2008 Retrophrenia
Metal, Music, Merchantry


Deem Theater

「一個商業電影迷對2008的膚淺回顧」



Pre:
2008 Retrophrenia
The Provenance
Post:
2008 Retrophrenia
The Provenance
Chinese General I
關心妍《最愛Jade.i》




作為2008年回顧第一擊,唔想從音樂開始 - 信我,劉Sir一講/寫音樂,會講/寫到你唔想睇,講漫畫講玩具又未夠班,就由電影開始。事先聲明,劉Sir唔識睇戲。《如何呃劉Sir俾錢入場睇戲指引@I Am Legend》在此,睇完你就知佢係個淨識睇膚淺商業電影e.g.李連杰全線的白痴仔乙名,所以黎緊出現只會有最pop最大路最...爛的商業電影,任何高檔高層次深層思考發人深省警世哲學者通通冇份。同劉Sir寫野從來嚴重欠缺深度,假如你想睇學者級文獻,好似《低清老翻王》明明只係一個意外加冇錢令班窮人拍「老翻」搵錢供樓的故事,可以講到佢地係為對抗商賈反動電影工業而翻拍電影,我相信導演拍套戲時會有呢種心態、想從套戲帶出自己思想,單套戲表面睇,呢種思想確實潛台詞潛到深不見底果隻,常人冇可能會睇得出囉。呢種無限擴大,就等同於見到一個街邊乞兒唔搵野做唔領綜援,代表佢自力更生反商業社會反封建政府好punk好hardcore時代先鋒一樣,只是一種知識份子夾硬搵野黎講的拋書包,而我個人a) 好抗拒呢種文藝評論員書寫 b) 睇見只會笑爆咀唔會感到有乜內涵,所以自己就算夠料都唔會/唔敢寫。(講係噉講,到寫metal時卻往往情不自禁)


因為我份人好膚淺好容易滿足,講鍾意乜戲有排講,不如先講08年度唔鍾意、失望電影有邊幾套。論最,必數《X-Files: I Want to Believe》,如非掛住X-Files個名根本冇可能有(咁多)人入場,著實爛到我要相信這真是X-Files原作者出品都難,套戲直頭唔應該拍出黎。另一套係《Superhero Movie》。《搞乜鬼》頭兩三集強勢跟住益廢,入場咪又係俾個名呃左囉。以上兩套能夠高票當選成我年度最失望電影,可能因為冇睇到人人話廢的《地球停轉日》。另一睇完極度唔開心係《Mummy 3》一心有港星有李連杰秦皇陵都玩埋,頭兩集一集比一集好睇,今舖仲唔掂?點知,故事導演特技演技死晒仲要死得好慘,睇完想喊。唉。仲有《L》,向來唔多睇日本戲,有見《死亡筆記》第一集劇本同演出得,第二集改編到自己都講唔通已經灰,整集外傳出黎諗住冇死亡筆記包袱會有突破?點知玩到占士邦噉更加唔知拍黎做乜,除左賺錢之外。我唔鍾意日本野其中一個原因,就係有時商業過頭而毫不掩飾。


游走中間路線多到數唔晒。因為世界上唔止劉Sir一個人膚淺,2000年代成為邊個投資舊錢夠大、特技夠誇張,邊個就賣到座的年代,《變形金剛》已經玩特技玩到盡頭,大家仲有咩好鬥、仲邊有得鬥?08年回歸番「真」。07年尾hype到08年頭、《Lost》大佬主理之《Cloverfield》,玩番《Blair Witch Project》種手提機現場拍攝,第一身睇大怪獸毀滅美國,一月上畫即時成為2008年度首部最佳/最廢電影,我屬於前者,不過年尾輪到《[REC]》上位,變番「行貨」喪屍橋、範圍縮細至一棟樓,勝在歐洲風格係與別不同,同最重要劇情夠完整,又冇過份脫離現實,連美國都高速整套重拍版《Quarantine》,香港冇可能上架喇,唯有等VCD/DVD。對得多假野,睇番唔花巧踏實正經拍法更有風味,只不過係時候適可而止,見有利可圖立即個個走去拍(《[REC]》衍生《Quarantine》已明顯投機),話咁快就會玩到俗晒死晒。另一種真係玩番真人落場唔死靠特技,堅持old-school的《Doomsday》用番八十年代動作片拍法,可觀之餘唔娘,能夠多番人拍呢種高質素硬橋硬馬動作片就好。最想開反而係《Jumper》續集,因為想到個有趣前提,故事同特技都有廣闊空間發展,可算是一部另類特技片,同時能夠玩特技之餘偏向劇情/真實路線。相信因為一開就話整三部曲,作為長篇作第一章明顯特技劇情都壓制太多,再拍的話集中將空間跳躍結合動作場面會更得人歡心,但08經濟大仆街,電影公司未必肯鑊鑊俾咁大舊錢,都幾擔心有冇人肯投資開第二集。


