終於等到大年初一，劉Sir＆TRHK休市三天，初四啟市。自從舖頭換左部32" LCD大電視，而家日日係噉打DC同Wii（生意興隆呀），年三十打到點幾鐘先走玩到勁頭痛，返到屋企撻低年初一成兩點幾先起身。跟住就要出發搵食了。所以出出鱔稿頂住檔先呢三日。大家搵完食我又開番工先再寫啦。

本來仲諗住出埋文化潮流「中樂vs金屬」篇正稿，不過搞到今日條片仲未搞得掂，相信等下等下就會變成復活節鉅獻，呵呵∼

「《你給愛一個壞的名字》劉Sir 09新春賀歲開年版Official Bootleg A＆Official Bootleg B，劉Sir地盤獨家洩漏。叫做比Ｎ年前trhK收斂了。唱完我仲要返工搵食架大佬。」

本來仲有《難為正邪定分界》同《每一句說話》，不過為免引起大眾不安，都係唔出街為妙。反而太極多正歌，好聽之餘今日玩玩，發覺key同腔都好唱，值得研究。如果有一首歌令我愛上太極，唔會係最rock的《紅色跑車》，唔會係最pop的《每一句說話》，唔會係MANOWAR的《頂天立地》同math rock的《樂與悲》，一定選《Crystal》，根本就係芬蘭野，話power metal又得，玩gothic亦得，編曲太強了。我成日都話計技術太極點都贏BEYOND。單鼓同bass已經唔需要比較啦。咪就係輸在真係rock而唔夠pop囉。

「聽完首，諗到少少野。首歌非常GUNS N' ROSES《Use Your Illusion》歌路。《Use Your Illusion》1991年出，而太極《Crystal》1992年出。有冇關係先大家？」

話可以唱到四點，但老細兩點唔夠走晒，飯又食埋（Neway的lunch確是不錯的），各位朋友各有節目，三點未夠散水。其實近排幾想出尖沙咀走走，但有更重要正經事做。咪係囉又係部電視累事囉。七刀同學臨別秋波，再多左部Wii，搞到而家每日最重要就係上舖頭。機未到之前無聊開電視，撞到無記《娛樂直播》（現己是《娛樂錄播》了）搵左林敏聰做嘉賓，條友賤到爆又串到爆，單睇主持點俾佢玩死已經笑到仆街。因為佢，而家無線唯一仲會睇之節目係《龍鳳大茶樓》，但更想睇番當年亞視佢搭曾志偉的《笑足千八秒》同《開心主流派》，舊時亞視齋為睇佢兩個同吳耀漢已經抵到爛，果陣星期一至五晚七點半晚晚不同搞笑資訊節目，好笑之餘睇完又真係學到野，無記搞笑節目如《笑星救地球》完全唔夠班，單劉志榮去郊野公園扮劉備點知影到後面有人踩單車的《歷史也瘋狂》夠殺晒無線所有同類娛樂節目。所以我幾時都咁支持亞視。你無線低俗佢實制因為香港人鍾意，但有幾可敢癲？

「亞視以前好多cult節目架∼」

跟住就到打Wii了。勁Wii。係噉Wii。不斷Wii。Wii到我禮拜五見公司冇乜野做，近排屋企部電視又多問題同老豆執左成晚執到好支力，索性射波早ｄ開舖打機算（我一射波，老細就歷史性地俾全公司早放四點了，挑∼）。年初五晚盛勢之五人打Wii打到十一點咁滯先收檔，睇黎唔班多兩個Wii手掣返黎四打唔多掂。夜晚連無尾兄都蒲埋頭。亦因為咁多人咁多野玩，搞到新年到左兩批貨，隔左幾日去到禮拜六終於靜晒冇機打，先搞到個貨單出黎：

Wii打埋今個禮拜日就冇得打，到時應該會勤力番ｄ架喇，黎緊會再有好多新貨。不過呢，well...

