「生命不在乎得到甚麼，而在乎做過甚麼。」
黃家駒 1962-1993
嬉皮士(Hippies)者，「反西方，追求東方宗教思想，Free Love，追龍，外表不修篇幅之人」也。
優皮士(Yuppies)者，「有抱負，受過高等教育，居於大城市，具專業技術，生活富裕之年輕人」也。
收皮士(Souppies)者，「交晒功課上晒堂但係懶郁懶行又自閉識得人少，所以長期困室生活頹廢之人」也。
比浸會遲一個月、比中大遲兩個月，Sem 4終於圓滿結束，今日開始正式成為「收皮士」隱居，但係第一日已經完全唔Souppies。幾時先可以真真正正咩都唔做收皮避世？
RA
搵工搵一大輪結果又係番番黎RA，不過噉都好一放暑假就有工開唔使搵又唔使同時做幾份工嘆番唔少。
教署搞左個短期課程俾在職教師讀，結果勁多學校報搞到超額，入唔到ｄ學校ｄ先生甚至校長都打黎話「不如開多個位俾我地啦」，有間仲勁話「好多教師都有興趣，希望教署可以派人去佢間學校教。」跟住其他唔係讀教院之RA係度狂小，「做得先生就唔好咁無賴啦。」有時都覺得教書幾折墮，成日都有個所謂「傳統包袱」呢樣又唔得果樣又唔好，普通人做壞事就係「壞」但係教師做就係「好很壞」。搞到覺得第時都幾灰想爆下粗小下老母都要小心ｄ，又校長如果知道我平時玩開ｄ乜聽開咩歌的話分分鐘書唔使教都似。
Dick & Cowboy in Concert2002
老爹：表現唔錯算係噉啦，不過硬係覺得佢可以再狂ｄ。最後嗌到冇得再嗌真係笑爆咀。
樂隊：水準唔錯又幾搞野，個外援結他佬又放支結他係頭後面彈又用牙彈夠多花臣，不過個Bass就．．．
嘉賓：鄧健明冇野講得個強字（唱功除外），個Guitar Solo中間段即興Band Jam陰到正；鄭中基出場時人人都準備好係得佢要試結他怯場噉款，又唔唱中文歌反而唱Eric Clapton首Wonderful Tonight，搞到相比下冇咁突出；最精彩反而係蘇永康出場，全世界都等睇佢Fing頭。
好好一場演唱會，同上次Peter, Paul & Mary一樣又係因為場地同工作人員關係搞禍晒。應大之結他聲細到無倫反而應細之低音全場最響，搞EQ班友完全係唔知做乜淨係坐係度唔較番好結果由頭到尾都俾支Bass嘈死。仲有一個香港演唱會通病：拍條友九成時間都淨係影個歌手，結他Solo時主角係結他手但係又淨係拍個歌手行黎行去。希望下次同樣新伊館之International Rock會有改善。
講開又講，之前有人投訴我「嗌歌」個Style都唔係原創而係因為聽得多呢ｄ歌。回應只有一個：
「點解唔識調番轉諗？其實我好多玩法都係『英雄所見略同』。」
暑假時間表1.0已出，有野搞想搵我的話請到「師範」睇睇我幾時會得閒。
冇呀今日毫無建樹真係收皮
探花兄你真係符碌，我去到間琴行看舖個阿姐先話套鼓搬開左，想打的話要自己Set番。我當然冇咁戇九，套野已經殘如果搬時唔小心搞爛一兩件要我賠原價咪中招？
出到黎冇理由即刻番屋企，唯有探探久違了之機舖。事實證明，識打鼓唔代表識打鼓機。
唔好問我今日做過ｄ乜當連工我都可以唔番之時你覺得我仲會做到ｄ乜？
似乎所有人都睇化，打去老細度話請病假佢得一句：
「放飽佢啦你！我都唔得閒理你！」
Park Lane姐打黎問電腦，第一句又係
