成個月前已經講過，2009年4月之後，我會離開TRHK長休一輪。 結果？家陣五月，上黎TRHK，又係見到劉Sir，真灰。我講緊我。自從五年前畢業後，已經立即開始日頭夜晚 － 初期仲要有時兼埋TRHK即打三份工 － 五年間冇幾多機會正式放假，最少未試過放真真正正之長假，對我黎講可以有連續兩日匿係屋企乜 都唔使做慢慢上網聽歌睇書睇戲訓覺已經好幸福。不過，諗諗就算。TRHK幾年黎基本上得兩個人，但真正工作量其實加多兩個人都應付唔晒，黎緊23/5 HIBRIA，已經同TRHK舖面二合為一的劉Sir走左的話，TRHK門市部真係摺得，我敢講黎到今時今日，劉Sir以外再冇第二個人能夠勝任完全接手TRHK門市。所以，走唔甩．．．

真係離開TRHK的話，我諗會一段（長）時間完全遠離metal及音樂，或者去讀番書，從而（暫時）唔需要面對我覺得真係無法改變、已過份負面之香港metal界。諗番轉頭，噉可能對所有人更好。七年總結，香港地真正「搞得到」metal，只得三種人。第一種係地下band，典型思維見你夾band就覺得你識野，越出名亦即越識得多越地下，但好多時其實剛剛相反，不過有乜所謂？當局者絕對希望大家繼續迷多過清。第二種係支持免費音樂同免費下載，當你見到搞show最大最多果班甚至唔少樂隊成員都屬於呢種，你就知道唔埋堆唔得，又唔使俾錢又有福齊齊享仲能共同做英雄，何樂而不為？第三種係只賣最潮最出名果種，果期大公司出乜就賣乜、客人問乜你就俾乜，完全唔需要思考更加千祈唔好思考，顧客永遠是對的，千祈唔好質疑又或企圖賣其他非大公司出品，因為潮流當道下，俾顧客見到佢地認得識得之樂隊，先會認同你係識野同有心做音樂，到時賣得貴都唔緊要，你幾時見過港女話LV貴？只要係潮物，幾貴都係平。可惜劉Sir不屬前述三種，而係第四種：開門見山講晒你聽全盤現實，其實真正地下音樂既多且大又廣到你唔信、同需要你付出時間金錢支持，唔係上網同人講你聽左乜／聽過乜再download download download就等於支持左，即使全部同「地下音樂難生存」一樣係客觀事實，已經夠得罪所有只會留意大公司出名band、覺得唔出名ｄband只值得download或同人講「我MySpace搵到正野」而唔值俾錢買或認真聽人士（呢類人前提早已是逆邏輯地自己唔識不等於地下），進而反駁第四種人係「搵錢」、「睇低人」、「唔支持香港音樂」。簡單黎講，我對而家香港metal兩個末期病症，包括香港Metal K歌化，同住半山聽metal，已經睇到好化好厭了。我未能明白香港好多人一面玩／聽地下音樂，一面話支持地下音樂、明白地下音樂難生存難搵食，但叫佢地一齊付出去捱去支持，總會多多事實加鬧番轉頭有人惟恐天下不亂。所以你見全香港只得劉Sir一個，會同你講出晒而家香港metal出左乜野問題，而講事實者即本地眼中之得罪人者，的確唔太適合兼做銷售員，你知我坐TRHK見過接近全部人士，都係入黎望望問「有冇（metalcore band／潮band／forum或Facebook煲緊的某隊band）」，答佢冇之後面露得戚之意再笑多幾笑從此消失，自會知香港人聽metal為乜、聽metal心態係點。比喻係，買LV拎Gucci。當然仲有更多。隔左半年，近來仲可以有事發生，令我 － 以一個身在香港的metal迷身份，而不是一個賣metal人士身份 － 再加對香港metal睇化睇淡。都有ｄ後悔，之前冇將成個故事寫出黎。香港人、香港band友、香港metal界，實在太過虛偽。

係時候收口了，呢種批判香港metal現況題材，一開左個頭冇五六千字都收唔到手，總之現實就係我冇長假放，你上黎TRHK又見到劉Sir眼冤啦。除左呢樣，仲要提多兩樣野23/5 HIBRIA，加一批貨：

（按圖放大）

今個星期即09五月黃金週末後第一個禮拜，《壹週刊》剛剛好出到第1,000期，不過今日同大家重溫係第911期政經B刊專欄《坦白講》。我鍾意睇《壹週刊》非全因佢地立場偏右，人物專訪水準確實優異，又同我特別有緣，年幾前《坦白講》已令我回到高中時，今篇故事主角童俊謙先生（見到個童字，我差少少想嗌小朋友）同我完全無關係，大家互不相識，同樣有數項共通之處而特別留意及思考。

訪問之中，可以睇到兩樣野：首先，在現今特區政府英明領導下，百姓將來唔使旨意有好日子過已成定局，金融海嘯大家聽日可能已經冇工開冇飯食，政府講一大輪先批月入一萬以下可得六千蚊強積金俾你幾十年後享福，係我見過最戇居最戇居之救民政策，加擺明別有用心。香港主幹仍是金融，我地ｄ強積金去左邊？炒。每人強積金多左六千蚊，即係成個市突然間多左幾十億，或者的確推高到個市，但過程中每筆六千蚊首先唔見左唔知幾多、大家幾十年後真正入到手得番多少？選擇發強積金而非發現金，換言之無諮詢下借紓民困為名花公帑曲線救市，係有心救各位市民，定背後動機實是香港政府只為幫番自己？好難睇唔出。預算案中其他大量謬政及各官謬論，睇報紙都睇到悶啦，唔使再多講。只有講番句祝住在香港又非有米的各位好運。

另一樣就係香港教育，師範出身，所以特別留意。童小朋友先生講香港教育點差、教出黎的師生點衰，我好認同架，尤其睇到大家都係睇洋劇同David Letterman學英文，充滿共鳴。最留神當然係最後一段。聽開歌一望就知，講緊PINK FLOYD首反官僚教育聖詩《Another Brick in the Wall》，源於《The Wall》主角童年受教師及同學欺凌之反動思想，記得細個國際台夜晚播睇到（當年電視連《The Wall》咁激都會播，而家《秋天的童話》都俾人投訴，幾灰），《Another Brick in the Wall Part 2》個MV成班靚仔靚妹走入機器入面，出番黎戴晒面具一模一樣，最後跌落碎肉機死晒，細個唔識英文又唔識睇戲，未明段戲想講乜，只覺得好鬼邪釘，到大個左開始學英文同聽歌，就明白樂隊思想知佢地批評乜野，香港教育出於英國之脈，自不然感同身受十分認同。

到最後，首歌甚至成為我其中一份畢業功課。教院四年生涯最後個學期，其中一個單元講教學理念，非常老實入得教院往往係全屆A-Level成績合格中最差果班，我除左中英電腦其他科全部E晒，入到去仲聽到有人全E入場，成績好果班都入中大港大科大讀醫讀專科啦，真係有成績又想教書，其他名校都有教育學院，使乜特別入唔係好過人甚至調番轉頭差過人的大埔教院？說是作育英才，純粹打工心態地讀純為呃沙紙如我者絕對唔少，個單元叫大家寫自己教學理想，即係摷notes邊個教育家心理學家邊個學說用得著，砌砌埋埋就係「我的教學理念」了，邊個夠薑寫事實「都係搵兩餐，貪教書一個月有兩皮野嗟！」不幸地最後一堂我被點名堂上分享，毫無準備之下，就同全班同學講《Another Brick in the Wall》，當然冇人知講緊乜，香港文化一向係自己唔識就等於唔好等於另類，特別教育界思想更加保守，基本上分享之後，只令更多人覺得劉Sir係個終極白痴仔，好在已經到全學期最後一堂。既教學理念本身已無定向，加上最後一個學期將結，只要政治正確玩玩野無妨，就以《Another Brick in the Wall》作引子，將音樂、metal及獨立音樂工作者三項融入，好多人知劉Sir音樂態度從來係聽音樂而非聽人名、要留意內容而不是潮流，將音樂態度搬番入音樂，帶出「教書不是教書，應是教人」 － 相信冇幾多人想像得到，metal對劉Sir影響同啟發有幾大，佢點樣活在metal中。結果教育理念係我四年黎最得心應手功課之一，亦係我唯一一份拎到A之個人功課，有鑑個人學習態度從來是「不是求學、不是求分數，只是求祈」，冇幾多份功課唔係臨交前一日通頂做起，平時個人功課有B已經好勁，居然臨尾俾個A我，簡直係奇蹟加一份畢業禮物，寫到咁黐線都有A，係教授鍾意夠另類或者夠真卦？

不過教學理念被贊同，又如何？大家都知出到黎真係落場教，你根本冇可能唔跟番最行貨最求祈一套，即係填鴨。教書同音樂一樣，一係你就商業（打工／搵兩餐心態求祈教），要indie要另類（真心去教好書／「教人非教書」），除左自己辛苦之餘仲好易換來大量白眼，想生活輕鬆唯有妥協（「pop」），單我三年實習已經睇到，好多野你讀完學完，出到黎根本完全用唔著加冇時間做，我都想堂堂玩遊戲又幾十樣教具教材呀，有冇咁多時間資源俾我做先？正職教師唔同我地實習教師一日教得一兩堂，而係一日空堂都唔知有冇一兩堂、一個人攬（十）幾班學生改簿都改到死、落堂仲要開會呀做行政呀帶課外活動呀甚至帶校隊跟問題學生面對家長萬幾樣野，點樣可以班班都做到演唱會咁精彩咁多活動？加上我個學位係教小學而非中學，而小學生冇得講道理家長更加不可理喻，我地一代細個係學生怕先生、家長希望先生教得嚴，家陣先生叫個學生唔好大聲講野都俾人投訴，家長郁下就搵校長話先生點樣對自己仔女唔好，仲點教呀大佬？「教書不是教書」根本冇可能做到。好多舊同學當初雄心壯志想教好細路，幾年後而家講得晒課文過到骨個個月準時逗糧就算，除非入得著間學校制度開明學生又資優，否則冇可能達成真正之教學理念，教書仍然同打份工一樣。我教書的話，我唔想。

