段記





29/9/2008 MON

Deus Ex Haggard

Project: Batman



5/10/2008 SUN

「劉Sir你去左邊?好耐冇新野睇喎!」

冇計啦,國慶嘛!工廠十月一開始連放五日假,我咁愛國,梗係追隨祖國政策一齊玩啦!反正工廠唔開工,d客預大陸放假香港都唔開工,返到公司究極冇野做,個人都頹鬼晒,就同工廠一齊放假五日唔做野嘆嘆抖抖先。不過其實做左唔少野架。個網冇野睇嗟,其實寫左好多野,不過出街就等等啦。

「單係今單所謂『撞騷』者,都大把野講啦,劉Sir講野咁直份人咁乞人憎,呵呵∼」

仲因今個九月尾十月頭好多野玩。禮拜二晚收舖大家拉隊過荃灣連夾三個幾鐘band,非常開心,因為大家都有共通目的。

「讓我們大家一起唱更加多的卡拉OK,已經選好參賽歌曲喇!各位妹妹,2009動漫節見!」

就連十一全場靜晒都多野玩。

「市長,我已探望到妃子的名字了!今日都可算咁多年黎最多野玩一日!」


唔係未試過咁多「假期」,只係今個禮拜係近幾年冇幾多次真正感受到自己似享受假期。太多過癮野發生。好似張大導又再蒲頭,除左掃碟仲有新野玩。當年六翼天使搵劉Sir上亞視搞左個《慧珊Metal時尚坊》,然後KING'S-EVIL果場又走左去蒲窩拍仲播埋電視,嘈過頭就俾阿頭嘈番轉頭了,《Metal時尚坊》打回原形成《慧珊時尚坊》再由十點幾做彈後成個鐘先出得街(對唔住!係我!),就知道在香港metal唔應該上電視。不過佢唔識死,又黎。

「我而家搞文化節目,十月中出街,黎緊諗住講metal!」
「仲黎?你老細仲忍到你咩?」
「我係導演而家,我話metal係文化就係!」
「都好玩喎!你諗住點玩先?」
「咪好似之前噉,我地上黎問你乜野係metal囉!叫個亞姐上黎訪問你好唔好?」
「梗係好啦!邊個亞姐先?」
「今年未選,梗係搵番上年07年冠軍張家瑩啦!」
「...叫04年冠軍呂晶晶得唔得呀?」
「我幫你爭取下啦!我自己都好鍾意佢架!」

*******中間三分鐘內容不便出街*******

「如果今次真係出到街,你班阿頭肯批你又講metal,呂晶晶都應承埋訪問我,你先再搵我啦!話時話,個節目邊日幾點出街先?」
「禮拜日朝早八點半。」

「頂你個肺!呢個鐘數我都未起身!點做?」


同始終場show臨近多野搞,加上假期執執倉摷到d舊野出黎補補,拿,劉Sir唔係得個懶字,有做野架!

Nation Beyond:慶國慶新貨



6/10/2008 MON

國慶前夕最hit話題係海高斯,仲hit過三聚氰胺。初時話個風禮拜日打到黎,跟住減速天文台路徑圖直頭禮拜一朝早同香港重疊咁激,因為禮拜二紅日,大家熱切期待禮拜一八號,就可以連放三日甚至四日假。點知風大喇雨大喇,禮拜六晚一號波都冇埋。噉有乜意思?

「今朝返到公司見到老細笑口噬噬個樣,就想打柒佢。」

冇假放或者唔係壞事,禮拜三一連兩檯客,今日如果唔返工準備一下,禮拜三返到黎可能仲大鑊。搞左成日返到舖頭,節目係睇電視。《X-Files》套戲簡直倒米,我到而家仲對佢感到非常婉惜,好在上畫冇耐明珠台立即摷番第一季出黎重播,唔覺唔覺今日已經大結局。第一季劇本演出特技未叫做好勁,尤其所謂特技同外星人/怪物化妝簡直笑到你反肚仲灰過特攝片,但同最新一集電影版比起黎,要怒炒已經綽綽有餘。第一季噉就完左,第二季幾時開始?最怕因為套戲落左熱潮已過,明珠台索性斷尾第二季都廢事播咋大佬。我仲等緊佢重播第一集電影架。真係好睇。

完左《X-Files》,又有新野追:《Terminator: The Sarah Connor Chronicles》。呢幾個月冇乜心情追電視,《Heroes》第一季睇左,一兩個月前第二季睇左頭三集就放棄,懶了,早排《Bones》勁好睇仲要禮拜三晚播睇左大半加等緊新一季,近來《Dirty Sexy Money》撞到睇兩睇,導演編劇都得喎呢套追得過,但時間難就加上懶就算啦。不過呢套撻到未來戰士出黎,雖然冇乜期望,都抽空追追先。當戲名都話你知主角係Connor老母、當未來戰士州長由變左個囡囡,你就知道...嗯。不過今晚冇得睇了,因為收舖前意想不到的肥仔瘦仔出現。

「...有冇半年未見過你地?」

跟住走左去食麻辣米線走辣,同朱古力新地走朱古力...好耐未見過。唔止肥瘦仔。係好多九龍城龍珠人士都不復見。見證住整個metal scene的起落 - 尤其後者 - 矣。



10/10/2008 FRI

又靜左一排。冇計,實在超勁忙,每一年最忙就係十月,先有無數客人要見,今個禮拜已經日均一檯,前日仲要早一晚一咁激,琴晚放左工夜晚都要飛出酒店同個客講一輪。加上下星期起連踩兩個展覽,十一月中之前唔會有咩得閒時間。當然,仲有正經野要搞啦:


Tomahawk Metal Fest
到!
記得11/10星期六TRHK搞show唔開!


