一公佈已經十分地有興趣，都係兩個禮拜前途經先至買飛，算遲，都買到第三行近中間位。入到香港藝術中心，第一件事係上89268（人地開完一間又一間），想執番假音人隻碟，但兜極都唔見，睇檔個姐姐仔又煲電話粥，最後都有執野走人，但係係執Ahy（．．．），一俾完錢有個人入左黎，黎手就摷到隻假音人即鎊走人。灰爆。

睇黎今次假音人（之陳浩峰）演唱會非常之成功，全場爆滿，而且男女老幼齊晒仲有唔少老野，一開場已經嗌到九彩。其實點解假音人會咁受歡迎？因為陳浩峰。噉點解陳浩峰會咁受歡迎？除左因為演技，仲因為佢把聲，實在係非常之七八十年代，仲要真係好鬼假音，台風造型完全係小黃耀明，真係好另類口味，受就會好受，唔受就真係好難受，假音人／陳浩峰外界評價咁極端，就係因為呢兩樣野。既然場騷叫得K唱會，就講到明係唱K哥，冇錯，就係玩勁歌金曲，古巨基果隻，唔止玩cover，仲要玩埋medley，睇呢場騷就好似聽陳百強、梅豔芳、羅文cover番而家ｄ歌，把聲唔差但唱法實在好舊同好多假音，除左唱好多'7890年代女人歌，自然有唱近排假音名曲《浮誇》，坦白講，聽呢首歌，有一半都係為聽最後假音加尖叫位，假音位自然冇乜難度，但嗌位變成降key長假音，有ｄ失望。編曲亦真係非常「爵士搖滾」，有爵士，有搖滾，連後搖滾都有，中間有一首結他佬一彈已經知會有事發生，估唔到可以將一首老歌改編成post-rock，仲可以玩得咁好，唱完之後先到戲肉，歌佬走入後台回氣，全隊加兩個keyboard即時爆到九彩，一心黎睇陳浩峰的話呢一刻會唔知做乜，因為冇野睇、冇得唱、冇得跳、冇得fing，我就超超超超超enjoy果一段。實在玩得太好。就正如某資深樂迷所說，「仲玩得好過本地某隊post-rock band。」呢一點，我（絕對）認同。中間有玩黎明，除左一半人起身狂嗌之disco medley仲有jazz cover版，坦白講，實在玩得好過Janice，無論編唱，但亦睇到呢場演唱會有少少「誤導」，雖然係借假音人個名，但實際上成隊band真係冇乜突出過，搞到好似借假音人個名吸引人，因為實際上全隊真係得陳浩峰一個似番表演，兩個guest樂手仲搶過晒佢地，一到「爵士」之部份結他佬同個bass已經差唔多可以坐定定休息，而且兩個guest真係實在太勁喇，玩jazz果時一個double bass一個鋼琴，玩幾首之後交換，點知換左之後玩得仲勁。吹脹。

場騷實在好正，夠多元化之餘，難得台下好投入，全場聽到超high，成半個場起晒身又跳又叫（真係一半，我左手邊個妹妹仔嗌同跳到好似睇緊黎明演唱會噉，右手邊個阿嬸就訓左大半場），實在難得，除左因為香港觀眾都會噉樣做，仲因為政府場好少可會發生呢ｄ事，當年高山六翼一衝台就有事即比人嘈。只不過似乎香港觀眾都唔係演唱會常客，其實編曲同表演方面落左唔少心思，有好多位係做黎比觀眾嗌（好似停位、靜位），但結果次次台下係冇（乜）反應。但比起其他睇過之本地演唱會，呢一場已經係非常非常好。嘉賓呢家野就自然少不了，本身都冇諗過自己會咁好彩，就係咁符碌撞到PIXEL TOY！本身冇乜期望會睇到佢地，諗住睇到楊千嬅、林一峰架咋，點知就係咁蹺遇到佢地做嘉賓。但好可惜，都幾失望，因為冇玩電子野甚至冇玩自己野，男先出黎同假音人一齊唱一首，女再出黎自己solo一首，唔係唱得差，只係揀楊采妮首《不會哭於你面前》，其實幾失策，因為呢首歌其實幾悶，唱live唱呢首，反應真係唔係太好。之後繼續勁歌金曲，實在係太玩野喇，編曲真係一流，好多位好巧好妙好絕，人地係一首一首連，佢係一句一句連（好似某網上流傳勁作），難得歌佬要嗌定唱定假聲，從到唱到尾唱足兩個鐘都keep到冇失聲，真係勁，到最後encore得一首，唔使講啦自然係《勁歌金曲》假音人版，玩串歌串到連歌詞都順真係無話可說，當連《他約我去迪士尼》都玩埋，你仲有咩好講？只不過玩太多古巨基，耐唔耐就會彈句「做隻貓做隻狗」，反而玩到有反效果。睇完之後，立即想查番到底幕後製作同音樂總監係邊個，因為真係太太太太太好喇！雖然似某ｄ歌手，都係玩「勁歌金曲」同玩cover，但睇完呢場都知道已經贏晒，唔係因為人地唱唔得或者幕後班底唔得，而係你玩得主流，一定唔敢玩到咁癲咁放，所以抵呢場演唱會成功。除左音樂，舞台又要讚一讚，好簡單但好有概念，燈光同影象更加係一流，無論setting還是控制都非常高水準，視覺同聽覺效果一流，個場聲同畫都靚到震。個場真係一流。冇錯，個場同音響真係好緊要，所以點解當年六翼天使要揀高山劇場搞，仲要使咁多錢搞音響同燈光。但大家唔會理呢ｄ，因為大家有得睇就得，同只會理$230。香港觀眾，素質同要求始終仍低。

門口寫長兩個半鐘，但實際等半個鐘，玩兩個鐘，都夠晒晒啦。有得睇多次一定睇，兼再買貴ｄ飛。