另一當局者面對之謎，係香港教育制度實在太垃圾。大家讀小學時已經聽到好多人噉講，屋企老豆老母講、學校先生甚至校長講、睇電視睇報紙更多學者專家講，而廿幾三十年前講到今時今日仲未講完加鬧得更大聲，自己幾經辛苦走得甩，都唔想入番去教助紂為虐啦。而且制度之禍不止於學生，連我地教師都受牽連。先講講個故事。每提教育制度，以前其中一個經常出鏡人士，係身兼語常委主席暨教統局委員之田北辰。見到姓田你都知係商人。點解做生意會走左去搞教育？考起。香港從來係商人治港。田主席其中一宗偉績係大力推行母語教育。我從來唔反對母語教育，大家由細到大英文書聽中文講課，咪就係母語教育囉？分別在於內容，太多太亂太多變太多多餘掣肘。同埋你會發現，各位生意人搞出黎的傑作，到頭來邊個受？一次田主席被一個港台清談節目訪問，討論到本地教育時，主理香港教育的佢大發雷霆：

「我都唔明點解香港人成日話香港教育唔好。佢地知唔知我地用左幾多時間同心機去設計課程、去制定教育語言？其實母語教學有乜唔好？做乜一定要仔女上堂俾人用英文教呢？點解個個家長都話香港讀書唔好，一定要送仔女去外國讀書？點解唔試下欣賞香港教育呢？」

講／鬧左大半個字。跟住主持問田主席，佢ｄ仔女接受乜野教育？心平氣和：

「我四個仔女都係外國讀書。」

就係咁諷刺。搞教育果班本身從商，身處上流社會之餘又欠缺民生知識，「何不食肉糜」例證仲有呢個。唔識又攬權，咪自己覺得應該係點就亂咁黎，搞一壇野衰左唔會諗係邊部份出事，而立即棄舊再搞另一壇新野出黎，希望搞到有一壇終於冇人鬧為止，所以每隔幾年就聽到教育制度改乜乜物物，如果以讀教院四年計，可能我入去讀時係一個課程，畢業果年學埋ｄ野已經有大半唔同左，因為「教育革新」。成日咁多先生跳樓死全因如此：你根本連自己應該教乜同點教都未知，又話要改野加野了，唔做死你你真好彩，不過無論點衰法，班官自己又唔會有事，因為佢地自己從來唔係落場做果個，又有錢送仔女去外國讀書唔使同你班蟻民一齊受苦你吹咩？睇完個訪問，我覺得自己好似演緊《星球大戰》，班官做黑武士，而我做企佢前面幫佢擋住反抗軍子彈個兵仔，此景正是而家好多現職教師所面對，制度差教唔掂學生適應唔到，家長嘈邊個？教不嚴師之惰，ｄ先生跳樓極都未燒到度政策班官啦，出計係佢但死係你，有事又唔會共患難，對住呢ｄ阿頭、呢種制度同工作環境，你仲有冇心投身？而且生意人心態從來希望服務對象冇思想唔批評，顧客梗係越易控制對自己越好，但將市場營運一套放落教學、將學生當成顧客噉去塑造，香港地新一代又點會有創意同批判能力？到底係邊個批准俾班商人管教育？

罪不止於此。主因，其實又要多謝教局各位。我讀教院時主修常識副修英文電腦，當年其實都想改成主修英文，不過種種原因最後冇改到，結果成為全級唯一一人如此組合學科型到爆。不過懶型就死了。因為家長成日話師資不足（上面都講左啦，考得好又點會揀入教院呀？），調查證實香港學生語文水準日低，就梗賴到語文教師頭上啦，為安撫家長及社會，教局又出絕招：再創新制以「改善」，即一切責任落番先生身上。我讀到第三年時出現基準試，冇問題我照考俾你，第四年已經聽說讀寫四份卷合格晒，當時連在職教師都唔係好多做到。到畢業半年之前，又話改制度：一定要主修英文至可以教英文，主修英文的話可以豁免基準試，但副修英文者就算過左基準，都一定要限期再進修番個主修學位，先至正式算達標可以教英文。冇錯正正我畢業前半年先講，而教院首當其衝，因為全香港咁多間教育學院中，唯有我地大埔一間有副修英文，而涉及人數只得廿幾人。簡單黎講，你覺得我夠料先俾我入教院讀英文；到我入到黎讀好書，你就話我未夠料，要再考多個試；考埋臨下山，又話都係覺得未夠，唔該再修行多幾年至好走。假如真係要自由教書，我畢業之後仲要part-time讀多兩三年，先叫正常將副修英文變番做主修，又或者直接讀碩士，又係要part-time兩三年。其實有興趣讀，不過我係教小學，畢業時遇上不斷殺校，如果讀左一半俾人殺出黎，繼續讀唔係唔讀又唔係時點算？又讀完之後係咪真係仲有學校請？未計學費十幾萬，加讀緊時會超辛苦，日頭教書朝七晚七，每星期最少兩三晚仲要放學再去上三個鐘堂喎。當年畢業後教職爭崩頭，我搵唔到算正常，聽講有人寄左百幾封信幾近寄晒全港所有小學都冇回音，我起碼有幾次面試機會先，叫對得住自己啦。

不過教院出身唔教書，的確好難話轉行就轉，唔算大學生咩？絕對算大學畢業。不過同人講，人地又唔當你係。加上果陣搞show，從真正開始起計，用左差唔多半年先搵到工，仲要有人介紹至有工開，叫做有書教，不過教私校，總算近番自己理想。雖然職位叫校園行政，修左英文同電腦，亦有落場教之機會，當年全校只得一班十幾個學生，環境輕鬆時間鬆動，教到書之餘又真係教到人，加大家相處融洽，正接近自己心目中之教學。但世事特別在香港又何嘗如意？教常規學校，好大機會失去理想甚至生活，不過搵到食，如果畢業後開始教書，我而家月入超過二萬。教非常規學校較易做到心目中所想，不過極難搵食之餘工時極長，更甚要面對好多自己唔鍾意之事，例如極度商業化之營運。加上性格較自由，做左一年，決定放棄教育。對此我冇非常後悔過，計收入損失絕對有50%以上，但我更鍾意而家份工多野玩又有挑戰性加自由，同教書的話幾年間生活一定唔會如此多姿多彩。我係同屆畢業生中月入最低一個，但亦係最開心一個。

「選擇唔去教書，而做個教音樂的劉Sir，都唔錯。」

不過做得音樂科劉Sir耐，支力了／化了。或者，係時候做番教常識教英文教電腦的劉Sir。

四月中做完展覽，其實擺展幾日辛苦多過忙仲要好好玩，擺完先死跟客之餘幾十間公司email黎問野，再加大量人士要上公司上廠開會，搞到個個禮拜都要返大陸一轉。其實我幾鍾意返大陸做野，就算冇野做日日坐寫字樓都悶啦，想寫野又唔係成日有靈感有精神寫咁多，閒來出去行個圈個人精神爽利，就同我成日講果句一樣，

「咪當自己去渡假囉。一星期七日做到足，次次上廠我都當自己放假架。」

特別自己上而唔係跟老細車，雖然要六點幾起身出尖咀上船，全程夠穩ｄ凳又勁舒服，買個麥記或者雞記早餐拎份報紙上去慢慢嘆，睇完食完仲有個半鐘訓，如果可以攤低訓直頭媲美酒店。係落船麻煩少少。大家都知個幾禮拜前爆左個豬流感出黎，經過沙士一疫（我仍然覺得SARS係史上最型病名，等全世界記得係我地香港人搞出黎），大陸香港通通有殺錯冇放過，條船一泊岸，三個人著晒保護衣由頭包到落腳衝上船，大聲嗌：

「全部坐番埋自己位！」

仲要每人拎住枝測溫槍，睇落勁似恐怖份子，各位乘客要一個個列隊，俾恐怖份子用枝槍隊住你額頭射一發先准走，勁俾人處決feel。落船再交張入境衛生檢疫紀錄，寫你今個禮拜有冇頭暈身興或接觸禽鳥之類，次次出現人禽流感都會實施的口岸措施，不過老實講，即使你帶病入大陸，你敢唔敢寫自己有事？寫有的 話，分分鐘可以大陸渡番一頭半個月假唔使返香港了。

唔知點解我ｄ客好鍾意整鬼我，上星期一個客話十點到廠，點知我上到廠等極唔見人，打個電話俾佢，先講有野做唔得閒黎。仲好啦即係我上黎工廠食個飯就走得，陰陰嘴笑之際，又打黎話晏晝到。食完飯繼續等，仲未見人，結果五點幾先出現，搞到我趕唔到六點尾班船要搭直通巴返香港，七點上車九點幾先過關十點半至返到屋企。今日個仲型，又係我到廠先通知遲到，型到唔打電話而出個email講我聽，當堂又肴晒底雖然星期三晚唔使開舖嗟！好在今次只遲一個鐘咁多，趕佢地走之後食完飯仲可以訓多個幾鐘，不過辛苦在好鬼熱。而家大陸真係一日四季，朝早上到去十幾度，好在我見香港都涼涼地著左件長袖衫上去，點知到中午上到廿幾度，食埋飯直頭三十幾，我訓覺時得把風扇吹住，幾乎熱到訓都訓唔到。訓下醒下睇睇電視，新聞講今日香港包機送番各位墨西哥旅客返屋企，似乎豬流感單野搞掂左，大家根本冇當過今次單野係一回事。睇上星期一，新聞話香港封酒店又確診又點點點，檯面大大碟豬腳薑同時菜炒豬肉，今日又係新聞一面講豬流感成檯都係豬，上左大陸咁耐除香港海關同檢疫員未見過有人戴口罩，雖然帶左個私伙口罩上黎，噉情況戴的話都幾樣衰喎？其實我都想借ｄ倚扮有病去投案等人地隔離我架，你睇報紙睇電視，被隔離有得住酒店入渡假村，再日日有免費三餐有新衫著有免費電話打有野玩有野食仲送多大量紀念品＆玩具甚至現金補貼，自己放假去玩都冇咁爽冇咁多著數啦你話係咪抵先！

