2009年四月第二個星期，我去左九展睇演唱會。熟悉劉Sir的朋友梗會話，
「哦！你去睇metal show！」
希望我講你聽，日子唔係7/4而係8/4，我冇睇STUDIOFORCE而睇左林曉培，你唔會笑我啦。其實冇諗過睇，之前冇乜聽過林曉培，加上近來風雨連連，五月HIBRA香港演唱會大把野跟（決定左TMF2之後突然多左場1.5先大鑊），舖頭又多事發生，日頭份工撞著展覽更忙，一個禮拜前愚人節Sarah Brightman部署左好耐都要放棄。林曉培開show前幾日，好榮幸收到演唱會飛，平生從未睇一場免費show，BlackWIne唔使錢入場全因我係（扮）工作人員，今次到《紙談音樂》「出糧」，其實早於年半前08年一月，我篇「讀者來函」貼過堂，當時係MY CHEMICAL ROMANCE演唱會幾日前，我已經買左飛，先話有得送飛，喊晒。中間間斷寫過幾篇，四月頭「讀者投稿」又貼堂了，第33期有謝安琪《Yelling》！加上劉Sir已成為《紙談音樂》常任客串寫手，由第34期起多左個固定地盤《Kowloon Metal City》俾佢玩，送番份紀念品仔俾我唔算過份卦？這是我應得的！！！（講到自己都感動到喊，加多幾個感嘆號先）
「話時話，有冇謝安琪演唱會飛？我等緊你地下次『出糧』俾我架，騎騎∼」
有「糧」出，又遇著全個星期唯一得閒的星期三晚，多事多風多雨都好，決定放番晚假。地點是新興演唱會場地九展匯星 － 今場show前，我一直以為間野叫星匯 － 由九龍灣穿梭巴車站到會場入面，遇到大量身材高眺苗條個樣十足model的姐姐仔，是否台妹？真係勁多。再次證明玩metal冇前途。未黎過都聽好多人講過，星匯匯星唔好在位窄，原來用酒樓凳打橫一張連一張種排凳，難怪咁多人鬧，側邊個肥少少都迫死你，不過幾多人都影響唔到我，因為自己雄霸一排冇人埋到身，騎騎∼
睇過咁多流行演唱會，今場算坐得最近台，R行即離台十八行，走廊位視野清晰，睇冇問題，只關心聲得唔得？場show最特別開波樂隊已經輪流solo，第一次見呢種安排，介紹成員順便試聲，band solo加第一首歌全場聲已執靚晒。演唱會前對林曉培認識只得幾首名曲好似《煩》同《She Knows》，印象深在出道時正是台灣歌手開始在香港吃香時期，佢路線唔係流行之清新派而玩rock，仲有國語人唱廣東話的《娃娃愛天下》，香港人唱國語歌入大陸台灣市場成日見，台灣歌手唱番廣東歌打入香港？《娃娃愛天下》前我未見過（皆因見識少），更冇諗過台灣歌手廣東話可以咁好／呃得人。重唱《冷雨夜》又係個小小綽頭，不過最為香港人熟識，莫過於一年前交通意外，你知香港人好事唔會理醜事記成世。當我識得最「新」一首已經係十年前《娃娃愛天下》，入場前完全冇諗過場show會係點樣。原來，係我睇過其中一場最rock的流行秀。開場band solo見試聲卦，成隊band彈得好隨便冇乜心玩，失望諗住會流流地之際，一到真正夾歌兩回事勁到爆又多動作，而睇過咁多玩rock之流行show，今場個lead結他算最強一個，枝結他拆得夠靚仲要彈出黎粒粒清，加大把創意solo唔齋快齋衝而玩效果玩特別聲，較聲技術思維全部掂再加台型台風一流，就連後面推聲一班都專業，而我敢話佢係最好之一，正因特登推大佢支結他，都唔會聽到有拆或唔乾淨全部行雲流水。逢入solo明顯推大佢枝結他等你一定聽得到，仲連攝影師都影住有得大電視睇佢彈solo，冇多少本地演唱會會做 － 本地show只識推爆咪除歌手低音乜都唔清唔楚，同鏡頭永遠只對住歌手一個。結他佬實在太強太型了。絕對係華語流行樂壇最強session結他手之一。