「呀!仲有!TRIVIUM新碟《Shogun》CD+DVD特別版到左喇!CD送多三首歌,DVD包製作特輯及結他教材,定價$115!」

「未完!謝安琪今個禮拜日兩點半到三點去朗豪坊CD Warehouse開簽名會喎!」


即係,可能又有番個幾幾個星期冇新野睇。唔緊要。睇睇戲頂住先:

Project: 20th Century Boys



13/10/2008 MON

第一屆Tomahawk Metal Fest,圓滿結束。玩埋星期日,一切回復正常,照舊日頭返工,照舊夜晚開舖,照舊冇生意,照舊「冇metal野買」。都慣了。不過今次演唱會不論成敗得失,最重要係大家玩得開心,因為場地加入場觀眾,今次係TRHK搞過最high之一場,比兩年前METHOD六陸6再癲多幾倍,甚至跟住隊band玩足廿四小時。當睇見表演時歌佬同鼓佬台風,加琴日班友可以上到酒店三條友除晒衫共浴加狂影閃卡(黐撚線),落街撞到唔知乜事差佬封街成隊藍帽子拎晒霰彈槍包圍左棟大廈,可以衝埋去睇差佬趕扮唔識聽中文繼續睇(哈哈),點解可以玩足廿四小時唔使我講啦。搞indie show好辛苦、要使好多錢、同冇人支持。不過絕對開心、絕對夠high。


「我知好多人想我寫寫今次『撞show』事件。寫就一定會寫。不過未係時候。」

「如果要寫,我會寫到好透徹,而且一寫就寫足晒全盤來龍去脈,而且唔係只講一晚,而係呢一晚於整個香港metal史之象徵、意義。」

「當然,寫之身份,唔會係TRHK,而會係『香港資深重金屬樂迷』劉Sir。因為半個身站在TRHK以內、半個身站在TRHK以外,全香港唯一同時屬於業內及業餘的特殊身份,今場show我係全香港完全知道全個故事唯一一人。」

「亦因為知道咁多,同時令我更加想,同更加唔想寫。就如所謂『撞show』事件的源頭...雖然一向TRHK所有演唱會,成事前我一概冇任何決策權,我只負責成事後執行,但全個洽談過程我都會知道。而當我知道今場演唱會事前係點,再聽到來風之所謂『撞show』事件原因...我好想笑。苦果隻。甚至笑到想喊。慘情果隻。唔係為TRHK。係為香港metal。」

「2008年10月11日,令我明白到自己好多野做錯左。唔係話搞今場show係做錯左、係對唔住人。而係話在香港有時唔做好人好過做。香港metal界並不需要好人。人善被人欺。」


「一切係出自『香港資深重金屬樂迷』劉Sir,而非『TRHK個sales』。識得劉Sir、熟劉Sir,自會知佢份人係點,講得出佢就係有承擔有理據,就算你同佢當面對質,佢都可以無懼無悔義無反顧地同你議論,有理會撐盡,冇理會批判,錯左會認錯。關注左香港metal六年的我,一定要就今次所謂『撞show』發表意見,只有話經過左二十年,香港metal界仍未有多少進步過。香港metal正向一個自己曾經不屑、鄙視的方向前進。」



15/10/2008 WED

慶祝公司就黎執笠,公司兩老又飛撲返大陸,又玩足食足成日,重溫香港metal經典:


AZYLUM
1992 Live@高山劇場


Azylum 1992:
結他/主音:Soni  結他:阿中
低音:小丙  鼓:阿修



《Are We Born To Suffer?》
Source: 阿修



《Fade》
Source: 阿修



《Dreamland》
Source: 阿中



21/10/2008 TUE

「反來囉。」


收左皮非常長時間,皆因每年十月係我最忙日子,月頭勁多客見、月中返大陸擺展覽、月底再黎多個,我都係琴晚先剛剛大陸返到黎。十月中個展覽係去中山古鎮,中國人要面子所以一擺就六日長人地普通展覽一倍,老細顧番大家十月多野做同再跟住禮拜又展覽,就編到每日兩位香港同事上去都係早上晚返唔使過夜,我個時間表正到爆,禮拜日因為要見客所以必上可以順便補一日假,跟住禮拜三再上,夜晚尖沙咀落船仲可以行埋街先返屋企,非常合皮。點知老細編完之後,老闆娘睇完立即小九佢:

「搞錯呀你?你點編架?」

每日都係早上晚返,即係要公司俾多大量車錢船錢,為「避免公司不必要的資源錯配與浪費」,變成每二人一組上工廠睇兩日,搞到我要禮拜日晚上工廠過夜。已經有人性左架喇。本身我連星期六都要上上足三日。禮拜六加班開工冇得補假架大佬,過埋夜蝕到仆添啦。


「見你上年上去好好玩丫!」
「上年嘛。今年...唉!」


禮拜日晚四五點先訓,平時家常便飯,但當跟住果日要六點幾起身趕船時就大鑊了。個客約實十點開會,我九點九落船再轉車返工廠差唔多,見完佢就食飯食完再過中山,六點收檔再食飯返到工廠都八九點。點知落船第一件事,就係話個客「病左」要遲兩三個鐘先到。平時見客個客遲到必遭千刀萬剮,今日調番轉要鳴謝佢遲到,同佢傾成三個幾鐘,走左四點都黎緊,過中山要成個鐘車去到都無謂啦!即時走入房撻上床訓覺咩都唔理。五點半起身,一出門口撞到工廠老細。


