09燈展第二回之繼續玩轉 (+Special: Mattolium Chapter II)

09燈展第二回之繼續玩轉
(+Special: Mattolium Chapter II)

剛剛中山返到，隔唔夠幾日立即接月底會展，年年十月一定超忙。每年燈展有兩個，一個係四月春季展，半年後十月到秋季展，（話）係香港甚至亞洲全年最大燈展博覽。咁大單野公司自然落重本去做，雖然佔地面積非最大一次，內裏規模同複雜性卻可能是史上最強。中山返到黎又上左廠（星期五上完工廠晏晝搭船返香港，非常巧合地撞番個做左model的中學同學，一個想寫不過因為顧住打Diablo冇寫到（．．．）的故事），為趕及香港展前清晒大陸一個禮拜黎大把手尾，星期六放工開左個幾鐘OT。往常我會選擇留番ｄ野唔做星期日加班，嘆ｄ之餘可以呃番最少半日假。何解今舖咁順攤星期六都開OT？

「十月最後一個禮拜，半個月前已經排到本身紅日的禮拜日一都要返晒返足七日。點走？」

通常展覽會都係開展之前日砌場，而「成本問題」，永遠要全公司不論職位總動員去砌，因為星期二開而星期一重陽，砌場改為星期日進行，都好架喇，星期六砌的話假都冇得補呀。全公司十二個人，工廠再派四個，九點集合，當九點三開始啦，中間食一個鐘飯，準時砌到六點先走得，十足平時返工一樣，而且破晒紀錄：以前無論幾難搞，就算比今次少幾個人，都好少可會遲過三四點完工。我只擔心最後一日少左工廠四個工程師，拆幾耐場先拆得晒。不過已經冇晒意識去諗。Ｎ年前的一張相，每次展覽都合用，次次砌場日子去會展，你都會見到我同會計靚女兩個：

「做展覽其實唔辛苦。辛苦永遠係只得之前一日砌場同最後一日拆場。」

個展覽屬全世界業內每年最重要之一，加同一個月香港大陸多展覽到你唔信，所以年年撞正十月必定大把外國客黎香港，重陽紅日有個美國佬話佢朝早十點要黎我公司，想放假又有乜計？星期一起身已經有點唔聚財有份「今日好黑仔」預感，九點半返到公司坐到十一點，果然被放飛機。好野我永遠冇乜感應能力，衰野灰野就永遠晨咁早預知得到。一場返到公司，唔通咁快走咩！幾大坐番半日再呃埋飯食先走，反正本身晏晝都要出旺角做野，然後返屋企打埋最後一日Diablo（開展後想打都冇得打了），衣櫃摷摷封晒塵的西裝，禮拜二起半年黎再次回到會展苦戰。普遍第一日會做到踢晒腳，公司特登抽調晒所有市場部加助理坐鎮，不過今日絕對唔屬於普遍，坐足成日，都唔夠以前一半咁多客，有大半時間四野無人成班人坐係度打牙骹。莫非個市仍然差到喊？反應差得過上年喎但係，照計好難。又可能係其他原因。某程度上，你想知道一個時期經濟景氣與否，黎會展展覽打個轉就知，因為有趣地會場囡囡－不論官方還是商方－都與經濟指數掛勾。兩年前開展時，雖個市已經向下，仍算年內最好景時段，展覽幾日會展姐姐好似夜總會地一字長蛇陣列隊歡迎你，而且好多質素奇高，仲連名人都撞埋，大門有幾個靚model舉牌，會場入口仲有難得處於最佳狀態的Kawaii，展後即入無線做千金小姐同掌故王已經變得太瘦太厚粉，仲有另一無記明珠台柱碧琪姐姐（well，我好後來先知原來唔係Peggy，係Becky，灰），更有大把公司請promotor甚至搵model做司儀玩遊戲。2008雷曼一爆全球陷家富貴，貿發局請少左好多囡囡，而且不知何解質素成正比地嚴重下滑，連大公司都請少左好多model，起碼仲有真空deep-v姐姐撐場。今年全世界都話個市好過上年，而的確多左好多靚女喎，一朝早整入場證俾人彈黎彈去走左幾個counter，睇場的姐姐們大多十分順眼，又好招呼又有紀念品送。不過仍然冇乜大公司投資請promotor，通常推自己公司較省鏡的女同事出黎坐櫃面同派野就算，話雖如此都夠壓場，行左好耐只見到一間有promotor，冇問題，因為果間開正我公司隔籬。

大公司梗鍾意霸頭位，等所有人一入門口就見到佢地，我公司又爭唔到頭就搶番個尾廢事同大公司鬥，點知有間唔知點解又要揀會場最尾開檔，而佢地個攤位係全場最旺之一永遠人山人海，原因好簡單：當你請左四個promotor，仲要唔係旺角行街撞到見到會調頭走果隻，有乜可能冇人？四位promotor姐姐主要職責係舉牌繞場宣傳間公司個攤位，同企攤位派目錄派紀念品，只要企、派野、笑就得，英文同國語唔掂冇乜所謂？麻甩佬講英文講普通話唔得，係柒；靚女講英文講普通話唔正、唔識講，係cute。況且佢地唔係正式公司職員，純粹引人／佬埋去嗟，ｄ人／鬼見ｄ囡囡口英文同國語咁「得意」，玩得開心，關唔關事都自然會入去個攤位望望傾傾架啦，請一個夠有突，而家仲有四個咁多，自不然輕易成為全場最受歡迎攤位。而佢地咁多人簇擁，對隔籬檔的我地影響就大喇。真正黎搵生意做的客人已經超多。目及人士更多。加上全會場可能得佢地一間有promotor仲要高質素，經常出現會場記者同龍友，因為走廊狹窄，空間有限而攝記眾多，只隔三四步的我公司攤位往往成為記者／影相佬們借位影靚相場地，最激時入口企滿晒人影相，行過你只會見到成班人圍住班model，而唔知道原來有另一個攤位即我公司存在。無無聊聊，自己都做龍友影番張襯熱鬧。

