冇幾耐之前同大家分享過兩則「鏽色幽默」，除左香港metal界，「俾錢買碟唔download正傻仔」同「香港MJ MySpace啟示錄」仍是我最愛講的兩個本地metal笑話。好榮幸／好遺憾，第三個在今日誕生。
有留意本地band界，可能會知道今日2009年8月26日，係KOLOR新碟《Surrealism》發佈慶祝演唱會。演出詳情與新碟同時公佈，只要將唱片內表格填妥寄回，就可以得到26/8/09於九龍灣展貿舉行之演唱會門票兩張，以一隻碟只售$79-$99，有得去九展睇一場完整演唱會，會場再有tee送，一般indie gig都未必有咁著數呀。好多年前睇過一次KOLOR，歌得（雖未算太好）但唱同台風一流，不過長期睇舖走唔開錯過晒跟住所有演出，今次機會非常難得，而且隻碟本身已經必買架喇，前排行街掃碟時掃漏左，搵番日放工特登出旺角買再即晚寄表。26-28一連三晚有大show，但29/8星期六要搞TMF4，時間有限只能揀一場，為KOLOR我放棄左廿八號Kaman姐勁多外國band加香港band多到夠睇通宵的YO Park Final Gig，同廿七號又係九展加有MR.的「搖滾復活」。
凶時一到，別名「地獄黑仔王」的劉Sir，剋己剋人命格再次發作：正正我買左隻碟寄信拎飛之後果日，就公佈「因主辦單位內部問題」，是場KOLOR新碟發佈演唱會取消。
「．．．向來唔download的我，係咪都要爆番句『早知就download隻碟算買都廢事買慳番啦』？」
唔知道「主辦單位內部問題」是甚麼，希望唔會係隻碟太少人買進而更少人睇show索性取消，又或主辦單位（畢駒音樂？）同樂隊及會場傾唔掂數錢銀問題扼殺音樂。香港地要真正搞起band sound，金錢、社會、圈子等掣肘太多。KOLOR同想支持佢地的大家，今舖真係好灰。
我好想現場睇KOLOR玩《了不起》。我好想聽live版《圍城》。而家，我好想喊。
Tomahawk Metal Fest IV
Asian Death Metal Fest
TMF4：亞洲死亡金屬祭
「今日就係喇！」
如果到頭來都係上唔切皆旺TRHK買預售票，唔使擔心，雖然29/8正日TRHK休息，開show前即下午六點前你call劉Sir留低個人資料，就可以完成電話預約，每張電話預約門票售價與預售相若為$170！
做完show，加上近日日頭份工超忙，實在冇乜力寫咁多野。所以先講番上星期六場葵芳場indie gig。而家自己show反而仲未開始寫，積埋積埋，已經有四場喇。點算。
正正一星期前《鏽色幽默新章》，提到KOLOR場九展新碟發佈演唱會取消左勁灰，跟住星期五晚YO Park仲有另一場，不過撞正自己搞show，事忙都係冇得睇。只有留係屋企聽碟一洩心頭之恨。
認識KOLOR，要數到三年前。個名越傳越響，但印象只得「臨記Sammy隊新band」，因為臨記我麻麻，自然冇特別留意或搵歌聽。06年獨立字頭城大第一次睇到，當晚佢地玩壓軸，好感十分，在一場punk core metal雜錦show中，一上台大大聲
「我地係玩pop！」
港式rock唔算好突出、技術未至於超群，不過勁好睇。你睇到佢地表演時，台下圍住左幾多女性、有幾多女士拎住相機不停噉影，就會明白Sammy幾有魅力，彈得唱得大隻有台型，係型到連一向對呢種現象反感的我都服晒冇野講的「偶像實力派」，加多首《了不起》，即時愛上佢地。
「型。真係好型。」
非常紮實又有／夠自己歌，加值香港獨立樂隊開始勤出唱片之抬頭期，預左會出碟 － 唔出先係浪費，玩得咁好！樓梯響好耐，經過多番大小事，NOTHING NONE結他手入左隊（又一個故事），跟住簽約黃家強，過多年先正式出碟。
