我冇乜聽過佢地ｄ歌架，係舍妹有佢地隻精選播過兩三首，但就係得咁多，只知道佢地係一隊好正之美式hard rock band。八點先開場，六點放工之後大把時間剩，就行去尖咀搭船兩個二過會展，仲平過巴士or地鐵Ｎ倍。雖然已經係慢慢躝過黎，到左仲要圍晒成座會展行成個圈先入去，但仍然後悔點解唔再晏ｄ先黎，賣到爆晒剩係入人都入左大半粒鐘，結果坐到八點十先有得開始，但已經算快，上次根屎剩係等都等左成個半鐘。

等幾耐冇緊要，最重要係玩得好唔好。可能因為冇乜期望噉黎睇佢地，結果係，出乎意料之外地好。個女主音完全唱得番CD水準，仲要全場都可以維持到狀態先難得，又好識得搞氣氛，班觀眾好投入又拍手又嗌又跳仲識得唱，我冇乜聽過佢地ｄ野都好high。全場演唱會頭半好正，後半ｄ歌都唔錯但冇上半咁投入，可能因為最"retro"果ｄ放晒頭，而我對老餅野始終岩feelｄ，後半ｄ歌較「傳統」相比下聽落唔多夠feel。最經典一段要數首本名曲"Lady Madonna"中段轉入STEPPENWOLF "Born To Be Wild"極正，台下班友又好似知發生咩事同識首歌先過癮，不過坦白講，如果台上隊band係紅到噉款，就算佢地係清唱《有隻雀仔跌落水》台下果班一樣當佢地神噉拜架啦。

全場兩個鐘四個字，抵睇，唔會覺得唔夠，只覺得剛剛好，而我睇過咁多演唱會最爆係今次，全個演講廳係坐無虛席坐足二三千人。不過有樣唔多滿意，就係冇大電視，之前兩次黎會展睇PPM同GnR唔爆足兼冇咁大個場都有，今次開晒全場兼爆滿反而唔整，我坐山腰位置已經係只見人形不見人樣，好唔滿意，既然穩賺就唔該做好ｄ啦。

總結：一Ｘ流。