喜出望外在冇預過歌手可以拍得住隊band咁rock，以前睇MV唔太覺，點知現場聽佢唱歌，強到嚇親，失驚冇神扯番野長高音尖叫又長氣加唔走音（除左第二首歌一處失誤相當明顯．．．），又唔係死恆要放輕都可以，最重要聽得到把聲入面有份心意，係咪真正用心唱歌大家聽得出呃唔到人，佢屬於有心得過份、好熱愛唱歌果種。開心在有好多第一次，好似第一次黎匯星、第一次認真認識林曉培，仲有第一次撞到SOLER。冇諗過我第一次睇佢地live係呢個情況，合唱一首葡萄牙文歌再唱自己新歌一首，新歌唔太突出，但聽SOLER往往吸引在二重唱，場show跟住一日就出新碟，要支持了。
主角抖完上番台，點知唱得嗌得仲勁過之前，頭三份一除左fans冇乜人有反應，過左一半已經炒到大半場high晒，現場氣氛十分高漲，就算我唔識佢幾多首歌，全場從頭享受到尾，況且意外地玩左好多cover，同過癮地成日爆廣東話。事前唔知佢咁玩得咁真性情，每唱幾首歌就會講好多野，比起好多同期台灣女歌手，在港知名度佢算頗低，加上上年醉駕撞車咁大件事，黎到香港自然大把野講，無聊搞笑唔止台下觀眾連隊band都玩埋一份，亦有正經分享音樂同生活，感觸傷心聲淚俱下場面唔少，最鍾意佢將cover歌結合感受分享，選唱人地歌唔止為唱多幾首歌咁簡單，而真正為唱出自己內心所想，葉世榮在場自然唱《冷雨夜》，木結他彈唱廣東話《遙望》最意外。《假如》國語版同《漫步人生路》都唱埋，好少見非「高檔」流行歌手現場會唱咁多cover同選曲咁古式，但做到同自己歌間比例恰到好處，加上能用選曲代表自己心聲，已顯非常有心。
唱完最後一首歌，成隊band自己勁solo，唔知特登安排定隊band走火入魔？通常呢ｄ時間隊band玩分幾鐘就會收檔入後台，我未睇過有一場本地pop show，歌手返後台之後，隊band可以自己jam足成個字唔肯停，仲要越玩越激果隻，起初個個好正常係鼓手死爆唔停，跟住結他手見佢唔停手又啡埋一份，開場試聲段求祈solo根本冇得比，我睇到好high因為結他手較聲同技術可遇不可求自然珍惜，可以連續solo大半個字仲有貨喎幾多結他手即興得出呀！F.I.R.機博演唱會隊band玩到SCAR SYMMETRY噉我以為已經好勁，估唔到還有山高，不過場內明顯好多人唔知做緊乜以為完場走人。好在觀眾鼓譟前夕主角再度出場，同大家講「冇encore」明顯玩野，黎香港唔唱《娃娃看天下》你敢走人？唱完兩首cover再加呢首重頭曲，先正式完場。
「我成日覺得撞正林曉培黎香港開演唱會，先有人摷番十幾年前『娃娃毒』條片出黎，係別有用心的市場策略。」
