My Chemical Romance:
The Black Parade



為左今晚,全個月節衣縮食。2007已經叫好多騷,點知2008仲勁,rock界第一壇就係現今最潮MCR。點解咁潮?因為

「emo!!!!!!」

關我咩事?

「劉Sir唔係淨係識聽metal咩?」

咪係囉!做乜扮野識聽emo去睇MY CHEMICAL ROMANCE?

「吹咩?扮專家得唔得先我而家?」


我愚見emo真正進入香港(或者話emo於香港開始潮),係MY CHEMICAL ROMANCE《I'm Not OK》。係咪(真係)emo?我唔識分(我淨係識聽metal架咋),但佢地「好CoF」的頭兩隻,自己唔多鍾意。06年《The Black Parade》突然轉晒style,係「emo聲」加hard rock加交響,歌詞講絕症病人回顧一生,音樂加故事夾埋變成「emo版《The Wall》」 - 雖然佢地變完已經唔多emo,我甚至唔覺得佢地可以算係emo(專家勿插,見人叫佢地emo我跟風咋)。係咪emo都與我無關,我只聽音樂,而《The Black Parade》除左後半未夠順全碟滿意,又睇到近幾年「潮band」紛紛轉型,你見MCR都無端端「放棄emo」調番轉玩art rock(少少)就知,唔知係咪連帶影響,跟住一年好多(潮)band都想做到「唔pop有深度」,好似AVENGED SEVENFOLD隻同名,俾我感覺好似想將自己「Black Parade化」,我都受但轉型唔太成功,同《City of Evil》實在太強,即使衰後半。跟住pop band、emo同metalcore會唔會向智慧型發展我唔知,眼前見到係MCR會黎香港,仲打正《The Black Parade》旗號tour,抱有一點期望/幻想,就買左平飛入場。為左扮emo,特登幾日冇洗頭有幾亂整幾亂、摷番小學套校服出黎著貪佢夠緊身、買左對烏蠅鏡、再黐左塊衛生巾上額頭,希望個裝扮唔會失禮人夠證明我都係emo友啦。

「有幫劉Sir影到相的朋友,見字請send番俾佢廣告天下,多謝。」


初時有點猶豫,因為地點係機場博覽館,遠同車錢係一個好大問題,來回已經三十加三個鐘車程,價錢同對於二日要返工黎講幾襟計。另外聲個個話唔好,今次第二次黎,第一次亞洲博覽館睇係NIN,佢地細廳出聲做得好,今次MCR係大hall,好定差入到去先知。六點放工,好在公司附近有站上E21直達博覽館(上次無聊到行出太子上車超戇居),等車等左近半個鐘,上到車再搖個半鐘,落車已經近八點。入冬睇騷最惡搞,尤其過黎博覽館,一落車空曠夾大風凍到流汗,但睇騷時多人又迫熱到結冰,褸呢家野著唔係唔著又唔係抽住又麻煩。個個趕頭趕命跑入場,我慢慢地躝,沿路仲有勁多人吹人煲煙,而我踩到入場一刻剛剛好熄燈開始,場外班友點解可以咁姿悠?或者因為佢地都知道,可以準時八點開始,一定唔會係主角出場。又係意料之外,有一隊馬來西亞nu-metal band POP SHUVIT做opening,以前唔興呢家野,而家場場騷都有warm up band,仲要係之前(好似)冇宣佈過,NIN我都係入到場先知原來有THE LOVESONG做opening,搞手有「進步」了,當然如果可以俾多一隊更好,反正主角永遠唔會早出場,中間半個幾一個鐘空檔,搵多隊玩好過大家企係度唔知做乜啦。隊野係band加DJ加MC組合,睇到都知好hip-hop果隻,台風得夠feel夠互動,但嫌歌同表演未夠力,加上我個人聽hip-hop冇問題但睇係好好好怕頂唔順yo yo check it out的「詼諧動作」,在場所有人好enjoy我就一般。睇完佢地真係好擔心。先講講個場咩情況。大細同九展地下展覽廳差唔多,全場分$780同$480兩個價位,個廳最後三份一封左,餘下三份二正中間一排鐵馬分開,平飛係後到soundboard之後,因為我搭正開場先入到去,一早俾人衝晒欄排到四五重人牆之後,基本上隔左成半個廳再幾排人擋住,全場騷七成時間睇人頭。音響集中晒台前,但器材推力唔夠,最前$780飛朋友可能睇得好開心,但$480飛完全祭晒旗,唔企最前睇已經難點知聽仲衰,opening band的永恆宿命:負責試聲,除左歌手同DJ聽得清其他冇乜時間分得清同經常轉balance,冇計。我都想詳細欣賞呢隊馬來西亞band玩成點。但不能也。



