近排日頭份工忙，夜晚又多野搞，加上七月下半撞著好多project，拖左半個月先出到稿：
等左好耐的朋友，唔好意思，相信比你想像中短同行貨，相比劉Sir平時寫親萬幾字上落。因為場show真係冇乜好寫。不過，之前講過，show外、咪後，先多野寫，仲多過正場：
相信全香港，只得劉Sir一個會如此以學術同世界層面剖析香港metal。所以咁多人唔妥佢。因為香港metal，係唔需要「專業」的。
「無知是福。」
不過，有時唔知得個灰。睇報紙見到，
「謝安琪前晚在九龍灣國際展貿中心舉行『903 id club拉闊變奏廳』，更演繹偶像Beyond經典歌曲《海闊天空》，獻唱《我是憤怒》時，Beyond成員黃家強更突然出現．．．」
灰呀！！！點解我會唔知？？？
「前日 = 星期三，我全個禮拜唯一一晚自由夜！」
頂仲要唱BEYOND加有黃家強！！！點解我會唔知？？？？？？？？
今日無聊一早上到舖頭，除左有歡樂早場，仲因為BlackWine。自從場show過左，《影子》已經少左好多人搵，一來香港風氣係果期興乜有人講乜野就搵過左就唔會理，二來會買果班場show前後已經買齊，唔會買的話你點介紹點推薦點勸點求點誠心點真摰都只會被嗤之以鼻。不過今次唔係講BlackWine，雖都有關係。因為前排不斷聽《影子》，連帶摷番好多「典型」野出黎聽番對比，此乃職業習慣也。而今朝有個客一早打黎問買《影子》，既然果段時間我又係近旺角，十二點半見咁早上到舖頭，聽開有舖癮，今日一次過播晒全線RHAPSODY (OF FIRE)。由佢地仲叫THUNDERCROSS隻demo開始聽，中間全部大碟加EP加single掃到最新一隻碟，都係七個幾鐘嗟。
「已經out到嘔的RHAPSODY我居然俾錢買碟買齊全線仲要齊成噉demo都買埋，希望唔會成為專家笑柄。」
無論你點講（「你」＝「睇緊篇野的你」），RHAPSODY 係九十年代歐洲metal特別典型metal最偉大最重要之一已是公認事實，雖十幾年後今天已唔會得到你尊重（「你」＝「蔑視典型金屬抬舉metalcore同extreme metal人士」）。原因一早講晒。人人都知佢地玩交響power metal，而噉玩法佢地唔係第一隊（ANGRA便已早過），不過毫無疑問成型同發揚光大全靠佢地，就好比progressive metal中DREAM THEATER之地位，ANGRA玩法只係加入交響元素，重點仍然係超高技術結他、傳統power metal/speed metal組織，玩晒《魔戒》屠龍中世紀、定立symohonic epic power metal全靠RHAPSODY，到2008十一週年，唔計demo、EP同single已經有七隻大碟。最多人鬧RHAPSODY係隻隻碟都一樣，某程度上的確冇錯，但同DRAGONFORCE一樣，其實你肯留心聽、花時間聽，每隻碟都有唔同有自己style。不過，都係果條問題囉：
「而家普通一隻碟你可能聽兩三次已經『聽悶』、已經出現另一隻碟『要聽』，幾多人肯一隻碟聽咁多次呀？」
隻demo就無謂講咁多，因為仲係demo同初期所以錄音差、用鼓機、歌佬唔太得、旋律唔夠靚、solo未雕琢好，同近全部歌後來正式出碟都有，所以隻demo真係完全fans如我先有需要。第一隻碟《Legendary Tales》亦係最特別一隻，RHAPSODY招牌係交響同中世紀，但真正帶出中世紀氣氛可能只有呢隻，寫歌同編曲法都唔同之後，甚至唔全算power metal而做到種新metal出黎，不過亦只止一隻。RHAPSODY最出名作《Symphony of Enchanted Lands》，除左（終於）power metal到爆，仲加左好多弦樂同古典樂章寫法，跟住《Dawn of Victory》小提琴同結他又玩多ｄ野，不過寫歌方面除長歌佔優，其他未足。《Rain of a Thousand Flames》隊band話EP，不過七首歌玩八個幾字，點計都唔算EP卦？派台首主題曲MV比首歌吸引（加送裸女，不過，聽我講，除左裸女出場的三秒鐘，其他三分幾完全唔需要睇），其他歌先係賣點所在。好多人當RHAPSODY metal版RPG，又係喎RHAPSODY歌詞同氣氛同《勇者鬥惡龍》果ｄ一樣，而為突出戲劇性音樂特別長歌經常加入歌劇元素，歌手真係用歌劇唱腔而唔係「基佬聲」或拆聲極度順耳（這是我超喜愛RHAPSODY原因，唔知點解冇幾多band會搵呢種真正具古典味男歌手），隻碟正正多長歌同做到非常戲劇性，最後四首歌合成一個四幕劇，結幕曲《The Wizard's Last Rhymes》長之餘引用埋一個非常經典之古典樂曲（當年睇《銀河英雄傳說》經常聽到），加起黎極度史詩，為四部曲同第四幕夠值買隻碟。不過講到我覺得最好，都係第五隻《Power of the Dragonflame》。
起初話全故事係三部曲，但過左頭三隻碟先至到左一半、魔王先至成軍，正式結局要到第五隻碟，所以最邪最重亦係呢隻。隻碟2002年出，有唔少野係當年power metal中先鋒級試作：《Power of the Dragonflame》比一般power metal band恆同爛之結他聲、《When Demons Awake》的「death metal vocal」、《Lamento Eroico》玩左一幕意大利悲情歌劇，最後一首長曲《Gargoyles, Angels of Darkness》彈同編都玩左好多實驗，唔止RHAPSODY，整個power metal中《Power of the Dragonflame》都係我最鍾意之一，音樂水準同power metal方面開拓都達相當成就，可惜似乎只得我一個覺得，冇太多人對呢隻碟音樂內外給予其應得之評價、嘉許。之前四隻碟已經累積至好多人一聽到RHAPSODY個名已經神經反射講句「隻隻一樣」。