七刀同學在香港的最後一天，比預期中淒清，就連無皆旺都奇靜無比，格外憂愁。不過，絲毫不影響我們打Wii的情緒，五條友如常打機嘈到拆天。兜兜轉轉，Wii最後玩的都係Wii Sport，雖然最後班唔到四打手掣，都玩到四人互毆保齡球。同研究網球點樣連續打Ace。不過過埋今日就乜都冇得再玩了。能夠遠赴美國學音樂，呢種機會唔係人人有架。

「真係要一路好行呀阿捷哥。大家等緊你歸來成為香港Malmsteen為我地爭光的一日。」

而我最需要擔心的，除左以後TRHK冇Wii打，同TRHK外賣部＆衛生部即日關門大吉外，第時返工睇唔到舖，或有飯局or有show睇時，又要頭痛了。

近來心血來潮，好想打番當年8-bit game，呢幾日特登周圍行搵會唔會有復刻紅白機ｄ山寨機買。當年賣到成巷成市，行街十間遊戲機舖有一半狂賣幾百合一ｄ山寨機，而家想搵部都好難，特登走出龍珠古地重遊，再行埋女人街，一部都搵唔到。發生乜野事？本身想去埋鴨寮街，冇理由鴨記都冇卦？最後冇去到。點解？

「好叉熱呀大佬！上個禮拜仲天寒地凍，做乜呢兩日突然廿幾三十度架？」

近來無聊（坐在TRHK，日日都是無聊），不斷地煲超任模擬器，始終拎住個手掣對住部電視同對住個芒篤keyboard兩種感覺，好想重拾當年煲機份感覺。至於點解要搵山寨機？正版機唔係冇，行龍珠已經有幾間放緊，問題係機唔貴，game先貴，同你睇ｄ舖全部帶冇乜保養保護就噉放係度咁多年，仲玩唔玩到都成問題。讀中學時有部二百幾合一即插即玩架，可惜唔見左，唉，當時買左冇乜玩過，而家知灰了。所以今日又係睇電視。踏入2009年，慢慢覺得亞視越來越灰。講睇囡囡的話，而家禮拜六日晏晝必睇的，《激流青春》大結局後亞視搬番《PC自主派》出黎，唔知邊套？即係大家搭巴士都有得睇講電視果個節目，叫得做重播ｄ料自然係過晒時，但你睇個節目，都係為左Kawaii嗟為學電腦咩？點知今日跑馬冇得睇。無線自製校制常識問題比賽《智激校園》，今年起女主持換左四葉草龔嘉欣，最好睇係佢受人錢財真係搏到盡非常敬業樂業，唔係好多人做兒童節目有佢咁搏命架。我成日覺得呢ｄ成名姐姐仔，其實唔需要簽電視台都發到達啦，單靠自己個名同人脈都夠搵食？

「可能佢都知，所以今集唔見左佢了，呵呵∼」

基本上亞視大半一線女演員都係接收無線棄將，無線成日將演員包裝到好俗氣，反而亞視冇呢個情況，但香港人就係鍾意俗，所以就算質素上我覺得無線及唔上亞視，睇女的都係睇無線多。當然《東邊西邊》要追啦，呂晶晶喎！今晚先知原來第廿六集大結局，唔睇唔得啦。作為fans的我因為間中星期三放假又或舖頭有客，搞到廿六集中有大半冇睇到，但單睇大結局一集，呂晶晶原來只算大茄一名，主角係林韋辰，後來十集由講東西文化衝突變成佢被吳亭欣同六合彩姐姐（相信係佢在亞視拍《東邊西邊》以外最主要工作）兩個爭仔，而結局呢，你都估到，就係兩條女和好如初見男主角俾佢任揀但又唔講揀邊個的open ending（正常人的選擇都會係揀晒兩個的齊人之福ending，不過電視劇加上亞視尺度問題，此alternative ending出唔到街），係娘，但睇完套野，覺得比無線而家ｄ劇好出不知多少，不論「劇味」還是演技。令我不斷幫套戲加分係唔知點解乜都關佢事、差唔多個個場合都見到佢、鑊鑊爆炸metal長髮上庭唔使戴假髮個metal法官啦。睇埋呢套，你真係唔知道亞視幾時先再有自拍劇，甚至仲有冇可能拍自拍劇，點都要支持埋佢架喇。而家亞視真係俾無線追住打打得好慘。好似當年全靠佢我而家英文先叫做見得人的《Late Show with David Letterman》，原來2009起直頭冇得做！睇黎亞視財困得好犀利，英文台而家冇乜劇播，變成平日都播番戲搞「國際930」，但明珠台見佢噉又照播戲打對台，始終勁戲都係無線搶晒，邊有得鬥？基本上而家無線睇亞視做乜佢就跟住做，選擇上九成人肯定睇無線。好似今晚週日明珠930播《絕世天劫》，你睇唔睇？單為個片尾已經冇得唔睇啦下嘩！