「右邊位有ｄ似我覺得幾正的DaDa Chan。」

人地個個出晒長短火，我得部傻瓜機，睇相都知有幾弱啦。我第一次感受到落本買部勁相機的重要性。這是一個「功欲善其事，必先利其器」的寓言故事。姐姐們大把客人要招呼，晏晝我亦突然間超忙，食飽飯冇野做卦客人迫埋晒晏晝一齊黎，打發佢地走後五點幾要趕過隔籬酒店。半個月前有對鬼佬鬼妹突然走上黎我公司，原來佢地專幫人搞event，有間美國公司襯今次燈展黎香港包左酒店宴會廳辦公司十週年紀錄晚會，不過兩星期前先搵佢地做，咁急唯有不斷睇雜誌揭揭揭，見到我公司個廣告覺得適合就走上黎。得半個月工廠造貨都唔夠時間，最後只幫佢訂少少現貨，再搵公司用開個外判工程師幫佢做場地。其實今次晚會唔接可能仲好，因為佢地只得兩個鐘砌晒成間廳，而且佢地間公司好似就係得鬼佬鬼妹兩個人，連辦公室都冇乜都屋企搞掂咁激，所以五點半我同工程師加佢兩條靚到場之前，基本上得佢地兩個做野加幾個侍應仔幫手，而我到場之後先知佢地個佈置計劃，單靠我地十個人唔夠加半個鐘，根本冇乜可能完全順利完成。好在個工程師原來好鬼勁乜都曉，叫佢駁電線搭電路之類簡單啦，碎料到連幫舞台整幕布，甚至擺串燈裝飾樹仔都駕輕就熟，我做呢行咁多年都唔識真慚愧，最勁整場果班全部外國人，佢英文「唔得」都夠同佢地溝通。全靠佢神功蓋世，時間關係有幾樣野取消，多番意外後只遲左幾分鐘完工，工程師加佢兩條靚就企定定等收錢了。做呢種function勁好搵，由第一日到今晚完工，所有野都係你話幾錢就幾錢完全唔講價，而且全部真金白銀見貨俾錢永冇拖欠，相信搞一場佢兩個搵到唔少，今晚我幫手做免費勞工（著住套西做苦力真辛苦），都係當打好個關係等佢第時多ｄ呢種project益我咋。我要求好低的。接多ｄjob，等我搵多ｄ錢，可以買番部靚相機；同，公司賺多左錢，我就可以向老細反映下次展覽自己都請番（幾）個promotor了，呵呵。

第一日做完展覽做酒店活動，由朝做到晚，返到屋企已經十分支力，打多陣Diablo（．．．）就訓。第二朝起身，返會展途中拎幾份免費報紙，既近期慳電膽咁紅（多謝曾特首），燈飾展本來無關痛癢都得以登上大雅之堂，收費定免費報紙都有篇幅講今次展覽，一定係訪問隔籬間公司，加圖片必定有四位靚女其中一二。聽老細講，間公司仲買埋報紙全版廣告，甚至電台節目都有人做媒打上去講慳電膽順便推廣一下「而家應該要轉用LED燈膽」十分打手，有錢就係唔同ｄ，記者要就時事局勢搵料，佢地咁大間公司又勁落本宣傳，加上四個靚靚promotor提供埋佈景板俾各位攝記影相交差，今次展覽最成功一定係佢地公司，盡握天時地利人和之機，除左撞到今次展覽全館得佢地請promotor仲要掂果隻，賣LED燈膽的佢地絕對要特別鳴謝曾特首臨開展搞單利益輸送新聞幫佢地時勢造英雄。

即係我以為大陸個展覽已經夠晒灰，香港展叫香港以至亞洲年度最大，點解我可以仲得閒過一個禮拜前中山係噉行係噉訓的生活？所以更灰。以前展覽會六點半就收檔，睇場果班要遲半個鐘放加香港島放工，已經唔妥。今年可能主辦單位覺得經濟好左，會有更多外國客人黎？居然七點先收展。琴晚係唔係都要幫個外國客去酒店砌場即實要OT，冇乜所謂；今日只不過第二日，已經靜到食完飯大家吹水等收工咁淡。今年老細下旨委派左個新任務我，就係賜我Buyer之名去其他公司採購產品，作為全公司唯一一個買家，可以合法四圍去奉旨吞pop，我居然冇濫用職權四圍走，睇檔係悶到想訓，主辦單位同各家參展商今年連俾我出去無聊的藉口都冇。半年前個展覽叫做細，齋拎野食都多野揀到食自助餐噉加無限供應，紀念品更加唔在講啦連會場經理都頂唔順塞左成大抽俾我地廢事我地成日去抽獎換禮物個counter搞事，我一個人帶左十幾枝電筒返屋企（雖然完全未用過，小便宜呢家野，有時不在於實用性，而在於「小」同「便宜」兩部份，呵呵），再一年前拎禮物拎到俾貿發局blacklist加為我地修例就更加經典啦。今年？乜叉都冇。冇免費野飲野食（唔係冇，不過要上三層樓拎，收皮），又冇任何紀念品換，又冇deep-v姐姐，仲有乜野好行？全場唯一的姐姐仔齊集晒我隔籬個檔口（所以抵佢地發），長期大量佬圍住，第一日記者龍友影晒相，跟住幾日客同老細影，過程中難免被人＆鬼抽少少水，需知promotor制服除左超短裙，仲有展示公司重點產品的超光LED腰帶，客人好奇時又或講解果陣，就會有意無意地出現接觸，影相時更加唔使講，你知道外國人見到靚女幾咁熱情架啦。既然我咁得閒，姐姐們晏晝又冇咁忙，可唔可以借ｄ倚去影張相？點知：

