奇show者有兩種解法。一解表演內容出奇怪異唔知點形容，基本上都係正野。二解睇牌面、睇時勢，點睇都唔覺得當事演出真係會有人落本去搞、真係會搞得成。唔使問，你都知呢度我係用緊後者。
其實本身2010三月已經好奇，前所未有地咁多show，加成世人第一次拗柴（拗柴拗到發炎入醫院訓成個禮拜你見過未？間醫院都未見過呀型到），一個禮拜前即仆街正日亦有場相當異類的薩頂頂。抖左成個星期，未行得番晒又再出動過九展睇古幽靈。冇記錯同晚定差唔多仲有場S.A.W.，作為《Saw》fans梗想捧場，不過一來好遲先知已經買左今場飛又唔行得太多，二來見到一隊indie band包成個九展廳玩到咁大，你知根本冇可能會搵到錢甚至回到本，俾我揀都會去捧佢地場，聽音樂之餘亦本住幫手幫補心態。
不過，可能係我蠢左，可以搞到咁大，或者因為，真係咁大。宣傳方面較遜色，係人都知劉Sir超級自閉閉到唔會上網搵新聞果種人，就連個Facebook都唔多理 － 你知唔知我個account最大用途唔係自己用，直頭俾埋我個login同事俾佢地玩Restaurant City同其他game，基本上每日七點前見到個劉Sir都唔係劉Sir？死未！我係二月底好機緣巧合上到TRHK，見到張海報再問問先知道原來有呢場show，二月買飛有early bird平幾十，當時已經得番一日，返到屋企旋上網買張。如果唔係咁無聊撞左上皆旺，相信呢場show會同好多觀塘葵芳gig一樣，過左先知甚至成世唔知。
唔好理宣傳，只睇規模。我諗最搶眼，應該係生之旋律有限公司個大名。真係有呢間公司的（我估）。老實講以公司性質機構搞show唔係未試過，TRHK已經係啦催化同89268都算，不過多涉及外國樂隊，打正「有限公司」名義舉辦無海外嘉賓兼具如此規模indie gig第一次見，而且印象中係第一場由本地gothic metal樂隊做headliner之大gig。除左宣傳籌備非常專業，所有派發物料不但印刷精美，而且同「公司網頁」一樣，今場演唱會有齊中英德日四文介紹，嘩大佬你睇過咁多年演唱會，有冇見過咁誇張先幾百萬大製作都未玩過啦！（眼利的朋友，會在演唱會介紹網頁中，找到 亞視《文化潮流》劉Sir同大家吹中樂vs金屬水特備節目，呵呵）。網頁仲見到大量香港大陸日本甚至歐洲合作伙伴與贊助單位，演唱會當晚深圳有專車接各位同胞直達九龍灣會場，住酒店仲有得打折直頭可以當黎香港旅行，絕對係有史以黎見過最正式最具排場的indie gig，對上一次同樣大陣仗得誇張是05年挪亞方舟。
話說音樂會當日，仍因不良於行冇返工，本來諗過唔去算，因為搭巴士要淘大果頭落車，再行好長馬路加上一條行人天橋再穿德福商場至搭到穿梭巴去九展，好在原來繁忙時間我屋企樓下有架巴士直達德福花園穿梭巴總站。單計落車位置至穿梭巴上車車站頭，平時行過去一分鐘就得，今晚，我行左兩個字，為此特登早左半個鐘出門口。好在有呢架巴士咋，如果要淘大行過黎，早多個半鐘出門口都得。加唔知中途會發生咩事。
「癱左隻腳都去睇show好hardcore？其實冇乜野。網上見過一位外國metal友，佢朋友每次睇show一定跟埋去，因為佢朋友兩隻眼盲晒。盲左都睇metal gig先至係hardcore。特別外國唔似香港逢gig必撞到爆，佢入到去聽唔到野睇唔到人夠晒激。斷隻腳算ｄ乜？」
預得早又遲開場，九展冇野行加想行都行唔到，呃左門口實Ｑ姐姐張凳黎坐。因為早到加一直對住條隊，基本上今場show咩人睇全部過晒目，兩大陣營是一家大細（好多細路），同大量gothic囡囡，個款似睇開metal gig果班人數反而比預期中少。坐門口除左對所有觀眾瞭如指掌，仲間唔中有大陸人同外國人走過黎問「邊度排隊」、「幾點開場」之類，兼任埋場地PR工作（．．．）。八點七先開場，等待期間，門口隔籬有部電視可以睇場內綵排解解悶，亦有個好多大路小路音樂會都忽略的安排：表演前後中間有台後有女司儀同大家吹吹水介紹樂隊講講音樂。衰在把聲加語氣令我諗起幾反感的小儀。