「病？咋病咋卦你條友！」
死喇大家都開始放棄我，我真係頹到無人能醫無藥可救。
蛇左一日，點都要番去補補鑊。發覺原來最大舊豬頭骨又係我哽，六個PowerPoint我淨係做其中一個，但係人地做成兩三個我都淨係得小半個，因為其他ｄ淨係抄抄抄抄．．．我個就又要做閱讀理解又要自己作仲要作成百幾版。見到人地一日一個，我兩日先至得四十幾版，灰，所以襯老細今日唔係度，Lunch就閃番屋企吞pop算。似乎呢世都會係PowerPointer，就算做晒RAｄPowerPoint仲有ACEI個。
講開又講，原來之前俾大量學校超額認購，由教院同教署合辦之「專題研習教學法Project-Based Learning」課程咁受歡迎，係因為教署來年之課程編定會好睇重做Project，所以大家都仆到黎學點教。但係又唔係間間都有得學，抽唔中ｄ學校下年點算？
Pop，故然要吞，鼓，亦不可不打。阿姐禮拜三耍完我都有ｄ唔好意思，所以今次點我去總砣間大Band房。套野唔錯，最重要係可以「埃」住黎打完全係為我呢ｄ頹人而設。探花兄，下星期三記住搵我。
「謎底 已經解開！」
今晚係最後一次聽呢句，因為《少年包青天》大結局。記得當年《包青天》王馬張趙四條友都係叫展昭做「展大哥」，照道理「少年版」時應該會同少年展昭一樣仍然係靚仔形狀。但係而家佢地已經係超級老餅，去到《老年包青天》時應該係另外三條友叫番佢地做「阿Ｘ伯」先係喎。等左成個月黎到今晚最後一集，「王朝馬漢張龍趙虎會老過晒其他人」呢個驚世之謎之謎底仍然未能解開，令我有ｄ傷心，所以冇心情再寫落去。
乜唔係話「係世界末日十日之前就可以預測到」咩？點解而家又話我地三日前差少少就俾粒足球場咁大之小行星撞瓜？所以真係而家有得玩就玩多ｄ喇，如果唔係瓜左都唔知乜事時未玩夠就真係唔很抵。
晨早打電話黎話「今個星期內要起晒六個PowerPoint」，距離目標仲有四個。但係跟住個禮拜Park Lane姐淨係番兩日工，我個單元二似乎都唔會易搞仲有排整，點算？我淨係識講一句「唔Ｑ知」，頹左佢先算。
上龍珠焚到九點幾，完全唔似係仲有Ｎ樣野要做，似乎今晚有排做。Soni有句野講得好：
「天才係你，『螺』彩就唔係你。」
回應當然又係得一句，經常講之呢一句：
「我淨係負責做野同埋收錢，其他野與我無關．．．」
原來有隊band個鼓手係小學教師。又係教小學又係打鼓同我幾似，但係似乎我唔會成為第二個例子，因為就算得道都冇乜機會搵到人同我夾。
好明顯真係「放暑假」，由琴日開始做到今朝七點幾加埋廿幾個鐘先搞掂大半個PowerPoint交貨。開工都要通頂，而家真係頹到仆街。遲ｄ個ACEI PPT又係大野，似乎最少仲有一晚要通。
波我不嬲都唔睇，但係都鍾意睇無線播世界盃，一睇李克勤窒阿叔，二睇無線班友成日係度嗌
「頂你老味波冇理由要俾錢睇！＊＃ｘｙｚ．．．」
琴日冇番，今日點都要番去做番ｄ野。本來目標係「ｄ」做個朝早就算，但係一番到就俾老細點名留低開工，一做就做足十個鐘，番到屋企仲要繼續做，灰。不過而家個Project就黎搞掂，加上幾經努力我負責之部份又就黎做晒，探花兄，似乎星期五開房有望，假如我今晚唔頹的話．．．
