Frankfurt Freewalk 2011
Episode 9
2.3科隆自由行．午＆夜行
Episode 3：1.28-2.1之做乜鬼野展覽丫落吧蒲去睇show才是王道
3/2/2011 THU 科隆
行完科隆動物園，晏晝兩點幾，來日方長。雖然同事極力推薦黎科隆，實際上完全冇認識，佢地以前黎科隆做展覽就蒲得多嗟，單買份地圖自已撞，見萊茵河咁出名河邊又有幾間博物館，就隨便上架電車去河邊，經過上面一個稱為Ubierring的公園，見咁靚就落車睇睇。距離夜晚九點半上火車，仲有漫長時間慢慢消磨，就由河邊的Ubierring開始慢慢去沿河幾間博物館遊覽。
河邊遇著一隻幾好玩的狗仔，唔知點解個主人幫佢剃毛只剃一邊咁型（其實好鬼死似皮膚病）
可能太過現代化，我所經過之萊茵河景色都唔太吸引。或者想睇景，都係要海德堡等古色古香先有味道。
河邊零零舍舍起左一間屋仔，位置同建築好有童話感覺，睇落好唔真實。唔知係旅館定餐廳？可以俾我住一定開心死。
沿河都係寫字樓同幾間博物館。唔行河邊同跑步客單車客爭，可以選擇中間一條大直路，左右兩邊係商業樓宇，仲會穿過三座特別設計門形大樓，所謂「門常開」的新政府總部大樓，不論內、外還是四周環境規劃，唉，拍埋真係影衰香港。
雖然萊茵河景色失望，但好多雀仔，而且唔驚人，你行埋去都未必會飛走。係估唔到咁凍佢地會飛出黎吹風。
所以話黑仔啦，真係黎左德國，去親邊度，邊度就裝修整路。
好似係家劇院黎。人地建築魅力在於俾個好似劉Sir噉的路人甲行過，都會停低望望讚嘆一番。
居然俾我撞到EA Games！原來佢地河邊有自己一棟辦公室。好想入去參觀。當然冇可能啦。不過有趣是行過樓下撞到佢地有位女職員放工，係拖住隻狗公司行出黎再落樓下停車場。俾狗入商場同上交通工具已經出奇，直頭俾帶寵物返工更加估唔到。真開心呀。
除左觀光，一直行仲想搵飯食，點知行到三點幾，先俾我見到其中一棟寫字樓地下有間餐廳，怕錯過埋又要行多大半個鐘先有得食，唔理咁多入左去先。當然又係乜都德文啦，睇舖個黑皮膚哥仔英文又唔太好，不過服務態度絕對值得敬佩，大家講唔掂再手語，跟住見成間餐廳得我一個客人，帶我入廚房俾我每隻味試少少，你點好意思唔幫襯。
落單叫左個他他汁意粉，好食呀不過七歐羅，加多枝蘋果汁，承惠EU8.6，肉痛但黎得歐洲就要習慣。最唔慣亦最唔順係，大佬，我搵間餐廳食飯，除左飽肚仲想行左成朝坐低抖抖，唔知細定地方習俗定點，成間餐廳居然一張凳都冇要企住食，吹到脹晒。
餐飯半個鐘，間餐廳除左我，就只有另外兩個人入過黎，好似似父子，每人飲枝啤酒吹左陣水就走左。可能返工日子三點幾所以咁冷清，但就算咁大個寫字樓區俾佢做到大半獨市，我都唔覺得可以賺得幾多。人地守業生活就係咁悠閒唔多使憂噉款．．．
會決定沿河邊自己行而唔搭車，因為睇地圖好似好近，點知實際上行到你腳跛，由頭先起點行計埋餐飯，望落好近的門常開，行左我成個鐘頭先到。其實都幾唔明呢頭返工班人點生活，可能真係要靠單車同滑板車。最灰係咁長條路中間差唔多冇野食，餓起上黎點算真係餐餐叫pizza？