一場live使我極高期望，點鍾意都要承認，聽碟確比現場來得遜色。同AUDIOTRAFFIC一樣，盲摸摸入場live終極震撼，對隊band出碟引頸以待，入到耳卻始終覺得差段距離，畢竟事前之演出冇任何預期或先入為主觀念，睇過心中定左型，而且作為成功樂隊live一定比CD好，音響效果澎湃過你屋企對喇叭同耳筒外，再玩加唱放過錄音，返到屋企點都會感到有所不足，例如聽碟覺得唱冇咁好火。
當然音樂同錄音可以令唱片同現場距離拉近，但講過之兩隊（KOLOR及AUDIOTRAFFIC）都未能達標，錄音質素已經好高，但要一隻碟第一首到最後都好聽，即使是世界級歌手／樂隊亦難做到，整體水準夠平均已經可以，《Color》卻呈參差，錯摸在樂隊定位。正常本地band show多數俾你表演半個鐘，梗精打細算揀晒好歌同最主打／出名作品，加現場表演多數選快歌製造氣氛，睇過live梗覺得佢地係rock band，碟內兩首小品情歌《日日夜夜》、《後備》冇諗過會出現，仲要並排放專輯中間拖慢整體步伐，可算是個失策編排，《瓦礫下的人》同打完場之《給天使的信》無論創作還是位置都好得多。「我地係玩pop」似乎語中有意。
其他歌一貫港式搖滾，類近黃貫中甚至ZEN（聽《獨家堅料》好易諗起《乜Ｑ報章》），缺點除提及過水準不均，可能屬早期作品 － 隻碟三年前出，歌更舊得多 － 曲詞好「入屋前BEYOND」格調，聽落難免感到脫節，BEYOND你會鍾意《衝上雲宵》還是《光輝歲月》多？頭兩首《舉手》《衝鋒隊》未夠震動，反而放到尾二之《哄動》更適合做開場。部份歌曲亦缺張力，好似《離家》編曲有意思卻建立不到氣勢。重點一定係第三四首《瓦礫下的人》同《了不起》一慢一快，後者是令我愛上KOLOR的金曲，前者聽名已知講乜，出碟一年後就四川地震，慘情地應景，曲好卻差在詞；其實詞題同措詞是專輯中兩大弊病。大多地下樂隊都係差在歌詞，配合搖滾通常偏向口語或市井，最大問題係意境，好似《瓦礫下的人》，有意思，可惜部份句語詞意好怪。
曲編詞各有不足，開隻碟好多時只認真聽《瓦礫下的人》、《了不起》、《獨家堅料》、《 哄動》其他略過，皆因《Color》主打好得但非主打歌水準不穩，及未能在rock & pop中間找到確實位置。
《Color》後大事之一是環球簽左MR.，當時有感KOLOR懷才不遇，香港大眾始終只受抒情音樂，就算夾band都要放輕黎玩先有機會入屋，而且KOLOR只得黃家強獨立公司支持，問過「之後會點」，隔年出第二隻碟《Surrealism》。主題超現實主義，封面切題地迷幻，不過唔係我杯茶，諗起BEYOND《The Story Live》樣衰到喊個宣傳造型．．．因為長期冇聲氣，出碟又冇乜大宣傳，某日上網見到話有新碟，以免好似《Color》先入為主影響，避開晒試聽同MV直接買隻碟，再度十分震撼，分別在我諗就算有所準備，買左碟聽晒所有歌依然覺得咁好。兩年間，所有方面大幅進步，就如樂隊自己形容，從Canto POP「升呢」成Canto ROCK。
上隻碟其中一失，是開場白未夠凌厲，今集開宗名義廣東搖滾，《無人島》勁過《舉手》＆《衝鋒隊》加埋，其他歌同樣爆得多，連錄音都有力左，再者閉關苦練同寫歌咁耐回報可觀，編曲耐唔耐有聽到拍手位，每歌個性鮮明，冇《Color》某幾首面目模糊情況。專輯編排亦好左，點都要有的輕情歌兩首擺到最後，如果又係攝碟中間或每幾首快歌出一首慢歌，就會浪費晒其他歌咁搖滾之迫力。創作編曲旋律演奏演唱排曲通通成熟晒，必能滿足得到一心為聽band sound人士如我。《無人島》+《傻人》+《時代騙局》+《大條道理》炸到九彩。
