「點解入教院？」好多教授都問我呢個問題。「唔好問我，我都唔知點解。」我每一次都係答呢個標準答案。「下？點解？」跟住佢地實會 追問。「冇呀，ＣＭ面試病左，選科又擺錯位，噉就冇端端入左教院囉。」都係標準答案。講真，入教院真係完全純粹意外，又唔可以話唔想入， 之但係身處教院個人又冇左中學時種動力。

　自從入左教院之後，就真真正正係「渾渾噩噩又一天　無無聊聊又一年」。係呀，不經不覺噉原來就無聊左兩年幾囉。逢到中七選科，一定 好多中七人問我「教院好唔好讀呀？入唔入得過？」我每一次都係答呢個標準答案：

　由CM面試之前一日開始大病就有預感，知道自己會繼承父業。結果「夢想成真」，都唔知呢份生日禮物是吉是凶。

　AL得兩D三E，除左教育學士呢ｄ重面試多過成績之學科之外，基本上可以話係好大機會冇書讀。二千年聽到最低紀錄五條E，二零零一年水準 開始上升最低紀錄四E一D，教院呢個大水泡會開始縮細。黎到二零零二年．．．

　以上兩段載自香港電台《大學之道》討論區。唔使我講啦。為左（妄想）升格做大學，跟住幾年教院個收生要求會繼續向上。各位有心入教院 人士請多加努力，好自為之。
　當然，成績唔係最重要，面試先至係食唔食糊之關鍵。噉個面試又係點？

　「Ｘ佢老Ｘ，問『張惠妹大陸禁唱感想』，點Ｘ知呀，我都唔Ｘ睇報紙．．．」

　以上就係一位二千年中七生面試之後所講。冇錯，個所謂「教師適性評核試」其實係同中七時中文個口試一模一樣，分別只係完全冇時間準備 要玩即場同埋ｄ題目全部都係時事題。如果冇睇開報紙或者冇留意開新聞的話，你面試之後可能會同好似上面位仁兄噉樣。所以面試幾日謹記睇下 報紙先。當然，有時考官會問你呢條教院入面最流行之問題：「點解入教院？」先睇睇以下呢個真人真事個案：

　Ｈ君於１９９９年面試中
　「點解入教院？」
　「呀．．．冇呀，做教師薪高糧準福利好嘛．．．假期又多喎．．．所以咪想做先生囉。」
　「．．．你可以走喇。」

　Ｈ君於２０００年面試中
　「點解入教院？」
　「嗯，我一向對教書都好有興趣，細細個就有個志願想做教師作育英才，一嘗教書滋味。」
　「好，唔錯。如果你冇問題的話可以走先。」

　雖然大家都係因為「薪高糧準福利好假期多」呢ｄ原因 － 尤其是而家個市咁差呢一種人之數目直以倍數增加，但係噉樣同ｄ考官講會有九成 機會俾人踢出街，事實亦都證明左呢個正確答案只會令你踏入九死一生之境。二千年個答案相比之下就好好多，起碼好聽ｄ先 － 雖然有九成人心入 面都唔係噉諗。但係做人又可必咁坦白呢？昆下自己呃下人地，佢地開心你又高興，何樂而不為？

　今日帶大家遊覽一下教院。首先係我屋企集合出發。由第一日開始，就得到教院其中一項免費福利：彈性上學時間。一時由土瓜灣出大埔要成個 半鐘，一時又九個字就得，真係夠晒彈性。真係上八點半堂就要趕餐死。唔住Hal真係咁麻煩？．．．唔係我錯！係教院太遠！

　黎到教院，一落巴士，「好靚喎。」你會講。冇錯，教院背山面林係唔錯。跟住擰轉頭，「好靚喎。」你又會講。係呀，ｄ樓真係好靚。不 過你睇到呢ｄ別墅豪宅都唔關教院事，成坐山最豪華之地段係屬於淺月灣同倚龍山莊。噉教院人住係邊？入到校門轉左，你會見到一大列樂高屋。 冇錯，呢堆野就係咱們之宿舍。雖然ｄ單位真係好細，但係聽返ｄ退學人士講，教院宿舍質素同其他大學宿舍相比算係好好。

