勇氣囉,絕對係戇居囉。聽朝早一早上機,但今晚出到黎食到鬼死咁夜,原來行李都未執晒,不過話其實去得好少,一個背囊加一個細篋就「裝得晒」,就係咁少。
「我去美國一個禮拜都要大大個篋去啦,你住兩個月帶咁少野會夠?」
「噉又唔係!仲有一箱杯麵!」

你冇聽錯,係帶一箱杯麵過去德國,勁大箱果隻即係如果唔帶的話行李數量仲少過自由行,但箱杯麵一箱已經多&大過晒所有行李。德國香腸送杯麵好食d卦。今日特登出黎食飯,就係襯佢聽朝上機之前,等佢可以食飽d上路。再跟住八月頭 漢 又會去泰國玩番個禮拜。係我冇。
「唔制!我要去清海!」
在場全部得我一個唔係教書,即係吹水果班有吹水果班自己吹,我自己打邊爐算,今日花園金閣d肥牛唔多掂全部變晒瘦牛又老,轉攻無窮包心丸&黑椒牛丸,花園金閣最正就係兩樣丸,包心丸多汁夠味,黑椒牛丸勁爆多黑椒入口超辣,我一個人兩樣各掃幾碟,正!一面食時一面聽佢地呻,覺得自己及早抽身好明智,因為而家教小學,唔俾人殺出黎都遲早頂唔順,假使你唔係有置諸死地而後生之有教無類春風化雨精神的話(好明顯我(地)都冇)。唔使我講啦而家睇報紙都睇得多啦,而家d靚仔真係好極端,社會中上層果d細路,可以上流貴族有學識到你唔信,即係四五歲英文已經拍得住你都有,但下層果d同樣可以恐怖到你唔信,好似話中學妹自願玩5P?其實已經算碎料矣。話說Sam少非常好運地去到香港教育勝/性地天水圍教,都未開始教,單係去學校簽約果一日沿途撞到兩班靚妹,一班有條女講點樣去買套,第二班四條靚妹鬥講佢地飲醉酒之後鬥搞得多,以上之靚妹係指唔超過中二三,
「中學先至係遮!」
唔好意思,小學呢,都會發生呢d事架。去到呢種環境,過左中二仲保住完璧之身之女同學都唔知仲有幾多(「我地太早出世。」)。以前我地讀書時,一班有幾個呢種問題學生已經叫嚴重啦,而家係成班差唔多全部人都係咁「前衛」,阿Sam仲要教天水圍添,d學生直頭可以對住你對住訓導主任對住校長對住老豆老母爆粗,書都未開始教你已經想死了。叫做冇咁多問題學生之上層學校都未必一定好,首先工作量已經死啦又要係噉讀書,加埋小學而家前景已經唔係太好,有時人事同校長無良都迫到人唔想教書。Sam少已經完全唔理啦教完今年就釜底抽薪洗使全部錢去埋個旅行九月返到香港先再算, 漢 本身兩年前間學校已經被殺殺到全校師生上埋電視抗議叫做捱到落去,但教埋下年今次真係會被殺校,即係一路讀咁多野進修咁多其實到頭來可能冇用,叫做好架喇起碼進修完畢左業先至被殺,讀到一半時殺左出黎先唔知點算,讀落去好定唔讀落去好?我就一早選擇脫離教育界,錢就一定冇夠人賺得多架喇,但而家睇番各位朋友訴苦,再睇睇自己舒舒服服返工似渡假,感到好自豪好慶幸。噉教書又唔係真係灰到咁純粹為錢,同學生玩好有樂趣架。唔知點解身邊d人好鍾意學埋晒d冷門野越冷門越好,好似Sam唔知點解得閒無事學雕字,即係拎舊石或者拎塊木雕個印雕幾隻字噉,唔好睇少呢樣野呀即係同人雕個印仔一隻字可以收幾舊水架,噉當然冇番十幾幾十年功力都收唔到呢個價錢啦,我地Sam少而家經驗值有十幾份之一!識呢d偏門野有另一個好處,你知d校長幾鍾意整色整水,課外活動梗係越「多姿多彩」越好,
「雕字?即係做乜?聽落勁喎!其他學校都冇,就憑雕字呢家野我決定請你!」
即係雕成點雕d乜有幾屎唔係問題,齋係個銜頭已經呃得下水,更正就梗係教靚仔果時,可以光明正大大大聲指住條靚仔講句:
「雕!!!!」
漢 又係開心,教左咁多年,終於臨被殺校之前教到班學生畢業,本身我地係琴日星期六打邊爐,但移師中大就係為就佢個期同班學生仔燒野食,而家人地升到中學返黎謝師,無謂阻住佢啦!學校入面大家鑑於師生規範好多野都唔方便,但而家畢晒業出到黎大家唔係師生係朋友,梗係好玩得多啦!最正梗係終於可以同班學生面對面鬥爆粗!知唔知「薯條麥樂雞」下一句係乜?「雙層魚柳包」又點解?
「噉都唔識?柒左少少喎!」
考完試等放暑假的時間,做學生就梗係最開心啦,大家細細個讀過書都知道呢d日子全年最愉快,成班friend去學校玩仲開心過放暑假!但係學生冇野做就會搞事,先生要諗計鎮住佢地。其中一個最受歡迎活動係成班一齊做暑假作業,而家夾份做/抄晒暑假咪唔使做有得玩囉!更強一著係播片,即係我以前實習時攝時間係播ETV已經碎料喇,而家係"Harry Porter"全線,一套兩三個鐘,瘋狂怒播,話咁多就過左個禮拜!嘩頂而家d學生真係幸福,仲開心過做先生!又等放暑假之日子,學校往往會有好多戶外活動好似去旅行去博物館,想當年我year 1暑假時去小學做助教,都有份帶隊去科學館玩,果時仲俾學生屈請食薯條,之後俾佢地搞到我成褲茄汁!果次係我最後一次正式去科學館(跟住去睇clinic果d唔計啦),幾日前就到 漢 帶隊去。
「你知我間學校幾細啦,都就死!我地帶團去科學館,成隊人有三個先生,但係帶得十一個學生!而家科學館做恐龍展覽,個場勁多恐龍game玩仲有副成個場咁大恐龍骨化石,咁大副仲放得出黎俾你搞俾你摸就梗係流野啦!同我一齊去果兩個都係三十幾歲miss黎,兩個人係度影相,研究邊個位可以影到同恐龍骨握手,影極唔肯走,班學生問我『阿sir,行得未呀?』『好啦我地行先啦!』我走得左去廢事理佢地!我自己都影左張一拳打落恐龍下顎架!最後成隊人合照影得兩張,無聊恐龍骨相就大把!」
教書對我黎講係灰,但係都幾有樂趣架,就係同學生玩果時,睇當年劉Sir仲係做書院時同學生玩得幾開心就知啦!只係為左同學生玩/玩學生,都唔夠令我重返教育界。限制太大,亦同我理念太唔符合,更重要係教書要放棄實在太多野。同埋真係要做野。我太頹了。
「話時話,科學館我真係好想去,因為好玩加好多野玩架又定期換新野!有冇無聊人有興趣大家搞番次科學館版罪?」
最後,嚴正警告倉庫番先生又名沙包瘋同學:
「下次打邊爐時咪俾我撞到你呀下!」

最後食到點幾兩點先走。各位大佬,你地放暑假遮,我唔係嘛,真係大整古。搭小巴返屋企時,亞皆老街途經眼科醫院果度撞到炒車,有四車連環相撞一架小巴三架跑車炒埋一碟,地下仲有勁深色車呔紋夠晒賽車feel,成班差佬係度封左大段路三條線封剩一條,好在仲有一條唔係屋企都返唔到 - 行囉。
死,好似劉Sir真係去親邊度死邊度。



16/7/2007 MON

唔知點解會咁死過癮:
「電訊盈科被中國電訊攔截網絡,今日香港demail去唔到大陸,大陸demail黎唔到香港,大家唔使做好野!」(明顯地最後一句係劉Sir自己加落去)
過癮。真係好過癮。無端白事都會俾人「hack」,PCCW都算得罪人多了。
「噉今日同唔到大陸溝通,你咪好得閒?」
「超!都唔關我事!我不嬲都咁得閒架啦!係要搵我最得閒果日先黎死email,蝕左!」


琴晚食到夜一夜先完,全日超級眼訓,lunch時間一個鐘幾乎訓足一個鐘 - 唔係107無端端打黎嘈醒的話。
「lunch訓到咁耐?唔使食咩?」
我有話係食lunch咩?係食早餐。因為近來餐牌冇咩好食,加上各位(女)同事成日話要減肥唔想食太多太油,大家鍾意食早餐多過食正餐,叫法好簡單遮,早餐時間去到十一點,我地就走法律罅地11:29分打落去叫,
「我地係叫早餐食,但唔該你地十二點半先同d飯盒一齊送上黎丫唔該!」
幾醒!你梗係會問點解要食早餐啦,頭先都講左,呢論餐牌真係唔多掂冇啖好食,我寧願叫個早餐煙肉餐肉炒蛋薯餅,快快手手趙晒就可以早d訓覺,就好似今日噉,十二點半一到飯盒立即借開檯分飯盒為名順便係噉偷食食食,一點都未到已經成個早餐唔見晒 - 噉我都會留番一兩啖蛋係老細面前象徵式地食一食做得好好睇睇。而且茶餐廳早餐同晏晝午餐茶餐其實多數一樣但價錢平d,反正內容一樣都係一個麵加個奄列整多個方包野飲,點解要叫午餐茶餐二十蚊,唔叫個一模一樣但平兩三蚊的早餐?自從呢個法律罅俾我地發現加濫用之後,間茶餐廳開始越黎越唔妥我地公司了,特別係其中成日要煙餐蛋薯餅果條麻煩友。


夜晚?就算啦。一路以黎買玩具都唔係密,係呀我係好鍾意得閒無事行街睇野,但玩具睇就睇得多買反而到而家夾埋都只係買得好少,平均一個月只係買一件仔咁大把,未去到狂迷果種一個月幾千買到影響埋生活果隻。但我擔心黎緊會買密d多d。因為而家夜晚實在係太多時間玩玩具了。



17/7/2007 TUE

我真係冇諗過,前幾日已經係好得閒,但仲可以更得閒。
「好得閒冇野做呀!上網都上到悶呀老細!點算呀?」
個Outlook全日個收件匣同寄件匣空白一片(又唔係空白一片,個Outlook都會寫番句「個收件匣/寄件匣空白一片」提提你有幾得閒噉囉),加上琴日開始之中港email斷絕來往情況再加嚴重,唔止網上行連大陸幾間ISP都收發唔到email來去香港,更加靜啦自不然想多幾封email都難啦!好得閒地又捱到食飯,實在愛上lunch食煙餐蛋薯餅早餐了,而家lunch有劉Sir的表演節目:
「如何用一枝牙籤食一餐『飯』」
冇錯我好犯賤刀叉匙筷都有,係揀用枝牙籤仔黎食,篤篤篤住食煙肉炒蛋先有feel嘛!又係各位同事都未醒覺lunch到左時,我已經食晒盒野去多個靚廁施施然訓覺了。訓醒時檯頭有張玩具十蚊紙,
「真係好玩具!真係十蚊紙黎?」
原來係新出品之膠製十蚊紙,外國都係用緊呢種野,膠膠地摸落中間有穿左個窿,真係一唔覺意自己掟落垃圾桶都唔覺,質地唔係好叫做冇咁易爛易趨噉,只係太玩具啦,即係當初新十蚊紙出時已經覺得樣衰似歡樂天地d飛,而家再新版一樣花但變成膠,真係你唔講我都唔信係真銀紙。香港銀紙上面實會有兩個官只簽名,就係財政司司長同金融管理專員,兩張銀紙牽涉之人名包括三個:梁錦松、唐英年、任志剛,銀紙上有佢地三個之中人簽名。
「三個簽名點睇都係同一個人簽喎但係!莫非我果張翻版黎?」
仲未講點解會有張十蚊紙。當然唔會無端白事突然出現咁正啦,而係會計靚女盜用左我一舊水落樓下買書條,買足喎仲要找得十個零幾過我咁大把,真係多謝晒啦,
「好在有雪夾糕!」
怒食,會計靚女仲執左幾包栗子上黎,爆食,跟住兩個人夾埋分左個出前一丁原味杯麵(無敵的原味麻油麵),狂食,冇錯又係自助餐渡日。實在太無聊。
食住野上住網,又同107嗲嗲,條友終於都放完暑假,開始上堂教番書。教暑期倉頡班唔再係得阿叔師奶終於有學生妹出現喇!雖然學生妹唔等於大晒!
「對住扒妹,好過對住扒師奶先啦!」(雖然對佢黎講分別全無)
教書又可以online咁得閒?確係得閒,教幾堂又可以閃番屋企上個網睇睇個市,執番幾千銀之後再出門口教下半場,真係好開心架噉教法又free。我都有d興趣。下年睇下會發生咩事啦。


