Frankfurt Freewalk 2011
Episode 4
2.2日遊海德堡．舊鎮區
Episode 3：1.28-2.1之做乜鬼野展覽丫落吧蒲去睇show才是王道
2/2/2011 WED 法蘭克福
德國展覽會已於之前一日1/2圓滿結束，但這只是個開始，因為代表劉Sir德國自由行正式開始了。即係到而家都未明點解老細會派我呢個美國sales過黎德國做fair。唯有當佢都好想津貼我黎歐洲旅行囉，既然係噉仲要展覽會之後就撞著農曆新年我連假都唔使特登請，恭敬不如從命自當玩盡佢啦。
首先回到法蘭克福火車總站，跟住就會坐火車穿州過省地去今天的目的地海德堡了。
玩之前要先一早起身，今日開始乜都使自己，所以七點幾起身刷牙洗面沖涼執行李，再搭兩三個字去酒店放低野先。知唔知恨左落雪幾落？一場黎到歐洲已經嫌佢唔夠凍，雪都等足成個星期最尾幾日先肯落，之前一晚做晒fair睇完show臨訓前就開始落雪是個epic ending+beginning。搬黎酒店前聽屋主講，我地黎之前個禮拜雪落到成尺厚剷極都剷唔晒，但我黎到，落係落左，一寸都唔夠。
肥佬屋主樓下車站隔籬有間日本餐廳，因為出街食好貴本地人慣左自己煮飯食，佢附近我差唔多冇乜見過其他食肆。第一日黎到就話想食點都要豪一次all you can eat，結果到今日走人都未食過。美國的經驗話我知亞洲菜館任何野整出黎只會日唔日中唔中西唔西，只志在塞得飽，而且十歐羅位又唔算貴，出去食個漢堡包都四蚊啦。只係冇機會試了。
好在下榻間酒店Hotel Excelsior就係火車站對面，過條馬路仔一分鐘唔使就到。冇乜時間check-in，去到掟低行李落佢地地牢暫存就出發了。
仲有時間可以周圍八八。天色唔多好，又唔落雪，想點先。
樹上面本來好多雀。一行埋去就飛走晒。
戶外企得耐，就凍到同碌柱差唔多。都係入火車站啦。
一入到火車站，又有成班雀四圍走搵野食，邊度有垃圾桶邊度就見到佢地。琴日去超市買左幾個朱古力批，俾佢地見到我食好似好好味立即圍埋黎，即閃。
其實本身展覽之後自己留幾日冇乜計劃，更加冇諗過會黎海德堡，不過同事老公同個女飛埋黎德國，成家人去巴黎之前先遊一轉海德堡，火車飛又平廿二歐羅搞掂，咪跟佢九點幾搭兩個站火車去走走。（其實冇得揀啦，自己留三日而法蘭克福查實唔算多野玩，唔去第二個城真係唔知點消磨咁多時間）
站入面架架都係最新型子彈火車，點知我地係坐最舊果架，雖然車程只一個鐘中間要停一站，唔知係咪呢個原因所以來回兩程先收廿二歐羅咁平？不過光猛乾淨好坐，票務員服務又好，上到車查完飛就乜都唔理訓覺了。
過癮在開左車行左幾個字先開始查飛，如果我白撞左上車會點，要拉我我都去得到目的地啦，唔會夾硬車番我黎蘭克福咁絕卦。
2/2/2011 WED 海德堡
大鄉里出城，成日覺得外國咁大仲要坐高速火車好大陣仗，但搭過發現同坐火車上深圳唔差幾多 － 其實差好多，車錢係貴幾倍，但時間相差無幾之餘車廂座位質素冇得比，同有樣野冇得唔讚德國佬好野，講到明幾點開車幾點到站就真係兩邊都必定準時，地鐵學下野啦，價就猛咁加服務反而越來越差。
同見到火車站門口成街單車，真係好羨慕人地咁重視單車甚至滑板車代步，火車站有locker俾你放行李或者背囊，跟住租架單車就可以四圍去，夜晚返黎還車拎行李上火車再上路或者去酒店，幾開心。
火車站對出已經好靚，德國建築真一流，不過今次海德堡之行只得半日，主要行兩個地方：舊鎮區，同古堡。所以冇時間四圍走去研究。
落車搭陣巴士就去到舊鎮區入口，成日投訴劉Sir篇篇文都鬼咁多字的朋友有福了，今日開始會相多字少。（實際係自己懶寫）
舊鎮區中心位置有間古屋，睇落應該係勁野黎。不過．．．
有解說，但全部德文。身為遊客想知道間古屋歷史都無從入手。旅遊區喎。
此乃舊鎮區地圖，唔算好大同基本上幾條大街組成好易行，目標是右上的古橋。
選帝侯博物館，好多文物好似連駭骨都有，有興趣入去望望但閂左門。
帝侯博物館隔籬有個靚花園，不過好似私人地方，搞到唔敢入去。
唔知係咪預冬季冇咁多遊客？好多地方都維修整路，行幾步路就見到小工地。
估唔到黎到海德堡仲要舊鎮區，先第一次見到德國戲院，反而法蘭克福咁摩登，但行左幾個地區幾個商場都未見過有，諗唔明。
唔少得當然仲有大量雀仔啦。比法蘭克福更多同更加唔怕人，真係通街都係去到邊都總有幾隻在左近，不過好多人放狗，間唔中就會身邊突然成班雀彈起或飛過，隨時中頭獎。
行左大半個鎮有點支力，見到有檔賣Schneeballen，難得有特色小食就買左個試試。
Schneeballen即係雪球，其實係唔同料撈落麵粉之類再炸，都幾似茶樓甜品。叫左個少少朱古力加nuts，靚係靚但鍾意食甜食的我唔多識欣賞，口感麻麻亦覺得唔夠味唔夠甜。噉就豪左四歐羅。
望見都知間豪華餐廳唔係我地食得起。聽同事老公講，佢以前試過同老細黎德國出差，入過去食一次，食餐飯埋單夠你住一晚酒店。都係返去食雪球算啦。
「場Ball der Vampire好似幾吸引，應該會有大量gothic/lolita囡囡蒲頭，著住件Cradle of Filth入去肯定媾死女。」
頭先間豪爆餐廳豪唔起，又唔想食雪球的話，好在仲有間亞洲酒家。但．．．唔係走到黎海德堡都要食中餐卦．．．
「真係去到邊豪到邊。好在我住法蘭克福，唔係幾大筆旅費都唔夠俾酒店。」
最後，終於黎到目的地內卡河。無敵河景呀。
想知條橋咩來頭，城樓柱腳有歷史簡介。即係除左數目字，我一隻字都睇唔明囉．．．
其實更有興趣，係上山入森林睇。見到都想上去啦。
過左橋到對面，又係好多工程整路，前無去路冇得上山被迫返轉頭。
除左好多人跑步，仲成日撞到狗。上到橋就撞到呢隻狗仔，死咬住個波唔放，橋頭走到橋尾都唔肯俾個波我。
可惜天色唔多好，去到邊都係白朦朦一片，但反而更加襯座古堡。走完古橋遠眺，係時候向下一站出發。