開場前，有樣野要講講：作為一個rock/metal/band迷，我從來冇進入過香港人必修J系，聽完中文歌跳過整個日本音樂界別直接進入歐美。日本文化使然，一種外國音樂進入，佢地唔會一模一樣全部複製，而會針對個別範疇正面或負面極限化，靚的更靚、嘈的更嘈、豪的更豪，聽落似外國野又有獨家性格。問題係唔受一樣野時，J化之後只會比平時更加難接受。在我之情況，從我跳過整個日本音樂文化面向歐美，就知道個人喜好是重型粗暴，年間接觸過之日本音樂，鍾意都係thrash、death同噪音、實驗類band，因為乜都去得比歐美盡利於追求極端，主流樂隊間真正接受只得聖肌魔同SEX MACHINEGUN等比較西式樂隊。換著真正「地道」果班，即香港人捧到爛的視覺系J-Rock，將歐美pop rock同glam放大十倍，我第一日至今日仍然只得兩種感覺：太甜，或者太好笑，後者居多，特別視覺部份，所以到而家我對一切visual kei、日本gothic之類音樂與時裝仍不存一絲興趣，就連LUNA SEA甚至X-JAPAN等必聽級J-Rock樂隊都冇乜聽過，在香港問佢地有乜歌出名可能等同於問BEYOND有乜歌出名一樣咁普通，但我連咁普通問題都唔識答。
而metal中唔計純為商業產生之類如nu-metal及metalcore，gothic metal算我較少聽、較唔鍾意一門，個人要求metal夠重夠力，gothic metal方向正正相反，加上理念中之gothic係七八十年代，即gothic rock同延伸之new wave、shoegaze氣氛同意境為主，實際上所謂gothic metal其實同真正gothic無大關係，所以我認為metal結合偏正宗gothic而家只得TYPE O NEGATIVE一隊（俱往矣），不過咁大聲講會俾人笑加小，當個個覺得gothic就係靚就係女聲就係交響時。因此，每當同香港人講到gothic metal時，我都唔敢咁大聲講野矣。
事先聲明，正因日本主流音樂、日式歌德甚至全球整個「摩登歌德」界別從來打動唔到我，而今場正正係100%追隨日式、「摩登歌德」，而且為人較懶加尋求驚喜，所以入場前冇聽過三隊bandｄ歌對佢地認識接近零，如果有乜野講錯左唔好聽得罪左人，唔係隊band錯，係我唔識野唔識聽嗟。
HEADHUNTER http://www.myspace.com/headhunterhk
你同我講HEADHUNTER，只會諗得起DESTRUCTION歌佬搞果隊德國power thrash metal（．．．），對香港HEADHUNTER印象一直是個urban legend，好多好多好多年前已經聽過個名，但從未睇過live僅限人言，「玩industrial rock」、「扮SLIPKNOT面具band」、「換左／晒人」、「有人話散左」、「好似出左碟」、「轉左玩gothic」，聽過數之不盡流言，就係未聽過佢地音樂（．．．）。有佢地做opening難免對今場有點期待，畢竟香港好少機會睇到industrial rock/metal樂隊演出。
講表演之前，又要先講講場地。九展演講廳冇黎過多少次，歷史一隻手數得晒：好多年前MOGWAI，跟住隔幾年先再黎睇上年年底李卓庭，冇幾耐前多一場MONO，雖然同地點曾經舉行過唔少（我唔會睇的）metal show，今晚至係我第一次黎九展演講廳睇metal。就之前三場綜合，我對呢個場冇乜信心，MOGWAI可能因為級數最專業音響爆得黎唔爛，李卓庭玩pop rock唔算勁拆音響已勉強，MONO果場直頭炒晒，炒到我想寫都寫唔到除左ELF FATIMA唔爆所以最容易鑑賞，沼澤MONO一開拆聲根本唔多知發生咩事，別於平時次次睇完show都長篇大論，到而家對MONO音樂會，回應只得Facebook一句：
「Mono音樂會解釋坐場辦gig有時非壞事：『嘈／拆＝好／勁』仍是本地台上台下常存謬思。」
好多人以為我話band show有得坐係好事，其實我意思係好彩做坐場，只有坐低聽靠前面企晒起身堆人牆吸音擋聲，濾左一重雜音低音先可以聽清楚台上到底表演緊乜，道理與戴住耳筒睇band show同。
