演唱會之後會花時間回顧的朋友從來少之又少，一來乜而家仲有人咁得閒寫咁多字咩影相打卡才是皇道嘛，二來直到今時今日講香港gig仍然屬高風險行為，尤其涉及大band時，講錯一句好大機會成為被批鬥目標 — 最少對我黎講係非常普遍之遭遇，就算係對住大家好熟平日好開心見誠的樂隊朋友講事實，下場好多時都係變成得罪人。所以，雖然相信一如以往於獨立音樂界中工作之十年，冇人會認真對待甚至冇乜人會睇（「劉Sir？邊撚個？」），廢事又唔知點解得罪左人為保個人平安，在此申一申利：

「個人之見，不喜勿hi。愛之深，責之切。」

Kolor係其中一隊我最欣賞香港獨立樂隊，所有大show可以出席必睇 － 細show要同全城妹妹仔爭飛，太具挑戰性 － 而佢地個名加Rock Motel已經係音樂同現場演出質素之保證。但今場有點自毀招牌，單入場安排已非常唔理想，七點半去到九展已經排到一早兜左八樓成層大個圈條龍個尾，已經叫好架喇因為原來後面仲有另一條隊最少幾十人。冇冷氣加有點陰森的八樓迫左大半個鐘，八點四五終於入到場，已經錯過左開場加大半首《天地會》，我諗後面另一條隊入到場時可能連陳淑莊都見唔到。我明今晚真係好多歌好長所以要準時八點三開場，同第一次搞二千人演出實會面對好多難處，都希望可以按情況提早放人入。遺憾是，我真係好鍾意《天地會》。

為左容納近二千人，今場選址九展七樓宴會廳，已經有預感會出事，因為個圓形場本身根本唔適合做音樂演出聲音好易撞到朦晒散晒，睇演唱會咁多年音響燈光最差幾次唔係任何cheap場細場，而係同一個宴會廳搞。係冇預到可以咁大問題。先談音質：現場演出最需要層次分明同適時突出，今場樂器除左鼓清晰少少其餘全部過份壓縮，好多歌應出之部份如solo都唔突出又或拆晒聲，只有慢歌情況好少少，所以全場最（唯一？）舒服係unplugged部份。無奈是平常演唱會往往初兩三首處於摸索階段音響效果較差，按現場觀眾情況調整之後就會靚聲，今場反而大部份問題一直冇解決過後半場甚至有點惡化，去到《費城實驗》一連幾首快歌明顯比之前同類歌破爛朦朧。最疑惑是，其實有冇音響？我企全場正中間，正正台前主人群後面位置，感想係成個場好似只有台聲而冇場聲，所有聲音全靠台芒傳出黎而觀眾範圍冇任何喇叭一樣，身處現場睇卻有睇緊Youtube的感覺。

講到音量，更灰。平衡做得非常之差，歌佬唔知係咪用無線咪關係收音收得非常細聲，三枝結他一齊開distortion已經聽唔到，大半場聽唔清楚佢唱乜，當連歌與歌中間清談部份情況一樣，就真係好大問題。最慘係前面都講過樂器聲亦唔係做得好，solo時唔推大快歌又成日爆低音同鼓聽唔清riff，未能拉上補下。Kolor + Rock Motel今晚之前未試過有任何一場自家製作如此失準，但當掛住佢地兩個已是本地名牌之Q嘜寶號、以一場如此大規模演出而論，黎到現場居然有可比bootleg質素之製作，就真係我不能接受.jpg。

