都唔係第一次，成日都係。七點三落樓，好似好早，但係都可以等成四個幾字先有車，結果又係遲到。不過算啦都未破到最高等車紀錄半個鐘。一係就撞車，一係就冇車，真係成日遲到我都唔知點同教授講。「真係咁蹺又撞車？又冇巴士今日？」係好不可思義，但係我條命就係生得咁神奇，我都冇計。之但係有邊個會相信有人會成日都撞到意外？睇住對面馬路過左兩架75X自己呢邊都仍然係一架車都未到，上到車又會遇到交通意外，呢ｄ野真係有苦自己知。

估唔五六年前係咁倚睇書立過Logo三四年前又同舍妹吹過，今日居然會用得著。都唔係全班得我一個識丫，又係搵我做示範，只有一句：「時也命也。」
我呢世人所做之大事都係由微不足道、隨意之所致之小事累積、擴大而成。話唔埋呢幾堂又再做好ｄ上堂留心ｄ，《狐假虎威》再現江湖之日，就係多個博士搵我幫手做野之日。

今日，終於有番ｄ心機上堂，關鍵就係晏晝上拉記訓番半個鐘，當堂醒晒。不過「人和」亦都好緊要。GS堂教你點食煙，死未？英文堂同班喪友一齊，根本就唔係上堂。不過，咁先似上堂。所以成日都話，
「遇到好教授同埋正同學，仲好過修到心水科。」

係時候同「班人」正面交鋒。英文學會同英文系會有咩分別唔知唔怪你，但係自己想做學會定系會、上莊黎做乜都唔知，一個字：「強。」結果七哥出手就夠我就淨係負責做勢。講真，通常只有兩個情況需要我出手，一係做醜人，一係同人拗。係教院入邊唔知點解我永遠都係咁負面，又係命。今次唔使我出面，好事黎丫。咁代表件事差極有限。

"thx for your advice　sometime, i am so 自大　i should 虛心"
Jenny姐，今朝見介紹份工俾你你仲可以訂晒條件好似係自己好有料請硬你咁，咁先求祈同你講番個笑，估唔到你又會當真。冇野講，又係隨意之所致。講真，我身份地位唔係高，但係唔知點解成日都影響住其他人。可能我係掃帚精托世，地位低微但係就無時無刻將其他人之垃圾掃走。

花姐，唔好再諗喇。我係教院生活又何嘗好過？不過只要你肯接受個環境，總有一天，你會係環境之中，探索、發現到你喜歡之人、事、物。凡事諗到咁偏做乜？連自己條命都唔鍾意的話，你又點可以享受生活呢？同埋，最緊要有夢，咁樣生活先至會更快活更完全。仲有，懶都可以係享受生活之方法嘛，「人在天涯，何妨頹廢。」
羡慕我生活平凡，仲想將自己生活方式改到好似我咁？有陣時ｄ野唔可以強求，你越求變就越難變。要你突然間好似我咁唔出街蒲同外界隔絕，你都接受唔到啦。邊個唔想做李嘉誠個仔呢？不過既然而家條命生成係咁，咪享受而家之生活囉。你想變的話，可能變極都唔得但係到頭來開一開竅就會大徹大悟。不過我道行唔夠，點化唔到你喇。
如果想好似我咁「無壓」生活，從來都唔會有壓力呢回事的話，我只可以話俾你知，竅門就係「唔好當壓力係壓力」。講就好簡單：「只要你唔當佢地係壓力咁處理就好自然唔會有壓力啦。」對你黎講可能係知易行難，但係對我黎講就係知易行易，因為我係一早就已經好自然咁修成呢種處事態度，可能真係因為自細開始就諗好多野，所以我都唔知點樣解俾你知。
出到社會做野，人、事方面都一定會有好多不如意，上頭係明玩你，其他人係唔妥你，冇計啦，呢ｄ野你明知係解決唔到，仲咁傷心做乜？到頭來連份工都唔鍾意，做埋苦人咪仲煩？既然你係硬性子，咪用呢ｄ刺激黎做原動力囉。一係好似我咁，「傲笑紅塵」。一個人指住條魚笑，笑佢唔識上陸地行路，條魚咪又可以笑番個人，笑佢唔可以係水入面生活？雖然自己都唔係高層次得去邊，但係記住，呢個世界實在太多愚昧之人喇。
仲有，不妨一笑。凡事咁拘緊，做人又點會開心呢？係我係成日俾人話癲經常無端端狂笑，但係你諗下，十樣野入邊我有八樣野可以笑，你笑得四樣，邊個開心ｄ？仲有，你都係因為我咁癲先鍾意同我玩啦，係咪？
感情方面，可以話係失敗左，不過呢方面我不嬲都睇得好開，唔使花姐你操心。機舖，除左上星期五之外，都冇乜點入喇。可能，我個生活模式都係度改變緊。

係，我就係一個咁樣之人。識我之人，雖然唔係咩偉論，但係請慢慢咀嚼，就當係大家吹吹水分享下啦。唔識我之人，唔明唔緊要，當白痴唔緊要，就當係知道「劉義」呢個人新一面啦。始終，生活係要不斷發掘先有意思嘛。
朋友，今天你又發掘了多少？