「唔影得相架！」

灰。原因，可能好簡單：你係唔係鬼佬？唔係。你係唔係客？唔係。你係唔係老細？唔係。成就了一個現代香港社會寓言故事：因為食過檸檬，你先至會更努力搵錢、更落力上位，等有朝一日自己做到老細，到時唔使去人地度黐影相，你有錢，想搵幾多囡囡都得啦！（冇錯，到頭來，香港還是只剩下錢）

冇野食，冇便宜貪，冇街好行，冇野好睇，坐半日已經喊啦，點頂全日呀？其實黎展覽，仲有個非常特別原因。老細就梗為點我過黎做野，而我咁順攤肯黎（「有得唔順攤咩？邊個出糧俾你？」），主要為左一個人：

Mattolium Chapter II
Matto Met Metalium Bassist Lars Ratz (Again)

上年同一時段撞到，大家都冇諗過一個燈飾展會撞到對方、另一個metal友、另一個內行人，展覽過後繼續email通訊，一年過後再逢燈展，既然佢會黎香港，自不然又碰頭了。老實講，大家見到面大把野傾，不過佢自由身我唔係，所以佢黎到我地頭傾左個幾字就分道揚鑣，噉唔代表「正常」。上面張相，攝影師係我老細。問你死未？

去到展覽第三日，本身我唔使出動，係全個展覽我唯一一日留守公司，不知幾開心，行開兩日多email到死，而且剛完一個展覽抖幾日又黎，屋企隻狗搞幾搞覺都冇得訓，之前一晚返到屋企已經留晒鼻水，有得抖番日好開心－唔使七點幾起身趕車過灣仔已經算抖。誰不知有個客突然身痕，見佢今年黎香港擺展覽大家又好耐冇見，琴晚至出聲叫我今日四點去佢個攤位。為左佢，病緊都要特登晏晝飛過會展，見佢唔使三個字，跟住仲有兩三個鐘，冇理由咁無聊返檔口做野架？況且今年咁靜，返去得個悶字。去行街囉。話晒今年我係「buyer」，我要幫公司到其他廠商「採購」嘛，這個多餘職銜今日終於有用喇。咩叫緣份？亂咁行，都俾我撞到Lars。話想夜晚搵人帶佢出去蒲。以佢鬼佬習性，蘭桂坊是必然之選。點知琴晚佢已經去左，而且live band只玩U2之類，想搵酒吧有metal cover band。我酒都唔識飲更加唔好話去蒲，要帶的話只識得帶佢去６六陸的The Wanch，起碼有BON JOVI同IRON MAIDEN聽下卦。不過諗真，第二朝又要七點幾起身，加最後一日拆場必須出席，病左仲同佢噉蒲法，第二日黎唔到展覽就炒得。

到第四日，為慶祝是次展覽完滿結束，特別經冷爺搭路執左件有性趣已久的I Sick Leave Tomorrow，著住黎展覽會肯定串爆－雖然好無聊，因為不論有冇病，本身第二日我都唔使返工（．．．），不過玩野重於一切。係咪真係咁好玩？事實發現．．．唔係。好多鬼佬鬼妹行過見到，笑到仆街，猛問件衫邊個整、邊度有得買，但冇幾多個香港人明白件tee想玩乜，近所有睇完冇反應，有反應亦多數係

「．．．你想講乜呀？」

這就是香港文化與外國文化之別，同點解香港（永遠）跟唔上外國甚至台灣大陸之因。冇所謂，我著住件I Sick Leave Tomorrow招搖過市十分滿足，呃到鬼佬已經夠晒過癮啦，幾時都應該展望國際，香港只宜觀望。得以善用件tee，全賴老細都放棄，第一日已經只得上年一半反應，跟住兩日死得仲慘，而家最後一日可以有乜作為？我基本上只係一朝早返去，坐低睇晒咁多份免費報紙，再食早餐（黐左同事半個麥記餐，當然是免費，騎騎），然後會計靚女公司拎野過黎順便買左個勁大餐俾我做lunch（又係麥記，豬柳蛋＋四隻雞翼＋九件麥樂雞，四十幾蚊開晒公司數，又騎騎），十二點正式以buyer身份孖住會計靚女出動。要等埋佢除左為餐豐富麥記，仲要履行職務。點解老細今年特登下旨要我做買家？展覽最後一日，大陸廠通常唔會將帶黎之幾十件樣品帶番工廠，因為運費仲貴過新造一批，留係度又會俾會場鬧，多數願意賤價出售，前年老闆娘用幾十蚊執左一部冷風機加一部飲水機、二百五十蚊買到夠半間屋用咁多電器，已成各位同事們的榜樣，而我呢個「buyer」就係名乎其實地去人地ｄ檔口收購佢地ｄ樣品，好讓公司同事們可以參詳一番，冇會計靚女帶番幾千蚊現金過黎邊有錢買咁多野？平時叫會計靚女出街做野難過叫佢減肥，今次肯主動地加踴躍地過黎會展，唔係可以自己以公司名義周圍執平貨俾自己，肯咁好死？我面皮已經好厚架喇，同佢拍埋根本冇得出聲，講價講到人地差在未免費送俾佢唔在講，唔肯賣佢都可以拗到人地頂佢唔順求祈開個價放幾件佢算，最勁十蚊買左盞大天花燈，原價六十幾蚊架。

