（留意下方之張大導）
星期六晚係演唱會，星期五晚KING'S-EVIL黎到香港，落完機上完酒店擺低行李第一件事就係落吧劈酒（毋用置疑，佢地絕對係100% band友）。果間吧有隊live band表演，個鼓佬手痕走左上台solo。佢solo果時全間酒吧二百幾人望住冇聲出，打完之後全場拍爛手掌係噉圍上去同佢握手同讚佢，本來隊live band個賓仔鼓佬都話佢
"Jan hai holland gain!"
一朝早老細當然係出去招呼KING'S-EVIL，個場就梗係留比我呢ｄ細既搞。十一點幾鐘就上左TRHK拎海報同其他野，之後同阿Rax搭970X過蒲窩，預左會搭成粒鐘所以買左本"PM"（謎之「音樂」雜誌），封面係關心妍但係放係本咸書隔離（好似叫《美麗軀體》），買果時個師奶以為我要果本咸書忝。
又睇下書又訓下覺，真係搭左成粒幾鐘終於到達蒲窩，等埋負責做聲之大哥丞到埋就係重點節目：set台。得三條友set真係超灰，ｄ線亂到爆，又唔夠乜唔夠物，有果ｄ都爛噉幾件，三條友搞到一頭煙，終於明點解人地就算係蒲窩搞細騷都拉晒成隊crew過黎。又或者，因為我地係TRHK同埋係"metal"，所以咁戇居？
三條友set左個幾鐘，差唔多搞掂果時KING'S-EVIL終於到，之後張導演到埋，睇＆拍KING'S-EVIL玩幾首歌，玩得唔錯，係個鼓佬好似冇乜心機打噉。然後HERMETIC SILENCE黎埋，不過佢地綵排果陣我冇得睇，因為果時我帶左KING'S-EVIL去蒲窩間cafe食公仔麵（冇錯係公仔麵），到臨尾先入番去，都睇到少少，唔錯＆好堅，最大娛樂係睇佢地玩孖寶＆泡泡龍。
拍拍下張大導話要食飯拉隊走人（「唔理拍咩，到食飯時間我地就乜都唔理食完先算架喇！」），咁Ｑ大雨仲要上落果條四十五度超斜路，但係佢死都要拎埋部機走唔肯放係蒲窩，真係唔明。可能佢都估到，如果放部機係度，我一定會襯佢走去食飯果時拎黎玩玩到殘哈哈哈。
野set完，音試完，張大導飯都食完番黎拍門口等入場班人。見反正冇乜事幹，搭七就開始入場，真係有幾何有band show會咁「準時」開始呢 － 其實本身可以搭四就放人入去搭半就開始更加準時，反正都咁少人，呵呵。
HERMETIC SILENCE
SUFFOCATION、CRYTOPSY式之old school death / brutal death metal，上次＆唯一一次睇係前年「審判日II」之事，果次睇完係十分震撼，因為係冇預期過有香港band玩death metal（仲要係brutal death）可以玩得咁有水準，果晚對佢地之印象甚至比DEPARTING CROSS更深刻（或者因為DC之前已經被大肆吹捧所以有晒心理準備）。玩左四首歌，整體十分之好，鼓佬技術出乎意料地高，個結他佬真係好堅，非常唔錯。又係你睇完之後會問佢地「幾時出碟？」果ｄ。
台上好恆，但台下反應就．．．
 
| |||
今晚之主角，來自日本之亞洲thrash metal霸者KING'S-EVIL。十分意外地，上到台第一件事係METALLICA式播番段交響樂先，似乎而家呢種開場法成為左潮流，阿阿阿大哥丞幾時到你地DSC搵隊中樂團幫你地整番首開場？場騷有（得？）五十幾人，個個圍晒去台前面，所以個場睇落得三份人滿，可惜有唔少人（特別係鬼）都係HERMETIC SILENCE玩完先入黎。一共玩左八首歌，有六首係舊碟ｄ歌，新碟反而一首歌都冇玩到，另外兩首係由bass佬唱之METALLICA cover "Whiplash"，同埋最後做encore之KREATOR "Extreme Aggression"（歌佬把聲勁似Mille Petrozza，就噉聽真係昆到人係KREATOR玩）。因為老細成日話「琴晚個drum solo好Ｘ正呀！」之關係，個鼓佬就係中間插左一段仔drum solo，唔係真係打到飛起果隻，不過佢諗ｄbeat同pattern真係好好，可能仲有幾首歌跟住唔敢玩咁放卦。整體黎講水準唔錯夾得準同齊，係結他聲可能因為多人關係而散左冇rehearsal果陣咁清同靚剩係一味夠恆（剩係一兩舊地雷仔咁簡單）。個鼓佬rehearsal果時打到好似冇乜心機噉，點知一到live立即醒晒勁好多，係唔知點解好多時都打得好辛苦死頂噉。歌佬都同台下好多交流，不過唔知係佢ｄ英文同腔唔清還是台下點聽都唔會聽得明，基本上除左"Are you ready?"之外無論佢講咩台下都冇咩反應哈哈哈。最正係同場加映之前睇"BC"見到有metal band黎香港立即衝上TRHK買飛之瑞典仔Eric衝上台搶埋歌佬個位大嗌