相同原因,09年起片商開戲會或者會從經濟角度出發,特技片未必似幾年間成行成市,除寫實作外,劇情片會更盛?畢竟一套戲襟睇與否,劇本比特技場面更具決定性嘛。頭先用過黎做例的小品《Be Kind Rewind》絕對係表表者,格局有新意、格調與別不同,我未至於睇到套戲反商賈反工業咁高層次,只有作為獨立音樂工作者,而深切體會到賣藝術賣非潮流產物足以致命極具共鳴,同我講多幾多次,都唔會遊說得到我戲中人係如專家所寫般行為背後咁具反動意識,因為佢地只係做自己鍾意、自己想做之事,同政治、商業無關,而我明白佢地做緊乜與做事動機,正正是《Be Kind Rewind》成為2008年我最有感受電影之一原因,電影水準是未夠,但感情同意識搭救 - 最後爛尾大團圓除外,因為現實之中,獨立音樂是冇幾多個大團圓。可能我睇開的都係商業電影,所以劇本搵新意係兵行險著,始終出錢班大老細睇實你唔可以好冒險,兩頭唔到岸唔敢去到盡就搞到不淪不類,《Tropic Thunder》故事非常突出又有優秀宣傳策略,可惜導演太自我中心,加上電影公司講到套戲笑片黎點知入到場先知俾人昆左,睇得唔算太開心,雖則我非常鍾意佢所探討之題材,而《Hancock》又係衰足晒同一瓣,笑唔夠笑、暗唔夠暗、結局奇弱。《The Happening》更加唔使講啦,導演拍戲已視商業回報為無物想點拍就點拍(難得仲有老細肯投資),但對於馬蘭,見到佢《鬼眼》後持續下滑之水平(《森魔》除外,是我心頭好),而家睇佢戲純為睇風格同佢個名,唔敢抱大期望。同一結論可用在《恐懼鬥室》系列,《Saw V》偏左總算未去到失望層面,只係見今集已經玩到前傳/外傳,導演講明拍九步曲即最少玩多四年先收手,反擔心會唔會黎緊前完再前、外完再外地死唔斷氣,講得舊戲帶唔出新戲。


講完差、講完中間位,要講好,相信唔難捉路。經濟好加特技發達,造就近年ACG橫行電影界,經過幾十年養精蓄銳,ACG三方面早已有大量家傳戶曉角色同傳奇故事作為電影素材,但亦只到近代CG發展到頂峰,先可以將天馬行空場面真實化。不如順序講。A唔算太多,睇左兩套一中一西,西方代表《Speed Racer》可以話近年睇過定位最怪電影。你話唔掂?唔係,我覺得拍得幾好。掂咩?又唔係喎,要數大把位你數,用咁多精神將一部真人電影拍成卡通片已是成也敗也,賺錢唔覺能夠大收,當藝術又太通俗,睇完除左嘆句有錢有名真係大晒鍾意做乜都得,諗唔到應該點樣講呢套戲,而家仍然一頭霧水。另邊廂日本代表EVA多年後再有新電影版,因為原來結局電視最後電集接《Death》《Rebirth》《Air》太深,就番睇唔明的觀眾加吸納迎一代,reboot番野從頭講過全個故仔。不論日本定美國,係噉食老本、得閒舊作翻新當新野搵錢屬平常事,分別在美國漫畫好興為現有角色創作全新故事,唔止改頭換面加世界大變,甚至玩到時光錯配正邪顛倒,所以睇足十幾年仲有新野玩。日本就唔係,一係一個故事死拖爛拖到死唔斷氣,一係越變越白痴就番日本人心態睇龍珠就知啦,戰隊同超人系列設計靚d再加CG爆d就新一輯玩足十幾年唔厭,變都唔多會大變,例如龍珠夠唔夠膽講到悟空係邪派、菲利維護正義?EVA難得肯打倒昨日的我重頭構想,原版用廿四集電視加兩集電影先交代晒全部野,新版夠膽死只拍四部曲,可想而知會去得幾快省略幾多,但快極《序》兩個鐘先打得三隻使徒,黎緊三集會點玩?預告片講到同電視版完全兩回事,即係按而家日本動畫走勢,淺易路線是預期之內,最少有新意,連月球都拉埋黎玩,佈局同氣氛近番電視版頭三份一種打打殺殺媾媾女典型日式機械人動畫,或者導演想拍番最初想拍的EVA出黎。最緊要香港上左第一集,唔好爛尾唔上二三四呀大佬。