客觀環境同樣不利：當時典型metal雖然仲多人聽，樂迷思維已漸被潮流侵蝕，一係nu-metal（metalcore再過多一兩年先突然狂浪捲至），一係果時仲未死晒的J-Rock（過多一兩年，J-Rock先成為被「metal友」人身攻擊之目標（「metal友」＝「有部份係本身聽J-Rock但metal開始比J-Rock潮而轉聽metal人士」）），一係由power metal「升級」至好似勁好多查實只係black/death metal聲唱的power metal之芬蘭melodic death（你唔會想像得到當年你話俾人聽「我聽CHILDREN OF BODOM」可以為你帶來多少虛榮：果時計仲榮過話「我聽X-JAPAN」、而家比仲榮過同人講你聽metalcore！），一係再進一步向入門級extreme metal進發（想比「我聽CHILDREN OF BODOM」更型？「我聽CRADLE OF FILTH」啦！）。雖然所講之新嘗試非完全第一個，如progressive (melodic) death之INTO ETERNITY第二隻碟《Dead or Dreaming》就佢地早一年出，只係當時佢地未夠出名同對當時聽眾黎講仲係太前衛先冇人理，；「extreme power metal」的DRAGONFORCE亦因機遇而兩年後先出第一隻碟（再者，佢地稱extreme power，卻到第二隻甚至第三隻先真正撈extreme power成份）；不過在「true metal」內，《Power of the Dragonflame》好多手法相當新鮮。
全個故事完成，隊band當然唔係跟住玩完，冇幾耐個故事就有續集。既然上隻碟玩技術玩重玩邪玩到盡，新故事改向更加《魔戒》更加史詩，《Symphony of Enchanted Lands II: The Dark Secret》第一次搵到完整交響樂團，仲有《魔戒》老法師做讀白，歌曲基本似《Dawn of Victory》，不過交響再大陣仗，好多band對orchestra、弦樂對結他／管樂時候，善用晒成隊交響樂團六七十人後援，只係去到第六隻碟，連碟名都一睇就覺得「又食老本」，錄音又為遷就交響樂團而高檔左，對比上隻係RHAPSODY最恆一隻，一靚聲更加覺得唔夠力。跟住俾軟件商告，隊band迫住改名RHAPSODY OF FIRE即場娘爆，《Triumph or Agony》係好多人失望一作，因為出品年已經2006，metalcore入侵令典型metal大勢久去，power metal老將都回頭玩'80 heavy metal，HAMMERFALL同RHAPSODY九十年代中一齊令power metal回魂，但前者復古後者一樣追隨，結果由symphonic power metal變成symphonic metal，就達唔到好多人期望了，畢竟《Power of the Dragonflame》實在太強，同潮流做到唔聽美式野extreme野你就冇面（非常不健康但眾人又非常受落的病態風氣），不過做得fans，玩成點照噉追，衰都睇佢衰成點。反而隔左兩年，新碟風聲似有還冇，好想聽聽佢地而家會玩ｄ乜。點都追架啦。
全日就係噉樣，RHAPSODY全線煲完，再重溫多次《Power of the Dragonflame》，再播埋謝安琪新碟《Binary》新碟先至收舖，全程未被打斷過。證明而家幾好生意。
我終於復活了。上兩星期兩三張單一齊驗貨出貨，禮拜尾過晒關出晒所有文件，亦即全部手尾掟晒俾其他部門其他同事，今朝早返到公司，好開心，一開電腦發現自己等同於放工。得閒到幾乎想打機。近幾日因為《蝙蝠俠》同戈竹尸，終於潛番入屋企自己睇見都驚的茫茫碟海搵野，結果摷番唔少正野出黎，有聽的，亦有玩的。好開心俾我執番隻死人打字出黎。近幾年最鍾意玩的一隻game，因為夠戇居，當年乜都爆晒就係差Very Hard未爆，好有興致爆埋佢，返到公司仲要今日半間公司唔返工，請假的請假、返工廠的返工廠，連老細兩個中間都有幾個鐘唔見人唔知去左邊，我已經悶到所有諗到可以做的都做晒、個blogｄbookmark都全部睇晒咁滯咁無聊（我寫好多字，不過一向我唔多鍾意睇字的，呵呵），真係好想好好想好好好好想想打死人打字呀你老味。
「唔係我公司間格係全開揚式老細一望就望到我部機，連上網都要就住就住唔太好意思擺到明，呢ｄ時候一早入番隻死人打字落公司部機先啦！」
上到舖頭旋裝怒打乜都唔理。平時舖頭頂晒龍打flash game，因為叫做間中有客，太大陣仗的game唔太方便，但而家可以成隻死人打字肆無忌憚噉打，幾得閒啦知道我每一晚。
「好有興趣執舊game返黎重溫。有冇人知邊度多舊DOS game同586年代PC game買？好多史前戰略game想煲番，如《X-Com》全線，第一集係電腦遊戲歷史最佳策略遊戲，當年打到書都唔想讀爆完再爆，美好回憶也。同《Syndicate》。似乎要搵次去黃金同灣仔走番個圈。」
「我終於有一日冇遲到喇！」
張卡保持全紅紀錄多倨月，今日居然冇紅色。應該話，直頭冇色。
「梗係啦，今朝都冇返公司！」
業內人士都知，全香港最大貿易行座落長沙灣，近期係買貨旺季，試過最勁一個禮拜三個agent突發上黎公司，早前淋邪足就係其中一單。上完工廠琴日一個電話叫「過黎我office睇貨」，琴日公司得閒到爆又冇皇管我梗係唔肯出去啦！就約左今朝十點鐘過長沙灣搵佢。真係開心。因為屋企附近有巴士直到可以訓晏少少先起身，而且見客有得特赦唔使打卡，本身今朝公司仲要開會我走埋唔使聽老細solo成個鐘邊聽邊頂住唔訓著咁辛苦，正呀我好想開番個特別鳴謝專欄多謝個客今朝咁好帶契。
