入過無聊齋，一定會睇過呢首詩。有人會覺得無聊，有人會唔知講乜。其實，係有得解。簡簡單單四句，就講出我係教院之生活。係教院， 基本上完全係「我行我素」，融入唔到教院呢個世界，日日就係教院流浪有學就返有堂就上，渾渾噩噩咁就一日，無無聊聊咁就一年。當渾噩的我 在教院挨日子之時，最開心自在之時侯就係係自己空間無無聊聊自得其樂。就係咁灰。有熟人問過我對教院感覺點，我話係「生無可戀」，由頭到尾 我都只係覺得自己只不過係教院入邊一個過客、一個流浪者。如果你覺得我成日上堂都唔知做乜咁，做埋ｄ野就神神經經講埋ｄ野又語無倫次，咁樣 係好正常因為係教院範圍內，我根本係無乜心機去諗野思考想做就做合皮就算。無錯我係教院入邊就係咁樣一個人。

　我諗成級都冇咩人唔識我。係點樣識都好係邊個講你知關於我都好，我相信記得我之原因一定唔會係諗頭多Present勁IT強呢ｄ正面因素，而係 「孤僻」同埋「不正常」呢兩個「招牌」。「孤僻」有咩問題呢？唔埋堆就有問題，呢個世界都幾有問題。係咪想靜靜地享受孤獨自得其樂都唔可以呢？好多人唔係好妥我就係因為我 僻，僻到成日見到人都扮睇唔到掂行掂過唔打招呼。如果我見到你，知道我打完招呼之後你最少會有機會應番我我都會打。我之前講過一個PowerPoint 懶勁之人我每次見到佢我都會打招呼。雖然每一次佢都唔會應又或者扮睇唔到再或者立即擰轉頭。當然佢點諗我就唔知同時亦唔想知。如果我唔同 你打招呼，一係見唔到你，一係你同人講緊野我就廢事，一係就知道你係唔會希罕我呢個小小招呼咁就慳番。不過都唔知點解而家ｄ人可以連唔打招呼 呢ｄ小小事都可以搞到咁多野出黎。見到面知同你打招呼你都唔會應，咁我就自然唔會打。結果就係俾人話懶係野見到都唔打招呼。到我打左招呼， 又當睇唔到走左去，跟住就係俾人講打招呼都唔知搏乜。係囉我錯晒囉。不過你都好似由頭到尾都冇同我打過招呼喎。
「劉義呢個人呀，見到面又唔打招呼，懶係野樣衰衰咁，野都唔講句人都唔望一眼咁就走左去．．．（下略）」
通常講呢ｄ說話之人就係因為自己係咁再將呢套放係人地身上跟住再批評人。講呢番說話之前唔該諗下先：你見到我之時個表情又係點呢？你又知人地一定係專登樣衰衰懶係野唔打招呼？你又有冇打招呼呢？
橫掂你地又唔接受我，我又唔想融入你地，咁咪等我呢個天涯孤客獨來獨往，我有我闖蕩你有你生活，河水不犯井水互不干預囉。點解你地係 要搵我黎講呢？我又冇得罪你地丫，係咪搵野講已經成為你地生活一部份呢？不過算喇，都係一句：「我都慣喇。」

　唔知點解好多人遇到ｄ唔正常或者唔明之事物之時，就會將呢ｄ野當成係唔好。係咪而家做親乜都要入俗套呢？唔跟世俗呢套就唔得？有陣時 我都想融入下呢個環境，之但係我連唔睇無線亞視都可以俾人視為異類，我都睇化。當你連一個人唔睇呢兩個台都覺得有問題之時，你會唔會接受到 一個同你坐埋唔會講女、去到街唔識Shopping淨係識打機、乜高檔野特別野都唔鍾意食淨係鍾意街邊檔、去唱Ｋ唔唱而家ｄ歌淨係唱鄭少秋夏韶聲 唔舊唔唱之人？會，會接受，接受黎笑囉。我都慣喇。不過我明，呢個唔係你地錯，係我錯。我錯在唔入俗套。我錯在只識Sci-Fi、神話、另類音樂 呢ｄ你地永遠都唔會接觸既野。

「估唔到你平時個人冇咩，個網頁就咁樣，鬼死咁騎呢！」
　差唔多所有睇過我個網頁之教院人都係咁講。咁樣只係你地唔熟我。呢個問題 永遠都會係教院出現，因為除左熟人永遠都冇人肯接受我係一個玩野之人而只會當係一個講埋ｄ野聽唔明行徑又怪異之傻仔。係囉。我講乜做乜都係白痴，唔係因為我講ｄ野廢而係因為聽個人唔明。

「我同阿漢傾過，劉義呢個人英文又得中文又得ＩＴ又得，老豆做教書老母係護士長，屋企仲有三個單位，但係都可以搞到咁懶。我同阿漢最後斷定，劉義係一個缺乏家庭溫暖而墜落於教院既人。」
　最後一句，前半中，我屋企不嬲都冇咩溫暖一直處於冰河時期。後半都中，我年幾以黎都係墜落於教院同時於教院墜落。不過成句就錯，並唔係 因為前半而導致後半。墜落於教院係自作孽揀錯科，於教院墜落就係因為教院環境問題。我係墜落不過係自甘墜落，因為我唔覺我浮番上黎呢個世界之後， 呢個世界有咩值得我留係度同時你地亦唔會拉番我上黎，不如再沉番落去算。

　年半喇，教院對我黎講仍然係一個「陌生的世界」，我對入邊一切都陌生同時你地又唔會熟悉我。就等我繼續做個天涯孤客，浪跡天涯，係呢 個陌生世界中繼續獨步江湖啦。一呼百應、一字通百句明、全級異人與我同行，呢ｄ情景係我在學之年都唔會再出現。