雖然我從來唔係阿波羅大fans，講食雪糕都係牛奶公司比較正（不過好多年前牛奶公司已經俾雀巢食左，不再「tr00」了），欣賞是佢地marketing。細個即係小學果陣，阿波羅宣傳好叉勁的，一到夏天就會有平兩蚊大行動，係乜都平兩蚊定買唔知幾多錢先有得平兩蚊唔記得左，不過睇完個廣告就會跟住係噉嗌「平兩蚊」保證記得。亦出過唔少經典，好似果陣興機械人卡通，就整個機械人雪條系列，仲有印象係藍戰士、紅戰士同太陽神其他唔記得，老實講只係普通雪條而且唔多好食，但膠袋印個機械人再改個型名，當年呃到唔少傻仔，可惜而家搵唔番，唔係買條藍戰士聽住《豈有此理》食應該好有feel。仲有Monaka，「搣得黎食既雪糕」，同埋Magic Cone與Magic Cup，當時仍盛行蓮花杯甜筒等，Magic系列設計奇特份量多十分反傳統，即使一個要五六蚊果陣算幾奢侈，都好鍾意慳番幾日零用錢買黎食。阿波羅帶俾我的（美好）回憶，勝過其他所有雪糕品牌。

只可惜後勁不繼，因為事實上除左一兩隻味道例如牛奶味，阿波羅雪糕的確唔夠牛奶公司甚至維記好食，有時甚至係難食。你有冇見過每到暑假，特別有新雪糕雪條出時，牛奶公司會似阿波羅噉電視報紙賣恆晒廣告？冇，除左佢地個名一早深入民心，仲因為有質素，阿波羅自知雪糕唔夠鬥只有靠gimmick吸引人，但過完一兩次口癮就會少幫襯，難怪要係噉出新款、谷廣告、「平兩蚊」，相信入遠不敷出，升左上中學已經冇乜阿波羅廣告。到而家，大家會記得其他品牌特別雀巢經典口味，好似三色雪糕、鳳仙、大腳板、雪米磁（維記難得傳世佳作，雖然我識好多人唔鍾意食），大部份依然有賣大家依然成日食，但你仲記得多少阿波羅雪糕，仲會買黎食？機械人雪條要去到舊區殘士多先搵得到；Magic系列得番Cone，Magic Cup仲有冇都唔知太耐未見過。唯有Monaka站得住腳，雪糕算阿波羅出品較好食果檔又夠特別，時至今日仍間唔中幫襯，不過亦帶出阿波羅除雪糕質素外另一失敗原因：食得多阿波羅出品，唔難發現因為太賣gimmick而本末倒置，如Monaka重點是「搣得黎食」，聽到都知你要開完膠袋拎出黎再一舊舊撕開先有得食，加一面食舊野一面變形雪糕一面溶，當香港人乜都要方便要快手，噉設計只會影響銷路。其他新奇款式亦或多或少有類似問題。所以比其他人更早締造的多種經典，如今只能成為一個cult。

亦再冇乜新野出喇。我印象中較新已經係出左好長時間的雪糕三文治，兩蚊一件最平個半都有，用兩塊超薄威化餅夾住一磚雪糕，但雪糕同塊餅都勁難食，而且你上下夾住黎拎一用力雪糕就唧晒出黎，加上一食雪糕就會開始溶，而你基本上同直接拎住一舊長方形雪糕冇分別．．．賣兩蚊一件都彌補唔到，如果連食Monaka你都嫌麻煩，個雪糕三文治會食到你不斷講粗口。阿波羅光輝歲月已遠去矣 － 雖則可能十幾年前早就結束。

所以有朝返工，見到巴士車身賣阿波羅新廣告，覺得好出奇。好多年未睇見過佢地新廣告喇，仲要有新野出添，公司樓下華潤見到，有「減價」，執左兩盒試試。

其實我連佢叫咩名都唔知，盒寫啜啜雪，但巴士車身叫啜啜雪糕。冇記錯$25一盒四枝裝，即係六個幾一枝，有朱古力同牛奶兩種味。包裝唔太娘我覺得幾cute的，最少應該呃到頭水，如我。但食落口．．．

唔好講食住，睇先。個賣相十分唔掂，已經影響食慾。又食之前，再需要講講物理：物質有液態、固態同氣態三種型態。「啜」此動作，適用於液體。而雪糕，屬於固體。所謂啜啜雪糕，其實同大家由細食到大的啜啜冰一樣，長條形軟膠管入面加雪藏餡，問題係啜啜冰重點不在飲，而在大熱天時俾你拎住碌冰消暑，同一枝中間搣開兩條同人分享果份樂趣，好唔好味；雪糕則是甜品，為一開就放得入口立即食落肚。我想問，雪糕唔同冰冇咁易溶，就算猛咁啜都唔會話吸就吸到出黎。結果，一係冰格拎出黎之後擺一陣，等佢溶，當奶昔啜出黎；一係用手同牙暴力唧出黎，污糟夾核突；一係好似我噉，暴力食左頂果少少之後，鉸剪剪開佢拎隻匙當雪糕杯噉食。換言之，點食都戇居。

「請問邊位天才諗到將雪糕放落啜啜冰筒入面咁醒扒？」

朱古力果款顏色同味道都唔掂，牛奶好得多，或者因為我一向接受阿波羅牛奶味雪糕，同白色點都好睇過屎色，但整體而論，以此賣相、以此概念、以此價錢，只有話啜啜雪（糕）是個epic fail。佢成為左「阿波羅雪糕就是難食」的活生生例證：味道差入口難，加構思差食得困難。

「每次講起食雪糕，不得不重提cult classic雪夾糕。應該Facebook開個雪夾糕群組要求復刻！」

（點知原來雪夾糕間label窩屎，出完雪夾糕之後就收左皮了，可能俾劉Sir怒掃一蚊一個雪夾糕收購到佢地破左產，真灰）