　因為係新校加埋係山上面，教院ｄ裝修同風景係唔錯。係Ａ座開始行，不經不覺噉就去到Ｃ座個中央廣場。七記、EPS、Canteen同埋圖書館 都係度。教院ｄ導師成日都有一個不解之迷：「點解其他大學ｄ圖書館成日都爆，但係教院個圖書館永遠都冇乜人？」答案好簡單：「教院圖書館要 學生證先入得、教院地理位置極度偏僻，同埋人地係『大學』。」

　繼續行又係不經不覺，噉就去到Ｅ座喇，有泳池，有球場，有運動場，有健身室。仲有兩間Canteen，一間係傳聞真係教職員先俾入之「職 員專用」茶樓；另一間我未試過，因為由開張到今日都係劣評如潮所以我都未（敢）去過。係Ｅ座再行過ｄ，就去到賽馬會宿舍。如果你唔想住ｄ迫 狹樂高屋的話，只要你俾得起錢同搵夠腳就可以入住呢個「Ｎ人一單位」豪宅區（最少同普通宿舍相比下係噉）。係呢度冇幾遠有一座超豪華官殿。 呢楝野就係教院之終點站，校長官邸喇。叫到「校長官邸」自然閒人免進，所以各位仁兄黎到呢度可以可以調轉頭走喇。睇睇錶，「咩話？半個鐘 都唔使？」係呀，你由正門行到盡頭，來回都唔使半個鐘。假設由大埔火車站出發到教院一程巴士係二十分鐘，等一程車係五分鐘，你淨係花係交 通上之時間已經夠你行教院兩個圈喇。教院就係咁細。話晒呢度只不過係間「學院」，人地一間大學都唔知有幾多間學院仔啦，教院係得呢個Size你仲想點。

　人生當然不可缺少吃、喝、玩、樂。入到教院做「教」徒都仍然係人丫，依然唔可以擺脫呢個宿命。教院位處孤山上，附近只有淺月灣同倚龍 山莊，要出市區就一定要搭車出大埔。噉一眾「教」徒之吃、喝、玩、樂點算？

　先講「吃喝」。我有時真係戥住HALｄ人慘，教院雖然有三間Canteen，但係中央廣場間價錢又唔係平料又唔係多又要勁難食只可以叫做入 到下口。人地大學ｄCanteen十幾蚊已經大大碟食到嘔，呢度廿零蚊先得少少食到「嘔」。惟一可取之處可能係夜晚七點之後執笠價一蚊一碟賣淨飽 點。雖然呢ｄ貨最少都放左成日，但係一分錢一分貨，算啦。之於間茶樓就去得過，價錢夠平野食夠多，不過傳聞因為噉搞到先生學生校工秘書加 其他住隔離豪宅之路人甲乙丙丁都湧晒入黎食，令到一眾教職員極度不滿，話晒係「職員專用」嘛，所以ｄ學生就俾人趕左去樓下間由飯堂喇。「傳聞」 咋，我好耐冇飲過茶所以唔知真定假。至於間學生飯堂我就唔知喇，以前做自助餐時我食過下，後來變左做茶樓聽到「飲茶要折墮到要自己出櫃檯 沖茶，仲要係一杯杯噉沖唔俾你成壺拎返埋位」已經唔敢幫襯，而家間野變成點我當然唔知同唔會知。總之讀教院想食好ｄ就搭車落大埔啦，不過 噉就跌硬十蚊車錢加最少半個鐘飛車時間，所以呢個方案只適合有大量閒時間同閒錢之人採用。