今個Sem六科，已經有兩科得C。英文一個CP可以當係「豪俾佢」，但係GS成四CP都係得條C就真係仆得街。如果同樣佔五成之考試A到的話，拉埋就可以B到。「如果」．．．似乎今個Sem GPA又係高唔過二點三。
GS份野成十幾句評語，句句都係小，要黃太諗咁多劣評搞到我都有ｄ過意唔去。呢份野同阿嫂份差唔多，但係阿嫂拎A，我就C尾，點解？唔通係上次正生書院考察團見黃雨扮晒唔去而家公報私仇？
其中一樣俾人小係「冇小規模調查」。呢樣真係諗爆頭都唔明，係做「青少年吸煙」的話都叫做可以問下條靚仔「想唔想飛？」但係而家係做「青少年濫藥」，唔通真係問條靚仔「隊唔隊草？」就算真係問我都唔覺有靚仔會話「隊！我隊！」既然係噉，點解係都要我做呢ｄ冇意義「小規模調查」，唔俾人引香港禁毒處個官方大規模調查？呢野仲唔係報仇？
又係幾乎通，朝早四點幾終於做完個PPT。但係其實只係搞掂本來工作之三份一，訓兩個鐘之後又要開工。今日架巴士係從未如此好訓過．．．
上半場：高能時間
「高能時間」係做所有同電腦有關之工作。可能係訓得少迴光反照，居然一個朝頭早就搞掂晒ｄPPT，仲可以去拉記訓下覺睇下書吞下pop。完全冇人會好似我咁無聊暑假都上拉記「溫書」。包晒成層之拉記又係「從未如此好訓過．．．」
下半場：低能時間
所有同電腦甚至自己個腦都冇關純粹靠勞力之工作，就係「低能時間」之節目。因為晨早就搞掂晒ｄ高能野，所以晏晝除左等老細間歇性之Order同無聊地遊教院外就淨係負責攝單張。見到Park Lane姐一面做老細一直唔肯收貨之PPT一面怨「要劉義呢條友做埋晒攝單張呢ｄ低Ｂ野真係大材小用」，我除左笑之外都唔知有乜好做。不過唔好再叫我做高能野喇，我諗搞掂左呢個Project之後一段時間之內唔可以／唔敢再做PowerPoint。賴柏星！甘志強！ACEI！我對你地唔住！
出外邊開房打鼓成本真係太高，教院暑假又冇乜人會用間音樂室，所以成日都想搵番上年教音樂個阿Sir出頭幫我申請於非繁忙時間使用音樂室，可惜一直都見唔到佢地。今日終於撞到－不過條友剛剛係廁所開緊大。早知就同佢講
「快ｄ講音樂室個密碼我知！你唔講我就唔俾廁紙你！」
其實今日番工都幾無聊，因為ｄPowerPoint基本上一早就做晒所以番到去淨係坐、執下手尾同交貨。係咪讀理科ｄ人語文都唔會好？見到老細寫ｄ信同問卷一係錯文法一係Chinglish，真係見自己咁得閒就唔爭在搶埋黎做。搞掂之後我得一句：
「唔係！我唔係教中文！係！我可能係揀錯科！」
雖然而家個Project搞掂，但係手頭上仲有另一個跟緊，今日又再批多個落黎，睇黎今個月只會驚太多工開唔會冇野做。但係RA個Budget偏偏係我今個月最多野做先黎冇乜錢剩，即係無論做到點多都好，人工都只可以報少唔可以報多，如果唔係輕則冇錢收，重則搞到老細破產飯碗都冇埋。
行過大昌見到有隻撈麵做Promo搞試食，小便宜冇理由唔貪當然係食左先算。食完發覺係唔錯就豪番條買一Pack，見娘親同做Promo個師奶討論「小麥做之撈麵點解會好食過公仔麵」唔肯走，冇野好做唯有食多兜。
「喂小朋友，你都好唔客氣啵！」
我唯有好樣衰（唔係「瘀皮」隻樣衰係「樣衰衰」隻樣衰）噉答：
「買多Pack囉 挑！」
因為實在太易整之關係，我一得閒就會整番包黎食，今日又係劉家竹戰再消耗多幾包，睇黎呢十包麵都捱唔到幾多日。似乎過幾日要再落去食多幾次同挑多幾次。
