同上次MOGWAI一樣又係白撞上去睇騷，唔同在SIGUR ROS起碼叫做聽過下先入場。MOGWAI果場係全無準備噉去睇，睇完覺得表演至音樂至音響都係無懈可擊，但SIGUR ROS就算真係乜都未聽過噉入場，相信都唔會咁大震撼，因為post-rock呢家野對我黎講都幾極端下，實在太多band唔同style，所以一隊鍾意另一隊可以冇乜感覺，有ｄ真係一聽已經愛到狂追，好似GODSPEED同MOGWAI；亦有一ｄ人人都話好正點正但聽極都冇乜feel，好似EXPLOSION IN THE SKY，同SIGUR ROS。場騷確係好正但睇完唔太鍾意仲有其他因素，睇落去就知。個場超超大仲要爆左八成幾，睇黎搞手今次有所斬獲。我算係最早入場果批，所以見到好多識人，有punk友、有hardcore友、有metal友，自己友又有，好似係觸執毛的一班人坐係我隔籬。見到咁多人，但當然冇人見到我，劉Sir呢ｄ小腳色一向咁低調又唔係咩明星，行街撞到都認唔出啦，何況呢ｄ地方？
AMINA
唔使問我，呢場騷我連主角都唔識，opening act更加唔會知咩料。據聞係SIGUR ROS指定開場單位，女子四人組合玩一些好古典的東西，唔用樂隊呢個詞係因為成隊band接近冇用過band樂隊，而係用一部電腦加多其他好多電子同古典樂器，四個人係不斷走黎走去換樂器噉玩法，當連拉鋸都出埋（呢樣野第一次見有外國人玩），仲有咩唔滿意？有。聲無可避免地唔多得（開場樂隊好似經常被淪為試聲單位），好多時ｄ樂器特別係真樂器加電子樂器一齊果時都炒埋一碟噉，不過成日聽唔清楚都唔係呢個原因，而係因為附近前後左右差唔多個個都唔係睇，而係傾偈。左邊一pair右邊一pair後面一堆鬼仔鬼妹，前面仲有兩個阿叔以超大聲討論古典音樂同hi-fi，搞到好係入左間唱堂Ｋ酒廊，頭半差唔多完全聽唔到。睇，都唔係好得好多，個台九里遠又唔加高地台其一啦，坐得後比前面ｄ人遮晒其二啦，仲有香港演唱會特別現象：永遠係開左場先入場。門口明明超多人，但未開波都唔會入個場仲係少人，一開場立即成村衝入黎，開始左之後一個鐘都仲不斷有人行過，好有睇人頭版老翻VCDfeel。仲有一個大問題：好閃。又係一個好有趣的香港現唱會現象，人人都係影相多過聽歌睇騷，坐低第一件事就係拎部相機出黎影影影影影影．．．影唔係問題，不過當成個場黑晒之時係正我側邊或者後面開閃光燈仲要係好似記者影明星噉連續不斷地閃果隻，真係瞌埋眼都日頭咁光對眼想開都開唔到，直頭唔使睇騷。後半叫做好ｄ，但叫做睇同聽得清楚ｄ果時，玩左陣就玩完。所以冇乜野講，除左一心睇rock點知開場係隊古典野有ｄ意外，都幾好聽幾好睇，用埋拉鋸呢野確係好特別。聽聞有隻EP但買唔到，如果今場live四首歌就係EP四首，就確係有ｄ遺憾，因為我覺得聽碟佢地ｄ野會更加有感覺，呢次演出就係太多因素影響對佢地之印象。此乃opening act的悲哀。
SIGUR ROS
主角出場，終於冇人傾偈，實Ｑ大力阻止下亦冇乜人影相，終於可以留心睇同聽（做opening act真悲哀，成日都得唔到尊重）。我寧願佢地成場唔拉開個幕。一開始拉埋白布幕淨係用大燈投影個人影落幕度，再用projector播visual，視覺效果一流，但一首之後到最後一首先再拉埋個幕，我寧願佢地成場唔拉開個幕。除此之外SIGUR ROS確係好特別，首先結他佬把好英倫唱hymn款假音好正（雖然推聲果個成日整到爆咪），用琴弓拉結他而唔彈結他，呢兩樣聲已經殺晒。而且隊band出騷果時唔止得四個人，而係加埋AMINA四個人，即係八個人，又係不斷走位換樂器，亦因為咁多人，弦樂部份唔使用keyboard，唱片入面一首歌當中咁多唔聲音效live都可以完全做番出黎唔使用synth或者播帶，難怪係御用開場樂隊，根本就係SIGUR ROS一部份，冇左佢地會失色好多。雖然係似番MOGWAI果類，但之前屋企聽佢地ｄ歌都唔算太有feel，黎到live感覺同視覺都好正（依然係果句：我寧願佢地成場唔拉開個幕），但真係唔算我杯茶。或者因為MOGWAIｄ野「bandｄ」？又或者MOGWAI個場細ｄ聲焗ｄ感覺好ｄ同唔會成日爆咪？（雖然我都知SIGUR ROS出名過MOGWAI，但兩場騷人數差距都唔使勁到要用倍去計卦？）氣氛係好正，但對我黎講睇正過聽，相信我都係同佢地無緣。甚至覺得我會鍾意AMINA多過SIGUR ROS。（講係噉講不過碟又照買，灰）
八點三準時開始十一點半先完，超抵睇，非常抵睇。但唔知點解，SIGUR ROS開場冇耐已經不斷有人走，好似前面AMINA果陣以十分pro的古典音樂知識＆音響研究經驗高談闊論台上表現果兩位阿叔，睇左兩首就走左人。未夠半個鐘已經不斷地有人走，一直走到encore前未停過。好有趣。諗起一個外國metal網主的笑話：
「見過有位ＸＸ（香港形容方法係「MK仔」）周圍同人講『STRAPPING YOUNG LAD隻"City"好Ｘ勁好Ｘ正！有乜理由唔聽佢地呀？』之後有一日佢自己終於去HMV買左隻返屋企，一播立即受傷，無論生理上還是心理上。」