今場玩嘈野時有擔心過，第一隊opening又通常身先士卒擔任正場試聲，難以避免不幸，作為工業系programming估相當比重，當結他拆聲一撞電腦就爆，頭三首特別第三相當嚴重台上炒成一碟鼓聲差唔多完全冇，跟住台前幕後先慢慢搵到平衡，可惜同期望仲差一段距離，只叫冇人牆吸音下差唔多坐到全場最後的我接受得到。不過相信得我一個感到唔滿意。就如MONO時提過，「嘈／拆＝好／勁」仍是本地台上台下常存謬思，有陣時唔係人人、唔係乜情景都追求或需要清楚。除左我之外，全場大部份人玩得非常開心。
歌路同我估計差唔多，可以當Manson聽，可能因為我唔係佢fans，興趣未算好大，我成日講單憑音樂，Manson fans數量可能只有而家十分一，其他九成會選擇NIN，HEADHUNTER音樂唔差，只係自己對此類別追求更多變化及電子。另一方面，對唱有點疑惑。好多人經常將industrial同gothic兩樣野混淆，雖然兩種音樂本身有關連，好多工業band亦鍾意著黑著皮著歌德 － 市場要求嘛你睇Manson就知，著得gothic一點就算音樂唔得都可以大紅大紫你著唔著？實際上兩者相當獨立。稱「industrial metal混合gothic」，先入為主男聲會用磁性沉聲唱因為屬於gothic傳統，而呢種「old-school gothic」唱法好易弄巧反拙，一定要夠沉先帶得到抑鬱、歌德氣氛出黎，但本身聲底唔夠厚唔識掌握用聲，係扮都冇得扮一聽就聽得出你係唔得或者變左第二回事。HEADHUNTER歌手把聲，遺憾地令我諗起零霧個歌佬，同樣用聲及氣氛皆未夠配合自己樂隊音樂例子。當然，問題非出於隊band，只係出現gothic一字，就好容易引起我誤解，實際上industrial一字可能才是重心。
玩左六首歌（卦），頭三首大致講過，印象最深果首可能係「I will fucking kick your ass and run you over」，係歌詞黎我諗除左TYPE O NEGATIVE冇人改歌名改得咁戇居卦？雖然司儀過場有講番歌名，已無必要了，一句精警歌詞勝過任何歌名。後半三首較合我意，第四首「少ｄ電子」重左gothic rock感覺，第五首好《水底樂園》（邊個話香港pop冇好野？），歌佬把半沉聲最夾呢首，完場梗玩最極端一首，慢得黎加較多電子同sample，後半場近番我心目中「industrial (gothic) rock/metal」，半個鐘演出正正可以用好壞參半形容。個人愚見，有幾首歌例如第四同最後，加少少女和音會暗好多，另外歌加長就有更多空間玩編曲、電子同氣氛，歌佬方面相信個人問題居多，但希望可以走第四同第六首方向，因為佢把聲夾呢兩種編曲法。仲有樣野，相信冇乜人諗過或接受得到：我覺得佢地應該填廣東詞。多年前BlackWine演唱會後記提過，唱廣東話係香港(metal) band大忌之一，我反而覺得既然HEADHUNTER想做到怪異、陰深，有乜野比唱廣東話更不和諧？（一個苦笑的笑話）再者填廣東詞唔代表唔好，要怪要異，廣東話旋律同文字作得好會幫到好多，《水底樂園》就係個例子。既indie無局限，何不去盡？
「想問問：首『I will fucking kick your ass and run you over』，係咪同梵姬隻碟第一首同一首歌黎？兩隊有乜關係？」
「最後一樣野想講：台左邊紅色結他果位．．．唔掂我真係頂唔順。係咪玩親J野gothic野，彈結他一定要咁也母？你睇過佢，就會明白點解我到今日仍接受唔到日本野。」
NUCLEAR N'CORE N'GINE http://www.nuclearhk.com