換著以前通常一開完會飯都唔食就走人趕一點半或者兩點車，今日會食埋飯再施施然遊手好閒，皆因工廠有幾套辦未做得起，我要等佢地起晒貨拎埋至可以起程返香港，仲好啦，一程巴士三個鐘，返到香港已經五點幾，要返一返公司睇睇電腦打個卡先正式放工，勁戇居。如果三點巴士返到香港已經六點幾又要落車過關麻鬼煩，我等四點搭船兩個鐘都係六點幾到香港，一程過又好訓，幾大等搭船啦！聽到工廠今日晏晝四點開例會，一早叫定唔好遲過三點半出車，上星期一已經領教過，香港公司開個例會老細講完公司乜乜乜再各位同事分享今天我要做甚麼，無無謂謂就浪費半個幾鐘，我已經覺得好惡頂，而國內文化仲死一開會領導唔講番個零鐘唔停，上個禮拜全工廠開會時我搵左部腦上網，上到差唔多訓著，唔係有客到以工廠領導之精力同口水直踩到放工都冇問題，如果今日冇特別提出三點半一定要出車的話，等佢地開埋會分分鐘可以趕尾班車喇。去碼頭聽工廠老細講，原來我間廠個鎮好出名，許淇安幾日前過左身，而佢地許氏家族就係呢個鎮出身，當年許冠傑出名後返黎探親，成隊公安由村口起列隊歡迎。越講越多人，原來個鎮出左好多香港名人（咦我都叫沾到ｄ光喎騎騎），數下數下，連泛民派成員都有份。真定假呀？

「咁大鑊？原來呢度係反共基地？？？」

經過無數次響鞍加大量粗口，百二米極速奔馳中途遇上多次幾乎發生之交通意外，比平時快差唔多一半，兩個字就飛到碼頭了，睇黎老細自己都好急住返工廠開會。我堅持要搭船的原因除左舒服同快加唔使起身過關＆返到香港剛剛好六點過少少唔使返公司一舉四得，再貪佢尖沙咀落船，好耐未行過街，臨返屋企可以順路去HMV望望，估唔到《G.E.M.》而家可以出到第三版咁激，連HMV都賣到$69咁平，似乎值得為首remix bonus track買隻喎？不過此行只掃番幾隻舊中文碟，講出黎俾各位專家笑就無謂啦，襯減價入多隻《V for Vendetta》DVD，黎緊TRHK可以再開電影版罪了。其實本身諗住再過通利，搏會唔會仲有謝安琪演唱會飛賣，諗落似乎又可以免喇。我想睇尾場16/5。不過16/5係咩日子？甭提。

其實本來好灰，因為每年五月呢個時段，我都會飛左過拉斯維加斯做展覽，正正同謝安琪演唱會撞期冇得睇，點知今年個市差到喊，老細決定都係放棄美國展算，心諗有得睇啦？到自己搞show撞日子。本來仲打算落本睇足兩次。似乎冇行了。

「再提提大家，而家兩場show仲賣緊飛架！同黎緊兩個星期，TRHK星期三晚照開，即直踩到22/5全部日子都開門！記得上黎買飛！」

雖然《紙談》版只得一版咁短，每隊band訪問全文有咁長，每隊band十幾條問題架。今篇訪問，說來話長：其實最初打算幫IE好似DECAPITATED噉寫一個特集，不過我從來只識寫長篇大論唔曉精簡（．．．），《紙談》一期得一版一千字左右，單寫最新三隻碟加近幾年換人轉歌路都唔夠位啦，加上四月搞完展覽會勁忙唔夠時間寫，臨交稿前兩三日決定改用Plan B：幫兩隊band做個訪問算。本來打算再做詳細ｄ，即係每隊band最少有二三十題，不過佢地得一日時間回覆遲左就交唔切稿，加上果日病病地加煲緊U2（明顯後者才是主要，呵呵），同好多問題寫到好深純粹自己想知想研究，問完出左街都未必有人會理會明（知唔知BlackWine出《影子》果陣，我寫俾佢地篇「模擬訪問稿」有六十幾條題目？外國雜誌都唔會問咁多呀！），所以問十幾條再揀一半出街乜都夠，亦好好彩今次兩隊band都有覆，其實自第一場04六翼天使起，幾近全部show我都有準備訪問俾所有外國band，不過你知搞親show我一個人要顧幾多野，今次全靠《紙談》之便／藉口（呵呵），樂隊訪問先能成事。但又唔係點稀罕，老實講。而家仲有幾多香港人會認真睇非潮band訪問？專家們都係果句：

「隊band乜料？要我睇咁多字去識佢地？放seed俾我好過啦！都唔識佢地，你唔係諗住要我俾錢去聽佢地丫嘛？」

此題目，又可作進一步延伸。自從近幾年人人上網、免費音樂（即download）極速普及，連舖頭仔都有DARKTHRONE賣時，你就知metal已經潮到無可再潮的地步，進而有外國band份演出之indie show成行成市到家常便飯級數。不過，唔知你有冇留意過：當一隊外國indie band黎香港表演，你對佢認識會有幾深？可能除左場show公佈之後幾十字簡介加MySpace幾首歌，之後到香港睇完「好勁」，但對隊band甚至佢地種音樂認識可能僅限於此，走左之後已立即遺忘，之後亦唔會有多少機會諗番起佢地。回到原點：其實indie成員為何要辦秀？因為要推廣音樂。自從音樂等同於上網一個BT搞掂、一隻碟可能夾埋聽得一次都唔夠、一隊band聽過佢一兩首歌已等同於「識左」「聽完」、每日聽少左一隊band追唔切上網會俾人笑，band名自然比音樂重要，難怪好多年前已經再冇香港人會落手寫中文metal網，forum上講metal主題極多但幾近全屬「分享」（加好多罵戰）而冇多少討論音樂本質，就算有人提出問題或討論，往往只得到含糊與非肯定之回應，假如有人應的話。而家咁多人搞show，又是否秉承得到最初之推廣、教育音樂之目的呢？

有樣特別，係既請外國band黎香港，某程度上佢地應該係全場全晚主角，但好多band show反會集中宣傳番本地樂隊，而外國樂隊做到似opening多過headliner。就如上面所講：有幾多band show搞手，除幾十字簡介加post條MySpace link出黎，會再有特別推薦海外來賓同佢地種音樂俾觀眾識？真係好少。反而有時候講番本地樂隊／自己隊band仲多過提黎表演隊外國band。其中一個最容易之推廣、教育方法就係訪問，直接叫隊band同所有人講佢地音樂概念、心態、心得加講解自己種音樂，唔止睇訪問時學到野，入場前準備好睇show時自然更加投入。而會替來港演出indie樂隊先做訪問或寫專文介紹，幾近一面倒只有外國人籌辦之演出，而少見會有香港人搞外國band黎香港，演出前會為外國band做呢ｄ野 － 我相信LLNR有做過。而家《紙談》，你見逢Start from Scratch同TRHK搞show，都一定會有一版／幾版係樂隊訪問，最得意之處在於，呢兩間本地label都係外藉人士成立。想聽多個諷刺案例？當年DEATHGUY黎香港，唯一一則公開廣泛流傳之多元深入樂隊訪問，唔係主辦單位，而係劉Sir同獨立字頭兩個局外單位負責。好多樂隊同音樂都如此例，演唱會過後即逝。從而可知香港band壇文化中，音樂與知識之地位有幾高／低。

因此，我已經好耐冇寫過metal碟評同長文，香港band文化下，你認真用心同人講音樂，「有效」程度、受歡迎程度、被注意程度、獲正面回應之機會，遠不及乜都唔使講簡簡單單直接post條download link出黎咁大。所以我都廢事寫了。已無需要及意義。時移世易，過氣了。

「再提提大家，而家兩場show仲賣緊飛架！同黎緊兩個星期，TRHK星期三晚照開，即直踩到22/5全部日子都開門！記得上黎買飛！」

原先只打算對黑夜遊人前輩作個簡單回應，因又失預算，唯有特別闢疆以覆。

其實要回應「文盲論」之好多論點，文中已經提及到。我所講之講音樂（「談論音樂」或更政治正確／順耳）實指整體。要認識一種音樂，除左用心聽，有時的確需要靠睇，如音樂背後歷史文化，甚至單對一隊樂隊一張專輯更深入認識，有賴從不同作者多方面文獻／「導聽」，正如單聽一種音樂而唔睇書，唔會明白種音樂出處歷史、與其他風格之關係，及其自己一套文化。

以前上網未普及時，show前show後寫作反更盛行，大家會就音樂本質作討論，非一定要長篇大論，最少會有相關文章介紹樂隊評論音樂，大家感受得到整個風氣存在，容易帶起聽眾動機去理解所聆聽到之背後。如今問題出在樂迷、搞手甚至樂隊間，反而忽視要營造風氣之必要性，就如前輩所言，一隊band黎前走後，入場大家對樂隊（甚至佢地種音樂）認識並無差距或大進展，只成一種形式性參與。係樂隊本身出問題嘛？演出前夕及期間，好易聽到見到觀眾提住隊band點勁技術點高台風點好整體點犀利，換言之唔係差或唔受歡迎，只係隊band一走大家立即視若無睹，睇睇咁多外國樂隊黎香港之後仲有幾多人會買佢地ｄ碟就知。問題在於來港band真係唔夠吸引力，還是其他方面？

香港網絡上可以見到好多人，經常甚至每日提到自己聽過乜新band、睇show如何頻密，同「聽好多」的佢地傾偈，同你講聽過乜band好容易隨口隨手幾十個名，但問佢知唔知自己聽緊乜，當中精神係點？已經用功左幾年的佢可以答你「其實唔太知」。近年易左搵音樂，進而多左show、多左外國band黎香港，真正有心研究音樂本質或談論音樂之樂迷比例卻不斷下降。前輩曾撰HYPONIC簡史，講到佢地巡演中國，啟發好多內地人聽metal、組樂隊，反而更接近國際之香港唔會出現相同情況。此是我一直指出之弊端所在。