KING'S-EVIL八首歌加一段drum solo玩左七八個字，九點一二就完場，完場之後到簽名時間反而最好玩，個個走去counter搶poster搵樂隊簽名同影相，大家都玩得好開心，最衰張導演果時走左拍唔到呢ｄ花絮，呢ｄ先至好睇呢。
大夥玩完，老細帶左KING'S-EVIL番酒店，最後得番我同阿Rax執埋ｄ手尾交番個場比蒲窩，噉就玩完。今次KING'S-EVIL演唱會戰利品：
得兩樣咁少？係呀，隻碟我都俾埋張大導，名都冇得簽。今次場騷基本上唔多關我事（不論感覺上定實際上都係），黎得蒲窩基本上咩都有唔多使點樣搞，我只係負責執頭執尾（即係最早到最遲走果個），隊band都只係今日先見一見面，接機、香港一日遊同送機又冇我份，我似係黎睇騷多過似搞騷。
講番場騷。同一日入面有三場演唱會，除左KING'S-EVIL九龍又有一場local band show，西貢又有Levis「媲美外國大型音樂節」果場(pop) festival，好多人（「我好metal」果班同「朋友出騷」果班）一早已經話會去西貢果場，保留估計最少流失左十來個。其他情有（不）可原地因事黎唔到、（仍然係）「貴」、（又係）「冇人陪」、「都唔多人唔夠現場氣氛」（相信呢位仁兄以後唔使睇香港演唱會）、口話冇錢但雙手俾錢買碟果ｄ呢，就更加唔使計有幾多喇。最後有／得五十幾人，有呢個數算係唔錯，雖然本身預期會有更多，因為始終相信外國thrash metal樂隊第一次黎香港，點都有一定吸引力，但係都係果句，講到我都唔想講果句：
「而家講乜都冇用。」（不論係我地還是「佢地」）
至於表演，HERMETIC SILENCE正如之前所言，係達到可以出碟之水準，不過大家都知，身在香港地呢，出碟呢家野，努力賺多年幾／幾年錢搵到筆資金先有得諗諗 － 係諗諗咋，都幾灰。KING'S-EVIL玩係好有質素，不過得個零鐘真係好短（都有人投訴呢樣），係勝在有質素但當然玩多ｄ歌會更加好，就算係cover都好啦（rehearsal果時有玩到KREATOR首"Betrayer"架）。總括黎講，算係不俗的一場。
今日《蘋果》有講到西貢場騷：
「．．．昨日有觀眾電郵本報投訴，指大會安排失當，他們一直等到十時仍未見有人出場交代演唱會是否繼續，遂到詢問處查詢，負責人表示演唱會取消，著他乘接駁巴士離開，誰知原來演唱會仍繼續，大會的失當安排令消費者有所損失．．．」
果位觀眾我知道係邊個，不過睇過果封信之我可以話你知，封信呢就唔止爆／鬧咁少野，態度亦都冇《蘋果》咁溫和。但其實，抱住睇band show之心態去西貢場騷的各位，會唔會係太一廂情願呢？其實睇睇搞手同合作單位、睇睇活動、睇睇cast list、睇睇工作人員、睇睇歡眾，都可以估到，呢一個只係一班唔識搞騷之人搞出黎之pop festival，你地諗住去到可以睇rock/metal/band show（結果當然唔會係），再從rock/metal/band角度去小佢地，會唔會有點兒那個？
又，如果真係想睇rock/metal/band show的話，其實邊一面／邊班人真係有心／有能力搞呢類show，就算唔係明眼人都一眼睇到。即係成日話要metal、話自己點metal，到真係有metal騷，反而寧願揀個結果真係變左睇明星之明星festival，之後又要小人地搞成點點點，有乜謂呢？
星期五KING'S-EVIL到港，星期六出騷，星期日遊香港，星期一走。除左星期六之外，其他一概與我無關，得個聽字。話說星期日晚老細帶左佢地上山頂，行過一間餐廳時有個侍應問佢地
"Are you KING'S-EVIL?"