「拍極門你都唔應,諗住帶你出去威架嘛!頭先我去左洗頭沐足,條囡囡幫我按摩左成個鐘,不知幾舒服!」
「頂你個肺!你唔早講?」


跟住出去會合做展覽班同事食飯,食完返到廠撻低個幾鐘再起身沖涼又撻低就第二朝。完全冇野玩。等我特登帶埋部電腦上黎工廠,諗住夜晚有野玩下做下。點知黎到工廠就係訓覺,六點幾起身七點幾上車之後又係訓番個幾鐘。本身今日有一行七人,但一到會場已經唔見左四個,得番負責今次展覽位大佬同我加另一位香港同事,因為

「我們不懂得說英文,碰到外國人都幹不了事!就讓我們去抄襲其他公司的產品設計,你們負責接待客人吧!」

跟住個個走晒去行街煲煙食野訓覺。三條友坐係度唔知做乜。上年叫做好景都已經冇乜人啦,當今年經濟再不景氣時,除左其他大陸廠商走過黎抄野,同d師奶阿叔行過問「這個賣不賣」,有幾多真係需要/值得招呼的客人?好悶,再坐落去又訓著,頂唔順,走過隔籬KFC食個早餐先。今年我地個攤位風水好正正係KFC附近,雖然唔係平三十二蚊兩件雞加個薯條加杯大汽水(大佬!上年同一個餐,只係二十四蚊咋!加價50%),但d姐姐仔真係落足料俾你,包薯條多到滿瀉我都食唔晒汽水又勁大杯,雖然貴過香港幾蚊(再兌番人民幣計,就唔止幾蚊港幣咁簡單了),食完都覺得抵番三十二蚊的。不過再望望餐牌,六十二蚊已經有一個全桶套餐,仲要係大桶過香港九十二蚊個桶餐。


「...早知叫一桶,由朝食到晚好過。」


返到檔口,終於開始有人了。兩位同事非常落力地sell客,當然唔係因為愛國愛港愛公司啦,而係有唔少係囡囡關係。今年第二次黎到中山呢頭,對於本地囡囡質素真的不敢恭維,但其他省份黎到之公司代表同買家係另一極端,樣完全見得人,就算你話唔係個個靚或者唔係處處地方人面相合你口味,都仲有頸以下搭救,借用《無間道》的比喻,就係胸夠大、腰夠細、籮夠突。難怪同事面這麼熱情款待,而且為「商務溝通較方便」拎人地QQ同MSN了。

係架而家唔搵囡囡座鎮真係唔多掂。上年黎見到有間廠搵左范冰冰做代言人,今年仲有佢份,不過遇上勁敵,有另一間廠搵左瞿穎代言,周街見到有人拎住個袋有佢個樣,基本上你唔會知果間係咩公司,因為望埋去只見到勁大個瞿潁企係度搶晒妹仔大個主人婆。靚到我都想拎番個,不過行晒全場都見唔到邊度有得拎,灰爆之際,撞到個咖啡妹妹。我檔口隔籬個展館係「金牌館」,即係所謂大廠大公司展館,裝修超靚加勁多囡囡,大會亦搵左個妹妹仔為大家沖免費咖啡,聽佢講係內蒙古人,為左由內蒙黎到中山呢個展覽做接待賺錢花左四日路程,因為睇得又玩得加上佢個位有免費咖啡任飲,長期圍住大量麻甩佬,唔止附近公司所有雄性動物,就連在場的保安都只顧走埋去同佢玩唔睇場。我當然亦成日走過去。不過原因,係全場唯一免費野飲就係佢d咖啡,連飲水機都冇部,吹脹。


「終於知點解我地公司生意咁差。人地公司可以浮誇到,請成隊旗袍女知客繞場叫人去睇佢地檔口。我地?冇生意係抵死的,老細都唔肯投資!」


行都行到悶,返到檔口,走左出去玩班友識得自動自覺,返黎時買左個飯盒我食。雖然而家乜都貴晒,大陸食飯仍然超抵,一個飯盒裝爆白飯,再一個盒裝爆送,夾埋先至八蚊。香港雙一倍價錢都唔知有冇呢度一半。雖然而家大陸食野唔知乜野入得口、食落肚安唔安全,但平夾抵食加好食,又開公數唔使自己俾錢,唔理啦食左先算啦!

「知唔知點解次次上黎工廠,點菜我一定點豆腐?因為香港豆腐永遠食唔到大陸土耕土種份地道新鮮豆味。」

同最重要:唔使又俾KFC昆嘛。全個場得KFC一間你食。當今年可以比上年加價加足50%的時候,即使份量多爆,你點都覺得係搵笨實的。食飯時各位國內工廠同事圍住,雖然香港已經「魚蛋了」,仲有一樣野令佢地覺得香港人好X勁:英文。佢地唯一能夠流利運用的英語除左廿六個英文字母,只得"Sorry I don't know English."同"Please call our Hong Kong office."一撞到鬼佬立即踢晒d波俾香港同事,自己繼續煲煙鬥地主。今天需要劉Sir,係「想替我自己/我兒子/我女孩改個英文名字」,要朝向國際嘛家陣,但佢地所認識的英文名不離最行的Michael呀John呀之類。