**********************************************************


玩左唔係好耐,四首歌加大量台詞,三個字POP SHUVIT就完左,跟住好遺憾係專家時間,估唔到由皆旺走到赤蠟角,都未能逃離專家魔掌。想知何謂潮物,回顧四周就知:入場除左外國人之外,絕大部份係靚仔靚妹兩者各佔一半,單香港人黎計,我已經屬於超齡份子。群埋佢地度,感慨時代真係唔同,我仲係佢地年紀時至叫做識少少BEYOND,每個月飯錢連零用錢夾埋$1000都唔知有冇,但而家d靚仔十三四歲已經

「梗係要聽MY CHEMICAL ROMANCE啦!佢地咁勁!」

「上次睇完LINKIN PARK,今晚又睇MCR,好貴呀,但兩隊我都咁鍾意,梗係要睇啦!」

但繼續聽佢地傾,好鍾意的兩隊,都係

「邊個send俾我聽架!你唔記得我都send過俾你咩?」

明白了。行過少少,係一班年紀較大的大學(畢業)生,當中一位男性同身邊一群妹妹仔討論學業,

「果時我報Kong U Archi,佢地收我架,不過我冇興趣讀,所以去左XXXXXX」

進而由成功人生去到淵博音樂:

「上次我去睇LINKIN PARKXXXXX」

自然換來一眾姐姐妹妹仔的仰慕及驚嘆。素來最怕裙腳仔觀音兵,睇見聽見都眼冤耳鳴,sound crew此時仲要咁蹻播PANTERA《Fucking Hostile》,應晒景,一面聽一面笑爆。又行過少少,撞到二男一女討論音樂。

「其實MY CHEMICAL ROMANCE玩乜架?」
「佢地咪係玩punk囉!你唔係噉都唔知丫嘛?」
「係咩?佢地係玩punk咩?」
「點解唔係呀?NIRVANA都係俾人話佢地係玩punk啦!」

好戲在後頭。討論左一輪,場內響起PINK FLOYD《Another Brick in the Wall》,高談闊論的三人(主要係兩男)狐疑曰:

「咦?呢首咩歌黎架?」

我笑了。再跟住一首係AC/DC,(理所當然地)冇晒聲出,直到AC/DC完埋到GUNS N' ROSES,有番聲氣:

「呢首咪《Welcome to the Jungle》囉!」

再努力地證明你睇佢真係識,旁觀者我忍笑忍得好辛苦。唔知係咪我超齡過頭所以融入唔到後生仔文化,但走左幾頭,都係面對以上幾個情況不住重演,真係好辛苦。同場加送在場觀眾「I Love MCR('s crew)」精彩表演。個四十五分鐘intermission,比全場表演更具娛樂性。


「大家明劉Sir點解溝唔到女啦?鬼叫佢唔係專家!抵死!」



**********************************************************


opening三個字、set up九個字,MCR真係搭正九點出場計得咁準,之前唔入黎果班係咪一早收到風知道晒?主角出場觀眾亦魚貫入場,POP SHUVIT時前半得四份一左右後半叫做有三份一,一到MCR,兩個半場都爆左超過一半甚至三份二以上,迫埋迫埋爆到半個hall應該過千人。基本上頭三個字係完全唔知做乜,因為只睇到更多人頭,同聲幾近冇大改善到,你有冇睇過演唱會聽唔到鼓聲?以前睇通常係鼓聲最清最出,今場調轉見到鼓佬打但鼓聲接近完全冇,全場最清楚係結他solo明顯刻意地推高,其他聽唔聽到真係祝你好運,要到過左好多首歌半個鐘後先叫做tune得較為靚聲,但只係「較為」,整體似企係演唱會場館外聽場內演出噉樣,d聲好似俾一重屏障隔一隔先再去到後半場,朦到你都唔多知玩緊乜,間中認得下,再間中一兩樣野彈得清俾你聽到(除左solo段段清到死,點解其他整唔到咁靚聲?),加上四百八同個台差幾十米再隔一排鐵馬,感受真係好似自己唔係置身場館內睇演唱會,只係間接地睇其他人(貴飛果班)睇MCR表演。去到後三份一唔知再較好左還是已經習慣左,叫做認到佢彈乜玩乜先。但單講音響,搞手好似只顧貴飛VIP,明知d喇叭唔夠力去場後照去,完全冇尊重過四百八飛區域感受,終於體驗到點解黎過博覽館大廳睇都小「聲唔得」。