上飽飯再上路，繼續沿河散步吹風。
睇定目標，我要過對面岸，去右下角個環，睇黎好大座。
奧林匹克博物館，興趣唔大冇入到去，只有外面張長凳坐左幾個字，大佬一朝早就行連頭先食飯都冇得坐，要抖抖了。
其實行咁大段路，都係為左佢，朱古力博物館。不過睇見招牌，似Lindt自己公司多過博物館．．．
設計幾型，好多種唔同風格夾埋，這就是建築學同美學了。
後面個弧形大玻璃係餐廳同展館，但到頭來唔敢入去，除左一丁友，太high class了，我怕入到去俾人笑（呵）
四圍都見到朱古力廣告牌，單車站水牌都係佢。
終於俾我行到尾喇，終點就是內河河口橋，幫條橋影完張相，相機就冇電了。琴晚唔記得叉滿，朝早影草泥馬又影左大半電，一場黎到科隆先如此失策，仲要個天黑左成日，搭電車過橋時個天就光，影唔到日落真係灰。跟住夜晚唯有用電話影相，同用最原始方法幫部相機叉電：捽大脾．．．
坐火車過河，出站有檔士多仔，本身想食條雪條，平極都要1-3歐羅，名牌野4蚊起跳，最後買枝可樂算。都兩蚊呀。
出到去先知，原來對面岸睇到個大圓環係球場，好大好壯觀，不過今晚冇球賽亦冇演唱會，靜又冇人，失望。
球場出面個大花園仲吸引。唔算大我諗同維園球場差唔多，種晒樹好靚好舒服，坐低飲住枝82年可樂享受一下，除左我，只得一個清道夫執垃圾，同一個阿伯放狗。如果有球賽或者演唱會，可能呢度會爆滿晒人「佔領ＸＸＸ」噉款。
坐下坐下，唔覺就五點幾，開始回程了。不忘影番張球場夜景。
這就是在這萊茵河彼岸的另一主要火車站展館站。同對面現代風格之科隆總站成一大對比。
呢棟大廈，唔記得左叫Square定Circle定Triangle，總之我記得就係，棟樓個形狀同個名完全唔夾甚至矛盾。情形就好似香港那九唔搭八的圓方。
好多地方都見到中國國家雜技團廣告。其實而家都唔太明點解鬼佬咁鍾意睇。同係咪真係有熊貓，定還是同海洋公園一樣純粹搵人扮？
初時諗住搭車返過對面岸火車總站，點知已經去到大橋，就選擇行過對面。仲好啦，全日最好睇就係夜晚過橋時。
記得睇電視旅遊節目有講過，科隆火車大橋中段，好多人鍾意黎呢度扣把鎖上去，越扣越多扣到出左名成為觀光點。至於點解就．．．唔記得了。
靚到仲有咩好講丫，過橋行左35分鐘，但天氣唔太凍加上夜風，只會令人越行越舒服，大把人跑步踩單車或者帶埋隻狗一齊跑。如果香港都有地方咁好環境咁好空氣，我都會每日黎跑步做運動。當然，就算有，你都要似人地寫字樓準時六點、商舖唔遲過八點咁早放工先。唔通晚晚黎跑午夜場咩。
一過橋又見到大教堂，六點九，仲有近三個鐘，仲可以遊多轉。
日頭冇太陽太暗睇唔出神髓，一到夜晚黑夜加燈光，靚到我都唔信真係影相影出黎，成個景似畫出黎。立即好自豪，
「估唔到我影相都有大師級水準喎，騎騎∼」
最後都冇機會入去睇睇。而家咁夜，更加冇可能啦。差商業區未行，最後兩個鐘就向城市另一個方向出發。
去到內陸區，又開另一種眼界。唔似旺角之類地方有錢區同窮人區迫埋一齊，更貼切形容係一個擴大多倍的銅鑼灣，你向一個方向直行十分鐘，途中全部係無數大商場、名牌舖同酒吧食肆，人流唔多唔迫你都會感受到更加繁榮，亦因此消費指數更高，買或食同一樣野比法蘭克福貴少少。
