C x Brix Works Ltd. Presents:
Ken South Rock x 怒人 x AAW



嘩好耐未上過HA睇show喇,記憶中今年第一次上黎(嘩對上一次有冇半年前),仲要好上唔上揀正做展覽一排上半年最忙日子先上,我承認雖然Ken South Rock已經好正冇得唔睇,但唔係有怒人都未必咁神心一放工立即灣仔飛過黎,大佬擺fair好支力仲要一放工立即成個飲樣噉趕車過黎睇完第二朝又要晨咁早起身過海好辛苦架。


今晚個台擺得幾有趣套鼓打直放左邊,因為要就返兩隊外賓。居然會由AAW打頭陣,日本仔歌佬加鬼仔鼓佬noise rock duo,套鼓放埋邊就係俾歌佬有成個場發癲,玩keyboard仔行雷聲澎澎澎是過癮的(但玩得太少),同鼓佬用splash同cymbal代替兩個tom夠特別一roll有點電氣感,其實nu-metal band出碟鍾意最尾一首歌要玩到得好實驗迷迷離離,我覺得就係想做呢種感覺,如果nu-metal唔係咁潮咁空洞而玩得出同一種氣氛,我都會鍾意。整體好有條理諗過度過唔係乜都亂咁黎,所以好睇除左最後一首,臨尾首歌長得黎又有點唔順,再加有點造作,之前都幾架喇其實但起碼多返少少說服力先。


場show叫「Ken South Rock x 怒人 x AAW」,以為排名只為順口,原來實際都係噉排,反而估唔到怒人會出第二仲以為排頭。作為今場噪音搖滾香港代表 - 論音樂論意識,而家的確冇幾多隊本地樂隊可以更貼切用「噪音」形容,好多可以玩到好嘈好爆,但唔係鳩黎又點稱得上噪音?睇過怒人幾次今場係最喪之一,雖然仍然只得一枝結他(自己唔彈都搵多個session幫幫拖啦),但台風搭救今晚超好睇,同套鼓放台邊可以近距離睇到Tim叔手鼓有幾猛,以前睇/聽開佢打Peri M都唔覺點犀利(老實佢出Peri M時drum solo都打到收收埋埋),估唔到一夾怒人立即變成另一個人。當然唔少得台下大量囡囡,怒人show玩得拍得住佢咁癲果班從來係妹妹仔,識得歌詞會一齊唱又夠放,今晚《神屌人》最尾怒神上身,有條女大嗌「屌你快撚d啦!」笑到仆街。


同估唔到會玩返好舊的《守秩序》。其實怒人唔係只得EP同新出幾首,出第一隻碟前已經寫左好大堆歌,所以每場總有一兩首b-side,不過事實係EP前舊歌好多都唔算寫同編得好好,隻EP咁成功除左前無古人後無來者地喪,仲有寫歌真係進步左好多。只不過,都係未有《屌時代》,見今場有新bass佬,仲諗住會有新野聽。係咪要等到年中年底新碟release party先有得聽呀?


「條超緊身粉藍色牛仔褲加多對紅色波鞋,正面地講,係好鬼'80 metal十分old-school;事實就係,嘩屌都幾撚基!」


至於Ken South Rock...睇完非常明白點解會搵怒人揳中間AAW排第一,大家都係日本結佬歌佬加美國鼓佬玩noise rock,但完全兩個級數冇得比,當歌佬拎住枝木結他插成地effect拆聲拆到電結他咁恆再衝埋上套鼓度玩,發癲級數已經去到mathcore/noisecore境界,indie gig睇過幾年,冇邊隊喪得過Ken South Rock。歌又寫得好雖然玩亂始終以歌為本有紋有路有hook,同好明白choke的重要性,進而再多一份math味同「說服力」。如果兩隊性質咁似而排埋一齊前後出,AAW真係立即俾人比下去。


寫得有點求祈,因為展覽時期支力&忙,記一記就算 - 其實寫咁多只為搵個理由貼今場怒人個setlist出黎嗟,屋企返工都多事忙真係冇乜時間專心寫野,怒人個訪問下集本身諗住復活節前出街,但新年返黎一直踩而家做fair,下星期Evocation出新碟又有怒人,睇埋先再算,我目標係五月前出到怒人訪問下集(到時應該就會話「暑假前」架喇)。或者應該整多個特集,去研究一下而家香港indie gig一個比柒十柒個柒不思議加埋更神奇的現象:點解每次有怒人出場,無論係咩gig,都一定會超級地多(靚)女蒲頭?乜而家中產除左鍾意飲咖啡同睇法國戲,仲興聽粗口歌咩?