「有讀市場學的朋友,從今次MCR演唱會兩個價位觀眾之安排中,可以睇到好多理論實證、學到好多野。」


講玩,演出流程亦唔多得我心。打住《The Black Parade Tour》名義,我就係預左上半場玩晒成隻新碟《The Black Parade》舞台劇版,下半場再玩其他歌,點知係雜錦歌演唱會,《The Black Parade》係差唔多成隻碟玩晒,但唔係我想睇之《The Wall》式歌劇演譯,甚至連宣傳重點骨頭衫都冇著。可能我遲左,如果佢地早一年黎先會噉表演法。講玩睇加聽得唔清楚,加上我唔算好識佢地d野最熟只係成日聽的新碟,評語只有話

「OK啦。」

當然快歌會開心過慢歌,但起碼冇乜我反感的歌曲或發言。最過癮係歌佬把聲超Axl Rose,玩快歌時十分GUNS N' ROSES feel,但非常唔穩定同扯唔到高音,所以一玩新歌就死:《The Black Parade》想玩art-rock格音域變化好大,但佢上唔到高音位,幾首新歌降晒key甚至改埋melody就自己把聲唱,立即遜色好多,尤其主題曲《Welcome to the Black Parade》,去到最後(理應)全場合唱之bridge,本身係激昂高音唱,但佢差唔多降八度唱出黎,嘩個氣勢爭好遠 - 當然仲有其他原因,會再討論。另外有時要玩到三枝結他最少兩枝lead,但得一個結他手會彈solo,又好多新歌一到技術位冇左好多野。音響同唱以外,全隊玩得好好又走又跳後來結他佬玩到訓地,睇真係唔錯架。全場最好係最後三個字,除左煙幕加逆光設計實在出色,仲係玩慢歌,一部鋼琴加歌佬唱完一首,再慢慢加其他樂器,因為少樂器爭聲,全場最靚聲就係近encore時段。但玩到最後先可以咁靚聲。希望搞手第時會顧番我地平飛觀眾感受,投資更多落音響針對後半場需要,而家噉樣分分鐘睇DVD都不如,覺得自己被搵左笨。

「好在NIN已經唔係現今潮物,所以上次黎香港只出細廳,因為佢地d野唔可以唔靚聲。」


初時諗住場騷大概一個鐘多少少左右,但完場睇睇錶成十點半,都有個半鐘算抵番d啦。滿唔滿意?你睇我一路寫落都知唔多滿意。假如你只為一睹明星偶像風采陪佢地焚下跳下,相信好值,因為佢地確係唔錯的live band場騷又夠長;但如果你似我真係黎聽歌睇騷,就會同理想中差很遠。我自己,未話好唔妥,總算叫做

「OK啦。」



**********************************************************


或者我真係去錯騷,所以難免又口痕得罪人。去過咁多騷,今場算係年齡層最低、「潮」取向最高,可能我真係太老,好多野我都唔明。睇完場騷,感覺香港人對rock show甚至band show之流程、睇法、投入方式未理解,好多野係非必然,但當連基本認識都缺乏就會出現問題。其實入場的咁多位,係咪都知道自己入場睇乜?第一隊band係馬來西亞POP SHUVIT,出場身邊聽到有人係

「MCR開始玩喇?好彩我入得切黎!」

POP SHUVIT玩緊時,又嗌又跳十分投入。三個字樂隊離台後,身邊傳出

「嘩!MCR好勁呀!」 or 「下?乜MY CHEMICAL ROMANCE玩完架拿?」

就算唔識、唔認得台上班人,一聽都應該認得出唔係MCR卦,假設你係聽過MCRd歌知佢地大概玩咩音樂先入場?