雖然唔使番工但係都有工開，老細得閒就Sendｄ圖表過黎然後「幫我轉晒呢ｄ圖做PowerPoint！」做好之後Send俾佢，佢再掟第二幅圖過黎繼續PPT，搞到好似打機過關噉。真係做到想大嗌
「我唔想做呀！我唔想見到PowerPoint！嗚嗚嗚∼」
諗番起十幾年前之一集《柏林週記》。話說小柏林想買一部任天堂，佢家長就話假如佢肯蓄錢，到聖誕節時蓄夠一百蚊的話就送一部任天堂俾佢做聖誕禮物，噉小柏林就開始努力地蓄錢。有一日小柏林執到個一毫子，但係佢係佢對魔鬼父母之慫恿下都冇將之據為己有，而將個一毫子拎去差館報失。過左不知多少時日，聖誕節到喇，小柏林剩係得九十九個九。噉部任天堂點算？好在你拎野去差館報失的話，如果過左一排（好似係三個月）都冇人認領的話件野就係屬於你，而剛剛好聖誕節正日就係「過左一排」，所以差館就寄左呢個一毫子俾小柏林。小柏林終於搵夠一舊，柏林老豆老母亦都唯有買部任天堂俾佢。
故事就講到呢度。問題有三個：
問題一：拎個一毫子去報失？唔係話唔應該，不過我係個當值個差佬，都會勸佢「你唔要的話不如你拎去俾乞兒啦，跌左呢個一毫子個人唔會介意，亦都唔會黎差館認領架．．．」
問題二：乜郵局會係聖誕節派信咩？
問題三：想當年寄一封信只不過係六毫子，而家要用六毫子郵費加其他人力物力燈油火蠟黎寄呢個一毫子，咁蝕本你覺唔覺幾戇居下？
係囉，噉就一年。原來已經開左齋一年。呢一年做過ｄ乜有咩成就？我都唔知。
「我讀過架，入師範乜都學唔到，無無聊聊幾年噉又出番黎都唔知做乜。所以你最好就自己搵ｄ野學下喇。」當年係師範學院「無聊」左兩年之老豆由兩年前派位當日開始就係噉講呢句。而家，我都「無聊」左兩年喇，唉，真係「乜Ｘ都冇」。要我夾硬數的話，我會話呢兩年最大得著係識到同我共頹廢之麻甩佬兩件囉。「女」都叫做有－各位唔使擔心，唔係真係「女」，契妹乙件而已。「夢中情人」仍然處於夢中，同現實無緣。
之前次次朝早打黎我都仍然係昏迷狀態，可能老細今次為左令大家都「好睇ｄ」就晏晝先打黎搵我。
「做緊乜？」「做緊野！」
朝早打黎都可以話係訓緊覺唔理，但係晏晝打黎就點都要俾下面做下野啦。雖然做極都係冇咩進展。
如無意外（例如俾老細急Call開工），我星期三晏晝都會去開房。不過今次都有意外，就係探花兄都有出席。探花兄，買塊鼓板番屋企玩下啦，打鼓機係練唔到打真鼓，但係拎黎練初階協調同數拍子就真係無敵。
除此之外，過程中仲有另一個意外，不過主角係邊個發生左咩事就唔講喇，唔想講，同埋基於當事人現時之情況我唔會講。
之前買之兩Pack「浸滾水就食得」之撈麵，對我呢個開爐煮公仔麵都懶之頹人黎講簡直係恩物。但係Ｎ日前已經冇貨，今日見得閒就去掃下貨。
「小朋友，又想食？呢排淨係promo燒賣咋喎！」
見到個師奶樣衰衰，撈麵之價錢亦比之前之一條高成四份一，唯有又樣衰地答
「唔買囉 挑！」
圖書館已經成為我每日開工／睇書／吞POP／訓覺必到之地。早到的話，我會上拉記訓到夠鐘先至去開工；遲到的話，索性上拉記頹／做成朝扮晒遲番。每日做八個鐘，當中差唔多有四份一時間我都係於圖書館中度過。當然，交左成四萬幾學費，咁多書放係面前我自然唔會暴殄天物，通常訓醒又或者蛇到悶之時就會周圍摷書睇。呢論睇搖滾簡史，真係肯睇的話可能八月內可以學埋中樂基礎。真係好鬼死似政府個職業英文乜Ｑ