原來果位仁兄係幫襯開之尼泊爾朋友，佢本身都超想去KING'S-EVIL演唱會，但係請唔到假唯有放棄，本來都好失望，估唔到會係呢個地方呢個時候撞到佢地，相信KING'S-EVIL自己都估唔到佢地係香港都會比人認得出（即係就算我聽慣對慣但係見口見面都未必立即認到佢地個樣啦，可能因為佢地著住自己隊band件tee卦）。之後果位尼泊爾朋友好開心地招呼佢地，仲請左佢地食牛扒 － 當然係貴價果隻。佢好開心，因為雖然miss左場騷，都可以見一見呢班亞洲thrash metal精英同請佢地食飯；KING'S-EVIL亦都好開心，因為雖然場騷反應真係好唔理想，起碼知道有fans真係咁為佢地著迷。
講多樣野你聽，班尼泊爾朋友永遠買碟同聽只揀brutal death，但係差唔多有親metal band出之band show（唔限風格），佢地都會搵錢搵時間去睇，原因好簡單：因為係METAL。 ．．．香港不如尼泊爾？
KING'S-EVIL玩完幾個禮拜，又有band黎香港玩，同上一場調番轉，今次唔係人，係鬼；唔係快，係慢。佢地就係來自澳洲之gothic doom metal樂隊THE ETERNAL，亦即CRYPTAL DARKNESS之骨灰。
我呢ｄ雜卒仔，當然又係負責執場。因為今日得我同大哥丞，所以可以訓多陣十二點幾先起身，之後搭屋企樓下去「香港仔華富」架107，醒喇今次！點知等超耐，搭車又超耐，之後原來仲要轉小巴，仲耐同貴過出旺角搭970X，戇居喇今次！
折騰一番兩點三先到，仲以為遲到忝，點知大哥丞仲遲，不過就算大家都準時到都冇用，因為照規矩呢band房係三點先開得架（但係唔知點解上次KING'S-EVIL反而冇呢條規矩），結果嬲嬲地就走左去cafe嗌左兩個餐蛋麵，
「冇野做唔食多ｄ野點浪費到咁多時間呀！」
叫完之後有ｄ後悔，話就話未食飯但係兩個餐蛋麵喎，剛剛大哥丞黎到就夾硬塞一碗比佢，
「知你未食飯嘛一早幫你嗌定架！我地ｄ細既孝敬你既！唔准唔食呀唔食我喊架！」
食埋麵差唔多三點先有得搞，今次少噉件得兩條友，當然係一舊雲加一頭煙啦，蒲窩ｄ野係亂加殘ｄ又冇噉幾件，不過又唔算太差同埋價錢夠平，算啦 － 都冇得唔算啦其實，即係除左蒲窩，仲有邊度可以咁「價廉物美」地搞metal show？Set到三點幾都未搞掂晒ｄ野THE ETERNAL已經到，本身都驚搞唔切，點知班友砌野超快三兩下手勢就搞掂，ｄsetting仲要超簡單兩個結他佬一個剩係帶舊地雷另一個仲要得隻wah，但係ｄ聲出黎係靚到你唔信，一插就夾得唔使搞咁多野。由黎到到夾左兩三首試音到試完聲加埋都唔知使唔使半個鐘，痴Ｑ線！佢地仲要係今朝早先落機，上左酒店擺低ｄ野立即趕過黎，夜晚就黎料，癲架！
隊野試完音走左去吹水煲煙同食黎到蒲窩不能不食之公仔麵，之後到opening act、香港僅有之幾隊（「幾」即係邊ｄ我都數唔到，唉）doom metal樂隊之一BEREAVEMENT。玩成點就到正場一次過講。佢地都試埋音之後仍然時間尚早，又係一早搞掂晒等開場，真係超快手（噢，我係話大哥丞，呵呵呵）。見咁得閒BEREAVEMENT & FRIENDS（即係BEREAVEMENT+HERMETIC SILENCE+DEPARTING CROSS）班友就用我個名借波打，打打下仲要係我係正側邊親眼目擊之情況之下掟左個波出街忝！好在執得番，唔係今場騷會多一筆「賠番個籃球俾蒲窩」之「不正常支出」！