「令我諗番起睇SIGUR ROS時坐我前面果兩個阿叔。」


不過,會入場睇,已經好過好多POP SHUVIT表演時仲留係場外的朋友。另一個香港人睇騷特性係揀黎睇,一場騷係睇邊隊就只睇邊隊,其他band就算玩得好都唔會支持。

「都唔係MY CHEMICAL ROMANCE玩,做乜入去睇?」

所以你話你隊band叫咩名,比你隊band玩咩音樂玩得有幾好緊要幾多?


正常超過一隊樂隊表演之band show,一隊完左,第二隊上台之前一定會先搬好整好樂器試晒聲,先開始第二場表演,而主流樂隊中間間斷同準備時間半個鐘或以上係平常,除左台上準備,後台仲有「不知名原因」要等,好似GUNS N' ROSES果場等左個半鐘(算好架喇,睇外國GN'R show review等幾個鐘甚至近半日都試過)。但得意在台下一見到台上有人,係唔係都歡呼尖叫,尤其試結他試鼓試咪試燈有聲出有人影晃動的時候,台下反應更加是瘋狂,結果觀眾對MCR roadie的愛戴,更甚於opening act POP SHUVIT,但嗌完都唔知咩事同唔知自己嗌左俾咩人聽。睇落好好笑。其實當真正準備好晒臨開始表演,會場係會熄晒全場燈光通知你,見到冇晒燈先至慢慢嗌都未遲。


最多人做果樣,係影相。足全場果隻。熄晒燈之後,會場特意先黎一段雙語廣播,提醒大家「請尊重MY CHEMICAL ROMANCE,表演時切勿進行閃燈拍照。」身邊的二男一女(請refer番上面intermission),即時回應如下:

女:「唔俾影相喎!」
男:「梗係照影啦!去睇騷唔影相咪好戇鳩?」

噢。我好戇鳩。或者因為佢一句,在場任何人總之身上工具可以留倩影,有理冇理拎出黎係噉拍,工作人員起初有阻止後來都廢事理,實Q多定觀眾多?我到而家都仲未明,點解去睇騷唔影相就係好戇鳩。有趣地睇過唔少文獻,亦同外國朋友傾過偈,不約而同指出香港人有喜愛拍攝的民族習性,去旅行去玩去做野去考察行街見到有事去睇節目去睇表演乜都好,係唔係都拎部機出黎影低佢先,其他野影完相先算。外國朋友問:

「其實香港觀眾入場係睇演唱會,定係影明星相?」

正如好多演唱會後網上討論,話題離唔開「我影左幾多張相/影左乜野相」、「我企邊個位/企幾近隊band」、「我拎左乜乜紀念品」、「我有樂隊簽名」、「我掂到隊band邊個邊個」,真正講番表演同音樂之發言接近零,如果唔係零的話。香港人睇騷之意不在樂。只在「一睹風采」。


到樂隊表演,會跳會郁會投入好正常,但投入之餘,亦應睇番情況。POP SHUVIT有一首歌MC叫大家舉定手,一到chrous位立即跟住個beat玩浪,大家見到MC舉手自然一齊舉啦,但首歌一開始全部人已經係唔係都搖呀搖,完全達唔到樂隊預期效果。你捉個靚仔問佢,佢會答你

「我投入嘛!」

MCR上台,唱到主題曲時歌手提定各位

「你知幾時應該唱啦?」

一開始,全場合唱,正。但去到後面入交響段bridge、首歌其中一個高潮位,除左歌手降左八度把聲,全場粒聲都冇,但首歌論編曲論氣氛,其實歌手所指之「應該唱」係呢一首,點知最應該唱果段反而冇人唱到,建立唔到首歌應有之現場氣勢。好多band寫歌時會考量埋現場表演,諗定玩live時點樣同觀眾一齊玩,好似STRAPPING YOUNG LAD隻《SYL》歌詞入面所有verse或chrous全部合唱位特登bold晒,等你買左碟聽完歌做定功課之後,入到場知道幾時玩點樣玩。當然你可以話

「MCR隻碟冇講到明邊度唱!我又未識聽到知應該幾時先唱!」

但入場好多靚仔靚妹都係「send俾我」一代,我相信就算隻碟照SYL做法,靚仔靚妹都唔會知。你得首歌連隻碟都冇,又點會睇得到份「notes」?再者,真係俾到你,你會唔會有心花少少時間去睇呢,若只為「一睹風采」?


