雖然身為九龍城人，其實由細到大都冇乜入過啟德，只有細個時去過一兩次機場送機，同有年啟德大笪地行搞新年嘉年華，多攤位又有表演仲有機動遊戲不遜維園年宵，可惜可能地點真係太隔涉冇地鐵已是致命傷，難怪跟住大笪地話咁快就收檔。事隔Ｎ年後做左呢份工，雖然公司窗口一望出去就見到啟德，但從來冇諗過去望望，大佬大笪地執左之後得塊爛地冇車入去，一年一次七一Doom Festival同新起座郵輪碼頭更加唔關我事，點會無端白事去啟德？有事就唔同講法啦，特別件事係老細叫你去果陣時。老細慣左有project搞緊未必話你知，但到要傾要做果日或之前一日就同你講「提定你先陣間你有份去見架」，結果呢日就無端端跟住檯客走左落郵輪碼頭兜左個圈。行過一次先知，原來都幾正喎。
呢個shot唔係我公司影，係上個客即係啟德碼頭office影。傳說啟德個郵輪碼頭係風水陣黎，建築取龍形，坐西向東龍口對正鯉魚門，是為吸水發財陣也。
去時個碼頭其實仲未起完入面工地黎，所以戴安全帽至入得，不過頂樓另有洞天係個超靚露天花園，有花有草仲有得睇晒九龍港島兩岸，當然唔少得插返枝中國旗俾各位同胞影相留念啦。
個客話個設計深思熟慮過，之前咪提過碼頭係條龍，前面個圓拱門就係龍口吞盡鯉魚門湧入黎之海水，而大大舊訊號塔代表龍吐珠。佢噉講我噉聽啦，風水＋後現代前衛藝術既野，我識條春咩。
之前都冇諗過會黎郵輪碼頭，更加冇諗過原來地方咁靚，個客又話雖然下面仲係地盤未開，但頂樓露天花園已經起好同開放俾公眾上去，就好有興趣再黎。其實一直都想研究有冇可能由九龍城或者土瓜灣踩單車出黎九龍灣返工，真係踩到去九展就冇乜可能架喇，但啟德呢邊少人更少車（因為根本得的士同一架小巴會入黎．．．），加埋由頭到尾都係一條路，想踩入黎其實唔難。梗係唔係而家三十幾度曬到應黎踩，過幾個月涼返又冇咁猛太陽，先去搵架單車跟住個GPS試試啦。
其實今日個行程同關係相當複雜。老細一向同郵輪碼頭傾開生意，但今日係陪另一個客帶佢果邊另外兩個客過郵輪碼頭實地睇場（其實主要係等同胞們可以去兩枝旗杆度影張靚相到此一遊），跟住上碼頭office同佢地傾合作，然後再全部人即係夾埋五間公司一齊過海再見另一間公司傾project。唔明唔緊要，其實我都唔多明只係行行企企聽幾位老細吹水的我出席有咩意思，不過咁多檯客加咁大公司就即係食飯肯肯定唔會求祈啦，結果晏晝夜晚都係成班人去大酒樓一餐千幾蚊，見食得咁開心班客又住九龍，我就盡一盡地主之誼帶各位國內朋友搭天星小輪欣賞香港夜景啦。
做香港人咁多年都好少搭船，返工要過海唔搭地鐵都搭小巴或者巴士啦仲去碼頭上船慢慢嘆搏俾老細小咩，放假想過海幾架主要過海巴士通通經我屋企樓下使乜出去搭船咁花時間，之前搭過幾次都係日頭，反而冇乜幾可好似今次夜晚搭。可能對慣對熟覺得冇乜野，不過客觀講維多利亞港夜景的確係世界級，所以每逢有朋友第一次黎香港，我都會叫佢點都要黎睇一次海傍夜景，可以搭渡海小輪或者上山頂睇就更好。
又回到海港城了。上次過黎呢邊係上Sony執執幾個月前做落堆文件手尾，過黎第一日就係今次Snoopy展覽開始當日，今晚仲見到，幾時會轉呢。其實我最想好似上次蜘蛛俠噉，整返個Guardians of the Galaxy景點，不過相信冇乜可能矣。
碼頭同個客say個bye，搞到八點幾終於返得歸，好在係星期五，唔係咁鬼頻撲第二朝仲要返工就辛苦。係咪呢個鐘數有幻彩耀香江呢碼頭超級多人，不過吹住風聽碼頭幾隊busker band唱Supper Moment唱《海闊天空》，再行個圈至上巴士返屋企，的確是好很舒服的。但係次次都係尖沙咀放工順便散個步至會噉講，你叫我平日得閒無事專登出黎噉行法，我又唔會咁好心機囉，呵。
不過其實送完客都仲有工開，有個客話想買珍妮曲奇又冇乜時間，見反正第二日都要出油尖旺買Slowdive飛同電腦野，就順便去尖沙咀睇睇係咩一回事。唔係個客講我都唔知道乜野係珍妮曲奇，不過又難怪作為香港人會唔知，因為第一眼見除左個盒印個熊公仔幾靚之外冇乜特別亦唔見得好食，同埋間舖實在好多人，強國人。去到門口已經廿幾人，再俾強國同胞打下尖排左兩三個字終於到我，諗住有得買喇卦？唔好意思，原來想買珍妮曲奇呢，唔係噉樣行入舖頭就俾你買，而係．．．
．．．係要先行返出去商場外面排隊，門口個哥仔會派籌分批放人入去，拎左籌先代表你有資格去佢地舖頭門口排隊。我十點幾去到，入到舖擾攘一輪大約十一點出到去，外面已經排左三四十人，仲要排左冇耐開始落雨仲要係雷雨添，當然又要見識強國人特別既排隊技巧啦，結果淋左大半個鐘雨我先由相入面你見到個位置去到地鐵站入口前面，即係前面仲有十幾廿人，個天又越黎越大雨，我就只有同個上海妹講句對唔住放棄算。
冇錯，會咁熱心，擺明就係因為女啦。即係如果係條佬叫我幫手我都會幫，反正今朝本身都會出黎順便嗟，不過見到咁多人就一定即閃唔會排隊，但今次係個上海妹叫到梗有幾盡幫幾盡啦。自從上次去HA睇Diablo，冇錯咪就係香港成日話要睇show果班metal友話「挑又唔係大band我識佢老鼠梗係唔睇」結果得廿個人唔夠買飛果場Diablo，當晚最大收獲唔係睇左場好精彩的show，而係撞到個唔知頭唔知路就上左黎睇Diablo的上海妹，佢係連睇完都唔知道三隊band叫乜名，單純因為係metal gig就上黎HA捧場，走時話「我要回去了，趕著回上海看Fleshgod Apocalypse。」嘩上海的女孩子真是外在美跟內在美兼備啊。今次這位上海美人仲要住我屋企附近間酒店近水樓台添，我承認如果佢唔係結左婚，晏晝落完雨又深水土步買完野，我係會出返去尖沙咀幫佢排多次隊排到買到為止架，口桀口桀