「你叫Mary吧!你就叫Elisabeth,夠特別!至於你...一見你個頭,就知道你叫Seven啦!」

因為語言分別,好多大陸人以為好型的名/譯名,換著香港廣東話,即時樣衰晒。好似有間公司叫咩咩咩西,而佢地稱呼自己的員工,為西人。同撞到兩條友姓漆。一個中文名叫漆超,英文名係Chiu Chut。都未夠另外條友叫漆投咁柒。


悶到出汁,睇左四百幾次錶之後,終於捱到五點半收館。今日經理有個客上黎工廠,回程就好自然搵佢兜埋我地,點知又會咁好彩佢開車黎中山時部車壞鬼左要拎去整(撞著世紀黑仔王劉Sir這些是家常便飯),一度惹來「又要工廠訓多晚」之集體性恐慌。好在臨尾趕得切整番,不過到開車時都差唔多六點。通常三點前工廠開車,都趕得切六點前返到公司,因為過左六點就要同大量貨櫃車同大陸放工返香港屋企人士爭路,而我地今晚六點走之餘,仲要係再遠離工廠多個幾鐘車程之中山,而唔係工廠起行。聽經理講佢上一次同老細上工廠,六點開車可以九點幾先返到香港,仲要係塞車塞到唔行陸路改搭船先可以咁早。各位即時為今晚及聽朝返工憂心,好在大半程路係高速公路,加上經理都知大家返香港心切(主要係佢嗟),雖然而家大陸捉超速緊左,老細都好少開快過一百一,經理有理冇理百三四照去。

「有乜所謂!今日我開老細架車上黎,俾人影相都係罰佢,唔係罰我!哈哈!」

頭半都安然無事。後半開始進入市集,就大鑊了。需知我地只係趕返香港的幾百部車之一,而時速120只係標準速度,就連巴士貨櫃車都唔止啦,睇住後面d車不斷標上前面玩頭文字D,嚇到唔敢訓覺。不過細車都唔夠大車勁。全條路開得最快係架巴士,快不特止仲要任我行,有段路明明雙程,個巴士佬可以見前面多車,就算隔籬逆線有車黎緊,照轉出去再一個超級急彎爬前面幾架車頭,當正隔籬線迎面而黎班車冇到。十車係大晒架喇,你開部私家車撞落佢巴士度,你死先定佢死先?我地跟住佢後面架車,就好似去機舖睇人打Konami出品隻Thrill Drive,一隻開住架巴士或者貨車見人/車就撞之公路賽車(動作?)game。大陸就係咩都有。好似我地隔籬係架豬車,雙層大貨車裝左幾十隻豬,難得佢地仲可以攤晒係度訓覺咁悠閒。有隻豬訓覺之餘,成隻腳突左出車外邊,大家一直跟住部豬車,就係想睇下幾時有車經過撞斷佢隻腳(真death metal)。不過追左一陣,本來側邊線架貨櫃車突然減速轉線爬頭,唔係經理立即停車而且老細架車煞車得,剛剛好臨撞貨櫃車車尾時停低,我同大家已經報紙相見,而唔係我九點幾有命返到屋企。


「大陸就係乜叉都得、乜叉都有。兩日黎,最『好玩』就係最後三個鐘之現實版賽車game。不過有d野,真係唔玩好過玩。」



24/10/2008 FRI

今個月好鬼耐先更新一次,冇計啦搵食嘛,一年入面我得三個月做野,一個係五月,必去一次美國做展覽(拉斯維加斯!),擺完展就有野跟;跟住到十月,講過啦,萬幾個客再加兩個展覽,剛剛去完中山返黎,隔幾日到今天星期五,聽日禮拜六開始下個展覽、年度壓軸之香港展準備,今日有個檯大客專登由美國飛黎,因為佢約到一間大超市個買手見面,係咁多年黎第一次,就搵左我工廠合作一齊搞,今日晏晝去酒店包左間會議室做秀。間酒店叫洲際,我非常記得,今次第二次黎,第一次就係為今日會議做準備,專登一日放工之後走過黎酒店睇定間房點佈置,睇地圖查左位置,走到出尖東去二號會議室等佢,跟住收到電話:


"Where are you? Dung jor lay sam gor gi!"
"Yi lau meeting room law!"
"Or dou hai wo! Dim guy tie lay ng dou?"
"Gum che?"


問清楚,先知道原來尖沙咀有兩間洲際,一間係我果間,另一間要去到對角太空館,搞到我要走兩三個字過去。只有話好彩兩間洲際都在尖沙咀。到上個禮拜睇報紙,見到裝修工人聯群結隊去洲際示威,話拖數三千幾萬,最後勞資雙方討論結果,係「一星期後再作決定」。好似今日就係一個禮拜喇喎。又俾我撞到衰野。應該話,次次有衰野的地方,都同我有關。


「世紀黑仔王,是我。」


個客晏晝三點黎,但晨早十點半就出車先運晒我用左半個月時間準備之十幾箱辦去酒店,一落晒野老細就開車走左,


「我仲有野做!你同阿姐兩個砌場,乜都夠啦!」


正所謂精人邊個俾錢邊個出口。好在唔算太麻煩,同阿姐兩個一個拆箱一個佈置,兩個鐘唔使搞掂,而本身工廠有兩個工程師聽日展覽砌場,今日就順便早d坐船落黎幫手,但未到酒店我同阿姐已經砌好晒咁滯,連個客都非常滿意。跟住個客話請我地食自助餐。老細隔空傳話:


"Ng sai! Or day gi gay yau fan sic!"
"Yau fan sic? Or day ton lay day sic buffet wo!"
"Or day better!"