　噉「玩樂」又點？教院圖書館係「全港最大教育類書籍藏書庫」。「噉咪好多書睇囉？」係好多，不過有名你叫「教育類書籍藏書庫」，你想 搵下金庸、古龍、衛斯理之類黎睇睇的話．．．唔係冇，少到離奇噉囉。不過咁大間野你肯行的話分分鐘執到寶，例如係某個隱蔽角落原來放左一套 《中華小廚師》．．．想玩音樂？對唔住，音樂室只供修音樂學生使用，你不在此列的話又可以收皮。「咁『大』間院校連間Band房仔都冇？」係呀， 係音樂室入面有Set鼓囉。就算你問過可以入去玩，都要同中樂團加西樂團加大量音樂人爭。「想打下機又點呀？」你如果諗住會好似城大噉有間「 遊戲機室」俾你娛樂的話又係走得，話晒而家係「準教師」，打機都唔可以打得咁張揚。就算去到電腦房都講到明"No Computer Games"，你話幾 灰？「冇機打咪上下網囉，話晒係寬頻上網。」冇錯係寬頻，但係ｄ機都係350仲要得64M Ram － 有64M算好架喇，我試過幾次撞到ｄ機得16M Ram 咋，千祈唔好諗住用呢ｄ機黎做"Multi-Tasking"：做一樣野（Word），冇事；做兩樣野（Word + 聽歌），有ｄ勉強；做三樣野（Word + 聽歌 + 上 網），開始危喇；做四樣野（Word + 聽歌 + 上網 + Download），噉都唔輕機的話你好彩喇。

　「喂！仲有學會呢？點都叫有ｄ活動卦？」睇完O-Week個學會秀之後只有一個問題：「到底教院ｄ所謂『莊』同中學ｄ學會有咩分別？」可能 因為教育學院而家仲未係大學啦，所以連ｄ學會都只有中學水準。睇黎睇去，都係「電腦學會」、「中文學會」、「地理學會」．．．呢ｄ中學時見 過之物體。唔緊要，有得玩就得啦，報住名先囉。點知就真係年頭到年尾都唔多覺有乜活動，就好似我報個「戲劇學會」噉，係報左，邊知Sem 1頭 到Sem 2尾都完全唔覺有搞過活動。終於有喇，「招募演員、編劇、導演．．．」想玩，但係已經係暑假喇。問番其他「大學生」，「喂我Sound U 十蚊堂教打鼓結他加夾Band喎。」聽完之後．．．都大專啦而家，點解大家仍然徘徊係呢ｄ咁傳統之學會上面，冇人諗下ｄ新野？

　「灰呀！教院真係乜野都冇得玩？」噉又唔係，教院仲有一樣最齊全之設施：體育中心，而且好多時都冇乜人。教院之外就唔使講啦，落到大埔 想點行都得啦。對我黎講最重要當然就係機舖，大埔ｄ機舖整體黎講都唔錯，尤其是大埔超級城間Funny Land，光明機舖之餘仲要24-7 Happy Hour， 連賽車打鼓呢ｄ都係兩蚊鋪，抵到爛。惟一唔明就係點解由第一日入教院到而家，無論係朝早九點去定係夜晚七點去，佢都係寫住「黃金時段大減價」。

　即係唔係唔想識多ｄ人，不過睇睇身邊ｄ人．．．唉，我見到佢地都唔想行埋去。假如你發現以下症狀係你身上出現，恭喜你，你唔會識到我， 亦都唔多會見到我（相反亦然）：

• 盡量令自己身邊女多男少
• 係異性面前踩低自己
• 係同性面前抬高自己
• 係群體之中表現自己
• 對外來同性抱敵視態度

女：「我有科B唔到，今個Sem GPA過唔到3好低呀！」
仔：「唔係丫！你GPA有2.XX，已經高過我喇！你仲想點呀！」

　女？教院好多。姓八名婆。

　噉又唔係話教院冇好女仔，不過我咁耐都見唔到幾多個。教院男女比例係一對三至四，可能係咁多間大專之中最高之一間，而我咁耐以黎見過 之好女仔都唔超過一隻手，按人口比例黎講就真係冇乜好女仔。