撞／搶／鬥show方面，前輩所述完全正路，亦即我聽過無數次之「主流論點」：

1. 極比TRHK更早決定11/10搞show
2. TRHK知極搞show，所以決定同一日做show

而我會話呢個係個笑話，皆因真實發生過之情節，正正同「主流論點」近徹底相反。而家全部人都如前輩所言，覺得劉Sir同TRHK中間永恆存在一個等號，但從來我冇參與過其中任何重大決策如搞show或簽band，只屬一個自由身外援，當TRHK有問題照樣如我blog中態度直接向話事人提出，接到指令覺得有問題同樣可以唔跟指示做野，TRHK非我地頭，只算一個提供機會俾我觀察同研究香港metal界之平台。半個身站在TRHK外，搞show我唔係個腦只係對手，都有機會睇到上年八月至現今幕後發生過乜事，暫時可提供之事實有：

1. 08年八月初至中，DEFILED已主動同TRHK聯絡決定黎香港
2. DEFILED一開始已講定會同HYDROPHOBIA出同一場show，而唔係分開表演
3. 因日本方面要同其他表演地點如澳門確認好日子及行程，八月底左右演出日期定為11/10
4. 基本上除場地及香港樂隊，TRHK演唱會九月初已籌備完成
5. 正正九月初TRHK公佈演出之前一日，先收到通知DEFILED選擇參與其他表演，一切宣傳被迫暫停
6. 當TRHK擱置公佈演出一個星期之後，另單位搶先公佈同日舉行一場包括DEFILED之演唱會
7. 因要另尋樂隊代替DEFILED之位，結果TRHK比其他演出遲公佈，即使比人早定好
8. 自遲過其他人公佈即日起，已聽到接近一面倒之「撞show／鬥頂」言論

換言之TRHK理應比任何一個單位更早同日本方面接洽，日子只因需協調整個中國巡迴到後期先決定，另無意外發生，TRHK會比任何一個單位更早確認及更早公佈，換言之TRHK由始至終都係最早決定搞show加比其他人更早開始籌辦，只能成為俾人搶／鬥而非去搶／鬥人一方，如噉都可以叫做TRHK「知道有人同一日搞show」而決定要頂，我無話可說。

另我想提出一點，半年以黎除左站在整個市場觀察之我，冇任何人思考過提出過：

「當一場show可以同時出現EVOCATION同HYPONIC兩隊香港現今最受歡迎metal樂隊，加上係HYPONIC『久休復出演』，就算冇其他（海外）樂團同行都能輕易得到過百人支持，仲要一張飛$100有tee有DVD送，你會唔會／夠唔夠薑頂？」

老實講，當時我舖外都同人講過，唔係自己要搞show的話一定去睇，我未睇過一場正式玩得好之HYPONIC live，單為佢地一隊已經值晒張飛，同一百蚊左右買完飛睇完show仲有新衫著有DVD睇喎。換著任何一個稍有認識同理智之正常indie metal gig搞手，都會知道同一日辦另一場show，即使做到免費入場都冇可能鬥得贏，如真係要做，我會用「戇鳩」去形容。敢問黑夢游人前輩，縱大家從未親身見面，單憑對我之微薄認識，唔會覺得我有咁戇鳩卦？雖然TRHK中我從來冇絕對決策權只屬幫手（故我常講我只屬半個TRHK人仕），如我知道當事人真係咁「有心」同日搞多場show對頂，又點會唔用盡一切方法去制止如此戇鳩的決定呢？

「點解冇人思考過，點睇牌面TRHK都冇可能係主動去鬥之一方，只有可能被鬥？簡單一問：你有心撞／鬥的話，會唔會搵個陣容論名氣同受普羅大眾歡迎程度遠低，加遲過人公佈之餘賣飛貴過人地？好似大家覺得以卵擊石比反之更合乎常理行為邏輯，同對被灌輸之資訊過於盲從而唔先自行思考合理真偽與否？」

前輩無提出「主流論點」的話，我仍然唔會揭露多少事實，如問點解仲唔寫出全件事，即使到此刻仍然模稜兩可，全因好多立場及兼顧。如果以劉Sir個人名義暢所欲言地寫，相信要等回到真正獨立個人身份，如離開TRHK之時。同我覺得有時好多野唔需要講太多。至今我仍未能完全接受或投入香港獨立音樂界，全因當中實在太多是非爭鬥，一個現象係好多同類型利益單位例如零售商或主辦單位以至樂隊，往往會以TRHK作假想敵或踏腳石，咁多年黎TRHK從來只有主攻音樂推廣冇任何小動作，就係耐唔耐傳黎好多閒話「有人話TRHK話劉Sir乜乜乜喎」，聽完一笑置之，因為冇幾多宗唔係子虛烏有，其中一例有好多年前新界開左另一間metal/darkwave舖，開張時先有人到forum投訴TRHK經常宣傳商品，跟住投訴人自己以該新店售貨員身份於forum上催谷自己間舖，或者有人仲記得經典之「乜你而家仲聽X-JAPAN咁out呀梗係聽DARK TRANQUILLITY啦」主題。到過左火俾人群起攻之，就話「係劉Sir開假account扮我地黎抹黑，驚我地搶TRHK生意」，但全程由始至終我冇上forum做過任何野甚至潛左水，更加從來冇講過另一間舖乜野，就係有人信流言都唔會信劉Sir／TRHK。六七年黎久而久之已經慣左呢種香港獨立音樂文化，所以你見無論發生過乜野事，從來只有其他人話TRHK點點點，而冇TRHK官方（即非劉Sir）抨擊其他人乜野或作回應／反擊，劉Sir自己都懶寫咁多，皆因深信自己冇做過野冇做錯野加清者自清，有心做音樂總有人知。此從來是TRHK之音樂及工作態度。相信長期睇劉Sir個blog必定會認同。

未寫，另因餘下兩念。唔知前輩有冇睇《蝙蝠俠－黑夜之神》？結局蝙蝠俠為顧全社會穩定，決定承擔被誣陷成殺人犯之屈辱。可能會有人覺得好囂張（我已預左會被人斷章取義），但此乃最接近比喻。承上本地獨立音樂界多是非之論，既已經咁亂咁多糾紛，何必再擲石於湖？係咪當極搞一場show可以咁成功、可以吸引到咁多人去進入metal、可以令整個metal界以「戰勝共同敵人」而進一步團結時，而TRHK／劉Sir唔再深入回應，就可以助長整體發展？如果係，我又唔介意將全單case封塵一段（長）時間，老實講，即使睇得出本地好多荒誕虛偽有時甚至頂唔順，始終叫自己地頭，總希望佢可以做番起、再進步，人唔得，都希望音樂水準可以。

另一念在於整個文化中TRHK之定位。正如我講過，當而家香港metal界中夾band同支持免費音樂等同於「正派」，而要求人俾錢買（地下）音樂等同於「反派」時，TRHK屬於一個要你俾錢先可以買到音樂，加缺乏多人認識或潮流效應唱片之商業性營運機構，以label身份去做任何野，幾近必定淪落至俾人話「搵錢」同「商業」，我已經聽得太多，不過唔知點解「搵錢」「商業」咁多年，TRHK兩個人仍然冇任何一個試過全職做音樂，同發言者可以當TRHK內佔全店九成以上之地下樂隊冇到，及唔會對其他主流唱片店如HMV等作相同評價，甚至會選擇去主流店買碟而非indie店。被一面倒認定為「冇心」「搵錢」「商業」「反派」時，你就知講多都無謂，不如留待真正適當時機。

因此，「撞show」發生之後，你只見其他單位、樂隊大量言論，而「官方回應」，最接近只得劉Sir演唱會後簡短非官方評論一則，皆因清者自清信念，及上面講過：你抽身從客觀角度一望，自知所謂「TRHK鬥人」之說冇可能成立，甚至輕易睇出其中另有內情。結果事實證明，抱清者自清心態者，真係冇可能於香港生存得到，同香港人確實唔會思考，自演出後自己都轉低調時，仲可以多時被人用有正面有負面種種不同語氣問「點解你地同人地撞show呀？」，睇到有人Facebook上面寫「TRHK搞show同人頂點知點點點」，甚至有人話我聽「場show有隊band唱左首歌叫《Fuck Trinity》」（個人不知真偽），有時我都覺得當初冇回應到，可能真係戇居左，正如我聽過有人講TRHK知人地搞show自己又搞，點知「鬥輸左」冇聲出又要面，結果劉Sir亂吠一餐，跟住唔夠人講搞到無以為繼。事實呢？睇番上面咁多段。而現今事實是，相信「劉Sir亂吠」已成一個笑柄。

同埋場show已過半年，直到現今仍能發生好多事，近日再有新進展，更多笑話出現。既全件事實際上未完全結束，與其逐少逐少寫出黎費時失事，不如等正式大結局一次過全篇同你從頭到尾台前幕後講晒，亦都講過寫的話唔會單寫場show，而會由四年前開始從文化角度出發。前輩文中提及過，對劉Sir之模稜兩可感到「失望」同「不公平」，其實全應從另一角度出發：半年前一場撞show事件，居然經過半年尚可餘波未了，或者唔係失望我到而家仲未寫，而應該失望點解到而家仲未可以寫；自演唱會前即08年八月初起，至今日整個過程中TRHK冇做過任何對其他人不利行為，而只作受方承受大量偏離事實衍生之打擊及流言，到底全件事對邊一方唔公平？況且我都講過，TRHK從來處於弱勢，有心人完全唔會覺得唔公平，更可能寧願繼續唔公平落去添，睇番提及過之「劉Sir亂吠」。希望個故事可以盡快結束，等我可以將全件事寫出，到時唔好變成有人話TRHK唯恐天下不亂就得。雖則，早對呢種香港獨立音樂界特色思維習慣加睇化了。

最後回應一點：按照Yahoo統計，劉Sir個blog訪客日均不足一百，我唔覺得點樣多人睇法，雖都敢講全中英文界，自己個網算生活文化及音樂中思維最另類最獨特之一，最少黎到用心睇一定有所得著，同其他地方唔會搵得到， 不過講到影響力／殺傷力，不見得有幾大。認真寫metal已有五六年，如真如前輩所言，我空談幾句即可影響大眾，香港metal界好多問題應該一早消失，TRHK早就生意興隆，加我發左達好耐，唔會人加舖「搵錢」「商業」左咁多年還是折墮依然。如真要講到劉Sir咁有影響力、佢文章確實蘊藏龐大煽動力量同高深智慧，寫左咁多年音樂同metal不見啟發到多少人，反而絕大部份聽metal人士唔會（敢）同人講佢識劉Sir、有睇劉Sir寫ｄ野，加同劉Sir連帶TRHK保持遠距離，或是又一本地獨立音樂／本地metal失敗例證？