屋企有呢套戲隻DVD，成日開隻DVD只為睇呢個MV，睇DVD已經睇左呢個MV過百次，以前冇YouTube架大佬可想而知而家一代人幾幸福。到今次今日仲覺得歌同MV都無敵，睇完聽完就知道點解我地要追AEROSMITH，呢首歌都算令我投入rock & metal其中一個原因。睇完個MV再睇睇《Hulk》，Liv Tyler殘得真快。．．．扯到好遠，講緊無線同亞視，不過等我再睇多次個MV回味多番AEROSMITH先。

講節目質素，唔計娘同大陸，其實亞視好多普遍優質過無線，特別以前一早儲定大批存貨。好似前排無線睇完林敏聰先講話想睇番佢舊時ｄ片，亞視旋抽水出左集《群星笑joke半世紀》，將當年林敏聰亞視無數搞笑節目ｄ片段剪成一集，正呀不過要夜晚十二點幾先播．．．當英文台連David Letterman都放棄，中文台又唔再拍自拍劇，覺得亞視今舖命不久矣是真的，積弱左咁多年每年蝕幾億，而家可能到左最後倒數階段。灰矣。如果有一日，香港電視台真係得番無線一間，到時除左睇收費台同明珠台，再冇任何意義去開電視了。

話說一次八三三之 漢 同Sam少灣仔食到間韓燒唔錯，新年前已經話要黎食一次，不過一時你忙一時我忙，互放無數次飛機後，今晚終於成事。破天荒之一今次居然係我接近一面倒地被佢兩條友放飛機。破天荒之二：

「出尖沙咀都嫌遠的劉Sir，居然肯唔花園金閣，暨肯過海同兩條契弟開飯！」

間野叫高麗苑，佢兩個話仲好食過暫時試過最無敵之東大門，今晚得閒加佢兩個終於唔放飛機，就黎一試。食開坐低寫紙等人招呼的打邊爐同韓燒，呢度回歸old-school要自己出去拎，但睇見用一個個錫紙兜裝好似開party噉，求祈左ｄ喎。我地個位正正野食隔籬，唔起身就噉跨身遞手埋去都夾到野食咁近，一眼望晒，唔係多，但選擇上多款過東大門，而且食落確實樣樣得加夠新鮮，係熟食弱左少少，冇東大門無限供應的我的最愛咖哩角（．．．）。韓燒場一如典型入場即計時，佢話九十分鐘，但唔知金融海嘯定本身已經冇乜生意，七點入場我地先第四圍全場得十幾人，食到八點幾叫做多ｄ人入黎都只爆大半場，個場仲要未開盡有三分一封左，咁好生意，坐幾耐都得啦，韓燒好少可架東大門個半鐘已經執野俾單趕客喇！