起身非常緊張，一號風球喎個風仲話吹到正香港喎！落到街超勁大風，搭巴士出到長沙灣仲要落埋雨，不過個勢似乎過唔到一號，灰也。比預期中早到，可以行陣街先，對Shure換左大半年已經爆晒線，如此唔襟用設計實在太唔鍾意，而Shure代理商正正就係長沙灣，仲要巴士一落車行落一條街就到，今日諗住咁順路又有時間順便上埋去換番對，因為兩年保養期就黎玩完喇。點知出到去先發現，我個袋從來唔執咁多年乜野都裝晒入去都搵得到出黎，
「乜都有，就係耳筒張單唔見左！佢個肺！」
枉我今日可以早左近半個鐘黎到長沙灣，搞到而家要淋雨，好在搵到檔賣三文治，執左件餐蛋治做早餐，再入隔籬機舖食。間機舖幾大下，只係入到去唔覺得好大因為ｄ機都大，而家乜都要推銀仔、玩卡、跑馬、一舖三四十蚊果ｄ巨型機，真正有興趣玩的普通遊戲機接近零，大型機舖俾我感覺只有大而無當。不過抵死在唔知點解中間掛左部電視。機舖都有電視睇真係第一次見。今朝餐早餐都係靠佢。
佢約我十點，我睇電視睇到九點十一先施施然行過去，上埋樓佢都仲未返到。囡囡就大把。今日之前冇乜正式黎長沙灣行過，可能區內多寫字樓加上有大公司，就連囡囡都執到靚一靚先上街，過半數是正的，對比我大角咀，直頭係兩個世界。只係睇唔得幾耐就冇得睇了，因為個客一到，唔使半個鐘傾晒所有野，跟住再有幾檯客要見立即趕我落地鐵站返大角咀。灰在返到旺角先十一點，想行街都冇野好行，上到朗豪坊CD Warehouse都未開，信和唔使行添啦？落新之城打番舖Time Crisis同渣古又冇乜心情（好耐未出過修羅雙連擊），條街又勁大風把遮都吹到反左兩次骨，唯有死死地氣買左堆野食走番上公司做野算。好無奈添，難得今日有得自由活動，點知噉就浪費左。都好在，因為搭咁多車，今日終於有空閒時間睇埋最新一期《DMC》。
而家差唔多半年先出一期，第三期上年漫畫節，今年年頭第四期，最新第五期果然又係漫畫節先有。即係第七期可能要等大家2009年逗埋利是。頭兩期真係笑到仆街，不過第三期起，一期比一期行貨同唔好笑。作者自己可能都知，所以今期玩到Krauser二世前身Krauser一世都出埋黎。雖然寫到四五十話，都冇解釋過主角一條傻仔點解會玩死亡重金屬，可能作者專登留番，等到好似而家悶局時解圍用？有點期待，因為呢個部份好似會寫得較認真。但第六期出左先算。有排。
「套戲又點？連《20世紀少年》都出埋預告片定左十月香港上，《DMC》仲未有聲氣，睇黎收左皮。驚譯唔掂字幕？」
今日仲風平浪靜過上次反而掛足全日八號波，係咪天文台上次俾劉Sir小得咁勁，驚又俾佢小多鑊唱成世，今次立即全日唔落波贖罪？（唔係講笑，黑椒漢堡俾我鬧完冇汁之後，跟住麥記真係有幾多汁落幾多汁，辣到黐線加試過ｄ汁漏到成檯都係！）既然咁開心有日假，除左狂聽歌仲連睇幾套戲，黎緊大把野寫。今日都係寫戲，不過，係幾耐之前的：
好遺憾，今天落左波，要返工了，即使起身返工時仲係風大雨大。隔左一日，返到公司異常得閒，唔係因為冇野做，而係琴日已經做晒。冇錯琴日雖然八號波唔使返工，但人不在心要在，兩點幾老細已經打電話黎叫做野。做法？屋企部機連返去公司部機IP遙控做野。每次打風落雨，條寬頻線都會神神地唔穩定又極慢，加上遙控第二部電腦本身已經慢到死，我仲要有個超大報價表、幾十版Excel要今日起貨俾個客。如果返公司開電腦我諗一個朝早就做得晒，現在窒上加窒的情況，我用足一晝先起好晒份報價單，仲要出左之後夜晚個美國打電話黎話呢樣唔得果樣又唔滿意，本質上我夜晚十點幾仲係返緊工。
「早知係唔係都返公司做先，呃番半日假都好，反正琴日天氣又唔係咁差。」
不過，諗深一層，又好在冇咁戇居，睇睇今日有位同事俾人笑到喊就知。佢近排多街出，一早申請今個禮拜二放假，不過手頭上好多野跟緊，老細就叫佢星期三先放，丫佢又制喎仲星期二極度落力做埋禮拜三ｄ野。琴日放工大家見到三號波加天氣圖個風球吹到正香港，已經祝佢好運。結果．．．呵呵呵。佢今朝返到公司第一句係
「可唔可以當我取消左琴日請假個申請呀？」
「制的話，仲叫老細？」
我都冇幾可笑得咁大聲。更加慶幸我琴日冇咁自告奮勇返公司開電腦做份報價。唔係，今天的工作就係三陪之一的陪笑。
「這個故事教訓我們，好人是沒有好報的，懶人自有福，頹才是皇道。」
雖然琴日份報價個客極度唔滿意，不過我只係照實報唔關我事，改係工廠負責，佢地一日改唔好份野我一日都唔使做，所以大半日坐係度玩同寫野。自從謝安琪新碟《Binary》出左，日聽野聽，都好耐冇邊隻碟令我有心再動筆，metal以內以外都係。
「寫碟評？」
「唔係，好耐冇寫。我已經開始緊寫2008年回顧。」
停咁耐你知點解。市場事非音樂事。我都知而家先係八月、2008仲有四個月先完，但越來越多野要回顧，我甚至擔心緊，得番四個月，夠唔夠時間我寫咁多野。
「唯有每晚打少ｄ死人打字，由一晚爆兩局減至一晚爆一局囉，呵呵。」
不過唔打死人打字，都唔係好得去邊。因為沙包瘋今日十分熱心地，整左隻史前怒爆頭爆肚血腥行街game上黎，cult爆。又有排玩。
「寫野，都係留番2009，呵呵。」
10/8劉Sir誕hardcore大食會
（行動代號：Circle Eat）
倒數檢閱：
http://forum.lau-sir.com/viewthread.php?tid=2375&extra=page%3D1
「今日奧運開幕喎！」
「奧運又點呀？佢死佢事啦！」
輯錄於昨日早上公司高層會議對話。前者來自大陸老細。後者來自香港老細。事緣係昨天8/8係北京奧運開幕。大陸老細諗住襯此佳日放全工廠假。但香港老細唔肯。結果大家繼續167地坐係公司（唔）做野。灰到爆。會計靚女條仔間公司有得早放兩個半鐘。船務師奶個朋友直頭食完飯已經走得人。而且兩間都唔係大陸公司，係外國公司、香港公司。大陸公司者，我聽講過有大陸公司愛國到直頭今日聽日唔使返，好讓各位同事一同迎奧運。不過單論香港，綜合各位同事MSN收到的風聲，我地係少數今日冇得早放的本地公司。特別本來大陸老細係話我地可以放，不過香港老細一句，大家夢碎。全公司立即MSN拎埋怒小，連續小左幾個字。
