獨樂秀



獨立字頭大show,去到城大演講廳搞,個場超靚音響又落本,好有迷你版高山感覺,有得坐好開心 - 雖然話係band show,但睇完場騷發現,呢個坐位場可能更適合呢場騷之觀眾?因為噉先照顧得到玩緊隊band唔like又煲完煙唔知可以走去邊之朋友有地方坐住等下場,同等各位fans影相影到筋疲力盡時有得坐低抖抖?


VERY APE
呢班日本仔個名聽左咁多年,今次先係第一次睇。唔知點解一直以黎覺得佢地會係化晒KISS妝上台玩到好喪果隻(...),點知原來都幾正常。玩左一首歌先入去miss左少少,但淨番果兩首已經令我好滿意,音樂同台風都非常鍾意!起碼唔係企定定玩有好多郁動先。
要等下一場live,同埋隻碟。

HYPONIC
好坦白講,今晚黎之兩個原因其中一個就係睇HYPONIC,幾年未出過騷加埋隻超成功新碟,呢次實在係唔可以miss。為佢地而黎呢場騷之人唔少。多左DAS阿華做歌佬,相信黎緊會唔少機會睇佢地live。因為首首歌都好長,所以夾埋先玩得三首。第一首DEATH cover "Philosopher",唔算太突出;第二首新碟歌"Hymn to the Dark",論歌呢首係好無敵(其實成隻新碟都好無敵),但始終呢類音樂香港黎講算係太新型,似乎要用多d時間同機會揣摩用聲,一向好鍾意HYPONIC tune到好似guitar-synth果隻lead結他聲,但太薄太幼出唔到,rhythm隻聲感覺上太散而且同lead唔太夾,做唔到大碟果種噪音同迷離感。最後一首係《眾神復活二》之"Metamorphosis",我覺得呢首開始HYPONIC先真正黎料,慢同迷得黎doom death番d,以呢個場之音響,似乎最適合呢首歌,整體黎講最鍾意亦係呢首。
或者期望太高又或者音響問題,呢一次HYPONIC live,冇想像中咁驚天動地。

BLACKWINE
佢地係我見過第一隊有自己條crew、玩之前有人幫手set野之後有人幫手執野之香港band。四首歌三首係《追夢》d歌,只得一首新歌,之前上網睇video已經睇過呢首慢歌,唔算特別,但有新歌總好過冇。雖然我寧願睇番以前成日玩果幾首新歌,因為我覺得《追夢》之後d歌先真正算黎料,同埋果幾首好聽&好睇得多。而且,真係等緊新碟。所以居然連以前果幾首新歌都冇玩,確係有d唔夠喉。
如果歌佬認真番d,不論唱還是演出,會好得多。(呢樣野好似每次睇完BLACKWINE live都會講,亦係好多人口中所講)

NOTHING NONE
佢地係我見過出親騷都超大陣仗、set野時間最長之一隊band(好在呢場有勁敵HARDPACK),同埋係唯一一隊試過好多次為左出騷而專登請假之香港band。
"SOILWORK!!!"
一開波以為。點知原來淨係得個intro係,之後都係舊歌,兩首自己歌三首cover,"Paradise City"+"Cementary Gate"仲有另一首新歌DEPECHE MODE "Enjoy the Silence"(可惜都唔係自己歌)。揀呢首唔知係咪因為聽多左瑞典melodic death野(註:DEPECHE MODE係瑞典melodic death轉型發展時之其中一個重要影響)。唱得再好左,但輝爺打鼓始終太斯文,beat好但冇乜火。同埋郁多d會好d。除左HYPONIC今晚就係專登黎睇閉關咁耐先出番黎之你地,但係,
「喂!搞錯!又冇新歌?」

**********************************************************

上半場頭係rock&metal,亦即下半場係punk&pop。所以NN玩完之後,走左一班人,入番一(大)班人。好「交更」feel。

**********************************************************

觸執毛
呢一part開始,台前開始聚集fans。呢樣野上半場冇乜發生過。 成場騷反而最鍾意睇佢地!玩garage punk夠玩野,但最鍾意都係佢地恆到仆街好似AGNOSTIC FRONT一味死去果d野,同埋個歌佬嗌到仆街。唔知點解一路睇特別係好grind果d位,覺得好似睇緊CEPHALIC CARNAGE玩緊live不過popd咁解。班友台上面就係玩得咁癲。另一咁鍾意佢地之地方,係好鍾意個鼓佬好有力之表現。睇rock show lived鼓佬始終係要打到斷手噉款先好睇,誇張一回事但真係睇得開心,同埋要噉樣打法先打得出果隻聲。呢一樣野,之前四隊同之後三隊都做唔到。
敗筆係最後掟結他&甩結他。好在有crew幫手執番野,唔係玩完走入後台隔一陣又要走番出黎執番d結他,就真係超樣衰。(好似上次MOGWAI live ELF FATMIA噉)雖然係好鍾意觸執毛呢part,但當最後一首見到結他手飛結他,真係有d忍俊不禁。我始終唔多受呢種玩法。
又,見到玩完會有crew幫手執野,先知道原來而家crew呢家野咁盛行。