齊齊來找碴：以下兩圖有何不同之處？

會計靚女幫個檔買左兩個巨型發光如意，
我幫公司掃晒ｄ盆栽同桔，十分賀年feel。

背景唔係會展的話，會以為我地去行花市or自由行。

可惜今次展覽好悶。以前好多廠參加，唔關事都走埋黎擺番一份，大把過癮野執，各式減肥纖體甚至豐胸產品應有盡有，連玩具都有見過有檔全檔都係賣翻版變形金剛玩具勁開心。今年就算啦，乜叉都冇連想買個萬能蘇都冇，真正為公司買野自己冇野執。只得會計靚女一個開心，因為佢屋企加有親戚屋企裝修，黎到見到有乜野靚，打電話親戚唔要就自己要，又檯燈又吊燈連勁大盞水晶燈見六舊水搞掂咁抵照執，最後買左幾千蚊野，得一半係公司數。全場最滿足收穫，必定要數：

行行下見到有檔賣木馬，俾細路騎上去搖搖搖果種，本身已經玩到唔捨得走，跟住發現另一邊ｄ獅子老虎仲可以行！就大鑊了，因為原來附近幾間大陸廠對ｄ木馬同獅子老虎一樣虎視眈眈，不過個老細一直唔肯賣，到會計靚女玩到唔願走，係噉叫個老細平賣俾佢，隔籬幾間又走過黎想抽抽水，個老細廢事俾其他檔ｄ人搶晒佢ｄ貨，兩舊幾水賣左隻俾會計靚女打發佢走。個老細話隻老虎可以負荷一百六十磅，分分鐘我都玩得（減番四五十磅的話），買完會計靚女當佢係輪椅＆購物車，興起攬住佢行，支力起黎，拎放入場證吊頸個牌拉住佢行，我著住件I Sick Leave Tomorrow，加佢先抱住再拉住隻老虎四圍走，去到邊威到邊成街人望住，鬼佬們更加笑到碌地。所以大家好鍾意一齊行街，因為我地兩個都係黐鳩線的。

MMMEEETTTAAALLL!!!

既然展覽會閉幕日撞正30/10萬聖節，
不如整番個哈囉喂特集！

嗚～～～鬼呀～～～

好驚呀好驚呀好驚呀！

（無Ｘ聊）

前幾年展覽砌場，全公司十幾人加埋工廠四五個工程師一齊郁手，通常半日至3/4日就搞得掂，今年相同人數可以砌足朝九晚六，不禁擔心拆場又要幾多個鐘？本來我抱非常觀望態度，三點開始拆，只求唔好遲過七點走人就得，好在全公司同我一樣諗法，上下同心快手快腳拆拆拆拆，居然兩個零鐘搞掂晒！當然全世界開心到爆啦，聽日禮拜六長週的同事可以早ｄ返屋企，短週如會計靚女可以早ｄ出去蒲慶祝Halloween，而我最開心，係趕得切同Lars食餐飯。展覽一完佢夜晚就上機，八點幾要到機場，好在早拆完場，收工仲夠時間。因為佢酒店出黎拉兩大篋野，跟住又要趕飛機，廢事走咁遠，就會展門口間茶餐廳搞掂，我黎做展覽咁多年都未幫襯過，食個雞尾包都收你十蚊喎你食唔食？今次有人請咪黎見識下囉呵呵。除左請食飯，仲有手信收添：

展覽會正正一個月前，24/9收到佢email，除左知會黎香港，仲有提醒跟住果日即九月廿五，METALIUM就（又？）出新碟《Grounded: Chapter Eight》，既然大家再次見面時間又咁剛剛好，特別拎左隻俾我。其實我一直好想幫METALIUM好似之前U2又或DECAPITATED又或Jennifer Batten噉寫番個特集講佢地歷史同全線，因為佢地十一年歷史八隻碟大把料寫，開頭亦聲勢鉅大，但一直冇時間，可能好事，今晚同Lars傾左陣，知道得更多。

我地兩個相認於一年前2008年十月燈飾展，佢當時做左呢行唔算耐，第一次黎香港加大陸，之前亞洲只去過日本同泰國，初時諗住中國唔會有人識佢地，甚至冇諗過呢個地方有人聽metal，點知咁唔好彩撞到劉Sir。在此可以先重讀《K.M.C.》第一章power metal專題。power metal每十年復興一次，源頭雖是八十年代德國，九十年代你數數：HAMMERFALL係瑞典、RHAPSODY係意大利、ANGRA係巴西，德國元老一班風頭被蓋過，新樂隊能夠成功亦數唔得到幾多隊，加上九十年代power metal興重古典，METALIUM玩番最正宗，即使比唔少前輩高超，一樣闖唔出頭。既然METALIUM香港已經冇乜人識，佢之前隊ZED YAGO更加唔在講，佢知道我識時覺得我黐線，因為外國可能都冇乜人仲記得呢隊band喇，更何況知佢夾過？而佢覺得冇人聽metal的香港地，居然有人講得出（呵呵）。此乃一隊奇band，甚至可能有資格成為cult band，因為搞手係一個．．．師奶？個女歌手本身唱blues，不過鍾意metal，就搞左隊metal band，1988年出第一隻碟《From Over Yonder》時Lars先廿歲，個歌婆大佢二十年（！）。整個樂隊概念都係個歌婆諗出黎，個睇見一係立即記得一係唔知做乜的band名就係佢改，有見當時大家係一係玩NWOBHM一係玩thrash power又開始抬頭，想不一樣決定玩慢一點玩戲劇性，介乎CANDLEMASS等元祖doom metal同NWOBHM之間，加埋女歌手優勢把聲又特別，兩隻碟別樹一格，得以打出德國帶佢地去到西歐，Lars哥當年都算做到個rock star架。不過之後又係睇戲一樣地內部分裂，兩幫人各有各搞結果出現左兩班ZED YAGO，最後更鬧到上法庭，又唔知點解地居然創團之女歌手打輸左，連自己諗出黎個band名都冇埋，就帶埋Lars同鼓手另組VELVET VIPER，結他手搵左個新班底繼續ZED YAGO，Mark II班底玩ｄ野我冇聽過，不過既最初靈魂係女歌手，冇左原來主導之佢思維同佢把聲，得番個名尚餘多少代表性？就如Lars形容，

"It's just like METALLICA without Kirk Hammet."