夜晚,Rax哥出現。唔知邊個黎、唔記得邊個黎?好正常,因為佢就係麥記結他手。邊隊麥記?劉Sir三四年前隊麥記McDONALDDICA。阿Rax係咁多朋友中結他最勁一個,彈得晒全首"Master of Puppets"連solo(另一個勁人係彈得晒"Far Beyond the Sun"之瘦仔,邊個勁d就無重比較),當年大家狂夾METALLICA(「校歌!!!」)同GUNS N' ROSES好開心架,但反來麥記因為種種問題無疾而終左,跟住Rax哥仲metal都放棄埋。今日出現,因為
「PAIN OF SALVATION出左新碟,上黎執番。」
都講左大半年先出現(但仍然有大量存貨等緊佢,可想而知PoS香港幾紅)。係呀真係好多人好耐冇見過佢喇。以前真係搵野聽野果班,都好似佢一樣,慢慢放棄metal唔見晒人不知所蹤。冇辦法,metal年齡層面太窄,你叫一班十零廿歲靚仔聽metal唔係為 而真係去研究去理解自己聽緊果種音樂?都係節省一點算罷。嘈野技術野唔夠襟聽,生活迫人加上「聽到厭」,自不然聽metal果班一個一個少,到而家以前見開幫襯開果班,真係剩番一對手都數得晒。舊果班已經唔再聽metal、新果班亦唔係/唔會聽TRHK賣緊果d,因為「唔係邊隊」亦「唔係果種metal」,斷層就係噉黎。堅持係冇用,我絕對可以話你知,當全香港都係跟住潮流走時。
所以?自己坐係度聽下歌玩下野算啦。對住而家香港metal個境況、而家個「市」,對世事不聞不問自己滿足就算,確會令人開心好多。所以你見之前「堅持」同真心聽野果班都收晒山。劉Sir的呢一日相信亦不遠矣。請鼓掌。



18/7/2007 WED

冇錯又係極級得閒。點解?
「講晒俾你知啦已經!」
你知唔知我得閒到點?得閒到開始執執自己個portfolio。portfolio即係個人作品集,例如劉Sir個網就係劉Sir個人作品集,紀錄低佢咁多年黎所作所為、做過d乜、有咩好有咩唔好,等人一睇就知道劉Sir咩料(噉當然劉Sir個網唔係一睇而需要一睇再睇睇完又睇先會明白劉Sir條仆街點解咁戇鳩)。而近來咁得閒,呢排又乾乾地塘寫野冇咩動力靈感,反正冇野做咪執一執搵工個portfolio,將公司做落d單同文件有用果d輯埋,再上個網執執「見得下人」d文章(即係有粗口同無聊果d一定唔會有啦)(「噉即係冇喇喎!」),例如碟評噉囉王菀之呀謝安琪呀呢d都叫做個人寫作(噉你唔係叫我整篇CANNIBAL CORPSE俾人嘆卦?),可能整埋d玩具呀影評呀,諗緊再去段記執d「精華」,執下執下,原來我都好多野可以俾人睇。仲想將當年教院d功課拎埋出黎。執下執下先知道原來我真係好多野玩、玩過好多野。
為自己準備定portfolio、收集定自己覺得可以表現自己、突出自我之作品,對自己經驗同將來搵工都有幫助,當人人得封求職信加個履歷表講自己點點點,你夾多幾篇作品寫得出俾到人睇你識乜做到乜,老細第一個印象對邊個好d先、會揀邊個上黎面試先?


本身我係諗住今晚去買sound card&display card,點知臨門一腳屋企要食飯,噉又冇左一晚了。近來喜歡旺角行路返屋企,減到肥之餘又慳到錢(買碟買玩具唔使錢咩),夜晚唔係太熱行番屋企半個零鐘唔難捱又可以順便聽歌,都幾開心架。就撞到d無聊野:
The K.H. Homicide
行亞皆老街成日見到,襯今晚有相機跟身就影低佢,位置係九龍醫院行車路入口。見左好耐,只係仲未知點解會係醫院門口搵到。


metal友留意了,契爺學劉Sir返工吞pop時為大家帶黎新聞一則:
"Taiwanese Symphonic Black Metal Band to Publicize Taiwan's U.N. Bid While on Tour"
跟住仲有社論,記得有上下集。
「其實一開始,政治立場已經相當鮮明,尤其頭兩隻碟歌詞故事影射性極高。」



20/7/2007 FRI

...近來都冇咩心機寫野。種種原因,個人好懶、冇乜心機。


呢兩日確係好有趣。唔計熟人同混吉人士,琴日上黎TRHK,全近都係女;今日就全部都係鬼。
「香港人、香港男仔去晒邊?」
真係鬼知。今晚隻鬼係哥倫比亞黎,入到黎第一件事大嗌
"Wow so fucking metal!!!!!"
之後同條女一齊影張好metal的相(真係好metal,外國女係唔同d),跟住聽歌買碟走人。行程係一個月亞洲漫遊,幾個國家周圍去,去完香港之後下一站係菲律賓,又係做一年野之後玩盡佢再打算之寫意生活,當然外國人生活負擔冇香港人咁重,起碼香港齋講住為間屋已經夠你揹成世,又你唔做一份工之後再去搵另一份,唔好計薪酬福利及唔及得上以前,只計搵唔搵得番工做已經非常困難,生於香港真係只有個捱字。你問我,我真係唔敢噉樣寫意法喇。



21/7/2007 SAT

過左七月頭,真係得閒到死。好難我今日先搵到d野做,令到自己睇落唔係上網無聊而係「做緊野」,好辛苦終於一點,瘋狂行街好野!由大角咀行到油麻地行番去旺角,行左好多舖頭,最緊要梗係上信和搵搵107啦:
「件變形金剛tee都OK喎!」
前面係博派or狂派標誌勁大個,背後係Transformers大大個字,夠簡單我鍾意,只係a)個logo都大得誇張左少少喎 b)狂派隻紫色可以再靚d c)件tee白色就好啦!不過平到街坊價過街坊價,加上107個大名,冇理由唔支持下啦!
「《變形金剛》廿六號上,就28禮拜六或者29禮拜日搞野版罪,陷家著晒變形金剛tee去睇!」
玩具,好多;戲,又係好多;講音樂,而家最大興趣係PIXEL TOY加KOLOR(PIXEL TOY真係超過癮,但KOLOR隻碟仍然未見過),下個月出糧先啦。
「需要有番個財務計劃。同埋祝香港股市日日向上。」


上到舖頭,狂打超任。咁靜的日子,除左慢慢聽歌,就梗係打機開心下啦(變形金剛?仲有幾隻都未開添!)。會玩番超任模擬器,主因係兩隻game:忍者戰士Ninja Warriors,同重裝機兵Valken。忍者戰士其實係隻只算係中上之行街game,但世界觀同人設機設我鍾意,加埋難玩(隔左咁多年再玩番,第一次爆機用左三個幾鐘過五十次continue),我係超懶就算俾埋我我都唔多願開黎打,但一俾我搵到呢隻game就大劑立即怒煲日煲夜煲。重裝機兵又係當年打到黐晒線之一隻action game,可以話係一隻action RPG,操作系統同物理景觀都超真實,而且你每關任務成唔成功都會影響到之後d關同結局,爆機都有幾個ending,超任最愛遊戲肯定係佢,只係勁多功能操作複雜,用keyboard玩真係好難玩,亦即係可以慢慢玩。又摷到隻異形對鐵血戰士,未玩已經有中左招之預感,因為呢隻超任game係美國出而唔係日本出,而超任年代唔知點解真係逢係歐洲或者美國出品,十隻有七隻都係食左屎仲要係食得好嚴重果隻,好似超任機能未摸熟又未夠經驗寫game都夾硬整隻game出黎噉,當然到而家好唔同我64bit年代起我覺得外國game出得比日本好,而呢隻AVP,誠實地招供,只係因為Alien同Predator兩個名我先會玩加爆埋(其實超易爆,只要用Predator不斷射laser最後大佬掂都掂唔到你,玩過就知易到離奇),而玩過加爆左之後永遠唔會再玩,因為真係悶到好恐怖隻game我超級Alien+Predator fans都唔敢再掂喇廢得。有隻怪獸摔角King of the Monsters細個又係好鍾意玩,SNK出品,六隻怪獸中選一,去唔同大城市同電腦隻怪獸用摔角方或一抽一或者二對二,打死之後要責住對方數三聲對方都唔起身先叫贏,打果時可以狂踩爛地面d建築物同交通工具又或者拎黎掟人,人類又會派自衛隊黎攻擊d怪物(d戰機戰車梗係又可以執起黎掟啦),將特攝片同摔角結合好過癮架隻game所以以前五蚊三個字年代鍾意去有Neo-Geo租d機舖玩呢隻,只係移植到超任,超任同Neo-Geo性能始終差好遠隻game好多野都cancel冇擺到入去而且變得好窒好慢,似乎要搵番個街機模擬器先有得重溫呢隻喇。另外兩隻超任game想玩番係Final Fight 3同快打刑事亂。Final Fight相信唔使多講冇可能有人未玩過,第一集街機出仍係永留傳之行街game經典,第二同三集直落超任,第二集基本上同第一差唔多只係角色唔同但唔好玩,第三集又再換人(只得市長一個三集都有出現)而且加埋出招系統同儲滿氣有得出超必,但個系統差加畫面唔得,三集結果都係得第一集玩得落手;快打刑事就可能冇咁多人知咩黎,一共有三集:第一集、亂同修羅,都係超任出品,特別在花好多時間交代劇情,同埋有「怒」系統,當你俾人打得咁上下主角就會發嬲,「怒」果時無敵之餘撻人會變得好勁,修羅係最靚同系統故事最完整一集亦有最多隱藏野,但最鍾意都係第二集修羅,又係人設同關卡設計,只係超任年代好多行街game設定都好差搞到好難玩,唔係真係難果種難而係電腦超屈機果種難,電腦人多之餘攻擊力強速度快招式距離遠,判定又怪經常你打唔到佢佢打到你,成日俾電腦遠距離無影撻你連續技打緊時都反擊到你已經戇居(連續技打打下俾人破到,噉行街game點玩?),加上超陰濕你每次出必電腦知道晒破綻係邊每次出完招或者出完連續技肯定俾另一隻敵人伏番,快打刑事亂仲要冇無敵時間你跌左落地敵人一樣可以打到你一跌落地可以起番身已經冇左半行,加埋最後大佬之無聊屈機(打過Captain Commando就會知我有幾唔鍾意Capcom行街gamed最後大佬,得佢打你冇你打佢搵笨),即係敵人老屈都算全隻game仲要勁少野食焗你輸,今日先一舖Final Fight 3再一舖快打刑事亂,夾埋之粗口我諗我2007七個月黎夾埋都冇今日一個晏晝咁多,好耐未試過打機爆咁Q多粗喇,呢個係8bit同16bit 動作game之特色(灰),當我由細打到大打到而家都可以爆得咁勁,信我你玩果時肯定講得仲多粗口,尤其當狂俾電腦屈你果零點零幾秒硬直位屈你根本避都避唔開之「有敵位」果種超不合理屈機時,你係技術勁我冇野好講,不過用電腦同人手之別再加系統之缺憾黎屈,打到keyboard都就黎打爆。只不過,粗照爆鬧照鬧,跟住咪又係煲?


Project: Grindcorehouse

Grindcore呢家野,科幻&恐怖&垃圾片迷劉Sir提供的劉Sir柒知識,係美國特色影院之一,五六十年代美國電影起飛時,量多自然不產生大量粗製濫造產品,grindhouse就係專責收容呢d二線片、爛片之戲院,而叫得做二線同爛題材自然同樣通俗/庸俗,都離唔開血腥暴力超現實科幻恐怖鬼古女同埋性,因為超大量加上要吸引觀眾入場,grindhouse播片係以打孖甚至打三上,可以話係美國版「一張票睇到笑」。同當今音樂工業一樣,grindhouse最後亦因為「科技進步」而顯過時被排斥取締,七八十年代錄影帶出現同開始普及之後,想睇片唔一定要入戲院買或者租帶已經得,高彈性低消費已經唔需要特意入戲院入grindhouse睇,所以呢種特色戲院已經成為美國電影歷史一部份。十幾廿年之後,兩個玩野導演想向此歷史致敬,每人拍一套模仿當年之「爛片」,再加又係應景之(假)trailer,夾埋就係"Grindhouse"呢套2007年玩野爛片。


Grindhouse Prelude

美國本土上畫,"Grindhouse"就係按番grindhouse形式,兩套戲拍住上,即係一套戲三個幾鐘噉去,但香港唔係美國,你唔知grindhouse咩黎?唔緊要,我地就用你知咩事之方法上:將「一套戲」拆番成「本來」之兩套,亦即係本一張飛頂龍加多十蚊就可以睇晒之完整package,而家「驚你唔慣grindhouse連睇兩套戲同坐咁耐」,要你俾兩次錢買飛入場,真係多謝晒。套戲共分「兩集」:"Death Proof"《玩命.飛車.殺人狂》同"Planet Terror"《索女.喪屍.機關槍》,d譯名真係夠晒爛夠晒老土,不過不得不承認確係花過心思去諗而唔似好多西片中譯名,亂咁黎譯、譯得(更)老土或者果期潮咩就譯咩(例如:"The Prestige"因為同《死亡筆記》同期上就叫做《死亡魔法》,個名立即搞到呢套正戲cheap晒),雖然官方次序都係"Death Proof"為先"Planet Terror"為次,但上畫次序唔知點解會調轉,七月初上"Planet Terror"隔多兩個幾禮拜先上「第一集」"Death Proof"。但我睇戲習性同聽歌一樣,一黎就黎全線而且係由頭去到尾,所以"Planet Terror"上左畫個個睇晒都唔去睇住,等到"Death Proof"上埋,計劃搵個禮拜日朝早一野歡樂早場跟次序睇番晒。點知"Death Proof"上左之後行勻旺角戲院差唔多全部冇晒"Planet Terror",
「喂兩個禮拜遮唔係咁快落畫丫嘛?」
最後走到去油麻地百老匯電影中心先搵到有一間上晒兩套,但都要拆開星期六晚"Planet Terror"第二朝先睇到"Death Proof",心目中之「原版」達成唔到勁失望。油麻地電影中心在我心目中一向係遙不可及之地方,充滿文藝氣息明顯我呢d市井metal友配唔起,加上地方隔涉今次先第一次黎呢度睇戲,某程度上都係被迫架鬼叫周圍都冇晒"Planet Terror"睇咩!今日先知原來呢度得四個院,每個院都係同上次去旺角百老匯頂樓睇《廿八週後》果間細院一樣,百幾人一場唔係大銀幕又唔係勁音響,但舒服同好過上次百老匯喎,或者今次係"Grindhouse"就係要咁underground先襯番個feel卦?