Sam少的健康人生越來越健康，早前跑二十公里馬拉松幾乎跑死，仲未識死，上星期渣打馬拉松再玩，仲要跑足全馬五十公里，問佢跑左幾耐？佢答半跑半行，五個半鐘先完場 － 相信「半跑」即係「跑左半個鐘」，包括頭三個字同尾三個字，起跑衝線最多記者嘛！八千幾人當中第五千幾個完成，灰在連上晒電視報紙著晒鯊魚衫果五個都快佢個幾鐘嘛！

「跑果陣好多野食架！跑一陣就有攤位，有得食香蕉又有朱古力拎，飲完水又有得飲冰極！跑到後半我都唔想跑喇，行住係噉拎野食算！跑完仲飽過食自助餐！」

「行幾步路就食個生果，冒險島咩？有冇食滑板呀頂你！」

渣打都跑埋仲未夠，計劃緊再飛日本跑超級馬拉松，一百公里跑足十幾個鐘，跑到晏晝停低食飯食完飯再跑果種。不過睇死佢條友都係貪食果餐免費東洋晏晝飯，再呃埋ｄ紀念品就走人然後當黎日本旅行。跑到 漢 都有興趣一齊跑，因為剛剛佢學校做完學生體檢，全校肥到黐Ｑ線，佢班四年級有個百五磅肥仔，全身脂肪比例係95%。

「算好架喇！聽校長講，六年級有個肥仔二百一十幾磅，成98%呀！」

好想知如果100%脂肪會點？會唔會其實100%先係標準，超過100%先算有事，所以兩條肥仔其實冇問題？又有冇得好似戶愚呂噉爆二百幾三百%？佢都唔敢問老細，因為體檢完左，即時被欽點成校內減肥大使，明顯因為呢ｄ豬頭骨冇人接而屈左俾佢啦。所以而家四圍操fit自己，同搵緊有乜活動可以幫班肥仔肥妹減肥，叫佢地跑步就死硬架喇大吉利時起黎分分鐘跑冇耐就瓜柴，人好化學架咋！有乜野唔多使郁又好玩自己又教得開心？始終都係老本行拳擊好玩。轉左幾間健身館同拳館，估唔到而家佢做左我街坊去左先達練拳，抵死到四樓練正正我地夾開的band房正對面。佢唔講都唔知道原來先達呢ｄ地方都會有拳館，仲要係夠位打交加擺埋擂台果隻。聽佢講老闆係個泰仔，泰國打到贏晒冠軍又娶左個香港老婆，就黎香港開間拳館當屋企生意搵食，因為性質咁家庭式所以輕鬆好多，以前打拳撻Ｑ打親師傅立即被勁小，呢度撻Ｑ打中師傅佢問番你轉頭有冇傷有冇事，而且閒日可以任你玩一堂錢玩足成日玩到你唔玩先停都得，最正有得免費試堂，佢同個師傅比試個泰仔直頭企係度任佢打乜事都冇，再還拖一拳打到佢腦震盪加送右眼爆肛血跡一大撻，就知人地有料了上堂又似黎玩多即時報名。Sam少聽完又想玩埋一份，因為近來佢又無聊自己打拳，屋企冇野做周圍踢，一踢踢爆左個木櫃成塊板斷開兩截飛出黎，最大鑊間屋佢同人地夾份租，立即夾硬塞番塊板上去當冇事發生，佢朋友見到個櫃裂左大大條痕，一摸落去俾條剌摻親，摻到發炎要去睇醫生，佢自己踢爆櫃冇事反而累死人笑爆。講落我都有ｄ興趣。反正夠近打完拳先開舖都夠時間，又有得免費試堂喎！

食到十點幾連糖水三款加甜品者喱都擦左不知多少杯先埋單，一位$128，加埋一每人$141，就係咁蹺，搞到兩條友又吹一大餐。聽佢地講141個forum非常多野睇，除左比鹹古更精彩的賽後報告（「真係自己叫雞都冇咁好享受呀！」），睇其他網友點樣評ｄ囡囡最好睇，有ｄ囡囡俾人網上勁插服務態度差，條囡囡立即自己影埋相同大家道歉「我會改善架喇！」有時ｄ囡囡又會網上回應係行家惡意中傷，叫大家唔好信繼續支持佢／幫襯佢。就算你唔係玩開果種，單睇個forum都有大把笑料你笑餐死。我冇乜興趣理。因為食完我望緊高麗苑樓下間東園金閣。我型住佢係花園金閣港島區分店。係咪應該過多次海試試？

