10/10是個很難抉擇之日子。一星期前，隻狗訓訓下覺突然中風，之後訓左成個禮拜醫院。中左風再行唔番，加上大量新病舊患，醫生都唔睇好，大家傾好雙十送佢走。（「點解唔即日送？」「香港都市人生活：第二日唔使返工咩！你想死，都要就到我有時間先死得，幾灰？」）跟住每晚都有人去獸醫診所見佢最後一面。臨尾幾日，吊左個禮拜鹽水日日食藥開始有起色，傾左幾晚，結果：

急病醫好晒，而家只差中風後遺症起唔到身行唔到路，不過變番以前咁精神，養左佢七年大家始終唔捨得，醫生亦見佢好左，或者俾多佢一兩個星期希望再有好轉，就決定大家辛苦少少繼續照顧佢。知道有得出院，隻狗都立即開心晒。

中風加上老狗常見病白內障，慘在一緊張就失禁，拎塊毛巾包住佢，抱起已經瀨濕左，非常好彩遇到個狗迷的士司機，撞正交更時份都肯幫手，而且帶狗上車通常要加五蚊，落旗計半價就算，好快就帶到佢返屋企。

中風之後，唔止起身行路，連訓低都有難度，因為冇晒手腳協調，訓低都一定要手手腳腳叉開晒，打側訓責住手腳會郁唔到，被迫做個X-JAPAN fans日日擺佢地pose。要服侍隻老病狗，都幾大陣仗：

平時訓開張圓床俾佢當枕頭，張舊床仔擺側邊做後備，因為行唔到，攤開塊毛巾再放尿布以防萬一。除左行唔到路之外，生活同以前冇乜大分別，都係訓飽就食，食飽就訓。

住院日日吊鹽水，食野除左係噉食藥冇啖好食，又日日屈入籠冇得郁唔舒服，返到屋企第一件事行唔到都地下躝黎躝去，再大啖大啖食罐頭，仲要肯自己食而唔係之前個禮拜噉要姑娘夾硬塞入口，好耐未試過咁開心。不過黎緊兩個甚至一個禮拜，就要再決定佢走定唔走。上次中風兩三日已經冇晒事，大家都希望再有奇蹟出現。

doom的事一不離二。隻狗入院幾日後，到老豆心絞痛，差少少早過隻狗上路，狗仔出院黎緊到佢入廠。反而劉氏家族得罪人最多果個劉Sir冇事。（定還是，時辰未到？呵呵）