Phase 1: Planet Terror

兩大名導之一Robert Rodriguez,(我識之)招牌作有《殺出個黎明》同"Sin City",仲有"Spy Kids"系列(益智到我唔會睇但電視播下播下我又追晒全線),睇到《殺出個黎明》個名都會知道套戲之影像有幾刺激啦。又要扮足陳年舊戲,正戲之前要先黎一段trailer扮晒下回預告,trailer係超老土七八十年代「職業殺手被出賣後向黑手報復」,但我勁鍾意呢d單人匹馬揹住幾頓軍火幾十把刀將邪惡組織連根拔起之無聊戲,old-school嘛果個年代拍親都係呢d架啦!所以如果真係會拍套噉既野肯定會去睇,夠爛夠戇居就得!"Planet Terror"係當年最興片種之一:喪屍片,都係老土地講化學氣體洩漏,跟住一傳十十傳百附近城鎮居民變晒喪屍,主角同一班生還者求生之餘順便將想將全世界變晒做喪屍之邪惡軍人殺晒,劇情完全係唔使問入到場跟住會發生咩事都知道晒估到晒,喂玩/扮番廿幾年前d野嘛你想有幾創新前衛?點樣去拍去玩先係賣點所在。cast可能好勁卦可惜我只識Bruce Willis一個仲要唔係出得多鏡,其他恕小弟膚淺我真係一個都唔識,反而仲好喎對住陌生面孔先有驚喜嘛、玩先玩得夠玩野夠放嘛!年代係而家(PDA手機SMS、Bruce Willis殺拉登哈哈哈哈),但製作係以前,當今世代個個用CG為做到有幾靚有幾真時,反其道而行執得要殘要舊,懶係要做到套戲好多花痕穿窿,又走菲林走色,最抵死係男女主角搞野時"missing reel",再入番片時已經跳左唔知幾多段戲,係無聊但就係鍾意佢無聊得咁抵死!劇情自然又係冇乜好講啦,只係以爛片黎講都算有紋有路喎,除左男主角之外,好似為做主角而主角,本身帶住枝超強狙擊步槍、武功槍法都一流,典型舊世代電影英雄,但到底咩料背境係點?冇講到,只係一講到主角個名時d人就會
「哦?乜原來係你?有你我地就有救了!」
噉就交代左主角之超能了,真爛。不過正正係咁唔交代先正,好多笑料往往就係乜都唔交代之情況下全無先兆地引發,好似入到醫院拎住刀仔日本式狂斬喪屍,笑到爆晒咀,所有動作槍戰炒車戲都一流,完全捕捉晒「果個年代」之誇張漫畫方式,喪屍食人撕到周圍都係肉同內臟、求祈一槍都穿頭爆肚斷手斷腳噴晒血、周圍d建築物同車係唔係都爆明明唔關事都會爆炸、d碎肉碎血飛到周圍都係成個鏡頭遮晒,無不唔係玩串舊世代爛片,就係鍾意咁作狀我鍾意!戲肉梗係條女隻腳變左機槍(我認得係M4A1!但poster係左腳套戲係右腳,點解?),最後男主角又要似足爛片地,女主角殺晒全部敵人之後點知背後仲有個未死,個敵人想開槍射佢時男主角出現救佢,平時打不死的男主角唔知點解無敵神功忽然失靈,跟住主角同敵人互射大家不斷中槍,敵人死左主角就死(永遠唔會係主角死先,灰),跟住女主角帶埋生還者去重建印加,正呀爛到佢丫!除左頭半好慢悶左d之外,呢套戲對我黎講真係好好好鬼死正,特別鍾意好作狀地玩舊片之笑料,但唔知點解我睇果場係全場爆晒(我係臨開場即場買飛,全場除左最前一行只得番兩個位),套戲由頭到尾差唔多冇乜人笑過,有d位明明好好笑(我覺得卦)但全場係粒聲都冇...爛得滯卦套戲?
「完場唔好走住呀!片尾首拉丁rock high到震,再跟住首又係好歌,睇晒個片尾先好走!」



22/7/2007 SUN

Grindhouse Interlude

油麻地電影中心除左細,隔涉係我咁耐先第一次黎之原因,睇完"Planet Terror"差唔多十二點,位置正正旺角同佐敦中間,呢兩個地方都大把車返屋企偏偏油麻地行過去起碼兩三個字先行到,我又咁懶,只有一架九號揀,但九號四五個字先一班又要狂兜路,所以我寧願去旺角百老匯,冇呢度咁好但冇計我好驚睇完戲要行路返屋企。訓醒之後又到第二場"Death Proof",我去到先知道原來琴日同聽朝一樣,同一個時段係同時播"Planet Terror"同"Death Proof",反正都係要拆開,點解琴晚我唔睇"Death Proof"先噉今朝就可以順序睇埋"Planet Terror"?而且噉睇法唔使趕咁多,因為今朝"Death Proof"開十二點但"Planet Terror"一點先開,噉就唔使好似而家噉趕頭趕名,咁蹻今朝撞正冇唯一一架九號直出油麻地又冇車,搞到最後等到車之後要旺角落車再飛奔過去油麻地。相信可見之將來,非必要都唔會黎油麻地呢邊睇戲,好辛苦架大佬。


Phase 2: Death Proof

坐低剛剛好開正場miss左段trailer,當堂灰晒,"Grindhouse"套戲重點之一就係dtrailer嘛,據聞Rob Zombie有份整trailer架!《危險人物》同《標殺令》之昆頓塔蘭天奴執導,同"Planet Terror"好唔同,"Death Proof"一d都唔科幻仲好寫實,除左少少位有玩跳線跳格同走色,冇用到咩「特技」去專登舊化,故事亦係講變態飛車佬殺女「正常」好多,其實未睇我已經覺得"Death Proof"我會唔多鍾意睇,首先導演d戲唔多係我心頭好任佢d作品幾經典都好,二來咁正常又咁玩女我冇乜興趣喎寧願"Planet Terror"果種殺殺殺。要講故事其實好簡單:上半套戲變態飛車佬睇中左幾條女,最後一架車撞埋去全部女死晒;下半套戲又睇中另外幾條女,但今次殺唔死班女仲做佢地做低左,冇錯就係咁簡單。你以為係飛車戲,就會有好多飛車場面?錯,真係炒車片其實短之又短。有冇睇《危險人物》?有睇過都知道導演風格,就係好多好多好多好多水吹,慣常手法係一個鏡頭影住班友/女係度吹水仲要一個鏡頭/吹一吹水係拍/吹足幾個字長,成套「飛車」戲文戲多過車戲十倍都有,睇住四條女吹水係噉爆粗串《極速60秒》新版垃圾一個鏡頭拍晒,或者有人會覺得好真實好有深度?我就唔識睇了,諗住係飛車戲或者笑片爛戲點知咁「認真」,如果論對白,又冇其他好似《危險人物》咁精警喎,臨尾飛完車打一輪突然就話The End了,完左套戲都唔知咩事。又因為冇玩咁多「特技」野,年代錯配感冇"Planet Terror"咁突出,我就幾失望下,因為諗住係玩野嘛點知個導演真係認真過認真地拍番套grindhouse戲。琴晚好笑之"Planet Terro"已經靜,今套笑料更少吹(悶)水多好多之"Death Proof"自然更靜,睇睇下同場仲有人走埋添,相信佢同我一樣係唔識睇啦。一直到完場有一個人拍手掌,其他人全部好似唔知做乜噉,相信網上評價呢集會比上集負面好多,我就怕個trailer會仲好過套戲。不過,都係果句,我膚淺遮你知劉Sir睇戲打到七彩又多血又夠快先鍾意,如果鍾意《危險人物》因為手法相似(但當然《危險人物》高章得多)同昆導演d戲相信會捧到好高,我就寧願執"Planet Terror"隻DVD睇多次算,簡簡單單笑笑適合我多d。
一場吹水戲入面班女提左好多飛車戲,唔知會唔會有人睇完套戲之後受到「感召」搵番呢d經典黎睇?


Grindhouse Postlude

其實齋睇導演你都估到我會鍾意"Planet Terror"成數高過"Death Proof",睇戲的話唔好叫劉Sir用腦,感官刺激充裕就得,昆導演d戲,太「文藝」了。一間grindhouse兩套戲唔同風格適合唔同口味人士,"Planet Terror"夠好笑夠造作又玩串舊片娛樂性豐富,"Death Proof"就玩內涵玩對白玩內容加導演名氣,雖然"Grindhouse"一開始係打正玩野旗號,但真正玩(到)野我覺得只有"Planet Terror",昆導演太「放唔低」了(講明先丫我係睇得戲少呀我未追晒佢全線架),如果係話玩野我寧願真係玩盡佢好似"Planet Terror",而家噉樣,唔多夠喉。(重申一次:「係劉Sir膚淺唔識欣賞遮!」)
睇完就明白點解要分開兩套上。"Death Proof"我諗真係唔係太多人鍾意,尤其是非影迷而得閒去戲院睇套戲果種,一野要捱三四個鐘唔容易,加上"Death Proof"講多過做唔多係香港人口味,導演名氣幫得幾多,對快餐式睇戲(如劉Sir)的香港人黎講?真係夾埋上肯定被超劣評;又明白點解會調轉先後次序上,"Planet Terror"好玩好笑,睇完之後會順便睇埋本是同根形之"Death Proof",中左招之後想怨都冇得怨,但如按原次序上,"Death Proof"悶死晒d人個個狂鬧,噉剩番果套仲點會多人睇?聰明的地區商業策略。