「傾開之前上佢屋企打部紅白機版PSP 2PG，又原來佢仲搵到六百幾蚊包幾百隻game的世嘉模擬器，好想買番部呀機癮起呀！」

「媽咪∼∼∼」（繼「點解冇signal」後又有新電話聆聲了）

100% death metal啦。睇左個廣告先知原來老母麵咁metal。老母麵大大話話食左廿幾年，難怪大個左會聽metal。係呀老母麵真係好metal架。唔信？睇完老母麵廣告，睇埋呢個MV：

再睇呢個：

你話兩個MV同老母麵電視廣告有咩分別先？我覺得冇乜分別囉。老母麵隻吉祥物（老母？）明抄芝麻街曲奇怪，又其實曲奇怪先至係全世界第一個「人」玩death metal，難怪老母麵如此metal。想知多一點點，梗要睇埋下面Wikipedia都叫你睇的文獻：

寫得好正呀條友。好多人成日問，到底幾時開始有brutal death metal？當death metal正式tribute芝麻街時，brutal death就誕生了，第時想著metal fashion出街，一手一包老母麵，勝過著七件皮褸八對皮靴再揹住三十斤鐵鍊二百發子彈，當然cosplay埋曲奇怪／老母最是metal。篇文雖由專業音樂編輯所撰，相信其中好多點會遭到香港專家抨擊，是對是錯自問未夠班評論，有請各位本地專家送錢入我袋。我只知有ｄ野唔使咁執著，對住非內行人士應概括如文中，即使對「內行」者都唔會話一定講到好實好肯定啦下嘩？況且，大大聲之後會覺得自己說話有幾實幾肯定？對聽音樂純粹為人聽我聽為今期流行為追潮流而非為藝術者，Devin Townsend贈過一句：

"Music? Well, it's just entertainment folks."

與其日日好似做功課噉上網「呢樣果樣係／唔係乜乜物物」、「邊個講野錯乜錯物」、「今期興ｄ乜乜物物」、「有冇人可以send我乜乜物物」就感到自己懂得音樂、尋求音樂，不如買包媽咪麵返屋企開電視睇實芝麻街等曲奇怪唱death metal好過啦，絕對簡單過而metal過你日日上網做功課。

會計靚女：「有人send左條問題俾我，唔識答呀！『書到用時方恨小』，佢話寫錯左喎！錯乜野呀？」

五金柒仔：「一睇就知正確答案係『書到用時方恨：「小！」』啦！唔通恨少咩！」

原先靜局的一晚，臨收舖突然聯群結隊地入黎，原來有朋自瑞典來，右邊位朋友是其中之一。佢隊band叫NETHERBIRD，玩symphonic/melodic black metal，CATAMENIA、ILLNATH風格，有AT THE GATES即THE HAUNTED又即前CRADLE OF FILTH鼓佬打鼓。

我對左條友興趣大ｄ，可惜今日佢冇黎，隊band只黎得歌佬，睇相好似好惡，但真人個款超級阿叔，行街撞到只會覺得係個普通中坑。好多時metal友都係冇樣睇但感覺得到。成班人四五個黎香港玩，隔幾日飛上海繼續玩，之後再遊香港先返瑞典屋企。上網知道TRHK，成隊人特登走上黎掃碟，講metal舖外國唔係冇，尤其瑞典本就是metal國要乜有乜，但好多鬼佬鍾意上TRHK掃貨，除左因為平過好多地方，仲因大量外國都未必有之地下野執。