夾完VELVET VIPER又入其他band玩下，98年終於搞成正式屬於自己之METALIUM，作為主辦人加領隊，作曲、填詞到錄音製作都大力參與，甚至自己開左間錄音室。1999至2004四隻碟已經係當今power metal經典，贏在舊派得正宗，heavy metal得黎夠thrash，同技術高但永遠創作同音樂性行先，新一代好多樂隊就係唔記得左平均，好多時一係太著重結他或技術（DRAGONFORCE），一係太著重歌手（我非常唔想提，但HIBRIA第二隻碟《The Skull Collectors》的確係個好例子），第一隻碟《Millenium Metal: Chapter One》比較美式同thrash似ICED EARTH夠快夠夠恆直接，加上歌手把聲基聲唔係基佬式高音或太多假音而本身真正夠厚夠恆，加起上黎可能係九十年代最佳power metal碟之一，由頭好聽到最尾之餘，送多首史上最強《Smoke on the Water》，係TOC外我最愛版本；就連歌詞都正，都係玩講故仔concept album，但未有RHAPSODY等交響樂隊咁「低能」，用RHAPSODY比不如用《Painkiller》啦，METALIUM第一隻碟起已經建立一個屬於自己之Metalium宇宙，講述Metalian(s)（後來再多個Metaliana）面對末世挑戰，早期live真係著晒盔甲扮Metalian好激好爆笑架，與《Painkiller》異曲同工，而我好受呢種現代奇幻末世故事，佢地ｄ詞又唔似好多傳統派metal band寫得片面或白痴，《Millenium Metal》我聽左咁多年仲係咁high。當然，星戰對霸王神劍封面更加無能敵。METALIUM可能係史上將metal呢個字cliche化至最盡之metal band，不過cliche得我鍾意。《Void of Fire》兩分半鐘，已經metal過晒全世界大半power metal band。

隻碟1999年發行，成為年度歐洲最暢銷metal碟之一，再被稱作歐洲年度最佳新樂隊登場作，跟住一年《State of Triumph: Chapter Two》多番慢歌，而且開始加適量keyboard同新古典，美式轉歐式仍然好聽，畢竟Lars之前在ZED YAGO有功。值得留意反而是班底：頭兩隻碟可以話係半個all-star project，第一隻碟有Mike Terrana (!)同SAVATAGE Chris Caffery (!)，第二隻碟兩個走左，換左另一個SAVATAGE結他手Jack Frost (!)，除左奇在三個人都咁出名咁傳奇，仲有一隊「新」德國band可以搵到咁多美國明星－雖當時Mike Terrana仍未算出名，佢都係METALIUM第一隻碟紅遍歐洲後先正式紅起。至於之後一直維持全德國班底，Lars講番先知，原來當中好多原因，而且迴響非常大，好似Mike Terrana走，並非「METALIUM換鼓佬」咁簡單，而成為當年歐洲metal界大事之一，可能冇乜人諗到。雖十年前發生，箇中寫晒出黎的話，好多野仍能夠拉到去我成日講之「美國重金屬過份商業」與媒體扭曲品牌過大等「劉Sir cliche」相互補充。《Hero Nation: Chapter Three》班底一直維持到今日，可能頭兩隻碟太強加經歷人事出入，水準仍高卻淪為頭四隻碟最弱一作，值得研究之處在於冇SAVATAGE兩位結他手，對本已有個超勁結他佬的佢地黎講損失唔大，反倒呢隻碟起一路只得一枝結他，靠Lars低音部份用好多effect同彈法彌補令音色繼續豐富，冇左枝結他live一定冇咁精彩，倒頭來卻讓bass大幅進步發揮更多，令METALIUM進一步於典型power metal樂隊群中脫穎而出：冇幾多成功power metal樂隊bass手會冇所作為，同要玩得好傳統式、舊派metal，一定一定唔能夠忽略低音部之重要性。轉個頭再兩年，《As One: Chapter Four》重拾第一章《Millenium Metal》種天下無敵，感覺就好似聽JUDAS PRIEST，八幾年尾沉左幾隻碟1990突然一隻《Painkiller》彈番起咁興奮，傾過先知Lars同我一樣覺得《As One》係最滿意之作，《Millenium Metal》勝在直接同真，《As One》則藝術成就較高。全隻碟我唯一唔多鍾意係個Metaliana封面。老實講，METALIUM的確冇幾多個封面真正可以用靚去形容。（所以第一隻碟咁簡單是聰明的，呵呵）

高峰過後，要繼續維持非常艱難。《Demons of Insanity: Chapter Five》快歌依舊凌厲，更克服到德國power metal band普遍弱點：寫好聽快歌唔難得但寫慢歌唔得，METALIUM識得避，因為一寫慢歌就盡量唔寫power metal式慢歌，更多時特別後期乾脆寫BON JOVI式power ballad，反正慢歌本身已偏pop，倒不如pop到盡唔好拖泥帶水累人累己。可惜全碟冇以前咁有能力維持得住全隻碟質素是事實，緊接而來第六七章更是我眼中之低潮，power metal band最難就係逃出類型局限，頭四隻碟可以保持到高水準已經難得，跟住好易玩死自己，我覺得Lars寫歌時唔知應該繼續METALIUM定落重番ZED YAGO種doom。而且聽眾要求，power metal碟往往唔能夠短過四十分鐘，好勉強地為達標寫夠歌，質素同力度都大大退步。慘在Metalium/Metalian/Metaliana故事過左頭五隻碟應該已經完結，歌詞變番較行貨普通之heavy metal題材，歌手又唔知點解由以前Dio聲變成扯到好拆好沙，以往作為樂隊特色之佢一轉令全隊band吸引力大減，就連美術都因故事結束失去方向而失去特色。太靚聲可能都係失望理由。當科技進步，錄音同混音只有越來越電，而metal就係要一粒粒爛聲至好聽，冇左舊時種粗糙感，就冇左果種正宗、懷古感覺，新派如melodic death同metalcore可能越電聲越好，heavy metal同power metal唔係呢。聽時我非常懷念《Millenium Metal》種錄音。佢地第一隻碟隻聲，更加係其中一個我最愛power metal錄音。