睇完戲返到舖頭,梗係繼續打超任你以為係賣碟咩!冇錯係爆粗爆到仆街,但鬧還鬧機一樣照打,仍然係Final Fight 3同快打刑事。真係越打越興。超任d行街game唔知點解好多都好難玩,係咪因為機能所限唔可以一次出十幾廿隻圍你,好似FInal Fight街機版?所以較到電腦AI用番遊戲系統對人手之限制黎剋住你。例如攻擊判定。成日出招你睇落明明你打中,但敵人冇事企定定係度,而佢出招時點睇都掂唔到你但你反而會中招,吹到脹晒。更屈係電腦會用你出招同收招之時間同無敵狀態黎屈你,你出任何一招,電腦都會立即用相應佈署打番你,例如你出昇,電腦會立即計到攻擊範圍之後全員避開,再計到你幾時同邊個位置落地,就派定人去果個位度等你;出波的話,一出d敵人立即知道個波點行避開,再由背後或者斜角位埋身,甚至出波時因為對手冇判定,波同人中間會有真空位置,就由果個真空突入打番你轉頭。真係人腦人手邊有可能做到?如果係出無敵招仲抵死,冇錯出招果時係係無敵,只係收招到你可以再動之間有硬直空隙,電腦又係計到你出招時範圍幾大然後避開、收招後有邊零點零幾秒郁唔到又派定人呢段時間打你,就連執野食之類之相同情況一樣有同一情況(所以好多時野食唔執好過執),所以一面打一面爆粗,Final Fight 3有招你出反而唔俾好過俾,因為每你出一招,招後超過一半機會之後立即俾電腦打番轉頭,超搵笨。唔好話出招,齋講連續技已經夠你小爆機,行街game一向你打電腦時狂打就會出連續技,過程中電腦係還擊唔到一直俾你打,即係你出晒一招連續技之後未再郁得時後面已經多左個敵人等你一收招立即做低你已經算少野,見過有行街game出緊連續技時,電腦可以中斷你招連續技反擊未,甚至你原地狂出拳時計準你兩拳之後果0.0000X秒郁唔到,用呢超短時間突入攻擊咁神技?甚至試過用行街game無敵之飛腳,電腦都可以唔行開避而係走埋黎臨踢中前一刻一拳打番我落黎,就係「電腦」成噉就係灰成噉。你又見過有行街game玩果個冇無敵招但電腦d敵人有無敵招未?你自己招「無敵招」電腦識襯你收招時「有敵」果陣還擊出好似仲衰過唔出,但勁多卒仔係有無敵攻擊技同迴避技,加上超強電腦計算攻擊,根本戇居。Final Fight 3咁用電腦系統黎屈你機,打到你爆粗都爆到口乾咁仆街,信我,我驚你第一關都未過已經熄機。再加上d大佬,Final Fight 3d大佬係歷來最屈機,全部超快加d招超遠加差唔多出親招都係無敵(即係個個大佬都有三四招無敵招,搵笨),四五條命搏贏一個打佬實在係閒事,而都講過勁唔鍾意Capcom行街gamed大佬,Capcom好興整到d大佬全部輕功非凡黎玩你(已經唔止係屈咁簡單),提過之例子係Captain Commando,個最後大佬攻擊只得出波、出拳打你或者撻你同圍住自己d地全部爆炸,但係識得飛,佢永遠都會飛係你前面,但距離一定係你出招剛剛好打唔到,無論你邊跑邊跳佢一定係固定浮係你五六個身位之正前面,而場地設定亦係冇版邊所以你唔可以玩屈死角狂打,佢就係等你出招揮空或者跳起避唔開時出波打你,果時係一定中;你諗住周圍走同佢玩兜圈,行的話一定唔夠快避開佢d波實中招,跑的話你每次跑轉方向中間一定要停一停,就係停低果四份一秒佢就會出波打中你;唔打佢玩肴底自暴自棄?唔好意思你諗住敵不動我不動的話,佢往往就係襯你唔多郁時突然衝上前毆你幾拳或者撻到你幾里遠,除左玩錢不斷用大招同飛腳搏打中佢之外只有佢打你冇你打佢,我玩模擬器唔使錢齋打個大佬都要con十幾次先贏到,所以如果有人可以一條命打爆Captain Commando的話請搵我領獎,咩都得。而Final Fight 3好多大佬都係同佢一樣,永遠都係你前面但你打唔到佢之距離,等你一有空位立即出招一招扣你四份一行,最後大佬直頭盡得此真傳,又係超快行黎行去閃去你前面,佢d招又鬼死咁遠大家一面對面佢立即可以打到你,到你一埋到身佢又會出無敵招打開你避都避唔到,唔係有得屈版邊又係唔會爆到機。快打刑事亂基本上以上問題全部都有只係程度冇咁嚴重,又應該話「冇咁電腦」冇咁明顯,似番玩開之行街game,只係問題一樣有好似你狂出拳佢居然可以若無其事行過黎打你或者撻你,隻game又要差唔多隻隻卒仔都識撻人,當可以噉無端端行過黎就打到你果陣,你狂出拳已經冇任何防守意義。又因為除左你俾人打到飛起時滯空果段時間你係無敵,一人你貼住塊地無論企定訓人地都打到你,一個卒仔出招打低你之後,跟住可以成堆卒仔圍住你條屍黎打,我試過十秒唔使已經冇左半行血,就係撻落地之後係噉俾人打,撻低左打到彈番起跌番落地又再打過。所以隻game先要有「怒」俾人打打下會變無敵,唔係你跌一次身都起唔到已經game over。叫做順氣過打Final Fight 3先囉。
「噉你仲打,咁唔妥的話?」
「冇計。又係一起成長、中學打到而家之回憶。」

最後都係玩重裝機兵算。超級真實型機械人action RPG,太正喇,超任我最鍾意就係呢隻game。以前五蚊三個字,就係係噉燒錢去煲呢隻,因為係冇得save一舖過,命又唔係多得幾次continue,每次都玩到好小心果時煲到好精,只係事隔咁耐加上變左keyboard,要玩番好似以前咁強,相信要花時間去練番(時間我大把!)仲有隻game搵緊,又係想玩番好耐。
「隻game係立體射擊黎,同時控制個人走黎走去同郁個遊標射人,1P係個牛仔2P係個女人,d敵人都係西部野另外有d機械人,可以開槍之餘有得掟繩圈掟中敵人會郁唔到一陣,敵人埋身時又可以一拳打死佢,同可以碌左或者碌右避彈,勁鍾意呢隻game,有冇人知叫咩名、邊度搵得到?」



23/7/2007 MON

逢禮拜一朝早起身都想死,你睇我型到爆件tee係調轉左前後黎著,仲要噉樣調轉著著到由到去公司開完個會十一點幾眼訓入廁所匿埋訓陣時望到塊鏡先知道
「咦?係喎!件衫調轉左喎!」
噉先調番正黎著。真係勁死眼訓。好在近來同上幾個禮拜一樣,都好靜冇乜野做,公司成日半冇皇管,就係坐係度上網同諗辦法令自己唔訓著(好辛苦)。近來對物理學好有興趣,其中一個研究課題係
「到底一個飯盒可以裝到幾多野?」
一個飯盒,理論上就係可以裝到一個飯盒既野,多謝。但經過劉Sir實驗,原來可以裝到好Q多,今日我叫左個粟米肉粒飯,寧舍多汁多到幾乎瀉咁滯,跟住女同事再貢獻多半個雞扒出前一丁,直接麵加扒劈落去就算,本來已經好半之飯盒,仲可以塞得落呢半碗雞扒一丁。然後加多半舊蘿蔔糕落去,仲成功閂得到蓋完好無缺。證明一個飯盒,其實係可以裝到超過自己容量1.5倍之「物體」(入面果劈野已經唔可以用「飯」或者「食物」去形容了)。未夠公信力?我都知架喇,所以劉Sir仲做埋臨床測試,將所有「野」食晒。直到實驗之前,先發現雖然我日日都食咁多,但真真正正食裝飯之飯盒,原來呢兩個月黎今日先第一次正式食,因為意粉呀早餐呀太好食了。平時你睇劉Sir幾個早餐呀兩三兜意粉呀狂倒落去仍然面不改容,但今餐一個飯盒加半碗麵&其他零星野,嘩飽到阿sir都唔認得打邊爐之外好耐未試過一餐食得咁飽(食桶雞都冇咁飽呀真係),滯到晏晝吽吽地做野都冇乜心機(「乜你有野要做咩?」「有!上網囉!」)。點解會噉?點解一個盒飯可以裝到一個飯盒裝唔到既野?點解一餐可以食到咁飽?點解平曰食極唔夠的劉Sir今餐居然一個飯盒就搞掂左佢?呢個係一個謎。


夜晚,自然係繼續重裝機兵啦。隔左十幾年,而家玩番隻game立即變得好易玩同好短話咁快就爆,好多大佬仍然記得點屈法,不過好玩就係好玩玩極唔厭,加埋一隻普通action game都有劇情會有分叉路會有唔同ending,超任game就係有而家dgame點都及唔上之遊戲性。當年五蚊三個字隻game打到爛晒都唔知道,到十幾年後上網睇番先知原來有秘技可以拎隱藏武器,拎到簡直係屈番電腦轉頭,平時幾分鐘幾百槍先殺得死之大佬用隱藏武器對住射幾發幾秒鐘已經搞掂,最後大佬本身係幾難打下但而家變到同雜卒仔唔差好遠。所以隱藏武器用一次就夠,真係好冇癮架爽係爽但挑戰性冇晒囉。屈機成噉,自然100%爆機玩到最完美結局啦。下次我要試下玩最唔完美bad ending先,以前試過架爆機係爆機但結果除左主角其他人全部死晒。


打完機返到屋企仲有節目,手痕開個電視,
「Steamboy!!!」
就係《阿基拉》大導演大友克洋另一鉅作,係CG世代中仍然堅持2D之日本動畫,亦係製作經年加投資最大之日本動畫。你可以話係現代版《天空之城》,世界觀係超蒸汽世代,劉Sir柒知識話你知,呢種超科學世界觀學名叫steampunk,同現代同未來科幻唔同係假想成工業革命後蒸汽科技成為世界主流,科技發展建基於機械而非電子(因為蒸汽時代電力尚未盛行),睇到十八世紀好古雅之生活環境但用緊媲美甚至超越現代之機械科技,機設亦往往好誇張同超現實而重古典/經典色彩,加起黎帶出一種荒誕感,正正係steampunk別於其他科幻世界吸引之處,亦因為歷史背景,steampunk探討之問題往往較為宏觀:現代同未來科幻因為科技發展至過於便利,人同人之間之連繫再冇以往咁強烈,人際同社會往往成為探討主題,但steampunk系因為仍然處於人手工作時代,思考問題就關乎到科學對人類將來發展之影響,足以改變世界往後發展之蒸汽科技應該用黎為善還是為惡,代入到工業/steampunk革命「科技」剛剛起步帶來之「科學恐慌」,係另一種思考層面。所以我係極鍾意將steampunk、古文明同未來結合之《冒險少女娜汀亞》(庵野秀明《新世紀福音戰士》前之名作,當年小學時播好多集都冇睇到,好想搵番黎重溫),另外幾年前上果套"LXG"唔係太好睇但某程度上因為蒸汽同"all-star"落搭左,但有套我唔睇都估到唔多好睇之戲想搵下,唔記得咩名喇個英文名超長,中文譯名又係長到爆只記得叫《乜乜乜決戰明日世界》差唔多噉款,"Tomb Raider"女主角有份做(記得做完"Tomb Raider"冇耐就上,冇去睇原因之一係因為對"Tomb Raider"冇乜興趣,同一條女做自然同樣唔多想睇),但知唔好睇興趣又唔太大仍然想撞番睇下,除左套野(好似)係第一套全藍幕CG電影,亦因為係玩現代撞steampunk
講完steampunk,講番"Steamboy"。大友克洋個名已經吸引到好多人,
「《亞基拉》喎!」
我記得電視播果時我仲讀緊小學,明珠台要到深夜先播,當時係明珠九三零年代唔知點解要遲咁多,睇過先知道原來咁鬼死核突,但勁喎核突成噉居然都可以電視照播冇cut到喎!換著而家尺度仲唔cut到九彩?(時代倒退了)耐唔耐都撞到電視/明珠台重播,多年黎睇左不下三次,只係睇極都唔係話太深感覺,除左仍然覺得真係好叉死核突,就係主角架電單車同鐳射步槍好型,經典係經典,可惜無緣就係無緣我仍然未識欣賞、未領略到當中意思,所以"Steamboy"雖然係當今個個都用CG佢仲堅持八九十年代人手畫風加埋用左好多年整出黎,期待冇其他人咁大,上畫時冇入戲院,到今日電視撞到先睇,原來都唔錯喎,只係冇想像中咁好。故事係講主角個阿爺同阿爸發明左顛覆蒸汽發展之新發明,可以將無限蒸氣入納入一個鐵球入面,阿爺想用黎改變世界,阿爸想用黎征服世界,得到蒸汽球之主角就被美國同英國兩國政府同大財團追趕,最後美國同英國海陸空三軍對缺,最後成個蒸汽基地飛起變埋哈爾移動城堡,雖然可以令全世界進入新紀元科技幾級跳,但科學促進世界發展只係一廂情願,美國又好、英國又好,只要係有權,得到終極力量都只會用暴力同戰爭而唔係改善生活黎令世界進入下一個紀元,而唔會以人類福祉為首要前題,所以最後足以便利全人類之偉大發明只有被毀下場。雖然唔少科幻故事都係玩灰暗格調結局好發人深省,但steampunk果種灰係自成一家,因為外星人、其他星體同超科技往往唔係最重點甚至唔存在,只有最實在之地球、地球人同歷史,正因為睇果班係人類、都經歷過人類歷史、都明白人性的弱點,會比睇外星人侵略地球、超空間科技點樣影響人類智慧同社群發展更切身,亦對人類感到進一步失望,因為其實唔係人心之貪婪,我地而家生活可以比想像中進步得多、美好好多,好似《死亡魔法》入面,特斯拉 - 就係構思出無限能源之偉大科學家 - 發明到好多劃時代,但結果因為愛迪生之干預,發明點偉大點有貢獻都好,你係同權貴為敵、會影響到社會大人物之利益,都只會俾人排擠取締(之前寫《死亡魔法》時都有討論過)。假使你唔想諗咁多野,純粹當動作動畫噉睇,志在焚下爆下開心兩個鐘鬆一鬆,一樣冇問題,《亞基拉》之畫功已經達殿堂級地位,話係十幾廿年前但而家睇番完全唔脫節,始終新一代2D動畫(非CGI)就係由《亞基拉》開始,之後動畫發現變得更加高清高質同真實,例如口型:好多動畫入面角色講野時只係個口開開閂閂或者有少少唔同口型,但明顯地係畫幾格輪住用就當講野,但《亞基拉》係真正完全按住角色對白畫番正確口型出黎,睇落真係似講緊野而唔係配音,像真度即時提昇幾倍亦係創動畫先河,加上多格數超流暢畫面,一出已成經典。隔多十幾年,個個都玩電腦時"Steamboy"仲玩手繪似乎有點落伍,當然有位係用電腦執過啦,好在冇乜好假好「電」、景同人唔夾之CG動畫弊病,同保留住人手上色之舊色彩,畫功自然同《亞基拉》接近,但個人喜好設定同筆觸都係鍾意《亞基拉》多,如果你係本住睇日本動畫、睇大友克洋出品心態,確唔會失望。但論編劇個人覺得未夠好,睇"Steamboy"好有宮崎駿感覺,或者大家都係走現代童話路線,但論情節一路冇乜高潮起伏位,思考位置同人物發展亦未夠深入,好多轉折都達唔到應有之驚喜效果,以致全套戲感覺好「簡單」,例如拍埋《天空之城》,大家之敘事功夫已顯差距。又或者同配樂有關啦,宮崎駿動畫好多配樂好勁帶得起氣氛,"Steamboy"正正缺乏令人印象深刻或者被牽動情緒之音樂同旋律,唯有聲畫合一影畫先可以成功:任你畫風點靚點細膩,冇聽覺補足只似未點晴,動畫唔同靜畫。
「噉你鍾唔鍾意?」
都唔錯,除左因為世界觀,仲有一樣宮崎駿動畫及唔上:因為唔係闔家觀電影,死亡冇被軟化式喻意表達,係真係睇得到見血橫屍果種死法,視覺震撼同氣氛都立體得多。對我黎講係易明過《亞基拉》,只係未至於吸引到我睇過之後一再重溫(《風之谷》、《天空之城》),可能真係太多年後先出喇,錯過時機。更關心係將來仲有冇機會睇到呢種手繪動畫、唔好用咁多電腦加工同特攝式CGI之真正動畫?