除rock左，最得我心之成熟是歌詞部份。自己寫詞比以前老煉，詞題再加社會化同搖滾精神向，用詞修辭有改進之餘避免口語化，始終廣東話口語入詞好易變成自殺；另請到專業填詞人相助，黃家強唔出奇，最開心有我最愛本地填詞人劉卓輝，但同時有我極度唔妥的甄健強。要讚今集歌詞，一定要講與《瓦礫下的人》同是慢板、同放專輯第三之《圍城》：樂隊訪問時話首歌本來想講母愛，點知越編越灰，劉卓輝再插一插手就由《真的愛你》變成《說不出的未來》（出自劉卓輝手，真實描寫出八十九年代香港社會心態佳作），佢向來擅長以文字立體繪畫社會灰暗面，《圍城》貧苦懸殊勞無所得之境，正是活在經濟大瀉卻只得窮人含撚當下的你我日日所見所歷。而家冇主流歌手K歌有佢填詞，正因手筆太灰太沉重太易拉到去社會，仲點K？BEYOND遠去，兜兜轉轉又是繼續為樂隊盡力。
上隻碟飛住歌聽，今集只得四首唔滿意：老實講我好怕太陽光或太舊式港式搖滾，包括部份BEYOND早期作品，所以《雄心》多數會飛，而巧合地呢首就係甄健強填詞； 《愛莫能助》可能係KOLOR「最BEYOND」之作（又是巧合：填詞人正是黃家強），其實寫得好好，可惜後面假聲和音幾難頂；普遍聽埋《大條道理》就停碟唔聽最後兩首慢歌，興趣不大之餘《圍城》太強。某程度上我當自己買左隻七曲大碟，其他拉上補下冇左兩首慢歌完全冇損失，如果《Color》只為聽《了不起》（嚴格黎講，全碟我非常鍾意的確只得一首），《Surrealism》同樣假設成買single噉買，《圍城》是不二之選，況且單其他「b-side」都可獨當一面。《Surrealism》是個人今年最佳香港band專輯之一。而且佳在不止於一張光碟上 － 雖最後變成一宗悲劇。
在這「音樂應當免費」時代，單純只賣音樂銷情必須慘淡，得歌冇特別野送我download唔好？KOLOR名氣微薄更加。要刺激／保證銷路，額外贈品同gimmick屬必需，TWINS一隻EP都包到鞋盒咁大必有因，此乃所謂「樂迷」們迫成 － 但當然，「衛道派」們（即唔少本地「聽外國野」、「聽地下野」人士），一方面話買TWINS果班只貪贈品唔識欣賞音樂，一方面同你講「超呢隊band呢隻碟呢個版都冇野送我download黎聽算啦而家好多錢咩」，換言之心態同佢地鬧緊「為個鞋盒多過為隻碟」的TWINS fans無差多少。但起碼TWINS fans肯俾錢，而理應明白地下樂隊捱得辛苦過任何人的「衛道派」，會覺得各位地下band友唔使錢都開到飯，而自己ｄ錢就當然留俾自己享樂，「隻碟download都得唔通俾錢買咩！」（再者，有時俾錢買唔download先真正搵居黎戇）。《Surrealism》刺激銷路之著，是買碟送九展演唱會門票換領券，一隻碟可以換兩張飛，入場仲有機會拎免費tee，除番四十蚊左右就可以到九展睇搖滾演唱會兼收贈品仲有碟在手，仲超值過睇indie band show呀。演出一個禮拜前先至係戲肉。正正別名「地獄黑仔王」的劉Sir買左隻碟寄信拎飛之後果日，主辦單位就公佈「因內部問題」，是場KOLOR新碟發佈演唱會取消。唔知道「主辦單位內部問題」是甚麼，希望唔會係隻碟太少人買進而更少人睇show索性取消，又或主辦單位同樂隊及會場傾唔掂數錢銀問題扼殺音樂。香港地要真正搞起band sound，金錢、社會、圈子等掣肘太多。KOLOR同想支持佢地的大家，今舖真係好灰。所以，聽歌算啦。