C就自然玩晒啦,連Marvel自己都開間studio,一開就計劃連開幾套戲到201X年,而且逢漫畫改編幾近必定大收不論叫好與否,全年大半特意入場電影都係同漫畫有關。全年最佳電影正路地係《The Dark Knight》,雖然漫畫追開Marvel,對DC甚至冇太大好感,拎Marvel連串大作好似《Iron Man》《The Incredible Hulk》同佢比,根本係商業同藝術之別,一套戲為DC爭番啖氣。睇左《Iron Man》,加埋《Hellboy 2》種獨一無二氣質加抵抵死死,已經感到英雄片有救,但蝙蝠俠灰暗出身之先天優勢加無敵幕前幕後陣容,唔受DC都要大大聲講:


「噉先係而家美漫迷想睇之超級英雄電影呀!」


的確近年導演終於識相,拍超級英雄電影唔再如初時從特技同名氣出發(例見《再生俠》同《Ghost Rider》,近代兩套最廢改編英雄電影),而肯俾番心機落劇本,蝙蝠俠得左,黎緊同類戲相信會更暗更真實。值得思考係以前呢種電影路線香港人根本頂唔順,要睇可能得油麻地,家陣一套商業電影玩到咁黑咁暗,卻無阻大家入場一看再看,仲要睇完覺得好有深度好好睇。係觀眾接受力高左?定世界真係灰左,觀眾對以前感到異類之題材、演譯,已習以為常了?本來有另一套戲覺得會再次帶到俾我《The Dark Knight》份「modern gothic」感覺(單講感覺,非指水準可相提),就係原定年底上畫之《Punisher: War Zone》,可惜最後香港市場放棄左。有趣在當年《Hellboy》上第一集,連宣傳都做埋,點知突然間片商決定上《Punisher》,《Hellboy》係難得冇乜動作而多文戲但好睇的英雄片,但既Hellboy同Punisher兩個香港人都唔識,正路商業決定梗係上套槍戰片多過另類的Hellboy啦,雖然第一集成品欠理想,按原計劃上Hellboy可能更好。08調番轉,不過睇左《Hellboy 2》條trailer,立即明解了,始終在香港都係保守路線好,《Hellboy 2》打到九彩一定大賣,典型黑幫片槍戰片的話年中已經有《Wanted》(雖則從英雄漫畫改編成槍戰電影都幾離譜),Punisher角色唔出名,動作又唔夠人黎(「冇特技」),故事沉得黎上集上畫又唔算大收,唔上都好正常。最後想特別一提係《AVP2》,第一集廢到無可再廢,(盲目)捧場仲要盲到入戲院睇左兩次只因我是兩者fans。第二集單trailer已經好睇過成集第一集,因為第一集導演明顯係異形fans,Predator負責俾人殺俾人恰,今次做番英雄加大量新奇科技似番樣,雖然入場先發現又俾人呃左,尤其結局夠馬虎(Predator鬥大佬時,人類一個核彈炸晒兩隻搞掂,灰到爆的反高潮),但作為爛片睇都唔錯架,一定好睇過第一集先囉,對於AVP冇期望就冇失望。呢套戲仲要係2008年第一套電影,《Cloverfield》是第二套,而兩套都係「爛片」,個頭已經咁爛,唔怪得2008我覺得咁多正戲睇啦。