「資助你之餘仲俾你一份信心同認同，仲可以自我增值忝！」
做左成大半年，員工證終於到手喇！先有多個Email加廿MB網上空間，再贈送無限黑白Print Quota，而家持員工證可以以「員工」身份搭校巴，仲好似可以當係圖書證用！如果唔係「好似」而係「真係」的話，即係每次可以借多十本書，同人地鬥Hold書都唔驚唔夠爭！所以成日話做教書除左人工高，福利仲好很好！噢，簡直令人滾動！RA！萬歲！！
《少年張三豐》又將近結局。發現《少年》系列都有一個通病。點解張三豐會同張翠山一樣咁大，其他武當弟子又會同阿「張真人」差唔多年紀？睇完之後搞到唔敢學太極，因為原來太極會令人急速衰老．．．不過又可能因為張三「豐」唔係張三「丰」所以吹脹．．．
喪架！點解班人可以咁狂！我七點半出門口，班友已經可以打電話黎問
「番未？」「番緊．．．」
點解可以咁Ｑ癲？唔通知我琴晚幾乎咩都冇做今日立即要我交貨陰我？好在老細有堂上，有兩個鐘俾我飛身入電腦房趕貨，做完仲有時間去拉記訓下。噢，噉開工法簡直係完美．．．
又係PPT除左做新野仲要執執其他人搞ｄPPT之手尾。真係咁蛇法老細都唔多小我，全靠手PPT快靚正，老細拎住我做ｄPPT去教書心情都靚ｄ。冇錯PowerPointer又係我。呢野應該灰定唔灰？
居然俾老細突擊無聊齋！老細有個親戚上網Search老細個名，居然會彈「段記」條Link出黎！好很驚！以後講野都要小心ｄ，以防飯碗不保！
「有冇咁邪呀？」
唔信你都可以試下架！你可以上香港雅虎度Search自己個名好似「仆街仔」、「陷家產」、「傻仔」噉，你會發覺差唔多篇篇有你個名出現之段記都會Search到出黎架！
又放榜。到而家都仲未聽到好消息。灰。
公務員減薪終於搞到遊行。睇班友講到減薪的話真係會「陷家產」完全係笑爆咀。減極都高過人地啦下嘩？仲要唔使抄包你有工開呢？睇見班友有ｄ人嗌「唔係唔接受減薪，只係唔接受立法減薪！」係接受減薪的話就唔會有今次遊行啦真係．．．不過都廢事再講第時出到黎教書我都叫做半個公務員．．．
係時候上一上珠算協會拎番拖左幾個月之人工。成日都以為有成三千六未拎，點知原來之前拎左上期三份一而家得二千四。可能開頭成日以為有成四千係手好很開心，搞到而家有ｄ若有所失。好在RA又係今日出糧噉先冇咁灰。（係！我知我衰仔！有二千幾收仲講到得好少好唔合皮！衰！）
一如所料，所有人見到我第一句就係「幾時番黎教！你講！」答案，我都想知。
預定十二堂、通常要上十四堂先畢到業之「鼓初階課程」，七堂就搞掂。呢個只係舊紀錄，一名叫劉義之中國籍男子剛剛於今日創下新紀錄：
冇今日超頹工都冇番所以唔使問我做過乜
韓燒！聽到食韓燒我第一個反應就係「hehe．．．」結果都係番番去打邊爐。太多人太耐未見過。上一次聚係幾時？感覺上好似係Ｎ年前之事．．．
原來上次番丘中講道時之《以潘為喻》俾人講到家傳戶曉，以後唔敢再番丘中行走。
唱！幾耐冇唱過呀！大佬！打完邊爐就唱Ｋ，幾耐冇試過呢ｄ生活！不過真係太耐冇玩過，人同歌都係究極冇貨，陳奕迅「破喉四歌」剩係出得四份一。最大娛樂又係睇大佬。幾時再唱？不如問我幾時有貨？