能夠比酒店自助餐更better,尤其係傳說中全港最正之一的洲際,老細莫非帶我地過酒店食自助餐威番次?原來,已經返到公司的佢,諗住主場每人十零蚊買個叉雞飯飯盒再車過黎一齊食搞掂,「中國人食飯」嘛。我無話可說了。反正個場搞掂左,我地更改行程,老細車番兩位工程師同阿姐返公司「食飯」(這兩個字真正名乎其實),我自己駐守尖沙咀,反正散場時一點半距離開會仲有兩個幾鐘,行行街好過啦真係返去食飯咩大佬,雖則三十幾度仲要恤衫西褲地走黎走去真係好鬼辛苦,幾耐冇著過西裝呀上次著已經係五個月前喇大佬,但唔理咁多,遇上大好機會又夠近,先去食個Burger King先。雖然地方算就腳今次我只係第二次黎食,都係叫同一個包,但感覺比開左冇耐就黎試的第一次好,似乎廚師進步左,第時要幫襯多d了,皆因除左好食,仲有無敵的囡囡。旺角分店幾時開呀?到時肯定日日去食!食完再行埋幾間CD舖,除左為謝安琪演唱會DVD(不見,只有VCD,幾時出呀?),仲有Malmsteen新碟。想當年係Yngwie Malmsteen令我開始聽metal,我買第一隻metal碟就係佢,任你點講佢,我心中地位仍然神聖,而出左新碟,走左好處地方,結果都係得HMV,$165高價發售。拎起佢,俾錢,令我找回當年metal碟幾乎只得HMV有得買,仲要又少又貴到死一隻,但就係因為想聽而儲大舊錢買返黎果份開心、果份興奮。只係想聽隻碟,都要等三點幾返到酒店開埋會、再返到公司執埋手尾然後上舖頭先有得試。得唔得?


「好耐未試過有一隻碟,挑得番起初聽metal份興奮,聽完想立即衝上band房、去學結他。」



25/10/2008 SAT

對於展覽砌場,我已經經驗豐富。琴日走左去酒店幫個客搞完一場,今日一起身又走到會展。晨咁早大廈管理員打電話黎:


「喂!做乜你公司今日會冇晒人架?」


唔好意思講佢聽「老細走左佬丫嘛」,唯有呃住佢先,話今日我地全公司過晒灣仔會展砌場。香港公司仝人加上工廠工程部,總共十九條友,晨咁早灣仔集合,目標係今日六點前砌好成個場。唔係講笑,我公司每逢展覽陣容都大到你唔信,即係人地公司擺係展示自己公司一半以下產品,我地係七成或以上。而上年開始,十月個展覽我地搬到去大公司先擺之第一個廳搞,規模比以前大一倍,用十九個人去砌,完全唔係誇張,係有必要。但唔好以為黎到最大展館擺,就代表我地都係大公司。人地個攤位同我地一樣大。不過人地公司係搵承建商做,全部野唔使自己出手,最多只有老細級人馬在旁監工,而我地人數幾乎係全部公司中最多,但全部係自己人,當連平時唔多關事的會計部船務部雜務部唔止男丁連女丁都要出黎做苦力,就算十九個人一齊做,九點幾開始都搞到點幾鐘先正式砌好晒。我都唔敢同人講我地係大公司。做完之後,劉Sir反應,同會計靚女一樣:



「支力。」


砌完,就到食飯時間。既老細可以寬宏到覺得叉雞飯會好食過五星級酒店自助餐,今日收工叫大家去食大家樂完全唔驚訝。但成班同事自己走左去食傳說中之金鳳。成村人黎到,因為幫襯開的同事極力推薦金鳳奶茶同雞批,當連茶餐廳都可以門口排長龍(今個晏晝我見過可以排成十幾個人,茶餐廳咋喎唔係茶樓喎!),我地七個人要分三張檯坐,就知間野旺到離譜。叫左個餐蛋麵,加多個菠蘿油,飲埋凍奶茶食埋雞批,最後兩樣果真名不虛傳,但真正整得好亦只限呢兩樣。食完剛剛遇到新一底雞批出爐,同事誓神劈願我唔食多個會後悔,試真,頂頭先個凍左已經覺得正,新出爐熱辣辣簡直好食到恐怖。仲有小二為你表演拋批絕技。所以今餐雖然食左差唔多五十蚊(好在可以開公數claim番一半),一餐三十已經到頂的我好少可食飯食得咁奢侈,但真係好食加上有幾可再黎呢頭幫襯?豪盡佢又點話。


食埋飯三點幾,本身想直上舖頭但散晒,都係返屋企沖番個涼換埋衫先出旺角。今日冇TRHK只有TRJ,先過隔籬舖問肥仔拎隻Avex Trax周年大典睇盡最紅J-Pop巨星,再有七刀同學的Sugizo@THE FLARE。冇錯今天一點都唔metal。因為受到近幾日一位上黎TRHK找visual的客人啟發。單今個十月,已經令我明白到,香港真係做唔起metal。



26/10/2008 SUN

展覽當前,今日專登返公司做陣野,大佬過左今日我幾乎搬去灣仔會展住咁滯連續四日唔返公司,近排多客見同多貨出好多野跟緊,一野走左去咁多日絕對大鑊,一定要今日返一返公司清一清先。


