其實今晚414 SIU2《聲遊者》發佈會，都唔使點樣寫，因為有關音樂半年前「超聲速漫遊」都講晒，實質有點兒中伏，因為冇諗到性質近座談會多過音樂會，心諗最少都會玩晒成隻新碟嘛，點知一個鐘講多過彈，搞到最後主持姐姐問有咩想問，真係好想搶枝咪大嗌

「下今晚乜玩得咁少歌？新碟主題曲都唔玩？？唔Ｘ係卦？？？」

而聽碟同現場感覺，差左一截，或者因為新碟如所言遲左半年出，而對《聲遊者》曲目最先認識係上場音樂會，當晚演出實在太爆音樂音量都係，聽慣重口味自然非常滿意，但CD版始終唔會即興同mix得好有爆炸力，當伍Sir都提到有觀眾反映前兩隻碟已經「太嘈」，明白好多野只可以留待現場盡情抒發。一向覺得第一隻碟問題在於太隨意，進展到而家第三隻碟，比從前少左份fusion/jam感覺而更以歌為本，每首歌採一國風情配合專輯概念，今次以旅遊作為創作主題或者可視為一張概念專輯，我自己幾鍾意呢種音樂同構思路向，希望下一隻碟會再有新玩意繼續發癲，畢竟，SIU2可能係而家香港碩果僅存之progressive rock band。

雖然場「release party」講多過彈玩得幾首歌中左伏，但最大收獲係買到第一代SIU隻碟。跨代成員只有大佬賢少同bass細威，不過風格同SIU2第一隻碟一致，我覺得比即興意味甚／太重的《開門》好，音樂同錄音都係。最正當然係細威啦，SIU1隻碟同SIU2頭兩隻，其中一個大賣點就係bass，而第一代鼓手同佢配合得多，比二代時有更多火花。

望望隻碟，原來2005年出已經差唔多十年前，網站仲要係用已經R.I.P.的Geocities，真係究極地old-school。