「為免又遭斷章取義，重申一次：劉Sir寫野好廢只識亂吠架咋，呵呵∼」

前輩多則回覆中，似乎將重點從撞show之日及其後發生之事，轉移到「邊一邊早開始搞show先／邊一邊早決定早開始先／邊一邊決定11/10先」之類，加上用字文法不一，相信非全是黑夜遊人兄自己所覆？此方面討論相信總有機會，老實講，我只講出我所知，事實可能的確會有所不同，有興趣歡迎到時慢慢插，反正我從來冇講過自己一定岩晒，我只講出我所知。黑夜遊人前輩初時帶出，係討論後遺。我先回到正軌。

睇黎前輩（或有份參與回文者）仍相信一點：TRHK後發兼故意定同一日辦另一場show，一直論點從此出發可見其一。並有提出過「就算知唔夠鬥都可以選擇去撞」等。須知搞本地indie show大家就算同一日辦，即使各方只得好少人出席都未必蝕本，但請外國band成本必過五位數，如同一日辦只會兩敗俱傷。我亦講過稍有本地metal常識，見到有EVOCATION+HYPONIC+兩隊日本band，都知屬對立必敗局面，我唔覺一個正常思維者（包括我），明知搞親必定唔夠人鬥，仲要一蝕就五位數加樣衰到爆，仍能咁「有心」去燒幾萬蚊兼丟自己架。我文帶出過一點，當「主流言論」同我聽到之流言係個個講到TRHK見人地11/10搞，自己又11/10搞、去惡意撞人地show，但睇到咁大個破綻，都知前提已經成立唔到，知TRHK根本唔會噉做、唔會「選擇去撞」，其他搞手我唔知，但當有可能全香港indie metal中唯一一個會提出市場層面論點之劉Sir有份插手時，敢講所有人包括前輩都會相信呢種事冇機會發生。但前輩之回文中，可見仍然冇多少人用常理去剖析事件經過，未改變一面倒當最初聽到之一切「主流言論」就係（（近）全盤）事實，覺得TRHK真係選擇蝕五位數資金去「鬥」。如果係噉，得我一個從市場層面解釋，而其他人仍從單純樂手或搞手層面去睇時，我諗我再講落去都好吃力，硬要認定TRHK蝕錢都要夾硬做，邏輯已偏離常理，就連我解過畫都唔改變唔到，我唔知仲可以點覆，就同所提過，你繼續當我係條戇鳩仔算啦，噉樣大家都會輕鬆好過得多。

至於點解模稜兩可？演出日子係11/10，但「主流言論」並非當日或之後先開始傳出，我第一則發文之前，最少有一個月時間睇到「主流言論」之發展及其影響，而演出後一個星期，從其他人口中及網上睇到，更是非常不堪。上篇文提到，劉Sir本身毫無影響力（如真有，好多事根本已解決／唔會發生），單單幾隻字我唔覺得會引起到乜野揣測，只會俾人當癲狗亂吠，仲多一個笑話笑添。噉點解話唔講又要講？如指係我上年演出後第一則發言，第一次已聲明過同一切從一個本地metal迷身份出發，換言之TRHK官方都冇回應過，好多人都知我態度一向係見到有問題有錯就應提出，一面倒盲目支持，就唔會解決得到問題或再進步，從而講出此樂迷 － 一個比其他人知多ｄ內幕消息的樂迷 － 所見到。如是指近日之發言，我只係被動者，當前輩帶出「主流言論」，已是唆擺我破戎引發今次討論，否則我根本仍未講過任何野。。提左，又是否有錯呢？似乎大多數者（或包括前輩）覺得，在「主流言論」之下，TRHK方面真應完全沉默，包括劉Sir以個人身份評論都唔應該唔可以。但我聽到睇到，「主流言論」之主動傳播及影響並未有停止，而此等傳播一直對TRHK帶黎深遠影響，包括好多人覺得TRHK真係咁惡意去壓制其他單位，從而令失去為數唔少之潛在顧客（這是事實），更有人以此為名杯葛任何TRHK所辦演唱會（這也是事實），亦即沉默落去，無過犯之「反派」TRHK會遭受長遠營運影響，但反觀從中獲益之其他單位事件發生前後各種行為傳言特別近期之事，我正思考是否值得如此保持緘默。用番前輩之「公平」論：文中提過，*****真係有幫助的話*****，可以封閉全單case完全唔講，但半年來之景，如此境況是否真係算有幫助？又是否對TRHK公平？人所共知香港人從來傳人壞話最快，在此半年間TRHK所受之各式打擊，並非不屬label界之前輩所能想像到。是否在此情況，仍值附和「主流言論」主張者、支持者所想，TRHK及劉Sir繼續低調呢？（註：近日「高調」，只因回應前輩之提詢，而非我主動高調帶出。）

某程度上，我回文其實有點多餘，因看前輩日來回應，語氣雖平和，內文其實已顯偏袒其他單位之意，即使我指出過多項資料證明TRHK冇可能係特登惡意撞人show，不見得有多少改變，精明如前輩都未有思考及接受到我提出之最大逆邏輯漏洞，仍覺得「TRHK為型為蝦人蝕幾萬蚊在所不計」屬理性選擇。同自一開始即上年演出後起，前輩已執著晚輩之言論多於其他人之言論，例如提出劉Sir幾句會引來其他人對另單位作出不必要之揣測（老實講，我真係唔覺得會有／會幾有效喎），卻唔會質疑番另方，即一位觀眾同我講番「有樂隊可以公開於二百幾位本地樂迷及兩支海外樂隊面前公開唱一首歌叫《Fuck Trinity》」之一方，所發佈之「主流言論」真偽（從前輩第一篇言論，已可見如我演出後冇發過任何回應，前輩會對「主流言論」照單全收，及不見得會有足夠動機特意聯絡劉Sir／TRHK查證虛實），亦冇公開質詢另方傳播「主流言論」對TRHK可能帶來之潛在影響（已發生良久，及遠比劉Sir寫幾隻字大殺傷力大影響力好多），早已自為兩方定正邪，似替友人求清白多於一切。在此情況下，處於弱勢之劉Sir及TRHK再回都冇乜意思。仍想繼續討論，總有機會，請待整個故事結束之時，我都講過未全寫皆因未完結。

仲有意繼續引發潛在討論，歡迎繼續回文，不過最少唔好夾硬當我地、當劉Sir係戇鳩仔先，否則我好難合乎常理邏輯回覆。我唔識覆顛覆思考講野，例如，我答唔出「係我地係明知唔夠人鬥或本身無知都選擇拎幾萬蚊出黎同人地鬥」之類。

再重申：今次討論從頭到尾非我主動帶出。請唔好話係我撩交嗌。我從頭到尾只負責回應。

三日來言論，好似只得前輩之發言日具火氣，而我咁耐以黎發言中唯獨找到無奈？好老實講，當一件事我已經睇到好化時，好難令我再起到火。前輩覺得我語氣中帶火（進而咁有火氣的回答），就當我係啦，我份人一向隨和。我只有話part 1-10部份句語中（非全部）用字、別字、修辭等多方面，的確非常迴異於平時之前輩，易生非同一人所寫之感，如此乃誤會，還請大家見諒。

我針對緊整個「主流言論」所提，即而家人人講緊（加前輩支持緊）之「係TRHK知極11/10搞show，特登同一日搞另一場惡意競爭」。老實講，一直以來前輩其實亦同我一樣模稜兩可，在肯定「主流言論」中的細節之餘，提出論點時有退卻。我日前回文中有兩點提出過：

1. 逆邏輯之前提。基本上睇穿呢點，已經知道「主流言論」甚至前輩都有點支持之「惡意搞show／撞show」唔會成立，我亦已多次及用多種形式去表達／保證過，有劉Sir在，TRHK一定唔會作出如此舉動，冇錯我只係TRHK對手，但唔代表我冇能力阻止呢種戇鳩事發生。但經過多番解釋，劉Sir本身無機心去做呢種撞show事（我同極最少11/10前從來無過節，加上我非能動用如此資金人士），而TRHK要撞show劉Sir亦唔會俾佢搞，前輩繼續堅持有人可以掌握充份市場知識及欠動機下仍要「惡意撞show」，並提出「TRHK絕對有權咁做，on唔on9，我唔知，亦唔需要理」，已是先入為主及不顧客觀事實。某程度上黎到呢個地步，討論下去已無必要，因前輩似乎只想聽到自己想聽到之言論／想聽到有助另方之言論。

2. 雙方之時間表。同樣，邊一邊早過邊一邊等我冇興趣理，真係到有官方公佈資料時先再比較都未遲，再重申：我冇講過我所有資料一定岩晒。好似冇乜人知道，DEFILED同HYDROPHOBIA兩隊係一齊巡迴亞洲，而DEFILED一開始聯絡TRHK時，都係以此方式來港。從我提供之時間表可以睇到，兩隊band黎到香港會拆夥加導致同日出現兩場演出，亦即係話其實上年十月本來只會有一場show。另外一提：因為兩隊樂隊一同巡演中國之日程，及玩完香港第二朝要返東京表演成個巡演最後一場，「唔刻意」之可能性極細。

