搵埋功夫熊貓做代言，仲要有雙層版，賣相一流喎！
但抵死在廣告六月廿幾出街，過多近成個禮拜先開始賣。
「因為要就六月底功夫熊貓上畫？」

兩款食邊隻好？仲使諗，兩隻買晒，甭煩！
雙層果隻唔係叫雙層黑椒孖堡，而叫珍寶裝，原來。

價錢如何？單層$12.5，雙層／珍寶$17.8。
我記得兩三年前，單層一個先收八九蚊，
收舖買兩個返屋企當晚餐，夠飽又好食仲要平。
幾年間，加左價幾乎50%，仲要只係齋包價錢，
叫全個套餐要幾錢，我都唔敢睇／問。
即係雙層個價，等同於以前一個餐囉，已經。
「明我點解而家唔食麥記未？」

官方的鱔稿照，非常吸引。
那，真係到你買時，得唔得先？

「．．．．．．」
唔知整包班友有問題，定個包本身已經有問題，
成劈噉，見到都唔多開胃。

好在仲有兩塊豬柳，不過黑椒汁冇以前咁多。
而洋蔥，搞錯呀，使唔使縮皮縮得更嚴重？
「以前食，ｄ洋蔥係多到跌出黎！」

單層版除左樣衰、少汁、少洋蔥，叫做維持水準。
新登場的珍寶版又如何？

貴野係唔同ｄ，蠟紙包之餘外面加多個盒。
我成日同人講，麥當奴係全球最環保財團。

至於個樣呢．．．我冇期望過囉，前車可鑑。
即係佢砌得出「雙層」個樣出黎，我已經滿足。

賣點係有四塊扒，但係相比汁更加唔夠。
洋蔥唔係冇落，只係收左落底，唔係灑上面。
等你冇咁易發現落少過以前的手段卦？

汁唔夠以前多，特別雙層中間直頭乾晒，
搞到味都冇咁濃，舊時入口感覺到辣，現在只得椒味；
洋蔥亦少左，唔似以前舖滿成層，欠一點爽口度；
整體分數低過以前，但仲係我最愛麥記包。
至於珍寶版，四塊扒足料，唔叫餐食完都有點飽，
以$17.8填到肚計，又唔算唔抵食，
尤其而家普通個餐近三十蚊，但食完好似冇食過野。

又可能，我地都食錯左。
正確夠多夠飽食法，該是如此：

三層六豬柳．帝皇黑椒漢堡
售價$30.3

「噉先似樣。」

但，當你食到噉，點解唔直接去Murder King？