Mogwai Live in Hong Kong



Post-Rock野唔係聽好多,除左GODSPEED...之外,都只係聽得少少,呢隊「Post-Rock經典」更加剩係識個名,但係見既然黎香港玩場咪支持下同當試下。唔係自己聽開果瓣、未聽過佢地d歌、冇人陪自己一個去睇、仲要四百二一張飛成幾舊水咁多...咦?犯晒「香港『音樂人』睇騷指引」d戒條忝!

因為係不設劃位之關係,所以六點幾就去到九龍灣展貿排隊(阿Rain姐仲四點幾就到忝真痴線),果時仲冇乜人都排到頭二十之內架,一直到七點左右先開始多人,早知就唔同班友一齊癲咁早到要棟係度個半鐘啦(雖然冇乜所謂,反正都係同係屋企一樣焚下機睇下書,分別係由坐變做企)。七點十就入得場都幾準時,撕完飛第一件事係塞左成疊卡紙過黎,係Rockit2CLUB 8自然捲 NATURAL QIN LOVEELF FATIMA新碟預告,每場/隊一張即係一共五張,硬卡紙全彩印刷,ELF FATIMA果張仲要係麻質面。睇番我地TRHK,宣傳演唱會都只係得一張A4裁開兩份白底黑字公仔都冇之「單張」,更加唔使諗印乜野「彩色硬卡紙」去宣傳d樂隊喇(簽左成四五六七隊band都未有得宣傳過,都幾灰)。大公司係唔同d。個場坐到七百人左右,我排隊頭坐到第四行(都唔想坐太前,d聲實唔夠靚),個場爆左大半,搞手真係開心死。今晚之後下個月11/11同樣會展又搞多一場CLUB 8自然捲 NATURAL QIN LOVE,犀利。點解人地搞親騷都輕輕鬆鬆順順利利,係我地TRHK搞先笨笨七七硬硬膠膠?呢個故事教訓我地,香港玩metal,保證冇前途,起碼我暫時未聽過有一個入場睇MOGWAI之post-rock fan話「$420一張飛好貴」先。


ELF FATIMA
一開始已經全場人衝晒上台前,難得做opening之香港bandd人都肯噉做,好有氣氛。(大家記得六翼天使果場嘛?)上次「弦極聽典」第一次睇佢地玩,印象十分唔錯,今次玩d歌好似同果次差唔多。聲唔會講,因為做得opening band聲差同音響set唔好就預左,一時好似未開晒amp就玩好唔夠聲,一時結他爛過頭而bass出唔到,都幾心酸,因為佢地音樂真係唔差。開頭一兩首有點兒甩,到後段熱完身又較番好d聲之後,最後兩首instrumental真係好正。不過佢地硬係衰台風,係台上好似唔知應該點樣面對同應付觀眾噉。玩完最後一首之後由兩支結他谷爆狂feed之後全隊走左去,以為就係噉樣用feedback法去轉樂隊咁型同咁創新,點知原來唔係,跟住班友又走番出黎執番d架生,其實都幾樣衰。點都好,佢地年尾出新碟,記得支持。

MOGWAI
ELF FATIMA玩左半個鐘之後,再set一大輪野,九點二終於到主角出場。睇完ELF FATIMA玩都擔心,post-rockd野如果d聲唔夠靚同清真係玩唔出果種感覺,如果d聲仲係咁差的話就真係失望死。好在呢半個鐘setting冇白費到,佢地d聲做得真係好靚,而且要搞咁大輪setting都唔係冇原因,因為佢地首首歌都要換架生,就算係玩緊途中都要換結他甚至結他佬轉玩bass(即係同時兩支bass),的確係好複雜,而我最鍾意係個鼓聲協調得好好,好多時都係放到最後,唔會嘈過頭之餘亦唔會比三支結他+bass遮晒,但係個主結他佬反而好似嫌個kick太細聲。聲方面只得一個問題,就係balance差少少,好多時有結他"solo"時,個panel都唔推出d果支結他個聲,為一美中不足,但係除左呢樣之外,呢場騷的確係我睇過做聲做得最靚之一場。觀眾非常之正,每首歌彈出頭幾個音已經嗌晒拍晒手掌(仲要首首都係先好野),睇黎人人都非常熟悉佢地,全場得我呢個一首MOGWAI歌都未聽過之傻仔完全唔知發生咩事。隊band就更加唔使講,非常之合拍,全晚完全冇話甩、唔齊或者夾硬黎,專業就是專業,雖然亞洲band音樂水準係高,但論台上表現西方樂隊硬係較優勝。佢地玩左咁多首歌(又其實可能唔係好多首,因為大部份歌都係好長),其實每一首之旋律都較簡單同重重複性(但結構就十分複雜),但就係點聽都唔會悶先好野,全場個半鐘唔係好多跳或者un位,但係就係聽極都唔悶,Encore前尾二一首係我聽過最正post-rock歌曲(亦係全場反應最好之一首),從靜到嘈再到靜之間斷令我諗起OPETH。佢地d歌都好多野玩,歌佬把聲全落effect(全場歌佬先得三四首有唱),個主結他佬都玩effect玩到傻,但係比台前d人擋住晒睇唔到佢點玩,剩係睇到個bass彈法幾特別,用木結他彈法去彈bass,好多時都係用拇指。佢地d歌好「重」,但係呢種「重」唔同metal果種,metal果種重係好似一拳窩落你條仆街度噉款(最佳演繹大獎:PANTERA "Vulgar Display of Power"),post-rock果種重係好似比一大疊厚棉被笠住噉,而且因為有三支結他+bass or 雙結他雙bass之關係,做出黎果幅音牆係非常有壓迫感,用到雙bass果時個重低音係震到你有點想嘔。某程度上,我覺得post-rock果種重之「重」感覺係來得比metal更重。玩左好多首(定其實只係幾首?我都數唔清喇)之後,出黎再encore多兩首就散場,見樂隊係就係玩得好,但係好多時好似唔多想玩噉,正場玩完之後拜拜都唔多句立即放低所有野九秒九鬆人,出番黎encore之後最後一件一件噉走謝幕都冇,臨尾話有簽名會又取消埋,以為又係果d「藐視香港市場」之大牌band,問清楚先知原來之前佢地先係台灣表演,踩完台灣之後就飛過黎香港再踩一場所以先咁支力。最後佢地玩左個半鐘完場,非常滿足。


總結?好簡單:
「我睇過最正之一場live。$420,絕對值。」