全香港indie界可能得我一個傻仔唔識NUCLEAR。我知佢地玩左好多年。我知佢地好出名。我知佢地技術好。我知佢地超多妹妹fans（這才是重點）。但，我完全未睇過未聽過，僅有認識限於呢條「某校勁band」video（重點可能唔係條片，而係下面堆（垃圾）留言，一個點解我好多年前已經唔上唔玩香港forum的線索）。老實講YouTube咁多「某校勁band」片而99%俾人笑或真係唔掂，呢條係我睇過最好的「某校勁band」。但場show之前我一首佢地自己歌都未聽過，有鑑首《金屬狂人》cover唔錯（即使Ｎ年前），加吹到咁恆，點都有點期待的。
既本來乜都唔識，佢地有冇換過人、之前叫咩名，對我完全冇影響，只需要睇好今場就夠。官方消息樂隊改左名，原先叫N'CORE，完全唔鍾意，一來唔好聽，二來可能因為metal被core污染，而家除左grindcore之外，一見到個core字已經冇晒胃口（我唔係歧視metalcore，metalcore係有好野，但事實的確欠水準／冇水準者佔大多數）。黎到會場先知道，原來再改名，叫N'GINE。型好多。亦metal得多。I love this name。
開波前女司儀話NUCLEAR玩左好多年、出過好多show、參加過好多比賽、贏過好多獎，基本上個個成員都拎過「最佳ＸＸ獎」之類，的確唔講得笑，頭兩首歌全部野無懈可擊包括音響，連我對J-Rock、視覺系冇乜興趣都好享受，歌佬聲同唱功實在太強，加鼓佬遞到上天隻左手已經已經奪晒命啦。歌佬解畫，兩首都係NUCLEAR時期作品，俾舊fans懷緬、新fans如我重新認識。識完，發覺我好想聽番睇番NUCLEAR，因為第三首N'GINE時期原創新歌，音樂歌詞都十分KOLOR，冇左標誌性日式反而平淡左，跟住玩番首NUCLEAR《最後限期》又返生。我唔多鍾意日本野，都寧願佢地維持舊路，因為玩J-Rock更得心應手。
我欣賞佢地整體台風同技術，歌佬唱得，結他佬玩呢類野更是無能敵。不過未夠衝台的大大班妹妹仔們咁懂得欣賞。你真係要去目擊一下。實在超勁多妹妹仔。冇辦法啦。你上佢地官網睇佢地ｄ相。睇佢地ｄ商品。睇結他佬英文名叫Fantasy。睇佢地biography入面寫住「state: single」。想班妹妹仔唔發癲，實在冇乜可能。
「劉Sir幾時都話，聽metal，冇前途架啦。拉埋J或gothic時除外。今日起我開始同人講我隊grindcore band係玩J-Gothi'Core。應該好快紅。」
「同埋，喂，點解唔玩《金屬狂人》？唔開心喎！」
古幽靈 http://www.ancientspiritband.com
過左個幾鐘，九點八終於到主角出場。少不免台後女司儀長篇大論介紹，故事大概係噉：1997組band初期玩grunge，後來停下夾下2003年轉玩gothic metal，2009再搵到女歌手Fraise（I love this name again），可以睇到樂隊的命格是六年一閏。而家連女歌手都有埋叫成型，歌路可參考佢地隻single《完美世界》，簡單黎講係（身在香港點避都避唔開的）LACRIMOSA + （而家可能比LACRIMOSA更難避的）EPICA + 六翼天使（音樂底同歌手把聲似佢地頭兩隻碟）。有此配搭（基本上只有頭兩者相干，六翼天使是可有可無的，對香港人黎講），想唔多人／女睇的確好難，反應十分熱烈。有鑑自己對gothic metal興趣唔算大印象唔算正面，特登事前乜都唔聽以免有影響，結果製作同音樂都屬滿意，反而冇預過技術方面較失望。
冇記錯玩左九首歌，加intro同drum solo，其實「官網」有得睇番晒差唔多成場演唱會，懶了記得幾多就講番幾多啦。symphonic metal開場編曲唔錯，但睇到成員間短處：鼓手穩陣，但同時太穩陣，導致大部份時間技術同節奏上過份簡約，與鼓息息相關的低音更甚，一來鼓已經平，而bass向來跟住套鼓做人已經平平無奇，再者就我睇到聽到，bassline好多時只得一條直線接近零起伏，就連全部人靜晒俾低音表演時間，都係只跟番節奏照彈root就叫「solo」，旋律或裝飾音都慳番。此不足非限於intro，基本上節奏部二人全場演出整體都十分平庸，就連中間drum solo鼓手做主角時間，表演亦全不起眼。當節奏部份選擇平淡，難免會對音樂帶黎影響，如需要鼓或低音玩多ｄ花去推高，而分別可能只得鼓踩單bass定雙bass、低音結他root彈八分定十六分，對氣氛改變同升跌帶黎非常大局限。而從現場角度，始終穩打穩紮玩現場點都好過想表演但撻Ｑ累晒全隊，而且，非常老實，接近全部現場觀眾都（只）會留意主唱同主奏部份，有幾多人似我咁無聊針到咁細？