好多商場都靚，不過相機冇電（繼續捽大脾．．．），只影到呢個算最有特色的代表性建築。
同樣鬧市中又會搵得到各種教堂、城堡等古建築，而且保養得宜，睇人地保育做得幾好。
唔買野又唔好名牌，所以咁大間音樂中心，令我流連左好長時間。街角成座大廈都係佢，唔止相入面睇到的五層樓，右邊仲有同樣大棟的附屬停車場，離遠睇時我都唔信樂器舖黎。Tom Lee尖咀總舵拍埋都要收皮。
樂器舖八點就收檔，門口齋睇二手唱片同樂器冇癮的話，可以去對面間Hot Topics，一間樂隊潮物連鎖專門店，MK潮人必入，可惜香港冇。當然好多band tee啦，但最精品放晒櫥窗引你入去，好似Eddie the Head胸像，我都係對Megadeth隻Vic Rattlehead較大興趣。想當年，樂隊唔將自己變成吉祥物（Kiss），都會整好多吉祥物做樂隊標誌甚至代言。而家已經冇乜樂隊咁有心機。
最想買，其實係AC/DC《Back in Black》鐘，唔平呀22.9歐羅，你當兩舊半港紙啦。
各大舖頭同商場陸續打烊，亂行左好多地方發現到其他特別舖頭同博物館，但太遲了我只餘最後一小時。連超市熟食部都閂埋，只好返火車站搵飯食。又撞到隻狗，帶住去火車站行買野未算奇，我見到有人拖住隻狗等長途火車，唔知狗係咪可以同我地一樣坐火車穿州過省？
到頭來，又係食漢堡扒。Burger King都幾貴四五十蚊個餐，Pizza Hut睇都唔敢入去睇，反而麥當奴幾家連鎖入面叫做最平，只比香港貴少少，但係冇理由真係要食佢地咁灰卦？其他選擇唔多，唔想食麵包或者三文治，就得番漢堡包，同個姐姐講唔要包平番蚊幾，一塊2.25，可樂1.9，夾埋一餐咁簡單，都要差唔多七十蚊港紙呀。雖然真係好好食，自從太子冰室冇做自助餐之後，已經冇見過仲有邊間平民食肆搵得到呢種正宗燒肉餅漢堡扒，七條就七條啦。
坐火車唔使入閘，但係去廁所要十分抵死，發達商業區就係high過人，法蘭克福總站先收你七毫子，科隆收足你齊頭一歐羅仲要慌死你呃佢重門深鎖，雖然我承認廁所的確好乾淨，而且設施齊備你入去刷牙洗面插風筒吹頭都得，冇詳細參觀過但你話我知有地方沖埋涼我亦唔會出奇。只係要俾錢去廁所並非人人習慣亦唔方便，我去完走果時就見到有條友明顯好急衝住入黎，點知去到閘口發現冇散紙，立即調轉頭衝番出去搵人求救，十分好笑。
等火車時，在月台遠眺大教堂外車站旁另一名勝Muscial Dome，聽個名都知係大型音樂場地，是晚節目是Rocky Horror Show，名聽得耐但從來未睇過呢齣音樂劇。其實好想親身體驗一次入去呢種幾萬人大館睇場音樂會。今次行程太趕，唯有寄望將來。
八點半玩到九點半，十一個鐘其實唔夠，雖然唔多花時間逗留景點，但萊茵河兩條大橋只走過一條，同之前一晚失策叉唔夠電動物園又玩過火，好多超靚夜景都影唔到，所以一定會再黎多次補足番。同一定鍾意科隆多過法蘭克福（雖然乜都貴），景多鍾意邊行邊睇大把選擇，如果鍾意買野就更加要黎科隆呢個超巨型銅鑼灣。第二次歐洲遊，科隆會係我重點重遊地區。