2008 Retrophrenia
Metal, Music, Merchantry


Chinese General IV
鄧紫棋《G.E.M.》

「你有冇諗過靚妹都可以玩到咁喪先?」



Pre:
2008 Retrophrenia
The Provenance
Post:
Chinese General III
王菀之《Infinity Journey》
Chinese General V
李卓庭《Eunix Mag》






我諗2008年度香港樂壇最串爆,莫過於出左個G.E.M.。香港各大小音樂頒獎禮,早到你我都唔記得唔幾耐以前開始,公信力已經蕩然無存,好少可再有得獎者會大家覺得眾望所歸實至名歸,所以當G.E.M.橫掃08頒獎禮,而媒體加大眾全盤認同佢當之無愧無異議,就可以肯定佢實力超班。最勁同最串在出左名拎咁多獎時仲未夠秤。


資料顯示,因為家族好多音樂家,細細個開始學唱歌,中一已經幾乎屈爆學校歌唱比賽,2006即係十四歲已經簽獨立唱片公司,兩年後考埋會考正式出碟,出完紅成點大家有目共睹,紅遍全港九時先得十七歲至勁嘛。單此出身在現今香港已非常見:四大天王時代後,歌星越來越唔需要識唱歌,以前做歌星係學完唱歌先出黎唱,後四大天王偶像世代變成睇樣揀蟀出左名先返轉頭去學唱歌(甚至唔需要學番唱歌),一直持續至K歌橫行多年之今日情況先有些微好轉,難免八九十年代後,好少見到如G.E.M.音樂世家出身之流行歌手,唔係冇,不過通常死得好快,又或唱得「冇咁pop」如王若琳,而絕少擺明唱流行曲。市道又是原因,廿年前紅歌星賣一隻碟夠食幾年,要「降格」做流行歌手都可以堂而皇之,而家出一隻碟歌手自己可能仲要倒貼,堂堂藝術人音樂家,無名開班授徒都未必咁灰啦,何解要同有冇必要咁屈就自己?會考拎左廿一分但唔升中六,初時以為直頭為做歌星放棄學業咁堅,原來報左演藝學院,拎住廿一分唔讀正規學校而「走偏」,換言之已決定追求音樂/演藝事業 - 當然家景冇番咁上下(相信佢唔差),在香港冇乜可能及勇氣作此抉擇。老實講,而家做歌星就算紅如佢,都未必可以搵到好多錢,或長遠計劃一部份,做歌星只作為演藝事業發展一塊踏腳石,我都希望係噉諗,因為本地市場局限太大,置身耐左必須妥協,最好能做到好似王若琳,從普通流行再上至另一層面,就如隻碟唔係唔好聽,但發揮能夠再大。


聽歌前好難唔先講包裝。就算聽過佢歌先見到隻碟,仍然有點兒反感,因為一向唔妥呢種地道式豪華包裝,成本書咁大咁厚,內附「得意寶麗來貼紙」(唔係佢換著任何歌手做同一樣野,絕對會俾人勁笑怒小),再版仲有game碟送,但相信更多人有興趣,係第一版「學生資料」中「愛吃」一行。咁大份,隻碟先得五首歌,包裝大過音樂本末倒置,但而家香港人係要噉樣至受,就算隻碟得一首歌甚至唔好聽都冇問題,你送野夠多夠大份夠綽頭就得,有乜計?同好在歌得。