一直以黎，前輩只著重於所知道言論（包括TRHK及另方雙方面）之表面，而無太深入剖析，好多時新論點、其他觀點，都係我畫出腸地指出，如不合邏輯之前提。今次之回應，當然又可延伸到為何一個雙樂隊巡迴組合，偏偏黎到香港先會拆夥、會導致有兩場show，我講過好多次，今日仲未寫，因為全宗撞show事件未完全結束。前輩一直之觀點，係覺得每次有發展的話，我／TRHK（而非另方）都要即時公開講清免生誤會，如按照近半年發展，差唔多每隔一段時間就有新發展，但又以前輩現時之推理及典型港人心態，如我／TRHK真係如前輩所言，每隔幾個禮拜就「最新消息係ＸＸＸ」地發言，有心人（可能包括前輩）只會話劉Sir／TRHK唯恐天下不亂加死要面，而唔會如前輩理論所提覺得劉Sir／TRHK係即時為大家彰顯最新真相，皆因TRHK早已被定型為「反派」及弱勢。再者，呢種事一開左個頭就會有排燒，坦白講，我亦冇興趣將我地頭，一個講自己生活同音樂思想之地頭，變成一個戰場 － 近幾日一切都係前輩發言挑起，我非主動帶出一方，但單回應前輩數點咁簡單已經涉及咁長時間加咁多字數時，真係幾個星期出一個新論點的話，會拉鋸幾耐、會涉及幾多精神及時間？處於講又係俾人鬧唔講又係俾人鬧情況，連一向平心討論之前輩都開始呈單打姿態時，點解我唔等全件事完左先慢慢解釋？反正係唔係都死架啦，不如挑選一個較便利自己之做法，橫掂解畫與否選擇權在於我／TRHK，而我方不解，另方亦根本全無損失甚至有利？詳又睇番「劉Sir亂吠」論。TRHK惡意撞show又「鬥輸」一點，絕對方便有心人大做文章，有心人更加會希望TRHK繼續冇聲出添，噉先似輸嘛。

經過多次解釋，到最近一次，前輩仍繼續堅持劉Sir網上寫幾隻字存有誤導，對極帶來（不可能之）潛在聲譽打擊，並屢屢提及公平之論。但同樣我一開始已經講，點解咁執著於公平之前輩，會在我提出不下於兩次後，仍對

1. 極方於演出前已經到處發佈「主流言論」，影響TRHK生意及門票收益
2. 有樂隊於極方11/10演出中，在二百五十人及兩支海外樂隊面前公開演唱一首歌叫《Fuck Trinity》
3. 演出後至現今，有人仍繼續以「主流言論」打擊TRHK甚至劉Sir，半年間為此本地廠牌帶來可觀之商業及人流損失

三點視若無睹、唔會覺得以上行為及言論對TRHK唔公平呢？亦唔會覺得另方言論一樣可以存在誤導成份呢？單比較我模稜兩可幾隻字，同一首開宗明義《Fuck Trinity》公開演出，兩者程度已經完全唔同，前輩唔會覺得一個人網上「暗示有人專登撞show」，會嚴重得過一隊知名樂隊當住二百幾人加兩隊日本band面前大大聲「屌鳩TRHK」卦？又你覺得一個普通香港人會信本地metal界早已避之則吉又不存在影響力之路人甲劉Sir，還是一隊已人人追捧之香港頂級extreme metal band？從前輩至今仍支持「主流言論」多，已是個行動例證。

如前輩真有心尋求公平，「主流言論」早於另方公佈11/10一個演出時已開始散播，直至演出後個人發言前，中間之充裕時間空檔中，點解又不見前輩會向TRHK主管或劉Sir求問真相，從而比較雙方以探真實呢？

另前輩提出向來會作出種種糾正，以上一點作延伸：真有心糾正，為何聽到另方「主流言論」後，又唔會即時向TRHK或劉Sir問證，以確保「主流言論」無誤試圖為TRHK糾正，而只有待劉Sir「誤導對極有影響」先開始呢？亦從來未見過前輩演出後半年黎對「主流言論」有任何大質問，更莫說試圖糾正或制止散佈之動機？

有見前輩提供之糾正例子，加綜合多時發言，不難看到前輩每每會作出發言、糾正，都係與其他單位或樂隊如極及其連繫樂隊，又即與自己友人有牽連方會行動，所以前輩從來冇就「主流言論」提出質詢，反會質詢指出「主流言論」不實者絕非古怪。但在此立場下，前輩之出發點已經缺乏足夠客觀性，所提出之「公平」者亦不如前輩一向提倡咁公平。如真公平、真重視公平，前輩理應一早已對上面我提及過不下兩次之多點作出回應，為TRHK討個公道？

到近來，前輩之討論態度更大幅改變趨激進化，台詞中「TRHK嫌疑大過其他人」、「一定係TRHK有謀在先」之意比初時更重更明顯，可見其實早就視「主流言論」為全部事實，但當我連日來未有任何改變，前輩卻連用字語氣都改變到可以令人誤會係另一個人回覆，及越來越偏離客觀，如此討論態度與情況，確實唔適合繼續進行討論，因為持續落去相信只會演變成劉Sir／TRHK承受進一步激烈單打，到時除非我地認低威，否則對部份人如前輩而言並不算真正結束（註：寫出全件事經過與認低威係兩回事）。噉又有乜意思，何來真正討論之有？

另可以繼續放心，至此刻我未有如前輩動過絲毫火氣，呢回事已經好難令我再火，自覺語氣同用字已經相當心平氣和了，最少比起前輩。

當然，我亦歡迎繼續指教。特別是前輩帶出之「公平」論。

我都希望可以快ｄ完。但相信暫時完了。

後記：多謝黑夜遊人前輩幫忙完成今次實驗。平時正正經經寫音樂寫metal，一日只得幾十人駐足，冇太多人登門造訪。當話題由音樂轉到近日有關撞show事件之議論，瀏覽人數即有大幅度上昇，幾近可以增加一倍，進而又多一個例證支持俑中提出論點：香港band壇文化中，音樂與知識地位有幾高／低。高不過是非。

人人都知劉Sir係超極級謝安琪粉絲。難得今個月紅館開演唱會，避得開第一劫今年唔使去撞期美國展，避唔開第二劫IE，場show仲要撞正我最想睇之尾場，自作孽十分無奈。本來諗住今晚好似上次陳慧琳walk-in上紅館搏買即場飛，因為要開舖繼續賣飛行唔開，好唔開心。尤其是舍妹去左睇頭場，聽佢講番唔單止有陳奕迅做嘉賓（灰呀！），佢仲要識人係３用戶同信用卡訂飛，唔單止有得拎免費簽名碟同簽名大海報，場show完左又可以入到後台搵謝安琪影相簽名傾偈，仲要好好人全無架子主動撩你傾偈，影相又會自己走埋黎搭你膊頭果隻。搞到我好想喊。老實講，今鑊一月兩場TMF令我損失左去紅館睇謝安琪的機會，打擊更甚於睇唔到邊隊metal band。講著講著，開始有ｄ唔多妥IE添。

「劉Sir已經不再metal了，口桀口桀∼」

反正預唔會有多少人上黎打擾，近來日頭夜晚都忙有點支力，開舖賣飛的星期三放放假睇戲算，反正無聊屋企又多存貨，或者第時逢星期三上黎舖頭開電影版罪清清囤積過度之DVD先。老實講，我好想買番《The Wrestler》隻DVD，搵個禮拜三上舖頭熄晒燈扭爆聲黎煲，齋聽歌已經值晒，不過望望屋企堆DVD（CD更加唔好提），除非撞正平貨（近排HMV《Sin City》減價有興趣執番隻特別版），留番ｄ銀根買CD保險過買DVD。而家寫野好懶好慢，之前《復仇》＋《原罪犯》＋《親切的金子》三部曲過左郁都未郁，睇完一套戲往往個幾月後先出街，今次，又先睇番套舊戲先。

半年一集，即使第一集十分失望，對第二章《最後之希望》期望極高，因為全漫畫最鍾意係第二集年期段劇情，即反朋友派各散東西，健次失蹤，主角變為珈南時。想大概知道，簡單講講：「血腥除夕夜」後，健次失蹤，落仔被捕，其他人行蹤不明，仍知去向只得第一集女主角雪次，及健次家姐同「朋友」所生之珈南。偶然發現朋友計劃刺殺即將探訪新宿之教宗，用個人魅力、勇氣加上繼承自「朋友」之超能力，令一家賭場破產籌得大量資金團結中國泰國兩大黑幫，再遇落仔等反對勢力，多方面共同保衛新宿及教宗安全，不過最後先發現估錯晒：「朋友」冇諗過殺死教宗，真正目的係令自己成為神，再引發新一輪人類滅亡危機。雖然點計健次先係正式主角，反而冇佢劇情更加吸引更加緊湊，相信靚女角搭重電影感劇本存在深思熟慮之商業計算。

「講起女角，有樣野好想問。第一集片尾預告首次出鏡位珈南，唔知鏡頭定化妝定乜野原因，相當樣衰。今集做珈南果個，真係同一個人黎？？？？」

論全套漫畫，此部份緊張刺激懸疑動作兼而有之，最容易亦最適合改編成電影，而且上集套路接近荷里活多過日本本土，好難差得過上集？估佢唔到，導演居然敢向高難度挑戰。有鑑上集之大幅省略，對於新角色早不抱信心，唔少（重要）人物被或大或小地犧牲，可惜為減篇幅，人物減冇所謂，連漫畫最重要環節都冇埋：藉一碗麵平定黑幫騷動呢？一個無名小卒賭贏成間賭場呢？一個靚妹點樣講服數百黑道中人，令兩大黑幫肯聽佢指揮團結一致呢？教宗同新宿主教間段江湖情呢？最後朋友點樣復活勇救教宗，從而比神更偉大呢？換言之漫畫中環環相扣，直到最後引發高潮睇得人蕩氣迴腸之一切，通通被遺棄。

部份情節因而變得薄弱，好似中泰黑幫同珈南傾左陣，就立即停火收手加聯手保護佢，純粹因為覺得佢「幾過癮」，一來夾硬得太戇居，二來直頭令跟住賭場加教堂戲無用武之地，對於電影長短黎講此乃必要，又有冇諗過睇過漫畫一班，正是為遭大改或刪減之部份而入場？完全未能顯出主角之懾人魅力，而朋友樂園bonus stage一段，亦只有將「朋友」之身份同經歷再加含糊化。其實我幾鍾意新劇情中「朋友」之死，原來係成班人無端白事夜訪母校，跟住無厘頭中槍就死左（此乃漫畫後段作者自己都開始唔知點埋尾而亂咁黎／夾硬黎之序幕），呢度講到昔日被利用為「朋友」創造病毒之科學家大悟，就等「朋友」（代替原作教宗之位）訪問新宿時當眾槍殺佢，比較合乎角色關係及情理，但又要睇番，全靠先抽走教宗，進而令前述過漫畫中幾近全部重點劇情未被使用，我寧願佢唔改照足漫畫拍算。大結局一如所料健次回歸，零距離承受原爆都唔死唔傷，本格科學再會。改編唔得人心，演員演技對我黎講又未足夠（最入戲，相信都是朋友樂園班爪牙），真係睇到人好灰架。

