MCB的告別，是逃不了的宿命。現在，我只有向這十年歲月說聲「再見」。

在香港辦音樂雜誌總不會維持得長久，彷彿是一個宿命。MCB經營了十年，也逃不了這個命運安排。

過去的十多年，自己親眼看著一份份有代表性、有分量的本地音樂雜誌相繼倒下來：《搖擺雙週刊》、《音樂一週》、《助聽器》、《音樂通信》(Music Bus)、多次休刊與復刊的《結他雜誌》、Top、《豁達音樂誌向》等等，有的圓滿結束，也有的不辭而別。就算是走流行偶像路線的音樂刊物，也不能活得長久。當我創辦MCB的那一天，也早已料到會有這終結的一天，只是遲早問題。

這說明了甚麼？香港是音樂文化沙漠？

在香港這塊彈丸之地，一直以來出版業大集團總是沒有多大興趣投資辦音樂雜誌，絕大部分本地的音樂刊物，都是中小型甚至蚊型公司（如早年以Home Office起家的MCB)出品，辦音樂刊物的，背後總得不到甚麼支持。

MCB創刊初時，我們的擂台對手、我們的沙場戰友，是商業二台辦的《豁達音樂誌向》(Quotables)。作為配合電台節目《豁達音樂天空》所推出的月刊，由前輩馮禮慈主編、有陳輝虹梁兆輝黃志淙作號召、夏永康任美指，論背景論資金論人才論唱片公司支持論音樂普及性，MCB根本難以跟他們比下去（有趣是當年大家的作者又會「豁達」地互相地為對方執筆)。Quotables vs MCB，這場對壘的劇情發展，理應是MCB先倒下來。然後也許我會因此而加入Quotables工作，故事大概便因此而改寫。但實情是先從戰線退下來卻是Quotables，剩下自資經營的MCB孤軍作戰，迄今我仍覺得有點不合情理。

在這十年期間，我們身邊也有好一些曇花一現的音樂刊物出版過，但都是那麼短暫的事物。你說MCB無敵是最寂寞嗎？我只會感覺到，音樂雜誌已淪為息微行業、黃昏工業。

．．．．．．

多麼可悲．．．

首先，我唔係逢星期五棟係報紙檔、期期追跟內文買碟、講到無其不可之MCB擁躉，或者話，我從來唔係MCB擁躉，只係睇封面同內容買之causal reader，懶睇書的我有幾期買番黎就掟埋牆角，到唔知幾耐之後摷到先醒起自己未睇過，包括最後三期，呢三期到寫呢篇野時我仲未睇。甚至，對MCB有點反感，包括忽視或低視某ｄ音樂類型（最明顯係metal，一向少講甚至唔講，講果時好多時都錯資料，而且逢係metal野永遠唔會高分或非常好評），同埋MCB網頁論壇，對呢個forum，我係十分反感，特別係非音樂但同MCB有關果ｄthread。但MCB亦有值得欣賞之地方，編輯之音樂知識閱歷令人服得五體投地，通常一本MCB得兩三頁真係識睇或者有興趣，其他完全唔明，但從中學到唔少野；文筆亦十分地好，好似我永遠剩係識講「好」，但佢地閒閒地可以撻到幾十個二三四字詞出黎。而最尊敬之地方，當然係呢份十年之堅持。

但MCB之「善惡」，唔係我想討論之地方。我只係想講，MCB係咪真係如袁智聰所講咁「抵死」。係香港搞非主流音樂等同燒銀紙，唔使我或者TRHK講你知，上面篇文已經講得好清楚。用一大舊錢去支持一本非主流音樂雜誌營運十年可能真係幾「抵死」，因為用呢舊錢買晒六合彩，回本或者賺錢機會會仲高。但袁氏選擇左堅持。呢一份堅持對香港音樂帶來乜野貢獻、帶左幾多人進入另類音樂、為多少人提供主流音樂以外選擇之途徑，都唔使係度講喇，因為如果你係真係有心關心（本地）音樂，呢ｄ成就同貢獻早就已經知道，唔會連佢地休左刊都唔知或者未到休刊果日有人提先意識到呢本野之存在。亦都可以見到，其實MCB真係有唔少支持者，始終已經捱到第十年，點都有一批固定讀者同定期有新人加入。點解噉都捱唔住呢？莫非講一套做一套，真係香港人之特色？可以自己諗番，你會話自己支持香港地下音樂、獨立音樂，但係你會點支持？大大聲話支持本地另類音樂，但係永遠唔買local band/artist碟、永遠唔去睇band show、完全唔去發掘香港有咩樂隊同音樂人或者公司、甚至local band/artist/labelｄ名甚至作品都未聽過，永遠只摷外國野聽把口又話支持本地音樂之人，唔少。叫你每兩星期食少餐飯俾十五蚊，支持一下一本本地真心音樂雜誌甚至係香港唯一音樂雜誌，都唔肯。因為，嗌口號唔使錢，買書要。但到人地休刊，突然間非常悲慟，慨嘆點解香港唯一一本音樂雜誌都冇人支持要執笠，順便嗌多幾句「支持本地音樂。」、「展望重光。」然後，繼續邊嗌支持香港音樂邊去摷外國野。直到下一個悲壯時刻。鬧媒體唔講音樂，但又話MCB唔岩口味，《打口》又太pop索性未睇先屌（希望真係會睇下啦，唔係因為我有幫佢地手，而係：「你有冇真係睇過？特別係十月號？有講天譴九歌同閃靈．．．」），再繼續鬧香港冇人肯搞音樂雜誌；話冇band黎香港，有人搞時，又要揀邊隊邊隊，又要睇價錢，結果就係有騷冇人睇，因為班人去晒鬧冇人搞騷。唔使講外國騷喇，睇本地騷有幾多人口口聲聲話去又唔蒲頭就知。所以，其實係香港搞音樂，都幾抵死。