所以收到新碟《Grounded: Chapter Eight》，初時冇任何期望，上幾隻太難全盤接受之餘，第八部作品之客觀處境亦帶來沉重壓力。好在封面比上幾隻碟叫見得人仲得我心，隻碟一開信心返晒黎，第一首歌叫《Heavy Metal》，Lars手詞第一句已經cliche到世界上只有MANOWAR拍得住，之後連續多首快歌好慢歌好都令人回想番去最少《Chapter Five》時期，作為封面靈感之《Pharao's Slavery》玩慢玩doom玩埃及feel，係樂隊有史以來實驗性最重一首，更加做得佢地新一代金曲。聽得出嘗試玩得progressive一點，好多編曲同錄音手法以前未試過，就連碟名都有意思：見過太多樂隊用數碼科技篡改錄音成品，最常見係電腦扯高或拉長歌手把聲，同用鼓機錄音（呢樣野六翼天使錄音後到歐洲做後期製作時已證實左：製作人會驚訝佢地錄時真係自己落場打而唔用鼓機，笑爆），Lars自己有錄音室當然想點都得，不過決定用番最原始方法製作，盡量唔好數碼化、錄完音將所有修飾同改動減到最少，如其名《Grounded》回到基本，聲音與音樂皆是，冇Metalian仍聽得我十分開心。聽《Grounded》就好似Yngwie Malmsteen 2008年隻《Perpetual Flame》，大家都係迷失左數年重抬正宗一招回勇，難要求有番起初全隻碟首首歌都好聽咁高境界架喇，返到去《Chapter Five》我已經好滿足，起碼佢做得到冇一首歌覺得寫得唔好聽到想飛，聽碟特別長碟我寧願如此，即使歌唔夠好最少要水準平均，好過如第六七章質素參差，作為《Millenium Metal: Chapter One》十週年慶典及格有餘，如果歌佬肯用番以前種實聲而唔係成日唱到咁拆扯到咁高更加好。同點解冇cover？METALIUM實力所在，除自己創作理所當然地得，玩cover有一套加玩得夠特別。通常會以為metal band正路選擇梗係metal歌，其實最metal只得《Millenium Metal》，《Smoke on the Water》嚴重黐線地現代化（太強！比原版更強大！！），ACCEPT《Burning》十分忠於原著但玩得好，你可以話隻碟為《Void of Fire》加呢兩首cover已經抵晒。不過往後，cover其他metal band往往留待tribute album，自己碟選曲有趣得多：《State of Triumph》玩John Miles《Music》一首舊時流行金曲，首歌原來帶點progressive rock（七十年代歐洲流行音樂特色），經佢地手變得近symphonic metal咁誇，同你估唔到歌佬可以唱得咁柔咁夾，跟住仲個更柔情版KANSAS《Dust in the Wind》吹脹；《Hero Nation》最過癮，有個鋼琴演奏家幫德國歷史上最偉大拳擊手作左首古典曲，搵METALIUM cover做metal版《Heart of the Tiger》，雖然佢地本身keyboard同古典成份唔算重，《Music》加《Heart of the Tiger》話俾全世界知佢地唔係寫唔到symphonic power。跟住要到第六章《Nothing To Undo》先有首《The Show Must Go On》，此乃QUEEN經典及Freddie Mercury遺作之一，本身已極具張力，變埋metal版要幾浮誇有幾浮誇，灰在呢首cover可能係全碟最好一首。第四章後冇乜新猷，可能集中寫cover俾tribute album，又可能低潮徘徊冇乜搞作，實在遺憾，因為METALIUM都算我聽過其中一隊玩cover玩得最好之metal band，如果肯好似HELLOWEEN、CoB等一樣，出番張全cover碟，分分鐘可以成為《As One》之後最佳專輯。