25/7/2007 WED

正今日頹下一城。美國國慶之後,一連十幾廿日都冇乜野做,每日除左上網就係食,間唔中一兩個job搞搞佢噉囉。只不過老細係度大家都面阻阻,我上網唔可以上得盡情,佢見到我唔做野又唔好意思出聲(「喂,你兩個邊個先係老細?」),今日老細兩個唔見埋人添,唔使眼冤大家高興。返到公司已經普天同慶緊了,成間公司冇個係做野,一係走左去食煙,一係玩同吹水,一係上網睇野,我隔籬船務師奶直頭成朝電話未離過手狂睇股票,
「我鍾意呢間公司!」
我就係噉寫野,近來手風順寫野寫得寧舍爽手。疏乎一回事,大家點高興,都要解決一個重要問題先:
「lunch食乜?」
每次冇皇管時,同事間往往爭議lunch食d乜可以拗成個幾兩個鐘,又想食得多又唔想俾多錢係咁麻煩架喇。最後?
「咪又係食雞!你班友次次鬧完幾個鐘交最後都係KFC架啦!都唔知嘈乜!」
今餐超豪叫左近四百蚊,有三大盒雞一盒十幾舊辣一盒十幾舊唔辣加多盒十幾隻蜜蜜燒,整多八個葡撻兩盒雞皇飯加兜薯蓉十個人分,完全係食到死都食唔晒齋食雞都食到滯,噉我都冇負眾望都啃埋兜薯蓉同幾個葡撻先收皮算係俾足面啦。平時一點打鐘食飯,今日打鐘時我已經撻低訓緊覺了,訓足個幾鐘今個晏晝特別精神爽利,我真係好鬼死鍾意伏係公司檯頭聽住關心妍訓覺架!(話時話又出左新碟了,死幾時出糧?)訓醒覺除左繼續上網同寫野,又點少得甜品時間?必備佳品無限雪夾糕,前排樓下間華潤俾人/俾我掃到冇晒貨,等左好耐終於返到貨立即怒掃,仲要$9.9減價減左咁多個月都未減完,似乎呢個三折大優惠將會是永恆。仲有十蚊八枝姆明牌吮吮冰(我唔知係咩牌子,見膠袋有隻姆明咪叫姆明牌囉),吮吮冰知唔知咩黎呀即係一個長膠管入面入果汁再放落冰格雪成冰拎出黎剪開或者中間拗開成兩枝慢慢吮黎食果d吮吮冰呀,嘩我食果時已經係廿幾年前讀小學啦,小學畢業之後食吮吮冰會俾人笑架!唔係會計靚女多麼的無聊想食(好明顯因為唔使佢俾錢),都唔會無端端執包上黎慢慢吮。
「噉返工法簡直係人間天堂。」
死我真係好驚我唔做呢間公司之後下一份工點算。


拖左好耐,襯住今日得閒無事,終於的起心肝去買番張display card同soundcard喇,為左應應今日得閒到出汁之景同證明我真係得閒到無Q聊,我決定行路出黃金。之前去契爺青山道尾(真係最尾)屋企行去九個幾字成個鐘咁滯,深水土步同長沙灣都唔係差得好遠遮有排行,點知原來大角咀去到深水土步半個鐘唔使,晨咁早仲有時間行行玩具舖。同上次比,好似少左幾間?有幾間真係多變到金剛到爆,諗住《變形金剛》上會有好多變形金剛,點知意外地接近零。可能d玩具舖都對電影版似外星人多過似機械人之設計冇乜信心?國貨就好多,大陸對變形金剛呢家野真係樂此不彼,先搵到個Transformble系列,仲有隻Trgnsfirmers版擎天柱,好似係超神版,勁大隻d料又唔係差喎,最正都係個logo由Transformers改成Trgnsfirmers但似到十足唔睇真完全冇破綻,祖國之開發天才世界之間真是無能敵也!仲有大陸版Lego阿Leiga,行完深水土步令我體會到祖國之偉大,睇國貨絕對係開心過玩國貨 - 睇時有得笑仲要真係好好笑,但一玩落就知大劑。行埋都仲有大把時間,上次一班人黎長沙灣打邊爐(每人六十又超好加無限坐抵玩,幾時下餐?),落黎黃金行行除左搵到死人打字仲有撞到個客,好耐冇見過原來而家黎到黃金賣野,打邊爐好似都差唔多半年前發生喇,部機去美國前已經死左,拖左咁耐終於執到display card加soundcard,亦即係
「好野我終於可以打番機聽番歌喇!」
初頭以為行黎都有排行,加埋行街約七點半,點知而家乜都行晒買晒先七點過d,大把時間,仲可以再行路經旺角返屋企。冇錯我真係得閒得太無聊了。起初我諗住回程時落埋新之城打多陣機先架,裝修左喎而家勁大喎又多左幾部五百合一要落去玩玩啦!不過唔得,C&C等緊我!


八點未夠已經返到屋企,遠比我想像中早,下次可能深水土步行出旺角再經尖咀過紅磡返屋企先夠浪費時間。裝卡最難唔係裝,係拆晒d線抬部機出黎開蓋插完再調轉頭從新做多次,我承認就係因為太難做呢幾個步驟而不必要地拖多左幾個月,大佬,我部電腦已經俾無數CD包圍,每次搞機搬開晒d碟都要好大工程。當然努力是有回報的,今晚已經好開心地打番C&C了,雖然部機唔算舊張display card唔係貴野但cheap cheap地都唔係差,但玩C&C3都唔可以用到最靚setting黎玩,仲同demo靚到黐線之畫面有段距離,不過玩到就算啦大佬等左幾耐呀!
「C&C喎!」
不過恨還恨,裝晒之後第一件事唔係立即打C&C3,而係立即繼續番舊果幾隻。C&C1同2爆左,而家打番Red Alert 1,跟住仲有Red Alert 2同expansion,然後仲有玩現實時空之將軍系列。C&C3?我諗到第三集出埋expansion pack,我仲係打緊Red Alert!



26/7/2007 THU

全日戰戰兢兢。
「死!我真係冇晒野做!連平日扮做野用d『儲備』都用晒!」
即係我冇野做時,都會準備定幾百千幾封email得閒無事掟幾封出去營造一個「我做緊野」之假象,只係近來實在得閒,每日都炸五六百封email出去,日日噉炸乜都炸晒啦大佬我今日仲可以做d咩炸d咩呀?唯有行出行入飲飲食食。雪夾糕,唔使講你都知道我又食左幾包啦;吮吮冰,怒吮,食唔係點好食勝在夠浪費時間,最鍾意拎一枝返自己個位度,一面慢慢吮/咬一面上網,一條真係夠你「食」兩三個字架,我鍾意;無聊到兩個人走入pantry研究沖野飲,今日係沖奶茶,又係正,繼食之後第時又多樣消遣;公司樓下萬寧有即食粟子減價,會計靚女怒掃左十幾包,又要食;最後無聊返自己位開開個櫃桶,
「係喎仲有包花生未開喎!」
前日lunch落街掃貨時特登買左包花生準備琴日公司冇皇管時慶祝大家排排坐剝花生,但最後太開心了成間公司失控,連當事人我都唔記得左呢回事。噉又未至於今日兩老出現時當番佢地面剝花生咁囂張,雖然我得閒到有少少動機實行。唔好話等到放工,捱到食飯已經捱得我好辛苦喇,冇野做其實都好慘架。
「老細!兩條路俾你行!一係你返工廠匿番一頭半個月!一係你放我假俾我出去嘆番幾日!唔好意思炒我呢個option唔存在!」


夜晚,繼續打機。重裝機兵係好玩但先放低一輪,因為搵到喇,前幾日問果隻牛仔game!得到各方好友熱情相助,隻game係叫Wild Guns ,以前打超任時好鍾意打架,可能又係因為舊世界結合新科技個感覺好過癮,加埋隻game真係好玩好多招出唔係齋射咁悶,一搵到立即重裝機兵都要放,一放低先。只不過真係好難玩,玩左咁多舖打極都只係過到第一關,好在收到加上網搵到之咁多個版本中,我玩緊果個係無限continue,雖然有限同無限都冇分別,因為去到第二關必死con十幾廿次都過唔到,到最後要出絕招 - 模擬器save+load無限復活,先爆到機。爆左之後諗番就覺得其實都唔係難玩,而係循正常方法打,以我而家之力一定爆唔到機。呢隻加埋重裝機兵,夠我玩多幾個月架喇。碟評同變形金剛,灰,暫且放低一輪先唯有。


九龍皇帝駕崩

我諗近來最「轟動」新聞就係呢單。其實我同佢都幾有緣架。有段時間佢去我屋企土瓜灣果邊蒲,屋企樓下行到去九龍城,沿路電線箱電燈柱牆身好多地方都有皇上真跡,通常寫完之後隔幾日就會俾人油左,但好快又再出現,果時每次出街都有御筆同行,日對夜對加埋知道皇帝歷史,點都有份感情。到後來龍體虛弱不便遠行後先不復見。點知意外地琴日就殞落。好多人會話佢只係發神經亂寫,但我覺得佢係個不折不扣街頭藝術家,佢手字你望一眼就記得,亦係只此一家全港甚至全中國以至全世界只得九龍皇帝先寫得出呢種「御書」,亦有完整歷史同思想解構唔係話寫就寫想藝術去藝術 - 佢亦從來冇話過諗過自己係做藝術啦?只可惜藝術本身已經唔受香港人重視,街頭藝術就更甚者唔止冇人理更俾人睇低睇死。
為香港又損失一個傑出 independent artist 致哀。

Trans罪mers
「拿拿拿殺到埋身喇各位朋友!一人上107度買件變形金剛tee著住去睇!」



28/7/2007 SAT

「...琴日做乜冇野睇?」
當你睇到劉Sir話佢部電腦整番好soundcard加裝埋display card,有d野唔使寫到咁明了。冇野睇,即係日頭好得閒 + 加夜晚靜 + 返到屋企怒打C&C。明白未?