七點九入人，舖頭到今日先賣得三十幾張都諗住灰爆，大佬，得果三十幾人，真係大家一齊訓係度睇都仲有位剩啦。點知黎到呢度即場賣都成三十，仲有好多係女同鬼忝，生面口更加唔使數好多人我都未見過，當然仲有耐唔耐都會過黎香港蒲頭兼幫襯TRHK之澳門仔三人（如果佢地班友黎晒，應該會有多七八個）。仲有超多人／鬼夾埋買成幾打啤上黎，呢晚個feel有ｄ似開party，哈哈！
BEREAVEMENT
| |||||||||||||||
上次睇係前年之事。睇個名都知，佢地聽左好多KATATONIA，而事實上亦好重KATATONIA味，最後一首就係cover "Without God"。整體黎講唔錯，玩得相當有feel，係鼓佬唔多穩定同支結他好feed。佢地唔係玩得唔好，但係好似潛左水好耐，DEPARTING CROSS都好似係呢場兩三個月前先浮番上水面，活躍之extreme metal band就只有DARK VAMPIRE一隊。香港extreme metal band係咪真係咁難搵機會表演？
Intermission
劉Sir立即飛身將notes即係show rundown乙張交俾Mark：
「自己出騷都唔記得玩咩歌！點搞架！跟住仲要去歐洲表演架！」
「對唔住呀劉Sir！我會改善架喇！」
最後每人腳下一張notes／貓紙，表演終於可以順利開始！
"Lau Sir! You saved the day!
 | 
| ||||||||||||||||||||||
 
| |||||||||||||||||||||||
The Eternal Live in Hong Kong Rundown:
04年9月係THE ETERNAL第一次踏出澳洲之tour，佢地會於九月底到歐洲參加當地盛事"Doomination of Europe" Tour ，去之前獲TRHK之邀，就係過歐洲之時順便黎香港停一停玩一場， 相信佢地點估都估唔到，第一場澳洲外演唱會之觀眾會係亞洲人，仲要係香港人。睇左樓上rundown都知，好多歌成十二首，基本上除左"Commemorate the Misery"同"Harmony of Dissonance"兩首instrumental之外，全隻"The Sombre Light of Isolation"玩晒，最開心當然就係起碼長過上次KING'S-EVIL先。全隊人夾得好齊，根本就係CD水準，係唱法同CD有ｄ唔同比較富張力，而另一個結他佬（高到仆街）負責black腔，但得頭兩首用得著佢。另外結他聲稍嫌遮左琴聲（大哥丞話：「頂唔蒲呀佢地ｄ野！好在較聲果陣冇訓著！專登搞恆ｄ結他聲整細個琴黎整到自己一直醒架！」），但係單靠一舊地雷／一隻wah，同KING'S-EVIL一樣簡簡單單已經好靚聲，實在相當犀利。成場都十分之high，成村人係度猛劈酒（有個勇士仲睇睇下嫌唔夠酒衝落去再執多幾打忝），到話玩"Down"（亦係可以全首download試聽之一首，相信全靠呢首試聽，先可以拉到咁多人），全場即刻歡呼，果然係hit single。或者過左頭兩首大家warm up左，樓下好多人／鬼又劈左幾罐，台上台下都好投入，會郁下fing下嗌位都會嗌下，玩完"Remembrance Scars"（定"Black Serenity"？）之後全場台上台下一齊\m/好精彩，最衰呢一幕影唔到忝唉。玩到一首歌仲有火機忝，好少可見香港metal band show台下班人肯郁同咁投入。樂隊難得在可以keep住水準唔會越玩越比人覺得支力，台下都繼續地high，村友狂劈啤夾埋劈左四五打都有。
 
| |||||||||||||||