仲有好多野傾，好似多年前有個日本妹因為鍾意metal，冇人冇物隻身走到德國貼街招搵人夾band，Lars見到拉埋佢個鼓佬同其他德國metal勁人幫個日本妹錄歌出碟，最後登埋台上到Wacken Open表演，又是一個亞洲金屬的勵志故事，直頭可以化成一本漫畫。見當時Lars自己開間label幫個日本妹出碟，今次佢黎香港順便託佢幫手帶佢兩隻碟俾我，與其上網郵購，不如襯label director黎香港直接搵佢訂帶埋黎運費時間都慳番？點知事隔多年佢，佢除左留俾自己隻辦外冇晒貨。呢ｄ碟香港撞手神都唔知撞唔撞得到。衰在冇時間。坐到七點半，佢要起程過機場，係時候埋單，佢食一碗飯，我飲杯凍華田，佢隊多三罐青島啤，承惠一百五十幾，你明點解黎會展咁多年我都未幫襯過佢間茶餐廳啦。走時仲有一罐青島「留番上車飲」，非常典型的西方metal友，幾日每次見佢，任何時候唔係手拎住，個身都一定帶住一罐or一枝酒。因為搵唔到巴士，只餘地鐵一條路，兩個人拉住兩大篋野由會展行去灣仔地鐵站，辛苦得我一個嗟，Lars哥不知幾咁舒服：唔知仲有幾多人記得暴走鞋？當年滑板車沒落後，鞋爭位裝個轆的暴走鞋行到邊滑到邊成為新貴，同番簡鞋平分天下，不過逃離唔到滑板車相同命運：即使原來設計理念是多麼認真絕對實用，黎到香港只會俾人視為MK仔玩意繼而笑到佢話咁快消失。我記得最後一次見過暴走鞋已經係無線《律政新人王》，當時仲讀緊書即係六七年前'00頭。估唔到會咁多年後噉時候噉場合再見到，仲要係個行商貿show的外國metal佬玩俾你睇。其實暴走鞋等除左玩，正正適合呢種場合，一層可以有成個足球場咁大，要行有四五層你行，做買家往往要拉住車野周圍走，係你睇唔出地體力勞動，好似佢噉整番對暴走鞋實乃聰明之舉。同佢一人拉一隻篋行去地鐵站，我行餐死，佢一踩郁都唔使郁就行左幾步路，落斜直頭唔使用力，除左慳水慳力慳埋時間不知幾受歡迎，沿途仲惹黎無盡豔羨目光，佢滑到邊所有人都係望實佢，加送大量姐姐仔善意笑聲，潮流快起快落加香港人向來善忘，滑板鞋成六七年前，可能而家冇乜人記得係乜一回事，從而令曾幾何時的低Ｂ仔玩意突然間潮爆型爆lum死女。當然，全因佢係外國人。換著係個香港人e.g.劉Sir做同一樣野，又只會俾人笑戇鳩。這就是《K.M.C.9: Jennifer Batten》後記討論過之香港人詭異媚外心態，及如I Sick Leave Tomorrow一樣，外國文化從來難以獲香港人正確理解、接受。

識左一年、見面多次，此最後一程大家先傾番音樂以外。問佢一個rock star、一個metal佬，點解會入行？原來經過好有趣。咁多個人當中，得佢一個非全賴音樂維生：ZED YAGO歌婆《From Over Yonder》時四十幾，今年Lars四十一，即係個歌婆已經六十幾，佢blues唱完、metal玩完，而家走左去搞福音音樂（！）。其他METALIUM成員個個同樣一係教音樂一係做session，佢算較特別自己開埋錄音室，除左得閒走去人地band度玩出出碟，大多時間集中做幕後多。因為追求舒適生活，幾年前移民去西班牙，依佢形容，西班牙輕鬆到就算你返工時訓覺都冇乜大不了咁嘆，所以選擇搬去果度住（99%香港人成世都冇可能做到呢種事）。到步後重操故業開錄音室，地段好比風和日麗渡假勝地，因為其他成員仍住德國，錄音時佢包晒佢地機票包食宿，黎錄音時各位隊員不知幾咁羨慕，因為呢度生活好似人間天堂。有一日，撞到人問佢識唔識整燈光？其實佢完全唔識，不過照同人講：

"Yes! Of course I know!"

之後返屋企上網搵幾間大陸廠訂野，不過貨寄到先發現極度垃圾，嬲起上黎上年決定自己出馬到大陸搵貨，導致誤打誤撞開左間燈飾公司，加首次踏足中國就撞到劉Sir了。因為今年至第二次黎香港同大陸，加兩次留大陸時間唔夠一個禮拜，又聽得多傳聞，對大陸同香港兩個地方好感興趣，講講社會政治之餘，又同我分享佢返大陸的趣事。佢以駐西班牙德國商人身份聯絡內地廠商，做得咁官方，大陸班人梗預期佢會非常斯文著晒西裝噉黎見佢地，點知長頭髮紋晒身戴住骷髏頭頸鏈，ｄ大陸人見到佢有點唔相信佢真係黎做生意。到大陸第一晚，工廠老細帶左佢去唱K，中文歌梗唔識唱，點知搵到《Paradise City》，跟住．．．呵呵。十分多好笑野，仲搞笑過你睇《D.M.C.》，這就是「正常metal友」的生活遭遇。又講到有次佢去泰國有豔遇，某晚落酒吧，遇到個「靚女」搵佢搭訕：

"Hi."（請使用death metal唱腔）

"Hey you have a deep voice for a chick!"

"I love singing."

"Really? Maybe you could sing for my band!"

"Yes. I love singing WIRELESS（邊講邊做動作）"

笑到仆街。對此佢有點見怪不怪，因為聽佢講漢堡原來除左多漢堡包（．．．），仲有好多人妖。佢都想搵機會再黎亞洲，玩又好表演又好，難在時間唔夠。全靠佢同鼓佬寫歌快，先可以每一兩年一隻新碟－你睇番佢地歷史，自第一隻碟1999起，除左2003冇任何一年冇作品出過，夾埋已經有八隻碟兩隻DVD，作為一支欠驕人名氣及大廠牌撐腰之power metal band，比好多好多大band更落力。但本身各位成員已生活繁忙，而家佢仲有自己公司更難抽身，出左新碟都難四圍表演，以前都話可以去到南美等地方，而家來來去去幾個歐洲國家同盛事如Wacken Open，加上冇label支持想黎亞洲更加困難，只試過四年前大阪一次。佢都好想搞個亞洲tour，難處諸多，唔好講隊band本身搵食生活有幾忙，黎到亞洲，可以點搞？power metal早已式微甚至成為新一代metal友笑柄。再者，METALIUM實力超強夠晒歌，又如何？有幾多人識得？況且，在這metalcore年代，個band名越唔同metal拉上關係，反而越多人覺得係metal，個名叫METALIUM，只會是個笑話。

落到地鐵站買飛時，見到佢心口紋左三個字，鬼佬特別band友紋身十分普通，但西洋metal佬紋中文字我第一次撞到，通常佢地紋身都選擇邪惡圖案嘛，而佢揀中文字仲要紋正心口型到爆。