「當然,順便呃多半日補假,先至係重點/返來的原因。」


返到公司第一件事,梗係叫番個早餐先啦,食完話咁快就做晒野。誰不知,今日美國律師朝早落機,住公司隔兩條街間酒店,但要兩點先有房拎,就上黎公司消磨時間,本身冇野做的我就變成是日接待員。好在老細十二點幾返到黎同佢食飯,唔使我陪佢成日,唔係就接受唔到訪問。


「呂晶晶?」


未到。張導演仲同班老頂傾緊個文化節目可唔可以用metal做主題,始終亞視係保守台,雖已肯冒險過無線。今日有我地R先生為自己寫作而邀訪劉Sir。問乜?梗係問metal啦,由起源到現在到展望加上文化精神,中途仲有亂入阿叔同大家講講點解「而家歐洲回到中世紀」,進而討論帝制政治對宗教政治。幾時出街?就要睇睇R先生心情了。


「今日兩條友噉樣傾一傾,就冇左兩個幾鐘。唔出奇,試過有外國客上黎傾metal,一傾就五個幾鐘,幾乎開舖傾到收舖。」


或者最唔出奇果樣,係可以兩個幾鐘全程,幾近全無被打斷過。



27/10/2008 MON

年度香港大展覽加今年我有份之最後一個展覽,今天駕灣仔會展開始了。當全球經濟可以一年內由史上高峰急速崩潰至有史以來低潮,加上中國內地連串德政,外國人唔買野,中國製造業可以百份之幾十地萎縮,呢個展覽仲搞黎做乜?


大家仲會出現,只因仍是好景的年頭已經遞晒表俾晒錢冇得唔黎,當然當初俾左錢的唔一定代表而家仲黎得到啦。所以展覽規模大縮水,就連場地製作都縮埋皮,以前一入到會場豪華排場勁有體面,今年連地氈都唔舖,就知道蕭條成點了。叫做仲好過上星期中山個德福花園囉。但灰到連公司都響應主辦單位的節流精神,攤位檯凳要俾錢,老細英明,只俾錢租檯唔租凳,再自己公司帶摺凳過去,全場得我地個攤位擺到似打麻雀噉款型到爆。經濟唔好,對大家真係好大影響架。我自然首當其衝啦。以前擺展覽行展覽最開心,就係一路行一路偷人地d野,大公司有錢宣傳,大量袋呀筆呀紀念品擺到周圍都係,出去兜番兩三個字好似行完銅鑼灣噉走番公司。今年雖然有點預左,冇諗過真係可以一個袋一支筆都冇得拎咁折墮嘛!以往每半年一個展覽,夠拎我跟住六個月所有所需物資架!食完飯已接近冇晒人,以前展覽最後一日都冇咁淡,再對比上年第一日多人到入都入唔到、一個人對兩個客都招呼唔切,今年第一日真正傾過偈之客人比上年少成倍,恆指今日可以跌到萬一,一個禮拜跌三分一咁滯,唔係數字跳跳咁簡單的,而全部客特別美國客一致睇淡前景,今舖都係陷家魚蛋一鑊熟架喇各位。自求多福啦。


「相信而家除左殯儀業,全世界冇邊個行業撈得起唔使死。」



28/10/2008 TUE

黎到展覽第二日,客人數目同琴日差唔多,不過反而辛苦過琴日,除左第一日一定全公司總動員,今日起每日只得一半四個人睇場少左人手,d客唔知點解係咁賤格,一係唔黎,一係幾班客夾埋十幾人噉出現,搞到次次都好鬼踢腳。但計番空閒的時間都比以前展覽多。搞到次次展覽會之後都肥幾磅。冇計,黎到灣仔會展擺,朝早必定順路買個麥記早餐,坐低冇野做就會拎檯面d糖同朱古力勁食,係本身係俾客食,但當客人都唔多個時,我唔食左佢咪好暴殄天物?犯賤架!為表尊敬,特登將最矜貴的三角朱古力收埋唔擺出黎,全數留俾自己食。除左食就係成班同事無聊玩同吹水。悶的時候,真係可以好悶架。所以掌握時間出街玩,雖然會展d飯一向唔多好食,琴日都行唔出街咁浪費時間會場飯盒搞掂(好在我把口夠雜個個話唔好食我都受到),今日晏晝都係老細晏晝過黎接更時公司帶埋黎搞掂,就係為左三個字清完飯盒仲有個幾鐘出去走黎走去把握時間。因為俾我發現到好多正野。雖然今年因為經濟蕭條令展覽排場大倒退,發現到原來今年都有免費禮物換,不過可能開源節流整少左同唔敢亂派,同上年我地實在拎得太誇張了(下回分解),(向會場各位妹妹仔)明查暗訪之後先俾我知道。


免費禮物有兩種,一種係隨街姐姐仔拎單張,收到到會展圖書館就可以憑單換精美全透明膠紙座一個,睇落真係好靚,不過膠紙座呢家野屋企有幾可用得著?同全透明咁靚,真係用唔夠兩個月肯定花晒污糟晒,用之無肉呀。另一種就係大家最愛的吸印仔:會展五個地方擺攤位俾你吸印仔,當然係全部大對角大死位有幾遠隔幾遠啦引你行晒全間會展嘛,但相信除左真係有心換禮物的無聊人如我們,冇幾多真係會為換禮物而行晒 - 有冇禮物,都冇幾多人行得晒全個館啦,咁支力又咁淡市。吸晒印之後再落到會展停車場,憑一個買家證就可以抽獎,拎五款禮物其中一款。有個係印度全手製紙燈罩同測電流通電器完全唔吸引,次獎送慳電膽都唔錯,但頭獎先吸引:瑞士軍刀同不鏽鋼超光電筒!即時成為全會展最踴躍果位買家。