一路都講美國野,日本戲唔係冇,問題係亞洲戲一向唔睇太多,《乒乓》時講過我對日本誇張演出幾咁反感,日本仔又鍾意動漫真人化,但你將卡通一套照直搬去真人版,會柒到頂唔順。08兩套好在冇事。《20世紀少年》自命本格,加上原著踏實,成果相當滿意,可惜最精髓的冇晒、最商業的留低,覺得想扮西方大製作,但睇日本戲就係為其地方情懷,做乜要放棄自己咁失敗?差少少令我想入場睇所謂「MR. CHILDREN加《二十世紀少年》」的《海角七號》補番數。而作為metal友不能不睇是《D.M.C.》,我諗大把人話好睇特別非聽metal人士,我就覺得麻麻,雖然用最強之頭兩期漫畫做劇本,但進度太急省略過多,浪費原著大好故事,最大問題出於創作角度,作者點睇都唔係metal,所以不同於外國戲常見之metal友負責編劇,分別可以相當大,因為即使大家笑同一個metal cliche,邊個有內涵邊個夠高章即見。或者我覺得唔好睇,源於局外人永遠唔明白之地下困境,對於一個見盡本地metal界灰暗面之人黎講,你講到地下音樂咁勵志咁有生機咁有希望,最忌。


最後G就慘情。遊戲改編香港人好似從來唔多受,因為文化唔同,對開日動日漫打開日玩,就算歐洲美國遊戲點樣受歡迎,風格同市場問題最難到本地觀眾共鳴卦?《Max Payne》改編一隻現代經典第三身射擊PC遊戲,隻game打住「先過《Matrix》玩bullet time」、「John Woo & Chow Yuen Fat tribute」旗號,當年係令我學期尾努力做功課原動力,果陣遇著交功課日子,連通兩晚頂交埋最後一份功課返到屋企第一件事唔係訓覺,係立即開Max Payne打晚通宵!當時已經過左打機時期連屋企部PS1都封緊麈,Max Payne係難得勾得番起煲機舖癮之正game。隻game出左五六年先至開戲,雖然預告片非常唔對路,為個名已經會睇啦,點知上畫日子十月變十二月,賣埋廣告平安夜上跟住冇埋件事,相信同《Hellboy》第一集當年一樣唔聲唔聲收左皮。一年前《Hitman》又係噉,廣告都出埋最後唔上點知唔想,事實證明遊戲改編電影香港行唔通,而最大興趣兩套改編戲《Punisher》《Max Payne》都冇得上,只得「非常GTA」的《Wanted》頂住,算是2008的美中不足。係套戲唔掂?我覺得更大原因係譯名。中文叫《魔間煞星》,明顯地譯果條友睇完預告片再食住「魔間」條水就起左呢個名,但查實套戲根本冇魔間,出現的黑天使是個騙局,發現連中文名改錯左已經太遲,怕俾人笑惱羞成怒索性唔上。


一路睇西片,好似港產片接近冇睇過,即係唔係唔想支持,你有乜野可以俾我支持呢?愛情片我唔會睇。胡鬧片我冇興趣。賣囡囡戲更加唔會入場。普通動作片等電視播算,因為欠驚喜。唯二睇左係《功夫之王》《赤壁》,但我都唔知呢兩套合唔合資格叫港產片?《功夫之王》冇乜好提笑片一齣,《赤壁》相信要睇埋下集《之戰》先可以判斷拍得好唔好。全年最應該睇,可能係《奪標》《葉問》,而難得我非常有心入場睇之港產片終於出現,就係傳說中之《PTU》續集《機動部隊》,初時以為十二月底上,原來係一月頭,又要等。


ACG縱橫天下令我史無前例地破左一年入最多次戲院紀錄,平均半個月入戲院睇一套戲。09年又會點呢?我好膚淺的,唔使用腦就得,所以在於fans立場好想睇特技乜都好《變形金剛》續集熱切期待。仲有《之戰赤壁2》同《機動警察部隊》。最期待喇喎,肯定係佢啦:





如無意外,這就是個人The Movie of 2009,我對佢期望極高,甚至寄望佢超越到《The Dark Knight》、再一次顛覆整個超級英雄片種,雖然成數微乎其微。無獨有偶,《Watchmen》同《The Dark Knight》「原著」漫畫一樣誕生於1986年,除漫畫也是metal最光輝/最黑暗一年。


"All hail 1986."




Pre:
2008 Retrophrenia
The Provenance
Post:
2008 Retrophrenia
The Provenance
Chinese General I
關心妍《最愛Jade.i》




Sir個網
lau-sir.com

Sirblog
http://hk.myblog.yahoo.com/lausirisual