「頂你個肺。奧運唔係話同一個夢想咩？點解人地有得放早放假，我地冇？」
我仲要今日長週。當堂冇晒心情。難得有心情，今朝返到公司勁寫野。有好多project都係開左個頭但未完，近期反正手上ｄ單走晒貨，寫番多ｄ野，有個跨媒體大project game + 戲 + 音樂 + 玩具四大crossover，玩左大半年都未完，都係時候埋埋個尾。雖然埋完，都唔知幾時出街，呵呵。就同大量碟評一樣。
全日就係寫野同打機。當然，仲要提醒大家：
「Hardcore大食會Circle Eat到喇喎！仲唔蒲頭？」
返工我其中一項工作就係reception，職責包括接線生。基於近日乜都做晒、返到公司食完早餐已經到上網等放工環節，全日最忙就係聽電話，畢竟其他同事唔似劉Sir咁頹廢，人地有野做、人地有客見、人地有單跟的，繁忙時段可以每十秒響一次電話。襯住無聊，今日研究了上面的撚囡絕技。
平時接電話都會無聊玩玩自娛，好似機座一抽掟到個聽筒鬼咁高跌落黎接番住、左手拋右手再拋番去左手xN、拉住條電話線流星鎚式飛個聽筒俾同事聽電話、等等等等老細＆同事見到小爆粗的花式二三四。同此雞尾酒式不同，玩來玩去個聽筒都係以近固定角度於空中移動，而非旋轉方式前進。而要型、要溝死女，一定要轉先顯得瀟灑。
講到轉，自己仲有招超必Matrix式接電話：公司個電話放電腦右手邊，電話響起時，快速以右手手腕旋轉拉起電話，令聽筒以水平面旋轉（即非雞尾酒底之垂直面），再高速飛向自己右邊面，大約旋轉一百八十度即上下倒轉，及聽筒將近撞到落塊面時，左手立即接子彈式一個反手捉住，全個動作唔超過一秒，同埋之後全場都會睇實你，因為左手橫於面前、右手舉於額頂之動作非常John Woo，同接實聽筒時會「澎」一聲，嚇死晒所有同事同電話入面果位。兩者相比，雞尾酒式較實用、可行同自然，危險性亦低得多，同最重要撚到囡（你唔會話囡囡見到Matrix接子彈覺得好型卦），就用左大半日練熟這雞尾酒接電話法。
看圖方法似乎好簡單，一手交一手即可，但實際使出會面對大物理限制：辦公室電話冇幾多係無線，而拋出有線聽筒時，電線對全個動作之成功率及效果具絕對影響。假如拋出角度太斜，聽筒旋轉過程可能會被電線纏住，另一隻手接到時可能聽筒電線夾埋一大舊，更有可能因距離被縮短，半途遭反彈扯後或急速下墜、改變方向。想避免咁樣衰，要留意拋聽筒角度。絕大部份辦法室環境中，聽筒放於電話機座時係向下平放，拋出時保持此方向，只要飛行距離唔係太遠，應能避免纏線發生。
至於距離方面，聽筒電線本身具彈性而回彈力較強，如超過尺半可能會有意外，令整個動作不能太過高調使出，或者可集中於在女同事座位使出；叫得做撚女絕技，冇女在場時你都唔會咁白痴自己玩俾自己睇啦，下嘩？因其炫耀性質美感最重要，要小心到手時電線纏繞聽筒又或上下倒轉，女同事面前使出而遇到此兩情況就樣衰到爆。所以建議平時先多練習。
練習方法有兩階段：初開始先單手持聽筒垂直向上拋，找尋拋擲之最佳角度、力度，由空中轉一個圈開始，慢慢提昇圈數及高度。掌握基本手感後就可以開始練雙手橫向交，同樣由近至遠摸索最大許可距離。深造者除求雙手皆可隨時施展而非限於常用手如右手，亦應鑽研降低電線擺動幅度。因物理限制，動作能夠瀟灑，都需道具方面配合方可達完美。有線電話最大問題係拋出時電線會隨之而舞龍噉舞，直接破壞全個動作美感，所以除練就兩手拋接得心應手，最好可同時控制電線穩定性。
為了各位的終生幸福，工餘時間或食飽飯又訓唔著時，不妨多加練習此雞尾酒接電話法，話唔埋有朝一日就係靠佢擲得美人歸。只不過我練成之後，發覺自己練黎都冇叉用，因為全公司最正的會計靚女，得閒無事就會走過黎撚我兩撚，都唔使我專登走埋去；除此之外，無囡可撚。再加上，雖似有型，實質奇柒。即係自己出完都覺自己笨實。你覺得ｄ女見到，會有咩反應？
「此『撚囡之法』者，都可謂『屠龍之技』的現代新釋也。」
知唔知今日係咩日子？
今日係星期二。
知唔知星期二有咩特別？
特別在以前是明珠台所謂「Serial Tuesday」。
《X-Files》係「Serial Tuesday」開山大將。接近每新一季，都係星期二晚明珠台八點半播。
當年，《X-Files》好好睇。
長沙灣市長再召喚
Hardcore大食會Circle Eat續集
trhK MK IV
Hardcore K迷大作戰
行動代號：Circle K
將於中秋節昨日13/9星期六晚十點後
駕旺角Neway City舉行！
長沙灣市政府指定贊助商
見到單名都知有幾黐線。黐線在除左勁多，仲勁多唔係metal／「唔係metal」。
最唔metal，莫過於有大量hardcore同punk野。小之前，請先明白有現在的metal皆因有hardcore punk，佢地出現跟住先有thrash同crust/grind，先至有extreme metal。list中幾個名，都係crust/hardcore/punk中必聽經典，其中AMEBIX除影響hardcore punk同crust，亦係sludge先行者之一。唔嫌老土的話 － 雖然佢地音樂而家聽番仍然唔係老土，因好多band就算點新，風格仍然係跟住佢地90%冇改變過 － 其經典同歷史價值已值得嘗試。進多一步之大量thrash同crust/grind野，因都係現時甚潮名字，相信大部份人比我更熟當中樂隊band名同音樂，就廢事獻醜了。自己鍾意除左EMPEROR加WINDIR夾埋之all-star「black punk」SCUM，係GAMA BOMB。睇到個名都知點解了。又要勁FORBIDDEN+ANTHRAX喎。