第二集一反常態咁快收筆，皆因已經冇乜好寫更加冇乜好讚，我擔心睇完第三集，會直頭無言。

多謝各方好友支持（大量意想不到人士出現），IE香港演唱會正式結束，太倦又未有相加黎緊星期六23/5仲有一場HIBRIA，玩晒兩場show先再算啦。記住，今個禮拜六23/5HIBRIA演唱會資料、五隊樂隊簡介及MV試聽等click呢度，而想演出前先認識HIBRIA音樂風格power metal，請click呢度閱讀HIBRIA演出前訪問《紙談音樂》版及劉Sir完整版。睇完，星期六見啦。記得今個禮拜三19/5，TRHK都開門。

「同埋有去睇INTO ETERNITY影相的朋友，不論質素如何，都send番俾我呀，email or MSN lau_sir@hotmail.com！」

懶寫，今日繼續睇戲啦：

20090516 IE香港演唱會時身兼多職乜都係我，企counter賣野找錢時開心得滯，本身想拎五十蚊，一拉，拉左十二個半出黎。仲要公數。

「大檸樂。好在唔係五百or一千蚊紙，否則加埋冰。」

話晒五十蚊唔係少野架！返到公司見阿姐落銀行，順手俾佢拎份殘骸去換番張全屍，點知銀行話要換爛銀紙請過主匯豐銀行總行搞掂。我大角咀返工，好日都唔會過海，要我辦公時間過中環？真係過去，來回車錢時間人工使費都唔止五十蚊啦老細，換黎做乜？

「早知換唔番，就搵隊band幫我簽埋名型爆佢啦！」

23/5星期六就係巴西power metal樂隊HIBRIA演唱會，又係時候硬推銷一番。記住，HIBRIA演唱會資料、五隊樂隊簡介及MV試聽等click呢度，想演出前更深入認識巴西HIBRIA同香港BROKEN LIGHTER音樂風格power metal，請click呢度閱讀HIBRIA演出前訪問《紙談音樂》版及無刪減完整版。最新一期《紙談音樂》即五月中第36期，同你講埋香港BLACKWINE同日本VIGILANTE兩隊progressive metal：

extreme metal與metalcore當道，香港indie界難得可以有非此兩類之外國metal band黎香港，加上同場加多一隊日本band及三隊香港樂隊，希望聽歌者同睇show者可以明白到欣賞到其中稀有與唏噓，唔好萬事只會講「唔係邊隊band」或「唔係邊種風格」，思維及心態從音樂出發。不過我都知好難，及在香港確實冇可能，同一問題講左幾年，未見有改善甚至日益劣化，香港社會性質始終過份商業，直接導致所謂地下心態同是，見得多就會明白香港地下音樂界其實不多地下，畢竟在商業社會成長、浸淫太多年，縱心理如何反動，態度本性始終難移。

「HIBRIA去外國，係上extreme metal gig表演、同extreme metal band一齊出show，對此外國人覺得好勁好有料到，就連extreme metal友都會去睇佢地live。對於香港人黎講，前述一切代表乜野？同佢地個名一樣：代表唔知乜野同唔算乜野。」

同一觀點，評論本地對待progressive metal心態亦可。文中特別講出好多人已將progressive metal視為等同於technical metal，此乃多年以前progressive metal在港已發展停步原因，唔係講玩一班練唔到或練到盡，而係聽一班從來要求progressive metal一定要有技術，如果冇solo、唔複雜、太玩feel甚至冇keyboard，即時同你講「唔好聽」又或連試都唔願試，換言之一定要似DREAM THEATER先肯聽、先可以聽。其實如此心態及思想發展非常唔健康，因為progressive本身唔止得技術，意識層面甚至比技術編曲更重要，但香港人有幾多個聽歌會睇歌詞？英文歌詞，唔會睇；中文歌詞？睇睇BlackWine唱廣東話咩境況就知。

既歌詞地位可有可無，難怪大量真正講哲理作出批判之樂隊如QUEENSRYCHE冇乜香港人鍾意，能在港普及同「潮得起」之progressive metal，只包括DREAM THEATER及似DREAM THEATER (technical metal)，又或網上（突然）多人講的邊隊；幾年前聽progressive一班聽metal之餘亦會聽rock，技術非必要感覺更重要，除媒體污染未達嚴重，更有台灣前衛金屬誌教誨，經過metal被主流谷得太勁，加metalcore同extreme metal先後洗禮，rock唔潮唔恆唔爆之餘太玩氣氛solo唔勁同慢＆悶，就連真正投入前衛之前金亦因商業是非R.I.P.，而家冇太多人特別新人會肯聽progressive rock，即使與現代metal本同根 － 包括progressive及非progressive。現今間或在港紅得起有人提之progressive rock band，唔係網上「某人搵到」之後互傳之類（都少），就係幾近必定明星組合，如非某隊progressive metal成員或某名人有份參與如TRANSATLANTIC，相信香港一樣唔會有人理。前衛意思是不斷前進及脫俗追求、包容更高藝術層次，但見香港聽progressive metal者大多堅持沉醉於技術層面，即可能係前衛金屬之最表層而抗拒繼續深究，當技術性凌駕音樂性，再樂隊／樂手名氣凌駕技術性，不進則退，某程度上可視香港前衛範疇認知水平實際上一直下跌。

「當然，我一直講緊之接受同試，唔係大包圍下載download晒先算或者『你有咪今晚send俾我聽下囉』果種。」

篇文唔太見得人，原因之一係顧得兩場show，一直記錯出書日子為截稿日子，到交稿果日晏晝先醒起原來到期臨急臨忙快手搞掂。《紙談》版面空間有限加唔適宜寫太深是另因。坦白講，講progressive metal冇可能唔講DREAM THEATER，只想盡量避免提起佢地，因為某程度上被太多人過份盲目追捧，及影響太多人形成接受progressive metal之局限，音樂唔差卻早達瓶頸，歌詞更不出眾（冇錯，歌詞從來是progressive metal重要一環），個人覺得有好多新舊樂團，比現時／近代DREAM THEATER更值得溫古知新。新band入面我好鍾意意大利PATHOSRAY，話說我寫緊篇文時播住隻碟，有個鬼佬入黎徘徊左三次，聽左大半隻碟後決定買左佢，佢走左又多個唔關metal事香港人覺得好聽又買隻，因為氣氛好旋律靚，但當然，見到個名、見到封面，加唔係玩高技術果種，有幾多人會理？好多band同佢地一樣，玩得好冇用，就係衰唔跟大路同冇名 － 你明點解咁多樂隊搏晒命都要入大label，同大label可以對一隊樂隊影響幾大啦。

美國thrash metal有四大，其實美國progressive metal當年一樣有四大，加上遺珠眾多，認真寫的話除歷史部份必需提及，點都唔會寫DREAM THEATER。近來先後睇番《V for Vendetta》電影同漫畫，加冇幾耐前Rock爺講番先知原來歌佬死左，極大動機寫SHADOW GALLERY呢隊(progressive) metal界最傳奇錄音室樂隊 － 技術水平其實極高，具音樂性同時社會意識強烈（話晒《V for Vendetta》影響喎），唔係出道廿幾年至今時今日歌佬死埋仍然一場show都未出過，多方面更勝DT的佢地，點會落得而家咁「cult」？單業餘夾band能夠堅持廿幾年出左五隻碟，仲要幾近全部佳作加部份達經典級數，已經比好多大label樂隊值得尊敬。QUEENSRYCHE完全唔玩技術，單靠歌詞已經影響深遠，就如PAIN OF SALVATION當正自己新世代QUEENSRYCHE，NEVERMORE演唱及歌詞直頭Geoff Tate上身，可惜自從前金沒落，已經再冇人會提到佢地種非技術派prog-metal band，就如經典如《Operation: Mindcrime》，唔好講故事內容同政治寓意，就連個名都冇太多人講得出。無數無奈冇人留意樂隊更灰連名都冇乜人記得，單講佢地已多到講唔晒。何必執迷於一／幾隊？

有兩隊「progressive metal」想寫好耐：WATCHTOWER同TOXIK。按照香港cult thrash專家BloodKrishna所述，兩隊band應歸類於thrash metal，是否真thrash懶理，總之兩隊band當年單用結他同鼓已將technical推到「常理中之極端境界」，屬於progressive/technical metal中之extreme metal樂隊，TOXIK第二隻碟《Think This》更加係個人眼中音樂、技術、歌詞、意識及美術最完美metal碟之一，封面廿幾年黎仍是無人能敵，單睇見隻碟個封面，立即領略到何謂八十年代、何謂重金屬甚至何謂前衛。我唔覺得佢地完全屬於thrash，剖析角度會相當唔同，不過想寫一回事，相信唔會寫，因為珠玉在前。想當年自己都係睇BloodKrishna、從佢ｄ碟評開始聽metal，而BloodKrishna一早成為香港metal界最受歡迎碟評人，夠陀地之餘帶得起潮流嘛。講音樂、講碟評，劉Sir算老幾？都係早日收皮算啦。我份人一向懶progress。

「再提多次：記住，23/5星期六HIBRIA演唱會資料、五隊樂隊簡介及MV試聽等click呢度，想演出前更深入認識巴西HIBRIA同香港BROKEN LIGHTER音樂風格power metal，請click呢度閱讀HIBRIA演出前訪問《紙談音樂》版及無刪減完整版。星期六就係喇！」

本月兩場Tomahawk Metal Fest 1.5+II圓滿結束，HIBRIA今場第一次試到睇／搞show做個人殘晒冇晒力，但返到屋企諗番場show興奮到訓唔到覺，單VIGILANTE同HIBRIA兩隊，同最後三隊band歌佬一齊合唱《2 Minutes to Midnight》，已成為唔少香港人畢生難忘metal gig之一。show完不代表立即鬆晒，執手尾大把工作，加上今個月日頭份工本身都忙，或者又要潛番幾日水。睇完show，不如睇睇報紙啦。都唔係劉Sir叫你睇。係Rock爺叫。