實在太愛《圍城》，旋律夠哀、編曲悲壯、劉卓輝歌詞天下無雙，2009年訖今我聽過最佳、最感動香港中文歌一定係佢，因為verse一個旋律，次次聽都諗番起《阿信的故事》主題曲《信》，仲要夏韶聲《諳III》版本（蹺多鑊，冇幾耐前葵芳炒粉II零霧時都cover《信》）。可能編曲本已接近，聽著聽著有時撈亂以為MR.，Sammy唱呢首歌把聲勁似Alan，如果MR. cover《圍城》，或者首歌直頭係佢地唱，可能一早俾人日傳夜傳朝播晚播，唔似而家只成遺珠。始終陳奕迅聲先係香港人所喜愛，同歌路一定唔能夠爆，MR.起碼英倫路向港人受落，真係要rock？從MR.與KOLOR際遇差異，「下場」不難理解。
講開繼續講。《圍城》作者羅斌，就是文初提及過由NOTHING NONE轉會KOLOR位結他手。NN曾經係我最欣賞香港樂隊之一，佢地玩已經「out左」的nu-metal，不過因為本身聽開歐洲melodic death野而非一味死追美國，就將自己nu-metal歐陸化，風格獨家玩live氣氛好所以鍾意。「曾經」者，乃成團唔算好長時間就散左，原因好多，最戇居當然是香港一隊band有心玩音樂唔搞是非往往最易俾人背後猛講俾人釘死之荒謬文化（所以即使作為工作者，我從來同本地獨立樂壇保持距離），仲有成員音樂口味多向，有時太廣泛未必好，創作多元化卻要所有人得到共識非易事，羅斌棄metal選rock已顯心中取向，或者好多人會出聲，老實講，面對同一處境，相信絕大部份人會作出相同抉擇。多年過去，較有認識之三人中，鼓手輝爺修心養性教鼓同相妻教子，Davy繼續幫人做session同教結他（《圍城》MV羅斌一段彷如面鏡），早走改玩pop rock之羅斌叫撈得最好，可見香港玩metal太難出頭，特別佢地玩nu-metal，而所謂「撈得最好」，在整個香港樂壇甚至band壇中，都仍只算是半紅不黑。香港地夾band，始終只是圍城中的個傻人困局，一個如何大條道理有雄心都難以逃出無人島之時代騙局，愛莫能助。
去美國唔知夠唔夠一年就走番黎香港的七刀同學（似去渡假多過讀書喎小朋友），享左幾個月福又返過去，下次再返香港可能要幾年後，為隆重其事地送行，傳說中之trhK 5/9星期六晚再現江湖。唔計到最後一刻先呢個放飛機果個唔得閒之不成功經驗，對上一次大搞已經係一年前08中秋（仲未寫添．．．），同今場應該算係MK V。有見撞正開學K房優惠變晒星期一至五，星期六晚唱怕貴又唔知唱唔唱到通宵，大家徬徨，估唔到長沙灣市長之魔爪伸展到幾近油麻地仍然咁有影響力，係噉倚打個電話，當堂想唱幾耐有幾耐，經理再少少側側膊．．．
「果然出外靠朋友呀。」
太耐冇唱過K（應該話爆過K），加向來唔飲酒隊左兩杯已經差唔多搞掂，坐低唔知唱乜歌好又唱得十分正常（「唔夠爆」）。大家都冇乜貨唱到四點幾就走堅持唔到五點九，返到屋企沖埋涼五點幾，撻低第二日三四點先起身，仲要係電話嘈至醒，一起身又俾老豆拉出街食飯，支力左兩日禮拜一開番工又忙，返到公司同市長電話吹開水先醒起，條友已經上機飛左大家都唔知，一連幾日咁多節目支力到爆，放工回魂先講番句：
「七刀，一路好走呀。唔媾番幾件鬼妹返黎，你對唔住我地鄉親父老呀。」
七刀走左，到聖誕前又冇乜特別日子同假期，黎緊冇乜藉口又成棚人出黎唱K。或者係時候寫番成年前的trhKMK IV － 跟住去左燒野食又係未寫到。不過都要得閒先。而家退左休，反而仲冇時間過以前。黎緊幾個禮拜仲差唔多個個禮拜六日有show有function添。
展覽臨近，今年諗左幾個新project去展館玩玩，首先要幫自己（偽）造個新身份，除左印新卡片仲要開番個新email。剛剛撞正網站公司電話問公司網頁續唔續約，同事查番發現，有ｄ舊同事走左之後好多email account冇再用過，我就揀左個黎當自己「新」email。個email三年幾冇開過，Outlook入晒人名密碼click完成前有晒心理準備，都冇諗過咁激，一黎立即收差唔多四千封email，洗之不盡之餘爆到連部機都頂唔順，每隔一分鐘個Outlook就會死一次，閂左幾鑊之後直頭死到想開番個Outlook都開唔到。boot完機見如果唔理個輕機警告個Outlook雖然唔用得但會照收email，就擺係度由佢係噉由server度download幾千封email落部機度，結果全程用左半個幾鐘先終於收晒四千封。同測試到，原來我公司部機用開個垃圾電郵過濾，攔截率都有九成架。