玩晒"The Sombre Light of Isolation"之後，先黎THE ETERNAL前身CRYPTAL DARKNESS之"Last Embrace"，而會番玩CRYPTAL DARKNESSｄ歌 － 應該多數係呢首"Last Embrace" － 係THE ETERNAL演唱會指定環節，有個客本身好鍾意CRYPTAL DARKNESS但唔多受THE ETERNAL就係為左呢個環節黎睇THE ETERNAL，結果當然係非常滿意，而最滿意就係睇左場live發覺THE ETERNAL其實都係好正好正！之後到佢地預計下年出之第二隻碟之新歌"Everlasting"，同"The Sombre Light of Isolation"相比，呢首歌較重doom death味，但下隻碟會唔會就係走呢個重型路線就下年先知。最後encore THE ETERNAL個歌佬搵左BEREAVEMENT Vincent上台合唱ANATHEMA "Sleepless"，台下fans真係high晒，BEREAVEMENT & FRIENDS有條友（好似係BREAVEMENT個bass，我都唔多記得）仲上台玩埋插水超正哈哈哈。雖然Vincent都唔多記得歌詞，但最緊要係，大家都合皮，同埋呢一刻之意義。
| ||||||||||||||||||||||||
完場之後又係簽名同影相時間，完場好玩過正場已經成為TRHK騷傳統。今次CD同poster嚴重雙缺，眨下眼就比人買／搶晒，我自己留起果張都比人撻埋，連場入面本身貼牆果張都比人撕埋去簽，折墮到要去蒲窩塊board撬番張poster出黎，不過果張後來都比埋人。最後簽到張"notes"，Avis加May@蒲窩係office又撻到幾張，最後送番張比我忝好開心（雖然最後捐左比舖頭）。全場都狂影相，好鬼死多女仔，隊band同ｄ女都好開心呵呵呵呵∼
「喂！影緊相架！準備得好ｄ得唔得！」 
| |||||||||||||||||||||||
完左之後雞飛狗走，我自然係善後，都唔敢交番個場比人住，點都執番晒ｄ垃圾、煙頭同啤酒罐，入得眼先交場啦。蒲窩果邊ｄ人話「其實呢，個場就食煙飲酒都ban既，但係見你地一入到去個個煲煙又成桶啤酒擺係度，算啦．．．」我都有ｄ唔好意思。
本身見KING'S-EVIL thrash野都噉，今次仲要doom野，隊野又要仲冇KING'S-EVIL咁出名，賣到琴日先得三十幾張飛，都冇預過會好，開頭仲諗住呢場會少人到大家訓係度聽都得夠晒doom，點知即場買飛人數已經等於兩個月黎賣飛總數，好多仲要係新面孔，鬼亦有唔少，女仔仲要佔唔少數，十分意外。除左人數之外，另一樣野係觀眾真係十分投入，起碼會嗌下郁下fing下，好high，好過KING'S-EVIL！最可惜今次張大導冇黎拍，因為無論音樂定係花絮，呢場都會比KING'S-EVIL更適合電視播。
今日係一個好特別之日子，因為THE ETERNAL臨上機之前會上TRHK探下大家，但琴晚先臨時宣佈佢地今日晏晝五點到六點上黎，咁急，ｄ人點知得切丫，結果得兩件咁大把上黎左但都預左。又到今日先摷到原來仲有一大疊海報，但係點大疊都冇用．．．