　女我不嬲都唔多講，所以都冇ｄ咩可以再講落去。最後送兩段某某與某某之對話俾各位。

　講教院人，基本上就冇乜好講，因為撞到好人定賤人係睇你好唔好彩，加上都冇乜人好似我咁脫俗，所以都諗唔到可以點講。所以又係送幾句 說話俾大家算。

• 你唔出聲：
  － 冇人會話你啞，不過會當你傻仔。
  － 冇人會話你啞，你出聲亦唔代表你有料。
• 唔知幾時開始自得其樂都變得有問題。
• 做乜野都係為引女，幫下人又係為溝女。唔明呢個世界係咪真係冇女唔得，唔明呢個世界幾時開始做親乜野都要有機心。
• 幾條女坐埋一齊就係講仔，幾條仔坐埋一齊就係講女，呢個世界幾時變到只係得番仔、女同錢呀？

　讀左兩年教院，真正可以話「識」之人，唔會超過兩隻手。呢個世界唔係真係唔入俗套就咁難生存呀？

　「喂，入教院有咩好？」你問我。我答你：「．．．我只可以話俾你知院校同大學大家都係收咁多學費，但係我地就可以返多好多日上多好多堂 做多好多功課，你俾四萬二學費完全係物超所值好很抵．．．」

　一個Sem讀成差唔多十科，你都幾難搵到有大學可以讀得咁多囉。當每一科兩份功課，即係一個學期以黎你就有成接近廿個Project要做，包保 你每個學期之生活都會異常充實。唔好唔記得仲要出去實習喎。由於實習對個課程黎講係幾咁重要，所以好多科ｄ功課都會同佢有關連。即係話呢 一ｄ功課未到實習你都唔可以做，只可以叫做「準備做唔到ｄ乜，但係一到實習之後你就要係好短時間之內趕好晒呢大堆功課。淨係一個短短實習 之工作量已經有成個學期咁多喇，所以你話讀教院係幾咁抵玩。而每年十二月頭同五月頭更加係每個學年之高潮所在，因為呢個就係所有功課之最後 死線，通常有九成人都會係呢幾個星期內廢寢忘餐做生做死噉黎趕大量功課，我就係其中之一。雖然冇住宿舍，但係為左趕好都唔知幾多份功課加 小組報告都洗左唔知幾多錢買蛇飛黎通幾晚頂做功課，一日打過萬個中文字完全唔出奇。「點解唔早ｄ做功課呀？一早做好咪唔使咁趕囉。」你想做功 課時你又未必有得做，ｄ功課係突然間一大堆一大堆噉出現，你想「早ｄ做」都幾難。而且咁鬼多功課除非你開學開始每個星期做一份啦，如果唔係 到最後點都會有大把功課等緊你。真係除左科大呢ｄ一年考幾次試又大把測驗之大學都冇乜邊間可以有教院咁多節目。仲有，問心一句，就算你好有 危機感覺得教院有咁多野搞應該一早做掂ｄ野先，你都寧願乜都唔理過下預期中比中學歎好多之「大專式生活」啦？噉樣死法都甘心ｄ嘛。

　講開「大專式」，就唔可以唔提下教院ｄ堂。記住教院係「大專院校」即係都屬於大學級，但係點解ｄ堂都係由派筆記 ＞ 講 ＞ 講 ＞ 講 ＞ 可能會出現討論 ＞ 落堂呢？噉樣同中學上ｄ堂有咩分別？我上到黎大學就係想上堂時可以同教授吹吹水，佢教我點諗野，而唔係對住條友講一大輪 話我知我應該要知ｄ咩喎！所以教院做唔到大學都唔係無因，上堂方式仲係重中學式單方向教學，又剩係教知識唔多教思考，根本就追唔上潮流。 而家香港教育俾人小得最勁就係填鴨式教學法搞到ｄ細路個個都唔識用個腦諗野，「我地知！」教院話。但係你都係用呢種方法去教ｄ準教師，你 又點可以期望佢地出到黎可以唔用填鴨教法呢？