「希望唔會俾人笑。我到好後來先知,原來G.E.M.唔止碟名,G點E點M點更加係官方認可英文名,而非Gem。」


就算出EP都相當落本,最後三首歌仲去到洛杉磯做mixing,幕後好多大家熟悉的session名字,雷記梗唔少得啦,理你話佢抄乜抄物,始終香港樂壇唯佢仍有點石成金神效,有佢插手預左歌路會大路過大路,《等一個他》西方流行舞曲式R&B真麻麻,強勢主打《Where Did U Go》才是重點,旋律編曲勁掂,同一首歌晒盡G.E.M.實力要乜有乜。其他三首非雷記出品,感覺亦有點不同,《回憶的沙漏》典型台式慢歌,唱埋國語聽落十分F.I.R.又係好歌,反而另一國語歌《愛現在的我》玩番《等一個他》種R&B,旋律編曲皆欠突出,全EP呢首我最唔鍾意。好在跟住《睡公主》全碟最強救番晒,非常典型八十年代香港流行曲式power ballad,或者你會話因為我向來鍾情八零而偏袒,但客觀黎睇編曲及演唱呢首確全碟水準最高。不過聽埋《睡公主》隻碟玩完,唔多夠喉,主要原因在《等一個他》《愛現在的我》兩首拖累左。EP好多人唔鍾意包括我,理由過份商業投機,當然運用得宜EP精短特質可以變成優勢,如《K sus2》係我覺得謝安琪最佳作品甚至本地最佳EP之一,皆因EP二十分鐘長度得以維持整體質素及完整,《G.E.M.》卻因兩首即近一半歌曲式唔夠變化且冇乜表現唱功,就顯好聽之時間唔夠多。但此純粹不太喜歡R&B的我個人觀感。


學過聲樂就係唔同,聽開model仔唱歌再聽唱家班表演,兩個世界黎冇得比,亦因太耐冇出現學過正統歌唱技巧先出道之真正歌手,無論樂風你鍾唔鍾意、唱法接唔接妥,你點聽都會聽得到比同代歌手高出幾班。打動我心自不然是《Where Did U Go》例牌最後一段副歌後面加番野死唔斷氣扯恆高音勁去夠晒metal(...),而且非錄音室加工live唱到有餘再唱高d長d仲得,單最後個高音,而家香港已經冇幾多個(女)歌手應付得到。噉唱得高音唔代表大晒,唔係唱到就等於一定勁一定好聽,但當唱到高音只係整體實力唱功其中一項加駕輕就熟,而佢絕對熟過現時幾近任何一個女歌手,就係真材實料。聲厚夠氣、音域廣、唱腔變化多、感情豐富、換氣控制得宜,除左低音有時太「牛」如《睡公主》初段(都冇計,女歌手難唱好低音之先天難處),唯一問題或者只得口音。官方資料因先天發育問題致講野漏風,所以咬字硬係有點唔清楚,噉咪幾好,入耳即覺有點唔多順耳,缺憾美更易令人記得、認到自己,善加利用就能成為與別不同之標記,況且而家唔係唱到黐利根噉又完全唔似大陸人唔正口音唱廣東話。可惜香港人向來喜好吹毛求疵。


亦到後來先知道G.E.M.仲算唱作人,好似隻EP五首歌,除左一首之外全部有份作曲或填詞,《睡公主》仲要兩樣自己搞掂晒,未夠勁?話,《睡公主》就係十四歲時贏左歌唱比賽簽埋唱片公司之作,而且原版歌詞係英文,即係其實早幾年出道已經夠街頭帶到街尾,不過俾你地虛榮多兩年啦考埋會考先indie地出黎玩串party你吹咩。感想之一:而家d靚妹真早熟,唔止講外表,想當年自己十幾歲白痴仔一個時仲未識欣賞情歌,來來去去聽同唱都係BEYOND,媾仔/女非常遙遠,只係隔左十幾年嗟,而家就連十六歲靚妹已經唔止唱緊,仲作埋歌&詞講媾仔瘟仔。當堂覺得自己好老。難怪劉Sir一直媾唔到女啦。


對於G.E.M.我絕對支持,雖然歌路唔算我杯茶 - 首首玩到《睡公主》噉就話 - 為佢實力、態度同獨立身份我會撐,亦希望唔好咁快或咁容易簽大label,衛蘭第一隻碟後即極速下沉已是大公司害人一例,最怕佢變成第二個衛蘭,歌越來越大路同普通,有唱功都冇得發圍。一路印象非常正面,不過講近年最愛新人,非G.E.M.




Pre:
2008 Retrophrenia
The Provenance
Post:
Chinese General III
王菀之《Infinity Journey》
Chinese General V
李卓庭《Eunix Mag》




Sir個網
lau-sir.com

Sirblog
http://hk.myblog.yahoo.com/lausirisual