弦極聽典The Carnival



五十五蚊張飛,九隊band,仲有隻七首歌demo CDR送,抵到爛啦。


ELF FATIMA
以前聽佢地dgothic rock野所以今次都係本住聽gothic之心態黎朝拜,點知變左做post rock,不過冇乜所謂一樣鍾意,而且玩得都唔差。係女主音好似唔太識同於適當時候用適當方法搞氣氛...

COXA
官方話係alternative,似gothic metal,隻demo CDR果首就似industrial metal。都幾"alternative"。佢地玩d野我就唔太岩口味所以不予置評,不過demo果首我就幾鍾意,如果佢地係玩demo果種的話相信會幾正下。

CURLING FOR THEM
事先聲明,個人係唔多鍾意post punk/gothic rock野。不過我不得不承認,呢隊post punk band玩得真係十分十分之好。一般黎講我會覺得音樂好悶同唔多鍾意歌佬果種唱法,不過今次兩樣都冇。我甚至覺得全場玩得最好就係佢地(出自我口都幾有趣架)。或者睇live同聽始終係有分別。(知唔知呀成日淨係識話「我唔會聽XXX」唔去睇騷班人!永遠唔識調番轉諗!)

DARK VAMPIRE
Symphonic black metal,同之前Live House果次一樣,又係主音&鼓>bass>結他。不過keyboard好多時都聽唔到or唔出所以聽起黎恆左,今次感覺幾好,但係歌佬好似轉左唱法喎唱得唔夠「行」同「狠」,鼓個snare隻聲亦唔多出,特別係blastbeat時更係聽唔到。Demo果首應該係今次第一首歌,錄音比上次《死夜》果首好,係唔夠齊。總體黎講,幾好。

M-BOMB
官方話係pop rock,我覺得似nu-metal多d。玩三首歌...卦,因為一開始就冇停直玩到最尾,就噉聽好似係三首歌黎,不過我覺得一般左d,而且噉樣一次過三首唔停真係唔知應該點聽。

BLACKWINE
Progressive metal,都唔需要多介紹啦。仍然係咁穩打穩紮,歌佬今次唱得幾好係有時去到太盡咬字唔夠清,而且整體台風好過以前。表演同音樂都冇咩唔好架喇我覺得佢地d新歌比《追夢》果時更有水準,只係差在一樣野:音響。全部私伙架生都超靚,不過全部結他好似得台聲台下喇叭冇駁噉搞到好薄。但係總括黎講都係唔錯啦。

CLOUDY
官方話係darkwave,我就唔知&懶分總之gothic果d啦。玩得唔係差我亦有少少enjoy,不過始終唔係我非常鍾意&識聽果種,所以又係不予置評。只有話「給了一個不太愛聽後崩和歌德音樂的人正面的感覺。」玩到最後果首得drum loop冇鼓個鼓佬打完之前果首立即執野走人,睇台上之反應好似個鼓佬玩到唔想玩臨陣脫逃噉款笑爆哈哈哈。

JETHouse
「英倫、低調」,後者唔多覺,前者就好明顯。印象唔太清楚喇,只記得唔太對口味。最記得係個鼓手,佢手鼓同力水我都好鍾意,衰在最後越打越躁結果臨尾淨係聽到鼓聲其他乜都聽唔到。

D-HEAD
官方話係alternative,綜合睇過佢地人士意見係「唔知玩乜」,到我睇完之後,我係極力支持後者。一上台先jam首funk,第一首lounge,第二首pub rock,第三首alternative rock,第四首英倫,第五首似gothic野仲有死腔忝,demo果首係低調野。算係咩?"Alternative"卦...或者叫「一隊多元化的流行搖滾樂團」囉。某幾首唔錯只有話(我鍾意第一同第四),台風同作風就唔太鍾意。


$55蚊,四個鐘長,九隊band(仲差唔多隊隊都明星),又每隊都唔同風格(岩我呢d鍾意睇騷識新band人士,某d人會話「太雜」),仲有demo送,最難得係唔似其他好多band show每隊set野都一陣搞掂(開頭幾驚每隊玩三個字set三個字)。要彈的話,音響唔會彈(做得好好架我覺得,始終呢d騷你預期可以拎幾多錢出黎做聲丫),係遲左成八個字開場,燈光都唔係做得太好。唔係話唔夠閃爍唔夠花巧唔夠多燈我亦唔太睇重呢d,而係台右邊盞射燈係長開,搞到企係台左睇(例如我)係十分辛苦。呢場騷算搞得十分成功,等緊下一次。