前述到之無線咪除左音響，亦直接影響到演出效果：因為演唱不再局限於台前一／幾個定點位置，歌佬表演時可以自由行動，但唔知係咪為遷就攝影機，好多時會企同觀眾相隔一段大距離之台中心，而宴會廳其中一個大缺憾係舞台太矮，唔企台前幾排或最後panel梯級位根本乜都睇唔到，成場聽到身邊最多人講除左「大聲Ｄ」就係「行前Ｄ」。另一個大問題係，因為可以四圍走點走都得，歌佬好多時會走到台後其他樂手同佢地對彈，相信只是無意識舉動，但台大而矮唔企最前好多人都望唔到，加上前面提過場內只有台聲而冇場聲，有時搞到似樂隊自己想happy多過一場公開表演。為彌補場地限制用到螢幕轉播，同樣未如人意，除左大多數機距離舞台太遠加拍／播唔正重點，器材仲好似有唔少技術問題．．．

演唱會主題係「樂隊唔係潮流係運動」，仲有樂壇同娛樂圈、創作artist同呃飯食artist之別，好多我都認同，但綜合成場演會觀眾舉措，實在好難唔嘆氣。去睇演唱會，有四樣野我好憎：

1. 刺耳過啟德時代飛機聲的妹妹仔尖叫

2. 大班麻甩佬／仔係又嗌唔係又嗌唔知想做乜

3. 在最不適合場合亂叫，例如唱慢歌時、主人家講野時、台上想同台下嚴肅交流時

4. 在任何非流行演唱會e.g. rock gig進行收上任何舉動

上場「Now Loading」演是一流但中間有點悶場，因為當其時創作風格「太情歌」，令個別環節落差太大。新EP歌路我非常鍾意，今場整體選歌都屬於想聽的Kolor金曲，即使唔知係咪場租關係舞台音響燈光器材等各方面明顯不及上兩次大show，亦全無嘉賓或豪華服飾或巧妙改編（唔係因為準備時間精力不如前卦？），演出毫不花巧地簡簡單單按原版演譯，仍然好有潛質超越「Now Loading」，但客觀因素之負面影響實在太多，個人黎講極其量只有合格水平。同睇完「Law of 14」，我感想係樂隊有點未知自己跟住想點：「Independence」正式踏上獨立之路，舞台製作、音樂創作、嘉賓陣容同樂隊狀態全達顛峰，造就一場最完美香港indie gig，我真係冇睇過幾多場香港獨立音樂會及得上；「Now Loading」則帶革命色彩，顛覆在俾大家見證到一隊獨立樂隊加一個小型室內球場，都可以造得出一場不輸紅館水準之超班演出，扣少少分除左「太情歌」，仲因為冷氣死左。今場我個腦只不斷想像出一幕，樂隊開會時，共識是

「我地出左新碟係時候開返場release party，既然名氣夠高fans人數夠多，可以開大場喇。」（唔好打我）

樂隊提到今晚有千七人，下年會搞場三千人演唱會，其實唔難，如果唔係同一晚農夫搶左Star Hall（好可惜最後開唔成），今晚由Kolor開Star Hall未必爆唔到。只不過其之一請好似上兩次，搵一個鮮明大方向；其之二場唔係要大，而係好，包括聲好同台好（其實仲想講觀眾好，不過相信好難），正如「Now Loading」，球場仔擺一千人都冇，氣氛卻絕對大贏「Law of 14」。有幾多套衫、有幾多嘉賓，我實在唔志在，只要最基本的音響同埋音樂做得好就夠，正如樂隊所云，音樂理應同娛樂分開，本質內容比其他所有都重要。

好喇，講完，希望出街唔會點相俾人打，又或俾人洗板。（「驚咩丫劉Sir，老幾呀你？識你老鼠咩」）

Show Review Archive:

Kolor Independence Live 2010 (6/8/2010)

http://lau-sir.com/music/projects/shows/kolor_independence_live_2010.html

Kolor Now Loading Concert 2011 Day 1 (23/7/2011)

http://lau-sir.com/music/projects/shows/kolor_now_loading_day1/kolor_now_loading_day1.html

Kolor Now Loading Concert 2011 Day 2 (24/7/2011)

http://lau-sir.com/music/projects/shows/kolor_now_loading_day2/kolor_now_loading_day2.html