Frankfurt Freewalk 2011
Episode 13
天堂>地獄 德遊後記



Episode 1:從香港的1.27到德國的1.27

Episode 2:1.27晚間自由行+夜攝大教堂

Episode 3:1.28-2.1之做乜鬼野展覽丫落吧蒲去睇show才是王道

Episode 4:2.2日遊海德堡.舊鎮區

Episode 5:2.2日遊海德堡.古堡行

Episode 6:2.2夜行法蘭克福

Episode 7:2.3科隆自由行.火車總站&大教堂

Episode 8:2.3科隆自由行.動物園

Episode 9:2.3科隆自由行.午&夜行

Episode 10:2.4法蘭克福自由行.亂行篇

Episode 11:2.4法蘭克福自由行.動物園

Episode 12:2.4法蘭克福自由行.博物館行

Episode 13:天堂>地獄 德遊後記



****************************************************************************************************



5/2/2011 FRI 法蘭克福



很傷心,在德國兩個禮拜的歡樂時光話咁快就完,實在太傷心,琴晚食完Pizza執行李執執下唔開心到訓著左,今朝起身拿拿臨執埋再刷牙洗面沖涼check out。有時候真係不得不信邪,劉Sir黎左德國之後,留幾多日個天就黑幾多日,到佢一走,立即大雨灑過後晴天(唔好意思,剛剛睇完謝安琪演唱會,成個腦都係佢歌詞)。




俾劉Sir邪住的德國是咁的,成日黑媽媽




咁好天氣,是四處觀光遊覽的大好時機。可惜我走先黎咁好天。樂觀地睇,起碼回程唔會橫風橫雨有咩意外囉,上年同事黎到撞到火山爆發全歐洲停航,滯留左成個禮拜,冇人冇物現金都用晒得番張信用卡灰過火山灰。




這就是傳說中的chemtrail嗎




其實搭中午機唔使趕頭趕命,不過成世人第一次自己去旅行加第一次黎歐洲,大鄉里出城廢事出事,係唔係都去機場拎左位check in件行李先。點知就係噉柒左,去到航班都未出,坐左大半個鐘先等到check in,就四圍睇浪費時間。估唔到全城最陳舊係個機場,不論款式同裝修都係,同仲用緊好古老的跳字牌資料板,好似返左啟德機場。




琴晚用幾毫子買果枝百事,慢慢品嚐飲到上機,飲到最後先俾我見到後面有個回收標誌,唉蝕左添。德國回收意識高到一個地步,除左垃圾桶分晒類,商舖又有自動回收機,放膠樽入去會自動scan,掃完可以回收的會收埋再俾番少少錢你,有時行街見到人摷垃圾桶,你就知道佢尋緊寶收集膠樽去換錢了。點解臨上機先俾我知道,又唔知機場邊度有回收機,分分鐘我按番個膠樽,收番舊錢仲多過我俾錢買枝百事呀。




呢個飛人睇報紙廣告幾型,雖然機場有點殘舊,但好多精心設計的廣告,唔一味只得畫同字咁悶。




仲有好多實物廣告,呢個牌子呢隻玩具好熟面口,香港都見過。問題係,機場入面擺,就算你真係好鍾意好想買,你會唔會買咁大件野上機先?




終於俾我等到送件行李入倉,安心坐電車去閘口等上機。上磅時幾驚,限20kg但磅果陣超左5kg,冇計真係買左好多香腸,好在最後個姐姐笑笑口側側膊先過到骨。




等了又等,飛機都唔見影,無聊到我遊火車河,再出番機場外面睇人地遊火車河。早知就訓多陣先起行啦,等我咁鬼驚返唔到香港。




入廁所都有開心大發現,有自動安全套販賣機。我睇果陣,側邊個小朋友同我一齊神情貫注地研究部機。




塊banner前企左好耐,同入面條友一樣望住枝Gibson望到入神。但望到我返左香港,都唔知道其實賣咩廣告。香港機場好似都有呢間Sap的廣告,但德國睇到香港都唔知賣乜,都幾失敗。




再見了,法蘭克福,我要回去地獄了。




唉上機上得好唔捨得,因為返去香港,就同由天堂跌番落地獄一樣。十二個鐘頭機,連睇三套戲,《Scott Pilgrim vs. the World》(應該係其中一套3D效果做得最好最有道理的立體電影,但睇完明白點解香港會唔上,原著香港唔出名,仲要前半青年劇式美漫故仔後半變左港產式武俠片真係吹到漲,但我受)、《Shutter Island》(比想像中好,都幾神),《敵人傑》(唉這就是年度最佳電影之一?),再聽多次王菀之《我來自火星》演唱會(真的很正),一面嘆世界,一面嘆82年可樂。(搞咁多,其實因為同第一程機一樣坐機翼隔籬,引擎嘈到仆想訓都唔多訓得著)


我真係好鍾意德國可樂種淡味,上到機立即叫空姐俾罐,好在搏到德國版唔係港版。飲埋今程機,返到屋企就只可以去水打糖醬的茶餐廳同麥記搵。早知落機前拎多罐慢慢隊,唔知係咪我成篋腸仔累事,七點半落機,因為「技術問題」行李出左成個鐘,搞到九點幾至返到屋企。




返到香港同幾班朋友&親戚補食團年飯,更重要當然係收番利是幫補旅費,就開始點點手信了。德國十日主要四圍行玩同睇,購物消費冇乜,幫人買手信多,買俾自己除左少少野食,只得明信片一張。行過好多舖頭明信片通通行貨到爆,法蘭克福來來去去賣教堂同萊茵河景,海德堡就山林古堡雖然好鬼black metal始終又係悶,科隆玩設計吸引得多,本來冇打算買,不過見幾得意同一場黎到冇理由乜紀念品都唔買咁灰,貪過癮平平地買張寄俾自己。