或者係呢度講唔太恰當，但都想抒發一下。人人都知，係香港地搞另類音樂係非常非常艱難。噉邊種音樂最難係香港發展同做得起？唔使講到自己聽開果種音樂係香港幾咁唔吃香，我直接講事實你知，係metal，甚至乎到全世界，都係metal。唔講電子同darkwave果ｄ只講band，好容易見到好多人聽／玩hardcore、punk，但玩metal有幾多隊你可以數下，再減埋nu-metal果堆，唔使我講啦。其他另類音樂，起碼都有MCB會講。Metal呢？唔好同我講"Milk"果ｄ「Death Metal精讀」，亦唔好提MCB十幾版當中有一個格仔提及仲要常有錯漏之篇幅。會提及metal之媒體，係零。問人香港有邊間label做另類同indie野，隨隨便便都撻到89268、Monitor、White Noise等等四五六間出黎，但會提到Trinity Records Hong Kong呢個名既，都唔知有冇四五六個。而且做另類音樂／indie之香港label唔少，但做metal，就真正只此一間。或者你到而家都唔知Trinity Records Hong Kong其實咩料，噉我講多ｄ野你知。TRHK係香港唯一集中做Metal之獨立唱片公司，除左簽約到數隊亞洲同歐洲樂隊加盟，更加係部份海外著名唱片公司之亞洲區代理，係世界中已經經過嶄露頭角地步而達廣為人知之境。而且TRHK之進口水準係非常之高，有好多碟甚至係歐洲都極難搵到以至絕版貨，有ｄ你上網訂都未必訂得到之CD，TRHK都搵得到，曾經有一個新加坡客上到TRHK話：「如果呢間舖開係新加坡，唔使兩個禮拜已經一隻碟都冇得剩。」呢ｄ係TRHK自九九年起半個十年之堅持同努力，得到之世界級成就。你會話，「係唔係呀？咁威水我會唔知？」你當然唔會知啦。你只會關心，邊度可以download到MP3、邊個燒到CDR比你、係TRHK以外邊度有sample或者翻版metal野買，同埋係邊度可以點樣拋書包同踩聽pop果ｄ。要俾錢果時，就過主。而且，不論玩果班還是聽果班都唔多買碟聽甚至唔肯試多ｄ，好多碟入到番黎，根本係冇人會過問甚至試。到過左幾個禮拜甚至幾個月，批新貨變晒做舊貨放晒去外國，ｄ人先會黎追番問有冇邊隻邊隻，但果時一早已經賣晒。跟住ｄ人就會話，「TRHK好廢，呢ｄ貨都冇！」係架。真係好廢架我地。有人話，TRHKｄ貨黎得好慢，寧願捱貴ｄ去HMV或者自己上網訂，都唔會幫襯TRHK。但佢地永遠唔會諗，問題係邊度。做生意，ｄ貨要週轉，就要有資金，要有資金就要有人買野。但個個覺得自己聽野點多點闊果ｄ，衰ｄ講句，有時真係好想笑，因為要笑的話可以笑佢地「聽pop野」，永遠只會要個名最響果ｄ其他當睇唔到唔肯試，就好似佢地笑ｄpop友聽TWINS一樣，又或者笑某ｄ人隔左不知多少時日先將ｄ舊野當最新大發現拎出黎拋。如果我真係串，我一早可以串到從此冇人再上TRHK。結果次次有貨到，呢ｄ聽野多麼地廣多麼地闊的老細上到黎發現入左百幾二百隻新野，但就係冇果一隻，「除左果隻我其他乜都唔買！」結果每個月只買一隻甚至幾個月先一隻，其他果ｄ掂都唔會掂試都唔會試，直到其他人講起或者「自己發現」。試問冇錢流入，又唔使你先付款或者俾訂，但唔付出之餘又要人地做到HMV級數俾你，點做呢？成日講自己點開明果班，原來先係最唔開明果班，乜你唔係成日講到自己肯／想嘗試更加多新／好音樂咩？