送完客十秒鐘唔夠另一隻鬼走入黎，又係瑞典鬼，又係上網睇到TRHK，不過唔係遊客，之前北京做野，而家調左黎香港，第一件事又係上黎買碟。不過有趣在佢聽death metal，自己隊band玩alternative rock，佢負責打鼓，「懶math」果隻。

第一隻碟由香港indie label出，勁在搵左PINK FLOYD個producer做mixing，難怪咁鍾意玩到早期PINK FLOYD種拍子。而佢最鍾意metal band係OPETH，貪佢夠progressive rock，可以從中搵到靈感，學點樣將progressive rock融入其他音樂當中。

所以每逢旅遊旺季我就好開心，可以成日撞鬼，今晚，香港人只見過兩個，但同晚遇到之外國人，人數達十倍以上。外國遊客唔止捨得同肯俾錢買碟（「肯俾錢買碟」呢樣，本地已難求喇，更加唔好求係俾錢買真正underground野），而且可以傾到好多野，畢竟基礎同接受力遠超好多人。

叫大家睇睇上面個MV的，是AV興。話說佢從事專業音響工程（即搞搞商場show就覺得自己好pro（阿興唔好打我！）），有次搞show遇到狄易達表演，同場featuring JJ，著住MV中的同一條裙，發著MV中的同一樣花癲。

「果日我負責遞咪俾JJ，佢拎咪時成隻手摸落我隻手度，好正呀！！！！（唔夠位，請自己打多六十個感嘆號）high到我立即想買佢隻碟呀！不過佢唱歌好鬼難聽，最後都係冇買！」（相信興爺唔知道，個個買隻碟，只為隨碟附送本寫真集）

興哥仔份工都幾夢寐以求，一來做番自己本行音響學以致用，加上作為專業音響師，大把大場面需要佢撐場，好似本週重頭戲會展皮草展搞catwalk，整聲重任自不然落到佢身上，呢種咁高檔展覽大量一線模特兒唔少得，佢同班model一齊後台工作，ｄmodel出場間場當大家冇到人前人後照換衫，做得model就梗高啦，仲要著住幾寸高爭鞋行騷，興爺本身已經玉樹林風，企埋班model旁邊，當堂矮晒，人人高佢個幾頭。

「我睇左咁耐，等一個model矮過我咋！」
「咪仲好！方便你啦！」

場show係三點式打底轉衫／加衫，加上model一返到後台就地換衫即走下轉，興哥仔無時無刻被大量真正model級數的三點式姐姐包圍，加上人地個個高佢一個頭，可想而知眼前景況，當堂high晒，發覺自己冇入錯行，晏晝特登抽空打個電話俾劉Sir，

「打黎同你分享我心中喜悅，等你羨慕下嗟！對住咁多model囡囡，睇到我有ｄ悶滯滯地！」

似乎轉工轉行的吉時已到。

本身Rock爺號召今日大家齊齊上TRHK搞番個'80電影回顧，叫各位朋友帶備八十年代經典電影、遺珠名作、cult戲、鳩戲等等等等由朝睇到尾，點知條友放飛機，唔緊要啦，預左架喇，鑊鑊條友話出黎十次有九次放飛機，我都化晒。唯有繼續睇電視。琴日先提起李卓庭，今日《津港直航》就見到佢，同場仲有唔知去左邊的英皇Mandy。點解會見到佢地？因為今日重播上年新年果集，唔知邊個賀年嘉年華搵ｄ明星（你可以話奀星，悲哀）出鏡同大家恭喜發財。跟住重播埋《PC自主派》（有Kawaii！），就冇乜野好睇了，直到明珠945今晚做《Starship Troopers》，鬼佬特攝大戰，相當爛不過我幾鍾意，唔使用腦同好多《鐵甲威龍》式笑料（同一個導演嘛），可惜拍錯左，有時間會寫寫呢套戲，一定唔係今日，太懶了近排。同無聊上網搵港台節目：