我五點正開始搞，中間輕輕機boot兩boot臨尾搞掂晒已經係五點七八，做多陣野就可以安心放工，不過諗落有ｄ唔妥：睇番上面，差唔多download晒全部email，點解條bar仲係得半條唔夠咁長？再開個Outlook，原來頭先只係上半場，再有（最少）三千幾封未落。跟住又炸到個Outlook開唔番。計一計數：因為個email冇用好耐即冇過濾，一日平均可以收到十個spam mail以上，三年半冇開過，365 x 3.5 x 10 =．．．立即拿拿臨熄左部機扮冇事算，唔係唔使收工。
上回講到琴日因為手痕重開公司封印多年之舊同事email，結果搞到一野download左四千封email落部電腦幾乎死機，而且只係頭盤。第二朝好在有個客約左我十點上佢尖咀office見面，唔係開住個Outlook又做唔到野都唔知點樣扮忙（．．．）。特登交帶同事幫我開機收定email，我近中午返到公司仲未收晒，個Outlook已經唔多郁到，邊收邊清食埋個晏晝飯，部機先叫做平常行得番。終於：
今晝經我手收到之email有成萬二個，我返公司即樓上事發前同事已經keep住幫我隔幾個字洗一次，加埋琴日四千封，兩日夾埋收到二萬個email屬保守估計。收email都可以收到破晒紀錄前無古人，相信我已達到「柒人所不柒」的最終境界。
潛左水差唔多成個禮拜。退休之始已講過音樂以外離開舖頭之三個主因：自己時間、工作同家庭。雖然兩個半月前已經脫離開舖日子，而家三樣野夾埋仲忙過睇舖果時。
剛剛個禮拜六日，就係日日由朝到尾都有節目。星期一係也哥大囍日子，前後撞正幾檯客見，十月兩個展覽今個月要準備更忙，班親戚又唔知咩事個個搵晒呢排食飯一晚食完跟住晚又第二個，星期六錯過Rock Motel，早前俾KOLOR「玩」冇左場新碟演唱會，今次連續兩晚出show補數，我一場都冇得睇。食食下飯又要做野，忙到禮拜日朝早都要返公司開半日OT，為左也哥餐囍宴星期一請左半日假，跟住星期二就有個大客黎開會，懶起身懶出街禮拜日都要上上公司先搞得掂。因為要顧住星期二個會，請半日假老細已經嘴藐藐，冇得請全日名乎其實兄弟都冇得做，不過對兩位新人黎講似乎係好事，你知劉Sir幾黑仔架啦。之前一晚食飯搞到遲左起身，見趕唔切個天又陰陰地，已經打算搭的士返公司，好甘架搭一鑊的士錢已經等於成個禮拜咁多日朝早返工車錢加埋，不過冇時間又多野做冇計啦。屋企樓下已經唔易截的士差唔多隔半個字先有機會見到一架，落到屋企樓下差幾步出門口，剛剛好有架眼前經過。唯有走番去搭小巴，返工最煩係我一定要搭小巴，而且中途站唔好彩可以等半個幾鐘都上唔到車甚至冇車經過，小巴司機鍾意飛站ｄ阿叔師奶又成日打尖，早起身都唔代表一定準時返到公司。我出門口個時間通常會有一架吉巴疏導人群，結果當然你都估到，當我就黎行到去小巴站時，就見到架吉巴飛站了。等左三個字至上到車，幾經辛苦去到公司樓下時，剛剛好有部電梯。點會咁好彩丫？已經飛身跑埋去，隻手指掂到個掣同一剎那，部電梯上左樓。就係差果0.01秒。十分睇戲款地遲幾秒鐘出門口乜都唔同晒，今朝遭遇值得拍番套戲。最戲劇性咁急趕番公司為左跟住果日同個客開會執定好多野，入到門口老細第一句，個客臨時改左行程唔黎開會。早知係噉我就請足全日假去做兄弟啦。但搵著個咁黑仔的兄弟，新郎有冇機會成功接到新娘都成問題。