「喂!你唔係擺展覽咩?做乜你會係買家?」


可能因為睇完《蝙蝠俠》,今次展覽我都做左雙面人,對住客時擺展商證,去人地檔口就出示買家證,以便縱橫天下 - 噉當然,更重要原因係因為買家先有得換禮物啦,仲唔一早寄定信換定咩。而且今年做買家寧舍高人一等,以前幾萬人入場你死你事啦少你一個唔少,今年係灰到要主辦單位係噉打電話去催d人黎睇展覽咁靜,以買家身份行走江湖立即馨香得多,連會場d囡囡主動走過黎搵你俾野你。假使掛住個展商證?繼續魚蛋啦你。


實在太悶,加上今日睇場是一班麻甩佬,講下講下,又係去到囡囡。次次展覽完左返到黎,同大家講果一句都係:


「去一次展覽見識一下,就知道港女真係...」


唔計鬼妹的話,單講亞洲樣,大陸台灣都夠殺啦,數埋日本同(特別)韓國,更加收晒了。琴日撞到有三個泰國靚妹入黎,真是靚果隻,雖然美國以外我一向跟開亞洲山卡啦地區,不過怕班小妹妹原來係人妖,都係交俾其他同事跟算。另琴日同今日分別有兩個韓國妹黎左,昨日那個是美人(但美得黎是真是假就冇人知了),今日係個好古典的靚妹,樣正但國語仲正過晒我地班港燦溝通完全冇問題,黎到玩左三個字先走,佢又肯同我地成班白痴仔玩先開心喎。我五月去拉斯維加斯之前公司去左韓國擺展覽,在場的同事甲有幸去左,返黎報告話韓國囡囡真係激爆地正,而且正的唔止係外型仲有性格,佢去到果邊都唔使自己出聲,附近韓國攤位d人見到你中國人黎左,已經會自己走埋黎撩你玩撩你傾偈,就連同佢影相都會主動叫你搭佢膊頭。所以今日個韓國妹妹可以三唔識七都同我地玩到咁耐。而韓國更得人鍾意係整體水平:大家心目中的日本不離日劇、電影、AV,見得到的日本妹十個有九個得,但真正去到日本先會知道質素參差得相當懸殊,韓國呢方面就比較平均,就算只係普通行街都會見到唔少標緻面孔而無太多不堪入目,更接近大家在劇集同電影中所得到的國家形象。


「講到咁正,點解唔影相返黎俾大家兄弟?」
「我用手機影左好多架!點知臨飛返黎香港果日,跌左部手機喎!」
「唔理!照打!」


跟住同事乙又講講佢早前同老細去匈牙利,話說公司個攤位附近起左個台做內衣展,砌場果陣隔籬就係model綵排,雖然綵排未真係著內衣都著到好性感,可以一件tee入面乜都冇就行出黎。


「佢地係正我隔籬行show,個場鬼死咁迫避唔到,班model又要高喎,佢行埋黎我直望就係佢心口!真係得件tee咋大佬真空架入面!」


都仲未講今日晏晝黎我地度傾生意個台妹。立即唱番首《我愛台妹》先。係架真係好灰架香港的現實。再加上今舖主辦單位都唔落本了。以往展覽一開就成棟會展開晒都唔夠位,你去到門口已經成班女企晒係度舉牌等你,包括俾錢請的model同(明顯地揀過蟀的)會場工作人員,一路行直頭一字長蛇囡囡陣迎接你,唔識路跟住囡囡走實冇死(講到成間夜總會噉),再逢電梯口同大門口實有個model棟係度舉牌歡迎,唔少大公司亦必請囡囡坐鎮,派野、企係度俾你睇引你埋去。今年...算啦。長蛇陣不再,質素亦退步了。至於各大公司,既今年連小禮物都唔整,禮品姐姐又點會有用?可想而知,經濟蕭條,對大家影響幾大。(...)


但,又唔係咁一無是處。全場真正得的港女 - 呢度應該稱呼為「香港女仔」方夠政治正確 - 仲有一個:有間公司年年都擺到超大,亦必請兩個囡囡著超純情低胸白色衫派袋同行必引大家幫襯,年年都見到佢地,其中一個好似次次展覽必有佢份,可能因為佢真係model格,有樣有身形又高,全場唔計外地囡囡最得就係佢。當琴日會展只開一半,件低胸衫入面仲有一件,今日全部展館開晒,大deep-v入面立即冇加野了,真搏命。難怪我d同事成日走去佢個攤位。


「與其閒著閒著,不如出去目及女拎禮物充實自己生活!」



...不過,全日最正果樣,反而唔係女,係仔:


「原來德國power metal樂隊METALIUM個bass手兼producer Lars Ratz,同我係行家黎!」



29/10/2008 WED

黎到展覽第三日亦係尾二一日,出現的客人唔係多(不過可以仲忙過琴日,因為人手調配再減少,客少左反而仲忙左,多謝老細),加上好多舊客都約今日過黎見面開會,朝早相當地忙,但無阻我們的換禮物計劃。換禮物之前,要先講番上年我地同貿發局的恩怨、我地一班傻仔玩殘貿發局單野。話說上年拎傳單再加一張買家證,就可以去攤位換一隻超精緻陶瓷杯,我地知道梗係立即瘋狂影印張傳單拎禮物啦。第一日因為會場大部份工作人員係兼職未熟規則,加上冇預過有人似我地可以為禮物如此瘋狂,派出女同事去嗲幾嗲睇檔條友,就用一張展商證換到成箱杯返黎了。相信果條友即日俾人炒左。第二日換禮物攤位即時多左個經理or主任樣人馬全日駐守,亦冇得再用展商證混水摸魚,唔緊要我地即刻幫自己整個買家證,又勝一仗,到晏晝班阿頭見勢色唔對,再改規則:一張買家證只可以換一隻杯。第三日一返到去先拎偷自其他公司的卡片,即場整左十幾廿個買家證,一樣有得換你吹咩!實在頂我地唔順,主辦單位再次還擊了,就係只有開展前申請之買家證先用得,開展後即場新整唔計。玩到呢個地步真係笑爆咀,不過我地仲未放棄,既黎到最後一日,就四圍乞客人d買家證返黎,唔止熟客生客都唔放過,為求可以換多隻杯而不擇手段,換到攤位班人一見我地行埋去已經頂我地唔順。相信過左上年,我地公司已經列入會展同貿發局黑名單。亦可能玩到咁激,今年d禮物立即收到咁密唔亂咁俾我地拎了。


「上年換杯單野,仍然係令我津津樂道的光輝一頁。」


所以今日就做野了,不斷地躝街拎紙仔吸印仔,雖然換到返黎先發現,期望最高的瑞士刀手工奇差,好在不鏽鋼電筒靚同光都超乎預期補番,但實在唔易換呀今年,因為吸印仔d紙仔收得好密唔亂咁派(換著以前?派得仲踴躍過派傳單呀班姐姐仔),行晒全棟會展兩個圈先拎得十幾張返黎。但躝躝街都係好事黎的。五個吸印仔位置處於會展最僻地點,即係唔係為禮物都唔會專登走過黎果d,原意係鼓勵各位買家去淡區睇睇刺激人流,但人流只包括我地呢等無聊人。所以發現到今年會展,囡囡的整體質素比往年低,而最見得人果班已經集中晒近門口位置,然後質素隨地段人流及與入口之距離下調,編到去最遠最偏僻果d,通常都係...難怪擺咁遠了。但行晒全場,都有唔少得的,只係數目上確比以前少好多。蕭條之象也。


「當然,琴日的deep-v姐姐真係好正的,騎騎」


再加上今日藉「幫公司律師print野」而走去貿發局個攤位借電腦消磨時間,又遇到個都算全場數一數二的妹妹仔玩左半個鐘先走(大家都悶嘛大佬),今年最佳節目,反而係目及同搵企攤位做問卷派野d姐姐仔玩。都幾慘架即係生意慘淡到爆:好似食完四點下午茶後已經冇人入過我地攤位咁滯。日日有得噉玩都幾開心。但亦是灰矣。



30/10/2008 THU

唔覺唔覺,展覽已經黎到最後一日。十分唔捨得。因為超級好玩,尤其今年特別多過癮野,同一唔好彩的話,今屆可能真係今世人最後一次展覽會了,嗚嗚嗚嗚。不過連續三日冇返過公司,會場方面又得個悶字,原來四日都駐場的我,今日俾老細叫朝早返公司做野好過。一對住部電腦,幾十封email,而且得一朝睇都睇唔晒做又唔係唔做又唔係,先發現唔返好過返/早知扮傻走左去會展算唔返黎公司好過。所以食完飯訓完晏覺,立即同會計靚女飛地鐵過灣仔。我地去到時三點幾,都唔好話睇囡囡(會計靚女一心想黎睇的deep-v姐姐一早放左工/唔返工啦),四點未夠已經全場執野,去到山卡啦咁遠本身已經冇人d館更加入到去已經接近走晒咁滯,冇野玩啦黎到大家都只爭取最後個幾鐘有幾多禮物搶幾多。大家為此已經進入無法自拔的失控狀態。走過各大攤位問人地拎袋有幾多拎幾多少不免。最重要的吸印仔換禮物,班姐姐仔收埋晒d卡唔肯派,幾經辛苦先俾我琴日集齊十張,今日在場全體女同事拉隊去發姣,最後十張飛換到十六件野返黎,連會計靚女都出埋絕招跌膊再呃多隻,場內做part-time果班成日調位好少睇死一個位置,都可以因為我地多日來的肆無忌憚,就算唔係日日企同一個攤位都認得我地了。連最濕碎果d都唔放過,每行過膳食部立即包裝糖鹽有幾多拎幾多,話「拎返屋企煮送」,同會計靚女要糖黎「古法磨砂美膚」,夾埋拎足一個膠袋。本已貪心的我都冇眼睇了。到四點正式開始執野時(通常是五點的,但一向唔到最後一分鐘唔罷休的老細都帶頭四點開始,就知市道幾灰了),自然男丁出馬,女丁見唔使錢的禮物已經到手,再走晒全場其他公司度買人地唔要d野,佢地同人地嗌價理論把聲浪,隔幾個攤位都聽到。


「今年展覽,就噉結束。開心之餘,當中暗藏不少唏噓的。不過,未完,仲有...」



31/10/2008 FRI

Mattolium:
Matto Met Metalium