因為bass佬病左所以一早去左機場等check-in時休息，今日得四件上左黎。全隊band都十分好傾，見過咁多隊band，THE ETERNAL係我遇過最好相遇之一班，禮貌好又好笑又好傾，全無架子真係和藹可親，而且有問必答講乜都得，好nice好正。樂隊表示，香港演唱會係佢地第一場澳洲以外之國際演唱會，佢地話呢場係"one of their greatest gigs"，香港觀眾之投入同迴響出乎佢地意料之外甚至比一ｄ澳洲騷更好反應，最後觀眾同佢地簽名影相同傾偈佢地覺得好開心，因為覺得台上同台下之關係好close。歌佬話有一首歌，應該係"Down"，玩果時見到台下有個女仔跟住一齊唱，最後仲唱到喊。雖然人數唔係話好多，但佢地都已經好開心，因為呢場就係佢地開始以黎最好之一次，而且台下大家真係鍾意同支持佢地，仲有人投入到會喊，好感動。另外佢地話澳洲本土金屬音樂發展都好艱難，問題同情況同香港好相似：本地人都唔支持番本地樂隊，對本地樂隊只識得彈；外國樂隊黎表演差唔多場場爆滿，但係到本地樂隊有gig時台下人丁單薄冇乜人支持，香港呢一場算係多人；睇騷時絕大部份時間台下都係冇反應完全唔郁企定定，所以香港呢場台下觀眾咁好反應同熱情都好開心。人離鄉貴？
再吹吹下水，班友坐晒係地下打躉，個歌佬仲索性訓埋係地下繼續傾。問下佢地平時聽乜，歌佬聽rock、結他佬聽classical、琴佬聽ambient、鼓佬聽jazz．．．總之唔係齋metal，甚至係聽其他野多過聽metal，亦只有聽多ｄ唔同樂隊同風格，先會得到更多靈感同創意。成六尺幾高之結他佬阿Matt個頭係其中一個我最鍾意之metal髮型，簡單黎講側邊剷光中間瘋狂留長，再簡單黎講請參考VOIVOD記唔清邊個成員係"Dimension Hatross"時期個頭或者Jason Newsted '89 Live個頭（佢係忠實VOIVOD迷，所以剪埋呢個頭），更簡單就係睇番樓上ｄ相。佢話佢都好鍾意VOIVOD，但係澳洲時人地唔係認錯佢做VOIVOD而係Devin Townsend。話說有次Devin Townsend同STRAPPING YOUNG LAD去澳洲（好想睇），佢果排落吧經常比人認錯係Devin Towsend（我就唔多明，因為佢兩個個頭同個樣都唔係點似），結果果幾晚佢係酒吧講得最多之說話就係
"F**K OFF!!!"
到六點幾，樂隊要入機場上機終需一別，臨行前送左ｄ紀念品比佢地 － 唔好諗住係ｄ咩貴野我點會識買果ｄ野，只係好行貨果ｄ英文名漢語對照，唔係咩貴野，但係樂隊佢地係可以窮到連呢ｄ都買唔起，因為去歐洲ｄ使費都係要靠自己，都幾灰架話就話樂隊出國表演但錢方面都要就住就住，呢個就係metal之悲哀。所以佢地收到呢份禮物感到非常高興，因為黎到香港總算買到香港地道紀念品（雖然係ｄ行野）：
Ryan
懷：Elegance
仁：Mercyful
James
詹：Advancement
士：Courteous
Chris
基：Foundation
斯：Polite, Gentle
Mark
馬：Horse: Stamina
克：Endurance
知道自己個名係點解，大家都好開心，唯獨係佢：
Matt
麥：Wheat
"WTF? I'm fucking wheat?"
其後，THE ETERNAL樂隊於21/9晚八點半上機，先飛至芬蘭接受媒體訪問，再到同佢地簽約之唱片公司Firebox一遊，然後到英國同荷蘭，並於24/9星期五於盧森堡舉行第一場歐洲演唱會（我地香港好有幸成為佢地第一個於澳洲外演出之地區），之後會巡迴歐洲到德國、比利時、西班牙、德國、英國及葡萄牙演出。有緣的話，下年再會。
最後，特別嗚謝各位，you know who you are。特別多謝比我偷相放係度果ｄ，實在太多人send相比我，事隔多時我都唔記得邊張打邊個，想出番個名的話通知我，我會加番你個名係度。總之，you know who you are。但KING'S-EVIL果場真係冇乜相，對唔住。
最重要就係，多謝各位支持。多謝。