　除左多功課之外，教院另一個物超所值之處就係超多堂上同時超少假期。除左中大之外都冇乜聽過邊間大學有教院咁少假。可以話基本上 你係一至六都要返。同人講我一個星期幾乎返晒六日。ｄ人好驚。

「唔係卦？我一個星期剩係返一至五仲要有一日Dayoff，而且有兩日剩係番得一堂喎。咩學校呀你間？」
　咪就係院校囉．．．
「我好嘆呀，剩係Tutor先至要簽到，Lecture我都冇番過。有時ｄ科太廢我都照走。」
　Tutor，咩黎？點解我冇？唔知我乜都唔知，我剩係知我上ｄ堂不論大小都係叫做Lecture仲一定要簽到，加埋走多過兩堂就一定死。唔通因為 教育學院仲未係大學，所以只得一半剩係有Lecture？
　「喂，我好很多功課喎。」
　「下？我冇乜功課喎！」
　．．．功課多，堂數多，仲要少假期，入到教院包保你生活無休。

　時值二零零零年末。聖誕假，乜我有咩？正當人人都「放緊假」，我仍然係度趕GS篇論文。
　二零零零十二月三十一，又係開別墅迎新歲。正當現場人人都打牌吹水睇電視，我仍然一面聽訪問錄音帶一面寫稿。俾人串。當然，我又唔係讀大學。
　二零零一年第一日你做乜？娛樂？消遣？搵節目？我就返左教院搞論文。
　好喇，一月二，終於搞掂，順利交晒上學期所有功課。交GS論文成為上下學期之交接儀式。聖誕假，乜我有咩？

　二零零一一月三。行緊去上堂時接到電話。
　「喂，我而家Sem Break呀，一月中先開學，仲有兩個禮拜要挨呀，有咩搞作呀黎緊幾日？而家係邊度蒲緊呀？」
　「．．．」
　「喂，嶺南班友佢地聖誕假之後就有成個月Sem Break，一直放到新年假再連住放，三個假期加埋放成兩個月咁滯，二月幾先開學喎，真係嘆。你又放幾耐呀？」
　「．．．」
　Sem Break，乜我有咩？原來世上有呢樣野存在．．．溝通唔到。我又唔係讀大學。

　到左下學期喇，咦，上學期考成點呢？等。等。再等。等左個幾月，人地大學都出晒成績表，噉我地院校幾時有得睇？
　「喂，我聽講二月有得睇成績喎．．．」「唔係卦，我聽到係三月幾喎．．．」「下，係咩？我聽到明明係．．．」
　都唔知呢間咩學校。所有官方消息都係靠以訛傳訛傳遞，官方就乜都唔會講。可能呢ｄ就係院校文化。

　等左兩年，「效率」呢兩個字終於係教院出現。想當年下學期完左想睇睇個成績點，點知原來全校教職員同我一齊放暑假唔做野，八月中先 至派成績表。所以今年七月就收到成績表有ｄ愕然。更愕然就係：「可以網上Reg科喇！」呢樣野真係打救世人呀你知唔知，雖知大埔位處窮鄉 僻壤，邊一次八月Reg科時專誠飛車入黎之人係唔爆粗？

　總之，如果你係想「享受」大專生活，唔好意思教院絕對唔適合你，你求祈入一間入到嶺南都好都一定會好過入教院；如果你想「感受」 大專生活，唔好入大學喇，入教院啦。只有教院先可以俾到你一個真真正正之大專人生。

　同個行家吹水，內容如下。

　六年可以做到ｄ乜？
　我：教師學位（四年）＋工作經驗（兩年）　起薪 一萬七
　佢：教師文憑（兩年）＋工作經驗（兩年）＋翻譯學士（兩年）
            起薪 一萬七千

　人地讀教師文憑，早我兩年出黎，起薪萬七，仲可以有時間讀多個Degree。我而家挨生挨死挨到仆街都好，讀多人兩年都係萬七， 都係噉樣搵工，都係要考基準試。我讀黎為乜？