上年中學派位，女學生ｄ家長嘈到仆街；今年中學派位，就男學生ｄ家長鬧到仆街。今年個制度仲話要「實行兩年後先檢討」。即係下年ｄ家長又要小多次。諗番當年自己升中學時好似冇咁多事發生，點解而家可以亂成噉？真係第時自己做六年級班主任或者老豆時都唔知點算。
係咪唱Ｋ唱到傻左？呢幾日又係訓到天昏地暗，人地訓時我醒到人地係床上面時我反而周圍行行企企。已經訓到四日都冇番／開過工。唔得聽日真係要做番ｄ野交差如果唔係真係聽炒。
Blackwine呢個名你可能唔識，但係唔緊要我而家話俾你知。Blackwine係香港一隊地下金屬樂隊。佢地第一隻大碟《追夢》就快出，ｄ歌寫得唔錯，技術不俗，主音把聲同唱功更加係香港難求，仲要係唱廣東話，真係想聽歌的話記住支持。
「Heavy Metal咁嘈！」
未聽過你又知會唔好聽？而且都係六條咁大把，試下啦。八月記住捧場。
呢隻碟下個月先出，點解我咁快就有得聽？係囉，點解呢？
International Rock Concert
司儀：唔掂喎黃志淙，淨係識得嗌。
場地：同上次迪克牛仔一樣場地，音響亦都一樣咁差。反而隊日本樂隊表演時冇咩問題出現，係因為人地由日本黎所以俾面執正ｄ，定係人地用ｄ樂器係靚ｄ？
DSC:雖然大哥丞有ｄ失準Bass又換人，但係有得睇大哥丞用電結他彈《十面埋伏》你仲想點？加埋中敲的確係無敵，不過相信中敲solo會悶親唔少人。重點推介新曲《豬朋狗友》昆晒全場唔識彈結他之觀眾之「正反手彈結他」（想知係乜搵我示範俾你睇啦）。不過DSC都係要彈中樂先掂，自己創作仍然未夠水準。
X.Y.Z.->A:「佢地會以一個特別方式開場！」有幾特別？播成三個幾字CD睇台上工作人員飛黎飛去set野，夠特別未？全隊人都超喪（個得中三學生咁高之主音唱功同佢身高絕對成反比），不過J-野我都係唔多識欣賞。隊野搞氣氛搞得唔錯，估唔到香港人都會肯一齊玩。
Hei Bao:黑豹，國寶級樂隊，但係我都唔識欣賞，「太pop。」可能因為咁pop搞到技術上唔及另外兩隊。
壓軸Drum Trio:講技術，黑豹個鼓手可以不理，淨係睇另外兩個踩兩個Bass Drum佢踩得一個就知冇得比，Solo到最後佢都打到唔想打落去。阿超手鼓不嬲都掂，但係都冇得同XYZ個鼓手比，人地根本就係日本頂級。講玩野，阿超轉棍XYZ鼓手打打下企起身擺pose大家都笑爆，黑豹個鼓手．．．人地踏實！
香港觀眾之「質素」仍然係好低。一種係唔多投入個現場氣氛，台上班友叫一齊玩都唔多理（我承認我係當中之一），每一次間場都唔知有幾多人走；一種係扮晒自己識聽Rock野，成日係又爆粗唔係又爆粗，好似嗌得多"F**KING COOL"自己就真係"F**KING COOL"，慌死其他人唔知佢（懶係）ROCK友噉。最佳例子坐正係我隔離，你話我係呢三個鐘幾難頂。
DSC係呢兩晚「唯一一隊以業餘樂隊身份參加之樂隊」。雖然佢地係香港水準最高之樂隊之一，但係全職日本樂隊X.Y.Z.無論係結他、Bass定鼓，都可以俾DSC快同複雜一倍。所以話香港個Band Scene幾灰，個樂壇幾唔健康。不過又可能因為噉先可以令香港保持住一個「地下樂壇」，如果唔係DSC或者頭先講隊Blackwine都會好似黑豹噉「POP晒」。噉係好定唔好？我都唔知。
既然四日都冇番工冇做過野唔淨在加多日