除punk/thrash系，全水貨最吸引，反而係black metal。相信除左大label幾隊，新到冇幾多隊知名度高，但音樂調番轉超強，你睇國家越睇唔出佢玩得好black metal果ｄ，反而先係玩得最好果班。相信焦點會係韓國PYHA（「十四歲black metal玩到簽label出碟」係真的話，就夠晒cult了）同馬來西亞MANTAK。PROFUGUS MORTIS雖然唔太關事，不過folk/viking metal同black近，加上ENSIFERUM、FINNTROLL等關係，就當black metal講埋。《...So It Begins》點聽都係芬蘭野，點知隊band加拿大人黎，仲要玩得比而家部份芬蘭band仲folk吹到脹晒。有埋靚女小提琴手添喎（雖然走左）。上年最大發現之一都算係佢地了，尤其我本身極愛加拿大metal。順便提提，SPIRIT OF THE FOREST雖然勁(pagan) black，都係black metal黎；TALAMYUS係加拿大維京metal添，玩到AMON AMARTH噉款，又吹脹。
death見到有BLOODBATH DVD同CARCASS（又）再版就夠晒啦。另大量technical野：HATE ETERNAL同SPAWN OF POSSESSION以外，相信CYAEGHA吸引力更大。melodic death同樣拉到technical，主角係兩隊美國band ALETHEIAN同ARSIS，ARSIS唔使講啦已經係而家美國最紅technical melodic death metal band，ALETHEIAN冇咁激咁恆但比較實驗，最重要係cover CYNIC。歐洲MEMFIS之前都入過一次，講過係瑞典MASTODON，嫌太前衛就THE FORSAKEN吧。雖然唔出名，但DARKANE以外我自己好鍾意之一隊瑞典thrash death，夠thrash夠激夠恆，最重要係而家新版送多五首歌，見到三首cover有METALLICA+SLAYER包括我最愛METALLICA歌之一《Blackened》已經即買，而且新版咁多歌送塞爆成隻碟近七十分鐘，抵玩。只係唔知點解，呢類真係玩勁玩實力之thrash death/melodic death band而家通通唔見晒。而家玩metal，唔美式真係唔可以，唔core真係咁難生存？
要feel的，gothic返左DARK SANCTUARY兩隻碟，佢地係法國darkwave，靚女聲加靚交響樂。要metal的話，CRADLE OF FILTH雖然已經冇人聽，佢地個女歌手自己隊ANGTORIA出左碟，勁多交響樂之純女聲gothic metal，近EPICA同AFTER FOREVER同TRISTANIA之類，不過冇男聲。但gothic metal一向偏少，因為而家gothic metal真係大勢已去，當年幾多人話要gothic話要女聲相信你仲記得，但除住美式壟斷，gothic metal呢種歐洲metal已經再冇幾多人特別留意，女聲都冇人搵啦而家接受，如曾紅爆的AFTER FOREVER同WITHIN TEMPTATION（相信佢地又會紅／潮番，因為就有新野出）。但最重要最吸引，其實係KILLING JOKE，能算係gothic同industrial之父、玩左廿幾三十年仲玩緊，新出boxset，同樣係想研究gothic/industrial的值得執。而講industrial，就會係BLACK COMEDY，永遠前衛的挪威友行埋整多呢隊gothic metal版SOILWORK，曾經好多人問DEATHSTAR，其實鍾意果類野，就即係會鍾意BLACK COMEDY。呢隻可能係今年我最鍾意metal碟之一。
比起gothic，doom逆轉開始慢慢抬頭，同再調轉頭走sludge同classic路線再加實驗，MOSS同LIKE A KIND OF MATADOR兩隊已經例子，同GORGOROTH變CATHEDRAL之SAHG。要「正常」一點的，除左澳洲傳奇MOURNFUL CONGREGATION全舊歌一隻孖碟包晒之精選再現（隔左兩三年了），DAYLIGHT DIES同NOVEMBRE先係大家想搵卦？但我自己仍然係鍾意DARK SUNS。係，佢地唔係doom metal。
實驗野前衛野一向多朋友鍾意。今水都有唔少。APOCRYPHAL VOICE black底唔鍾意？SUBTERRANEAN MASQUERADE囉，The End老細親自出馬，仲唔夠avantgarde？progressive rock底唔鍾意？Ihsahn新碟《angL》吧。或者HACRIDE加HERMANO。夠怪雞。HERMANO笑到你爆咀啦，當知道有乜人玩。
正正路路的，最唔正路係NEVERMORE歌手solo碟，加埋SOILWORK結他手一齊寫，相信相當摩登。同Chris Caffery結他手第一隻單飛，條友來頭係SAVATAGE同曾經香港爆紅之TRANS-SIBERIAN ORCHESTRA（現已問都冇人問）兩隊結他手，第一隻碟《Faces》就係玩呢兩隊種symphonic metal，正在雙CD單碟價，而第二隻碟係另一隻完整大碟九個字長。你話而家玩正宗metal幾賤？我自己勁鍾意HEADHUNTER同GRAND MAGUS，NIGHTMARE唔講相信你唔知呢隊band存在，可能係法國最老metal band之一，而法國係歐洲其中一個metal最難生存地區，肯堅持到而家加堅持玩正宗heavy metal，係最令人欣賞之處，況且單講音樂佢地玩得非常好。但當然，你會問，噉關你咩事？而家聽metal唔會敬老、玩metal唔興唱歌了。