做得遊客生意梗吊高少少,明信片最低消費五毫子歐羅大多不離一蚊,可能我揀呢張冇實景所以五毫搞掂,但仲開心又平又有得玩。跟住去郵局寄返香港郵費一歐羅,當時歐羅兌港元匯率係10.5,即係夾埋港紙十六蚊左右。郵局睇檔兩個師奶都答我唔到德國寄信到香港要幾耐,開頭以為要兩三個星期,點知正正一個禮拜七日就寄到屋企。真有效率,抵俾十蚊郵費支持。




回程一路為行李擔心,因為入面放左好多樽Sam少特別落柯打的柯華田醬。其實同香港有得買的朱古力醬好似Nutella差不多,但更加甜同多左柯華田味,加大量可可米式粒粒有得咬,每日都要搽番幾塊麵包頂癮,食到最後落熱水沖可可米華田一點都不浪費,買左七八罐返香港,送晒禮得番兩樽俾自己,有點後悔買得咁少送得咁多,好好味架仲要二三十蚊樽架。




臨走買左幾十歐羅腸仔俾同事做手信,但對自己當然唔可以虧待啦,超鍾意食漢堡扒,買左兩底返香港加料,一盒有五塊,承惠每包EU1.69,打埋稅當齊頭廿蚊啦,都超級地抵,香港地買包普通漢堡扒,size細過又薄過,半打已經要廿頭。就算賣得貴過香港我都唔會介意,重點是香港地冇乜地方搵得到呢種正宗漢堡扒呀,有都唔慌平得去邊,唔使叫我去Taste之類搵。




怕煎完中間唔夠熟或外面太熟而中間落刀一分為二,左邊係豬肉味,右邊係少見的雞肉。




唔知係咪紅肉白肉之別,雞肉漢堡扒較圓滑平整,冇豬肉咁凹凸不平。豬肉味其實同一般的漢堡扒差唔多,但口感絕對冇得比,同落少少胡椒等香料醃一醃,帶點辣味又好香,味道亦略鹹送飯一流。


至於雞肉味,就要先講番差唔多二十年未食過的雞肉漢堡扒。以前大昌同超市間唔中會出現神奇貨品,雞肉漢堡扒就係其中一種,個樣似一塊圓餅形的麥樂雞更好味得多,非常鍾意食可惜好少地方搵得到,中學食過之後已經冇遇過,難得德國俾我再回味這童年開心回憶,但同德國雞肉漢堡比亦當然完全唔同層次啦,最接近的形容是漢堡扒的口感加麥樂雞的味道,但仍差很遠。下次去德國,要再大量掃貨。




好食係漢堡扒,但論到抵食必定係沙林美腸,價錢最平個半歐羅有找,一包有幾十塊,薄得黎鹹又係送飯極品。話說有日老母叫左班親戚上屋企打牌,煎左半包再加豆腐玩fusion,本來碟沙林美豆腐成座山咁高,但打牌時食下一舊「咦好味喎你試下」食下一舊「嘩真係好食」食個不停,開飯時已經少左一層。鹹腸淡豆腐夾埋fusion食法,真係冇得頂。




最平淡是芝士腸,唔細細條賣一買就買一條長芝士腸,內有非常濃郁芝士,但拍埋另外兩樣的確唔夠特色,用黎整芝士腸蛋炒飯,味道剛剛好,再加多個梨下下火,完美的一餐。




當然頭先咁多味,全部唔係劉Sir自己整啦,佢除左杯麵,就只識得整營多撈麵。都冇問題。唔使落湯粉醬汁,兩塊漢堡扒加一排沙林美腸,我已經技窮喇寫到唔知仲可以點形容此等人間美食。話咁快冰格存貨就俾我清晒。德國呀德國,點解我唔係住德國。




只短短兩星期德國生活,已經令到返到香港之後非常唔習慣,單人地空間咁寬敞、空氣咁清新,已經兩個世界,不過得著是令個人健康左,以前每逢換季或吹吹冷氣就會病,兩三個月總要見見醫生,但歐洲返到香港,慣左外面兩三度日夜都大風,就唔再覺得十度八度係咩一回事,返左香港成年只睇過一次醫生,仲要係臨第二次出trip流少少鼻水,驚出遠門先黎病,反正公司有保險claim有理冇理睇左先。去外國走一轉,對世界對自己都會改變晒。


做fair時每日食杯麵是有回報的,最後返到香港,七除八扣計晒數,仲有少少錢剩低,正好當成公司封利是,留埋留埋到第二次半公數旅行再用 - 拿拿臨出晒舊相,都係為左趕上機前清舊數嗟,今晚寫完2011德國遊,第二晚就再上機出發去歐洲了,今次2012世界末日前最後一次歐洲遊再加玩盡佢倫敦>科隆>法蘭克福>巴黎,繼續妒忌吧,香港的契弟們。



****************************************************************************************************



Episode 1:從香港的1.27到德國的1.27

Episode 2:1.27晚間自由行+夜攝大教堂

Episode 3:1.28-2.1之做乜鬼野展覽丫落吧蒲去睇show才是王道

Episode 4:2.2日遊海德堡.舊鎮區

Episode 5:2.2日遊海德堡.古堡行

Episode 6:2.2夜行法蘭克福

Episode 7:2.3科隆自由行.火車總站&大教堂

Episode 8:2.3科隆自由行.動物園

Episode 9:2.3科隆自由行.午&夜行

Episode 10:2.4法蘭克福自由行.亂行篇

Episode 11:2.4法蘭克福自由行.動物園

Episode 12:2.4法蘭克福自由行.博物館行

Episode 13:天堂>地獄 德遊後記