多謝七哥傳話，知道IT份功課有B。之前Tryout同Present點都有B卦？終於有番科B到唔使咁灰。
再多謝七哥傳話，知道 漢 英文超唔掂。作為主修科但係三個Module一個B一個D一個肥．．．上個Sem之2.4拉唔拉得番？點都要掂！如果唔係八三三三賤人就三缺一！
International Rock Concert
冇今晚場我冇去聽，雖然係想去不過始終DSC吸引力大ｄ。我對呢場唯一有興趣係最後個壓軸鼓手Jam。我想知星盒子冇鼓手（玩Folk-Pop架佢地）點同其他鼓手Jam（其實答案琴晚已經知，X.Y.Z.個鼓手今晚會黎玩多次），想知"Yip Sai Wing & Friends"會唱咩歌，同埋想知壓軸時葉世榮會唔會以鼓手身份上場玩。
第六日．．．
「俾十秒鐘時間你解釋點解成個禮拜都唔番工！」
「呀．．．．．．夠十秒未呀老細？夠就不如算數啦，你俾多十分鐘我我都諗唔到有咩藉口可以掩飾『因為我頹』呢個事實喎．．．」
五日冇做過野係應該開下工，但係 懶。噉就鼠左出去搵也哥吹水。
也哥而家同人搞緊一個二手書買賣網站，個名係乜內容係點就係商業秘密唔講得，但係可以話你知本來個網名係 bookguy.com 。佢地打算如果上頭唔批呢個名就自己去reg番個 cubookguy.com 。
未來報告 Minority Report
《未來報告》作為戲名冇咩問題，但係戲入邊都係將"Minority Report"譯做「未來報告」就好有問題。唔明的話你去睇睇就知。套戲唔錯近排抵睇必睇戲之一。
今日又有「先聽為快」。TRHK我愛你！今次聽隻碟應該下個月出，係「電子民族」，應該冇咩人有興趣。不過如果你想跳舞的話就搵我啦隻試版碟仲係我手。
今日又搵多份秘撈。做ｄ乜？講到明係「秘撈」，點會俾你知？等我撈到ｄ油水先至話你聽做ｄ乜。
冇番成個星期，唔知點解教院會多左大量中年婦女同小朋友。有人話係「數學奧林匹克（路人甲肥良提供）」，有人話係「黎入CAMP（工作人員甲Zoe姐講）」。答案係乜冇人知。此乃是日不解之謎之一。
曠左成個禮拜工，老細今日見到我第一句就係「嘩！點解你會番黎架！」此乃是日不解之謎之二。
是日工作：造數
此「造數」不同彼「造數」，呢個係「造問卷調查數據統計」噉解。不過過程中有冇造數就呵呵呵，提示係要睇一百份問卷每份六條問題每題最少分八項選擇（點分法都係要我諗架），就算計錯數都睇唔到救唔番，同埋老細剩係會關心最後個統計報告。
個問卷調查係關於Year 3人點樣用呢個"Portfolio"（中文名廢事講因為譯名都成七八個）黎扶助自己之專業發展，第一次係「製作前」問預計會點做同會有乜問題，第二次係「製作中」問面對咩問題有乜建議。第二次其中兩條問題係噉情況：
「你曾遇上甚麼困難？最困難的部份是甚麼？」
「又要搞教務又要做功課，又唔俾sample，你叫我點做呀？」
「如果你再做一次『學校經驗文件夾』，你會採取那些不同的處理方法？」
「唔做！」
唔係得幾個人玩野架有好多人都係噉寫。由此可見"Portfolio"呢樣野搞到民怨幾咁高漲。不過唔好笑喇就黎到我，可能下年接我更條友睇到我張問卷時又係笑爆咀。