都有唔少「抵死」故事。一件真人真事：某日某sample店中，有顧客向店主反映，「入多extreme metal野啦，唔係我過皆旺啦，佢地d碟咁撚貴真係唔撚得，咁撚貴，上到去買碟真係要試清楚！」一隻冇得「試清楚」仲有可能係打窿版之日本sample要$8X-$9X，而「皆旺咁撚貴唔撚得」但有得「試清楚」果間，一隻歐／美版正版碟$94。或者係「自己搵」唔係靠專業人士介紹實在有太大滿足感，就算價錢比「咁撚貴」更加貴，都唔算係點樣貴法。多一件真人真事：有一間臭名遠播之唱片舖，不論生意手法還是搞騷都一塌糊塗兼不值欣賞，間野有問題係人人都知，亦個個都話想間野早ｄ執同支持真係有心搞音樂果ｄ，但結果呢間野唔使執仲越搞越大，真係有心搞果間就隨時執得，因為班友發現，只要幫襯左果間野之後鬧番佢地幾句，就可以繼續保持清高，而佢地寧願繼續噉樣一面鬧一面幫襯果間「黑店」，都唔幫襯佢地覺得真係值得支持果間。又一件真人真事：有個人問我有乜metal野好聽，介紹完之後，第二日聽到話「全部download晒，好正！」隔多一排，「OPETH正呀！」「買左邊隻聽呀？」「七隻都download晒！」Download晒之後仲會唔會買番？唔使我講啦，你問下你自己先啦。原來呢個世界真係有免費午餐，仲要係食得好開心忝。再一件真人真事：一個聽metal的朋友搞左個網頁介紹metal音樂，但好遺憾個網頁有著唔少錯處而惹來嘲笑，而佢於TRHK forum討論之惡劣討論態度惹來眾人非議，惱羞成怒之下，TRHK呢個名從此冇再係佢網頁當中出現過，並係網中講到係香港係唔會買得到metal野，慫恿人寧從外國label訂碟都唔好係香港搵。當有人質問時，只留下一些自相矛盾及以偏蓋存之回應，然後消聲匿跡。都幾有趣架，其實你聽metal為乜？音樂？定係型？我會原諒果位朋友，因為佢發現左TRHK令到佢變得唔夠型之事實，同買sample、download同上網訂一樣，自己搵先夠型嘛。因為太多真人真事，最後一件：其實好簡單，就係ｄ人寧願要快，俾錢HMV、韻彙、芒記買貴價碟或者上網訂都唔肯等多一段時間，等TRHK入之後買平碟。因為佢地覺得，「人地又係CD舖，但人地入得快咁多，你地咁廢，梗係唔幫襯你地啦！」ｄ人永遠唔會明白，TRHK唔係芒記或者HMV，人地可以有Ｎ個員工朝九晚五只做唱片舖內之工作，TRHK員工數目一隻手甚至半隻手數得晒而且全部都唔係全職唔係朝九晚六就朝八晚八，再加多又係一隻手數得晒之外援，呢間野就係靠呢幾個人幾對手係放工放學之後捱出黎，但冇人會去欣賞呢一份付出同堅持，要身嬌肉貴之佢地同TRHK一齊捱？算啦。果時ｄ人話買碟冇得平五蚊寧願唔買都唔肯俾錢，更何況好似而家噉要佢地等多個幾禮拜呢。其實都幾抵死，因為一間本地label － 仲要係一間達世界性成功之label － 都唔獲得玩開同聽開果班人支持。芒記而家可以做到咁大，除左因為MCB，仲因為聽果班人支持佢地，出晒名服務態度差，人人都照係噉幫襯佢地；相反，TRHK貴為服務態度最好之一間香港唱片舖，玩同聽果班人反而唔肯去幫襯同支持。如果芒記係「小」時，環球係「大」的話，將芒記放係「大」時，「小」= TRHK。大家都係搞獨立音樂，但規模就係可以差距咁大，睇TRHK間舖連芒記個閣仔咁大都冇，就知兩者規模同財力之別。又或者係真抵撚死，明知香港ｄband友同「metal友」本身都唔會支持都仲搞，結果呢間local extreme metal label係世界開始揚名，反而係坐落地香港冇人肯支持，十分諷刺。或者，對香港人，真係唔需要咁好。好似搞六翼天使，搞果陣個個都拍爛手掌話好、一定支持，但係「我好想睇架，但冇人陪，點睇呀？仲有，要我俾兩舊水睇？戇鳩架？」最後有幾多人真係去，又有幾多玩metal、「支持metal」之人去左？都廢事講喇。笑又唔係，喊又唔係。

吠完。只想講，我唔知道TRHK幾時會好似MCB噉出「編者話終極號」。你想知的話，好簡單。繼續一如以往，做番個自戀香港人就得。連一本每星期只售七個半、十年歷史之音樂雜誌都捱唔住，要一間對你黎講九十四蚊一隻碟已經好貴、聽日已經執得笠之唱片舖收檔，相信仲容易過你上網搵歌download。