至於音樂，提過今場係single發佈會，演出後已經寫左隻碟，大致已經講晒音樂方面，因為做晒功課，主角反而最少野講。都係果句：你鍾意EPICA、接受早期即係結他多過交響＆男聲多過女聲的LACRIMOSA，就試試古幽靈。因為show前未聽過佢地歌，隻碟事後先聽番寫番，加上本身對樂隊認識不足，睇果陣的確同自己預期出現偏差。其中一個問題，可能係太多結他，當然同樂隊grunge出身有關，但覺得keyboard可以有更大發揮，特別走交響歌德路線時，編曲還是混音keyboard地位理應提升。又可能女聲太零星。或者遲加入唔夠時間寫新歌？睇隻single只有主題曲一首有女聲、真正夾現今樂隊主題就知。現場同樣多數歌只得男聲，用到女聲時只得好少篇幅，從而出現女歌手可以長時間唔見人，到佢要唱時至出現，唱幾句又消失左的奇景。搞到女歌手好似只係客串。
只玩左九首歌加個drum solo個零鐘左右，可想而知的確唔夠歌。印象較深都係近尾，冇記錯排第七的《The End》評論single時已寫過，首歌live玩發揮空間大得多，要玩氣氛要做到歌德感覺，利用keyboard或者玩effect結他再走慢板一層層建立自然事半功倍，最後全隊一齊爆時，唔止keyboard終於發揮得到，鼓手都係。首歌之前有段drum solo，只叫比打歌時好一點但只有咁多（我更想睇NUCLEAR drum solo呀點解冇！），《The End》最後反而更多野聽／睇。重點的主題曲《Perfect World》擺最後，因為冇encore，可以當呢首就係encore，暫時最成功最完整，恆得黎編曲豐富同有女聲，但花左長時間先捉到路，要等到下次再有完完整整symphonic gothic metal作品面世，或者要過多大半年。另一點要改進，相信好難：同HEADHUNTER一樣，主要問題出於男聲，必須略沙略沉先有感覺，而且用果隻腔都要有果種嗓先得，而香港冇乜男歌手把聲夠沉夠磁性，至目前為止聽過之本地（偏）gothic樂隊男主音，都只能達到模仿真正gothic男聲唱法層面。要在香港組gothic metal樂隊從來唔容易，因為男女聲都難搵，而搵到適合男聲難度更高。今場有點掃興正因此，我對Fraise把聲頗有好感，厚得黎夠凍，似gothic metal需要種女聲，但出場機會十分少，壟斷是未如人意男聲。都係果句：女歌手太guest feel。搞到有點唔知點對待佢，同對待成隊樂隊。
玩左大半場，有個靚女上台獻花，再同古幽靈各位隊員抱抱。睇真ｄ，原來係Oli姐。
「搞錯呀！想當年我仲留守皆旺TRHK，睇左舖咁耐都冇，我又要！．．．咩話？我次次上親皆旺都食晒你ｄ朱古力同餅乾？區區少少野無謂計啦．．．」
不過，亦全靠Oli姐，先拎得到呢隻絕世珍藏紀念版：
唔太常到九展睇show，其中一個原因係出入麻煩一定要等專車，去時排隊排餐死熱天仲大件事封閉式車站人多車多焗到四十度都有，後來我已經索性唔熱唔落雨的話寧願花四五個字行去算；走果陣又大鑊，你知每次睇完show必定十點幾十一點架啦，個個都想快ｄ返屋企沖涼訓覺趕第二朝返工，唔想等車要同人地鬥快。隻腳殘晒，今次算喇唔敢同人爭，豪三條截架的士算數，相信空前絕後只此一次，成日噉真係豪唔起。
回程時，對今場音樂會好多思考。雖演出方面唔算滿意，製作不得不大讚，事前從未黎演講廳睇過metal show，能夠比較只有性質最接近之Eunix － MOGWAI同MONO根本擺到明推到爆喇叭先收手講都冇必要啦？擔心在於，確實冇乜聽過演講廳搞聲搞得好，以前多場之迴響 － 包括現場聽眾甚至表演樂隊本身 － 都對個場搞metal show彈多過讚，因為場地本身不論坐場性質還是音響效果都唔適合搞嘈band show。或者先入為主，結果出人意表，除左身先士卒的HEADHUNTER，N'GINE同古幽靈做聲非常好，比上次李卓庭更清更靚，加上音響之外舞台設計同效果同樣用心去做，音樂及表演失左分，以無大單位支持獨立製作黎講，仍是一大成就。