另一樣野,令我諗番起十幾年前四大天王時代。在場好多好多妹妹仔。而妹妹仔就係愛尖叫。每當台上玩緊慢歌(又或妹妹仔所愛的「lum歌」),應該係寧靜投入欣賞,但一到「lum歌時段」往往會出現好多妹妹仔尖叫聲,嘈住其他觀眾之餘,亦騷擾到台上樂隊。情況就好似去睇黎明演唱會,場內充斥「黎見Leon」的妹妹,係又嗌唔係又嗌。照計十幾年前靚妹係聽黎明,十幾年後今日靚妹改為聽外國band、聽rock聽metal聽emo、聽MCR,欣賞層面理應係向高。但點解在場女fans反應,同以前睇Leon妹妹完全冇分別?

「果真睇騷之意不在樂也。」


全場最high,首選新碟主題曲《Welcome to the Black Parade》,因為除左《I'm Not OK》,就係呢首令好多人認識到MCR,而全場演唱會,$480地段只有呢首歌觀眾會mosh。

「會mosh又有問題?」

冇。但點mosh法又係一個問題。mosh的地方,叫mosh pit,一場(hard) rock/metal/punk/hardcore band show(在香港,只限於punk及hardcore,此兩者方為皇道嘛),大家興起就會mosh,只睇唔mosh的觀眾自會靠邊,讓出場中空間成pit供mosh。但睇過咁多本地騷,冇幾可見到正正經經的mosh pit,好多時係部份「識野」人士一到行歌就任意全方位勁撞,總之見到身邊有人就撞埋去,甚至特別針對pit(有的話)邊緣無關人士或留意表演台而非mosh pit人士,總之盡量將mosh pit(有的話)擴大、盡量牽涉更多人唔理佢關唔關事mosh唔mosh、盡量令更多人留意到mosh pit(有的話)存在同自己有份mosh緊,從而話俾盡多人知

「我識mosh因為我識聽!」

結果,只係可笑。係識聽識mosh識音樂,自然會知道現場即興mosh pit位置大小,同唔應該打擾到無關/無辜旁觀者之不成文規定,同mosh pit係人讓出黎而唔係自己夾硬撞出黎,更加唔會視全個場為mosh pit。好多非band友去過band show每每表示印象負面,特別係有「行band」參加的主流show,就係因為好多「識mosh識聽」人士的熱情表演。


睇完演唱會,場內人數眾多、觀眾咁熱情,相信MCR同emo、rock會得到好多人賞識?會...卦。在場有個攤位有得買MCRd碟。就我見到,係接近冇人幫襯。因為好多人演唱會前已經買左/買齊?從身邊大量「send俾我/你」言論,相信唔會係。因為潮完。值演唱會時期前後,有幸同幾位「會睇騷」的樂迷傾過,俱表示會睇表演,但唔會買碟。

「佢地表演得咁好,你自己又鍾意,點解唔買隻碟支持?」
「佢地都離開香港啦!」

香港的band友/metal友都係向前看的。一隊band「好聽時期」,只限於有人講緊、會黎表演之時,會聽亦只限「send俾我」,當演唱會過左隊band走左就立即「唔好聽」,因為其他人講緊係另一隊、有另一隊黎緊,而「好聽」果隊就變成「另一隊」。所以可以見到在場好多靚仔靚妹表示「睇過LINKIN PARK」已經係好了不起,但當sound crew試音時播PINK FLOYD、AC/DC同PANTERA時會無動於衷,場騷完左之後已經可以轉投另一隊band懷抱,就知道現在香港新一代樂迷全部好有遠見。以前樂迷聽演唱會,係睇完之後對音樂產生興趣,正如好多你睇緊聽緊的band,都係由「睇過一場演唱會」(常見例子有DEEP PURPLE、IRON MAIDEN同METALLICA),而認真投入音樂同開始夾band,亦即一場演唱會帶黎一場革命。但你而家完全唔需要預期會有相同情況發生,因為「向前看」,好多人係唔會認真研究自己聽緊d乜,所以你對高叫「我聽emo」入場睇MCR的「樂迷」試試真正的emo如EMBRACE同RITES OF SPRING,佢地會小九你;道理就如好多人(話)聽death metal但只限於CoB之類melodic death,播真正的death metal俾佢聽,佢會話(完全)唔好聽一樣。



「似乎,我真係超齡入場。」