算忙架喇今個朝頭早有個客要見見,不過夾埋仍然係十分得閒。放工之後走上信和無聊,
「107,次次帶埋囡囡上黎都撞唔到,我都冇計啦!」
冇乜野做,都係走上舖頭坐低打打機算。兩點半未正式開舖時有一個鬼仔帶住個中國女仔上黎,好正常呢個情況好多鬼仔黎香港都會噉,但過癮在唔止咁簡單。個鬼仔入到黎,拎起一隻碟,再同個女仔講講講講...講左好多隻碟好多隊band。好普遍呢個情況,專家經常會做,但分別在於a)個鬼仔講d野係好pro果隻,即係每隊band每隻碟係玩d乜做d乜特色係乜全部都講得出晒,同埋 b)個女仔都係,呢樣先意外。非常恐怖。並唔係一般專家同身邊d朋友/條女講「我知咩黎我識幾多野」果種,而真係兩個係度討論,隨便拎起一隻碟一隊band都可以閒話家常地講一大堆學術級數資料出黎,仲要對音樂同埋創作理念討論得好深入好有深度果隻,唔係「呢隊band咪係玩乜乜乜囉好出名架」然後冇晒下文果種,短短五分鐘之談論,已經有見識過咁多年黎睇過之任何香港forum topic,所以當佢地吹吹下水
「唔知,你又覺得呢隊band點呢?呢隻碟佢地玩成點?」
劉Sir立即肴晒底:
「...我負責坐係度遮!其實我唔識聽metal架!」
我都係鍾意保持低調,等其他專家教下我仲好,包括真正果隻(學到野)同「本土特色」果隻(學唔到野,但有得笑)。外國d女仔確係堅料好多,上次個新西蘭男仔陪佢個超級IN FLAMES迷華裔女朋友上黎買碟一掃全線IN FLAMES,今次呢個女仔同個鬼仔一樣直頭係metal研究生添啦,住香港幾時會撞到呢d女仔?0%機會。文化同態度唔同就係唔同。所以,算啦,打機算。

一打,就係八個鐘,由兩點半上到黎坐低起,一路打到十點半收舖咁滯,全日非打機時間唔夠一個鐘,證明多麼的多客,同多麼的無聊。平日冇人九點半可能已經閃左,今晚十點半先收舖明顯地係有野玩啦,咪就係我地
「Trans罪mers!!!」
所謂「版罪」,結果都係得三個人咁大把,或者係我地先咁柒卦?廿六號先上畫,但廿七號已經連廿八號十點半場飛都賣晒,今晚三個人睇十一點半場都唔係話易買到飛。好在個位唔太後算幾好,全場差最前一行已經爆鬼晒。
「好唔好睇?」
我相信我一定會睇多最少一次,所以唔會講住。短評係:
「就好似睇武器小說,諗住睇金庸,點知拎上手係古龍。」



29/7/2007 SUN

今日係漫畫展,有d興趣去架,一來無聊襯熱鬧,二來跳蚤市場有時有正野執,三來想睇下會唔會撞到band show,好抵睇架一日有幾次表演一張票睇到笑!睇完《變形金剛》返到屋企已經兩點幾,三點幾即訓,九點起到身,不過...
「...頂唔順。」
十一點再起多次,
「...都係頂唔順。」
一點起到,都太遲啦。
「算Q數啦。」
結果兩點半先正式起身,即係同平時一樣。
「算Q數啦劉Sir你都係!鑊鑊都係噉!」


「...跟住點?仲使問???」



30/7/2007 MON

我地繼續黎研究物理學。是日餐牌有漢堡蛋飯,令我諗番起當年TRHK最愛「漢堡煎蛋飯粟米汁炒底」,一定要叫個黎回味一番啦,當然同以前果間外賣比差好好好多皮啦,只係果間劉Sir食完之後就執左了,到而家繼劉Sir邪過之後仍然迄立不倒只有大家食、新旺同新明威。同事叫d野又正喎,今日仲有個沙嗲牛肉炒河,嘩正到未開飯我已經走入pantry係噉偷食其他同事果幾盒,正式開飯時自不然又會收到唔少捐獻啦,盒漢堡蛋飯除左一盒飯,仲塞左四份一盒炒河加半個出前一丁,走湯硬身乾啃果隻我鍾意。盒飯叫佢落粟米汁點知上到黎乜汁都冇,旋打電話落去小,或者間野見「冇粟米汁咁少野都嘈生晒」玩野送成碗汁上黎,個碗裝到滿晒一開蓋就瀉仲裝得多過例湯果隻,碗汁倒埋落去立即變成粟米出前沙嗲漢堡一丁牛肉煎蛋泡飯,同事口中係「撈到成劈屎噉」,影響晒在場全部同事食欲,所以大家好快就食(唔)晒走人,間pantry得劉Sir一個坐係度印印腳慢慢嘆。上次研究結果係飯盒容量係自身之1.5倍,今日再下一城去到兩倍,當有一日我可以將十個飯盒裝晒落一個入面,就係拎諾貝爾獎的時候了。


夜晚,冇錯問黎做咩丫都係狂打機架啦。Wild Guns一搵到立即瘋狂地打,每日唔爆番一兩次唔心足,就同The Last Stand一樣(但自從出現左超任模擬器加上搞掂左sound+displaycard,已經少玩左了)。所以下隻game攻略,唔使問架喇就會係Wlid Guns。好玩,同埋易寫。
「反正而家真係大把時間!」



31/7/2007 TUE

非常開心,老細又上左大陸,加上我十點前已經做晒所有野(真係超超超得閒呀呢個月),又係坐係度渡日辰的日子,真係疏乎。今日公司突然間出現左好多個Leah Dizon,大家食完飯都攬住佢訓覺,都係因為會計靚女衰,佢呢個超級Leah Dizon fans見到107度有得買LD枕頭立即掃貨,近排經理同另一個同事又想買枕頭,經佢帶契就搞到人人LD了。
「劉Sir呢?」
劉Sir冇攬女。劉Sir剝緊花生。上個禮拜老細上廠,特登買左包花生返黎,點知玩得太開心唔記得左,難得今日又係噉景況,得閒冇野做就開埋黎慢慢剝,剝剝剝剝剝剝剝剝剝剝剝剝剝剝左成個朝早食左成包,細包裝遮算收歛左架喇以前係屋企冇野做時我試過一晚食晒成包大包裝萬里望架!會計靚女走過黎一齊剝,
「我以前間公司d人食花生先勁呀!有個同事佢個位有個櫃桶專用黎放花生,返到公司就係係噉剝花生,全部殼掟晒落個櫃桶度算!」
「咦噉好似我要再猖狂d先得喎!」


夜晚,仍然係繼續打機的日子。打機以外,撞到幾個有趣的客人,不過懶寫喇。有時有d野對都對到悶、笑到笑到悶。打多舖機好過啦。



1/8/2007 WED

唔覺唔覺,2007年已經過左七個月,又仲有一個半禮拜就到劉Sir生日了!為左慶祝,今晚一唔覺意就爆埋C&C Red Alert。隻game都十年前出,十年間dgame要幾複雜要幾難乜都得,而家玩番自然覺得唔算太難打,除左有時有d屈機位要靠save load大法,大致上都係屈番電腦轉頭。
「噉咪可以開始打C&C3囉?」
仲有排。而家爆左C&C1同Red Alert 1,但其實兩隻都未完全爆晒,仲有隱藏關未玩。C&C1果期興侏儸紀公園有得玩打恐龍,Red Alert 1都有得打巨型螞蟻,仲過癮過正傳,爆埋佢先算啦。然後Red Alert 2有兩派加埋expansion要爆四次機先算爆晒,將軍系列仲死三派要打六次,
「C&C3?聖誕節先算啦!唔好咁快出expansion添呀我警告你!」


難得係禮拜三,全日休息。做野已經冇乜野俾我做了前排我已經高速清晒好多野近來好得閒,都幾似前排,返到公司先有會計靚女餐肉芝士三文治,lunch再黎個芝士煙肉意粉,食飽訓醒繼續玩,全日就係食同埋上網同埋發癲,夫復何求呀真係噉樣返工法。本身夜晚仲有下場架,就係同靚女出太子買野順便上第尾鋸鋸扒,仲特登買左飛夜晚九點八朗豪坊睇多次變形金剛,點知臨出發先俾人放飛機,六點放工九點八先開場成三個幾鐘點算?唔係叫我上舖頭打超任咁無聊卦?結果係仲無聊:由旺角 徒步走出尖沙咀 再返旺角,沿路機舖、(V)CD舖、玩具舖逐間掃,係熱不過噉樣行街都幾開心架,唔使一定要買齋睇我都好心滿意足架喇劉Sir份人好簡單架咋,唯一俾錢係食左兩舊臭豆腐囉,此等人間美食今日一試先醒起原來好耐未食過喇,自從我地五十蚊基金除牌之後。一面行街,一面聽歌,呢三個鐘過得十分開心,只係好多機舖、(V)CD舖執甚至戲院都唔見左,都係「科技進步」同「時代進步」之結果也。最開心當然係玩具反斗城啦,前幾次都係一朝早過黎,十點開門已經到,有邊個似我咁無聊?自然係冇咩人啦。今次夜晚過黎,
「嘩原來玩具反斗城真係好多人幫襯喎!」
變形金剛個櫃位自然係最受歡迎啦,除左玩具迷之外仲好多老豆老母帶埋個仔黎,就連自由行都成隊走入黎睇&掃,大家都中晒毒喇。可能時間真係太多,今晚係我留連玩具反斗城時間最長一次睇足大半個鐘,開心嘛,幾乎睇到唔夠時間走番去旺角準時入場睇。今次試睇朗豪坊,上次開畫第三日加週末全場99%爆,今日平日都只差最頭兩行半,即係又係幾乎全爆,呢套戲實在係太勁了。話九點八開場,但片頭加廣告播足你三個字先開始,如果係三個字播足片頭我唔拘呀,衰埂片頭得一個字都冇其他兩個字係無聊廣告,又巧合地同星期六新世紀睇坐同一個位,只係唔多鍾意朗豪坊呢邊,除左音響唔夠勁之餘入口係側邊唔係後面,出口個EXIT大大隻全場射住你,所以一直揀新世紀睇戲而唔去百老匯同朗豪坊就係呢個原因。
「使唔使咁急又睇多次呀?」
都講過《變形金剛》係冇可能只睇一次,既然今日有時間不如順便睇埋,只可惜唔係IMax,另一個原因係《Simpsons》都就上,唔快d睇多次遲下可能難就到時間。睇完第二次,結論係
「好在我睇多次。越睇越好睇。值得睇多一/幾次。」
當年中五時上《鐵達尼》,我班有個女同學睇左超過六十次(我到而家都(超)唔鍾意呢套野)。噉我又未至於咁有「大志」。都擔心冇六十次,都有十六次。



2/8/2007 THU

今日我有三個理由大條道理躝街。第一,我冇野做(「噉都算理由?」老細問)。第二,黎緊會好多機會返大陸,係時候去拎番張新回鄉證(已經升level成回鄉卡了)。第三,
「好痛呀!」
就黎到lunch時,會計靚女突然間心口痛,好嚴重痛到喊果隻。劉Sir一向唔鍾意大熱天時出街身水身汗大家都知,不過被迫要英雄救美,冇辦法啦。
「冇鬼用!食完飯先黎痛咪抵d囉!」
「真係好痛!唔知係咪琴日去游水,游得太激拉傷左肌肉!」
「所以我好安全!我永遠唔運動,所以永遠唔會受傷!」

立即飛的 去法國醫院,即係公司最近係廣華,但公立醫院分完流仲要同成班阿伯阿婆爭,五點都唔知有得睇未,所以選法國,除左快,仲因為
「好Q靚呀!!!」
法國醫院係間私立醫院,近我屋企果頭,以前經過入過都幾殘舊,但事隔多年後已經由醫院變成間酒店,一入門口係Starbucks加超大天窗,然後係酒店大堂式勁高樓底無數梳化,d空間係大到唔好話人直頭你成架車入黎行都仲夠,唔係班人有著制服,你同我講呢間係醫院我一定唔會信囉。去到「醫院」,
「咦?又好似唔多痛喇喎!」
「好明顯呢個病身在公司時先會發作啦!」

之但係都係搵個醫生睇睇檢查一下會好d。先去接待處報個名,私立醫院同公立唔同在於,真係舒服好多。間醫院勁大勁豪,但人冇幾多個,所以話似酒店多過似醫院囉,去公立入到大堂已經幾百人塞爆啦,入到私立醫院做真係正,人咁少冇乜做冇乜跟,換著公立一個鐘已經夠做死你。跟住就開始咱們的醫院遊:被點「去呢間房乜乜乜」、「上幾層樓搵果個部門物物物」、「落番去果間房等然後點點點」,去量血壓探熱然後見醫生再去照照X光又走番去醫生度聽候發落,周圍走黎走去,再一次見證私立醫院係豪過人,唔止裝修就連護士同接待果班都要後生d靚d,最誇張都係個廁所,
「嘩真係好豪呀你一定要試下!」
會計靚女去完曰。去廁所都要試?冇錯!廁所唔奇,廁所裝自動門先奇你見過未?一行埋去諗住伸手推開度門,有把聲講
「縮手啦!」
然後自己打開,出入全自動完全唔使自己推門方便又衛生,喂酒店都冇咁豪華高科技喎!去醫院往往八成時間都係等,見完醫生照完X光,兩個人摷到個磅,係度玩度高磅重十分開心,玩到人人都側目時先見到個磅上面貼左張紙,寫住
請勿在此嬉戲
玩一大輪終於走得。都幾擔心,話晒私立醫院喎,門診話百二但點知睇完會唔會呢樣加果樣加收幾舊水架?
「先生你估中左喇!承惠三百四十蚊丫唔該!」
門診百二包埋照X光都算抵,但開藥開俾你咁大把,就要收多二百二,聽會計靚女講個醫生仲要係唔太有料果種,
「睇極都唔知係咩病,張X光片睇一睇幾秒鐘唔使就睇完又講唔出咩事,分分鐘藥都係俾三粒panadol我就算,七十幾蚊一粒panadol!使唔使咁貴呀?」
「梗係要啦!d裝修咁靚唔使錢呀?」

都未完喎,因為個醫生都唔太識睇張X光片,所以要搵專科醫生再研究,下星期需要再上黎覆診多次。話唔埋係寶藥黨陷阱,
「拿!你睇!咁大個陰影,一睇就知係cancer啦!不過唔緊要!我地醫院而家做緊優惠,呢個『癌症開心治療』package,包醫好冇手尾都只係收你三千八百八十八!假如你仲係擔心,俾多四千蚊升級做我地黃金會藉會員,仲可以優惠價六千八百買多個『輕鬆醫療住院計劃』...」

睇完醫生先至兩點未夠,都仲有大把時間剩,
「大佬出到黎補番我食lunch個鐘都要啦!」
玩d咩好?咁近屋企,真係有諗過走返去屋企整個公仔麵食順便大家玩玩狗架,不過老豆係屋企,廢事佢以為我咁快就俾人炒左,都係出番旺角算。
「去邊度好呀?」
「新之城先啦!」