但有樣野其實我唔太明：點解會選擇九展演講廳舉辦今場音樂會？就算得罪都請容我講一句：經驗所見，香港地indie band特別metal界別中人搞咁大，往往係過份高估市場大小同自己叫座力，唔需要講其他人，好老實講TRHK咁多年黎任何一場都係例子，除左完全免費入場的６六陸，同埋全靠$70張飛先請得郁各位大帝之DISAVOWED，其他大多數場都過到一百人，但實際上要應該全部開支同樂隊支出，需要多一倍以上人數。所以我非常理解香港人或稱大老細心態，冇人搞show時嘈，搞時又要鬧點解冇乜band、點解ｄband唔出名，賣飛貴少少又要鬧要杯葛、冇出名樂隊過二百蚊一場已經少左大半人入場．．．總之對住口講「支持地下音樂」但出錢出力免問的香港人，搞show只有灰字。街外人更加唔使講啦，冇聽開又唔係識你，真係冇乜可能無端易事俾你拉得到入場。
只係局內人仍然冇幾多個睇得通透，見過太多搞手特別樂隊，好多時一搞演出，往往有幾大搞幾大，覺得入座率必定夠高回到本甚至賺到錢。現場觀察過，對今場財務非常擔憂，因為條隊剛開始成型得幾個人時我已經坐係度望住，放人入場時大約七八十，包括提過之大人細路，相信唔少係家人親友捧場，唔敢講八十人當中俾足價錢入場者有幾多。當然實有人遲到，始終禮拜五晚搞唔係個個放得切工，加上sad but true香港band場文化，「我係黎睇邊隊」選擇性入場人士亦非罕見，N'GINE同古幽默表演時間，相信場內人數過唔到二百，應該都比開場時多一倍。以此人數計，即使全部人俾錢入場，相信仍不足以回本。而metal比其他類型難做，除左市場本身細得多（假使你唔係走metalcore等當打路線），香港metal缺乏一種社群性，詳可對比香港hardcore，點解每次有香港著名core band例如門生表演，台下往往輕易企滿人？因為hardcore著重社群性，一方出手，百方支持。而metal向來偏回音樂本質，但香港地一向冇音樂大家都知，metal只是一股潮流。所以，身在香港搞metal show？相信幾難叫得郁「都唔係邊一種／邊一隊」、「唔識唔出名我唔睇」、「外國band至搵我」果班入場。
結果就係，好多時搞手想做大function、樂隊出碟想幫自己做勢，覺得一定要排場夠大至顯得有體面，自不然落重本租大場做宣傳，預期只要宣傳攻勢夠強，就可以谷到坐滿大半場，場面可觀之餘亦能帶來不俗收入。最後．．．我諗案例過多，毋需再特別帶出。疑問在於，其實需要一個可以安置二百至三百人，場地設計更適合做band show，同時可以大幅減輕財政負擔之場地，香港雖小但亦非冇其他選擇，例如蒲吧。為何一定要選擇九展演講廳？是否因為多外國出名metal band表演過，令香港metal界視之為一個聖地，覺得上過同一個台板表演，先代表自己已有一定江湖地位？仍百思不得其解。
點都好，有見《Perfect World》首歌比舊作完整得多，對大碟同下一場有點期盼。依然覺得只得single就辦咁大場音樂會係個錯誤決定，因為玩晒全部新舊歌仍然唔夠歌，今場就係靠開場兩隊支撐，音樂會先不至於太短，倒不如花時間寫多幾首歌同錄音，做好成隻大碟先搞一場大型演出。如今single出左就做左一場，蝕左頭威之餘亦有點勞民傷財。出到大碟請多開一場release party，我唔介意翻炒N'GINE做opening，但非必要唔好再搞九展喇，規模從來唔一定同質素掛勾，而且我冇睇過幾多場冇明星級樂隊同外國樂隊撐場的本地indie metal gig過到二百人入場。同宣傳一定要大大改善。仲有：唔會等好耐卦？睇番樂隊六年一閏命格：1997>2003>2009>2015．．．