辣鶇鐵

四年前去大阪表演時紋，原意是將"Lars Metal"「中文化」（同好多外國人一樣，對佢黎講日文同中文是相同的），主意出自德國撞到個日本妹，成伙人搵埋紋身師傅用三日時間諗寫乜點紋。第一同第三個字大家識點解啦。第二個字，字典解釋係一種雀，廣東話讀東，即係而家變左LaDon Metal。日本漢字讀音唔同卦？（等我仲係噉同佢講佢俾人呃左，呵呵）

Mattolium Chapter II
"I Sick Leave Tomorrow" Special

以前睇舖時，經常撞鬼，話晒外國人同遊客負擔左TRHK三分一甚至更多生意，自退下香港metal界火線，除左去睇gig，已經好難再有機會遇到外國metal友，Lars係難得之一，仲能夠維持一段特別關係，出乎晒大家意料：佢冇預過中華地區有人識得METALIUM；我冇想過一個無比正經場合可以撞到metal友，仲要rock star級。仲睇緊TRHK時已經做到十分underground，同好多其他行內人比，見到明星之次數同級數根本冇得比，但我仲開心喎：

「如此最冇可能撞到之情況下撞到外國metal band成員，而且發現作為rock star的佢『平民身份』同自己一樣，比見過幾多點樣出名的明星更有樂趣。」

難得碰頭，如果仲有機會見面可能都要等到一年後，同Lars時飲杯野就算，除左太貴食唔起，仲因有下場。八三三聚餐，每每為就劉Sir睇舖放十點同遠過油尖旺一概懶出的惰性，冇幾可唔係旺角佐敦太子食，半年前一次好難得出到灣仔試佢地話正的新高麗苑，今晚難得輪到我灣仔放工，仲唔大條道理叫番佢兩個過黎食咩！話說今日我玩到個電話冇晒電，送完Lars上地鐵，摷晒全身得一個一蚊，跟住搵地鐵站入錢電話，確認兩條友真係到左搵埋位先上去，如果呢一蚊都冇或打唔通，我就當佢兩個放我飛機算返屋企架喇呵呵。估唔到上到去新高麗苑又撞到明星，正正我地前面就係吳國敬。如同我第一次見到Lars就知佢係metal友，係果種人就有果種氣質，同道中人一相遇就能相認。入座後，坐低，大家相對望，跟住．．．相安無事，各有各繼續食。

「你以為會點？唔通大家一齊企起身合唱『滴著熱血插碎玻璃』咩！你估而家真係《D.M.C.》呀！」

食左咁多年，都係我地三條友。從當年迫埋八三三號房起，到終於畢業佢有佢地教書我有我頹，間唔中出黎打個邊爐，唔覺唔覺已經五年，漢仲到派帖時候，雖然我慣左做人契哥，老死叫到，就降級一次做兄弟啦！之前見我退休，兩條友打算搵次一齊去旅行，台灣大計因地震告吹，而我就極想去澳門，因為展覽之後個禮拜六7/11澳洲有F.I.R.演唱會，08年聖誕節一場睇完到而家仲回味無窮，知道佢地去澳門極想過去encore，不過我從未去過人生路不熟，佢兩個又成日話想去玩，梗拉埋佢地過去帶路，晏晝玩夜晚佢兩個返香港我就睇F.I.R.啦！點知平時爛玩的漢修心養性，

「十二月結婚喇大佬！澳門呢ｄ敏感地方，我仲點敢去呀！」

就搞唔成了。其實黎緊真係勁多show睇、極多機會過澳門呀，我從來絕不羞恥於承認，我最愛的香港男歌手是鄭少秋，所以知道F.I.R.兩個禮拜之後到佢去澳洲開show，仲有湯寶如做嘉賓，真係好有好有衝動架！但佢兩條友死都唔肯過，冇計。跟住仲要錯過多兩場：28/11有Joey Tang加唔使過大海，但要搞TMF5 MYPROOF，到5/12 TMF6 DARK MIRROR OV TRAGEDY先灰，果晚謝安琪去澳洲開演唱會呀！！！年紅館去唔到，澳門相信會比紅館搞得仲大，點知自己玩死自己！灰！！！！！

非常好彩地，展覽會跟住個星期六短週，食埋韓燒返屋企可以抖足成日，這是必要的，因為尾二一日已經病病地，完埋展直頭病到死，不過星期日都要返去開番半日工，展覽會前後太多野要跟，病都要清噉ｄ，唔係一定做唔晒咁多野，同埋星期日唔做定野，我星期一點請病假？？雖然請病假老細一樣叫你做，屋企病住都要連線番公司部機做野，基本上冇假放，總叫做舒服過返公司先。不過因為星期日仲要返工，放工節目就係返屋企食藥休養，錯過左107的生日會，同星爺一世人一次的大日子。全因為佢，紅燈山丘中先會出現文曲星戰隊，今年文曲星十週年，好應該總動員影番張合照，一餐囍宴正好提供機會俾所有隊員現身。但真係唔掂。跟住一連兩個星期都唔使旨意得閒得去邊。加埋屋企隻狗要廿四小時有人照顧，出夜街都難，跟住探花兄生日邊爐又要缺席。

「而家退左休，點解好似仲忙過放工後仲要睇舖果陣？月底又黎多兩場show，希望仲頂得住！好耐冇見劉Sir的朋友，黎睇呢兩場show就會撞到我架喇！」

Tomahawk Metal Fest V & VI :
Asian Metal Double Assault

28/11/2009
Tomahawk Metal Fest V
Tokyo Metalcore/Melodic Death
Myproof Live in Hong Kong

5/12/2009
Tomahawk Metal Fest VI
Seoul Symphonic Gothic Black Metal
Dark Mirror ov Tragedy Hong Kong Live