而家Office剩係用黎報到，睇書會去拉記，開工會去電腦房，所以次次「做野」之時老細都搵我唔到。今日ｄ野其實三點幾就做完，不過硬係要頹到四點半先拎上去交貨，「已經做得好趕架喇老細。」我認我衰仔架。不過可能老細都識穿左我呢個陰謀，即刻批多個Project落黎：
(a)為之前兩個問卷調查做數據統計（剛剛搞掂）
(b)睇Ｎ本有關"Portfolio"之書（本來已經有Ｎ本要睇即要而家總共有ＮＸ２咁多書等緊我）
(c)搵十幾個Year 3人做訪問（呵呵呢個我都唔知點做）
(d)用(a)、(b)同(c)所得資料，以英文寫一篇不少於十五版之論文（仲慘過做功課，開學都唔知搞唔搞得掂）
「呢份野夠做到你氣咳喇！仲唔走？」
「嗚∼老細，我唔敢再吞pop喇，嗚∼」
由今朝到放工，所有撞到之Year 2人見面第一句就係
「又番黎搵銀呀？」
我係全級最唔起眼最冇人識之路人，但係點解人人都知我ｄ野？是日不解之謎之三。
早：乜放假仲會有朝早咩？
午：開房啦當然係
晚：除左同佛爺上草妹屋企整機冇野做過
呢個就係是日生活。工，當然係冇開過。
原來Digital請多左一個阿伯，佛爺地位不保！遲ｄ旺電一一零會上演一場《阿叔阿伯大鬥法》，欲知鹿死誰手請多多幫襯。
即係唔係唔想番工（呢句之真確性值得商榷），不過起身之時已經係十二點幾，就算即刻飛身入大埔番到教院都已經成兩點幾 ，真係分分鐘來回時間仲長過開工時間。橫掂番工都冇用，所以曠工算鬼數。
「好呀你！唔番工都唔黎唱Ｋ！」
有得唱我都想唱。工係冇番，不過野點都要做。真係睇左成日都完全唔明篇essay到底點寫、到底要寫ｄ咩。如果問起點解今日曠工，我都可以多個藉口：
「因為我唔敢番工。都唔知你要我做乜！」
唔係之前聽到老細就飛要去問佢ｄ野點做，真係見今日又係十二點幾起身就曠埋工算。由起身開始有預感老細就係今日上機，但係硬係唔肯信邪結果就中招，番工之目的就係放工。噉份野點做點算？我都唔Ｑ知。
老細飛成個禮拜，跟住個星期一定要補鑊睇番多ｄ書同寫番少少野俾佢睇，如果唔係佢番到黎就仆硬街。
冇理由咁無聊今日出黎就係為左放工，所以回程時上一上TRHK走番轉。
「成日上，有乜好做呀？」
如果你搵到一間唱片舖入邊全部都係正碟同時可以試聽任何一隻（係舖內所有、任何一隻碟，呢樣野HMV都唔得）同時經常有資深聽歌人士同Band友在場同你吹水同推介買碟時仲可以有折仲可以幫手訂碟，你就會明點解我成日上。今日同人吹水時有人提起呢句，值得睇睇：
「食飽ｄ，玩盡ｄ，上路喇！」
大佬！最後一晚，最後的晚餐，好好珍惜！俾你玩同串又有乜所謂，你唔玩我串我我先驚，周身唔聚財！
食完飯先至係重頭戲：俾大佬拐左去打機。大佬打到打烊老細熄機都唔肯停，如果佢當其時仲唔放低對棍繼續打的話個阿叔真係爆粗都似。大佬係有進步喎，想當年一代時我又係好似你噉為左練Real十蚊打首本。不過而家我真係老喇．．．
真係噉就兩個禮拜。大佬，夠喉未？
打開有舖癮，晏晝又出左去打番幾舖。大佬，我真係收左皮喇，而家只係搵部四代煲"Love Affair"同"When I Dream of You"。係呀而家好鍾意玩番ｄ易歌。真係老喇。
冇喇今日除左打機之外乜都冇。
"Another Brick In The Wall, Part II", "The Wall", Pink Floyd, 1979