另一特別，係今次多左好多本地野。BlackWine《影子》唔使講啦，係TRHK/TMHK自家出品嘛。另外DSC第一亦係唯一一隻碟《龍變》返左，只得五首歌、一首原創歌，已經係我最鍾意本地band唱片之一，除左編曲同錄音得，最重要係做聲做得好，好多香港band忽略之一環：技術得、歌得，都要音響音色調得好先能錦上添花，有時甚至比技術影響更大。另一香港東西合璧後生仔自組之SCT Records，以一個月甚至半個月出一隻碟之神速，相信會有一日堆滿TRHK其中一個角落頭。SCT Records之出現，可以成為現代香港metal發展討論專題之一。
今水帶番好多舊人出現，特別九龍城龍珠年代人士。睇睇批貨、睇睇對方，大家討論話題都係講左幾年果樣。TRHK剛開、extreme metal初正式進入香港時，十個人上黎，九個係乜都唔識問有乜好聽，舖內大家唔識都好，都可以大家傾、互相交流、一齊試，而且試完亦唔一定要係邊樣先得，今日買完隻CHILDREN OF BODOM，下次上黎可以買DARK SANCTUARY聽交響女聲，再跟住執番隻progressive rock，可以聽同接受到好多好雜。但過左幾年搬左出旺角，舊面孔唔見晒，新面孔上黎亦唔係搵同試，一開口已經要邊隊邊隻，冇的話已經可以即時閃人，而就算留低試自己唔識ｄband，試完鍾意都好多數亦唔會買，因為講到要俾錢，都係買新野同出名野好，唔出名唔識果ｄ就算已經放正面前等緊你、自己聽過亦鍾意，始終唔係出名band唔值得俾錢，要買，除非有朝一日佢地出到名啦。這是香港特色underground。
唔好意思真係好鬼死懶，咁多日吉左。遇著生日，近來多偈傾多應酬嘛，試過一日內三四個舊朋友先後出現，今個禮拜撞番久未見面人士多過成年夾埋，飲茶食飯原來可以咁支力。加上終於有貨到，近幾日忙執貨入機，冇計啦，今年自己label咁多band出碟，而出錢唔係使得少錢（雖然，呢ｄ錢使左，香港人係絕對唔會留意或欣賞；這是香港特色underground），所以見上一批貨已經係兩個半月前端午節，之後連幫幾隊band出碟，出碟要使錢仲要做好多文書同公關野，到而家BlackWine都叫小功告成，就可以專心繼續入碟。好耐未試過一水入咁多貨咁多箱。執貨都執左我成日－ 講緊係十二點幾一點已經落到舖頭執果隻。 而且，未完架。同埋，怒打機。
這就是當年最愛煲PC game之一、《X-Files》都提過之史上最佳策略遊戲X-Com。上面係片頭。唔好話好白痴好差，以當年1993電腦科技同水準計，無論畫功分鏡音響意境，甚至當年仲未盛行之CG（架X-Com戰機同飛碟），條片係破天荒傑作，隻game得兩三隻3.5寸磁碟咁多，裝完夾埋先10MB咁大，個片頭file仲要只係佔當中四分一咋大佬，而且而家仲邊度有人咁好心機畫動畫噉同你畫條2D片出黎？以前細個睇片頭已經睇到似睇卡通咁開心。玩就正正似片頭，外星人侵略地球，靠你指揮特種部隊攻擊飛碟打走外星人保障市民生命。隻game分兩個部份：一個係地球儀策略模式，要選擇地方建立基地、委派戰機擊落UFO，再派部隊到現場清理、收集殘骸物資進行研究，一切經營資金除左售賣外星科技，仲要靠各國政府資金贊助，而佢地每個月會俾幾多你、肯加多會減少定直頭唔俾取決於你每月表現。
除左擊落UFO後到現場，有時大城市亦會被異形攻擊，又或你攻打外星人基地甚至調番轉佢打你基地，到時就會進入戰鬥畫面，特別在玩半實時回合制，每個角色有自己時間單位，所有動作各消耗不同數量，全員調配自由度極大，亦因此自己回合時可能會遭到外星人反擊。而最正係地圖視角感好重，如果敵人唔出現隊員視線範圍發現唔到，成日俾人暗處同背後伏擊，所以全隊人唔係各有各打而要互相掩護同配備唔同武器，戰略感比一般眼觀四面耳聽八方日式戰略game重得多，攻打飛碟同外星基地時亦夠晒陰森。全隻game就係跟住打外星人＞執外星科技同捉外星人研究＞更勁外星人出現＞再執新科技同捉更多外星人＞最後殺到去火星基地，雖然過左頭半開發到最強裝備之後根本係老屈番外星人轉頭，後半為等目標科技同外星人出現黎研究爆機，令後來有點拖，但整體隻game無敵就是無敵，勁在個feel真係好鬼gothic。事隔十幾年再摷黎玩，仲係玩得咁開心回味無窮。每次玩隻game，都一定會睇晒個片頭，亦因個片頭同遊戲系統咁先進，而家玩番都唔覺得隻game老土過時。睇睇DOS版幾年後出的PS1版片頭：
同DOS版有幾大分別，加多格數更順，同段音樂真係玩到metal噉款十足當年G.I. Joe之類卡通片片頭？（所以我鍾意美國game同美國動漫！就連8-bit MIDI都metal過人！）（但有趣地，當年家用機尺度令死亡場面淡化，反觀PC game果時自由得多）game中畫面都冇乜大改動因為冇必要，但PS加多左好多動畫，好似外星人成功侵略地球之game over片段：
難得係CG動畫，因為好多新加動畫仲用片頭式手繪，就係鍾意呢份懷舊風味，不過段game over當年多邊形數咁少砌出黎可以簡約得咁靚，又可見開發組功力。可惜係Playstation。如果電腦玩到幾好。不過單DOS版都有排我煲。而玩完X-Com，仲有另一隻更勁，就係Syndicate，講近未來高科技黑幫為統治地球大打出手，大屠殺之餘又有得玩間諜玩特務玩暗殺，同樣係策略加小組戰略結合，但各方面比X-Com完美多幾倍。單打番十幾年前ｄ舊game，都有排煲。搞到我C&C3買左咁耐連加強版都出埋，仲未爆。
「唉。仲有好多野未寫。生日玩到癲晒都未寫添！」
「暑假最後一個星期四五，
市長與您，相聚於TRHK。」
為哀悼2008暑假即將結束，八月最後一個星期四五、28/8及29/8，長沙灣市長將微服出巡，跨區到旺角體恤民情，同最重要的老屈各位街坊買BlackWine新碟。欲一睹市長風采／柒碌，28/8星期四及29/8星期五，一連兩天下晝兩點起，記得上旺角皆旺108 TRHK！
「28/8及29/8兩天TRHK將提早於4:00pm開始營業！」
長沙灣市政府康體發展局發出之最新2008年夏天長沙灣市市民文娛康樂活動指引：