會計靚女要買野,既然大家出到黎旺角梗係順便買埋啦,噉新之城買野梗係順便落樓下機舖打番陣機先啦,兩個人自然係玩篤篤機啦一男一女篤篤最開心,好唔好彩篤篤下老細就打黎追魂,都差唔多時候走人喇。首先去中旅社拎番個回鄉證先,好緊要架今日唔拎就大劑喇,去辦證時真係搞足大半日先完工,黎拎證就快好多排兩個字隊走得人,即係都仲好早咋喎!又黎左呢頭順路,中旅社開始掃街掃到兆萬,走到去好景果頭搵到間炸野有得坐,大家坐低食臭豆腐篤魚蛋,食之餘順便研究一下
「食臭豆腐同食魚蛋,食食下係咪一定會跌落地?」
研究結果係,
「係,」
無論你點小心法都一定會跌。另外大家一致認同全香港臭豆腐最正係灣仔168附近果間,當年果頭返學實習,放學去搭車時一定經過呢檔,差唔多日日起碼食番一舊先肯走,
「唔得搵次要去回味番次!」
篤完魚蛋仲有會計靚女推介之仙跡岩雙料朱古力芭夫特飲,可以當成係朱古力沙冰,佢好鍾意我就覺得太多冰溝淡晒唔夠濃味,係勝在入面有粒粒朱古力趙下。回程沿路又周圍行行睇睇,三點半返到公司,
「係喎,仲未食lunch!」
雖然掃街已經掃到飽晒,但出門口時係臨到lunch,食飯時間時唔在場,lunch就變左而家之下午茶了,今日我都醒架喇淨係叫個早餐當lunch,但各位女同事慷慨解囊,我「早餐」個盒返到黎已經塞到爆一爆,旁邊仲有兜意粉等緊,真係多謝晒,只可惜掃完街返黎已經太飽,個「早餐」一次過食唔晒要剩番一半留番五點再下半場,個意粉明日先分解啦。唉。噉食法真係大劑。前排已經食少左,半個月前上磅,歷史性地得番一百六十磅,都不知幾開心,但跟住兩三個禮拜又得到各位同事愛戴熱心捐獻,今日醫院上磅時,已經去到一百七十六了。相信過埋今日,會回歸18X。大劑。


日頭成日都有呢d奇遇,真係好開心架。反而而家夜晚超悶。同以前調轉左。
「同埋笑囉。近排真係多左好多笑料聽/睇。」



4/8/2007 SAT

「抵死啦你!」
終於有野做!七月過左回歸同美國國慶之後連續三個禮拜冇野做,一到八月踏入(理論上之)旺季,立即多番野做,七月已經兩個鬼佬話八月頭上工廠,又會咁蹻兩個都揀禮拜六先黎,灰架大佬禮拜六半身返半日工,去工廠做足全日都冇得補,所以我從來唔鼓勵d客禮拜六上工廠or黎搵我,大老細除外,
「俾錢就係老細!」
朝早果檯係荷蘭佬,我跟開美國線唔知點解歐洲客都關我事,夠大卦,聽老細講係「荷蘭最大客之一」,平時好多客都係玩玩下,呢個真係認真喇真係黎做生意,行工廠行左一個圈之後大家坐傾好耐要咩貨點樣做法,都幾凝重架不過你知啦劉Sir咁衰仔,大生意當然係老細傾,佢呢,就負責食飯,話晒係大客又多野傾,所以工廠特別準備左豐富大餐俾兩位客人,一共有兩煲野 - 係酒樓去飲裝魚翅果種大煲 - 一煲係炒飯一煲係炒麵,驚d鬼佬唔鍾意中國菜,再整多碟媲美美國垃圾食府McFxxkno同FxxKC之吉列雞翼,話晒我工廠煮飯個阿姐以前係酒樓大廚黎架!不過結果班鬼佬鍾意係炒飯炒麵多,碟雞翼大半歸劉Sir(可能本身就係諗住整俾佢食)。講就唔多到我講架喇我地位又卑微個人又懶(呢樣先真),不過一d都唔嘆架大佬善後係我做嘛,見完客傾完之後d文件呀報價呀果堆麻煩野係我搞架呢d先花時間呀。傾完生意食完飯仲要等司機黎開車,到一點半個客終於走人,換著平時呢個時間我係食飽飽訓緊覺,但今次唔好話訓,送完客去個廁所出到黎第二個客已經到,抖都冇得抖幾辛苦架,真係做野講生意嘛呢d客。好在晏晝呢檯就好d,係一個「正常」客人,雖然來頭唔細聽老細講係我果行中之一個傳奇人物無人不識(我唔識,證明我唔係呢行),美國展覽時撞到之後日日傾亦黎過工廠,今次派人黎純粹係睇睇間工廠好唔好掂唔掂,呢d客就最鍾意,雖然睇工廠真係咩都睇,行一層樓問幾十條問題連廁所乾唔乾淨都理埋,平時行廠每個部門行一行就得半個鐘唔使睇晒,今次陪個客行/講足成個鐘先至行完,好在大陸冇香港咁熱,溫度計香港而家日日三十五(一兩年前三十四度已經話係全年最高,但今年三十四已經係平均溫度、酷熱天氣警告整同唔整都冇分別因為日日都出,大家冇幾多年剩咋),大陸一定高過香港最少三度,但反而工廠仲涼過香港,可能因為冇咁多高樓大廈,同空氣污染勁隔一隔卦?雖然晏晝呢個齋行就得,之後又唔使跟進,不過噉樣身水身汗行個幾鐘都好支力架,尤其是朝早果檯走左之後都未抖過,四點半先開得車走,一上車立即訓啦乜都唔理。
「好似好順利喎。」
劉Sir返大陸,冇幾多次會冇事發行咁順風順水。梗係唔會啦。叫做冇咁大件事噉囉。今次輪到架車個轆有事,唔知咩事個轆裝錯左一行快架車就會怒震,噉我同老細兩個又未到咁專業識整(不過經過咁多次大陸行,我已經有豐富爆呔換呔經驗了,雖然我冇車牌),即係震震下應該冇咩事(對我黎講我訓到覺唔會搞得醒我就係冇事),不過架車係老細開車係老細,好似平時噉百七米踩法架車會唔會瓜柴佢都唔敢講,搞到要慢慢行高速公路係噉俾人過,我就舒舒服服吹住冷氣聽住歌印印腳訓覺。個轆有事之餘,又要爆埋窗喎,有飛石仔打爆玻璃窗,叫得做車窗就冇咁化學都幾實淨石仔飛黎都係小小裂痕一個仔遮,不過你知啦而家天氣三十五六七度,曬到隻窗興烚烚突然落雨,熱脹冷縮,唔使我講會發生咩事啦。一個窿仔就變成橫跨車窗大裂縫,嘩精彩真係。搞到老細越黎越唔妥我。
「邊次你跟車,我會冇事?今次又要我使錢整車!都係你!!!」
我訓緊覺乜都唔知。


「你想去邊度落車?去沙田玩?定尖沙咀行街?」
六點幾返到香港,老細問。
「我都想去行街呀唉!」
要上舖頭呢。今晚有件不愉快事件發生。難怪肥仔要求立即解。所以TRHK經歷咁多年,只剩番我一個留守。除左要背負大量冇人會欣賞同尊重之犧牲,亦要面對香港「metal友」之愚昧同下賤。呢樣先至最難。
「今日發生之事,令我對部份所謂『聽metal』之香港人徹底失望。」



5/8/2007 SUN

因為黎緊個禮拜超多野做,諗住禮拜日返公司做番半日野,再返工時冇咁辛苦同拎假。可惜丫。
「鬼叫我整番張soundcard。」
Red Alert 1已經俾我極速爆左。輪到2。真係超難玩。之前同Rock爺成日上網吧兩條友抽電腦勁老屈,但到自己單打對電腦d關屈機到爆,玩左一半去到第八關已經完全冇乎,努力到七點鐘,都係訓覺算。返工?算啦。都係兩點半起身去開舖算。而家實在太多野玩。屋企就係聽歌同打C&C啦,玩到悶又可以睇電視、睇DVD同寫野。落到舖頭,唔寫野,都仲可以打超任、睇DVD(屋企係睇戲,舖頭係睇演唱會)、玩變形金剛(仲有兩三隻未拆,都係時候喇),近來仲多樣野:漫畫。呢排等緊《DMC》,又搵搵其他野睇,雖然好多人都係鍾意睇日本漫畫多,始終美國漫畫先係我杯茶,正傳興趣唔係大反對鍾意天馬行空之crossover,最正當然係兩大種族Alien同Predator,不過廿幾年越撈黎撈去要幾誇張都有,AVP未夠?加埋個未來戰士入去打一大餐都得,再夾多幾個Marvel角色,真係乜都有。同埋美國漫畫電影感同迫力確係其他國家好似日本及唔上(又或者話我鍾意美國漫畫家果種鏡頭用法),日本漫畫畫風係要靚同精細(而家係要「萌」),但美國佬強烈色差同對比、寫實樣衰面相同追求真實畫法更正,同埋彩色嘛你有冇睇過美國漫畫係黑白?(相反,你睇過幾多日本漫畫係全彩?)另一樣受美國多係短篇地位高,日本仔弊病係為賣錢同商品而咩都要長,往往越去到後面越誇誇到作者自己都救唔番(《龍珠》斯路打後,你仲鍾意嘛?),美國漫畫當然一樣長篇先係主打甚至比日本更複雜更商業,但往往一期起幾期止d短篇先係神來之筆,內容正傳甚至正常漫畫都唔會搵得到,加上可能美國電影文化影響,短篇往往好具荷里活味道,劇情同場面緊張緊湊之餘編劇亦唔係亂黎,最欣賞係美國漫畫家編劇功力,就算係「原著改編」、只得一兩期交代,都可以將一個故事或者一個角色構思得天馬行空,好似異形電影四集對異形都冇乜交代過解釋過,睇過一本將異形塑造成一個宗教,從未有人試過之構想,劇情發展落去冇乜打戲冇乜死人,就係夠邪。只可惜身在香港,日本文化橫行之香港。
噉就打機睇漫畫成日了。就係咁得閒。



6/8/2007 MON

公司返工時間係九點三,但今朝呢個鐘數我先上到車,唔係我晏起身(邊日唔係八點九先起身呀我?),係橫風橫雨累事。琴晚兩三點時已經又雷又雨,今朝起身時情況幾穩定冇乜事幹,點知一出門口立即落雨,行到中途擔住遮都成個袋濕晒,去到車站直情大雨到黑雨噉款,根本睇路都睇唔到有咩車行緊過黎都唔知,小巴佬又鍾意飛站吉車都照飛唔停吹佢唔脹(轉工的話下一份工我一定唔會揀搭小巴返工),點睇都似打風或者大雨啦今日點解噉都要返工?害我滂沱大雨之下淋足幾個字雨遮都差唔多吹爛,九點三先終於等到有車(所以永遠唔會早出門口,早出又好晏出又好,結果永遠都係遲一遲先有車),一上車,行唔夠半分鐘就立即停雨差未出太陽。唔使多講,你都知道一落車,又落番雨啦。
「唉!係就黑雨或者八號風球啦唔該!係要噉玩野!」
同事搭嗲:
「算好架喇,今日冇打雷!」


老細又不在。正。可惜偏偏到我返完工廠見完客,今次真係要做野加多野做時先唔係度,浪費左大好時光添。好在又係搏命做得晒d野,仲有時間上上網睇睇野等六點放工。同樣地,六點前一滴雨都冇,但我一落樓,立即落仲要大雨過朝早果時,
「搞X錯!」
放工時間先黎落雨,穿越人海半個幾鐘先到達皆旺,又係唔使講,一上到舖頭,唔使幾耐出面就停晒雨,吹脹。點解我知?見個個客上到黎都乾身得我一個濕晒就知。係,終於有客。梗係,而家做到$280三隻,九十三四一隻碟,都嫌貴、都冇野買的話,我都冇計。雖然事實證明,做乜都好,冇計就係冇計。正如之前係「SUFFOCATION新碟」,而家係「NILE新碟」了。你冇?九十三一隻碟又點?九個三一隻都唔要。
「都唔係。」