在香港，即使與metal無關，你都唔會搵得到呢種音樂文章，更加冇多少業餘人士會好似Gotthard兄咁有心。相信冇多少人知佢來頭，其實當年台灣甚至全華人地區最專業前衛系專門網站前衝金屬誌(R.I.P.)，Gotthard兄屬於論壇分享（音樂知識心得而非下載）及推動音樂中堅份子，當前金論壇後期慘變商業喉舌最後全站關閉，台灣metal界高速貼近香港，基本上而家台灣情況都係集中聽出名band大路野，分別在兩個市場口味唔同，台灣至今仍頗為抗拒極端金屬，同香港人從來只追求橫向發展，而台灣人發展較縱向，但兩向相比何者較佳？相信明顯不過。最少，台灣會有Gotthard呢種老鬼，仲願同你玩呢種文化野，香港就算真係有人會寫、會譯、會整上網，一係冇人理，一係俾人話「挑抄外國野！」即能見縱橫之別。難怪咁多年黎，香港從未出現過一個風氣及深度可以接近前金之（重金屬）論壇。

重金屬精神為何，文中已經同你講解晒，基本上整個八十年代金屬界 － 包括主流及地下 － 已是重金屬精神行動化型式化象徵。懶睇字，又係好簡單一句：

「篇文提過《The Wrestler》。一套戲講晒你聽乜野係重金屬。」

老坑一代metal友如Gotthard兄，音樂生活態度明顯不同於新一代，正因從重金屬音樂文化中領悟到逆境自強之道理及方法。想再深一步理解，除左《The Wrestler》，亦可參考《星期日檔案之生於Y世代》，不過基於無線有好野唔肯放出黎但又唔益人加要谷自己賣TV之仆街心態，YouTube所載片段見字99.9%已經被無線投訴強迫刪除。而重金屬魅力所在，除官能刺激及藝術層面，仲因將之當成一份簡單普通官能娛樂，或是一門普羅／另類藝術，又或生活態度生活文化，皆能有所得著，實際上能做到雅俗共賞 － 八十年代金屬外國地位與性質根本已等同於BEYOND啦。

我鍾意metal，全因其自知之明意識，好多metal友鍾意自我諷刺，去到接受甚至歡迎諷刺，全因某程度上metal屬於一種「柒」的音樂，好多時明知是柒都照做你吹咩？最緊要我知道自己做緊乜，就算明知自己係柒，都預左有人會串會不懷好意地笑，但不論你鍾意與否，一樣我行我素，我係噉就係噉，同敢於面對承擔番自己所做所講之一切，至於鄙視之「poser」者，正是做唔到最後一點而未能達自知之明：唔係果樣又或冇咁大個頭，但要充、要扮，好多時內行者一個眼色一個動作一句說話，已可知眼前者「level」去到幾高。完全脫離poser領域實非常困難，亦因此真正投入metal者，往往氣質言行舉止心態多方面完全異於他人。

噉點解到而家，重金屬玩同聽一班大幅變質？九十年alternative抬頭，全世界音樂一致向另類派提倡之自我內心黑暗面向進發，metal自然由以前講求團體參與、台上台下互動娛樂同「我擺明柒」，變成喊自己生活有幾灰同「我唔係柒，我係灰同唔開心」之類上主流，如此負面又如何能放開去面對自己同其他人？

「真與自我，就是重金屬。」

日頭份工忙過，一連兩個禮拜六搞掂兩場show，《紙談金屬》剛剛前兩日完show後漏夜趕埋六月一號第三十七期篇稿，本身諗住寫寫兩場show，但未收齊相又支力，有個理由抖抖。起因係乜已經唔記得左，今晚突然大家咁有興致，出荃灣同幾位教院女同學食餐飯聚聚舊。居然要勞動到離開九龍城土瓜灣大角咀同旺角會喊、過海直頭會死的劉Sir走到荃灣咁遠？

「算啦，畢業後五年黎第一次！各位女同學住到新界邊疆咁遠，本身話出屯門食添呀！而家肯移玉步到荃灣遷就劉Sir，各位女同學算有人性架喇！」

荃灣我完全唔熟，一向得拜年或同親戚食飯先出，以前做緊補習時個個禮拜都會出最少一次，我又唔鍾意行街，基本上冇幾多次專登出黎，雖然以前諗過搵次出黎打機架，荃灣有唔少大機舖。其他機會？Tomahawk Metal Fest I演後翌日BASSAIUM住如心順便遊荃灣囉。有次同會計靚女加個舊同事出荃灣食過小肥羊，算係全區唯一我識叫做見得人的食肆，為防各位女同學要陪劉Sir一齊捱麥記or雞記甚至十蚊麵，小肥羊啦就廢事嚇親人。

劉Sir梗係六點準時放工啦，不過各位教書的朋友，有幾多位何嘗可以準時走，甚至早過六點走啦？我已經遲落車蕩失路行多左幾個字七點三四先到，仍可以開完位一個人食番半個鐘，清左碟肥牛加黑椒牛丸加午餐肉（．．．），第一位女主角Phoebe姐先至出現，跟住Leanne姐又遲多差唔多半個鐘，咪仲好，荃灣小肥羊唔同旺角，唔係逐碟計大部份主要款式好似肥牛牛丸午餐肉（又．．．）任叫，但招牌菜如各式地道菜同羊肉或多或少需要收費，免費羊肉就入場起人頭一碟，再加一個雖個名有個羊字但原來係薯仔做唔關羊肉事的薯仔寬條麵肥羊粉，另外幾位未到，我咪可以食多ｄ羊肉同個肥羊粉囉∼雖然小肥羊貴，食過咁多次仲係覺得，真係好食過其他好多打邊爐架，一分錢一分貨。但係如果俾我揀，其實我會鍾意九十幾蚊百零蚊去花園金閣或者油麻地花園怒點肥牛同包心丸加無限蔗水搞掂多，夠市井嘛。

意料之外係連阿恩姐都出現。唔知點解我唔係修音樂，讀書時同音樂系同學反而特別有緣，因為學科關係四年黎冇幾多次一齊上堂，不過全靠因音樂同埋劉Sir個網，自閉的劉Sir無形間搵到好多朋友。約時問兩位靚女仲想見邊個？諗起又係音樂人的恩姐，諗住講下就算，點知開左位個幾鐘後真係蒲頭。坐低，第一件事「唔好出聲」，第二件事「拎張紙黎」，第三件事成張紙十樣野七樣要就算要收錢照剔完全無視收費，第四件事「阿姐幫我落單快ｄ到」，第五件事「幫我拎枝啤酒黎俾多杯冰我」，第六件事「快手ｄ啦阿姐我叫ｄ野飲野食點解仲未到架」（距離落單不超過一分鐘），野食到第七件事乜都唔理勁食，千祈唔好同佢講野阻住佢，唔係身為傳道者的佢會同你講一大輪福音，內容係乜我一ｄ都唔明，相信係佢飲大左關係，由佢係噉狂食唔得閒講野才是明智。以為劉Sir打邊爐食野已經好恐怖？拍埋佢度我只係雜魚甲，佢係我見過打邊爐落單同食野最恐怖女仔。鑑於90%時間佢係忙於暴飲暴食同呼喝侍應甲乙丙點解野食仲未到，而唔食野時亦處於貓下貓下的精神狀態，影得到上面張合照，已屬難能可貴。

今餐兩位女主角Phoebe同Leanne，劉Sir會山長水遠走到出黎都係為左兩位靚女咋。04年畢業後做補習社港九新界四圍走，有晚屯門放工同Phoebe姐食過一餐，都四年前喇。四年後今日，仍然教緊小學，教到結埋婚之餘粗身大細左四個月，而Leanne姐姐畢業五年黎第一次見，已經昇華到掌握兩個master，今餐遲到因為要去間中學面試，而家教開間小學傾緊續約，間中學又肯請，煩緊繼續教小學定轉去教中學。幾年嗟，已經教到咁高level甚至買埋樓結埋婚仔都就黎生，睇番自己仍然on99，唔知點噉添。雖然我早已脫離教育界，不過而家市道咁差，都有諗過或者返去教書，夠穩定嘛人工又高我而家成倍。要考慮考慮。

相隔五年，大家冇乜大變化，大肚婆肥過平時就一定架啦（雖然本身已經好肥了，所以大肚四個月其實完全睇唔出／唔覺，呵呵），但兩位靚女難得教書辛苦都冇乜殘到，有變的只是劉Sir，肥左 － 話晒而家我都三十九寸腰二百幾磅了。不過樣睇唔出，聽落而家教書真係好難頂，尤其教著band 3即以前band 5質素，小學生已經校園內課堂間以流利粗口同各位師長溝通，掛名小學生但條友已經十五六歲，係咪笑爆咀先？從而衍生出新紀元學校紀律管治方法：以暴易暴。話說學生咁難教，校長請左個跆拳道黑帶三段miss，全年九月開學禮指定節目，就係請跆拳miss上台表演，一輪龍虎亂舞再踢爛無數個蘋果後，台下所有好壞學生自然即場肅靜，跟住最少第一個學期學校紀律得以有效整頓。後來發現一個唔夠，跟住果年請多個北京散打王，每年開學禮指定武術表演環節亦由一個變成兩個，雖然上學期玩晒，我相信下學期環節一樣唔會少：聖誕後開學日，叫上學期犯最多規班學生出黎，小過者心口前舉木板，中過者面前捧住個蘋果，大過者蘋果放頭頂，再由跆拳miss同散打王阿sir繼續全校面前表演踢木板爆蘋果絕技，到畢業禮又玩多次，肯定全年冇學生夠薑搞事。估唔到而家有武功底原來有助爭取入職教席，果真奇聞也。低band難教，高band又如何？恩姐而家就係教緊間band 1學校，學生唔劣，但面對是另一種壓力，齋校長主任家長三方面夠玩死你啦。各位同學真係辛苦。所以我成日話，全屆人工最低係我，但最開心果個係我。錢同開心自由，你點揀先？講講下，都係唔返去教書了。

食完小肥羊，許留山食多個甜品，今晚就玩完了。咱們的聚餐，五年一度。下餐應該係2014年。