Hardcore大食會Circle Eat續集
trhK MK IV
Hardcore K迷大作戰
行動代號：Circle K
將於中秋節昨日13/9星期六晚十點後
駕旺角Neway City舉行！
長沙灣市政府指定贊助商
「又打風喇！」
證明地球真係就黎玩完了。以前一年先打一兩次風，今年年初已經開始有風球（記得好似話今年破左最早掛風球紀錄？），跟住平均每個月總有最少一單黑雨或八號風球，即係差唔多個個月都多一日假放，當然唔係次次咁好彩啦，有放得好，亦有小老母。今日？一半一半啦。
一如以往，當前幾日已經傳出打風消息，仲要講到今次個風吹到應一應，幾日黎全公司所有人第一件事，就係頻頻上網睇實風球動向，仲緊張過睇奧運。我份人就比較有遠見，一早走左過公司隔籬個汽水倉掃貨。前排大熱係雀巢咖啡，一底廿四罐計番$3.75一罐，不過飲左咁多想轉轉口味，維他朱古力奶返左貨，七十五蚊廿四包即係$3.125，朱奶是我中學時的最愛，當年維他奶先兩個半至三蚊一包但朱奶係要貴最少五毫子，而家萬物皆貴更加唔使講冇四五蚊唔使飲，難得而家搵得番十幾年前個價仲更平，旋怒掃，公司飲之餘，最重要係積定糧第二日打風屋企都有得飲嘛！
「當年全靠朱奶，先至有《丁舉人》的出現，而家仲好懷念以前一到小息lunch大家衝落 f tuck shop溫一包朱奶、一包聰明豆。」
琴日晏晝吹到好恆，話傍晚三號、凌晨八號、中午九號、過多陣十號，點知琴晚放工仲風平浪靜加大大個太陽曬住，到夜晚先三號，個款亦點睇都唔似有機會八號喎？跟住天文台話可能第二日下午至晚上先八至九號，跟住個風夜晚就散，喂灰到爆喎唔係連半日都唔俾我放，仲要夜晚先大風又唔捱到禮拜六朝早送多個短週俾我卦？又七點幾就起身，偉大的18503，繼分幾鐘電訊盈科垃圾資訊之後，錄音姐姐話我聽而家仲係三號風球。好傷心。攬住個枕頭喊。再訓，八點三起身窗外依然風平浪靜，睇黎都係冇行架喇，諗住起身刷牙洗面換衫返工。好在手痕打多次電話。八號。好野。好在。
「住得遠七點幾出門口ｄ同事唔知而家點？出左門口甚至返到公司先知八號咪灰爆？」
就可以繼續訓了，不過都唔係開心得好耐，因為大陸冇打風工廠要返工，訓多陣已經打電話黎問野做野嘈醒。而且琴日老細都知今日有機會黎料，全公司電腦通通唔准熄，就算打風唔返得公司，所有人等一律屋企連番公司部機照做野。更慘係雖然冇生意都叫踏入旺季，外國客開始多搞作，琴晚睇舖時已經有美國客打長途電話過黎傾左大半個鐘，有電話黎即係有野做啦，點都要開開機睇睇email。不過屋企呢邊網上行超廢，咁多年都係一到打風落雨就唔穩定或慢，加上網上遙控另一部電腦本身速度已經令你諗番起以前56K上網，負負得更負，做左一陣野頂唔順，收皮。當然，更大原因係因為
「挑！本身我今個星期六係長週，睇個勢唔似會打風打到禮拜六朝早，係唔係都要返去，咁搏做乜？」
每次打風，第一樣要先處理係食飯，度度都唔開、落雨又唔想落街，好在上年聖誕節執左勁大箱撈麵，食到而家仲有幾包剩，屋企又摷到罐鹹牛肉，今日兩餐都係靠佢！
好在有撈麵唔係都唔知食乜好，雖然琴日帶左成打朱奶返屋企，唔通飲朱奶過世咩？既然又多日假，今日無聊左好多野。破天荒再入碟海，已經好多年冇試過，你見過我屋企ｄ碟海／碟牆，就會明點解多年黎我都唔敢搵碟。無聊搵搵一ｄ好耐未聽過想重溫之舊碟，好多碟今日先知原來買左自己都唔知，甚至買左幾年仲未開（．．．）。執下執下，摷左少少就氣餒，不過都砌左棟碟地下向天發展高過膝頭哥。先至係碟海沙灘位摷到之一小部份。
「實數有幾多隻碟就無謂講喇，而家識聽音樂、愛音樂係以有幾多首／幾多激MP3作指標，所以唔講，廢事講出黎俾人笑啦。唔好笑呀，真係上forum見過有人話自己買碟，之後俾人笑『唔係卦？做乜你買碟呀？你唔識download咩？』現在已是俾錢買音樂成為笑柄，download先係『支持音樂／樂隊』的世代了。」
但令我咁有興致摷碟，皆因JUDAS PRIEST。期待己久之新碟出左了，琴晚有興買到，遇到今日放假，諗住從舊到新重溫。講heavy metal個個都講IRON MAIDEN，但英國新浪兩個大佬我偏愛JUDAS PRIEST，可能因為IRON MAIDEN「punkｄ」，而JUDAS PRIEST音樂歌詞造型台風各方面都更加接近真正heavy metal？不過我到而家仲未追晒，大大話話齋大碟都十六隻，我而家先儲齊一半左右，而新碟由06年講到今年延期左兩年先出到，仲要由heavy metal變symphonic (power) metal、玩孖碟metal opera，JUDAS PRIEST到而家玩左差唔多三十年都未試過，而班友已經唔止阿叔咁簡單，就黎變阿伯添喇。今日連聽三次。玩成點呢？
「等2009年啦。我已經著手寫緊2008年度回顧。不過，真係多到我都怕黎緊四個月唔夠時間寫晒。」
要簡單講的話，我鍾意，甚至覺得係佢地十六隻碟中最好最成功之一，贏在敢試，甚至試到你可以話佢「唔係metal」，但肯定勁多人狂鬧呢隻碟，亦因敢試，被稱為「Metal神」居然唔玩metal，仲唔死？所以我更加欣賞。唔係咁多band肯按自己志向轉型，而且轉型係為音樂而唔係為商業，就算好似佢地玩左廿幾年搵夠錢鍾意點都得之經典band，都唔係咁多夠薑拎自己前途商機較飛，就算試新野通常都係轉pop，而唔係轉indie、轉深奧。比較METALLICA同JUDAS PRIEST，你就會明點解我咁鍾意佢地。
「聽JUDAS PRIEST聽到好開心。打風打到聽朝就好。」
「請大家再次屌鳩天文台。」
琴日九號我聽JUDAS PRIEST聽到大安旨意今日唔想返工。你唔好同我講風球幾多號同個風位置、風勢幾強有關係。明顯其他客觀因素有時凌駕天氣實況。琴晚話今天清晨先會改掛八號，非常開心，點知臨訓時已經八號，今朝起身打個電話，橫風橫雨緊仲激過琴日八號風球朝早，話三號。既然不嬲起咩波同真正天氣冇直接關係，天文台你點解唔夾硬掛八號掛到十點先落？最少掛到今天清晨先改三號，等我借ｄ倚門口都唔出唔返工丫？我最憎明知有得掛波的日子仲要食風澗水返公司，尤其是禮拜六！