ATTENTION TO PISS
台前再多dfans。歌好正,好識搞氣氛,亦有一班熱心fans跟足,所以聽同睇都好正。真係好鍾意佢地寫d歌。見到佢地可以一面彈一面飛黎飛去,就覺得玩(extreme) metal都係灰,玩親永遠冇可能咁活躍:有幾多結他手可以一面彈住"Angel of Death"一面好似班punk友噉飛黎飛去?就係因為冇,所以好多人睇metal show都覺得台上面個個都係企定定唔郁,好悶。

HARDPACK
台前最多fans就係呢個時間。雖然係第一次睇,但一路以黎聽到好多人提,都知道呢隊band當紅,睇睇今晚見到dpunk友兩個有一個著HARDPACK tee、連ATP出騷時都要著住HARDPACK就知。玩d野似GREEN DAY,好聽,但我真係同HARDPACK冇乜緣。同類音樂的話,我會鍾意ATP多好多;講搞氣氛,同樣地覺得ATP搞得更好,雖然台下絕對係HARDPACK出果時最high,又倒水又撞又插水連女fans都插埋一份。但點紅點high都好,我鍾意ATP多d,但最鍾意當然係觸執毛。我都係鍾意dband較有style同較玩野。
睇完就明,點解dpunk band一定要下半場出。要就番fansd放工同作息時間嘛,早出騷的話dfans趕唔切黎捧場就唔好啦!反正metal band都冇乜fans咪放頭!

KOLOR
「我地係玩pop!」
我好鍾意的開場白。台前fans仍未散去而且只有更多,難怪呢隊臨記Sammy之all-star band要放最後。絕對要承認,Sammy確係好型。玩d野有d似BEYOND/黃貫中,雖然聽番黎之評語係結他技術唔錯,但我反而覺得冇乜野聽/睇,唱先係成隊最出色一環。歌我鍾意,唱同詞更鍾意,但一路睇隊band玩,一路見到台下做最多係...影相。坐我隔籬果兩位女fans - 仲係係好鬼靚果隻女fans - 從頭到尾影不停影完呢邊又走過去台另一邊繼續影。d((靚)女)fans影相影得好開心。
「呢場騷話比大家知,玩metal,冇前途。要有((靚)女)fans,千祈唔好玩metal。因為metal永遠做唔到pop同punk吸引大眾同受歡迎之處:鮮明同開心。Metal正正係呢兩樣之對立面。所以玩親metal,都唔多使旨意會有好多((靚)女)fans。好簡單:你覺得一個正常女仔,會接受doom metal多d,定punk多d?」


八隊玩完,十點半圓滿結束,呢場騷非常成功,而且真係隊隊band都好睇都鍾意。好耐未睇過騷同咁好睇之騷了。下場大騷唔知係幾時?

除左場騷,仲睇到好多野。睇睇台上,睇睇台下,又同搞手吹吹水,有d香港band show特有現象,咁多年都未消失過 - 或者有改善過,但未消失過。呢d野唔止呢場騷,係一直以黎到今日呢場騷都見到:玩果班,呢隊band唔妥果隊band,hardcore/punk果dband唔妥metal band,metal自己本身又係呢隊唔妥果隊,原因不離「唔識音樂懶型」、「囂/串」、「多(女)fans」之類,但身邊比人鬧「懶型」果d音樂態度往往認真、身邊比人鬧「囂/串」果d往往比人更踏實、低調,高調同浮誇反而係出聲鬧人果班(我識得比人排擠得最勁果班,係冇乜邊幾隊會同工作人員講「唔該」同「多謝」,反而大大聲果d唔係全部有呢種修養同禮貌)、比人鬧「多(女)fans」果班往往比大大聲果班更多(女)fans(大大聲果dband出黎解釋:「佢地唔係因為夠星味夠型都唔會有fans,我地係因為玩得好唔夠靠星味靠型多fans!」);搞果班,搵得呢隊又唔敢搵果隊,果隊應承左出騷又要放棄另一隊,有果一類band,又唔可以搵其他另一種band,咁多問題,就係因為頭先玩果班果d問題;睇果班,又一個永遠的不解之謎,亦係一個典型香港band show現象,台下班人永遠係車輪轉式噉轉,台上一隊band,台下一班人,台下另一隊band,台上另一班人,又或者自己識果隊玩完就走人,到另一隊band自己識先入番黎睇,有d似流行演唱會d廁所位(band show呢d叫煲煙位),甚至有dband出騷果時,會有另外dband吹雞拉隊走人(呢樣係我聽過最神奇之地方:大家都係出騷睇騷遮,使唔使咁大動作呀?);同一班人,對住自己識果dband時會嗌會撞會郁會跳,但當台上係自己唔識既band,就算台上玩得點high點恆點好點勁,班人都唔會有反應 - 又或者好似頭先所講,自己唔識果dband上台果陣時,可能出左場外煲煙或者已經走左人喇。真係可以用睇報紙娛樂版之心態去睇band show,雖然呢樣正正係搞band show同睇band show者所抗拒。但事實上確是如此有趣。到底去"band show",係去睇band定係睇show?自問唔係睇過好多騷,但睇過之咁多場同聽過討論之咁多場,都係屬於前者。