教院起我已經是個出晒名的PowerPointer，想當年一次present整PowerPoint幫我搵到幾個freelance project返黎做，今次做唔到兄弟都晏晝到，全因負責幫手搞電腦，今時唔同往日了，都係PowerPoint，不過我只負責click mouse同播音樂。咁早到其實只為呃飲呃食場地各式中西美點。呢舖都算經典，擺酒先撞正八號風球，貴人出門招風雨正是如此。
「等緊相呀。」
八號風球，有點重點得喧賓奪主，冇計啦，今年話會比往年打多好多風，需知之前兩年勁在多風之餘差唔多埋親香港一定變八號，夏季個個月最少多一日假，對2009期望好高架我大佬，點知風球少到爆，真係上到八號少得黎仲要一係夜晚一係禮拜六日搵笨實，今次難得星期一晚，好希望可以俾日我訓一訓覺，連續咁多日多多事幹十分支力。因為天氣唔好，連帶隻狗都訓得唔安樂，準時每個鐘俾佢嘈醒一次，而每醒一次就打一次電話問天氣，四點五點六點七點都八號，好開心，今年終於有個八號波唔使返工喇！結果一樣早起身，老細向來勁早五六點已經彈起，跟住開住電視收音機，九點鐘聽到天文台話過多一兩個鐘就會改掛三號 － 係將會，當時仲係八號波，三號到十點三先掛 － 立即發散晒係噉打電話溫馨提示各位同事記得晏晝要返工，慌死你會扮晒野成日唔返。這就是老細本色。放到半日假叫做好過冇。本身諗住原諒天文台，但係冷爺不知何解好鍾意聽劉Sir講粗口，好啦，詢眾要求：
希望是日段記，唔會引來專家們恥笑。一個metal友講民歌喎，仲要係三四十年前組合唔係乜野新neo-folk、darkwave project，仲唔笑死？
六十年代初，世界大戰過去，世界仍處於不穩狀態，加上冷戰、越戰等國際問題，唔少歌手開始以民歌作為批判時局之工具，當中最成功之一就係二男一女組合Peter, Paul & Mary。當時好興互相cover，好多時一首歌原作者唔算好多人理，反而第二個人cover先唱紅自己同首歌，PP&M一面重玩其他歌手如Bob Dylan等名曲，可能好多人仍然以為《Blowin' in the Wind》係PP&M作。自己作品同樣歌詞充滿政治味道，加上活躍於各種社會活動，當然唔少得Mary Travers金髮女郎之市場優勢，就令Peter, Paul & Mary大受歡迎同經常被人留意。
雖然劉Sir metal，其實佢係聽民歌大（基本上除左中樂同大戲，冇乜音樂我未試過踩過隻腳埋去），世人第一場演唱會，就係2001年Peter, Paul & Mary會展演出，亦即佢地唯一一場香港演唱會。後來睇《絕世天劫》，除左《I Don't Want to Miss a Thing》，另一首重點歌曲是《Leaving on a Jet Plane》，另一首PP&M金曲 － 不過同樣非原創，原唱者係John Denver － 挑番起舖民歌癮，又摷番屋企幾隻民歌精選出黎，可惜實在冇乜時間聽太多音樂，其後放低幾年，前幾日睇報紙，先知Mary Travers已經走左，即Peter, Paul & Mary正式結束。
「時間，過得真係好快。」
琴晚去左睇門生（我唔係core友，睇完都覺得正），訓到點幾先起身，本來諗住全日屋企抖門都廢事出，老豆打電話黎話見到惠康做緊減價叫我幫佢手入貨，夜晚出街買飯食順便過去望望啦。原來做緊買兩箱八罐裝可樂送一條六包裝陽光檸檬茶，雖然間惠康同我屋企距離只係街頭街尾半個字路程，我得一個人加一個袋都有點擔心，除左重拎唔到，行行下個袋爛左點算？最後只買到上面咁多。兩樣野本來賣幾錢唔知，而家係可樂$19.8八罐，檸檬茶減價$12.9六包，即係買四十蚊送十三蚊。今次減價非常受歡迎，我噉買法已經少架喇，買完去惠康隔籬間茶餐廳買飯盒時，見到有架車仔裝住十箱可樂加五條檸檬茶，老闆娘同物主傾緊今次個優惠，講到連佢都有興趣過去掃。