「天文台，屌你！」
所以擺到明唔做野。今朝，成朝執貨單：
理論上同上星期批貨同一水，不過分兩個禮拜運落黎，所以用同一張貨單update算。今水主要返番一ｄ出名band新碟，又或新band作品。最多人望實TESTAMENT新碟。同INTO ETERNITY、SCAR SYMMETRY、CRYPTOPSY。玩成點我都唔知，自己都未試，反正時間及機會大把，況且實會追，當一隊band我追開或已得到我尊重時，佢地新碟玩成點都照買，就算衰都睇你點衰、死都睇你點死，係我自己原則同個人「支持」之信念。這是《St. Anger》的道理。所以CRYPTOPSY新碟出左咁耐，我未聽過有任何一個人話好聽，就更加大興趣了，呵呵。
「brutal death唱清聲，你聽過未？」
新貨中最大興趣唔係以上任何一隻，而係Impelliteri。唔知仲有幾多人記得這位「全世界最快結他手」。你話未聽過都唔出奇，雖然（話）「最快」，但當年結他英雄當道年代唔知點解都唔多人識，因一講結他手十個有九個係YJM版G3，講快大家講Michael Angelo，都唔會提Chris Impelliteri，既以前已冇人理，而家反技術年頭益加啦。你可以話同Malmsteen一樣，ｄ歌咁多年都係果個款，尤其core年代仲heavy metal聽等死。可能因為噉，新碟玩到「American Metal vs Swedish Metal」，笑爆咀，見到個名我已經唔需要聽立即俾錢買，唔係好多老野咁夠薑的。除左佢，最感興趣，反而係BURN。已經聽到
「extreme metal公司、metalcore emo年代，仲入AOR？冇Ｘ野呀？」
This is anti-commercial.
「順便提提，而家搞CD+tee package優惠，詳見貨單啦。」
「多謝明珠台重播X-Files。」
好耐冇興致追劇集。雖然睇晒Heroes，而家播緊第二季，但頭兩集之後冇心情，就放棄了。或者呢排多野做煩左少少，唔夠心機坐定定一個鐘睇電視啦。不過一話明珠台摷番X-Files出黎重播，唔掂，即時挑番起舖癮。
擺到明係抽水架喇電視台一向，前排蝙蝠俠上立即頭四集拎出黎逐套重溫，Hellboy上第二集又即播番第一集，X-Files新電影版剛剛上，大好機會點可以錯過呀？鑑於新電影版真係有史以黎最廢（叫The Millennium File算啦），睇番明珠台從頭開始播過電視版，睇到好感動同感慨，作為fans睇完套戲實在想喊，電視這些劇情同演技才是那回事呀。明珠台選擇由第一季開始播起，係咪諗住一次過全線播晒先罷休？好在唔再係Serial Tuesday一星期播一集咁大把，而每個禮拜一至四播四集，但一季廿幾三十集，一星期四集都要兩個月先播得晒一季，假如真係咁大整蠱第一季播到最後一季先罷手，咪即係黎緊年幾兩年，個個禮拜一二三四坐定電視機前面走唔甩？
「因為X-Files夜晚九點半播，而我一定睇埋先收舖返屋企，直接導致只要明珠台播X-Files的日子，TRHK鐵定十點半先閂門。禮拜一二四夜上黎的朋友，請多謝X-Files令劉Sir等埋你地先收舖啦。」
email of the day
「記住聽日起，28/8星期四及29/8星期五一連兩日，TRHK將提早於4:00pm開始營業！每日晏晝有請guest長沙灣市長二寶樂為我地主持大局！」
「當DRAGONFORCE、OPETH、SLIPKNOT同SOULFLY新碟都到晒TRHK時，你仲有乜理由唔上黎？」
今日晏晝老細出左街，公司大半個下晝冇皇管，全公司玩到癲，成班同事鬥上網搵埋晒ｄ無聊ICQ題MSN互send笑到黐線，不過唔包括我，因為琴日突然有個客話今日晏晝上黎，好揀唔揀今日老細出街先上黎，真係頂佢個肺，仲要一開會開左三個鐘。其實本身唔使咁耐。不過今日上黎間公司有兩個人，一個遲到，先同早到果個講左一輪；講完第二個先到，又要同佢由頭到尾講多次；同兩個講晒，臨走時老細剛剛返到，捉住佢兩個坐番低又講多次。即係原本一個鐘搞得掂，結果重覆多兩次先收科。搞到我蝕左個任玩的晏晝。
收工，就梗係上舖頭啦。不過今天大家終於唔使等劉Sir開舖喇。
今期流行，係SLIPKNOT新碟。聽到我想笑。笑唔係唔係唔好聽，係SLIPKNOT出番黎仲可以咁SLIPKNOT，又可以咁唔SLIPKNOT，有點無所適從，畢竟上隻都成四年前，之後SLIPKNOT已經講到明起碼2008先出新碟，而一年間整個音樂市場已經可以改變到難以置信，睇LINKIN PARK唔夠兩年天堂跌落地獄就知。雖然第一隻碟（九人，唔係六人）仍然係nu-metal中最無敵（老實講，唔止nu-metal啦？甚至比初代至現在metalcore、deathcore更爆更恆？），但04隻碟已經玩到SLAYER噉款，會唔會成為下一個LINKIN PARK？當然做得當年nu-metal最強就唔會冇貨，最少唱同打仍然SLIPKNOT，但新碟我諗仲要聽多好耐先敢講好唔好聽、失望定驚喜。
當然唔少得SOULFLY。我冇特別追開，但中間果ｄ覺得麻麻，上隻碟《Dark Age》玩thrash少少有驚喜，畢竟佢地ｄ歌唔計巴西底一係太hardcore一係太nu，始終現代回顧簡單過頭。但巴西metal就係勁在冇人做到：一係超恆。一係超民族。總之世界上第二度搵唔到。所以歌未夠唔緊要，新碟送果隻DVD成場live先係重點。現在價錢，當買隻DVD都值晒。
「reggae metal，聽過未？」
SLIPKNOT, SOULFLY, DRAGONFORCE, OPETH新碟已到TRHK！