7/8/2007 TUE

案件重演,又係八點九起身,又係起身時冇雨,又係一出門口立即落狗屎,又係橫風橫雨中戙係小巴站睇住司機飛站,又係一上到車立即雨過天晴,又係返到公司遲晒大到,
「頂你個肺!」
世紀黑仔王之威力繼續催殘身邊各位朋友,繼老細架車裂玻璃跌左幾千銀近成皮之後,今日連個電話都跌埋,
「又冇幾千!都係你!!!」
你知劉Sir架啦,野又唔做(終於趕起晒d野喇今日我一番努力之後,繼續嘆世界!),鬧又唔聽(因為俾人鬧時佢已經ZZZZZ緊),仲好忙地食野。
「我要減肥!」
自從黐埋劉Sir度,會計靚女條腰一日比一日粗,尤其上星期「病左」去完醫院出旺角瘋狂掃街,即時肥番五六七磅先啦。只不過要減,好難,因為前後上下左右度度人人都係野食。從前得閒無事時,都會走去其他同事度摷摷櫃桶睇睇有冇好野,而家唔使添喇,耐唔耐我個位都會神秘出現各種零食好似朱古力同餅,嫌疑係各位買野食係噉買但買到返公司驚肥唔敢食結果插贓嫁禍的女同事,都唔使我起身唔使我出聲各位同事都知道我衰自己乖乖奉獻,我的覓食境界已經達到「不屈而服」之化境了。食左幾多就我都唔敢講你聽喇,即係今日食朱古力已經等同於食飯咁多,仲有其他呢?今日lunch有卡邦尼芝士雞扒飯,
「一定要食啦!一個月先得一次!」
但同時有焗意粉食,卡邦尼與焗意粉不能兼得,無奈,轉投各位同事。
「拿今日我要食意粉分唔到俾你架!」
各位女同事今天居然咁開胃。灰。跟住會計靚女放風:
「計完今日公司飯錢,貼十蚊就可以加多個意粉!要唔要?」
便宜實貪,小便宜就更加係劉Sir所愛,旋叫啦。到一點,各位同事埋位之後,
「我都係唔多想食喎!不如我地自己分,多左果盒留俾你啦!」
噢。結果十蚊一盒意粉變左五蚊盒。又或者話無端端自己科水買多左盒意粉。晏晝食完個芝士雞扒飯加多半碗公仔麵(你試過一啖入面同時有飯同麵未?呢幾日我日日係噉食),已經飽到郁都郁唔到,今天不在狀態。訓醒之後繼續無窮雪夾糕
「幾時先食晒呀?全公司得你一個鍾意食,又霸住晒d位買唔到新雪條!」
我都想知,不過真係好多食極都食唔完。食呀食呀,四點鐘,
「咦?夠鐘下午茶喇喎!」
下午茶同午餐or晚餐,基本上冇咩分別,都係大大兜意粉。仲有兩兜意粉等緊我。四點食到四點半,都幾辛苦架,個卡邦尼芝士雞扒公仔飯漏到爆食完勁滯,唔係會計靚女強迫我食住意粉陪佢吞pop我都唔會食呀。仲有一兜,頂唔順喇放番入雪櫃先。
「而家食意粉呀!你估食藥咩每日四盒四個鐘頭食一盒咩!」


算好架喇今日放工上舖頭時冇落雨。人,當然係冇乜啦,即係同平時一樣。係有阿成上黎同大家講講,
"God save the Queen!"
有佢同大家分享,皇后碼頭示威現場,有幾多囡囡;同大家分享,電視報紙講到點激點爆都好,其實警民幾近冇乜肢體衝突,冇大家所想咁緊張刺激;同大家分享,成宅點樣空群而出去皇后碼頭指住班差佬大嗌
「你無X恥!!!!」
我身邊咁多人、識咁多人之中,阿成係最有學識最有修養最有文化果個。
「劉Sir?條傻仔淨係識打機同聽metal遮!」
同場仲有來自HMV的關淑怡compilation EP,十蚊隻。
「貴左喇!而家跌到五蚊隻咋!」
關淑怡唔會話唱歌唔好聽、d歌唔好聽卦?雖然歌電左d香港地黎講實驗左少少,佢把聲對而家d人黎講又飄渺過頭。跟住仲有沙包瘋。
「倉庫番好玩嘛?」
「冇玩啦!而家做可樂人!」

成功成為可口可樂香港辦事處每日十個鐘辦公室助理乙個,佢個「位」座落全公司最尊貴果間房,名為"Drivers' Room",即係塞滿各位司機,加埋佢一個非司機。
「原來可樂公司好多雪櫃,大雪櫃都成六個,仲未計其他暗櫃,全部裝爆晒可樂!」
「如果我去你公司開雪櫃然後大嗌『點解冇百事?』又或者拎住罐百事入你公司,會唔會俾人打死?」
「會!仲會死得好慘添!連annual diiner都規定一定要著紅色衫唔可以著藍色!」
「咁激!噉你負責做乜架?」
「負責飲可樂!每日我八點半返到公司,就係負責開雪櫃睇有邊罐可樂過期,逐個開,全部飲晒佢!」

大公司就係大公司,全公司周圍都係可樂&其他可樂公司出品汽水,你鍾意點飲就點飲想拎就拎,當然係低姿態地進行。
「公司員工有福利,每個月公司會送成底廿四罐可樂上你屋企,送到上門架!不過我冇!鬼叫我職位低微!好在放工之前我都用汽水塞到個袋爆晒先走!」
我身邊真係好多唔正常人士。又或者話群得劉Sir、上得黎TRHK,冇個正常。


大家就係打超任同唔知做乜地係TRHK浪費時間,玩到夜一夜都唔走。點解?
「要睇電視嘛。」
今晚開始明珠台做"Heroes",起初都擔心會唔會有超柒中文譯名,你知明珠台/香港d野。所以最後用番英文名反而估佢唔到。劇情講人類經過多年之後再開始進化,部份人類發現自己擁有超能力,但面對世俗反而排擠自身之超能力,另一方面有預視能力之主角之一睇到世界末日,又有神秘人跟蹤各位異能人士。非常似X-Men,不過規模上細好多隱晦好多,唔係漫畫係噉打大爆炸誇過唔誇(但X-Men仍然係美國漫畫中最有深度之一),而集中講佢地點樣面對自己突然擁有超能力同點樣運用,人性同內心戲先係重點而唔係動作特技,電視劇嘛呢套係。好唔好睇?第一集睇完我覺得我一定會追晒囉,又係因為夠寫實夠邪夠暗。所以第時大家禮拜二晚冇野做的話,不妨上黎TRHK浪費時間,逢星期二冇十一點半我都唔會閂門。



8/8/2007 WED

朝早,勤力工作。晏晝,勤力上網。夜晚,勤力食野。食個冇停口。隔左差唔多時間,又襯住劉Sir誕,今日又同舊同事走番出黎食飯。劉Sir係脫離教育界晉身商界,但同事調番轉,讀完MBA之後離開商界去教書,
「因為商界而家唔好做!而家大陸同香港競爭,生意難做,香港公司都唔留係香港啦,好似PPCW客戶服務部話搬上大陸,HSBC IT部搬到去印度,總之唔係香港!香港地好搵只得番教育同醫療兩樣必須性行業!好似我教IVE,辛苦但係最多可以近兩萬蚊,但商界會出高過12K,都唔係有幾多間肯,只得大集團有呢個價,同埋做到高層或者做到死先有!」
所以讀左咁多年書都仲要讀,去讀多年教育,繼續教書之路。
「做阿sir之前都冇諗過原來教書咁好玩!劉Sir做乜你唔教?」
「你教IVE,我教小學嘛大佬!正規學校一d都唔好教。」
「今日朝早學校派左我去金管局聽講座,我教金融經濟嘛,特登叫我黎聽。原來金管局好靚架,我去到五十六樓聽talk,到五十五樓轉電梯果野好正呀,上到五十六樓個景超靚!個個知我係阿sir不知幾尊重我,sir前sir後又有專人服侍晒!個講座係講銀紙發展、點分真假銀紙,主講係商業罪案調查科、金管局、鑑證科阿頭級人馬,同我一齊聽全部係銀行家商家大粒野,呢d場合居然有我份我覺得自己真係威!除左講點分仲有得俾你試,原來而家唔係用假銀紙,係用超級假銀紙,同真銀紙99%一樣連專家都要用顯微鏡睇先分得到。因為咁緊要,去到邊度都有電閘自動落黎反鎖晒,走果時仲要逐個搜身搜完先准走!」

真係好玩。教書的確係幾多野玩架。不過一定唔係教常規學校,先最好玩。
「係呀,好多學生妹架!仲要全部十六七歲,著衫化妝靚到你唔信架而家d靚妹!仲要聽教聽話上堂唔嘈唔惡留心聽書!不過全部都係灰始娘,一放學立即變晒飛女!」
噉淨係上堂時對住佢地就得啦!
「唔係架!落堂變飛女先精彩呀!上堂時真係乖到你話點就點聽晒你話仲主動留心聽書,但落堂立即去蒲落吧,成日去吧劈到醉晒,第二朝醒左唔知自己去邊唔知俾咩人點樣搞法,但佢地又覺得冇乜野喎,佢地心態係襯住十六七歲仲後生應該玩盡佢,所以成日俾人搞完自己都唔知咩事,社工日日接呢dcase都對到麻木喇,淨係勸佢地『下次唔好咁蠢蝕底喇!』就算數!」
時代真係唔同了,世風真係日下了,你睇劉Sir老過而家d靚妹十幾年仲係廿幾年保持單身時。此謂之代溝也。
「係架而家真係唔同晒喇,d靚妹不知幾明目張膽,當住阿sir面前同條仔係班房摷野搞野,你喝佢都唔停!」
「嘩!」
「真係日日有戲睇!以前會『搞野咪俾我見到!』而家?『係搞就搞揚咪俾阿Sir見唔到呀下!有野睇先准收手!』」
「噉咪好難教?」
「好在而家我教d班都係女學生多,女仔夠乖易教!試過有個男學生上堂串我,跟住的左去見感化官,跟住話『不尊重師長』,噉就判左入男童院十四日。」
「嘩!串串阿sir就可以掟佢入男童院兩個禮拜,你個阿sir都幾大權力喎!」
「唔關我事架!係個感化官唔妥佢遮!你日日對住幾十個呢d問題學生,本身無心向學又冇紀律,你都想快手整走佢地啦!而家教著班乖學生好彩,之前教成班冇個讀書,堂堂教到鬧交噉教管局都黎埋睇堂,撞著呢d學生你真係工都唔想返架!」

教非正統學校,真係好好玩架,尤其同學生打成一片時。所以我鍾意見唔同社會階層同工作領域人士,甚至自己去嘗試唔同工作、唔同事務,因為可以令自己見聞好多野。


東大門好食好坐冇咩唔好,就係衰在限住你食兩個鐘,個半鐘已經開始暗示你埋單趕你走,不過調番轉頭睇,九點幾食完,返到屋企仲好早有大把時間玩。暫時超任game未搵到新一隻非常想玩(重裝機兵怒爆,Wild Guns舖頭晚晚打已經打到爛了,等攻略啦),梗係繼續C&C啦,Red Alert 2盟軍已經苦戰到尾二一關了。不過玩左一粒鐘已經算Q數,因為老屈到爆,玩成個鐘只係不斷重覆全關最開頭五分鐘,因為一開波唔使半個字敵人蘇俄已經會派同時五路軍黎攻你,而果時你係接近乜野兵都未有。我已經重玩左十幾次,但十幾次都未過得到五分鐘。
「搞錯!噉點玩?」
粗係噉爆,但笨繼續俾佢搵。這就是C&C和我的孽緣。
「冇計啦,中二打到而家十幾年。」
即時戰略十幾年出到天花龍鳳,勁過C&C唔係冇好似Starcraft,不過就係鍾情C&C,除左因為係第一隊,亦同鍾意打超任多過而家d機同樣原因,
「貪佢夠簡單直接唔使煩。」



9/8/2007 THU

臨到生日又黎忙番,今日奇多野做由朝做到晚,中間只有兩三個鐘可以上網做自己野,唔開心。(...)臨放工前十分鐘老細先突然大疊野醒黎,當然唔理啦立即走人算啦!要快手上舖頭,有人「預祝」劉Sir生日嘛!
「其實係我聽晚有飯局,今晚上定黎俾定d禮物你咋!」
剛剛去完泰國渡假一星期的 漢 ,返港帶同四件泰國tee,
「見你咁metal件tee睇落又似metal,五十蚊件平平地咪執俾你囉!特登快手上黎俾左你咋,咁鬼樣衰我都唔想放係屋企!」
都唔係重要,最重要係雞,執多一盒雞上黎大家分,真知劉Sir心意。原來佢學拳學左幾年,由當年打沙包(「劉Sir拎住個枕頭or梳化褥」=「沙包」)打到而家去比賽,幾勁!唔係街邊路人甲乙互抽比賽,真係去體育館百幾幾百人坐觀眾席圍住睇,出場時全場黑晒射燈射住你行上台加送"Rocky"主題曲全場觀眾歡晒呼先開波果隻比賽,勁呢!不過一round就被KO了,因為對手係青年組業餘泰拳世界冠軍。
「好明顯你間拳館推你出去做炮灰,保留實力。」
「我d學生比賽之後仲係噉打電話俾我,問我死左未!」
(係小學生,教書開唔開心真係睇你撞著班咩學生)
因為比賽之後就上機,各位師兄弟同師傅比賽之後成個禮拜搵唔到佢,以為佢輸左比賽失唔到刺激人間蒸發。到前幾日返到香港,今日就上黎預祝劉Sir生日了。
「你幾多喇?」
「81,廿六。」
「我都廿七喇。Sam少仲勁,廿九喇。不過我地三個最癲係佢。」

唔覺唔覺。真係好快。我地都六年了。


TRHK暑期邪童大優惠

買3隻$130或以下CD共承惠$280正!
買兩隻DVD有75折!!
買兩件tee都有75折!!!

即日起至8月14星期二止!
仲有5日!


劉Sir生日會今日10/8星期五晚
駕皆旺TRHK舉行,七時恭候
「會有神秘嘉賓出現!
你又準備好禮物未?」