「有興趣的朋友，快手落惠康喇。」
拿。你話唔撐Murder King點得丫。上回講麥樂雞coupon時，搞華堡買一送一，不過Murder King我情有獨鍾八號雙層烤煙肉漢堡，麥記自從黑椒漢堡收左皮，唯一可以與之匹敵得番足六兩。好在知我口味，Murder King黎個突破：
唔止雙層，玩到三層，呢個燒烤煙肉三層漢堡，睇見已經想食。麥記似乎只有出足九兩或者真．帝皇黑椒漢堡先招架得住。強勁到作為Murder King忠實fans的我都唔敢接招，唔係怕佢三層，老實講兩層我食完都唔覺算乜野，我絕對有信心加多層難度唔會高得幾多，就算而家噉買一送一，連食兩個應該先等於我平時一餐飯份量（呵呵）。問題係．．．價錢幾甘。$34，幾乎等於雙層包餐，值唔值為加多一層扒，放棄勁好食的殺人王薯條同汽水？
「好唔好食先？」
答唔到你。其實我同呢個Murder King新包好有緣份。之前《希魔撞正殺人狂》得二級版好在冇睇，油麻地近來上番三級足本，平時得晏晝場今晚難得有場七點二，錯過左唔知幾時至有，所以放工一定會過油麻地，又一早叫左屋企唔使留飯，晏晝同事send呢張coupon過黎，似乎連個天都叫我把握機會嘆番次。點知比會計靚女剋一剋，近排佢唔知咩事肚屙左成個禮拜，請埋假屙左日，睇完醫生食左藥，點知屙得仲勁，不過當事人仲開心，今日返到公司宣佈「我屙到瘦左五磅」（．．．）。我今日先知肚屙會傳柒，佢屙屙下，搞到我近排都肚屙埋，放工同會計靚女一樣，都係趕番屋企保險ｄ，呵呵。
「記住今次買一送一去到25/9星期五咋！Murder King冇乜唔好，就係衰在次次優惠期都得兩三日！我應該嘆唔到。」
希望呢個三層煙肉堡會成為Murder King固定款式，唔好好似黑椒漢堡噉得閒就出一排跟住又要等幾年，等我下次出開油麻地或尖沙咀時可以食番個，不過到時冇左買一送一，三十四蚊食個包，的確要先掙扎一番。有人試過的話，話俾我知掂唔掂飽唔飽呀。
前排怒煲「Diablo flash tribute」Agony: The Portal，煲到癮起，立即摷番當年陪我渡過A-Level放榜的Diablo 2出黎，隔左十年唔夠嗟，點解會唔見左？搵到咁上下我都放棄，畢竟＞5000隻CD非碎料，仲未計大量DVD、小說、漫畫同變形金剛．．．撞正十月，特登請埋國慶同中秋中間日星期五2/10連放四日假，加假期前有日出旺角順路買番隻Diablo全集珍藏版，三舊水唔使有晒頭兩集送多本成本數學書咁厚的攻略，當年就噉買其中一隻都唔得啦仲要冇野送 － 最值錢，可能係賣game姐姐私人醒的天龍八部 Kama海報騎騎。我差少少想買埋同Diablo同公司Blizzard出的Starcraft，當年同Diablo一樣打到發癲的正game。寫過Diablo tribute，有興趣寫寫兩大即時戰略老牌label，C&C+Dune EA/Westwood同Starcraft+Diablo Blizzard（Diablo唔係戰略，而且應該提Warcraft多過Diablo，可惜我一向唔多鍾意Warcraft），兩間label由中學打到教院別具意義，不過一寫就大鑊大把野寫，加埋假期梗想放假打機唔想郁，有機會先啦（機會＝相信幾年後，我連近半年好多場show都未寫．．．）。今日寫寫jazz先。
「劉Sir，你聽metal，jazz你又岩？」
「實際上，metal以外、metal之前，好多音樂都關我事．．．」
「今年中秋，你點過？」