前排開電視撞到，反正今日無聊，上網摷黎睇睇。《頭條新聞》好耐冇睇，因為近（十）年弱左好多冇以前咁夠串（香港已正式回歸了），原來上年年底開始搞左個「迷你版」，重點搵左周博賢加Ban Ban Music仝人（當然，謝安琪除外），舊曲新詞（好多曲都唔舊了）諷刺時弊，將尊子精神結合流行音樂。周博賢實在好神，而家香港流行音樂界中，亦只得佢地位加定位可以噉玩。就係鍾意佢唔放開indie。

「如果你話想搵地下音樂，而講之餘真係想搵地下音樂，TRHK今水貨都幾難滿足唔到你。都係『冇好野』的話，閣下的地下應下得深不見底。」

細細個已經勁鍾意飲維他朱古力奶，黑豬白牛打韆鞦電視廣告早成經典，飲到上中學成班齊齊飲，《丁舉人》「溫一包朱奶」是有典故的。不過朱奶對中學時期的我黎講係奢侈品，每日零用錢唔多（中一時冬令一日零用得十五蚊僅夠買個飯盒，夏令返屋企食飯更加冇零用錢，你話灰唔灰？睇報紙而家ｄ靚仔一個月有五六千零用仲嫌老豆老母俾唔夠，嘆句身在福中不知福矣），維他奶學校價$2.5，而朱奶貴最少一蚊，幾等同於原味同麥精375價錢（到而家仲未明，點解朱奶死唔出375？），每次飲之前都要諗過度過，不過始終鍾意飲冇計，差唔多一日一包。出左黎做野就開心得多，經濟差，最恐怖果陣我公司全層樓執剩我地一間，跟住隔籬幾個單位俾人包晒黎做汽水倉，得閒無事就走過去買平貨，朱奶當然唔少得。市價賣三個半至五蚊一包，開倉價一條廿四包$75，計番三個一二一包抵玩，公司又用維他飲水機訂水時有我順便訂維他貨又係七十幾，係噉怒掃。可惜金融海嘯之後朱奶來貨價加左近三成，最激果時一條賣到九十五蚊，就連維他自己官網都咁貴，飲唔起。所以汽水倉都選擇放棄賣維他，主攻市場最大的啤酒。好在間唔中仲有好帶挈。

當麥當奴都要整開心樂園餐攻靚仔靚妹市場，維他奶點能夠唔跟隨？迷你裝朱古力奶，一包只得正常版一半125，明做幼稚園同小學。汽水倉老細盤點時先發現倉入面有，自己都唔知邊度搵返黎，因為而家佢客路轉做啤酒朱奶冇乜門路走，仲要係迷你版先死，唔知點解＆點算，就走過黎搵大善人劉Sir求救。因為全公司加全家都鍾意飲朱奶，

「有幾多貨？」
「八條。」
「捧晒入我公司個倉！」

一條四十四包，八條即係三百五十二包，義無反顧，因為一蚊一包。計落超抵，兩包迷你版等於一包正常250朱奶，250一包單買最少三個幾啦，而家兩包細先至兩蚊，即係平過而家市價一半買到！而且市道咁差無幾可仲平朱奶執，不論問隔籬倉定問維他只靠撞手神，仲唔立即瘋狂怒掃咩！八條抬番公司，自己都未飲，各位同事即時勁搶，都有同事有人性少少俾錢收購的，不過人人又買又搶，有市場喎，立即抬價：

「而家全大廈朱奶係晒我手，我玩獨市！要買？個半一包！」

所有同事旋收皮，結果自己一個人攬左二百幾盒奶：

呢度只係一部份，開埋雪櫃嚇死你。大鑊。之前低買高賣大計，因為冇人接盤告吹，坐左艇做左蟹。搞到而家我返工飲朱奶，上到舖頭又係飲朱奶，屋企雪櫃都裝爆朱奶，連訓覺床下底都係朱奶。飲到驚。

「繼雪夾糕同Kid-O，維他應該搵我幫佢地做代言人力銷朱奶啦。」