或者為等大家由九龍灣過黎卦？張飛寫八點三，結果遲半個幾鐘先開始，好在冇趕收場玩左差唔多三個鐘，抵到爛，最緊要嗌足全場冇走音冇失聲，而且越後唱得越勁完全冇疲態，有幾多歌手做到？講番自己98年出道，過左十一年，計番出道時廿幾，而家已經三十幾歲，仲可以咁rock狀態咁好加練到廣東話夠香港人收貨，不過場演唱會好睇，唔單唱好歌得三個鐘超值，而係氣氛同感情。明顯感受到歌手每句歌聲說話通通發自內心非常真摯，同其他人交流多除左觀眾台上樂隊都唔係當session彈完就算，得人歡心全因夠真。香港歌手正欠缺呢份真，唔止講緊個樣，仲有人品性格，有幾多香港歌手你覺得佢講野做野同埋個人唔係扮出黎、唔係人前人後兩個樣？香港藝人出晒名虛偽，本地歌手我只諗到一個王菀之可以用真去形容，不過真又點？你會發現在香港越真者越冇人理。大家咁鍾意台灣歌手，好似林曉培、陳綺貞，音樂之外，正因意識上已厭惡左虛偽。我未睇過有一個現代香港歌手，可以感動到台下大班上年紀男性成班肥佬企起身拍住手跟住唱。林曉培做得到。
亦如以往，每每睇過外來歌手演出，必會問番既大家可以咁接受一個風格別於本地之外地歌手，點解本地歌手做唔到？其實係本地歌手錯，定樂迷自己錯？廣東話所限，好搖滾rock歌手難尋，有都難出道，可以睇番同林曉培差唔多時期出道的盧巧音，已經唔見左人，歌迷非少，但大多係想聽《好心分手》，而唔係《天演論》或BLACK & BLUE。新一代有李卓庭，更加唔使講啦，分分鐘個名你都未必聽過，即使已經出左兩隻碟。就算你唱得到，班底又肯寫rock歌，你一玩，見你係香港歌手，唔理你玩得好唔好，立即話你抄外國先。香港音樂發展一直停滯不前就因為噉，冇時鬧點解冇人做，有時又話人地抄，外來歌手做同一樣野就乜都係好，好難怪香港創作人寫歌從來唔能夠用盡全部才華，正是為遷就佔大多數之排己媚外歌迷。另一個外國歌永遠好聽過香港歌之原因，就如F.I.R.時提過，外地大型演唱會常見，加上歌迷真係為聽歌，寫歌往往arena向，屋企聽得，去現場睇更大享受，就算原版唔改動直接搬上舞台，音樂性娛樂性依然足夠。但香港流行曲發揮場地局限於K房，自己一個人對住一部電視幾個朋友咁大把，音樂性已經冇晒，既首歌一出黎已犧牲左音樂，只餘簡陋旋律俾你跟住唱，無論CD機播定紅館表演，能夠有幾好聽呢？老實講，歌真係好聽的話，而家香港歌手ｄ演唱會，有冇需要將賣點轉移到舞台有幾大、ｄ衫有幾花巧有幾貴，擺明包裝凌駕歌手／音樂，而忽視歌曲本身？
場內二千幾個位，八點九打後開場時入左大半，相信應該過二千人，當然有幾多真係買飛入場同為林曉培就要再諗諗。好坦白，同而家香港人講林曉培，「咁out」同「唔岩聽」係最常聽到回應，我親身試驗過，佢而家黎香港好難對新一代有足夠叫座力。我咁路人甲都夠飛幫自己整個VIP位，相信手持免費飛人士為數不會少，而場內可以見到好多「超齡」男女，年齡層分佈極廣，可見免費飛或平飛情況嚴重。開場冇耐已開始有人走，我前幾行有個西裝骨骨阿伯，第二首歌入場，第三首歌半分鐘唔夠已經走，十首歌未夠已經對人來人往見怪不怪，過左半場前面直頭空曠到我可以可以訓係度睇。最活躍者是各位娛樂記者，雖然我拎最貴飛，個位都被編到欄杆後，每次歌手換衫、講野、感動位，立即成班記者十幾人衝上欄杆前長蛇陣係噉影相擋住後面，次次都要實Ｑ出面趕人。做娛記搵食真辛苦。不過當有時娛記比觀眾更好反應，都咪話唔驚。全場主力，就係靠班非常死忠歌迷，話晒十一年喇。從來睇流行演唱會最感慨，係永遠唔明點解一班靚仔靚妹fans，能比鄙視他們的獨立樂迷更能熱心投入、更接近獨立精神。
「話時話，演唱會主題其實係Hold定Behold呢？好似主辦單位自己都搞錯左？」